ಕೊಂಕ್ಣೆಚಾ ವಿಂಚ್ಣಾರ್ ಸಾಹಿತ್ಯಾಚೊ ಕೊನ್ಸೊ - ’ದಾಯ್ಜ್’ - ಫಕತ್ತ್ ಕೊಂಕಣಿ ಥಾವ್ನ್ ಕೊಂಕಣಿ ಪರ್ಯಾಂತ್, ಕೊಂಕಣಿ ಖಾತಿರ್.
ಮೆಲ್ವಿನ್ ಜೆರಾಲ್ಡ್ ವಾಸ್: ಕೆಲರಾಯ್ ಫಿರ್ಗಜೆಜೊ, ಪಾಟ್ಲ್ಯಾ ಭಾರಾ ವರ್ಸಾಂ ಥಾವ್ನ್ ಕುವೆಯ್ಟಾಂತ್ ವಾವ್ರ್ ಕರುನ್ ಆಸಾ. ಚಡುಣೆಂ ಪಂದ್ರಾ-ಸೊಳಾ ವರ್ಸಾಧಿಂ ಸಾಹಿತ್ಯಾಚಿ ಸುರ್ವಾತ್ ಕರುನ್, 35 ಮಟ್ವ್ಯೊ ಕಾಣ್ಯೊ ಆನಿ ಏಕ್ ಕಾದಂಬರಿ ಬರಯಿಲ್ಲಿ ತರ್ಯೀ ಸಭಾರ್ ವರ್ಸಾಂನಿ ತಿ ಜಿವಾಳ್ ದವ್ರುಂಕ್ ಸಕಾನಾಸ್ತಾಂ ರಾವ್ಲೊ ತರ್ಯ್ ಕೊಂಕ್ಣಿ ಸಾಹಿತ್ಯಾಚೆರ್ ತೊಚ್ಚ್ ಮೋಗ್ ಆನಿ ಹುಸ್ಕೊ ಅಸೊನ್, ಆಯ್ಲೆವಾರ್ ಸರಾಗ್ ರಿತಿನ್ ವೆವೆಗ್ಳ್ಯಾ ಪ್ರಕಾರಾಚಿ ಸಾಹಿತಿಕ್ ಕೃಷಿ ಕರುನ್ ಕೊಂಕ್ಣಿ ವರ್ತುಲಾಂತ್ ನಾಂವಾಡ್ದಿಕ್ ಜಾಲಾ. ಕಾಣ್ಯಾಂಶಿವಾಯ್ 4 ನಾಟ್ಕುಳೆ, 75 ಕವಿತಾ, 10 ಲೇಖನಾಂ, 20 ವಿಮರ್ಶೆ/ಸಮೀಕ್ಶಾ ಬರಯ್ಲ್ಯಾತ್. ಹಾಚೊ ಸ್ವತಾಚೊ ( ಫುಡ್ಲದ್) ಕವಿತಾಜಮೊ ’ಆಟ್ವ್ಯಾ ರಂಗಾಚೊ ಧೊಣು’ ವೆಗಿಂಚ್ ’ಆಶಾವಾದಿ ಪ್ರಕಾಶನ್’ ಪರ್ಗಟ್ಚಾರ್ ಆಸಾ. ಹಾಚ್ಯಾಧಿಂ ಹಾಚಿಂ ಕವಿತಾಂ/ಲೇಕನಾಂ ’ಮೊತಿಯಾಂ ಆನಿ ತಾರಾಂ’, ’ಸಾಗೊರಾಚ್ಯಾ ವಾಟೆಚ್ಯೊ ಝರಿ’, ’ಕವಿತಾಪಾಠ್’ ಆನಿ ’ದರ್ಯಾಕ್ ಉದಾಕ್’ ಬುಕಾಂನಿ ಪರ್ಗಟ್ಲ್ಯಾಂತ್. ಪಾಟ್ಲ್ಯಾ ದೋನ್ ವರ್ಸಾಂ ಥಾವ್ನ್ ದಾಯ್ಜ್.ಕೊಮ್ ಸಾಯ್ಟಿಚೊ ಸಹ-ಸಂಪಾದಕ್ಯೀ ಹೊ ಜಾವ್ನಾಸಾ.
ಭ್ರಮಿದೆಂತ್ಲ್ಯೊ ಸಾವ್ಳ್ಯೊ: ಏಕ್ ಸಾಮಾಜಿಕ್ ಕಾದಂಬರಿ, ಪ್ರಮುಖ್ ಜಾವ್ನ್ ತೆಗಾಂಚ್ಯಾ ತೀನ್ ರಿತಿಚಾ ಸಂಭಂಧಾಂಚೆ ಎಕಾಮೆಕಾಚೆ ಗಾಂಚ್ ಮ್ಹಣ್ಯೆತಾ. ವಾಚ್ಪ್ಯಾಂಕ್ ಸಿಂತಿಮೆಂತಾಂ, ಚಿಂತಾಪ್, ಭಗ್ಣಾಂ, ಉಮಾಳೆ ಜಾಗಂವ್ಕ್ ಜರೂರ್ ಸಕ್ತೆಲಿ ಮ್ಹಳ್ಳೊ ಮ್ಹಜೊ ಭರ್ವಸೊ.
ಪುಸ್ತಕ್ ತೀನ್
ತುಜ್ಯಾ ವಿಂಚವ್ಣೆಚಿ ಝಡ್ತಿ
ಆವಸ್ವರ್ ತೆವೀಸ್
ಮಿಶೇಲಾಚಿ ಖುನ್ ಜಾಲ್ಲಿ!
ದರ್ಯಾ ತಡಿ ವಯ್ಲ್ಯಾ ಫಾತ್ರಾಂ ಮಧೆಂ ಮಿಶೇಲಾಚೆಂ ಮೊಡೆಂ ಶಿರ್ಕೊನ್ ಆಸ್ಲ್ಲೆಂ ಸಾಂಪಡ್ಲ್ಲೆಂ!
ಮಿಶೇಲಾಚಿ ಖುನ್ ಜಾವ್ನ್ ಸಭಾರ್ ದೀಸ್ ಜಾಲ್ಲ್ಯಾನ್ ಆನಿ ಮೊಡೆಂ ದರ್ಯಾಚಾ ಉದ್ಕಾಂತ್ ಆಸ್ಲ್ಲ್ಯಾನ್ ತೆಂ ಸಗ್ಳೆಂಚ್ ಪುಗ್ಲ್ಲೆಂ. ತಾಚ್ಯಾ ಮಾತ್ಯಾಚೆ ಕೇಸ್ ಸಗ್ಳೆ ಜಡೊನ್ ವಚೊನ್ ಸಗ್ಳ್ಯಾ ಆಂಗಾಕ್ ಮಾಸ್ಳ್ಯಾಂನಿ ಕೊಚಾಯಿಲ್ಲ್ಯಾನ್ ತೆಂ ಪಳಂವ್ಕ್ ವಿಕಾರ್ ದಿಸ್ತಾಲೆಂ. ತೊಂಡಾಚಿ ಖಾತ್ ವೊಡುನ್ ಗೆಲ್ಲಿ. ದೊಳೆ ನಾತ್ಲ್ಲೆ. ದೊನ್ಯ್ ಪಾಂಯಾಂಕ್ ನೈಲಾನ್ ದೊರಿಯೆಂತ್ ಬಾಂದುನ್ ತಿ ದೊರಿ ಥೊಡಿ ಲಾಂಬ್ ಆಸೊನ್ ತಾಕಾ ಪಾಸ್ ಮಾರ್ಲಲೊ ದಿಸ್ತಾಲೊ.
"ಮಿಶೇಲಾಚಿ ಖುನ್ ಉಣ್ಯಾರ್ ಉಣೆಂ ಎಕಾ ಹಪ್ತ್ಯಾ ಪಯ್ಲೆಂ ತರ್ಯ್ ಜಾಲ್ಯಾ! ತಾಚಿ ಖುನ್ ಕರುನ್ ತಾಚ್ಯಾ ಪಾಯಾಂಕ್ ಬಾಂದುನ್ ತ್ಯಾ ಪಾಂಯಾಂಕ್ ಕಿತೆಂ ತರ್ಯ್ ಜಡಾಯೆಚೆಂ ಬಾಂದುನ್ ಹ್ಯಾ ದರ್ಯಾಂತ್ ಉಡಯ್ಲಾಂ!" ಇನ್ಸ್ಪೆಕ್ಟರಾನ್ ರಾಯನಾಕ್ ವರ್ಧಿ ದಿತಾನಾ ತಾಕಾ ತಿಂ ಉತ್ರಾಂ ಆಯ್ಕೊಂಕ್ ಜಾಲಿಂ ನಾಂತ್.
ಹರ್ಯೆಕ್ ಘಡಿ ಮಿಶೇಲಾಕ್ ಪಳವ್ನ್ ಬಸೊಂಕ್ ಆಶೆಂವ್ಚೊ ರಾಯನ್ ಆಜ್ ಎಕಾ ಖಿಣಾಕ್ಯ್ ಹ್ಯಾ ಮಿಶೇಲಾಕ್ ಪಳಂವ್ಕ್ ಸಕ್ಲೊ ನಾ. ಮಿಶೇಲ್ ತಿತ್ಲೆಂ ವಿಕಾರ್ ಆನಿ ವಿದ್ರೂಪ್ ಜಾಲ್ಲೆಂ. ಫಕತ್ತ್ ಮಿಶೇಲಾನ್ ನ್ಹೆಸ್ಲೆಲ್ಯಾ ತಾಚ್ಯಾ ತ್ಯಾ ವಸ್ತುರಾ ಥಾವ್ನ್ ಆನಿ ಮಿಶೇಲಾಚಾ ಆಂಗಾ ವಯ್ಲ್ಯಾ ಭಾಂಗಾರಾ ಥಾವ್ನ್ ರಾಯನಾನ್ ಮಿಶೇಲಾಚಿ ವಳಕ್ ಧರ್ಲಿ.
ಮಿಶೇಲಾಚಿ ವಳಕ್ ಧರ್ಲಲೊ ರಾಯನ್ ತಾಚ್ಯಾ ಮತಿಚ್ಯಾ ಸಂತುಲನಾರ್ ನಾತ್ಲ್ಲೊ.
ಮಿಶೇಲಾಚೆಂ ಮರಣ್ ಇತ್ಲೆಂ ಭಿರಾಂಕುಳ್ ಜಾತೆಲೆಂ ಮ್ಹಣೊನ್ ತಾಣೆಂ ಚಿಂತುಂಕ್ ಸಯ್ತ್ ನಾತ್ಲ್ಲೆಂ.
ಮಿಶೇಲಾಚೆಂ ಪೋಸ್ಟ್ ಮಾರ್ಟಮ್ ಜಾತಾನಾ ಹೆಂ ಕಳಿತ್ ಜಾಲ್ಲೆಂ ಕೀ ಮಿಶೇಲಾಕ್ ಪಯ್ಲೆಂಚ್ ಜಿವೆಶಿಂ ಮಾರುನ್ ದರ್ಯಾಂತ್ ಉಡಯ್ಲಾಂ. ಮಿಶೇಲಾಚಾ ಆಂಗಾಂತ್ ಪಿಸ್ತುಲಾಚೊ ಏಕ್ ಬುಲೆಟ್ ಸಾಂಪಡ್ಲ್ಲೊ.
"ಮಿಸ್ಟರ್ ರಾಯನ್! ಮಿಶೇಲಾಚೆಂ ಮರ್ಡರ್ ಕರುನ್ ಉಪ್ರಾಂತ್ ತಾಕಾ ದರ್ಯಾಂತ್ ಉಡಯ್ಲಾಂ! ತ್ಯಾ ಭಾಯ್ರ್ ತಾಚ್ಯಾ ಪಾಂಯಾಂಕ್ ಕಿತೆಂ ತರ್ಯ್ ಜಡಾಯೆಚೆಂ ಬಾಂದುನ್ ತಾಚೆಂ ಮೊಡೆಂ ಪಾಸೊನ್ ಹ್ಯಾ ಉದ್ಕಾ ಥಾವ್ನ್ ವಯ್ರ್ ಉಪ್ಯೆವ್ನ್ ಯೇಂವ್ಕ್ ದೀನಾಸ್ತಾನಾ ತ್ಯಾ ದರ್ಯಾ ಭಿತರ್ಲ್ಯಾ ಮಾಸ್ಳ್ಯಾಂಕ್ ಖಾವಂವ್ಚೆಂ ಹೆಂ ಪ್ರಯತ್ನ್ ಕೆಲಾಂ. ತುಕಾ ಕೊಣಾಯ್ಚೆರ್ ದುಬಾವ್ ಆಸಾ.....?" ಇನ್ಸ್ಪೆಕ್ಟರ್ ರಾಯನಾಚಾ ದುಬಾವಾಕ್ ಆಯ್ಕೊಂಕ್ ಆತುರ್ ಆಸ್ಲ್ಲೊ. ಲಾಗಿಂ ಲಾಗಿಂ ಏಕ್ ಮಹಿನೊ ನಾಪತ್ತೊ ಜಾಲ್ಲೆಂ ಮಿಶೇಲ್ ಆತಾಂ ಮೆಳ್ಲ್ಲೆಂ ಜಾಲ್ಯಾರ್ಯ್ ಎಕಾ ನಿರ್ಜೀವ್ ರುಪಾನ್. ತಾಚ್ಯಾ ನಿರ್ಜೀವ್ಪಣಾಚೆಂ ರೂಪ್ ಜಾಲ್ಯಾರ್ಯ್ ಕಸಲೆಂ? ನಿಜಾಯ್ಕ್ಯ್ ಭಯಾನಕ್!
ರಾಯನ್ ಕೊಣಾಚೆರ್ ದುಬಾವ್ ಕರ್ತಲೊ? ಮಿಶೇಲಾಕ್ ಹ್ಯಾ ಮುಂಬಯಿಂತ್ ವಳ್ಕೊಂಚಿಂಚ್ ಕೊಣ್ಯ್ ನಾತ್ಲ್ಲಿಂ ಮ್ಹಳ್ಯಾ ಉಪ್ರಾಂತ್ ತಾಚಿಂ ದುಸ್ಮಾನಾಂ ಕೋಣ್ ಆಸೊಂಕ್ ಸಕ್ತಾತ್? ಕೊಣಾಯ್ಚೆರ್ ದುಬಾವ್ ಕರ್ಚ್ಯಾ ತಿತ್ಲಿ ಸಕತ್ ರಾಯನಾಚಾ ಮತಿಕ್ ಆಯ್ಲಿ ನಾ.
ಕಾಂಯ್ಚ್ ನೆಣಾ ಆಸ್ಲ್ಲೊ ಏಕ್ ನಿರಫ್ರಾಧಿ ಜೀವ್ ಬಲಿ ಜಾಲ್ಲೊ.
ಶೀತಲಾನ್ ಆತಾಂ ವೇಳ್ ಕಾಡ್ಲೊ ನಾ. ಶೀತಲಾನ್ ಆಲಿಯಾ ವಯ್ಲ್ಯಾ ಆಪ್ಲ್ಯಾ ದುಬಾವಾಕ್ ಪೊಲಿಸಾಂ ಮುಕಾರ್ ದವರ್ಲೊ.
ಶೀತಲಾಚಾ ಸಾಂಗ್ಣ್ಯಾ ಥಾವ್ನ್, ಆಲಿಯಾ ವಯ್ರ್ ಜಾಲ್ಲ್ಯಾ ಹಲ್ಲ್ಯಾಕ್ ಆನಿ ಹ್ಯಾ ಮಿಶೇಲಾಚಾ ಖುನಿಯೆಕ್ ಖಂಡಿತ್ ಸಂಭಂಧ್ ಆಸಾ ಮ್ಹಳ್ಳೆಂ ಪೊಲಿಸಾಂಕ್ ಸಮ್ಜಾಲೆಂ. ದರ್ಯಾ ತಡಿರ್ ಮೆಳ್ಲ್ಲೆಂ ಮೊಡೆಂ ಮಿಶೇಲಾಚೆಂಚ್ ಮ್ಹಣೊನ್ ಉಗ್ತ್ಯಾನ್ ಪಾಚಾರ್ಚ್ಯಾ ಆದಿಂ ಭಟ್ನಾಗರಾನ್ ಆಲಿಯಾಕ್, ಇಕ್ಬಾಲಾಕ್ ಆನಿ ರಾಶಿದಾಕ್ ಅರೆಸ್ಟ್ ಕೆಲೆಂ.
ಶೀತಲಾಚಾ ದುಬಾವಾ ಥಾವ್ನ್ ತಾಚ್ಯಾ ಘೊವಾಚೆಂ ವಿಶು ಕುಮಾರಾಚೆಂ ಆಕ್ಸಿಡೆಂಟ್ಯ್ ತೆಂ ಆಕ್ಸಿಡೆಂಟ್ ನ್ಹಯ್ ಬಗಾರ್ ತಿಯ್ ಖುನ್ ಮ್ಹಳ್ಳಿ ಪೊಲಿಸಾಂಕ್ ಖಾತ್ರಿ ಜಾಲಿ. ಪೊಲಿಸಾಂನಿ ವಿಶುಚ್ಯಾ ಆಕ್ಸಿಡೆಂಟಾಚಿ ಕೇಸ್ ಪರ್ತ್ಯಾಕ್ ಭಾಯ್ರ್ ಕಾಡ್ಲಿ.
ಕೊರ್ಟಾಂತ್ ಎದೊಳ್ಚ್ ಆಲಿಯಾಕ್ ಆನಿ ಇಕ್ಬಾಲ್ ರಾಶಿದಾಕ್ ಸಂಭಂಧ್ ಆಸ್ಲ್ಲೊ ವಿಶಯ್ ರುಜು ಜಾಲ್ಲೊ. ಆತಾಂ ರಾಯನಾಚಾ ಉಚಾರಾ ಥಾವ್ನ್ ಆನಿ ಶೀತಲಾಚಾ ಉಚಾರಾ ಥಾವ್ನ್ ವಿಶು ಕುಮಾರಾಕ್ ಆನಿ ಇಕ್ಬಾಲಾಕ್ ಸಂಭಂಧ್ ಆಸ್ಲ್ಲೊ ಮ್ಹಳ್ಳೊ ಪೊಲಿಸಾಂಕ್ ನಖ್ಖಿ ಜಾಲೆಂ.
ವಿಶು ಕುಮಾರಾಕ್ ಆನಿ ಆಲಿಯಾಕ್ ಸಂಭಂಧ್ ಆಸ್ಲ್ಲ್ಯಾ ವಿಶಿಂ ಇಕ್ಬಾಲಾನ್ ಆಪ್ಣಾಕ್ ಪೋನ್ ಕರುನ್ ಸಾಂಗ್ಲ್ಲೊ ವಿಶಯ್ ಶೀತಲಾನ್ ಪೊಲಿಸಾಂ ಮುಕಾರ್ ದವರ್ಲೊ. ಹ್ಯಾ ಉಪ್ರಾಂತ್ ಪೊಲಿಸಾಂಕ್ ನಖ್ಖಿ ಜಾಲೆಂ ಕೀ ಹ್ಯಾ ಸಗ್ಳ್ಯಾಂಕ್ ಎಕಾ ಥಾವ್ನ್ ಎಕಾಕ್ ಸಂಭಂಧ್ ಆಸಾ. ತಾಣಿಂ ಶೀತಲಾಕ್ ಮುಖ್ಯ್ ಸಾಕ್ಶಿ ಜಾವ್ನ್ ಘೆತ್ಲೆಂ. ಆನಿ ತಾಂಚೆಂ ಕಾರ್ಯಾಚರಣ್ ಆರಂಭ್ ಕೆಲೆಂ. ಭಟ್ನಾಗರಾಚಾ ಮ್ಹಿನತೆನ್ ಹ್ಯಾ ಪಾವ್ಟಿಂ ಇಕ್ಬಾಲಾಕ್ ಬೇಯ್ಲ್ ಮೆಳ್ಳಿ ನಾ.
ಭಟ್ನಾಗರಾನ್ ಆಲಿಯಾಚಾ ಆದ್ಲ್ಯಾ ಚರಿತ್ರ್ಯಾಕ್ ಉಸ್ತಿಲೆಂ. ಹಾಚ್ಯೆ ಥಾವ್ನ್ ಸಗ್ಳೆಂ ಸತ್ ತಾಂಚೆ ಮುಕಾರ್ ಆಯ್ಲೆಂ. ಮಿಶೇಲಾಚಾ ಖುನಿಯೆಕ್ ಆನಿ ಆಕ್ಸಿಡೆಂಟ್ ಮ್ಹಣೊನ್ ಎದೊಳ್ ಧಾಂಪುನ್ ಗೆಲ್ಲ್ಯಾ ವಿಶು ಕುಮಾರಾಚಾ ಮರ್ಣಾಕ್ ಹೆಂ ಆಲಿಯಾ ಆನಿ ಇಕ್ಬಾಲ್ ರಾಶಿದ್ಚ್ ಕಾರಾಣ್ ಮ್ಹಣೊನ್ ಕಳಿತ್ ಜಾತಾನಾ ಹ್ಯಾ ಕೇಸಿಚಾ ಮುಳಾ ಪಾಸೊನ್ ಪೊಲಿಸಾಂನಿ ಸೊಧ್ನಾಂ ಆರಂಭ್ ಕೆಲಿಂ.
ರಾಯನಾಕ್ ಆನಿ ಸಾವಂತಾಕ್ ಆಲಿಯಾನ್ ಆಶೆಂ ಕೆಲಾಂ ತೆಂ ಆಯ್ಕೊನ್ ಧಖೊ ಬಸ್ಲೊ. ಕೆದ್ನಾಂಚ್ ಶಾಂತ್ ಆಸೊನ್ ಸದಾಂಚ್ ಸೊಭಿತ್ ಮುಖಮಳಾಚೆಂ ಆಲಿಯಾ ಇತ್ಲ್ಯಾ ಭಿರಾಂಕುಳ್ ಸ್ವಭಾವಾಚೆಂ ಮ್ಹಳ್ಳೆಂ ತೆಂ ರಾಯನಾಕ್ ಪಾತ್ಯೆಂವ್ಕ್ ಜಾಲೆಂ ನಾ. ಸಾವಂತಾಕ್ ಜರೀ ಆಲಿಯಾ ಸವೆಂ ತೆ ಸ ಮಹಿನೆ ಕಾಮ್ ಕರುನ್ ಆನ್ಭೋಗ್ ಆಸ್ಲ್ಲೊ. ತಾಕಾ ತ್ಯಾ ಸ ಮಹಿನ್ಯಾಂನಿ ಆಲಿಯಾ ಕೆದ್ನಾಂಚ್ ಅಸಲ್ಯಾ ವಿಚಾರಾಂಚೆಂ ಚಲಿ ಮ್ಹಳ್ಳೆಂ ಭೊಗ್ಲ್ಲೆಂ ನಾ. ತೊ ಆಲಿಯಾಚಾ ವಯ್ಲ್ಯಾ ಹ್ಯಾ ಆಫ್ರಾಧಾಕ್ ಮಾಂದುನ್ ಘೆಂವ್ಕ್ ತಯಾರ್ ಜಾಲೊ ನಾ.
ರಾಮ್ ಪ್ರಸಾದಾಕ್ ಮಿಶೇಲಾಚಾ ವಿಶಿಂ ಆಯ್ಕೊನ್ ಸಂಸಾರ್ಚ್ ಕೊಸ್ಳೊನ್ ಗೆಲ್ಲ್ಯಾ ಪರಿಂ ಜಾಲೆಂ. ಮಿಶೇಲಾಚಾ ಖುನಿಯೆಚೊ ಆಫ್ರಾಧ್ ಪೊಲಿಸಾಂನಿ ಆಲಿಯಾ ವಯ್ರ್ ಮಾಂಡ್ಲ್ಯಾ ಉಪ್ರಾಂತ್ ಕೊರ್ಟಾಂತ್ ಆಲಿಯಾಚಾ ತರ್ಫೆನ್ ಝಗ್ಡೊನ್ ಕಾಂಯ್ ಫಾಯ್ದೊ ನಾತ್ಲ್ಲೊ. ಮಿಶೆಲ್ ರಾಯನಾಚೆಂ ಬಾಯ್ಲ್! ಅಸಲ್ಯಾ ಮಿಶೇಲಾಚಿ ಖುನ್ ಜಾಲ್ಯಾ ಮ್ಹಳ್ಯಾರ್ ರಾಯನ್ ಹ್ಯಾ ಆಲಿಯಾಕ್ ಮಾಫ್ ಕರ್ತಲೊ? ಕೆದಿಂಚ್ ನಾ. ಆಶೆಂ ಆಸ್ತಾನಾ ರಾಯನಾಚಾ ವಿರೋಧ್ ಆಪ್ಣೆಂ ಆಲಿಯಾಚಾ ಪಾಡ್ತೆನ್ ಝುಜೊಂಕ್ ಸಾದ್ಯ್ ಆಸಾ?
ರಾಮ್ ಪ್ರಸಾದ್ ಹ್ಯಾ ವಿಶ್ಯಾಂತ್ಚ್ ಉಲಂವ್ಚ್ಯಾಕ್ ರಾಯನಾಚಾ ಘರಾ ಆಯ್ಲೊ.
"ಮ್ಹಾಕಾ ನಿಜಾಯ್ಕ್ಯ್ ಹ್ಯಾ ಆಲಿಯಾ ವಯ್ರ್ ಕಾಂಯ್ಚ್ ದುಬಾವ್ ನಾತ್ಲ್ಲೊ ರಾಯನ್! ಆಲಿಯಾ ಆಶೆಂ ಕರ್ತೆಲೆಂ ಮ್ಹಣೊನ್ ಮ್ಹಾಕಾ ದುಬಾವ್ ತರ್ಯ್ ಜಾಲ್ಲೊ ಜಾಲ್ಯಾರ್ ಹಾಂವ್ ಮಿಶೇಲಾಕ್ ಉರಂವ್ಚೆಂ ಪ್ರಯತ್ನ್ ಕರ್ತೊಂ! ನಿಜಾಯ್ಕ್ಯ್ ಐ ಯಾಮ್ ವೆರ್ರಿ ಸಾರ್ರಿ!" ರಾಮ್ ಪ್ರಸಾದಾಚಾ ತಾಳ್ಯಾಂತ್ ಬೆಜಾರಾಯ್ ಆಸ್ಲ್ಲಿ.
"ತುಜಿ ಕಾಂಯ್ ಚೂಕ್ ನಾ ಪ್ರಸಾದ್! ಮ್ಹಾಕಾಚ್ ಮ್ಹಜ್ಯೆರ್ ಪಾತ್ಯೆಂವ್ಕ್ ಜಾಯ್ನಾಂ. ಹಾವೆಂಚ್ ಮ್ಹಾಕಾ ಧಗೊ ದಿಲಾ! ಎಕಾ ವಾಟೆನ್ ಪಳೆಲ್ಯಾರ್ ಮಿಶೇಲಾಚಾ ಮೊರ್ಣಾಕ್ ಹಾಂವ್ಚ್ ಕಾರಾಣ್! ಕಿತ್ಯಾಕ್ ಮ್ಹಣೊನ್ ಹಾಂವ್ ತಾಕಾ ಹ್ಯಾ ಮುಂಬಯಿಕ್ ಆಪವ್ನ್ ಹಾಡುನ್ ಆಯ್ಲೊಂ ಮ್ಹಳ್ಳೆಂಚ್ ದೂಖ್ ಮ್ಹಾಕಾ!" ಮಿಶೇಲಾ ವಿಣೆಂ ರಾಯನಾಚೊ ಸಂಸಾರ್ ನಿಜಾಯ್ಕ್ಯ್ ಅಂದ್ಕಾರಾಂತ್ ಉಪ್ಯೆತಾಲೊ. ಹ್ಯಾ ದಿಸಾಂನಿ ರಾಯನ್ ಸಂಪೂರ್ಣ್ ಬದ್ಲಾಲ್ಲೊ. ತಾಚ್ಯಾ ಉಲವ್ಣ್ಯಾಂತ್ ತಾಣೆಂ ಮನ್ಶ್ಯಾಕ್ ಪಳಂವ್ಚ್ಯಾ ನದ್ರೆಂತ್ ಮಸ್ತ್ ಬದ್ಲಾವಣ್ ಜಾಲ್ಲಿ.
"ಏಕ್ ಮಿನಿಟ್!" ಆಪ್ಲ್ಯಾ ಬಸ್ಕೆರ್ ಥಾವ್ನ್ ಉಟ್ಲಲೊ ರಾಯನ್ ಮುಕಾರ್ ಗೆಲ್ಲೊ ತೊ ಮುಕ್ಲ್ಯಾ ಲ್ಹಾನ್ ಕಬಟಾಕ್ ಉಗ್ತೆಂ ಕರುನ್ ತ್ಯಾ ಕಬಟಾ ಭಿತರ್ಲಿ ಶಿವಾಸ್ ರೀಗಲ್ ವಿಸ್ಕಿ ಭಾಯ್ರ್ ಕಾಡುನ್ ತಿ ತಾಣೆಂ ರಾಮ್ ಪ್ರಸಾದಾಚಾ ಮುಕಾರ್ ದವರ್ಲಿ.
"ಶಮ್ಮಿ.....? ದೋನ್ ಗ್ಲಾಸ್ ಆನಿ ಥೊಡೆಂ ಐಸ್ ಹಾಡ್!" ತಾಣೆಂ ಶಮ್ಮಿಕ್ ಉಲೊ ದಿಲೊ.
ಶಮ್ಮಿನ್ ಹಾಡುನ್ ದಿಲ್ಲ್ಯಾ ಗ್ಲಾಸಾಂಕ್ ವಿಸ್ಕಿ ಬಾಗಾವ್ನ್ ತಾಣೆಂ ತಿ ರಾಮ್ ಪ್ರಸಾದಾಚಾ ಮುಕಾರ್ ದವರ್ಲಿ. ಐಸ್ ಬಾಕ್ಸಾಂತ್ಲೆ ದೋನ್ ಐಸ್ ಕ್ಯೂಬ್ ಕಾಡುನ್ ಆಪ್ಣಾಚಾ ಗ್ಲಾಸಾಂತ್ ಘಾಲುನ್ ದೋನ್ ಐಸ್ ಕ್ಯೂಬ್ ರಾಮ್ ಪ್ರಸಾದಾಚಾ ಗ್ಲಾಸಾಕ್ ದೆಂವಯ್ಲೆಂ.
ರಾಯನಾನ್ ಆಪ್ಣಾಕ್ ದಿಂವ್ಚಿ ಸೆವಾ ಪಳಯಿಲ್ಲೊ ರಾಮ್ ಪ್ರಸಾದ್, ರಾಯನ್ ಆಜ್ ಆಪ್ಣಾ ಥಾವ್ನ್ ಕಿತೆಂ ತರ್ಯ್ ಆಶೆತಾ ಮ್ಹಳ್ಳೆಂ ಸಮ್ಜಾಲೊ. ತೊ ಜಾಲ್ಯಾರ್ಯ್ ರಾಯನಾನ್ ಸಾಂಗ್ಲೆಲ್ಯಾ ಪರಿಂ ಆಯ್ಕೊಂಕ್ ತಯಾರ್ ಆಸ್ಲ್ಲೊ.
"ಆತಾಂ ಕಿತೆಂ ಕರ್ಯಾಂ ಮ್ಹಣ್ತಾಯ್ ತುಂ.....?" ರಾಮ್ ಪ್ರಸಾದಾಕ್ ರಾಯನಾಚಾ ಆದೇಶಾಚಿ ಗರ್ಜ್ ಆಸ್ಲ್ಲಿ.
ರಾಮ್ ಪ್ರಸಾದಾಚಾ ಸವಾಲಾಕ್ ರಾಯನಾನ್ ಕಾಂಯ್ ಜವಾಬ್ ದಿಲಿ ನಾ. ತಾಣೆಂ ಆಪ್ಲ್ಯಾ ವಿಸ್ಕೆಚೊ ಗ್ಲಾಸ್ ತೊಂಡಾಕ್ ಧರ್ಲೊ. ಪುಣ್ ತಾಚ್ಯಾ ಮತಿನ್ ಪ್ರಸಾದಾಚಾ ಸವಾಲಾಕ್ ಜವಾಬ್ ದಿಲಿ.
"ಮ್ಹಜ್ಯಾ ಆವಯ್ಚ್ಯಾ ಉಪ್ರಾಂತ್ ಹಾವೆಂ ಕೆದ್ನಾಂಚ್ ಎಕಾ ಚಲಿಯೆ ವಯ್ರ್ ಭರ್ವಸೊ ಕರುಂಕ್ ನಾತ್ಲ್ಲೊ. ಪುಣ್ ಮಿಶೇಲ್....? ಮಿಶೇಲ್ ತಶೆಂ ನ್ಹಯ್ ಆಸ್ಲ್ಲೆಂ. ಮಿಶೇಲಾನ್ ಮ್ಹಜ್ಯಾ ಪಾತ್ಯೆಣೆಕ್ ಫಟ್ ಕೆಲ್ಲೆಂ. ತಾಚ್ಯೆ ಥಾವ್ನ್ ಹಾಂವ್ ಚಲಿ ಮ್ಹಳ್ಯಾರ್ ಕಿತೆಂ ಮ್ಹಳ್ಳೆಂ ಸಮ್ಜಾಲೊಂ. ಮ್ಹಜೆಂ ಮಿಶೇಲ್ ಪ್ರಾಯೆನ್ ವಾಡೊನ್ ಚಲಿ ಜಾಲ್ಲೆಂ ಜಾಂವ್ಕ್ ಪುರೊ. ಪುಣ್ ತೆಂ ಅಜೂನ್ ನೆಣ್ತೆಂ. ತೆಂ ಸಂಸಾರಾಕ್ ಜಾಣಾಂ ಜಾಲಾಂ ಜಾಂವ್ಕ್ ಪುರೊ ಪುಣ್ ಸಂಸಾರಾನ್ ಆಪ್ಣಾಕ್ ಜಾಣಾಂ ಜಾಯ್ಜಯ್ ಮ್ಹಳ್ಳಿ ಆಶಾ ತಾಕಾ ನಾತ್ಲ್ಲಿ. ಮ್ಹಜ್ಯೆ ಸವೆಂ ನ್ಹಯ್ ಜಾಲ್ಯಾರ್ ಕೊಣಾಯ್ ಸಾಂಗಾತಾ ತೆಂ ಏಕ್ ಸಂತೊಸಾಚೆಂ ಜಿವಿತ್ ಕಾಡುಂಕ್ ಸಕ್ತೆಂ. ಕೆದ್ನಾಂಚ್ ಸುಖ್ ಆಶೆಲ್ಲೆಂ ಚೆಡುಂ ತೆಂ ನ್ಹಯ್! ಫಕತ್ತ್ ಮತಿಚೊ ಸಂತೊಸ್ ಆನಿ ಕಾಳ್ಜಾಚೊ ಉಲ್ಲಾಸ್ ಮಾತ್ರ್ ತಾಣೆಂ ಆಶೆಲ್ಲೊ! ಮ್ಹಜ್ಯಾ ಮಿಶೇಲಾಚೊ ಸಂಸಾರ್ಯ್ ಕಿತ್ಲೊ ಸೊಭಿತ್ ಆಸ್ಲ್ಲೊ.....! ಹೊ ರಾಯನ್ ಆಪ್ಣಾಕ್ಚ್ ’ಕೀಂಗ್ ಮೇಕರ್’ ಮ್ಹಣೊನ್ ಘಮಂಡಾನ್ ಉಲಂವ್ಚೊ, ಹ್ಯಾ ಮಿಶೆಲಾಚಾ ಮತಿಕ್ ಸಮಾಧಾನ್ ದೀಂವ್ಕ್ಯ್ ಸಕ್ಲೊ ನಾ. ಕಿತೆಂ ಸತ್ ಮ್ಹಳ್ಳೆಂ ತೆಂ ಮ್ಹಾಕಾ ಜಾಣಾಂ ಜಾಂವ್ಕ್ ಜಾಯ್ !" ಮತಿಂತ್ಚ್ ಉಲಯಿಲ್ಲ್ಯಾ ರಾಯನಾನ್ ಪರ್ತ್ಯಾಕ್ ಆಪ್ಣಾಚೊ ವಿಸ್ಕೆಚೊ ಗ್ಲಾಸ್ ತೊಂಡಾಕ್ ವೆಲೊ.
ರಾಯನಾಚಾ ಕಾಳ್ಜಾಂತ್ ಎಕಾ ವಿಚಿತ್ರ್ ಥರಾಚಾ ಫಾರಿಕ್ಪಣಾಚೊ ಉಜೊ ಝಳ್ತಾಲೊ. ರಾಮ್ ಪ್ರಸಾದ್ ಖಾಸ್ಗೆನ್ ರಾಯನಾಕ್ ಬರೆಂ ವಳ್ಕಾತಾಲೊ. ರಾಯನಾಚಾ ತೊಂಡಾರ್ ಬದ್ಲುಂಚಾ ತಾಚ್ಯಾ ಛಾರ್ಯಾಕ್ ತೊ ರೂಪ್ ರೂಪ್ ವಾಚೊಂಕ್ ಸಕ್ಲೊ. ತೊ ಹೆಂಯ್ ಜಾಣಾಂ ಕೀ ರಾಯನ್ ಆಪ್ಲ್ಯಾ ದುಸ್ಮಾನಾಂಕ್ ಕಿತ್ಲೆಂ ದ್ವೇಶಿತಾ ಮ್ಹಳ್ಳೆಂ.
"ಲೆಟ್ ದೆಮ್ ಹ್ಯಾಂಗ್ ಅಂಟಿಲ್ ಡೆತ್!" ರಾಯನಾಚಾ ಜಿಬೆರ್ ಥಾವ್ನ್ ಉತ್ರಾಂ ಉಸಾಳ್ಳಿಂ.
ರಾಯನಾಚೆಂ ಫೈಸಲ್ಚ್ ನಿಮಾಣೆಂ ಫೈಸಲ್! ಹ್ಯಾ ಫೈಸಾಲಾಕ್ ತ್ಯಾ ಕೊರ್ಟಾಂತ್ಲ್ಯಾ ಜಡ್ಜಾನ್ ಬದ್ಲಿಲ್ಯಾರ್ಯ್ ರಾಯನ್ ಆಪ್ಲ್ಯಾ ಬುದ್ವಂತ್ಕಾಯೆನ್ ತ್ಯಾಚ್ ಜಡ್ಜಾಕ್ ರಾಯನಾಚಾ ತರ್ಫೆನ್ಚ್ ಪೈಸಲ್ ದಿವಯ್ಶೆಂ ಕರ್ತಾ. ಹೆಂ ಫೈಸಲ್ ಆನಿ ಕೊಣಾ ಥಾವ್ನ್ಯ್ ಬದ್ಲುಂಕ್ ಸಾದ್ಯ್ ನಾ. ಪ್ರಸಾದಾನ್ ಚಿಂತ್ಲೆಂ.
"ಮ್ಹಾಕಾ ಏಕ್ ಪಾವ್ಟಿಂ ಮ್ಹಜ್ಯಾ ಮಿಶೇಲಾಚಿ ಹಿ ಗತ್ ಕೊಣೆ ಕೆಲ್ಯಾ ಮ್ಹಳ್ಳಿ ಖಬಾರ್ ಮೆಳಾತ್ ಜಾಲ್ಯಾರ್.....!" ಉಲಂವ್ಚ್ಯಾ ರಾಯನಾನ್ ಆಪ್ಲ್ಯಾ ಗ್ಲಾಸಾಕ್ ಶಿವಾಸ್ ರೀಗಲಾಚಿ ಬಾಟ್ಲಿ ಬಾಗಾಯ್ಲಿ. "ಮಿಶೇಲ್ ಕಾಂಯ್ಚ್ ಪಾಪ್ ಖತ್ ನಾತ್ಲೆಲಿ ಏಕ್ ಮುಗ್ದ್ ಶೆಳಿ!" ರಾಯನ್ ಆಪ್ಲ್ಯಾ ಕಾಳ್ಜಾಚಾ ಗೂಂಡಾಯೆ ಥಾವ್ನ್ ಉಲಯ್ತಾಲೊ.
"ತುಂ ಕೊರ್ಟಾಕ್ ಯೆತಾಯ್....?" ರಾಮ್ ಪ್ರಸಾದಾನ್ ವಿಸ್ಕೆಚೊ ಏಕ್ ಸಿಪ್ ಮಾರುನ್ ಆಪ್ಲೊ ಗ್ಲಾಸ್ ಮೆಜಾರ್ ದವರ್ಲೊ.
"ಹಾಂವ್ ಸಾಕ್ಸ್ ಜಾವ್ನ್ ಯೆಂವ್ಚೊಂ ನಾ! ಪುಣ್ ಜಡ್ಜಾನ್ ಫೈಸಲ್ ವಾಚ್ತಾನಾ ಹಾಂವ್ ಯೆತಲೊಂ. ಮ್ಹಾಕಾ ಪಳಂವ್ಕ್ ಜಾಯ್! ಮ್ಹಾಕಾ ಪಳಂವ್ಕ್ ಜಾಯ್ ಮಿಶೇಲಾಚ್ಯಾ ಖುನಿಯೆಕ್ ಕಾರಾಣ್ ಜಾಲ್ಲ್ಯಾ ಜ್ಯಾ ಮನ್ಶ್ಯಾಂಚಾ ದೊಳ್ಯಾಂನಿ ಮರ್ಣಾಕ್ ಪಳೆತಾನಾ ತಾಂಚಾ ದಿಶ್ಟಿಂತ್ ವ್ಹಾಳೊನ್ ಯೆಂವ್ಚೆಂ ಭ್ಯೆಂ ಕಿತ್ಲೆಂ ಭಿರಾಂಕುಳ್ ಆಸ್ತಾ ತೆಂ! ಹೆಂ ಪಳಂವ್ಕ್ ಹಾಂವ್ ಯೆತಲೊಂ. ಆನಿ ಹಾವೆಂ ಯೇಂವ್ಕ್ಚ್ ಜಾಯ್!"
ರಾಯನಾಚಾ ಉಲವ್ಣ್ಯಾಂತ್ ಆಸ್ಲ್ಲೊ ತಿರಸ್ಕಾರ್ ರಾಮ್ ಪ್ರಸಾದಾನ್ ಎದೊಳ್ ಪಳಂವ್ಕ್ ನಾತ್ಲ್ಲೊ. ರಾಯನಾನ್ ವೊತ್ಲ್ಲ್ಯಾ ವಿಸ್ಕೆಚೊ ನಿಮಾಣೊ ಸಿಪ್ ರಾಮ್ ಪ್ರಸಾದಾನ್ ಮಾರ್ಲೊ.
ರಾಮ್ ಪ್ರಸಾದಾಚೊ ಗ್ಲಾಸ್ ಖಾಲಿ ಜಾಲ್ಲೊ ಪಳವ್ನ್ ರಾಯನಾನ್ ವಿಸ್ಕೆಚ್ಯಾ ಬಾಟಲಿಕ್ ಪರ್ತ್ಯಾಕ್ ಹಾತ್ ವೆಲೊ.
"ಮ್ಹಜೆಂ ಜಾಲೆಂ ರಾಯನ್! ಪುರೊ. ತರ್ ಹಾವೆಂ ಕಿತೆಂ ಕರುಂಕ್ ಜಾಯ್ ಮ್ಹಣ್ಚೆಂ ತುವೆಂ?" ರಾಮ್ ಪ್ರಸಾದ್ ಆಪ್ಲ್ಯಾ ಬಸ್ಕೆರ್ ಥಾವ್ನ್ ಉಟ್ಲೊ.
"ತುಕಾ ಅಜೂನ್ಯ್ ಸಮ್ಜೊಂಕ್ ನಾ?" ರಾಯನಾನ್ ರಾಮ್ ಪ್ರಸಾದಾಕ್ಚ್ ಪಳೆಲೆಂ. ತಾಚ್ಯಾ ದೊಳ್ಯಾಂಚಿ ದೀಶ್ಟ್ ಚಡ್ಚ್ ತೀಕ್ಶ್ಣ್ ಆಸ್ಲ್ಲಿ. "ಆಲಿಯಾಕ್ ವಾಂಚಂವ್ಚ್ಯಾ ನಿಬಾನ್ ತುವೆಂ ತಾಕಾ ಫಸಂವ್ಕ್ ಜಾಯ್! ಆನಿ ಸತ್ ಜಾಣಾಂ ಜಾಂವ್ಕ್ ಜಾಯ್! ಆನಿ ಸತ್ ಜಾಣಾಂ ಜಾಲ್ಯಾ ಉಪ್ರಾಂತ್ ತುವೆಂ ಕಿತೆಂ ಕರುಂಕ್ ಜಾಯ್ ಮ್ಹಳ್ಳೆಂ ಹಾವೆಂ ತುಕಾ ಸಾಂಗೊಂಕ್ ಜಾಯ್ ಮ್ಹಳ್ಳಿ ಗರ್ಜ್ ನಾ ಮ್ಹಣೊನ್ ದಿಸ್ತಾ!"
"ಸಮ್ಜಾಲೆಂ ರಾಯನ್! ಕೊಣಾಯ್ಕ್ಯ್ ಕಾಂಯ್ಚ್ ದುಬಾವ್ ಜಾಂವ್ಚೊ ನಾ!" ರಾಯನಾಚೊ ಮತ್ಲಾಬ್ ರಾಮ್ ಪ್ರಸಾದ್ ಸಮ್ಜಾಲೊ.
"ಉಡಾಸ್ ದವರ್ ಪ್ರಸಾದ್! ಹ್ಯಾ ಕೇಸಿಚೆಂ ಫೈಸಲ್ ಮಾತ್ರ್ ಮ್ಹಜ್ಯಾ ತರ್ಫೆನ್ ಯೇಂವ್ಕ್ ಜಾಯ್! ಐ ವಿಲ್ ಹ್ಯಾಂಗ್ ದೆಮ್ ಅಂಟಿಲ್ ಡೆತ್!" ರಾಯನಾಚೆಂ ನಿಮಾಣೆಂ ಫೈಸಲ್ ಪ್ರಸಾದಾಚಾ ಕಾನಾಂಕ್ ಪರ್ತ್ಯಾಕ್ ಘಡ್ಗಡ್ಯಾಪರಿಂ ಘಾಜ್ಲೆಂ.
"ಹಾಂ ರಾಯನ್!" ರಾಮ್ ಪ್ರಸಾದಾನ್ ಆಪ್ಲಿ ತಕ್ಲಿ ಬಾಗಾಯ್ಲಿ.
ಘರಾ ಥಾವ್ನ್ ಭಾಯ್ರ್ ಆಯಿಲ್ಲೊ ರಾಮ್ ಪ್ರಸಾದ್ ಆಪ್ಲ್ಯಾ ಕಾರಾರ್ ಬಸ್ಲೊ. ತಾಣೆಂ ಆಪ್ಲೆಂ ಕಾರ್ ಚಾಲು ಕೆಲೆಂ.
"ದೇಟ್ಸ್ ರಾಯನ್! ಆಲ್ಫ್ರೆಡ್ ರಾಯನ್!" ಕಾರಾಚೆಂ ಆಕ್ಸಿಲೇಟರ್ ದಾಂಬ್ತಾನಾ ರಾಮ್ ಪ್ರಸಾದ್ ಉದ್ಗಾರ್ಲೊ.
ದೋನ್ ಮಹಿನ್ಯಾಂ ಉಪ್ರಾಂತ್!
ಟ್ರಾಯಲ್ ಪರ್ತ್ಯಾನ್ ಆರಂಭ್ ಜಾಲೆಂ.
ಹ್ಯಾ ದೋನ್ ಮಹಿನ್ಯಾಂತ್ ಆಲಿಯಾ, ಇಕ್ಬಾಲ್ ಆನಿ ರಾಶಿದ್ ಪೊಲಿಸ್ ಕಸ್ಟಡಿಂತ್ ರಿಮಾಂಡಾರ್ ಆಸ್ಲ್ಲಿಂ.
ಹ್ಯಾ ಪಾವ್ಟಿಂಚೆಂ ಟ್ರಾಯಲ್ ಆಲಿಯಾಚಾ ಹಲ್ಲ್ಯಾಚಾ ಟ್ರಾಯಲಾ ಸವೆಂ ಮಿಶೇಲಾಚಿ ಹತ್ಯಾ ಆನಿ ವಿಶು ಕುಮಾರಾಚೆಂ ಆಕ್ಸಿಡೆಂಟ್ ಹ್ಯಾ ಕೇಸಿಕ್ ಸಂಭಂಧ್ ಜೊಡುನ್ ಕೊರ್ಟಾ ಮುಕಾರ್ ಹಾಜರ್ ಜಾಲೆಂ.
ಪೊಲಿಸಾಂಕ್ ಭಳಾಧೀಕ್ ಸಾಕ್ಶ್ಯೊ ಲಾಭ್ಲ್ಲ್ಯೊ. ಹ್ಯಾ ಸಾಕ್ಶೆಂ ಪಯ್ಕಿ ಶೀತಲ್ ಭಳಾಧೀಕ್ ಸಾಕ್ಸ್ ಜಾವ್ನ್ ಉಭೆಂ ಜಾಲೆಂ.
ಪೊಲಿಸಾಂಚಾ ತರ್ಫೆನ್ ಡಿಫೆನ್ಸ್ ಜಾವ್ನ್ ಹೈ ಕೋರ್ಟಾನ್ ಪಬ್ಲಿಕ್ ಪ್ರಾಸಿಕ್ಯೂಟರ್ ಯೂಸುಫ್ ಮುನಾವರ್ ಖಾನಾಕ್ ನೇಮಕ್ ಕೆಲೊ.
ಆನಿ ಟ್ರಾಯಲ್ ಪರ್ತ್ಯಾಕ್ ಆರಂಭ್ ಜಾಲೆಂ.
ಟ್ರಾಯಲಾಚೊ ಪಯ್ಲೊ ದೀಸ್!
ಕೊರ್ಟಾಚಿ ಕಾರ್ಯಾವಳ್ ಕೊರ್ಟಾಚ್ಯಾ ಹರ್ಶೆಂಚಾ ರಿತಿ ರಿವಾಜೆ ಪ್ರಕಾರ್ ಆರಂಭ್ ಜಾಲಿ.
"ಯು ಮೇ ಪ್ರೊಸೀಡ್ ಮಿಸ್ಟರ್ ಪಬ್ಲಿಕ್ ಪ್ರಾಸಿಕ್ಯೂಟರ್!" ಜಡ್ಜಾನ್ ಯೂಸುಫಾಕ್ ಪರ್ವಣ್ಗಿ ದಿಲಿ.
"ಥ್ಯಾಂಕ್ ಯು ಮಿ ಲೋರ್ಡ್!"
ಹ್ಯಾ ಸವೆಂ ಸತ್ ಆನಿ ನೀತಿಚೆಂ ಝುಜ್ ಆರಂಭ್ ಜಾಲೆಂ.
"ತುಮಿಂ ಜಾಣಾಂತ್ ಮಿ ಲೋರ್ಡ್! ಹ್ಯಾಚ್ಚ್ ಕೋರ್ಟಾಂತ್ ದೋನ್ ಮಹಿನ್ಯಾಂ ಪಯ್ಲೆಂ ಬಾಲಿವುಡಾಚೆಂ ನವೆಂ ಹೀರೋಯಿನ್ ಮಿಸ್ ಆಲಿಯಾ ಖಾನಾ ವಯ್ರ್ ಜಾಲ್ಲ್ಯಾ ಹಲ್ಲ್ಯಾಚಿ ಕೇಸ್ ಚಲ್ತಾಲಿ. ತ್ಯಾ ಕೆಸಿಚಿ ಕಾರ್ಯಾವಳ್ ಏಕ್ ಮಹಿನೊ ಚಲ್ಲಿ ಜಾಲ್ಯಾರ್ಯ್ ತಿ ಕೇಸ್ ಖಂಯ್ಚಾಯ್ ತೀರ್ಮಾನಾಕ್ ಪಾವ್ಲಿ ನಾ. ತಿ ಕೇಸ್ ಖಂಯ್ಚಾಯ್ ತೀರ್ಮಾನಾಕ್ ಪಾವೊಂಕ್ ಜಾಯ್ ಜಾಲ್ಯಾರ್ ಮಿಶೇಲಾಚಿ ಸಾಕ್ಸ್ ಗರ್ಜ್ ಆಸಾ ಮ್ಹಣೊನ್ ಆಮ್ಚ್ಯಾ ಮಾನಾಧೀಕ್ ಪ್ರಾಸಿಕ್ಯೂಟರ್ ನಾಯರಾನ್ ಮಿಶೇಲಾಕ್ ಕೊರ್ಟಾಂತ್ ಹಾಜರ್ ಕರುಂಕ್ ಜಾಯ್ ಜಾಲ್ಲಿ ಪರ್ವಣ್ಗಿ ಮಾಗ್ಲ್ಲಿ. ಹೆಂ ಮಿಶೇಲ್ ಜಾವ್ನಾಸ್ಲ್ಲೆಂ ಆಲ್ಫ್ರೆಡ್ ರಾಯನಾಚೆಂ ಪತಿಣ್! ಆಲ್ಫ್ರೆಡ್ ರಾಯನ್ ಬಾಲಿವುಡಾಂತ್ಲೊ ಎಕ್ಲೊ ಭಳಾಧೀಕ್ ಫೈನಾನ್ಸರ್! ತಾಚ್ಯಾ ಕಾರ್ಪೊರೇಟ್ ಹೌಸಾ ಮುಕಾಂತ್ರ್ ತಾಣೆಂ ಸಭಾರ್ ಬಾಲಿವುಡಾಚಾ ಫಿಲ್ಮಾಂಕ್ ಫೈನಾನ್ಸ್ ಕೆಲಾಂ. ಹ್ಯಾ ಮಿಸ್ ಆಲಿಯಾ ಖಾನಾನ್ ಅಭಿನಯ್ ಕರುನ್ ಸಾವಂತಾನ್ ಡೈರೆಕ್ಶನ್ ದಿಂವ್ಚ್ಯಾ ಫಿಲ್ಮಾಕ್ಯ್ ಹೊಚ್ ರಾಯನ್ ಫೈನಾನ್ಸ್ ಕರುಂಕ್ ತಯಾರ್ ಜಾಲ್ಲೊ. ಮಿಸ್ ಆಲಿಯಾ ಖಾನಾಕ್ ಬಾಲಿವುಡಾಕ್ ಹಾಡ್ಲ್ಲೆಂಚ್ ಹ್ಯಾ ರಾಯನಾನ್! ಆಶೆಂ ಆಸ್ತಾನಾ ಅಚಾನಕ್ ಆಲಿಯಾ ಖಾನಾ ವಯ್ರ್ ಹಲ್ಲೊ ಜಾತಾ. ಹ್ಯಾ ಉಪ್ರಾಂತ್ಲೊ ವಿಶಯ್ ಹ್ಯಾ ಪಯ್ಲೆಂ ಕೊರ್ಟಾಂತ್ ಪ್ರಸ್ತುತ್ ಜಾಲ್ಲ್ಯಾ ಸಾಕ್ಶೆ ಮಾರಿಫಾತ್ ಕೊರ್ಟಾಚಾ ದೊಳ್ಯಾಂ ಮುಕಾರ್ ಆಯ್ಲಾ. ಆನಿ ಕೊರ್ಟಾಕ್ಯ್ ಸುಸ್ತಾಲ್ಲೆಂ ಕೀ ಮಿಶೇಲಾಕ್ ಹ್ಯಾ ಕೇಸಿಚಿ ಸಾಕ್ಸ್ ಜಾವ್ನ್ ಕೊರ್ಟಾಮ್ತ್ ಪ್ರಸ್ತುತ್ ಕರುಂಕ್ ಜಾಯ್ ಮ್ಹಳ್ಳೆಂ!"
"ಪುಣ್ ಮಿ ಲೋರ್ಡ್...., ಹೆಂ ಮಿಶೇಲ್ ಹ್ಯಾ ಕೊರ್ಟಾ ಮುಕಾರ್ ಪ್ರಸ್ತುತ್ ಜಾಂವ್ಕ್ ಸಕ್ಲೆಂ ನಾ. ಆಲಿಯಾಚಾ ಹಲ್ಲ್ಯಾಚಿ ಕೇಸ್ ಆರಂಭ್ ಜಾಂವ್ಚ್ಯಾ ಪಯ್ಲೆಂಚ್ ಮಿಶೇಲ್ ಅಚಾನಕ್ ಮುಂಬಯಿ ಥಾವ್ನ್ ಮಾಯಾಗ್ ಜಾಲೆಂ. ತಾಚಿ ಕೊಣಾಕ್ಚ್ ಖಬಾರ್ ನಾತ್ಲ್ಲಿ. ಮಿಶೇಲ್ ಅಚಾನಕ್ ಮುಂಬಯಿ ಥಾನ್ ಮಾಯಾಗ್ ಜಾಂವ್ಕ್ ಆನಿ ಕೊರ್ಟಾಂತ್ ಆಲಿಯಾಚಾ ಹಲ್ಲ್ಯಾಚಿ ಕೇಸ್ ಆರಂಭ್ ಜಾಂವ್ಕ್ ಕಿತೆಂ ಕಾರಾಣ್ ಮ್ಹಳ್ಳೆಂ ತೆಂ ಕೊಣಾಯ್ಕ್ಯ್ ಕಳಿತ್ ಜಾಂವ್ಕ್ ನಾತ್ಲ್ಲೆಂ. ಮಿಶೇಲ್ ಅಚಾನಕ್ ಮಾಯಾಗ್ ಜಾಲಾಂ ವಾ ತೆಂ ಖುದ್ಧ್ ನಪಂಯ್ಚ್ ಜಾಲಾಂ ವಾ ತಾಕಾ ಕೊಣೆಂ ಲಿಪಯ್ಲಾಂ ವಾ ತೆಂ ಖುದ್ಧ್ ಲಿಪ್ಲಾಂ ವಾ ತಾಚೆಂ ಅಪಹರಣ್ ಜಾಲಾಂ ತೆಂ ಕೊಣಾಯ್ಕ್ಯ್ ಕಳಿತ್ ಜಾಲೆಂ ನಾ. ಮುಂಬಯಿಚ್ಯಾ ಪೊಲಿಸಾಂನಿ ಹಿ ಕೇಸ್ ಹಾತಿಂ ಘೆವ್ನ್ ದೀಸ್ ರಾತ್ ಮಿಶೇಲಾಚಿಂ ಸೊಧ್ನಾಂ ಕೆಲಿಂ ಜಾಲ್ಯಾರ್ಯ್ ಮಿಶೇಲ್ ತಾಂಕಾ ಲಾಬ್ಲೆಂ ನಾ!"
"ಪೂಣ್ ಮಿ ಲೋರ್ಡ್ ಜುಲಾಯ್ಚಾ ದೋನ್ ತಾರಿಕೆರ್ ಮಿಶೇಲಾಚೆಂ ಮೊಡೆಂ ಹ್ಯಾಚ್ ಮುಂಬಯಿಚ್ಯಾ ದರ್ಯಾಂತ್ ಉಪ್ಯೆವ್ನ್ ಆಯಿಲ್ಲೆಂ ಮೆಳ್ಟಾ! ಮಿಶೇಲಾಚಿ ಹತ್ಯಾ ಜಾಲ್ಯಾ ಮಿ ಲೋರ್ಡ್! ಅಮಾನುಶ್ ಪಣಿಂ ಮಿಶೇಲಾಚಿ ಹತ್ಯಾ ಕೆಲ್ಯಾ! ಮಿಶೇಲಾಕ್ ಹ್ಯಾ ಕೊರ್ಟಾ ಮುಕಾರ್ ಹಾಜರ್ ಕೆಲ್ಯಾರ್ ಆಪ್ಲೊ ಘುಟ್ ಭಾಯ್ರ್ ಪಡ್ತಾ ಮ್ಹಳ್ಳ್ಯಾ ಎಕಾಚ್ಚ್ ಉದ್ದೇಶಾನ್ ಕಾಂಯ್ಚ್ ಪಾಪ್ ನಾತ್ಲೆಲ್ಯಾ ಮಿಶೇಲಾಚಿ ಹತ್ಯಾ ಕೆಲ್ಯಾ. ತಾಚೆಂ ಮೊಡೆಂ ಪಾಸೊನ್ ಹ್ಯಾ ದರ್ಯಾಚಾ ಮಾಸ್ಳೆಂಕ್ ಖಾವಂವ್ಚೆಂ ಪ್ರಯತ್ನ್ ಚಲ್ಲಾಂ. ಮಿಶೇಲಾಚೆಂ ಮೊಡೆಂ ಪಳೆಲ್ಲೊ ಮಾತ್ರ್ ಜಾಣಾಂ ಜಾಂವ್ಕ್ ಸಕ್ತಾ ಕೀ ಹಿ ಕಿತ್ಲ್ಯಾ ಧಾರುಣ್ ಕಾಳ್ಜಾಚ್ಯಾ ಮನ್ಶ್ಯಾಚಿ ಹತ್ಯಾ ಮ್ಹಳ್ಳಿ ತಿ!"
"ಮಿ ಲೋರ್ಡ್! ಹಿ ಹತ್ಯಾ ಮ್ಹಣೊನ್ ಎದೊಳ್ಚ್ ಪೊಲಿಸ್ ಇನ್ವೆಸ್ಟಿಗೇಶನಾ ಥಾವ್ನ್ ರುಜು ಜಾಲಾಂ. ಪೋಸ್ಟ್ ಮಾರ್ಟಮಾಂತ್ ಮಿಶೇಲಾಚಾ ಕುಡಿಂತ್ ಪಿಸ್ತುಲಾಚೊ ಏಕ್ ಬುಲೆಟ್ ಲಾಭ್ಲಾ. ಪೋಸ್ಟ್ ಮಾರ್ಟಮಾಚೊ ರಿಪೋರ್ಟ್ ಎದೊಳ್ಚ್ ಹಾವೆಂ ಕೊರ್ಟಾಕ್ ಪ್ರಸ್ತುತ್ ಕೆಲಾ. ಹ್ಯಾ ಪ್ರಕಾರ್ ಹಾಂಗಾ ಹೆಂ ರುಜು ಜಾತಾ ಕೀ ಮಿಶೇಲಾಚಿ ಹತ್ಯಾ ಜಾಲ್ಯಾ. ಆನಿ ಹಿ ಹತ್ಯಾ ಹ್ಯಾಚ್ ತೆಗಾಂ ಭಿತರ್ಲ್ಯಾ ಎಕ್ಲ್ಯಾನ್ ಕೆಲ್ಯಾ ಮ್ಹಣೊನ್ ಪೊಲಿಸಾಂಚಾ ವಿಚಾರಣಾ ವೆಳಾರ್ ಕಳೊನ್ ಆಯ್ಲಾಂ. ಹೆಂಚ್ ಆತಾಂ ಹಾಂವ್ ಹ್ಯಾ ಕೊರ್ಟಾ ಮುಕಾರ್ ಸಾಕ್ಶೆ ಸವೆಂ ರುಜು ಕರುಂಕ್ ಆಯ್ತೊಂ ಜಾಲಾಂ!"
"ಆಜ್ ಹಾಂಗಾಸರ್ ಹ್ಯಾ ಮಿಶೇಲಾಚಾ ಹತ್ಯಾಕ್ ಆನಿ ಆಲಿಯಾಚಾ ಹಲ್ಲ್ಯಾಚಾ ಕೇಸಿಕ್ ಸಂಭಂಧ್ ಆಸಾ ವಾ ನಾ ತೆಂ ರುಜು ಕರುಂಕ್ ಆಸಾ ಮಿ ಲೋರ್ಡ್! ಕಿತ್ಯಾಕ್ ಮ್ಹಳ್ಯಾರ್ ಆಲಿಯಾಚಾ ವಯ್ರ್ ಚಲ್ಲ್ಲ್ಯಾ ಮರಣಾಂತಿಕ್ ಹಲ್ಲ್ಯಾಚಾ ಕೇಸಿಂತ್ ಜರ್ ಮಿಶೇಲಾಚಿ ಸಾಕ್ಸ್ ಗರ್ಜ್ ಆಸಾ ಜಾಲ್ಯಾರ್ ಮಿಶೇಲಾಚಾ ಹತ್ಯಾಚಾ ಕೇಸಿಂತ್ ಹ್ಯಾ ಆಲಿಯಾ, ಇಕ್ಬಾಲ್ ವಾ ರಾಶಿದಾಚೊ ಹಾತ್ ಖಂಡಿತ್ ಆಸೊಂಕ್ಚ್ ಜಾಯ್!"
"ಮಿ ಲೋರ್ಡ್! ಹ್ಯಾ ಮಿಶೇಲಾಚಾ ಹತ್ಯಾಚಾ ಕೇಸಿಚಿ ಪ್ರಮುಖ್ ಸಾಕ್ಸ್ ಜಾವ್ನ್ ಹಾಂವ್ ಮಿಸೆಸ್ ಶೀತಲ್ ವಿಶು ಕುಮಾರಾಕ್ ಕೊರ್ಟಾ ಮುಕಾರ್ ಹಾಜರ್ ಜಾಂವ್ಚಿ ಪರ್ವಣ್ಗಿ ಮಾಗ್ತಾಂ!"
"ಪರ್ಮಿಶನ್ ಗ್ರ್ಯಾಂಟಡ್!"
"ತುಜೆಂ ನಾಂವ್?"
"ಶೀತಲ್!"
"ಕೊರ್ಟಾಕ್ ತುಜೆಂ ಸಂಪೂರ್ಣ್ ನಾಂವ್ ಜಾಯ್ ಮಿಸೆಸ್ ಶೀತಲ್!"
"ಮಿಸೆಸ್ ಶೀತಲ್ ವಿಶು ಕುಮಾರ್!"
"ವಿಶು ಕುಮಾರ್ ತುಜೊ ಘೊವ್.....?"
"ವ್ಹಯ್!"
"ತರ್ ತುವೆಂ ಸಾಂಗ್ಚ್ಯಾ ಪರಿಂ ಮಿಶೇಲಾಚಿ ಹತ್ಯಾ ಕೆಲ್ಯಾ!"
"ವ್ಹಯ್!"
"ಹತ್ಯಾರಾಂ ವಿಶಿಂ ತುಂ ಕಾಂಯ್ ಜಾಣಾಂಯ್.....?"
"ಮ್ಹಾಕಾ ಆಲಿಯಾ ವಯ್ರ್ ದುಬಾವ್ ಆಸಾ! ಹೊ ಫಕತ್ತ್ ದುಬಾವ್ ಮಾತ್ರ್ ನ್ಹಯ್ ಬಗಾರ್ ಮ್ಹಾಕಾ ಹೆಂ ಖಚಿತ್ ಆಸಾ!"
"ತೆಂ ಕಶೆಂ ಮಿಸೆಸ್ ಶೀತಲ್?"
"ಆಲಿಯಾ ಬಾಲಿವುಡಾಕ್ ಆಯ್ಲ್ಯಾ ಉಪ್ರಾಂತ್ ಮ್ಹಜ್ಯಾ ಘೊವಾಕ್ ಆನಿ ಆಲಿಯಾಕ್ ಸಂಭಂಧ್ ಆಸಾ ಮ್ಹಣೊನ್ ಮ್ಹಾಕಾ ಕಳಿತ್ ಜಾಲೆಂ!"
"ತುಜ್ಯಾ ಘೊವಾಕ್ ಆನಿ ಆಲಿಯಾಕ್......? ಐ ಮೀನ್ ವಿಶು ಕುಮಾರಾಕ್ ಆನಿ ಆಲಿಯಾಕ್....?"
"ವ್ಹಯ್!"
"ಹೆಂ ತುಕಾ ಕಶೆಂ ಕಳಿತ್ ಜಾಲೆಂ.....?"
"ಮ್ಹಾಕಾ ಜಯರಾಜನ್ ಹ್ಯಾ ವಿಶಿಂ ಕಳಿತ್ ಕೆಲ್ಲೆಂ!"
"ಜಯರಾಜ್.....? ಹೊ ಜಯರಾಜ್ ಕೋಣ್.....?"
"ಮ್ಹಜೊ ರಿಲೇಟಿವ್!"
"ತಾಣೆಂ ತುಕಾ ತುಜ್ಯಾ ಘೊವಾಚ್ಯಾ ವಿಶ್ಯಾಂತ್ ಕಿತ್ಯಾಕ್ ಸಾಂಗ್ಲೆಂ ಮಿಸೆಸ್ ಶೀತಲ್....?"
"ಜಯರಾಜ್ ಮ್ಹಜ್ಯಾ ಆವಯ್ಚಾ ಕುಟ್ಮಾಂತ್ಲೊ ಮ್ಹಣ್ತಾನಾ ತಾಕಾ ಮ್ಹಜೊ ಹುಸ್ಕೊ ಆಸ್ಲ್ಲೊ!"
"ಬರೆಂ! ಉಪ್ರಾಂತ್!"
"ಹ್ಯಾ ಜಯರಾಜನ್ಚ್ ನಮಿತಾಚಾ ಉತ್ರಾಕ್ ಪಾಳೊ ದೀವ್ನ್ ಆಲಿಯಾಕ್ ಇಕ್ಬಾಲಾಚಾ ಹಾತಾ ಥಾವ್ನ್ ಬಚಾವ್ ಕರುಂಕ್ ಮ್ಹಜ್ಯಾ ಘೊವಾಚಿ ಮಜತ್ ಮಾಗ್ಲ್ಲಿ!"
"ತಿ ಮಜತ್ ಖಂಯ್ಚಾ ವಿಶಯಾಂತ್ ತೆಂ ತುಂ ಜಾಣಾಂಯ್.....?"
"ಆಲಿಯಾ ಬಾಲಿವುಡಾಕ್ ಯೆಂವ್ಚ್ಯಾ ಪಯ್ಲೆಂ ಏರ್ಹೊಸ್ಟೆಸ್ ಜಾವ್ನ್ ಆಸ್ಲ್ಲೆಂ. ತ್ಯಾ ವೆಳಾರ್ ಪ್ಲೈಟಾರ್ ರಾಶಿದಾ ಸವೆಂ ತಾಚೆಂ ಝಗ್ಡೆಂ ಜಾಲ್ಲೆಂ. ಹೆಂ ಝಗ್ಡೆಂ ಇತ್ಲೆಂ ಚಡ್ ಜಾಲ್ಲೆಂ ಕೀ ಇಕ್ಬಾಲಾನ್ ಆನಿ ರಾಶಿದಾನ್ ಆಲಿಯಾಕ್ ಜಿವೆಶಿಂ ಮಾರುಂಕ್ ಪಾಸೊನ್ ಪಳೆಲ್ಲೆಂ!"
"ಪುಣ್ ತುಜ್ಯಾ ಘೊವಾನ್ ಮಧೆಂ ಯೇವ್ನ್ ಆಲಿಯಾಕ್ ಇಕ್ಬಾಲಾ ಥಾವ್ನ್ ಬಚಾವ್ ಕೆಲೆಂ.....?"
"ವ್ಹಯ್!"
"ಉಪ್ರಾಂತ್......?"
"ಕಸಲ್ಯಾ ಕಾರಾಣಾ ಖಾತಿರ್ ಹಾಂವ್ ನೆಣಾಂ! ಬಾಲಿವುಡಾಕ್ ಆಯಿಲ್ಲ್ಯಾ ಆಲಿಯಾನ್ ಮ್ಹಜ್ಯಾ ಘೊವಾ ಸವೆಂ ಸಂಭಂಧ್ ದವರ್ಲೊ! ಬೋವ್ಶ್ಯಾ ಮನೋಜ್ ಕುಮಾರಾ ವಯ್ರ್ ಹಗೆಂ ತಿರ್ಸುಂಚಾ ಖಾತಿರ್!"
"ಹೊ ಮನೋಜ್ ಕುಮಾರ್ ಕೋಣ್?"
"ಆಲಿಯಾಕ್ ತಾಚ್ಯಾ ಕಾಮಾ ಥಾವ್ನ್ ಟರ್ಮಿನೇಟ್ ಕೆಲ್ಲೊ ವೆಸ್ಟ್ ಲೈನ್ ಏರ್ವೇಸಾಚಾ ಸ್ಟಾಫ್ ಮೆಂಬರಾಂಚೊ ಎಕ್ಸ್ ಅಸಿಸ್ಟಂಟ್ ಮ್ಯಾನೇಜರ್!"
"ತರ್ ಆಲಿಯಾಕ್ ಏರ್ವೇಸಾ ಥಾವ್ನ್ ಟರ್ಮಿನೇಟ್ ಕೆಲ್ಲೆಂ.....?"
"ವ್ಹಯ್!"
"ಕಿತ್ಯಾಕ್......?"
"ತಾಚೆಂ ಕಾಂಯ್ ಪ್ರೂಫ್ ನಾ!"
"ಉಪ್ರಾಂತ್.....?"
"ಮ್ಹಜ್ಯಾ ಘೊವಾಚ್ಯಾ ಕುಮ್ಕೆನ್ ಆಲಿಯಾನ್ ಮನೋಜ್ ಕುಮಾರಾಕ್ ತಾಚ್ಯಾ ಕಾಮಾ ಥಾವ್ನ್ ಕಾಡುನ್ ಆಪ್ಲೆಂ ಹಗೆಂ ತಿರ್ಸಿಲೆಂ!"
"ಉಪ್ರಾಂತ್.....?"
"ಹ್ಯಾ ಜಯರಾಜಾ ಥಾವ್ನ್ಚ್ ಮ್ಹಾಕಾ ಮ್ಹಜೊ ಘೊವ್ ಕಾನೂನಾ ಭಾಯ್ಲ್ಯಾ ಕಾಮಾಂನಿ ಮೆತೆರ್ ಆಸಾ ಮ್ಹಳ್ಳೆಂ ಕಳಿತ್ ಜಾಲೆಂ!"
"ಕಸಲಿಂ ಕಾಮಾಂ ಮಿಸೆಸ್ ಶೀತಲ್?"
"ಅಂಡರ್ ವರ್ಲ್ಡಾಂತ್ ತೊ ಇಕ್ಬಾಲಾ ಸವೆಂ ಮೆಳೊನ್ ಆಸ್ಲ್ಲೊ!"
ಎಕ್ಚ್ಚ್ ಪಾವ್ಟಿಂ ಕೊರ್ಟಾಂತ್ ಗುಸು ಗುಸು.
"ಆರ್ಡರ್! ಆರ್ಡರ್!"
"ಉಪ್ರಾಂತ್.....? ಮುಖಾರ್ಸಿ ಮಿಸೆಸ್ ಶೀತಲ್. ತುವೆಂ ಕಾಂಯ್ ಭಿಯೆಂವ್ಚಿ ಗರ್ಜ್ ನಾ!"
"ಹಾವೆಂ ಮ್ಹಜ್ಯಾ ಘೊವಾಕ್ ಸಮ್ಜಾಂವ್ಚೆಂ ಪ್ರಯತ್ನ್ ಕೆಲೆಂ. ಹೊ ವಿಶಯ್ ಹಾವೆಂ ಮಿಶೇಲಾಕ್ಯ್ ಕಳಿತ್ ಕೆಲ್ಲೊ. ಮುಂಬಯಿಂತ್ ಮಿಶೇಲ್ ಮಾತ್ರ್ ಮ್ಹಜೆಂ ಲಾಗ್ಶಿಲೆಂ ಇಶ್ಟಿಣ್ ಜಾವ್ನ್ ಆಸ್ಲ್ಲೆಂ. ಪುಣ್ ತೆಂ ತಿತ್ಲ್ಯಾ ಧಯ್ರಾಚೆಂ ಚೆಡುಂ ನ್ಹಯ್ ಜಾಲ್ಲೆಂ ಜಾಲ್ಯಾರ್ಯ್ ಹೊ ವಿಶಯ್ ತಾಣೆಂ ಆಪ್ಲ್ಯಾ ಘೊವಾ ಲಾಗಿಂ ಸಾಂಗೊನ್ ವಿಶು ಕುಮಾರಾಕ್ ಸಾರ್ಕ್ಯಾ ವಾಟೆಕ್ ಹಾಡುಂಕ್ ಆಪ್ಲ್ಯಾ ಘೊವಾಚಿ ಮಜತ್ ಮಾಗ್ಲಿ. ಪುಣ್....!" ಶೀತಲಾಚೆಂ ಮೌನ್.
"ಪುಣ್ ಕಿತೆಂ ಶೀತಲ್?"
"ತ್ಯಾಚ್ ವೆಳಾರ್ ಮ್ಹಜ್ಯಾ ಘೊವಾಚೆಂ ಆಕ್ಸಿಡೆಂಟ್ ಜಾಲೆಂ. ಆನಿ ತೊ ಅಂತರ್ಲೊ! ಹಾಂವ್ ಜಾಣಾಂ ಮ್ಹಜ್ಯಾ ಘೊವಾಚೆಂ ಆಕ್ಸಿಡೆಂಟ್ ಜಾಂವ್ಕ್ ನಾ. ಮ್ಹಜ್ಯಾ ಘೊವಾಕ್ ಹ್ಯಾ ಆಲಿಯಾನ್ಚ್ ಜಿವೆಶಿಂ ಮಾರ್ಲಾಂ! ತಾಚಿ ಹತ್ಯಾ ಕೆಲ್ಯಾ!"
"ಹೆಂ ತುಂ ಕಶೆಂ ಸಾಂಗೊಂಕ್ ಸಕ್ತಾಯ್....?"
"ಆಲಿಯಾಕ್ ತಾಚ್ಯಾ ಏರ್ಹೊಸ್ಟೆಸಾಚಾ ಕಾಮಾ ಥಾವ್ನ್ ಮನೋಜ್ ಕುಮಾರಾನ್ ಟರ್ಮಿನೇಟ್ ಕೆಲ್ಲೆಂ ಜಾಲ್ಯಾರ್ಯ್ ತ್ಯಾ ಟರ್ಮಿನೇಶನಾಕ್ ಮ್ಹಜೊ ಘೊವ್ಚ್ ಕಾರಾಣ್ ಜಾವ್ನ್ ಆಸ್ಲ್ಲೊ!"
"ರಾವ್ ಮಿಸೆಸ್ ಶೀತಲ್! ಅತ್ತಾಂ ತುವೆಂ ಸಾಂಗ್ಲೆಂಯ್ ತುಜ್ಯಾ ಘೊವಾನ್ ಆಲಿಯಾಕ್ ಬಚಾವ್ ಕೆಲ್ಲೆಂ! ತೆಂ ಚಲಿ ಕೋಣ್ ಮ್ಹಣೊನ್ ತುವೆಂ ಸಾಂಗ್ಲೆಂಯ್.....?"
"ನಮಿತಾ!"
"ಹಾಂ! ನಮಿತಾ. ಹ್ಯಾ ನಮಿತಾನ್ ಜಯರಾಜಕ್ ಸಾಂಗೊನ್ ಆಲಿಯಾಕ್ ಇಕ್ಬಾಲಾಚಾ ಹಾತಾ ಥಾವ್ನ್ ಬಚಾವ್ ಕೆಲೆಂ. ತರ್ ತುಜ್ಯಾ ಘೊವಾನ್ಚ್ ಪರ್ತ್ಯಾಕ್ ಆಲಿಯಾಕ್ ತಾಚ್ಯಾ ಕಾಮಾ ಥಾವ್ನ್ ಕಶೆಂ ಟರ್ಮಿನೇಟ್ ಕರಯ್ಲೆಂ? ಕೊರ್ಟಾಕ್ ಹೆಂ ಸಮ್ಜೊಂಕ್ ನಾ ಮಿಸೆಸ್ ಶೀತಲ್!"
"ಸತ್ ಸಾಂಗ್ಚೆಂ ಜಾಲ್ಯಾರ್ ಮ್ಹಜೊ ಘೊವ್ ಆಲಿಯಾಕ್ ವಳ್ಕಾನಾತ್ಲ್ಲೊ. ತಾಣೆಂ ಜಯರಾಜಾಚಾ ಸಾಂಗ್ಣೆಕ್ ಪಾಳೊ ದೀವ್ನ್ ಆಲಿಯಾಕ್ ಬಚಾವ್ ಕೆಲೆಂ ಜಾಲ್ಯಾರ್ ಉಪ್ರಾಂತ್ ದುಸ್ರ್ಯಾ ಕುಶಿನ್ ತ್ಯಾ ಇಕ್ಬಾಲಾಚಾ ಉಲ್ಯಾಕ್ ಪಾಳೊ ದೀವ್ನ್ ಹ್ಯಾಚ್ ಆಲಿಯಾಕ್ ತಾಚ್ಯಾ ಕಾಮಾ ಥಾವ್ನ್ ಕಾಡಯ್ಲೆಂ. ಮ್ಹಜೊ ಘೊವ್ ಹಾಂಗಾ ಹ್ಯಾ ದೊಗಾಂ ಮಧೆಂ ತಿಸ್ರೊ ಮ್ಯಕ್ತಿ ಜಾವ್ನ್ ಆಸ್ಲ್ಲೊ. ಮ್ಹಜ್ಯಾ ಘೊವಾಕ್ ಆಲಿಯಾಚಿ ಪಳವ್ನ್ ವಳಕ್ ಜಾಲ್ಲಿಚ್ ಆಲಿಯಾ ಬಾಲಿವುಡಾಕ್ ಆಯ್ಲ್ಯಾ ಉಪ್ರಾಂತ್!"
"ಬರೆಂ! ಮುಕಾರ್ ಕಿತೆಂ ಜಾಲೆಂ?"
"ಮ್ಹಜ್ಯಾ ಘೊವಾಚೊ ಫಾಯ್ದೊ ಉಟವ್ನ್ ಆಲಿಯಾನ್ ತಾಚಿಂ ಕಾಮಾಂ ಕೆಲಿಂ. ಉಪ್ರಾಂತ್ ತಾಚಿ ಗರ್ಜ್ ಮುಗ್ದಾತಾನಾ ಮ್ಹಜ್ಯಾ ಘೊವಾಚಿ ತಾಣೆಂ ಹತ್ಯಾ ಕೆಲಿ!"
"ಉಪ್ರಾಂತ್.....?"
"ಇಕ್ಬಾಲಾ ಸರ್ಶಿನ್ ಪಾವೊಂಕ್ ಆಲಿಯಾಕ್ ಎಕ್ಚ್ಚ್ ವಾಟ್ ಆಸ್ಲ್ಲಿ. ರಾಯನ್! ಹ್ಯಾ ರಾಯನಾ ಥಾವ್ನ್ಚ್ ಆಪ್ಲೆಂ ನಾಂವ್ ವಾಡಂವ್ಕ್ ಸಾದ್ಯ್ ಆಸಾ ಮ್ಹಳ್ಳೆಂ ತೆಂ ಆಲಿಯಾ ಜಾಣಾಂ ಆಸ್ಲ್ಲೆಂ. ಹ್ಯಾಚ್ ಖಾತಿರ್ ಆಲಿಯಾನ್ ರಾಯನಾಕ್ ಆಪ್ಣಾ ತೆವ್ಶಿಂ ವೊಡುಂಕ್ ಪ್ರಯತ್ನ್ ಕೆಲೆಂ. ತೆಂ ಹ್ಯಾ ಪ್ರಯತ್ನಾಂತ್ ಆಸ್ತಾಂ ಅಚಾನಕ್ ಪರ್ತ್ಯಾಕ್ ಇಕ್ಬಾಲ್ ಆಲಿಯಾಕ್ ಮುಕಾರ್ ಆಯ್ಲೊ. ತೊ ಬಾಲಿವುಡಾಚಿ ಸಗ್ಳಿ ಖಬಾರ್ ಜಾಣಾಂ ಆಸ್ಲ್ಲೊ. ಆಲಿಯಾ ಬಾಲಿವುಡಾಕ್ ಆಯಿಲ್ಲೆಂ ಆನಿ ತೆಂ ರಾಯನಾಚಾ ಫಿಲ್ಮಾಂತ್ ಕಾಮ್ ಕರ್ಚೆಂ ತೊ ಜಾಣಾಂ ಜಾಲೊ. ರಾಯನ್ ಬಾಲಿವುಡಾಂತ್ ಭಳಿಶ್ಟ್ ಜಾಲ್ಲ್ಯಾನ್ ಪಯ್ಲೊ ಪಯ್ಲೊ ತೊ ಮೌನ್ ರಾವ್ಲೊ. ಪುಣ್ ಆಲಿಯಾ ಬಾಲಿವುಡಾಕ್ ಆಯ್ಲ್ಯಾ ಉಪ್ರಾಂತ್ ತಾಣೆಂ ಕೆಲ್ಲಿಂ ಕಾಮಾಂ ಪಳವ್ನ್ ತೊ ಭಿಯೆಲೊ!"
"ಕಿತ್ಯಾಕ್.....?"
"ಮ್ಹಜ್ಯಾ ಘೊವಾಚ್ಯಾ ವಳ್ಕೆಚೆರ್ ಮನೋಜ್ ಕುಮಾರಾಕ್ ತಾಚ್ಯಾ ಕಾಮಾ ಥಾವ್ನ್ ಕಾಡುನ್ ಉಡವ್ನ್ ಉಪ್ರಾಂತ್ ಮ್ಹಜ್ಯಾ ಘೊವಾಚಿಚ್ ಹತ್ಯಾ ಕೆಲ್ಲೆಂ ಆಲಿಯಾ ಆಜ್ ನಾ ಜಾಲ್ಯಾರ್ ಫಾಲ್ಯಾಂ ಆಪ್ಣಾಕ್ ಖಂಡಿತ್ ಆಪಾಯ್ ಮ್ಹಳ್ಳೆಂ ಜಾಣಾಂ ಜಾವ್ನ್ ಇಕ್ಬಾಲಾನ್ ಆಲಿಯಾಕ್ ಬೆಶ್ಟಾಯ್ಲೆಂ! ಪುಣ್ ಆಲಿಯಾ ಇತ್ಲೆಂ ಧಯ್ರಾಧೀಕ್ ಚೆಡುಂ ಕೀ ತೆಂ ಭಿಯೆಲೆಂ ನಾ!"
"ಹ್ಯಾ ಖಾತಿರ್ ಇಕ್ಬಾಲಾನ್ ಆಲಿಯಾ ವಯ್ರ್ ಹಲ್ಲೊ ಕೆಲೊ.....?"
"ವ್ಹಯ್! ಹ್ಯಾ ಹಲ್ಲ್ಯಾಂತ್ ತೆಂ ವಾಂಚ್ಲೆಂ! ಇಕ್ಬಾಲಾನ್ ತಾಚ್ಯಾ ವಯ್ರ್ ಹಲ್ಲೊ ಕೆಲ್ಯಾ ಉಪ್ರಾಂತ್ ಆಲಿಯಾಕ್ ರಾಯನಾಚಿ ಚಡ್ ಗರ್ಜ್ ಆಸಾ ಮ್ಹಣ್ ಭೊಗ್ಲೆಂ. ಫಕತ್ತ್ ರಾಯನ್ ಮಾತ್ರ್ ಆಪ್ಣಾಕ್ ಇಕ್ಬಾಲಾಚಾ ಹಾತಾ ಥಾವ್ನ್ ಬಚಾವ್ ಕರುಂಕ್ ಸಕ್ತಾ ಮ್ಹಳ್ಳೆಂ ತೆಂ ಆಲಿಯಾ ಜಾಣಾಂ ಜಾಲ್ಲೆಂ!"
"ಉಪ್ರಾಂತ್.....?"
"ಮ್ಹಜೊ ಘೊವ್ ಮೆಲ್ಯಾ ಉಪ್ರಾಂತ್ ಏಕ್ ದೀಸ್ ಹ್ಯಾಚ್ ಇಕ್ಬಾಲಾನ್ ಮಿಶೇಲಾಕ್ ಪೋನ್ ಕೆಲೆಂ! ಆನಿ ತಾಣೆಂ ಆಲಿಯಾ ವಿಶಿಂ ಮಿಶೇಲಾಕ್ ಸಗ್ಳೆಂ ಸಾಂಗ್ಲೆಂ! ಮಿಶೇಲಾನ್ ಹೊ ವಿಶಯ್ ಆಪ್ಲ್ಯಾ ಘೊವಾ ಮುಕಾರ್ ಉಗ್ತೊ ದವರ್ತಾನಾ ರಾಯನಾನ್ ಹ್ಯಾ ವಿಶಯಾಕ್ ಘೆವ್ನ್ ಅಲಿಯಾ ಸವೆಂ ಚರ್ಚ್ಯಾ ಕೆಲಿ. ಹಾಂಗಾ ಥಾವ್ನ್ ಮಿಶೇಲ್ ಅಚಾನಕ್ ನಾಪತ್ತೊ ಜಾಲೆಂ! ಹ್ಯಾಚ್ ಕಾರಾಣಾಕ್ ಲಾಗೊನ್ ಮಿಶೇಲಾಚೊ ಆಜೊ ಆನಿ ಆಜಿ ಆಕ್ಸಿಡೆಂಟ್ ಜಾವ್ನ್ ಅಂತರ್ಲಿಂ! ತ್ಯಾ ಉಪ್ರಾಂತ್....!"
"ತ್ಯಾ ಉಪ್ರಾಂತ್......? ಸಾಂಗ್ ಮಿಸೆಸ್ ಶೀತಲ್ ತ್ಯಾ ಉಪ್ರಾಂತ್ ಕಿತೆಂ ಜಾಲೆಂ....?"
"ತ್ಯಾ ಉಪ್ರಾಂತ್ ಕಿತೆಂ ಜಾಲೆಂ ತೆಂ ಕೋರ್ಟ್ ಜಾಣಾಂ ಆಸಾ. ಮಿಶೇಲಾಕ್ ಜರ್ ಕೊರ್ಟಾಂತ್ ಹಾಜರ್ ಜಾಂವ್ಚಿ ಪರ್ವಣ್ಗಿ ಕೋರ್ಟಾನ್ ದೀಂವ್ಕ್ ನಾತ್ಲೆಲಿ ಜಾಲ್ಯಾರ್ ಮಿಶೇಲ್ ವಾಂಚ್ತೆಂ ಆಸ್ಲ್ಲೆಂ! ಮಿಶೇಲ್ ಜರ್ ಕೊರ್ಟಾಂತ್ ಹಾಜರ್ ಜಾಲೆಂ ಜಾಲ್ಯಾರ್ ಹೊ ಇಕ್ಬಾಲ್ ಬಚಾವ್ ಜಾತಲೊ. ತೊ ಬಚಾವ್ ಜಾಲ್ಯಾರ್...? ಹ್ಯಾಚ್ ಖಾತಿರ್ ಆಲಿಯಾನ್ ಮಿಶೇಲಾಕ್ ಜಿವೆಶಿಂ ಮಾರ್ಲೆಂ!"
"ತರ್ ತುಂ ಸಾಂಗ್ತಾಯ್ ಆಲಿಯಾನ್ಚ್ ಮಿಶೇಲಾಕ್ ಅಪಹರಣ್ ಕರುನ್ ತಾಚಿ ಹತ್ಯಾ ಕೆಲ್ಯಾ....?"
"ವ್ಹಯ್!"
ಕೊರ್ಟ್ ರುಮಾಂತ್ ಗುಸು ಗುಸು.
"ಆರ್ಡರ್! ಆರ್ಡರ್!"
"ತರ್ ಮಿಶೇಲಾಕ್ ಅಪಹರಣ್ ಕರುನ್ ಆಲಿಯಾನ್ಚ್ ತಾಚಿ ಹತ್ಯಾ ಕೆಲ್ಯಾ ಮ್ಹಣೊನ್ ತುವೆಂ ಸಾಂಗ್ಚೆಂ....?"
"ವ್ಹಯ್!"
"ಥ್ಯಾಂಕ್ ಯು ಮಿಸೆಸ್ ಶೀತಲ್!"
"ಮಿ ಲೋರ್ಡ್! ಶೀತಲಾಚ್ಯಾ ಹ್ಯಾ ಸಾಕ್ಶೆ ಥಾವ್ನ್ ಹೆಂ ರುಜು ಜಾತಾ ಕೀ ಹ್ಯಾ ಆಲಿಯಾ ಇಕ್ಬಾಲ್ ಆನಿ ರಾಶಿದಾಚಾ ಖೆಳಾಂತ್ ದೋನ್ ಅಮಾಯಕ್ ಜೀವ್ ಬಲಿ ಜಾಲ್ಯಾತ್! ತ್ಯಾ ವಯ್ರ್ ಹ್ಯಾ ಕೊರ್ಟಾಕ್ ಇತ್ಲ್ಯಾ ತೆಂಪಾ ಥಾವ್ನ್ ಘುಸ್ಪಡಾವ್ನ್ ಕಾನೂನಾ ಸಾಂಗಾತಾ ಹಾಣಿಂ ಖೆಳ್ಚೆಂ ಧಯ್ರ್ ಕೆಲಾಂ! ಹಾಂಚ್ಯಾ ಖೆಳಾಚೆಂ ಪರಿಣಾಮ್ ಕಿತ್ಲೆಂ ಧಾರುಣ್ ಮ್ಹಳ್ಳೆಂ ತೆಂ ಆಜ್ ಕೊರ್ಟಾಚಾ ಮುಕಾರ್ ಸ್ಪಶ್ಟ್ ಉಗ್ತೆಂ ಜಾಲಾಂ. ಆಪ್ಲ್ಯಾ ಹಗ್ಯಾಚಾ ಖೆಳಾಂತ್ ಖೆಳೊನ್ ದೋನ್ ಜಿವಾಂಚಾ ಮರ್ಣಾಕ್ ಕಾರಾಣ್ ಜಾಲ್ಲ್ಯಾ ಹ್ಯಾ ಆಫ್ರಾಧ್ಯಾಂಕ್ ಕಾನೂನಾಂತ್ಲಿ ಕಠೀಣಾಯೆ ಥಾವ್ನ್ ಕಠೀಣಾಯೆಚಿ ಶಿಕ್ಶಾ ಫಾವೊ ಜಾಂವ್ಕ್ ಜಾಯ್ ಮಿ ಲೋರ್ಡ್! ಅಸಲ್ಯಾ ಆಫ್ರಾಧ್ಯಾಂ ವಯ್ರ್ ಕಾನೂನಾನ್ ಕೆದ್ನಾಂಚ್ ಭಿರ್ಮತ್ ದಾಖಯ್ನಾಸ್ತಾನಾ ಆಪ್ಲೆಂ ಫೈಸಲ್ ವಾಚುಂಕ್ ಜಾಯ್!"
"ದೇಟ್ಸಾಲ್ ಮಿ ಲೋರ್ಡ್! ನೋ ಮೋರ್ ಫರ್ದರ್ ಕ್ವಾಶ್ಚನ್ಸ್!"
"ಇಟ್ಸ್ ಯುವರ್ ವಿಟ್ನೆಸ್!"
ಶೀತಲಾನ್ ರಾಯನಾಚಾ ತರ್ಫೆನ್ಚ್ ಸಾಕ್ಸ್ ದಿಲ್ಲಿ. ರಾಯನಾಕ್ ಆಲಿಯಾ ವರ್ನಿಂ ತಾಚೆ ಮಿಶೇಲ್ ಚಡ್ ಗರ್ಜೆಚೆಂ! ಎಕಾದಾವೆಳಾರ್ ರಾಯನಾಕ್ ತಾಚ್ಯಾ ಮಿಶೇಲಾಚ್ಯಾಕ್ಯ್ ಹೆಂ ಆಲಿಯಾ ಗರ್ಜ್ ಆಸ್ಲ್ಲೆಂ ಜಾಲ್ಯಾರ್ ಶೀತಲ್ ಆಜ್ ಇತ್ಲ್ಯಾ ಸುಡಾಳಾಯೆನ್ ಸಾಕ್ಸ್ ದೀಂವ್ಕ್ ಸಕ್ತೆಂ ನಾ! ಎಕಾದಾ ವೆಳಾರ್ ತೆಂ ಸಕ್ಲ್ಲೆಂ ಜಾಲ್ಯಾರ್ಯ್ ಆಲಿಯಾಚೊ ಲಾಯರ್ ಎದೊಳ್ಚ್ ಆಲಿಯಾಚಾ ತರ್ಫೆನ್ ಝಗ್ಡೊಂಕ್ ತಯಾರ್ ಜಾತೊ. ರಾಮ್ ಪ್ರಸಾದ್ ಆಪ್ಲ್ಯಾ ಬಸ್ಕೆರ್ ಥಾವ್ನ್ ಉಟ್ಚೊ ದಿಸ್ಲೊ ನಾ. ಆಪ್ಲ್ಯಾ ಮತಿಂತ್ಚ್ ಹೆಂ ಲೇಖ್ ಘಾಲ್ಲೊ ನಾಯರ್ ಆತಾಂ ಉಟೊನ್ ಉಭೊ ಜಾಲೊ.
"ತರ್ ತುಂ ಮಿಸೆಸ್ ವಿಶು ಕುಮಾರ್.....?"
"ವ್ಹಯ್!"
"ತುಜೊ ಘೊವ್ ಮೊರೊನ್ ಸಾದಾರ್ಣ್ ಪಾಂಚ್ ಮಹಿನೆ ಜಾಲೆ ಆಸ್ತೆಲೆ. ಯಾಮ್ ಐ ರೈಟ್ ಮಿಸೆಸ್ ಶೀತಲ್.....?"
"ವ್ಹಯ್!"
"ತರ್ ತುಂ ಇತ್ಲೆ ದೀಸ್ ಕಶೆಂ ವೊಗೆಂ ಬಸ್ಲೆಂಯ್....?"
"ಹ್ಯಾ ವಿಶಿಂ ಹಾವೆಂ ಮಿಶೇಲಾಕ್ ಕಳಯಿಲ್ಲೆಂ. ಪುಣ್ ಪಬ್ಲಿಕ್ಪಣಿಂ ಮ್ಹಾಕಾ ಹ್ಯಾ ವಿಶಿಂ ಉಲಂವ್ಕ್ ನಾಕಾ ಆಸ್ಲ್ಲೆಂ!"
"ಕಿತ್ಯಾಕ್......?"
"ಹ್ಯಾ ವರ್ವಿಂ ರಾಯನಾಕ್ ಆನಿ ಮಿಶೇಲಾಕ್ ದೂಖ್ ಪಾವ್ತೆಂ!"
"ತೆಂ ಕಶೆಂ.....?"
"ಆಲಿಯಾ ರಾಯನಾಚಾ ಫಿಲ್ಮಾಂತ್ ಕಾಮ್ ಕರ್ತಾಲೆಂ!"
"ತರ್......?"
"ಪಯ್ಲೆಂಚ್ ರಾಯನಾಚೊ ಏಕ್ ಪ್ರಾಜೆಕ್ಟ್ ಭಂಧ್ ಪಡೊನ್ ತಾಕಾ ಲುಕ್ಸಾಣ್ ಜಾಲ್ಲೆಂ. ಹೆಂಯ್ ಭಂಧ್ ಪಡೊನ್ ತಾಕಾ ಲುಕ್ಸಾಣ್ ಜಾಲ್ಯಾರ್....? ಹಾವೆಂ ಆಶೆಂ ಚಿಂತ್ಲೆಂ. ಪುಣ್ ಮಿಶೇಲಾಕ್ ಹಾವೆಂ ಹ್ಯಾ ವಿಶಯಾಂತ್ ತಿಳ್ಸಿಲ್ಲೆಂ!"
"ಮಿಶೇಲ್ ಆತಾಂ ನಾ ಶೀತಲ್! ತ್ಯಾ ವಿಶಯಾಕ್ ಸೊಡ್ಯಾಂ. ಪುಣ್ ತುವೆಂ ರಾಯನಾಚಾ ಫಾಯ್ದ್ಯಾಚೆಂ ಚಿಂತ್ಲೆಂಯ್. ವ್ಹಯ್...?"
"ವ್ಹಯ್!"
"ಸಂಪೂರ್ಣ್ ಬಿಜ್ನೆಸಾಚಾ ನದ್ರೆನ್! ಪುಣ್ ಹ್ಯಾ ತುಜ್ಯಾ ಚಿಂತ್ಪಾ ಥಾವ್ನ್ ರಾಯನಾಕ್ ಆತಾಂ ಪಯ್ಲೆಂಚ್ಯಾಕ್ಯ್ ವರ್ತೆಂ ಲುಕ್ಸಾಣ್ ಜಾಲಾಂ ಮಿಸೆಸ್ ಶೀತಲ್. ಹಾಕಾ ತುಂ ಕಿತೆಂ ಮ್ಹಣ್ತಾಯ್?"
"ತಾಕಾ ಹಾಂವ್ ಜವಬ್ದಾರ್ ನ್ಹಯ್! ಹಾವೆಂ ಮಿಶೇಲಾಕ್ ಜಾಗಯಿಲ್ಲೆಂ!"
"ತರ್ ತುವೆಂ ಸಾಂಗ್ಚೆಂ ಆಲಿಯಾನ್ಚ್ ಮಿಶೇಲಾಚೆಂ ಅಪಹರಣ್ ಕರುನ್ ತಾಚಿ ಹತ್ಯಾ ಕೆಲ್ಯಾ!"
"ವ್ಹಯ್!"
"ಹ್ಯಾ ವಿಶಿಂ ಆಮ್ಚೊ ಖಾಬಿಲ್ ಪ್ರಾಸಿಕ್ಯೂಟರ್ ವಾದ್ ಮಾಂಡ್ತಲೊ. ಪುಣ್ ತುಂ ಮ್ಹಾಕಾ ಹೆಂ ಸಾಂಗ್..... ಆಲಿಯಾ ವಯ್ರ್ ಹಲ್ಲೊ ಕೆಲ್ಲೊ ವ್ಯಕ್ತಿ ತೊ ಇಕ್ಬಾಲ್ ಆನಿ ತಾಚೊ ಭಾವ್ ಮ್ಹಣೊನ್ಚ್ ತುಂ ಕಶೆಂ ಸಾಂಗ್ತಾಯ್?"
"ಹಲ್ಲೊ ಜಾಲ್ಲ್ಯಾ ವಗ್ತಾರ್.....!"
"ಹಾಂ! ಸಾಂಗ್ ಮಿಸೆಸ್ ಶೀತಲ್. ಹಲ್ಲೊ ಜಾಲ್ಲ್ಯಾ ವಗ್ತಾರ್.....?"
"ಹಾಂವ್ ಆಲಿಯಾಚಾ ಪ್ಲ್ಯಾಟಾಂತ್ ಆಸ್ಲ್ಲಿಂ!"
ತಿತ್ಲೆಂಚ್!
ಸಗ್ಳ್ಯಾ ಕೊರ್ಟಾಂತ್ ಸಂಪೂರ್ಣ್ ಮೌನ್! ಕಾಂಯ್ಚ್ ಆವಾಜ್ ನಾ. ಕಾನ್ ದೀವ್ನ್ ಆಯ್ಕೊಂವ್ಚೊ ಕೋರ್ಟ್ ರುಮಾಂತ್ಲೊ ಲೋಕ್ ಶ್ವಾಸ್ ಘೆಂವ್ಕ್ ವಿಸ್ರಾಲೊ.
ಥೊಡಿಂಚ್ ಖಿಣಾಂ!
ಇಕ್ಬಾಲ್ ಆನಿ ರಾಶಿದ್ ಬಸ್ಲೆಲ್ಯಾ ಕಡೆಚ್ ಎದೊಳ್ ನಿಟ್ಟ್ ತಕ್ಲಿ ಉಭಾರುನ್ ಆಯ್ಕೊಂಚೆ ತೆ ತಾಂಚೊ ಪಾಟಿಚೊ ಖಣೊ ಮೊಡ್ಲೆಲ್ಯಾ ಪರಿಂ ಜಾವ್ನ್ ಬಾಗ್ವಾಲೆ.
ವ್ಹಳೂ ಕೊರ್ಟಾಂತ್ ಗುಸು ಗುಸು.
ನಾಯರಾಚಾ ಜಿಬೆಕ್ ಆರ್ ಮಾರ್ಲ್ಲ್ಯಾ ಪರಿಂ ಜಾಲೆಂ.
ಆಲಿಯಾ ನೀಟ್ ಜಾಲೆಂ. ರಾಮ್ ಪ್ರಸಾದಾಚಾ ಬಾಗ್ವಾಲ್ಲ್ಯಾ ಗೊಮ್ಟೆಚಿ ಶಿರ್ ಉಟೊನ್ ಉಭಿ ಜಾಲಿ.
ಕೊರ್ಟಾಂತ್ ಗುಸು ಗುಸು ಚಡ್ ಜಾಲೆಂ.
"ಆರ್ಡರ್ ಆರ್ಡರ್!"
"ಪ್ರೊಸೀಡ್ ಮಿಸ್ಟರ್ ಪ್ರಾಸಿಕ್ಯೂಟರ್!" ಜಡ್ಜಾಚೊ ಆದೇಶ್
"ಎಸ್ ಮಿ ಲೋರ್ಡ್!"
"ಹಾಂ! ತುವೆಂ ಕಿತೆಂ ಜವಾಬ್ ದಿಲಿಯ್ ಮಿಸೆಸ್ ಶೀತಲ್.....?"
"ಇಕ್ಬಾಲಾನ್ ಆಲಿಯಾ ವಯ್ರ್ ಹಲ್ಲೊ ಚಲಯ್ತಾನಾ ಹಾಂವ್ ಆಲಿಯಾಚಾ ಪ್ಲ್ಯಾಟಾಂತ್ ಆಸ್ಲ್ಲಿಂ!"
"ಆಲಿಯಾಚಾ ಪ್ಲ್ಯಾಟಾಂತ್ ತುಂ ಕಿತೆಂ ಕರ್ತಾಲೆಂಯ್....?"
"ಹಾಂವ್ ಆಲಿಯಾಕ್ ತಾಚ್ಯಾ ಕಾಮಾಂ ವಿಶ್ಯಾಂತ್ ಸಮ್ಜಾಂವ್ಕ್ ಆಯಿಲ್ಲಿಂ!"
"ಇಕ್ಬಾಲಾನ್ ಆನಿ ರಾಶಿದಾನ್ ತುಕಾ ಪಳಂವ್ಕ್ ನಾ?"
"ನಾ!"
"ಅತ್ತಾಂ ತುವೆಂ ಸಾಂಗ್ಲೆಂಯ್ ಇಕ್ಬಾಲ್ ಆನಿ ರಾಶಿದ್ ಆಲಿಯಾಚಾ ಪ್ಲ್ಯಾಟಾಕ್ ಯೆತಾನಾ ತುಂ ಪ್ಲ್ಯಾಟಾಂತ್ ಆಸ್ಲ್ಲೆಂಯ್!"
"ವ್ಹಯ್!"
"ತರ್ ಇಕ್ಬಾಲಾನ್ ಆನಿ ರಾಶಿದಾನ್ ತುಕಾ ಪಳಂವ್ಕ್ ನಾ ಕಿತ್ಯಾಕ್....?"
"ಆಲಿಯಾನ್ ಮ್ಹಾಕಾ ಘರಾ ಭಿತರ್ ಲಿಪಯಿಲ್ಲೆಂ!"
"ಕಿತ್ಯಾಕ್?"
"ಹಾಂವ್ ನೆಣಾಂ!"
"ಹೆಂ ಫಟಿ ಮಾರ್ತಾ!" ಆಪ್ಣೆ ಬಸ್ಲೆಲ್ಯಾ ಕಡೆನ್ ಥಾವ್ನ್ ಇಕ್ಬಾಲ್ ಉಟೊನ್ ಉಭೊ ಜಾಲೊ.
"ಸಿಟ್ ಡೌನ್ ಮಿಸ್ಟರ್ ಇಕ್ಬಾಲ್! ತುಕಾ ಕೊರ್ಟಾಂತ್ ಉಲಂಯ್ಕ್ ಆವ್ಕಾಸ್ ಲಾಭ್ತಲೊ!" ಜಡ್ಜಾನ್ ಆದೇಶ್ ದಿಲೊ.
"ಹೆಂ ಫಟಿ ಮಾರ್ತಾ ಮಿ ಲೋರ್ಡ್!" ನಾಯರ್ ಬೊಬಾಟ್ಲೊ
"ನಾ ಮಿ ಲೋರ್ಡ್! ಶೀತಲಾಕ್ ಫಟಿ ಮಾರ್ಚಿ ಗರ್ಜ್ಚ್ ನಾ!" ಯೂಸುಫ್ ಉಟೊನ್ ಉಭೊ ಜಾಲೊ.
"ಹ್ಯೊ ಫಟಿ ಮಿ ಲೋರ್ಡ್!"
"ನ್ಹಯ್ ಮಿ ಲೋರ್ಡ್!"
"ವ್ಹಯ್!"
"ನ್ಹಯ್!"
"ಹ್ಯೊ ಫಟಿ!"
"ತರ್ ಸತ್ ಕಿತೆಂ....? ಕಿತೆಂ ಸತ್?"
"ಸತ್ ಕಿತೆಂ ಮ್ಹಳ್ಳೆಂ ಕೊರ್ಟಾಚಾ ಮುಕಾರ್ ಯೆತೆಲೆಂ ಮಿ ಲೋರ್ಡ್!"
"ಯೇಂವ್ಕ್ ಜಾಯ್ ಮಿ ಲೋರ್ಡ್!" ಯೂಸುಫ್ ಆಪ್ಲ್ಯಾ ಬಸ್ಕೆರ್ ಬಸ್ಲೊ.
"ಬರೆಂ! ತರ್ ತುಂ ಸಾಂಗ್ತಾಯ್ ಆಲಿಯಾ ವಯ್ರ್ ಹಲ್ಲೊ ಜಾತಾನಾ ತುಂ ಆಲಿಯಾಚಾ ಪ್ಲ್ಯಾಟಾಂತ್ ಆಸ್ಲ್ಲೆಂಯ್....?"
"ವ್ಹಯ್!"
"ಹಲ್ಲೊ ಕೊಣೆಂ ಕೆಲೊ ಇಕ್ಬಾಲಾನ್ ವಾ ರಾಶಿದಾನ್?"
"ದೊಗಾಂಯ್ ಮಧ್ಲ್ಯಾ ಎಕ್ಲ್ಯಾನ್! ಹಾಂವ್ ತಾಂಚ್ಯಾ ದೊಳ್ಯಾಂ ಮುಕಾರ್ ನಾತ್ಲ್ಲಿಂ ಜಾಲ್ಲ್ಯಾನ್ ಆಲಿಯಾ ವಯ್ರ್ ಹಲ್ಲೊ ಚಲಯಿಲ್ಲೊ ತೊ ಕೋಣ್ ಮ್ಹಣೊನ್ ಹಾಂವ್ ನೆಣಾಂ. ಪುಣ್ ಎಕ್ಲೊ ಹಲ್ಲೊ ಕರುಂಕ್ ಆನಿ ಎಕ್ಲೊ ಆಲಿಯಾಕ್ ಬಚಾವ್ ಕರುಂಕ್ ಭಿಲ್ಕುಲ್ ಆಯಿಲ್ಲೊ ನ್ಹಯ್!"
ಕೋರ್ಟ್ ರುಮಾಂತ್ ಚರ್ಚೆ. ಥಂಯ್ ಹಾಂಗಾ ಗುಸು ಗುಸು.
"ತರ್ ತುಂ ಸತ್ ಉಲಯ್ತಾಯ್.....?"
"ವ್ಹಯ್!"
"ತುಂ ಜರ್ ತರ್ ಆಲಿಯಾ ವಯ್ರ್ ಹಲ್ಲೊ ಜಾತಾನಾ ಆಲಿಯಾಚಾ ಪ್ಲ್ಯಾಟಾಂತ್ ಆಸ್ಲ್ಲೆಂಯ್ ಜಾಲ್ಯಾರ್ ತುಕಾ ತ್ಯಾ ಅಪಾರ್ಟ್ಮೆಂಟಾಚಾ ವಾಚ್ಮ್ಯಾನಾನ್ ಪಳಂವ್ಕ್ ನಾ ಕಿತ್ಯಾಕ್?"
"ಹಾಂವ್ ಆಲಿಯಾಕ್ ಮೆಳೊಂಕ್ ವೆಚೆಂ ಕೊಣಾಯ್ಕ್ಯ್ ಕಳೊಂಕ್ ನಜೊ ಮ್ಹಣೊನ್ ಹಾಂವ್ ಟ್ಯಾಕ್ಸಿಚೆರ್ ಗೆಲ್ಲಿಂ. ಆನಿ ಹಾಂವ್ ಅಪಾರ್ಟ್ಮೆಂಟಾ ಭಿತರ್ ವೆತಾನಾ ವಾಚ್ಮ್ಯಾನ್ ಮ್ಹಜ್ಯಾ ನದ್ರೆಕ್ ಪಡೊಂಕ್ ನಾ. ಹಾಂವ್ ನೆಣಾಂ ತೊ ಖಂಯ್ ಆನಿ ಕಿತೆಂ ಕರ್ತಾಲೊ ತೆಂ!"
"ಬರೆಂ! ಹೆಂ ಆಲಿಯಾಚಾ ಪ್ಲ್ಯಾಟಾಕ್ ವೆತಾನಾ ಜಾಲೆಂ. ಆಲಿಯಾ ವಯ್ರ್ ಹಲ್ಲೊ ಜಾಲ್ಯಾ ಉಪ್ರಾಂತ್....?"
"ಆಲಿಯಾ ವಯ್ರ್ ಹಲ್ಲೊ ಜಾಲ್ಯಾ ಉಪ್ರಾಂತ್ ಹಾಂವ್ ಭಿಯೆಲ್ಲಿಂ. ಹಾಂವ್ ತುರ್ತಾನ್ ಆಲಿಯಾಚಾ ಪ್ಲ್ಯಾಟಾ ಥಾವ್ನ್ ಭಾಯ್ರ್ ಪಡ್ಲಿಂ."
ನಾಯರಾಕ್ ಎದೊಳ್ಚ್ ಸಗ್ಳೆಂ ಸಂಪ್ಲ್ಲ್ಯಾ ಪರಿಂ ಜಾಲೆಂ. ತಾಚೊ ಭರ್ವಸೊ ಆತಾಂ ಮಾಜ್ವೊನ್ ಯೇಂವ್ಕ್ ಲಾಗ್ಲೊ.
ಎದೊಳ್ ಪಾಸೊನ್ ತಾಣೆಂ ತಣ್ ಖಾವಯಿಲ್ಲೊ, ಗಳ್ಯಾಕ್ ಮೊಗಾನ್ ಪೊಶೆಲ್ಲೊ, ಭಿರ್ಮತಿಚಿ ದೀಶ್ಟ್ ವೊತ್ಲ್ಲೊ ಉದ್ಕಾಚೆ ಥೆಂಬೆ ಬೊರಯಿಲ್ಲೊ ತೊ ಬೊಕ್ರೊ ಆಜ್ ತಾಕಾಚ್ ಬಾನಾಯಿಲ್ಲೊ ಮಾತಿಯೆಚೊ ಬೊಕ್ರೊ! ಹೆಂ ನಾಯರಾಕ್ ಕಳಿತ್ ಜಾಲೆಂ.
"ನೋ ಮೋರ್ ಫರ್ದರ್ ಕ್ವಾಶ್ಚನ್ಸ್!"
ನಾಯರ್ ಥಂಡ್ ಜಾಲೊ.
ಆತಾಂ ರಾಮ್ ಪ್ರಸಾದಾನ್ ಉಟೊಂಕ್ ಜಾಯ್ ಆಸ್ಲ್ಲೆಂ.
ಶೀತಲಾಚಾ ಸಾಕ್ಶೆ ಥಾವ್ನ್ ಹರ್ಯೆಕಾ ವಾಟೆನ್ ಆಲಿಯಾ ಫಸ್ಲ್ಲೆಂ. ತಾಚ್ಯಾ ಮಾತ್ಯಾರ್ ದೊಗಾಂಚಾ ಖುನಿಯೆಚೊ ಆಫ್ರಾಧ್ ಥಾಪ್ಲ್ಲೊ. ಇಕ್ಬಾಲ್ ಆನಿ ರಾಶಿದ್ ಫಕತ್ತ್ ಆಲಿಯಾ ವಯ್ಲ್ಯಾ ಹಲ್ಲ್ಯಾಂತ್ ಮಾತ್ರ್ ಫಸ್ಲ್ಲೆ.
ರಾಮ್ ಪ್ರಸಾದಾನ್ ಜಾಲ್ಯಾರ್ಯ್ ಆಲಿಯಾಕ್ಚ್ ಆತಾಂ ಫಸಂವ್ಕ್ ಜಾಯ್ ಆಸ್ಲ್ಲೆಂ!
ರಾಮ್ ಪ್ರಸಾದ್ ರಾಯನಾಚೊ ಖಾಸ್ ಮನಿಸ್ ಜಾವ್ನ್ ಆಪ್ಣಾಚ್ಯಾ ಜಯ್ತಾ ಖಾತಿರ್ ಖಂಡಿತ್ ಝಗಡ್ಚೊ ನಾ. ಆಪ್ಣಾ ಖಾತಿರ್ ಹೊ ರಾಮ್ ಪ್ರಸಾದ್ ರಾಯನಾಚಾ ವಿರೋಧ್ ಭಿಲ್ಕುಲ್ ವೆಚೊ ನಾ. ಆಲಿಯಾಕ್ ಹೆಂ ಖಚಿತ್ ಜಾಲ್ಲೆಂ. ತೆಂ ರಾಮ್ ಪ್ರಸಾದಾಚಾ ಮುಕ್ಲ್ಯಾ ಚಾಲಿಕ್ ಆಯ್ಕೊಂಕ್ ಆಯ್ತೆಂ ಜಾಲೆಂ.
"ಹಾಂ ಮಿಸೆಸ್ ಶೀತಲ್! ತರ್ ತುವೆಂ ಸಾಂಗ್ಚೆಂ ಆಲಿಯಾನ್ಚ್ ಮಿಶೇಲಾಚೆಂ ಅಪಹರಣ್ ಕರುನ್ ತಾಚಿ ಹತ್ಯಾ ಕೆಲ್ಯಾ!"
"ವ್ಹಯ್!"
"ತುಂ ಕಸಲೆಂ ಕಾಮ್ ಕರ್ತಾಯ್ ಮಿಸೆಸ್ ಶೀತಲ್?"
"ಕಾಜಾರಾ ಪಯ್ಲೆಂ ಏರ್ಹೊಸ್ಟೆಸ್!"
"ಕಾಜಾರಾ ಉಪ್ರಾಂತ್.....?"
"ಹೌಸ್ ವೈಫ್!"
"ಘೊವ್ ಮೆಲ್ಯಾ ಉಪ್ರಾಂತ್.....?"
"ಘೊವಾಚೆಂ ಬಿಜ್ನೆಸ್ ಸಾಂಬಾಳ್ತಾಂ!"
"ಮ್ಹಾಕಾ ದುಬಾವ್ ಮಾರ್ಲೊ ಕಿ ತುಂ ಏಕ್ ಡಿಟೆಕ್ಟಿವ್ ಮ್ಹಣೊನ್!"
ಕೋರ್ಟ್ ರುಮಾಂತ್ ಹಾಸೊ.
"ಆರ್ಡರ್! ಆರ್ಡರ್!"
ಸವ್ಕಾಸ್ ಕೋರ್ಟ್ ರುಮಾಂತ್ ಮೌನ್!
ಮುಖಾರ್ ಕಿತೆಂ ಜಾತಾ ತೆಂ ಜಾಣಾಂ ಜಾಂವ್ಚಿ ಆತುರಾಯ್ ಕೋರ್ಟ್ ರುಮಾಂತ್ಲ್ಯಾ ಸರ್ವಾಂ ಥಂಯ್ ವಾಡ್ಲಿ.
"ನೋ ಮೋರ್ ಫರ್ದರ್ ಕ್ವಾಶ್ಚನ್ಸ್ ಮಿ ಲೋರ್ಡ್!"
ರಾಮ್ ಪ್ರಸಾದ್ ಆಪ್ಲ್ಯಾ ಬಸ್ಕೆಕ್ ಪಾಟಿಂ ಪರ್ತಾಲೊ.
ಆಲಿಯಾನ್ ಚಿಂತ್ಲ್ಲ್ಯಾ ಪರಿಂಚ್ ಘಡ್ಲ್ಲೆಂ. ರಾಮ್ ಪ್ರಸಾದಾನ್ ಆಲಿಯಾಕ್ ಸಾಂಗಾತ್ ದೀಂವ್ಕ್ ಇನ್ಕಾರ್ ಕೆಲ್ಲೆಂ.
"ಕೋರ್ಟ್ ಇಸ್ ಅಡ್ಜರ್ನ್ಡ್ ಅಂಟಿಲ್ ಫರ್ದರ್ ನೋಟಿಸ್!"
"ಟಕ್!" ಜಡ್ಜ್ ಉಟೊನ್ ಉಭೊ ಜಾಲೊ.
ಆಲಿಯಾಚಾ ಕೇಸಿಂತ್ ರಾಮ್ ಪ್ರಸಾದಾಚಾ ಭರ್ತಾವಾಕ್ ಪಳೆವ್ನ್ ನಾಯರಾ ಸವೆಂ ಸಗ್ಳೆಂ ಕೋರ್ಟ್ ರೂಮ್ಚ್ ಶೆರ್ಮೆವ್ನ್ ಗೆಲೆಂ. ರಾಮ್ ಪ್ರಸಾದಾನ್ ಆಲಿಯಾಚಾ ತರ್ಫೆನ್ ಕಾಂಯ್ಚ್ ವಾದ್ ಮಾಂಡಿನಾಸ್ತಾನಾ ಆಪ್ಲಿ ಸಲ್ವಣಿ ಮಾಂದುನ್ ಘೆತ್ಲೆಲಿ ಪಳವ್ನ್ ಸರ್ವಾಂಕ್ ರಾಮ್ ಪ್ರಸಾದಾ ವಯ್ರ್ ದುಬಾವ್ ಉಟ್ಲೊ ಜಾಲ್ಯಾರ್ಯ್ ನಾಯರಾಕ್ ಆನಿ ಇಕ್ಬಾಲ್ ರಾಶಿದಾಕ್ ಹೆಂ ತಾಂಚ್ಯಾ ಬರ್ಯಾಕ್ಚ್ ಪಡ್ಲೆಂ. ರಾಯನಾನ್ ಆಲಿಯಾಚೊ ಹಾತ್ ಸೊಡ್ಲಾ ಮ್ಹಳ್ಳೆಂ ತೆ ತೆಗೀ ಜಾಣಾಂ ಜಾಲೆ. ಆಲಿಯಾಚಾ ಹ್ಯಾ ಎಕ್ಸುರ್ಪಣಾ ಥಾವ್ನ್ ಆಪ್ಣಾಕ್ ಜಾಯ್ ಪುರ್ತೊ ಫಾಯ್ದೊ ಉಟಂವ್ಕ್ ನಾಯರಾನ್ ಚಿಂತ್ಲೆಂ. ತಾಚ್ಯಾ ಚಾಲಿಕ್ ಹ್ಯಾ ಕೇಸಿಚ್ಯಾ ಮುಕ್ಲ್ಯಾ ಆಯ್ಕೊವ್ಣ್ಯಾಂತ್ ಪ್ರಸ್ತುತ್ ಕರುಂಕ್ ತೊ ಆಶೆಲೊ.
ಆಯ್ಚ್ಯಾ ಕೊರ್ಟಾಚಾ ಆಯ್ಕೊವ್ಣ್ಯಾಂತ್ ಮೀಡಿಯಾಕ್ ಆನಿ ಪ್ರೆಸ್ಸಾಕ್ ಲಾಭ್ಲ್ಲಿ ಖಬಾರ್ ಪ್ರೆಸ್ಸಾಚ್ಯಾ ಪ್ರಿಂಟರಾಂತ್ ಪ್ರಿಂಟ್ ಜಾತಾಲಿ ಜಾಲ್ಯಾರ್ ಟಿ.ವಿ. ಚ್ಯಾನೆಲಾಂ ಹ್ಯಾ ಖಬ್ರೆಕ್ ತುರ್ತಾನ್ ಪ್ರಸಾರ್ ಕರುಂಕ್ ಆಯ್ತಿಂ ಜಾಲ್ಲಿಂ. ಎಕಾ ಕುಶಿನ್ ಬಾಲಿವುಡ್ ಜಾಲ್ಯಾರ್ ದುಸ್ರ್ಯಾ ಕುಶಿನ್ ಅಂಡರ್ ವರ್ಲ್ಡ್! ಮೀಡಿಯಾಚ್ಯಾಂಕ್ ಹಾಚ್ಯೆ ವರ್ನಿಂ ವರ್ತಿ ಸೆನ್ಶೇಶನಲ್ ಖಬಾರ್ ದುಸ್ರಿ ನಾತ್ಲ್ಲಿ.
ಇಕ್ಬಾಲಾಕ್ ಆನಿ ರಾಶಿದಾಕ್ ಆಪುಣ್ ಹ್ಯಾ ಕೇಸಿ ಥಾವ್ನ್ ಸುಲಾಭಾಯೆನ್ ಭಾಯ್ರ್ ಯೇಂವ್ಕ್ ಸಕ್ತಾಂವ್ ಮ್ಹಳ್ಳ್ಯಾಚಿ ಖಾತ್ರಿ ಅಜೂನ್ ಜಾಂವ್ಕ್ ನಾತ್ಲ್ಲಿ ಜಾಲ್ಯಾರ್ಯ್ ಸರ್ವ್ ಆಫ್ರಾಧ್ ಆಲಿಯಾ ವಯ್ರ್ ಘುಂವ್ಲ್ಲ್ಯಾನ್ ಕೊರ್ಟಾಚಾ ಮುಕ್ಲ್ಯಾ ಆಯ್ಕೊವ್ಣ್ಯಾಂತ್ ನಾಯರ್ ಆಪ್ಣಾಚಾ ತರ್ಫೆನ್ ಕಾಂಯ್ ತರ್ಯ್ ಚಾಲ್ ಚಲ್ತಲೊ ಮ್ಹಳ್ಳೊ ಭರ್ವಸೊ ಇಕ್ಬಾಲಾಕ್ ಆಸ್ಲ್ಲೊ.
ಆಲಿಯಾಚಾ ಜಿನೊಸಾಂತ್ ಕಾಂಯ್ ಬದ್ಲಾವಣ್ ಆಯ್ಲಿ ನಾ. ತೆಂ ತಶೆಂಚ್ ಶಾಂತ್ ಆಸ್ಲ್ಲೆಂ. ಮಿಶೇಲಾಚಾ ಖುನಿಯೆ ಸವೆಂ ವಿಶು ಕುಮಾರಾಚಾ ಖುನಿಯೆಚೊ ಆಫ್ರಾಧ್ ಪಾಸೊನ್ ಶೀತಲಾನ್ ಆಲಿಯಾಚಾ ಮಾತ್ಯಾರ್ಚ್ ಥಾಪ್ಲ್ಲೊ. ವಿಶು ಕುಮಾರಾಚಾ ಮರ್ಣಾಕ್ ಆಪುಣ್ ಕಾರಾಣ್ ಮ್ಹಣೊನ್ ಖುದ್ಧ್ ಇಕ್ಬಾಲಾನ್ ಆಲಿಯಾ ಲಾಗಿಂ ಪಯ್ಲೆಂಚ್ ಸಾಂಗ್ಲ್ಲೆಂ. ಇಕ್ಬಾಲಾನ್ ಆನಿ ರಾಶಿದಾನ್ ಮೆಳೊನ್ ವಿಶು ಕುಮಾರಾಕ್ ತಾಂಚಾ ವಿರೋಧ್ ಆಲಿಯಾಕ್ ಕೆಲ್ಲ್ಯಾ ಮಜತೆಚೆಂ ಹಗೆಂ ತಿರ್ಸುಂಕ್ ಇಕ್ಬಾಲಾನ್ಚ್ ವಿಶು ಕುಮಾರಾಕ್ ಮರ್ಣಾಚಿ ವಾಟ್ ದಾಕಯಿಲ್ಲಿ. ಪುಣ್ ಆಜ್ ಹೆಂ ರುಜು ಕರುಂಕ್ ಆಲಿಯಾ ವರ್ವಿಂ ಸಾದ್ಯ್ ನಾತ್ಲ್ಲೆಂ. ಹ್ಯಾ ವಗ್ತಾರ್ ಸಗ್ಳೆಂ ಆಲಿಯಾಚಾ ವಿರೋಧ್ ಆಸ್ಲ್ಲೆಂ. ಹ್ಯಾ ವಗ್ತಾರ್ ರಾಮ್ ಪ್ರಸಾದಾ ಸವೆಂ ರಾಯನ್, ನಾಯರ್, ಇಕ್ಬಾಲ್, ರಾಶಿದ್, ಯೂಸುಫ್, ಸಗ್ಳೆ ಆಪ್ಣಾ ವಿರೋಧ್ ಉಟೊನ್ ರಾವ್ಲ್ಯಾತ್ ಮ್ಹಳ್ಳ್ಯಾ ಪರಿಂ ಆಲಿಯಾಕ್ ದಿಸ್ಲೆಂ. ತ್ಯಾ ಶಿವಾಯ್ ತಾಣೆಂ ಎದೊಳ್ ಜಿವಿತಾಂತ್ ಝುಜೊನ್ ಆಯಿಲ್ಲಿ ತಾಚಿಚ್ ಚಲಿಯೆ ಜಾತ್ ಶೀತಲಾಚಾ ರುಪಾರ್ ತಾಕಾಚ್ ವಿರೋಧ್ ಜಾವ್ನ್ ಝುಜಾರ್ ದೆಂವ್ಲ್ಲಿ.
ಪುಣ್ ಆಲಿಯಾ ತಿತ್ಲೆಂ ಭಿವ್ಕುರೆಂ ಚಲಿ ನ್ಹಯ್ ಆಸ್ಲ್ಲೆಂ! ತಾಚಿ ವಾಟ್ ತಾಣೆಂಚ್ ತಯಾರ್ ಕೆಲ್ಲಿ! ಅಜೂನ್ ತಾಚೊ ಭರ್ವಸೊ ಘಟ್ ಆಸ್ಲ್ಲೊ. ಆಪ್ಣಾ ವಯ್ರ್ ವಿಶ್ವಾಸ್ ದವರ್ಲ್ಲೊ ಮನಿಸ್ ಕೆದಿಂಚ್ ಸಲ್ವಾನಾ ಮ್ಹಳ್ಳೆಂ ಆಲಿಯಾ ಬರ್ಯಾನ್ ಜಾಣಾಂ.
ಆಲಿಯಾ ಇಕ್ಬಾಲ್ ಆನಿ ರಾಶಿದಾಕ್ ಪರ್ತ್ಯಾಕ್ ಪೊಲಿಸ್ ಕಸ್ಟಡಿಂತ್ ರಿಮಾಂಡಾರ್ ದವರ್ಲೆಂ.
*********
"ತುಜೆಂ ನಾಂವ್?"
"ಮನೋಜ್ ಕುಮಾರ್"
"ಕಾಮ್......?"
"ಮಂದಿರಾ ಪ್ಲಾಸ್ಟಿಕ್ಸಾಂತ್ ಲೇಬರ್ ಆಫೀಸರ್!"
"ಹಾಚ್ಯಾ ಪಯ್ಲೆಂ.....?"
"ವೆಸ್ಟ್ ಲೈನ್ ಏರ್ವೇಸಾಂತ್ ಪ್ಲೈಟ್ ಕ್ರೂ ಮೆಂಬರಾಚೊ ಅಸಿಸ್ಟಂಟ್ ಮ್ಯಾನೇಜರ್ ಜಾವ್ನ್ ಆಸ್ಲ್ಲೊಂ!"
"ತುಂ ಮಿಸ್ ಆಲಿಯಾ ಖಾನಾಕ್ ಕಶೆಂ ವಳ್ಕಾತಾಯ್.....?"
"ತೆಂ ವೆಸ್ಟ್ ಲೈನ್ ಏರ್ವೇಸಾಂತ್ ಏರ್ ಹೊಸ್ಟೆಸ್ ಜಾವ್ನ್ ಆಸ್ಲ್ಲೆಂ!"
"ತುಂ ತಾಕಾ ಖಾಸ್ಗೆನ್ ವಳ್ಕಾತಾಲೊಯ್ ವಾ ಫಕತ್ತ್ ತುಜ್ಯಾ ಕಾಮಾಚಾ ಸಂಭಂಧಾನ್....?"
"ಆಮ್ಚೆ ಮಧೆಂ ಕಾಂಯ್ ವಳಕ್ ನಾತ್ಲ್ಲಿ! ಫಕತ್ತ್ ಕಾಮಾಚೊ ಮಾತ್ರ್ ಸಂಭಂಧ್!"
"ಮಿಸೆಸ್ ಶೀತಲಾಚಾ ಸಾಂಗ್ಣ್ಯಾ ಪರ್ಮಾಣೆಂ ಹ್ಯಾಚ್ ಆಲಿಯಾ ಖಾನಾನ್ ತುಕಾ ತುಜ್ಯಾ ಏರ್ ವೇಸಾಚಾ ಕಾಮಾ ಥಾವ್ನ್ ಕಾಡಯಿಲ್ಲೆಂ. ವ್ಹಯ್....?"
"ವ್ಹಯ್!"
"ಹೆಂ ಕಿತ್ಯಾಕ್ ಮಿಸ್ಟರ್ ಮನೋಜ್ ಕುಮಾರ್....? ತುಕಾ ಆನಿ ಆಲಿಯಾಕ್ ಕಾಂಯ್ ದುಸ್ಮಾನ್ಕಾಯ್ ಆಸ್ಲ್ಲಿ?"
"ಮ್ಹಾಕಾ ಕಾಂಯ್ ಹ್ಯಾ ಆಲಿಯಾ ವಯ್ರ್ ದುಸ್ಮಾನ್ಕಾಯ್ ನಾತ್ಲ್ಲಿ. ಪುಣ್ ಹ್ಯಾ ಆಲಿಯಾಕ್ ಮ್ಹಜ್ಯಾ ವಯ್ರ್ ದುಸ್ಮಾನ್ಕಾಯ್ ಆಸ್ಲ್ಲಿ!?"
"ಹಿ ಕಿತ್ಯಾಕ್....?"
"ಆಮ್ಚ್ಯಾ ಏರ್ವೇಸಾಂತ್ ಆಲಿಯಾಚಾ ವರ್ತನಾ ವಯ್ರ್ ಸಗ್ಳ್ಯಾಂಚಿ ನದರ್ ಆಸ್ಲ್ಲಿ. ತಾಚೊ ಸ್ವಭಾವ್ ಬರೊ ನಾತ್ಲ್ಲೊ. ಪ್ಲೈಟಾರ್ ಜಾಲ್ಯಾರ್ಯ್ ತಾಚೆಂ ಪಯ್ಣಾರ್ಯಾಂ ಸವೆಂ ಝಗ್ಡೆಂ ಜಾಲ್ಲೆ ದಾಖ್ಲೆ ಆಸಾತ್! ತಾಕಾ ಆಮ್ಚ್ಯಾ....."
"ಏಕ್ ಮಿನಿಟ್ ಮಿಸ್ಟರ್ ಮನೋಜ್ ಕುಮಾರ್! ತುವೆಂ ಆಲಿಯಾಚಾ ಝಗ್ಡ್ಯಾಚೆ ದಾಖ್ಲೆ ಆಸಾತ್ ಮ್ಹಳೆಂಯ್."
"ವ್ಹಯ್!"
"ಹ್ಯಾ ದಾಖ್ಲ್ಯಾಂ ಪಯ್ಕಿ ಏಕ್ ದಾಖ್ಲೊ ಕೊರ್ಟಾಕ್ ಪ್ರಸ್ತುತ್ ಕರ್ಯೆತ್....?"
"ಖಂಡಿತ್!"
"ಏಕ್ ದೀಸ್ ಆಲಿಯಾ ಹ್ಯಾ ರಾಶಿದಾ ಲಾಗಿಂಚ್ ಪ್ಲೈಟಾರ್ ಝಗಡ್ಲೆಂ!"
"ಹಾಚಿ ಕಾಂಯ್ ರುಜ್ವಾತ್ ಆಸಾ? ಐ ಮೀನ್ ಲಿಖಿತ್....?"
"ವೆಸ್ಟ್ ಲೈನ್ ಏರ್ವೇಸಾಂತ್ ತ್ಯಾ ಝಗ್ಡ್ಯಾಚೆಂ ಪೈಲ್ ಆಸಾ!"
"ತೆಂ ಝಗ್ಡೆಂ ತಿತ್ಲೆಂ ವ್ಹಡ್ಲೆಂ ಜಾಲ್ಲೆಂ.....?"
"ವ್ಹಯ್! ಪೊಲಿಸ್ ಕಂಪ್ಲೇಂಟ್ ಪಾಸೊನ್ ಜಾಲ್ಲೆಂ. ಉಪ್ರಾಂತ್ ಆಮ್ಚ್ಯಾ ಭಿತರ್ಚ್ ಆಮಿ ಸಮಾಧಾನೆಂತ್ ಕಾಡ್ಲೆಂ!"
"ಉಪ್ರಾಂತ್.....?"
"ಆಲಿಯಾ ವಯ್ರ್ ಪರ್ತ್ಯಾಕ್ ಏಕ್ ಕಂಪ್ಲೇಂಟ್ ಆಯ್ಲೆಂ!"
"ಮ್ಹಳ್ಯಾರ್ ಆಲಿಯಾ ತಾಚ್ಯಾ ಸ್ವಭಾವಾನ್ಚ್ ಝಗ್ಡ್ಯಾಚಾ ಸ್ವಭಾವಾಚೆಂ ಮ್ಹಣೊನ್ ಮ್ಹಣ್ಚೆಂ ತುವೆಂ.....?"
"ಹೆಂ ಹಾವೆಂ ಸಾಂಗ್ಚೆಂ ನ್ಹಯ್! ಸಗ್ಳೆಂ ಏರ್ ವೇಸ್ ಹ್ಯಾ ಆಲಿಯಾ ವಿಶಿಂ ಜಾಣಾಂ!"
"ಉಪ್ರಾಂತ್.....?"
"ಆಲಿಯಾಚಾ ಹ್ಯಾ ಝಗ್ಡ್ಯಾಚಾ ಸ್ವಭಾವಾಕ್ ಲಾಗೊನ್ ತಾಕಾ ಆಮ್ಚ್ಯಾ ಏರ್ವೇಸಾಚಾ ಕಾಮಾ ಥಾವ್ನ್ ಕಾಡ್ಚೆಂ ಪಡ್ಲೆಂ!"
"ಆಲಿಯಾ ವಯ್ರ್ ಹೆಂ ದುಸ್ರೆಂ ಕಂಪ್ಲೇಂಟ್ ಕೊಣೆಂ ದಿಲೆಂ.....?"
"ವಿಶು ಕುಮಾರಾನ್!"
"ಕಾರಾಣ್.......?"
"ಕಾರಾಣ್ ತೆಂಚ್! ಆಲಿಯಾಚೊ ಸ್ವಭಾವ್! ಪ್ಲೈಟಾರ್ ಪಯ್ಣಾರ್ಯಾಂ ಸವೆಂ ತಾಚೊ ಸ್ವಭಾವ್ ಮಯ್ಪಾಸಿ ಜಾವ್ನ್ ನಾತ್ಲ್ಲೊ!"
"ಹ್ಯಾ ಖಾತಿರ್ ತುವೆಂ ತಾಕಾ ಕಾಮಾ ಥಾವ್ನ್ ಕಾಡ್ಲೆಂಯ್!?"
"ವ್ಹಯ್!"
"ಉಪ್ರಾಂತ್.....?"
"ಹ್ಯಾ ಕಾರಾಣಾಕ್ ಲಾಗೊನ್ ಆಲಿಯಾನ್ ಮ್ಹಜ್ಯಾ ವಯ್ರ್ ಹಗೆಂ ದವರುನ್ ಸ ಮಹಿನ್ಯಾಂ ಉಪ್ರಾಂತ್ ಮ್ಹಾಕಾ ಕಾಮಾ ಥಾವ್ನ್ ಕಾಡುನ್ ಆಪ್ಲೆಂ ಹಗೆಂ ತಿರ್ಸಿಲೆಂ!"
"ಥ್ಯಾಂಕ್ ಯು ಮಿಸ್ಟರ್ ಮನೋಜ್ ಕುಮಾರ್!"
"ಮಿ ಲೋರ್ಡ್! ಹ್ಯಾ ಆಲಿಯಾ ಖಾನಾಚಾ ಸ್ವಭಾವಾಕ್ ಲಾಗೊನ್ ತೆಂ ಖಂಯ್ ಖಂಯ್ ಗೆಲಾಂ ಥಂಯ್ಚರ್ ತಾಣೆಂ ಆಪ್ಲ್ಯಾ ಪೆಲ್ಯಾ ಥಂಯ್ ದುಸ್ಮಾನ್ಕಾಯ್ ಜೊಡ್ಲ್ಯಾ ನ್ಹಯ್ ಆಸ್ತಾಂ ತೆಂ ಪೆಲ್ಯಾ ಥಂಯ್ ಬರ್ಯಾ ರಿತಿನ್ ರಾವೊಂಕ್ ನಾ. ಆಮಿಂ ಜಿಯೆಂವ್ಚ್ಯಾ ಹ್ಯಾ ಸಮಾಜೆಂತ್ ಎಕಾಮೆಕಾ ಸವೆಂ ಮೊಗಾ ಮಾಯ್ಪಾಸಾನ್ ಜಿಯೆಂವ್ಚೆ ಸೊಡುನ್ ಹ್ಯಾ ಆಲಿಯಾನ್ ಆಪ್ಲ್ಯಾ ಸಮಾಜೆ ಸವೆಂ ದುಸ್ಮಾನ್ಕಾಯ್ ಕೆಲಿ. ಆಪ್ಲೊ ಸ್ವಭಾವ್ ಬದ್ಲುಂಚೊ ಸೊಡುನ್ ದುಸ್ರ್ಯಾಂಚಾ ಜಿವಿತಾಕ್ ಆಪ್ಲ್ಯಾ ಖೆಳಾಚಿ ವಸ್ತ್ ಜಾವ್ನ್ ತಾಣೆಂ ಘೆತ್ಲಿ. ಅಸಲೆಂ ಚಲಿ ಹ್ಯಾ ಸಮಾಜೆಕ್ ಏಕ್ ಮಾರೆಕಾರ್ ಪಿಡಾ ಮಿ ಲೋರ್ಡ್!"
"ದೇಟ್ಸಾಲ್ ಮಿ ಲೋರ್ಡ್!"
"ಇಟ್ಸ್ ಯುವರ್ ವಿಟ್ನೆಸ್!"
ಯೂಸುಫ್ ಆಪ್ಲ್ಯಾ ಬಸ್ಕೆಕ್ ಚಮ್ಕಾಲೊ.
ನಾಯರ್ ಉಟೊನ್ ಉಭೊ ಜಾಲೊ.
"ಮಿಸ್ಟರ್ ಮನೋಜ್ ಕುಮಾರ್! ತುವೆಂ ಆತ್ತಾಂ ಸಾಂಗ್ಲೆಂಯ್ ತುಮ್ಚ್ಯಾ ಏರ್ ವೇಸಾಂತ್ ಹ್ಯಾ ಆಲಿಯಾ ಆನಿ ರಾಶಿದಾಚಾ ಝಗ್ಡ್ಯಾಚೆಂ ಲಿಖಿತ್ ಪೈಲ್ ಆಸಾ! ಹೆಂ ನಿಜಾಯ್ಕ್ಯ್ ಆಸಾ.....?"
"ವ್ಹಯ್ ಆಸಾ!"
"ಬರೆಂ! ತರ್ ತುವೆಂ ಸಾಂಗ್ಚೆಂ ಆಲಿಯಾಕ್ ತುವೆಂ ಕಾಮಾ ಥಾವ್ನ್ ಕಾಡ್ಲ್ಲ್ಯಾಕ್ ತಾಣೆಂ ತುಜ್ಯೆರ್ ಫಾರಿಕ್ಪಣ್ ಘೆತ್ಲೆಂ......?"
"ವ್ಹಯ್!"
"ಹೆಂಚ್ ಫಾರಿಕ್ಪಣ್ ತೆಂ ಇಕ್ಬಾಲಾಚಾ ಭಾವಾ ವಯ್ರ್ ಐ ಮೀನ್ ರಾಶಿದಾ ವಯ್ರ್ಯ್ ಕಾಡುಂಕ್ ಸಕ್ತಾ!"
"ಖಂಡಿತ್ ಕಾಡುಂಕ್ ಸಕ್ತಾ! ಮ್ಹಜಿ ಡ್ಯೂಟಿ ಕೆಲ್ಲ್ಯಾ ಮ್ಹಜ್ಯಾ ವಯ್ರ್ ಜರ್ ತರ್ ಆಲಿಯಾ ಹಗೆಂ ತಿರ್ಸುಂಕ್ ಸಕ್ತಾ ಜಾಲ್ಯಾರ್ ತ್ಯಾ ರಾಶಿದಾ ವಯ್ರ್ ಕಿತ್ಯಾಕ್ ನಾ? ರಾಶಿದಾ ಸವೆಂ ತಾಚೆಂ ಝಗ್ಡೆಂ ಜಾಲ್ಲೆಂ. ಮ್ಹಜ್ಯಾಕ್ಯ್ ಪಯ್ಲೆಂ ತ್ಯಾ ರಾಶಿದಾ ವಯ್ರ್ ತಾಣೆಂ ಆಪ್ಲೆಂ ಹಗೆಂ ತಿರ್ಸುಂಚೊ ಸಂಭವ್ ಚಡ್ ಆಸಾ!"
"ಆನಿ ವಿಶು ಕುಮಾರ್....?"
"ಹಾವೆಂ ಆಯ್ಕಾಲಾಂ ಕೀ ವಿಶು ಕುಮಾರಾಚೆಂ ಆಕ್ಸಿಡೆಂಟ್ ಜಾಲಾಂ! ಪುಣ್ ಹಾಂವ್ ಪಾತ್ಯೆ ನಾ. ತೆಂ ಆಕ್ಸಿಡೆಂಟ್ ಹ್ಯಾ ಆಲಿಯಾನ್ಚ್ ಕರಯ್ಲಾಂ!"
"ಹೆಂ ತುಂ ಇತ್ಲ್ಯಾ ವಿಶ್ವಾಸಾನ್ ಕಶೆಂ ಸಾಂಗ್ತಾಯ್....?"
"ಆಲಿಯಾಕ್ ಆನಿ ವಿಶು ಕುಮಾರಾಕ್ ಸಂಭಂಧ್ ಆಸ್ಲ್ಲೊ!"
ಕೊರ್ಟಾಂತ್ ಗುಸು ಗುಸು.
"ಆರ್ಡರ್! ಆರ್ಡರ್!"
"ಆಲಿಯಾಕ್ ಆನಿ ವಿಶು ಕುಮಾರಾಕ್ ಸಂಭಂಧ್ ಆಸ್ಲ್ಲೊ.....? ಹೆಂ ತುಕಾ ಕಶೆಂ ಕಳಿತ್ ಜಾಲೆಂ.....?"
"ವಿಶು ಕುಮಾರಾಚಾ ವಳ್ಕೆನ್ಚ್ ಆಲಿಯಾನ್ ಮ್ಹಾಕಾ ಮ್ಹಜ್ಯಾ ಕಾಮಾ ಥಾವ್ನ್ ಕಾಡಂವ್ಚೊ ಉಪಾಯ್ ಕೆಲ್ಲೊ! ಆಲಿಯಾಕ್ ಮ್ಹಜ್ಯಾ ತಿತ್ತುನ್ ಫಾವೊಂಕ್ ಕಶ್ಟ್ ಆಸ್ಲ್ಲೆ. ಹ್ಯಾ ಖಾತಿರ್ ತಾಣೆಂ ವಿಶು ಕುಮಾರಾಕ್ ಲಾಗಿಂ ಕರುನ್ ಪಯ್ಲೆಂ ಮ್ಹಾಕಾ ಮ್ಹಜ್ಯಾ ಕಾಮಾ ಥಾವ್ನ್ ಕಾಡಯ್ಲೆಂ. ಉಪ್ರಾಂತ್ ತಾಣೆಂ ಕೊಣಾಯ್ಕ್ಯ್ ದುಬಾವ್ ಜಾಯ್ನಾತ್ಲ್ಲ್ಯಾ ಪರಿಂ ಆಪ್ಣಾ ವಯ್ರ್ ಕಂಪ್ಲೇಂಟ್ ದಿಲ್ಲ್ಯಾ ವಿಶು ಕುಮಾರಾಚೆಂ ಆಕ್ಸಿಡೆಂಟ್ ಕರಯ್ಲೆಂ! ವಿಶು ಕುಮಾರ್ ಬಾವ್ಡೊ ಆಲಿಯಾ ಕಸಲೆಂ ಚಡುಂ ಮ್ಹಳ್ಳೆಂ ನೆಣಾಂ ಆಸ್ಲ್ಲೊ!"
"ತರ್ ಹ್ಯಾ ಸರ್ವಾಂಕ್ಯ್ ಕಾರಾಣ್ ಹೆಂ ಆಲಿಯಾ ಮ್ಹಣೊನ್ ತುವೆಂ ಸಾಂಗ್ಚೆಂ.....?"
"ವ್ಹಯ್!"
"ಥ್ಯಾಂಕ್ ಯು ಮಿಸ್ಟರ್ ಮನೋಜ್ ಕುಮಾರ್!"
"ಮಿ ಲೋರ್ಡ್! ಹ್ಯಾ ಕೊರ್ಟಾಂತ್ ಹೆಂ ಸ್ಪಶ್ಟ್ ಜಾತಾ ಕೀ ಹೆಂ ಆಲಿಯಾ ತಾಚ್ಯಾ ಜಿವಿತಾಂತ್ ಕಸಲೊ ಖೆಳ್ ಖೆಳೊನ್ ಆಯ್ಲಾಂ ಮ್ಹಳ್ಳೆಂ ತೆಂ! ದುಸ್ರ್ಯಾಂಚಾ ಜಿವಿತಾ ಸವೆಂ ಖೆಳ್ಚೆಂ ನಿಜಾಯ್ಕ್ಯ್ ಏಕ್ ವ್ಹಡ್ ಆಫ್ರಾಧ್ ಮಿ ಲೋರ್ಡ್! ಹ್ಯಾ ಇಕ್ಬಾಲ್ ಆನಿ ರಾಶಿದಾ ಸವೆಂಯ್ ಆಶೆಂಚ್ ಜಾಲಾಂ ಮಿ ಲೋರ್ಡ್! ಹ್ಯಾ ಪಯ್ಲೆಂ ಆಲಿಯಾ ವಯ್ರ್ ಜಾಲ್ಲ್ಯಾ ಹಲ್ಲ್ಯಾಕ್ ಹೊ ಇಕ್ಬಾಲ್ ಆನಿ ರಾಶಿದ್ಚ್ ಕಾರಾಣ್ ಮ್ಹಣೊನ್ ಮಿಸೆಸ್ ಶೀತಲಾನ್ ಸಾಕ್ಸ್ ದಿಲ್ಯಾ ಜಾಲ್ಯಾರ್ಯ್ ಆಲಿಯಾ ವಯ್ರ್ ಹಲ್ಲೊ ಜಾಲ್ಲ್ಯಾ ವೆಳಾರ್ ಮಿಸೆಸ್ ಶೀತಲಾನ್ ಇಕ್ಬಾಲ್ ಆನಿ ರಾಶಿದಾನ್ ಹಲ್ಲೊ ಕರ್ಚೊ ತೊ ಆಪ್ಲ್ಯಾ ದೊಳ್ಯಾಂನಿ ಪಳಂವ್ಕ್ ನಾ. ಆಶೆಂ ಆಸ್ತಾನಾ ಆಲಿಯಾನ್ ಹ್ಯಾ ಇಕ್ಬಾಲ್ ಆನಿ ರಾಶಿದಾ ವಯ್ರ್ ಮಾಂಡ್ಲ್ಲ್ಯಾ ಆಫ್ರಾದಾಕ್ ಬುನ್ಯಾದ್ ನಾ!"
"ದೇಟ್ಸಾಲ್ ಮಿ ಲೋರ್ಡ್!"
"ನೋ ಮೋರ್ ಫರ್ದರ್ ಕ್ವಾಶ್ಚನ್ಸ್!"
ರಾಮ್ ಪ್ರಸಾದ್ ಆತಾಂ ಉಟ್ಲೊ.
ಬಸ್ಕೆರ್ ಥಾವ್ನ್ ಉಟ್ಲ್ಲ್ಯಾ ರಾಮ್ ಪ್ರಸಾದಾನ್ ತಶಿಚ್ ಏಕ್ ನದರ್ ಆಲಿಯಾ ವಯ್ರ್ ಖಂಚಯ್ಲಿ.
ಆಲಿಯಾ ಶಾಂತ್ ಬಸ್ಲ್ಲೆಂ.
ಇಕ್ಬಾಲಾಚಾ ಆನಿ ರಾಶಿದಾಚಾ ತೊಂಡಾರ್ ದಿಸೊನ್ ಯೆಂವ್ಚಿ ಖುಶಿ ಆನಿ ಆಲಿಯಾಚಾ ತೊಂಡಾ ವಯ್ಲೆಂ ಶಾಂತ್ಪಣ್ ಪಳೆತಾನಾ ರಾಮ್ ಪ್ರಸಾದಾಕ್ ಖಂಯ್ಗೀ ಕಿತೆಂಗೀ ಚುಕ್ಲ್ಲ್ಯಾ ಪರಿಂ ಜಾಲೆಂ.
"ನೋ ಕ್ವಾಶ್ಚನ್ಸ್ ಮಿ ಲೋರ್ಡ್!" ರಾಮ್ ಪ್ರಸಾದ್ ತಸೊಚ್ ಆಪ್ಲ್ಯಾ ಬಸ್ಕೆರ್ ಪರ್ತ್ಯಾಕ್ ಬಸ್ಲೊ.
"ದಿ ಕೋರ್ಟ್ ಇಸ್ ಅಡ್ಜರ್ನ್ಡ್!"
"ಟಕ್!"
ಜಡ್ಜ್ ಆಪ್ಲ್ಯಾ ಬಸ್ಕೆರ್ ಥಾವ್ನ್ ಉಟ್ಲೊ.
"ತುಜೆಂ ನಾಂವ್?"
"ಕ್ಯಾಪ್ಟನ್ ರಾಣಾ ಪ್ರತಾಪ್ ಸಿಂಗ್!"
"ತುಂ ಪ್ಲೈಟ್ ಕ್ಯಾಪ್ಟನ್....?"
"ಧಾ ವರ್ಸಾಂ ಪಯ್ಲೆಂ ಹಾಂವ್ ಇಂಡಿಯನ್ ಏರ್ಪೋರ್ಸಾಂತ್ ಪ್ಲೈಟ್ ಕ್ಯಾಪ್ಟನ್ ಜಾವ್ನ್ ಆಸ್ಲ್ಲೊಂ. ತ್ಯಾ ಉಪ್ರಾಂತ್ ಧಾ ವರ್ಸಾಂ ಹಾವೆಂ ಫ್ಲೈಯಿಂಗ್ ಕಮಾಂಡರ್ ಜಾವ್ನ್ ಏವಿಯೇಶನ್ ಟ್ರೇಯ್ನಿಂಗ್ ಇನ್ಸ್ಟಿಟ್ಯೂಟಾಚಾ ಪ್ಲೈಟಾರ್ ಕಾಮ್ ಕೆಲಾಂ!"
"ಆತಾಂ.....?"
"ಆತಾಂ ಹಾಂವ್ ಘರಾ ಆಸಾಂ!"
"ತುಂ ಆಲಿಯಾಕ್ ವಳ್ಕಾತಾಯ್ ಕ್ಯಾಪ್ಟನ್....?"
"ವ್ಹಯ್!"
"ತುಂ ಆಲಿಯಾಕ್ ಕಶೆಂ ವಳ್ಕಾತಾಯ್?"
"ಆಲಿಯಾ ಫ್ಲೈಯಿಂಗ್ ಟ್ರೇಯ್ನಿಂಗಾಂತ್ ಮ್ಹಜೆಂ ಸ್ಟೂಡೆಂಟ್ ಜಾವ್ನ್ ಆಸ್ಲ್ಲೆಂ!"
ಕೊರ್ಟಾಂತ್ ಗುಸು ಗುಸು.
"ಆರ್ಡರ್! ಆರ್ಡರ್!
"ಹ್ಯಾ ಆಲಿಯಾಕ್ ಆನಿ ತುಕಾ ಹ್ಯಾ ಟ್ರೇಯ್ನಿಂಗಾ ಭಾಯ್ರ್ ಕಸಲೊಯ್ ಸಂಭಂಧ್ ಆಸ್ಲ್ಲೊ....?"
"ನಾ!"
"ತುವೆಂ ಏವಿಯೇಶನಾಕ್ ಕಿತ್ಯಾಕ್ ಸೊಡ್ಲೆಂಯ್ ಕ್ಯಾಪ್ಟನ್ ರಾಣಾ....?"
"ಹಾವೆಂ ಸೊಡುಂಕ್ ನಾತ್ಲ್ಲೆಂ. ಹ್ಯಾ ಆಲಿಯಾ ಥಾವ್ನ್ ಹಾವೆಂ ಸೊಡ್ಚೆಂ ಪಡ್ಲೆಂ!"
"ಮ್ಹಳ್ಯಾರ್......?"
"ಆಲಿಯಾನ್ ಮ್ಹಕಾ ಮ್ಹಜ್ಯಾ ಪ್ಲೈಟ್ ಕಮಾಂಡರಾಚಾ ಕಾಮಾ ಥಾವ್ನ್ ಕಾಡಯ್ಲೆಂ!"
"ಕಿತ್ಯಾಕ್......?"
"ಆಲಿಯಾ ಪ್ಲೈಯಿಂಗ್ ಟ್ರೇಯ್ನಿ ಜಾವ್ನ್ ಆಸ್ತಾ ತಾಚೊ ಸ್ವಭಾವ್ ಹಟ್ಟಿ ಆನಿ ಗರ್ವಿ ಜಾವ್ನ್ ಆಸ್ಲ್ಲೊ. ಹಾಂವ್ ಮಿಲಿಟರಿ ತತ್ವಾಂಕ್ ಪಾಳ್ಚೊ ಮನಿಸ್. ಹಾವೆಂ ಆಲಿಯಾಕ್ ಸುದ್ರಾಂವ್ಚೆಂ ಪ್ರಯತ್ನ್ ಕೆಲೆಂ. ಪುಣ್ ತೆಂ ಸುದಾರ್ಲೆಂ ನಾ. ಬಗಾರ್ ತೆಂ ಚಡ್ ಹಟ್ಟಿ ಆನಿ ಗರ್ವಿ ಜಾಲೆಂ. ಹಾವೆಂ ಹ್ಯಾ ವಿಶಿಂ ಆಮ್ಚ್ಯಾ ಜನರಲಾಕ್ ಕಂಪ್ಲೇಂಟ್ ಕೆಲೆಂ. ಆಲಿಯಾನ್ ಆಪ್ಲಿ ಚೂಕ್ ವಳ್ಕೊನ್ ಘೆತ್ಲಿ ನಾ. ಆನಿ ತೆಂ ಏವಿಯೇಶನ್ ಸೊಡುನ್ ಗೆಲೆಂ. ಹ್ಯಾ ಉಪ್ರಾಂತ್ ಅಚಾನಕ್ ಏಕ್ ದೀಸ್ ಆಲಿಯಾ ಏವಿಯೇಶನ್ ಏರ್ಬೇಸಾಕ್ ಫಿಲ್ಮ್ ಶೂಟಿಂಗಾ ಖಾತಿರ್ ಆಯಿಲ್ಲೆಂ. ಹ್ಯಾ ಫಿಲ್ಮ್ ಶೂಟಿಂಗಾಚಾ ವೆಳಾರ್ ತಾಣೆಂ ವಿಶು ಕುಮಾರಾ ಸಾಂಗಾತಾ ಮೆಳೊನ್ ಆಮ್ಚ್ಯಾ ನವ್ಯಾ ಜನರಲಾಚಿ ಇಶ್ಟಾಗತ್ ಕೆಲಿ. ಆನಿ ಫಿಲ್ಮಾಚಾ ಶೂಟಿಂಗಾ ವೆಳಾರ್ ಹಾವೆಂ ಜನರಲಾಚೆ ಆರ್ಡರ್ ಆಯ್ಕೊಂಕ್ ನಾಂತ್ ಮ್ಹಳ್ಳ್ಯಾ ಕಾರಾಣಾ ಖಾತಿರ್ ಮ್ಹಾಕಾ ಏವಿಯೇಶನಾ ಥಾವ್ನ್ ಕಾಡಯ್ಲೆಂ!"
"ತುವೆಂ ಜನರಲಾಚೆ ಆರ್ಡರ್ ಕಿತ್ಯಾಕ್ ಮಾಂದುನ್ ಘೆಂವ್ಕ್ ನಾಂತ್.....?"
"ತೆ ಆರ್ಡರ್ ಜನರಲಾಚೆ ನ್ಹಯ್! ಬಗಾರ್ ಹ್ಯಾ ಆಲಿಯಾಚೆ ಮ್ಹಳ್ಳೆಂ ಹಾಂವ್ ಜಾಣಾಂ! ತೆಂ ಮ್ಹಾಕಾ ತಾಚೊ ಗುಲಾಮ್ ಕರುಂಕ್ ಆಶೆಲ್ಲೆಂ. ಹಾಂವ್ ತಯಾರ್ ಜಾಂವ್ಕ್ ನಾತ್ಲ್ಲ್ಯಾಕ್ ಆಲಿಯಾನ್ ತಾಚೆಂ ತೆಂ ಆದ್ಲೆಂ ಮ್ಹಜ್ಯಾ ವಯ್ಲೆಂ ಫಾರಿಕ್ಪಣ್ ಕಾಡ್ಲೆಂ!"
"ತರ್ ತುವೆಂ ಸಾಂಗ್ಚೆಂ ಆಲಿಯಾ ಅಜೂನ್ ತ್ಯಾಚ್ ತಾಚ್ಯಾ ಹಟ್ಟಿ ಆನಿ ಗರ್ವಿ ಸ್ವಭಾವಾನ್ಚ್ ಭರ್ಲಾಂ. ತೆಂ ಸುದ್ರೊಂಕ್ ನಾ....!?"
"ವ್ಹಯ್!"
"ಥ್ಯಾಂಕ್ ಯು ಕ್ಯಾಪ್ಟನ್!"
"ಮಿ ಲೋರ್ಡ್! ಕೊರ್ಟಾ ಮುಕಾರ್ ಹ್ಯಾ ಆಲಿಯಾ ವಿಶಿಂ ಸಗ್ಳೆಂ ತಾಚೆಂ ಚರಿತ್ರ್ಯ್ ಉಗ್ತೆಂ ಜಾಲಾಂ ಆಸ್ತಾಂ ಆತಾಂ ಹಾವೆಂ ಕಾಂಯ್ ಸಾಂಗ್ಚಿ ಗರ್ಜ್ ನಾ ಮಿ ಲೋರ್ಡ್! ನಿಜಾಯ್ಕ್ಯ್ ಹೆಂ ಆಲಿಯಾ ಏಕ್ ಸೈಕಿ ಚಲಿ ಮ್ಹಣೊನ್ ಮಾಂದುನ್ ಘೆವ್ಯೆತ್! ಅಸಲ್ಯಾ ಮನ್ಶ್ಯಾಂ ವಯ್ರ್ ಕಾನೂನಾನ್ ಕಸಲಿಯ್ ದಯಾ ದಾಕ್ಶೆಣ್ ದಾಕಯ್ನಾಸ್ತಾನಾ ಆಪ್ಲೆಂ ಫೈಸಲ್ ದೀಂವ್ಕ್ ಜಾಯ್ ಮಿ ಲೋರ್ಡ್!"
"ದೇಟ್ಸಾಲ್ ಮಿ ಲೋರ್ಡ್!"
"ಯುವರ್ ವಿಟ್ನೆಸ್!"
ಯೂಸುಫ್ ಖಾನ್ ಆಪ್ಲ್ಯಾ ಬಸ್ಕೆಕ್ ಪಾಟಿಂ ಪರ್ತಾಲೊ.
ರಾಮ್ ಪ್ರಸಾದ್ ಉಟೊನ್ ಉಭೊ ಜಾಲೊ.
"ನೋ ಕ್ವಾಶ್ಚನ್ಸ್ ಮಿ ಲೋರ್ಡ್!" ತೊ ತಸೊಚ್ ಆಪ್ಲ್ಯಾ ಬಸ್ಕೆರ್ ಬಸ್ಲೊ.
ಆತಾಂ ನಾಯರಾಚಿ ಸರ್ತಿ!
ಹ್ಯಾ ಕ್ಯಾಪ್ಟನಾಚಾ ಸಾಕ್ಶೆಕ್ ಆನಿ ನಾಯರಾಕ್ ಕಾಂಯ್ ಸಂಭಂಧ್ ನಾತ್ಲ್ಲೊ. ಹ್ಯಾ ಸಾಕ್ಶೆ ಥಾವ್ನ್ ತಾಚೆಂ ಭಳ್ ಆನಿಕ್ಯ್ ವಾಡ್ಲೆಂ ನ್ಹಯ್ ಆಸ್ತಾಂ ಉಣೆಂ ಜಾಲೆಂ ನಾ.
"ನೋ ಕ್ವಾಶ್ಚನ್ಸ್ ಮಿ ಲೋರ್ಡ್!" ನಾಯರಾನ್ಯ್ ತಶಿಚ್ಚ್ ಆಪ್ಲಿ ಬಸ್ಕಾ ಸಾಂಬಾಳ್ಳೀ.
"ದಿ ಕೋರ್ಟ್ ಇಸ್ ಅಡ್ಜರ್ನ್ಡ್ ಅಂಟಿಲ್ ಫರ್ದರ್ ನೋಟಿಸ್!"
"ಟಕ್!"
ಜಡ್ಜ್ ಆಪ್ಲ್ಯಾ ಬಸ್ಕೆರ್ ಥಾವ್ನ್ ಉಟ್ಲೊ.
*************
ಕೊರ್ಟಾಂತ್ ಆಜ್ ರಾಶಿದಾಕ್ ಆನಿ ಇಕ್ಬಾಲಾಕ್ ಆಫ್ರಾಧ್ಯಾಂನಿ ರಾಂವ್ಚ್ಯಾ ಜಾಗ್ಯಾರ್ ಉಭೆಂ ಕೆಲ್ಲೆಂ!
ಜಡ್ಜಾಚಾ ಆದೇಶಾಕ್ ಘೆವ್ನ್ ಯೂಸುಫ್ ಆಪ್ಲ್ಯಾ ಬಸ್ಕೆರ್ ಥಾವ್ನ್ ಉಟ್ಲೊ.
"ಹ್ಯಾ ಕೊರ್ಟಾಂತ್ ಪ್ರಸ್ತುತ್ ಜಾಲ್ಲ್ಯಾ ಸಾಕ್ಶೆಂಕ್ ತುಮಿಂ ದೊಗಾಂಯ್ನಿ ಆಯ್ಕಾಲಾಂ! ಆಶೆಂ ಆಸ್ತಾನಾ ತುಮಿಂ ಕಿತೆಂ ಸಾಂಗ್ತಾತ್.....?"
"ಹೆಂ ಸಗ್ಳೆಂ ಆಲಿಯಾ ಥಾವ್ನ್ ಜಾಲಾಂ. ಮ್ಹಾಕಾ ಆನಿ ಮ್ಹಜ್ಯಾ ಭಾವಾಕ್ ಹ್ಯಾ ಆಲಿಯಾ ವಯ್ಲ್ಯಾ ಹಲ್ಲ್ಯಾಂತ್ ಜಾಂವ್ ಮಿಶೇಲಾಚಾ ಹತ್ಯಾಂತ್ ಜಾಂವ್ ಕಾಂಯ್ಚ್ ಸಂಭಂಧ್ ನಾ!" ಇಕ್ಬಾಲ್ ಉಲಯ್ಲೊ.
"ಕಾಂಯ್ಚ್ ಸಂಭಂಧ್ ನಾಸ್ತಾನಾ ತುಮ್ಕಾಂ ಆಲಿಯಾನ್ ಹ್ಯಾ ಕೊರ್ಟಾಂತ್ ವೊಡುನ್ ಹಾಡುಂಕ್ ಸಾದ್ಯ್ಚ್ ನಾ ಮಿಸ್ಟರ್ ಇಕ್ಬಾಲ್!"
"ಆಮ್ಕಾಂ ಆನಿ ಹ್ಯಾ ಆಲಿಯಾಕ್ ಕಾಂಯ್ ಸಂಭಂಧ್ ನಾ!"
"ಸಂಭಂಧ್ ಆಸಾ ಮಿಸ್ಟರ್! ಸಂಭಂಧ್ ಆಸಾ! ಆಲಿಯಾನ್ ಆಪ್ಲ್ಯಾ ಫಾರಿಕ್ಪಣಾಚೆಂ ಹಗೆಂ ಸಗ್ಳ್ಯಾಂ ವಯ್ರ್ ತಿರ್ಸಿತಾನಾ ತುಕಾ ಆನಿ ತುಜ್ಯಾ ಭಾವಾಕ್ ಮಾತ್ರ್ ಆಲಿಯಾನ್ ಕಿತ್ಯಾಕ್ ಕೊರ್ಟಾಕ್ ವೊಡ್ಲೆಂ?"
"ಹಾಂವ್ ನೆಣಾಂ!"
"ವಿಶು ಕುಮಾರಾ ತಸಲ್ಯಾ ಮನ್ಶ್ಯಾಕ್ ಆಲಿಯಾ ಜರ್ ಆಕ್ಸಿಡೆಂಟ್ ಕರಂವ್ಕ್ ಸಕ್ತಾ ಜಾಲ್ಯಾರ್ ಆನಿ ರಾಯನಾ ತಸಲ್ಯಾ ಮನ್ಶ್ಯಾಕ್ ಆಲಿಯಾ ಆಪ್ಲ್ಯಾ ಹಾತಾಂತ್ ದವರುಂಕ್ ಸಕ್ತಾ ಜಾಲ್ಯಾರ್ ತುಕಾ ಆನಿ ತುಜ್ಯಾ ಭಾವಾ ವಯ್ರ್ಯ್ ತೆಂ ಹಗೆಂ ತಿರ್ಸುಂಕ್ ಸಕ್ತಾ! ವ್ಹಯ್...?"
"ವ್ಹಯ್!"
"ತರ್ ತಾಣೆಂ ಆಶೆಂ ಕಿತ್ಯಾಕ್ ಕೆಲೆಂ ನಾ.....?"
"ಹಾಂವ್ ನೆಣಾಂ!"
"ಆಲಿಯಾ ವಯ್ರ್ ಹಲ್ಲೊ ಜಾಲ್ಲ್ಯಾ ದಿಸಾ ತುಮಿಂ ಆಲಿಯಾಕ್ ಮೆಳೊಂಕ್ ಗೆಲ್ಲ್ಯಾತ್.....?"
"ವ್ಹಯ್! ಪುಣ್ ಆಲಿಯಾ ವರ್ಯ್ ಹಲ್ಲೊ ಆಮಿ ಕರುಂಕ್ ನಾ!"
"ಮಾಗಿರ್ ಕೊಣೆ ಕೆಲಾಂ.....? ತುಮಿಂ ಆಲಿಯಾಚಾ ಪ್ಲ್ಯಾಟಾಕ್ ಗೆಲ್ಲ್ಯಾ ವೆಳಾರ್ ತುಮ್ಕಾಂ ಮಿಸೆಸ್ ಶೀತಲಾನ್ ಪಳೆಲಾಂ! ತಾಣೆಂ ಸಾಂಗ್ಚ್ಯಾ ಪರ್ಮಾಣೆಂ ತುಮ್ಚ್ಯಾ ದೊಗಾಂ ಭಿತರ್ಲ್ಯಾ ಎಕ್ಲ್ಯಾನ್ ಹೊ ಹಲ್ಲೊ ಕೆಲಾ. ಶೀತಲಾನ್ ಹೊ ಹಲ್ಲೊ ಕೊಣೆ ಕೆಲಾ ಮ್ಹಳ್ಳೆಂ ತೆಂ ಪಳಂವ್ಕ್ ನಾ ಜಾಲ್ಯಾರ್ಯ್ ಖುದ್ಧ್ ಆಲಿಯಾ ಆಪ್ಣಾ ವಯ್ರ್ ಹಲ್ಲೊ ಕೆಲ್ಲೊ ಕೊಣೆ ಮ್ಹಳ್ಳೆಂ ಸಾರ್ಕೆಂ ಜಾಣಾಂ. ತುಮಿಂ ದೊಗಾಂಯ್ನಿ ಆಲಿಯಾ ವಯ್ರ್ ಹಲ್ಲೊ ಕರುಂಕ್ ನಾ. ಬಗಾರ್ ಎಕ್ಲ್ಯಾನ್ ಕೆಲಾ. ತೊ ಕೋಣ್ ಮ್ಹಳ್ಳೆಂ ತೆಂ ತುಮಿಂಚ್ ಒಪುನ್ ಘೆತ್ಲ್ಯಾರ್ ಬರೆಂ ಆಸಾ. ಆಲಿಯಾನ್ ತುಮ್ಚ್ಯಾ ದೊಗಾಂ ಭಿತರ್ಲ್ಯಾ ಎಕ್ಲ್ಯಾ ವಯ್ರ್ ಬೋಟ್ ಜೊಕ್ಲಾಂ ಮಿಸ್ಟರ್ ರಾಶಿದ್. ಬೋವ್ಶ್ಯಾ ಹೆಂ ತುಮಿ ನೆಣಾಂತ್!"
ರಾಶಿದ್ ಆನಿ ಇಕ್ಬಾಲ್ ಎಕಾ ಮೆಕಾಕ್ ಪಳಂವ್ಕ್ ಪಡ್ಲೆ.
"ಹೆಂ ಸಾದ್ಯ್ಚ್ ನಾ. ಆಲಿಯಾ ವಯ್ರ್ ಆಮಿಂ ಹಲ್ಲೊ ಕರುಂಕ್ಚ್ ನಾ!"
"ತುಮಿಂ ಆಲಿಯಾಚಾ ಪ್ಲ್ಯಾಟಾಕ್ ಗೆಲ್ಲ್ಯಾತ್.....?"
"ವ್ಹಯ್!"
"ತುಮಿಂಚ್ ಮಂದುನ್ ಘೆಂವ್ಚ್ಯಾ ಪರಿಂ ಆಲಿಯಾ ವಯ್ರ್ ಹಲ್ಲೊ ಜಾಲ್ಲ್ಯಾ ಥೊಡ್ಯಾಚ್ ಖಿಣಾಂ ಪಯ್ಲೆಂ ತುಮಿಂ ಆಲಿಯಾಚಾ ಪ್ಲ್ಯಾಟಾಂತ್ ಆಸ್ಲ್ಲ್ಯಾತ್. ವ್ಹಯ್....?"
"ವ್ಹಯ್!"
"ತರ್ ತುಮಿಂ ಕಶೆಂ ಹೆಂ ಮಾಂದುಂಕ್ ತಯಾರ್ ನಾಂತ್ ಕೀ ಹ್ಯಾ ಆಲಿಯಾ ವಯ್ರ್ ಹಲ್ಲೊ ತುಮಿಚ್ ಕೆಲಾ ಮ್ಹಳ್ಳೆಂ.....?"
"ಆಮಿ ಆಲಿಯಾಚಾ ಪ್ಲ್ಯಾಟಾ ಥಾವ್ನ್ ದೆಂವೊನ್ ಆಯ್ಲ್ಯಾ ಉಪ್ರಾಂತ್ ದುಸ್ರ್ಯಾ ಕೊಣೆಂಯ್ ಹೊ ಹಲ್ಲೊ ಕರ್ಚಿ ಸಾದ್ಯತಾ ಆಸಾ. ಮಿಸೆಸ್ ಶೀತಲಾನ್ಯ್ ಹೊ ಹಲ್ಲೊ ಕರ್ಚಿ ಸಾದ್ಯತಾ ಆಸಾ!"
"ಆಸಾ ಮಿಸ್ಟರ್ ಇಕ್ಬಾಲ್ ಖಂಡಿತ್ ಆಸಾ. ಪುಣ್ ಮಿಸೆಸ್ ಶೀತಲಾನ್ ಕೆಲ್ಲ್ಯಾ ಹಲ್ಲ್ಯಾಕ್ ಆಲಿಯಾ ತುಮ್ಚ್ಯಾ ವಯ್ರ್ ಕಿತ್ಯಾಕ್ ಘಾಲ್ತಾ.....? ಜರ್ ತರ್ ಆಲಿಯಾ ಹಾಂಗಾಸರ್ ಕೊಣಾಯ್ಕ್ಯ್ ಬಚಾವ್ ಕರುಂಕ್ ಪಳೆತಾ ಜಾಲ್ಯಾರ್ ತುಂ ಚಿಂತಾಯ್ ಹೆಂ ಆಲಿಯಾ ಆಪ್ಣಾಚೊ ಜೀವ್ ಕಾಡುಂಕ್ ಪಳೆಲ್ಲ್ಯಾ ಕೊಣಾಯ್ಕ್ಯ್ ಇತ್ಲ್ಯಾ ಸುಲಾಭಾಯೆನ್ ಭೊಗ್ಸಿತಾ ಮ್ಹಳ್ಳೆಂ? ಹ್ಯಾ ಕೊರ್ಟಾಂತ್ ಎದೊಳ್ಚ್ ತುಮಿಂ ಆಯ್ಕಾಲೆಂ ಕೀ ಫಕತ್ತ್ ಆಪ್ಣಾಕ್ ಕಾಮಾ ಥಾವ್ನ್ ಕಾಡ್ಲೆಲ್ಯಾ ಮನೋಜ್ ಕುಮಾರಾಕ್ ಆಲಿಯಾನ್ ಕಿತೆಂ ಕೆಲಾಂ ಮ್ಹಳ್ಳೆಂ. ಆಶೆಂ ಆಸ್ತಾನಾ, ಆಪ್ಣಾಚೊ ಜೀವ್ ಕಾಡುಂಕ್ ಪಳೆಲ್ಲ್ಯಾ ವ್ಯಕ್ತಿಕ್ ಆಲಿಯಾನ್ ಭೊಗ್ಸುಂಚೆಂ ಸವಾಲ್ಚ್ ಉದೆನಾ!"
"ಮಿ ಲೋರ್ಡ್! ಆಲಿಯಾ ವಯ್ರ್ ಹಲ್ಲೊ ಹ್ಯಾ ಇಕ್ಬಾಲಾನ್ ಆನಿ ರಾಶಿದಾನ್ಚ್ ಕೆಲಾ ಮ್ಹಣ್ಚ್ಯಾಕ್ ಆಲಿಯಾ ಖುದ್ಧ್ ಜಾವ್ನ್ ಸಾಕ್ಸ್ ನ್ಹಯ್ ಆಸ್ತಾಂ ಶೀತಲ್ ಆನಿ ಸಾರಂಗಾಚಾ ಸಾಕ್ಶೆನ್ ಹೆಂ ಸ್ಪಶ್ಟ್ ಜಾತಾ. ಪುಣ್ ಆಫ್ರಾಧಿ ಮಾತ್ರ್ ಹೆಂ ಮಾಂದುನ್ ಘೆಂವ್ಕ್ ತಯಾರ್ ನಾಂತ್!"
"ದೇಟ್ಸಾಲ್ ಮಿ ಲೋರ್ಡ್!"
"ಮಿಸ್ ಆಲಿಯಾ ಖಾನ್!"
ವಿಚಾರಣಾಕ್ ಉಭೆಂ ಜಾಂವ್ಚ್ಯಾ ಜಾಗ್ಯಾರ್ ಉಭೆಂ ಜಾಲ್ಲ್ಯಾ ಆಲಿಯಾನ್ ಧಯ್ರಾನ್ ಆಪ್ಲಿ ತಕ್ಲಿ ಉಭಾರುನ್ ಸಗ್ಳ್ಯಾ ಕೊರ್ಟ್ ರುಮಾಕ್ ಪಳೆಲೆಂ. ಕೋರ್ಟ್ ರುಮಾಂತ್ ಬಸ್ಲೆಲ್ಯಾಂಚೆರ್ ಆಪ್ಲಿ ನದರ್ ಭೊಂವ್ಡಾಯಿಲ್ಲ್ಯಾ ಆಲಿಯಾನ್ ಸರ್ವಾಂ ವಯ್ರ್ ಏಕ್ ನದರ್ ಮಾರ್ಲಿ.
"ತುಂ ಆತಾಂ ಕಿತೆಂ ಸಾಂಗ್ತಾಯ್ ಮಿಸ್ ಆಲಿಯಾ ಖಾನ್? ಹ್ಯಾ ಕೊರ್ಟಾಂತ್ ಮಾಂಡ್ಲೆಲ್ಯಾ ಆಫ್ರಾದಾಂಕ್ ಕಬೂಲ್ ಕರುಂಕ್ ತುಂ ತಯಾರ್ ಆಸಾಯ್?"
ಥೊಡೊ ವೇಳ್ ಮೌನ್ ರಾವ್ಲ್ಲೆಂ ಆಲಿಯಾ,
"ಕಸಲೆ ಆಫ್ರಾಧ್.....?" ಆಲಿಯಾಚಾ ನದ್ರೆಂತ್ ಶಾಂತತಾ ಉಪ್ಯೆತಾಲಿ.
"ಮಿಶೇಲ್ ಆಲ್ಫ್ರೆಡಾಚೆಂ ಅಪಹರಣ್ ಆನಿ ತಾಚಿ ಹತ್ಯಾ. ವಿಶು ಕುಮಾರಾಕ್ ಆಪ್ಲ್ಯಾ ಫಾಯ್ದ್ಯಾ ಖಾತಿರ್ ಗಳ್ಸುನ್ ಉಪ್ರಾಂತ್ ತಾಚಿ ಹತ್ಯಾ....!"
"ಜರ್ ತರ್ ಹಾವೆಂ ಹಾಂಗಾಸರ್ ಸತ್ ಉಚಾರ್ಲ್ಯಾರ್ ತುಮಿ ಹ್ಯಾ ಕೊರ್ಟಾಂತ್ ಪ್ರಸ್ತುತ್ ಕೆಲ್ಲ್ಯೊ ಸಭಾರ್ ಸಾಕ್ಶಿ ಫಟ್ ಸಾಕ್ಶಿ ಜಾಂವ್ಕ್ ಸಕ್ತಾತ್! ತೆದಾಳಾ ಕೋರ್ಟ್ ಕೊಣಾಚ್ಯಾ ಸಾಕ್ಶೆಕ್ ಸತ್ ಮ್ಹಣೊನ್ ಮಾಂದ್ತಾ.....?"
ಯೂಸುಫಾ ಲಾಗಿಂ ಕಾಂಯ್ ಜವಾಬ್ ನಾತ್ಲ್ಲಿ.
"ಮ್ಹಜ್ಯಾ ಸವಾಲಾಕ್ ಮ್ಹಕಾ ಜವಾಬ್ ಜಾಯ್ ಮಿಸ್ಟರ್ ಪ್ರಾಸಿಕ್ಯೂಟರ್!"
ಸಗ್ಳ್ಯಾ ಕೋರ್ಟ್ ರುಮಾಂತ್ ಮೌನ್. ಸಗ್ಳೆ ಎಕಾಮೆಕಾಚಿಂ ತೊಂಡಾಂ ಪಳಂವ್ಕ್ ಪಡ್ಲೆ. ಜಡ್ಜಾಕ್ ಆಲಿಯಾ ಕಿತೆಂ ಉಲಯ್ತಾ ತೆಂ ಸಮ್ಜಾಲೆಂ ನಾ.
"ತುವೆಂ ಹಾಂಗಾಸರ್ ಫಕತ್ತ್ ಮ್ಹಜ್ಯಾ ಸವಾಲಾಂಕ್ ಮಾತ್ರ್ ಜವಾಬ್ ದೀಂವ್ಕ್ ಜಾಯ್ ಶಿವಾಯ್ ತುಜ್ಯಾ ಸವಾಲಾಕ್ ಜವಾಬ್ ದೀಂವ್ಕ್ ಹಾಂವ್ ಹಾಂಗಾ ಹಾಜರ್ ಜಾಂವ್ಕ್ ನಾ!"
"ತರ್ ವಿಚಾರ್ ತುಕಾ ಕಿತೆಂ ವಿಚಾರುಂಕ್ ಆಸಾ ತೆಂ!"
"ತುಕಾ ಆನಿ ವಿಶು ಕುಮಾರಾಕ್ ಸಂಭಂಧ್ ಆಸ್ಲ್ಲೊ....?"
"ವ್ಹಯ್!"
"ವಿಶು ಕುಮಾರಾಚಾ ಮಜತಿನ್ ತುವೆಂ ತುಜೆಂ ಫಾರಿಕ್ಪಣ್ ಘೆತ್ಲೆಂಯ್?"
"ತೆಂ ಫಾರಿಕ್ಪಣ್ ನ್ಹಯ್! ಹಾವೆಂ ಎಕಾ ಚಲಿಯೆಕ್, ತಾಚ್ಯಾ ವಯ್ರ್ ಜಾಲ್ಲ್ಯಾ ಆನ್ಯಾಯಾಕ್ ನ್ಯಾಯ್ ದಿಲಾ!"
"ತುಜ್ಯಾ ಫಾರಿಕ್ಪಣಾಕ್ ತುಂ ನ್ಯಾಯ್ ಮ್ಹಣ್ತಾಯ್....?"
"ವ್ಹಯ್! ಚಲಿ ಹ್ಯಾ ಸಂಸಾರಾಂತ್ ಕೆದ್ನಾಂಚ್ ಅಭಲ್ ನ್ಹಯ್ ಮ್ಹಳ್ಳೆಂ ಹಾಂವೆಂ ದಾಖವ್ನ್ ದಿಲಾಂ!"
"ಚಲಿ ಅಭಲ್ ನ್ಹಯ್ ಮ್ಹಣೊನ್ ದಾಖಂವ್ಚ್ಯಾಕ್ ತುವೆಂ ವಿಶು ಕುಮಾರಾಚಿ ಹತ್ಯಾ ಕೆಲಿಯ್.....?"
"ವಿಶು ಕುಮಾರಾಕ್ ಹಾವೆಂ ಗಳ್ಸಿಲ್ಲೆಂ ಮಾತ್ರ್ ಶಿವಾಯ್ ಹಾವೆಂ ತಾಚಿ ಹತ್ಯಾ ಕರುಂಕ್ ನಾ!"
"ತರ್ ತುವೆಂ ಕೊಣಾಯ್ ಥಾವ್ನ್ ಕರವ್ನ್ ಘೆತ್ಲ್ಯಾಯ್.....?"
"ನಾ! ವಿಶು ಕುಮಾರಾಚಿ ಹತ್ಯಾ ಕೆಲ್ಲಿ ಇಕ್ಬಾಲಾನ್!"
"ಹೆಂ ತುಂ ಕಶೆಂ ಸಾಂಗ್ತಾಯ್.....? ಮಿಸೆಸ್ ಶೀತಲಾನ್ ತಾಚ್ಯಾ ಘೊವಾಚ್ಯಾ ಹತ್ಯಾಚೊ ಆಫ್ರಾಧ್ ತುಜ್ಯೆರ್ ಮಾಂಡ್ಲಾ ಮಿಸ್ ಆಲಿಯಾ!"
"ಅಫ್ರಾದ್ ಕೊಣೆಂಯ್ ಕೊಣಾಯ್ಚೆರ್ ಮಾಂಡುಂಕ್ ಜಾತಾ! ಪುಣ್ ತ್ಯಾ ಮಾಂಡ್ಲ್ಲ್ಯಾ ಆಫ್ರಾಧಾಕ್ ರುಜು ಕರುನ್ ದಾಖಂವ್ಚಿ ಶಾಥಿ ಆಸೊಂಕ್ ಜಾಯ್!"
"ತರ್, ತುವೆಂ ಆತಾಂ ತ್ಯಾ ಇಕ್ಬಾಲಾ ವಯ್ರ್ ಮಾಂಡ್ಲ್ಲ್ಯಾ, ವಿಶು ಕುಮಾರಾಚಾ ಹತ್ಯಾಚಾ ಆಫ್ರಾಧಾಕ್ ತುಂ ರುಜು ಕರುಂಕ್ ಸಕ್ತಾಯ್....?"
"ವ್ಹಯ್!"
"ಕೋರ್ಟ್ ತುಕಾ ಪರ್ವಣ್ಗಿ ದಿತಾ ಮಿಸ್ ಆಲಿಯಾ. ತುವೆಂ ಹ್ಯಾ ಇಕ್ಬಾಲಾ ವಯ್ರ್ ಮಾಂಡ್ಲ್ಲ್ಯಾ ಆಫ್ರಾದಾಕ್ ರುಜು ಕರುನ್ ದಾಖವ್ಯೆತ್!"
"ವಿಶು ಕುಮಾರಾಕ್ ಆನಿ ಮ್ಹಕಾ ಸಂಭಂಧ್ ಆಸಾ ಮ್ಹಳ್ಳೆಂ ಹ್ಯಾ ಇಕ್ಬಾಲಾಕ್ ಕಳ್ಲ್ಲೆಂ. ಇಕ್ಬಾಲಾಕ್ ಪಯ್ಲೆಂಚ್ ಹ್ಯಾ ವಿಶು ಚೆರ್ ರಾಗ್ ಆಸ್ಲ್ಲೊ!"
"ರಾವ್ ಮಿಸ್ ಆಲಿಯಾ! ಹ್ಯಾ ಇಕ್ಬಾಲಾಕ್ ಆನಿ ರಾಶಿದಾಕ್ ವಿಶುಚೆರ್ ಕಿತ್ಯಾಕ್ ರಾಗ್ ಆಸ್ಲ್ಲೊ ತೊ ತುಂ ಜಾಣಾಂಯ್.....?"
"ವ್ಹಯ್!"
"ಕಿತ್ಯಾಕ್....?"
"ರಾಶಿದಾಚಾ ಆನಿ ಮ್ಹಜ್ಯಾ ಝಗ್ಡ್ಯಾಂತ್ ಮ್ಹಾಕಾ ವಿಶು ಕುಮಾರಾನ್ ಮಜತ್ ಕೆಲ್ಲಿ!"
"ತರ್ ತುಕಾ ಆನಿ ವಿಶುಕ್ ಸಂಭಂಧ್ ಆಸ್ಲ್ಲೊ ಮ್ಹಣೊನ್ ತುಂ ಒಪ್ತಾಯ್.....?"
"ವ್ಹಯ್!"
"ಉಪ್ರಾಂತ್.....? ಮುಖಾರ್ಸಿ ಮಿಸ್ ಆಲಿಯಾ!"
"ಹಾಂವ್ ಆನಿ ವಿಶು ಕುಮಾರ್ ದೊಗಾಂಯ್ ಏಕ್ ಜಾಲ್ಯಾರ್ ಫುಡಾರಾಕ್ ಇಕ್ಬಾಲಾಕ್ ಕಶ್ಟ್ ಜಾತೆಲೆ ಮ್ಹಣೊನ್ ಹ್ಯಾ ಇಕ್ಬಾಲಾನ್ ವಿಶು ಕುಮಾರಾಕ್ ಆಕ್ಸಿಡೆಂಟ್ ಕರವ್ನ್ ತಾಚಿ ಹತ್ಯಾ ಕರಯ್ಲಿ!"
"ಹೆಂ ತುಂ ಕಶೆಂ ರುಜು ಕರವ್ನ್ ದಾಖಯ್ತಾಯ್.....?"
"ಇಕ್ಬಾಲಾನ್ ಮ್ಹಾಕಾ ಪೋನ್ ಕರುನ್ ಬೆಶ್ಟಾಯ್ತಾನಾ ಖುದ್ಧ್ ಇಕ್ಬಾಲಾನ್ಚ್ ಮ್ಹಾಕಾ ಹ್ಯಾ ವಿಶಿಂ ಸಾಂಗ್ಲ್ಲೆಂ!"
"ಹ್ಯಾ ಸಾಂಗ್ಣ್ಯಾಚಿ ಕಾಂಯ್ ಸಾಕ್ಸ್......?"
"ಮ್ಹಜ್ಯಾ ಟೆಲೊಪೋನಾರ್ ಹ್ಯಾ ಇಕ್ಬಾಲಾಚೆಂ ಪೋನ್ ನಂಬರ್ ಆಸಾ! ತಾಣೆಂ ಉಲಯಿಲ್ಲಿಂ ಉತ್ರಾಂ ರೆಕಾರ್ಡ್ ಜಾಯ್ನಾಂತ್!"
"ಪುಣ್, ವಿಶು ಕುಮಾರ್ ತುಜೊಯ್ ದುಸ್ಮಾನ್ ಜಾವ್ನ್ ಆಸ್ಲ್ಲೊ!"
"ಜಾವ್ನ್ ಆಸ್ಲ್ಲೊ! ಪುಣ್ ಮ್ಹಾಕಾ ತಾಚಿ ಹತ್ಯಾ ಕರುಂಕ್ ಜಾಯ್ ಮ್ಹಳ್ಳಿ ಗರ್ಜ್ ನಾತ್ಲ್ಲಿ. ತಶೆಂ ಮ್ಹಕಾ ಸಗ್ಳ್ಯಾಂಚಿ ಹತ್ಯಾ ಕರುಂಕ್ ಜಾಯ್ ಜಾಲ್ಲಿ ಜಾಲ್ಯಾರ್ ಹಾಂವ್ ತ್ಯಾ ಮನೋಜ್ ಕುಮಾರ್ ಆನಿ ಕ್ಯಾಪ್ಟನ್ ರಾಣಾಚಿಯ್ ಹತ್ಯಾಚ್ ಕರಯ್ತಿಂ! ಮ್ಹಾಕಾ ಫಕತ್ತ್ ಹ್ಯಾ ಚಲ್ಯಾ ಜಾತಿಕ್ ಸಲ್ವಣ್ ದಾಖವ್ನ್ ದೀಂವ್ಕ್ ಜಾಯ್ ಆಸ್ಲ್ಲಿ. ತಿತ್ಲೆಂಚ್!"
"ಆನಿ ತುವೆಂ ದಾಖಯ್ಲಿ?"
"ವ್ಹಯ್!" ಆಲಿಯಾಚಾ ಹರ್ಯೆಕಾ ಜವಾಬೆಂತ್ ತೆಂ ದ್ರಡ್ ಆಸ್ಲ್ಲೆಂ.
"ತುಜ್ಯೆರ್ ಹಲ್ಲೊ ಕೆಲ್ಲೊ ತೊ ಕೋಣ್.....?"
"ಹೊ ಇಕ್ಬಾಲ್ ಆನಿ ರಾಶಿದ್!"
"ಹೆಂ ತುಂ ಸತ್ ಉಲಯ್ತಾಯ್......?"
"ವ್ಹಯ್!"
"ಮಿಶೇಲಾಚೆಂ ಅಪಹರಣ್ ಕರುನ್ ತಾಚಿ ಹತ್ಯಾ ಕೆಲ್ಲಿ ಕೊಣೆ.....?"
"ಕೋರ್ಟ್ ಹಾಂಗಾಸರ್ ಮ್ಹಜ್ಯಾ ಸಾಕ್ಶೆಕ್ ಸತ್ ಮ್ಹಣೊನ್ ಪಾತ್ಯೆತಾ.....?"
"ಖಂಡಿತ್.....!"
"ಹಾಂವ್ ಹ್ಯಾ ಕೊರ್ಟಾಚ್ಯಾ ಹಾನರೇಬಲ್ ಜಡ್ಜಾಚ್ಯಾ ತೊಂಡಾ ಥಾವ್ನ್ ಆಯ್ಕೊಂಕ್ ಆಶೆತಾಂ!"
ಕೋರ್ಟ್ ರುಮಾಂತ್ಲ್ಯಾ ಸರ್ವಾಂಚಿ ನದರ್ ಜಡ್ಜಾ ತೆವ್ಶಿಂ ಧಾಂವ್ಲಿ.
"ತುಂ ಸತ್ಚ್ ಉಲಯ್ತಾಯ್ ಮ್ಹಳ್ಳ್ಯಾಕ್ ರುಜ್ವಾತ್ ಕಿತೆಂ.....?"
"ತುಮಿಂ ಸಾರ್ಕೆಂ ಸವಾಲ್ ಕೆಲೆಂ ಯುವರ್ ಹಾನರ್! ಮ್ಹಜ್ಯಾ ಹ್ಯಾ ದೇಶಾಂತ್ ಎಕಾ ಚಲಿಯೆಚೆರ್ ಭಲತ್ಕಾರ್ ಜಾತಾನಾ ತ್ಯಾ ಚಲಿಯೆನ್ ಪಯ್ಲೆಂ ಆಪ್ಣಾ ತರ್ಫೆನ್ ಏಕ್ ಸಾಕ್ಸ್ ಸೊಧುಂಕ್ ಪಡ್ತಾ. ಆಪ್ಣಾಚೆರ್ಚ್ ಭಲತ್ಕಾರ್ ಜಾತಾನಾ ತಾಣೆಂ ಸಾಕ್ಶೆಕ್ ಬೋಬ್ ಮಾರುನ್ ಆಪಂವ್ಕ್ ಪಡ್ತಾ. ಯೆಯಾ ಪಳೆಯಾ...! ಮ್ಹಜ್ಯಾ ವಯ್ರ್ ಹೊ ಭಲತ್ಕಾರ್ ಕರ್ತಾ! ಮ್ಹಾಕಾ ನ್ಯಾಯ್ ದಿಂವ್ಚ್ಯಾ ಖಾತಿರ್ ಕೊರ್ಟಾಂತ್ ಸಾಕ್ಶಿ ಜಾಂವ್ಚ್ಯಾ ಖಾತಿರ್ ಮ್ಹಜೆರ್ ಜಾಂವ್ಚೆಂ ಭಲಾತ್ಕಾರ್ ಪಳೆಯಾ! ಮ್ಹಣೊನ್ ತಿಣೆಂ ಬೋಬ್ ಮಾರುಂಕ್ ಪಡ್ತಾ. ಸಾಕ್ಸ್ ಜರ್ ನಾ ಜಾಲ್ಯಾರ್ ತಾಚ್ಯೆರ್ ಜಾಲ್ಲ್ಯಾ ಭಲತ್ಕಾರೆಕ್ ತೆಂ ನ್ಯಾಯ್ ವಿಚಾರುಂಕ್ ಫಾವೊ ಜಾಯ್ನಾಂ! ತರ್ ಕಿತೆಂ ಹರ್ಯೆಕಾ ಚಲಿಯೆನ್ ಆಪ್ಣಾ ಸವೆಂ ಸದಾಂ ಏಕ್ ಸಾಕ್ಸ್ ಘೆವ್ನ್ ಭೊಂವೊಂಕ್ ಜಾಯ್? ಆಮ್ಚ್ಯಾ ಕಾನೂನಾಂತ್ ಸುಧಾರಣ್ ಖಂಡಿತ್ ಗರ್ಜ್ ಆಸಾ ಯುವರ್ ಹಾನರ್!"
"ತುಂ ಹಾಂಗಾ ಕೊರ್ಟಾಚಾ ಮಾನಾಕ್ ಆನಿ ಕಾನೂನಾಕ್ ನೀಚ್ ದಾಖವ್ನ್ ಉಲಯ್ತಾಯ್ ಮಿಸ್ ಆಲಿಯಾ ಖಾನ್! ಹೆಂ ಹ್ಯಾ ಕೊರ್ಟಾಚೆಂ ಉಲ್ಲಂಘಣ್! ಹ್ಯಾ ಖಾತಿರ್ ತುಕಾ ಕೋರ್ಟ್ ಶಿಕ್ಶಾ ಲಾಂವ್ಕ್ ಸಕ್ತಾ!" ಜಡ್ಜ್ ಉಲಯ್ಲೊ.
"ಹುಂ...!" ಆಲಿಯಾಚಾ ತೊಂಡಾರ್ ವಿಲಕ್ಶಣ್ ಹಾಸೊ ಉದೆವ್ನ್ ಧಾಂವ್ಲ್ಯೊ.
"ಎಕಾ ಚಲಿಯೆಚಾ ಮಾನಾ ಮರ್ಯಾದೆ ಮುಕಾರ್ ತುಮಿ ಕೊರ್ಟಾಚಾ ಮಾನಾ ವಿಶ್ಯಾಂತ್ ಉಲಯ್ತಾತ್?"
"ಕಾನೂನಾ ಮುಕಾರ್ ಸಿಂತಿಮೆಂತಾಕ್ ಆವ್ಕಾಸ್ ನಾ ಮಿಸ್ ಆಲಿಯಾ ಖಾನ್!" ಯೂಸುಫಾನ್ ಆಲಿಯಾ ಮುಕ್ಲ್ಯಾ ತ್ಯಾ ರುಕಾಟಾಚಾ ಗ್ರಿಲ್ಲಾಕ್ ಹಾತ್ ದಾಡಾಯ್ಲೊ.
"ಸಿಂತಿಮೆಂತಾಂಕ್ ಘೆವ್ನ್ ಹ್ಯಾ ಕೊರ್ಟಾ ಮುಕಾರ್ ಯೆಂವ್ಚ್ಯಾಕ್ಯ್ ಹಾಂವ್ ಮ್ಹಜ್ಯಾ ಘರಾಚ್ಯಾ ಎಕಾ ಕೊನ್ಶ್ಯಾಕ್ ಬಸೊನ್ ರಡೊನ್ ಮ್ಹಾಕಾಚ್ ಭುಜಯ್ತಿಂ. ಆಶೆಂ ಕರುಂಕ್ ಹಾಂವ್ ಸಲ್ವಾಲ್ಲಿಂ ಜಾಲ್ಯಾರ್ ಜೀವ್ಘಾತ್ ಕರ್ತಿಂ! ಪುಣ್ ಮ್ಹಾಕಾ ಆಶೆಂ ಕರ್ಚಿ ಗರ್ಜ್ ನಾ! ಹ್ಯಾಚ್ ಖಾತಿರ್ ಹಾಂವ್ ಮ್ಹಜ್ಯಾ ವಯ್ರ್ ಜಾಲ್ಲ್ಯಾ ಆನ್ಯಾಯಾ ಖಾತಿರ್ ಝುಜ್ಲ್ಯಾಂ!
"ಆನಿ ಹ್ಯಾ ಝುಜಾಂತ್ ತುವೆಂ ಮಿಶೇಲಾಚಿ ಹತ್ಯಾ ಕೆಲಿಯ್....?"
"ಹ್ಯಾ ಸವಾಲಾಕ್ ಜವಾಬ್ ದಿಂವ್ಚ್ಯಾ ಪಯ್ಲೆಂ ಮ್ಹಾಕಾ ಹೆಂ ರುಜು ಜಾಂವ್ಕ್ ಜಾಯ್ ಕೀ ಕಿತೆಂ ಕೋರ್ಟ್ ಮ್ಹಜ್ಯಾ ಸಾಕ್ಶೆಕ್ ಸತ್ ಮ್ಹಣೊನ್ ಮಾಂದ್ತಾ...?"
"..........." ಯೂಸುಫ್ ಕಾಂಯ್ಚ್ ಜವಾಬ್ ದೀಂವ್ಕ್ ಸಕಾನಾಸ್ತಾನಾ ಜಡ್ಜಾಕ್ ಪಳಂವ್ಕ್ ಲಾಗ್ಲೊ.
"ತುಕಾ ವಿಚಾರ್ಲೆಲ್ಯಾ ಸವಾಲಾಕ್ ಮಾತ್ರ್ ತುಂ ಜವಾಬ್ ದೀ ಮಿಸ್ ಆಲಿಯಾ ಖಾನ್!" ಜಡ್ಜ್ ಉಲಯ್ಲೊ.
"ಜರ್ ತರ್ ಕೋರ್ಟ್ ಮ್ಹಜ್ಯಾ ಸಾಕ್ಶೆಕ್ ಸತ್ ಮ್ಹಣೊನ್ ಮಾಂದುನ್ ಘೆನಾ ಜಾಲ್ಯಾರ್ ಹಾವೆಂ ಸತ್ ಉಲವ್ನ್ ಕಾಂಯ್ ಫಾಯ್ದೊ ನಾ!" ಜಡ್ಜಾಚಾ ಜಿವಿತಾಂತ್ ಪಯ್ಲ್ಯಾ ಪಾವ್ಟಿಂ ಏಕ್ ಚಲಿ ತಾಚ್ಯಾ ಮುಕಾರ್ ಆಶೆಂ ಉಭೆಂ ರಾವ್ಲ್ಲೆಂ ಕೀ ಜಶೆಂ ಲೊಂಕ್ಡಾಚಿ ವೊಣೊದ್!
"ತುವೆಂ ಉಲಯಿಲ್ಲ್ಯಾಂತ್ ಸತ್ ಆಸಾ ಮ್ಹಣೊನ್ ತುಂ ರುಜು ಕರ್ತಾಯ್ ಜಾಲ್ಯಾರ್ ತುಜ್ಯಾ ಸಾಕ್ಶೆಕ್ ಸತ್ ಮ್ಹಣೊನ್ ಮಾಂದುನ್ ಘೆಂವ್ಕ್ ಜಾತೆಲೆಂ!" ಜಡ್ಜಾಕ್ ಮಾಂದುನ್ ಘೆಂವ್ಕ್ ಪಡ್ಲೆಂ
"ಮ್ಹಜ್ಯಾ ಲಾಗಿಂ ಸಾಕ್ಸ್ ಆಸಾ ಯುವರ್ ಹಾನರ್!"
"ಕಸಲಿ ಸಾಕ್ಸ್......?" ಯೂಸುಫ್ ಆಲಿಯಾ ತೆವ್ಶಿಂ ಘುಂವ್ಲೊ.
"ಹಾಂಗಾ ಹ್ಯಾಚ್ ಜಾಗ್ಯಾರ್ ರಾವೊನ್ ಮಿಸೆಸ್ ಶೀತಲಾನ್ ಹಿ ಸಾಕ್ಸ್ ದಿಲ್ಲಿ ಕೀ ಮ್ಹಜ್ಯಾ ವಯ್ರ್ ಹ್ಯಾ ಇಕ್ಬಾಲಾನ್ ಹಲ್ಲೊ ಕರ್ತಾನಾ ತೆಂ ಮ್ಹಜ್ಯಾ ಪ್ಲ್ಯಾಟಾಂತ್ ಆಸ್ಲ್ಲೆಂ! ಹಿ ಫಟ್ ಸಾಕ್ಸ್ ಯುವರ್ ಹಾನರ್! ಇಕ್ಬಾಲಾನ್ ಆನಿ ರಾಶಿದಾನ್ ಮ್ಹಜ್ಯಾ ವಯ್ರ್ ಹಲ್ಲೊ ಚಲಯ್ತಾನಾ ತೆಂ ಮ್ಹಜ್ಯಾ ಪ್ಲ್ಯಾಟಾಂತ್ ನಾತ್ಲ್ಲೆಂ ಯುವರ್ ಹಾನರ್!"
ಎಕಾಚ್ಚ್ ಫರಾ ಕೊರ್ಟಾಂತ್ ಮೌನ್. ಏಕ್ ಸುವಿ ಪಡ್ಲ್ಯಾರ್ಯ್ ಆಯ್ಕೊನ್ ಯೆತಾ ಮ್ಹಳ್ಳ್ಯಾ ತಸಲೆಂ ಮೌನ್. ರಾಮ್ ಪ್ರಸಾದ್ ಆಪ್ಲ್ಯಾ ಬಸ್ಕೆರ್ ಪಾಟಿಚೊ ಕಣೊ ಮೊಡ್ಲೆಲ್ಯಾ ಪರಿಂ ಬಾಗ್ವಾಲೊ. ಇಕ್ಬಾಲಾಕ್ ಆನಿ ರಾಶಿದಾಕ್ ಫಸಂವ್ಚ್ಯಾ ಖಾತಿರ್ ತಾಣೆಂಚ್ ಶೀತಲಾಚಾ ತೊಂಡಾ ಥಾವ್ನ್ ಹೊ ಉಚಾರ್ ಕರುಂಕ್ ಆದೇಶ್ ದಿಲ್ಲೊ. ರಾಯನಾಚಾ ಖುಶಿಯೆ ಪರ್ಮಾಣೆಂ ಹ್ಯಾ ತೆಗಾಂಯ್ಕ್ಯ್ ತಾಣೆಂ ಫಸಂವ್ಕ್ ಜಾಯ್ ಆಸ್ಲ್ಲೆಂ. ಪುಣ್ ಆತಾಂ....?
ಆಲಿಯನ್ ಶೀತಲಾಚಾ ಸಾಕ್ಶೆಕ್ಚ್ ಫಸಯಿಲ್ಲೆಂ!
ಇಕ್ಬಾಲಾಕ್ ಆನಿ ರಾಶಿದಾಕ್ ಕಿತೆಂ ಜಾತಾ ತೆಂ ಕಳ್ಳೆಂ ನಾ. ಖುದ್ದ್ ಆಲಿಯಾನ್ಚ್ ತಾಂಚೆರ್ ಆಫ್ರಾಧ್ ಮಾಂಡುನ್ ಆತಾಂ ಖುದ್ಧ್ ಆಲಿಯಾನ್ಚ್ ತಾಂಕಾಂ ಬಚಾವ್ ಕರುಂಕ್ ಪಳೆಲ್ಲೆಂ. ಇಕ್ಬಾಲಾಚೊ ಆನಿ ರಾಶಿದಾಚೊ ಉಭೊನ್ ಗೆಲ್ಲೊ ಜೀವ್ ಪಾಟಿಂ ತಾಂಕಾ ಲಾಭ್ಲ್ಲ್ಯಾ ಪರಿಂ ಜಾಲೆಂ.
"ತುವೆಂ ಮ್ಹಣ್ಚೆಂ...... ತುಜ್ಯಾ ವಯ್ರ್ ಹಲ್ಲೊ ಜಾತಾನಾ ಶೀತಲ್ ತುಜ್ಯಾ ಪ್ಲ್ಯಾಟಾಂತ್ ನಾತ್ಲ್ಲೆಂ.....?"
"ನಾತ್ಲ್ಲೆಂ!"
"ಹೆಂ ತುಂ ರುಜು ಕರುಂಕ್ ಸಕ್ತಾಯ್....?"
"ವ್ಹಯ್!"
"ಕಶೆಂ.....?"
"ಇಕ್ಬಾಲಾನ್ ಆನಿ ರಾಶಿದಾನ್ ಮ್ಹಜ್ಯಾ ವಯ್ರ್ ಹಲ್ಲೊ ಚಲಯ್ತಾನಾ ಮಿಶೇಲ್ ಆನಿ ಶೀತಲ್ ದೊಗಾಂಯ್ ಶೀತಲಾಚಾ ಘರಾ ಆಸ್ಲ್ಲಿ. ಶೀತಲಾಚಾ ಘರಾ ತಾಂಕಾ ದೊಗಾಂಯ್ಕ್ಯ್ ಕೊಣೆಂಗೀ ಬೆಶ್ಟಾಂವ್ಚೆಂ ಪ್ರಯತ್ನ್ ಕೆಲ್ಲೆಂ. ಆನಿ ಹ್ಯಾ ಬೆಶ್ಟಾವ್ಣೆಚೆಂ ಲಿಖಿತ್ ಕಂಪ್ಲೇಂಟ್ ಪೊಲಿಸ್ ಸ್ಟೇಶನಾಂತ್ ಆಸಾ. ತುಮ್ಕಾಂ ಜಾಯ್ ಜಾಲ್ಯಾರ್ ತುಮಿಂ ಹ್ಯಾ ವಿಶಿಂ ಚಡಿತ್ ಮಾಹೆತ್ ಪೊಲಿಸಾಂ ಥಾವ್ನ್ ಘೆವ್ಯೆತ್! ತಾಂಕಾ ಹಿ ಬೆಶ್ಟಾವ್ಣಿ ಕೊಣೆಂ ದಿಲ್ಲಿ ಮ್ಹಳ್ಳೆಂ ಹಾಂವ್ ಜಾಣಾಂ. ಹ್ಯಾಚ್ ಇಕ್ಬಾಲಾನ್ ಆನಿ ರಾಶಿದಾನ್!"
ಸಗ್ಳ್ಯಾ ಕೋರ್ಟ್ ರುಮಾಕ್ಚ್ ಅಜ್ಯಾಪ್!
ಆಲಿಯಾನ್ ಆಪ್ಣಾಚಾ ತರ್ಫೆನ್ ಆಸ್ಲ್ಯಾ ಸಾಕ್ಶೆಕ್ಚ್ ಫಟ್ ಸಾಕ್ಸ್ ಮ್ಹಣೊನ್ ವೊಲಾಯಿಲ್ಲೆಂ.
"ಹ್ಯಾ ವಿಶಿಂ ವಿಚಾರಣ್ ಚಲಂವ್ಕ್ ಜಾಯ್! ಹ್ಯಾ ವಿಚಾರಣಾ ಖಾತಿರ್ ಥೊಡ್ಯಾ ವೆಳಾಕ್ ಕೊರ್ಟಾಚಿ ಕಾರ್ಯಾವಳ್ ಸ್ತಗಿತ್ ಜಾತೆಲಿ!" ಜಡ್ಜಾನ್ ಆದೇಶ್ ದಿಲೊ.
"ಟಕ್!"
ಜಡ್ಜ್ ಆಪ್ಲ್ಯಾ ಬಸ್ಕೆರ್ ಥಾವ್ನ್ ಉಟ್ಲೊ.
ಥೊಡ್ಯಾ ವೆಳಾನ್ ಕೊರ್ಟಾಚಿ ಕಾರ್ಯಾವಳ್ ಪರ್ತ್ಯಾಕ್ ಆರಂಭ್ ಜಾಲಿ.
ಕೊರ್ಟಾಚಾ ಮುಕಾರ್ ಸಬ್ ಇನ್ಸ್ಪೆಕ್ಟರಾನ್ ರುಜ್ವಾತ್ ಪ್ರಸ್ತುತ್ ಕೆಲ್ಲಿ. ಆಲಿಯಾನ್ ಸಾಂಗ್ಲ್ಲೆಂ ಸತ್ ಆಸ್ಲ್ಲೆಂ. ಮಿಶೇಲಾನ್ ಆನಿ ಶೀತಲಾನ್ ಪೊಲಿಸ್ ಸ್ಟೇಶನಾಂತ್ ಬರಯಿಲ್ಲೆಂ ಲಿಖಿತ್ ಕಂಪ್ಲೇಂಟ್ ಕೊರ್ಟಾಚಾ ಮುಕಾರ್ ಪ್ರಸ್ತುತ್ ಜಾಲ್ಲೆಂ. ಶೀತಲಾನ್ ಸಾಂಗ್ಲೆಲ್ಯಾ ಫಟ್ ಸಾಕ್ಶೆಕ್ ಲಾಗೊನ್ ಶೀತಲಾನ್ ಜುಲ್ಮಾನ್ ಭರುಂಕ್ ಕೊರ್ಟಾ ಥಾವ್ನ್ ಆದೇಶ್ ಜ್ಯಾರಿ ಜಾಲೊ.
"ಸಾಂಗ್ ಮಿಸ್ ಆಲಿಯಾ ತುಂ ಕಿತೆಂ ಸಾಂಗೊಂಕ್ ಆಶೆತಾಯ್?" ಯೂಸುಫ್ ಪರ್ತ್ಯಾಕ್ ತಯಾರ್ ಜಾಲೊ.
"ಹಾಂವ್ ಆತಾಂ ಜೆಂ ಕಿತೆಂ ಉಚಾರ್ತಾಂ ತೆಂ ಹೊ ಕೋರ್ಟ್ ಸತ್ ಮ್ಹಣೊನ್ ಮಾಂದ್ತಾ ಜಾಲ್ಯಾರ್ ಹಾಂವ್ ಸತ್ ಉಲಯ್ತಾಂ ಕೀ ವಿಶು ಕುಮಾರಾಚೆಂ ಮರಣ್ ಆಕ್ಸಿಡೆಂಟ್ ನ್ಹಯ್! ತಿ ಹತ್ಯಾ! ಆನಿ ಹಿ ಹತ್ಯಾ ಹ್ಯಾ ಇಕ್ಬಾಲಾನ್ಚ್ ಕೆಲ್ಯಾ ಮ್ಹಳ್ಳೆಂ ಹ್ಯಾ ಇಕ್ಬಾಲಾನ್ ಖುದ್ಧ್ ಮ್ಹಾಕಾ ಮ್ಹಜ್ಯಾ ವಯ್ಲ್ಯಾ ಹಲ್ಲ್ಯಾಚಾ ವೆಳಾರ್ ಮ್ಹಾಕಾ ಬೆಶ್ಟಾಯ್ತಾನಾ ಉಚಾರ್ಲ್ಲೆಂ. ತೊ ಜರ್ ಮ್ಹಜ್ಯೆ ಲಾಗಿಂ ಹ್ಯಾ ವಿಶಿಂ ಉಚಾರಿನಾತ್ಲ್ಲೊ ಜಾಲ್ಯಾರ್ ಹಾಂವ್ಯ್ ಹೆಂ ಏಕ್ ಆಕ್ಸಿಡೆಂಟ್ಚ್ ಮ್ಹಣೊನ್ ಮಾಂದುನ್ ಘೆತಿಂ. ಪುಣ್ ಹೆಂ ಆಕ್ಸಿಡೆಂಟ್ ನ್ಹಯ್! ಹಿ ಇಕ್ಬಾಲಾನ್ ಆನಿ ರಾಶಿದಾನ್ ಮೆಳೊನ್ ಕೆಲ್ಲಿ ಹತ್ಯಾ!"
ಸಗ್ಳೊ ಕೋರ್ಟ್ ಮೌನ್ ಜಾವ್ನ್ ಆಲಿಯಾಕ್ ಆಯ್ಕಾತಾಲೊ. ಸರ್ವಾಂಚಿ ನದರ್ ಫಕತ್ತ್ ಆಲಿಯಾ ವಯ್ರ್ ಖಂಚ್ಲ್ಲಿ.
"ಆನಿ ಮಿಶೇಲಾಚೆಂ ಅಪಹರಣ್ ಹಾವೆಂ ಕೆಲ್ಲೆಂ. ತಾಚಿ ಹತ್ಯಾಯ್ ಹಾವೆಂ ಕೆಲ್ಲಿ. ಇಕ್ಬಾಲಾಚಾ ಮುಕಾರ್ ಝುಜೊಂಕ್ ಮ್ಹಾಕಾ ಏಕ್ ಭಳಾಧೀಕ್ ಆಧಾರ್ ಜಾಯ್ ಆಸ್ಲ್ಲೊ. ವಿಶು ಕುಮಾರಾಚಿ ಇಕ್ಬಾಲಾನ್ ಹತ್ಯಾ ಕೆಲ್ಯಾ ಉಪ್ರಾಂತ್ ಮ್ಹಜ್ಯಾ ಮುಕಾರ್ ಮ್ಹಾಕಾ ಆಧಾರ್ ಜಾವ್ನ್ ಆಸ್ಲ್ಲೊ ಮ್ಹಳ್ಯಾರ್ ರಾಯನ್ ಮಾತ್ರ್! ರಾಯನಾಕ್ ಆಪ್ಣಾಂವ್ಕ್ ಹಾವೆಂ ಮಿಶೇಲಾಚೆಂ ಅಪಹರಣ್ ಕೆಲೆಂ ಆನಿ ತೆಂ ಕೊರ್ಟಾಕ್ ಹಾಜರ್ ಜಾಯ್ನಾತ್ಲ್ಲ್ಯಾ ಪರಿಂ ತಾಚಿ ಹತ್ಯಾ ಕೆಲಿ.!"
ಕಸಲ್ಯಾಗೀ ಎಕಾ ವಿಚಿತ್ರ್ ಧಯ್ರಾನ್ ಮ್ಹಳ್ಳ್ಯಾಪರಿಂ ಉಲಂವ್ಚ್ಯಾ ಆಲಿಯಾಕ್ ಆಯ್ಕೊವ್ನ್ ಸಗ್ಳೊ ಕೋರ್ಟ್ಚ್ ಸ್ತಬ್ದ್ ಜಾಲೊ. ಯೂಸುಫಾಚಾ ಜಿಬೆಕ್ ಆರ್ ಮಾರ್ಲ್ಲ್ಯಾ ಪರಿಂ ಜಾಲೆಂ. ರಾಮ್ ಪ್ರಸಾದಾನ್ ಆನಿ ನಾಯರಾನ್ ಆಪ್ಣೆ ಸಲ್ವಾಲ್ಲಿ ರುಜ್ವಾತ್ ಜಾವ್ನ್ ತಕ್ಲಿ ಬಾಗಾಯ್ಲಿ. ಇಕ್ಬಾಲ್ ಆನಿ ರಾಶಿದ್ ಸಕಯ್ಲ್ ಗಳ್ಳೆ. ಆಲಿಯಾ ಮಾತ್ರ್ ಧಯ್ರಾನ್ ಜಡ್ಜಾಕ್ ಪಳೆತಾಲೆಂ. ತಾಚ್ಯಾ ದೊಳ್ಯಾಂನಿ ಭಿರಾಂತ್ ಜಾಂವ್ ಖಂತ್ ಜಾಂವ್ ಕಾಂಯ್ ನಾತ್ಲ್ಲಿ. ತೆಂ ಶಾಂತ್ ಆಸ್ಲ್ಲೆಂ.
"ತುಕಾ ಆನಿ ಕಿತೆಂ ಉಲಂವ್ಕ್ ಆಸಾ......?"
"ನಾ ಯುವರ್ ಹಾನರ್! ಮ್ಹಜ್ಯಾ ಸತಾಕ್ ಕಬೂಲ್ ಕರುನ್ ಕೊರ್ಟಾನ್ ದಿಂವ್ಚ್ಯಾ ಶಿಕ್ಶೆಕ್ ಮಾಂದುನ್ ಘೆಂವ್ಕ್ ಹಾಂವ್ ತಯಾರ್ ಆಸಾ!"
"ತರ್ ಹ್ಯಾ ಆಲಿಯಾಚಾ ಹಲ್ಲ್ಯಾಚಿ ಆನಿ ಮಿಶೇಲಾಚಾ ಹತ್ಯಾಚಿ ಕೇಸ್ ಆಜ್ ಹಾಂಗಾಸರ್ ಸಂಪ್ತಾ!"
"ದಿ ಕೋರ್ಟ್ ಇಸ್ ಅಡ್ಜರ್ನ್ಡ್ ಅಂಟಿಲ್ ಟುಮೋರ್ರೊ!"
"ಟಕ್!"
ಜಡ್ಜ್ ಆಪ್ಲ್ಯಾ ಬಸ್ಕೆರ್ ಥಾವ್ನ್ ಉಟ್ಲೊ.
"ಆಲಿಯಾ.... ಪುತಾ ತುವೆಂ ಆಶೆಂ ಕಿತ್ಯಾಕ್ ಕೆಲೆಂಯ್.....?" ಕೋರ್ಟ್ ರುಮಾಂತ್ಲೊ ಆಲಿಯಾಚೊ ಬಾಪಯ್ ಹುಸ್ಕಾರೊನ್ ರಡ್ಲೊ.
ಪೊಲಿಸಾಂ ಸವೆಂ ಆಲಿಯಾ ಕೋರ್ಟ್ ರುಮಾ ಥಾವ್ನ್ ಭಾಯ್ರ್ ವೆಚಾ ವಗ್ತಾರ್ ತಾಚಿ ನದರ್ ಆಪ್ಲ್ಯಾ ಬಾಪಾಯ್ಚೆರ್ ವಚಾನಾಸ್ತಾನಾ ಗೆಲಿ ನಾ. ಆಪ್ಲ್ಯಾ ಬಾಪಾಯ್ಚ್ಯಾ ದೊಳ್ಯಾಂತ್ಲಿಂ ದುಖಾಂ ಪಳವ್ನ್ ಧಾಂವೊನ್ ವಚೊನ್ ತ್ಯಾ ದುಖಾಂಕ್ ಆಪ್ಲ್ಯಾ ಹಾತಾಂನಿ ಪೊಶೆಂವ್ಕ್ ಆಲಿಯಾಕ್ ಮನ್ ಜಾಲೆಂ. ಪುಣ್ ತಾಣೆಂ ತಶೆಂ ಕರುಂಕ್ ಸಾದ್ಯ್ ನಾತ್ಲ್ಲೆಂ. ತಶೆಂಚ್ ತೆಂ ಆಪ್ಲ್ಯಾ ಬಾಪಾಯ್ಕ್ ಪಳವ್ನ್ ಅಮ್ರುಕೊ ಹಾಸ್ಲೆಂ. ಶಬೀರಾಕ್ ಆಪ್ಲ್ಯಾ ಧುವೆಚ್ಯಾ ಹಾಸ್ಯಾಂನಿ ತಾಚೆಂ ಜಯ್ತ್ ಸ್ಪಶ್ಟ್ ದಿಸೊನ್ ಆಯ್ಲೆಂ.
ಜಶೆಂ ತೆಂ ತಾಚ್ಯಾ ಲ್ಹಾನ್ಪಣಾರ್ ಥಾವ್ನ್ ಜಯ್ತ್ ಆಪ್ಣಾವ್ನ್ ಆಯ್ಲಾಂ ತಶೆಂ!
ದುಸ್ರ್ಯಾ ದಿಸಾ ಪರ್ತ್ಯಾಕ್ ಕೊರ್ಟಾಚಿ ಕಾರ್ಯಾವಳ್ ಆರಂಭ್ ಜಾಲಿ.
ಆಜ್ ಜಡ್ಜಾಚೆಂ ಫೈಸಲ್ ಯೆಂವ್ಚೆಂ ಆಸ್ಲ್ಲೆಂ.
ರಾಮ್ ಪ್ರಸಾದ್, ನಾಯರ್, ಯೂಸುಫ್ ಆಪಾಪ್ಲ್ಯಾ ಜಾಗ್ಯಾರ್ ಬಸೊನ್ ಮುಕ್ಲ್ಯಾ ಘಡಿಯಾಂಕ್ ಆತುರಾಯೆನ್ ರಾಕ್ತಾಲೆ. ಇಕ್ಬಾಲ್ ಆನಿ ರಾಶಿದ್ ಭಿಯಾನ್ ಥರ್ಥರ್ತಾಲೆ. ತೆ ಕಿತ್ಲೆ ಭಿಯೆಲ್ಯಾತ್ ಮ್ಹಳ್ಳೆಂ ತೆಂ ತಾಂಚ್ಯಾ ದೊಳ್ಯಾಂ ದಿಶ್ಟೆಂತ್ ಆನಿ ತಾಂಚ್ಯಾ ಬದ್ಲಾಲ್ಯಾ ತೊಂಡಾಚ್ಯಾ ಭಾವನಾಂತ್ ಹೆಂ ಸ್ಪಶ್ಟ್ ಝಳ್ಕಾತಾಲೆಂ.
ಆಲಿಯಾ ಆಪ್ಣಾಚಾ ಸಂಸಾರಾಂತ್ ಮೌನ್ ಬಸೊನ್ ಆಸ್ಲ್ಲೆಂ. ತೆಂ ಕಾಂಯ್ಚ್ ಭಿಯೆಲ್ಲೆಂ ನಾ. ತಾಚ್ಯಾ ತೊಂಡಾರ್ ಖಂತ್ ಜಾಂವ್ ಬೆಜಾರಾಯ್ ಜಾಂವ್ ದೂಖ್ ಜಾಂವ್ ಕಾಂಯ್ಚ್ ವಾಚುಂಕ್ ಮೆಳಾನಾತ್ಲ್ಲೆಂ. ತೆಂ ವಿಚಿತ್ರ್ ಶಾಂತತಾಯೆಂತ್ ಆಸ್ಲ್ಲೆಂ.
ಜಡ್ಜಾಚಾ ಫೈಸಾಲಾ ವಯ್ರ್ ಸಭಾರಾಂಕ್ ದುಬಾವ್ ತಶೆಂ ಆತುರಾಯ್ ಆಸ್ಲ್ಲಿ. ಹಾಂಚಾ ಮಧೆಂ ಆಲಿಯಾಚೊ ಬಾಪಯ್ ಶಬೀರ್ ಆಪ್ಲ್ಯಾ ಧುವೆಚ್ಯಾ ಫುಡಾರಾಚ್ಯಾ ದಿಸಾಂಕ್ ಕೋರ್ಟ್ ಕಸೊ ಘೆತಾ ಮ್ಹಳ್ಳ್ಯಾ ವಿಶಿಂ ಚಿಂತುನ್ ದೆದೆಸ್ಪರ್ ಜಾಲ್ಲೊ.
ಥೊಡ್ಯಾ ವೆಳಾನ್ ಕೊರ್ಟಾಚಿ ಕಾರ್ಯಾವಳ್ ಆರಂಭ್ ಜಾಲಿ.
ಆತಾಂ ಜಡ್ಜ್ ಉಲಯ್ಲೊ.
"ಆರ್ಡರ್! ಆರ್ಡರ್!"
"ಜೂನಾಚಾ ಬಾರಾ ತಾರಿಕೆ ಥಾವ್ನ್ ಚಲ್ಲ್ಲ್ಯಾ ಹ್ಯಾ ಮಿಸ್ತೆರಾಭರಿತ್ ಆಲಿಯಾಚಾ ಹಲ್ಲ್ಯಾಚಾ ಕೇಸಿಕ್, ಮಿಶೇಲಾಚಾ ಹತ್ಯಾಚಿ ಕೇಸ್ ಆನಿ ವಿಶು ಕುಮಾರಾಚ್ಯಾ ಆಕ್ಸಿಡೆಂಟಾಚಾ ಕೇಸಿನ್ ಸಾಂಗಾತ್ ದಿತಾನಾ ಹರ್ಯೆಕಾ ದಿಸಾ ಎಕಾ ಥಾವ್ನ್ ಎಕಾ ಸಾಕ್ಶೆ ಮಧೆಂ ನವೆ ನವೆ ಮಿಸ್ತೆರ್ಚ್ ಭಾಯ್ರ್ ಪಡ್ಲೆ ನ್ಹಯ್ ಆಸ್ತಾಂ ಹಿ ಕೇಸ್ ದಿಸಾಂದೀಸ್ ಚಡ್ ಆನಿ ಚಡ್ ಕಾಂಪ್ಲಿಕೇಟ್ ಜಾವ್ನ್ ವೆತಾಲಿ.
ಪುಣ್ ಆಲಿಯಾನ್ ಆಪ್ಣೆ ಆಫ್ರಾಧ್ ಮಾಂದುನ್ ಘೆತ್ಲೆಲ್ಯಾನ್ ಆನಿ ಹ್ಯಾ ಕೊರ್ಟಾಂತ್ ಚಲ್ಲ್ಲ್ಯಾ ಹ್ಯಾ ಟ್ರಾಯಲಾಚಾ ಸಾಕ್ಶೆಂಕ್ ಸಂಪೂರ್ಣ್ ಥರಾನ್ ವ್ಹಾರಾವ್ನ್ ಪಳಯ್ಲ್ಯಾ ಉಪ್ರಾಂತ್ ಹೊ ಕೋರ್ಟ್ ಹ್ಯಾ ನಿರ್ದಾರಾಚೆರ್ ಪಾವ್ಲಾ ಕೀ ಆಲಿಯಾ ಖಾನಾ ವಯ್ರ್ ಮರಾಣಾಂತಿಕ್ ಹಲ್ಲೊ ಆನಿ ವಿಶು ಕುಮಾರಾಚಿ ಹತ್ಯಾ ಇಕ್ಬಾಲ್ ಆನಿ ತಾಚ್ಯಾ ಭಾವಾನ್ ರಾಶಿದಾನ್ಚ್ ಕೆಲ್ಯಾ ಮ್ಹಳ್ಳೆಂ ರುಜು ಜಾತಾ.
ತಶೆಂಚ್ ಮಿಶೇಲಾಚಾ ಅಪಹರಣಾಕ್ ಆನಿ ತಾಚ್ಯಾ ಹತ್ಯಾಕ್ ಹೆಂ ಆಲಿಯಾ ಕಾರಾಣ್ ಮ್ಹಳ್ಳೆಂ ರುಜು ಜಾತಾ.
ಆಲಿಯಾ ತಾಚ್ಯಾ ಜಿವಿತಾಂತ್ಲ್ಯಾ ಸಮಸ್ಯಾಂಕ್ ಕಾನೂನಾಚಿ ಮಜತ್ ಮಾಗಾನಾಸ್ತಾನಾ ಕಾನೂನಾಕ್ ಆಪ್ಲ್ಯಾ ಹಾತಾಂತ್ ಘೆವ್ನ್ ತಾಚ್ಯಾ ಬಚಾವೆ ಖಾತಿರ್ ಎಕಾ ನಿರ್ಧೊಶಿ ಚಲಿಯೆಚಿ ಹತ್ಯಾ ಕರುಂಕ್ ಪಾವ್ಲಾಂ ತೆಂ ಏಕ್ ಭಯಾನಕ್ ಕೃತ್ಯ್! ಜಿವಿತ್ ಮ್ಹಳ್ಯಾರ್ ಏಕ್ ಖೆಳ್ ಭಿಲ್ಕುಲ್ ನ್ಹಯ್! ಕೊಣಾಯ್ಚಾ ಜಿವಾ ಸವೆಂ ಖೆಳ್ಚೆಂ ವ್ಹಡ್ಲೊ ಆಫ್ರಾಧ್!
ಇಕ್ಬಾಲಾಕ್ ಆನಿ ರಾಶಿದಾಕ್ ಅಂಡರ್ ವರ್ಲ್ಡಾಚೆ ಸಂಭ್ಂಧ್ ಆಸಾತ್ ಮ್ಹಳ್ಳೆಂ ರುಜು ಜಾತಾ. ಆಪ್ಲ್ಯಾ ಪಯ್ಶ್ಯಾಂಚಾ ಭಳಾನ್ ಕೊಣಾಯ್ಕ್ಯ್ ಬೆಶ್ಟಾವ್ನ್ ಧಮ್ಕಾವ್ನ್ ತಾಂಚಿ ಹತ್ಯಾ ಕರ್ಚಿ ಮ್ಹಳ್ಯಾರ್ ಹ್ಯಾ ಸಮಾಜೆಕ್ ಆಪ್ಲ್ಯಾ ಹಾತಾಂತ್ ಧರುಂಕ್ ಕರ್ಚೆಂ ಪ್ರಯತ್ನ್. ಹೆಂ ಮನ್ಶ್ಯಾಂಚಾ ಮಾನವೀಯ್ ಹಕ್ಕಾಂಚೆಂ ಉಲ್ಲಂಘನ್!
ಹ್ಯಾಚ್ ಖಾತಿರ್ ಹೊ ಕೋರ್ಟ್ ಸರ್ವ್ ಸಾಕ್ಶಿ ಆನಿ ಆಧಾರಾಕ್ ಮಾಂದುನ್ ಘೆವ್ನ್ ಹ್ಯಾ ತೆಗಾಂಯ್ಕ್ಯ್ ಚೂಕಿದಾರ್ ಮ್ಹಣೊನ್ ಮಾಂದುನ್ ಘೆತಾ. ತಾಚ್ಯಾ ಸವೆಂ ಇಂಡಿಯನ್ ಪೀನಲ್ ಕೋಡ್ ೩೦೨ ಆನಿ ೩೦೬ ಚ್ಯಾ ಆಧೀನ್ ಜಿವಿತಾಕ್ ಏಕ್ ಖೆಳ್ ಜಾವ್ನ್ ಘೆವ್ನ್ ನಿರಾಫ್ರಾಧಿ ವಿಶು ಕುಮಾರಾಚಿ ಹತ್ಯಾ ಆನಿ ಆಲಿಯಾ ಖಾನಾ ವಯ್ಲ್ಯಾ ಮರಣಾಂತಿಕ್ ಹಲ್ಲ್ಯಾಕ್ ಕಾರಾಣ್ ಜಾಲ್ಯಾ ಇಕ್ಬಾಲಾಕ್ ಆನಿ ರಾಶಿದಾಕ್ ಮರ್ಣಾಚಿ ಶಿಕ್ಶಾ ವಾಚ್ತಾ. ತಶೆಂಚ್ ಹ್ಯಾ ಖೆಳಾಂತ್ ಕಾನೂನಾಕ್ ನಿರ್ಲಕ್ಶ ಕರುನ್ ಮಿಶೇಲ್ ಆಲ್ಪ್ರೆಡಾಚಾ ಹತ್ಯಕ್ ಕಾರಾಣ್ ಜಾಲ್ಲ್ಯಾ ಆಲಿಯಾ ಖಾನಾಕ್ ಮರ್ಣಾಚಿ ಶಿಕ್ಶಾ ವಾಚ್ತಾ.
"ಟು ಬಿ ಹ್ಯಾಂಗ್ಡ್ ಆಂಟಿಲ್ ಡೆತ್!"
ಜಡ್ಜಾನ್ ಆಪ್ಲ್ಯಾ ಫೈಸಲಾಚೆರ್ ದಸ್ಕತ್ ಕೆಲಿ.
ಆನಿ ಹೆಂ ಟ್ರಾಯಲ್ ಸಂಪ್ಲೆಂ.
ಇಕ್ಬಾಲ್ ಆನಿ ರಾಶಿದ್ ಜಡ್ಜಾಚೆಂ ಫೈಸಲ್ ಆಯ್ಕೊನ್ ಧರ್ಣಿಕ್ ಕೊಸಾಳ್ಳೆ.
ಪೊಲಿಸಾಂನಿ ಯೇವ್ನ್ ಆಲಿಯಾಕ್ ಆನಿ ಇಕ್ಬಾಲ್ ರಾಶಿದಾಕ್ ಪರ್ತ್ಯಾಕ್ ಖೊಡೊ ಘಾಲೊ.
ತಿತ್ಲ್ಯಾರ್!
’ಸಟ್ಟ್’ ಕರುನ್ ಆಲಿಯಾಚಿ ನದರ್ ಕೋರ್ಟ್ ರುಮಾಂತ್ ಬಸ್ಲೆಲ್ಯಾ ರಾಯನಾ ವಯ್ರ್ ಗೆಲಿ.
ತಾಣೆಂ ತಶೆಂಚ್ ರಾಯನಾಕ್ ಪಳೆಲೆಂ.
ಥೊಡ್ಯಾ ಖಿಣಾಂತ್ ಆಲಿಯಾ ಆನಿ ರಾಯನಾಚಾ ದೊಳ್ಯಾಂ ದಿಶ್ಟೆ ಮಧೆಂ ದ್ವಂದ್ವ್ ಝುಜ್ ಚಲ್ಲೆಂ.
ಆಲಿಯಾಚಾ ದೊಳ್ಯಾಂಕ್ ರಾಯನಾಚಾ ದೊಳ್ಯಾಂನಿ ಉಪ್ಯೆವ್ನ್ ಆಸ್ಚಿ ಫಾರಿಕ್ಪಣಾಚಿ ಭುಕ್ ಸ್ಪಶ್ಟ್ ದಿಸ್ಲಿ. ತೊ ಆಲಿಯಾಚಾ ತೊಂಡಾರ್ ಭಿರಾಂತೆಚೊ ಛಾರೊ ದೆಖೊಂಕ್ ಆಶೆಲೊ. ಆಪ್ಲ್ಯಾ ಮಿಶೇಲಾಕ್ ಜಿವೆಶಿಂ ಮಾರುನ್ ಆಪ್ಲ್ಯಾ ಜಿವಿತಾಂತ್ ಆಂದ್ಕಾರ್ ವೊತ್ಲ್ಲ್ಯಾ ಆಲಿಯಾಚಾ ದೊಳ್ಯಾಂನಿ, ಹ್ಯಾ ವಗ್ತಾರ್, ತೊ ತೊಚ್ಚ್ ಆಂದ್ಕಾರ್ ಪಳಂವ್ಕ್ ಆಶೆಲೊ. ತಾಚಿ ಆಶಾ ಇಕ್ಬಾಲಾಚಾ ಆನಿ ರಾಶಿದಾಚಾ ದೊಳ್ಯಾಂನಿ ಜ್ಯಾರಿ ಕೆಲ್ಲಿ. ತಾಂಚ್ಯಾ ದೊಳ್ಯಾಂನಿ ಆಸ್ಲ್ಲೆಂ ಮರ್ಣಾಚೆಂ ಭ್ಯೆಂ ರಾಯನಾಚಾ ದೊಳ್ಯಾಂನಿ ಸ್ಪಶ್ಟ್ ವಾಚ್ಲ್ಲೆಂ. ಆಜ್ ತಾಚಿ ಅರ್ಧಿ ಭುಕ್ ಹ್ಯಾ ಇಕ್ಬಾಲಾಚಾ ಆನಿ ರಾಶಿದಾಚಾ ತೊಂಡಾ ವಯ್ಲ್ಯಾ ಮರ್ಣಾಚಾ ಭಿರಾಂತೆನ್ ಥಾಂಬಯಿಲ್ಲಿ. ಉರ್ಲೆಲಿ ಅರ್ಧಿ ಭುಕ್ ತೊ ಆಲಿಯಾಚಾ ತೊಂಡಾರ್ ನಾಚೊನ್ ಯೇಂವ್ಕ್ ಜಾಯ್ ಜಾಲ್ಲ್ಯಾ ತ್ಯಾ ಮೊರ್ಣಾಚಾ ಭಿರಾಂತೆ ಥಾವ್ನ್ ಥಾಂಬವ್ಕ್ ಆಶೆಲೊ.
ತಿತ್ಲೆಂಚ್!
ರಾಯನಾಚಾ ದೊಳ್ಯಾಂಕ್ಚ್ ಪಳೆವ್ನ್ ಆಸ್ಲ್ಲೆಂ ಆಲಿಯಾ ವ್ಹಳೂ ಹಾಸ್ಲೆಂ!
ಆಲಿಯಾಚಾ ಜಯ್ತಾಚ್ಯೊ ಹಾಸೊ ತ್ಯೊ!
ರಾಯನ್ ಆಪ್ಲ್ಯಾ ಬಸ್ಕೆರ್ ಥಾವ್ನ್ ಉಟೊನ್ ಉಭೊ ಜಾಲೊ. ತಾಣೆಂ ಆಲಿಯಾಚಾ ದೊಳ್ಯಾಂನಿ ದೆಖೊಂಕ್ ಆಶೆಲ್ಲೆಂ ತೆಂ ತೊ ದೆಖೊಂಕ್ ಸಕ್ಲೊ ನಾ. ರಾಯನ್ ಸಲ್ವಾಲ್ಲೊ. ರಾಯನಾಕ್ ಆಲಿಯಾನ್ ಸಲ್ವಾಯಿಲ್ಲೆಂ!
"ಕಮಾನ್ ಆಲಿಯಾ! ಐ ವಾಂಟ್ ಟು ಸೀ ಇಟ್ ಇನ್ ಯುವರ್ ಫೇಸ್! ತುಜ್ಯಾ ತೊಂಡಾರ್ ಹಾಂವ್ ಮರ್ಣಾಕ್ ಪಳಂವ್ಕ್ ಆಶೆತಾಂ! ಕಮಾನ್....!" ರಾಯನ್ ಮತಿಂತ್ಚ್ ಬೊಬಾಟ್ಲೊ.
"ತುವೆಂ ಆಶೆಲ್ಲೆಂ ತುಕಾ ಪಳಂವ್ಕ್ ಮೆಳ್ಚೆಂ ನಾ ರಾಯನ್! ಕಿತ್ಯಾಕ್... ಆಲಿಯಾ ಆಜ್ ಜಯ್ತೆವಂತ್ ಜಾಲಾಂ!" ಆಲಿಯಾ ಆಪ್ಲ್ಯಾ ದೊಳ್ಯಾಂನಿಚ್ ಉಲಯ್ಲೆಂ. ತಾಚ್ಯಾ ದೊಳ್ಯಾಂನಿ ಉಚಾರ್ಲೆಲ್ಯಾ ಉತ್ರಾಂಕ್ ಸಾಕ್ಸ್ ಜಾವ್ನ್ ಆಲಿಯಾಚಾ ವೊಂಟಾನಿ ಹಾಸೊ ಪರ್ಜಳ್ತಾಲ್ಯೊ.
"ಕಮಾನ್ ಆಲಿಯಾ! ಐ ವಾಂಟ್ ಟು ಸೀ ಇಟ್!" ರಾಯನಾಚಿ ಮತ್ ಆಪ್ಲೊ ತಾಳೊ ಪಿಂದುನ್ ಬೊಬಾಟ್ಲಿ.
"ನಾ!" ಆಲಿಯಾ ತಶೆಂಚ್ ಆಪ್ಲ್ಯಾ ತೊಂಡಾರ್ ಹಾಸೊ ಹಾಡವ್ನ್ ರಾಯನಾಕ್ ಪಳೆತಾಲೆಂ.
ತಿತ್ಲೆಂಚ್!
’ದಡ್ಡ್’ ಕರುನ್ ರಾಯನ್ ತ್ಯಾ ಕೋರ್ಟ್ ರುಮಾಚಾ ಬಾಂಕಾರ್ ಬಸ್ಲೊ.
ರಾಯನ್ ಆಜ್ ಸಲ್ವಾಲ್ಲೊ!
ಜಿವಿತಾಂತ್ ಕೆದ್ನಾಂಚ್ ಸಲ್ವೊನ್ ನೆಣಾಂ ಆಸ್ಲ್ಲ್ಯಾ ರಾಯನಾಕ್ ಆಲಿಯಾನ್ ಸಲ್ವಯ್ಲೆಂ!
ತಾಚ್ಯಾ ಪಾಟ್ಲ್ಯಾನ್ ತೊ ರಾಮ್ ಪ್ರಸಾದ್, ನಾಯರ್, ಯೂಸುಫ್ ಮುನಾವರ್, ಆನಿ ನಿಮಾಣೊ ಜಾವ್ನ್ ತೊ ಜಡ್ಜ್ ಪಾಸೊನ್ ಎಕಾ ಚಲಿಯೆ ಮುಕಾರ್ ಸಲ್ವಾಲ್ಲೊ. ಆಲಿಯಾನ್ ಆಜ್ ಹ್ಯಾ ಸಮಾಜೆಕ್ಚ್ ಸಲ್ವಾಯಿಲ್ಲೆಂ! ಹ್ಯಾ ಸಮಾಜೆಚ್ಯಾ ರಿತಿ ರಿವಾಜೆಂಕ್! ದಾದ್ಲ್ಯಾ ಪಣಾಚಾ ಹಂಕಾರಾಕ್! ಆನಿ ಹ್ಯಾ ಕುರ್ಡ್ಯಾ ಕಾನೂನಾಕ್!
ಹೆಂ ಕಶೆಂ ಆನಿ ಕಿತ್ಯಾಕ್ ಮ್ಹಳ್ಳೆಂ ತೆಂ ಫಕತ್ತ್ ಆಲಿಯಾ ಆನಿ ತಾಚೊ ಮೊಗಾಚೊ ಬಾಪಯ್ ಮಾತ್ರ್ ಜಾಣಾಂ ಆಸ್ಲ್ಲಿಂ!
ಆಲಿಯಾನ್ ಆತಾಂ ಆಪ್ಲ್ಯಾ ಬಾಪಾಯ್ಕ್ ಪಳೆಲೆಂ.
"ಅಬ್ಬೂ....!" ತಾಚೆ ವೋಂಟ್ ಉಲಯ್ಲೆ. ವ್ಹಳೂ ತ್ಯಾ ವೊಂಟಾನಿ ಹಾಸೊ ಉದೆಲ್ಯೊ.
ಶಬೀರಾಕ್ ಆಪ್ಲ್ಯಾ ಧುವೆಚ್ಯಾ ಹಾಸ್ಯಾಂಕ್ ಪಳಂವ್ಕ್ ಜಾಲೆಂ ನಾ. ತಾಣೆಂ ಆಪ್ಲ್ಯಾ ದೊಳ್ಯಾಂನಿ ಗಳ್ಚ್ಯಾ ದುಖಾಂಕ್ ಪೊಶೆಲೆಂ.
"ತುವೆಂ ಆಶೆಂ ಕಿತ್ಯಾಕ್ ಕೆಲೆಂಯ್ ಬೇಟಾ....?" ಶಬೀರಾಚಾ ಜಿಬೆರ್ ಉತ್ರಾಂ ಉಟೊನ್ ಆಯ್ಲಿಂ. ತ್ಯಾ ಸವೆಂ ತಾಚ್ಯಾ ದೊಳ್ಯಾಂ ಥಾವ್ನ್ ದುಖಾಂ ಗಳ್ಳಿಂ.
"ರಡಾನಾಕಾ ಅಬ್ಬೂ...!" ವೊಂಟಾನಿಚ್ ಉಲಯಿಲ್ಲ್ಯಾ ಆಲಿಯಾನ್ ಆಪ್ಲ್ಯಾ ವೊಂಟಾನಿ ಹಾಸೊ ಹಾಡವ್ನ್ ಆಪ್ಲ್ಯಾ ಬಾಪಾಯ್ಕ್ ಭುಜಯ್ಲೆಂ. ತಾಣೆಂ ನಿಮಾಣೆಂ ಆಪ್ಲ್ಯಾ ಬಾಪಾಯ್ ವಯ್ರ್ ದೀಶ್ಟ್ ಘಾಲಿ. ಉಪ್ರಾಂತ್ ತೆಂ ಪೊಲಿಸಾಂ ಸವೆಂ ಫುಡೆಂ ಚಲ್ಲೆಂ.
***************
ಸ ಮಹಿನ್ಯಾಂ ಉಪ್ರಾಂತ್!
ಜನವರಿ ಮಹಿನ್ಯಾಚಿ ಅಟ್ರಾವಿ ತಾರಿಕ್!
ವೊರಾಂ ಫಾಂತ್ಯಾಚಿಂ ಚಾರ್!
ಸ ವೊರಾಂಕ್ ಆಲಿಯಾಚೆಂ ಎಕ್ಸಿಕ್ಯೂಶನ್!
ಆಲಿಯಾಚಾ ಎಕ್ಸಿಕ್ಯೂಶನಾಚಾ ದೋನ್ ವೊರಾಂ ಪಯ್ಲೆಂಚ್ ಸೆಂಟ್ರಲ್ ಜೈಲಾಚೆಂ ವಾರ್ಡನ್ ದೊಗಾಂ ಗಾರ್ಡಾಂ ಸವೆಂ ಆಲಿಯಾಕ್ ದವರ್ಲ್ಲ್ಯಾ ಸೆಲ್ಲಾ ಮುಕಾರ್ ಉಭೆಂ ಜಾಲ್ಲೆಂ. ಆಲಿಯಾ ಧಾ ದಿಸಾಂ ಥಾವ್ನ್ ಹ್ಯಾ ಸೆಲ್ಲಾಂತ್ ಆಸ್ಲ್ಲೆಂ. ತ್ಯಾ ಪಯ್ಲೆಂ ತೆಂ ಸೆಂಟ್ರಲ್ ಜೈಲಾಚಾ ತ್ಯಾ ದುಸ್ರ್ಯಾ ಸೆಲ್ಲಾಂತ್ ಆಸ್ಲ್ಲೆಂ.
ಆಲಿಯಾಕ್ ಹ್ಯಾ ರಾತಿಂ ನೀದ್ ಆಯಿಲ್ಲಿ ನಾ. ತೆಂ ಜಾಣಾಂ ಆಸ್ಲ್ಲೆಂ ಆಯ್ಚಿ ರಾತ್ ತಾಚ್ಯಾ ಜಿವಿತಾಚಿ ನಿಮಾಣಿ ರಾತ್! ಮೊಳಾಬಾ ವಯ್ಲಾ ತಾರಾಂಕ್ ಪಳಂವ್ಚಿ ತಾಕಾ ಆಶಾ ಉದೆಲ್ಲಿ.
"ಆನಿ ಥೊಡ್ಯಾಚ್ ವೆಳಾನ್ ತುಂ ತ್ಯಾ ಮೊಳಾಬಾ ವಯ್ಲ್ಯಾ ತಾರಾಂ ಸವೆಂ ಏಕ್ ಜಾತಾಯ್ ಆಲಿಯಾ. ತುವೆಂ ಸದಾಂ ಆಶೆಲ್ಲ್ಯಾ ತ್ಯಾ ಮೊಳಾಬಾರ್ ತುಂ ಸದಾಂ ರಾಜ್ ಕರ್ತೆಲೆಂಯ್! ಆಜ್ ತುಂ ಹ್ಯಾ ಧರ್ತೆ ಥಾವ್ನ್ ತೊಟೊನ್ ವೆಚೆಂ ನೆಕೆತ್ರ್!" ಆಲಿಯಾಚಾ ಮತಿನ್ ಆಲಿಯಾಚಾ ಕಾಳ್ಜಾಚಾ ಆಶೆಕ್ ಭುಜಯ್ಲೆಂ.
ಮಾನವೀಯ್ ಹಕ್ಕಾಂಕ್ ಲಾಗೊನ್ ವಾವುರ್ಚ್ಯಾಂನಿ ಆಲಿಯಾಚಾ ಪಾಡ್ತೆನ್ ಉಭೆಂ ಜಾಂವ್ಚೆಂ ಪ್ರಯತ್ನ್ ಕೆಲೆಂ. ರಾಜಕೀಯ್ ಫುಡಾರ್ಯಾಂನಿ ತಾಂಚ್ಯಾ ಫಾಯ್ದ್ಯಾ ಖಾತಿರ್ ಆಲಿಯಾಚಾ ಶಿಕ್ಶೆಕ್ ರಾಜಕೀಯ್ ರಂಗ್ ದೀಂವ್ಕ್ ಪ್ರಯತ್ನ್ ಕೆಲೆಂ. ಫಾಶಿಯೆಚ್ಯಾ ಶಿಕ್ಶೆಕ್ ಬಹಿಶ್ಕಾರ್ ಘಾಲೊ. ಪುಣ್ ಖುದ್ಧ್ ಆಲಿಯಾನ್ ತ್ಯಾ ಮಾನವೀಯ್ ಹಕ್ಕಾಂಚಾ ನಿಬಾನ್ ಆಪ್ಲೊ ಜೀವ್ ವಾಂಚಂವ್ಚೆಂ ಪ್ರಯತ್ನ್ ಕೆಲೆಂ ನಾ.
ಆಲಿಯಾನ್ ಕಿತೆಂ ಚೂಕ್ ಕೆಲ್ಯಾ ಮ್ಹಳ್ಳಿ ತಿ ತಾಕಾ ಖಬಾರ್ ಆಸ್ಲ್ಲಿ. ತಾಚ್ಯಾ ಕಾಳ್ಜಾಕ್ ಸಮಾಧಾನ್ ಆಸ್ಲ್ಲೆಂ. ತಾಚ್ಯಾ ಮತಿಂತ್ ಜಯ್ತಾಚಿ ಖುಶಿ ಆಸ್ಲ್ಲಿ.
ಹ್ಯಾ ಸ ಮಹಿನ್ಯಾಂಚಾ ಆವ್ದೆಂತ್ ಆಲಿಯಾ ಕೊಣಾಯ್ಕ್ಯ್ ಆನಿ ಕಸಲ್ಯಾಕ್ಯ್ ಆಶೆಲ್ಲೆಂ ನಾ.
ತೆಂ ಆಶೆಲ್ಲೆಂ ಮ್ಹಳ್ಯಾರ್ ಫಕತ್ತ್ ತ್ಯಾ ಮೊಳಾಬಾಕ್ ಮಾತ್ರ್!
ತೊ ನಿಳ್ಸೊ ನಿಳ್ಸೊ ಮೊಳಾಬ್!
ತಿಂ ಧವಿಂ ಧವಿಂ ಕುಪಾಂ!
ತ್ಯಾ ಕುಪಾಂ ಪಂದಾ ಉಭ್ಚಿಂ ಸ್ವತಂತ್ರ್ ಸುಕ್ಣಿಂ!
ಆಲಿಯಾ ತ್ಯಾ ಸುಕ್ಣ್ಯಾಂ ಪರಿಂ ಸ್ವತಂತ್ರ್ ಜಾವ್ನ್ ಜಿಯೆಲ್ಲೆಂ. ಸ್ವತಂತ್ರ್ ಜಾವ್ನ್ ಮೊರೊಂಕ್ ಆಶೆತಾಲೆಂ.
ಆಲಿಯಾಚಾ ಎಕ್ಸಿಕ್ಯೂಶನಾಕ್ ಆನಿಕ್ಯ್ ದೋನ್ ವೊರಾಂ ಆಸ್ಲ್ಲಿಂ.
ದುಸ್ರ್ಯಾ ಕುಶಿಂನ್ ಇಕ್ಬಾಲ್ ಆನಿ ರಾಶಿದ್!
ಜಿಣಿಯೆಂತ್ ತಾಣಿ ಖೆಳ್ಲ್ಲೊ ಖೆಳ್ ಆಜ್ ತಾಂಚಾಚ್ ಜಿವಿತಾಂತ್ ಖೆಳೊಂಕ್ ಆಯ್ತೊ ಜಾಲ್ಲೊ!
ಚಲಿ ಮ್ಹಳ್ಯಾರ್ ಆಪ್ಲ್ಯಾ ಖೆಳಾಚಿ ಬಾವ್ಲಿ ಮ್ಹಣೊನ್ ತ್ಯಾ ಚಲಿಯೆಚಾ ಜಿವಿತಾ ಸವೆಂ ಖೆಳೊನ್ ಆಯಿಲ್ಲ್ಯಾ ಇಕ್ಬಾಲಾಕ್ ಆನಿ ರಾಶಿದಾಕ್ ಎಕಾ ಚಲಿಯೆನ್ಚ್ ತಾಂಚ್ಯಾ ಗಳ್ಯಾಕ್ ದೊರಿ ಆಂರ್ದಿಲ್ಲಿ. ಪಯ್ಶ್ಯಾಂಚಾ ಹಂಕಾರಾನ್ ಆಪ್ಲ್ಯಾ ಘರ್ಚ್ಯಾ ಸಾಲಾಂತ್ ಚಲಿಯಾಂಚಾ ಪಾಯಾಂಕ್ ಗುಂಗುರು ಬಾಂದ್ಚ್ಯಾ ಇಕ್ಬಾಲಾಚಾ ಆನಿ ರಾಶಿದಾಚಾ ಹಾತಾಕ್ ತ್ಯಾಚ್ ಚಲಿಯೆನ್ ಸಾಸ್ಣಾಕ್ ಖೊಡೊ ಘಾಲ್ಲೊ.
ಬಹಿರಂಗ್ಪಣಿ ಎಕಾ ಚಲಿಯೆಕ್ ಉಕ್ಲುನ್ ವರ್ಚೆಂ ಧಯ್ರ್ ಘೆತ್ಲೆಲ್ಯಾ ರಾಶಿದಾಚ್ಯಾ ಆನಿ ಇಕ್ಬಾಲಾಚ್ಯಾ ಪಾಟಿಚ್ಯಾ ಖಣ್ಯಾಕ್ ಆಜ್ ತ್ಯಾಚ್ ಚಲಿಯೆನ್ ಮೊಡ್ಲ್ಲೆಂ. ಆಜ್ ತೆ ಸಂಸಾರಾ ಮುಕಾರ್ ಅಸಹಾಯಕ್ ಜಾಲ್ಲೆ.
ಸೆಂಟ್ರಲ್ ಜೈಲಾಂತ್ ದೊಗಾಂಯ್ನಿ ಸಾರ್ಲೆಲ್ಯಾ ಹ್ಯಾ ಸ ಮಹಿನ್ಯಾಂತ್ ಇಕ್ಬಾಲ್ ಆನಿ ರಾಶಿದಾಕ್ ಅಜೂನ್ ಹೆಂ ಕಳಿತ್ ಜಾಂವ್ಕ್ ನಾತ್ಲ್ಲೆಂ ಕೀ ಆಲಿಯಾ ವಯ್ರ್ ನಿಜಾಯ್ಕ್ಯ್ ಹಲ್ಲೊ ಕೆಲ್ಲೊ ಮನಿಸ್ ಕೋಣ್? ಆಲಿಯಾನ್ ತ್ಯಾ ಮನ್ಶ್ಯಾಕ್ ಕಿತ್ಯಾಕ್ ಲಿಪೊನ್ ದವರ್ಲಾಂ? ಇಕ್ಬಾಲ್ ಆನಿ ರಾಶಿದ್ ಹ್ಯಾಚ್ ಸವಾಲಾಕ್ ಜಾಪ್ ಸೊದ್ಚ್ಯಾಂತ್ ತಾಂಚ್ಯಾ ಮರ್ಣಾಕ್ ಲಾಗಿಂ ಜಾಲ್ಲೆ.
ಎಕಾ ಚಲಿಯೆಚಾ ಧಯ್ರಾ ವಯ್ರ್ ಆನಿ ತಿಚ್ಯಾ ಸಕ್ತೆ ವಯ್ರ್ ಹ್ಯಾ ವಗ್ತಾರ್ ಇಕ್ಬಾಲಾಕ್ ಆನಿ ರಾಶಿದಾಕ್ ಸಮ್ಜಣಿ ಆಯಿಲ್ಲಿ. ಪುಣ್ ಹಿ ಸಮ್ಜಣಿ ತಾಂಕಾ ಮೆಳ್ಚ್ಯಾ ಪಯ್ಲೆಂ ವೇಳ್ ಉತ್ರೊನ್ ಗೆಲ್ಲೊ! ತೆ ಲಾಚಾರ್ ಜಾಲ್ಲೆ. ಎಕಾ ಚಲಿಯೆಚಾ ಮುಕಾರ್ ತೆ ಸಲ್ವಾಲ್ಲೆ! ತಾಂಚಿ ಜಿಣಿಂ ಎದೊಳ್ಚ್ ಸಂಪ್ಲ್ಲಿ. ಫಕತ್ತ್ ಶ್ವಾಸ್ ಉಭೊಂಕ್ ಮಾತ್ರ್ ಬಾಕಿ ಆಸ್ಲ್ಲೊ.
ವೊರಾಂ ಭರ್ತಿ ಸ ಜಾತಾನಾ ಜೈಲಾಚಾ ವಾರ್ಡನಾನ್ ಆನಿ ದೊಗಾಂ ಗಾರ್ಡ್ಸಾಂನಿ ಮೆಳೊನ್ ಇಕ್ಬಾಲಾಕ್ ಆನಿ ರಾಶಿದಾಕ್ ಫಾಶಿ ದಿಂವ್ಚ್ಯಾ ಸುವಾತೆ ತೆವ್ಶಿಂ ಆಪವ್ನ್ ಹಾಡ್ಲೆಂ.
ದೊಗಾಂಯ್ಚಾ ನಿಮಾಣ್ಯಾ ಆಶೆ ಪರ್ಮಾಣೆಂ ದೊಗಾಂಯ್ನಿ ಎಕಾಮೆಕಾ ನಿಮಾಣೆಂ ಆರಾವ್ನ್ ಧರ್ಲೆಂ.
ತ್ಯಾ ಉಪ್ರಾಂತ್!
ಪಯ್ಲೆಂ ರಾಶಿದಾಕ್ ಫಾಶಿಯೆಕ್ ಚಡಯ್ಲೊ.
ಉಪ್ರಾಂತ್ ಇಕ್ಬಾಲಾಕ್ ಚಡಯ್ಲೊ.
ತಿಸ್ರಿ ವ್ಯಕ್ತಿ ಜಾವ್ನ್ ಆಲಿಯಾಚಿ ಸರ್ತಿ!
ಆಲಿಯಾಚೆಂ ಮುಖಮಳ್ ಸಂಪೂರ್ಣ್ ಶಾಂತ್ ಆಸ್ಲ್ಲೆಂ!
ತಾಚ್ಯಾ ಮತಿಂತ್ ಕಾಂಯ್ಚ್ ಗೊಂದೊಳ್ ನಾತ್ಲ್ಲೊ.
ತಾಚ್ಯಾ ದೊಳ್ಯಾಂನಿ ಕಸಲಿಯ್ ಆಶಾ ವಾ ಕಸಲೆಂಯ್ ಸವಾಲ್ ನಾತ್ಲ್ಲೆಂ.
ಫಾಶಿಯೆಚ್ಯಾ ಖಾಂಬ್ಯಾಕ್ ಚಡ್ಚ್ಯಾ ಪಯ್ಲೆಂ ನಿಮಾಣೆಂ ಜಾವ್ನ್ ಆಲಿಯಾಕ್ ಮೊಳಾಬಾಕ್ ಪಳಂವ್ಚಿ ಆಶಾ ಜಾಲಿ. ಪುಣ್ ತಾಣೆಂ ಆಪ್ಲಿ ತಕ್ಲಿ ಉಕೊಲ್ಲಿ ನಾ.
ಕಿತ್ಯಾಕ್, ತೆಂ ಜಾಣಾಂ ಆಸ್ಲ್ಲೆಂ.....!
ಹ್ಯಾ ಮೊಳಾಬಾರ್ಯ್ ಹ್ಯಾ ವಗ್ತಾರ್ ಏಕ್ ನೆಕೆತ್ರ್ ತುಟೊನ್ ವೆತಾ!
ತಾಚ್ಯಾ ದೊಳ್ಯಾಂನಿ ತಿಂ ತಾಣೆಂ ಹಾಚ್ಯಾ ಆದಿಂ ಪಳಯಿಲ್ಲಿಂ ತ್ಯಾ ಮೊಳಾಬಾ ವಯ್ರ್ ಥಾವ್ನ್ ತುಟೊನ್ ಗೆಲ್ಲಿ ತಾರಾಂ ಉದೆವ್ನ್ ಆಯ್ಲಿಂ.
ಆಲಿಯಾನ್ ತಶೆಚ್ ಆಪ್ಲೆ ದೊಳೆ ದಾಂಪ್ಲೆ. ಆಪ್ಲ್ಯಾ ಅತ್ಮ್ಯಾಕ್ ತಾಣೆಂ ಧಯ್ರ್ ದಿಲೆಂ.
ತ್ಯಾ ಉಪ್ರಾಂತ್ ಕಾಳೊಕ್ಚ್ ಕಾಳೊಕ್!
ತ್ಯಾ ಕಾಳೊಕಾಂತ್ಯ್ ಆಲಿಯಾಕ್ ಏಕ್ ರೂಪ್ ದಿಸೊನ್ ಆಯ್ಲೆಂ.
ತೆಂಚ್ ರೂಪ್!
ರಸ್ತ್ಯಾ ವಯ್ಲ್ಯಾ ಸಿಗ್ನಲಾರ್ ರಾವೊನ್ ಭಿಕ್ ಮಾಗ್ಚ್ಯಾ ಲ್ಹಾನ್ ನೆಣ್ತ್ಯಾ ಚೆಡ್ವಾಚೆಂ!
ತಾಣೆಂ ತ್ಯಾ ಚೆಡ್ವಾಕ್ ವೆಂಗುಂಕ್ ಚಿಂತ್ಲೆಂ! ತಾಚಿಂ ದುಖಾಂ ಪೊಶೆಂವ್ಕ್ ತೆಂ ಆಶೆಲೆಂ! ತಾಕಾ ಧಯ್ರ್ ದೀಂವ್ಕ್ ತೆಂ ಆಂವ್ಡೆಲೆಂ!
ತಿತ್ಲ್ಯಾರ್!
ವೇಳ್ ಉತ್ರಾಲ್ಲೊ.
ತೆಂ ರೂಪ್ ಆಲಿಯಾಚಾ ದೊಳ್ಯಾಂ ಥಾವ್ನ್ ಉಭೊನ್ ತ್ಯಾ ಮೊಳಾಬಾರ್ ಸ್ವತಂತ್ರ್ ಜಾವ್ನ್ ಉಭ್ಲೆಂ!
ಉಭ್ಲೆಂ!
ಆನಿ ಉಭೊನ್ ಗೆಲೆಂ!
****************
[ಫುಡೆಂ ಕಿತೆಂ ಜಾತಾ ಮ್ಹಳ್ಳೆಂ ವಾಚುಂಕ್ ರಾಕೊನ್ ರಾವಾ....]
ಕಾದಂಬರಿಕಾರಾಚಿಂ ಉತ್ರಾಂ: 1, 2, 3, 4, 5, 6, 7, 8, 9, 10, 11, 12, 13, 14, 15, 16, 17, 18, 19, 20, 21, 22
About us | Feedback
| Contact us
Copyright © 2005
DAAIZ.COM All rights reserved.
Page concept, designed and maintained by Ashawadi
Publications
