ಕೊಂಕ್ಣೆಚಾ ವಿಂಚ್ಣಾರ್ ಸಾಹಿತ್ಯಾಚೊ ಕೊನ್ಸೊ - ’ದಾಯ್ಜ್’ - ಫಕತ್ತ್ ಕೊಂಕಣಿ ಥಾವ್ನ್ ಕೊಂಕಣಿ ಪರ್ಯಾಂತ್, ಕೊಂಕಣಿ ಖಾತಿರ್.
[2006 ಇಸ್ವೆಚಾ ಸಪ್ತೆಂಬರ್ 23 ತಾರಿಕೆರ್ ಅಪ್ಲೊ 41ವೊ ಜಲ್ಮಾದಿವಸ್ ಆಚರಣ್ ಕರ್ಚಾ ಆಂಡ್ರು ತುಕಾ ಹೆಂ ಅಂಕಣ್ ಅರ್ಪಣ್]
ಸತಾಂ ಆನಿ ಖತಾಂ - 21. ನಾಂವ್
ಹೆಂ ಅಂಕಣ್ ’ರಾಕ್ಣೊ’ ಚೆರ್ ತಶೆಂಚ್ ಆಶಾವಾದಿ ಪ್ರಕಾಶನಾಚಾ ಬುಕಾರುಪಾರ್ ಪರ್ಗಟ್ ಜಾಲಾಂ.
ಎಕಾ ಗಾಂವಾಂತ್ ಸರ್ವ್ ಧರ್ಮಾಚೊ ಲೋಕ್ ಜಿಯೆವ್ನ್ ಆಸ್ಲ್ಲೊ. ತಾಂತ್ಲೆಂ ಸಭಾರ್ ಕ್ರೀಸ್ತಾಂವ್, ಹಿಂದು, ಮುಸ್ಲಿಮ್ ಆನಿ ಹೆರ್. ಕ್ರೀಸ್ತಾಂವಾಂಕ್ ಹೆರಾಂ ’ಪರ್ಬುಲೆ’ ಮ್ಹಣ್ತಾನಾ, ಹಿಂದ್ವಾಂಕ್ ತಾಂಚಾ ಜಾತಿಕ್ ಅನುಸಾರ್ ಜಾವ್ನ್ ’ಸೆಟ್ರೆ’, ’ಪೂಜಾರ್ರೆ’, ’ಭಟ್ರೆ’ ಮ್ಹಣೊನ್ ಹೆರ್ ಜಾತಿಚೆ ಆಪಯ್ತಾನಾ ಮುಸ್ಲಿಮಾಂಕ್ ’ಸಾಯ್ಬೆರೆ’ ಮ್ಹಣೊನ್ ಆಪಯ್ಲಾಗ್ಲೆ. ತಾಂಚೆ ಪಯ್ಕಿಂತ್ಲೊ ಎಕ್ಲೊ ಖಾದ್ರಿ ಸಾಯ್ಬ್ ಜಿವಾನ್ ಇಲ್ಲೊ ಮಟ್ವೊ ಆಸ್ಲ್ಲ್ಯಾನ್ ತಾಕಾ ಸಗ್ಳ್ಯಾಂನಿ ’ಕುಂಟ ಖಾದ್ರಿ’ ಮ್ಹಣೊನ್ ಉಲೊ ಕರ್ತಾಲೆ. ತಾಚಾ ಘರಾಂತ್ ಧಾ-ಭಾರಾ ಬುರ್ಗಿಂ ಆಸೊನ್, ದುಬ್ಳಿಕಾಯ್ ಆಸ್ಲ್ಲೆವರ್ವಿಂ ತಾಕಾ ಹ್ಯೇ ವಿಶಿಂ ಚಡ್ ಗಮನ್ ದೀಂವ್ಕ್ ಜಾಲೆಂನಾ.
ಅಶೆಚ್ಚ್ ದೀಸ್ ಬದಲ್ಲೆ ಆನಿಂ ತಾಚಿಂ ಬುರ್ಗಿಂ ವ್ಹಡ್ ಜಾಲಿಂ ಆನಿಂ ಎಕೆಕ್ಲಿಂಚ್ ಪರ್ಗಾಂವಾಕ್ ಗೆಲಿಂ.
ಅಶೆಂ ಖಾದ್ರಿ ಸಾಯ್ಬಾಚಿ ಪರಿಗತ್ ಬದ್ಲಲಿ. ಆನಿಂ ತಾಚಾ ಬುರ್ಗ್ಯಾಂಕ್ ಲೊಕಾಂನಿ ’ಕುಂಟ ಖಾದ್ರಿಚೊ ಪೂತ್’ ಮ್ಹಣೊನ್ ವೊಲಾಂವ್ಚೆಂ ಬರೆಂ ಲಾಗ್ಲೆಂನಾ ಆನಿಂ ತ್ಯಾವಿಶ್ಯಾಂತ್ ಸಗ್ಳ್ಯಾ ಬುರ್ಗ್ಯಾಂನಿ ಮೆಳೊನ್ ಏಕ್ ಉಪಾವ್ ಸೊಧ್ಲೊ. ಗಾಂವಾಕ್ ಯೆತೆಚ್ ತಾಣಿಂ ತಾಂಚಾ ಅಬ್ಬಾಚೆಂ ನಾಂವ್ ಖಾದ್ರಿ ಆಸ್ಲ್ಲೆಂ ’ಶೇಕ್ ಅಕ್ಬರ್’ ಮ್ಹಣೊನ್ ಬದ್ಲಿಲೆಂ ಆನಿಂ ಕಾನೂನಿ ರಿತಿಂನಿ ತಾಣಿಂ ನಾಂವ್ ಬದ್ಲಿಲೆಂ ಆನಿಂ ಗಾಂವ್ಚಾ ಸಗ್ಳ್ಯಾಂ ಲೊಕಾಂಕ್ ಆಪವ್ನ್ ಗಡ್ದಾಯೆನ್ ಜೆವಾಣ್ ಕೆಲೆಂ. ಆನಿಂ ಹಾಜರ್ ಜಾಲ್ಲ್ಯಾ ಲೊಕಾಂಕ್ ತಾಣಿಂ ವಿನತಿ ಕೆಲಿ ’ಆಯ್ಚಾನ್ ಆಮ್ಚಾ ಅಬ್ಬಾಕ್ ಕೊಣೆಂಯ್ ಕುಂಟ ಖಾದ್ರಿ ಮ್ಹಣಾನಾಯೆ’ ಮ್ಹಣೊನ್. ಆಯ್ಕಾಲ್ಲೊ ಲೋಕ್ ದಾಧೊಶಿ ಜೇವ್ನ್ ಗೆಲೊ.
ವಾಟೆರ್ ವೆಚಾ ಲೊಕಾಂಚೊ ವ್ಹೊರ್ ಪಳೆಲ್ಲ್ಯಾ ಥೊಡ್ಯಾ ಹಿಂದ್ವಾಂನಿ ತಾಂಕಾ ವಿಚಾರ್ಲೆಂ ’ಖಂಯ್ ಗೆಲ್ಲ್ಯಾತ್ ತುಮಿಂ?’
ಲೊಕಾಂನಿ ಜಾಪ್ ದಿಲಿ "ಆಜ್ ತ್ಯಾ ಕುಂಟ ಖಾದ್ರಿಚೆಂ ನಾಂವ್ ಬದ್ಲಿಲ್ಲೆಂ ಆನಿಂ ತ್ಯಾ ಸಂತೊಸಾನ್ ತಾಂಗೆರ್ ಜೆವಾಣ್ ಆಸ್ಲ್ಲೆಂ"
ಸಂದೇಶ್: ಮನಿಸ್ ಆಪ್ಣಾಥಂಯ್ ಕಿತ್ಲೆಂ ಸುಧಾರಣ್ ಹಾಡುಂಕ್ ಪ್ರೇತನ್ ಕೆಲ್ಯಾರೀ, ಲೊಕಾಂನಿ ತಾಕಾ ವಳ್ಕೊಂಚಿ ನದರ್ ಪಯ್ಲೆಂಚಿಚ್. ಹೆಂ ಆಮ್ಚಾ ಜಿಣ್ಯೆಕ್ ಲಘು ಜಾಯ್ನಾಂಗೀ? ಬರೊ ಮನಿಸ್ ಕಾಂಯ್ ಖೊಟ್ಯಾ ಕಾಮಾಂಕ್ ನಾಂವಾಡ್ದಿಕ್ ಜಾಯ್ತ್ ತರ್ ತೊ ಉಪ್ರಾಂತ್ ಕಿತ್ಲೆಂ ಬರೆಂ ಕಾಮ್ ಕರಿತ್ ತರೀ ಲೊಕಾಂಚಾ ನದ್ರೆಂತ್ ತೊ ’ಖೊಟೊಚ್’ ಜಾವ್ನ್ ಉರ್ತಾ ನ್ಹಯ್ಗೀ?
About us | Feedback | Contact us
Copyright ©
2005 DAAIZ.COM All rights reserved.
Page concept, designed and maintained by Ashawadi Publications
