ಕೊಂಕ್ಣೆಚಾ ವಿಂಚ್ಣಾರ್ ಸಾಹಿತ್ಯಾಚೊ ಕೊನ್ಸೊ - ’ದಾಯ್ಜ್’ - ಫಕತ್ತ್ ಕೊಂಕಣಿ ಥಾವ್ನ್ ಕೊಂಕಣಿ ಪರ್ಯಾಂತ್, ಕೊಂಕಣಿ ಖಾತಿರ್.
ಆಸ್ಚ್ಯಾ ಎಕಾ ಸಂಸಾರಾಂತ್ ದೇವ್ ಕಶೆ ಇತ್ಲೆ? ಕೊಣಾಚೊ ದೇವ್ ಖರೊ? ಸಂಸಾರ್ - ಎಕಾ ಸಂಸಾರಾಕ್ ದೆವಾನ್ ರಚ್ಲ್ಲೊ ತರ್ - ಆಮ್ಚೆ ಮಧೆಂ ಆಸ್ಚಾ ಸಭಾರ್ ದೆವಾನ್ ಖಂಚ್ಯಾ ದೆವಾನ್ ಹ್ಯಾ ಸಂಸಾರಾಕ್ ರಚಿತ್ ಕೆಲ್ಲೆಂ? ದೆವಾ - ಮ್ಹಜ್ಯಾ ದೆವಾ ತಕ್ಲಿ ಮ್ಹಜಿ ಸಗ್ಳಿ ಘುಂವ್ತಾ - ಲಟ್ಟೊ ಘುಂವ್ಲೆಲ್ಯಾಬರಿ! ಹೆಂ ಮ್ಹಾಕಾ ಚಿಂತುನ್ ಚಿಂತುನ್ ತಕ್ಲಿ ಪಾಡ್ ಜಾಲ್ಯಾ.
ಸತಾಂತ್ಲಿಂ ವಿಚಿತ್ರಾಂ - 7. ಮಾಗ್ಣೆಂ ಆನಿ ದೇವ್
ಜೆಮ್ಮಾ ಪಡೀಲ್
ದೆವಾ ತುಂ ಆಮ್ಚೊ ರಾಯ್; ತುಂ ಆಮ್ಚೊ ಬಾಪ್, ಸೊಡ್ವಣ್ದಾರ್. ತುಂ ದಯಾಳ್, ತುಂ ಮೊಗಾಳ್. ತುಕಾ ರಾಗ್ ಯೇನಾ. ತುಂ ಮಾಗ್ಲೆಲೆಂ ದಿತಾಯ್. ತುವೆಂ ಮಾಗ್ಲೆಲೆಂ ದೀನಾತ್ಲ್ಯಾ ವಗ್ತಾಂ ಆಮ್ಕಾಂ ತುಜೆರ್ ರಾಗ್ ಯೆತಾ "ಹಾಂವ್ ಸದಾಂನೀತ್ ಮಾಗ್ತಾಂ, ಸಕಾಳಿಂ, ಸಾಂಜೆರ್, ರಾತಿಂ, ದಿಸಾಂ ಮಧೆಂ ವೇಳ್ ಆಸ್ತಾನಾ ತುಜ್ಯೆಲಾಗಿಂ ಮಾಗ್ತಾಂ. ತುಂ ಥೊಡೆಪಾವ್ಟಿಂ ಏಕ್ದಮ್ ಖಂಜೂಸ್ ಮ್ಹಣಾಜಯ್. ನಾಂ ತರ್ ಕಾಂಟ್ಭರ್ ಮಾಗ್ಲೆಲ್ಯಾಕ್ ತುವೆಂ ದಿಂವ್ಚೆಂ ತರೀ ಕಿತ್ಲೆಂ -
ಮೂಟ್ಭರ್!"
ತುಂ ಮೊಳ್ಬಾರ್ ಆಸಾಯ್. ಧರ್ಣಿ ಭಿತರ್ ಲಿಪ್ಲಾಯ್. ತುಂ ಉದ್ಕಾಭಿತರ್ ಉಪ್ಯೆತಾಯ್. ತುಂ ರಾನಾಂತ್ ಆಸಾಯ್, ಮೊಳ್ಯಾಂತ್ ಆಸಾತ್, ಗುಡ್ಯಾರ್ ಆಸಾಯ್; ಪರ್ವತಾರ್ ರಾವ್ತಾಯ್. ತುಂ ವಾರ್ಯಾರ್ ಉಭ್ತಾಯ್. ಮಾತ್ಯೆರ್ ಚಲ್ತಾಯ್. ತುಂ ನಾರದಾ - ಸರ್ವ್ ಜಾಗ್ಯಾಂನಿ, ಸರ್ವ್ ಗಾಂವಾಂನಿ, ಖಂಡಾಂನಿ ಆಸಾಯ್; ಹೆಂ ಹಾಂವ್ ಜಾಣಾಂ. ದೆಕುನ್ ತುಂ ಸಗ್ಳ್ಯಾ ಸಂಸಾರಾಚೊ ಸರ್ವಾಧಿಕಾರಿ.
ಸಕ್ಕಡ್ಯ್ ಮಾಗ್ತಾತ್. ಹಾಂವ್ ಇಗರ್ಜೆಂತ್, ತೊ
ಪಳ್ಳೆಂತ್. ಅನ್ಯೇಕ್ಲೊ಼ ದಿವ್ಳಾಂತ್, ಸಿಖ್ಖಾಂಚಾ ಗುರುಧ್ವಾರಾಂತ್ ಹರ್ಯೆಕ್ಲೊ ತಾಚ್ಯಾ ತಾಚ್ಯಾ ಜಾತಿ ಫರ್ಮಾಣೆ ಮಾಗ್ತಾ. ತುಂ ಹ್ಯಾ ಸಂಸಾರಾಚೊ ಧನಿ. ತುವೆಂ ಹೊ ಸಂಸಾರ್ ರಚ್ಲ್ಲೊಯ್ ಮ್ಹಳ್ಳೆಂ ಮ್ಹಾಜೆಂ ಧರ್ಮ್ ಸಾಂಗ್ತಾ. ಜಾವ್ಯೆತ್ ವಿಗ್ಯಾನಿಂ ಫರ್ಮಾಣೆಂ ಹೊ ಸೌರವ್ಯೂಹ್ ಎಕಾ ಮಹಾ ಸಂಘರ್ಷಣಾಂತ್ ಯಾ
Big Bang ಮ್ಹಳ್ಳ್ಯಾ ನಾಂವಾನ್ ಉದೆಲ್ಯಾರೀ ಹೊ ಸಂಸಾರ್ ತುಜ್ಯಾ ರಚ್ನೆಚೆಂ ಕಾರ್ಯೆಂ ಹಾಂವ್, ತೊ ಆನಿ ತೆ ಸರ್ವ್ ಪಾತ್ಯೆತಾತ್.
ಹೊ ಸಂಸಾರ್ ಏಕ್ - ಹ್ಯಾ ಸಂಸಾರಾಂತ್ಲ್ಯೊ ವಸ್ತು ಹ್ಯಾ ಜಾಗೆ ಆಸಾ ತಶೆಂಚ್ ತರ್, ತುಜ್ಯಾ ಸಂಸಾರಾಂತ್ ಸಭಾರ್ ಜಾತಿ - ಸಕ್ಕಡ್ ಮ್ಹಣ್ತಾತ್ ದೇವ್ ಆಸಾ. ಸಕ್ಕಡ್ ಮ್ಹಣ್ತಾತ್ - ಮ್ಹಜೊ ದೇವ್ ಖರೊ. ಉರ್ಲ್ಲೆ ಪೂರಾ ನಾಂವಾಕ್ ಮಾತ್ರ್!
ಆಸ್ಚ್ಯಾ ಎಕಾ ಸಂಸಾರಾಂತ್ ದೇವ್ ಕಶೆ ಇತ್ಲೆ? ಕೊಣಾಚೊ ದೇವ್ ಖರೊ? ಸಂಸಾರ್ - ಎಕಾ ಸಂಸಾರಾಕ್ ದೆವಾನ್ ರಚ್ಲ್ಲೊ ತರ್ - ಆಮ್ಚೆ ಮಧೆಂ ಆಸ್ಚಾ ಸಭಾರ್ ದೆವಾನ್ ಖಂಚ್ಯಾ ದೆವಾನ್ ಹ್ಯಾ ಸಂಸಾರಾಕ್ ರಚಿತ್ ಕೆಲ್ಲೆಂ? ದೆವಾ - ಮ್ಹಜ್ಯಾ ದೆವಾ ತಕ್ಲಿ ಮ್ಹಜಿ ಸಗ್ಳಿ ಘುಂವ್ತಾ - ಲಟ್ಟೊ ಘುಂವ್ಲೆಲ್ಯಾಬರಿ! ಹೆಂ ಮ್ಹಾಕಾ ಚಿಂತುನ್ ಚಿಂತುನ್ ತಕ್ಲಿ ಪಾಡ್ ಜಾಲ್ಯಾ. ಕೊಣಾಯ್ಲಾಗಿಂ ’ಹ್ಯಾ’ ವಿಷಯಾವಯ್ರ್ ಉಲಂವ್ಕ್ ಗೆಲ್ಯಾರ್ ಮಾರ್ ಖಾಯ್ಜೆ ಪಡಾತ್ - ಕಿತ್ಯಾಕ್ ತೊ
ಹಾಂವ್ ನ್ಹಂಯ್, ತಾಂಚೊ
ದೇವ್ ಮ್ಹಜೊ ನ್ಹಂಯ್.
ತುಕಾ ಹಾವೆಂ ವಿಚಾರ್ಲೆಲೆಂ ಯಾ ಉಚಾರ್ಲೆಲೆಂ ಸಮ್ಜಾಲೆಂ???
ಹಾಂವ್ ಮಾಗ್ತಾಂ ಸೊಮಿಯಾಂ - ಕಿತ್ಯಾಕ್ ತುವೆಂ ಮಾಗೊಂಕ್ ಸಾಂಗ್ಲಾಂಯ್? "ಮಾಗ್ ಮೆಳ್ತೆಲೆಂ, ಬಡಯ್ ಉಗ್ತೆಂ ಜಾತೆಲೆಂ" ಮ್ಹಜೊ ಸೆಜಾರಿ ದಿಸಾಕ್ ಪಾಂಚ್ ಪಾವ್ಟಿಂ ಖಳನಾಸ್ತಾನಾ
ನಮಾಜ್ ಕರ್ತಾ. ತೊ ನಮಾಜ್ ಕರ್ತಾನಾ ತಾಚ್ಯಾ ಖುಶಿನ್ ಘಡ್ಗಡೊ ಪಡ್ಲ್ಯಾರೀ ತಾಕಾ ಖಬಾರ್ ನಾ. ಮ್ಹಾಕಾ ಇಗರ್ಜೆಂತ್ ಮಿಸಾಕ್ ಆಯಿಲ್ಲ್ಯಾ ಸೊಭಿತ್ ಚಲಿಯಾಂಕ್ ಯಾ ತಾಂಚಾ ಆವಯಾಂಕ್ ಪಳೆತಾನಾ ಮ್ಹಜೆಂ ಮಾಗ್ಣೆಂ ಲಿಪ್ತಾ!
ಸರ್ದಾರ್ಜಿ ಪಳೆ - ತೆ, ಗುರು ಗೃಂಥ್, ಸಂಗೀತ್ ರುಪಾರ್ ಗಾಯ್ತಾತ್. ಹಿಂದು ಭಾವ್ ಪುಜಾ ಕರ್ತಾತ್. ಯಜ್ನ್ ಕರ್ತಾತ್. ತುಕಾ ಖಂಯ್ಚೆಂ ಪಸಂದ್ ಧನಿಯಾಂ? ತುಂ ಎಕ್ಲೊ’ ಹೊ ಸಂಸಾರ್ ಏಕ್. ಪುಣ್.. ತುಕಾ ವಾಖಣ್ಚೆಂ ಕಿತ್ಲೆಂ ಆನಿ ಕಶೆಂ???
ಆಮ್ಚ್ಯಾ ಮಂಗ್ಳೂರ್ ಗಾಂವಾಂತ್ ಜೂನ್ ಮಯ್ನೊ ಪಾವ್ಸಾಳ್ ಮಯ್ನೊ. ಆಜ್ಕಾಲ್ ಪಾವ್ಸ್ ಯೆಂವ್ಚ್ಯಾಕ್ ರೀತ್ ನಾ. ಹಾಂವ್ ಪಾವ್ಸ್ ಯೇಂವ್ಕ್ ಮಾಗ್ತಾಂ. ಮ್ಹಜ್ಯಾ ಬಾಂಯ್ತ್ ಉದಾಕ್ ಸುಕ್ಲಾಂ. ಮುನ್ಸಿಪಾಲಿಟಿ, ಪಂಚಾಯತ್ ಯಾ ಕಾರ್ಪೊರೇಶನಾಚಿ ಉದ್ಕಾಂ ದಾರ್ವಾಟೆ ಬಂಧ್ ಜಾಲ್ಯಾತ್. ಮ್ಹಜ್ಯಾ ಕುಶೆಚ್ಯಾ ಘರಾ, ಪೊರ್ವಾಂ ಕಾಜಾರ್. ತೊ ನಮಾಜ್ ಕರ್ತಾನಾ’ ಪಾವ್ಸ್ ಯೇನಾಕಾ ಮ್ಹಜ್ಯಾ ಧುವೆಚೆಂ ಕಾಜಾರ್ ಬರ್ಯಾ ಥರಾನ್ ಜಾಂವ್ದಿ"
ಮ್ಹಣ್ ಮಾಗ್ತಾ. ಮ್ಹಾಕಾಯ್ ಆಪವ್ಣೆಂ ಆಯ್ಲಾಂ. ಅನ್ಯೇಕಾ ಘರಾ, ಘರ್ ಭಾಂದ್ಚೆಂ ಅಖೇರ್ ಜಾಂವ್ಚಾರ್ ಆಸಾ. ತೊಯ್ ಮಾಗ್ತಾ - "ಪಾವ್ಸಾ ರಾಯಾ ಪಾಟ್ಲ್ಯಾನ್ ಯೇ. ಆತಾಂ ನಾಕಾ".
ದೆವಾ ತುಂ ಖಂಯ್ಚೆಂ ಆನಿ ಕೊಣಾಚೆಂ ಮಾಗ್ಣೆಂ ಆಯ್ಕತಾಯ್? ಮ್ಹಜೆಂ? ತಾಚೆಂ?
ಯಾ ತಿಸ್ರ್ಯಾಚೆಂ?
ಮ್ಹಜೆಲಾಗಿಂ ಆಸ್ಚಿಂ ಸವಾಲಾಂ ಸಂಪಿಂ. ಯೆದೊಳ್ ಪರ್ಯಾಂತ್ ತುಕಾ ಹಾವೆಂ ಧಾಡ್ಲೆಲ್ಯಾ ಎಕಾ ಸವಾಲಾಕೀ ತುವೆಂ ಜವಾಬ್ ದೀಂವ್ಕ್ ನಾಂಯ್! ಮ್ಹಜ್ಯಾ ಸವಾಲಾಂತ್ ತೀರ್ ನಾಂ? ಚಿಂತಾಪ್ ನಾಂ? ಯಾ ಹಾವೆಂ ವಿಚಾರ್ಚೆಂ ಸತಾ ವಿರೋಧ್ ಯಾ ಧರ್ಮಾ ವಿರೋಧ್?
ಹೆಂ ಸವಾಲ್ ಯೆದೊಳ್ ತುಕಾ ಕೊಣೆಂ ವಿಚಾರ್ಲಾಂ? ವಿಚಾರ್ಲಾಂ ತರ್ ತಾಚಿ ಜವಾಬ್ ಮ್ಹಾಕಾಯ್ ದಿ. ನಾಂತರ್ ಮ್ಹಾಕಾ ತುವೆಂ ಏಕ್ ಖರಿ ಬರಿ ಉಂಚ್ಲಿ ಜವಾಬ್ ದಿಲ್ಯಾರ್ ಹಾವೆಂ ಪಾಡ್ ಕೆಲ್ಲಿ ತಕ್ಲಿ ಸಮಾ ಜಾಯ್ತ್. ಹಾವೆಂ ಖರ್ಚಿಲ್ಲ್ಯೊ ಘಡಿಯೊ ಸಾರ್ಥಕ್ ಜಾಯ್ತ್. ಮ್ಹಾಕಾ ಲೊಕಾಂನಿ ಪಿಸೊ ಮ್ಹಳಾಂ. ಹಾಂವ್ ಜಾಣಾಂ ಧರ್ಮ್ ವಿರೋಧ್ ಉಲಂವ್ಚೆಂ ನ್ಹಂಯ್. ಪಳೆನಾತ್ಲ್ಲ್ಯಾ ದೆವಾವಿಶ್ಯಾಂತ್ ಕಿತೆಂಯ್ ಉಲಂವ್ಚೆಂ ’ದುಸ್ರ್ಯಾಕ್’ ಕೊಡು ಲಾಗ್ತಾ - ಹೆಂ ಮಾತ್ರ್ ಸತ್!
ಕೊಣಾಚೊ ದೇವ್ ಖರೊ?
ಕೊಣಾಚೆಂ ಮಾಗ್ಣೆಂ ಖರೆಂ??
ತರ್ ಧರ್ಮ್ ಮ್ಹಳ್ಯಾರ್ ಕಸಲೆಂ ದೆವಾ? ತುವೆಂ ಕಿತ್ಯಾ ಖಾತಿರ್ ಸಭಾರ್ ಧರ್ಮಾಂಕ್ ಜನನ್ ದಿಲಾಂಯ್?
ಹ್ಯಾ ಸವಾಲಾಕ್ ತುಂ ಜವಾಬ್ ದಿ.
[ಕುರ್ಪಾ: ಹೆಂ ಲೇಖನ್ ಬರಂವ್ಕ್ ಉತ್ತೇಜನ್, ಚಿಂತಾಪ್ ದಿಲ್ಲ್ಯಾ ಫೆಲಿಕ್ಸ್ ಡಿ’ಸಿಲ್ವಾಕ್ ಅರ್ಗಾಂ]
ಆಧ್ಲೆ ಆಂಕ್ಡೆ: ಸಂವಾದ್, 1, 2, 3, 4, 5, 6
About us | Feedback | Contact us
Copyright ©
2005 DAAIZ.COM All rights reserved.
Page concept, designed and maintained by Ashawadi Publications
