ಕೊಂಕ್ಣೆಚಾ ವಿಂಚ್ಣಾರ್ ಸಾಹಿತ್ಯಾಚೊ ಕೊನ್ಸೊ - ’ದಾಯ್ಜ್’ - ಫಕತ್ತ್ ಕೊಂಕಣಿ ಥಾವ್ನ್, ಕೊಂಕಣಿ ಪರ್ಯಾಂತ್, ಕೊಂಕಣಿ ಖಾತಿರ್.
ಸಯ್ರಿಕ್ ಜಾಯ್!?
[ವಿಡಂಬನ್]
ಮೆಲ್ವಿನ್ ಪೆರ್ನಾಲ್
ಮುರ್ನಾಳ್ ಫಿರ್ಗಜಿಚ್ಯಾ ಸೊರ್ನಾಡ್ ವಾಡ್ಯಾಚ್ಯಾ ಇಂತ್ರು ಕಾಮ್ತಿಚ್ಯಾ ಪುತಾಕ್ ಗುಸ್ತಿನಾಕ್ ಏಕ್ ಬರಿಶಿ ಸೈರಿಕ್ ಜಾಯ್. ತೆಂಕ್ಡೆಬರಿಂ ಲಾಂಬಾಯ್ ನಾತ್ಲ್ಲೆಂ; ಹಸ್ತಿಬರಿ ಮೊಟಾಯ್ ನಾತ್ಲ್ಲೆಂ, ಸುರ್ಯಾಪರಿಂ ಗೊರೆಂ ಆಸ್ಚೆಂ; ಸುಣ್ಯಾಪಿಲಾಬರಿ ಪುಡ್ಪುಡಿತ್ ಆಸ್ಚೆಂ ಗುಣೇಸ್ತ್ ಚೆಡುಂ ಜಾಯ್ ಮ್ಹಣ್ ತಾಕಾ ಜಬ್ಬೊರ್ ಆಶಾ... ಕಿತೆಂ ಕರ್ಯಾಂ ಆಮ್ಚ್ಯಾ ಶತದಡ್ಡ ‘ನಾಕಾಣೆ’ ಗುಸ್ತಿನಾಕ್ ಸೈರಿಕ್ಚ್ ಘಡ್ಲಿನಾ. ಚವ್ತೆ ಕ್ಲಾಸಿಂತ್ ಚಾರ್ ಪಾವ್ಟಿಂ ‘ಡುಮ್ಕಿ’ ಘಾಲ್ನ್ ಇಸ್ಕೊಲಾ ಥಾವ್ನ್ ಮಾಯಾಗ್ ಜಾಲ್ಲೊ ಗುಸ್ತಿನ್, ತೆಣೆಂ ಹೆಣೆಂ ವಿಂಚುನ್ ಖಾವ್ನ್ ಬಾಪಾಯ್ಚ್ಯಾ ಗುಸ್ತಾರ್ ವಾಡ್ಲ್ಲೊ. ಮಾಲ್ಘಡ್ಯಾಂಚಿ ದರಬಸ್ತ್ ಆಸ್ತ್ ಖರ್ಗುಂಕ್ಚ್ ಜಲ್ಮಾಲ್ಲ್ಯಾಪರಿಂ ತೊ ಜಿಯೆತಾಲೊ. ಪತ್ರಾಂನಿ ಜಾಹೀರಾತಾಂ; ಸೈರಿಕೆಚ್ಯಾ ಮಾಲ್ಯಾಂಕ್ ಹಜಾರಾಂನಿ ದುಡು ಯೆಟ್ಲ್ಯಾರೀ ಪಸಂದೆಚಿ ಸೈರಿಕ್ ಮಾತ್ರ್ ವೊಂಬಾಲಿನಾ.
‘ಸೈರಿಕೊ ಸರ್ಗಾರ್ ಘಡ್ತಾತ್ ಖೈಂ; ಎಕಾ ಚೆಡ್ಯಾಕ್ ಸಾಡೆಸಾತ್ ಚೆಡ್ವಾಂ ಖೈಂ...! ತರ್ ಮ್ಹಾಕಾ ಹಾಂಗಾ ಕಾಜಾರಾಚಿ ಪ್ರಾಯ್ ಉತ್ರೊನ್ ಆಯ್ಲಿ, ಮ್ಹಜ್ಯಾ ‘ನಶೀಬಾಂತ್ಲೆಂ ಚೆಡುಂ’ಖೈಂ ಆಸಾ ಮಾಷ್ಟ್ರಾಮಾ?, ಸಕಾಳಿ೦ಚ್ಯಾ ಫರಾ ಗುಸ್ತಿನ್ ಮ್ಹಜ್ಯಾ ಕುಡಾ ಭಿತರ್ ರಿಗೊನ್ ಅಸೊಯ್ ಕಾನ್ ಚಾಬಾತ್ ಮ್ಹಣ್ ಹಾಂವೆಂ ಲೆಕುಂಕ್ ನಾತ್ಲ್ಲೆಂ. ‘ತುಕಾಯ್ ಏಕ್ ಮೆಳ್ತಾಲೆಂ ಸಾಯ್ಬಾ, ತಾಕಾ ಖೈಂ ಪ್ರಾಯ್ ಭರೊಂಕ್ ನಾ ಆಸ್ತೆಲಿ’ - ಮ್ಹಣ್ ತಮಾಶೆಚೆಂ ಉತಾರ್ ಉಲಯ್ಲೆಂ ತರ್ ಆಜ್ ಮ್ಹಾಕಾ ಹೊ ಹಾಚ್ಯಾ ಘರಾ ಥಾವ್ನ್ ಭಾಯ್ರ್ ಘಾಲುಂಕ್ ಆಸಾ. ಹಾಂವ್ ಪ್ಶುಲ್ಯಾ ಗಾಂವ್ಚೊ, ಹ್ಯಾ ಗಾಂವ್ಚ್ಯಾ ಸರ್ಕಾರಿ ಇಸ್ಕೊಲಾಂತ್ ಕನ್ನಡ ಶಿಕಂವ್ಚೊ ಮಾಷ್ಟ್ರ್. ಗುಸ್ತಿನಾಗೆರ್ ಭಾಡ್ಯಾಕ್ ರಾವ್ತಾಂ. ರಾತ್ಭರ್ ನೀದ್ ನಾಸ್ತಾಂ; ಅರ್ಧಿ ಬಾಟ್ಲಿ ರಮ್ - ಉದಾಕ್ ಭರ್ಶಿನಾಸ್ತಾಂ ಪಿಯೆಲ್ಲ್ಯಾ ಪಿಂವ್ಡ್ಯಾಬರಿ ದೊಳೆ ತಾಂಬ್ಡೆ ಕರ್ನ್ ಗುಸ್ತಿನ್ ಮ್ಹಜ್ಯಾ ಮುಕಾರ್ ಉಭೊ ರಾವ್ತಾನಾ; ಮ್ಹಜ್ಯಾ ಜಿಬೆರ್ ಉತ್ರಾಂ ಸುಟ್ಲಿನಾಂತ್.
‘ಕಿತೆಂಯ್ ಜಾಂವ್ ಮಾಷ್ಟ್ರಾಮಾ, ಆನಿ ತುಮಿಂಚ್ ಮ್ಹಾಕಾ ಸೈರಿಕ್ ಪಳಯ್ಜೆ. ಹ್ಯಾ ವರ್ಸಾ ಕಾಜಾರ್ ಜಾಲೆಂನಾ ತರ್ ಹಾಂವ್ ಮಾಗಿರ್ ಕಾಜಾರ್ಚ್ ಜಾಯ್ನಾ; ಅಂಕ್ವಾರ್ಚ್ ರಾವ್ತಾಂ, ಗುಸ್ತಿನಾಚೆಂ ರುದಾನ್ ಆಕಾಸಾಕ್ ಪಾವ್ಲೆಂ. ‘ಹಾಣಿಂ ಕಾಜಾರ್ ಜಾಯ್ನಾಂ ಜಾಲ್ಯಾರ್ ಮ್ಹಜ್ಯಾ ಬಾಪಾಯ್ಚೆಂ ಕಿತೆಂ ವೆತಾ?’ಮತಿಭಿತರ್ಚ್ ಚಿಂತ್ಲೆಂ ತರೀ ಉಗ್ತ್ಯಾನ್ ಸಾಂಗೊಂಕ್ ಧಯ್ರ್ ಪಾವ್ಲೆಂನಾ. ಹ್ಯಾ ವರ್ಸಾಂತ್ ಆನಿ ಉರ್ಲಾ ಏಕ್ ಮಹಿನೊ. ಪಾದ್ರ್ಯಾಬ್ ಖರಾರ್ ಜಾವ್ನ್ ತೀನ್ ಮಹಿನೆ ಜಾಲ್ಲ್ಯಾ ಶಿವಾಯ್ ರೆಸ್ಪೆರ್ ಕರುಂಕ್ ಜಾಯ್ನಾ ಮ್ಹಣ್ತಾ. ಹೊ ತಾಚಿ ಖೆಳ್ಕುಳಾಂ ಕರ್ತಾ...?
‘ಪಳೆಯಾಂ, ತುಂ ಹಾಂಗಾ ಯೇ, ಬಸ್ ಪಯ್ಲೆಂ; ಬಸೊನ್ ಉಲವ್ಯಾಂ’- ಹಾಂವೆಂ ವಿಷಯ್ ಬದ್ಲುಂಕ್ ಪ್ರೇತನ್ ಕೆಲೆಂ. ‘ಮಾಷ್ಟ್ರಾಮಾ, ದೇವ್ ಕಶೆಂಯ್ ಆಮ್ಚ್ಯಾ ನಶೀಬಾಂತ್ ಏಕ್ ಚೆಡುಂ ರಚ್ತಾ. ತರ್ ವೆಳಾರ್ ಆಮ್ಕಾಂ ಕಳಯ್ಲ್ಯಾರ್ ಕಿತೆಂ? ಹೆಂ ಹಜಾರ್ ಗಾಂವ್ ಭಂವೊನ್ ಹಜಾರ್ ಚೆಡ್ವಾಂಕ್ ಪರೀಕ್ಷಾ ಕರ್ಚಿ ಗತ್ಚ್ ಉದೆತಿನಾ; ಎಕೇಕ್ ಪಾವ್ಟಿಂ ತ್ಯಾ ದೆವಾಚೊಯ್ ಮ್ಹಾಕಾ ಸಂತಾಪ್ ಯೆತಾ. ಗುಸ್ತಿನಾಚೊ ರಾಗ್ ದೆವಾ ಖುಶಿನ್ ಘುಂವ್ಲ್ಲೊ ಪಳೆವ್ನ್ ಭಿತರ್ಲ್ಯಾ ಭಿತರ್ ಸಂತೊಸ್ ಪಾವ್ಲೊಂ. ತರೀ; ಮ್ಹಾಕಾ ಕಿತೆಂ ತರೀ ಹೊ ಹಾಡ್ನ್ ಆಯ್ಲಾ ಮ್ಹಳ್ಳೊ ದುಬಾವ್ ಧೊಸಿಲಾಗ್ಲೊ. ‘ಖೈಂಚಾಕೀ ತಿ ವೇಳ್ಘಡಿ ಯೇಜಾಯ್ನೇ ಗುಸ್ತಿನಾ; ತೊ ವೇಳ್ ಯೆತಾನಾ ‘ತೆಂ’ಆಪಾಪಿಂ ಮೆಳ್ತಾ, ತುಂ ಚಿಂತಾ ಕರಿನಾಕಾ.
‘ನಾ ಮಾಷ್ಟ್ರಾಮಾ... ತೆಂ ಪೂರಾ ಜಾಯ್ನಾ. ತುಮಿ ಇತ್ಲೆ ಜಾಣಾರಿ, ವಯ್ಲ್ಯಾನ್ ಕವಿ - ಲೇಖಕ್ - ಚಿಂತ್ಪಿ. ತುಮ್ಚ್ಯಾಕಡೆ ಐಡಿಯಾಂಚ್ಯೊ ಝರಿ ಆಸಾತ್. ಕಶೆಂ ತರೀ ಕರ್ನ್ ಹೊ ಸಮಸ್ಸೊ ತಿರ್ಸಿಜಾಯ್. ಮ್ಹಜೆ ವಿಷ್ಯಾಂತ್ ಸೊಡ್ಯಾಂ. ಲಾಖೊಂ ಚೆಡ್ಯಾಂನಿ ಆಪ್ಲ್ಯಾ ‘ನಶೀಬಾಂತ್ಲ್ಯಾ ಚೆಡ್ವಾ’-ಕ್ ಸೊಧುಂಕ್ ಕರೋಡಾಂನಿ ದುಡು ಖರ್ಚೊಂವ್ಚೊ ಮ್ಹಾಕಾ ಬರೆಂ ದಿಸಾನಾ. ಕಿತ್ಯಾಕ್ ತುಮಿ ಏಕ್ ‘ಸುಪರ್ - ಸುಪ್ರೀಮ್’ಐಡಿಯಾ ಸೊಧುಂಕ್ ನಜೊ; ಜಲ್ಮಾತಾನಾಂಚ್ ಚೆಡ್ವಾಕ್ ಆನಿ ತಶೆಂಚ್ ಚೆಡ್ವಾಕ್ ಆಪುಣ್ ಕೊಣಾಲಾಗ್ಗಿಂ ಕಾಜಾರ್ ಜಾತಾಂ ಮ್ಹಣ್ ಆಪಾಪಿಂಚ್ ಕಳ್ಚ್ಯಾಬರಿ ಕರುಂಕ್ ನಜೊ...?’ಬಡ್ಡ್ ತಕ್ಲೆಚ್ಯಾ - ಕುಂಬು ಮೆಂದ್ವಾಚ್ಯಾ ದಡ್ಡ ಗುಸ್ತಿನಾಕ್ ಝಳ್ಕಾಲ್ಲೊ ದುಬಾವ್ ಮಾತ್ರ್ ತಾಚ್ಯಾ ಕಾಲೆತಿಕ್ ಸಾಂಗ್ಲ್ಲೊ ನ್ಹಯ್.
ತಾಣೆಂ ಸಾಂಗ್ಚ್ಯಾಂತೀ ಸತ್ ಆಸ್ಲ್ಲೆಂ. ತಸಲಿ ಏಕ್ ಐಡಿಯಾ ಹಾಂವ್ ಸೊಧುನ್ ಕಾಡಿನ್ ತರ್, ಆನಿಕೀ ಫಾಮಾದ್ ಜಾತಾಲೊಂ. ಕಾಡಿನಾಂ ಜಾಯ್ತ್ ತರ್ ಮ್ಹಜ್ಯಾ ಮರ್ಯಾದಿಚೆ ವಾಂದೆ ಜಾತಾಲೆ.
‘ಭಾರಿ ಬರೆಂ ಚಿಂತ್ತಾಯ್ ತುವೆಂ ಗುಸ್ತಿನಾ... ಹ್ಯಾ ವಿಶಿಂ ಖಂಡಿತ್ ಚಿಂತ್ತಾಂ ಆನಿ ತುಕಾ ಸಾಂಗ್ತಾಂ, ಆತಾಂ ಮಾತ್ರ್ ಇಸ್ಕೊಲಾಕ್ ವೇಳ್ ಜಾಲೊನೇ?’ ಹಾಂವೆ ಮಾಂದ್ರಿ ಖೊವಳ್ಳಿ. ಗುಸ್ತಿನ್ ತೆಣೆಂ ಪದ್ರಾಡ್ ಜಾತಾನಾಂ; ಹಾಂವೆಂ ಉಶ್ಯಾ ಪಂದಾಕ್ ಹಾತ್ ವ್ಹೆಲೊ.
ಕಾಲ್ ಇಸ್ಕೊಲಾ ಥಾವ್ನ್ ಯೆತಾನಾ ಸೆಜಾರ್ಚ್ಯಾ ಸೆಲಿನಾನ್ ದಿಲ್ಲೆಂ ಕಾಗಾತ್ ತೆಂ. ಮೊಗಾ ರುದಾನ್ ತೆಂ. ತಾಕಾ ಮ್ಹಜೆರ್ ಮೋಗ್ ಉದೆಲಾ. ತೆಂ ಮ್ಹಜೆಕಡೆ ಕಾಜಾರ್ ಜಾತಾ ಖೈಂ. ಥೈಂ ಗಾಂವಾಂತ್ ಮಾಂಯ್ನ್ ಸೈರಿಕ್ ಪಳೆಲ್ಯಾ. ‘ವೆಗ್ಗಿಂ ಗಾಂವಾಕ್ ಯೇ; ಹ್ಯಾಚ್ ವರ್ಸಾ ತುಜೆಂ ಕಾಜಾರ್. ದೊಳೆಭರ್ ಪಳಯ್ಜೆ’ ಮ್ಹಣ್ತಾ ತಿ. ಗುಸ್ತಿನಾಕ್ ಗುಳೊ ಮಾರ್ಯಾಂ; ತರ್ ಆತಾಂ ಮ್ಹಜ್ಯಾ ‘ನಶೀಬಾಂತ್ಲೆಂ’ ಕೋಣ್? ಸೆಜಾರ್ಚೆಂ ಸೆಲಿನ್ಗೀ ವ ಮಾಂಯ್ನ್ ಪಳೆಲ್ಲೆಂ ಆಲಿಸ್? ವ ‘ಸೈರಿಕ್ ಜಾಯ್ ಮ್ಹಣ್ ಹಾಂವೆಂಯ್ ಗಾಂವ್ಭರ್ ಗುಸ್ತಿನಾಬರಿ ಭೊಂವಾಜಾಯ್ ಪಡಾತ್?’
ಗುಸ್ತಿನಾನ್ ರಿಗುಲ್ಲೊ ಕಿಡೊ ಆತಾಂ ಮ್ಹಜಿ ತಕ್ಲಿ ಸಾರೆಂ ಕರಿಲಾಗ್ಲೊ... ಹ್ಯಾ ‘ನಶಿಬಾಂತ್ಲ್ಯಾ ಚೆಡ್ವಾಕ್ ಸೊಧಿಜೆ ತರ್ ನಶೀಬ್ ಜಾಯ್ಜೆ ನ್ಹಯ್ಗೀ...? ತುಮಿ ಕಿತೆಂ ಮ್ಹಣ್ತಾತ್...? ಮ್ಹಜೆಂ ವೆಗಿಂಚ್ ಮೆಳಾತ್ಗೀ...?
(ಕುರ್ಪಾ: ‘ಝೆಲೊ’)
About us | Feedback | Contact us
Copyright ©
2005 DAAIZ.COM All rights reserved.
Page concept, designed and maintained by Ashawadi Publications