ಕವಿತಾकविताPoem
ಉಘಡ್ತಾನಾ
ಕೊಂಕ್ಣೆಚಾ ವಿಂಚ್ಣಾರ್ ಸಾಹಿತ್ಯಾಚೊ ಕೊನ್ಸೊ - ’ದಾಯ್ಜ್’ - ಫಕತ್ತ್ ಕೊಂಕಣಿ ಥಾವ್ನ್, ಕೊಂಕಣಿ ಪರ್ಯಾಂತ್, ಕೊಂಕಣಿ ಖಾತಿರ್.
ಕವಿತಾ ಮ್ಹಳ್ಯಾರ್ ಭಗ್ಣಾಂಚಿ ಅಭಿವ್ಯಕ್ತಿ.
ಕವಿತಾಪಾಠ್ - 4
ಲಿಸಾಂವ್ - 4. ಆಜ್
ಕವಿತಾ - ಆಜ್
ಕವಿ: ವಲ್ಲಿ ಕ್ವಾಡ್ರಸ್, ಅಜೆಕಾರ್
ಬೂಕ್: ಕಟ್ಪುತ್ಳಿ
ಪ್ರಕಾಶಕ್: ಆಶಾವಾದಿ ಪ್ರಕಾಶನ್
ಪಾಠ್ ಚಲವ್ಪಿಣ್: ಕ್ಯಾರಲ್ ಮಾರ್ಟಿಸ್
ತಾರಿಕ್: 13 ಮಾಯ್ 2005
ಜಾಗೊ: ಸಾಲ್ಮಿಯಾ, ಕುವೇಯ್ಟ್
ಚರಿತ್ರೆಚಿಂ ಪಾನಾಂ ಉಸ್ತಿಲಿಂ
ಎಕಾ ಶೆಕ್ಡ್ಯಾಚಿಂ
ಧಾ ಧಾಕ್ಡ್ಯಾಚಿಂ
ತೆ ದೀಸ್ಯ್ ಅಸೆಚ್ ಆಸ್ಲ್ಲೆ
ಭುಕಿಂ ಥೊಡಿಂ ನಾಗ್ಡಿಂ
ಗಾಂವಾಂತ್ ಲಾಸ್ತಾಲಿಂ
ಘರಾಂ, ಮನಾಂ, ಕಾಳ್ಜಾಂ
ದೆವಾಚೊ, ಧರ್ಮಾಚೊ ದಂಧೊ
ತೆದ್ನಾಂಯ್ ಚಲ್ತಾಲೊ
ಸಕ್ಕಡ್ ತಶೆಂಚ್ ಆಸಾ
ಪೊರ್ಚೆ, ಕಾಲ್ಚೆ ಆಯ್ಚೆಪರಿಂ
ಆಜ್!
(ತಸ್ವಿರೆಂತ್ ಆಸ್ಚಿಂ - ದಾವ್ಯಾ ಥಾವ್ನ್ ಉಜ್ವ್ಯಾಕ್)
ಬಸ್ಲ್ಲಿಂ: ಜೊಮೆಲ್ ಬೊಂದೆಲ್, ವೆರೋನಿಕಾ ಫೆರ್ನಾಂಡಿಸ್, ಕ್ಯಾರಲ್ ಮಾರ್ಟಿಸ್.
ಉಭಿಂ ಆಸ್ಚಿಂ: ಲೆಸ್ಲಿ ನೊರೊನ್ಹಾ, ಸಿರಿಲ್ ಪೆರಿಸ್, ಆಂಟನಿ ಮಿನೇಜಸ್, ಕ್ಲಾರಾ ಫೆರ್ನಾಂಡಿಸ್, ವೀಣಾ ಮಿನೇಜಸ್, ಪ್ರಿಯಾ ಸಿಕ್ವೇರಾ, ಮೆಲ್ವಿನ್ ಜೆ. ವಾಸ್, ವಲ್ಲಿ ಕ್ವಾಡ್ರಸ್.
ಕವಿಚಿ ವ್ಹಳೊಕ್:
ವಲ್ಲಿ ಕ್ವಾಡ್ರಸ್ ಅಜೆಕಾರ್ ಕೊಂಕ್ಣೆಂತ್ಲ್ಯಾ ಆಯ್ಲೆವಾರ್ ಕವಿಂಪಯ್ಕಿಂತ್ಲೊ ಎಕ್ಲೊ ತರ್ಯ್ ಕೊಂಕ್ಣಿ ಸಾಹಿತ್ಯಾಕ್ ಪರ್ನೊ. ಹಾಚಾಧಿಂ ತಾಚೊ ’ಚ್ಯಾರ್ ಮುಖಾಂ’ ಕವಿತಾಜಮೊ ಆಶಾವಾದಿ ಪ್ರಕಾಶನಾಧ್ವಾರಿಂ ಪರ್ಗಟ್ ಜಾಲಾ. ಕೊಂಕ್ಣಿ, ಕಾನಡಿ, ಹಿಂದಿ ತಶೆಂಚ್ ಇಂಗ್ಲಿಶ್ ಭಾಸಾಂನಿ ಕವಿತಾ ಲಿಖ್ಲ್ಯಾಂತ್, ಕೊಂಕ್ಣಿ ಆನಿಂ ಇಂಗ್ಲಿಶ್ ಕವಿತಾಂಕ್ ಇನಾಮಾಂಯ್ ಲಾಭ್ಲ್ಯಾಂತ್. www.poetry.com , www.ndtv.com ಹಾಂತುಂ ಇಂಗ್ಲಿಶ್ ಕವಿತಾ ಪರ್ಗಟ್ಲ್ಯಾಂತ್.
ಆಧ್ಲ್ಯಾ ಕವಿತಾಪಾಠಾಂಚೊ ವಿವರ್
ಕವಿತಾಪಾಠ್ - 3 . ಸಲ್ವಣಿ (ಫ್ರೆಡ್ ಕುಮಾರ್)
ಕವಿತಾಪಾಠ್ - 2 . ಕಯ್ದ್ಯಾಚಿ ಕವಿತಾ (ಎಚ್ಚೆಮ್)
ಕವಿತಾಪಾಠ್ - 1 . ವಾಟ್ (ಮೆಲ್ವಿನ್ ರೊಡ್ರಿಗಸ್)
ಆಜ್ ದೊಳೆ ಉಘಡ್ತಾನಾ (ಮೆಲ್ವಿನ್ ಜೆ. ವಾಸ್, ಕೆಲರಾಯ್)
ಮನಿಸ್ ಜಾತ್ ತರೀ ಕಸಲಿ? ತಾಚಿ ಹಿ ನೀದ್ ಕಸಲಿ? ನಿದೆಚೆಂ ಸಪಾಣ್ ತರ್ಯೀ ವಿಚಿತ್ರ್. ಸಪಾಣ್ ಪಳೆಲ್ಲೆಂ ತೆಂ ಫಾಂತ್ಯಾಫರಾರ್ ದೊಳೆ ಉಘಡ್ತಾನಾ ಸಗ್ಳೆಂ ಗಯ್ರೆಂ ಗಯ್ರೆಂ. ಮತಿಚಾ ಪಡ್ದ್ಯಾರ್ ಉಗ್ಡಾಸಾಚಾ ಹಿಂದ್ಳ್ಯಾಕ್ ವಿಸ್ರೊಂಕ್ ಜಾಯ್ನಾಸ್ತಾನಾ ಧಲೊನ್ ಆಸ್ಲ್ಯಾರ್ ಪಯ್ಸಿಲ್ಯಾ ಕುಪಾಂ ಮಧೆಂ ಆಪಾಲಿಪಾಂ ಖೆಳ್ಚೆಂಯ್ ಆಸ್ತಾ ಹೆಂ ಮನ್ಶಾ ಸಪಾಣ್. ಪುಣ್ ಕವಿಚೆಂ ಸಪಾಣ್ ಹಿಂದ್ಳ್ಯಾರ್ ಧಲೊನ್ ಕುಪಾಂ ಚಡೊನ್ ವರ್ಸಾಂಚಿ ಗಡ್ ಉತ್ರೊನ್ ಪಾಟಿಂ ಪಳೆತಾನಾ....!
ಸಗ್ಳೆಂ ತೆಂಚ್...! ಕಾಂಯ್ಂಚ್ ಬದ್ಲಾವಣ್ ನಾ.
ತಿಚ್ ಚರಿತ್ರಾ ತಿಂಚ್ ಪಾನಾಂ..
ತಿಂಚ್ ವರ್ಸಾಂ ತೆಚ್ ಶೆಕ್ಡೆ.
ಸುರ್ಯೊ ಉದೆತಾಲೊ ಅಸ್ತಮ್ತೆಕ್ ದೆಂವ್ತಾಲೊ. ಮನಿಸ್ ಖಾತಾಲೊ ಜೆವ್ತಾಲೊ ನಿದ್ತಾಲೊ. ಕೊಣ್ ಉಪಾಶಿಂಚ್ - ಭುಕೆನ್ ನಿದೆಕ್ ಉಡ್ಡಾತಾಲೊ. ವೇಳ್ ಮಾತ್ರ್ ಧಾಂವ್ತಾಲೊ ಸದಾಂಚೆಪರಿಂ ಕಾಂಯ್ಂಚ್ ಬದ್ಲಾವಣ್ ನಾಸ್ತಾನಾ. ಸಮಾಜೆಂತ್ ಜಿಯೆಂವ್ಚೊ ಮನಿಸ್ ಸಮಾಜೆಚಾ ಕೊನ್ಶಾರ್ ಪಡ್ಲ್ಲೊ. ಅಪ್ಣೆಂ ಮಾಯಾಮೊಗಾನ್ ಮನ್ಶಾಪಣಾನ್ ಜಿಯೆಂವ್ಕ್ ರಚ್ಲ್ಲ್ಯಾ ಸಮಾಜೆಂತ್ ಕೊಣ್ ಎಕ್ಲೊ ಕಿಡೊ ಜಾಲ್ಲೊ ತರ್ ಕೊಣ್ ಎಕ್ಲೊ ತಾಕಾ ಮಸ್ತುಂಕ್ ಪಾಡೊ ಜಾಲ್ಲೊ.
’ಭುಕಿಂ’ ಥೊಡಿಂ ’ನಾಗ್ಡಿಂ’ ’ಗಾಂವಾಂತ್ ಲಾಸ್ತಾಲಿಂ’ ’ಘರಾಂ ಮನಾಂ ಕಾಳ್ಜಾಂ’ ’ದೆವಾಚೊ ಧರ್ಮಾಚೊ ಧಂಧೊ’ ಎಕೆಕಾ ಸಬ್ಧಾಂನಿ ಎಕೆಕ್ ಇಮಾಜ್ ಉಭಿ ಕರ್ತಾ ಕವಿ ಹಾಂಗಾಸರ್. ಹ್ಯಾ ಇಮಾಜೆಪಾಟ್ಲೆಂ ಸತ್ ಪಾರ್ಕುಂಕ್ ಖಂಡಿತ್ ಮೆಳ್ಬಾಕ್ ನಿಸಣ್ ದವರ್ಚಿ ಗರ್ಜ್ ನಾ.
ಜಶೆಂ ದರ್ಯಾಕ್ ತಿಳುಂಕ್ ಆರ್ಶ್ಯಾಚಿ ಗರ್ಜ್ ನಾ ತಶೆಂ ಹ್ಯಾ ಇಮಾಜೆಂನಿ ತಿಳುಂಕ್ ವಿಶೇಷ್ ಬುಧ್ವಂತ್ಕಾಯೆಚಿಯ್ ಗರ್ಜ್ ನಾ. ಖಂಯ್ಸರ್ ಭುಕ್ ಥಂಯ್ಸರ್ ನಾಗ್ಡೆಂಪಣ್. ಕೊಣ್ ಕರಯ್ತಾ ತರ್ ಕೊಣ್ ಅಪ್ಲೇಸ್ತಕಿಂ ಸಲ್ವೊನ್ ಕರ್ತಾ. ಹರ್ಯೆಕ್ ಎಕಾ ರುಪಾಚೊ ಧಂಧೊ, ಹಾಂತುಂ ಘರಾಂಯ್ ಲಾಸ್ತಾಲಿಂ, ಮನಾಂ ಖಡ್ತಾಲಿಂ, ಕಾಳ್ಜಾಂ ಭಾಜ್ತಾಲಿಂ, ಸಗ್ಳೆಂ ತಶೆಂಚ್ ಆಸಾ. ಪೊರ್ಚೆ ಕಾಲ್ಚೆ ಆಯ್ಚೆಪರಿಂ - ಆಜ್...!
ಕವಿ ಹಾಂಗಾಸರ್ ನಿಜಾಯ್ಕ್ಯೀ ಕುಪಾಂಮಧೆಂ ಚಡ್ಲಾ? ವಾ ಸಮಾಜೆಚಾ ದುರಿಗಾಭಿತರ್ ಶಿರ್ಕಾಲಾ? ಯಾ ಕೊಣಾಯ್ಕ್ಯೀ ಉಟಂವ್ಚೆಂ ಪ್ರೇತನ್ ಕರಿತ್ ಆಸಾ? ಭೋವ್ಶಾ ಮ್ಹಾಕಾ. ಸಮಾಜೆಚಾ ಕಾಳಾ ಥಾವ್ನ್ ಕಾಳಾಕ್ ಬದ್ಲಾಂವ್ಕ್ ಸಕಾನಾತ್ಲೆಲ್ಯಾ ಸತಾಕ್ ಕವಿ ಮ್ಹಜಾ ದೊಳ್ಯಾಂ ಮುಖಾರ್ ಹಾಡ್ಚೆಂ ಪ್ರಯತ್ನ್ ಕರ್ತಾ. ಪ್ರಯತ್ನ್ ಕಿತ್ಯಾಕ್?
ಫಾಲ್ಯಾಂ ತರ್ಯೀ ಅಶೆಂ ಕರಿನಾಕಾತ್ ಮ್ಹಣೊನ್. ಸಮಾಜೆಚಾ ತೊಂಡಾಮುಖಾರ್ ಕವಿನ್ ದವರ್ಲ್ಲೊ ಹೊ ಏಕ್ ಫುಟ್ಕುರೊ ಆರ್ಸೊ ಮ್ಹಣ್ಯೆತ್. ಆರ್ಸೊ ಕಿತ್ಲೋಯ್ ಪಿಟೊ ಕರಾ, ಹರ್ಯೆಕಾ ತಾಚಾ ಕುಡ್ಕ್ಯಾಂತ್ ತೆಂಚ್ ದೊಳ್ಯಾಂಕ್ ದಿಸ್ತೆಲೆಂ. ಆನಿಂ ಮ್ಹಾಕಾ ತುಕಾ ಹೆಡಾಯ್ತೆಲೆಂ.
ಅಜೂನ್ ಸಂಸಾರ್ ಪ್ರಗತೆಕ್ ಪಾವ್ಲಾ, ಮನಿಸ್ ಚಂದ್ರಾಕ್ ಚಡ್ಡ್ಲಾ ಮ್ಹಣ್ ಪೆಂಪಾರೆಂ ವ್ಹಾಜಾಂವ್ಚಾ ಕಾಳಾರ್ಯ್ ಕಾಂಯ್ಚ್ ಬದ್ಲೊಂಕ್ನಾ ಸಮಾಜೆಚಾ ಬಂಧ್ದಾರಾಂಕ್ ಉಗ್ತಾವಣ್ ದೀಂವ್ಕ್ ಕವಿಚೊ ತಾಳೊ ಹೊ. ತಾಳ್ಯಾಕ್ ಸಾರ್ಕ್ಯೊ ಇಮಾಜಿ ದೊಳ್ಯಾಂಚಿಂ ಪಿಂತ್ರಾಂ ಕಾಡುನ್ ಉಡಂವ್ಚೊ. ಸಗ್ಳ್ಯಾ ಸಮಾಜೆಕ್ ಕವಿನ್ ಜೊಕ್ಚೆಂ ಬೋಟ್ ಖಂಡಿತ್ ತೆಂ ಪಳೆಲ್ಲ್ಯಾ ಸಪ್ಣಾಕ್ ನಿರಾಸ್ ಜಾವ್ನ್ ಕ್ರಾಂತಿಕ್ ಆಪವ್ಣೆಂ ದಿಂವ್ಚೆಂ.
ಕವಿತೆಂತ್ ಕವಿನ್ ಇಮಾಜೆಂಕ್ ಮಾತ್ರ್ ಸೊಭಯ್ಲಾಂ ಶಿವಾಯ್ ತ್ಯಾ ಇಮಾಜೆ ಪಾಟ್ಲ್ಯಾ ರುಪಾಂಕ್ ನ್ಹಯ್. ಹ್ಯಾಚ್ ಕಾರಾಣಾಂಕ್ ಹೆಂ ಕವಿತಾ ಅಸಲ್ಯಾಚ್ ರುಪಾಕ್ ಲಾಗುಕರಿನಾಸ್ತಾನಾ ಖಂಯ್ಚಾಯ್ ರುಪಾಕ್ ಲಾಗು ಕರ್ಯೆತ್. ಹೊ ಏಕ್ ಖಂಡಿತ್ ಪಳೆಂವ್ಕ್ ಜಾಯ್ ಜಾಲ್ಲೊ ವಿಶಯ್. ದಾಖ್ಲೊ ದಿಂವ್ಚೊ ತರ್ ಭುಕ್. ಭುಕೆಚಿಂ ರುಪಾಂ ಹಜಾರ್. ಹ್ಯಾ ಹಜಾರ್ ರುಪಾಂನಿ ಹಜಾರ್ ಅಸಲಿಂ ಕವಿತಾ ಉಭಿಂ ಕರ್ಯೆತಾ.
ತ್ಯಾ ಹಜಾರ್ ರುಪಾಂಕ್ ಸಂಕೀರ್ಣ್ ಕರುನ್ ಆಜ್ ಮ್ಹಳ್ಳ್ಯಾ ಎಕಾಚ್ ಉತ್ರಾನ್ ಎಕಾಚ್ ರುಪಾನ್ ಸೊಬಯಿಲ್ಲೆಂ ಕವಿತಾ ನಿಜಾಯ್ಕ್ಯ್ ಧಾ ಹಜಾರಾಂಚಾ ಹಜಾರ್ ಶೆಕ್ಡ್ಯಾಂ ಥಾವ್ನ್ ವ್ಹಾಳೊನ್ಂಚ್ ಆಯಿಲ್ಲೆಂ ಮ್ಹಣೊನ್ ಮ್ಹಜಿ ಅಭಿಪ್ರಾಯ್.
’ಆಜ್’ - ಪುನರಾವರ್ತನ್ ಜಾಯ್ನಾಯೆ ಮ್ಹಳ್ಳೊ ಸಂದೇಶ್ ದಿಂವ್ಚಿ ಕವಿತಾ - ಕ್ಯಾರಲ್ ಮಾರ್ಟಿಸ್, ತ್ರಾಸಿ
’ಆಜ್’ ಕವಿತೆಚೊ ಕವಿ ಆಯ್ಚಾ ದಿಸಾಕ್ ಶೆಕ್ಡ್ಯಾಧ್ಲ್ಯಾ ದಿಸಾಂಕ್ ಎಕಾಮೆಕಾ ದವ್ರುನ್ ಆಜ್ ಪರ್ಯಾಂತ್ ಜ್ಯೆ ಕಿತೆಂ ಘಡ್ಲಾಂ ತಾಚಿ ಬದ್ಲಾವಣ್ ಗರ್ಜೆಚಿ ಮ್ಹಳ್ಳೊ ಉಲೊ ದಿತಾ, ಆನಿಂ ಸಕಯ್ಲ್ಯೊ ಇಮಾಜ್ಯೊ ಹಾಚೊ ರುಜ್ವಾತ್ ದಿತಾತ್;
ಆಧ್ಲೊ ಲೋಕ್ ದುಬ್ಳೊ ಆಸ್ಲ್ಲೊ ಜಾವ್ಯೆತ್, ಖಾಣಾ ಜೆವ್ಣಾಕ್ ದುಬ್ಳೊ, ನೆಸ್ಪಾಕ್ ದುಬ್ಳೊ, ಶಿಕ್ಪಾಕ್ ದುಬ್ಳೊ, ಪಿಡೆಕ್ ದುಬ್ಳೊ ತರ್ಯೀ ಕಾಳ್ಜಾಂ ಮನಾಂನಿ ಗ್ರೇಸ್ತ್ ಆಸ್ಲ್ಲೊ. ಪುಣ್ ಆಜ್ಕಾಲ್ ಹಿ ಪರಿಗತ್ ಜಾಯ್ತಿ ಬದಾಲ್ಲ್ಯಾ ತರ್ಯ್ ಕಿತೆಂಚ್ ಬದ್ಲೊಂಕ್ ನಾ ಮ್ಹಣ್ತಾ ಕವಿ.
ದುಬ್ಳಿಕಾಯ್ ಆಸಲ್ಲಿ ತರೀ ಲೊಕಾ ಥಂಯ್ ಬರೆಂ ಮನ್ಶ್ಯಾಪಣ್ ಆಸ್ಲ್ಲೆ, ಪುಣ್ ಆತಾಂ ಮ್ಹನ್ಶಾಚಿ ದೇವ್ ಬಿರಾಂತ್ ನಪಂಯ್ಚ್ ಜಾವ್ನ್, ಮ್ಹನಿಸ್ ಎಕಾಮೆಕಾ ಸ್ವಾರ್ಥಿ ಜಾಲಾ, ದೆವಾಚ್ಯಾ ನಾಂವಾನ್ ದಂಧೊ ಚಲ್ತಾ, ಧರ್ಮಾಚ್ಯಾ ನಾಂವಾನ್ ಮ್ಹನಿಸ್ ಸಮೊಡ್ತ್ ಬದ್ಲಿತಾ, ಧಾರ್ಮಿಕ್ ಮೊಲಾಂ ಪಯ್ಸ್ ಸರ್ಲ್ಯಾಂತ್ ಮ್ಹಣ್ ಕವಿ ಸಾಂಗ್ತಾ. ಹ್ಯಾ ಸರ್ವ್ ಸಂಗ್ತಿಂಕ್ ಆಮಿಂಚ್ ಆನಿಂ ಆಮ್ಚೆಂ ಸ್ವಾರ್ಥ್ ಕಾರಾಣ್ ಜಾಲಾಂ.
ಕವಿ ಆಶೆಂ ಪಯ್ಲೆಂ ಜಾಲ್ಲೆಂ, ಆತಾಂ ಜಾಂವ್ಚೆ ಆನಿಂ ಮುಖಾರಿಂಕ್ ಆಶೆಂ ಘಡುಂಕ್ ನಜೊ, ಮ್ಹಣ್ ಕವಿ ಲೊಕಾಕ್ ಜಾಗ್ವಣ್ ದಿತಾ.
ಕಿತೆಂಚ್ ಬದ್ಲಾನಾತ್ಲ್ಲಿ ಬದ್ಲಾವಣ್ (ಲೆಸ್ಲಿ ನೊರೊನ್ಹಾ, ಕುಲ್ಶೇಕರ್)
’ಆಜ್’ ಕವಿತೆಚಾ ಕವಿಚಿಂ - ವಲ್ಲಿ ಕ್ವಾಡ್ರಸಾಚಿಂ ಹೆರ್ ಚಡಾವತ್ ಬರ್ಪಾಂ ವಾಚುನ್, ತಾಚಾ ನಾಟ್ಕುಳ್ಯಾಂತ್ ನಟನ್ ಕರ್ನ್, ತಶೆಂಚ್ ತಾಕಾ ಲಾಗ್ಸಿಲ್ಯಾನ್ ವಳ್ಕೊನ್ ಜಾಣಾಸ್ಲ್ಲ್ಯಾನ್ ತಾಚೆಂ ಚಿಂತಾಪ್, ಜೆಂ ಹ್ಯಾ ಕವಿತೆಂತ್ ಲಿಪೊನ್ ಆಸ್ಚೆಂ ಮ್ಹಾಕಾ ಸಾರ್ಕೆರಿತಿನ್ ಸಮ್ಜಾತಾ ಆನಿಂ ತೆಂ ಜಾವ್ನಾಸಾ;
’ಮನಿಸ್ ಆಜ್ಕಾಲ್ ಕಿತ್ಲೋಯ್ ಪ್ರಗತಿಶೀಲ್ ಜಾಲಾ ತರ್ಯ್ ಮೂಳ್ ಚಿಂತ್ನಾಂನಿ ಮನಿಸ್ ಥಂಯ್ಚೊ ಥಂಯ್ಂಚ್ ಆಸಾ ಮ್ಹಳ್ಳೊ ಸಂಧೇಶ್ ದಿತಾ ಕವಿತಾ - ’ಆಜ್’
ಚರಿತ್ರೆಚೆಂ ಆಜ್ - ಕ್ಲಾರಾ ಫೆರ್ನಾಂಡಿಸ್, ಕುಲ್ಶೇಕರ್
ಕವಿ ಹಾಂಗಾಸರ್ ದುಬ್ಳಿಕಾಯೆ ವಿಶ್ಯಾಂತ್ ಉಲಯ್ತಾ. ಹಿ ದುಬ್ಳಿಕಾಯ್ ಜಾಂವ್ಕ್ ಪುರೊ ಆರ್ಥಿಕ್ಪಣಾಚಿ, ಮನ್ಶ್ಯಾಪಣಾಚಿ ಯಾ ಆಮ್ಚ್ಯಾ ಅಮ್ಚಾ ಹ್ಯಾ ಕೊಂಕ್ಣೆ ಭಾಷೆಚಿ.
ಎಕಾ ಶೆಕ್ಡ್ಯಾ ಆಧಿಂಯ್ ಅಸ್ಲ್ಲೆಂ ಹೆಂ ದುಬ್ಳೆಂಪಣ್ ಅಮ್ಚೆ ಥೈಂ ಅತಾಂಯ್ ಆಸಾ. ಅಮ್ಚೆ ನದ್ರೆ ಮುಖಾರ್ ಜಾಯ್ತ್ಯಾ ಘರಾಂನಿ ಎಕಾ ವೆಳಾಚೆಂ ಶಿತ್ ಶಿಜಾನಾತ್ಲ್ಲೆಂ ತರಿ ಕೊಣಾಯ್ಕಿ ಪರ್ವಾ ನಾತ್ಲ್ಲಿ. ಕುಟ್ಮಾಚ್ಯಾಂಕ್ ತಾಂಚೆರ್ ಭಿರ್ಮ್ತ್ ದಿಸಾನಾತ್ಲ್ಲಿ. ಸರ್ವ್ ಅಪ್ಲ್ಯಾ ಅಪ್ಲ್ಯಾ ದಾದೊಸ್ಪಣಾಚಿ ದಾಧೊಸ್ಕಾಯ್ ಉಲಯ್ತಾಲಿಂ. ಘರಾಂ ತಾಂಚಿ ಸೊಭಾಯ್ತಾಲಿಂ.
ಮನಾಂ ತಾಂಚಿ ಮೆಳಿಂ ಅಸ್ಲ್ಲಿ ತರ್ಯೀ ದೆವಾಚಾ ನಾವಾನ್ ಇಗರ್ಜ್ಮಾತೆಕ್ ದಾನ್, ಧರ್ಮ್ ದಿತಾಲಿಂ, ದೆವಾಚಿ ದಿಸ್ ರಾತ್ ಪುಜಾ ಕರ್ತಾಲಿಂ. ತರ್ ಹಿ ದುಬ್ಳಿಕಾಯ್ ಕಸಲಿ? ಹಿ ದುಬ್ಳಿಕಾಯ್ ಮನ್ಶ್ಯಾಪಣಾಚಿ?, ಅಮ್ಚ್ಯಾ ಚಿಂತ್ಪಾಚಿ?, ಸಮಾಜೆಚಿ? ಮನಿಸ್ ಜಸೊ ಕಾಲ್ ಅಸ್ಲ್ಲೊ, ತಸೊಚ್ ಆಜ್ಯಿ ಅಸಾ. ಕಾಂಯ್ಚ್ ಬದ್ಲಾವಣ್ ನಾಂ.
ಆಧ್ಲೊ ಸಂಸಾರ್ ಆನಿಂ ಆತಾಂಚೊ ಸಂಸಾರ್ (ಪ್ರಿಯಾ ಸಿಕ್ವೇರಾ, ಫೆರಾರ್)
ಕವಿ ಹಾಂಗಾಸಾರ್ ಸಂಸಾರಾಚ್ಯಾ ಅಧ್ಲ್ಯಾ ಪರಿಸ್ಥಿತಿ ಆನಿಂ ಅತಾಂಚ್ಯಾ ಪರಿಸ್ಥಿತೆಕ್ ಕಿತೆಂಚ್ ವ್ಯತ್ಯಾಸ್ ನಾ ಮ್ಹಣ್ ಹ್ಯಾ ಕವಿತಾಧ್ವಾರಿಂ ವಿವರಿತಾ. ಎಕಾ ಶೆಕ್ಡ್ಯಾಚಾ, ಧಾ ದಾಕ್ಡ್ಯಾಚಾ ಚರಿತ್ರೆಚಿ ಪಾನಾಂ ಉಸ್ತಿತಾನಾ ತಾಕಾ ಆಶೆಂ ಭೊಗ್ತಾಂ.
"ತೆ ದೀಸ್ಯೀ ಅಶೆಚ್ಚ್ ಅಸ್ಲ್ಲೆ
ಭುಕಿಂ ಥೊಡಿಂ ನಾಗ್ಡಿಂ
ಗಾವಾಂತ್ ಲಾಸ್ತಾಲಿಂ ಘರಾಂ, ಮನಾಂ, ಕಾಳ್ಜಾಂ"
ಆದ್ಲ್ಯಾ ಕಾಳಾರ್ಯೀ ದುಬ್ಳಿಕಾಯ್ ಭರೊನ್ ವೊಮ್ತಾತಾಲಿ. ಸಭಾರ್ ಜಣಾಂಕ್ ಪೊಟಾಕ್ ಖಾಂವ್ಕ್, ಘಾಲುಂಕ್ ವಸ್ತುರಾ ನಾತ್ಲ್ಲಿ. ಆತಾಂಯೀ ತಿಚ್ಚ್ ಪರಿಸ್ಥಿತಿ. ಕಿತ್ಲೆಶೆ ಯುವಜಣ್ ಕಾಮ್ ನಾಸ್ತಾನಾ ಬೆಕಾರ್ ಬೊಂವ್ತಾತ್. ಕಿತ್ಲೆಶೆ ಕುಟ್ಮಾಂನಿ ಸೊರ್ಯಾ ವರ್ವಿಂ ವೀದ್ವಾವ್ಳಿ ಜಾತಾತ್. ನಾ ಭುರ್ಗ್ಯಾಂಕ್ ಶಿಕಾಪ್, ಹಾಚೊ ಪರಿಣಾಮ್ ದುಬ್ಳಿಕಾಯ್, ನಾಸಮಧಾನ್, ನಾ ನೆಸೊಂಕ್ ನಾ ಪಾಂಗ್ರುಂಕ್. ಆನಿ ಥೊಡೆಂ ಗ್ರೇಸ್ತ್ ಆಸೊನ್ಯೀ ದುಬ್ಳೆ ಜಾವ್ನಾಸಾತ್.
"ದೆವಾಚೊ, ಧರ್ಮಾಚೊ ದಂಧೊ ತೆದ್ನಾಂಯ್ ಚಲ್ತಾಲೊ"
ದೆವಾಚಾ, ಧರ್ಮಾಚಾ ನಾಂವಾನ್ ಝಗ್ಡಿಂ, ಝಜ್ ಚಲೊನ್ಂಚ್ ಅಸಾ. ಎಕ್ಚ್ಚ್ ದೇವ್ ಮ್ಹಣ್ ಪಾತ್ಯೆಂವ್ಚಾ ಬದ್ಲಾಕ್ ತುಜೊ ಧರ್ಮ್ ಕೀಳ್, ಮ್ಹಜೊ ಊಂಚ್ ಮ್ಹಳ್ಳೆಂ ಚಿಂತಾಪ್; ಧರ್ಮಾಚ್ಯಾ ನಾಂವಾನ್ ಖುನ್, ಮಾರಾಫಾರ್.
ಆದ್ಲ್ಯಾ ಕಾಳಾರ್ಯೀ ಹೆಂ ಚಲೊನ್ ಆಸ್ಲ್ಲೆ ಆನಿಂ ಆತಾಂಯೀ. ಪರಿಗತ್ ತಶಿಚ್ಚ್ ಆಸಾ, ಪೊರ್ಚೆ, ಕಾಲ್ಚೆ, ಆಯ್ಚೆಪರಿ ಆಜ್.
ಆಧುನಿಕರಣಾಂ ಮಧೆಂ ಪರ್ನೊ ಉಸ್ವಾಸ್ ಸೊಡ್ತಾ ’ಆಜ್’ - ಜೊಮೆಲ್, ಬೊಂದೆಲ್
"ಆಜ್" ಕವಿತಾ ವಾಸ್ತಾನಾ, ಏಕ್ಕಿಸಾವ್ಯಾ ಶೆಕ್ಡ್ಯಾಕ್ ಪಾವಲ್ಲೊ ಹೊ ಆಧುನಿಕ್ ಸಂಸಾರ್, ಆಧುನಿಕ್ ಸೌಲ್ಯತ್ಯಾಂತ್ ಮುಕಾರ್ ಪಾವ್ಲಾ ತರೀ, ಕವಿ ಚರಿತ್ರೆಂಚಿ ಪಾನಾಂ ಉಸ್ತುನ್ ಪಳೆತಾನಾ, ದೆವಾಚಾ ನಾಂವಾರ್ ಜಾಂವ್ಚೊ ಧರ್ಮಾಚೊ ದಂದೊ, ಹಾತಾಕ್ ಆಸ್ಲ್ಲಿ ಶಿತಾ ಉಂಡಿ ಚೊರುನ್ ಕಾಡ್ಚೊ ದಂಧೊ, ಭುರ್ಗ್ಯಾಂ ಬಾಳಾಂಕ್ ವಿಣ್ಗೆಂ ಕರುನ್ ರಗಾತ್ ಘೊಟ್ಚೊ ದಂಧೊ ಆಸಾ ತಶೆಂಚ್ ಆಧಿಂಮಾಗಾ ಥಾವ್ನ್ ಘಡ್ತೆಚ್ ಆಸಾ ಕಿತೆಂಚ್ ಬದ್ಲುಂಕ್ ನಾ ಮಳ್ಳೆಂ ಬೆಜಾರಾಯ್ ಕವಿಚಿ.
ಕವಿ ’ಆಜ್’ ಏಕಾ ಜಾಗ್ಯಾರ್ ರಾವುನ್, ಕಾಲ್ಚೆಂ ಪೊರ್ಚೆಂ ಚರಿತ್ರೆಚಿಂ ಪಾನಾಂ ಉಸ್ತಿತಾನಾ, ಕಿತೆಂಚ್ ಬದ್ಲುಂಕ್ ನಾ ಮ್ಹಳ್ಳಿ ಬೆಜಾರಾಯ್ ತಾಚಿ. ಪೂಣ್ ’ಫಾಲ್ಯಾಂ’ಕ್ ಕಿತೆಂ ಕರಿಜೆ ಮ್ಹಣ್ ಕವಿನ್ ವಾಟ್ ದಾಖಯ್ಲಿ ತರ್ ಹಿ ಕವಿತಾ ಆನಿಕೀ ಗೂಂಡ್ ಜಾವ್ನ್ ಸೊಭ್ತಿ.
ಕವಿಚಾ ಉತ್ರಾಂನಿ
ಜಿವಿತ್ ಮ್ಹಳ್ಯಾರ್ ಕವಿತಾ ಆನಿಂ ಕವಿತಾ ಮ್ಹಳ್ಯಾರ್ ಏಕ್ ಮಿಸ್ತೆರ್ ಆನಿಂ ಮಿಸ್ತೆರ್ ಮ್ಹಳ್ಯಾರ್ ಸಮ್ಜೊಂಕ್ ಜಾಯ್ನಾತ್ಲ್ಲಿ ಹುಮಿಣ್ ಬಿಲ್ಕುಲ್ ನ್ಹಯ್.
ಕವಿತಾ ಮ್ಹಳ್ಳೊಚ್ ಏಕ್ ಪ್ರಕಾರ್ ಆನಿಂ ಜರ್ತರ್ ಕವಿತಾಯ್ ಕೊಣಾಯ್ಕ್ಯ್ ಕಶ್ಯೊಯ್ ಸಮ್ಜಾತ್ಯೊ ತರ್ ಭೋವ್ಶಾ ಸಾಹಿತ್ಯಾಂತ್ ಕವಿತಾ ಮ್ಹಳ್ಳೊ ಪ್ರಕಾರ್ ಆಸ್ತೊಚ್ ನಾ. ಆಜ್ ಕವಿತಾ ಬರಂವ್ಚಾ ವೆಳಾರ್ ಮ್ಹಜಾ ಮತಿಂತ್ ಆಸ್ಲ್ಲೆಂ ನಖ್ಖೆಂ ಚಿಂತಾಪ್ ಮ್ಹಾಕಾಚ್ ಕಳಿತ್ ನಾಂ ತರ್ಯ್ ಮ್ಹಾಕಾ ತೆಂ ಕವಿತಾ ಬರಂವ್ಕ್ ಪ್ರೇರಣ್ ದಿಲ್ಲೆಂ ಚಿಂತಾಪ್ ಜರೂರ್ ಉಡಾಸ್ ಆಸಾ.
ಕವಿತಾ ವಯ್ಲೆಭಾರ್ ವಾಚ್ಲೆಂ ತರ್ ನಿರಾಸ್ವಾದ್ ಪಾಚಾರ್ತಾ, ತರ್ಯ್ ಮ್ಹಾಕಾ ಭೋವ್ ಸಂತೊಸ್ ಭೊಗ್ತಾ ಎಕ್ಲ್ಯಾ ದೊಗಾನ್ ತರ್ಯ್ ಹ್ಯಾ ಕವಿತಾಕ್ ಫಕತ್ತ್ ವಯ್ಲೆಭಾರ್ ಪಳೆನಾಸ್ತಾಂ ಕವಿತಾಚಾ ಭಿತರ್ಲೆ ಭಿತರ್ ದೀಶ್ಟ್ ಘಾಲ್ನ್, ಕವಿತೆಚೆಂ ತೀರ್ಳ್ಚ್ ಆಪಡ್ಲಾಂ - ಹಾಂತ್ಲೊ ಪರಿಪೂರ್ಣ್ ರಿತಿನ್ ಜಯ್ತೆವಂತ್ ಜಾಲ್ಲೊ ಕವಿ ಮ್ಹಜಾ ಕಾಳ್ಜಾಮನಾಕ್ ಸಮ್ಜಾಲ್ಲೊ ಆಂಡ್ರು ಡಿ’ಕುನ್ಹಾ ಮಾತ್ರ್.
ಕವಿತಾಚೆಂ ತಕ್ಲೆನಾಂವ್ ’ಆಜ್’ ಆನಿಂ ಕವಿತಾಚೊ ಅಖ್ರೇಚೊ ಸಬ್ಧ್ ’ಆಜ್!’. ಕವಿತೆಂತ್ ಖಂಯ್ಸರ್ಯೀ ಫಾಲ್ಯಾಂ ಮ್ಹಳ್ಳೊ ಸಬ್ಧ್ ನಾ. ಮ್ಹಜಾ ಮತಿನ್ ಚಿಂತ್ಲ್ಲ್ಯಾ ಚಿಂತ್ಪಾಪ್ರಕಾರ್ ಲಿಸಾಂವಾಂ ಶಿಕ್ಚಾಕ್ ಏಕ್ ಚರಿತ್ರಾ ಉಸ್ತಿಲಿ, ತೀಯ್ ಎಕಾ ಶೆಕ್ಡ್ಯಾಚಿ, ಯಾ ಧಾ ದಾಕ್ಡ್ಯಾಚಿ ಚರಿತ್ರಾ. ಆಜ್ ತರ್ಯೀ ಹಾಂವ್ ಚಿಂತುಂಕ್ ಸಕ್ತಾಂ ಎದೊಳ್ ಕಿತೆಂ ಜಾಲ್ಲೆಂ ಮ್ಹಳ್ಳೆಂ ತೆಂ. ತಶೆಂ ಆಸ್ತಾಂ ಫಾಲ್ಯಾಂ ಕಶೆಂ ಜಾಯ್ಜಯ್? ಕಿತೆಂ ಜಾಂಯ್ನಾಯೆ ಮ್ಹಳ್ಳೆಂ ಚಿಂತಾಪ್ ಹಾಡಂವ್ಚೆಂಚ್ ಮ್ಹಜೆಂ ಚಿಂತಾಪ್ ಜಾವ್ನಾಸ್ಲ್ಲೆಂ ಶಿವಾಯ್ ಹೆರ್ ಕಿತೆಂಚ್ ನ್ಹಯ್.
ಮ್ಹಜಾ ಚಿಂತ್ಪಾಪ್ರಕಾರ್ ಭುಕಿಂ ಥೊಡಿಂ ನಾಗ್ಡಿಂ ಮ್ಹಳ್ಳ್ಯೊ ಇಮಾಜ್ಯೊ ಹ್ಯಾ ಕವಿತೆಚಾ ತಿರ್ಳಾಚಿ ಸಾವ್ಳಿ.
ಭುಕ್ - ಕೊಣಾಕ್ ನಾಂವಾಚಿ, ಕೊಣಾಕ್ ಮಾನಾಚಿ, ಕೊಣಾಕ್ ಪದ್ವೆಚಿ, ಕೊಣಾಕ್ ಅಧಿಕಾರಾಚಿ, ಕೊಣಾಕ್ ಆಸ್ಚೆಂ ಸಗ್ಳೆಂ ಅಪ್ಣಾಚೆಂ ಕರ್ಚಿ, ಭುಕ್.. ಥೊಡ್ಯಾಂಕ್ ಪೊಟಾಚಿ ಭುಕ್ ಸಯ್ತ್. ಆನಿಂ ಹ್ಯಾ ಭುಕೆಕ್ ಮನಿಸ್ ಎಕೆಕ್ ವಿಧ್ಯಾ ವಾಪರ್ನ್ ಅಪ್ಲ್ಯಾ ಭುಕೆಕ್ ಹೆರಾಂಚಿಂ ವೆಕ್ತಿತ್ವಾಂಕ್ಚ್ ಗಿಳ್ತಾ, ಹೆರಾಂಚೆಂ ಅಸ್ಮಿತಾಯ್ಚ್ ಗಿಳ್ತಾ ಆನಿಂ ಮನಿಸ್ ಕಿತ್ಲೊಯ್ ಶಿಕ್ಪಿ, ಪ್ರಗತಿಶೀಲ್ ತರ್ಯ್ ಹ್ಯಾ ಸತಾಚೊ ನಾಗ್ಡೊ....
ಅನ್ಯೇಕ್ ಉತ್ರಾಚೊ ಹಾವೆಂ ವಾಪಾರ್ ಕೆಲಾ - ’ದಂಧೊ’. ಭೋವ್ಶಾ ಹ್ಯಾ ಸಬ್ಧಾಚೆ ಜಾಯ್ತೆ ಪರ್ಯಾಯ್ ಸಬ್ಧ್ ಆಸ್ಲ್ಲೆ, ಬಾಜಾರ್, ವೆವ್ಹಾರ್, ವೆಪಾರ್, ಬಿಜ್ನೆಸ್... ತರ್ಯ್ ದಂಧೊ ಮ್ಹಳ್ಳೊ ಸಬ್ಧ್ಚ್ ಮ್ಹಾಕಾ ಆಯ್ಚಾ ಕಾಳಾಚಾ ದೆವಾಚಾ ಧರ್ಮಾಚಾ ನಾಂವಾಂನಿ ಚಲ್ಚಾ ಭೊಂಗೊಸ್ತೊಳಾಚಿ ಕುರುಃ ದಿತಾ.
ಹಾಂಗಾಸರ್ ಹಾವೆಂ ಖಂಚಾಯ್ ಧರ್ಮಾಕ್ ಬೋಟ್ ಜೊಕುಂಕ್ನಾ ತರ್ಯೀ ಸಕ್ಕಡ್ ಧರ್ಮಾಂತ್ಲೊ ಉಗ್ತೊ ದಂಧೊ ಆಧಿಂಯ್ ಆಸ್ಲ್ಲೊ ಆತಾಂಯ್ ಆಸ್ಚೊ ಉಲ್ಲೇಕ್ ಕೆಲಾ. ಮ್ಹಜಾ ಭಾರಾ ಲಾಯ್ನಿಂಚಾ ’ಆಜ್’ ಕವಿತೆಕ್ ಶಿಂದ್ಲ್ಲ್ಯಾ ತುಮ್ಚಾ ಸರ್ವಾಂಚೊ ಹಾಂವ್ ಉಪ್ಕಾರ್ ಬಾವುಡ್ತಾಂ,
ವಲ್ಲಿ ಕ್ವಾಡ್ರಸ್, ಅಜೆಕಾರ್
13-ಮಾಯ್-2005
About us | Feedback | Contact us
Copyright © 2005
DAAIZ.COM All rights reserved.
Page concept, designed and maintained by Ashawadi
Publications
More in Daaiz
Send your comments to author on this writing
This is not a comment box. Nothing you write here appears on the site or is shown to any other reader: it is sent to him by email, privately, and he replies to you directly if a reply is called for.