ಕೊಂಕ್ಣೆಚಾ ವಿಂಚ್ಣಾರ್ ಸಾಹಿತ್ಯಾಚೊ ಕೊನ್ಸೊ - ’ದಾಯ್ಜ್’ - ಫಕತ್ತ್ ಕೊಂಕಣಿ ಥಾವ್ನ್, ಕೊಂಕಣಿ ಪರ್ಯಾಂತ್, ಕೊಂಕಣಿ ಖಾತಿರ್.
[ಆಯ್ಲೆವಾರ್ ಶ್ಹೆಣ್ ಚಳ್ವಳೆಚ್ಯಾ ನಿಬಾನ್ ಎಕಾಮೆಕಾ ಮಾನ್ ಕಾಡ್ಚ್ಯಾ ಪ್ರಕ್ರಿಯೆಂತ್ ಕಠೀಣ್ ದುಖೊನ್ ಕ್ಲೆರೆನ್ಸ್ ಕೈಕಂಬನ್ ಬರಯಿಲ್ಲೆಂ ಉಗ್ತೆಂ ಪತ್ರ್ ಹೆಂ]
ಏಕ್ ಉಗ್ತೆಂ ಪತ್ರ್
ಮೊಗಾಳ್ ಕೊಂಕ್ಣಿ ಮಿತ್ರಾಂನೊ, ಕೊಂಕ್ಣಿ ಭಾಸೆಚ್ಯಾ ಅಭಿಮಾನಿನೊ,
ಹೆಂ ಮ್ಹಜೆಂ ಏಕ್ ಉಗ್ತೆಂ ಪತ್ರ್. ಮ್ಹಜೆಂ ಪ್ರಾಮಾಣಿಕ್ ಕುಮ್ಸಾರ್ ವ ಭಗ್ಣಾಂ ಪಿಂತ್ರಾಯ್ಲ್ಯಾಂತ್. ’ಕೊಂಕ್ಣಿ’ ಮ್ಹಳ್ಳ್ಯಾ ಲ್ಹಾನ್ ವರ್ತುಲಾಂತ್ ಜ್ಯೆ ಕಿತೆಂ ಆಜ್ಕಾಲ್ ಜಾವ್ನ್ ಆಸಾ ’ಶ್ಹೆಣ್ ಚಳ್ವಳ್’ ಹಾಚೆರ್ ಮ್ಹಜೆಂ ಹೆಂ ಪಯ್ಲೆಂ ಭೋವ್ಶಾ ಅಖ್ರೇಚೆಂ ಪತ್ರ್ ಜಾವ್ನಾಸಾ, ಕಿತ್ಯಾಕ್ ಹಾಂವ್ ಖರೊಚ್ ಜಾವ್ನ್ ಭೋವ್ ದುಖ್ಲಾಂ, ಸಗ್ಳೊ ವಾಚ್ಪಿ ಲೋಕ್ ದುಖ್ಲಾ, ಕೊಂಕ್ಣಿ ಭಾಸೆಕ್ ವೆಂಗ್ಲ್ಲೊ ಲೋಕ್ ದುಖ್ಲಾ, ಕೊಂಕ್ಣಿ ಜಾಂವ್ ವಾ ಹೆರ್ ಭಾಸ್ ಜಾಂವ್ - ಭಾಸೆಚಿ ವ್ಹಾಡಾವಳ್ ತಶೆಂಚ್ ವೃದ್ದಿ ಜಾಂವ್ಚಿ ಅಶಿ ಭಿಲ್ಕುಲ್ ನ್ಹಯ್..
ಜೊ ಕೊಣ್ ಹೆಂ ಕರ್ನ್ ಆಸಾ, ಜರೂರ್ ಕೊಂಕ್ಣಿ ಭಾಸೆಚ್ಯಾ ಭಲಾಯ್ಕೆಭರಿತ್ ಫುಡಾರಾ ಪಾಸೊನ್ ಭಿಲ್ಕುಲ್ ನ್ಹಯ್. ಕೊಂಕ್ಣಿ ಸಮಾಜ್, ಕೊಂಕ್ಣಿ ಲೋಕ್ ಅಸಲ್ಯಾ ನಿರ್ದಯ್, ಲಜ್ಮಾಂಡಿ, ಕಿರ್ಕೊಳ್ ಕರ್ನ್ಯಾಂಕ್ ಭಗ್ಸಾಣೆ ಜರೂರ್ ದಿಂವ್ಚಿನಾ. ಕಿತ್ಯಾಕ್ ಪಾಸೊನ್ ಆಮಿ ಹೆಂ ಸರ್ವ್ ಕರ್ಚ್ಯಾಕೀ ಆಮ್ಚ್ಯಾನ್ ಕಿತೆಂ ಸಾಧ್ಯ್ ಆಸಾ ತೆಂ ಕರುಂಕ್ ನ್ಹಜೊ? ಹೆರಾಂ ಥಾವ್ನ್ ಕಿತೆಂಚ್ ವಿಶೇಸ್ ಅಪೇಕ್ಶಾ ಕರಿನಾಸ್ತಾಂ ಆಮಿಂ ಕಿತ್ಯಾಕ್ ನವಿ ಸುರ್ವಾತ್ ಕರುಂಕ್ ನ್ಹಜೊ?
ಆಮಿ ಏಕ್ ಲ್ಹಾನ್ ಸಮುದಾಯ್, ಲ್ಹಾನ್ ಸಮಾಜ್ - ಭೋವ್ ಥೊಡೊ ಲೋಕ್ ಆಜ್ ಕೊಂಕ್ಣಿ ಭಾಸೆಕ್ ವೆಂಗುನ್ ಆಸಾ. ಆನಿ ಭೋವ್ ಥೊಡೆ ಕೊಂಕ್ಣಿ ಭಾಸೆಚೆರ್ ಅಭಿಮಾನ್ ದವ್ರುನ್ ವಾವ್ರ್ ಕರುನ್ ಆಸಾ. ಆಮಿ, ಹಾಂವ್ ಆನಿ ಜೆರಿ ಡಿ’ಮೆಲ್ಲೊ (ಜೆದ್ನಾಂ ತೊ ಮಸ್ಕತ್ ಆಸ್ಲೆವೆಳಿಂ) ಜಾಣಾಂವ್ ಕಿತ್ಲೆಂ ಆಮಿ ಸೊಸ್ಲಾಂ ಆನಿ ಭಗ್ಲಾಂ ಮ್ಹಳ್ಳೆಂ; ಫಕತ್ತ್ ಕೊಂಕ್ಣಿ ಭಾಸೆಚ್ಯಾ ವಾವ್ರಾಕ್ ಪಾಟಿಂಬೊ ದಿಂವ್ಚೆ ಪಾಸತ್, ಮಸ್ಕತಾಂತ್ ಕೊಂಕ್ಣಿ ಭಾಸ್ ಜಿವಾಳ್ ದವರ್ಚೆ ಪಾಸತ್. ಆನಿ ಆಜ್, ಮಸ್ಕತಾಂತ್ ಜಾಲ್ಲ್ಯಾ ಕೊಂಕ್ಣಿ ವ್ಹಾಡಾವಳೆ ಥಂಯ್ ಆಮ್ಕಾಂ ಸಂತೊಸ್ ಆಸಾ, ಸಮಧಾನ್ ಆಸಾ, ಕಿತ್ಯಾಕ್ - ಮಸ್ಕತಾಂತ್ ಕೊಂಕ್ಣಿ ಜಿವಾಳ್ ಆಸಾ. ಆಯ್ಚಿಂ ಭುರ್ಗಿಂ ಕೊಂಕ್ಣಿ ಉಲಯ್ತಾತ್. ಆಮಿ ಮಸ್ಕತಾಂತ್ ಸಗ್ಳೆಂ ಕೊಂಕ್ಣಿ ಭಾಸೆಂತ್ ಕಾರ್ಯಿಂ ಚಲಯ್ತಾಂವ್, ಮಾಂಡುನ್ ಹಾಡ್ತಾಂವ್. ಆಮಿ ಆಮ್ಚ್ಯಾ ಸಂಸ್ಥ್ಯಾಚಿ ವ್ಹೆವಾರಿಕ್ ಭಾಸ್ ಸಯ್ತ್ ಕೊಂಕ್ಣಿ ಜಾವ್ನ್ ಬದ್ಲಿಲ್ಯಾ. ವಾರ್ಷಿಕ್ ವರ್ದಿ ವಾ ಲೇಕ್-ಪಾಕ್ ಹರ್ಯೆಕ್ ಕೊಂಕ್ಣೆಂತ್ ದಿತಾಂವ್. ಜೆದ್ನಾಂ ಭೋವ್ ಮಾನಾಧಿಕ್ ಫಿಲಿಪ್ ನೆರಿ (ಗೊಂಯಾಂ, ದಿಯು-ದಾಮನಾಚೊ ಭಿಸ್ಪ್) ದೋನ್ ಮಯ್ನ್ಯಾಧಿಂ ಮಸ್ಕತಾಕ್ ಆಯಿಲ್ಲೆವೆಳಾರ್, ಹ್ಯಾ ವಾವ್ರಾಚೆರ್ ಶಾಭಾಸ್ಕಿ ಉಚಾರ್ನ್, ಆಮ್ಚ್ಯಾ ಕೊಂಕ್ಣೀ ವಾವ್ರಾಚೆರ್ ವಾಖಣ್ಣುನ್, ಗೊಂಯ್ಚ್ಯಾ ಕೊಂಕ್ಣಿ ಭಾವಾಂನಿ ಸಯ್ತ್ ಹಿ ದೇಕ್ ಆಪ್ಣಾಂವ್ಕ್ ಉಲೊ ದೀವ್ನ್ ಗೆಲಾ. ಹಿ ಕಾಂಯ್ ಅತಿಶಯೋಕ್ತ್ ನ್ಹಯ್. ನಿಜಾಯ್ಕೀ ಹೆಂ ಉತಾರ್ ಗೊಂಯ್ಚ್ಯಾ ಭಿಸ್ಪಾಂ ಥಾವ್ನ್ ಆಯ್ಕೊಂಚೆಂ ಆಮ್ಚೆಂ ವರ್ತೆಂ ಭಾಗ್ ಜಾವ್ನಾಸಾ. ಆಜ್ ಸಂಸಾರ್ಭರ್, ಜಾಂವ್ ಮಂಗ್ಳುರ್, ಗಲ್ಫ್, ಕೆನಡಾ, ಯುಕೆಂತ್ ಥೊಡೆ ಕೊಂಕ್ಣಿ ವಾವ್ರ್ ಕರುನ್ ಆಸಾತ್, ಕೊಂಕ್ಣಿ ಸಂಸ್ಕೃತಿ, ತಶೆಂಚ್ ಭಾಸೆಚ್ಯಾ ಬರ್ಯಾ ಫುಡಾರಾ ಪಾಸತ್ ಮಿನತ್ ಕರುನ್ ಆಸಾತ್. ತರ್ ಕಿತ್ಯಾಕ್ ಅಸಲೆ ಥೊಡೆ ತಕ್ಲಿ ನಾತ್ಲೆಲೆ ಅಸಲ್ಯಾ ಸೊಭಿತ್ ಕೊಂಕ್ಣಿ ಭಾಸೆಚಿ ಮರ್ಯಾದ್ ಉಗ್ತ್ಯಾನ್ ಕಾಡ್ತಾತ್?
ಹಾಂವ್ ಪ್ರಾಮಾಣಿಕ್ಪಣಿ ಸರ್ವಾಂಕ್ ವಿನತಿ ಕರ್ತಾಂ - ಜೊ ಕೊಣ್ ಹ್ಯಾ ಶ್ಹೆಣ್ ಚಳ್ವಳೆಂತ್ ವಾಂಟೆಲಿ ಜಾಲ್ಯಾಂತ್ ತಾಂಕಾಂ; ದಯಕರುನ್ ಅಸಲಿಂ ಕಾಮಾಂ ರಾವಯಾ.. ಆಮ್ಚ್ಯಾ ಸಾಂಗಾತಿ ಲೇಖಕಾಚೊ ಗಳೊ ಕಾಪ್ಚೆಂ (ಮುಖ್ಲ್ಯಾನ್ ತಶೆಂಚ್ ಪಾಟ್ಲ್ಯಾನ್) ರಾವಯಾ. ಜೆ ಕೊಣ್ ತಾಂಚ್ಯಾ ತಾಂಕಿಚೊ ಕೊಂಕ್ಣಿ ವಾವ್ರ್ ಕರ್ನ್ ಆಸ್ಲೆಲ್ಯಾಂಕ್ ಪ್ರೋತ್ಸಾವ್ ನ್ಹಯ್ ತರ್ ಅನ್ನ್ಯಾಯ್ ಕರ್ಚೊ ರಾವಯಾ. ಕೊಂಕ್ಣಿ ವಾವ್ರ್ ಕರ್ತೆಲ್ಯಾ ವಾ ಬರಯ್ತೆಲ್ಯಾ (ವಾ ಪ್ರೇತನ್ ಕರ್ತೆಲ್ಯಾ) ಕೊಣಾಯ್ಕೀ ತಾಂಕಿಚೊ ಪಾಟಿಂಬೊ ದಿಯಾ - ದಯಕರುನ್ ಅಸಲ್ಯಾಂಚಿ ನಿಂದಾ ಕರಿನಾಕಾತ್. ಅಸಲ್ಯಾಂಕ್ ಮಾರೆಕಾರ್ ಉತ್ರಾಂ-ಕರ್ನ್ಯಾಂನಿ ಹಲ್ಕ್ ಕರ್ನ್ ಸಕ್ಲಾ ಘಾಲುಂಕ್ ಪ್ರೇತನ್ ಕರಿನಾಕಾತ್. ಆಮ್ಕಾಂಚ್ ಆಮಿ ದೆವಾನ್ ರಚ್ಲೆಲೊ ವರ್ತೊ ಲೇಖಕ್/ವಿಮರ್ಶಕ್/ಕವಿ ಮ್ಹಣ್ ಚಿಂತುನ್ ಹೆರ್ ಸರ್ವಾಂಕ್ ಲ್ಹಾನ್ ಮ್ಹಣ್ ಲೆಖ್ಚೆಂ/ಲಿಖ್ಚೆಂ ರಾವಯಾ - ಪ್ರತ್ಯೇಕ್ ಜಾವ್ನ್ ಜಿಂ ಕೊಣ್ ಕೊಂಕ್ಣಿ ಭಾಸೆಚ್ಯಾ ಉದರ್ಗತೆ ಪಾಸತ್ ತಾಂಚ್ಯಾ ತಾಂಕಿಚೊ ವಾವ್ರ್ ಕರುನ್ ಆಸಾ ತಸಲ್ಯಾಂಕ್.
ಇಶ್ಟಾಂನೊ, ಹೆಂ ಸರ್ವ್ ಕಿತ್ಯಾಕ್ ಪಾಸೊನ್ ಕರ್ಚೆಂ? ಅಸಲ್ಯಾ ಕಾಮಾಂನಿ ಕೊಂಕ್ಣಿ ಫುಡಾರಾಕ್ ಕಾಂಯ್ ಉಪ್ಕಾರ್ ಜಾಯ್ತ್?.. ನಾ.. ಕೊಣ್ಂಚ್ ಹ್ಯಾ ಕರ್ನ್ಯಾಂನಿ ಜೊಡುಂಕ್ ಸಕ್ಚೊನಾ. ಆಜ್ ಆಮ್ಕಾಂ ನಿರ್ದಯ್, ದೊಳ್ಯಾಂನಿ ರಗಾತ್ ನಾತ್ಲೆಲೆ, ವಾ ಗಳೊ ಕಾಪ್ಚೆ ವಿಮರ್ಶಕ್ ನಾಕಾತ್ ಪುಣ್ ಕೊಂಕ್ಣೆಂತ್ ಆಸ್ಚೆಂ ತಾಲೆಂತ್ ಸೊಧುನ್, ತಸಲ್ಯಾಂಕ್ ಉತ್ತೇಜಿತ್ ಕರ್ತೆಲೆ ಜಾಯ್ ಪಡ್ಲ್ಯಾತ್. ಆಮ್ಕಾಂ ಸರ್ವಾಧಿಕಾರಿ (ಡಿಕ್ಟೇಟರ್) ನಾಕಾತ್, ವಾ ನಾಕಾತ್; ಜೆ ಆಮ್ಚೆಂ ಸಾಹಿತ್ ಸಂಸಾರಾಂತ್ಲೆ ಕಿರ್ಕೊಳ್ ಸಾಹಿತ್ ಮ್ಹಣ್ಚೆ ತಸ್ಲೆ ವಾ ಆಮ್ಚ್ಯಾ ಕೊಂಕ್ಣೆಂತ್ ತೀನ್ ಕಾಸಾಂಚೆ ಬರವ್ಪಿ ಆಸಾತ್ ಮ್ಹಣ್ತೆಲೆ, ಆಮ್ಚೆ ಬರವ್ಪಿ ಶಿಕಾಪ್-ಸಮ್ಜೊಣಿ ನಾತ್ಲೆಲೆ, ಹೆರ್ ಸಾಹಿತ್ ಅಭ್ಯಾಸ್ ಕರಿನಾತ್ಲ್ಲೆ...... ಪುಣ್ ಆಮ್ಕಾಂ ಜಾಯ್; ತಕ್ಲಿ ಆಸ್ಲೆಲೆ, ಚಿಂತ್ಪಿ, ಆನಿ ವಿಧ್ವಾನ್ - ಜೆ ಆಮ್ಚ್ಯಾ ಬರವ್ಪ್ಯಾಂಕ್ ನವ್ಯೊ ವಾಟೊ ಸೊಧುನ್ ದೀಂವ್, ವಾ ಧಾಖವ್ನ್ ದೀಂವ್, ಆಮ್ಚೆಂ ಫುಡ್ಲೆಂ ಜನಾಂಗ್ ತರ್ಯೀ ತ್ಯಾ ವಾಟಾಂನಿ ಚಲೊಂ ಆನಿ ಅಶೆಂ ಆಮಿ ಎಕ್ವಟಿತ್ ಜಾವ್ನ್ ಕೊಂಕ್ಣೆಚೊ ಫುಡಾರ್ ಉಂಚಾಯೆಕ್ ವರುಯಾಂ.. ಆಮ್ಕಾಂ ಆಮ್ಚ್ಯಾ ಮಾಯ್ಭಾಸೆಕ್ ರಾಕೊಂಕ್ ’ಚಳ್ವಳ್’ ಭಿಲ್ಕುಲ್ ಗರ್ಜೆಚಿ ನ್ಹಯ್, ಬಗಾರ್ ಎಕ್ವಟಿಕ್ ಮನ್ ಆನಿ ಪ್ರಾಮಾಣಿಕ್ ವಾವ್ರ್ ಗರ್ಜೆಚೊ. ಜೆ ಪ್ರಾಮಾಣಿಕ್ ರಿತಿನ್, ಹಾಸೊನ್, ಗೌರವಾನ್ ತಶೆಂಚ್ ಭೋವ್ ಮಾನಾನ್ ಹೊ ವಾವ್ರ್ ಕರ್ತೆಲೆ. ಆಮ್ಕಾಂ ಆಮ್ಚಿ ಮಾಯ್ಭಸ್ ರಾಕೊಂಕ್ ಆತಂಕ್ವಾದಿ (ಟೆರರಿಸ್ಟ್) ನ್ಹಯ್. ಬಗಾರ್ ಖಾಲ್ತೆ ಬರವ್ಪಿ ಆನಿ ವಾವ್ರಾಡಿ, ಜೆ ಕೊಂಕ್ಣೆಕ್ ಬರ್ಯಾ ಫುಡಾರಾ ತೆವ್ಶಿನ್ ವರ್ತೆಲೆ.
ಬರೊ ದೀಸ್ ಮಾಗ್ತಾಂ, ದೇವ್ ಅಮ್ಚೆರ್ ಸರ್ವಾಂಚೆರ್ ಬೆಸಾಂವ್ ಘಾಲುಂ,
ಕ್ಲೆರೆನ್ಸ್ ಕೈಕಂಬ, (ಸಂಚಾಲಕ್, ಬರ್ಪಿ ಮಿತ್ರ್, ಮಸ್ಕತ್)
About us | Feedback | Contact us
Copyright ©
2005 DAAIZ.COM All rights reserved.
Page concept, designed and maintained by Ashawadi Publications