ಕೊಂಕ್ಣೆಚಾ ವಿಂಚ್ಣಾರ್ ಸಾಹಿತ್ಯಾಚೊ ಕೊನ್ಸೊ -’ದಾಯ್ಜ್ ’-ಫಕತ್ತ್ ಕೊಂಕಣಿ ಥಾವ್ನ್, ಕೊಂಕಣಿ ಪರ್ಯಾಂತ್, ಕೊಂಕಣಿ ಖಾತಿರ್.
ಥುಕ್ಕ್ ತುಮ್ಕಾಂ ಚೊರಾಂನೊ! - ಆಸ್ಟಿನ್ ಡಿ’ಸೋಜ್ ಪ್ರಭು
ಆದಿಂ ಥಾವ್ನ್ ಅಶೆಂ ಘಡ್ಲಾಂ, ಆತಾಂಯ್ ಘಡ್ತಾ ಆನಿ ಮುಖಾರಿಂಯೀ ಘಡೊನ್ಂಚ್ ವೆತೆಲೆಂ...!
ಆಮ್ಚ್ಯಾ ಕೊಂಕಣಾಂತ್ ಹಾತಾಂಚ್ಯಾ ಬೊಟಾಂನಿ ಮೆಜ್ಯೆತ್ ತಿತ್ಲೆ ಕೊಂಕ್ಣಿ ಪದಾಂ ಘಡ್ಣಾರ್ ಆಸಾತ್. ಭಾರಿಚ್ ಕಷ್ಟಾಂನಿ ತೆ ತಾಂಚ್ಯೊ ಕೊವ್ಳ್ಯೊ ಕಾಡ್ತಾತ್ ಆನಿ ವಿಕ್ರ್ಯಾಕ್ ಘಾಲ್ತಾತ್; ಕಿತೆಂಚ್ ಫಾಯ್ದೊ ನಾ ಜಾಲ್ಯಾರ್ಯ್ ತಾಂಚಿ ಮಿನತ್ ಕರ್ತಾತ್. ಪುಣ್ ಆಮಿಂ ಪದಾಂ ಆಯ್ಕೊವ್ಪಿ ಕಿತೆಂ ಕರ್ತಾಂವ್? ಕೋಣೀ ಹ್ಯಾ ಸವಾಲಾಕ್ ಜವಾಬ್ ದೀತ್?
ಆದಿಂ ವಿಲ್ಫಿ ರೆಬಿಂಬಸ್ ಮಂಗ್ಳುರ್ಚ್ಯಾ ಡೊನ್ ಬೊಸ್ಕೊ ಹೊಲಾಂತ್ ಆಪ್ಲಿಂ ಪದಾಂ ಗಾಯ್ತಾನಾ ಥೊಡೆ ಪಯ್ಶೆವಾಲೆ ಆಪ್ಲೆಂ ಟೇಪ್ ರೆಕೋರ್ಡರ್ ಹಾಡ್ನ್ ಪದಾಂ ಚೊರ್ತಾಲೆ ಆನಿ ಪ್ರತಿಯೊ ಕರುನ್ ಆಪ್ಲ್ಯಾ ಇಷ್ಟಾಂ-ಮಂತ್ರಾಂಕ್ ವಾಂಟ್ತಾಲೆ. ಧ್ವನಿವರ್ಧಕ್ ಚಲವ್ಪ್ಯಾಂಲಾಗಿಂ ಇಷ್ಟಾಗತ್ ಕರ್ನ್ ಆಪ್ಲೆಂ ಟೇಪ್ ರೆಕೋರ್ಡರ್ ಮೈಕಾಲಾಗಿಂ ದವರ್ನ್ಯ್ ಕೊಪಿ ಕರ್ನ್ ಪದಾಂ ಫಾರ್ತಾಲೆ.
ಆತಾಂ ಕಾಳ್ ಬದಲ್ಲಾ. ಆಮ್ಚ್ಯಾ ಕೊಂಕ್ಣಿ ಗಾವ್ಪ್ಯಾಂನಿ ಆಪ್ಲಿಂ ಪದಾಂ ಕೊವ್ಳ್ಯಾ ರುಪಾಂನಿ ಕಾಡುನ್ ವಿಕ್ರ್ಯಾಕ್ ಘಾಲುನ್ ಹ್ಯಾ ಚೊರಾಂಕ್ ಜಾಯ್ ಜಾಲ್ಲೆಂಚ್ ಮೆಳ್ಳಾಂ! ತಾಂಚೆಲಾಗಿಂ ಕಂಪ್ಯೂಟರಾಂ ಆಸಾತ್. ತೆ ಗಾಂವಾಕ್ ವೆತಾತ್, ಏಕ್ ಕೊವ್ಳಿ ಮೊಲಾಕ್ ಘೆತಾತ್ ಆನಿ ಪರ್ಗಾಂವಾಕ್ ಯೇವ್ನ್ ತ್ಯಾ ಕೊವ್ಳೆ ಥಾವ್ನ್ ಜಾತಾ ತಿತ್ಲ್ಯೊ ನಕ್ಕಲ್ ಪ್ರತಿಯೊ ಕಾಡುನ್ ಆಪ್ಲ್ಯಾ ಇಷ್ಟಾಂ-ಮಂತ್ರಾಂಕ್ ವಾಂಟುಂಕ್ ಲಾಗ್ತಾತ್. ಹ್ಯಾ ಚೊರಾಂನಿ ಕಾಂಯ್ ತರೀ ಆಪ್ಲ್ಯಾ ಮತಿಂತ್ ಹ್ಯಾ ವಿಶಿಂ ವ್ಯವಹರಣ್ ಕೆಲ್ಲೆಂ ಆಸಾ? ಕಾಂಯ್ ತರೀ ಚಿಂತ್ಲ್ಲೆಂ ಆಸಾ? ಹಾಂಚ್ಯಾಲಾಗಿಂ ಆಸಾತ್ ಪಯ್ಶೆ ಕುಸೊನ್ ಪಡ್ಚ್ಯಾ ತಿತ್ಲೆ; ತರೀ ಹ್ಯೊ ಕೊವ್ಳ್ಯೊ ಮೊಲಾಕ್ ಘೆವ್ನ್ ಹೆರಾಂಕ್ ವಾಂಟ್ಚ್ಯಾ ತಿತ್ಲೆಂ ಮನ್ಶಾಪಣ್ ನಾ?
ಎಕಾದಾವೆಳಾ ನಕ್ಕಲ್ ಪ್ರತಿ ಕೆಲಿಚ್ಚ್ ಮ್ಹಣ್ಯಾಂ, ತ್ಯಾ ನಕ್ಕಲ್ ಪ್ರತಿ ಬಾಬ್ತಿಂ ಥೊಡೆ ತರೀ ಪಯ್ಶೆ ತ್ಯಾ ಪದಾಂ ಘಡ್ಣಾರಾಕ್ ಧಾಡ್ಚ್ಯಾ ತಿತ್ಲಿ ಬೂದ್ ತರೀ ನಾ? ಹೆಂ ಚೊರ್ಪಣ್ ಮ್ಹಳ್ಳೆಂ ತಾಂಚ್ಯಾ ತ್ಯಾ ಅಶೀರ್ ಗಮನಾಕ್ ವಚಾನಾ?
ಆಮ್ಚೆ ಪದಾಂ ಘಡ್ಣಾರ್ ವ ಕೊವ್ಳ್ಯೊ ಪ್ರಗಟ್ಣಾರ್ ವ್ಹಡ್ಲೆ ಗ್ರೇಸ್ತ್ ಜಾಲ್ಯಾರ್ ಪರ್ವಾ ನಾತ್ಲ್ಲಿ. ಪುಣ್ ಹೆ ಪದಾಂ ಘಡ್ಣಾರ್ ಸಾದೆ ಸುದೆ ಭೊಳೆ ಕಲಾಕಾರ್, ಭಾರಿಚ್ ಕಷ್ಟಾಂನಿ ತ್ಯೊ ಕೊವ್ಳ್ಯೊ ಭಾಯ್ರ್ ವಿಕ್ರ್ಯಾಕ್ ಘಾಲ್ತಾತ್ ಆನಿ ಕಾಂಯ್ ತರೀ ಘಾಲ್ಲೆ ಪಯ್ಶೆ ಪಾಟಿಂ ಮೆಳ್ತಿತ್ಗಾಯ್ ಮ್ಹಣ್ ಹಾತ್ ಉದಾರೆ ಧರುನ್ ರಾಕೊನ್ ರಾವ್ತಾತ್. ತಾಂಕಾಂ ಹ್ಯಾ ಚೊರಾಂನಿ ದಿಂವ್ಚೆಂ ಕಿತೆಂ? ಫಕತ್ ಶೆಳೆಂ ಶಿತ್!
ಲಜ್ ಅಸಲ್ಯಾ ಚೊರಾಂಕ್, ಹೆರಾಂಕ್ ಮೆಳೊಂಕ್ ಜಾಯ್ ಜಾಲ್ಲೆ ಪಯ್ಶೆ ಆಡಾವ್ನ್ ಅಪ್ರಾಧ್ ಆಧಾರ್ತೆಲ್ಯಾಂಕ್. ಅಶೆಂ ಚೊರ್ಪಣ್ ಆಧಾರ್ಚ್ಯಾ ಬದ್ಲಾಕ್ ತೀನ್ ರಸ್ತ್ಯಾರ್ ಉಭೆ ರಾವೊನ್ ಹಾತಿಂ ಏಕ್ ತಗ್ಡಾಚೊ ಕಂರ್ಡೊ ಘೆವ್ನ್ ಭಿಕ್ ಮಾಗ್ಲ್ಯಾರ್ ಜಾಯ್ನಾ? ಥುಕ್ಕ್ ತುಮಿಂ ಭಿಕಾರ್ಯಾಂನೊ, ಥುಕ್ಕ್ ತುಮ್ಚ್ಯಾ ಜಲ್ಮಾಕ್!
-ಓಸ್ಟಿನ್ ಪ್ರಭು, ಚಿಕಾಗೊ.
About us | Feedback | Contact us
Copyright ©
2005 DAAIZ.COM All rights reserved.
Page concept, designed, hosted and maintained by Ashawadi Publications
