ಕೊಂಕ್ಣೆಚಾ ವಿಂಚ್ಣಾರ್ ಸಾಹಿತ್ಯಾಚೊ ಕೊನ್ಸೊ ’ದಾಯ್ಜ್’ ಫಕತ್ತ್ ಕೊಂಕಣಿ ಥಾವ್ನ್, ಕೊಂಕಣಿ ಪರ್ಯಾಂತ್, ಕೊಂಕಣಿ ಖಾತಿರ್.
ಸವಾಲಾಂಕ್ ಜಾಪಿ
ಹ್ಯಾ ಅಂಕಣಾಂತ್ ಇನಾಮಾಂಕ್ ಫಾವೊ ಜಾಲ್ಲ್ಯಾ ಸವಾಲಾಂಚೆಂ ಪೋಶಕ್ ಜಾವ್ನಾಸಾತ್ ಹಿಂ ಕೊಂಕ್ಣಿ ಪತ್ರಾಂ
ದಿವೊ ಹಾಫ್ತ್ಯಾಳೆಂ
ಮಿತ್ರ್ ಹಾಫ್ತಾಳೆಂ
ಸೆವಕ್ ಮಯ್ನ್ಯಾಳೆಂ
ಅಂಕಣ್ಕಾರಾ ವಿಶ್ಯಾಂತ್
’ಮಿತ್ರ್’, ’ಝೆಲೊ’ ತಶೆಂಚ್ ’ಕಾಣಿಕ್’ ಪತ್ರಾಂಚೆಂ ಸಂಪಾದಕ್ಪಣ್ ಚಲಂವ್ಚೆ ಮಾರಿಫಾತ್, ಕೊಂಕ್ಣಿ ಪತ್ರಿಕೋಧ್ಯಮಾಂತ್ ಭರ್ಪೂರ್ ಅನ್ಭೋಗ್ ಆಸ್ಚೊ ದೊ|ಆಸ್ಟಿನ್ ಡಿ’ಸೋಜ್ ಪ್ರಭು ಪ್ರಸ್ತುತ್, ಅಮೆರಿಕಾಂತ್ ಅಪ್ಲ್ಯಾ ಕುಟ್ಮಾಸವೆಂ ವಸ್ತಿ ಕರುನ್ ಆಸಾ. ಕೊಂಕ್ಣಿ ಭಾಸ್/ಸಾಹಿತ್ಯಾಚಾ ವ್ಹಾಡಾವಳೆಕ್ ಖಾಂದ್ ದಿಲ್ಲೊ ಹೊ ಏಕ್ ಸಂಘಟಕ್/ಮುಖೆಲಿ ತಶೆಂಚ್ ಕೊಂಕ್ಣಿ ಕಾರ್ಭಾರಿ ಜಾವ್ನಾಸಾ.
ಹಾಚಾ ವೆಕ್ತಿತ್ವಾ/ವಿಚಾರಾಂವಿಶಿಂ ಚಡ್ ಜಾಣಾಂ ಜಾಂವ್ಕ್ ಕೊಂಕ್ಣಿ ಕಾರ್ಭಾರಿ ಅಂಕಣಾಕ್ ಭೆಟ್ ದೀ.
[ಹೆಂ ಮಯ್ನ್ಯಾಳೆಂ ಅಂಕಣ್ ಜಾವ್ನಾಸಾ, ತುಮ್ಚಿಂ ಸವಾಲಾಂ ವಿಚಾರಾ, ಇನಾಮಾಂ ಜೊಡಾ]
ತುಜ್ಯಾ ಸೆಜಾರ್ಯಾಚೊ ಮೋಗ್ ಕರ್ ಮ್ಹಳ್ಯಾರ್ ಕಿತೆಂ? [- ಕು|ಶಾಲಿನಿ ಡಿ’ಸೋಜಾ, ಕುವೆಯ್ಟ್]
ತಶೆಂ ಮ್ಹಳ್ಯಾರ್ ತುಜ್ಯಾ ಸೆಜಾರ್ನಿಚ್ಯಾ ನೊವ್ರ್ಯಾಚೊ ಮೋಗ್ ಕರ್ ಮ್ಹಣೊನ್ ನಹಿಂ, ಜಾಗ್ರುತ್!
’ದೇವ್ ದಿತಾ ಆನಿ ಮನಿಸ್ ಘೆತಾ’ ಮ್ಹಣ್ ಹಾತ್ ಬಾಂದುನ್ ಬಸ್ಲ್ಲ್ಯಾಂಕ್ ಕಿತೆಂ ಕರುಂ ಆಸ್ಟಿನಾಮಾ? [ವಿನ್ಸಿ, ಬೆಂಗ್ಳುರ್]
ತುಂ ಸಕಾಳಿಂ ಉಟೊನ್ ಕಾಕ್ಸಾಕ್ ಗೆಲ್ಯಾ ತವಳ್ ಪಾಟಿಂ ಪಳೆತಾಯ್ಗೀ ವ ದೊಳೆ ಧಾಂಪುನ್ ಉದಾಕ್ ಸೊಡ್ತಾಯ್? ತಶೆಂಚ್ ಮ್ಹಣ್ ಚೀಂತ್.
ಹಾಂಗಾ ಎಕ್ಲಿ ತಿಚ್ಯಾ ಘರ್ಚ್ಯಾ ಪೆಟ್ಯಾಕ್ ರಸ್ತ್ಯಾರ್ ಭಂವ್ಡಾಯ್ತಾ ಆನಿ ತೊ ಪೆಟೊಯ್ ಆಪ್ಲ್ಯಾ ಕುಟ್ಮಾಚೊ ಸಾಂದೊ ಮ್ಹಣ್ತಾ, ಹಿಕಾ ಇಲ್ಲಿ ಬೂಧ್ ಸಾಂಗ್ಶಿಗಿ ಆಸ್ಟಿನ್? [ಡೆಲಿನಾ, ಬೆಂಗ್ಳುರ್]
ತಿಕಾ ನಹಿಂ, ಆತಾಂ ಹಾಂವೆ ತುಕಾ ಬೂಧ್ ಸಾಂಗಾಜಾಯ್ ಪಡ್ಲಿ! ಅಸೆಂ ಕೆಲ್ಲ್ಯಾಂತ್ ತುಜೆಂ ಕಿತೆಂ ಝಡ್ತಾ?
ಪನ್ನಾಸ್ ವರ್ಸಾಂಚ್ಯೆ ಪ್ರಾಯೆರ್ ಹಾಂಗಾ ಎಕ್ಲಿ ಮ್ಹಾತಾರಿ ’ಆಪ್ಣೆಂ ಕೊಂಕ್ಣೆಕ್ ಕಿತೆಂಯ್ ಕರ್ಯೆತೆಂ’ ಮ್ಹಣ್ ಹುಸ್ಕಾರ್ತಾಮೂ? [ಗಂಗು ಗಂಗೊಳ್ಳಿ, ಆತಾಂ ವಾರಣಾಸಿ]
ಆತಾ’ತಾಂ ಸಾಟ್ ವರ್ಸಾಂ ಪ್ರಾಯೆರ್ಯೀ ಭುರ್ಗ್ಯಾಕ್ ಜನನ್ ದಿತಾತ್ ಆಸ್ತಾಂ ತಿಚ್ಯಾ ನಾರ್ಲಾಂತ್ಯಿ ಗಿರೊಪ್ ಆಸಾ ಕಸೊ ದಿಸ್ತಾ ಮ್ಹಾಕಾ.
ಆಜ್ ಕಾಲ್ ಪರ್ಗಾಂವಾಂತ್ ಕೊಂಕ್ಣಿ ಫುಲೊನ್ ಯೆತಾನಾ ಮಾಂಯ್ ಗಾಂವಾಂತ್ ಕೊಂಕ್ಣಿ ಕುರ್ವೊನ್ ಯೆತಾಮೂ? [ಫ್ರಾನ್ಸಿಸ್ ನೊರೊನ್ಹಾ, ಕಲೀನಾ] (ಎಕಾ ವರ್ಸಾಚಿ ಸೆವಕ್ ಪತ್ರಾಚಿ ದೇಶಿ ವರ್ಗಣೆಚೆಂ ಇನಾಮ್ ಫಾವೊ ಜಾಲ್ಲೆಂ ಸವಾಲ್)
ತುಜ್ಯೆ-ಮ್ಹಜ್ಯೆ ತಸಲೆ ಗಾಂವ್ ಸೊಡ್ನ್ ಪರ್ಗಾಂವಾಕ್ ಗೆಲ್ಲ್ಯಾಚೊ ಪರಿಣಾಮ್ ಹೊ. ದುಬಾಯ್ ಮಂಗ್ಳುರ್ ಜಾಲಾಂ ಅನಿ ಮಂಗ್ಳುರ್ ಮಲಬಾರ್ ಜಾಲಾಂ!
ಪತ್ರಾಂನಿ ವರ್ದಿ ಧಾಡ್ಚಿ ರಾವಯ್ತೆಚ್ ಥೊಡ್ಯಾಂಚೊ ’ಕೊಂಕ್ಣಿ ವೇಸ್’ ರಾವ್ಲೊಮೂ? ಕಿತೆಂ ಮ್ಹಣ್ತಾಯ್ ಆಸ್ಟಿನಾಬಾ? [ಸಹನಾ, ಕುವೆಯ್ಟ್]
ತುಂ ಕೊಣಾಕ್ ಮಾರ್ ದೀವ್ನ್ ಸವಾಲ್ ವಿಚಾರ್ತಾಯ್ ತೆಂ ಮ್ಹಾಕಾಚ್ ಸಮ್ಜಾನಾಮೂ ಸಹನಾ! ಮಾತ್ಸೆಂ ಸೊಡವ್ನ್ ಸಾಂಗಾನಾಂಯ್.
ಕೊಂಕ್ಣೆ ಖಾತಿರ್ ವಾವ್ರ್ ಕರಿಜಾಯ್ ಆಸ್ಚೆ ಹಾಂಗಾ ಪೆಟ್ಯಾನ್ ಚಾಬೊನ್ ಪಡ್ಚೆಪರಿಂ ಚಾಬ್ತಾತ್ ಆನಿ ಏಕಾಮೆಕಾ ಘೊಂಕ್ತಾತ್ಮೂ? [ರೊಜಿಟಾ ನಜ್ರೆತ್, ಮಿರಾ ರೋಡ್] (ಎಕಾ ವರ್ಸಾಚಿ ಮಿತ್ರ್ ಪತ್ರಾಚಿ ದೇಶಿ ವರ್ಗಣೆಚೆಂ ಇನಾಮ್ ಫಾವೊ ಜಾಲ್ಲೆಂ ಸವಾಲ್)
ಆತಾಂ ಕೊಂಕ್ಣೆಂತ್ ಸಭಾರ್ ಹಾಡಾಂ ಆಸಾತ್ (ಲಿಪಿ, ಜಾತ್-ಕಾತ್, ರಾಜ್ಕಾರಣ್, ಇತ್ಯಾದಿ) ಆಸ್ತಾಂ ಝಗ್ಡೊಂದಿತ್ ಪೆಲ್ಯಾನ್. ಸವ್ಕಾಸ್ ಪಾಂಯ್ ಉಕಲ್ಚೊ ವೇಳ್ ಯೆತಾನಾ ಮಾತ್ಸೆ ಪಯ್ಸ್ ಸರ್ತೆಲೆ.
ಸತ್ ಸಾಂಗ್ ಆಸ್ಟಿನಾಮಾ, ಕೊಂಕ್ಣೆಕ್ ಹೊ ಬರೊ ಕಾಳ್ಗಿ ವ ಪೋಪಿಕಾಲ್? [ಸನ್ನೇಶಿ, ಬೊಳಿಯೆ]
ಪೋಪಿಕಾಲ್ಗೀ ವ ಪೊಂತಿಪಿಕಾಲ್ಗೀ ತೆಂ ಹಾಂವ್ ನೆಣಾಂ, ಮ್ಹಾಕಾ ದಿಸ್ತಾ ಕೊಂಕ್ಣೆಚಿ ಉದರ್ಗತ್ ಆಯ್ಲೆವಾರ್ ಜಾಲ್ಲ್ಯೆಪರಿಂ ಹಾಚ್ಯೆ ಆದಿಂ ಜಾಲ್ಲಿ ನಾ!
ಮಂಗ್ಳುರಾಂತ್ ’ಬಪ್ಪಾನಾಡ್ಚಿ ಧೊಲ್’ ಫಾಮಾದ್ ಜಾಲ್ಲ್ಯೆಪರಿಂ ಆಮೆರಿಕಾಂತ್ ಕಾಲೆಂ ಆಸಾ ಆಸ್ಟಿನಾಬಾ? [ಚಿರ್ಮುಲಿ, ಸಾಸ್ತಾನ್]
ಹಾಂಗಾಸರ್ ಸಕ್ಕಡ್ಯೀ ಆಸಾ ಚಿರ್ಮುಲೆ! ಏಕ್ ಪಾವ್ಟಿಂ ಜಿವ್ಯಾ ದೊಳ್ಯಾಂನಿ ಪಳೆಲ್ಯಾರ್ ತುಂ ಮಾಗಿರ್ ಮ್ಹಣೊಂಕ್ ಆಸಾಯ್, "ಆಸ್ಟಿನಾ, ಆಸ್ಟಿನಾ, ತಾಂಚ್ಯಾ ಆಂಗಾರ್ ಕಾಷ್ಟಿ ನಾ!" ತಸಲಿ ಗತ್ ಥೊಡೆಕಡೆನ್ ಧೊಲ್ ಪಳೆಂವ್ಕ್ ಗೆಲ್ಯಾರ್.
ಆಸ್ಟಿನಾಬಾ ತುಂ ದೊತೊರ್ ಖಂಚ್ಯಾಚೊ? ದೊಳ್ಯಾಂಚೊ? ಹಾಡಾಂಚೊ? ನಾಕಾಚೊ? ವ ಕಾಳ್ಚಾಚೊ? [ಕಾರ್ಕೊಳ್ಚೆಂ ಪೀಲ್]
ಹಾಂವ್ ದೊತೊರ್ ನಹಿಂ ಭುಂಯ್ ಕಾಂದ್ಯಾಚೊ, ಹಾಂವ್ ದೊತೊರ್ - ವ್ಯಾಪಾರ್ ಸಂಚಾಲನಾಚೊ - ಬಿಸ್ನೆಸ್ ಮ್ಯಾನೇಜ್ಮೆಂಟ್.
ಥೊಡಿಂ ಮ್ಹಣ್ತಾತ್ ಕಾಜಾರ್ ಜಾಂವ್ಚೆಂ ಸರ್ಗಾರ್ ಮ್ಹಣ್. ತುಂ ಕಿತೆಂ ಮ್ಹಣ್ತಾಯ್ ಆಸ್ಟಿನಾ? [ಎಡ್ವಿನ್ ಡಿ’ಸೋಜಾ, ಮಂಗ್ಳುರ್]
ಮ್ಹಣ್ಚೆಂ ಕಿತೆಂ ಎಡ್ವಿನಾ? ಸರ್ಗಾರ್ ಕಾಜಾರ್-ಬಿಜಾರ್ ಕಾಂಯ್ ನಾ. ಕಾಂಯ್ ತುಕಾ ಹೆಂ ಪಾದ್ರ್ಯಾಬಾನ್ ಸಾಂಗ್ಲೆಂ ಆಸ್ತೆಲೆಂ.
ಅಂತರ್ಜಾಳಿರ್ ಆತಾಂ ಭಯಂಕರ್ ಸಾಳಿಯೊ ಭರ್ಲ್ಯಾತ್ಮೂ? ಹೆಂ ಜಾಳ್ ಶಾಭಿತ್ ಉರಾತ್ಗಿ? [ಲವೀನಾ ಲಸ್ರಾದೊ, ಮುಂಬಯ್] (ಎಕಾ ವರ್ಸಾಚಿ ದಿವೊ ಪತ್ರಾಚಿ ದೇಶಿ ವರ್ಗಣೆಚೆಂ ಇನಾಮ್ ಫಾವೊ ಜಾಲ್ಲೆಂ ಸವಾಲ್)
ಅಂತರ್ಜಾಳಾಂತ್ಲ್ಯಾ ಸಾಳಿಯಾಂಕ್ ಫಾತೊರ್ ಘಾಲ್; ಕಂಪ್ಯೂಟರಾಂತ್ ತುಜಿಂ ಫಾಯ್ಲಾಂ ಸಾಂಬಾಳ್. ವಳಕ್ ನಾಸ್ಲ್ಲ್ಯಾಂಚಿ ಅಂತರ್ ಪತ್ರಾಂ (ಈ-ಮೇಯ್ಲ್) ಉಗ್ತಿಂ ಕರುಂಕ್ ವಚಾನಾಕಾ, ಸಾಂಬಾಳ್.
ಎಕಾ ವರ್ಸಾಚಿ ದೇಶಿ ವರ್ಗಣಿ ಹ್ಯಾ ಸಕಯ್ಲ್ಯಾಂಕ್ ಫಾವೊ ಜಾತಾ
’ಮಿತ್ ಹಾಪ್ತ್ಯಾಳೆಂ’
ರೊಜಿಟಾ ನಜ್ರೆತ್, ಮಿರಾ ರೋಡ್
’ದಿವೊ ಹಾಪ್ತ್ಯಾಳೆಂ’
ಲವೀನಾ ಲಸ್ರಾದೊ, ಮುಂಬಯ್
’ಸೆವಕ್ ಮಯ್ನ್ಯಾಳೆಂ’
ಫ್ರಾನ್ಸಿಸ್ ನೊರೊನ್ಹಾ, ಕಲೀನಾ
(ಇನಾಮಾಂ ಜಿಕ್ಪ್ಯಾಂಕ್ ತಾಂಚಿಂ ಇನಾಮಾಂ ತಾಣಿಂ ದಿಲ್ಲ್ಯಾ ವಿಳಾಸಾಕ್ ಪಾವ್ತೆಲಿಂ, ಚೂಕ್ ವಿಳಾಸಾಕ್ ಆಮಿ ಜವಾಬ್ಧಾರ್ ನಾಂವ್) - ಸಂ.
ತುಮ್ಚಿಂ ಸವಾಲಾಂ ಧಾಡುಂಕ್ ವಿಳಾಸ್: austinporob@gmail.com ವಾ editor@daaiz.com
ಹ್ಯಾ ಅಧ್ಲಿಂ ಸವಾಲಾಂ-ಜಾಪಿ: 1
About us | Feedback | Contact us
Copyright ©
2005 DAAIZ.COM All rights reserved.
Page concept, designed and maintained by Ashawadi Publications
