ಕಾಣ್ಯೊ
ಸಾಹಿತಿಕ್ ಸ್ಪರ್ಧೊ 2004
ಕಥಾಪಾಠ್
ಅಂಕಣಾಂ
ಸಾಹಿತಿಕ್ ಸ್ಪರ್ಧೊ 2005
ಕವಿತಾಂ
ಸಾಹಿತಿಕ್ ಸ್ಪರ್ಧೊ 2006
ದಾಯ್ಜ್ ಶಿಭಿರ್ 2006
ವಿಡಂಬನಾಂ
ದಾಯ್ಜ್ ಶಿಭಿರ್ 2007
ಕಥಾಮೃತ್
ವಿಮರ್ಶೆ
’ಸರ್ವಾಂಕ್ ಮಾನ್/ಮರ್ಯಾದ್ ದೀ. ಜೊ ತಾಕಾ ಫಾವೊ ಜಾಲ್ಲೊ, ತೆಚ್ಚ್ಪರಿಂ ಪಾಟಿಂ ಮಾನ್ ದೀಂವ್ಕ್ ಸಕ್ತಲೊ, ವಾ ಅಪ್ಲೊಚ್ ಮಾನ್ ಭಂಗಯ್ತಲೊ - ಆ.ವಾ.’
ಕೆದ್ನಾಂ ಮೌನ್ ಉಲಯ್ತಾನಾ..!
ವರಸ್ : 2011
ಅಂಕೊ : 52
ಮಯ್ನೊ : ಅಗೋಸ್ತ್
ಸಂಪಾದಕೀಯ್ - 52.
ವಲ್ಲಿ ಕ್ವಾಡ್ರಸ್
ಲಾಂಭಾಯೆಚೆಂ ಮೌನ್.. ಪಂಚ್ವೀಸ್ ಮಯ್ನ್ಯಾಂಚೆಂ ಮೌನ್ ಮ್ಹಾಕಾಚ್ ಅಜ್ಯಾಪ್ ಕರ್ತಾ.
ಹೆಂ ಮೌನ್ ಕಿತ್ಲೆಂ ಕರ್ಕರೆ ದೀಂವ್ಕ್ ಸಕ್ಲೆಂ ಮ್ಹಳ್ಳೆಂ ಮ್ಹಜ್ಯಾನ್ ಅಭಿವ್ಯಕ್ತ್ ಕರುಂಕ್ ಉತ್ರಾಂ ನಾಂತ್. ಎಕಾ ಪಾಟ್ಲ್ಯಾನ್ ಏಕ್ ಮ್ಹಳ್ಳೆಪರಿಂ ಅನ್ವಾರಾನ್ ಮ್ಹಜೆರ್ ಘಾಲ್ಲಿ ಧಾಡ್ ತರ್ಯೀ ತಿತ್ಲಿ ಕಠೀಣ್ ನ್ಹಯ್, ಜಿತ್ಲಿ ಹಾಚೆರ್ ಸಂತೊಸ್/ಸಮಧಾನ್ ಭಗ್ತೆಲ್ಯಾಂಕ್ ಪಳೆತಾನಾ, ಜಾಂಕಾಂ ಎಕಾ ತೆಂಪಾರ್ ಹಾಂವೆಂ ’ಆಪ್ಲೆ’ ಮ್ಹಣ್ ಚಿಂತ್ಲ್ಲೆಂ. ಪುಣ್ ಜಿವಿತ್ ಏಕ್ ರಂಗ್ಮಾಂಚಿ ಆನಿ ಆಮಿ ಸರ್ವ್ ಹಾಂತ್ಲ್ಯೊ ಕಟ್ಪುತ್ಳ್ಯೊ; ಕೊಣ್ ಖುಶೇನ್ ಆನಿ ಕೊಣ್ ನಿರ್ವೋಗ್ ನಾಸ್ತಾಂ.
ಮ್ಹಜ್ಯಾ ಲ್ಹಾನ್ಪಣಾರ್ ಥಾವ್ನ್ ಮ್ಹಜ್ಯಾ ಮತಿಂತ್ ಖಂಚೊನ್ ಆಯಿಲ್ಲೆಂ ಏಕ್ ಜಿವೆಂ ಸತ್ ಹೆಂ ಕೀ ’ಭೋವ್ಶಾ ಆಮ್ಗೆರ್ ಹಾಂವ್ ಕೊಣಾಕ್ಚ್ ನಾಕಾಸ್ಲ್ಲೊಂ ಭುರ್ಗೊ’ ಮ್ಹಳ್ಳೆಂ, ಕಿತ್ಯಾಕ್; ಹಾಂವ್ ಮ್ಹಾಲ್ಘಡೊ ಪೂತ್ ನ್ಹಯ್, ನಿಮಾಣೊ ಪೂತ್ಯೀ ನ್ಹಯ್. ಮಾಲ್ಘಡ್ಯಾಕ್ ಪುತಾಕ್ ತಶೆಂಚ್ ನಿಮಾಣ್ಯಾ ಪುತಾಕ್ ಸದಾಂಚ್ ಸ್ಥಾನ್ ಆಸ್ಲೆಂ. ಇತ್ಲೆಂಚ್ ನ್ಹಯ್, ಕಠೀಣ್ ರಾಗ್, ಹಠ್, ವಿಶೇಸ್ ಪೊಕ್ರಿಪಣಾಂ ಮ್ಹಾಕಾ ಅನಿಕ್ಯೀ ಕೊನ್ಶ್ಯಾಕ್ ಲೊಟ್ತಲಿಂ. ಇತ್ಲೆಂಚ್ ಪಾವಾನಾತ್ಲ್ಲ್ಯಾಕ್ ಮ್ಹಾಕಾ ಲ್ಹಾನ್ಪಣಾರ್ ವಿಶೇಸ್ ಶೆಳ್, ಖೊಂಕ್ಲಿ.
ಪುಣ್ ವಿಶೇಸ್ ಕಿತೆಂಗೀ ಮ್ಹಳ್ಯಾರ್ ಕೊಣಾಕ್ಚ್ಚ್ ನಾಕಾಸ್ಲ್ಲೊಂ ಹಾಂವ್ ಮ್ಹಜ್ಯಾ ಮಾಂಯ್ಕ್ ಮೊಗಾಚೊ, ಜಶೆಂ ಕಾನಡಿಂತ್ ಏಕ್ ಸಾಂಗಾಪ್ ಆಸಾ "ಹೆತ್ತವರಿಗೆ ಹೆಗ್ಗಣ ಮುದ್ದು". ಮ್ಹಜಿ ಆವಯ್ ಅಶಿಕ್ಪಿ (ಸಂಸಾರಾಚ್ಯಾ ಬಾಜಾರಿ ಉತ್ರಾಂನಿ ಸಾಂಗ್ಚೆಂ ತರ್; ಅನ್ಪಡ್ ಗವಾರ್)
ಮ್ಹಜ್ಯಾ ಜಿಣ್ಯೆಂತ್ ವಾದಾಳ್ ಕಾಂಯ್ ನವೆಂ ನ್ಹಯ್, ಸಭಾರ್ ಪಾವ್ಟಿಂ, ಸಭಾರ್ ರಿತಿಚಿಂ ವಾದಾಳಾಂ ಹಾಂವೆಂ ಫುಡ್ ಕೆಲ್ಯಾಂತ್. ಜಿತ್ಲೊಂ ಜಿಕ್ಲಾಂ, ಕಿತ್ಲೊಂ ಸಲ್ವಾಲಾಂ ಮ್ಹಳ್ಳೆಂ ಹಾಂವ್ ಮೆಜುಂಕ್ ವಚಾನಾ, ಪುಣ್ ಏಕ್ ಸತ್ ಶಿಕ್ಲಾಂ; ಜಿಣ್ಯೆಂತ್ ಯೆಂವ್ಚೆಂ ಹರ್ಯೆಕ್ ವಾದಾಳ್ ಏಕ್ ಸತ್ ಘೆವ್ನ್ ಯೆತಾ, ನಾಗ್ಡೆಂ ಸತ್, ಕೊಡು ಸತ್, ಅಡ್ಹೂಕ್ ಸತ್, ಕೋಣ್ ಹೆಂ ಮಾಂದುಂದಿ ವಾ ಮಾಂದಿನಾ ಜಾಂವ್.
2009 ಇಸ್ವಿ ಭೋವ್ಶಾ ಮ್ಹಜ್ಯಾ ಜಿಣ್ಯೆಂತ್ ಅನ್ಯೇಕ್ ವಾದಾಳ್ ಘೆವ್ನ್ ಆಯ್ಲೆಂ; ಪಯ್ಲೆಂ ಮ್ಹಜೆಂ ಕಾಮ್ ಗೆಲೆಂ, ಎಕಾಚ್ ಮಯ್ನ್ಯಾ ಭಿತರ್ ಮ್ಹಜಿ ಆವಯ್ ಹ್ಯಾ ಸಂಸಾರಾಚೆಂ ಪಯ್ಣ್ ಸಂಪವ್ನ್ ಗೆಲಿ.
ಲ್ಹಾನ್ಪಣಾರ್ ಥಾವ್ನ್ ಮ್ಹಾಕಾ ವಾಚ್ಪಾಚಿ ಪಿಸಾಯ್ ಚಡ್ ಆಸ್ಲಿ. ಚಡ್ತಾವ್ ಜಾವ್ನ್ ಕಾನಡಿ ಆನಿ ಕೊಂಕ್ಣಿ ಸಾಹಿತ್ಯ್ ವಾಚ್ತಾಲೊಂ. ಕೊಂಕ್ಣೆಂತ್ ಮ್ಹಜ್ಯಾ ಚಿಂತ್ನಾಂಚೆರ್ ಪ್ರಭಾವ್ ಘಾಲುಂಕ್ ಸಕ್ಲ್ಲಿ ಕಾದಂಬರಿ ಎ.ಟಿ.ಲೋಬೊಚಿ ’ತುಂ ಬರೊ ಜಾ’. ಆನಿ ಹ್ಯಾ ಕಾದಂಬರೆಂತ್ ಪರತ್ ಪರತ್ ಎ.ಟಿ.ಲೋಬೊನ್ ಬರಯಿಲ್ಲೆಂ ಉತಾರ್ ಜಾವ್ನಾಸಾ ’ರುಂವಾಂತ್ ಸರ್ಗ್ ಆಸಾ’. ಆನಿಂ ಹೆಂ ಉತಾರ್ ಭೋವ್ಶಾ ಪರತ್ ಪರತ್ ಮ್ಹಜ್ಯಾ ಹ್ಯಾ ಲಾಂಬ್ ಮೌನಾಂತ್ ಸಮ್ಜಲ್ಲೆಂ ಸತ್.
ಸಂಸಾರಾಚ್ಯಾ ಖಂಚ್ಯಾಯ್ ಸಮಾಜೆಂತ್ ಕಾಂಯ್ ಕೊಣ್ ಬೆಕಾರಿ ಆಸತ್ ತರ್ ತಾಕಾ ಕೊಣಿಂ ಕಾಮ್ ಲಾಭ್ಚ್ಯೊ ವಾಟೊ ಧಾಖಯ್ತ್ ತರ್ ಕೊಂಕ್ಣೆಂತ್ ಮಾತ್ರ್, ಅಸಲ್ಯಾಂಚ್ಯೊ ಖಬ್ರೊ ಜಾತಾತ್. ದುರ್ಭಾಗ್ಪಣಾಂತ್ ಹಾಂವ್ಯಿ ಅಸಲ್ಯಾ ಎಕಾ ಸಮಾಜೆಚೊ ವಾಂಟೊ ಜಾವ್ನಾಸ್ತಾಂ, ಮ್ಹಾಕಾಯ್ ಹಾಚೆ ಥಾವ್ನ್ ಸುಟ್ಕಾ ನಾತ್ಲ್ಲಿ. ಪುಣ್ ಸತ್ ಮಾತ್ರ್ ಹ್ಯಾ ಖಬ್ರಾಂ ಥಾವ್ನ್ ಅಥ್ವೆಂಚ್ ಜಾವ್ನಾಸ್ಲೆಂ.
ಆಯ್ಲೆವಾರ್ ಮಂಗ್ಳುರಾಕ್ ಭೆಟ್ ದಿಲ್ಲೆವೆಳಾರ್ ಮಿತ್ರ್ ಎಚ್ಚೆಮ್ ಮೆಳ್ಳೊ, ಸಂವಾದ್ ಕರ್ತಾನಾ ಮ್ಹಣಾಲೊ "ತುಮ್ಚೆವಿಶಿಂ ಸಭಾರ್ ರಿತಿಚ್ಯೊ ಖಬ್ರೊ ಆಯ್ಕಲ್ಯೊ, ತುಮಿ ಕಾಮಾವೆಳಾರ್ ಕೊಂಕ್ಣಿ ವಾವ್ರ್ ಕರ್ತಾಲ್ಯಾತ್ ದೆಕುನ್ ತುಮ್ಕಾಂ ಕಾಮಾಂತ್ಲೊ ಕಾಡ್ಲೊ ಕಂಯ್". ಮ್ಹಾಕಾ ಅಜ್ಯಾಪ್ ಜಾಂವ್ಕ್ ನಾ, ತಾಕಾ ಜಾಪ್ಯೀ ಸವಾಲಾಂತ್ಚ್ ದಿಲಿ;
"ಗಾಡ್ವಾ ಥಾವ್ನ್ ಖೊಟೆಶಿವಾಯ್ ಹೆರ್ ಕಿತೆಂ ಅಪೇಕ್ಶಾ ಕರ್ಯೆತ್? ಗುಲೊಬಾ ಥಾವ್ನ್ ಪರ್ಮಳಾಶಿವಾಯ್ ಹೆರ್ ಕಿತೆಂ ಅಪೇಕ್ಶಾ ಕರ್ಯೆತ್?, ಮನಿಸ್ ಜ್ಯಾ ಕಾಲೆತಿಚೊ/ಖಾಸ್ತಾಚೊಗೀ, ತೆಚ್ಚ್ ಮಾಪಾನ್ ಹೆರಾಂವಿಶಿಂ ಉಲಯ್ತಲೊ ನ್ಹಯ್?". ಹೆಂ ನಾಸ್ತಾಂ ಮ್ಹಜೆವಿಶಿಂ ಹೆರ್ ಕಸಲೆಂ ಸಾಂಗ್ತೆಲೆ? ಪಾಂಯ್ ಚುಕೊನ್ ವಾಗ್ ಎಕಾ ಫೊಂಡಾಕ್ ಪಡ್ಲ್ಲೊ ಕಂಯ್, ತವಳ್ ಸರ್ವಾಂನಿ ’ಮ್ಹಜೇಂಯ್ ಖೆಲಾಂ, ಮ್ಹಜೆಂಯ್ ಖೆಲಾಂ’, ಮ್ಹಣ್ ತಾಚೆರ್ ಫಾತೊರ್ ಮಾರ್ಲ್ಲೆ ಕಂಯ್. ಹಿ ಕಾಣಿ ಮ್ಹನಿ ಆಜಿ ಮ್ಹಾಕಾ ಲ್ಹಾನ್ಪಣಾರ್ ಸಾಂಗ್ತಾಲಿ. ಹಾಂವ್ಯೀ ಹೆಂಚ್ ಚಿಂತಾಂ. ಹಾಂವ್ ಕಾಂಯ್ ಧನ್-ದಿರ್ವೆಂ, ನಾಂವ್-ಆಸ್ತ್-ಬದಿಕ್ ಮೆಳ್ತಾ ಮ್ಹಳ್ಳೆ ಆಶೆನ್ ಕೊಂಕ್ಣಿ ವಾವ್ರಾಕ್ ದೆಂವೊಂಕ್ ನಾ, ದೆಕುನ್ ಮ್ಹಾಕಾ ಕೊಣ್ ಕಿತೆಂ ಸಾಂಗ್ತಾ ಮ್ಹಳ್ಳ್ಯಾಚೆರ್ ಭಿಲ್ಕುಲ್ ಗಣ್ಣೆಂ ನಾ.
ಕಿತೇಂಯ್ ಆಸೊಂ.
’ಏಕ್ ಜೆವೊಣ್ ಚ್ಯಾರಾಂನಿ ಜೆವ್ಯೆತ್, ಪುಣ್ ಚ್ಯಾರ್ ಜೆವ್ಣಾಂ ಎಕ್ಲ್ಯಾಕ್ ಜೇಂವ್ಕ್ ಜಾಯ್ನಾ’ ಮ್ಹಳ್ಳೆಂ ಲಿಸಾಂವ್ ಪಾತ್ಯೆಲ್ಲಿ ಮ್ಹಜಿ ಅನ್ಪಡ್ ಗವಾರ್ ಆವಯ್, ಕೆದ್ನಾಂಯ್ ಮ್ಹಜೆ ಈಶ್ಟ್ ಮಂತ್ರ್ ಘರಾ ಆಯಿಲ್ಲೆವೆಳಾರ್, ಘರಾ ರಾಂದ್ಲ್ಲೆಂ ನಾತ್ಲ್ಲೆವೆಳಾರ್ ಸಾಂಗ್ತಾಲಿ.
ಹಾಂವ್ ಜಲ್ಮತಾನಾ ಘರ್ಚೊ ಕೊಲು ಸಯ್ತ್ ಸಾರ್ಕೊ ನಾಸ್ತಾಂ ಸಗ್ಳ್ಯಾನ್ ಪೊಂವ್ತಾಲೆಂ ಕಂಯ್. ಅಸಲಿ ದುಬ್ಳಿಕಾಯ್ ಖುದ್ದ್ ಸೊಸುನ್, ಆಪ್ಲ್ಯಾ ಭುರ್ಗ್ಯಾಂನಿ ಬರೊ ಫುಡಾರ್ ಜೊಡಿಜಯ್ ಮ್ಹಣೊನ್ ಪರ್ಗಾಂವಾಕ್ ಗೆಲ್ಲಿ ಮ್ಹಜಿ ಆವಯ್, ಭುರ್ಗ್ಯಾಪಣಾರ್ ಆಮ್ಕಾಂ ಮೆಳ್ತಾಲಿ ದೋನ್-ಅಡೇಜ್ ವರ್ಸಾಂಕ್ ಏಕ್ ಪಾವ್ಟಿಂ ಮಾತ್ರ್. ಆನಿ ತ್ಯಾ ದೋನ್-ಅಡೇಜ್ ಮಯ್ನ್ಯಾಚಿ ರಜಾ ಖಾಸ್ ಕರ್ನ್ ಮ್ಹಾಕಾ ಭೋವ್ ಮೊಗಾಚಿ ಜಾವ್ನಾಸ್ತಾಲಿ.
ಏಕ್ ಪಾವ್ಟಿಂ ಮ್ಹಜ್ಯಾ ಎಕ್ಲ್ಯಾ ವ್ಹಳ್ಕೆಚ್ಯಾನ್ ಮ್ಹಜೆಲಾಗಿಂ ಆಸ್ಚೆ ಥೊಡೆ ಪೊಯ್ಶೆ ಮಾಗ್ಲೆ ದೆಕುನ್ ಹಾಂವೆಂ ತಾಕಾ ಗರ್ಜೆಕ್ ಮ್ಹಣೊನ್ ದಿಲಿ. ಪುಣ್ ತಾಣೆಂ ತೆ ಪಾಟಿಂ ದಿಲೆಚ್ಚ್ ನಾಂತ್. ಭುರ್ಗ್ಯಾಮತ್ ದೆಕುನ್ ಹಾಂವ್ ಮೊಸ್ತ್ ರಡ್ಲೊಂ. ತವಳ್ ಮ್ಹಜ್ಯಾ ಅನ್ಪಡ್ ಗವಾರ್ ಆವಯ್ನ್ ಮ್ಹಾಕಾ ವಿಚಾರ್ಲೆಂ;
"ಕಿತ್ಯಾಕ್ ರಡ್ತಾಯ್ ಪುತಾ, ತಾಣಿಂ ತುಜೆ ಪೊಯ್ಶೆ ಮಾತ್ರ್ ಖೆಲೆ ನೆ? ತುಜೆಂ ನಶಿಬ್ ವೆಲೆಂಯೆ?".
ಕಿತ್ಲೆಂ ಬರೆಂ ಸವಾಲ್? ಜ್ಯೆಂ ಆಜ್ ಪಾಸತ್ ಖಂಚ್ಯಾಯ್ ಬುಕಾಂನಿ ವ ಖಂಚ್ಯಾಯ್ ಡಿಗ್ರೆಂನಿ ಹಾಂವ್ ಶಿಕೊಂಕ್ ಸಕ್ಲೊಂನಾ.
ತಿ ಅನ್ಪಡ್ ಗವಾರ್, ತಿಚೊ ಬಾಪುಯ್ ತಿಚ್ಯಾ ಭುರ್ಗ್ಯಾಪಣಾರ್ ಸರ್ಲ್ಲೊ ದೆಖುನ್, ಅಪ್ಲ್ಯಾಚ್ಚ್ ಸಯ್ರ್ಯಾಂಗೆರ್ ಕಾಮ್ ಕರ್ನ್ ದೀಸ್ ಕಾಡ್ನ್ ವ್ಹಡ್ ಜಾಲ್ಲಿ ಮ್ಹಜಿ ಆವಯ್ ಪಯ್ಲೆ ಪಾವ್ಟಿಂ ಮ್ಹಜೆರ್ ರಾಗಾರ್ ಜಾಲ್ಲಿ ಜೆದ್ನಾಂ ಹಾಂವ್ ’ಪಾದ್ರಿ’ ಜಾಂವ್ಕ್ ಸೆಮಿನರಿಕ್ ಗೆಲ್ಲೆವೆಳಾರ್. ದೆವಾಕ್ ಅರ್ಗಾಂ, ಹಾಂವ್ ದೇಡ್ ವರ್ಸಾಂನಿ ಪಾಟಿಂ ಆಯ್ಲೊಂ. (ಸಂಸಾರಾಚಾ ಬಾಜಾರಿ ಉತ್ರಾಂನಿ ಸಾಂಗ್ಚೆಂ ತರ್ ದೊರೊ ಉಡೊನ್ ಆಯ್ಲೊಂ). ಆಮ್ಚ್ಯಾ ಗಾಂವಾಂತ್ ಏಕ್ ವಿಚಿತ್ರ್ ರಿವಾಜ್ ಆಸಾ, ಜಿಂ ಕೊಣ್ ಮ್ಹಜೆಪರಿಂ ದೊರೊ ಉಡೊನ್ ಆಯಿಲ್ಲಿಂ, ಕೊಣ್ಂಚ್ ಸಮಾಜೆಕ್ ದೊಳೆ ಮೆಳಂವ್ಕ್ ಸಕೊಂಕ್ ನಾಂತ್. ಆಜ್ ಸಯ್ತ್ ತಿಂ ಆಪ್ಲ್ಯಾ ಘರಾ ಯೇಜಯ್ ತರ್ ಮದ್ಯಾನೆರಾತಿಂ ಕಾಳ್ಯಾ ಆರ್ಶ್ಯಾಚ್ಯಾ ಕಾರಾಂನಿ ಲಿಪೊನ್. ಹಾಂವೆಂ ಚಿಂತ್ಚಿ ರೀತ್ ವೆಗ್ಳಿ. ಹಾಂವ್ ಸಮಾಜೆಕ್ ದೊಳೆ ಮೆಳವ್ನ್, ತೆಚ್ಚ್ ಸಮಾಜೆಂತ್ ಜಿಯೆಲಾಂ, ಕಿತೆಂಯ್ ಬರೆಂ/ವಾಯ್ಟ್ ಹಾಂವೆಂ ಕೆಲಾಂ ತರ್ ಲಿಪವ್ನ್ ನ್ಹಯ್, ಉಗ್ತ್ಯಾನ್. ಲಿಪವ್ನ್ ಕರ್ಚಿ ವಿಧ್ಯಾ ಶಿಕ್ಲ್ಲೊಂ ತರ್ ಆಜ್ ಹಾಂವ್ ಕಿತೆಂಗೀ ಜಾತೊಂ ಕೊಣ್ಣಾ. ದೆಕುನ್ ಸಮಾಜೆಕ್ ತರ್ಯೀ ಮ್ಹಜೆರ್ಚ್ ದೊಳೊ.
ವ್ಹಯ್! ಹಾಂವೆಂ ಚಿಂತ್ಚಿ ರೀತ್, ಹಾಂವೆಂ ಖಂಚೇಂಯ್ ಕಾಮ್ ಕರ್ಚಿ ರೀತ್ ಅಥ್ವಿಚ್ಚ್; ಜಿತ್ಲೊ ನಾಕಾರ್ ರಾಗ್ಕೀ, ತಿತ್ಲಿಚ್ಚ್ ಕಾಳ್ಜಾಂತ್ ದಯಾ-ಭಿರ್ಮತ್, ಆನಿ ಅಸಲ್ಯಾಂಕ್ ಸಮಾಜ್ ಜಿಯೆಂವ್ಕ್ ಸೊಡಿನಾ ಮ್ಹಳ್ಳೆಂ ಸತ್ ತಿಕಾ ಜಿಣ್ಯೆಲಿಸಾಂವ್ ಜಾವ್ನ್ ಜಾಣಾಸ್ಲ್ಲೆಂ ದೆಕುನ್ ಕೆದ್ನಾಂಯ್ ಮ್ಹಾಕಾ ಅಶೆಂ ಸಾಂಗ್ತಾಲಿ;
"ಮ್ಹಾಕಾ ಹೆರ್ ಪುತಾಂಚಿ ಖಂತ್ ನಾ, ಕಿತ್ಯಾಕ್ ಮ್ಹಳ್ಯಾರ್ ತಾಂಕಾಂ ಮನ್ಶಾಂಕ್ ಪಾರ್ಕುನ್, ಜೊಕ್ತೆ ರಿತಿನ್ ಜಿಯೆಂವ್ಕ್ ಕಳಿತ್ ಆಸಾ, ಪುಣ್ ತುಜೆರ್ ಮ್ಹಾಕಾ ಖಂತ್ ಆಸಾ, ಕಿತ್ಯಾಕ್ ತುಕಾ ಲೊಕಾಂಚೊ ಮತ್ಲಬ್ ಪಾರ್ಕುಂಚಿ ವಿಧ್ಯಾ ಅಜೂನ್ ಕಳಿತ್ ನಾ. ತುಕಾ ಧವೆಂ ಆಸ್ಲೆಂ ಸರ್ವ್ ದೂದ್ ಮ್ಹಣ್ ದಿಸ್ತಾ."
ಹಾಂವ್ ಪರ್ಗಾಂವಾಕ್ ಪಾವ್ಲೊಂ, ವರ್ಸಾಕ್/ದೋನ್ ವರ್ಸಾಕ್ ಏಕ್ ಪಾವ್ಟಿಂ ರಜೆರ್ ಗಾಂವಾಕ್ ಆಯ್ಲ್ಯಾರೀ, ಮ್ಹಜಿ ಆಸಕ್ತ್ (ಮಿತ್ರ್ ವಿತೊರಿ ಕಾರ್ಕಳಾಚ್ಯಾ ಉತ್ರಾಂನಿ ಸಾಂಗ್ಚೆಂ ತರ್), ಮ್ಹಾಕಾ ಆಸ್ಚಿ ಪಾಡ್ ಸವಯ್ ಎಕ್ಚ್; ’ಕೊಂಕ್ಣಿ’. ದೆಕುನ್ ಪಂದ್ರಾ ದಿಸಾಂಚ್ಯಾ ರಜೆರ್ ಆಯ್ಲ್ಯಾರೀ ಉಣ್ಯಾರ್ ಉಣೆ ಭಾರಾ ದೀಸ್ ತರ್ಯೀ ಕೊಂಕ್ಣಿ ಖಾತಿರ್, ಕೊಂಕ್ಣಿ ಬರವ್ಪ್ಯಾಂಕ್ ಮೆಳ್ಚೆಂ, ತಾಂಚೆ ವಿಚಾರ್ ಆಯ್ಕೊಂಚೆಂ ಪಿಶೆಂಪಣ್. ಹೆಂ ಫಕತ್ತ್ ಪರ್ಗಾಂವಾಕ್ ಪಾವ್ಲ್ಲ್ಯಾ ವೆಳಾರ್ ಮಾತ್ ನ್ಹಯ್, ಹಾಂವ್ ಜೆದ್ನಾಂ ಕಾಣ್ಯೊ ಬರಂವ್ಕ್ ಸುರು ಕೆಲ್ಲೆಥಾವ್ನ್ ಆಸ್ಲಿ ಪಿಸಾಯ್; ಗಾಂವ್ ಸೊಧುನ್, ಘರಾಂ ಸೊಧುನ್ ಹಾಂವ್ ಕಿತ್ಲೆಶ್ಯಾ ಬರಯ್ಣಾರಾಂಕ್ ಮೆಳ್ಳಾಂ ಮ್ಹಣ್ ಮ್ಹಾಕಾ ಅಜೂನ್ ಕಳಿತ್ ಆಸಾ, ಜಾಂವ್ಕ್ ಪುರೊ ತಾಂಕಾಂ ಕಳಿತ್ ನಾ.
ಹೆಚ್ಚ್ವಿಶಿಂ ಉಲ್ಲೇಕ್ ಕರುನ್ ಮ್ಹಜ್ಯಾ ಏಕಾ ಮಾಲ್ಘಡ್ಯಾ ಸಾಹಿತಿಕ್ ಮಿತ್ರಾನ್ ಮ್ಹಜ್ಯಾ ಆವಯ್ಕ್ ಸಾಂಗ್ಲೆಂ; "ತುಜ್ಯಾ ಪುತಾಕ್ ಇಲ್ಲೆಂ ಸಮ್ಜಾಯ್, ತಾಕಾ ಕೊಂಕ್ಣಿ ಭುತ್ ಲಾಗ್ಲಾ".
ಹಾಂವೆಂ ಉಪ್ರಾಂತ್ ತಾಕಾ ವಿಚಾರ್ಲೆಂ "ಕಿತ್ಯಾಕ್ ತುವೆಂ ಅಸಲಿಂ ಉತ್ರಾಂ ಸಾಂಗ್ಲಿಂಯ್?"
ತಾಣೆಂ ಮ್ಹಾಕಾ ಸಮ್ಜಾಂವ್ಕ್ ಪ್ರೇತನ್ ಕೆಲೆಂ "ಅಳೆ ವಲ್ಲಿ, ತುವೆಂ ಪಳೆಂವ್ಚೊ ಕೊಂಕ್ಣಿ ಬರವ್ಪಿ ಲೋಕ್, ಆನಿ ಕೊಂಕ್ಣಿ ಸಮಾಜ್ ತುಕಾ ಖಂಚ್ಯಾ ನದ್ರೆನ್ ಪಳೆತಾ ಮ್ಹಳ್ಳೆಂ ಸಮ್ಜೊನ್ ಘೆ. ತುಂ ತಾಂಚ್ಯಾ ನದ್ರೆನ್ ಫಕತ್ತ್ ಏಕ್ ದುಡ್ವಾಚೊ ಮುದೊ. ತುಜ್ಯಾ ಮುಕಾರ್ ಲೊಣಿಯೆ ಉತ್ರಾಂ ಸಾಂಗ್ತೆಲೆ ಹೆಚ್ಚ್ ತುಜ್ಯಾ ಪಾಟ್ಲ್ಯಾನ್ ತುಜಿಂ ಖೆಳ್ಕುಳಾಂ ಕರ್ನ್ ಹಾಸ್ತಾತ್. ಆನಿ ಮ್ಹಾಕಾ ಹೆಂ ಸೊಸಾನಾ. ತುವೆಂ ಜಿತ್ಲೆಂ ’ಶೆಣಾಂತ್ಲ್ಯಾ ಕಿಡ್ಯಾಂಕ್’ ಉಸ್ತುನ್ ’ಮೊತಿಯಾಂ’ ಕರುಂಕ್ ಚಿಂತಾಯ್, ತಿತ್ಲೆಂಚ್, ’ತೆ’ ಆಮಿ ’ಶೆಣಾಂತ್ಲೆ ಕಿಡೆಚ್ಚ್’ ಮ್ಹಣ್ ಧಾಖಂವ್ಕ್ ಮೊರ್ತಾತ್."
ತಾಕಾ ಹಾಂವೆಂ ಅಶಿ ಜಾಪ್ ದಿಲ್ಲಿ; "ಪಳೆ, ಹಾಂವ್ ಕೊಣಾಕ್ಯೀ ಮಾನ್/ಗೌರವ್ ದಿತಾಂ ತರ್ ತೆಂ ಮ್ಹಜೆಂ ವೆಕ್ತಿತ್ವ್. ಆತಾಂ ಜೊ ಹೊ ಮಾನಾಕ್/ಗೌರವಾಕ್ ಫಾವೊ ಜಾಲ್ಲೊ ಆಸಾ ತೊ ತೆಚ್ಚ್ ಮಾಪಾನ್ ಹೆರಾಂಕ್ ಮಾನ್/ಗೌರವ್ ದೀಂವ್ಕ್ ಸಕ್ತಾ. ಜೊ ಹ್ಯಾ ಮಾನಾಕ್/ಗೌರವಾಕ್ ನಾಫಾವೊ ಜಾಲ್ಲೊ ಆಸಾ ತರ್, ತಾಚ್ಯಾ ವೆಕ್ತಿತ್ವಾಕ್ ಸರಿ ಜಾವ್ನ್ ತೊ ಕರುಂದಿ, ತಾಚೆಂ ಲೇಖ್ ವಿಚಾರುಂಕ್/ಮೆಜುಂಕ್ ವ್ಹಚೊನ್ ಮ್ಹಜೊ ವೇಳ್/ತಕ್ಲಿ ಕಿತ್ಯಾಕ್ ವಿಭಾಡುಂ?, ಹಾಂವ್ ಹಾಂವ್ಚ್ ಆನಿ ತಿಂ ತಿಂಚ್"
ಮ್ಹಜಿಂ ಉತ್ರಾಂನಿ ತಾಚೆರ್ ಕಿತ್ಲಿಂ ಪ್ರಭಾವ್ ಕರುಂಕ್ ಸಕ್ಲಿಂ, ವಾ ನಾ, ತೆಂ ಹಾಂವ್ ನೆಣಾಂ. ಆಸೊಂ!
ಅಶೆಂ ರಜೆರ್ ಆಯಿಲ್ಲ್ಯಾ ದಿಸಾಂನಿ ಹಾಂವ್ ಕಂಯ್ ಗೆಲ್ಯಾರೀ ಮ್ಹಜ್ಯಾ ಆವಯ್ನ್ ಫೊನ್ ಕರ್ನ್ ಮ್ಹಾಕಾ ಸವಾಲ್ ವಿಚಾರ್ಚೆಂ "ಪುತಾ, ಜೆವ್ಲೊಯ್ವೆ?, ಪುತಾ ಕಿತೆಂ ತರೀ ಖಾ.. ಪಿಯೆ...". ಆನಿ ಕಿತ್ಲ್ಯಾ ಮೊಗಾನ್ ತಿ ಮ್ಹಕಾ ಸಾಂಗ್ತಾಲಿಗೀ, ತಿತ್ಲೊ ರಾಗ್ ಮ್ಹಾಕಾ ಯೆತಾಲೊ, ಆನಿ ತಿಕಾ ಮ್ಹಜಿ ಜಾಪ್ ಆಸ್ತಾಲಿ "ಹಾಂವ್ ಕಾಂಯ್ ಭುರ್ಗೊ ನ್ಹಯ್, ಮ್ಹಾಕಾ ಭುಕ್ ಲಾಗ್ತಾನಾ ಖಾತಾಂ, ತುಂ ಸಮಧಾನ್ ಘೆ".
ಆನಿ 2009 ಇಸ್ವೆಚ್ಯಾ ಜುಲಾಯ್ ಮಯ್ನ್ಯಾಚ್ಯಾ ಸೊಳಾ ತಾರಿಕೆರ್ ಹಾಂವ್ ಗಾಂವಾಕ್ ಯೆತಾಂ ಮ್ಹಣ್ ನಖ್ಖಿಂ ಜಾಲ್ಲೆಂ. ಪುಣ್ ಮ್ಹಜಿ ಆವಯ್ ಹಾಂವೆಂ ಯೆಂವ್ಚ್ಯಾಕೀ ದೋನ್ ದಿಸಾಧಿಂಚ್ ಹೊ ಸಂಸಾರ್ ಸಾಂಡುನ್ ಸಾಸ್ಣಾಚೊ ವಿಶೆವ್ ಘೆಂವ್ಕ್ ಗೆಲ್ಲಿ.
ಆತಾಂ ಮಯ್ನೆ ಸಂಪೊನ್, ವರ್ಸಾಂ ಪಾಶಾರ್ ಜಾಲಿಂ. ಕಾಳ್ಜಾಂತ್ ರುಪ್ಣೆಂ ತಶೆಂಚ್ ಆಸಾ, ಕಾನಾಂನಿ ಗಾಜ್ ತಸೊಚ್ ಆಸಾ.
ಪುಣ್! ಆತಾಂ ಉತ್ರಾಂ ನಾಂತ್, ಸೂತ್ರಾಂ ನಾಂತ್, ಫೊನಾಂ ನಾಂತ್, ಜೆವ್ತಾಂಗಿ ವಾ ಮೊರ್ತಾಂಗಿ ಮ್ಹಳ್ಳಿ ಫಿಕಿರ್ ಕರ್ಚಿಂ ನಾಂತ್. ಕಿತೇಂಯ್ ಆಸಾ ತರ್; ಹೆಚ್ಚ್ ಮ್ಹಜ್ಯೆ ಅನ್ಪಡ್ ಗವಾರ್ ಆವಯ್ನ್ ಶಿಕಂವ್ಚೆಂ ಪ್ರೇತನ್ ಕೆಲ್ಲಿಂ ತತ್ವಾಂ, ಜಿಂ ತಿಚಿ ಜಿಣಿ ಝರವ್ನ್ ಶಿಕ್ಲ್ಲಿಂ. ಇತ್ಲ್ಯಾಚೊ ಉಲ್ಲೇಕ್ ಕರ್ತಾನಾ, ಮ್ಹಜ್ಯಾ ಮತಿಂತ್ ಎಕಾ ಪದಾಚೊ ಉಡಾಸ್ ಯೆತಾ;
’ಸಬ್ ಕುಛ್ ಸೀಖಾ ಹಮ್ನೇ, ನ ಸೀಖೀ ಹೋಶಿಯಾರಿ, ಸಚ್ ಹೈ ದುನಿಯಾವಾಲೋಂ; ಕೆ ಮೆ ಹುಂ ಅನಾಡಿ’
(ಹರ್ಯೆಕ್ ಶಿಕ್ಲೊಂ ಹಾಂವ್ ಪುಣ್ ನ್ಹಯ್ ಹುಶಾರಾಯ್, ಸತ್ ಹೆಂ ಜಾವ್ನಾಸಾ; ಹಾಂವ್ಂಚ್ ಏಕ್ ಅನ್ನಾಡಿ)
[ಹ್ಯಾ ದೋನ್ ವರ್ಸಾಂಚ್ಯಾ ಆವ್ದೆಂತ್ ಪರತ್ ಪರತ್ ಮ್ಹಜೆವಿಶಿಂ ಹುಸ್ಕೊ ದವ್ರುನ್, ತಶೆಂಚ್ ಮ್ಹಜೆವಿಶಿಂ ಖಬ್ರೊ ಕರುಂಕ್ ಮ್ಹಾಕಾ ಸಂಪರ್ಕ್ ಕೆಲ್ಲ್ಯಾ ಸರ್ವಾಂಕ್ ಹಾಂವ್ ಧಿನ್ವಾಸ್ತಾಂ, ಹಾಂವ್ ಮೌನ್ ಮಾತ್ರ್ ಆಸ್ಲೊಂ - ಮೊನೊ ನ್ಹಯ್]
ದೇವ್ ಬರೆಂ ಕರುಂ
ಖಾಲ್ತೆಪಣಿಂ,
- ವಲ್ಲಿ ಕ್ವಾಡ್ರಸ್, ಅಜೆಕಾರ್
About us | Feedback | Contact us
Copyright ©
2004 DAAIZ.COM All rights reserved.
Page concept, designed and maintained by Ashawadi Publications
