ಕೊಂಕ್ಣೆಚಾ ವಿಂಚ್ಣಾರ್ ಸಾಹಿತ್ಯಾಚೊ ಕೊನ್ಸೊ - ’ದಾಯ್ಜ್’ - ಫಕತ್ತ್ ಕೊಂಕಣಿ ಥಾವ್ನ್ ಕೊಂಕಣಿ ಪರ್ಯಾಂತ್, ಕೊಂಕಣಿ ಖಾತಿರ್.
’ಜೆದ್ನಾಂ ತುಂ ಹೆರಾಂಚಾ ಬರ್ಯಾಪಣಾವಿಶ್ಯಾಂತ್ ಚಿಂತಾಯ್, ತೆದ್ನಾಂ ತುಜೆಂ ಬರೆಂಪಣ್ ಅಪಾಪಿಂ ಜಾತೆಲೆಂ’ - ಡಯಾನ್ ಡಿ’ಸೋಜ್
ಕೊಂಕ್ಣಿ ಕಾರ್ಭಾರಿ - 12.
ಹೊ ಉತ್ರಾಂನಿ ಸಾದೊ ಪುಣ್ ಅಪ್ಲ್ಯಾ ವಿವಾದಾತ್ಮಕ್ ಉತ್ರಾಂಕ್ ಫಾಮಾದ್, ಕೊಣ್ ಹಾಕಾ ರಾಜಕೀಯ್ ಮುಖೆಲಿ ಮ್ಹಣೊಂದಿ, ವಾ ಹೆರ್ ಕಸ್ಲ್ಯಾಯ್ ನಾಂವಾರ್ ಆಪಂವ್ಚಿ. ಮ್ಹಾಕಾ ಹಾಚೆಂ ವೆಕ್ತಿತ್ವ್ ಕಿತ್ಯಾಕ್ಗೀ ಕಾಸ್ವಾಚಾ ಜಿವಾಪರಿಂ ಭಗ್ತಾ - ಕಾಸೊವಾಚೆಂ ಆಂಗ್ ಭಾಯ್ಲ್ಯಾನ್ ಜಿತ್ಲೆಂ ಘಟ್ಗೀ, ತಿತ್ಲೆಂಚ್ ಭಿತರ್ ಮೋವ್. ಹೊಯೀ ಅಸಲ್ಯಾಚ್ ಸಂಯ್ಬಾಚೊ, ಭಾಯ್ಲ್ಯಾನ್ ಜಿತ್ಲೊ ಕಠೀಣ್ ಆನಿ ವಿವಾದಾತ್ಮಕ್ಗೀ, ಭಿತರ್ಲ್ಯಾನ್ ತಿತ್ಲೊಚ್ಚ್ ಮೊಗಾಳ್, ಮಾಯ್ಪಾಸಿ ಆನಿ ಸದಾಂಚ್ ಗರ್ಜೆಂತ್ ಆಸ್ಚಾ ಹೆರಾಂಚಾ ಮಜತೆಕ್ ಪಯ್ಲೊ ಉಭೊ ಜಾಂವ್ಚೊ ಮುಖೆಲಿ. ಹಾಚೆವಿಶಿಂ ಹಾವೆಂ ಹೆರಾಂ ಥಾವ್ನ್ ಆಯ್ಕಾಲ್ಲೆಂ ಥೊಡೆಂ ತರ್ಯೀ ಸಾಂಗಾಜಯ್ಚ್ ಮ್ಹಣ್ ಮ್ಹಾಕಾ ಭಗ್ತಾ.
ಪಾಸ್ಕಲ್ ಪಿಂಟೊ
ಪುರ್ತೆಂ ನಾಂವ್: ಪಾಸ್ಕಲ್ ಬ್ಯಾಪ್ಟಿಸ್ಟ್ ಪಿಂಟೊ
ಆವಯ್ ಬಾಪಾಯ್ಚೆಂ ನಾಂವ್: ದೆ|ಮೇರಿ ಪಿಂಟೊ ಆನಿ ದೆ|ಬ್ಯಾಪ್ಟಿಸ್ಟ್ ಪಿಂಟೊ
ಜಲ್ಮಾಲ್ಲಿ ತಾರಿಕ್: 23 ಅಗೋಸ್ತ್ 1953
ಜಲ್ಮಾಲ್ಲೊ ಗಾಂವ್: ಬಜ್ಪೆ
ವೆಕ್ತಿತ್ವಾವಿಶಿಂ ಥೊಡೆಂ:
ಪಯ್ಲೆಂ: ಜೆದ್ನಾಂ ಅಪ್ಲಿ ಭಲಾಯ್ಕಿ ಬರಿ ನಾಸ್ತಾಂ ಆಸ್ಪತ್ರೆಚಾ ಖಟ್ಲ್ಯಾರ್ ನಿದೊನ್ ಆಸ್ಚೆ ವೆಳಾರ್, ಹೊ ಅಪ್ಲಿಂ ವಖ್ತಾಂ ಘೆಂವ್ಚಾ ಬದ್ಲಾಕ್ ಬಗ್ಲೆಚ್ಯಾ ಕುಡಾಂತ್ ಆಸ್ಚಾ ಪಿಡೆಸ್ತಾಂಕ್ ಭೆಟೊನ್, ಕೊಣಾಕ್ ತಾಂಚ್ಯಾ ಪಿಡೆಂತ್ ವಖ್ತಾಂ ಮೊಲಾಕ್ ಘೆಂವ್ಕ್ ಸಾಧ್ಯ್ ನಾ ಮ್ಹಳ್ಳೆಂ ಸೊಧುನ್ ವೆತಾ ಆನಿ ತಾಂಚಿ ಮಜತ್ ಕರ್ತಾ.
ದುಸ್ರೆಂ: ಗಲ್ಫಾಂತ್ ಕಾಮ್ ಕರ್ನ್ ಆಪ್ಲ್ಯಾ ಕುಟ್ಮಾಕ್ ಪೊಸ್ಚಿ ಆಶಾ ಘೆವ್ನ್ ಯೇವ್ನ್ ಸಾರ್ಕೊ ಸಾಂಭಾಳ್ ನಾಸ್ತಾಂ, ಪಾಟಿಂ ಆಪ್ಲ್ಯಾ ಮಾಂಯ್ಗಾಂವಾಕ್ ವಚೊಂಕ್ ಸಾಧ್ಯ್ ನಾಸ್ತಾಂ ಆಸ್ಚಾ ಸಭಾರ್ ಘರ್ ಕಾಮೆಲಿಂಕ್ ಪಾಟಿಂ ಘರಾ ಪಾವಂವ್ಚಾಂತ್ ಹಾಣೆಂ ಕೆಲ್ಲೊ ತಶೆಂಚ್ ಕರ್ನ್ ಆಸ್ಚೊ ವಾವ್ರ್ ಭೋವ್ಶಾ ಖಂಚ್ಯಾಯ್ ಪತ್ರಾಂನಿ ವಾ ಸಾಯ್ಟಿಂನಿ ಪರ್ಗಟ್ ಜಾವ್ನಾ.
ತಿಸ್ರೆಂ: ಪರ್ಗಾಂವಾಂತ್ ಗತ್ ಆಧಾರ್ ನಾಸ್ತಾಂ ಮೊರೊನ್ ಪಡ್ಲ್ಲ್ಯಾ ಸಭಾರ್ ಮೊಡ್ಯಾಂಕ್ ಹಾಣೆಂಚ್ ಮುಖೇಲ್ಪಣ್ ಘೆವ್ನ್ ನ್ಹಾಣವ್ನ್, ತ್ಯಾ ಮೊಡ್ಯಾಕ್ ತಾಂಚ್ಯಾ ಗಾಂವಾಕ್ ಪಾಟಿಂ ಧಾಡ್ಚೆಂ ಕಾಮ್ ಕರ್ಚಾ ಭೋವ್ ಥೊಡ್ಯಾಂ ಪಯ್ಕಿಂತ್ ಹೊ ಎಕ್ಲೊ.
ಚೊವ್ತೆಂ: ಪರ್ಗಾಂವಾಂತ್ ಅಪ್ಲೊ ಫುಡಾರ್ ಸೊಧುಂಕ್ ಯೇವ್ನ್ ಫಸ್ಲ್ಲ್ಯಾ ಜಾಯ್ತ್ಯಾ ತರ್ನಾಟ್ಯಾಂಕ್ ಜೊಕ್ತೆಂ ಕಾಮ್ ನಾಸ್ತಾಂ ಬೆಕಾರಿ ಜಾವ್ನ್ ಕಂಗಾಲ್ ಜಾಲ್ಲೆವೆಳಾರ್ ತಾಂಚೆ ಮಜತೆಕ್ ವಚೊನ್ ಹಾಣೆಂ ಕೆಲ್ಲಿಂ ವಾ ಕರ್ನ್ ಆಸ್ಚಿಂ ಕಾಮಾಂ ಪರ್ದ್ಯಾ ಪಾಟ್ಲ್ಯಾನ್.
ಹ್ಯಾ ಮಾನೆಸ್ತಾಚಿ ವಳೊಕ್ ಮ್ಹಾಕಾ ಕರುನ್ ದಿಲ್ಲಿ ದೆ|ಜೊರ್ಜಿ ಪೀಂತ್ ಆಯ್ಕೊಳಾನ್. ತೆದೊಳ್ ಪರ್ಯಾಂತ್ ಹಾಚೆವಿಶಿಂ ಮ್ಹಾಕಾ ಕಿತೆಂಚ್ ಕಳಿತ್ ನಾತ್ಲ್ಲೆಂ, ಕಿತ್ಯಾಕ್ ಕುವೆಯ್ಟಾಕ್ ಹಾಂವ್ ನವೊ ಜಾವ್ನಾಸ್ಲೊಂ. ತೊ ತೆದ್ನಾಂ ಕುವೆಯ್ಟಾಂತ್ಲ್ಯಾ ಪ್ರತಿಷ್ಟಿತ್ ಸಂಸ್ಥೊ ಜಾವ್ನ್ ಆಸ್ಚಾ ’ಕೆ.ಸಿ.ಡಬ್ಲ್ಯೂ.ಎ’ ಚೊ ಸಾರ್ವ್ಜನಿಕ್ ಸಂಪರ್ಕ್ ಅಧಿಕಾರಿ. ಮ್ಹಾಕಾ ಸೊಧುನ್ ಯೇವ್ನ್ ತಾಣೆಂ ಮ್ಹಳ್ಳಿಂ ಉತ್ರಾಂ ಹಿಂ "ಆಮ್ಚಾ ’ಕೆ.ಸಿ.ಡಬ್ಲ್ಯೂ.ಎ’ಕ್ ತುಜೆ ತಸ್ಲೆ ನಿಸ್ವಾರ್ಥಿ ಯುವ ಕೊಂಕ್ಣಿ ಮುಖೆಲಿ ಭೋವ್ ಗರ್ಜೆಚೆ. ದೆಕುನ್ ತುವೆಂ ಸಾಂದೊ ಜಾಯ್ಜಯ್ಚ್" - ಆನಿ ಹಾಣೆಂಚ್ ಮ್ಹಾಕಾ ಕೆ.ಸಿ.ಡಬ್ಲ್ಯೂ.ಎಚೊ ಸಾಂದೊ ಕೆಲ್ಲೊ.
ಕುವೆಯ್ಟಾಂತ್ ಕೊಂಕ್ಣಿ ಅಭಿಯಾನ್ ಸಮಿತಿ ಘಡ್ಚೆ ವೆಳಾರ್ ಹಾಚೊ ಸಂಪರ್ಕ್ ಮ್ಹಾಕಾ ನಾತ್ಲ್ಲೊ ತರ್ಯೀ ಫುಡೆಂ ತೆಂ ಅಭಿಯಾನ್ ಮುಖಾರ್ಸುನ್ ವರುಂಕ್ ಹೊಚ್ಚ್ ಕಾರಣ್ಕರ್ತ್. ಸ್ವತಾ ಏಕ್ ಕೊಂಕ್ಣಿ ಬರವ್ಪಿ ಜಾವ್ನಾಸ್ಚಾ ಹಾಣೆಂ ಖಂಯ್ಚರ್ಯೀ ಅಪ್ಲ್ಯಾ ತಾಲೆಂತಾವಿಶಿಂ ವ್ಹಡ್ಪಣ್ ಉಲಯಿಲ್ಲೆಂ ವಾ ದಾಂಗ್ರೊ ಮಾರ್ಲ್ಲೊ ಹಾವೆಂ ಆಯ್ಕೊಂಕ್ ನಾ.
ವೆಕ್ತಿಗತ್ ಜಾವ್ನ್ ಆಮಿ ಥೊಡೆ ಪಾವ್ಟಿಂ ಎಕಾಮೆಕಾ ಸಮ್ಜೊಂಕ್ ಥೊಡೆಪಾವ್ಟಿಂ ಸಕ್ಲೆನಾಂವ್ ತರ್ಯೀ, ಕೊಂಕ್ಣೆಚಾ ವಾವ್ರಾಕ್ ಕಾಳ್ಜಾ ಥಾವ್ನ್ ಪಾಟಿಂಬೊ ದಿಂವ್ಚಾ ಪಯ್ಕಿಂತ್ ಹೊ ಖಂಡಿತ್ ಜಾವ್ನ್ ಎಕ್ಲೊ. ಕೋಣ್ ಹಾಚೆರ್ ಅಪ್ರಾಧ್ ಮಾಂಡಿತ್ - ಹೊ ಭೋವ್ಶಾ ಪೊಯ್ಶೆ ದಿತಾ ಆನಿ ಮಾನ್ ಘೆತಾ. ಭೋವ್ಶಾ ಮಾನಾಕ್ ಫಾವೊ ಆಸ್ಚಾ ಕೊಣೆಂಯ್ ಪೊಯ್ಶೆ ದೀವ್ನ್ ತೊ ಘೆಂವ್ಚೊ ಖಂಡಿತ್ ಜಾವ್ನ್ ಹೆರಾಂಕ್ ಅಪ್ಲೆಂ ಫಟ್ಕಿರೆಂ ರುಪ್ಣೆಂ ಧಾಖವ್ನ್ ಜೊಡ್ಚ್ಯಾಕೀ ವರ್ತೊ ನ್ಹಂಯ್ಗಿ?
ಸಂವಾದ್ ಚಲವ್ಪಿ: ಮೆಲ್ವಿನ್ ಜೆ. ವಾಸ್, ಕೆಲರಾಯ್.
1. ಪಾಸ್ಕಲ್ ಬಾಬ್, ಪಯ್ಲೆ ಸುವಾತೆರ್ ತುಮ್ಕಾಂ ಪರ್ಭಿಂ, ತುಮಿ ಗಲ್ಫಾ ಥಾವ್ನ್ ಮಂಗ್ಳುರಾಕ್ ಡೈರೆಕ್ಟ್ ವಿಮಾನ್ ಜಾಂವ್ಚ್ಯಾ ತೆವ್ಶಿಂ ತುಮ್ಚಾ ಮುಖೇಲ್ಪಣಾರ್ ಕೆಲ್ಲ್ಯಾ ಸುರ್ವಾತೆಕ್. ಆತಾಂ ತುಮ್ಕಾಂ ಕಶೆಂ ಭಗ್ತಾ?
ಜಾ: ದೇವ್ ಬರೆಂ ಕರುಂ ಮೆಲ್ವಿನ್ ತುವೆಂ ದಿಲ್ಲ್ಯಾ ಮಾನಾಕ್. ಹಾವೆಂ ಗಲ್ಫಾ ಥಾವ್ನ್ ಮಂಗ್ಳುರಾಕ್ ಡೈರೆಕ್ಟ್ ವಿಮಾನ್ ಜಾಯ್ಜಯ್ ಮ್ಹಣ್ ಆಜ್ಕಾಲ್ ಥಾವ್ನ್ ನ್ಹಂಯ್, ಪಾಟ್ಲ್ಯಾ ಸಭಾರ್ ವರ್ಸಾಂ ಥಾವ್ನ್ ವೆವೆಗ್ಳ್ಯಾ ರಿತಿರ್ ಮಿನತ್ ಕೆಲ್ಯಾ. ತರ್ಯೀ ತಾಚೊ ಫಳ್ ಆತಾಂ ತರ್ಯೀ ಲಾಭ್ಲೊ ಮ್ಹಳ್ಳೊ ಸಂತೊಸ್ ಮ್ಹಜೊ. ಜಾಂವ್ ಮೆಜಾ ವಯ್ಲೆಂ ಕೆಳೆಂ ಕಾಡ್ನ್ ಪಿಲ್ಯಾದ್ ಜೊಡ್ಚೆ ಆಸ್ತಿತ್. ಪುಣ್ ಆಮ್ಚಾ ಲೊಕಾಂಕ್ ಆಜ್ ವಿಮಾನ್ ಆಸಾ ಮ್ಹಳ್ಳಿ ವರ್ತಿ ದಾಧೊಸ್ಕಾಯೆಚಿ ಗಜಾಲ್.
2. ಆಯ್ಲೆವಾರ್ ಕೊಂಕ್ಣಿ ಚಟುವಟಿಕೊ ಸಗ್ಳ್ಯಾಂನಿ ಚಡೊನ್ ಯೆತಾತ್, ಗಾಂವಾಂತ್ ಮಾತ್ರ್ ನ್ಹಂಯ್ ಆಸ್ತಾಂ ಆತಾಂ ಗಲ್ಫಾಂತ್, ಅಮೆರಿಕಾಂತ್, ಯು.ಕೆಂತ್ ಸಯ್ತ್ ಕೊಂಕ್ಣಿ ವಾವ್ರ್ ಸುರು ಜಾಲಾ. ಗಾಂವ್ಚಾ ಇಸ್ಕೊಲಾಂನಿ ಸಯ್ತ್ ಕೊಂಕ್ಣಿ ಶಿಕಂವ್ಕ್ ಸುರು ಕೆಲಾಂ - ಕೊಂಕ್ಣೆಚಿ ಆಯ್ಚಿ ಪರಿಗತ್ ಸುಧ್ರೊನ್ ಆಯ್ಲ್ಯಾ ಮ್ಹಣ್ ತುಮ್ಕಾಂ ಭಗ್ತಾಗಿ? ತುಮ್ಚೆ ವಿಚಾರ್ ಕಸ್ಲೆ?
ಜಾ: ಭಾಯ್ಲೆ ದೆಖಿಕ್ ಹೆಂ ಸರ್ವ್ ಸಾರ್ಕೆಂ ತರ್ಯೀ ಕೊಂಕ್ಣೆಂತ್ ಆಮ್ಚೆಂ ಮುಳಾವೆಂ ಚಿಂತಾಪ್ ಅಜೂನ್ಯೀ ಬದ್ಲೊಂಕ್ ನಾ ಅಶೆಂ ಮ್ಹಾಕಾ ಭಗ್ತಾ. ಕೊಂಕ್ಣಿ ಹರ್ಯೆಕಾ ಕೊಂಕ್ಣಿ ಲೊಕಾನ್ ಅಪ್ಲಿ ಕರ್ಚಿ ಗರ್ಜ್ ಆಸಾ. ಆನಿ ತಿ ಗರ್ಜ್ ಕೊಣೆಂಯ್ ಕೊಣಾಚೆರ್ ಥಾಪುಂಕ್ ನಜೊ. ಜೆದೊಳ್ ಪರ್ಯಾಂತ್ ಆಮ್ಚಾ ಕಾಳ್ಜಾಂತ್ ಕೊಂಕ್ಣೆಚೊ ಮೋಗ್ ಆನಿ ಹುಸ್ಕೊ ನಾಂಗೀ ತೆದೊಳ್ ಪರ್ಯಾಂತ್ ಕಿತ್ಲ್ಯೊ ಚಟುವಟಿಕ್ಯೊ ಕೆಲ್ಯಾರೀ ತೊ ಆಮಿ ಆಮ್ಚಾ ತೊಂಡಾಕ್ ಸಾರಯಿಲ್ಲ್ಯಾ ಲೇಪಾಪರಿಂ; ಭಾಯ್ಲ್ಯಾನ್ ಸುಂದರ್ ದಿಸತ್ ತರ್ಯೀ ಭಿತರ್ಲೆ ಭಿತರ್ ತೆಂಚ್ ವಿಕಾರ್ಪಣ್.
ಭಾಯ್ಲೊ ಗಾಂವ್ ಕಿತ್ಯಾಕ್, ಆಮ್ಚಾ ಕುವೆಯ್ಟಾಂತ್ ಪಳೆಯಾಂ - ಕಿತ್ಲೆಶೆ ವೆವೆಗ್ಳೆ ಸರ್ಕಸ್ ಜಾವ್ನ್ ಆಸಾತ್? ಸರ್ವಾಂ ಆಮಿಂಚ್ ಕೊಂಕ್ಣಿ ವಾವ್ರ್ ಕರ್ತಾಂವ್ ಮ್ಹಣ್ ಪೆಂಪಾರೆಂ ವಾಜಯ್ತಾತ್. ಪುಣ್ ಎಕೆಕ್ಲ್ಯಾಂಚೊ ಎಕೇಕ್ ಅಜೆಂಡಾ. ಥೊಡೆ ಅಭಿಮಾನಿ ಪಂಗಡ್ ಭಾಂದುನ್ ರಾಜ್ ಕರ್ತಾತ್, ಆನಿ ಥೊಡೆ ಅಪ್ಣಾಕ್ ವೆದಿಚೆರ್ ಆಪವ್ನ್ ಫುಲಾಂ ಘಾಲ್ತೆಲ್ಯಾಂಚೊ ಮಾತ್ರ್ ಕೊಂಕ್ಣಿ ವಾವ್ರ್ ಮ್ಹಣ್ ಪಾಚಾರ್ತಾತ್ - ಹ್ಯಾ ಪರಿಗತೆಂತ್ ತುಮ್ಚೆ ತಸಲ್ಯಾ ಥೊಡ್ಯಾಂನಿ ಕೆಲ್ಲೊ ವಾ ಕರ್ಚೊ ವಾವ್ರ್ ಕೊಣಾಕ್ ದಿಸ್ತಾ? ಆಮ್ಚಾಚ್ ಮನ್ಶ್ಯಾನ್ ವಯ್ರ್ ಯೆತಾನಾ ಆಮ್ಚ್ಯಾನ್ ಸೊಸುಂಕ್ ಜಾಯ್ನಾ ದೆಕುನ್ ತಾಂಚೆ ಪಾಂಯ್ ವೋಡ್ನ್ ಘಾಲ್ಚೆಂ ಪ್ರೇತನ್ ಆಮ್ಚೆಚ್ ಪಯ್ಲೆಂ ಕರ್ತಾತ್. ಜಾಣಾರ್ಯಾಂನಿ ಖರೆಂಚ್ ಸಾಂಗ್ಲಾಂ - ಆಮ್ಚಿ ಕುರ್ಲ್ಯಾಂಚಿ ಸಮಾಜ್. ಆನಿ ತೆಚ್ಚ್ ಚಿಂತ್ಪಾನ್ ಆಮಿ ಜಿಯೆವ್ನ್ ಆಸಾಂವ್. ದೆಕುನ್ ಆಮ್ಚೆಂ ಹಡ್ಬೆಂಪಣ್ ಲಿಪಂವ್ಕ್ ಆಮ್ಕಾಂ ಮಾನ್ ಸಮ್ಮಾನಾಚೆ ಹೊರ್ಭೊಸ್. ಜೆದ್ನಾಂ ಹೆರಾಂಕ್ ಬುದಿ ಸಾಂಗೊನ್ ಸಾಹಿತ್ಯ್ ರಸ್ಚಾ ಹಾಣಿಂ ಅಪ್ಲ್ಯಾ ಜಿಣ್ಯೆಕ್ ಹೆಂ ಲಾಗು ಕರ್ಚೆಂ ಥೊಡೆಂ ಪ್ರೇತನ್ ತರೀ ಕೆಲೆಂ ತರ್ - ಖರೆಂಚ್ ಸಾಂಗ್ತಾಂ ಕೊಂಕ್ಣಿ ಅಪಾಪಿಂಚ್ ಫುಲ್ತೆಲಿ.
3. ತುಮ್ಕಾಂ ಕೊಂಕ್ಣಿ ಮೋಗ್ ಆಯ್ಲೆವಾರ್ ಉದೆಲೊ ಮ್ಹಣ್ಚಾ ಖೊಡಿಂಚೆರ್ ತುಮ್ಚಿ ಪ್ರತಿಕ್ರಿಯಾ ಕಸ್ಲಿ?
ಜಾ: ಮ್ಹಜೆರ್ ಕೊಣೆಂಯ್ ಕಸ್ಲ್ಯೋಯ್ ಖೊಡಿ ಕಾಡ್ತಚ್ ಹಾಂವ್ ಬದಲ್ನಾ - ಸರ್ವಾಂಕ್ ಅಪಾಪ್ಲೆಂ ಚಿಂತಾಪ್ ಉಚಾರ್ಚೆಂ ಸ್ವಾತಂತ್ರ್ ಆಸಾ. ಪುಣ್ ಹಾಂವ್ ಏಕ್ ಕೊಂಕ್ಣಿ ಬರವ್ಪಿ. ಮ್ಹಾಕಾ ಕೊಂಕ್ಣಿ ವಾವ್ರಾಚಿ ವೋಡ್ ಆಸ್ಲ್ಲಿ ಜೆದ್ನಾಂ ಜಿ.ಎಮ್.ಬಿ.ಲುದ್ರಿಕಾಸವೆಂ ಆಸ್ಲ್ಲೆ ವೆಳಾರ್, ಮ್ಹಣ್ಜೆ ಅಜೀಕ್ ತೀಸ್-ಪಾಂತೀಸ್ ವರ್ಸಾಧಿಂ. ಪುಣ್ ಮ್ಹಜ್ಯಾ ಕೊಂಕ್ಣಿ ವಾವ್ರಾವಿಶಿಂ ದಾಂಗ್ರೊ ಮಾರುಂಕ್ ನಾಕಾ, ವಿಜಿಟಿಂಗ್ ಕಾರ್ಡಾಂ ಛಾಪುಂಕ್ ನಾಕಾ. ಕೊಂಕ್ಣಿ ವಾವ್ರ್ ಕರ್ಚೊ ಆಮ್ಚೊ ಸರ್ವಾಂಚೊ ಧರ್ಮ್ ಆನಿ ಕರ್ತವ್ಯ್ ದೆಕುನ್ ಹಾಂವ್ ಕರ್ತಾಂ ಶಿವಾಯ್; ಮ್ಹಾಕಾ ಕೊಣೀಂ ಫುಲಾಂ ಫಳಾಂ ದೀಂವ್ದಿ ವಾ ಮ್ಹಜೊ ಅಭಿಮಾನಿಂಚೊ ಪಂಗಡ್ ರಚುನ್ ತಾಂಚೆ ಥಾವ್ನ್ ಮಾನ್ ಘೆಂವ್ಚೊ ಹೊರ್ಭೊಸ್ ಮ್ಹಾಕಾ ನಾ.
ಪುಣ್ ಆಯ್ಲೆವಾರ್ ಮ್ಹಜ್ಯಾ ಕೊಂಕ್ಣಿ ವಾವ್ರಾಕ್ ಇಲ್ಲೆಂ ಚಡಯ್ಲೆಂ - ತೆಂ ಜರೂರ್ ವೊಪ್ತಾಂ ಹಾಂವ್. ಅಳೆ ಭಾವಾ ಹಾಂವ್ ಕಾಂಯ್ ದೀಸ್ ರಾತ್ ಕೊಂಕ್ಣಿ ವಾವ್ರಾಚಾ ಪಾಟ್ಲ್ಯಾನ್ ರಾಂವ್ಚೊ ನ್ಹಂಯ್. ಮ್ಹಜ್ಯಾ ಕಾಮಾಚಾ ರಾಟಾವಳೆ ಮಧೆಂ ಜೆದ್ನಾಂ ಕೊಣ್ಯೀ ಖರೆಪಣಿಂ ನಿಸ್ವಾರ್ಥಿ ರಿತಿನ್ ಕೊಂಕ್ಣಿ ವಾವ್ರ್ ಕರ್ತಾ ಜಾಲ್ಯಾರ್ ತಸಲ್ಯಾಂಕ್ ಪಾಟಿಂಬೊ ದೀಂವ್ಕ್ ಹಾಂವ್ ದೆಕಿಂಚ್ ಪಾಟಿಂ ಸರಾನಾ. ಕುವೆಯ್ಟಾಂತ್ ಪಾಟ್ಲ್ಯಾ ಥೊಡ್ಯಾ ವರ್ಸಾಂನಿ ದಾಯ್ಜ್ ಪಂಗ್ಡಾನ್ ಕೆಲ್ಲಿಂ ಕಾಮಾ ಎದೊಳ್ ಖಂಚ್ಯಾಚ್ ಕೊಂಕ್ಣಿ ಸಂಘಟನಾಂನಿ ಕೆಲ್ಲಿಂ ನಾಂತ್. ಎದೊಳ್ ಅಟ್ರಾ ಬೂಕ್ ತಾಣಿಂ ಪರ್ಗಟ್ಲ್ಯಾತ್, ತೇಯೀ ಫಕತ್ತ್ ಎಕ್ಲ್ಯಾಚೆ ನ್ಹಂಯ್, ವೆವೆಗ್ಳ್ಯಾ ಲೇಖಕಾಂಚೆ, ವೆವೆಗ್ಳ್ಯಾ ಗಾಂವ್ಚಾ ಬರವ್ಪ್ಯಾಂಚೆ. ಇತ್ಲೆಂಚ್ ನ್ಹಂಯ್, ತುಮಿ ನವ್ಯಾಂಕ್, ಉರ್ಭೆವಂತಾಂಕ್ ಸೊಧುನ್ ಕಾಡ್ನ್, ತಾಂಕಾಂ ಜೊಕ್ತಿ ತರ್ಭೆತ್ ದೀಂವ್ಕ್ ಘೆಂವ್ಚಿ ಮಿನತ್ ಹಾಂವ್ ಜಾಣಾಂ. ಹೆಚ್ಚ್ ಇರಾದ್ಯಾನ್ ತುಮ್ಕಾಂ ಪಾಟಿಂಬೊ ದಿಂವ್ಚೊ ಮ್ಹಜೊ ಕಾಯ್ದೊ ಮ್ಹಣ್ ಚಿಂತಾಂ ಶಿವಾಯ್ ಹೆರ್ ಕಸ್ಲ್ಯಾಯ್ ಇರಾದ್ಯಾನ್ ನ್ಹಂಯ್.
4. ತುಮ್ಕಾಂ ಸಮಾಜಿಕ್ ವಾವ್ರ್ ಕರುಂಕ್ ಕಸೊ ವೇಳ್ ಲಾಭ್ತಾ?
ಜಾ: ವೇಳ್ ಸೊಧ್ಚೊ ಹಿಪೊಕ್ರೆತಾಂನಿ ಮಾತ್ರ್. ಕಾಳ್ಜಾಂತ್ ಜರ್ ಮೋಗ್ ಆನಿ ಕಿತೆಂಯ್ ಕರ್ಚಿ ಆಶಾ ಆಸ್ಲ್ಯಾರ್ ತಸಲ್ಯಾಂಕ್ ವೇಳ್ ಕಸೋಯ್ ಮೆಳ್ತಾ. ಹಾಂವ್ ಕೆದ್ನಾಂಯ್ ಮ್ಹಜೆಖಾತಿರ್ ಜಿಯೆಲ್ಲೊಂ ನ್ಹಂಯ್. ಗರ್ಜೆಂತ್ ಆಸ್ಚಾಂಕ್ ಮ್ಹಜ್ಯಾ ತಾಂಕಿ ಭಿತರ್ಲಿ ಕುಮೊಕ್ ಕರ್ಚೊ ಮ್ಹಜೊ ಧರ್ಮ್ ಮ್ಹಣ್ ಹಾಂವ್ ಚಿಂತಾಂ. ಆಮ್ಚಾ ಗಾಂವ್ಚೊ ಚಡ್ತಾವ್ ಲೋಕ್ ಆಜ್ ಬರ್ಯಾ ಪರಿಗತೆಂತ್ ಆಸ್ಲ್ಯಾರೀ, ಸಭಾರ್ ಲೋಕ್ ಅಜೂನ್ ತೆಚ್ಚ್ ದುಬ್ಳಿಕಾಯೆಂತ್ ಜಿಯೆತಾ. ಎಕಾ ಕಾಮಾಕ್ ತಸ್ಲ್ಯಾಂಕ್ ಹಾಡ್ನ್ ದುಸ್ರೆಂ ಕಾಮ್ ದಿಂವ್ಚೆ ಫಟ್ಕಿರೆ ಏಜಂಟ್ ಅಜೂನ್ ಆಮ್ಚೆ ಮಧೆಂ ಆಸಾತ್. ಕೊಣ್ ಗತ್ ಆಧಾರ್ ನಾಸ್ತಾಂ ಮೊರೊನ್ ಪಡ್ತಾ, ತಸ್ಲ್ಯಾಂಚಿಂ ನಿರ್ಜೀವ್ ಕೂಡ್ ಗಾಂವಾಕ್ ಧಾಡ್ಚಿಂ ಕಾಮಾಂ, ಬೆಕಾರಿ ಆಸ್ಚಾ ಆಮ್ಚಾ ಲೊಕಾಂಕ್ ಕಾಮಾಂ ಸೊಧುನ್ ದಿಂವ್ಚಿಂ ಕಾಮಾಂ ಖಂಚ್ಯಾ ಸಂಚಾಲನಾಚ್ಯಾನ್ ಕರಿಜಾಯ್ ಆಸ್ಲ್ಲೆಂ ಮ್ಹಳ್ಳೆಂ ಮ್ಹಾಕಾ ಕಳಿತ್ ನಾ. ಆಮ್ಚೆ ಆಯ್ಚೆ ಶಿಕ್ಪಿ ಮುಖೆಲಿ ಸಯ್ತ್ ತೆಚ್ಚ್ ಡಿಸ್ಕೊ ಪಾರ್ಟಿ ಆನಿ ಪಿಕ್ನಿಕಾಂನಿ ಘುಸ್ಲಾ. ಆಮ್ಚಾ ಕುವೆಯ್ಟಾಂತ್ ಇತ್ಲಿಂ ಫಿರ್ಗಜೆವಾರ್ ಸಂಚಾಲನಾಂ ಆಸಾತ್ ತರ್ಯೀ ಹಿಂ ಕಾಮಾಂ ಕರುಂಕ್ ಏಕ್ ಸಂಚಾಲನ್ಯೀ ನಾ. ದೆಕುನ್ ಹಾಂವ್ ಹಿಂ ಕಾಮಾಂ ಮ್ಹಜಿಂ ಕಾಮಾಂ ಮ್ಹಣ್ ಚಿಂತುನ್ ಕರ್ತಾಂ ಶಿವಾಯ್ ಹೆರ್ ಕಿತೆಂಚ್ ನ್ಹಂಯ್. ಹ್ಯಾ ಖಾತಿರ್ ಮ್ಹಾಕಾ ಕಸ್ಲಿಚ್ ವರ್ದಿ ಗರ್ಜ್ ನಾ, ಮ್ಹಜಿ ತಸ್ವೀರ್ ಜಾಂವ್, ಅಸಲ್ಯಾ ಅಮಾಯಕಾಂಚಿ ತಸ್ವೀರ್ ಜಾಂವ್ ಪತ್ರಾಂನಿ ಸಾಯ್ಟಿಂನಿ ಪರ್ಗಟ್ ಕರ್ನ್ ನಾಂವ್ ಜೊಡ್ಚೆಂ ಮ್ಹಜೆಂ ಚಿಂತಾಪ್ ನ್ಹಂಯ್.
5. ಥೊಡ್ಯಾ ತೆಂಪಾಧಿಂ ತುಮಿಂ ಮುಖೇಲ್ಪಣ್ ಘೆವ್ನ್ ಕೆ.ಸಿ.ಕೆ.ಸಿ ಚಾಲು ಕೆಲ್ಲೆಂ ಆತಾಂ ಕಶೆಂ ವೊಮ್ತೆಂ ಪಡ್ಲೆಂ?
ಜಾ: ಸತ್ ಸಾಂಗ್ಚೆಂ ತರ್ ಕೆ.ಸಿ.ಕೆ.ಸಿ. ಮ್ಹಜಿ ಏಕ್ ಚೂಕ್ ಜಾವ್ನಾಸ್ಲಿ. ತೆಂ ಹಾಂವ್ ವೊಪುನ್ ಘೆತಾಂ. ಆನಿ ಖಂಚೇಂಯ್ ಸಂಘಟನ್ ಜೆದ್ನಾಂ ಜೊಕ್ತೆಂ ಪಾಠ್ಥಳ್ (ಪಂಚಾಂಗ್) ನಾಸ್ತಾಂ ಉಭೆಂ ಜಾತಾ, ತೆಂ ಚಡ್ ತೇಂಪ್ ಬಾಳ್ವನಾ ಮ್ಹಣ್ಚ್ಯಾಕ್ ಹೊ ಏಕ್ ದಾಕ್ಲೊ.
6. ಕೆ.ಸಿ.ಡಬ್ಲ್ಯೂ.ಎ. ಕೊಂಕ್ಣೆಕ್ ಉಪ್ಕಾರಾಕ್ ಪಡ್ಚೆ ತಸಲೊ ಮ್ಹಣ್ಜೆ ಭುರ್ಗ್ಯಾಂಕ್ ಕೊಂಕ್ಣಿ ಸ್ಪರ್ಧೆ, ಜಾಂವ್ ಗಾಯನ್ ಸ್ಪರ್ಧೆ, ಭಾಶಣ್ ಸ್ಪರ್ಧೆ, ಲೇಖನ್ ಸ್ಪರ್ಧೆ ಕ್ರಿಯಾತ್ಮಕ್ ವಾವ್ರ್ ಕಿತ್ಯಾಕ್ ಕರಿನಾ? ಅಶೆಂ ಕೆಲೆಂ ಜಾಲ್ಯಾರ್ ಮಾತ್ರ್ ಆಯ್ಚಾ ಭುರ್ಗ್ಯಾಂಕ್ ಕೊಂಕ್ಣಿ ಭಾಸೆಚಿ ವೋಡ್ ದಿವ್ಯೆತಾ ನ್ಹಂಯ್ಗೀ?
ಜಾ: ಸತ್ ಸಾಂಗ್ಚೆಂ ತರ್ - ಅಸಲೊ ಹುಸ್ಕೊ ಆಸ್ಚೆ ಆಮ್ಚಾ ಕಮಿಟಿಂತ್ ಆಸ್ಚಿಂ ಭೋವ್ ಉಣಿಂ. ದೆಕುನ್ ಎಕ್ಲ್ಯಾ ದೊಗಾಂನಿ ಹಿ ಸಲ್ಹಾ ದಿಲಿ ತರ್ಯೀ ಹೆರಾಂಕ್ ಹೆಂ ಗರ್ಜೆಚೆಂ ಮ್ಹಣ್ ದಿಸಾನಾ ದೆಕುನ್ ಆಮ್ಚ್ಯಾನ್ ಅಸಲಿಂ ಕ್ರಿಯಾತ್ಮಕ್ ರಿತಿಚೊ ವಾವ್ರ್ ಕರುಂಕ್ ಜಾಯ್ನಾ. ತುಮ್ಚೆ ತಸಲ್ಯಾಂನಿ ಆಮ್ಚಾ ಕಮಿಟಿಂತ್ ಯೇವ್ನ್, ಆಮ್ಚ್ಯಾ ಸಂಚಾಲನಾಕ್ ಸಾಂಗಾತ್ ದಿಲ್ಯಾರ್ ಆಮ್ಚ್ಯಾನ್ ಫುಡೆಂ ಕಾಂಯ್ ಅಸಲಿಂ ಕಾಮಾಂ ಕರುಂಕ್ ಸಾಧ್ಯ್ ಜಾಯ್ತ್.
ಪುಣ್ ಏಕ್ ಸಂಗತ್ ಗರ್ಜೆಚಿ - ಕೆ.ಸಿ.ಡಬ್ಲ್ಯೂ.ಎ ಏಕ್ ಸಮಾಜ್ ಸೆವೆಚೆಂ ಸಂಘಟನ್ ಶಿವಾಯ್ ಫಕತ್ತ್ ಕೊಂಕ್ಣಿ ವಾವ್ರಾಚೆಂ ಸಂಘಟನ್ ನ್ಹಂಯ್.
7. ಕುವೆಯ್ಟಾಂತ್ ಆಸ್ಚಾ ಕೊಂಕ್ಣಿ ಸಂಘಟನಾಂವಿಶಿಂ ತುಮ್ಚಿ ಅಭಿಪ್ರಾಯ್ ಕಸ್ಲಿ?
ಜಾ: ಸತ್ ಸಾಂಗ್ಚೆಂ ತರ್ - ನಾಂವಾಕ್ ಜಾಯ್ತಿಂ ಆಸಾತ್ ಪುಣ್ ಕಾಮಾಂ ಕರುಂಕ್ ಕೊಣ್ಂಚ್ ನಾಂತ್ ಮ್ಹಣ್ ಭಗ್ತಾ. ಖರೆಂಪಣಿ ಸಾಂಗೊಂ ತರ್ ಕಾಮಾಂ ಕರ್ಚಾಕ್ ಕಸ್ಲೀಂಯ್ ಸಂಚಾಲನಾಂ ಗರ್ಜ್ ನಾಂತ್ ಮ್ಹಣ್ ತುಮಿ ರುಜು ಕೆಲಾಂ. ಆತಾಂ ತುಮಿ ಕರ್ನ್ ಆಸ್ಚೊ ವಾವ್ರ್ ಖಂಚೆಂ ಸಂಚಾಲನ್ ಕರ್ತಾ ಮ್ಹಣ್ ಸಾಂಗಾ?. ಮ್ಹಜೆಂ ಚಿಂತಾಪ್ಯೀ ಹೆಂಚ್. ಸಮಾಜ್ ಸೆವಾ ಮ್ಹಜ್ಯಾ ತಾಂಕಿ ಭಿತರ್ ಕಿತ್ಲಿ ಕರುಂಕ್ ಜಾತಾ ತಿತ್ಲಿ ಹಾಂವ್ ಕರ್ನ್ ಆಯ್ಲಾಂ ಆನಿ ಫುಡೆಂಯೀ ಕರ್ನ್ ಆಸ್ತಲೊಂ. ದೆವಾನ್ ಬರೆಂ ಮ್ಹಳೆಂ ತರ್.
8. ತುಮ್ಚಿ ಮಹತ್ವಾಕಾಂಕ್ಶಾ ಕಸ್ಲಿ?
ಜಾ: ಕೊಂಕ್ಣೆ ಖಾತಿರ್ ಎಕ್ವಟಿತ್ ರಿತಿಚೊ ವಾವ್ರ್ ಕರ್ಚಿ ಮಹತ್ವಾಕಾಂಕ್ಶಾ ಮ್ಹಜಿ. ಹಾಂವ್ ಜಾಣಾಂ ಹೆಂ ಸಲೀಸ್ ನ್ಹಂಯ್ ಮ್ಹಣ್. ಜೆದ್ನಾಂ ಪರ್ಯಾಂತ್ ಅಪ್ಲ್ಯಾ ಸ್ವಾರ್ಥಾಚೆ ಮುಖೆಲಿ ಆಮ್ಚಾ ಸಮಾಜೆಂತ್ ಆಸಾತ್ ತೆದ್ನಾಂ ಪರ್ಯಾಂತ್ ಹೆಂ ಅಸಂಭವ್, ತರ್ಯೀ ಆಮಿ ಧಯ್ರ್ ಸಾಂಡಿನಾಸ್ತಾಂ ಆಮ್ಚೊ ವಾವ್ರ್ ಮುಖಾರುನ್ ವೆಲೊ ತರ್ ಆಮ್ಕಾಂ ಆಡಾಂವ್ಕ್ ಕೊಣಾಯ್ಚ್ಯಾನೀ ಜಾಂವ್ಚೆಂನಾ.
9. ಆಯ್ಚಾ ಕಾಳಾರ್ ವೆಬ್ಸಾಯ್ಟಿಂನಿ ಕೊಂಕ್ಣಿ ವಾಡಾವಳ್ ಜಾತೇ ಆಸಾ - ಹ್ಯಾ ಇ-ಮೀಡಿಯಾ ವಿಶಿಂ ತುಮ್ಚಿ ಅಭಿಪ್ರಾಯ್ ಕಸ್ಲಿ?
ಜಾ: ಕೊಂಕ್ಣೆಚಿ ವ್ಹಾಡಾವಳ್ ಕಶೀಯ್ ಜಾಂವ್ - ಬರಿಚ್. ಇ-ಮೀಡಿಯಾ ಆತಾಂಚೆಂ ತಶೆಂಚ್ ಫುಡ್ಲ್ಯಾ ದಿಸಾಂಚೆಂ ಹಾತೆರ್. ಆನಿ ಹಾಚೊ ವಾಪಾರ್ ಬರೊ ಕರ್ನ್ ಬರ್ಯಾ ದಿಶೆನ್ ಕೆಲೊ ತರ್ ಖಂಡಿತ್ ಜಾವ್ನ್ ಬರೆಂ ಜಾತೆಲೆಂ ಮ್ಹಳ್ಳಿ ಮ್ಹಜಿ ಅಭಿಪ್ರಾಯ್. ಪುಣ್ ಆಮಿ ಕೆಲ್ಲೊ ಮಾತ್ರ್ ಮಹಾನ್ ವಾವ್ರ್ ಹೆರಾಂನಿ ಕೆಲ್ಲೆಂ ವಾ ಕರ್ಚೆಂ ನಾಂವಾಕ್ ಮ್ಹಳ್ಳೆ ಪಿಶೆ ವಾದ್ ಮಾಂಡ್ಚೆ ಆಮ್ಚಾ ಸಮಾಜೆಂತ್ ದರಬಸ್ತ್ ಆಸಾತ್. ಅಸಲ್ಯಾಂನಿ ಖೊಡಿ ಜರೂರ್ ಕಾಡಿಜಯ್, ಪುಣ್ ಪಯ್ಲೆಂ ತಿ ಖೊಡ್ ಅಪ್ಣಾಕ್ಚ್ ಕಿತ್ಲಿ ಲಾಗು ಜಾತಾ ಮ್ಹಳ್ಳೆಂ ಸಮ್ಜೊಂಕ್ ಪ್ರೇತನ್ ಕರಿಜಾಯ್.
10. ದಾಯ್ಜ್.ಕೊಮ್ ವಿಶಿಂ ತುಮ್ಚಿ ಅಭಿಪ್ರಾಯ್ ಕಸ್ಲಿ?
ಜಾ: ತುಮ್ಚಿಂ ಕಾಮಾಂ ಹಾಂವ್ ಖುದ್ದ್ ಪಳೆವ್ನ್, ಪಾರ್ಕುನ್ ಜಾಣಾಂ ದೆಕುನ್ ತುಮ್ಕಾಂ ಮ್ಹಜೊ ಪಾಟಿಂಬೊ ದಿತೇ ಆಸಾಂ. ಎದೊಳ್ ಮ್ಹಣಾಸರ್ ಕಶೆಂ ತುಮಿಂ ನಾಂವಾ ಪಾಟ್ಲ್ಯಾನ್ ಧಾಂವಾನಾಸ್ತಾಂ ಫಕತ್ತ್ ಕಾಮ್ ಕರ್ನ್ ಗೆಲ್ಯಾತ್ಗೀ, ತಶೆಂಚ್ ಮುಖಾರ್ಯೀ ವಚಾ. ದೆವಾಚೆಂ ಬೆಸಾಂವ್ ತುಮ್ಚೆರ್ ಪಡ್ತೆಲೆಂ. ತುಮ್ಕಾಂ ಅಧಿಕಾರಾಚೊ ಜಾಂವ್ ಹುದ್ದ್ಯಾಚೊ ಜಾಂವ್ ಮಾನ್ ಸಮ್ಮಾನಾಚೊ ಜಾಂವ್ ಹೊರ್ಭೊಸ್ ನಾ. ಕೊಂಕ್ಣೆ ಖಾತಿರ್ ಅಖಿಲ್ ಭಾರತೀಯ್ ಬರವ್ಪ್ಯಾಂಚಾ ಎಕ್ತಾರಾಚೆಂ ಜೆರಾಲ್ ಕಾರ್ಯದರ್ಶಿಚೊ ಹುದ್ದೊ ಸಯ್ತ್ ತ್ಯಾಗ್ ಕರ್ನ್ ಕೊಂಕ್ಣಿ ವಾವ್ರ್ ಕರ್ಚೆ ತುಮ್ಚೆ ಮಧೆಂ ಆಸ್ಚೆಂ ನಿಜಾಯ್ಕೀ ಸಂತೊಸಾಚೆಂ. ತುಮ್ಚೊ ವಾವ್ರ್ ಅಸೊಚ್ ಮುಖಾರುಂ. ಮ್ಹಜೊ ಪಾಟಿಂಬೊ ಜರೂರ್ ತುಮ್ಕಾಂ ಆಸ್ತಲೊ.
11. ದಾಯ್ಜ್ ವಾಚ್ಪ್ಯಾಂಕ್ ತುಮ್ಚೆ ಸಂದೇಶ್ ಕಾಂಯ್ ಆಸಾತ್?
ಜಾ: ಜರೂರ್ - ಭಾಯ್ಲ್ಯಾ ದೆಖಿಕ್ ಭುಲೊನ್ ಗಾಡ್ವಾಕ್ ಘೊಡೊ ಮ್ಹಣ್ ಚಿಂತುನ್ ಬಸಾನಾಕಾತ್. ಸಾರ್ಕೆಂ ತಜ್ವೀಜ್ ಕರ್ನ್ ಪಳೆಯಾ, ಪಾರ್ಕುನ್ ಪಳೆಯಾ - ಜೊ ಸಾಂಗ್ತಾ, ತೊ ಕರಿನಾ, ಆನಿ ಜೊ ಕರ್ತಾ ತೊ ಸಾಂಗಾನಾ. ದೆಕುನ್ ವಾಗಾಚಾ ವೆಸಾರ್ ಬೊಸ್ಲ್ಲ್ಯಾ ಕೊಲ್ಯಾಂಕ್ ತುಮ್ಚೊ ರಾಯ್ ಕರ್ನ್ ಬೆಕೂಫ್ ಜಿಣಿ ಜಿಯೆನಾಕಾತ್.
ತಶೆಂಚ್ ಕೊಂಕ್ಣಿ ವಾವ್ರ್ ಕರ್ಚೊ ಆಮ್ಚೊ ಸರ್ವಾಂಚೊ ಧರ್ಮ್ ಆನಿ ಗರ್ಜ್ ದೆಕುನ್ ಆಮಿಂ ಆಮ್ಚಾನ್ ತಾಂಕ್ಚೊ ವಾವ್ರ್ ಕರ್ಯಾಂ. ಆಮ್ಕಾಂ ತಾಂಕಾನಾಂ ತರ್ ತೊ ವಾವ್ರ್ ನಿಸ್ವಾರ್ಥ್ಪಣಿಂ ಕರ್ಚಾಂಕ್ ಪಾಟಿಂಬೊ ದಿಯಾ - ತಾಂಚ್ಯೊ ಖೊಡಿ ಕಾಡಿನಾಕಾತ್. ಆಮ್ಚಾ ಆವಯ್ಭಾಶೆಚೆರ್ ಭರ್ಮಾನ್ ಜಿಯೆಯಾ. ಕಿತ್ಯಾಕ್ ಆಮಿಂ ಕಿತೆಂ ಆಜ್ ವೊಂಪ್ತಾಂವ್ ತೆಂಚ್ ಫಾಲ್ಯಾಂ ಲುಂವ್ತೆಲ್ಯಾಂವ್. ಆಮಿಂ ಜರ್ ಆಜ್ ಮೋಗ್ ವೊಂಪ್ಲೊ ತರ್ ಫಾಲ್ಯಾಂ ಆಮಿಂ ಮೋಗ್ ಲುಂವೊಂಕ್ ಪಾವ್ತೆಲ್ಯಾಂವ್. ಆಮಿ ಜರ್ ಹಗೆಂ ಆನಿ ಮೊಸೊರ್ ವೊಂಪ್ಲೊ, ತರ್ ತೆಂಚ್ ಲುಂವೊಂಕ್ ಪಾವ್ತೆಲ್ಯಾಂವ್.
12. ದೇವ್ ಬರೆಂ ಕರುಂ ಪಾಸ್ಕಲಾಬ್ ತುಮಿಂ ಆಮ್ಕಾಂ ದಿಲ್ಲ್ಯಾ ಅಮೊಲಿಕ್ ವೆಳಾ ಖಾತಿರ್.
ಜಾ: ದೇವ್ ಬರೆಂ ಕರುಂ ಮೆಲ್ವಿನ್ ತುಕಾಯ್, ತುಂ ಮ್ಹಾಕಾ ಮೆಳೊನ್ ಇತ್ಲೆಂ ಉಲಯಿಲ್ಲ್ಯಾಕ್ ತಶೆಂಚ್ ಮ್ಹಾಕಾ ಆಯ್ಕಲ್ಲ್ಯಾಕ್.
ಹ್ಯಾ ಆಧ್ಲೆ ಕಾರ್ಭಾರಿ: 1, 2, 3, 4, 5, 6, 7, 8, 9, 10, 11
About us | Feedback | Contact us
Copyright ©
2005 DAAIZ.COM All rights reserved.
Page concept, designed and maintained by Ashawadi Publications
