ಕೊಂಕ್ಣೆಚಾ ವಿಂಚ್ಣಾರ್ ಸಾಹಿತ್ಯಾಚೊ ಕೊನ್ಸೊ - ’ದಾಯ್ಜ್’ - ಫಕತ್ತ್ ಕೊಂಕಣಿ ಥಾವ್ನ್ ಕೊಂಕಣಿ ಪರ್ಯಾಂತ್, ಕೊಂಕಣಿ ಖಾತಿರ್.
ಬೂಕ್ ಸಮೀಕ್ಶಾ - 13
ಪಣ್ತೆಚಿ ಪೆಲಿ
ಬೂಕ್: ಪಣ್ತೆಚಿ ಪೆಲಿ
ಭಾಗ್: ಆಯ್ಲೆಂ ತಶೆಂ ಗಾಯ್ಲೆಂ [ಕವಿತಾ]
ಕವಿ: ಚಾ.ಫ್ರಾ.ದೆ’ಕೋಸ್ತಾ
ಪ್ರಸ್ತಾವನ್: ನಂದಿನಿ (ಸ್ತೆಲ್ಲಾ ಡಿ’ಕೋಸ್ತಾ)
ಛಾಪ್ಲ್ಲಿ ಲಿಪಿ: ಕಾನಡಿ.
ಪಾನಾಂ: 526
ಮೋಲ್: ರು. 300
ಪ್ರಕಾಶಕ್: ಕ್ಲಿಫರ್ಡ್ ಡಿ’ಸೋಜ್
ಪರ್ಗಟ್ ಜಾಲ್ಲಿ ಇಸ್ವಿ: 2006
ಸಮೀಕ್ಶಾ ಚಲಯ್ಣಾರ್: ವಲ್ಲಿ ಕ್ವಾಡ್ರಸ್, ಅಜೆಕಾರ್
ತಾರಿಕ್: 21 ಎಪ್ರಿಲ್ 2006
ಜಾಗೊ: ಸಾಲ್ಮಿಯಾ, ಕುವೇಯ್ಟ್
ಚಾ.ಫ್ರಾ.ದೆ’ಕೋಸ್ತಾ
ವಲ್ಲಿ ಕ್ವಾಡ್ರಸ್
ಹ್ಯಾ ಸಮೀಕ್ಶಾ ಲೇಖನಾಚೆರ್ ಫಾಮಾದ್ ಕೊಂಕ್ಣಿ ವಾವ್ರಾಡಿ ಆಸ್ಟಿನ್ ಪ್ರಭುಚೆ ವಿಚಾರ್
ಕವಿಂಚಿ ವ್ಹಳೊಕ್:
ಕೊಂಕ್ಣಿ ಕವಿತಾ ಶೆತಾಂತ್ ಅಪ್ಲಿ ಅಸ್ಮಿತಾಯ್ ಥಿರ್ ಕೆಲ್ಲೊ ಚಾ.ಫ್ರಾ ಕೊಂಕ್ಣೆಚೊ ಅಮರ್ ಕವಿ. 1989 ಇಸ್ವೆಂತ್ ತಾಚಾ ’ಸೊಂಶ್ಯಾಚೆ ಕಾನ್’ ಕವಿತಾಸಂಗ್ರಹಾಕ್ ಕೇಂದ್ರ್ ಸಾಹಿತ್ಯ್ ಅಕಾಡೆಮಿ ಪ್ರಶಸ್ಥಿ ಲಾಭ್ಲ್ಯಾ. ಚಾ.ಫ್ರಾ ಫಕತ್ತ್ ಕವಿ ಜಾವ್ನ್ ಮಾತ್ರ್ ನ್ಹಂಯ್ ನಾಟಕಿಸ್ತ್ ಜಾವ್ನ್, ಕಾಣ್ಯೆಗಾರ್ ಜಾವ್ನ್, ಚಿಂತ್ಪಿ ಜಾವ್ನ್, ಉಲವ್ಪಿ ಜಾವ್ನ್, ನಟ್ ಜಾವ್ನ್, ದಿಗ್ದರ್ಶಕ್ ಜಾವ್ನ್ ಫಾಮಾದ್. ಹಾಚೆಂ ಸಾಹಿತ್ಯ್ ಕೊಂಕ್ಣಿ ಅಧ್ಯಯನಾಂನಿ ಮೆಳ್ತಾ. ಪತ್ರಿಕೋಧ್ಯಮಿ ಜಾವ್ನ್ ಹಾಣೆಂ ’ಪಯ್ಣಾರಿ’, ’ಉದೆವ್’ ತಶೆಂಚ್ ’ಜಿವಿತ್’ ಪತ್ರಾಂ ಚಲಯ್ಲ್ಯಾಂತ್.
ಸಮೀಕ್ಶಾ ಲೇಖನ್
ಆಯ್ಲೆಂ ತಶೆಂ ಗಾಯ್ಲೆಂ [- ವಲ್ಲಿ
ಕ್ವಾಡ್ರಸ್, ಅಜೆಕಾರ್]
ಬೂಕ್: ಪಣ್ತೆಚಿ ಪೆಲಿ
ಬರವ್ಪಿ: ದೆ|ಚಾ.ಫ್ರಾ.ದೆ’ಕೊಸ್ತಾ
ಸಂಪಾದನ್: ನಂದಿನಿ
ಪರ್ಗಟ್ಣಿ: ಕ್ಲಿಫರ್ಡ್ ಡಿ’ಸೋಜ್
ಸುರ್ವಾತ್:
ಕಾನಡಿ ಕೊಂಕ್ಣೆಚಾ ಕೊಂಕ್ಣಿ ಸಾಹಿತ್ಯಾಚಾ ಲಗ್ಬಗ್ ಶೆಂಬೊರ್ ವರ್ಸಾಂಚಿ ಚರಿತ್ರಾ ಆಸಾ ತರ್ಯ್ ಚಾ.ಫ್ರಾ ತಸಲೆ ಅಜೂನ್ ಕೊಣ್ ಉದೆಂವ್ಕ್ ನಾ ಮ್ಹಳ್ಳಿ ಪರ್ನಿ ಬೊಬಾಟ್ ಮ್ಹಜಾ ಕಾನಾಂನಿ ಅಜೂನ್ ಗಾಜ್ತಾನಾ ಚಾ.ಫ್ರಾ ಆಮ್ಕಾಂ ಸಾಂಡುನ್ ಗೆಲ್ಲ್ಯಾ ಚೊವ್ದಾ ವರ್ಸಾಂ ಉಪ್ರಾಂತ್ ತರ್ಯ್ ತಾಚೆಂ ಸಾಹಿತ್ಯ್ ಕೊಣೇಂಯ್ ಎಕಾ ಪುನೆಗೆಲ್ಲ್ಯಾನ್ ಪರ್ಗಟ್ ಕೆಲ್ಲೆಂನಾ ಯಾ ಪರ್ಗಟ್ ಕರ್ಚೆಂ ಮನ್ ಧಾಖಯಿಲ್ಲೆಂಯ್ ನಾ. ಚಾ.ಫ್ರಾ ಗೆಲೊ ಮ್ಹಳ್ಳಿಂ ಸಿಸ್ರಿಚಿಂ ದುಕಾಂ ಅಜೂನ್ ಥೊಡೆ ಗಳವ್ನ್ ಆಸಾತ್ ತರ್ ಚಾ.ಫ್ರಾ ಜೀವ್ ಆಸ್ತಾನಾ ಅಶೆಂ ಸಾಂಗ್ತಾಲೊ, ತಶೆಂ ಸಾಂಗ್ತಾಲೊ ಮ್ಹಳ್ಳ್ಯೊ ಜಾಯ್ತ್ಯೊ ಘಡ್ಪಾಂಚೊ ಕಾಣ್ಯೊ ಆಯ್ಕೊನ್ ಮ್ಹಜೆ ಹೆ ಕಾನ್ ದಾಡ್ಡ್ ಜಾಲ್ಯಾತ್. ಪುಣ್ ಹ್ಯಾ ಚೊವ್ದಾ ವರ್ಸಾಂನಿ
ಕೊಂಕ್ಣೆಚಾ ಎಕಾ ಮಹಾನ್ ಚಿಂತ್ಪಿ/ಸಾಹಿತಿ/ಪಂಡಿತ್ ಡಾ|ವಿಲ್ಲಿ
ಡಿ’ಸಿಲ್ವಾನ್ ’ಪ್ರಗತಿ ಪ್ರಕಾಶನ್’ ಧ್ವಾರಿಂ ’ಸೊಂಶ್ಯಾಚೆ
ಕಾನ್’ ಬೂಕ್ ಪರ್ಗಟ್ ಕೆಲ್ಲೊ ಸೊಡ್ಲ್ಯಾರ್, ಎಕ್ಲೊ ತರ್ಯ್ ಪುನೆಗೆಲ್ಲೊ ಹೆಂ ಮಿಸಾಂವ್ ಮುಖಾರುಂಕ್ ಆಯಿಲ್ಲೊನಾ? ಖಂಚಾಯ್ ಎಕಾ ಪತ್ರಾಚೊ?
ಖಂಚಾಯ್ ಎಕಾ ಪ್ರಕಾಶನಾಚೊ? ಖಂಚಾಯ್ ಎಕಾ ಪರಿಶದ್ದೆಚೊ ವ ಖಂಚಾಯ್ ಎಕಾ ಅಕಾಡೆಮಿಚೊ? ಮ್ಹಣ್ತಾನಾಂಚ್ ಕಳ್ತಾ ಆಮ್ಕಾಂ ಆಮ್ಚಾ ಕೊಂಕ್ಣೆಚೆರ್ ಕಿತ್ಲೊ ಮೋಗ್ ಆನಿ ಅಭಿಮಾನ್ ಆಸಾ ಮ್ಹಳ್ಳೊ.
ಆಸೊಂ!!
ಹಾಂವ್ ಚಾ.ಫ್ರಾಕ್ ವೆಕ್ತಿಗತ್ ಜಾವ್ನ್ ಥೊಡೆಪಾವ್ಟಿಂ ಮೆಳ್ಳಾಂ, ಪಯ್ಲೆಂ
1990-91
ಇಸ್ವೆಂತ್ ಫಾತಿಮಾ ರೆತಿರ್ ಮಂದಿರಾಂತ್ ಚಲ್ಲ್ಲ್ಯಾ ಕೊಂಕಣಿ ಅಧಿವೇಶನಾವೆಳಾರ್.
ಪುಣ್ ಉಪ್ರಾಂತ್ ಸಭಾರ್ ಪಾವ್ಟಿಂ ಆಮಿಂ ಮೆಳ್ಲ್ಲ್ಯಾಂವ್, ಕೊಂಕ್ಣಿ ಬರವ್ಪ್ಯಾಂಚಾ ಎಕ್ತಾರಾಚಾ ವಾವ್ರಾವೆಳಾರ್ ಸಭಾರ್ ಪಾವ್ಟಿಂ ಮೆಳ್ಲ್ಲ್ಯಾಂವ್. ಇತ್ಲೆಂಚ್
ನ್ಹಂಯ್, ಚಾ.ಫ್ರಾ ಆಪ್ಲ್ಯಾ ಕಾಮಾಖಾತಿರ್ ಮಿಲಾಗ್ರಿಸ್ ಆಯಿಲ್ಲೆವೆಳಾರ್, ಮಿಲಾಗ್ರಿಸ್ ಕ್ರೋಸ್ ರಸ್ತ್ಯಾಚೆರ್ ಹಾಂವ್ ಕಾಮ್ ಕರ್ಚಾ ಆಫಿಸಾಕ್ ಯೆತಾಲೊ ಆನಿ ಉಣೆಂ ಉಲಯ್ತಾಲೊ ಆನಿ ಚಡ್ ಆಯ್ಕತಾಲೊ. ’ತುಂ ಕವಿತಾ ಕಿತ್ಯಾಕ್ ಬರಯ್ನಾಂಯ್?’ ಮ್ಹಳ್ಳೆಂ ಸವಾಲ್ ತಾಣೆಂ ಕೆಲ್ಲ್ಯಾ ವೆಳಾರ್ ಹಾವೆಂ ದಿಲ್ಲಿ ಜಾಪ್
’ಲೊಕಾಂಕ್ ಕವಿತಾ ರುಚಾನಾಂತ್ ದೆಖುನ್ ಹಾಂವ್ ಕಾಣ್ಯೊ
ಬರಯ್ತಾಂ’. ತೆದ್ನಾಂ ತಾಣೆಂ ಮ್ಹಾಕಾ ಸವಾಲ್ ಕೆಲೆಂ
’ಲೊಕಾಂಕ್ ಕವಿತಾ ರುಚಾನಾಂತ್ ಮ್ಹಣ್ಗಿ ವಾ ತುಕಾ
ರುಚಾನಾಂತ್ ಮ್ಹಣ್?’ ಪುಣ್ ಮ್ಹಜೆಲಾಗಿಂ ಜಾಪ್
ನಾತ್ಲ್ಲಿ. ತರ್ಯೀ ತಾಣೆಂ ಮ್ಹಾಕಾ ತವಳ್ ತವಳ್ ಜಾಂವ್ಚಾ ’ಜಾಗೆ ಕವಿ’ ಪಂಗ್ಡಾಕ್ ತೋಂಡ್ಪಾಶಿಂ ಆಪವ್ಣೆಂ ದಿಲ್ಲೆಂ..
ಅಶೆಂ ಥೊಡ್ಯಾ ದಿಸಾಂ ಉಪ್ರಾಂತ್ ತಾಣೆಂ ’ಜಿವಿತ್’ ಪತ್ರಾಚೆರ್ ಪರ್ಗಟುಂಕ್ ಮ್ಹಜಿ ಏಕ್ ಮಟ್ವಿ ಕಾಣಿ ವಿಚಾರ್ಲಿ ಆನಿ ಹಾವೆಂ ತಿ ಎಕಾಚ್ ಹಾಫ್ತ್ಯಾಭಿತರ್ ತಾಕಾ ತಿ ಖುಶೇನ್ ದಿಲ್ಲಿ, ಪುಣ್ ’ಜಿವಿತ್’ ಪತ್ರ್ ತಶೆಂಚ್ ಚಾ.ಫ್ರಾಚೆಂ ಜಿವಿತ್ ವೆಗಿಂಚ್ ಸಂಪ್ಚಾರ್ ಆಸ್ಲ್ಲೆಂ ಮ್ಹಳ್ಳೆಂ ಸತ್ ಕೊಣಾಕ್ ಕಳ್ಲ್ಲೆಂ! ಆಸೊಂ!
ಆತಾಂ ತ್ಯೇವಿಶಿಂ ಕಸಲೆಚ್ ಸುಕೆ ಸಯ್ಲಾಪ್ ನಾಸ್ತಾನಾ ಸಾಂಗ್ಚೆಂ ತರ್; ಆತಾಂ ತರ್ಯ್ ಚೊವ್ದಾ ವರ್ಸಾಂ ಉಪ್ರಾಂತ್ ತರ್ಯ್ ಚಾ.ಫ್ರಾಚೆಂ ಸಾಹಿತ್ಯ್ ತಾಚಾಚ್ ಕುಟ್ಮಾಚಾಂನಿ, ತೇಂಯೀ ಕೊಂಕ್ಣಿ ಸಾಹಿತಿಂನಿ - ತಾಚಿ ಪತಿಣ್ ಸ್ಟೆಲ್ಲಾ ದೆ’ಕೋಸ್ತಾ (ನಂದಿನಿ), ಆನಿ ಧುವ್ ಸೋನಿಯಾನ್ ಮನ್ ಕೆಲ್ಲಿ ಗಜಾಲ್ ತಾಂಕಾಂ ಮಾತ್ರ್
ನ್ಹಂಯ್ ಅಖ್ಖ್ಯಾ ಕೊಂಕ್ಣೆಕ್ ವ್ಹಡಾ ಧಾದೊಸ್ಕಾಯೆಚಿ!.
ಚಾ.ಫ್ರಾ ಕೊಣ್?:
ಭಾರಿ ಬರೆಂ ಸವಾಲ್ ಹೆಂ ಭೋವ್ಶಾ ಆಜ್ಕಾಲ್ ಥೊಡ್ಯಾಂಚಾ ಮತಿಂತ್ ಹೆಂ ಸವಾಲ್ ಗಾಜೊಂಕ್ ಪುರೊ ಜಶೆಂ ಥೊಡ್ಯಾ ವರ್ಸಾಂ ಧಿಂ ಮ್ಹಜಾ ಮತಿಂತ್ ’ಬಾಮ್ಸ್ ಮ್ಹಳ್ಯಾರ್ ಕೊಣ್?’ ಮ್ಹಳ್ಳೆಂ ಸವಾಲ್ ಆಸ್ಲ್ಲೆಪರಿಂ. ಸಂಸಾರಾಂತ್ ಜಿಯೆಂವ್ಚೊ ಹರ್ಯೆಕ್ ಮನಿಸ್ ವಳ್ಕೊಂದಿ ವ ನಾ ಆಸೊಂ ಪುಣ್ ಸುರ್ಯೊ ಅಪ್ಲೊ ಪ್ರಕಾಸ್ ಧರ್ತೆಚೆರ್ ಫಾಂಕಯ್ತಚ್ಚ್, ಕೊಣ್ ಹೆಂ ವಳ್ಕೊಂ ವಾ ಸೊಡುಂ, ಕೊಣ್ ಆಶೆಂವ್ ವ ನಾ ಆಶೆಂವ್. ಹೆಂ ಪ್ರಾಕೃತಿಕ್.. ಸಂಸರಾಂತ್ ಹರ್ಯೆಕ್ ದೇಸಾಚಾ ಚರಿತ್ರೆಂತ್ ಏಕ್ ದೋನ್ ನಾಂವಾಂ ಅಮರ್ ಜಾವ್ನ್ ಉರ್ತಾತ್ ತಾಣಿಂ ದಿಲ್ಲ್ಯಾ ಬಲಿದಾನಾಖಾತಿರ್. ಜಶೆಂ ಮಹಾತ್ಮಾ ಗಾಂಧಿ ಭಾರತಾಚೊ ಅಮರ್ ವೆಕ್ತಿ ಜಾಲೊ ತಶೆಂ. ಹೆಚ್ಚ್ಪರಿಂ ಹರ್ಯೆಕಾ ಭಾಸಾಂನಿ ಎಕೆಕ್ ವೆಕ್ತಿ ಅಮರ್ ಜಾತಾತ್. ಕಾನಡಿ ಲಿಪಿಯೆಚಾ ಕೊಂಕ್ಣೆಂತ್ ಲುವಿಸ್ ಮಸ್ಕರೇಞ್ ಖಂಡಿತ್ ಅಮರ್ ತರ್ಯ್ ಕೊಂಕ್ಣಿ ಸಾಹಿತ್ಯಾಂತ್ ಚಾ.ಫ್ರಾ.ದೆ’ಕೋಸ್ತಾನ್ ಏಕ್ ಅಸಲೆಂ ನಾಂವ್ ಜೊಡ್ಲಾಂ ಭೊವ್ಶಾ ತೆಂ ನಾಂವ್ ಕೆದಿಂಚ್ ಮೊರ್ಚೆಂನಾ.
ಚಾ.ಫ್ರಾ ಏಕ್ ನಾಟಕಿಸ್ತ್ ಮ್ಹಣ್ ಲೋಕ್ ಮ್ಹಣ್ತಿತ್ ಕಿತ್ಯಾಕ್ ತಾಚೆ ಎಕೆಕ್ ನಾಟಕ್ ಎಕೇಕ್ ಲಿಸಾಂವಾಚಿ ಕಾಣಿ.
ಚಾ.ಫ್ರಾ ಏಕ್ ಪತ್ರಿಕೋಧ್ಯಮಿ ಮ್ಹಣ್ ಲೋಕ್ ಮ್ಹಣ್ತಿತ್ ಕಿತ್ಯಾಕ್ ’ಪಯ್ಣಾರಿ’, ’ಉದೆವ್’, ’ಜಿವಿತ್’ ಪತ್ರಾಂನಿ ತಾಣೆಂ ಜೀವ್ ಭರ್ಲಾ.
ಚಾ.ಫ್ರಾ ಏಕ್ ಕಾಣ್ಯೆಗಾರ್ ಮ್ಹಣ್ ಲೋಕ್ ಮ್ಹಣ್ತಿತ್ ಕಿತ್ಯಾಕ್ ತಾಣೆಂ ಅಪುರ್ಭಾಯೆಚೊ
ಕಾಣ್ಯೊ
ಬರಯ್ಲ್ಯಾತ್.
ಚಾ.ಫ್ರಾ ಏಕ್ ಕವಿ ಮ್ಹಣ್ ಲೋಕ್ ಮ್ಹಣ್ತಿತ್ ಕಿತ್ಯಾಕ್ ತಾಚಾ ’ಸೊಂಶ್ಯಾಚೆ ಕಾನ್’ ಕವಿತಾಜಮ್ಯಾಂಕ್ ಕೇಂದ್ರ್ ಸಾಹಿತ್ಯ್ ಅಕಾಡೆಮಿಚೊ ಪುರಸ್ಕಾರ್ ಲಾಭ್ಲಾ.
ಪುಣ್ ಮ್ಹಜಾ ನದ್ರೆಂತ್ ಚಾ.ಫ್ರಾ ಕೊಂಕ್ಣೆಂತ್ಲಿ ಏಕ್ ಪ್ರತಿಭಾವಂತ್ ಆನಿ ದುರಂತಾಚಿ ಕಾಣಿ ಮ್ಹಳ್ಳೆಪರಿಂ ಭಗ್ತಾ.
ಚಾ.ಫ್ರಾ ಏಕ್ ಚಿಂತ್ಪಿ, ಸಮಾಜೆಚಾ ಎಕೆಕಾ ವಿಸ್ವ್ಯಾಚೆರ್ ತಾಚಿ ವಿಮರ್ಶಾತ್ಮಕ್ ನದರ್ ಆಸ್ತಾಲಿ. ಜಾಂವ್ ತೊ ಧಾರ್ಮಿಕ್ ವ ಲಾಯಿಕ್, ಜಾಂವ್ ತೊ ಹುದ್ದೇದಾರ್ ವ ಸಾದೊ ಬೊಳೊ. ಹಾಂವೆಂ ದುರಂತಾಚಿ ಕಾಣಿ ಕಿತ್ಯಾಕ್ ಮ್ಹಳೆಂ ಮ್ಹಳ್ಯಾರ್, ಹ್ಯಾ ಸಂಸಾರಾಂತ್ ಫಕತ್ತ್ ಪ್ರತಿಭಾ ಆಸ್ಲ್ಯಾರ್ ಮಾತ್ರ್ ಪಾವಾನಾ, ಬಗಾರ್ ತಾಂಕಾಂ ರಂಗ್ ದಿಂವ್ಚಿ ಕಲಾ ಜಾಣಾ ಆಸೊಂಕ್ ಜಾಯ್, ಜಿತ್ಲೊ ರಂಗ್ ದೀಂವ್ಕ್ ಜೊ ಸಕ್ತಾ ತಿತ್ಲ್ಯಾ ಉಂಚಾಯೆಕ್ ತೊ ಪಾವೊಂಕ್ ಸಕ್ತಾ. ಕಿತ್ಯಾಕ್ ಮ್ಹಳ್ಯಾರ್ ಸಂಸಾರಾಕ್ ರಂಗ್ ಪಸಂದ್. ಆನಿ ಹ್ಯಾ ಸಂಸಾರಿ ಬಾಜಾರಾಂತ್ ರಂಗ್ ಬರೊ ವಿಖೊನ್ ವೆತಾ ಶಿವಾಯ್ ಕಾಳೆಂ-ಧವೆಂ
(Black and white)
ನ್ಹಂಯ್.
ವೃತ್ತಿಪರ್ ದುಸ್ಮಾನ್ಕಾಯ್ ಹ್ಯಾ ದುರಂತಾಚೆಂ
ಕಾರಣ್?:
ಹೆಂ ಹ್ಯಾ ಲೇಖನಾಕ್ ಗರ್ಜೆಭಾಯ್ಲೆಂ ಚಿಂತಾಪ್ ತರ್ಯ್ ಚಾ.ಫ್ರಾ ಏಕ್ ದುರಂತಾಚಿ ಕಾಣಿ ಕಶಿ ಮ್ಹಳ್ಳೆಂ ಉಚಾರ್ಚಾಕ್ ಭೋವ್ಶಾ ಭೋವ್ ಗರ್ಜೆಚೆಂ. ಹ್ಯಾ ಸಂಸಾರಾಂತ್ ಹರ್ಯೆಕಾ ದೇಶಾಚಾ ಹರ್ಯೆಕಾ ಭಾಸಾಂನಿ ವೃತ್ತಿಪರ್ ದುಸ್ಮಾನ್ಕಾಯ್
(Professional Rivalry) ಜರೂರ್ ಆಸಾ. ಬಾಜಾರಾಂತ್ ಅಪ್ಲೆಂ ಮೋಲ್ ಚಡಂವ್ಕ್ ಕೀಳ್ ಚಿಂತ್ಪಾಚಾ ಮನ್ಶಾಂನಿ ಕರ್ಚೆಂ ಪಯ್ಲೆಂ ಕಾಮ್ ಜಾವ್ನಾಸಾ ಹೆರಾಂಚಿಂ ಖೊಡಿ ಕುಲ್ಪಾಂ ಕಾಡ್ಚಿಂ, ಮ್ಹಳ್ಯಾರ್ ಹೆರಾಂಚೊ ಖೊಡಿ ಕಾಡ್ನ್ ಅಪುಣ್ ಊಂಚ್ ಮ್ಹಣ್ ಧಾಖಂವ್ಚೆಂ ಪ್ರೇತನ್. ಕೊಂಕ್ಣಿ ಸಾಹಿತ್ಯ್ ಸಂಪೂರ್ಣ್ ವೃತ್ತಿಪರ್ ಖಂಡಿತ್
ನ್ಹಂಯ್ ತರ್ಯ್ ಕೊಂಕ್ಣೆಂತ್ ವೃತ್ತಿಪರತಾ ನಾ ಮ್ಹಳ್ಳೆಂ ಫಟ್.. ಚಾ.ಫ್ರಾಚಾ ಪ್ರತಿಭೆಚಿ ಸುರ್ವಾತ್ ತ್ಯಾ ವೆಳಾರ್ ಕೊಂಕ್ಣೆಚೆ ಮಹಾನ್ ಮ್ಹಳ್ಳ್ಯಾ ಸಾಹಿತಿಂಕ್ ಸೊಸುಂಕ್ ಜಾಂವ್ಕ್ ನಾ, ಕಾಂಯ್ ಅಪ್ಲ್ಯಾ ಮಾನಾಕ್ (?) ಸಂಚಿಕಾರ್ ಯೇತ್ಗಾಯ್ ಮ್ಹಳ್ಳೆಂ ಚಿಂತಾಪ್ ಆಸ್ಯೆತಾ. ತಾಕಾ ತೆಕಿದ್ ಚಾ.ಫ್ರಾಚೆಂ ಶೀದಾ-ಖಡಕ್ಕ್ ವೆಕ್ತಿತ್ವ್, ತೊಂಡಾಂತ್ ಏಕ್ ಮತಿಂತ್ ಏಕ್ ಸಾಂಗೊನ್ ಸಂಸಾರಾಕ್ ಬನಾಂವ್ಚಾ ಖಾಸ್ತಾಚೊ ತೊ ಭಿಲ್ಕುಲ್
ನ್ಹಂಯ್ ಆಸ್ಲ್ಲೊ ದೆಖುನ್ ತಾಕಾ ಮೆಟಾಂ ಮೆಟಾಂನಿ ಜಾಯ್ತ್ಯೊ ಅಡ್ಕಳ್ಯೊ ಲಾಭ್ಲ್ಯೊ.
ಆಪ್ಲ್ಯಾ ಸಾಹಿತಿಕ್ ಸುರ್ವಾತೆರ್ ಚಾ.ಫ್ರಾನ್ ಜಾಯ್ತ್ಯಾ ಹೆರ್ ಭಾಸಾಂನಿ ಅಪ್ಲೆಂ ಸಮ್ಜಣಿಂ ವ್ಹಾಡಯ್ಲಿ, ಪ್ರತ್ಯೇಕ್ಪಣಿಂ ಮರಾಠಿ ರಂಗ್ಮಂಚಾಂತ್ ತಾಕಾ ಜಾಯ್ತೊ ಪ್ರಭಾವ್ ಪಡ್ಲೊ ಮ್ಹಳ್ಳೆಂ ಹಾವೆಂ ತಾಚೆಂ ಅಧ್ಯಯನ್ ಕರ್ಚೆವೆಳಾರ್ ವಾಚ್ಲ್ಲೊ ಉಡಾಸ್. ತೊ ಖಂಡಿತ್ ಬಾಂಯ್ತ್ಲೊ ಮಾಣ್ಕೊ ಜಾಂವ್ಕ್ ನಾತ್ಲ್ಲೊ ತರ್ಯ್ ’ಕುಂಡೊ ಖಾವ್ನ್ ಸವಯ್ ಜಾಲ್ಲ್ಯಾ ಆಮ್ಚಾ ಲೊಕಾಂಕ್ ಉಂಡೊ ರುಚ್ತಲೊ ತರ್ಯ್ ಕಸೊ?’.
ಮ್ಹಾಕಾ ಅಜೂನ್ ಉಗ್ಡಾಸಾಕ್ ಆಸ್ಚಿ ಏಕ್ ಸಂಗತ್ ಭೋವ್ಶಾ ಆತಾಂ ಉಗ್ಡಾಪೆ ಕರ್ಚಿ ಗರ್ಜ್ ಆಸಾ,
1991 ಇಸ್ವೆಂತ್ ಜೆದ್ನಾಂ ಮಂಗ್ಳುರಾಂತ್ ಬರವ್ಪ್ಯಾಂಚೊ ಎಕ್ತಾರ್ ಘಡ್ಚೆವಿಶಿಂ ಕಾಮ್ ಚಲ್ಲೆಂ [ವಿಜೆಪಿ ಸಲ್ಡಾಞ್, ಎ.ಟಿ.ಲೊಬೊ, ಚಾ.ಫ್ರಾ, ಸಿಜ್ಯೆಸ್ ತಾಕೊಡೆ, ರಿಚ್ಚಿ ಪಿರೇರ್, ಪಂಚು ಬಂಟ್ವಾಳ್, ಮೌರಿಸ್ ಶಾಂತಿಪುರ್, ಟೈಟಸ್ ತಾಕೊಡೆ, ಡಾ|ಎಡ್ವರ್ಡ್ ನಜ್ರೆತ್, ಸಿಲ್ವೆಸ್ಟರ್ ಸೊಜ್ (ತವಳ್ಚೊ ಉದೆವ್ ಸಂಪಾದಕ್) ಆನಿ ಹೆರ್ ಥೊಡೆ, ಹಾಂಚೆಸವೆಂ ಹಾಂವ್ಯ್ ಎಕ್ಲೊಂ ಜಾವ್ನ್ ಆಸ್ಲ್ಲೊಂ]. ತ್ಯಾ ವೆಳಾರ್ ಎಕ್ಲ್ಯಾ ದೊಗಾಂ ಮಹಾನ್ ಸಾಹಿತಿಂನಿ ತಾಂಕಾಂ ಆಪವ್ಣೆಂ ಪತ್ರ್ ಧಾಡ್ಲೆಲ್ಯಾ ವೆಳಾರ್ ಅಶಿ ಜಾಪ್ ದಿಲ್ಲಿ ’ಖಂಚಾ ಮೆಳಿಂತ್ ಚಾ.ಫ್ರಾ ಆಸಾ ಥಂಯ್ಸಚ್ ಆಮಿಂ ಆಸ್ಚಿಂನಾಂವ್’. ಅಶೆಂ ಆಮ್ಚಿಂ ಸುರ್ವಿಲಿಂ ಪಾವ್ಲಾಂ ಥಂಯ್ಚರ್ಚ್ ಥಾಂಬ್ಲ್ಲಿಂ.
ಉಪ್ರಾಂತ್ ಥೊಡ್ಯಾಚ್ ವರ್ಸಾಂನಿ ಹೊ ಬರವ್ಪ್ಯಾಂಚೊ ಎಕ್ತಾರ್ ಜಾಲೊಚ್ ಮ್ಹಣ್ಯಾಂ, ತೊಯ್ ಚಾ.ಫ್ರಾ, ಜೊಸಾ, ವಿಜೆಪಿ, ಎಟ್ಯೆಲಾ ಶಿವಾಯ್... ಹೆಂ ವಾಸ್ತವ್!!! ಹೆಚ್ಚ್ ದೆಖುನ್ ಚಾ.ಫ್ರಾಕ್ ಅಪ್ಲ್ಯಾ ಪ್ರತಿಭೆಕ್ ಸರಿ ಜಾಲ್ಲೊ ಮಾನ್ ಮಂಗ್ಳುರ್ಚಾ ಕೊಂಕ್ಣಿ ಪರ್ಜೆಕ್ ದೀಂವ್ಕ್ ಜಾಲೊಚ್ ನಾ. ಹೆಂ ಮಾತ್ರ್ ಆಮಿ ಜೀವ್ ಆಸ್ತಾಸರ್ ಆಮ್ಕಾಂ ಆಮ್ಚಾ ಅಂತಸ್ಕರ್ನಾಕ್ ಖೊಂಕ್ಚಿ ದೂಕ್ ಜಾವ್ನಾಸಾ. (ಅಂತಸ್ಕರ್ನ್ ಆಸ್ಚಾಂಕ್!).
ಚಾ.ಫ್ರಾ ಏಕ್ ವೆಕ್ತಿ ಜಾವ್ನ್:
ಚಾ.ಫ್ರಾ ಮ್ಹಜೆಪರಿಂಚ್ ಏಕ್ ಮನಿಸ್ ರಗ್ತಾ ಮಾಸಾಚೊ ಮ್ಹಣ್ತಚ್ ತಾಚೆಲಾಗಿಂಯ್ ಲ್ಹಾನ್-ವ್ಹಡ್ ಸಂಗ್ತ್ಯೊ ಆಸ್ತಿತ್, ಆಸ್ಲ್ಲ್ಯೊ. ಪುಣ್ ಜಿಣ್ಯೆಚಾ ದಿಸಾಂನಿ ಕಿತ್ಲೆ ಸಂಕಷ್ಟ್ ತಾಕಾ ಭೊಗುಂಕ್ ಪಡ್ಲೆ ತರ್ಯ್ ತೊ ಅಪ್ಲೆಂ ಕೊಂಕ್ಣಿ ಮಿಸಾಂವ್ ಸಾಂಡುನ್ ಪೊಳ್ಳೊನಾ ಆನಿ ಅಖ್ರೇಕ್ ತಾಚೆಂ ಪತ್ರ್ ’ಜಿವಿತ್’ ತಶೆಂಚ್ ತಾಚೆಂ ’ಜಿವಿತ್’ ದೊನ್ಯ್ ಎಕಾಚ್ ಘಡ್ಯೆ ಹ್ಯಾ ಸಂಸಾರಿಂ ಮುಗ್ದಾಲೆಂ...
ಹೆಂ ಚಾ.ಫ್ರಾ.ಚೆರ್ ಸಮೀಕ್ಶಾಚೆಂ ಲೇಖನ್ ನ್ಹಂಯ್, ಬಗಾರ್ ತಾಚಾ ಬುಕಾಚೆಂ ಸಮೀಕ್ಶಾ ಲೇಖನ್, ತರ್ಯ್ ಚಾ.ಫ್ರಾ ವಿಶಿಂ ಥೊಡೆಂ ಬರಂವ್ಚೆಂ ಗರ್ಜೆಚೆಂ.
’ಆಯ್ಲೆಂ ತಶೆಂ ಗಾಯ್ಲೆಂ’:
ಚಾ.ಫ್ರಾಚಿ ಕೊಂಕ್ಣಿ ಸಾಹಿತಿಕ್ ವಳೊಕ್ ಆಸ್ಚಾಂತ್ ಹ್ಯಾ ತೀನ್ ಸಬ್ಧಾಂಚೊ ಖರೊ ಅರ್ಥ್ ಭೋವ್ ಗುಂಡಾಯೆಚೊ ದಿಸ್ತಾ. ಹೆ ತೀನ್ ಸಬ್ಧ್ ’ಆಯ್ಲೆಂ ತಶೆಂ ಗಾಯ್ಲೆಂ’ ಬಿಲ್ಕುಲ್ ’ಆಯ್ಲೆಂ ಆನಿ ಗಾಯ್ಲೆಂ’ ಜಾಂವ್ ವ ’ಆಯ್ಲೆಂ ದೆಖುನ್ ಗಾಯ್ಲೆಂ’ ಮ್ಹಣ್ ಜಾಯ್ನಾಂ ಬಗಾರ್ ’ಆಯ್ಲೆಂ ತಶೆಂ ಗಾಯ್ಲೆಂ’ ಮ್ಹಣ್ ಜೊಕ್ತೆಂ ಜಾತಾಂ;
’ಪಣ್ತೆಚಿ ಪೆಲಿ’ ಬುಕಾಂತ್ ತಾಚಿಂ ಬರ್ಪಾಂ ಆಸಾತ್, ಚಡ್ತಾವ್ ಆಯ್ಚಾ ಕಾಳಾರ್ಯ್ ಪ್ರಸ್ತುತ್ ಜಾಲ್ಲಿಂ ಜಾವ್ನಾಸಾತ್, ಪುಣ್ ಹಾವೆಂ ಸಮೀಕ್ಶಾಕ್ ವಿಂಚ್ಲ್ಯಾಂತ್ ’ಕವಿತಾ’.
ಹ್ಯಾ ಭಾಗಾಂತ್ 46+2
ಕವಿತಾ ಆಸಾತ್, ಥೊಡಿಂ ಕವಿತಾ ಎದೊಳ್ಚ್ ಆಮಿ ಚಡ್ತಾವಾಂನಿ ವಾಚ್ಲ್ಯಾಂತ್ ಪುಣ್ ಥೊಡಿಂ ಕವಿತಾ ಅಜೂನ್ ಕೊಣೆಂಚ್ ವಾಚುಂಕ್ ನಾತ್ಲ್ಲಿಂ ಜಾವ್ನಾಸ್ತಿತ್.
ಪುಣ್ ಚಾ.ಫ್ರಾ.ಚಿಂ ಕವಿತಾವಿಶಿಂ ಬರಂವ್ಕ್ ಗೆಲ್ಯಾರ್ ಪಾನಾಂ ಉಣಿಂ ಪಡ್ತಿತ್, ಸಬ್ಧ್ ಉಣೆಂ ಪಡ್ತಿತ್.. ತರ್ಯ್ ಮಟ್ವ್ಯಾನ್ ತರ್ಯ್ ದೋನ್ ಸಬ್ಧ್ ಉಚಾರ್ಚೆ ತರ್;
ಹ್ಯಾ ಸಂಸಾರಾಂತ್ ಜಾಯ್ತೆ ಕವಿ ಕವಿತಾಂ ಬರಯ್ತಾತ್, ಕೊಣ್ ಗರ್ಜೆಕ್ ಕೊಣ್ ಮರ್ಜೆಕ್ ಆನಿ ಕೊಣ್ ಖೊರ್ಜೆಕ್. ಕೊಣಾಕ್ ಕವಿತಾ ಲಿಸಾಂವ್, ಕೊಣಾಕ್ ಪಾಶಾಂವ್ ತರ್ ಆನಿ ಕೊಣಾಕ್ ತೆಸಾಂವ್. ಕವಿತಾಂಕ್ ಏಕ್ ಹಾತೆರ್ ಕರ್ನ್ ಸಮಾಜ್ ಸುಧಾರಣಾಚೆಂ ಕಾಮ್ ಕರ್ಚೆಂ ಧಯ್ರ್ ಆನಿ ಮನ್ ಆಸ್ಚೆಂ ಭೋವ್ ಥೊಡ್ಯಾಂಕ್. ಕಿತ್ಯಾಕ್ ಮ್ಹಳ್ಯಾರ್ ಸಮಾಜೆಕ್ ಫುಗಾರ್ಲ್ಯಾರ್ ಮಾತ್ರ್ ಸಂತೊಸ್ ಪಾವೊಂಕ್ ಜಾತಾ ಶಿವಾಯ್ ಸಮಾಜೆಕ್ ಖೊಂಕುಂಕ್ ಗೆಲ್ಯಾರ್ ಮೆಳ್ಚಿ ಫಕತ್ತ್ ದುಸ್ಮಾನ್ಕಾಯ್. ತರ್ಯ್ ಅಪ್ಲ್ಯಾ ಧ್ಯೇಯಾಂಕ್ ಸೊಡ್ನ್ ದೀನಾಸ್ತಾನಾ ಚಾ.ಫ್ರಾನ್ ಸಾಹಿತ್ಯಾಚಾ ಎಕೆಕಾ ಪ್ರಕಾರಾಂನಿ ಸಮಾಜಿಕ್ ನಿತಿಚೆರ್ ಆರ್ಸೊ ಧರ್ಲಾ. ಜಾಂವ್ ತಿಂ ಕೊಡ್ಯಾಳ್ಚಿಂ ಬಸ್ಸಾಂ ಜಾಂವ್, ಮ್ಹಾತಾರೆಚಿ ಖಾಡ್ಕಿ ಜಾಂವ್. ಜಾಂವ್ ತೊ ಪಾದ್ರ್ಯಾಬಾಚೊ ಲೋಬ್ ವಾ ಬಾಯಾಂಚಿ ಮಾಂದ್ರಿ..
ಚಾ.ಫ್ರಾ ಏಕ್ ಗೂಂಡ್ ಚಿಂತ್ಪಿ, ಸಮಾಜೆಚಾ ಸಂದಾ ಸಂದಾಂಕ್ ಅಪ್ಲ್ಯಾ ಗಿದಾಚಾ ದಿಶ್ಟಿಂತ್ ವೊರಾವ್ನ್ ಪಳೆಲ್ಲೊ, ಸೊಂಶ್ಯಾಚಾ ಕಾನಾಂನಿ ಆಯ್ಕಲ್ಲೊ. ತಾಕಾ ಸಮಾಜೆಂತ್ ಘಡ್ಚಾ ಎಕೆಕಾ ಸಂಗ್ತೆಚಿ ಮಾಹೆತ್ ತಾಕಾ ಆಸಾ, ತಿ ಜಾಂವ್ ರುಕಾರ್ ಥಾವ್ನ್ ಪಡ್ಚೊ ಸುಕೊ ಖೊಲೊ, ವ ವೊಡ್ತಾಂತ್ಲ್ಯಾ ಫುಲಾಚೆರ್ ಬೊಸ್ಲ್ಲೊ ಮೂಸ್, ಅಸ್ಕತ್ ಮನ್ಶ್ಯಾಚ್ಯೊ ಅಸಹಾಯಕ್ ಖಿಳ್ಣ್ಯೊ ಜಾಂವ್ ವ ಲೊಬಾರಾಂಚೆ ಧೆಂಕ್.. ಹರ್ಯೆಕಾಕ್ ಹಾಣೆಂ ಆಪ್ಲ್ಯಾ ಗಿದಾ ನದ್ರೆನ್ ಪಳೆಲ್ಲೊ.. ಪಾರ್ಕಿಲ್ಲೊ.. ತಶೆಂಚ್ ಅಪ್ಲ್ಯಾ ಕವಿತೆಂತ್ ತಾಂಚಾ ಕರ್ತುವಾಂಚೆ ಕಾಳೆ ಪರ್ಧೆ ಉಕಲ್ಲಲೊ.
ಚಾ.ಫ್ರಾ ಏಕ್ ನಾಟಕಿಸ್ತ್, ಏಕ್ ಕಾಣ್ಯೆಗಾರ್, ಏಕ್ ಪತ್ರಿಕೋಧ್ಯಮಿ, ಏಕ್ ಉಲವ್ಪಿ, ಏಕ್ ನಟ್, ದಿಗ್ದರ್ಶಕ್ ಪುಣ್ ಸರ್ವಾಂಚಾಕೀ ಪಯ್ಲೆಂ ಏಕ್ ಪ್ರತಿಭಾವಂತ್, ಸಾದೊ ಮನಿಸ್, ಏಕ್ ಗೂಂಡ್ ಚಿಂತ್ಪಿ. ಆನಿ ಹಾಚಿ ರುಜ್ವಾತ್ ಹಾಚೆಂ ಸಾಹಿತ್ಯ್..
ದೆವಾಚೆ ದಯೆನ್ ತೆಂ ಸಾಹಿತ್ಯ್ ಮಾಡಾಮುಳಾಚೆಂ ಸಾರೆಂ ಜಾಯ್ನಾಸ್ತಾಂ ಕೊಂಕ್ಣಿ ಸಾಹಿತ್ಯ್ ಸಂಸಾರಾಂತ್ ನವೆಂ ದಾಯ್ಜ್ ಜಾವ್ನ್ ಪರತ್ ಉದೆಲಾಂ - ಹೆಂ ಖಂಡಿತ್ ಕೊಂಕಣಿ ಮಾಯೆಚೆರ್ ಲಾಭ್ಲ್ಲೆಂ ಏಕ್ ಬೆಸಾಂವ್ ಮ್ಹಣ್ ಹಾಂವ್ ಕಾಳ್ಜಾ-ಮನಾಂತ್ ಲೆಕುನ್ ತಾಚಾ ಎಕೆಕಾ ಕವಿತಾಚೆರ್ ನದರ್ ಭಂವ್ಡಾಂವ್ಕ್ ಅಭಿಮಾನ್ ಪಾವ್ತಾಂ;
ತಾಚಾ ಎಕೆಕಾ ಕವಿತಾಚೆರ್ ಮಟ್ವ್ಯಾನ್ ನದರ್ ಭಂವ್ಡಾಂವ್ಚಿ ತರ್;
’ಹಾತಿಂ ಮುಗೆಲ್ಯಾ ಪಣ್ತೆಚಿ ಪೆಲಿ
ಕೊಂಕಣಿ ಮ್ಹಜೆಂ ನಾಂವ್
ಆಜ್ ಮುಗೆಲಿ ಆಸ್ಡಿ ವೊಲಿ
ಕೊಂಕಣ್ ಮ್ಹಜೊ ಗಾಂವ್
ದೊಳ್ಯಾಂತ್ ಝರಿ ಕಾಳ್ಜಾಂತ್ ಡೋಲಿ
ಆವಾಜ್ ಡಾಂವ್ ಡಾಂವ್
ಚಾಲಿಂತ್ ಲಾಲಿ ಪೊಲ್ಯಾರ್ ಭುಲಿ
ಕಾರಣ್ ಜಾಣಾಂ ಹಾಂವ್
ಘರಾಂತ್ ಜಲ್ಮ್ ತೆರಾಂತ್ ದಿವಾಳಿ
ಬಾಳ್ ನಂದನ್ ಜಾಂವ್
ಗಾಂವಾರ್ ನಾಳಿ ಪಾಳ್ಣ್ಯಾಂತ್ ಕಳಿ
ಬಾಳ್ ಗಾಜೊಂ ಗಾಂವ್
ಹಾತಿಂ ಮುಗೆಲ್ಯಾ ಪಣ್ತೆಚಿ ಪೆಲಿ
ಮತಿಂತ್ ವೊರೆಸಾಂವ್
ಆಜ್ ಮುಗೆಲಿ ಆಸ್ಡಿ ವೊಲಿ
ಶುಭ್ ತುಜೆಂ ಜಾಂವ್’ (ಪಣ್ತೆಚಿ ಪೆಲಿ)
ಮ್ಹಳ್ಯಾರ್ ಸಮಾಜೆಂತ್ ದೆಡ್ಕಿ ಆಸ್ಲ್ಯಾರ್ ಮಾತ್ರ್ ಕೊಣಾಚಿಯ್ ಉಡ್ಕಿ ಆಸ್ಯೆತಾ ಮ್ಹಳ್ಳೆಂ ಸತ್ ಪರತ್ ತೊ ಉಚಾರ್ತಾ, ಪಣ್ತೆಚಿ ಪೆಲಿ ಮ್ಹಣ್ಜೆ ಕೊಂಕ್ಣಿ ಭಾಸ್. ಪುಣ್ ಆಜ್ ತಿ ಪೆಲಿ ಆಮಿ ಖಂಯ್ಚರ್ ದವರ್ಲ್ಯಾ ಮ್ಹಣ್ ವೊರಾವ್ನ್ ಪಳೆಲೆಂ ತರ್ ತ್ಯಾ ಕವಿತೆಚೊ ನೀಜ್ ಮತ್ಲಬ್ ಸುಸ್ತಾತಾ. ಚಾ.ಫ್ರಾಚಾ ಕೊಂಕ್ಣಿ ಮೊಗಾಚೆರ್ ನಿದರ್ಶನ್ ದಿಂವ್ಚೆಂ ಅನ್ಯೇಕ್ಕವಿತಾ ಅಶೆಂ ಆಸಾ;
"ಸೊಭಾಗೆಚಾ ಹ್ಯಾಯೀ ವೆಳಾ
ಕಾಳ್ಜಾಂತ್ ಆಮ್ಚಾ ಆಗ್ಟೆಂ ಜಳ್ತಾ
ಮೊಗಾಚೆಂ, ಸಂತೊಸಾಚೆಂ, ಉಲ್ಲಾಸಾಚೆಂ
ಕಿತ್ಯಾಕ್ ಕೊಂಕಣೆಚೊ ವಿಚಾರ್, ತಿಚೊ ಉಲೊ, ತಿಚೆಂ ಉತರ್
ಸಮಾಜಿಚಾ ಕೊನ್ಶಾ ಕೊನ್ಶಾರ್ ಆಮಿಂಯೀ ವೆಲಾಂ
ಬುಕಾಂನಿ, ಕಾಣಿಯಾಂನಿ, ಗಿತಾಂನಿ, ಪದಾಂನಿ ಆನಿ ಪತ್ರಾಂನಿ
ದೆಕುನ್ ಆತಾಂ ಚೆಪೆಂ ಉಕ್ಲುನ್ ಬಾವ್ಳೆ ಉಸವ್ನ್
ಆಸ್ಡೆರ್ ದೊದೋನ್ ದುಖಾಂ ಬಸೊವ್ನ್ ಆನಂದಾಚಿಂ
ಮಾಗ್ತಾಂವ್ ಉತ್ರಾಂ ಮೆಳಾನಾಸ್ತಾನಾ
ಜಿಯೆ ಭುಮಿರ್, ಜಿಯೆ ವಾರ್ಯಾರ್, ಜಿಯೆ ಉದ್ಕಾರ್
ಕಮಳಾಚಾ ಸೊಭಾಯೆನ್, ಕಸ್ತುರೆಚಾ ಪರ್ಮಳಾನ್
ಜಿಯೆ ಕೊಂಕಣಿ ಮಾಯೆ."
ಪುಣ್ ಆಜ್ ಕೊಂಕಣಿ ಮ್ಹಳ್ಯಾರ್ ಕೊಣಾ ಕೊಣಾಚಾ ತುರುಪಾಚೊ ಎಕ್ಕೊ ಜಾಲಾ. ಕೊಂಕಣಿ ಮ್ಹಳ್ಳೆ ಬಿಲ್ಲೆ ಘೆವ್ನ್ ಆಪಾಪ್ಲಿಂ ಭೊಳ್ಕಿಂ ಭರ್ಚೆ ಜಾಯ್ತೆ ಹೆಣೆಂ ತೆಣೆಂ ಆಸಾತ್, ಆನಿ ವೆವಸ್ತಿತ್ ರಿತಿಚೊ ಬಾಜಾರ್ ಕರ್ನ್ಂಚ್ ಆಸಾತ್. ಹೆಂ ಸತ್ ಹ್ಯಾ ಬುಕಾಚಾ ಪರ್ಗಟ್ಣಾರಾಕ್ ಕಳಿತ್ ಆಸಾ ದೆಕುನ್ ತೊ ಅಶೆಂ ಉಚಾರ್ತಾ;
"ಕೊಂಕಣಿಚಾ ನಾಂವಾರ್ ಆಪಾಪ್ಲಿಂ ತಾಲೆಂತಾಂ ಗಾಜೊವ್ನ್, ನಾಂವ್, ಧನ್ ಆನಿ ಮಾನ್ ಜೊಡುನ್ ಆಪಾಪ್ಲಿ ತಾನ್ ಭಾಗಂವ್ಚಾ ಮನ್ಶಾ ಸಂಯ್ಬಾಕ್ ಸಹಜ್ ಜಾಲ್ಲ್ಯಾ ವಾವ್ರಾವರ್ವಿಂ ಕೊಂಕಣಿಚೀಯ್ ಇಲ್ಲಿ ಉದರ್ಗತಿ ಜಾಲ್ಯಾ" (ಕ್ಲಿಫರ್ಡ್ ಸೊಜ್)
ಪುಣ್ ಕಿತೆಂಯ್ ಆಸೊಂ, ಹೊ ಬೂಕ್ ಪರ್ಗಟ್ಚಿ ಕೊಂಕ್ಣೆಥಂಯ್ ದಯಾ ಧಾಖಯಿಲ್ಲ್ಯಾ ತಾಕಾ ಖರೆಂಚ್ ಶಾಭಾಸ್ಕಿ! ತಾಚಾಚ್ ಉತ್ರಾಂನಿ ಸಾಂಗ್ಚೆಂ ತರ್; "ಹೆ ಗೃಂಥ್ ಕಿತ್ಲೆ ಜಣ್ ಘೆತಿತ್ ಆನಿ ವಾಚ್ತಿತ್ ಮ್ಹಣ್ ತಕ್ಲಿ ತಾಪಂವ್ಚಿ ನ್ಹಂಯ್. ಕೊಂಕಣಿ ಭಾಶೆಚೆಂ ಅಧ್ಯಯನ್ ಕರ್ನ್ ಕೊಂಕಣಿಚೆಂ ಆಂಗ್ಭರ್ಚಾ, ಗುಪಿತ್ ಆಸೊನ್ ಕೊಂಕಣಿ ಸಾಹಿತ್ಯ್ ಅಧ್ಯಯನಾಚೊ ವಾವ್ರ್ ಕರ್ಚಾ ಚಿಮ್ಟಿಭರ್ ಭಾಶಾಪ್ರೇಮಿಂಕ್ ಹೆ ಗೃಂಥ್ ಅಮೂಲ್ಯ್ ದಾಯ್ಜ್ ಜಾತೆಲೆಂ ಮ್ಹಣ್ಚಿ ಏಕ್ ಸಂಗತ್ ಮಾತ್ರ್ ಖಂಡಿತ್."
ಚಾ.ಫ್ರಾ. ಕವಿ ಜಾವ್ನ್ ಉದೆಲ್ಲೊ ಕೆನ್ನಾಂ?
ಚಾ.ಫ್ರಾ.ಚೆಂ ಪಯ್ಲೆಂ ಕವಿತಾ ’ಸ್ವಪ್ಣಾಂತುಲೆಂ ರಾಜ್’;
1951 ಇಸ್ವೆಂತ್ ಆಲ್ ಇಂಡಿಯಾ ರೇಡಿಯೊ ಮುಂಬಯ್ಚೆರ್ ವಾಚ್ಲ್ಲೆಂ ಅಶೆಂ ಆಸಾ;
’ಸಾವ್ಳ್ಯಾಂ ಶೆತಾಂ ವೊಳಿಂ, ವೊಡಾ ರುಕಾ ಮುಳಿಂ
ಕೊವ್ಳೊನ್ ಆಸ್ತಾಂ, ನೇತ್ರಾವತಿ ವ್ಹಾಳತ್ ಸುಳ್ಸುಳಿಂ
ಸಕಾಳಿಂಚಾ ಸುರ್ಯಾನ್ ಸಕಾಳ್ ಚೊವುಂಕ್ ನಾಸ್ಲ್ಲೊ
ನಿದ್ರಾ ಜಾಗಂವ್ಕ್ ತಾಚಿ ಕೊಂಬ್ಯಾನ್ ಸಾದ್ ಘಾಲೊ
ಕೊನ್ಶಾಂತುಲೆ ಕೊಗ್ಳಿಬಾಯೆ ಪೆಂಪಾರೆಂ ತುಜೆಂ ವ್ಹಾಜ್
ಮನ್ ಮ್ಹಜೆಂ ಜಾಲಾಂ ಕಾಲುಬುಲೆಂ ಆಜ್
ಪಳಾನ್ಪಳ್ ಮತಿಕ್ ಯೆತಾ ಸ್ವಪ್ಣಾಂತುಲೆಂ ರಾಜ್.’
ಕವಿತಾ ಮ್ಹಳ್ಯಾರ್ ಇತ್ಲೆಂಚ್ ಲಾಂಬ್, ರೂಂದ್ ಆಸಾಜಯ್ ಮ್ಹಳ್ಳೆಂ ಚಿಂತಾಪ್ ಭೋವ್ಶಾ ಫಟ್ ಕರ್ನ್ ಕವಿತೆಂಚೊ ಉಜೊ ಪೆಟಯಿಲ್ಲೊ ಚಾ.ಫ್ರಾ ಮ್ಹಣ್ಚಾಕ್ ಹೆಂ ಕವಿತಾ ಗೊವಾಯ್ ದಿತಾ. ಹ್ಯಾಚ್ಚ್ ಕವಿತೆಚಿ ಅಖೇರ್ಚಿ ಪಂಗತ್ ಅಶಿ ಆಸಾ;
’ಕಾಳ್ಶೆಲಾಂ ಮಳಬ್
ಮಳ್ಬಾರ್ ನೆಕೆತ್ರಾಂ
ಮೆಜುಂಕ್ ಆಶೆಲೊಂ
ಮವಾಲಿ ಪೋರ್ ಮೆಜುನ್ ಗೆಲೊ
ಹಾಂವ್ ಖರ್ಶೆಲೊಂ’
ತಶೆಂ ಮ್ಹಣೊನ್ ಚಾ.ಫ್ರಾನ್ ಪ್ರಾಸ್-ಅಲಂಕಾರಾಚೆರ್ ಕವಿತಾ ರಚುಂಕ್ ನಾಂತ್ ಮ್ಹಣ್
ನ್ಹಂಯ್. ತಾಣೆಂ ಅಪುರ್ಭಾಯೆಚಿಂ ಪ್ರಾಸ್-ಅಲಂಕಾರಿತ್ ಉತ್ರಾಂಚಿಂ ಕವಿತಾ ಲಿಖ್ಲ್ಯಾಂತ್ ತರ್ಯೀ ತಾಚಿಂ ಬರ್ಯಾಂತ್ಲಿಂ ಬರಿಂ ಕವಿತಾ ಫ್ರೀ ವರ್ಸಾಚೆರ್
(Free verses)ಆನಿ ಬ್ಲ್ಯಾಂಕ್ ವರ್ಸಾಚೆರ್
(Blank verses) ಆಸಾತ್. ಚಾ.ಫ್ರಾಚಿ ಕವಿತೆಂಚಿ ಪ್ರತಿಭಾ ಫಕತ್ತ್ ಕವಿತಾಂನಿ ಮಾತ್ರ್ ನ್ಹಂಯ್, ತಾಚಾ ನಾಟಕಾಂನಿ ಸಯ್ತ್ ವಾಚುಂಕ್/ಆಯ್ಕೊಂಕ್ ಮೆಳ್ತಾತ್. ತಾಚಾ ಸಾಹಿತಿಕ್ ಪ್ರತಿಭಾಥಂಯ್ ಹ್ಯಾ ಬುಕಾಚಿ ಸಂಪಾದ್ಪಿಣ್, ಚಾ.ಫ್ರಾಚಿ ಪತಿಣ್ ಅಶೆಂ ಲಿಖ್ತಾ;
"ಸಾಹಿತ್ಯಾಚೆ ಸರ್ವಯ್ ಪ್ರಕಾರ್ ತಾಚಾ ಫುಲ್ತ್ಯಾ ಫಳ್ತ್ಯಾ ಮತಿಂತ್ ಮೊಳೊನ್ ಯೆತಾಲೆ, ಜಾಲ್ಲ್ಯಾನ್ ಖಂಯ್ಚ್ಯಾ ಸಾಹಿತಿಕ್ ಪ್ರಕಾರಾಂತ್ ಚಾ.ಫ್ರಾ.ಕ್ ವರ್ತೊ ಮ್ಹಣ್ ವಳ್ಕೊಂಚೆಂ ಮ್ಹಳ್ಳೆಂ ಏಕ್ ಸವಾಲ್ ಜಾವ್ನ್ ಉರೆಲೆಂ. ಚಾ.ಫ್ರಾ. ಏಕ್ ಉತ್ತೀಮ್ ವರ್ಗಾಚೊ ಪತ್ರ್ಕರ್ತ್, ಲೇಖಕ್, ಕಥಾ ಕಾದಂಬರಿ ಬರಣಾರ್, ನಾಟಕ್ಕಾರ್ ಆನಿ ಕವಿಚ್ಚ್
ನ್ಹಂಯ್, ಉಂಚ್ಲ್ಯಾ ಪಾಂವ್ಡ್ಯಾಚೊ ಭಾಷಣ್ಕರ್ತ್, ದಿಗ್ದರ್ಶಕ್ ಆನಿ ನಟ್ಯೀ ಜಾವ್ನ್
ಆಸ್ಲ್ಲೊ." (ಸ್ಟೆಲ್ಲಾ ಡಿ’ಕೋಸ್ತಾ).
ಆಮ್ಚಾ ಕೊಂಕ್ಣಿ ಸಮಾಜೆಂತ್ ಎಕ್ವಟ್ ಏಕ್ ಸೊಡ್ನ್ ಹೆರ್ ಸಗ್ಳೆಂ ಆಸಾ, ಹೆಂ ಉಣೆಂಪಣ್ ಮ್ಹಣೊ ವ ಶಿರಾಪ್ ಮ್ಹಣೊಂ ತೆಂ ಮ್ಹಾಕಾ ಕಳಾನಾ; ಚಾ.ಫ್ರಾ.ಚಾ ಉತ್ರಾಂನಿ ಸಾಂಗ್ಚೆಂ ತರ್ "ಅಜೂನ್ ವರೇಗ್ ಕೊಂಕಣಿ ಸಮಾಜ್ ಏಕ್ ಸಾಹಿತಿಕ್ ಸಮಾಜ್ ಜಾವ್ನ್ ಎಕ್ವಟೊಂಕ್ ನಾ. ಹೆಂ ಕೊಂಕಣಿ ಕುಟಾಮ್ ಮಿಕ್ಳಾಲಾಂ, ತಶೆಂ ಮೆಕ್ಳೆಲಾಂ, ನಾಂವಾಕ್ ಏಕ್ ಕೊಂಕಣಿ ಸಮಾಜ್ ಖರ್ಯಾನ್ ಲ್ಹಾನ್ ಲ್ಹಾನ್ ಜಮ್ಯಾಂಚಿ ಚಿಂದಿ"
ಹೆಂಚ್ ಚಿಂತಾಪ್ ಸ್ತೆಲ್ಲಾ ಬಾಯ್ ಅಶೆಂ ವೆಕ್ತ್ ಕರ್ತಾ;
"ಅಪ್ಲ್ಯಾಕ್ ಅಪ್ಲೊ ಆಪ್ಲ್ಯಾ ಘರಾಂತ್ ವಳ್ಕಾನಾ. ಮಾನಾಚೆಂ ಸವಾಲ್ಚ್ ನಾ. ಅಶೆಂ ಆಮ್ಚಾ ಮಂಗ್ಳುರೀ ಕ್ರಿಸ್ತಾಂವ್ ಸಮಾಜೆಂತ್ ನಾಂವ್ ನಾಸ್ತಾನಾ ಆಳ್ವೊನ್ ಗೆಲ್ಲೆ ಸಭಾರ್ ಆಸೊನ್, ಅಪ್ಲೆಂಚ್ ವ್ಹಡಪ್ ಬಡಂವ್ಪ್ಯಾಂ ಮಧೆಂ ತೆ ನಾಂಚ್ ಜಾವ್ನ್ ಗೆಲ್ಯಾತ್." (ಸ್ಟೆಲ್ಲಾ ಡಿ’ಕೋಸ್ತಾ.)
ಚಾ.ಫ್ರಾಚಾ ಬರ್ಪಾಂನಿ/ಕವಿತೆಂನಿ ಮೆಳ್ಚೆ ಅನ್ಯೇಕ್ ಸತ್ ಮ್ಹಳ್ಯಾರ್ ಸವಾಲಾಂ;
’ಥೊಡೆ ಪಾವ್ಟಿಂ ಪಾವ್ಸ್ ಪಡ್ತಾ ಆನಿ ಥೊಡೆ ಪಾವ್ಟಿಂ ರಡ್ತಾ ಕಿತ್ಯಾಕ್?’ (ಪಾವ್ಸ್)
’ದೆವಾಕ್ ಜರ್ ಪಾತ್ಯೆತಾಯ್ ತರ್ ದೆಂವ್ಚಾರ್ ಕಿತ್ಯಾಕ್ ನಾಕಾ?’ (ದೇವ್ ಆನಿ ದೆಂವ್ಚಾರ್)
ಧಾರ್ಮಿಕ್ ಚಿಂತ್ಪಾಚಾ ಮನ್ಶಾಂಕ್ ಚಾ.ಫ್ರಾ ಏಕ್ ನಾಸ್ತಿಕ್ ಮ್ಹಳ್ಳೆಪರಿಂ ದಿಸೊಂಕ್ ಪುರೊ, ಪುಣ್ ಗುಂಡಾಯೆನ್ ತಾಚಿಂ ಬರ್ಪಾಂ ವೊರಾಯ್ಲಿಂ ತರ್ ತಾಕಾ ದೆವಾಚೆರ್ ಶಿಣ್ ನಾತ್ಲ್ಲೊ, ಬಗಾರ್ ದೆವಾಚಾ ಪಾಟ್ಲಾವ್ದಾರಾಂಚೆರ್ ಶಿಣ್ ಆಸ್ಲ್ಲೊ. ಹ್ಯೊ ವೊಳಿಯೊ ಪಳೆಯಾ;
’ದೆಕುನ್ ದೆವಾಕ್ ಮಾನ್ ದೀ ದೆಂವ್ಚಾರಾಕ್ ಕಾನ್ ದೀ
ದೆವಾಕ್ ತುಜೆಂ ದಾನ್ ದೀ ದೆಂವ್ಚಾರಾಕ್ ಪಾನ್ ದೀ’ (ದೇವ್ ಆನಿ ದೆಂವ್ಚಾರ್)
ತಶೆಂ ಮ್ಹಣೊನ್ ಚಾ.ಫ್ರಾನ್ ಥೊಡ್ಯೊ ಅಪುರ್ಭಾಯೆಚ್ಯೊ ಪ್ರಾಸಾಂಚ್ಯೊ ಕವಿತಾ ಬರಯ್ಲ್ಯಾತ್. ದಾಖ್ಲೊ ದಿಂವ್ಚೊ ತರ್;
’ಸುವಾಸ್ ಮ್ಹಣೊನ್ ಹುಂಗಾನಾಕಾ
ಚಾಂಪ್ಯಾ ವಾಚಾನ್ ತಕ್ಲಿ ಘುಂವಾತ್’
.....
’ವಾಚ್ಪ್ಯಾ, ಮ್ಹಜ್ಯಾ ಕರ್ಗಾನಾಕಾ
ಝಳಕ್ ದೆಖೊನ್ ಭುಲಾನಾಕಾ
ಹಿ ಕಾಣಿ ಮ್ಹಣೊನ್ ವಾಚಿನಾಕಾ
ಜಿಣಿ ಚಿಂತುನ್ ಕಾಳಿಜ್ ಭೆಸಾತ್’ (ಕಾಣಿ ಜಿಣಿ)
ಕವಿತೆಂತ್ ಆಸ್ಚೆಂ ಲಿಸಾಂವ್ ಕಿತ್ಲೆಂ ವಾಸ್ತವಿಕ್ ಸತ್ ಮ್ಹಳ್ಳೆಂ ತುಮಿಂಚ್ ಅಂದಾಜ್ ಕರಾ. ಕವಿತಾ ಬರಂವ್ಕ್ ಏಕ್ ಸಾದಿ ವಿಶಯ್ ಪುರೊ ಮ್ಹಣ್ಚಾಕ್ ಹೆಂ ಕವಿತಾ ಗೊವಾಯ್ ದಿತಾ ಅಶೆಂ;
’ಪಯ್ಲೆಂ ದಾಂತ್ ಧಾಂಬುನ್ ಘಾಸ್
ಮಾಗಿರ್ ಪೊಲೆ ರುಂದಾವ್ನ್ ಹಾಸ್’ (ಹಾಸ್)
ಹ್ಯಾ ಕವಿತೆಚೊ ಸಾಂಕೇತಿಕ್ ರಿತಿನ್ ಅರ್ಥ್ ಕೆಲ್ಯಾರ್ ಏಕ್ ಕಾಣಿಂಚ್ ಉಭಿ ಕರ್ಯೆತಾ. ತಾಚೆಂ ’ಆಯ್ಲೆಂ ತಶೆಂ ಗಾಯ್ಲೆಂ’ ಕವಿತೆಂತ್ಲಿಂ ಥೊಡಿಂ ಉತ್ರಾಂನಿ ಕವಿ ಆಪ್ಲ್ಯಾ ಕವಿತಾಂಚೆರ್ ತ್ಯಾ ವೆಳಾರ್ ಹೆರ್ ಕಶೆಂ ಲೆಖ್ತಾಲೆ ಮ್ಹಳ್ಳ್ಯಾಚೆರ್ ಅಪ್ಲೆ ವಿಚಾರ್ ಉಚಾರ್ತಾ.
’ಮತಿಕ್ ಜಶೆಂ ಆಯ್ಲೆಂ ತಶೆಂ ಆಮಿ ಗಾಯ್ಲೆಂ
ರಾಜಾಂವಾಂನಿ ಲೆಕ್ಲೆಂ ತಶೆಂ ಲಿಖ್ಲೆಂ
ಎಕೆಕ್ಲ್ಯಾನ್ ತುಕ್ಲೆಂ, ತೆಂ ಲೆಕಾಭಾಯ್ಲೆಂ
ಎಕೆಕ್ಲ್ಯಾಚೆಂ ಕಾಳಿಜ್ ಆಮಿ ಜಿಕ್ಲೆಂ’
ಫುಡೆಂ ಹ್ಯಾಚ್ ಕವಿತೆಂತ್ ರಾಜಾಂವ್ ಉಲವ್ನ್ ಸಾಂಗ್ತಾ;
’ನಾರ್ಲಾ ಮೊಲಾಂ ಜರಿ ಮೊಳ್ಬಾವೆರಿ ಧಾಂವ್ಲಿಂ
ಶೆವ್ಯೊ ರೊಸಾನ್ ಬುಡವ್ನ್ ತುಂವೆಂ ಖಾಯ್ಜೆ
ತಾಂದ್ಳಾ ಮೊಲಾಂ ಜರಿ ಪಾಂಚಾ ರುಪ್ಯಾ ಪಾವ್ಲಿಂ
ಭುರ್ಗ್ಯಾಂಕ್ ತುಜಾ ಜಿರ್ಸಾಳೆನ್ಂಚ್ ಲಾಯ್ಜೆ’
ಚಾ.ಫ್ರಾಚಿಂ ಕವಿತಾನಿ ವಾಸ್ತವಿಕ್ ಸತಾಂ ಚಡಿತ್ ಆಸ್ತಾಲಿಂ ಮ್ಹಣ್ತಚ್ ನಿರಾಶಾ ತಾಂತುಂ ಜರೂರ್ ಅಸ್ತಾಲಿ. ತರ್ಯ್ ಹ್ಯಾ ನಿರಾಶೆಚಾ ಕೊಂಡಾಂತ್ ಆಶಾವಾದ್ ಉಭ್ಜಾಶೆಂ ಕರ್ಚಿಂ ಜಾಯ್ತಿಂ ಕವಿತಾ
ಚಾ.ಫ್ರಾ.ನ್ ಬರಯ್ಲ್ಯಾಂತ್, ಏಕ್ ಅಶೆಂ ಆಸಾ;
’ಮೊಜಾ ಘರಾಂತ್ ಉಜ್ಯಾಪರಿಂ ಆವ್ರಾಂ ಲ್ಹಾರಾಂ ಭರ್ಲಿಂ
ಜಿರೆಂ ಸೊಲಾಂ ಮಿರಿಂ ಗೊಡಾಂ ವಾರ್ಯಾಚೆಲ್ಯಾನ್ ಚರ್ಲಿಂ
ಚೊಂಪೊ ಗೆಲೊ ರೊಂಪೊ ಮೆಲೊ ಗೆಲೆಂ ತಾಂದುಳ್ ಭಾತ್
ಪುರ್ಲೆ ಮಾಳೆ ಉರ್ಲಿ ಗಳೊನ್ ಆಂಗಾ ವಯ್ಲಿ ಕಾತ್’
’ಘರಾಂತ್ ಮೊಜಾ ಕಾಳೊಕ್ ಆತಾಂ ಕಿತ್ಯಾಕ್ ಬಾಳೆ ಹಾಸ್ತಾ
ಭಿರಾಂತ್ ಮಾಕಾ ಕಾಳೊಕಾಂತ್ ವಾತ್ ಕಸ್ಲಿ ದಿಸ್ತಾ
ಘರಾಂತ್ ಮೊಜಾ ಕಾಳೊಕ್ ಮೊಗಾ ಉಜ್ವಾಡ್ ಬಾಳೆ ಕಸೊ
ತೊಂಡಾ ವಯ್ಲೊ ದಿವ್ಟೊ ಪಳೆ ಹಾಂವೆಂ ಪೆಟಂವ್ಕ್ ನಾಸ್ಲೊ’ (ಪಾವ್ಶಿಲಿ ವೊರ್ವಿ)
ತೆಚ್ಚ್ಪರಿಂ ಸಾಂಕೇತಿಕ್ ರಿತಿನ್ ಗೂಂಡ್ ಅರ್ಥಾಚಿಂ ಕವಿತಾಂ ಚಾ.ಫ್ರಾನ್ ಲಿಖ್ಲ್ಯಾಂತ್. ಹಳ್ಧುವೊ ರಂಗ್ ಇಶ್ಟಾಗಾತೆಚಿ ಕುರುಃ ತರ್ ತಾಂಬ್ಡೊ ರಂಗ್ ಕ್ರಾಂತೆಚೊ. ಮ್ಹಳ್ಯಾರ್ ಹಾಂಗಾಸರ್ ಇಶ್ಟಾಗಾತ್ ಆನಿ ಕ್ರಾಂತಿ/ಬಂಡಾಯ್ ಜಾವ್ನ್ ಬದಲ್ತಾನಾ ಸಮಾಜೆಂತ್ ಖರೊಚ್ ಉಜೊ ಪೆಟೊಂಕ್ ಲಾಗ್ತಾ.
’ಭಾಂಗಾರಾಚೊ ರಂಗ್ ಹಳ್ದುವೊ
ಹಳ್ದುವ್ಯಾಂತ್ ಕಾಳ್ಕಯ್ ಆಸ್ತಾ
ರಗ್ತಾಚೊ ರಂಗ್ ತಾಂಬ್ಡೊ
ದೊಗಾಂಯ್ಕಿ ಏಕ್ ಸೈರಿಕ್ ಆಸ್ತಾ’
’ದೋನ್ಯ್ ರಂಗ್ ಮೆಳ್ತಿತ್ ಜಾಲ್ಯಾರ್
ಶಿರಾಪಾಚೊ ಉಜೊ ಲಾಗ್ತಾ
ದೆಕುನ್ ಮಿಸ್ತಾ ಭಾಂಗಾರ್ ಕೆನ್ನಾಂಯ್
ತರ್ನೆಂ ತರ್ನೆಂ ರಗತ್ ಮಾಗ್ತಾ’ (ಭಾಂಗಾರ್ ಆನಿ ರಗತ್)
ಚಾ.ಫ್ರಾನ್ ಸವಾಲ್ ಕರುಂಕ್ ಕಿತೆಂಚ್ ಮುಲಾಜ್ ದವ್ರುಂಕ್ ನಾ ಮ್ಹಣ್ಚಾಕ್ ಹ್ಯೊ ವೊಳಿ ವಾಚಾ;
’ಮೊಗಾನ್ ಮೊಜೊ ವಿಚಾರ್ ಜಾತಾ
ಮೊಗಾನ್ ಹಾಂವೆಂ ಉಮೊ ದಿಂವ್ಚೊ
ಸಾಂಗ್ ಬಾಪಾ ಎಕಾ ಉಮ್ಯಾನ್
ಸಾಂಗ್ ಕಸೊ ಚೆರ್ಕೊ ಜಾಂವ್ಚೊ?’ (ಪಾವ್ಸ್ ಆಶೆತಾಂ)
ಕವಿತೆಂನಿ ಭಳ್ವಂತ್ ಇಮಾಜ್ಯೊ ವಾಪಾರ್ನ್ ಜಿಣ್ಯೆಲಿಸಾಂವಾಂ ಪಾಚಾರ್ಚಿ ಕಲಾ ಚಾ.ಫ್ರಾ ಬರ್ಯಾನ್ ಜಾಣಾಸ್ಲ್ಲೊ ಮ್ಹಳ್ಳ್ಯಾಕ್ ಹಿ ವೋಳ್ ರುಜ್ವಾತ್ ದಿತಾ;
’ಮನ್ ಭುಲ್ಚೆ ಆಸ್ತಾ ವಾರ್ಯಾ ಉಡ್ಕೆಕ್ ಧಲ್ಚೆಂ
ನ್ಹಂಯ್
ಫುಲ್ ಮಾಳ್ಚೆಂ ಆಸ್ತಾ ವ್ಹಾಳ್ಯಾ ಉದ್ಕಾಕ್ ವ್ಹಾಳ್ಚೆಂ ನ್ಹಂಯ್
ಉಂಡಿ ಸೆಂವ್ಚಿ ಆಸ್ತಾ ಗಳ್ಯಾಲಾಗಿಂ ರಾಂವ್ಚಿ ನ್ಹಂಯ್
ಜಿವಿತ್ ಫುಲ್ಚೆಂ ಆಸ್ತಾ ಸಾರ್ಯಾ ಗುಂಡಿಯೆಂತ್ ಘಾಲ್ಚೆಂ ನ್ಹಂಯ್’ (ಜಿವಿತ್)
ಕವಿಚಿ ವಿಡಂಬನಾತ್ಮಕ್ ನದರ್ ಕಿತ್ಲಿ ಅಪುರ್ಭಾಯೆಚಿ ಮ್ಹಳ್ಳೆಂ ಹೆಂ ವಾಚ್ತಾನಾ ಸುಸ್ತಾತಾ;
’ಮಾಂಯ್ ಮುಕಾರ್ ಹಾಸ್ರೆ ಜಾಂವ್ಯಾ ಕುಂಕ್ಡಾಚೆ ಪಾಂಯ್ ಮೊಡಿತ್
ಮಾಂವಾ ಮುಕಾರ್ ಹಾಸ್ರೆ ಜಾಂವ್ಯಾ ಸೊರ್ಯಾ ಬಾಟ್ಲಿ ಕಾಡಿತ್’
....
’ಬಾಯ್ಲೆ ಮುಕಾರ್ ರಡ್ರೆ ಘೊವಾ ನಾತ್ಲ್ಯಾರ್ ಬೊಲ್ಸಾಂ ಸುಕಯ್ತ್’ (ಹಾಸ್ ಹಾಸ್)
ಅಶೆಂ ಮ್ಹಣೊನ್ ಕೆದಿಂಚ್ ಚಾ.ಫ್ರಾನ್ ಆಪ್ಲ್ಯಾ ವಿಡಂಬನಾಂನಿ ದೊಡ್ಯಾ ಅರ್ಥಾಚಿಂ ಅಶ್ಲೀಲ್-ಪೊಜ್ಡಿಂ ಉತ್ರಾಂ ಬರಂವ್ಕ್ ನಾಂತ್. ತೆಂಚ್ ತಾಚಾ ವಿಡಂಬನಾಚಿಂ ಮಟ್ಟ್ ಉಂಚಾಯೆಕ್ ಪಾವಯ್ತಾತ್. ಹಿಂ ಥೊಡಿಂ ಕವಿತಾಯ್ ಅಸಲಿಂಚ್;
’ದೆಂವ್ಚಾರಾಚೊ ದುಡು
ತಾಚೆಲಾಗಿಂಚ್ ಆಸೊಂ
ಸಂದಾ ಸಂದಾಂತ್ ತಾಚಾ
ಕೊಡ್ಸಾಣ್ ಆಸ್ತಾ
ದೆಂವ್ಚಾರಾಚೆಂ ಭಾಂಗಾರ್
ಥಳ್ಥಳಿತ್ ಆಸೊಂ
ಕೈಲೆ ಕುಡ್ಕ್ಯಾಚೆಂಯ್
ತಾಕಾ ಮೋಲ್ ನಾಸ್ತಾ’ (ದೆಂವ್ಚಾರಾಚೊ ದುಡು)
ತೆಚ್ಚ್ಪರಿಂ ಅನ್ಯೇಕ್ ಕವಿತಾ ಅಶೆಂ ಆಸಾ;
’ಊಟ್ ಬಾಬಾ ಉದಾಕ್ ಆಸಾ
ಪಾಂಯ್ ಧು ನಾತ್ಲ್ಯಾರ್ ನ್ಹಾ
ಜೆವ್ತಾಯ್ ಜಾಲ್ಯಾರ್ ಜೇವ್ ಬಾಬಾ
ನಾತ್ಲ್ಯಾರ್ ಥೊಡೆ ಗರೆ ಖಾ.
ಪೊಟಿಯೊ ಸೈರೊ ತಕ್ಷಣ್ ಮ್ಹಣ್ತಾ
ಭುಕೆಕ್ ದೋನ್ ಶಿತಾಂ ಖಾತಾಂ
ಆಶೆಕ್ ಥೊಡೆ ಗರೆ ಖಾತಾಂ
ಜಿರ್ಲೆಂ ಜಾಲ್ಯಾರ್ ಫಾಲ್ಯಾಂ ಯೆತಾಂ’ (ಪೊಟಾರಿ)
’ಆಂಬ್ಯಾ ಮುಳಿಂ ಶೆತ್ ಆಶೆತಾ ಪಾವ್ಸ್ ಮೊಟೊ
ಆಂಬ್ಯಾಚಾ ಮಾತ್ಯಾರ್ ಕೊಗುಳ್ ಖರ್ಶೆತಾ ಪಾವ್ಸ್ ಖೊಟೊ’ (ತಿಸ್ರೊ ಶಕುನಿ)
ಸಮಾಜೆಂತ್ ರೂಪ್ ಪಳೆವ್ನ್ ಗೂಣ್ ಪಾರ್ಕಿತೆಲ್ಯಾಂಕ್ ಕವಿ ಅಶೆಂ ಖೊಂಕ್ತಾ;
’ಹಾಂವ್ ತಿತ್ಲೊಂ ಸಿರಿವಂತ್ ನ್ಹಂಯ್ ಭಾಂಗಾರ್ ಶಿಂಗಾರ್ ನೆಟೊಂವ್ಕ್
ಹಾಂವ್ ತಿತ್ಲೊಂ ಪುನೆವಂತ್ ನ್ಹಂಯ್ ಧುಂಪಾ-ಧುಂವೊರ್ ಪೆಟಂವ್ಕ್’ (ಗುಲೊಬಾಚಿ ತಾಳಿ)
2002 ಇಸ್ವೆಂತ್ ನವೆಂಬ್ರಾಚಾ ಚೊವ್ದಾ ತಾರಿಕೆರ್ ಸುರು ಕೆಲ್ಲ್ಯಾ ಮಯ್ನ್ಯಾಳ್ಯಾ ಸಾಹಿತಿಕ್ ವಿಚಾರ್ಸಾತ್ಯಾಂತ್ ಆಮಿಂ
ವಿಂಚ್ಲ್ಲೊ ಪಯ್ಲೊ ಕವಿ ಚಾ.ಫ್ರಾ. ಆನಿ ತ್ಯಾವೆಳಾರ್ ಹಾವೆಂ ಚಾ.ಫ್ರಾಚಾ ’ಹಾಡ್ ಚೆಡ್ವಾ ಬುಡ್ಕುಲೊ’ ಕವಿತೆಚೆರ್ ಹೆ ವಿಚಾರ್ ಅಶೆ ವೆಕ್ತ್ ಕೆಲ್ಲೆ;
"ಚಾ.ಫ್ರಾ ಕೊಂಕ್ಣೆಂತ್ಲೊ ಪರಿಪೂರ್ಣ್ ರಿತಿಚೊ ಬಂಡಾಯ್ ಕವಿ ಮ್ಹಣ್ ತಾಚಿಂ ಚಡ್ತಾವ್ ಕವಿತಾ ವಾಚ್ಲ್ಲೆ ತಕ್ಶಣ್ ಒಪುನ್ ಘೆತಿತ್. ತಾಚೆಂ ’ಹಾಡ್ ಚೆಡ್ವಾ ಬುಡ್ಕುಲೊ’ ಕವಿತಾ ಗೊಯಾಂತ್ ವಾದಾಳ್ ಉಟಯಿಲ್ಲೆಂ ಕವಿತಾ ಮ್ಹಣ್ ಹಾವೆಂ ಕವಿ ಜೆ.ಬಿ.ಮೊರಾಯಸ್ ಥಾವ್ನ್ ಆಯ್ಕಾಲ್ಲೊ ಉಗ್ಡಾಸ್. ತಾಚಿಂ ಥೊಡಿಂ ಉತ್ರಾಂ ಅಶಿಂ
ಆಸಾತ್;"
’ಹಾಡ್ ಚೆಡ್ವಾ ಬುಡ್ಕುಲೊ ಲಕಯ್ ತಳ್ಯಾಂತ್
ಮ್ಹಜೆಂ ತುಜೆಂ ಉತಾರ್ ಜಾಲಾಂ ಕಾಜ್ಚಾ ಮೊಳ್ಯಾಂತ್’
...
’ಪಾದ್ರಿ ಚೀಟ್ ವಾಚಿನಾ ವ್ಹಡಿಲ್ ಮಾಟೊವ್ ರಚಿನಾ’
....
’ಪಾದ್ರಿ ವ್ಹಡಿಲ್ ವ್ಹಾಳೊನ್ ವಚೊಂ ವ್ಹಾಳ್ಚಾ ವ್ಹಾಳಾಂತ್
ಹಾಡ್ ಚೆಡ್ವಾ ಬುಖ್ದುಲೊ ..’
.....
’ಅಜೂನ್ ತುಕಾ ರಾಕೊನ್ ರಾವ್ಲಾಂ ಕಾಜ್ಚಾ ಮೊಳ್ಯಾಂತ್..’ (ಹಾಡ್ ಚೆಡ್ವಾ ಬುಡ್ಕುಲೊ)
ತಶೆಂ ಮ್ಹಣೊನ್ ಚಾ,ಫ್ರಾನ್ ಗೂಂಡ್ ಅರ್ಥ್ ದಿಂವ್ಚಿಂ ಕವಿತಾ ರಚುಂಕ್ ಪಾನಾಂಗಟ್ಲೆ ಬರಂವ್ಕ್ ನಾ ಮ್ಹಣ್ಚಾಕ್ ಹ್ಯೊ ಥೊಡ್ಯೊ ವೊಳಿ ರುಜ್ವಾತ್ ದಿತಾತ್;
’ಪೆಜೆ ವಾಟ್ಲಿ ಹಾತಿಂ ಘೆವ್ನ್
ದರ್ಯಾ ವೆಳೆರ್ ರಾವ್ಲಾಂ
ಕೊಣ್ಯ್ ವಿಚಾರ್ ನಾಕಾತ್ ಓವ್ನ್
ತೋಂಡ್ ಕಿತ್ಯಾಕ್ ಬಾವ್ಲಾಂ’
’ಆಸ್ಲೀ ಏಕ್ ಮಿಟಾ ಕಣ್
ಪಿಶೆ ಬುದಿನ್ ವಾಡ್ಲ್ಯಾ
ದರ್ಯಾಯೆದಿಂ ಜಾತಾಂ ಮ್ಹಣ್
ದರ್ಯಾಂತ್ ವಚೊನ್ ಉಡ್ಲ್ಯಾ’
’ದೀಗಾ ಮ್ಹಜಿ ಮಿಟಾ ಕಣ್
ತುಜಾ ಉದ್ಕಾಂತ್ ಖಿರ್ಲ್ಯಾ
ನಿರಾಸ್ ಜಾಲ್ಯಾ ಮ್ಹಜಿ ಜೀಣ್
ಪೇಜ್ ಆಳ್ಣಿ ಉರ್ಲ್ಯಾ’ (ಮಿಟಾ ಕಣ್)
ಅಸಲಿಚ್ಚ್ ಅನ್ಯೇಕ್ ಕವಿತಾ ಅಶಿ ಆಸಾ;
ಏಕ್ ಚಲಿ
ತುಜೆ ತಸ್ಲಿ
ವಾಟೆರ್ ಮೆಳ್ಳಿ
ಲಜ್ ಶಿ ದಿಸ್ಲಿ
ತಿಕಾ?
ಕಾಯ್ ಮ್ಹಾಕಾ
ತೆಂ ಮಾತ್
ವಿಚಾರ್ನಾಕಾ (ಲಜ್ಶಿ ದಿಸ್ಲಿ)
ತಾಚೆಂ ’ಆದಾಂವ್ ಬಾಪಾನ್ ಖೆಲ್ಲೆಂ ಕಿತೆಂ?’ ಅನ್ಯೇಕ್ ವಿಡಂಬನಾತ್ಮಕ್ ಕವಿತಾ ಅಶೆಂ ಆಸಾ;
’ಕಾಳಿಂಗ್ ಕಾಳೆಂ ನಾರ್ಲಾ ವೊಳೆಂ
ನಂದರ್ ಕಾಯ್ಚೆಂ ಮೊಟೆಂ ಕೆಳೆಂ?’
...
’ಖೆಲ್ಲೆಂ ತಾಣೆಂ ಶೆಕ್ಡ್ಯಾಂ ಆದಿಂ
ಅಜೂನ್ ಮ್ಹಜೆ ದಾಂತ್ ಫೊಡ್ತಾತ್’.
ಚಾ.ಫ್ರಾ ಸಾದ್ಯಾಲೊಕಾಂ ಸವೆಂ ಭರ್ಸೊನ್ ತಾಂಚಿ ಜಿಣಿ ಪರಿಪೂರ್ಣ್ ರಿತಿನ್ ಸಮ್ಜಾಲ್ಲೊ ದೆಖುನ್ ತಾಂಚ್ಯೊ ಗರ್ಜೊ, ಸಮಸ್ಸೆ ಬರ್ಯಾನ್ ಸಮ್ಜೊನ್ ಆಪ್ಲ್ಯಾ ಬರ್ಪಾಂನಿ ಚಿತ್ರಣ್ ಕರ್ತಾಲೊ. ಹೆಂ ಕವಿತಾ ವಯ್ಲೆ ನದ್ರೆನ್ ವಿಡಂಬನಾತ್ಮಕ್ ದಿಸತ್ ಪುಣ್ ಪರತ್ ಪರತ್ ವಾಚ್ತಾನಾ, ಕಶೆಂ ಏಕ್ ಅಸ್ಕತ್ ಮನಿಸ್ ಅಪ್ಲ್ಯಾ ಬರ್ಯಾ-ಫಾಲ್ಯಾಕ್ ದೆವಾಕ್ (ಧಾರ್ಮಿಕ್ ಬಾಜಾರ್?) ಲೋಂಚ್ ದೀಂವ್ಕ್ ಪಡ್ತಾನಾ ದೆವಾಂಕ್ (?) ಘಡಾಯ್ ಧಾಖಂವ್ಚೆಂ ಪ್ರೇತನ್ ಕರ್ತಾ ಮ್ಹಣ್ ಕಳ್ತಾ.
’ಆಸ್ತ್ರೀ ಎಕ್ಲಿ ಬಾಳಂದ್ ಜಾತಾ ಬಾಪಯ್ ಪುತ್ ಭಾಯ್ರ್ ಉಬೆ
ಎಕೇಕ್ ವೇಣ್ ಉಬೊನ್ ವೆತಾ ದೊಗ್ಯೀ ಭಿಯಾನ್ ಜಾತಾತ್ ಭೊಭೆ’
’ಬೊಕ್ರೊ ದಿತಾಂ ಪಳ್ಳೆಕ್
ದಿವ್ಳಾಂತ್ ದೇವ್ ಖಂಡಿತ್ ಶಿಣ್ತಾ
ತಾಕಾ ದಿತಾಂ ಕೊಬಾ ಭರೊ’
’ಸಾಂತಾಂತೊನಿಕ್ ಭುರ್ಗೆಂ ದಿತಾಂ
ರುಪಯಾ ತಗ್ಡಾನ್ ಪೆಟುನ್ ಕೆಲ್ಲೆಂ
ನಿತ್ಯಾದಾರಿ ಮಾಯೆಕ್ ಆತಾಂ
ಮ್ಹಜಾ ಕಾಳ್ಜಾ ಗುಂಡಾಯೆಂತ್ಲೆಂ’
...
’ಬಾಬಾ ಬಾಬಾ ಇತ್ಲ್ಯೊಯ್ ಪುರಾ
ವಸ್ತು ದೆವಾಂಕ್ ದಿತಾಯ್ ಕಶೊ?
ತಾಂಬ್ಯಾ ದೆಡ್ಕಿ ನಾಮೂ ಘರಾ
ಆಯ್ಕೊನ್ ಜಾಲ್ಯೊ ಶಿರೊ ಪಿಶೊ’
’ಪುತಾ ಮ್ಹಣ್ತಾ ಬಾಪಯ್ ತಾಕಾ
ಮಾಂಯ್ ತುಜಿ ಬಾಳಂದ್ ಜಾಂವ್ದಿ
ಮಾಗಿರ್ ಗಜಾಲ್ ಸೊಡ್ರೆ ಮ್ಹಾಕಾ
ಸಗ್ಳೆ ಮಾನೆಸ್ತ್ ಘಡಾಯ್ ಘೆಂವ್ದಿ’ (ಆಂಗೊವ್ಣ್)
ಅಸಲೆಂಚ್ ಚಿಂತಾಪ್ ಪಾಚಾರ್ಚೆಂ ಅನ್ಯೇಕ್ ಕವಿತಾ ಅಶೆಂ ಆಸಾ;
’ಏಕ್ ಸೊಡುನ್ ದೋನ್ ಮಾರ್ಲ್ಯಾರ್ ಕೊಣಿ ತರಿ ಮೆಲಾಂ
... ತೀನ್ ಮಾರ್ಲ್ಯಾರ್ ಇಗರ್ಜೆಚೊ ಪಾದ್ರಿ ವಿಗಾರ್ ಸರ್ಲಾ
... ಚಾರ್ ಮಾರ್ಶಿ .. ಭಿಸ್ಪ್ ಸಾಯ್ಬ್ ದೆವಾದಿನ್ ಜಾಲಾ
... ಪಾಂಚ್ ಮಾರ್ಶಿ .. ರೊಮಾಂತ್ ಪಾಪ್ ಸಾಯ್ಬ್ ಸರ್ಗಾರಾಜಾಕ್ ಗೆಲಾ
... ಸ ಮಾರ್ಲ್ಯಾರ್ ಲೋಕ್ ಕಿತೆಂ ಚಿಂತಿತ್
ತುವೆಂ ಆಮಾಲ್ ಗೆತ್ಲಾಂಯ್, ನಾತ್ಲ್ಯಾರ್ ದೇವ್ಚ್ ಮೆಲೊ ಮ್ಹಣ್ತಿತ್.’ (ಘಾಂಟಿ ಕಿತ್ಯಾಕ್ ವ್ಹಾಜ್ತಾತ್?)
ಪಾದ್ರಿಗಾರಾಂಚೆರ್ ತಾಚಿ ಶಿಣ್ ಅಶಿ ವೆಕ್ತ್ ಕರ್ತಾ;
’ದರ್ಯಾನ್ ಆಪ್ಲಿ ಗಾಜ್ ಕಾಡ್ಲಿ ಚೆಡ್ವಾನ್ ಆಪ್ಲಿ ಲಜ್ ಸೊಡ್ಲಿ
ದುಕ್ರಾಕ್ ಜೆದ್ನಾಂ ವೋಬ್ ನಾ ಪಾದ್ರಿಕ್ ಜೆದ್ನಾಂ ಲೋಬ್ ನಾ
ಸಗ್ಳೆಂ ಕಾಂಯ್ ಆಸಾ ತಶೆಂ ಆಸ್ತಾ
ಪಳಂವ್ಕ್ ಮಾತ್ ಉಣೆಂ ಉಣೆಂ ದಿಸ್ತಾ’ (ಉಣೆಂ ಉಣೆಂ ದಿಸ್ತಾ)
ಹೆರಾಂಚಾ ಚುಕಿಂಚೆರ್ ನದರ್ ಭಂವ್ಡಾಂವ್ಚಾ ಪಯ್ಲೆಂ ಅಪ್ಲ್ಯಾ ಬೊಂಬ್ಲೆಚೊ ಚಿಕೊಲ್ ನಿತಳ್ ಕರುಂಕ್ ಉಲೊ ದಿತಾ ಹಿ ಕವಿತಾ;
’ಆಪ್ಣಾಕ್ ಬಾಳಾ ಪಯ್ಲೆಂ ಪಳೆ ಪಯ್ಲೆಂ ಪಳೆ ಉಗ್ಡುನ್ ದೊಳೆ
ಖಂಯ್ ಥುಕ್ಲೊ ಖಂಯ್ ಮುತ್ಲೊ ಆಪ್ಲೆ ಬೊಮ್ಲೆಕ್ ಚಿಕೊಲ್ ಕಿತ್ಲೊ’ (ಮೊಟೆಪಣ್)
ಅಖೇರ್ ಕರ್ಚಾಧಿಂ ದೋನ್ ಉತ್ರಾಂ:
ಹಾವೆಂ ವಯ್ರ್ ಉಲ್ಲೇಕ್ ಕೆಲ್ಲೆಪರಿಂ ಚಾ.ಫ್ರಾ ಚಾ ಎಕೆಕಾ ಕವಿತಾಚೆರ್ ಎಕೇಕ್ ಲೇಖನ್ ಬರವ್ಯೆತಾ, ಜಿತ್ಲಿ ಗುಂಡಾಯ್ ತಿತ್ಲೆ ವಿಚಾರ್ ತಾಚಾ ಕವಿತೆಂನಿ ಮೆಳ್ತಾತ್. ಪುಣ್ ಜೆರಾಲ್ ರಿತಿನ್ ಸಾಂಗೊಂ ತರ್, ಜಶೆಂ ವಿಲ್ಫಿಚಿಂ ಎಕೆಕ್ ಪದಾಂ ಎಕೇಕ್ ಕಾಣಿಂ ಸಾಂಗ್ತಾತ್ ತಶೆಂ ಚಾ.ಫ್ರಾಚೆಂ ಎಕೆಕ್ ಕವಿತಾ ಎಕೆಕ್ ನಾಟಕ್ ಸಮಾಜೆ ಹುಜಿರ್ ದವರ್ತಾತ್. ಮ್ಹಾಕಾ ಚಾ.ಫ್ರಾಚಾ ಎಕೆಕಾ ಕವಿತೆಂನಿ ವಿಡಂಬನ್, ಎಕೇಕ್ ರುದಾನ್, ಎಕೇಕ್ ಅಸಾಹಯಕ್ಪಣ್, ಎಕೇಕ್ ಬೋಬ್ ಝಳ್ಕಾತಾ. ಚಾ.ಫ್ರಾಚಾ ಚಡ್ತಾವ್ ಕವಿತೆಂಚೊ ಕವಿ ಕವಿತೆಂನಿ ಸವಾಲ್ ಕರ್ತಾನಾ ವಾಚ್ಪ್ಯಾಕ್ ತಿಂ ಸವಾಲಾಂ ಮತಿಂತ್ ಪಾಳಾಂ ಫುಟಯ್ತಾತ್. ಹಿಂ ಸವಾಲಾಂ ಸಮಾಜೆಂತ್ ಭರೊನ್ ಗೆಲ್ಲ್ಯಾ ಹರ್ಯೆಕಾ ಸಂಗ್ತ್ಯಾಂಚೆರ್ ಆಸಾ, ಜಾಂವ್ ದೇವ್-ಧರ್ಮ್, ಜಾಂವ್ ಆಚಾರ್-ವಿಚಾರ್, ಜಾಂವ್ ನೆಸಾಪ್-ಉಲವ್ಪ್, ಜಾಂವ್ ಸಂಬಂಧ್-ಹುದ್ದೆ.., ಜಾಂವ್ ಧಾರ್ಮಿಕ್, ಜಾಂವ್ ಸಾಮಾಜಿಕ್, ಜಾಂವ್ ರಾಜಕೀಯ್, ಜಾಂವ್ ಹೆರ್ ಪ್ರಕಾರ್. ಹರ್ಯೆಕಾಚೆರ್ ಚಾ.ಫ್ರಾಚಿ ತೀಕ್ಷ್ಣ್ ನದರ್ ಭಂವ್ತಾ ಆನಿ ಕೊಣಾಚಿಚ್ ಕಸಲಿಚ್ ಮುಲಾಜ್ ನಾಸ್ತಾನಾ ಸುಶೆಗಾತ್ ಚಿಮ್ಟೆ ಕಾಡ್ಚಿ ವಿಧ್ಯಾ ಭೊವ್ಶಾ ಚಾ.ಫ್ರಾ ತಿತ್ಲ್ಯಾ ಪರಿಪೂರ್ಣ್ ರಿತಿನ್ ಹೆರ್ ಖಂಚೆಚ್ ಕವಿ ದೀಂವ್ಕ್ ಪಾಂವ್ಚೆನಾಂತ್. ಹಾಕಾ ಕಾರಾಣಾಂಯ್ ಜಾಯ್ತಿಂ ಆಸ್ಯೆತಾ, ತಿಂ ಸೊಧುನ್ ಗೆಲ್ಯಾರ್ ಭೋವ್ಶಾ ಅನ್ಯೇಕ್ ಲೇಖನ್ ಬರಂವ್ಕ್ ಪಡ್ತೆಲೆಂ.
ದೇವ್ ಬರೆಂ ಕರುಂ,
[2006 ಇಸ್ವೆಚಾ ಎಪ್ರಿಲ್ 21 ತಾರಿಕೆರ್ ಕುವೆಯ್ಟಾಂತ್ ಚಲ್ಲ್ಲ್ಯಾ ಚೊವ್ದಾವ್ಯಾ ಕವಿತಾಪಾಠಾಂತ್ ಹೆಂ ಲೇಖನ್ ವಾಚುನ್ ಸಾಂಗ್ಲಾಂ]
ಮೊಗಾಳ್
ವಲ್ಲಿ ಕ್ವಾಡ್ರಸ್,
’ಪಣ್ತೆಚಿ ಪೆಲಿ’ ವಯ್ಲ್ಯಾ ’ಆಸಾ ತಶೆಂ ಗಾಯ್ಲೆಂ’ ವಿಭಾಗಾವಿಶಿಂ ಬರಯಿಲ್ಲೆಂ ತುಜೆಂ ’ಬೂಕ್-ಸಮೀಕ್ಶಾಚೆಂ’
ಲೇಖನ್ ಹರ್ಯೆಕಾ ಲೇಖಕಾನ್ ವಾಚಿಜಾಯ್ ಜಾಲ್ಲೆಂ. ಹಾಂವೆ ಚಾ.ಫ್ರಾ.ಚೆ ದೋನ್ಯೀ
ಬೂಕ್ - ’ಪಣ್ತೆಚಿ ಪೆಲಿ’ ಆನಿ ’ಉತರಾಂ ಚಾಂದ್ನೆಂ’ ವಾಚುನ್ ಕಾಡ್ಲ್ಯಾಂತ್. ತ್ಯಾ
ಪುಸ್ತಕಾಂತ್ಲ್ಯಾ ತ್ಯಾ ಚಾ. ಫ್ರಾ.ಚಾ ಕೊಂಕ್ಣಿ ಭಾಶೆಚಿ ರೂಚ್ ಚಾಕ್ಲ್ಲ್ಯಾತಿತ್ಲಿ
ಪಾವಾನಾ. ಪೆಟುಲಾಂತ್ ದವರ್ಲ್ಲ್ಯಾ ಲಾಡ್ವಾಂಪರಿಂ - ಹಾತ್ ಘಡ್ಯೆ ಘಡ್ಯೆ ತ್ಯಾ
ಪೆಟುಲಾಕ್ ವಚೊನ್ ಆನ್ಯೇಕ್ ಖಾವ್ಯಾಂ ಮ್ಹಣ್ ಜಾಂವ್ಚ್ಯೆಪರಿಂ -
ಹಾಂವ್ ಹಿಂ ಪುಸ್ತಕಾಂ ಕೆನ್ನಾಂ ಕೆನ್ನಾಂ ವಾಚುನ್ಂಚ್ ರಾವ್ತೊಲೊಂ.
ಹಾಂವ್ ಗಾಂವಾಂತ್ ಆಸ್ತಾಂ ಚಾ. ಫ್ರಾ. ಮ್ಹಜೊ ಭಾರಿಚ್ ಲಾಗ್ಶಿಲೊ
ಮಿತ್ರ್ ಕಸೊ ಆಸ್ಲ್ಲೊ. ತೊ ಕೆನ್ನಾಂಯ್ ಆಮ್ಗೆರ್
ನಂತೂರ್ ಯೇವ್ನ್ಂಚ್ ಆಸ್ಲ್ಲೊ. ಏಕ್ ಪಾವ್ಟಿಂ ಹಾಂವ್ ಆನಿ ತೊ
ಬಾಯ್ಕಾರ್ ಬಸೊನ್ ಕಂಕ್ನಾಡಿ ಆಸ್ಪತ್ರೆ ತೆವ್ಶಿಲ್ಯಾನ್ ಪಾಶಾರ್ ಜಾತಾನಾ,
ಮುಖ್ಲ್ಯಾನ್ ಏಕ್ ಲೊರಿ ಯೇವ್ನ್ ಮ್ಹಜ್ಯಾ ಬಾಯ್ಕಾಕ್
ಮಾರ್ನ್ ಆಮಿಂ ದೋಗೀ ಕಂಕ್ನಾಡಿ ಆಸ್ಪತ್ರೆಕ್ ಸೆರ್ವಾಲ್ಲ್ಯಾಂವ್. ಆತಾಂ ತೊ ಉಡಾಸ್
ಮಾತ್ರ್ ಜಾವ್ನ್ ರಾವ್ಲಾ. ಇಕ್ರಾವ್ಯೆ ಕೊಂಕ್ಣಿ ಸಾಹಿತ್ಯ್ ಪರಿಷದೆ ವೆಳಾರ್
ಮಂಗ್ಳುರಾಂತ್ ಆಚರಣ್ ಜಾತಾನಾ ತಾಣೆಂ ’ಉದೆವ್’ ಪತ್ರಾಚೆ ತೀನ್ ದಿಸಾಳೆ ಆಂಕೆ ಕಾಡ್ಲ್ಲೆ ಆನಿ
ಮ್ಹಾಕಾ ತ್ಯಾ ದಿಸಾಳ್ಯಾಂಚೊ ಸಂಪಾದಕ್ ಕೆಲ್ಲೊ.
ಚಾ. ಫ್ರಾ. ಏಕ್ ಮಹಾನ್ ಲೇಖಕ್, ಚಿಂತ್ಪಿ ಆನಿ ಕ್ರಾಂತಿಕಾರಿ; ಭಾರಿಚ್
ಸಾಧೊ ಆನಿ ಖಾಲ್ತ್ಯಾ ಕಾಳ್ಚಾಚೊ ವ್ಯಕ್ತಿ. ಯಾಜಕಾಂಚ್ಯಾ ದಗ್ಲ್ಯಾ
ಭಿತರ್ ಲಿಪೊನ್ ರಾವ್ಲ್ಲ್ಯಾ ಕೊಂಕ್ಣಿ ಸಮಾಜೆನ್ ತಾಕಾ ನಾಸ್ತಿಕ್
ಮ್ಹಣ್ ವೊಲಾಯ್ಲೊ ತರೀ ತಾಣೆಂ ತಾಚೆಂ ಚಿಂತಾಪ್ ಹೆರಾಂ ಥಾವ್ನ್
ಮಾನ್ ಮೆಳ್ಚ್ಯಾಕ್ ಬದಲ್ಲೆಂನಾ. ತೊ ಆಪ್ಲೆಂ ಲಿಖ್ಪಾ ಝುಜ್
ಮುಖಾರುನ್ಂಚ್ ಗೆಲೊ. ತೆನ್ನಾಂ ಮ್ಹಜೆಲಾಗಿಂಯೀ
ವಿಶೇಷ್ ಪಯ್ಶೆ ನಾಸ್ಲ್ಲೆ. ಅಶೆಂ ಆಸ್ತಾಂ ಥೊಡಿಂ ಯೋಜನಾಂ ಆಮಿಂ
ಮುಖಾರುಂಕ್ ಚಿಂತ್ಲ್ಲಿಂ ಆಳ್ಮ್ಯಾಪರಿಂ ಥೊಡ್ಯಾಚ್ಚ್ ಕಾಳಾಚಿಂ ಜಾಲಿಂ. ಉಪ್ರಾಂತ್
ಹಾಂವ್ ಅಮೇರಿಕಾ ಯೇವ್ನ್ ಪಾವ್ತಾನಾ ಆಮ್ಚೆ ಮಧ್ಲೊ
ಸಂಬಂಧ್ಯೀ ಮಾತ್ಸೊ ಪಯ್ಶಿಲೊ ಜಾವ್ನ್ ಉರ್ಲೊ. ಹಾಂವೆ ಎದೊಳ್
ವರೇಗ್ ಚಾ. ಫ್ರಾ. ತಸಲೊ ಕೊಂಕ್ಣಿ ಲೇಖಕ್ ಪಳೆಲ್ಲೊ ನಾ ಆನಿ ಭೋವ್ಶಾ ಪಳೆಂವ್ಚೊಂಯೀ
ನಾ ಕೊಣ್ಣಾ! ಲಾಂಬ್ ಜಿಯೊಂ ಚಾ. ಫ್ರಾ. ಚಿಂ ಅಖಂಡ್ ಚಿಂತ್ಪಾ ಸಕ್ತೆನ್ ರೆಂವ್ಡಾಲ್ಲಿಂ ತಿಂ
ಬರ್ಪಾಂ; ದೇವ್ ಬರೆಂ ಕರುಂ ತುಕಾ ವಲ್ಲಿ, ತುವೆಂ ಚಾ. ಫ್ರಾ. ಚ್ಯಾ ಲಿಖ್ಪಾವಿಶಿಂ ಕೆಲ್ಲ್ಯಾ ತುಲನಾತ್ಮಕ್ ಉಲ್ಲೇಕಾಕ್.
-ಆಸ್ಟಿನ್ ಪ್ರಭು, ಚಿಕಾಗೊ
About us | Feedback |
Contact us
Copyright ©
2005 DAAIZ.COM All rights reserved.
Page concept, designed and maintained by Ashawadi Publications
