ಕೊಂಕ್ಣೆಚಾ ವಿಂಚ್ಣಾರ್ ಸಾಹಿತ್ಯಾಚೊ ಕೊನ್ಸೊ - ’ದಾಯ್ಜ್’ - ಫಕತ್ತ್ ಕೊಂಕಣಿ ಥಾವ್ನ್, ಕೊಂಕಣಿ ಪರ್ಯಾಂತ್, ಕೊಂಕಣಿ ಖಾತಿರ್.
ಕಥಾ: ಆಜ್ ತೊ ಯೆತಲೊ
ಶಾಲಿನಿ ವಾಲೆನ್ಸಿಯಾ: ಕೊಂಕ್ಣಿ ಸಾಹಿತಿಕ್ ಸಂಸಾರಾಂತ್ ಅಲಿಸ್ ಬಾಯ್ ಮ್ಹಳ್ಯಾರ್ ಸರ್ವಾಂಕ್ ವಳೊಕ್ ನಾ ತರ್ ’ಶಾಲಿನಿ ವಾಲೆನ್ಸಿಯಾ’ ಮ್ಹಳ್ಯಾರ್ ತಕ್ಶಣ್ ವಳೊಕ್ ಜಾತಾ. ಪಾಟ್ಲ್ಯಾ ಸಭಾರ್ ತೆಂಪಾ ಥಾವ್ನ್ ತವಳ್ ತವಳ್ ಅಪ್ರೂಪಾಯೆನ್ ತರ್ಯೀ ಕಾಣ್ಯೊ ಬರಂವ್ಚಾ ಹಿಚ್ಯಾ ಕಾಣ್ಯಾಂನಿ ಸಾಮಾಜಿಕ್ ಚಿಂತಾಪ್ ಉಟೊನ್ ದಿಸ್ತಾ. ಸಾದಿ ಭಾಸ್ ವಾಪಾರ್ ಕರ್ತಾ ದೆಕುನ್ ಸಾದ್ಯಾ ವಾಚ್ಪ್ಯಾಂಕ್ ಹಿಚ್ಯೊ ಕಾಣ್ಯೊ ಭೋವ್ ರುಚ್ತಾತ್.
ಶಾಲಿನಿ ವಾಲೆನ್ಸಿಯಾಚ್ಯೊ ಹೆರ್ ಕಾಣ್ಯೊ: ಗ್ರ್ಯಾನಿ.
ಶಾಲಿನಿ, ವಾಲೆನ್ಸಿಯಾ
"ಆಜ್ ತೊ ಯೆತಲೊ" ವಾಕ್ಯ್ ಹೆಂ ಮತಿಂತ್ ಪಾಶಾರ್ ಜಾತಾನಾ, ಶೀಲಾಚಿ ಕೂಡ್ ಎಕಾ ಥರಾಚಾ ಉದ್ವೇಗಾನ್ ಭಾರೀಕ್ ಕಾಂಪ್ಲಿ.
ವ್ಹಯ್, ಆಜ್ ತಾಚ್ಯಾ ಸಪ್ಣಾಂತ್ಲೊ ರಾಯ್ ಆಶೋಕ್ ಯೆತಲೊ!
ತೊ ಯೆತಲೊ ಮ್ಹಣ್ ಚಿಂತಾನಾಂಚ್ ತಾಚೆಂ ಕಾಳಿಜ್ ಫುಲ್ತಾಲೆಂ. ರವಿರಾಯಾಕ್ ದೆಕೊನ್ ಕಮಳ್ ಫುಲ್ಲ್ಲ್ಯಾಪರಿಂ.
ಕಿತ್ಯಾಕ್, ಆಶೋಕಾ ವಿಶ್ಯಾಂತ್ಲಿಂ ಸಪ್ಣಾಂ ಆನಿ ಚಿಂತ್ನಾಂ ತಾಕಾ ಮಧುರ್ ಅನುಭವ್ ದಿತಾಲಿಂ.
ಕಾರಾಣ್, ತೊ ಜಾವ್ನಾಸ್ಲ್ಲೊ ತಾಚ್ಯಾ ಕಾಳ್ಜಾಚೊ ಗೊಂಡೊ ಮುಕ್ಲೊ ಫುಡಾರ್. ಎಕಾ ಉತ್ರಾನ್ ಸಾಂಗ್ಚೆಂ ತತ್ ತೊ ಜಾಂವ್ಕ್ ಆಸ್ಲ್ಲೊ ತಾಚೊ ಮುಕ್ಲೊ ಸಾಂಗಾತಿ.
ಆನಿ ತೊಚ್ ಆಶೋಕ್ ಆಜ್ ಆಪ್ಲೆಂ ಉಂಚ್ಲೆಂ ಶಿಕಾಪ್ ಕಾಬಾರ್ ಕರುನ್ ಅಮೇರಿಕಾ ಥಾವ್ನ್ ಯೆಂವ್ಚೊ ಆಸ್ಲ್ಲೊ.
ಮೆಜಾರ್ ಆಸ್ಲ್ಲ್ಯಾ ತಸ್ವೀರೆರ್ ಶೀಲಾಚಿ ದೀಷ್ಟ್ ಗೆಲಿ. ಆಶೋಕಾನ್ ಶೀಲಾಕ್, ಅಮೇರಿಕಾ ಥಾವ್ನ್ ಧಾಡ್ಲ್ಲಿ ತಸ್ವೀರ್ ತಿ.
ಚಲನ್ಚಿತ್ರಾಂತ್ಲ್ಯಾ ಹೀರೋಚಾಕ್ಯ್ ಏಕ್ ತೂಕ್ ಚಡ್ ಸೊಭಾಯೆನ್ ಶೀಲಾಚೊ ಆಶೋಕ್ ತಾಂತುಂ ಸೊಭ್ತಾಲೊ. ಆನಿ ತಿ ಪಳವ್ಕ್ ಆನಿ ಪೊಶೆಂವ್ಕ್ ದಿಸಾಚೊ ಚೊವಿಸ್ ವರಾಂಚೊ ವೇಳ್ ತಾಕಾ ಪಾವಾನಾತ್ಲ್ಲೊ.
ಹಾತಾಂತ್ ಘೆತ್ಲ್ಲಿ ತಸ್ವೀರ್ ಪಾಟಿಂ ಮೆಜಾರ್ ದವರ್ಲಿ ಶೀಲಾನ್.
ಆಶೋಕಾಚಾ ಯೆಣ್ಯಾಕ್ ತಾಣೆ ತೀನ್ ಲಾಂಬ್ ವರ್ಸಾಂ ತೀನ್ ಯುಗಾಂಪರಿಂ ಪಾಶಾರ್ ಕೆಲ್ಲಿ.
ಹ್ಯಾ ಆವ್ದೆಂತ್ ತಾಚೆ ವಿಶ್ಯಾಂತ್ ತಾಣೆ ದೆಕ್ಲ್ಲಿಂ ಸಪ್ಣಾಂ ಆನಿ ಬಾಂದ್ಲ್ಲಿಂ ರಾವ್ಳೆರಾಂ, ಹ್ಯಾ ಸಂಸಾರಾಂತ್ಲ್ಯಾ ಖಂಯ್ಚಾಯ್ ಕವಿ ವರ್ವಿಂ ವರ್ಣುಂಕ್ ಆಸಾದ್ಯ್.
ಆಶೋಕಾ ವಿಶ್ಯಾಂತ್ ಚಿಂತ್ಲ್ಲೆಂ ಇತ್ಲೆಂಚ್, ಜರಿ ತರಿ ತಾಣೆ ತಾಚ್ಯಾ ಶಿಕ್ಪಾ ವಿಶ್ಯಾಂತ್ ಚಿಂತ್ಲ್ಲೆಂ, ವಿಶ್ವವಿದ್ಯಾಲಯಾಚೆಂ ಪ್ರಥಮ್ ರೇಂಕ್ ತಾಕಾ ಮೆಳ್ತೆಂ ಆಸ್ಲ್ಲೆಂ.
ಹ್ಯಾ ಚಿಂತ್ನಾಂ ಸಂಗಿಂ ಹಾಸೊ ತಾಚ್ಯಾ ವೊಂಟಾರ್ ಉದೆವ್ನ್ ಪಾಶಾರ್ ಜಾಲ್ಯೊ. ಆಶೋಕಾ ತಸಲೊ ಪತಿ ತಾಕಾ ರಾಕೊನ್ ಆಸ್ತಾನಾ ರೇಂಕಾಚಿ ಅವಶ್ಯಕತಾ ತರ್ಯ್ ತಾಕಾ ಕಸಲಿ?
"ಶೀಲಾ ಆನಿಕ್ಯ್ ಜಾವ್ನಾ ತುಜೆಂ? ವೇಳ್ ಜಾಲೊ. ಯಾ ಆಮಿ.....?"
ಅಪ್ಲ್ಯಾ ಕಲ್ಪನಾ ಲೊಕಾಂತ್ಲೆಂ ಜಾಗೆಂ ಜಲೆಂ ಶೀಲಾ ಬಾಪಾಚೊ ತಾಳೊ ಆಯ್ಕೊನ್.
ಆಶೋಕಾಕ್ ಸ್ವಾಗತ್ಸುಂಚಾ ಖಾತಿರ್ ವಿಮಾನ್ ನಿಲ್ದಾಣಾಕ್ ವಚೊಂಕ್, ಡೊನಾಬ್ ಎದೊಳ್ಚ್ ತಯಾರ್ ಜಾವ್ನ್ ಭಾಯ್ರ್ ರಾಕ್ತಲೊ.
ಪೂಣ್ ಶೀಲಾಚಿ ತಯಾರಿ ಮಾತ್ರ್ ವೆಗ್ಗಿಂಚ್ಯಾಕ್ ಮುಗ್ದೊಂಚಾ ಪರಿಂ ನಾತ್ಲ್ಲಿ. ಆಪ್ಣಾಚಿ ಕೂಡ್ ಶೃಂಗಾರಾಯಿಲ್ಲಿ ತಿತ್ಲಿ ತಾಚ್ಯಾ ಮತಿಕ್ ತೃಪ್ತಿ ನಾತ್ಲ್ಲಿ.
ಸೊಭಾಯೆನ್ ಶೀಲಾ ಕಾಂಯ್ಚ್ ಉಣೆ ನಾತ್ಲ್ಲೆಂ.
ತರ್ಯ್ ತಾಕಾ ದುಬಾವ್.
ಅಮೇರಿಕಾ ಥಾವ್ನ್ ಯೆಂವ್ಚಾ ಆಶೋಕಾಚೆಂ ಚಿಂತಾಪ್ ಕಸಲೆಂ.....? ಅಭಿರುಚಿ ಕಸಲಿ....?
"ಶೀಲಾ....!" ದುಸ್ರ್ಯಾ ಪಾವ್ಟಿಂ ಆಪಯ್ಲೆಂ ಬಾಪಾಯ್ನ್.
"ಆಯ್ಲಿಂ ಪಪ್ಪಾ....!" ಚಿಂತ್ನಾಂಕ್ ಏಕ್ ಮಿನುಟ್ ಪೂರ್ಣ್ ವಿರಾಮ್ ಘಾಲ್ನ್ ಶೀಲಾ ಕುಡಾ ಭಾಯ್ರ್ ಆಯ್ಲೆಂ.
ಸೊಭಾಯೆಚಿ ಮೂರ್ತಿ ತಶೆಂ ರಾವ್ಲ್ಲ್ಯಾ ಶೀಲಾಕ್ ಸಂಗಿಂ ಆಶೋಕಾಕ್ ನಿಯಾಳ್ನ್, ಏಕ್ ತೃಪ್ತೆಚೊ ಹಾಸೊ ಡೊನಾಬಾಚಾ ಮುಖಮಳಾರ್ ಉದೆಲೊ.
ತೊ ಭಾಯ್ರ್ ಕಾರಾ ಲಾಗಿಂ ವೆತಾನಾ, ಆಪ್ಲ್ಯಾ ಆವಯ್ಕ್ ಕಳಾವ್ನ್ ಶೀಲಾನ್ಯ್ ಬಾಪಾಯ್ಚೊ ಪಾಟ್ಲಾವ್ ಕೆಲೊ.
ಶೀಲಾಚಿ ಆವಯ್ ಆಶೋಕಾಚಾ ಯೆಣ್ಯಾಕ್ ಸಂಭ್ರಮಾಚೊ ಸ್ವಾಗತ್ ಕರ್ಚಾರ್ ಪಡ್ಲ್ಲಿ. ಸರ್ವ್ ತಯಾರಿ ಎದೊಳ್ಚ್ ಸಂಪ್ಲ್ಲಿ ತರ್ಯ್ ತಿಕಾ ಕಿತೆಂ ನಾ ಕಿತೆಂ ಉಣೆ ದಿಸ್ತಾಲೆಂ. ಆನಿ ತೆಂ ಭರ್ತಿ ಕರುಂಕ್ ಹರ್ ಪ್ರಯ್ತ್ನ್ ಕರ್ತಾಲಿ. ಹ್ಯಾ ಖಾತಿರ್ಚ್ ವಿಮಾನ್ ನಿಲ್ದಾನಾಕ್ ವೆಚಾ ಬದ್ಲಾಕ್ ತಿ ಘರಾ ರಾವ್ಲ್ಲಿ.
ಮುಂಬಯಿ ಪಾವ್ಲ್ಲ್ಯಾ ಆಶೋಕಾಚೆಂ ಟೆಲಿಗ್ರಾಮ್ ತಾಂಕಾಂ ಆಯಿಲ್ಲೆಂ. ಎದೊಳ್ಚ್ ಮಂಗ್ಳುರ್ಚಾ ವಾಟೆರ್ ತೊ ಆಸ್ಲ್ಲೊ. ಥೊಡ್ಯಾಚ್ ವರಾಂ ಭಿತರ್ ತಿಚ್ಯಾ ಘರ್ಚಾ ದಾರಾರ್ ರೊ ಉಭೊ ಆಸ್ತಲೊ.
ವೊಣ್ತಿರ್ ಸೊಭ್ಚಾ ಆಶೋಕಾಚಾ ತಸ್ವೀರೆರ್ ಏಕ್ ದೀಷ್ಟ್ ಘಾಲ್ನ್ ತಿ ಆಪ್ಲ್ಯಾ ವಾವ್ರಾಕ್ ಲಾಗ್ಲಿ.
ಹೆಣೆಂ ಕಾರಾರ್ ಬಾಪಾ ಸಂಗಿಂ ಬಸ್ಲ್ಲೆಂ ಶೀಲಾಯ್ ಆಶೋಕಾ ವಿಶ್ಯಾಂತ್ಚ್ ನಿಯಾಳ್ತಾಲೆಂ.
ಸತ್ರಾ ವರ್ಸಾಂಚೆ ತೆಂ. ತ್ಯಾ ದೀಸ್ ಆಶೋಕ್ ಅಮೇರಿಕಾಕ್ ವೆತಾನಾ.....
ಆಯ್ಚೆಪರಿಂಚ್ ತ್ಯಾ ದಿಸಾಯ್ ತೆಂ ವಿಮಾನ್ ನಿಲ್ದಾಣಾಕ್ ಪಯ್ಣ್ ಕರ್ತಾಲೆಂ.
ಪುಣ್ ಥೊಡೊ ವ್ಯತ್ಯಾಸ್. ತ್ಯಾ ದಿಸಾ ಸಾಂಗಾತಾ ಆಶೋಕ್ ಆಸ್ಲ್ಲೊ. ಆಜ್ ತೊ ನಾತ್ಲ್ಲೊ.
ತ್ಯಾ ದಿಸಾ ಶೀಲಾಚೆಂ ಕಾಳಿಜ್ ವೆಗ್ಳಾಚಾರಾನ್ ಜಡ್ ಜಾಲ್ಲೆಂ.
ಆಜ್ ಆಶೋಕಾಚಾ ಯೆಣ್ಯಾಕ್ ತಾಚೆಂ ಕಾಳಿಜ್ ವೆಗ್ಳಾಚಾರಾನ್ ಜಡ್ ಜಾಲ್ಲೆಂ.
ಅಮೇರಿಕಾ ಥಾವ್ನ್ ಸೊಭಿತ್ ಏಕ್ ವಸ್ತ್ ಹಾಡ್ತಾಂ ಮ್ಹಣ್ ಭಾಸಾವ್ನ್, ತಾಚ್ಯಾ ಪೊಲ್ಯಾಕ್ ಏಕ್ ಚಿಮ್ಟೊ ಕಾಡುನ್ ವಿಮಾನ್ ಚಡ್ಲ್ಲೊ ಆಶೋಕ್ ತ್ಯಾ ಎಕಾ ದಿಸಾ.
ಹೆಂ ಚಿಂತಾನಾ ಶೀಲಾಚೊ ಹಾತ್ ತಾಕಾಚ್ ಕಳಿತ್ ನಾತ್ಲೆಲ್ಯಾ ಪರಿಂ ತಾಚ್ಯಾ ಪೊಲ್ಯಾರ್ ಚರ್ಲೊ.
ಮುಖಮಳ್ ಮಧುರ್ ಚಿಂತ್ನಾಂನಿ ತಾಂಬ್ಶೆಲೆಂ.
ಭುರ್ಗ್ಯಾಪಣಾಚಾ ಸುಖಾಕ್ ಪಾಟ್ ಕರುನ್ ತರ್ನಾಟ್ಪಣಾಚಾ ಸುಖಾಕ್ ಸ್ವಾಗತ್ ಕರ್ಚಾ ವೆಳಿಂ ಶೀಲಾಚಿ ಮತ್ ಆಶೋಕಾ ತೆವ್ಶಿನ್ ವೊಡ್ಲ್ಲಿ. ತಾಚೆಂ ರೂಪ್ ಶೀಲಾನ್ ಆಪ್ಲ್ಯಾ ಮತಿಂತ್ ಕಾಂತಯಿಲ್ಲೆಂ.
ತರ್ಯ್ ಆಶೋಕಾಕ್ ಹೆಂ ಕಳಂವ್ಚೊ ಸಂದರ್ಭ್ ತಾಕಾ ಮೆಳೊಂಕ್ ನಾತ್ಲ್ಲೊ. ಆನಿ ಸಾಂಗ್ಚಿ ಗರ್ಜ್ಯ್ ತಾಕಾ ದಿಸೊಂಕ್ ನಾತ್ಲ್ಲಿ.
ಕಿತ್ಯಾಕ್, ತಾಚ್ಯಾ ಆವಯ್-ಬಾಪಾಯ್ಚಿ ಎಕ್ಚ್ ಆಶಾ ತಿಚ್ ಜಾವ್ನಾಸಾ ಮ್ಹಣ್ ತಾಕಾ ಕೊಣೆಂಯ್ ಸಾಂಗ್ಚಿ ಗರ್ಜ್ ನಾತ್ಲ್ಲಿ.
ಅಮೇರಿಕಾ ಥಾವ್ನ್ ತಾಣೆ ಯೆಂವ್ಚ್ಯಾಕ್ಚ್ ತಿಂ ರಾಕ್ತಾಲಿಂ ಮ್ಹಳ್ಳೆಂ ತಾಕಾ ಎದೊಳ್ಚ್ ಕಳಿತ್ ಜಾಲ್ಲೆಂ.
ಪುಣ್ ಆಶೋಕ್?
ಲ್ಹಾನ್ ಆಸ್ತಾನಾ ಕಶೆಂ ತಾಚ್ಯೆ ಸಂಗಿಂ ಸಳ್ಗೆನ್ ಆಸ್ಲ್ಲೊ ತಶೆಂಚ್ ತೆಂ ವ್ಹಡ್ ಜಾತಾನಾಯ್ ಆಸ್ಲ್ಲೊ. ತಾಚ್ಯಾ ನಡ್ತ್ಯಾಂತ್ ಕಸಲೆಂಯ್ ಬದ್ಲಾಪ್ ನಾತ್ಲ್ಲೆಂ.
ತರ್ಯ್ ದುಬಾವಾಕ್ ಇಡೆಂ ನಾತ್ಲ್ಲೆಂ.
ಪಯ್ಲೆ ಪಾವ್ಟಿಂ ತಾಕಾ ಸೊಡ್ನ್ ಮದ್ರಾಸ್ ಎಮ್.ಇ. ಕರುಂಕ್ ವೆತಾನಾ, ಶೀಲಾಕ್ ಪೊಟ್ಲುನ್ ಧರುನ್ ತೊ ರಡ್ಲ್ಲೊ.
ಥಂಯ್ ಥಾವ್ನ್ ವರ್ಸಾಕ್ ಏಕ್ ಪಾವ್ಟಿಂ ಗಾಂವಾಂಕ್ ಯೆತಾನಾ ಶೀಲಾ ಖಾತಿರ್ ತಾಣೆ ಹಾಡ್ಚ್ಯಾ ವಸ್ತುಂಕ್ ಲೇಕ್ಚ್ ನಾತ್ಲ್ಲೆಂ.
ಡೊನಾಬಾಕ್ ಮಯ್ನ್ಯಾಕ್ ಏಕ್ ಚೀಟ್ ಯೆತಾನಾ, ಶೀಲಾಕ್ ಹಪ್ತ್ಯಾಕ್ ಏಕ್ ಚೀಟ್ ಸರಾಗ್ ಯೆತಾಲಿ.
ತೊ ಘರಾ ಆಸ್ತಾನಾ ಶೀಲಾನ್ ಏಕ್ ಘಡಿ ಲೆಗುನ್ ತಾಚ್ಯಾ ದೊಳ್ಯಾಂ ಮುಖ್ಲೆಂ ಚುಖೊಂಕ್ ನಜೊ ಆಸ್ಲ್ಲೆಂ.
ಅಮೇರಿಕಾ ಥಾವ್ನ್ ಜಾಲ್ಯಾರ್ಯ್ ಮಯ್ನ್ಯಾಕ್ ಏಕ್ ಆಶೋಕಾಚಿ ಚೀಟ್ ಖುಶಾಲಾಯೆಚೊ ಫಳಾರ್ ಘೆವ್ನ್ ತಾಕಾ ಯೆತಾಲಿ.
ಚಿಂತ್ನಾಂಚಾ ವಿಶಾಲ್ ಸಂಸಾರಾಂತ್ ಆಸ್ಲ್ಲ್ಯಾ ಧುವೆಕ್ ದೆಖ್ಲೆಂ ಡೊನಾಬಾನ್.
ಶೀಲಾಪರಿಂ ತಾಚಿ ಮತ್ಯ್ ನಿಯಾಳ್ತಾಲಿ ಆಶೋಕಾಕ್ಚ್.
ಆವಯ್ ಬಾಪಯ್ ದೊಗಾಂಯ್ ಸರ್ಲ್ಲ್ಯಾ ವೆಳಾರ್ ಆನಾಥ್ ಜಾಲ್ಲ್ಯಾ ಆಟ್ ವರ್ಸಾಮ್ಚಾ ಆಶೋಕಾಕ್, ಸರ್ವ್ ತಾಚ್ಯಾ ಕುಟ್ಮಾಚ್ಯಾಂನಿ ಸಾಡ್ಲ್ಲ್ಯಾ ವೆಳಾರ್, ಆಪ್ಲ್ಯಾ ಘರಾ ಹಾಡ್ಲ್ಲೊ ಡೊನಾಬಾನ್.
ಚೆರ್ಕ್ಯಾಂಕ್ ಆಶೆಂವ್ಚಾ ತಾಂಕಾ ಕಾಜಾರ್ ಜಾವ್ನ್ ಸಭಾರ್ ವರ್ಸಾಂ ಜಾಲ್ಯಾರ್ಯ್ ದೆವಾನ್ ದಿಲ್ಲೆಂ ಏಕ್ ಮಾತ್ರ್ ಫಳ್ ಶೀಲಾ.
ತಶೆಂ ಜಾವ್ನ್ ಸೆಜಾರಾ ಆಸ್ಲ್ಲೊ ಆಶೋಕ್ ತಾಂಕಾಂ ಮೊಗಾಚೊ ಜಾಲ್ಲೊ.
ಆನಿ ಆತಾಂ ಆನಾಥ್ ಜಾಲ್ಲೊ ತೊ ಅತ್ಯಂತ್ ಮೊಗಾಚೊ ಜಾಂವ್ಚ್ಯಾಂತ್ ನವಾಲ್ ನಾ.
ವರ್ಸಾಚಾ ಶೀಲಾ ಸಂಗಿಂ, ಆಟ್ ವರ್ಸಾಂಚೊ ಆಶೋಕ್ ಕಸಲ್ಯಾಚ್ ಆಭಾವ್ ನಾಸ್ತಾನಾ ವರ್ತ್ಯಾ ಮರ್ಜೆನ್ ವಾಡ್ಲೊ.
ಮಂಗ್ಳುರಾಂತ್ ಬಿ.ಇ. ಜಾಲೆಂ. ಮದ್ರಾಸಾಂತ್ ಎಮ್.ಇ. ಜಾಲೆಂ. ಬುದ್ವಂತ್ಕಾಯೆಂತ್ ಊಂಚ್ಲ್ಯಾ ಪಾಂವ್ಡ್ಯಾರ್ ಆಸ್ಲ್ಲ್ಯಾ ತಾಕಾ ಅಮೇರಿಕಾ ವಚೊಂಕ್ ಕಾಂಯ್ ತೊಂದ್ರೆ ಜಾಲೆ ನಾಂತ್.
ಥಂಯ್ಚರ್ಯ್ ವರ್ತೆಂ ನಾಂವ್ ತಾಣೆ ಜೊಡ್ಲೆಂ. ಎಕಾಚ್ ಮಹಿನ್ಯಾ ಅದಿಂ ತಾಚಿ ಚೀಟ್ ಆಯಿಲ್ಲಿ.
ಪರೀಕ್ಶಾ ಜಾಲ್ಲ್ಯಾ ಫರಾ ಗಾಂವಾಕ್ ಯೆತಾಂ ಮ್ಹಣೊನ್ ಆಶೋಕಾನ್ ಬರಯಿಲ್ಲೆಂ.
ಹ್ಯಾ ಅವ್ದೆಂತ್ ತಾಕಾ ಫಾವೊತೆಂ ಕಾಮ್ ಸೊಧುನ್ ತಯಾರ್ ಕರುನ್ ದವರ್ಲ್ಲೆಂ ಡೊನಾಬಾನ್.
ಸಬಾರ್ ವರ್ಸಾಂಚಿ ಡೊನಾಬಾಚಿ ಆಶಾ, ಆಶೋಕಾಕ್ ಘರ್ ಜಾಂವಯ್ ಕರ್ಚಿ, ಆತಾಂ ಸುಫಳ್ ಜಾಂವ್ಚ್ಯಾ ಗಡಿರ್ ಪಾವ್ಲ್ಲಿ.
ತಾಚೆಂ ಮನ್ಯ್ ಅವ್ಯಕ್ತ್ ಸಂತೊಸಾಚಾ ಉಮಾಳ್ಯಾನ್ ಭರ್ಲ್ಲೆಂ.
ಕಾರ್ ವಿಮಾನ್ ನಿಲ್ದಾಣಾಕ್ ಪಾವ್ತಾನಾ ಬಾಪಯ್ ಧುವ್ ದೊಗಾಂಯ್ ಆಪಾಪ್ಲ್ಯಾ ಚಿಂತ್ನಾಂತ್ಲಿಂ ಜಾಗಿಂ ಜಾಲಿಂ.
ಆಶೋಕಾಕ್ ಸಂಭ್ರಮಾಚೊ ಸ್ವಾಗತ್ ಕರ್ಚಾ ಖಾತಿರ್ ತಾಚೆ ಈಷ್ಟ್ ಎದೊಳ್ಚ್ ತಯಾರ್ ಜಾಲ್ಲೆ.
ತಾಂಚೆ ಸಂಗಿಂ ಶೀಲಾ ಆನಿ ಡೊನಾಬ್ ಹಾತಿಂ ಫುಲಾಂಚೊ ಝೆಲೊ ಆನಿ ಮತಿಂ ಚಿಂತ್ನಾಂಚೊ ಹಾರ್ ಘೆವ್ನ್ ಉಭಿಂ ಜಾಲಿಂ.
ತಾಂಕಾಂ ಚಡ್ ವೇಳ್ ರಾಅಕೊಂಕ್ ಕರುಂಕ್ ನಜೊ ಮ್ಹಳ್ಳ್ಯಾ ಖಾತಿರ್ ಜಾವ್ಯೆತ್ ವಿಮಾನ್ ಆಶೋಕಾಕ್ ಘೆವ್ನ್ ಥಳಾರ್ ಉಭೆಂ ಜಾಲೆಂ.
ಎಕಾ ಪಾಟ್ಲ್ಯಾನ್ ಎಕ್ಲೊ ಸವ್ಕಾಸ್ ದೆಂವಾಲಾಗ್ಲೊ.
ತಾಂಚೆ ಸಾಂಗಾತಾ ಆಶೋಕ್ ದೆಂವ್ಚೊ ಸರ್ವಾಂನಿ ಪಳಯ್ಲೆಂ.
ಆಶೋಕಾಚಿ ಸರ್ವ್ ಸೊಭಾಯ್ ಆಪ್ಲ್ಯಾ ದೋನ್ ದೊಳ್ಯಾಂನಿ ಅಟಾಪುಂಕ್ ಕಶ್ಟ್ ಮಾರ್ಲೆ ಶೀಲಾಕ್. ತರ್ಯ್ ಆಶೋಕಾ ವಯ್ಲಿ ದೀಶ್ಟ್ ತಾನೆ ಬದ್ಲಿಲಿ ನಾ.
ತಿತ್ಲ್ಯಾರ್ ವಿದೇಶಿ ಚಲ್ಯೆಚಾ ಎಕಾ ಖಾಂದಾರ್ ಹಾತ್ ಘಾಲ್ನ್ ಆಶೋಕ್ ಶೀಲಾ ಆನಿ ಡೊನಾಬಾ ಮುಕಾರ್ ಉಭೊ ಜಾಲೊ.
ಕುತೂಹಲಾನ್ ವೊಮ್ತೊಂಚಾ ತಾಣಿಂ ಕಿತೆಂಯ್ ಉಲಂವ್ಚಾ ಆದಿಂ ಆಶೋಕಾನ್ಚ್ ಉಲವ್ಣ್ಯಾಕ್ ಬುನ್ಯಾದ್ ಘಾಲಿ.
"ಗುಡ್ ಈವ್ನಿಂಗ್ ಅಂಕಲ್. ಹೆಂ ಮರಿಯಾ ನ್ಯೂಲೆಂಡ್. ಮ್ಹಜಿ ಹೊಕಾಲ್. ಆಮ್ಚೆಂ ರಿಜಿಸ್ತ್ರಿ ಕಾಜಾರ್ ಎಕಾ ಹಪ್ತ್ಯಾ ಆಧಿಂ ಅಮೇರಿಕಾಂತ್ ಜಾಲೆಂ. ರೆಸ್ಪೆರ್ ಗಾಂವಾಂತ್ ತುಮ್ಚೆ ಹುಜಿರ್ ಜಾಂವ್ಚೆಂ ಮ್ಹಣ್ ಪಾಟಿಂ ದವರ್ಲೆಂ. ಆನಿ ಮರಿಯಾ ಹೊ ಮ್ಹಜೊ ಅಂಕಲ್......"
ಆಶೋಕ್ ಸಾಂಗಾತ್ತ್ ವೆತಾಲೊ. ಹಾಚೆಂ ಗುಮಾನ್ ಕರಿನಾಸ್ತಾನಾ ಹಾತಾಂತ್ ಜಡ್ ಜಾಂವ್ಚೊ ಝೆಲೊ ಡೊನಾಬಾನ್ ಆಶೋಕಾಚಾ ಗಳ್ಯಾಂತ್ ಘಾಲೊ.
ಸಕಯ್ಲ್ ಗಳೊಂಕ್ ತಯಾರ್ ಜಾಲ್ಲ್ಯಾ ಝೆಲ್ಯಾಕ್ ಆನ್ ಆಪ್ಣಾಕ್ಚ್ ಏಕ್ ಘಡಿ ಸಾಂಬಾಳುನ್, ಹಾತಾಂತ್ಲೊ ಝೆಲೊ ಮರಿಯಾಚಾ ಗಳ್ಯಾಂತ್ ಘಾಲೊ ಶೀಲಾನ್ ಸರ್ವ್ ಆಪ್ಲ್ಯಾ ಸಪ್ಣಾಂ ಆನಿ ರಾವ್ಳೆರಾ ಸಂಗಿಂ.
ಸ್ವಾಗತಾಚೊ ಸರ್ವ್ ಸಂಭ್ರಮ್ ಜಾವ್ನ್ ಪಾಟಿಂ ಘರಾ ವೆತಾನಾ ಚಿಂತಾಲೆಂ ಶೀಲಾ.......
"ಆಶೋಕಾನ್ ಹಾಡ್ತಾಂ ಮ್ಹಣ್ ಭಾಸಾಯಿಲ್ಲಿ ವಸ್ತ್ ಮರಿಯಾಚ್ ಜಾವ್ಯೆತ್....?"
ಶೀಲಾಚ್ಯಾ ಸಪ್ಣಾಂತ್ಲೊ ರಾಯ್ ಆಯಿಲ್ಲೊ.
ಪುಣ್ ಎಕ್ಸುರೊ ನ್ಹಂಯ್.... ಬಗಾರ್ ಸಂಗಿಂ ತಾಚ್ಯಾ ರಾಣ್ಯೆಕ್ ಘೆವ್ನ್!
*************
About us | Feedback | Contact us
Copyright © 2005
DAAIZ.COM All rights reserved.
Page concept, designed and maintained by Ashawadi
Publications
