ವಾವ್ರ್,

ಕೊಂಕ್ಣೆಚಾ ವಿಂಚ್ಣಾರ್ ಸಾಹಿತ್ಯಾಚೊ ಕೊನ್ಸೊ - ’ದಾಯ್ಜ್’ - ಫಕತ್ತ್ ಕೊಂಕಣಿ ಥಾವ್ನ್ ಕೊಂಕಣಿ ಪರ್‍ಯಾಂತ್, ಕೊಂಕಣಿ ಖಾತಿರ್.

"ಆಮ್ಚಾ ಜಿಣ್ಯೆಂತ್ ಚಡ್ತಾವ್ ಜಾವ್ನ್ ಆಮಿ ಹೆರಾಂಚಿ ಜಿಣಿ ಜಿಯೆಂವ್ಕ್ ವಚೊನ್ ತಾಂತುಂ ಆಮ್ಕಾಂ ಲಾಭ್ಚಿ ಸಲ್ವಣ್ ಘೆಂವ್ಚಿ ಸಕತ್ ನಾಸ್ಚಿಚ್ ವ್ಹಡ್ಲೆಂ ಅಸಮಧಾನ್."

ಕೊಂಕ್ಣಿ ವಾವ್ರ್, ವಾವ್ರಾಡಿ ಆನಿ ಮಾನ್

ವರಸ್ : 2006

ಅಂಕೊ : 21

ಮಯ್ನೊ : ಮಾರ್ಚ್

ಸಂಪಾದಕೀಯ್ - 21.

ವಲ್ಲಿ ಕ್ವಾಡ್ರಸ್

2004 ಇಸ್ವೆಚಾ ದುಸ್ರ್ಯಾ ಕೊಂಕ್ಣಿ ಅಭಿಯಾನ್ ಸಮಿತಿಚಾ ವೆಳಾರ್ ಹಾವೆಂ ಬರಯಿಲ್ಲ್ಯಾ "ಆಮಿ ಸೆವಾ ಕರ್ಚಿ ನಾಕಾ, ಬಗಾರ್ ವಾವ್ರ್ ಕರ್‍ಯಾಂ"; ಮ್ಹಳ್ಳ್ಯಾ ಉತ್ರಾಂಚೆರ್ ಮ್ಹಜಾ ಥೊಡ್ಯಾ ಮಿತ್ರಾಂನಿ ಮ್ಹಾಕಾ ’ಸೆವಾ ಆನಿ ವಾವ್ರ್’ ಹಾಚೆಮಧ್ಲೊ ತಫಾವತ್ ವಿಚಾರ್‌ಲ್ಲೊ. ತಾಂಕಾಂ ಹಾವೆಂ ಜಾಪ್‌ಯ್ ಅಶಿ ದಿಲ್ಲಿ;

"ಸೆವಾ ಕರ್ಚಿ ಪಿಡೆಸ್ತಾಂಚಿ, ಆರ್ ಮಾರ್‌ಲ್ಲ್ಯಾಂಚಿ, ಪೆಂಕಾಡ್ ಮೊಡ್‌ಲ್ಲ್ಯಾಂಚಿ, ಹಾತ್ ಪಾಂಯ್ ನಾತ್‌ಲ್ಲ್ಯಾಂಚಿ ವಾ ಪ್ರಾಯ್ವಂತಾಂಚಿ. ಪುಣ್ ಕೊಂಕ್ಣಿ ಭಾಸೆಕ್ ತಿ ಪರಿಗತ್ ಎದೊಳ್ ಪರ್‍ಯಾಂತ್ ಯೇಂವ್ಕ್ ನಾ ದೆಖುನ್ ಆಮಿಂ ಕೊಂಕ್ಣೆಚಿ ಸೆವಾ ಕರ್ಚಿ ಗರ್ಜ್ ನಾ, ಬಗಾರ್ ವಾವ್ರ್ ಮಾತ್ರ್ ಕರುಂಕ್ ಜಾಯ್".

ಎಕಾ ವರ್ಸಾಧಿಂ ’ದಾಯ್ಜ್ ಸಾಹಿತಿಕ್ ಸ್ಪರ್ಧೊ 2004’ ಆಸಾ ಕೆಲ್ಲೊ ಆನಿ ಹ್ಯಾ ಪಾವ್ಟಿಂಚಾ ’ದಾಯ್ಜ್ ಸಾಹಿತಿಕ್ ಸ್ಪರ್ಧೊ 2005’ ಹಾಂತುಂ ಆಮಿಂ ಏಕ್ ನವೊ ಪುರಸ್ಕಾರ್ ಆಸಾ ಕರುಂಕ್ ನಮ್ಯಾರ್‌ಲ್ಲೊ, ’ದಾಯ್ಜ್ ಕೊಂಕ್ಣಿ ವಾವ್ರಾಡಿ 2005’ - ಫಕತ್ತ್ ಯುವ ವಾವ್ರಾಡ್ಯಾಂಕ್ ಆಸಾ ಕೆಲ್ಲ್ಯಾ ಹ್ಯಾ ಪ್ರಶಸ್ತೆಕ್ ಯೋಗ್ಯ್ ಜಾಲ್ಲ್ಯಾಂಚಿ ನಾಂವಾಂ ಧಾಡುಂಕ್ ಆಮಿಂ ಇಸ್ತಿಹಾರಾಂ ಛಾಪ್‌ಲ್ಲಿಂ. ಆತಾಂ ಆಮ್ಕಾಂ ಸ್ಪರ್ಧ್ಯಾಕ್ ಆಯಿಲ್ಲಿಂ ಬರ್ಪಾಂ ಕಾಂಯ್ ಸಾಠ್-ಸತ್ತರಾಂಕ್ ಮಿಕ್ವತಿತ್ ತರ್‌ಯೀ ’ದಾಯ್ಜ್ ಕೊಂಕ್ಣಿ ವಾವ್ರಾಡಿ 2005’ ಪ್ರಶಸ್ತೆಕ್ ಯೋಗ್ಯ್ ಜಾಲ್ಲೆ ಮ್ಹಣ್ ನಾಂವಾಂ ಧಾಡ್‌ಲ್ಲಿಂ ಫಕತ್ತ್ ದೊಗಾಂನಿ ಮಾತ್ರ್.

ಅಶೆಂ ಕಿತ್ಯಾಕ್?

ಆಮ್ಚಾ ಕೊಂಕ್ಣಿ ಸಮಾಜೆಂತ್ ವಾವ್ರ್ ಕರ್ಚೆ ಕೊಣ್ಂಚ್ ನಾಂತ್? ವಾ ತಾಣಿಂ ಕರ್ಚಾ ವಾವ್ರಾವಿಶಿಂ ಕೊಣಾಕ್‌ಚ್ ಪಡೊನ್ ಗೆಲ್ಲೆಂ ನಾ?

ಭಾರಿಚ್ ದುರ್ಬಾಗ್ಪಣಾಚೆಂ ಚಿಂತಾಪ್ ಹೆಂ. ಆಮ್ಚಾ ಕೊಂಕ್ಣೆಂತ್ ಇತ್ಲ್ಯಾ ಹುಮೆದಿನ್ ವಾವ್ರ್ ಕರ್ಚಾ ಉರ್ಭೇಸ್ತ್ ತರ್ನಾಟ್ಯಾಂಕ್ ಪಾಟಿಂಬೊ ದಿಲೊ ತರ್ ಖಂಡಿತ್ ಜಾವ್ನ್ ತಾಂಚಾ ತ್ರಾಣಾಕ್ ಚಾರ್ ಪಾಕಾಟೆ ಫುಟ್ಚೆಂ ಖಂಡಿತ್, ಆನಿ ಅಸಲ್ಯಾ ಮಾನಾಖಾತಿರ್ ಯಾ ಪುರಸ್ಕಾರಾಖಾತಿರ್ ತಾಣಿಂ ವಾವ್ರ್ ಕರ್ಚೊ ನ್ಹಯ್ ತರ್‌ಯ್ ತಾಂಕಾಂ ವಳ್ಕೊಂಚೆಂ ಆನಿ ಮಾನ್ ದಿಂವ್ಚೆಂ ಕಾಮ್ ಕೊಣಾಚೆಂ?

ಭೋವ್ ಲಜೆಚಿ ಗಜಾಲ್ (ಲಜ್ ಮ್ಹಳ್ಳಿ ಆಸ್ಲ್ಯಾರ್).

ಆತಾಂ ದಾಯ್ಜಿದುಭಾಯ್ ಸಾಂಗಾತ್ಯಾಂನಿ ’ಡಯಾನ್ ಡಿ’ಸೋಜ್’ ಹಾಕಾ ’ದಾಯ್ಜಿ ವಾವ್ರಾಡಿ’ ಪುರಸ್ಕಾರ್ ಘೋಷಿತ್ ಕೆಲಾ, ’ದಾಯ್ಜಿ ಸಾಹಿತಿಕ್ ಪುರಸ್ಕಾರ್ 2005’ ಘೋಷಿತ್ ಹಾವ್ನ್ ಮಯ್ನೆ ಸಂಪ್ತಾನಾ ಆತಾಂ ಎಕ್‌ಚ್ ಪಾವ್ಟಿಂ ’ದಾಯ್ಜಿ ವಾವ್ರಾಡಿ’ ಪುರಸ್ಕಾರಾಚೊ ಆಂವ್ಸರ್ ಖಂಯ್ ಥಾವ್ನ್, ಕಸೊ, ಕಿತ್ಯಾಕ್ ಉದೆಲೊ ಮ್ಹಳ್ಳೆಂ ಹಾಂಗಾಸರ್ ಉಲಯ್ನಾಸ್ತಾಂ ರಾವ್ಲ್ಯಾಂವ್ ತರ್, ಹ್ಯಾ ಪುರಸ್ಕಾರಾಕ್ ಖಂಡಿತ್ ಜಾವ್ನ್ ’ಡಯಾನ್ ಡಿಸೋಜ್’ ಫಾವೊ ಜಾಲ್ಲೊ ವ್ಯಕ್ತಿ ಮ್ಹಳ್ಳ್ಯಾಂತ್ ಕಾಂಯ್ ದುಭಾವ್ ನಾ.

ಸಂಘಟನ್ ಜಾಂವ್, ಕಾರ್‍ಯಿಂ ಜಾಂವ್, ಚಟುವಟಿಕೊ ಜಾಂವ್ ವ ಕಸಲೊಯ್ ವಾವ್ರ್ ತೊ ಪ್ರಾಮಾಣಿಕ್ ರಿತಿನ್ ಕರ್ಚಾಂತ್ ಡಯಾನ್ ಡಿ’ಸೋಜಾನ್ ಎದೊಳ್‌ಚ್ ಅಪ್ಲಿ ಅಸ್ಮಿತಾಯ್ ಧಾಖಯ್ಲ್ಯಾ. ಹೊ ಪುರಸ್ಕಾರ್ ಖರೆಂಪಣಿಂ ತಾಕಾ ಮಾತ್ರ್ ನ್ಹಯ್ ತಾಚಾ ವಾವ್ರಾಕ್ ಕೆಲ್ಲೊ ಮಾನ್, ಆನಿ ತಸಲಿ ಏಕ್ ಸುರ್‍ವಾತ್ ಕೆಲ್ಲ್ಯಾ ದಾಯ್ಜಿದುಭಾಯ್ ಬರವ್ಪ್ಯಾಂಚಾ ಎಕ್ತಾರಾಕ್ ಹಾಂವ್ ಮಾನ್ ಭಾಗಯ್ತಾಂ ತಶೆಂಚ್ ಉಲ್ಲಾಸ್ ಪಾಟಯ್ತಾಂ.

ದೇವ್ ಬರೆಂ ಕರುಂ,
- ವಲ್ಲಿ ಕ್ವಾಡ್ರಸ್

ಆಧ್ಲಿಂ ಸಂಪಾದಕೀಯಾಂ

ಸಂಪಾದಕೀಯ್ ಮಂಡಳಿಕ್

ಪಾಟಿಂ ದಾಯ್ಜ್ ಪಾನಾಕ್

मुक्त उलवप वा सवायेचें (चीप) उलवप?

बिजी आसाय‌गी?

ಕಸ್ಟ್