ಎಡ್ವಿನ್ ಜೆ. ಎಫ್. ಡಿಸೊಜಾ ಹಾಂಚ್ಯೊ ಕಥಾ: ಎಕ್ ನಿಯಾಳ್ (- ಡೊ. ರೇಷ್ಮಾ ಅಮಿತ್ ಖೊಲ್ಕಾರ್)
ಸಾರಾಂಶ್:
ಎಡ್ವಿನ್ ಡಿಸೊಜಾ ಹಾಂಚೊ ಜಲ್ಮ್ ೧೪-೬-೧೯೪೮ ವರ್ಸಾ ಜಾಲೊ. ತಾಂಚೆ ಪಯಣ್, ತರಣಿ ಕಿರಣಾಂ ಸಾರಕೀಲೆ ಕಥಾಝೆಲೆ ಉಜವಾಡಾಕ್ ಆಯಲ್ಯಾತ್. ತಶೆಂಚ್ ತಾಣಿ ಕಾಂಯ್ ಕಥಾಂಚೊ ಅಣಕಾರೂಯ್ ಕೆಲಾ. ಅಶಾ ಹ್ಯಾ ಲಿಖೀತ್ ತಶೆಂಚ್ ಅಣಕಾರೀತ್ ವೆಂಚೀಕ್ ಕಥಾಂಚೊ ಆಸ್ಪಾವ್ ಹಾಂವೆಂ ಮ್ಹಜ್ಯಾ ಪ್ರಪತ್ರಾಂತ್ ಕೆಲಾ. ಎಡ್ವಿನ್ ಡಿಸೊಜಾ ಹಾಂಚ್ಯಾ ಕಾಂಯ್ ವೆಂಚೀಕ್ ಕಥಾಂನಿ ಚಿತ್ರೀತ್ ಜಾವಪಿ ಸಾಮಾಜೀಕ್ ಯಥಾರ್ಥಾಚೊ ನಿಯಾಳ್ ಕೆಲಾ. ನಿಯಾಳ್ ಕರತನಾ ಹಾಂವೆಂ ವ್ಯಕ್ತೀಂಚಿ ವಾಗಣೂಕ್ ಹಿಸಬಾಂತ್ ಘೆತ್ ತಾಂಕಾಂ ಫಾವೊ ತಿ ಶಬ್ದಾವಲಿ ದಿಲ್ಯಾ.
ವಿಶಯ್ ಕೆಂದ್ರೀತ್ ಉತರಾಂ:
ಸಂಸ್ಕಾರ್, ವಿಶ್ವಾಸ್, ವಿಭಕ್ತ್ ಕುಟೂಂಬ್, ವಾಗಣೂಕ್, ವ್ಯಕ್ತೀಮತ್ವ್.
ಪ್ರಸ್ತಾವನಾ:
ಸಮಾಜ್ ಹೊ ಫಕತ್ ವ್ಯಕ್ತೀಂಚೊ ಸಂಗ್ರಹ್ ನ್ಹಯ್, ತರ್ ಸಂಸ್ಕೃತಾಯ್, ಪರಂಪರಾ, ಮುಲ್ಯಾಂ ಆನಿ ಸಾಮುಹೀಕ್ ಜಾಣವಿಕಾಯ್ ಹಾಂಚೆ ಜಿವೆಂ ಮೂರ್ತ್ ರೂಪ್. ಕಾಳ್ ಬದಲತಾ, ಪರಿಸ್ಥಿತಿ ಬದಲತಾ; ಪೂಣ್ ಸಮಾಜಾಕ್ ಎಕಠಾಂಯ್ ಬಾಂದಪಿ ಮನೀಸಪಣ್, ಪರಸ್ಪರ್ ವಿಸ್ವಾಸ್ ಆನಿ ಸಹಕಾರ್ಯಾಚಿ ಭಾವನಾ ಸಾಸಣಾಚಿ ಉರತಾ. ಸಮಾಜಾಚ್ಯಾ ಪ್ರಗತೀಚೊ ಮಾರ್ಗ್ ಫಕತ್ ಭೌತಿಕ್ ಉದರಗತೀಂತಲ್ಯಾನ್ ನ್ಹಯ್, ತರ್ ಸಮಾಜೀಕ್ ಜಾಗೃತಾಯ್, ಸಂಸ್ಕೃತೀಕ್ ಸಮೃಧ್ದಿ ಆನಿ ಸಾಮುಹೀಕ್ ಸಹಭಾಗಾಂತಲ್ಯಾನೂಯ್ ಜಾತಾ. ಮಂಗಳುರಿ ಸಮಾಜಾಚೊ ಹೊ ಗಿರೆಸ್ತ್ ಪ್ರವಾಸ್, ಪರಂಪರಾ ಆನಿ ಶೈಲಿ ಉಕ್ತಾವಪಾಚೊ ಯತ್ನ್ ಹ್ಯಾ ಕಥಾಂನಿ ಜಾಲಾ. ಎಡ್ವಿನ್ ಡಿಸೊಜಾ ಹಾಂಚೆ ವಿಶಯ್ ಸಾದೆ ಸರಳ್ ದಿಸಪಟ್ಟೆ ಜೀಣೆಂತ್ ಘಡಪಿ ಪೂಣ್ ತಾಂಚೆ ವಿಶಯ್ ವಾಚಪ್ಯಾಂಕ್ ಬೊಧ್ ದಿತಾತ್ ವಾ ಶಿಟಕಾವಪಾಚೊ ಯತ್ನ್ ಕರತಾತ್. ತೆಚ್ ಬರೊಬರ್ ತೆ ಕಥೆಚೊ ಶೆವಟೂಯ್ ಜುಸ್ತ್ ಕರತನಾ ದಿಸತಾತ್. ಅಶಾಚ್ ಕಾಂಯ್ ಕಥಾಂತಲ್ಯಾ ಪಾತ್ರಾಂಚೊ ಆಸ್ಪಾವ್ ಹಾಂವೆಂ ಮ್ಹಜ್ಯಾ ಪ್ರಪತ್ರಾಂತ್ ಕೆಲಾ.
ಲೆಖಕ್ ಎಡ್ವಿನ್ ಜೊಸೆಫ್ ಫ್ರಾನ್ಸಿಸ್ ಡಿಸೊಜಾ ಹಾಂಚ್ಯಾ ಕಥಾ ಸಾಹಿತ್ಯಾಂತಲ್ಯಾ ಪಾತ್ರಾಂಚ್ಯಾ ವಾಗಣುಕೆಚಿ ವಿವಿಧಾಂಗೀಂ ರುಪಾಂ
ಸ್ರೆಶ್ಟತಾಯೆಚಿ ಗ್ರಂಥಿ (Superiority Complex)
"ಆಲ್ಫೆಡ್ ಎಡಲರ್ ಹಾಂಚ್ಯಾ ಮತಾ ಪ್ರಮಾಣ್ ಶಾರಿರೀಕ್ ವಾ ಮಾನಸೀಕ್ ಫ್ರಾಕೆಜೀಕ್ ಲಾಗೂನ್ ವ್ಯಕ್ತಿ ಭಿತರ್ ಜೆನ್ನಾ ನ್ಯುನಗಂಡ್ ತಯಾರ್ ಜಾತಾ ತೆನ್ನಾ ತಿ ಸ್ರೆಶ್ಟ್ ಜಾವಪಾಚೊ ಯತ್ನ್ ಕರತಾ ಆನಿ ಹಾಕಾ ಲಾಗೂನ್ ವ್ಯಕ್ತಿ ಕುಂಪ್ಲಿಕಾದ್ ಜಾವನ್ ಪಡಟಾ. ಮನೀಸ್ ಆಕ್ರಮಕ್, ಅಹಂಕಾರೀ, ಸ್ವತಾಕ್ ಶ್ರೆಶ್ಠ್ ಸಮಜೂಂಕ್ ಲಾಗಪ್ ಹೀಂ ತಾಚೀಂ ಲಕ್ಷಣಾಂ.
ಅಶೆಚ್ ತರೆಚೀಂ ಲಕ್ಷಣಾಂ ಎಡವ್ಹೀನ್ ಡಿಸೊಜಾ ಹಾಂಚ್ಯಾ ಚಿಂಪಾಝಿ ಕಥೆಂತಲ್ಯಾ ಮಾರಿಯಾ ಹ್ಯಾ ಪಾತ್ರಾಭಿತರ್ ದಿಸತಾ. ಮಾರಿಯಾಚೆ ಧುವೆಕ್ ವನಿಶಾ ಹ್ಯಾ ಪಾತ್ರಾಕ್ ಬಾವಲ್ಯಾಂಚೊ ಭೊವ್ ಸೊಸ್ ಆಸತಾ ತೆಂ ಸದಾಂಚ್ ಬಾವಲ್ಯಾಂಕ್ ಘೆವನ್ ನ್ಹಿದತಾ. ಪೂಣ್ ತಾಂಗೆರ್ ವಾವರಾಕ್ ಯೆವಪಿ ಲಕ್ಷ್ಮೀಚೊ ಪೂತ್ ತಿಪ್ಪಾ ತಾಚೆ ಬಾವಲೆ ಪಳಯತಾ ಆನಿ ತಾಕಾಯ್ ತ್ಯಾ ಬಾವಲ್ಯಾಂಪ್ರತಿ ಒಢ್ ನಿರ್ಮಾಣ್ ಜಾತಾ. ತ್ಯಾ ಬಾವಲ್ಯಾ ಸಾಂಗಾತಾನ್ ತಿಪ್ಪಾಕ್ ಖೆಳನ್ ದಿಸತಾ. ವನಿಶಾ ತಿಪ್ಪಾಕ್ ಬರೆಂ ಕರತಾ ಪೂಣ್ ಮಾರಿಯಾ ಮಾತ್ ಲಕ್ಷ್ಮಿ ಆನಿ ತಾಚ್ಯಾ ಪುತಾಲಾಗೀಂ ಪಾಯಾಂಚಿ ವ್ಹಾಣ್ ಪಾಂಯಾಂಕೂಚ್ ಬರಿ ಅಶೆಂ ಮ್ಹಣೂನ್ ಹೆ ಮ್ಹಣಿ ಪ್ರಮಾಣ್ ವಾಗತಾ. ಹಿ ಮ್ಹಣ್ ಕಥೆಂತ್ ಸಂವಾದಾವರವೀಂ ಆಯಿಲ್ಲಿ ದಿಸತಾ. ಪೂಣ್ ತಿಪ್ಪಾಚ್ಯಾ ದೊಳ್ಯಾಂತ್ ಸಗಳ್ಯಾಂತ್ ಚಡ್ ಭರತಾ ತೊ ಪಡ್ಡ್ಯಾಕ್ ಲಾಯಿಲ್ಲೊ ಚಿಂಪಾಝೀ. ಎಕ್ ದೀಸ್ ತಿಪ್ಪಾ ದುಯೆಂತ್ ಆಶಿಲ್ಲ್ಯಾನ್ ಇಸ್ಪಿತಳಾಂತ್ ಆಸತಾ ಆನಿ ತೊ ಇಂಜೆಸಾಂವಾಂ ಕಸೊಚ್ ಘೆವಪಾಕ್ ಸೊದಿನಾ ತೆನ್ನಾ ತಾಕಾ ಆವಯ್ ಆಪೂಣ್ ತುಕಾ ಚಿಂಪಾಂಝಿ ದಿತಲಿ ತೂಂ ಇಂಜೆಸಾಂವಾಂ ಘೆ ಮ್ಹಣೂನ್ ಸಾಂಗೂನ್ ತಾಚ್ಯಾ ಮನಾಚಿ ತಯಾರಿ ಕರತಾ ಆನಿ ತಿಪ್ಪಾ ಇಂಜೆಸಾಂವಾಂ ಘೆವಪಾಕ್ ತಯಾರ್ ಜಾತಾ. ಲಕ್ಷ್ಮಿ ತಿಪ್ಪಾಕ್ ಲಾಗೂನ್ ಚಿಂಪಾಝಿ ಫಾರಾಯತಾ ಪೂಣ್ ತಾಚೊ ಕಾಂಯ್ ಎಕ್ ಉಪೆಗ್ ಜಾಯನಾ ತಿಪ್ಪಾಕ್ ಮರಣ್ ಯೆತಾ ಆನಿ ತಿ ಚಿಂಪಾಝೀಕ್ ಆಪಣೆ ಫಾರಾಯಲ್ಲೊ ಹೆಂ ಮಾನ್ಯ್ ಕರೂನ್ ಆಶಿಲ್ಲ್ಯಾ ತ್ಯಾ ಪಡ್ಡ್ಯಾಕ್ ಚಿಂಪ್ಪಾಜೀಕ್ ಹುಮಕಳಾಯತಾ.
ಬಣ್ಣಕಡ್ಡಿ ಹ್ಯಾ ಕಥೆಂತ್ ಪನ್ನಾ ನಾವಾಚ್ಯಾ ಭುರಗ್ಯಾಕ್ (Superiority Complex) ಶ್ರೆಶ್ಠತಾಯೆಚಿ ಗ್ರಂಥಿ ಆಶಿಲ್ಲಿ ದಿಸತಾ. ತೊ ಜೊನಾಕ್ ಚಿಮಟೆ ಕಾಡಟಾ. ತಾಕಾ ಕುಳಕಾರ್ ಮ್ಹಣ್ಟಾ. ಪನ್ನಾ ವಿದ್ಯಾಲಯಾಂತ್ ಆನಿ ಭಾಯರ್ ಜೊನಾಕ್ ಆನಿ ಜೊನಾಚ್ಯಾ ಬಾಪಾಯಕ್ ಹಿಣಸಾಯತಾ. ದೆಖೀಕ್ : "ಕ್ರೆನ್ ಮ್ಹಣಚ್ಯಾ ಬದಲಾಕ್ ಕಿರಾಯನ್ ಮ್ಹಣತಾ ಪೂಣ್ ಜೊನ್ ಶಿಕಪಾ ಬರೊವಪಾಕ್ ಬರೊ ಆಶಿಲ್ಲ್ಯಾನ್ ಶಿಕ್ಷಕ್ ತಾಚಿ ತೊಖಣಾಯ್ ಕರತಾ ಆನಿ ಹೀಚ್ ತೊಖಣಾಯ್ ಪನ್ನಾ ಹ್ಯಾ ಪಾತ್ರಾಕ್ ತ್ರಾಸದಾಯಕ್ ಥಾರತಾ.
ಜುವಾನಪಣ್ ಆನಿ ಆಕರ್ಶಣ್
ಕಾಗ್ದಾಚಿ ಸ್ತ್ರಿ ಹೆ ಕಥೆಂತ್ ೧೨ ವರ್ಸಾಚ್ಯಾ ದಿಸಾಳೆಂ ವಿಕಪಿ ಭುರಗ್ಯಾಕ್ ಎಕೆ ಮಧ್ಯಮ್ ಪಿರಾಯೆಚ್ಯಾ ಬಾಯಲಮನಶೆಪ್ರತಿ ಆಕರ್ಶಣ್ ಜಾತಾ ಮ್ಹಣುನೂಚ್ ತೊ ಚಾಲಕಾಕಡೆನ್ ದಿವಪಿ ದಿಸಾಳೆಂ ತೆ ಬಾಯಲೆಕಡೆನ್ ದಿವಪಾಕ್ ಉತಾವೀಳ್ ಜಾತಾ. ಪೂಣ್ ತಿ ಫಾಟಲ್ಯಾ ಸಿಟಾರ್ ಬಶಿಲ್ಲಿ ಬಾಯಲ್ ಕಶೆಂಚ್ ತಾಚ್ಯಾ ಹಾತಾಂತಲ್ಯಾನ್ ದಿಸಾಳೆಂ ಘೆವಪಾಕ್ ತಯಾರ್ ನಾಸತಾ. ತೊ ಭುರಗೊ ಜಾಯತೆ ಯತ್ನ್ ಕರತಾ. ಅಶಾ ಹ್ಯಾ ಪಿರಾಯೆಕ್ ಲಾಗೂನ್ ಶಾರಿರೀಕ್ ಗುಪ್ತ್ ಆಂಗಾನ್ ವಾಢ್ ಜಾವಪ್ ಸಹಾಜೀಕ್ ಆಸತಾ. ಅಶಾ ಹೆ ಪಾಯರೆಕ್ ಪ್ಯುಬೀರ್ಟಿ ಮ್ಹಣಲ್ಯಾರ್ ಜುವಾನಪಣ್ ಮ್ಹಣಟಾತ್. ಹೆ ಪಿರಾಯೆಂತ್ ಭಾವನೀಕ್ ಚಢ್ ಉತಾರ್ ಜಾವಪಾಚಿ ಶಕ್ಯತಾಯ್ ಆಸತಾ ಮೂಡ್ ಸ್ವಿಂಗ್ ಜಾವಪ್ ಹೊರ್ಮೊನ್ಸಾಚ್ಯಾ ಬದಲಾಂಕ್ ಲಾಗೂನ್ ಎಕಾ ಖಿಣಾಭಿತರ್ ಖೂಬ್ ಆನಂದ್ ಆನಿ ದುಸರ್ಯಾ ಖಿಣಾಕ್ ಖೂಬ್ ಉದಾಸಪಣ್ ದಿಸಪಾಕ್ ಲಾಗತಾ. ತಶೆಂಚ್ ಅತೀಸಂವೆದನಶಿಲತಾಯ್ ನಿರ್ಮಾಣ್ ಜಾತಾ.
ಆಕರ್ಶಣ್ ಹೆಂ ಮುಖೆಲಪಣಾನ್ ದುಸಱ್ಯಾ ಮನಶಾಚೆಂ ರೂಪ್, ಆವಾಜ್ ವಾ ಶೈಲೀಚೆರ್ ಆದಾರೂನ್ ಆಸತಾ. ಮುಖೆಲಪಣಾನ್ "ತೊ/ತಿ ಕಿತಲಿ ಬರಿ ದಿಸತಾ"ಹಾಚೆರೂಚ್ ಭರ್ ದಿವಪ್ ಜಾತಾ. ತಾಂಚ್ಯಾ ದೊಶಾಂಚೆರ್ ದುರ್ಲಕ್ಷ್ ಕರಪ್ ವಾ ತೆ ಮಾತ್ತೂಯ್ ದೀಸ್ ನಾಸಪ್. ಹೆ ಬದಲ್ ತೆ ಭುರಗ್ಯಾ ಭಿತರ್ ಸಂವಾದಾಂತಲ್ಯಾನ್ ಜಾಣವತಾತ್. ಪೂಣ್ ತೊ ಭುರಗೊ ಎಕ್ ದೀಸ್ ಮರತಾ ತೆನ್ನಾ ತೆ ಮಧ್ಯಮ್ ಪಿರಾಯೆಚೆ ಬಾಯಲೆಕ್ ಕುವಾಡೆಂ ಪಡಟಾ. ತೊ ಭುರಗೊ ಆಪಲೆ ಕಡೆನ್ ಪೆಪರ್ ಕಿತ್ಯಾಕ್ ದಿವಪಾಕ್ ಸೊದತಾಲೊ ಕಾಯ್?
ಪೂಣ್ ತೆ ಕುವಾಡೆಂ ತಿಚೆ ಖಾತೀರ್ ಕುವಾಡೆಂಚ್ ಉರತಾ.
ವಿಭಕ್ತ್ ಕುಟೂಂಬಶೈಲಿ ಆನಿ ಪರಿಣಾಮ್
ಖಾಟ್ ಹೆ ಕಥೆಂತ್ ಆಶ್ರಮಾಚೊ ಉಲ್ಲೆಖ್ ಯೆತಾ. ಹಾಂಗಾಂ ಪೂತ್ ಆಪಲೆ ಜಲ್ಮದಾತೆ ಆವಯಕ್ ಆಶ್ರಮಾಂತ್ ದವರಪಾಚಿ ತಜವೀಜ್ ಕರತಾ. ಆವಯ್ ಜೆನ್ನಾ ಪುತಾಕ್ ಮ್ಹಣ್ಟಾ ಆಪಲಿ ಪೊರಣ್ಯಾ ಘರಾಂತಲಿ ಖಾಟ್ ಆಪಲ್ಯಾಕ್ ನವ್ಯಾ ಘರಾಂತ್ ಜಾಯ್ ತೆನ್ನಾ ಪೂತ್ ತಿಕಾ ಸರಳ್ ಆಶ್ರಮಾಚಿ ವಾಟ್ ಉಕ್ತಿ ಕರತಾ. ಅಶಿ ಹಿ ಮಾನಸೀಕತಾ ಘಡಪಾಫಾಟಲಿ ಕಾರಣಾಂ ಸಾಂಗಚಿ ಜಾಲ್ಯಾರ್ ಬದಲತಿ ಕುಟೂಂಬ್ ಪಧ್ದತಿ ಅಶೆಂ ಮ್ಹಣೂ ಯೆತಾ. ವಿಭಕ್ತ್ ಕುಟೂಂಬ್ ಪಧ್ದತ್ ಹಾಕಾ ಕಾರಣೀಭೂತ್ ಥಾರತಾ. ಆದಲೆ ತೆಂಪಾರ್ ಸಂಯುಕ್ತ್ ಕುಟೂಂಬ್ ಪಧ್ದತ್ ಆಶಿಲ್ಲ್ಯಾನ್ ಘರಾಂತ್ ಖೂಬ್ ಲೊಕ್ ಆಸತಾಲೆ. ಪೂಣ್ ಆಯಚ್ಯಾ ಆಧುನೀಕ್ ಕಾಳಾಂತ್ ಘೊವ್ ಬಾಯಲ್ ಆನಿ ಭುರಗೀಂ ಇತಲೆಚ್ ಮರ್ಯಾದೀತ್ ಕುಟೂಂಬ್ ಆಸತಾ. ಲಗ್ನಾ ಉಪರಾಂತ್ ಮನಶಾಚ್ಯಾ ಜಿವಿತಾಂತ್ ನವಿ ಭುಮಿಕಾ, ಜಾಪಸಾಲದಾರಕ್ಯೊ ಆನಿ ಸಂಬಂದ್ ಉದೆತಾತ್. ಹ್ಯಾ ಬದಲಾಂಕ್ ಸಮಾಯೊಜೀತ್ ಕರತನಾ ಕಾಂಯ್ ವ್ಯಕ್ತೀಂಕ್ ತಾಣ್, ಮಾನಸೀಕ್ ದಬಾವ್ ಆನಿ ಭುಮಿಕಾ ಸಂಘರ್ಶ್ ಹಾಂಚೆ ಕಡೆನ್ ಝುಜಚೆಂ ಪಡಟಾ. ಬಾಯಲ್, ಭುರಗೀಂ ಆನಿ ಜಾಣ್ಟಿ ಆವಯ್ ಹಾಂಚಿ ಅಪೆಕ್ಷಾ ಪುರಾಯ್ ಕರಪಾಚೊ ಯತ್ನ್ ಕೆಲ್ಲ್ಯಾನ್ ನಿರ್ಮಾಣ್ ಜಾವಪಿ ಮಾನಸೀಕ್ ತಾಣ್ ಮನಶಾಕ್ ಸೊಪೊ ಮಾರ್ಗ್ ವೆಂಚಪಾಕ್ ಲಾವಂಕ್ ಶಕತಾ. ಕಾಂಯ್ ಪ್ರಕರಣಾಂನಿ ಆವಯ್-ಪುತಾ ಮದಲೆಂ ಭಾವನೀಕ್ ನಾತೆಂ ದುಬಳೆಂ ಆಸತಾ. ಭುರಗೆಪಣಾಂತಲ್ಯಾ ಅಣಭವಾಂತಲ್ಯಾನ್, ಪುರಾಯ್ ಜಾವಂಕ್ ನಾಶಿಲ್ಲ್ಯಾ ಭಾವನೀಕ್ ಗರಜಾಂಕ್ ಲಾಗೂನ್ ವಾ ಫಾಟಲ್ಯಾ ಕುಟುಂಬೀಕ್ ಸಂಘರ್ಶಾಕ್ ಲಾಗೂನ್ ನಿರ್ಮಾಣ್ ಜಾಲ್ಲೆಂ ಭಾವನೀಕ್ ಅಂತರ್ ಜಾಣ್ಟೆಪಣಾಂತ್ ಲೆಗೀತ್ ತಿಗೂನ್ ಉರೂಂಕ್ ಶಕತಾ. ತಾಕಾ ಲಾಗೂನ್ ಪುತಾಕ್ ಆವಯ್ ಕಡೆನ್ ಕರ್ತವ್ಯಾಚಿ ಭಾವನಾ ಆಸಲಿ ತರಿ ಚಡ್ ಕರೂನ್ ಭಾವನೀಕ್ ಲಾಗೀಂಚೊ ಉಣಾವ್ ಆಸತಾ.
ಮ್ಹಾತಾರಪಣ್ ಆನಿ ಜಿಣೆಶೈಲಿ
ಎಕ್ ಕಪ್ ಹುನಹುನೀತ್ ಕೊಫಿ ಹೆ ಕಥೆಂತ್ ತಿಚೊ ಪೂತ್ ಕಾಜಾರ್ ಜಾಲ್ಯಾ ಉಪರಾಂತ್ ಮಾತಯೆಚೆಂ ಘರ್ ಮೊಡೂನ್ ಸಿಮಾಟಾಚೆಂ ಘರ್ ಬಾಂದತಾ. ಪೂಣ್ ತಿಕಾ ರಾನ್ನೀರ್ ರಾಂದಪಾಚಿ ಸವಂಯ್ ಆಸತಾ. ರಾನ್ನೀವಯಲ್ಯಾ ಕೊಫೀಚ್ಯಾ ಸುವಾದಾಕ್ ತಿಚೆ ನದರೆಂತಲ್ಯಾನ್ ವೆಗಳೀಚ್ ಮಜಾ ಆಸತಾ ಪೂಣ್ ಜೆನ್ನಾ ತಿಚಿ ರಾನನ್ ವತಾ ತೆನ್ನಾ ತಿಕಾ ಭೊವ್ ದೂಖ್ ಭೊಗತಾ ಕಾರಣ್ ತಿಚ್ಯಾ ಪುತಾನ್ ಘರ್ ಬಾಂದಪಾಚೊ ನಿರ್ಣಯ್ ತಿಕಾ ವಿಚಾರನಾಸತನಾ ಘೆತಿಲ್ಲೊ ಆಸತಾ. ತಾತೂಂತ್ ಭರ್ ಮ್ಹಣೂನ್ ತಿಚೊ ಘರಕಾರೂಯ್ ಗೆಲ್ಲೊ ಆಸತಾ. ಚುಲೀಚೆರ್ ಸುಗಂಧಿ ಕೊಫಿ ತಯಾರ್ ಕರಪ್ ಹೊ ತಿಚೊ ಜಾಯತೀಂ ವರ್ಸಾಂ ದಿಸಪಟ್ಟೊ ವಿಧಿ ಆಸತಾ. ತಿ ಜಗಿಲ್ಲೊ ಕಾಳಖಂಡ್ ಜಂಯ್ ಲಾಂಕಡಾಚೊ ಧುಂವರ್, ಲಾಂಕಡಾಚೊ ಜಳಪಾಚೊ ಆವಾಜ್ ಆನಿ ಕೊಫೀಚೊ ಸುಗಂಧ್ ಆಸತಾ ತೊ ತಿಚ್ಯಾ ಮನಾಂತ್ ಘರ್ ಕರೂನ್ ಆಸತಾ. ಪೂಣ್ ಆರ್ವಿಲ್ಲ್ಯಾ ಗೆಸ್ ವಾ ಚುಲೀಂತಲ್ಯಾನ್ ತಿ ಜಿವಿ ಉಶ್ಣತಾಯ್ ಮೆಳನಾ. ಮ್ಹಣುನೂಚ್ ತಿಕಾ ಆಪಲಿ ವಳಖ್ ಗಮಾವಪಾಚಿ ಭಾವನಾ ಅಸ್ವಸ್ಥ್ ಕರತಾ. ಎಕಾ ಕಾಳಾರ್ ತಿ ತೆ ಚುಲಿ ಭೊಂವತಣೀಂ ಆಶಿಲ್ಲೆಂ ಪುರಾಯ್ ಘರಾಚೆಂ ವೆವಸ್ಥಾಪನ್ ಕರತಾಲಿ ಆಸತಾ. ಆನಿ ಅಕಸ್ಮಾತ್ ತ್ಯಾ ನವ್ಯಾ ಘರಾನ್ ತಿಚೆಂ ವ್ಯವಸ್ಥಾಪನ್ ಕಾಡೂನ್ ಘೆತಿಲ್ಲೆಂ ಆಸತಾ. ಆನಿ ಮ್ಹಣುನೂಚ್ ನವಿ ರಾಂದಚೀಕೂಡ್ ಸೊಯೀಸ್ಕರ್ ಆಸಲಿ ತರಿ ಥಂಯ್ ತಿಚಿ ಸುವಾತ್ ವಾ ಮ್ಹತ್ವ್ ಉಣೆಂ ಜಾಲಾಂ ಅಶೆಂ ತಿಕಾ ದಿಸಪಾಕ್ ಲಾಗತಾ.
ಬಾಲಮನ್ ಆನಿ ದುಯೆಂಸ್
ಭಾವನೀಕ್ ಸುರಕ್ಷೀತತಾಯ್, ಮೊಗ್ ಆನಿ ಲಾಗೀಂಚೆ ಸಂಬಂದ್ ತಯಾರ್ ಕರಪಾಕ್ ಭುರಗೆಂಪಣ್ ಹೊ ಎಕ್ ಮ್ಹತ್ವಾಚೊ ಕಾಳ್. ಗಂಭೀರ್ ಶಾರಿರೀಕ್ ದುಯೆಂಸಾಂಕ್ ತೊಂಡ್ ದಿವಪಿ ಭುರಗ್ಯಾಂಚ್ಯಾ ಮಾನಸೀಕ್ ಭಲಾಯಕೆ ಖಾತೀರ್ ಕುಟುಂಬೀಕ್ ಆದಾರಾಚಿ ಭುಮಿಕಾ ಮ್ಹತ್ವಾಚಿ ಥಾರತಾ. ಮೆರಿ ಕ್ರಿಸಮಸ್ ಡೆಡಿ ಹೆ ಕಥೆಂತ್ ಲೆಖಕಾನ್ ಲ್ಯುಕೆಮಿಯಾ ಹೆಂ ದುಯೆಂಸ್ ಆಶಿಲ್ಲ್ಯಾ ಆಠ್ ವರ್ಸಾಂ ಪಿರಾಯೆಚ್ಯಾ ಚಲಯೆಚಿ ಭಾವನೀಕ್ ಸ್ಥಿತಿ ಮುಖೆಲಪಣಾನ್ ಚಿತ್ರೀತ್ ಕೆಲ್ಯಾ. ಹಿ ಚಲಿ ಆಶ್ರಮಾಂತ್ ರಾವತಾ. ತಿಚ್ಯೊ ದಿಸಪಟ್ಟ್ಯೊ ಗರಜೊ ಆಶ್ರಮಾಂತ್ ಆಶಿಲ್ಲ್ಯೊ ವ್ಯಕ್ತಿ ಭಾಗಯತಾತ್ ತರಿ ತಿಕಾ ತಿಚ್ಯಾ ಬಾಪಾಯಚ್ಯಾ ಮೊಗಾಚಿ ಯಾದ್ ಯೆತಾ. ಬಾಲ್ ಮಾನಸಶಾಸ್ತ್ರಾಚ್ಯಾ ಮತಾ ಪ್ರಮಾಣ್ ಭುರಗ್ಯಾಂಚೆ ಭಾವನೀಕ್ ಉದರಗತಿ ಖಾತೀರ್ ಆವಯ್-ಬಾಪಾಯನ್ ಭುರಗ್ಯಾಂಕಡೆನ್ ಸುರಕ್ಷೀತ್ ಭಾವನೀಕ್ ಸಂಬಂದ್ ದವರಪ್ ಗರಜೆಚೆಂ ಆಸತಾ. ದೀರ್ಘಕಾಳ್ ದುಯೆಂಸ್, ಆಶ್ರಮಾಂತ್ ರಾವಪ್, ಆವಯ್-ಬಾಪೂಯ್ ನಾಶಿಲ್ಲ್ಯಾನ್ ಭುರಗ್ಯಾಕ್ ಎಕಸುರೆಪಣ್ ಯೆವಪ್, ಅಸುರಕ್ಷೀತತಾಯ್ ಸಾರಕಿಲ್ಯೊ ಭಾವನಾ ನಿರ್ಮಾಣ್ ಜಾವಪಾಚಿ ಶಕ್ಯತಾಯ್ ಆಸತಾ. ಪೂಣ್ ಭುರಗ್ಯಾಂಚ್ಯಾ ಮಾನಸೀಕ್ ಲವಚೀಕಪಣಾಂತ್ ಆಶಾ ಹೊ ಎಕ್ ಮ್ಹತ್ವಾಚೊ ಘಟಕ್ ಆಸತಾ. ದುಯೆಂಸಾಕ್ ಲಾಗೂನ್ ಕೂಡ್ ದುಬಳಿ ಜಾಲಿ ತರಿ ಭಾವನೀಕ್ ಸಂಬಂದಾಂಚಿ ಗರಜ್ ಉಣಿ ಜಾಯನಾ; ಉರಫಾಟೆಂ ಅಶಾ ಪರಿಸ್ಥಿತೀಂತ್ ಮೊಗಾಚಿ ಆನಿ ಮಾನ್ಯತಾಯೆಚಿ ಗರಜ್ ವಾಡಟಾ. ನಾತಾಳಾಕ್ ಮೊಗಾಚೊ, ಭೆಟೀಚೊ ಉತ್ಸವ್ ಮಾನತಾತ್. ಅಶಾ ವೆಳಾರ್ ವನೆಸ್ಸಾ ಆಪಲ್ಯಾ ಜಿಣೆಚೆ ನಿಮಣೆ ಖೀಣ್ ಮೆಜತನಾ ದಿಸತಾ. ಇತಲ್ಯಾನ್ ವನೆಸಾ ಹೆ ಚಲಯೆಚೊ ಡೆಡಿ ಯೆತಾ. ದೆಖೀಕ್ "ಕೊಣ್ ಆಯಲಾ ಪಳೆ ಖಟಲ್ಯಾ ದೆಗೆರ್ ಬಸೂನ್ ತಿಣೆ ವನೆಸ್ಸಾಚೆ ದೊಳೆ ಉಕ್ತೆ ಕೆಲೆ. ತ್ಯಾ ದಿಸಾ ವನೆಸ್ಸಾ ಹೆ ಚಲಯೆಕ್ ತಿಚೊ ಬಾಪೂಯ್ ತಿಕಾ ಭೆಟ್ ದಿವಪಾಕ್ ಯೆತಲೊ ಅಶಿ ಖರ್ ಇತ್ಸಾ ಆಸತಾ. ತಶೆಂಚ್ ಹಾಂಗಾಂ ಬಾಪಾಯಚೀಯ್ ಸ್ಥಿತಿ ಬಿಕಟ್ ಆಸತಾ. ದೆಖೀಕ್ “ಹಾಂವ್ ಮ್ಹಾಕಾಚ್ ಫಟಯತಾಲೊಂ, ಪೂಣ್ ಆಯಚೆ ರಾತಿ ಮ್ಹಾಕಾ ಎಕೆ ಧುವೆಚಿ ಗರಜ್ ಪಡಲೀ. ನಿಮಣೆಕಡೆನ್ ಬಾಪಾಯಚ್ಯಾಚ್ ಬೆಗೆಂತ್ ತೆಂ ಜೀವ್ ಸೊಡಟ್ಟಾ.
ಮನೀಸಪಣ್ ಆನಿ ಪ್ರಾಮಾಣಿಕಪಣ್
ಚೊಕಲೀಟಾ ಹೆ ಕಥೆಂತ್ ಬಾಬೂಬಾಬಾ ಹೆ ಪಾತ್ರಾಕ್ ಗೊಡೆಮುತಾಚೆಂ ಆಸಲೆಂ ತರಿ ತೊ ಚೊಕಲೆಟಿ ಖಾವಪಾಚೆಂ ಸೊಡಿನಾ ತಾಕಾ ಚೊಕಲೆಟಿ ಖಾವಪಾಚೊ ಭೊವ್ ಘೊಸ್ತ್ ಆಸತಾ. ತಾತಲೆ ತಾತೂಂತ್ ವಿದೆಶಿ ಚೊಕಲೆಟಿ ಖಾವಪಾಚೊ ಘೊಸ್ತ್ ಆಶಿಲ್ಲ್ಯಾನ್ ಬಾಬೂಬಾಬಾ ಚೊಕಲೆಟಿ ಖಾವನ್ ತಾಂಚಿ ಕಾಗದಾಂ ಆಪಲೆಗೆರ್ ವಾವರ್ ಕರುಂಕ್ ಯೆವಪೆಚ್ಯಾ ಪೊತ್ಯಾಂತ್ ಘಾಲತಾ. ಹೀಂಚ್ ಬಾಬೂಬಾಬಾಚೀಂ ಕಾಗದಾಂ ಘರಾಂತ್ ಹಾಡಿಲ್ಲ್ಯಾ ಕೊಯರಾಂತಲ್ಯಾನ್ ವೆಂಚೂನ್ ತಿಚೀಂ ಭುರಗೀಂ ಹಸ್ತಕಲಾ ಸ್ಪರ್ಧೆಂತ್ ಇನಾಮಾಂ ಜೊಡಟ್ಟಾತ್. ಪೂಣ್ ಎಕ್ ದೀಸ್ ಬಾಬೂಬಾಬಾ ಮುದ್ದಾಮ್ ತಿಚ್ಯಾ ಕೊಯರಾಚ್ಯಾ ಪೊತ್ಯಾಂತ್ ದೊನ್ ವಿದೆಶಿ ಚೊಕಲೆಟಿ ಘಾಲತಾ. ಪೂಣ್ ದುಸಎಯಾಚ್ ದಿಸಾ ಹಿ ಭುರಗೀಂ ಯೆವನ್ ಬಾಬೂಬಾಬಾಚ್ಯಾ ಹಾತಾಂತ್ ತ್ಯೊ ಚೊಕಲೆಟಿ ಪರತ್ ಕರತಾತ್. ದೆಖೀಕ್: “ ಕಾಲಚ್ಯಾ ಕೊಯರಾಂತ್ ಹೀಂ ದೊನ್ ಚೊಕಲೆಟಿ ಆಮಕಾಂ ಮೆಳ್ಳೀಂ, ತೂಂ ತೀಂ ಖಾವಂಕ್ ವಿಸರಲೊ ಅಶೆಂ ದಿಸತಾ. ಹಾಚೆವೆಲ್ಯಾನ್ ತಾಂಚೆ ಭಿತರ್ ಆಶಿಲ್ಲೆಂ ಮನಿಸಪಣ್ ಆನಿ ಪ್ರಾಮಾಣೀಕಪಣ್ ಸ್ಪಶ್ಟ್ ಜಾತಾಚ್ ಆನಿ ಲೆಖಕ್ ನಕಳತ್ ಬಾಲಮನಾಕ್ ದೆಖ್ ದಿತನಾ ದಿಸತಾ. ಮನೀಸಪಣ್ ಆನಿ ಪ್ರಾಮಾಣಿಕಪಣಾ ಹೆ ದೊನೂಯ್ ಗೂಣ್ ಎಕಾಮೆಕಾಂಕ್ ಜೊಡಿಲ್ಲೆ ಆಸತಾತ್. ಮನಶಾಚ್ಯಾ ಖರ್ಯಾ ಚರಿತ್ರಾಚಿ ಆನಿ ಸಂಸ್ಕಾರಾಚಿ ಕಸೌಟಿ ಲಾಗತಾ ತಿ ಮ್ಹಣಲ್ಯಾರ್ ಗರಿಬೀನ್. ಗರಿಬಿ ಹಿ ಮನಶಾಚಿ ಪರಿಸ್ಥೀತಿ ಪೂಣ್ ಪ್ರಾಮಾಣಿಕಪಣಾ ಹೊ ಮನಶಾಚೊ ನೈತೀಕ್ ಗೂಣ್. ಜಾಯತೆ ಫಾವಟೀಂ ಗರೀಬ್ ಪರಿಸ್ಥೀತೀಂತ್ ಫಾವೊ ತಶೆ ಪಯಶೆ ಖರ್ಚ್ ಕರಪಾಕ್ ಮೆಕಳೀಕ್ ನಾಸತಾ. ಅಶಾ ವೆಳಾರ್ ಚುಕಿಚ್ಯಾ ಮಾರ್ಗಾರ್ ವಚಪಾಚೊ ಮೊಹ್ ವ್ಯಕ್ತೀಕ್ ಜಾವಂ ಯೆತಾ. ಪೂಣ್ ತ್ಯಾ ಮೊಹಾಕ್ ಬಳಿ ಪಡನಾಸತನಾ ಪ್ರಾಮಾಣಿಕಪಣಾನ್ ಜಗಪ್ ಹೊಚ್ ದರ್ ಎಕಾ ವ್ಯಕ್ತೀಚೊ ಖರೊ ಪಾಯೊ ಥಾರತಾ. ಹ್ಯಾ ಕಸೊಟೀಕ್ ಹೀಂ ದೊನೂಯ್ ಭುರಗೀಂ ಪಾರ್ ಕರತನಾ ದಿಸತಾತ್.
ಮದ್ಯಾಸಕ್ತಿ (Alcoholism) ಆನಿ ಪರಿಣಾಮ್
ಮನೀಸ್ ವಾಯಟ್ ನಾಸತಾ ಪೂಣ್ ತೊ ಭೊಗತಲಿ ಪರಿಸ್ಥೀತಿ ವಾಯಟ್ ಆಸತಾ. ಜಾಯತೆ ಫಾವಟೀಂ ಮನೀಸ್ ಹೆರಾಂಕ್ ಸಾಂಗಾತ್ ಕರಪಾಕ್ ಸೊರೊ ಘೆತಾ ಆನಿ ಮಾಗೀರ್ ತಿ ಸೊರ್ಯಾಚಿ ಲಾಗಣ್ ಕೆನ್ನಾ ಆನಿ ಕಶಿ ಲಾಗತಾ ಹಾಚೊ ಪತ್ತೊಚ್ ಲಾಗಪಾಕ್ ಪಾವನಾ. ಹೆಂ ನಿತಿ ಥಾವನ್ ಪಳಾಪಳ್ ಹೆ ಕಥೆಂತಲ್ಯಾ ಪಾವಲ್ ಶೆಟ್ ಹ್ಯಾ ಪಾತ್ರಾ ಭಿತರ್ ದಿಸತಾ. ಬಎಯಾ ಮನಶಾಚಿ ವಾಟ್ ಸೊಅಎಯಾಕ್ ಲಾಗುನೂಚ್ ಲಾಗತಾ. ಭಾವನಾ, ಉಮೆದ್, ಶಾರಿರೀಕ್ ಶಕ್ತ್, ಮನಶಾಂ ಸಗಲೆಂಚ್ ತಾಚೆ ಪಸೂನ್ ಪಯಸ್ ವತಾ. ತಶೆಂಚ್ ಹೆ ಕಥೆಂತ್ ಆನೀಕ್ ಎಕ್ ಪಾತ್ರ್ ಯೆತಾ. ತೊ ಹೆಂ ಪಾತ್ರ್ ಪಾವಲ್ ಶೆಟೀಗೆರ್ ಬಿರಾಡಾಕ್ ರಾವತಾ ಆನಿ ತಾಚಿ ವಾಗಣೂಕ್ ತೊ ಹ್ಯಾ ಪಾತ್ರಾಕ್ ಮಾತ್ತೂಯ್ ಆವಡನಾ. ತಶೆಂಚ್ ಹ್ಯಾ ಮಧ್ಯಾಸಕ್ತೀಕ್ ಲಾಗೂನ್ ಪಾವಲ್ ಶೆಟ್ ಹೆಂ ಪಾತ್ರ್ ಆಪಲೆ ಕಡೆನ್ ಬಿರಾಡಾಕ್ ರಾವತಲೆ ವ್ಯಕ್ತೀಚೆರ್ ಲೆಗೀತ್ ಸುರಿ ಘಾಲಪಾಚೆ ವಿಚಾರಾಂತ್ ಆಸತಾಚ್. ಇತಲ್ಯಾನ್ ಕಥಾನಕ್ ನವೆಂ ಮೊಡಣ್ ಘೆತಾ. ಪಾವಲ್ ಶೆಟ್ ಹೆ ವ್ಯಕ್ತೀಗೆರ್ ಜಿ ಭಾಡ್ಯಾಕ್ ರಾವಪಿ ವ್ಯಕ್ತಿ ಆಯಿಲ್ಲಿ ಆಸತಾ ತಿಕಾ ನ್ಹಿದಾನ್ ಚಲಪಾಚೆಂ ದುಯೆಂಸ್ ಆಸತಾ. ಜಾಕಾ (Somnambulism) ಮ್ಹಣಲ್ಯಾರ್ ನ್ಹಿದಾನ್ ಚಲಪಾಚೆಂ ದುಯೆಂಸ್ ಅಶೆಂ ಮ್ಹಣ್ಟಾತ್. ಲೆಖಕಾನ್ ಕಥೆಕ್ ಯೊಗ್ಯ್ ಅಸೊ ಮಾಥಾಳೊ ದಿಲ್ಲೊ ಆಸಾ. ತೊ ಮ್ಹಣಲ್ಯಾರ್ ನಿತಿ ಸಾವನ್ ಪಳಾಪಳ್. ಪ್ರತ್ಯಕ್ಷಾನ್ ಜರಿ ತೊ ಶೆಟೀಕ್ ಮಾರಪಾಕ್ ಪಾವಲ್ ಉಬಾರೀನಾಸಲೊ ತರಿ ತೊ ನ್ಹಿದಾನ್ ಸುರಿ ಘೆವನ್ ತಾಕಾ ಮಾರಪಾಕ್ ಭಾಯರ್ ಸರತಾ. ಹೆಂ ದುಯೆಂಸ್ ತಾಕಾ ಆಶಿಲ್ಲ್ಯಾನ್ ತೊ ಸುರಿ ಘೆವನ್ ಪಾವಲಾಚ್ಯಾ ಹುಂಬಎಯಾರ್ ಪಾವತಾ ಪೂಣ್ ಕೊಣೆ ತರಿ ಖೊಂಟ್ ಮಾರಿಲ್ಲೆವರಿ ದಿಶಿಲ್ಲ್ಯಾನ್ ತಾಕಾ ಜಾಗ್ ಯೆತಾ ಆನಿ ತೊ ಹಾತಾಂತ್ ಸುರಿ ಪಳೊವನ್ ಭಿಯೆತಾ. ಪೂಣ್ ತಾಚೆ ಭಿತರ್ ದಡಿಲ್ಲೆ ಸಂಸ್ಕಾರ್ ತಾಕಾ ಹೆಂ ಕಾಮ್ ಕರಪಾಕ್ ದಿನಾ ಆನಿ ನಿಮಣೆ ಕಡೆನ್ ಆಪಣೆ ತಾಕಾ ಮಾರೂಂಕ್ ನಾ ಮ್ಹಣೂನ್ ತೊ ಸಮಾಧಾನಿ ಜಾತಾ.
ನಿಶ್ಕರ್ಶ್:
ಎಡ್ವಿನ್ ಜೊಸೆಫ್ ಫ್ರಾನ್ಸಿಸ್ ಡಿಸೊಜಾ ಹಾಂಚ್ಯಾ ಲಿಖೀತ್ ತಶೆಂಚ್ ಅಣಕಾರೀತ್ ಕಥಾಂಚೊ ನಿಯಾಳ್ ಕರತನಾ ಕಾಂಯ್ ಗಜಾಲಿ ಮ್ಹಜ್ಯಾ ನದರೆಕ್ ಪಡಲ್ಯೊ ತ್ಯೊ ಅಶೊ, ಮನಶಾಚ್ಯಾ ಜಿವಿತಾಚೆರ್ ಜಾಯತ್ಯಾ ಸಮಾಜೀಕ್, ಮಾನಸೀಕ್ ಆನಿ ವೈಯಕ್ತೀಕ್ ಘಟಕಾಂಚೊ ಪ್ರಭಾವ್ ಪಡಟಾ. ಶ್ರೆಶ್ಠತಾಯೆಚಿ ಭಾವನಾ ಮನಶಾಕ್ ಹೆರಾಂ ಪಾಸೂನ್ ಪಯಸ್ ಕರಪಾಕ್ ಶಕತಾ, ಜಾಲ್ಯಾರ್ ಪ್ರಾಮಾಣೀಕಪಣ್ ಮನಶಾಕ್ ಸ್ವತಾ ಕಡೆನ್ ಆನಿ ಸಮಾಜಾ ಕಡೆನ್ ಜೊಡಟಾ. ವಿಭಕ್ತ್ ಕುಟುಂಬ್ ವೆವಸ್ಥಾ ಸ್ವಾತಂತ್ರ್ಯ್ ಆನಿ ಮೆಕಳೀಕ್ ದಿತಾ, ಪೂಣ್ ತ್ಯಾಚ್ ವೆಳಾರ್ ಭಾವನೀಕ್ ಆದಾರ್, ಪಿಳಗೆಚೊ ಅಣಭವ್ ಆನಿ ಸಾಮುಹೀಕತಾಯೆಚೊ ಉಣಾವ್ ನಿರ್ಮಾಣ್ ಕರೂಂಕ್ ಶಕತಾ. ಕಿಶೊರವಯೀನ್ ಆಕರ್ಶಣ್ ಹೆಂ ವಿಕಾಸ್ ಪ್ರಕ್ರಿಯೆಂತಲೆಂ ಎಕ್ ಸೈಮೀಕ್ ಆನಿ ಮ್ಹತ್ವಾಚೆಂ ಪಾವಲ್; ಯೊಗ್ಯ್ ಸಮಜೂತ್, ಸಂವಾದ್ ಆನಿ ಮಾರ್ಗದರ್ಶನ್ ಮೆಳ್ಳ್ಯಾರ್ ತರಣಾಟ್ಯಾ ಮನಾಂಕ್ ಯೊಗ್ಯ್ ದಿಕಾ ಮೆಳೂಂಕ್ ಶಕತಾ. ದುಸರೆ ವಟೆನ್ ಸೊಱ್ಯಾಚೆಂ ವ್ಯಸನ್ ಫಕತ್ ವ್ಯಕ್ತೀಚೆ ಭಲಾಯಕೆಚೆರ್ ನ್ಹಯ್ ತರ್ ಕುಟುಂಬಾಂತಲ್ಯಾ ಸಂಬಂದಾಂಚೆರ್, ಅರ್ಥೀಕ್ ಸ್ಥಿತೀಚೆರ್ ಆನಿ ಮಾನಸೀಕ್ ಶಾಂತೀಚೆರೂಯ್ ಪರಿಣಾಮ್ ಕರತಾ. ಆಶ್ರಮ್ ಸಾರಕಿಲೆ ಚಾಲಂತ್ ವಿಶಯ್ ಸಾದ್ಯಾ ಮೊಠೆ ಪ್ರಮಾಣಾಂತ್ ವಾಡಿಲ್ಲ್ಯಾ ಆಶ್ರಮಾಚ್ಯಾ ಆಂಕಡ್ಯಾಂ ವೆಲ್ಯಾನ್ ದಿಸತಾತ್. ತೆ ಲೆಖಕಾಚ್ಯಾ ಕಥೆಚೆ ವಿಶಯ್ ಥಾರತಾತ್. ಹಾಚೆ ಫಾಟಲೀಂ ಕಾರಣಾಂ ಮ್ಹಣಲ್ಯಾರ್ ಕುಟುಂಬೀಕ್ ದುರ್ಲಕ್ಷ್ ನ್ಹಯ್ ತರ್ ಭಾವನೀಕ್ ಪರಕೆಪಣ್, ಬದಲಪಿ ಕುಟುಂಬೀಕ್ ಮುಲ್ಯಾಂ, ಅರ್ಥೀಕ್ ಅಡಚಣೀ, ಕಾಳಜಿ ಘೆವಪ್ಯಾಂಚೊ ತಾಣ್ ಆನಿ ಸಮಾಜೀಕ್ ಪರಿಸ್ಥಿತಿ ಅಶೆ ವೆಗವೆಗಳೆ ಘಟಕ್ ದಿಸೂನ್ ಯೆತಾತ್. ಅಶೆ ಪರಿಸ್ಥಿತೀಂತ್ ಜಾಣ್ಟ್ಯಾಂಕ್ ಭಾವನೀಕ್ ಆದಾರ್ ಆನಿ ಸಮಾಜೀಕ್ ಸುರಕ್ಷಾ ಮೆಳಪ್ ಖೂಬ್ ಮ್ಹತ್ವಾಚೆಂ ಆಸತಾ.
ತಶೆಂಚ್ ಲೆಖಕಾನ್ ಲ್ಯುಕೆಮಿಯಾ ಸಾರಕಿಲ್ಯಾ ಗಂಭೀರ್ ದುಯೆಂಸಾಕ್ ಲಾಗೂನ್ ಭುರಗ್ಯಾಚ್ಯಾ ಶಾರಿರೀಕ್ ಭಲಾಯಕೆಚೆರಚ್ ನ್ಹಯ್ ತರ್ ತಿಚ್ಯಾ ಭಾವನೀಕ್ ಆನಿ ಸಮಾಜೀಕ್ ಜಿಣೆಚೆರೂಯ್ ಪರಿಣಾಮ್ ಜಾತಾ ಹೆಂ ದಾಖಯಲಾಂ. ಆಶ್ರಮಾಂತ್ ರಾವತನಾ, ಆಪಲ್ಯಾ ಮನಶಾಂಚೊ ಸಾಂಗಾತ್ ಜಾಯ್ ಜಾಯಸೊ ದಿಸಲೊ ತರಿ ತೊ ಮೆಳಪ್ ಅಶಕ್ಯ್ ಆಶಿಲ್ಲ್ಯಾನ್ ಜಾವಪಿ ವೆದನಾ ಲೆಖಕಾನ್ ಬೆಸ್ ಬರೆ ತರೆನ್ ಮಾಂಡಲ್ಯಾ. ಆನಿ ನಿಮಾಣೆಕಡೆನ್ ಆಧುನಿಕತಾ ಆನಿ ಪರಂಪರಾ, ಸ್ವಾತಂತ್ರ್ಯ್ ಆನಿ ಜಾಪಸಾಲದಾರಕೀ, ಭಾವನಾ ಆನಿ ವಿವೆಕ್ ಹಾಂಚೆ ಮದೀಂ ಸಮತೊಲ್ ದವರಪ್ ಗರಜೆಚೊ ಆಸತಾ ಹೆಂ ಸಾಂಗಪಾ ಖಾತೀರ್ ತಾ ಎಡ್ವಿನ್ ಜೊಸೆಫ್ ಫ್ರಾನ್ಸಿಸ್ ಡಿಸೊಜಾ ಹಾಂಣಿ ಕೆವಿವಿಧಾಂಗಿ ವಿಶಯಾವೆಲೆ ಬರಪ್ ಕೆಲ್ಲೆಂ ದಿಸತಾ.
ಸಂದರ್ಭ್ ವಳೆರೀ:
1. https://en.wikipedia.org/wiki/Superiority_complex
೨ ಕ್ವಾದ್ರೂಶ್ ವಲ್ಲಿ: ಚಲ್ ದೊನ್ ಚಂದ್ರಾಕ್: ಬಣ್ಣಕಡ್ಡಿ: ಪಾನ್ ಕ್ರ ೮
೩ ಡಿಸೊಜಾ ಎಡ್ವಿನ್: ಪಯಣ್: ಪ್ರಕಾಶಕ್ ಬಿಂಬ್ ಪ್ರಕಾಶನ್ ಆಗಶಿ ಗೊಂಯ್: ೨೦೧೪: ಪಾನ್ ಕ್ರ. ೯೬
೪. ಡಿಸೊಜಾ ಎಡ್ವಿನ್: ಪಯಣ್: ಪ್ರಕಾಶಕ್ ಬಿಂಬ್ ಪ್ರಕಾಶನ್ ಆಗಶಿ ಗೊಂಯ್ ೨೦೧೪: ಪಾನ್ ಕ್ರ. ೯೬
೫. ಸಂಪಾ. ಗಾಂವಕಾರ್ ಭಾಲಚಂದ್ರ್, ಸಾಖರದಾಂಡೆ ಅಂಜೂ, ನಾಯಕ್ ನಿತ್ಯಾನಂದ್: ಪ್ರಾತಿನೀಧೀಕ್ ಕಥಾ ಝೆಲೊ: ಪ್ರಕಾಶಕ್; ಚೆತನ್ ಆಚಾರ್ಯ ಕೊಂಕಣಿ ಭಾಶಾ ಮಂಡಳ್ ಮಡಗಾಂವ್ ಗೊಂಯ್. ಪಾನ್ ಕ್ರ. ೯೭
