ಕೊಂಕ್ಣೆಚಾ ವಿಂಚ್ಣಾರ್ ಸಾಹಿತ್ಯಾಚೊ ಕೊನ್ಸೊ - ’ದಾಯ್ಜ್’ - ಫಕತ್ತ್ ಕೊಂಕಣಿ ಥಾವ್ನ್ ಕೊಂಕಣಿ ಪರ್ಯಾಂತ್, ಕೊಂಕಣಿ ಖಾತಿರ್.
ಮೆಲ್ವಿನ್ ಜೆರಾಲ್ಡ್ ವಾಸ್: ಕೆಲರಾಯ್ ಫಿರ್ಗಜೆಜೊ, ಪಾಟ್ಲ್ಯಾ ಭಾರಾ ವರ್ಸಾಂ ಥಾವ್ನ್ ಕುವೆಯ್ಟಾಂತ್ ವಾವ್ರ್ ಕರುನ್ ಆಸಾ. ಚಡುಣೆಂ ಪಂದ್ರಾ-ಸೊಳಾ ವರ್ಸಾಧಿಂ ಸಾಹಿತ್ಯಾಚಿ ಸುರ್ವಾತ್ ಕರುನ್, 35 ಮಟ್ವ್ಯೊ ಕಾಣ್ಯೊ ಆನಿ ಏಕ್ ಕಾದಂಬರಿ ಬರಯಿಲ್ಲಿ ತರ್ಯೀ ಸಭಾರ್ ವರ್ಸಾಂನಿ ತಿ ಜಿವಾಳ್ ದವ್ರುಂಕ್ ಸಕಾನಾಸ್ತಾಂ ರಾವ್ಲೊ ತರ್ಯ್ ಕೊಂಕ್ಣಿ ಸಾಹಿತ್ಯಾಚೆರ್ ತೊಚ್ಚ್ ಮೋಗ್ ಆನಿ ಹುಸ್ಕೊ ಅಸೊನ್, ಆಯ್ಲೆವಾರ್ ಸರಾಗ್ ರಿತಿನ್ ವೆವೆಗ್ಳ್ಯಾ ಪ್ರಕಾರಾಚಿ ಸಾಹಿತಿಕ್ ಕೃಷಿ ಕರುನ್ ಕೊಂಕ್ಣಿ ವರ್ತುಲಾಂತ್ ನಾಂವಾಡ್ದಿಕ್ ಜಾಲಾ. ಕಾಣ್ಯಾಂಶಿವಾಯ್ 4 ನಾಟ್ಕುಳೆ, 75 ಕವಿತಾ, 10 ಲೇಖನಾಂ, 20 ವಿಮರ್ಶೆ/ಸಮೀಕ್ಶಾ ಬರಯ್ಲ್ಯಾತ್. ಹಾಚೊ ಸ್ವತಾಚೊ ( ಫುಡ್ಲದ್) ಕವಿತಾಜಮೊ ’ಆಟ್ವ್ಯಾ ರಂಗಾಚೊ ಧೊಣು’ ವೆಗಿಂಚ್ ’ಆಶಾವಾದಿ ಪ್ರಕಾಶನ್’ ಪರ್ಗಟ್ಚಾರ್ ಆಸಾ. ಹಾಚ್ಯಾಧಿಂ ಹಾಚಿಂ ಕವಿತಾಂ/ಲೇಕನಾಂ ’ಮೊತಿಯಾಂ ಆನಿ ತಾರಾಂ’, ’ಸಾಗೊರಾಚ್ಯಾ ವಾಟೆಚ್ಯೊ ಝರಿ’, ’ಕವಿತಾಪಾಠ್’ ಆನಿ ’ದರ್ಯಾಕ್ ಉದಾಕ್’ ಬುಕಾಂನಿ ಪರ್ಗಟ್ಲ್ಯಾಂತ್. ಪಾಟ್ಲ್ಯಾ ದೋನ್ ವರ್ಸಾಂ ಥಾವ್ನ್ ದಾಯ್ಜ್.ಕೊಮ್ ಸಾಯ್ಟಿಚೊ ಸಹ-ಸಂಪಾದಕ್ಯೀ ಹೊ ಜಾವ್ನಾಸಾ.
ಭ್ರಮಿದೆಂತ್ಲ್ಯೊ ಸಾವ್ಳ್ಯೊ: ಏಕ್ ಸಾಮಾಜಿಕ್ ಕಾದಂಬರಿ, ಪ್ರಮುಖ್ ಜಾವ್ನ್ ತೆಗಾಂಚ್ಯಾ ತೀನ್ ರಿತಿಚಾ ಸಂಭಂಧಾಂಚೆ ಎಕಾಮೆಕಾಚೆ ಗಾಂಚ್ ಮ್ಹಣ್ಯೆತಾ. ವಾಚ್ಪ್ಯಾಂಕ್ ಸಿಂತಿಮೆಂತಾಂ, ಚಿಂತಾಪ್, ಭಗ್ಣಾಂ, ಉಮಾಳೆ ಜಾಗಂವ್ಕ್ ಜರೂರ್ ಸಕ್ತೆಲಿ ಮ್ಹಳ್ಳೊ ಮ್ಹಜೊ ಭರ್ವಸೊ.
ಪುಸ್ತಕ್ ತೀನ್
ತುಜ್ಯಾ ವಿಂಚವ್ಣೆಚಿ ಝಡ್ತಿ
ಆವಸ್ವರ್ ಭಾವೀಸ್
ಮುಂಬಯಿ ಹೈ ಕೋರ್ಟ್!
ಆಯ್ಚಾ ದಿಸಾಚಾ ಕಾಮಾಸಾಳಾಂಕ್ ಕಾರ್ಯಗತ್ ಕರ್ಚ್ಯಾ ಪಾಸೊನ್ ಉಗ್ತೆಂ ಜಾಲ್ಲೆಂ ಮಹಾರಾಷ್ಟ್ರ ಸರ್ಕಾರಾಚಾ ಮಂತ್ರಾಲಯಾಚೆಂ ಕಟ್ಟೋಣ್ ಆಜ್ ಚಡ್ಚ್ ಕಾರ್ಯಗತ್ ಜಾವ್ನ್ ಆಸಾ ತಶೆಂ ದಿಸ್ತಾಲೆಂ. ಆಜ್, ಹ್ಯಾ ಕಟ್ಟೋಣಾ ಭಿತರ್ ವಕೀಲಾಂಚಿ ತಶೆಂ ಲೊಕಾಚಿ ಖೆಟ್ಚ್ ಖೆಟ್! ಭಾಯ್ಲೆಂ ಕೋರ್ಟಾಚೆಂ ಪಾರ್ಕಿಂಗ್ ಎದೊಳ್ಚ್ ವಾಹನಾಂನಿ ಭರ್ಲ್ಲೆಂ. ತ್ಯಾ ಭರೆಲ್ಯಾ ಪಾರ್ಕಿಂಗಾಂತ್ ತಿಂ ಸದಾಂಚಿಂ ವಾಹನಾ ನ್ಹಯ್ ಆಸ್ತಾಂ ಆಜ್ ನವ್ಯಾ ವಾಹನಾಂನಿ ಜಾಗೊ ಆಪ್ಣಾಯಿಲ್ಲೊ.
ಮುಂಬಯಿ ಹೈ ಕೋರ್ಟಾಂತ್ ಆಜ್ ಚಲೊಂಕ್ ಆಸ್ಚಿ ಕೇಸ್ ಬಾಲಿವುಡಾಕ್ ಆನಿ ಮುಂಬಯಿ ಅಂಡರ್ ವರ್ಲ್ಡಾಕ್ ಸಂಭಂಧ್ ಜೊಡ್ತಾಲಿ ಜಾಲ್ಲ್ಯಾನ್ ಆಜ್ ಕೊರ್ಟಾಚಾ ಭೊಂವಾರಿ ಪೊಲಿಸಾಂಚೊ ಭದ್ರ್ ಪಾರೊ ಆಸ್ಲ್ಲೊ. ಕೊಣಾಯ್ಕ್ಯ್ ಕೊರ್ಟಾಚಾ ಭಿತರ್ ಪ್ರವೇಶ್ ನಾತ್ಲ್ಲೊ. ಮೀಡಿಯಾಚೊ ಲೋಕ್ ತಶೆಂ ಪ್ರೆಸ್ಸಾಚೊ ಲೋಕ್ ಆಪ್ಣಾಚಿ ಐಡೆಂಟಿಟಿ ಪ್ರಸ್ತುತ್ ಕರುನ್ ಕೊರ್ಟಾಚಾ ಆವರಣಾ ಭಿತರ್ ಪ್ರವೇಶ್ ಜಾಂವ್ಕ್ ಪ್ರಯತ್ನ್ ಕರ್ತಾಲೆ. ತರ್ಯ್ ತಾಂಕಾ ಕೊರ್ಟಾಚಾ ಭಿತರ್ ಪ್ರವೇಶ್ ನಾತ್ಲ್ಲೊ. ಕೊರ್ಟಾಚಾ ಚ್ಯಾರ್ಯ್ ಭೊಂವಾರಿ ಪೊಲಿಸಾಂಚೊ ಪಾರೊ ಭದ್ರ್ ಆಸ್ಲ್ಲೊ. ಕೊಣಾಯ್ಕ್ಯ್ ಕಸಲ್ಯಾಯ್ ವಗ್ತಾರ್ ಸಂದೇಹಾಸ್ಪದ್ ಜಾವ್ನ್ ವರ್ತನ್ ಕರ್ಚೊ ಸಂಭವ್ಚ್ ನಾತ್ಲ್ಲೊ. ಹರ್ಯೆಕಾ ಪೊಲಿಸಾಕ್ ತಾಂಚಾ ಡಿಪಾರ್ಟ್ಮೆಂಟಾ ಥಾವ್ನ್ ಸ್ಟ್ರಿಕ್ಟ್ ಆರ್ಡರ್ ಮೆಳ್ಲ್ಲೆ.
ಆಜ್ ಆಲಿಯಾ ಖಾನಾ ವಯ್ರ್ ಜಾಲ್ಲ್ಯಾ ಹಾಲ್ಲ್ಯಾಚಾ ಕೇಸಿಚಿ ಪಯ್ಲಿ ಆಯ್ಕೊವ್ಣ್!
ಎದೊಳ್ಚ್ ಮುಂಬಯಿಚಾ ಮೀಡಿಯಾನ್ ಆನಿ ಪ್ರೆಸ್ಸಾನ್ ಹ್ಯಾ ಆಲಿಯಾಚಾ ಹಲ್ಲ್ಯಾ ವಿಶಿಂ ತೂಫಾನ್ಚ್ ಉಟಯಿಲ್ಲೆಂ. ಆಯ್ಚ್ಯಾ ಸಾಕಾಳಿಂ ಹರ್ಯೆಕ್ಲ್ಯಾಚಾಘರ್ಚ್ಯಾ ದಾರಾರ್ ಸದಾಂಚಾ ಪರಿಂ ಠೊಕೆ ಮಾರ್ಲ್ಲ್ಯಾ ಹರ್ಯೆಕ್ ದಿಸಾಳ್ಯಾ ಪತ್ರಾಂನಿ ಆಲಿಯಾಚಾ ಹಲ್ಲ್ಯಾಚಾ ವಿಶಯಾಕ್ ಪರ್ತ್ಯಾಕ್ ಜಿವೊ ಕೆಲ್ಲೊ.
ಆಲಿಯಾ ಎಕಾನ್ ಏಕ್ ಬಾಲಿವುಡಾಚಾ ಪರ್ದ್ಯಾರ್ ಸೊಭೊಂಕ್ ಲಾಗ್ತಾನಾ, ದುಸ್ರ್ಯಾ ಕುಶಿನ್ ತೆಂ ಹ್ಯಾ ಬಾಲಿವುಡಾಕ್ ಪುಜಾ ಕರ್ಚ್ಯಾ ಸಗ್ಳ್ಯಾ ಲೊಕಾಚಾ ದೊಳ್ಯಾಂ ಮನಾಂತ್ ತಾಂಚಾ ಆಸಕ್ತೆಚೆಂ ನವೆಂ ರುಪ್ಣೆಂ ಜಾವ್ನ್ ಖಂಚ್ಲ್ಲೆಂ.
ಆಲಿಯಾ ಖಾನ್!
ಫಕತ್ತ್ ಮುಂಬಯಿಚ್ಯಾ ಮಾತ್ರ್ ನ್ಹಯ್ ಆಸ್ತಾಂ ಸಗ್ಳ್ಯಾ ದೇಶಾಚಾ ಲೊಕಾಚಾ ಜಿಬೆ ವಯ್ರ್ ಹೆಂ ನಾಂವ್ ಖೆಳೊಂಕ್ ಲಾಗ್ಲೆಂ.
ಫಿಲ್ಮಾಚೆಂ ಪ್ರೀಮಿಯರ್ಚ್ ವರ್ತ್ಯಾ ವೈಭವಾನ್ ಚಲ್ಲ್ಲೆಂ.
ತ್ಯಾ ಉಪ್ರಾಂತ್.....!
ಸ್ಪರ್ಧ್ಯಾನ್ ಮ್ಹಳ್ಳ್ಯಾ ಪರಿಂ ಎಕಾ ವಯ್ರ್ ಎಕಾ ನಿವ್ಸ್ ಚ್ಯಾನೆಲಾರ್ ಮಟ್ವ್ಯಾನ್ ಆಲಿಯಾನ್ ಅಭಿನಯ್ ಕೆಲ್ಲ್ಯಾ ಫಿಲ್ಮಾಚ್ಯಾ ಪ್ರೀಮಿಯರಾಚಿ ಝಳಕ್ ಪ್ರಸಾರ್ ಜಾಲ್ಲಿ.
"ಆಲಿಯಾ ಖಾನ್! ಹೆಂ ತುಜೆಂ ಬಾಲಿವುಡಾಂತ್ ಡಿಬಟ್ ಫಿಲ್ಮ್. ಲೊಕಾಂನಿ ತುಕಾ ಮಸ್ತ್ ಸ್ವಾಗತ್ ದಿಲಾ. ಹ್ಯಾ ವಿಶಿಂ ತುಂ ಕಿತೆಂ ಮ್ಹಣ್ತಾಯ್?" ಪ್ರೀಮಿಯರಾಕ್ ಹಾಜರ್ ಜಾಲ್ಲ್ಯಾ ಎನ್. ಡಿ. ಟಿ.ವಿ.ಚ್ಯಾ ಸಂವಾದ್ಕಾರಿಣಿನ್ ಉಡಯಿಲ್ಲ್ಯಾ ಸವಾಲಾಕ್, ಆಪ್ಲ್ಯಾ ಘರಾಂನಿ ಹ್ಯಾ ಟಿ.ವಿ.ಚೊ ನಿವ್ಸ್ ದವರುನ್ ಆಯ್ಕೊಂವ್ಚ್ಯಾ ಲೊಕಾಂಚೆ ಕಾನ್ ನೀಟ್ ಜಾಲೆ. ಹ್ಯಾಚ್ ಟಿ.ವಿ.ಚ್ಯಾ ಪರ್ದ್ಯಾರ್ ಥೊಡ್ಯಾಚ್ ದಿಸಾಂ ಥಾವ್ನ್ ತಾಣಿಂ ಆಲಿಯಾಚಾ ವಯ್ರ್ ಜಾಲ್ಲ್ಯಾ ಹಲ್ಲ್ಯಾಚಿ ಖಬಾರ್ ಆನಿ ತ್ಯಾ ದಿಸಾಂದೀಸ್ ತ್ಯಾ ಖಬ್ರೆಂತ್ ಜಾವ್ನ್ ಆಯಿಲ್ಲಿ ಬದ್ಲಾವಣ್ ಆಯ್ಕಾಲ್ಯಾ.
"ಹಾಂ! ಬಾಲಿವುಡಾಂತ್ ಹೆಂ ಮ್ಹಜೆಂ ಪಯ್ಲೆಂ ಫಿಲ್ಮ್!" ಕ್ಯಾಮರಾಮ್ಯಾನಾನ್ ಆಪ್ಲ್ಯಾ ಕ್ಯಾಮರಾಕ್ ಆಲಿಯಾ ವಯ್ರ್ ಫೋಕಸ್ ಕೆಲೊ. ಆಪ್ಲ್ಯಾ ಘರಾಂತ್ ಆಪ್ಣಾಚೆಂ ಚಲಾನಾತ್ಲ್ಲಿಂ ಬಾಯ್ಲಾಂ, ಆಪ್ಣಾಕ್ ದುಸ್ರೊ ನಿರ್ವೊಗ್ ನಾಸ್ತಾಂ, ಆಪ್ಲ್ಯಾ ಘೊವಾ ಮುಕಾರ್ ಆಪ್ಲೆಂ ತೋಂಡ್ ಕಾಳೆಂ ಕರುನ್, ಟಿ.ವಿ.ಚ್ಯಾ ಮುಕಾರ್ ಬಸೊನ್ ನಿವ್ಸ್ ಪಳಂವ್ಚ್ಯಾ ತಾಂಚಾ ತೊಂಡಾ ವಯ್ಲಿ ಕಾಳ್ಬಾಣ್ ಹ್ಯಾ ಆಲಿಯಾಚಾ ಖಬ್ರೆ ಥಾವ್ನ್ ಉಭೊನ್ ಧಾಂವ್ಲಿ.
ಆಲಿಯಾಚಾ ಭಾಯ್ಲ್ಯಾ ಸೊಭಾಯೆಕ್ ಪಳಂವ್ಚ್ಯಾ ತಾಂಚಾ ಆತುರಾಯೆ ಸವೆಂ ತೆಂ ಕಿತೆಂ ಉಲಯ್ತಾ ಮ್ಹಳ್ಳೆಂ ತೆಂ ಜಿಕುನ್ ಧರುನ್ ಉಪ್ರಾಂತ್ಲ್ಯಾ ತಾಂಚ್ಯಾ ಖಬ್ರಾಳ್ಯಾ ಜಿವಿತಾಂತ್ ತ್ಯಾ ಖಬ್ರೆಕ್ ಪ್ರಸಾರ್ ಕರ್ಚ್ಯಾ ಉದ್ದೇಶಾನ್ ಆಲಿಯಾಕ್ ಹ್ಯಾ ವಗ್ತಾರ್ ಚೀತ್ ದೀವ್ನ್ ಆಯ್ಕೊಂವ್ಚೊ ತಾಂಚೊ ಉದ್ವೇಗ್! ಹಾಂಚಾ ಘೊವಾಂಕ್ ಆಲಿಯಾಚಾ ಭಿತರ್ಲ್ಯಾ ಸೊಭಾಯೆಕ್ ಎಕ್ಸ್-ರೇ ಕರುನ್ ಪಳಂವ್ಚೊ ಆನಿ ಆಪ್ಲ್ಯಾ ಬಾಯ್ಲಾಂಚಾ ಸೊಭಾಯೆ ಸವೆಂ ತುಲನ್ ಕರುನ್ ಪಳಂವ್ಚಿ ಪಿಶಿ ಬೂದ್ ಜಾಲ್ಯಾರ್ ರೆಸ್ಟೋರಂಟಾಚಾ ಮೆಜಾ ಮುಕಾರ್ ಬಸೊನ್ ಚ್ಹಾಯೆಚೆಂ ಕಪ್ಪ್ ತೊಂಡಾಕ್ ತೆಂಕ್ಚ್ಯಾ ದಾದ್ಲ್ಯಾಂಕ್ ತ್ಯಾ ಸೊಭಾಯೆಕ್ ಆಶೆಂ ಹ್ಯಾ ಚ್ಹಾಯೆಂತ್ ಸಾಕರ್ ಕಿರವ್ನ್ ಪಿಯೆಲ್ಲ್ಯಾ ಪರಿಂ ಪಿಯೆಂವ್ಚೆಂ ಸಪಾಣ್! ತರ್ನಾಟೆಂ ಚಲಿ ಆಲಿಯಾಚಾ ಸ್ವಭಾವಾಕ್, ತಾಚ್ಯಾ ಆಟ್ನೆಟಾಂಕ್, ತಾಚ್ಯಾ ಉಲವ್ಣ್ಯಾಕ್, ತಾಚ್ಯಾ ನ್ಹೆಸ್ಣಾಕ್, ಆಪ್ಲ್ಯಾ ಜಿವಿತಾಂತ್ ದೆವಂವ್ಚ್ಯಾ ವಿಶಿಂ ಚಿಂತಾ ಜಾಲ್ಯಾರ್, ತರ್ನಾಟೊ ಚಲೊ ಆಪ್ಲ್ಯಾ ಮತಿಂತ್ಲ್ಯಾ ಸಭಾರ್ ರಂಗ್ ರಂಗೀನ್ ಸಪ್ಣಾಂ ಮಧೆಂ ಹ್ಯಾ ಸಪ್ಣಾಕ್ಯ್ ಜಾಗೊ ಸೊಧುಂಕ್ ಆನಿ ಹ್ಯಾ ಜಾಗ್ಯಾಂತ್ ತಾಕಾ ನೆಟಂವ್ಕ್ ಆಂವ್ಡೆತಾಲೊ.
ಟಿ.ವಿ. ಪಳವ್ನ್ ಮಜಾ ಮಾರ್ಚ್ಯಾ ಲೊಕಾಂಚೊ ಹೊ ಹಾಲ್ ಜಾಲ್ಯಾರ್ ದುಸ್ರ್ಯಾ ಕುಶಿನ್ ರಸ್ತ್ಯಾರ್ ಭೊಂವೊನ್ ಭಿಕ್ ಮಾಗ್ಚೊ ಭಿಕಾರಿ ರಾತಿಕ್ ಫುಟ್ಪಾತಿರ್ ನಿದೊಂಕ್ ವೆತಾನಾ, ತ್ಯಾ ರಸ್ತ್ಯಾ ದೆಗೆಚ್ಯಾ ವೀಜ್ ದಿವ್ಯಾಂಚಾ ಉಜ್ವಾಡಾಂತ್ಯ್ ಮುಕ್ಲ್ಯಾ ರಸ್ತ್ಯಾ ದೆಗೆಚ್ಯಾ ವ್ಹಡ್ಲ್ಯಾ ದೊರ್ಯಾ ವಯ್ರ್ ಜಯ್ತ್ ಉಭಾರ್ಲ್ಲ್ಯಾ ಆಲಿಯಾಚಾ ಫಿಲ್ಮಾಚಾ ಪೋಸ್ಟರಾಕ್ ಪಳವ್ನ್, ಆಪ್ಲ್ಯಾ ಸಪ್ಣಾಂ ಸಂಸಾರಾಂತ್ ತ್ಯಾ ಪೋಸ್ಟರಾ ವಯ್ಲ್ಯಾ ಸೊಭಾಯೆಚಾ ಬಾವ್ಲೆಚಾ ಸೊಭಾಯೆ ಸಾಂಗಾತಾ ಹಾಲೊನ್ ಧಲೊನ್ ತ್ಯಾಚ್ ರಸ್ತ್ಯಾರ್ ಆಪ್ಲ್ಯಾ ಮತಿ ಭಿತರ್ಲ್ಯಾ ಸುಖಾಚಾ ಸಂಸಾರಾಂತ್ ಲೊಳೊನ್ ಲೊಳೊನ್ ನಿಮಾಣೆಂ ನಿದೆಕ್ ವೆಂಗ್ತಾಲೊ.
ಆಲಿಯಾ ಥೊಡ್ಯಾಚ್ ದಿಸಾಂ ಭಿತರ್ ಸಗ್ಳ್ಯಾ ದೇಶಾಚಾ ಲೊಕಾಚಿ ಆಸ್ತ್ ಜಾವ್ನ್ ಗೆಲ್ಲೆಂ.
"ಲೊಕಾನಿ ಮ್ಹಕಾ ಕಿತ್ಲೊ ಸ್ವಾಗತ್ ದಿಲಾ ತೆಂ ಹಾಂವ್ ನೆಣಾಂ. ಪುಣ್, ಹ್ಯಾ ಮ್ಹಜ್ಯಾ ಫಿಲ್ಮಾಕ್ ಪಳಯ್ಲ್ಯಾ ಉಪ್ರಾಂತ್ ಖಂಡಿತ್ ತಾಂಚ್ಯಾ ಕಾಳ್ಜಾ ಮನಾಂತ್ ಮ್ಹಾಕಾ ಜಾಗೊ ಮೆಳ್ತಲೊ ಮ್ಹಳ್ಳೊ ಭರ್ವಸೊ ಆಸಾ!" ಆಲಿಯಾ ಉಲಯ್ತಾಲೆಂ
ಟಿ.ವಿ ಚೊ ನಿವ್ಸ್ ಪಳಂವ್ಚ್ಯಾ ಹರ್ಯೆಕ್ಲ್ಯಾಚಾ ಕಾನಾಂಕ್ ಆಲಿಯಾಚಿಂ ಉತ್ರಾಂ ಪಡ್ತಾಲಿಂ. ಥೊಡ್ಯಾಂನಿ ಎದೊಳ್ಚ್ ಆಲಿಯಾನ್ ಸಾಂಗ್ಚ್ಯಾ ಪಯ್ಲೆಂಚ್ ತಾಂಚಿಂ ಕಾಳ್ಜಾಂ ಮನಾಂ ಉಗ್ತಿಂ ದವರ್ಲ್ಲಿಂ ಜಾಲ್ಯಾರ್ ಥೊಡ್ಯಾಂನಿ ಹ್ಯಾ ವಗ್ತಾರ್ ಭಲಾತ್ಕಾರೆನ್ ತ್ಯಾ ತಾಂಚಾ ಕಾಳ್ಜಾ ಮನಾಂತ್ ಪಯ್ಲೆಂ ಆಸ್ಲ್ಲ್ಯಾಕ್ ಭಾಯ್ರ್ ಲೊಟುನ್ ಆಲಿಯಾಕ್ ಜಾಗೊ ದಿಲ್ಲೊ. ಆನಿ ಥೊಡ್ಯಾಂನಿ ಆಪ್ಲ್ಯಾ ಕಾಳ್ಜಾ ಮನಾಂತ್ ಆಸ್ಲ್ಲ್ಯಾಂಕ್ ಭಲಾತ್ಕಾರೆನ್ ಭಾಯ್ರ್ ಲೊಟುಂಕ್ ಸಕಾನಾತ್ಲ್ಲ್ಯಾಂನಿ, ಅಸಹಾಯಕ್ ಜಾವ್ನ್, ಗುಪಿತ್ ಭಿತರ್ಲ್ಯಾ ಭಿತರ್ಚ್ ತ್ಯಾ ಕಾಳ್ಜಾಂ ಮನಾಂತ್ ಆಸ್ಲ್ಲ್ಯಾಂಚಿ ಖುನ್ ಕರುಂಕ್ಯ್ ಚಿಂತುನ್ ಜಾಲ್ಲೆಂ!
"ಹ್ಯಾ ಫಿಲ್ಮಾಂತ್ ಚಲಿಯೆಕ್ ಚಡ್ ಮಹತ್ವ್ ದಿಲಾ! ಆಯ್ಚಾ ಸಮಾಜೆಂತ್ಲಿ ಚಲಿ ತ್ಯಾ ಕಂಪ್ಯೂಟರಾಚಾ ಮುಕಾರ್ ಬಸೊಂಕ್ ಸಕ್ಲ್ಯಾ ಜಾಲ್ಯಾರ್ಯ್ ತ್ಯಾಚ್ ಸಮಾಜೆಂತ್ ಅಜೂನ್ ಆಮ್ಚ್ಯಾ ದೇಶಾಂತ್ ತಿಚ್ಯಾ ಪಾಂಯಾಂಕ್ ಗುಂಗುರು ಬಾಂದ್ಚೆ ಹಾತ್ ಆಸಾತ್! ಹ್ಯಾ ಹಾತಾಂ ವಿರೋಧ್ ಆವಾಜ್ ಉಟಂವ್ಚ್ಯಾ ಎಕಾ ಧಯ್ರಾಧೀಕ್ ಚಲಿಯೆಚಿ ಕಾಣಿಚ್ ಹೆಂ ’ಪ್ರತಿಭಟನ್’" ಆಲಿಯಾ ಆಪ್ಲ್ಯಾ ಫಿಲ್ಮಚಾ ಕಾಣಿಯೆ ವಿಶ್ಯಾಂತ್ ಉಲ್ಲೇಖ್ ಕರ್ತಾಲೆಂ.
"ಟಿ.ವಿ. ಚ್ಯಾ ಪರ್ದ್ಯಾ ಮುಕಾರ್ ಬಸೊನ್ ರಾಂದ್ವೊಯ್ ತಾಸಾಂವ್ಚ್ಯಾ ಬಾಯ್ಲೆಕ್ ಆಲಿಯಾಚಾ ಉತ್ರಾಂನಿ ಘಮಂಡ್ ಆಯ್ಲೊ. ಆಲಿಯಾನ್ ಉಚಾರ್ಲ್ಲ್ಯಾ ಪರ್ಮಾಣೆಂ ಬಾಯ್ಲಾಂಚಾ ಪಾಂಯಾಂಕ್ ಗುಂಗುರು ಬಾಂದ್ಚ್ಯಾ ಹಾತಾಂಕ್ ಆಪ್ಲ್ಯಾ ಕಾಳ್ಜಾ ಮನಾಂತ್ಚ್ ಮುಣ್ಕುಟ್ಯಾರ್ ದವರುನ್ ಆಪ್ಣೆ ಕಾತ್ರುನ್ ಉಡಂವ್ಚ್ಯಾ ಪರಿಂ ತಿಕಾ ಭೊಗ್ಲೆಂ. ಜಶೆಂ ತಿಣೆಂ ಹ್ಯಾ ವಗ್ತಾರ್ ಬೆಂಡಾಂ ಸುಟಿ ಕರ್ತಾನಾ ತ್ಯಾ ಬೆಂಡಾಂಚಾ ಕೀಡ್ ಧರ್ಲೆಲ್ಯಾ ಭಾಗಾಕ್ ಕಾತ್ರುನ್ ತಿ ಭಾಯ್ರ್ ಮಾರ್ತಾ ತಶಿ! ಸಪ್ಣಾಂತ್ ತ್ಯಾ ಗುಂಗುರ್ಂಕ್ ಬಾಂದ್ಚ್ಯಾ ಹಾತಾಂಕ್ ಕಾತ್ರುನ್ ಭಾಯ್ರ್ ಮಾರ್ಲೆ ಜಾಲ್ಯಾರ್ ಹಾಂಗಾಸರ್ ಆಲಿಯಾಚಾ ಉತ್ರಾಂನಿ ಭುಲೊನ್ ಸಂಸಾರ್ ವಿಸ್ರಾಲ್ಲ್ಯಾ ತಿಣೆಂ ತಿಚ್ಯಾ ಹಾಂತಾಂತ್ಲ್ಯಾ ಕಿಡೆರ್ಯಾ ಬೆಂಡಾಕ್ ತಶೆಂಚ್ ಕಾತ್ರುನ್ ರಾಂದ್ಚ್ಯಾ ತೊಪ್ಲ್ಯಾಂತ್ ಉಡಯ್ಲೆಂ.
"ಆಯ್ಚಾ ಪ್ರಸ್ತುತ್ ಸಮಾಜೆಕ್ ಸರಿ ಜಾಲ್ಲಿ ಕಾಣಿ! ಹಾಂಗಾ ಏಕ್ ಚಲಿ ಆಪ್ಲೆಂ ಜಿವಿತ್ ಸಾರ್ಚ್ಯಾ ಖಾತಿರ್ ಕಿತೆಂ ಕಿತೆಂ ಕರಿನಾ? ಹ್ಯಾ ಸಗ್ಳ್ಯಾ ಸಂಕಶ್ಟಾಂ ವಿರುದ್ಧ್ ಚಲಿಯೆನ್ ಝುಜ್ಚೆಂ ಝುಜ್!" ಮುಖಾರುನ್ ಉಲಂವ್ಚೆಂ ಆಲಿಯಾ ಆಪ್ಲ್ಯಾ ಜಿವಿತಾಂತ್ ಘಡ್ಲ್ಲ್ಯಾ ಘಡಿತಾಂ ವರ್ವಿಂ ಥೊಡೆಂ ಭಾವುಕಿ ಜಾವ್ನ್ ಉಲಯ್ತಾನಾ, ಆತಾಂಚ್ ಡ್ಯಾನ್ಸ್ ಬಾರಾ ಥಾವ್ನ್ ಆಪ್ಲೆಂ ಡ್ಯಾನ್ಸ್ ಸಂಪವ್ನ್ ಘರಾ ಆಯಿಲ್ಲೆಂ ತರ್ನಾಟೆಂ ಚಲಿ, ಆಪ್ಣೆಂಯ್ ತ್ಯಾ ಡ್ಯಾನ್ಸ್ ಬಾರಾಚಾ ದಳಿದ್ರ್ ಮನ್ಶ್ಯಾಂ ಮುಕಾರ್ ಝುಜೊಂಕ್ ಆಯ್ತೆಂ ಜಾಂವ್ಚೆಂ ಧಯ್ರ್ ಆರಾಯ್ತಾಲೆಂ. ತರೀ ಆಪ್ಣಾಚೊ ಬಾಪಯ್ ದೀಸ್ಭರ್ ಆಪ್ಣೆಂ ಜೊಡ್ಲೆಲೆಂ ಕಿತೆಂ ಕರ್ತಾ? ಆಪ್ಣಾಚೆ ಬಚ್ಚಾಲಿ ಭಾವ್ ಆಪ್ಲ್ಯಾ ಆವಯ್ನ್ ಜೊಡ್ಲ್ಲೆಂ ಖಂಯ್ ವರುನ್ ನಾಗಯ್ತಾತ್ ಮ್ಹಳ್ಳ್ಯಾ ವಿಶಿಂ ಚಿಂತುಂಕ್ ತಾಚ್ಯಾ ಮತಿಕ್ ಸಾದ್ಯ್ ಜಾಲೆಂ ನಾ. ಪುಣ್ ಆಪ್ಣಾಚೊ ಧಂದೊ ಕರ್ತೆಲ್ಯಾಂ ವಿರೋಧ್ ಮಾತ್ರ್ ತೆಂ ಎಕಾ ಖಿಣಾಕ್ ಉದ್ರೇಕಿತ್ ಜಾಲೆಂ.
"ಜಿವಿತಾಂತ್ ಪಯ್ಲೆ ಪಾವ್ಟಿಂ ತುಂ ಕ್ಯಾಮರಾ ಮುಕಾರ್ ರಾವ್ತಾನಾ ತುಕಾ ಜಾಲ್ಲ್ಯಾ ಆನ್ಭೋಗಾ ವಿಶಿಂ ಆಮ್ಚ್ಯಾ ದರ್ಶಕಾಂಕ್ ಸಾಂಗ್ಯೆತ್ ಮಿಸ್ ಆಲಿಯಾ ಖಾನ್....?" ’ಆಜ್ ತಕ್’ ಟಿ.ವಿ. ಚ್ಯಾ ನಿವ್ಸಾರ್ ದುಸ್ರೆಂ ಸಂವಾದ್ಕಾರಿಣ್ ಆಲಿಯಾ ಸಂಗಿಂ ಮಟ್ವ್ಯಾ ಸಂದರ್ಶನಾಕ್ ಘೆವ್ನ್ ಆಯ್ಲೆಂ.
"ಕ್ಯಾಮರಾಕ್ ಎಕಾ ಕ್ಯಾಮರಾಚಾ ನದ್ರೆನ್ ಹಾವೆಂ ಪಳಂವ್ಕ್ ನಾ. ಕ್ಯಾಮರಾಕ್ ಹಿ ಆಮ್ಚಿ ಸಮಾಜ್ ಮ್ಹಳ್ಳ್ಯಾ ನದ್ರೆನ್ ಹಾವೆಂ ಪಳೆಲಾಂ!" ಆಯ್ಚಾ ಸಮಾಜೆನ್ ಆಪ್ಲೊ ಭರ್ವಸೊ ದವರುನ್ ಆಪ್ಲ್ಯಾ ವಿಶ್ವಾಸಾಚೊ ಮತ್ ಚಲವ್ನ್ ಪಾರ್ಲಿಮೆಂಟಾಕ್ ದಾಡ್ಲ್ಲೊ ಗೋವರ್ದನ್ ಕೇಳೇಕಾರ್, ಆಪ್ಲ್ಯಾ ಘರಾಂತ್ ಸೊಭ್ಚ್ಯಾ ಚಿತ್ಳಾಚಾ ಚಾಮ್ಡ್ಯಾಚಾ ಸೊಫಾಚೆರ್ ಬಸೊನ್ ಆಲಿಯಾಚಿಂ ಉತ್ರಾಂ ಆಯ್ಕಾತಾಲೊ. ಆಲಿಯಾಚಿಂ ಉತ್ರಾಂ ಆಯ್ಕಾತಾಂ ಆಯ್ಕಾತಾಂ ಯೆಂವ್ಚ್ಯಾ ಮಹಿನ್ಯಾಂತ್ ಯೆವ್ಜಿಲ್ಲ್ಯಾ ಆಪ್ಲ್ಯಾ ಪುತಾಚಾ ಕಾಜಾರಾಕ್ ಆಕರ್ಶಣಾಚಿ ವಸ್ತ್ ಜಾವ್ನ್ ಮೀಡಿಯಾಚಾ ಮುಕಾರ್ ಪ್ರಸ್ತುತ್ ಕರುಂಕ್ ಹೆಂ ಆಲಿಯಾ ಖಾನ್ ಕಶೆಂ ಮ್ಹಳ್ಳ್ಯಾ ವಿಶಿಂ ಚಿಂತ್ನಾಂ ಆಟಯ್ತಾಲೊ. ರಂಗ್ ರಂಗೀನ್ ಬಾಲಿವುಡಾಚಾ ಸಂಸಾರಾಕ್ ಆನಿ ನಿತಳ್ ರಾಜ್ಕಾರಣಾಕ್ ಸಂಭಂಧ್ ಜೊಡುಂಕ್ ಚಿಂತಾಲೊ. ಪಾರ್ಲಿಮೆಂಟಾಂತ್ ಬೊಬೊ ಮಾರ್ತಾನಾಂ ಪಾಸೊನ್, ಏಕ್ ಥೆಂಬೊ ಘಾಮ್ ಸುಟೊನ್ ಖಂಯ್ ಆಪ್ಣಾಚೆಂ ವಜನ್ ಉಣೆಂ ಜಾವ್ನ್ ಉಪ್ರಾಂತ್ ಆಪ್ಣಾಕ್ ತ್ಯಾ ಪಯ್ಶಿಲ್ಯಾ ಅಮೇರಿಕಾಕ್ ಆಪ್ಣಾಚ್ಯಾ ಭಲಾಯ್ಕೆಚ್ಯಾ ಸುದ್ರಾಪಾಕ್ ವಚೊಂಕ್ ಪಡ್ಲ್ಯಾರ್.....? ನಾ ಆಪುಣ್ ತಸಲೊ ಲೋಕ್ಸೇವಕ್ ನ್ಹಯ್ ಮ್ಹಣೊನ್ ಇಲೆಕ್ಶನಾಚಾ ರ್ಯಾಲಿಂತ್ ಬೊಬೊ ಮಾರುನ್ ಆಪ್ಲ್ಯಾ ಥಂಡ್ ಎ.ಸಿ. ಕಾರಾರ್ ಯೇವ್ನ್ ಬಸ್ತಾನಾ, ಆಪ್ಣಾಕ್ ಮುಕಾರ್ ಭೆಟೊಂಕ್ ಯೆಂವ್ಚ್ಯಾ ಜಮತೆಕ್ ದಾಕಂವ್ಚ್ಯಾ ಖಾತಿರ್ ಮಾತ್ಯಾಕ್ ಮಿನರಲ್ ಉದಾಕ್ ವೊತುನ್ ಭಿಜ್ಲೆಲ್ಯಾ ವಸ್ತ್ರಾಂನಿ ಜಮಾತೆ ಮುಕಾರ್ ಹಾಜಿರ್ ಜಾವ್ನ್, ಲೊಕಾಚೊ ಜೈಕಾರ್ ಕಾನ್ ಫುಟ್ತಾ ಪಾಸೊನ್ ಆಯ್ಕಾಲ್ಲೊ ಹ್ಯಾ ಸಮಾಜೆಚೊ ಲೋಕ್ ಸೇವಕ್, ತ್ಯಾ ರಂಗ್ ರಂಗೀನ್ ಸಂಸಾರಾಕ್ ಆನಿ ಆಪ್ಲ್ಯಾ ಲೋಕ್ ಸೆವೆಕ್ ಸಂಭಂಧ್ ಜೊಡುಂಕ್ ಆಶೆತಾಲೊ.
"ತುಕಾ ಅಭಿನಯ್ ಕರ್ಚಿ ಇಚ್ಚಾ ಕಶಿ ಆಯ್ಲಿ ತಿ ಆಮ್ಚ್ಯಾ ದರ್ಶಕಾಂಕ್ ಸಾಂಗ್ಯೆತ್ ಮಿಸ್ ಆಲಿಯಾ ಖಾನ್?"
ಟಿ.ವಿ. ಮುಕ್ಲೊ ದರ್ಶಕ್ ಆಲಿಯಾಚಾ ಜವಾಬೆ ಥಾವ್ನ್ ಆಪ್ಣಾಕ್ಯ್ ಕಾಂಯ್ ತರ್ಯ್ ಫುಡಾರಾಕ್ ಉಪ್ಕಾರಾಕ್ ಪಡ್ಚೆ ಸಿದ್ಧಾಂತ್ ಲಾಬ್ತೆಲೆ ಮ್ಹಣೊನ್ ಕಾನ್ ದೊಳೆ ತೋಂಡ್ ಸೊಡುನ್ ಆಯ್ಕಾತಾಲೊ. ಅಚಾನಕ್ ಖಂಯ್ ಥಾವ್ನ್ಗೀ ಉದೆವ್ನ್ ಯೇವ್ನ್ ಎಕಾಚ್ಚ್ ಫಿಲ್ಮಾಂತ್ ಸಗ್ಳ್ಯಾ ಸಂಸಾರಾಚಾ ಲೊಕಾ ಮುಕಾರ್ ಉಭೆಂ ಜಾಂವ್ಚ್ಯಾ ಹ್ಯಾ ಕಲಾಕಾರಾಂನಿ ಆಪ್ಣಾಂವ್ಚೆ ನಾಂವ್ ಆನಿ ದಿರ್ವೆಂ ಪಳವ್ನ್ ಟಿ.ವಿ. ಮುಕಾರ್ ಬಸ್ಚೊ ಹರ್ಯೆಕ್ಲೊ ಆನಿ ಹರ್ಯೆಕ್ಲೆಂ ತ್ಯಾ ರಂಗೀನ್ ಪರ್ದ್ಯಾರ್ ಸೊಭೊಂಕ್ ಆಶೆತಾಲೆಂ.
"ಸತ್ ಸಾಂಗ್ಚೆಂ ಜಾಲ್ಯಾರ್ ಮ್ಹಾಕಾ ಅಭಿನಯ್ ಕರ್ಚಿ ಇಚ್ಚಾ ನಾತ್ಲ್ಲಿ! ಹೆಂ ಅಚಾನಕ್ ಕಶೆಂ ಜಾಲೆಂ ತೆಂ ಹಾಂವ್ಚ್ ನೆಣಾಂ!" ಆಲಿಯಾ ಆಪ್ಣಾಕ್ ವಿಚಾರ್ಲೆಲ್ಯಾ ಸವಾಲಾಕ್ ಮಾತ್ರ್ ಜವಾಬ್ ದಿತಾಲೆಂ. "ಹಾಂವ್ ಮೊಳಾಬಾರ್ ಉಭೊಂಕ್ ಆಶೆತಾಲಿಂ. ಆಚಾನಕ್ ಬಾಲಿವುಡಾಂತ್ ಅವ್ಕಾಸ್ ಮೆಳ್ಳೊ!"
ಆಲಿಯಾಚಾ ಜವಾಬೆಕ್ ರಾಕೊನ್ ರಾವ್ಲೆಲ್ಯಾ ದರ್ಶಕಾಕ್ ನಿರಾಸ್ ಜಾಲೊ. ತಾಚ್ಯಾ ಪಾಟ್ಲ್ಯಾನ್ ನಿವ್ಸ್ ಬದ್ಲಾತಾನಾ ದರ್ಶಕಾನ್ ಆಪ್ಲ್ಯಾ ನಿರಾಶೆಚಾ ರಾಗಾಕ್ ಪ್ರದರ್ಶನ್ ಕರ್ಚ್ಯಾ ಖಾತಿರ್ ಟಿ.ವಿ. ಚ್ಯಾನೆಲ್ಚ್ ಬದ್ಲಿಲೆಂ.
"ಮಿಸ್ ಆಲಿಯಾ ಖಾನ್! ’ಪ್ರತಿಭಟನ್’ ಫಿಲ್ಮಾಚೆಂ ಲೀಡಿಂಗ್ ಆಕ್ಟ್ರೆಸ್ ಆತಾಂ ಆಮ್ಚ್ಯಾ ಸವೆಂ ಆಸಾ!" ಸಹಾರಾ ಟಿ.ವಿ. ಚೆಂ ನಿವ್ಸ್ ರೀಡರ್ ಆಪ್ಲ್ಯಾ ನಿವ್ಸಾಕ್ ಆಖೇರ್ ಕರ್ಚ್ಯಾ ಪಯ್ಲೆಂ ಉಲಯ್ತಾಲೆಂ. "ಆಮ್ಚೆಂ ಸಂವಾದ್ಕಾರಿಣ್ ಮೃಣಾಲಿನಿ ಆತಾಂ ತುಮ್ಚ್ಯಾ ಮುಕಾರ್ ಆಪ್ಲ್ಯಾ ಪಯ್ಲ್ಯಾ ಫಿಲ್ಮಾಂತ್ಚ್ ಚರ್ಚ್ಯಾಕ್ ಕಾರಾಣ್ ಜಾಲ್ಲ್ಯಾ ಆಲಿಯಾಚಾ ಪಯ್ಲ್ಯಾ ಫಿಲ್ಮಾಚಾ ಪ್ರೀಮಿಯರಾ ವೆಳಾರ್ ಕೆಲ್ಲ್ಯಾ ಸಂದರ್ಶನಾಕ್ ತುಮ್ಚ್ಯಾ ಮುಕಾರ್ ಘೆವ್ನ್ ಯೆತೆಲೆಂ!" ಟಿ.ವಿ. ಪರ್ದ್ಯಾ ಪಯ್ಲೆಂ ನಿವ್ಸ್ ರೀಡರ್ ಮಾಯಾಗ್ ಜಾವ್ನ್ ತ್ಯಾ ಪರ್ದ್ಯಾರ್ ಮೃಣಾಲಿನಿ ಉದೆವ್ನ್ ಆಯ್ಲೆಂ.
"ಆತಾಂ ಆಮ್ಚೆ ಸವೆಂ ಆಸಾ ಆಲಿಯಾ ಖಾನ್! ’ಪ್ರತಿಭಟನ್’ ಫಿಲ್ಮಾಚೆಂ ಡಿಬಟ್ ಹೀರೋಯಿನ್!" ಮೃಣಾಲಿನಿನ್ ಸಾಂಗ್ತಾನಾ ಕ್ಯಾಮರಾಮ್ಯಾನಾನ್ ಆಪ್ಲ್ಯಾ ಕ್ಯಾಮರಾಕ್ ಆಲಿಯಾ ವಯ್ರ್ ಫೋಕಸ್ ಕೆಲೊ.
"ಮಿಸ್ ಆಲಿಯಾ ಖಾನ್! ಆಮ್ಚೆ ದರ್ಶಕ್ ತುಕಾ ಮೆಳೊಂಕ್ ಆತುರ್ ಜಾವ್ನ್ ಆಸಾತ್!"
"ಹಾಯ್!" ದರ್ಶಕಾಂಕ್ ಆಲಿಯಾನ್ ಹಾತ್ ಹಾಲಯ್ಲೊ.
"ಆಲಿಯಾ ಖಾನ್.....?" ಮೃಣಾಲಿನಿ ಉಲಯ್ಲೆಂ. "ಆಮ್ಚೆ ದರ್ಶಕ್ ಹೆಂ ಜಾಣಾಂ ಜಾಂವ್ಕ್ ಆಶೆತಾತ್ ಕೀ ಪ್ರಸ್ತುತ್ ಸಮಾಜೆಂತ್ ಚಲಿಯೆನ್ ಆಪ್ಲ್ಯಾ ಹಕ್ಕಾಂ ಖಾತಿರ್ ಝುಜ್ಚೆಂ ಕಿತ್ಲ್ಯಾ ಮಹತ್ವಾಚೆಂ? ಜಶೆಂ ತುವೆಂ ಹ್ಯಾ ಫಿಲ್ಮಾಂತ್ ಅಭಿನಯ್ ಕೆಲಾಂಯ್!"
"ಸಂಸಾರಾಚಾ ಸುರ್ವೆರ್ ಥಾವ್ನ್...." ಅಲಿಯಾ ಉಲಯ್ಲೆಂ. "......ಚಲಿಚ್ ಹ್ಯಾ ಸಮಾಜೆಂತ್ ಏಕ್ ಖೆಳಾಚಿ ವಸ್ತ್ ಜಾವ್ನ್ ಕೊಣಾ ಕೊಣಾಚಾ ಹಾತಾಂತ್ ಖೆಳೊನ್ ಆಯ್ಲ್ಯಾ. ಆಶೆಂ ಕಿತ್ಯಾಕ್? ಚಲಿ ಖಂಯ್ಚ್ಯಾಂಯ್ತ್ಯ್ ಉಣೆಂ ನಾ. ತಿಕಾಯ್ ತೊಚ್ಚ್ ಜೀವ್, ತೆಂಚ್ ರಗಾತ್, ತೆಂಚ್ ಮಾಸ್, ತಿಚ್ಚ್ ಆಶಾ ಆಸಾ. ಆಶೆಂ ಆಸ್ತಾನಾ ಚಲಿ ಚಲ್ಯಾ ಥಾವ್ನ್ ನೀಚ್ ಮ್ಹಣೊನ್ ಚಿಂತ್ಚೆಂ ಅಥ್ವೆಪಣ್! ಹ್ಯಾ ಅಥ್ವ್ಯಾಪಣಾಕ್ ಕಾಡುನ್ ಉಡಂವ್ಚೆಂ ಪ್ರಯತ್ನ್ ಹೆಂ. ಆಯ್ಚಾ ಸಮಾಜೆಂತ್ ಹೆಂ ಚಡ್ ಗರ್ಜೆಚೆಂ!"
"ಹ್ಯಾ ತುಜ್ಯಾ ಫಿಲ್ಮಾ ಥಾವ್ನ್ ಹೊ ತುಜೊ ಸಂದೇಶ್ ಹ್ಯಾ ದೇಶಾಚಾ ಹರ್ಯೆಕಾ ಲೊಕಾಕ್ ಪಾವ್ತಲೊ ಮ್ಹಳ್ಳೊ ಭರ್ವಸೊ ತುಕಾ ಆಸಾ?" ದುಸ್ರೆಂ ಸವಾಲ್.
"ಖಂಡಿತ್ ಆಸಾ! ಆಯ್ಚಾ ಪ್ರಸ್ತುತ್ ಚಲಿಯೆಕ್ ಆನಿ ಸಮಾಜೆಚಾ ಚಿಂತ್ಪ್ಯಾಂಕ್ ಹೆಂ ಫಿಲ್ಮ್ ಪಸಂದ್ ಜಾತೆಲೆಂ!"
"ಹ್ಯಾ ಫಿಲ್ಮಾ ಥಾವ್ನ್ ತುಜ್ಯಾ ಕ್ಯಾರಿಯರಾ ಥಂಯ್ ತುಜೊ ಭರ್ವಸೊ.....?"
"ಹಾವೆಂ ಮ್ಹಜೆಂ ಪ್ರಯತ್ನ್ ಕೆಲಾ! ಉರ್ಲೆಲೆಂ ದರ್ಶಕಾಚಾ ಹಾತಿಂ ಆಸಾ!"
"ಏಕ್ ನಿಮಾಣೆ ಸವಾಲ್!" ಕ್ಯಾಮರಾ ಏಕ್ ಪಾವ್ಟಿಂ ಮೃಣಾಲಿನಿ ವಯ್ರ್ ಘುಂವೊನ್ ಪರ್ತ್ಯಾಕ್ ಆಲಿಯಾ ವಯ್ರ್ ಘುಂವ್ಲೆಂ.
"ಥೊಡ್ಯಾ ದಿಸಾಂ ಪಯ್ಲೆಂ ತುಜ್ಯಾ ವಯ್ರ್ ಜಾಲ್ಲ್ಯಾ ಮರಣಾಂತಿಕ್ ಹಲ್ಲ್ಯಾ ವಿಶಿಂ ಆಮ್ಚ್ಯಾ ದರ್ಶಕಾಂಕ್ ಕಾಂಯ್ ಸಾಂಗ್ಯೆತ್....?"
"ಸಾರ್ರಿ! ಹ್ಯಾ ವಿಶಿಂ ಎದೊಳ್ಚ್ ಸರ್ವ್ ಪತ್ರಾಂನಿ ಚರ್ಚಾ ಜಾಲ್ಯಾ ಆಸ್ತಾಂ ಪರ್ತ್ಯಾನ್ ಹಾಂವ್ ಹ್ಯಾ ವಿಶಿಂ ಕಾಂಯ್ ಉಲಂವ್ಕ್ ಆಶೆನಾ!"
"ಹೆಂ ಆಸ್ಲ್ಲೆಂ ಆಲಿಯಾ ಖಾನ್!" ಟಿ.ವಿ. ಚ್ಯಾ ಪರ್ದ್ಯಾರ್ ಮೃಣಾಲಿನಿ ಆಯ್ಲೆಂ.
ಹಾಚ್ಯಾ ಪಾಟ್ಲ್ಯಾನ್ ಪರ್ತ್ಯಾಕ್ ತೆಂ ಆದ್ಲೆಂ ನಿವ್ಸ್ ರೀಡರ್ ಪ್ರತ್ಯಕ್ಶ್ ಜಾಲೆಂ.
ಆಪ್ಲ್ಯಾ ಫಿಲ್ಮಾಚಾ ಪ್ರೀಮಿಯರಾಚಾ ದಿಸಾ ಆಲಿಯಾನ್ ಆಪ್ಣಾ ವಯ್ರ್ ಜಾಲ್ಲ್ಯಾ ಹಲ್ಲ್ಯಾಚಾ ವಿಶಿಂ ಉಲಂವ್ಕ್ ಇನ್ಕಾರ್ ಕೆಲ್ಲೆಂ ಜಾಲ್ಯಾರ್ಯ್ ಆಲಿಯಾ ಆನಿ ತಾಚ್ಯಾ ವಯ್ರ್ ಜಾಲ್ಲ್ಯಾ ಹಲ್ಲ್ಯಾಕ್ ಮೀಡಿಯಾಚಾ ಲೊಕಾನಿ ಬಾಲಿವುಡ್ ಆನಿ ಅಂಡರ್ ವರ್ಲ್ಡಾ ಮಧೆಂ ಸಂಭಂಧ್ ಜೊಡ್ಲ್ಲೊ. ನಿಜಾಯ್ಕ್ಯ್ ಹಿ ಏಕ್ ಸಣ್ಸಣೀತ್ ಖಬಾರ್ ಜಾವ್ನ್ ಉಭಾರುನ್ ಆಯಿಲ್ಲಿ. ತೆದ್ನಾಂ ತೆದ್ನಾಂ ಘಡ್ಚ್ಯಾ ಘಡಿತಾಂನಿ ಲೊಕಾಂ ಹುಜಿರ್ ಹ್ಯಾ ಬಾಲಿವುಡ್ ಆನಿ ಅಂಡರ್ ವರ್ಲ್ಡಾ ಮಧೆಂ ಕಾಂಯ್ ತರ್ಯ್ ಸಂಭಂಧ್ ಆಸಾ ಮ್ಹಳ್ಳ್ಯಾ ವಿಶಿಂ ದುಬಾವಾಕ್ ಉಟಯಿಲ್ಲೆಂ. ಹೊ ದುಬಾವ್ ಆಲಿಯಾ ವಯ್ರ್ ಹಲ್ಲೊ ಜಾಲ್ಯಾ ಉಪ್ರಾಂತ್ ಆನಿ ಆಲಿಯಾನ್ ಇಕ್ಬಾಲಾಚೆಂ ನಾಂವ್ ಉಚಾರ್ಲ್ಯಾ ಉಪ್ರಾಂತ್ ಲೊಕಾಚ್ಯಾ ಮತಿಂತ್ ಫಕತ್ತ್ ದುಬಾವ್ ಮಾತ್ರ್ ಜಾವ್ನ್ ಉರ್ಲೊ ನಾ. ತಾಂಕಾ ಆತಾಂ ಸ್ಪಶ್ಟ್ ಜಾಲ್ಲೆಂ ಕೀ ಹ್ಯಾ ಬಾಲಿವುಡಾ ಆನಿ ಅಂಡರ್ ವರ್ಲ್ದಾ ಮಧೆಂ ಖಂಡಿತ್ ಸಂಭಂಧ್ ಆಸಾ ಮ್ಹಳ್ಳೆಂ ತೆಂ. ಹ್ಯಾಚ್ ಖಾತಿರ್ ಸಗ್ಳೆಂ ಬಾಲಿವುಡ್ ಆಲಿಯಾಚಾ ಹಾತಾಕ್ ಹಾತ್ ದೀವ್ನ್ ತಾಕಾ ಸಾಂಗಾತ್ ದೀಂವ್ಕ್ ತಯಾರ್ ಜಾಲ್ಲೆಂ.
ನವೆಂ ನವೆಂಚ್ ಬಾಲಿವುಡಾಕ್ ಪಾಂಯ್ ದವರ್ಲ್ಲೆಂ ಆಲಿಯಾ, ಅಜೂನ್ ತಾಚೆಂ ಪಯ್ಲೆಂ ಫಿಲ್ಮ್ ವ್ಹಡ್ಲ್ಯಾ ಪರ್ದ್ಯಾರ್ ಪ್ರದರ್ಶನ್ ಜಾಂವ್ಚ್ಯಾ ಪಯ್ಲೆಂಚ್ ಮರಣಾಂತಿಕ್ ಹಲ್ಲ್ಯಾಕ್ ವಳಗ್ ಜಾಲ್ಲೆಂ. ತೆಂಯ್ ಏಕ್ ಚಲಿ ಜಾವ್ನ್!
ಎಕಾ ಚಲಿಯೆ ವಯ್ರ್! ಬಾಲಿವುಡಾಚಾ ಡಿಬಟ್ ಹೀರೋಯಿನಾ ವಯ್ರ್ ಜಾಲ್ಲ್ಯಾ ಹಲ್ಲ್ಯಾನ್ ಸಗ್ಳ್ಯಾ ಮುಂಬಯಿಕ್ಚ್ ಹಾಲಯಿಲ್ಲೆಂ. ಅಖ್ಖ್ಯಾ ಮುಂಬಯಿಚ್ಯಾ ಮೀಡಿಯಾಕ್ ಹೊ ಏಕ್ ಸಮ್ಜೊಂಕ್ ಸಕಾನಾಸ್ಲಲೊ ಮಿಸ್ತೆರ್ ಜಾಲ್ಲೊ.
ಹೊ ಮಿಸ್ತೆರ್ ಭಳ್ ಜಾಲ್ಲೊಚ್ ಮಿಶೇಲಾನ್ ಅಚಾನಕ್ ನಪಂಯ್ಚ್ ಜಾಲ್ಲ್ಯಾ ದಿಸಾ ಥಾವ್ನ್! ಹ್ಯಾ ದಿಸಾ ಥಾವ್ನ್ ರಾಯನಾಚೆಂ ನಾಂವ್ ಪತ್ರಾಂನಿ ವ್ಹಾಳೊನ್ ಆಯ್ಲೆಂ. ಬಾಲಿವುಡಾಚಾ ಪ್ರಭಲ್ ಕಾರ್ಪೊರೇಟ್ ಹೌಸಾಚಾ ಪ್ರಭಲ್ ವ್ಯಕ್ತಿಚಾ ಬಾಯ್ಲೆನ್ ಆಚಾನಕ್ ಆಶೆಂ ಮಾಯಾಗ್ ಜಾಂವ್ಚೆಂ ಸಗ್ಳ್ಯಾ ಬಾಲಿವುಡಾಕ್ಚ್ ಹಾಲಂವ್ಕ್ ಪಾವ್ಲ್ಲೆಂ. ಪೊಲಿಸಾಂ ಸವೆಂ ಮೀಡಿಯಾನ್ ಮಿಶೇಲಾಚಾ ಹ್ಯಾ ನಪಂಯ್ಚ್ ಪಣಾಕ್ ಅಪಹರಣಾಚೆಂ ರೂಪ್ ದಿತಾನಾ ಮಾತ್ರ್ ಮುಂಬಯಿಚಾ ಸಂಸಾರಾಕ್ ಅನ್ಯೇಕ್ ಸಣ್ಸಣೀತ್ ಖಬ್ರೆನ್ ದಾಡ್ ಮಾರ್ಲ್ಲಿ. ಹಾಚ್ಯೆ ಥಾವ್ನ್ ಮುಂಬಯಿಚ್ಯಾ ಕಾರ್ಪೊರೇಟ್ ಹೌಸಾಂನಿ ಭಿರಾಂತೆಚೆಂ ವಾತಾವರಣ್ ಅಪ್ಲೆಸ್ತಕಿಂ ಉದೆಲ್ಲೆಂ.
ಆಲಿಯಾ ವಯ್ರ್ ಹಾಲ್ಲೊ ಆನಿ ಮಿಶೆಲಾಚೆಂ ಅಪಹರಣ್! ಎಕಾಮೆಕಾಕ್ ಸಂಭಂಧ್ ಜೊಡುಂಕ್ ಸಭಾರಾಂನಿ ಪ್ರಯತ್ನ್ ಕೆಲ್ಲೆಂ.
ಆಲಿಯಾಚಾ ಹಲ್ಲ್ಯಾ ವಯ್ಲ್ಯಾ ಕೇಸಿಕ್ ಕೊರ್ಟಾಂತ್ ಆಯ್ಕೊಂವ್ಚ್ಯಾ ದೋನ್ ದಿಸಾಂ ಪಯ್ಲೆಂ ಅಚಾನಕ್ ಮಿಶೇಲಾಚೆಂ ಅಪಹರಣ್ ಆತಾಂ ರಾಯನಾಕ್ ಆನಿ ಮಿಶೇಲಾಕ್ ಹ್ಯಾ ಆಲಿಯಾಚಾ ಕೇಸಿಂತ್ ವೊಡುನ್ ಹಾಡುಂಕ್ ಲಾಗ್ಲ್ಲೆಂ. ಮೀಡಿಯಾನ್ ಎದೊಳ್ಚ್ ಸಭಾರ್ ಕಾಣಿಯೊ ತಯಾರ್ ಕೆಲ್ಲ್ಯೊ. ತ್ಯಾ ಭಾಯ್ರ್ ಆಲಿಯಾಕ್ ರಾಯನಾನ್ ಆಪ್ಲ್ಯಾ ಫಿಲ್ಮಾಂತ್ ಪಯ್ಲೊ ಆವ್ಕಾಸ್ ದಿಲ್ಲೊ ತೊ ಉಗ್ಡಾಪೊ ಜಾತಾನಾ ಆಲಿಯಾ ವಯ್ಲೊ ಹಲ್ಲೊ ಆನಿ ಮಿಶೆಲಾಚೆಂ ಅಪಹರಣ್ ಸಾಂಗಾತಾ ಮೆಳೊನ್ ಸರ್ವಾಂಚಾ ಘುಸ್ಪಡ್ಣೆಕ್ ಕಾರಾಣ್ ಜಾಲೆಂ.
ಹೆಂ ಕಾರಾಣ್ ಆಜ್ ಖಂಡಿತ್ ಕೋರ್ಟಾಂತ್ ಉಗ್ತೆಂ ಜಾತೆಲೆಂ ಮ್ಹಳ್ಳಿ ಪಾತ್ಯೆಣಿ ಮೀಡಿಯಾಕ್ ಆಸ್ಲ್ಲಿ!
ಕೊರ್ಟಾಂತ್ ಉಗ್ಡಾಪೆಂ ಜಾಂವ್ಚ್ಯಾ ಸತಾಕ್ ಜಾತಾ ತಿತ್ಲ್ಯಾ ವೆಗ್ಗಿಂ ಆಪಾಪ್ಲ್ಯಾ ಚ್ಯಾನೆಲಾಂ ದ್ವಾರಿಂ ಲೊಕಾಕ್ ಪಾವಂವ್ಚಿ ಆತುರಾಯ್ ಮೀಡಿಯಾಕ್ ಆನಿ ಪ್ರೆಸ್ಸಾಚ್ಯಾಂಕ್ ಆಸ್ಲ್ಲಿ. ಹ್ಯಾ ಕಾರಾಣಾಕ್ ಲಾಗೊನ್ ಹೈ ಕೊರ್ಟಾಂತ್ ಖೆಟ್ ಜಾಲ್ಲಿ. ಪುಣ್ ಕೊರ್ಟಾಚಾ ಮುಕ್ಲ್ಯಾ ಪೊಲಿಸಾಂಚಾ ಭಂದೊಬಸ್ತೆನ್ ಸಗ್ಳ್ಯಾ ಮೀಡಿಯಾಚಾ ಲೊಕಾಕ್ ಕೊರ್ಟಾ ಭಾಯ್ರ್ಚ್ ಆಡಾವ್ನ್ ದವರ್ಲ್ಲೆಂ. ಲೊಕಾಕ್ ಸಾಂಭಾಳ್ಚ್ಯಾ ಹ್ಯಾ ಕಾರ್ಯಾಂತ್ ಪೊಲಿಸಾಂಕ್ ಸಾದಾರಣ್ ಮ್ಹಿನತ್ ಕರುಂಕ್ ಪಡ್ಲಿ.
ಹ್ಯಾ ಮಧೆಂ ಕೊರ್ಟಾಚೊ ವೇಳ್ ಭರಾನ್ ಧಾಂವ್ತಾಲೊ. ಪ್ರೆಸ್ಸಾಚೊ ಲೋಕ್ ತಾಂಚಾ ಅಮಾನತ್ ಕೆಲ್ಲ್ಯಾ ಜಾಗ್ಯಾಕ್ ಸೊಡುನ್ ಭಿತರ್ ವಚೊಂಕ್ ಸಕಾನಾತ್ಲ್ಲೊ. ಟಿ.ವಿ. ಚೆ ಸಂವಾದ್ಕಾರ್ ಘಡ್ಯೆ ಘಡ್ಯೆ ಕೊರ್ಟಾಚಾ ಆವರಣಾಂತ್ ತಾಂಕಾ ಲಾಭ್ಚ್ಯಾ ಮಾಹೆತೆಕ್ ತುರಂತ್ ತಾಂಚಾ ಸ್ಟೂಡಿಯೊಕ್ ಪಾವಿತ್ ಕರ್ತಾಲೆ. ಪುಣ್ ಹ್ಯಾ ಟಿ.ವಿ. ಸಂವಾದ್ಕಾರಾಂಕ್ ಕೋರ್ಟಾಚಾ ಆವರಣಾ ಭಿತರ್ ಮಾತ್ರ್ ಪ್ರವೇಶ್ ದಿಲ್ಲೊ ಶಿವಾಯ್ ಕೊರ್ಟಾ ಭಿತರ್ ತಾಂಕಾಂ ಪ್ರವೇಶ್ ನಾತ್ಲ್ಲೊ. ತ್ಯಾ ಭಾಯ್ರ್ ಬಾಲಿವುಡಾಚೆ ಅಭಿಮಾನಿ ತಾಂಚಾ ನವ್ಯಾ ಹೀರೋಯಿನಾಕ್, ತಾಂಚಾ ಕಾಳ್ಜಾಚಾ ಉಡಿಯೆಕ್ ಭೋವ್ ಲಾಗ್ಶಿಲ್ಯಾನ್ ಥಾವ್ನ್ ಪಳಂವ್ಕ್ ಆತ್ರೆಗ್ತಾಲೆ.
ರಾಮ್ ಪ್ರಸಾದ್!
ಅಖ್ಖ್ಯಾ ಮುಂಬಯಿಚ್ಯಾ ಕಾನೂನ್ ಕಾಯ್ದ್ಯಾಂತ್ಲ್ಯಾ ಸಂಸಾರಾತ್ ಚಿರಪರಿಚಿತ್ ನಾಂವಾಚೊ ಲಾಯರ್! ನಾಂವ್ ಆಯ್ಕಾತನಾಚ್ ಹ್ಯಾ ಲಾಯರಾ ವಿರೋಧ್ ಕೊರ್ಟಾಂತ್ ಝುಜೊಂಕ್ ದುಸ್ರೆ ಕೊಣ್ಯ್ ಲಾಯರ್ ತಯಾರ್ ಜಾಯ್ನಾತ್ಲ್ಲೆ. ತಾಣಿಂ ಕೊರ್ಟಾಂತ್ ಝುಜ್ಚ್ಯಾ ಪಯ್ಲೆಂಚ್ ತಾಂಚಿ ಸಲ್ವಣ್ ತಾಂಕಾ ತಾಂಚ್ಯಾ ದೊಳ್ಯಾಂ ಮುಕಾರ್ ಉದೆತಾಲಿ. ರಾಯನಾನ್ ಆಲಿಯಾ ತರ್ಫೆನ್ ತಾಚ್ಯಾ ಹಲ್ಲ್ಯಾಚಿ ಕೇಸ್ ಹ್ಯಾ ರಾಮ್ ಪ್ರಸಾದಾಕ್ ವಹಿಸುನ್ ದಿಲ್ಲಿ. ಅಖ್ಖ್ಯಾ ಮುಂಬಯಿಂತ್ ಆಪ್ಣಾಕ್ ಜೀಕ್ ಆಪ್ಣಾವ್ನ್ ದೀಂವ್ಕ್ ಸಕ್ಚೊ ಎಕ್ಚ್ ಏಕ್ ಖಾಬಿಲ್ ಪ್ರಾಸಿಕ್ಯೂಟರ್ ಮ್ಹಳ್ಯಾರ್ ರಾಮ್ ಪ್ರಸಾದ್ ಮ್ಹಳ್ಳೆಂ ತೊ ಜಾಣಾಂ ಆಸ್ಲ್ಲೊ.
ರಾಮ್ ಪ್ರಸಾದ್ ಜಿವಾಂತ್ ತಿಕ್ಕೆ ಮಟ್ವೊ ಆಸೊನ್ ಘಟ್ಮುಟ್ ಜಿವಾಚೊ. ಮಾತ್ಯಾಚೆ ಕೇಸ್ ಜಡೊನ್ ವಚೊನ್ ತೆ ಪಾತಳ್ ಜಾಲ್ಲೆ. ತ್ಯಾ ಪಾತಳ್ ಕೆಸಾಂಕ್ ಸಾರ್ಕೆಂ ಮಾತ್ಯಾರ್ ಉಗವ್ನ್ ಬಸಯಿಲ್ಲೆ. ಹ್ಯಾ ಪಾತಳ್ ಕೆಸಾಂ ಮಧ್ಲ್ಯಾನ್ ತಾಚ್ಯಾ ತಕ್ಲೆಚಿ ಧೊವ್ಸಾಣ್ ಸಾರ್ಕಿ ಉಡೊನ್ ದಿಸ್ತಾಲಿ. ಹ್ಯಾ ಧೊವ್ಸಾಣೆಂತ್ ತಾಚ್ಯಾ ತಕ್ಲೆಚ್ಯಾ ದಾವ್ಯಾ ಕುಶಿನ್ ಅಮೀಬಾಚಾ ರುಪಾ ತಸಲೆಂ ಕಾಳೆಂ ಖತ್ ತ್ಯಾ ಪಾತಳ್ ಕೆಸಾಂ ಮಧ್ಲ್ಯಾನ್ ಉಡೊನ್ ಮ್ಹಳ್ಯಾಪರಿಂ ದಿಸ್ತಾಲೆಂ. ಹ್ಯಾ ತಾಚ್ಯಾ ಪಾತಳ್ ಕೆಸಾಂಕ್ ತದ್ವಿರುದ್ಧ್ ಜಾವ್ನ್ ತಾಚ್ಯಾ ವೊಂಟಾರ್ ದಾಟ್ ಮಿಶಿಯೊ ತ್ಯಾ ತಾಚ್ಯಾ ಪುಗ್ರ್ಯಾ ಗಾಲಾಂಚಾ ತೊಂಡಾಕ್ ಘಮಂಡಾಯೆಚೊ ಛಾರೊ ದಿತಾಲ್ಯೊ. ಲ್ಹಾನ್ ದೊಳೆ ತ್ಯಾ ಚಪ್ಪಟ್ ನಾಕಾ ವಯ್ರ್ ಎಕಾ ಖಿಣಾಕ್ ಕೊಣಾಯ್ಚಾಯ್ ವಿಶ್ವಾಸಾಕ್ ದಂಡಳಾಯ್ತಾಲೆ. ಹ್ಯಾಚ್ ದೊಳ್ಯಾಂಚಾ ದಿಶ್ಟೆ ಥಾವ್ನ್ ತಾಣೆಂ ಸಭಾರ್ ತಾಚಾ ಕಕ್ಶಿದಾರಾಂಕ್ ಜೀಕ್ ಆಪ್ಣಾವ್ನ್ ದಿಲ್ಯಾ.
ರಾಮ್ ಪ್ರಸಾದ್ ಖಂಯ್ಚಾಯ್ ಕಕ್ಶಿದಾರಾಕ್ ಡಿಫೆಂಡಟ್ ಜಾವ್ನ್ ಕೊರ್ಟಾಂತ್ ಝುಜೊಂಕ್ ಯೆತಾ ಮ್ಹಣೊನ್ ಕಳಾತ್ ಜಾಲ್ಯಾರ್ ಮುಕ್ಲ್ಯಾ ಪಾಡ್ತಿಚ್ಯಾ ವಿರೋಧ್ ಪ್ರಾಸಿಕ್ಯೂಟರಾಚಾ ವಾ ಪಬ್ಲಿಕ್ ಪ್ರಾಸಿಕ್ಯೂಟರಾಚಾ ಆಂಗಾಂತ್ ಜಗ್ಲಾಣ್ಯಾಚೊ ಶಿರೊ ಧಾಂವ್ತಾಲ್ಯೊ. ಆಪ್ಲ್ಯಾ ಮಾಜ್ರಾ ದೊಳ್ಯಾಂಚಾ ದಿಶ್ಟೆಂತ್ ತೊ ಹರ್ಯೆಕಾ ವಿರೋಧಿಚಾ ಕಾಳ್ಜಾಕ್ ಅಶೆಂ ದಾವ್ಲ್ಯೊ ಮಾರ್ತಾಲೊ ಕೀ ವಿರೋಧಿಚಾ ತೊಂಡಾ ಥಾವ್ನ್ ವಿರೋಧಿಕ್ಚ್ ಫಟಂವ್ಕ್ ಸಕ್ತಾಲೊ. ಎದೊಳ್ ಪಾಸೊನ್ ಆಪ್ಣೆ ವಹಿಸುನ್ ಘೆತ್ಲೆಲ್ಯಾ ಏಕ್ಯ್ ಕೇಸಿಂತ್ ತೊ ಸಲ್ವೊನ್ ನೆಣಾಂ. ತಶೆಂಯ್ ಲ್ಹಾನ್ ಲ್ಹಾನ್ ಕೇಸಿಂತ್ ಝುಜ್ಚಿ ತಾಕಾ ಕಾಂಯ್ ಆಭಿರುಚಿ ನಾತ್ಲ್ಲಿ. ಸಕ್ತೆವಂತ್ ಝುಜಾಂತ್ ಝುಜ್ಚೆಂ ರಾಮ್ ಪ್ರಸಾದಾಕ್ ಸರೊಪ್ ಆನಿ ಮುಂಗುಸಿಚಾ ಖೆಳಾಚೊ ಆನಂದ್ ದಿತಾಲೊ.
"ಖಂಯ್ಚಾಯ್ ಪರಿಸ್ಥಿತೆಕ್ ಪಾವ್ಲ್ಯಾರ್ಯ್ ಪರ್ವಾ ನಾ ಪ್ರಸಾದ್! ಆಪ್ಣಾಕ್ ಹ್ಯಾ ಕೇಸಿಂತ್ ಜಯ್ತ್ ಜಾಯ್. ಆನಿ ಹೆಂ ಜಯ್ತ್ ಫಕತ್ತ್ ತುಂ ಮಾತ್ರ್ ದಿವಂವ್ಕ್ ಸಕ್ತಾಯ್!" ರಾಯನಾನ್ ಚತ್ರಾಯೆ ಸವೆಂ ಆಪ್ಣಾ ವಯ್ಲೊ ಭರ್ವಸೊ ಉಚಾರ್ಲ್ಲೊ. ಸಗ್ಳ್ಯಾ ಆಲಿಯಾಚಾ ಹಲ್ಲ್ಯಾಚಾ ಕೇಸಿಚಾ ವಿಶ್ಯಾಂತ್ ದೊಗಾಂಯ್ನಿ ಮಸ್ತ್ ಚರ್ಚಾ ಕೆಲ್ಲಿ.
ಕಾಲ್ಚ್ಯಾ ರಾತಿಕ್ ನಿಮಾಣೆಂ ಜಾವ್ನ್ ರಾಮ್ ಪ್ರಸಾದ್ ರಾಯನಾಚಾ ಘರಾಚ್ ರಾಯನಾಕ್ ಮೆಳೊಂಕ್ ಗೆಲ್ಲೊ. ತಾಕಾ ಎಕಾ ಪ್ರಾಮುಖ್ಯ್ಯ್ ವಿಶಯ ವಿಶಿಂ ಮಾಹೆತ್ ಆಪ್ಣಾಂವ್ಕ್ ಆಸ್ಲ್ಲಿ. ಸುಮಾರ್ ದೋನ್ ವೊರಾಂ ರಾಯನಾ ಸಂಗಿಂ ತಾಣೆಂ ಖರ್ಚಿಲ್ಲಿ.
"ಹ್ಯಾ ಕೇಸಿ ಥಾವ್ನ್ ಫಾಲ್ಯಾಂ ಜಾಯ್ತೆಂ ಸಂಸಾರಾಚಾ ದೊಳ್ಯಾಂ ಮುಕಾರ್ ಯೆತೆಲೆಂ ರಾಯನ್!" ರಾಮ್ ಪ್ರಸಾದಾನ್ ಆಪ್ಲ್ಯಾ ಮತಿಂತ್ಲೊ ದುಬಾವ್ ಉಚಾರ್ಲ್ಲೊ. ಆಲಿಯಾಚಿ ಕೇಸ್ ತಾಣೆಂ ಬರಿಚ್ಚ್ ಅಧ್ಯಾಯನ್ ಕೆಲ್ಲಿ.
"ತುಂ ಜಾಣಾಂಯ್ ಪ್ರಸಾದ್......?" ರಾಯನಾನ್ ವಿಸ್ಕೆಚೊ ಗ್ಲಾಸ್ ಆಪ್ಲ್ಯಾ ಹಾತಿಂ ಘೆತ್ಲೊ. ಏಕ್ ಸಿಪ್ ಮಾರುನ್ ತೊ ಗ್ಲಾಸ್ ಪರ್ತ್ಯಾಕ್ ಪಾಟಿಂ ತಾಣೆಂ ಮೆಜಾರ್ ದವರ್ಲೊ. "ಎಕ್ಲ್ಯಾನ್ ಮ್ಹಜ್ಯಾಚ್ ಪಾಂಯಾಂಕ್ ಖೊಂಚಾಂವ್ಚೆಂ ಪ್ರಯತ್ನ್ ಕೆಲಾಂ. ಹೊ ರಾಯನ್, ಆಸಲ್ಯಾ ಮನ್ಶ್ಯಾಂಕ್ ಕೆದ್ನಾಂಚ್ ಭೊಗ್ಸಿನಾ! ನೆವರ್!" ರಾಯನಾಚಾ ಉಲೊಣ್ಯಾಂತ್ ತಾಚೆಂ ಹಗೆಂ ಸ್ಪಶ್ಟ್ ಝಳ್ಕಾತಾಲೆಂ.
"ಮಿಶೇಲಾಚಿ ಕಾಂಯ್ ಖಬಾರ್......?" ಪ್ರಸಾದಾನ್ ಮಿಶೇಲಾಚೊ ಉಡಾಸ್ ಕಾಡ್ಲೊ.
ಪ್ರಸಾದಾಚಾ ಸವಾಲಾಕ್ ರಾಯನಾನ್ ಕಾಂಯ್ ಜವಾಬ್ ದಿಲಿ ನಾ.
"ತುಜೆಂ ಕಾಮ್ ಖಂಯ್ ಪಾವ್ಲಾಂ....?" ರಾಯನಾನ್ ವಿಶಯ್ ಬದ್ಲಿಲೊ.
"ಮ್ಹಜ್ಯಾ ಕಾಮಾಂತ್ ಮ್ಹಾಕಾ ವಿಶ್ವಾಸ್ ಆಸಾ ರಾಯನ್! ಹಿ ಕೇಸ್ ಖಂಡಿತ್ ಜಾವ್ನ್ ಆಲಿಯಾ ಜಿಕ್ತೆಲೆಂ!" ರಾಮ್ ಪ್ರಸಾದಾನ್ ಆಪ್ಲೊ ಭರ್ವಸೊ ಉಚಾರ್ಲೊ.
"ಜಿಕೊಂಕ್ಚ್ ಜಾಯ್!" ರಾಯನ್ ಉದ್ಗಾರ್ಲೊ. "ಆಲಿಯಾಚಾ ಜಯ್ತಾಂತ್ ಮ್ಹಜೆಂ ಜಯ್ತ್ ಆಸಾ ಪ್ರಸಾದ್! ಹೆಂ ಉಡಾಸ್ ದವರ್!"
ರಾಯನಾಕ್ ಜೆವ್ಣಾಕ್ ಜಾಗಂವ್ಕ್ ವೆಚ್ಯಾ ಶೀತಲಾಕ್ ರಾಯನಾಚಿಂ ಹಿ ನಿಮಾಣಿಂ ಉತ್ರಾಂ ಕಾನಾಂಕ್ ಪಡಾನಾಸ್ತಾನಾ ಗೆಲಿಂ ನಾಂತ್.
ಸೂಜಿ ಗೋಪಾಲ ಕೃಷ್ಣ ನಾಯರ್!
ಮಹಾರಾಶ್ಟ್ರಾಂತ್ಲ್ಯಾ ಮುಂಬಯಿ ಹೈ ಕೋರ್ಟಾಂತ್ ಕೊಣಾಯ್ ವರ್ವಿಂ ಜಿಕೊಂಕ್ ಸಾದ್ಯ್ಚ್ ನಾ ಮ್ಹಳ್ಳ್ಯೊ, ಕೋಣ್ಚ್ ಸಾಕ್ಶೆದಾರ್ ನಾಸ್ತಾನಾ ಖಂಡಿತ್ ಸಲ್ವಾತಾತ್ ಮ್ಹಣೊನ್ ಭರ್ವಸೊ ಸಾಂಡ್ಲ್ಲ್ಯೊ, ಹ್ಯಾ ಕೇಸಿಂತ್ ಕಾಂಯ್ಚ್ ಭಳ್ ನಾ ಮ್ಹಣೊನ್ ಸಗ್ಳ್ಯಾ ಪ್ರಾಸಿಕ್ಯೂಟರಾಂನಿ ಹಾತ್ ಧುಲ್ಲೆಲ್ಯಾ ಕೇಸಿಂಕ್ ಹಾತಿಂ ಘೆವ್ನ್ ತಾಂಕಾ ಜಯ್ತ್ ಜೊಡುನ್ ದಿಲ್ಲೊ ಏಕ್ ಮಾತ್ರ್ ಫಾಮಾದ್ ಪ್ರಾಸಿಕ್ಯೂಟರ್ ಸುಜಿ ಗೋಪಾಲ ಕೃಷ್ಣ ನಾಯರ್!
ನಾಯರಾಚೆಂ ನಾಂವ್ ಅವ್ಚಿತ್ತ್ ಮುಂಬಯಿಚ್ಯಾ ಕಾನೂನ್ ಸಂಸಾರಾಂತ್ ಆಯ್ಕೊಂಕ್ ಮೆಳ್ಲ್ಲೆಂ. ತೊ ಹ್ಯಾ ತಾಚ್ಯಾ ಪ್ರೊಫೆಶನಾಂತ್ ನವೊ ನ್ಹಯ್ ಜಾಲ್ಯಾರ್ಯ್ ಪರ್ನೊ ಭಿಲ್ಕುಲ್ ನ್ಹಯ್! ನಾಯರಾನ್ ಆಪ್ಲೆಂ ನಾಂವ್ ಅಚಾನಕ್ ವಯ್ರ್ ಹಾಡ್ಲ್ಲೆಂ. ಹ್ಯಾ ತಾಚ್ಯಾ ವಯ್ರ್ ಆಯಿಲ್ಲ್ಯಾ ವಾವ್ರಾಂತ್ ತಾಣೆಂ ಕಾಡ್ಲ್ಲಿ ಮ್ಹಿನತ್ಚ್ ಪ್ರಮುಖ್ ಕಾರಾಣ್. ನಾಯರ್ ಕೇರಳ ಥಾವ್ನ್ ಮುಂಬಯಿ ಧಾಂವೊನ್ ಯೆತಾನಾ ಫಕತ್ತ್ ತಾಚ್ಯೆಲಾಗಿಂ ಲಾಯರಾಚಿ ಡಿಗ್ರಿ ಮಾತ್ರ್ ಆಸ್ಲ್ಲಿ. ಹಾಂಗಾ ಥಾವ್ನ್ ತಾಣೆಂ ಆಪ್ಲೆಂ ಝುಜ್ ಆರಂಭ್ ಕೆಲ್ಲೆಂ. ಆಪ್ಲ್ಯಾ ಹಾತಾಕ್ ಆಯಿಲ್ಲ್ಯಾ ಕಸಲ್ಯಾಯ್ ಕೇಸಿಕ್ ತಾಣೆಂ ಪಾಟಿಂ ಸೊಡ್ಲ್ಲೆಂ ನಾ. ತ್ಯಾ ಕೇಸಿಂತ್ ಭಳ್ ಆಸ್ಲ್ಯಾರ್ ಜಾಲೆಂ. ಅಸಲ್ಯಾ ಕೇಸಿಂಕ್ ತೊ ಸುಲಾಭಾಯೆನ್ ಜಿಕ್ತಾಲೊ. ಭಳ್ ನಾತ್ಲ್ಲ್ಯಾ ಕೇಸಿಂಕ್ ಕಶೆಂ ಪುಣಿಂ ಕರುನ್ ನಾಯರ್ ಭಳ್ ಕರ್ತಾಲೊ.
ಭರ್ತಿ ಸ ಫೀಟ್ ಲಾಂಬಾಯೆಚೊ, ತಿಕ್ಕೆ ಭಾರೀಕ್ ಜಿವಾಚೊ, ಕಾಳ್ಶ್ಯಾ ಮ್ಹಳ್ಯಾರ್ ತಿತ್ಲ್ಯಾ ವಿಶೇಶ್ ಕಾಳ್ಶ್ಯಾ ಕಾತಿಚೊ ನ್ಹಯ್ ಜಾಲ್ಯಾರ್ಯ್ ಕಾಳ್ಸೊಚ್ ಮ್ಹಣ್ಯೆತ್! ತಕ್ಲೆರ್ ದಾಟ್ ಕಾಳ್ಯಾ ವರ್ಣಾಚೆ ಭರ್ಲೆಲೆ ಕೇಸ್! ತ್ಯಾ ಕಾಳ್ಯಾ ಕೆಸಾಂಕ್ ನಾರ್ಲೆಲ್ ತೆಲಾಂತ್ ಭಿಜವ್ನ್ ಕಾಡ್ಲಾಂ ಮ್ಹಳ್ಳ್ಯಾ ಪರಿಂ ಬಿಜವ್ನ್ ಮಾತ್ಯಾರ್ ತಾಂಕಾ ಬಸಯಿಲ್ಲೆಂ. ತ್ಯಾ ಕೆಸಾಂಕ್ ಉಗಯಿಲ್ಲ್ಯಾ ದಾಂತೊಣೆಚಾ ಇರಾಂಚಿ ರುಂದಾಯ್ ಸ್ಪಶ್ಟ್ ತಾಚ್ಯಾ ಮಾತ್ಯಾರ್ ದಿಸೊನ್ ಯೆತಾಲಿ. ತೊಂಡಾರ್ ನಾರ್ಲೆಲ್ ತೆಲಾಚಿ ಶೆಳ್ ಆಸೊನ್ ತ್ಯಾ ಶೆಳಿ ಥಾವ್ನ್ ತಾಚೆಂ ತೋಂಡ್ ತ್ಯಾ ಲೈಟಾಚಾ ಉಜ್ವಾಡಾಕ್ ಮಿರ್ಮಿರ್ತಾಲೆಂ. ನೀಳ್ ತೊಂಡಾರ್ ತಾಕಾಚ್ ಸೊಭಾಯ್ ದಿಂವ್ಚ್ಯಾ ಪರಿಂ ದಿಸ್ಚೆಂ ಲಾಂಭ್ ನಾಕ್! ಪಾತಳ್ ಆಸ್ಡ್ಯೊ, ಹಳ್ಟ್ ಗುಂಡಾಯೆಂತ್ ಆಸ್ಚೆ ಕಾಳೆ ದೊಳೆ, ಜಶೆಂ ಆಗಸಾ ವಯ್ಲೊ ಪಾಕ್ಕಿಸಾಳೊ ಹ್ಯಾ ಧರ್ಣಿ ವಯ್ಲ್ಯಾ ತಣಾ ಮಧೆಂ ಚರ್ಚ್ಯಾ ಸರೊಪಾಕ್ ಸೊಧ್ತಾ ತಶೆಂ!
ನಾಯರಾಕ್ ಕೋರ್ಟಾಂತ್ ಝುಜ್ಚೆಂ ಮ್ಹಳ್ಯಾರ್ ಭರ್ಲೆಲ್ಯಾ ಉದ್ಕಾಚಾ ಬಾಂಯ್ತ್ ತಾಕಾ ದ್ವಂದ್ವ್ ಝುಜಾಕ್ ದೆಂವ್ಲ್ಲ್ಯಾ ಪರಿಂ. ನಾಯರ್ ಆಪ್ಣೆ ಡಿಫೆಂಡಂಟ್ ಕರ್ಚ್ಯಾ ಕಕ್ಶಿದಾರಾಕ್ ಸಲ್ವೊಂಕ್ ಸೊಡುನ್ ಸೊಡುನ್ ತಾಕಾ ಕಶೆಂ ಜಿಕಯ್ತಾ ಆನಿ ಆಪ್ಣಾಚಾ ವಿರುದ್ಧ್ ರಾವ್ಲೆಲ್ಯಾ ಮ್ಹನ್ಶ್ಯಾಕ್ ಜಯ್ತಾಚ್ಯಾ ಪಾಂವ್ಡ್ಯಾರ್ ಪಾವವ್ನ್ ಪಾವವ್ನ್ ತಾಕಾ ಕಶೆಂ ಸಲ್ವಯ್ತಾ ತೆಂ ಕೊಣಾಕ್ಚ್ ಕಳಿತ್ ಜಾಯ್ನಾತ್ಲ್ಲೆಂ. ಕೇಸ್ ಇತ್ಯರ್ಥ್ ಕರುಂಕ್ ಬಸ್ಲಲೊ ಜಡ್ಜ್ ಪಾಸೊನ್ ನಾಯರಾಚಾ ಹ್ಯಾ ಬುದ್ವಂತ್ಕಾಯೆಕ್ ವಿಜ್ಮಿತ್ ಜಾತಾಲೊ. ಕೊರ್ಟಾ ಭಿತರ್ ಉಭೊ ಜಾಲ್ಲ್ಯಾ ಖಂಯ್ಚಾಯ್ ಮನ್ಶ್ಯಾಕ್ ಎಕಾಚ್ ನದ್ರೆನ್ ನಾಯರ್ ವಾಚ್ತಾಲೊ. ಹ್ಯಾ ತಾಚ್ಯಾ ತಾಲೆಂತಾಕ್ ಸರಿ ಜಾಂವ್ಚೊ ಕೊಣ್ಯ್ ನಾತ್ಲ್ಲೊ. ಹೆಂ ತಾಲೆಂತ್ ತಾಣೆಂಚ್ ಝುಜೊಂಕ್ ವಾಪಾರ್ಚೆಂ ಏಕ್ ಆಯ್ದ್ ಮ್ಹಣೊನ್ ಕೊಣಾಯ್ಕ್ಯ್ ಸಮ್ಜಾನಾತ್ಲ್ಲೆಂ.
ಇಕ್ಬಾಲಾನ್ ಆಪ್ಲಿ ಕೇಸ್ ಝುಜೊಂಕ್ ಆಪ್ಣಾಕ್ ಡಿಫೆಂಡಂಟ್ ಜಾವ್ನ್ ನಾಯರಾಕ್ ವಿಂಚ್ಲೊ. ಇಕ್ಬಾಲಾ ತಸಲ್ಯಾ ಮನ್ಶ್ಯಾಂನಿ ನಾಯರಾಚಾ ಘರಾ ಬಾಗ್ಲಾರ್ ತಾಕಾ ಸೊಧುನ್ ವೆಚೆಂ ಹೆಂ ನವೆಂ. ನಾಯರಾನ್ ಹಾಚ್ಯಾ ಪಯ್ಲೆಂ ಅಸಲ್ಯಾ ಹೈ ಪ್ರೊಫೈಲಾಚ್ಯಾ ಮನ್ಶ್ಯಾಂಚಾ ಕೇಸಿಂನಿ ಹಾತ್ ಘಾಲ್ಲೊ ಮಸ್ತ್ ಉಣೊ. ತಾಕಾ ಅಸಲೊ ಸಂಧರ್ಭ್ ಸೊಧುನ್ ಯೇಂವ್ಕ್ ನಾತ್ಲ್ಲೊ. ಹೈ ಪ್ರೊಫೈಲಾಚಾ ಸೊಸೈಟಿಂತ್ಲ್ಯಾಚಿಂ ಕಾಮಾಂ, ತ್ಯಾಚ್ ಸ್ಟ್ಯಾಂಡರ್ಡಾಚಾ ಲಾಯರಾಂ ಥಾವ್ನ್ ಜಾತಾಲಿಂ. ಪುಣ್ ಇಕ್ಬಾಲಾಕ್ ಆಪ್ಣಾಚಿ ಹಿ ಕೇಸ್ ಜಿಕೊಂಕ್ಚ್ ಜಾಯ್ ಆಸ್ಲ್ಲಿ. ಇಕ್ಬಾಲಾನ್ ನಾಯರಾಕ್ ಸೊಧುನ್ ಯೆಂವ್ಚ್ಯಾ ಪಯ್ಲೆಂ ಆಪ್ಲ್ಯಾ ಲಾಯರಾಂಚೊ ವಿಚಾರ್ ಕೆಲ್ಲೊ. ನಿಜಾಯ್ಕ್ಯ್ ಹ್ಯಾ ಕೇಸಿಂತ್ ಇಕ್ಬಾಲಾನ್ ಜಿಕ್ಚಿ ಸಾದ್ಯತಾ ಮಸ್ ಉಣಿಂ ಆಸ್ಲ್ಲಿ. ಹರ್ಯೆಕಾ ವಾಟೆನ್ ಹಿ ಕೇಸ್ ಆಲಿಯಾಚಾ ತರ್ಫೆನ್ಚ್ ಭಳ್ ಆಸ್ಲ್ಲಿ. ಹ್ಯಾಚ್ ಖಾತಿರ್ ತಾಚ್ಯಾ ಲಾಯರಾಂನಿ ತಾಕಾ ನಾಯರಾ ವಿಶಿಂ ಕಳಿತ್ ಕೆಲ್ಲೆಂ. ಕಿತ್ಯಾಕ್, ತೆ ಜಾಣಾಂ ಆಸ್ಲ್ಲೆ...., ಹ್ಯಾ ಕೇಸಿಂತ್ ಕಾಂಯ್ ಭಳ್ ಹಾಡುಂಕ್ ಜಾಯ್ ಜಾಲ್ಯಾರ್ ತ್ಯಾ ನಾರ್ಲಾಚೆಂ ತೇಲ್ ಪಿಯೆವ್ನ್ ಪಿಯೆವ್ನ್ ತ್ಯಾ ಪಾದರಸ ಪರಿಂ ಚುರುಕ್ ಜಾಲ್ಲ್ಯಾ ತ್ಯಾ ನಾಯರಾಚ್ಯಾ ಮತಿನ್ ಮಾತ್ರ್!
ಆಪ್ಣಾಚಾ ವಿಶಿಂ ಇಕ್ಬಾಲ್ಯ್ ಸಾರ್ಕೆಂ ಜಾಣಾಂ. ಆಲಿಯಾನ್ ಆಪುಣ್ ಆಪ್ಲೆಂ ಪಿಟಿಶನ್ ಬದ್ಲಿತಾಂ ಮ್ಹಳ್ಳ್ಯಾ ಧಯ್ರಾರ್ ಆಪುಣ್ ಪೊಲಿಸಾಂಕ್ ಸರೆಂಡರ್ ಕಶೆಂಯ್ ಜಾಲಾಂ. ಆಲಿಯಾನ್ ಆಪ್ಲೆಂ ಪಿಟಿಶನ್ ಬದ್ಲುಂಚಾ ಖಾತಿರ್ ಆಪ್ಣಾಚೆಂ ಎಕ್ಚ್ ಏಕ್ ಕಾಮ್ ಕರುಂಕ್ ಸಾಂಗ್ಲ್ಲೆಂ. ನಾಸಿರಾಚೆಂ ಆನಿ ತಾಚ್ಯಾ ಕುಟ್ಮಾಚ್ಯಾ ದೌಲತೆಚೆಂ ನಿಸ್ಸಂತಾನ್! ಹೆಂ ಆಪ್ಣೆಂ ಕೆಲಾಂ. ತರ್ಯ್ ಆಲಿಯಾನ್ ಆಜ್ ಪಾಸೊನ್ ತಾಣೆಂ ಕರ್ತಾಂ ಮ್ಹಳ್ಳೆಂ ಕಾಮ್ ಕರುಂಕ್ ನಾಂ. ಆಪ್ಣೆಂ ಪೊಲಿಸಾಂಕ್ ದಿಲ್ಲೆಂ ಪಿಟಿಶನ್ ತಾಂಚೆಲಾಗಿಂ ತಾಣೆಂ ಕೆಲ್ಲೊ ತಾಚ್ಯಾಚ್ ಹಲ್ಲ್ಯಾಚೊ ಉಚಾರ್ ತಾಣೆಂ ಬದ್ಲುಂಕ್ ನಾ. ಕಾಂಯ್ ತೆಂ ಬದ್ಲಿನಾ ಜಾಲ್ಯಾರ್? ವ್ಹಯ್, ಆಲಿಯಾ ಆಪ್ಲ್ಯಾ ಉಚಾರಾಕ್ ಬದ್ಲಿನಾ ಜಾಲ್ಯಾರ್ ಆಪುಣ್ ಜೈಲಾಕ್ ಗೆಲ್ಲ್ಯಾ ಪರಿಂಚ್! ಆಪ್ಣಾಕ್ ಬಾಚಾವ್ ಕರುಂಕ್ ಸಾದ್ಯ್ಚ್ ನಾ. ಅಸಲ್ಯಾ ಪರಿಸ್ಥಿತೆಂತ್ ಇಕ್ಬಾಲಾನ್ ಹ್ಯಾ ನಾಯರಾ ವಯ್ರ್ ಭರ್ವಸೊ ದವರ್ಲ್ಲೊ.
ಇಕ್ಬಾಲಾಚಿ ಕೇಸ್ ಸಮ್ಜೊಂಕ್ ಆನಿ ತ್ಯಾ ಕೇಸಿ ವಿಶ್ಯಾಂತ್ ವಿಚಾರ್ ವಿನಿಮಯ್ ಕರುಂಕ್ ನಾಯರಾನ್ ಚ್ಯಾರ್ ವೊರಾಂ ಘೆತ್ಲ್ಲಿಂ. ಹ್ಯಾ ಚ್ಯಾರ್ ವೊರಾಂತ್ ನಾಯರಾಕ್ ಹೆಂ ಸ್ಪಶ್ಟ್ ಜಾಲ್ಲೆಂ ಕೀ ಹ್ಯಾ ಕೇಸಿಕ್ ಜಿಕಂವ್ಚೆಂ ಮ್ಹಳ್ಯಾರ್ ವ್ಹಾಳ್ವಾಟೆಂತ್ ಬಾಂಯ್ ಖೊಂಡ್ಚಿ! ಭರ್ವಸೊ ಜಾಯ್ ಫಕತ್ತ್ ಭರ್ವಸೊ ಜಾಯ್! ನಾಯರಾಕ್ ಆಪ್ಣಾ ವಯ್ರ್ ಭರ್ವಸೊ ಆಸಾ. ಹ್ಯಾಚ್ ಖಾತಿರ್ ತಾಣೆಂ ಹಿ ಕೇಸ್ ಘೆತ್ಲಿ.
"ಪಳೆ ಇಕ್ಬಾಲ್!" ಆಪ್ಣಾ ವಯ್ರ್ ಭರ್ವಸೊ ದವರುನ್ ಯೆಂವ್ಚ್ಯಾ ಹರ್ಯೆಕಾ ಆಫ್ರಾಧಿ ಮ್ಹಣೊನ್ ಠರಾಯಿಲ್ಲ್ಯಾ ಪುಣ್ ತೆಂ ರುಜು ಜಾಯ್ನಾತ್ಲ್ಲ್ಯಾ ಮನ್ಶ್ಯಾಂಲಾಗಿಂ ಉಲಂವ್ಚ್ಯಾ ಪರಿಂಚ್ ನಾಯರ್ ಇಕ್ಬಾಲಾ ಲಾಗಿಂಯ್ ಉಲಯಿಲ್ಲೊ."ಹ್ಯಾ ಕೇಸಿಕ್ ಸಂಭಂಧ್ ಆಸ್ಲ್ಲಿ ಸಗ್ಳಿ ಜಾಣ್ವಾಯ್ ತುವೆಂಚ್ ಆಸಾ ತಶಿ ಮ್ಹಾಕಾ ಸಾಂಗ್ಲ್ಯಾರ್ ಬರಿ ಆಸಾ. ಕಾಂಯ್ಚ್ ಲಿಪವ್ನ್ ದವರ್ಚೆಂ ಪ್ರಯತ್ನ್ ಕರಿನಾಕಾ. ಹಾಂಗಾ ಲಿಪಯಿಲ್ಲೆಂ ಸಗ್ಳೆಂ ಕೊರ್ಟಾಂತ್ ಉಗ್ತೆಂ ಜಾತೆಲೆಂ. ದೆಕುನ್ ಸವಿಸ್ತಾರ್ ರಿತಿನ್ ಸಗ್ಳೆಂ ಮ್ಹಾಕಾ ವಿವರುನ್ ಸಾಂಗ್!"
ನಾಯರಾಚಾ ಉತ್ರಾಂಕ್ ಪಾಳೊ ದೀವ್ನ್ ಇಕ್ಬಾಲಾನ್ ಸಗ್ಳಿ ಖಬಾರ್ ಆಸಾ ತಶಿ ನಾಯರಾಕ್ ಕಳಯ್ಲಿ. ಪುಣ್ ಆಲಿಯಾ ಆನಿ ಆಪ್ಣಾ ಮಧೆಂ ಜಾಲ್ಲ್ಯಾ ಡೀಲಿಂಗಾಚಿ ಖಬಾರ್ ಆನಿ ಮಿಶೇಲಾಚಾ ಅಪಹರಣಾಚಿ ಖಬಾರ್ ಮಾತ್ರ್ ತಾಣೆಂ ನಾಯರಾ ಥಾವ್ನ್ ಲಿಪೊನ್ ದವರ್ಲಿ.
"ತುಂ ಸತ್ ಸಾಂಗ್ತಾಯ್ ಇಕ್ಬಾಲ್......?" ನಾಯರಾಕ್ ಇಕ್ಬಾಲಾ ವಯ್ರ್ ದುಬಾವ್ ಉದೆಲ್ಲೊ.
"ಹಾಂ! ಹಾಚ್ಯಾ ಭಾಯ್ರ್ ಕಾಂಯ್ಚ್ ನಾ!" ಇಕ್ಬಾಲಾನ್ ಧಯ್ರಾನ್ ಜವಾಬ್ ದಿಲ್ಲಿ.
"ಜರ್ ತರ್ ಆಲಿಯಾ ವಯ್ರ್ ಹಲ್ಲೊ ಚಲಯಿಲ್ಲೊ ಮನಿಸ್ ತುಂ ಜಾಲ್ಯಾರ್, ಆಪ್ಣಾ ವಯ್ರ್ ಹಲ್ಲೊ ಚಲಯಿಲ್ಲೊ ಮನಿಸ್ ಹೊ ಮ್ಹಣೊನ್ ಆಲಿಯಾನ್ ತುಕಾ ಬೋಟ್ ಜೊಕ್ಚ್ಯಾಂತ್ ಕಾಂಯ್ ದುಬಾವ್ ನಾ. ತುಂ ಮ್ಹಣ್ತಾಯ್ ಆಲಿಯಾ ವಯ್ರ್ ತುವೆಂ ಹಲ್ಲೊ ಚಲಂವ್ಕ್ ನಾಂಯ್! ತುಂ ಸತ್ ಸಾಂಗ್ತಾಯ್ ಜಾಲ್ಯಾರ್ ಆಲಿಯಾ ವಯ್ರ್ ಹಲ್ಲೊ ಚಲಯಿಲ್ಲೊ ಮನಿಸ್ ಕೋಣ್.......? ತ್ಯಾ ಶಿವಾಯ್ ಆಲಿಯಾ ತುಕಾಚ್ ಕಿತ್ಯಾಕ್ ಬೋಟ್ ಜೊಕ್ತಾ.....? ಹಿ ಚೊರಿಯೆಚಿ ಕೇಸ್ ನ್ಹಯ್ ಇಕ್ಬಾಲ್! ಚೊರಿಯೆಂತ್ ಜಾಲ್ಯಾರ್ ತುಜ್ಯಾ ಘರಾ ತುವೆಂಚ್ ಚೊರುನ್ ದುಸ್ರ್ಯಾ ವಯ್ರ್ ಆಫ್ರಾದ್ ಮಾಂಡುಂಕ್ ಜಾತಾ! ಹಾಂಗಾಸರ್ ಆಲಿಯಾಚಿ ಹತ್ಯಾ ಕರ್ಚೆಂ ಪ್ರಯತ್ನ್ ಚಲ್ಲಾಂ! ತೆಂ ಮರ್ಣಾಂತ್ಲೆಂ ವಾಂಚ್ಲಾಂ. ಸಗ್ಳಿ ಆಸ್ಪತ್ರ್ ನ್ಹಯ್ ಆಸ್ತಾಂ ಸಗ್ಳೆಂ ಬಾಲಿವುಡ್ ಹಾಕಾ ಸಾಕ್ಸ್ ಆಸಾ! ಆಶೆಂ ಆಸ್ತಾನಾ ಮ್ಹಾಕಾ ದಿಸ್ತಾ ತುಂ ಸತ್ ಉಲಯ್ನಾಂಯ್....!" ನಾಯರಾನ್ ಉಚಾರ್ಲ್ಲ್ಯಾ ದುಬಾವಾ ಮುಕಾರ್ ಇಕ್ಬಾಲ್ ಕಾಂಯ್ಚ್ ಉಲಯಿಲ್ಲೊ ನಾ. ತೊ ಮೌನ್ ಆಸ್ಲ್ಲೊ.
"ಪಳೆ ಇಕ್ಬಾಲ್! ತುವೆಂ ಜರ್ ತರ್ ಹಲ್ಲೊ ಕೆಲಾಯ್ ಮ್ಹಣೊನ್ ತುಂ ಮ್ಹಜ್ಯೆಲಾಗಿಂ ಒಪ್ತಾಯ್ ಜಾಲ್ಯಾರ್ ಮ್ಹಾಕಾ ಹ್ಯಾ ತುಜ್ಯಾ ಕೇಸಿಂತ್ ನಿಜಾಯ್ಕ್ಯ್ ಕಿತೆಂ ಆಸಾ ಮ್ಹಳ್ಳೆಂ ಸಮ್ಜಾತಾ. ಹ್ಯಾ ಸಮ್ಜಣೆ ಥಾವ್ನ್ ಹಾಂವ್ ತುಕಾ ಬಾಚಾವ್ ಕರುಂಕ್ಯ್ ಸಕ್ತಾಂ. ನಾ ಬಚಾವ್ ಕರುಂಕ್ಯ್ ಸಕ್ತಾಂ. ಪುಣ್ ಮ್ಹಾಕಾ ಸಾರ್ಕೆಂ ಕಳೊಂಕ್ ಜಾಯ್ ಕೀ ತುವೆಂ ಹಲ್ಲೊ ಕೆಲಾಯ್ ವಾ ನಾ!" ನಾಯರ್ಚ್ ಪರ್ತ್ಯಾಕ್ ಉಲಯ್ಲೊ.
"ಹಾಂವ್ ಸತ್ಚ್ ಸಾಂಗ್ತಾಂ ನಾಯರ್! ಹಾವೆಂ ಹೊ ಹಲ್ಲೊ ಕರುಂಕ್ ನಾ! ಹಾಂವ್ಚ್ ನೆಣಾಂ ಆಲಿಯಾ ವಯ್ರ್ ಹೊ ಹಲ್ಲೊ ಕೊಣೆ ಕೆಲಾ ತೊ!" ಇಕ್ಬಾಲಾನ್ ಸತ್ಚ್ ಸಾಂಗ್ಲೆಂ.
"ಬರೆಂ ತರ್! ಮ್ಹಾಕಾ ಜೆದ್ನಾ ಜೆದ್ನಾಂ ತುಜಿ ಗರ್ಜ್ ಪಡ್ತಾ ತೆದ್ನಾಂ ಹಾಂವ್ ತುಕಾ ಆಪಯ್ತಾಂ! ಹ್ಯಾ ಕೇಸಿಚಾ ವಿಶ್ಯಾಂತ್ ಹಾವೆಂ ಆತಾಂ ಅಧ್ಯಾಯನ್ ಕರುಂಕ್ ಆಸಾ! ಹಾಂವ್ ತುಜಿ ಕೇಸ್ ಘೆಂವ್ಕ್ ತಯಾರ್ ಆಸಾಂ!" ನಾಯರ್ ಒಪ್ಲೊ.
ದಿಸಾಳ್ಯಾ ಪತ್ರಾಂನಿ ತಶೆಂ ಟಿ.ವಿ. ನಿವ್ಸಾಚೆರ್ ಆಲಿಯಾಚ್ಯಾ ಕೇಸಿನ್ ವ್ಹಾಡಂವ್ಚಿ ಆತುರಾಯ್ ತಾಣೆಂಯ್ ಪಳೆಲ್ಲಿ. ಇಕ್ಬಾಲ್ ಪೊಲಿಸಾಂಕ್ ಸರೆಂಡರ್ ಜಾಲ್ಲ್ಯಾ ವೆಳಾರ್ ತಾಕಾ ಪೊಲಿಸ್ ಕಸ್ಟಡಿ ಥಾವ್ನ್ ಬೇಯ್ಲ್ ದಿವಯಿಲ್ಲೊ ಇಕ್ಬಾಲಾಚೊ ಖಾಸ್ಗಿ ಲಾಯರ್. ಆತಾಂ ಇಕ್ಬಾಲ್ ಆಪ್ಣಾ ತೆವ್ಶಿಂ ಆಯ್ಲಾ ಮ್ಹಳ್ಯಾರ್ ಖಂಡಿತ್ ಜಾವ್ನ್ ಇಕ್ಬಾಲಾಕ್ ಆಪ್ಣೆ ಕೇಸ್ ಜಿಕ್ಚ್ಯಾ ವಿಶಿಂ ದುಬಾವ್ ಆಸಾ. ಆಪ್ಣೆಂ ಕೇಸ್ ಜಿಕ್ಚ್ಯಾ ವಿಶಿಂ ಇಕ್ಬಾಲಾಕ್ ಜರ್ ದುಬಾವ್ ಆಸಾ ತರ್ ಇಕ್ಬಾಲ್ ನಿರಫ್ರಾಧಿ ನ್ಹಯ್! ತೊ ನಿರಫ್ರಾಧಿ ನ್ಹಯ್ ಜಾಲ್ಯಾರ್ ಖಂಯ್ ತರ್ಯ್ ಹ್ಯಾ ಆಫ್ರಾಧಾಂತ್ ತಾಚೊ ಹಾತ್ ಆಸಾ. ಹ್ಯಾ ಆಫ್ರಾಧಾಂತ್ ತಾಚೊ ಹಾತ್ ಆಸಾ ಜಾಲ್ಯಾರ್ ಖಂಯ್ ಆಸಾ? ಹೆಂ ಇಕ್ಬಾಲಾನ್ ಆನಿ ರಾಶಿದಾನ್ ಆಪ್ಣಾ ಥಾವ್ನ್ ಕಿತ್ಯಾಕ್ ಲಿಪವ್ನ್ ದವರ್ಲಾಂ? ಕಿತ್ಯಾಕ್.....? ಕಿತ್ಯಾಕ್....? ಕಿತ್ಯಾಕ್...? ನಾಯರ್ ದುಬಾವಾಕ್ ಇಡೆಂ ದೀನಾತ್ಲ್ಲೊ. ತಾಣೆಂ ತಕ್ಶಣಾಂಚ್ ಇಕ್ಬಾಲಾಕ್ ಪೋನ್ ಕೆಲೆಂ.
"ಏಕ್ ವಿಶಯ್ ಇಕ್ಬಾಲ್! ತುಂ ಮ್ಹಜ್ಯಾಲಾಗಿಂ ಕಾಂಯ್ ತರೀ ಸಾಂಗೊಂಕ್ ವಿಸ್ರಾಲಾಯ್...? ನಾಯರಾನ್ ಇಕ್ಬಾಲಾಕ್ ವಿಚಾರ್ಲೆಂ.
"ಖಂಯ್ಚಾ ವಿಶಯಾಂತ್?"
"ತ್ಯಾಚ್.... ಆಲಿಯಾಚಾ ಹಲ್ಲ್ಯಾಚಾ ವಿಶಯಾಂತ್!"
"ನಾ! ಕಾಂಯ್ಚ್ ವಿಸ್ರೊಂಕ್ ನಾ!" ಇಕ್ಬಾಲಾಚಾ ತಾಳ್ಯಾಂತ್ ಕಾಂಯ್ ಬದ್ಲಾವಣ್ ನಾತ್ಲ್ಲಿ.
"ಖಂಡಿತ್......?"
"ವ್ಹಯ್!"
ಹ್ಯಾ ಉಪ್ರಾಂತ್ ನಾಯರಾನ್ ಆಪ್ಲ್ಯಾ ತಕ್ಲೆಕ್ ವಿರಾಮ್ ದಿಲೊ ನಾ.
ಮುಂಬಯಿ ಹೈ ಕೋರ್ಟಾಚಾ ಕ್ರಿಮಿನಲ್ ಕೇಸಿಂಕ್ಚ್ ಮ್ಹಣೊನ್ ಠರಾಯಿಲ್ಲ್ಯಾ ಕೋರ್ಟ್ ರುಮಾಂತ್ ಎದೊಳ್ಚ್ ಸಗ್ಳಿಂ ಹಾಜರ್ ಜಾಲ್ಲಿಂ.
ಹ್ಯಾಚ್ಚ್ ವೆಳಾರ್!
ಏಕ್ ಧವೆಂ ಮಾರುತಿ ಕಾರ್ ಸಗ್ಳೆಂಚ್ ಲೈಟ್ ಸಿಲ್ವರ್ ರಂಗಾಚಾ ಆರ್ಶ್ಯಾಂನಿ ಭಂಧ್ ಆಸ್ಲ್ಲೆಂ ಮುಕ್ಲ್ಯಾ ಮುಖ್ಯ್ ರಸ್ತ್ಯಾರ್ ಥಾವ್ನ್ ಭಿತರ್ ಆಯಿಲ್ಲೆಂ ತೆಂ ಕೊರ್ಟಾಚಾ ಪಾರ್ಕಿಂಗಾರ್ ಯೇವ್ನ್ ರಾವ್ಲೆಂ. ಥೊಡ್ಯಾ ವೆಳಾಕ್ ಕಾರಾರ್ ಥಾವ್ನ್ ಕೊಣ್ಯ್ ದೆಂವ್ಲೆಂ ನಾ. ತ್ಯಾ ಕಾರಾಚೆ ಆರ್ಶೆ ಸಗ್ಳೆ ಭಂಧ್ ಆಸ್ಲ್ಲೆ.
ಕೊರ್ಟಾಚಾ ಆವರಣಾ ಭಾಯ್ರ್ ಜಮೊ ಆಸ್ಲ್ಲೊ ಮೀಡಿಯಾಚೊ ಲೋಕ್ ಕೊರ್ಟಾ ತೆವ್ಶಿಂ ಯೆಂವ್ಚ್ಯಾ ಹರ್ಯೆಕಾ ವಾಹನಾಂ ವಯ್ರ್ ಆಪ್ಲಿ ನದರ್ ಮಾರುನ್ ತಾಂಕಾ ಜಾಯ್ ಆಸ್ಲ್ಲ್ಯಾ ವ್ಯಕ್ತಿಕ್ ಸೊದ್ತಾಲೊ. ತಾಂಚಾ ಹಾತಾಂತ್ಲೊ ಕ್ಯಾಮಾರಾ ಖಂಯ್ಚ್ಯಾಯ್ ವಗ್ತಾರ್ ತಾಣಿಂ ಆಶೆಂವ್ಚ್ಯಾ ವ್ಯಕ್ತಿಂಚಿ ತಸ್ವೀರ್ ಘೆಂವ್ಕ್ ತಯಾರ್ ಆಸ್ಲ್ಲೊ.
ತಿತ್ಲ್ಯಾರ್!
ತ್ಯಾ ಕೋರ್ಟ್ ಆವರಣಾಚಾ ಪಾರ್ಕಿಂಗಾರ್ ಪಯ್ಲೆಂ ಯೇವ್ನ್ ರಾವ್ಲೆಲ್ಯಾ ತ್ಯಾ ಸಿಲ್ವರ್ ರಂಗಾಚಾ ಆರ್ಶ್ಯಾಚಾ ಧವ್ಯಾ ಮಾರುತಿ ಕಾರಾಚೆಂ ದಾರ್ ಉಗ್ತೆಂ ಜಾವ್ನ್ ತ್ಯಾ ಕಾರಾ ಥಾವ್ನ್ ಏಕ್ ವ್ಯಕ್ತಿ ಸಕಯ್ಲ್ ದೆಂವ್ಲಿ.
ಆಲಿಯಾ ಖಾನ್!
ಪಾತಳ್ ನಿಳ್ಶ್ಯಾ ಸಲ್ವಾರ್ ಕಮೀಜಾಚೆರ್ ಸೊಭಿತ್ ಸೊಭ್ಚೆಂ ಆಲಿಯಾ ತ್ಯಾ ಕಾರಾರ್ ಥಾವ್ನ್ ದೆಂವ್ಲ್ಲೆಂಚ್ ವೆವೆಗ್ಗಿಂ ಕೋರ್ಟಾ ಭಿತರ್ ಚಲೊಂಕ್ ಲಾಗ್ಲೆಂ. ಪುಣ್ ತಿತ್ಲ್ಯಾರ್ ಸಭಾರಾಂನಿ ತಾಚಿ ವ್ಹಳಕ್ ಧರುನ್ ಜಾಲ್ಲಿ. ಮೀಡಿಯಾಚೆ ಆಪ್ಲ್ಯಾ ಕ್ಯಾಮರಾಕ್ ಘೆವ್ನ್ ಹೆವ್ಶಿಂ ಧಾಂವೊನ್ ಯೇಂವ್ಕ್ ಲಾಗ್ಲೆ. ಭಾಯ್ಲ್ಯಾ ಕಾರ್ ಪಾರ್ಕಿಂಗಾ ಥಾವ್ನ್ ಕೊರ್ಟಾ ಭಿತರ್ ಪಾಂವ್ಚ್ಯಾ ವಗ್ತಾರ್ ಆಲಿಯಾಕ್ ಸಗ್ಳ್ಯಾ ಮೀಡಿಯಾಚ್ಯಾಂನಿ ತಶೆಂ ಪ್ರೆಸ್ಸಾಚ್ಯಾಂನಿ ವೆಡೊ ಮಾರ್ಲೊ. ಕೊಣಾಯ್ಚಾ ಸವಾಲಾಕ್ ಕಾಂಯ್ ಜವಾಬ್ ದೀನಾಸ್ತಾನಾ ಪೊಲಿಸಾಂಚಾ ಸೆಕ್ಯೂರಿಟಿ ಮಧೆಂ ಆಲಿಯಾ ಕೋರ್ಟ್ ರುಮಾಕ್ ಪಾವ್ಲೆಂ. ತಾಚ್ಯಾ ಸವೆಂ ರಘುಪತಿ ಆಸ್ಲ್ಲೊ.
ಥೊಡ್ಯಾ ತೆಂಪಾ ಪಯ್ಲೆಂ ತ್ಯಾ ಕ್ರಾಪರ್ಡ್ ಮಾರ್ಕೆಟಿಂತ್ ಪಾಸೊನ್ ತೆಂ ಉಗ್ತ್ಯಾನ್ ಭೊಂವ್ತಾನಾ ತಾಕಾ ವಳ್ಕಾಲ್ಲೊ ಕೊಣ್ಯ್ ನಾತ್ಲ್ಲೊ. ತೆದ್ನಾಂ ಹ್ಯಾ ಆಲಿಯಾಚೆಂ ಕೊಣಾಯ್ಕ್ಯ್ ಪಡೊನ್ ವಚೊಂಕ್ ನಾತ್ಲ್ಲೆಂ. ಆಜ್.....!
ಆಜ್ ಆಲಿಯಾಕ್ ಆಪ್ಲ್ಯಾ ಘರಾ ಥಾವ್ನ್ ಭಾಯ್ರ್ ಯೆಂವ್ಚೆಂ ಸುಲಾಭಾಯೆಚೆಂ ನ್ಹಯ್ ಆಸ್ಲ್ಲೆಂ.
ಕಿತ್ಲೊ ವ್ಯತ್ಯಾಸ್! ಥೊಡ್ಯಾಚ್ ಥೆಂಪಾ ಭಿತರ್ ಆಲಿಯಾ ಸಂಪೂರ್ಣ್ ಬದ್ಲಾಲ್ಲೆಂ. ತ್ಯಾ ಆದ್ಲ್ಯಾ ಆಲಿಯಾಕ್ ಆನಿ ಹ್ಯಾ ಆತಾಂಚಾ ಆಲಿಯಾಕ್ ಕಿತ್ಲೊ ವ್ಯತ್ಯಾಸ್ ಆಸಾ ತೆಂ ಆಲಿಯಾಕ್ ಆಜ್ ಹ್ಯಾ ಕೋರ್ಟ್ ಆವರಣಾ ಥಾವ್ನ್ ಕೋರ್ಟ್ ರುಮಾ ಭಿತರ್ ಪಾಂವ್ಚ್ಯಾ ವಗ್ತಾರ್ ಕಳೊನ್ ಆಯ್ಲೆಂ. ಹ್ಯಾ ವಗ್ತಾರ್ ತ್ಯಾ ರಕ್ಶಣೆಚ್ಯಾ ಪೊಲಿಸಾಂ ಸವೆಂ ರಾಮ್ ಪ್ರಸಾದಾಚೊ ಜ್ಯೂನಿಯರ್ ಲಾಯರ್ ರಘುಪತಿನ್ ಆಲಿಯಾಕ್ ತಾಚ್ಯಾ ಪ್ಲ್ಯಾಟಾ ಥಾವ್ನ್ ಹಾಂಗಾ ಪಾಸೊನ್ ಸಾಂಗಾತ್ ದಿಲ್ಲೊ.
ರಘುಪತಿ ಆಲಿಯಾಕ್ ಕೋರ್ಟ್ ರುಮಾಂತ್ ತಾಣೆಂ ಬಸೊಂಕ್ ಆಸ್ಚ್ಯಾ ಬಸ್ಕೆರ್ ಬಸವ್ನ್ ಭಾಯ್ರ್ ಗೆಲ್ಲೊ. ತಾಕಾ ಆತಾಂ ರಾಮ್ ಪ್ರಸಾದಾಕ್ ಮೆಳೊಂಕ್ ಆಸ್ಲ್ಲೆಂ.
ಆಲಿಯಾಚಾ ಕೇಸಿಕ್ ಆಯ್ಕೊಂಕ್, ಆನಿ ಹ್ಯಾ ಆಲಿಯಾಚಾ ಕೇಸಿಕ್ ಸಂಭಂಧ್ ಆಸ್ಲ್ಲೊ ಲೋಕ್ ತ್ಯಾ ಕೋರ್ಟ್ ರುಮಾಂತ್ ಭರೊನ್ ಗೆಲ್ಲೊ. ಆಲಿಯಾಕ್ ತ್ಯಾ ಕುಶಿನ್ ಪಳಂವ್ಚೆಂ ಧಯ್ರ್ ಆಯ್ಲೆಂ ನಾ. ತಾಣೆಂ ತ್ಯಾ ಕುಶಿನ್ ಪಳೆಲ್ಲೆಂ ಜಾಲ್ಯಾರ್ ತಾಕಾ ತ್ಯಾ ಲೊಕಾಂ ಮಧೆಂ ತಾಚೊ ಬಾಪಯ್ ಆನಿ ದಿಸೊನ್ ಯೆತೊ. ತ್ಯಾ ಭಾಯ್ರ್ ನಾಸಿರ್ ಆಸ್ಲ್ಲೊ ಅಮೀನಾ ಆಸ್ಲ್ಲೆಂ.
ಇಕ್ಬಾಲ್ ಅಜೂನ್ ಕೊರ್ಟಾಕ್ ಪಾವೊಂಕ್ ನಾತ್ಲ್ಲೊ. ತಾಚೊ ಪ್ರಾಸಿಕ್ಯೂಟರ್ ಜಾಂವ್, ರಾಮ್ ಪ್ರಸಾದ್ ಜಾಂವ್ ಎದೊಳ್ ಕೊರ್ಟಾಂತ್ ಹಾಜರ್ ಜಾಂವ್ಕ್ ನಾತ್ಲ್ಲೆ.
ರಾಯನಾನ್ ನಿಮಾಣ್ಯಾ ಘಡಿಯೆ ಆಲಿಯಾಕ್ ಸಂಪೂರ್ಣ್ ಧಯ್ರ್ ದಿಲ್ಲೆಂ. ಆಲಿಯಾನ್ ರಾಯನಾಕ್ ಕೊರ್ಟಾಕ್ ಯೆಂವ್ಚೊ ಉಲೊ ದಿಲೊ ಜಾಲ್ಯಾರ್ಯ್ ರಾಯನಾಕ್ ಯೇಂವ್ಕ್ ಸಾದ್ಯ್ ನಾತ್ಲ್ಲೆಂ. ಆಜ್ಚ್ ಸಾಕಾಳಿಂ ತಾಕಾ ಮಂಗ್ಳುರಾಂತ್ ಮಿಶೇಲಾಚೊ ಆಜೊ ಆನಿ ಆಜಿ ರಸ್ತ್ಯಾ ಆವ್ಘಡಾಂತ್ ಸಾಂಪ್ಡುನ್ ಅಂತರ್ಲ್ಯಾಂತ್ ಮ್ಹಳ್ಳಿ ಖಬಾರ್ ಆಯಿಲ್ಲಿ. ತೊ ಮಂಗ್ಳುರಾಕ್ ವಚೊಂಕ್ ತಯಾರ್ ಜಾತಾಲೊ.
ಆಲಿಯಾಕ್ ಆಪ್ಣಾ ವಯ್ರ್ ಅಖಂಡ್ ಭರ್ವಸೊ ಆಸ್ಲ್ಲೊ. ತ್ಯಾ ಭಾಯ್ರ್ ರಾಮ್ ಪ್ರಸಾದಾ ವಯ್ರ್ ತಾಕಾ ಪಾತ್ಯೆಣಿ ಆಸ್ಲ್ಲಿ. ಆಪ್ಣಾ ಖಾತಿರ್ ನ್ಹಯ್ ಜಾಲ್ಯಾರ್ಯ್ ರಾಯನಾಕ್ ಲಾಗೊನ್ ರಾಮ್ ಪ್ರಸಾದ್ ಹ್ಯಾ ಕೇಸಿಕ್ ಜಿಕೊಂಕ್ ವಾವುರ್ತಲೊ ಮ್ಹಳ್ಳೊ ವಿಶ್ವಾಸ್ ಆಲಿಯಾಕ್ ಆಸ್ಲ್ಲೊ. ಮ್ಹಜ್ಯಾ ಕೇಸಿಚಿ ಸಲ್ವಣಿ ಮ್ಹಳ್ಯಾರ್ ರಾಮ್ ಪ್ರಸಾದಾಚಿ ಆನಿ ರಾಯನಾಚಿ ಬಹಿರಂಗ್ಪಣ್ ಸಲ್ವೊಣಿ ಮ್ಹಳ್ಳೆಂ ಆಲಿಯಾ ಜಾಣಾಂ. ರಾಮ್ ಪ್ರಸಾದ್ ಎದೊಳ್ ಸಲ್ವೊಣ್ ನೆಣಾಂ ಜಾಲ್ಯಾರ್ ರಾಯನ್ ಆಪ್ಲ್ಯಾ ಸಲ್ವಣೆಕ್ಯ್ ಜಯ್ತಾಂತ್ ಬದ್ಲಾಂವ್ಚೊ ಶಾಥಿವಂತ್! ಹ್ಯಾ ದೋನ್ ಭಳ್ವಂತ್ ಖಾಂಬ್ಯಾಂ ಮಧೆಂ ಆಲಿಯಾನ್ ಆಪ್ಣಾಕ್ಚ್ ಸುರಕ್ಶಿತ್ ಮಾಂದ್ಲೆಂ. ತ್ಯಾ ಭಾಯ್ರ್....!
ಆಪುಣ್ ಆತಾಂ ಬಾಲಿವುಡಾಂತ್ ಉಜ್ವಳ್ಚೆಂ ಏಕ್ ನೆಕೆತ್ರ್! ತ್ಯಾ ವಯ್ರ್ ಆಪುಣ್ ಏಕ್ ಚಲಿ. ಆಶೆಂ ಆಸ್ತಾನಾ ಸಗ್ಳ್ಯಾ ದೇಶಾಚಾ ಲೊಕಾಚಿ ಸಹಾನುಭೂತಿ ಆಪ್ಣಾಚೆರ್ ಆಸಾ. ಹ್ಯಾ ಸಹಾನುಭೂತಿಚೊ ಪ್ರಭಾವ್ ಹ್ಯಾ ಕೊರ್ಟಾಂತ್ಲ್ಯಾ ಜಡ್ಜಾ ವಯ್ರ್ಯ್ ಪಡ್ತಾ. ಹೆಂಯ್ ಆಲಿಯಾ ಬರ್ಯಾನ್ ಜಾಣಾಂ.
ಇಕ್ಬಾಲ್ ಖಂಯ್ಚಾಯ್ ವಾಟೆನ್ ಬಚಾವ್ ಜಾಂವ್ಕ್ ನಜೊ ಮ್ಹಳ್ಳೊಚ್ ಆಲಿಯಾಚೊ ಆಶಯ್!
ಎಕಾ ಕುಶಿನ್ ಇಕ್ಬಾಲ್ ಬಚಾವ್ ಜಾಲೊ ಜಾಲ್ಯಾರ್ಯ್ ದುಸ್ರ್ಯಾ ಕುಶಿನ್ ಇಕ್ಬಾಲಾಕ್ ಆಲಿಯಾನ್ ಫಸಂವ್ಚಿ ಖಾತರ್ ದವರ್ಲ್ಲಿ.
ಮಿಶೇಲಾಚಾ ಅಪಹರಣಾಚಿ!
ಆಪ್ಣಾಚೆಂ ಎಕ್ಚ್ಚ್ ಏಕ್ ಉತಾರ್ ಮಿರ್ವಾಲ್ಯಾರ್ ಪಾಸೊನ್ ಭೊಗ್ಸಿನಾತ್ಲ್ಲೊ ರಾಯನ್ ತಾಚ್ಯಾ ಜಿವಾಚ್ಯಾಕ್ಯ್ ಚಡ್ ಮೊಲಾಧೀಕ್ ಜಾವ್ನ್ ಆಸ್ಚ್ಯಾ ಮಿಶೆಲಾಚಾ ಆಂಗಾರ್ ಹಾತ್ ಘಾಲ್ಲೊ ಇಕ್ಬಾಲ್ಚ್ ಮ್ಹಣೊನ್ ತಾಕಾ ಕಳಾತ್ ಜಾಲ್ಯಾರ್ ಹ್ಯಾ ಇಕ್ಬಾಲಾಕ್ ಮಾಫ್ ಕರ್ತಲೊ....?
ಎಕಾ ಕುಶಿನ್ ಆಪುಣ್ ಸಲ್ವಾಲ್ಯಾರ್ ದುಸ್ರ್ಯಾ ಕುಶಿನ್! ಆಲಿಯಾನ್, ಇಕ್ಬಾಲಾಕ್ ಆನಿ ರಾಶಿದಾಕ್ ಫಸಂವ್ಚೊ ಸಂಪೂರ್ಣ್ ಉಪಾಯ್ ಕೆಲ್ಲೊ!
ಇಕ್ಬಾಲಾಕ್ ಆನಿ ರಾಶಿದಾಕ್ ತಾಂಚ್ಯಾ ಆಫ್ರಾಧಾಚಿ ಶಿಕ್ಶ್ಯಾ ಧಾ ವಾಂಟ್ಯಾಂನಿ ಅಧಿಕ್ ಮಾಫಾನ್ ಪಾಟಿಂ ದೀಂವ್ಕ್ ಆಲಿಯಾ ಆಶೆತಾಲೆಂ.
ತ್ಯಾ ಭರ್ಲೆಲ್ಯಾ ವಿಮಾನಾರ್ ಇತ್ಲ್ಯಾ ಪಯ್ಣಾರ್ಯಾ ಮುಕಾರ್ ಎಕಾ ಚಲಿಯೆಕ್ ಕಾಂಯ್ಚ್ ಮರ್ಯಾದ್ ನಾ ಮ್ಹಳ್ಳ್ಯಾ ಪರಿಂ ಸಗ್ಳ್ಯಾಂ ಹುಜಿರ್ ಉಕ್ಲುನ್ ವರ್ತಾಂ ಮ್ಹಣೊನ್ ಬೊಟಾಂನಿ ಚಿಮ್ಟಿ ಮಾರುನ್ ದಾಖಯಿಲ್ಲ್ಯಾ ರಾಶಿದಾಕ್ ಫಾಶಿಯೆಚ್ಯಾ ಖಾಂಬ್ಯಾರ್ ಉಮ್ಕಾಳ್ಚೆಂ ಪಳಂವ್ಚಿ ಆಶಾ ಆಲಿಯಾಕ್ ಜಾಲ್ಲಿ. ಹ್ಯಾ ತಾಚ್ಯಾ ಆಶೆಕ್ ವೆಗಿಂಚ್ ಜ್ಯಾರಿ ಕರುಂಕ್ ತೆಂ ಆಶೆಲೆಂ. ಆಪ್ಲ್ಯಾ ಬಸ್ಕೆರ್ ಬಸ್ಲೆಲ್ಯಾ ಕಡೆನ್ ಥಾವ್ನ್ಚ್ ತಾಣೆಂ ಕೊರ್ಟ್ ರೂಮಾಚಾ ವೊಣೊದಿಚೆರ್ ಉಮ್ಕಾಳ್ಚ್ಯಾ ವ್ಹಡ್ಲ್ಯಾ ಗಡಿಯಾಳಾ ವಯ್ರ್ ನದರ್ ಮಾರ್ಲಿ.
ಫಕತ್ತ್ ಪಾಂಚ್ ಮಿನುಟಾಂ ಮಾತ್ರ್ ಉರ್ಲ್ಲಿಂ ಕೊರ್ಟಾಚಿ ಕಾರ್ಯಾವಳ್ ಆರಂಭ್ ಜಾಂವ್ಕ್!
ತಿತ್ಲ್ಯಾರ್!
ಎಕೇಕ್ಲೊಚ್ ಲಾಯರ್ ಯೇವ್ನ್ ತ್ಯಾ ಕೊರ್ಟ್ ರುಮಾಚಾ ಜಡ್ಜಾ ಮುಕ್ಲ್ಯಾ ತಾಂಚಾ ಅಮಾನತ್ ಕರುನ್ ದವರ್ಲ್ಲ್ಯಾ ಬಾಂಕಾರ್ ಬಸ್ಲೆ. ರಾಮ್ ಪ್ರಸಾದ್ ಆನಿ ರಘುಪತಿ ಸಾಂಗಾತಾ ಆಯ್ಲೆ. ತಾಂಚೆ ಪಾಟ್ಲ್ಯಾನ್ ಇಕ್ಬಾಲ್ ಆನಿ ರಾಶಿದ್ ಪ್ರಾಸಿಕ್ಯೂಟರ್ ನಾಯರಾ ಸಾಂಗಾತಾ ಭಿತರ್ ಸರ್ಲೆ.
ದೋನ್ ಮಿನುಟಾಂ ಉಪ್ರಾಂತ್ ಕೋರ್ಟ್ ರುಮಾಚಾ ವಾರ್ಡನಾನ್ ಕಾಂಪಿಣ್ ಮಾರ್ಲಿ. ತ್ಯಾ ಸವೆಂ ಜಡ್ಜಾನ್ ಯೆಂವ್ಚೊ ಉಚಾರ್ ತಾಣೆಂ ಕೆಲೊ.
ತಿತ್ಲೆಂಚ್!
ಕೋರ್ಟ್ ರುಮಾಂತ್ ಬಸ್ಲೆಲ್ಯಾ ಲೊಕಾಂ ಮಧೆಂ ಎದೊಳ್ ಪಾಸೊನ್ ಚಲೊನ್ ಆಸ್ಲ್ಲಿ ಚರ್ಚಾ ಭಂಧ್ ಜಾವ್ನ್ ಆತಾಂ ಕೋರ್ಟ್ ರುಮಾಂತ್ ಮೌನ್ಪಣ್ ರಾಜ್ ಕರುಂಕ್ ಲಾಗ್ಲೆಂ. ಎಕಾ ಪೊಲಿಸ್ ಇನ್ಸ್ಪೆಕ್ಟರಾ ಸವೆಂ ದೋಗ್ ಪೊಲಿಸ್ ಕಾನ್ಸ್ಟೇಬಲ್ ಕೋರ್ಟ್ ರುಮಾಂತ್ ಹಾಜರ್ ಜಾಲೆ. ದೊಗಾಂ ಚಲಿಯೊ ವಾರ್ಡನಾ ಆಮಿ ದೋಗ್ ಚಲೆ ವಾರ್ಡನ್ ಕೋರ್ಟ್ ರುಮಾಂತ್ ಯೇವ್ನ್ ರಾವ್ಲಿಂ.
ಕೋರ್ಟ್ ರುಮಾಚಾ ದಾರಾರ್ ಆಸ್ಲ್ಲ್ಯಾ ವಾರ್ಡನಾನ್ ಲೊಕಾಕ್ ನಿಮಾಣಿ ಜಾಗವ್ಣಿ ದಿಲಿ. ಹಾಚ್ಯೆ ಸವೆಂ ಕೋರ್ಟ್ ರುಮಾ ಭಿತರ್ಲೊ ಸಗ್ಳೊ ಲೋಕ್ ಉಭೊ ಜಾಲೊ ಆನಿ ಜಡ್ಜ್ ಭಿತರ್ ಸರ್ಲೊ.
ಜಡ್ಜಾನ್ ಆಪ್ಲಿ ಬಸ್ಕಾ ಘೆತಾನಾ ಸಗ್ಳ್ಯಾ ಕೋರ್ಟ್ ರುಮಾಂತ್ ಹಾಜಿರ್ ಆಸ್ಲ್ಲ್ಯಾ ಲೊಕಾನಿ ಆಪ್ಲಿ ಬಸ್ಕಾ ಘೆತ್ಲಿ.
"ಕೊರ್ಟಾಚಿ ಆಯ್ಚಿ ಕಾರ್ಯಾವಳ್ ಆರಂಭ್ ಕರ್ಯೆತ್!"
"ಟಕ್!" ಜಡ್ಜಾನ್ ಪರ್ವಣ್ಗಿ ದಿಲಿ.
ಆನಿ ಟ್ರಾಯಲ್ ಆರಂಭ್ ಜಾಲೆಂ.
ಆಲಿಯಾನ್ ಇಕ್ಬಾಲಾಕ್ ಗುನ್ಯಾಂವ್ಕಾರ್ ಮ್ಹಣೊನ್ ವೊಲಾಯಿಲ್ಲ್ಯಾನ್ ರಾಮ್ ಪ್ರಸಾದ್ ಆಪ್ಲ್ಯಾ ಬಸ್ಕೆರ್ ಥಾವ್ನ್ ಉಟ್ಲೊ. ತಾಣೆಂ ಕೊರ್ಟಾಕ್ ತಶೆಂ ಜಡ್ಜಾಕ್ ಹ್ಯಾ ಕೇಸಿಚೊ ವಿವರ್ ದೀಂವ್ಕ್ ಆಸ್ಲ್ಲೊ.
"ಯುವರ್ ಹಾನರ್!" ರಾಮ್ ಪ್ರಸಾದ್ ಆಪ್ಲ್ಯಾ ಬಸ್ಕೆರ್ ಥಾವ್ನ್ ಉಟ್ಲ್ಲೊ ಜಡ್ಜಾಚಾ ಮುಕಾರ್ ಹಾಜರ್ ಜಾಲೊ. "ಹಾಂವ್ ಆಲಿಯಾ ಖಾನ್ ಹಿಚ್ಯಾ ವಯ್ರ್ ಮಾಯ್ ಮಹಿನ್ಯಾಚಾ ತೇವಿಸಾವ್ಯಾ ತಾರಿಕೆರ್ ಜಾಲ್ಲ್ಯಾ ಹಲ್ಲ್ಯಾಕ್ ಖುದ್ಧ್ ಆಲಿಯಾ ಖಾನಾನ್ಚ್ ಸಾಂಗ್ಚ್ಯಾ ಪರ್ಮಾಣೆಂ ಇಕ್ಬಾಲ್ ಸಯ್ಯದ್ ಜಾಫ್ರಿ ಆನಿ ರಾಶಿದ್ ಸಯ್ಯದ್ ಜಾಫ್ರಿಚ್ ಕಾರಾಣ್ ಮ್ಹಣೊನ್ ಸಾಕ್ಶೆ ಸವೆಂ ರುಜು ಕರುಂಕ್ ಆಲಿಯಾ ಖಾನಾಚೊ ಸ್ಪೆಶಲ್ ಪ್ರಾಸಿಕ್ಯೂಟರ್ ಜಾವ್ನ್ ಹಾಜರ್ ಜಾಲಾಂ!"
ರಾಮ್ ಪ್ರಸಾದಾನ್ ಆಪ್ಣೆಂ ಹಾಡ್ಲ್ಲೆಂ ಏಕ್ ಫೈಲ್ ಉಗ್ತೆಂ ಕೆಲೆಂ. ತ್ಯಾ ಫೈಲಾ ಭಿತರ್ ಸ್ಟೆಪಲ್ ಕೆಲ್ಲಿಂ ದಸ್ತಾವೇಜಾಂ ಕಾಡುನ್ ಕೋರ್ಟಾಚಾ ಕ್ಲಾರ್ಕಾಕ್ ತಾಣೆಂ ದಿಲಿಂ. ತ್ಯಾ ಕ್ಲಾರ್ಕಾನ್ ತಿಂ ದಾಸ್ತಾವೇಜಾಂ ಘೆವ್ನ್ ಜಡ್ಜಾ ಮುಕಾರ್ ವೊಡ್ಡಾಯ್ಲಿಂ. ಜಡ್ಜಾನ್ ತಿಂ ದಾಸ್ತಾವೇಜಾಂ ಘೆವ್ನ್ ತಾಚ್ಯೆರ್ ತೊ ಆಪ್ಲಿ ನದರ್ ಮಾರುಂಕ್ ಲಾಗ್ಲೊ. ಥೊಡ್ಯಾ ವೆಳಾನ್,
"ಯು ಮೇ ಪ್ರೊಸೀಡ್ ಮಿಸ್ಟರ್ ಪ್ರಾಸಿಕ್ಯೂಟರ್!" ರಾಮ್ ಪ್ರಸಾದಾಕ್ ಪರ್ವಣ್ಗಿ ಮೆಳ್ಳಿ.
"ಯುವರ್ ಹಾನರ್!" ಆಪ್ಲೊ ಕಾಳೊ ಯೂನಿಫಾರ್ಮಾಚೊ ಕೋಟ್ ಆಪ್ಲ್ಯಾ ಗಳ್ಯಾಕ್ ಲಾಗಿಂ ವೊಡುನ್ ರಾಮ್ ಪ್ರಸಾದ್ ಉಲಂವ್ಕ್ ಲಾಗ್ಲೊ.
"ಆಲಿಯಾ ಖಾನ್! ಏಕ್ ಸುಶೀಲ್, ಗುಣೇಸ್ತ್ ಚಲಿ, ಆಪ್ಲ್ಯಾ ಸ್ವತಾಚಾ ಮ್ಹಿನತೆನ್ ಬಾಲಿವುಡಾಚಾ ಭಿತರ್ ಪ್ರವೇಶ್ ಘೆತಾನಾ ಬಾಲಿವುಡಾಚಾ ವಯ್ರ್ ಹಕ್ಕ್ ಚಲಂವ್ಕ್ ಆನಿ ಆಪ್ಲೊ ಕಾಳೊ ಸಾಮ್ರಾಜ್ಯ್ ಬಾಂದುಂಕ್ ಪ್ರಯತ್ನ್ ಕರ್ಚ್ಯಾ ಇಕ್ಬಾಲಾಕ್ ಹೆಂ ಸೊಸಾನಾ. ತೊ ಮಾಯ್ ಮಹಿನ್ಯಾಚಾ ತೇವೀಸ್ ತಾರಿಕೆರ್ ಧನ್ಫರಾಂಚಾ ದೋನ್ ವೊರಾಂಕ್ ಆಲಿಯಾಕ್ ತಾಚ್ಯಾ ಸೆಲ್ಪೋನಾರ್ ಪೋನ್ ಕರ್ತಾ ಆನಿ ಬೆಶ್ಟಾಯ್ತಾ. ಆಲಿಯಾನ್ ತಾಚ್ಯಾ ಫಿಲ್ಮಾಂತ್ ಕಾಮ್ ಕರಿನಾತ್ಲ್ಲ್ಯಾ ಪರಿಂ ತೊ ಆಲಿಯಾಕ್ ಧಮ್ಕಿ ದಿತಾ. ಪುಣ್ ಇಕ್ಬಾಲಾಚಾ ಹ್ಯಾ ಬೆಶ್ಟಾವ್ಣೆಕ್ ಮಾಂದಿನಾತ್ಲ್ಲ್ಯಾ ಆಲಿಯಾಕ್ ಹೊಚ್ಚ್ ಇಕ್ಬಾಲ್ ಆಪ್ಲ್ಯಾ ಭಾವಾ ಸವೆಂ ಮೆಳೊನ್ ತ್ಯಾಚ್ ದಿಸಾ ಸಾಂಜೆಚ್ಯಾ ಭರ್ತಿ ಸಾತ್ ಜಾವ್ನ್ ಧಾ ಮಿನುಟಾಂಚಾ ವೆಳಾರ್ ಮೆಳೊಂಕ್ ಯೆತಾ. ಹಾಂಗಾಸರ್ಯ್ ತೊ ತಾಚ್ಯಾ ಉದ್ದೇಶಾಂತ್ ವಿಫಲ್ ಜಾತಾನಾ ರಾಗಾನ್ ಭರೊನ್ ಆಲಿಯಾಕ್ ಜಿವೆಶಿಂ ಮಾರುಂಕ್ ಪಳೆತಾ. ತೊ ಆಲಿಯಾಕ್ ಆಪ್ಲ್ಯಾ ಪಿಸ್ತೂಲಾಂತ್ ಪೈರ್ ಕರುನ್ ಆಲಿಯಾ ವಯ್ರ್ ಹಲ್ಲೊ ಕರ್ತಾ ಆನಿ ಆಲಿಯಾ ಮೆಲೆಂ ಮ್ಹಣೊನ್ ಚಿಂತುನ್ ಥಂಯ್ ಥಾವ್ನ್ ಪರಾರ್ ಜಾತಾ. ಪುಣ್ ಮೊರೊಂಕ್ ನಾತ್ಲೆಲ್ಯಾ ಆಲಿಯಾನ್ ರಾಯನಾಕ್ ಆನಿ ತಾಣೆಂ ವಸ್ತಿ ಕರ್ಚ್ಯಾ ಬಿಲ್ಡಿಂಗಾಚ್ಯಾ ವಾಚ್ಮ್ಯಾನಾಕ್ ಆಪ್ಣಾ ವಯ್ರ್ ಜಾಲ್ಲ್ಯಾ ಹಲ್ಲ್ಯಾಚಿ ಖಬಾರ್ ದಿತಾನಾ ಆಪ್ಲೊ ಜೀವ್ ರಿಸ್ಕೆರ್ ಘಾಲುನ್ ರಾಯನ್ ಸಾವಂತ್ ಆನಿ ಆಲಿಯಾನ್ ವಸ್ತಿ ಕರ್ಚ್ಯಾ ಅಪಾರ್ಟ್ಮೆಂಟಾಚೊ ವಾಚ್ಮ್ಯಾನ್ ಸಾರಂಗ್, ಹೆ ತೇಗ್ ಮೆಳೊನ್ ಆಲಿಯಾಕ್ ವೆಳಾರ್ ಆಸ್ಪತ್ರೆಕ್ ಪಾವಯಿಲ್ಲ್ಯಾನ್ ಆಲಿಯಾಚೊ ಜೀವ್ ವಾಂಚ್ತಾಂ. ಪುಣ್ ಇಕ್ಬಾಲ್ ಆನಿ ರಾಶಿದ್ ಆಪ್ಲ್ಯಾ ಆಫ್ರಾಧಾಕ್ ವೊಳ್ಕೊನ್ ಘೆಂವ್ಕ್ ಕಬೂಲ್ ನಾಂತ್ ಜಾಲ್ಲ್ಯಾನ್ ಆಜ್ ಹಾಂವ್ ಹಾಂಗಾ ಆಲಿಯಾ ವಯ್ರ್ ಜಾಲ್ಲ್ಯಾ ಹಲ್ಲ್ಯಾಕ್ ಇಕ್ಬಾಲ್ ಆನಿ ರಾಶಿದ್ಚ್ ಕಾರಾಣ್ ಮ್ಹಣೊನ್ ರುಜು ಕರುನ್ ದಾಕಂವ್ಕ್ ನೇಮಕ್ ಜಾಲಾಂ."
"ಹಾಂವ್ ಹಾಂಗಾಸರ್ ಹ್ಯಾ ಭರ್ಲೆಲ್ಯಾ ಕೊರ್ಟಾಂತ್ ಹೆಂಚ್ ರುಜು ಕರುನ್ ದಾಕಂವ್ಕ್ ಸಕ್ತಾಂ ಕೀ ಇಕ್ಬಾಲಾನ್ ಆನಿ ರಾಶಿದಾನ್ಚ್ ಮೆಳೊನ್ ಆಲಿಯಾ ವಯ್ರ್ ಮರಣಾಂತಿಕ್ ಹಲ್ಲೊ ಕೆಲ್ಲೊ. ಆನಿ ಹ್ಯಾ ಹಲ್ಲ್ಯಾ ಪಾಟ್ಲ್ಯಾನ್ ಆಲಿಯಾಕ್ ಜಿವೆಶಿಂ ಮಾರ್ಚೊಚ್ ತಾಂಚೊ ಉದ್ದೇಶ್ ಜಾವ್ನಾಸ್ಲ್ಲೊ. ಹೆಂ ಏಕ್ ಅಟೆಂಪ್ಟಡ್ ಮರ್ಡರ್! ತೆಂಯ್ ಎಕ್ಸುರೆಂ ಚಲಿ ಜಿಯೆಂವ್ಚ್ಯಾ ಪ್ಲ್ಯಾಟಾಂತ್ ಘುಸೊನ್ ತಾಕಾ ಬೆಶ್ಟಾವ್ನ್ ಜಿವೆಶಿಂ ಮಾರ್ಚೆಂ ಪ್ರಯತ್ನ್! ಹಾಕಾ ಹಾಂವ್ ಮರ್ಡರ್ ಮ್ಹಣ್ಚ್ಯಾಕ್ಯ್ ರೂಲಿಂಗ್ ಟೆರರಿಸಮ್ ಮ್ಹಣ್ತಾಂ! ಬಾಲಿವುಡಾಚಾ ಸಾಮ್ರಾಜ್ಯಾ ವಯ್ರ್ ಇಕ್ಬಾಲ್ ಆನಿ ರಾಶಿದಾಚೆಂ ಮತ್ಲಾಬಿ ಟೆರರಿಸಮ್! ಪುಡಾರಾಕ್ ಹ್ಯಾ ಟೆರರಿಸಮಾಕ್ ವ್ಹಾಡಂವ್ಕ್ ದಿಂವ್ಚ್ಯಾಕ್ಯ್ ಹಾಕಾ ಹಾಂಗಾಚ್ ಕಾಭಾರ್ ಕರುಂಕ್ ಜಾಯ್ ಯುವರ್ ಹಾನರ್!"
ಜಡ್ಜಾ ಮುಕಾರ್ ರಾವೊನ್ ಉಲಯಿಲ್ಲೊ ರಾಮ್ ಪ್ರಸಾದ್ ಆತಾಂ ಆಪ್ಲ್ಯಾ ಬಸ್ಕೆ ತೆವ್ಶಿಂ ಚಮ್ಕಾಲೊ. ತಾಣೆಂ ತೆಂಚ್ ಆಪ್ಣೆಂ ಪಯ್ಲೆಂ ಉಗ್ತೆಂ ಕೆಲ್ಲೆಂ ಫೈಲ್ ಪರ್ತ್ಯಾಕ್ ಉಗ್ತೆಂ ಕೆಲೆಂ. ತ್ಯಾ ಫೈಲಾ ಥಾವ್ನ್ ದುಸ್ರಿಂ ಥೊಡಿಂ ದಾಸ್ತಾವೇಜಾಂ ಕಾಡುನ್ ತೊ ಮುಕಾರ್ ಚಮ್ಕಾಲೊ.
"ಹಾಸ್ಪಿಟಲಾಚಾ ದಾಕ್ತೆರಾಂನಿ, ಜ್ಯಾ ದಾಕ್ತೆರಾನ್ ಆಲಿಯಾಚಾ ಕುಡಿ ಥಾವ್ನ್ ಕಾಡ್ಲೆಲ್ಯಾ ದೋನ್ ಬುಲೆಟಾಂ ವಿಶಿಂ ಆನಿ ಆಲಿಯಾ ವಯ್ರ್ ಜಾಲ್ಲೊ ತೊ ಹಲ್ಲೊ ಕಿತ್ಲೊ ಮರಾಣಾಂತಿಕ್ ಮ್ಹಳ್ಳ್ಯಾ ವಿಶಿಂ ಹಾಂಗಾಸರ್ ಹಾಸ್ಪಿಟಲಾಚಿ ಸಾಕ್ಸ್ ಆಸಾ ಯುವರ್ ಹಾನರ್!"
ಆಪ್ಲ್ಯಾ ಹಾತಾಂತ್ಲಿಂ ತಿಂ ಆಸ್ಪತ್ರೆಚಿಂ ದಾಸ್ತಾವೇಜಾಂ ರಾಮ್ ಪ್ರಸಾದಾನ್ ಕ್ಲಾರ್ಕಾಚಾ ಹಾತಿಕ್ ದಿಲಿಂ. ಕ್ಲಾರ್ಕಾನ್ ತಿಂ ಘೆವ್ನ್ ತಶಿಂಚ್ ತ್ಯಾ ದಾಸ್ತಾವೇಜಾಂಕ್ ಜಡ್ಜಾಚ್ಯಾ ಹಾತಿಕ್ ಪಾವಿತ್ ಕೆಲಿಂ. ಜಡ್ಜ್ ಆತಾಂ ತ್ಯಾ ದಾಸ್ತಾವೇಜಾಂ ವಯ್ರ್ ನದರ್ ಮಾರುಂಕ್ ಲಾಗ್ಲೊ.
ಆತಾಂ ನಾಯರಾಚಿ ಸರ್ತಿ! ತೊ ಆಪ್ಲ್ಯಾ ಬಸ್ಕೆರ್ ಥಾವ್ನ್ ಉಟ್ಲೊ.
ಆಪ್ಲ್ಯಾ ಫೈಲಾಂತ್ಲಿಂ ಥೊಡಿಂ ದಾಸ್ತಾವೇಜಾಂ ಕಾಡುನ್ ತಾಣೆಂ ಆಪ್ಲ್ಯಾ ಹಾತಿಂತ್ ಧರ್ಲಿಂ. ತೊ ಕಾಂಯ್ಚ್ ಉಲಯ್ಲೊ ನಾ. ನಿಟ್ಟ್ ಕೋರ್ಟಾಚಾ ಕ್ಲಾರ್ಕಾ ತೆವ್ಶಿಂ ಚಮ್ಕಾಲ್ಲ್ಯಾ ತಾಣೆಂ ತಿಂ ದಾಸ್ತಾವೇಜಾಂ ತಾಕಾ ದಿಲಿಂ. ಕ್ಲಾರ್ಕಾನ್ ತಿಂ ದಾಸ್ತಾವೇಜಾಂ ಘೆವ್ನ್ ಜಡ್ಜಾಕ್ ದೀವ್ನ್ ಜಡ್ಜಾನ್ ತ್ಯಾ ದಾಸ್ತಾವೇಜಾಂಕ್ ಪುರ್ತೆಂ ಪಳಯ್ತಾ ಪಾಸೊನ್ ನಾಯರ್ ಮೌನ್ ಜಾಲೊ. ಜಡ್ಜಾನ್ ತ್ಯಾ ನಾಯರಾಚಾ ದಾಸ್ತಾವೇಜಾಂಕ್ ಪಳವ್ನ್ ತಾಕಾ ಸಮಾಧಾನ್ ಜಾಲ್ಲ್ಯಾ ಪರಿಂ ಆಪ್ಲಿ ತಕ್ಲಿ ಉಭಾರುನ್ ನಾಯರಾಕ್ ಪಳೆಲೆಂ.
ಜಡ್ಜಾಚಿ ಪರ್ವಣ್ಗಿ ತಿ!
"ಯುವರ್ ಹಾನರ್!" ನಾಯರ್ ಉಲಯ್ಲೊ. "ಮ್ಹಜ್ಯಾ ಸಾಂಗಾತಿ ಪ್ರಾಸಿಕ್ಯೂಟರಾನ್ ಎದೊಳ್ಚ್ ಹ್ಯಾ ಕೋರ್ಟಾಂತ್ ಉಚಾರ್ಲ್ಲ್ಯಾ ಪರ್ಮಾಣೆಂ ಹಾಂವ್ ಆನಿ ಮ್ಹಜೆ ಕಕ್ಶಿದಾರ್ ಹೆಂಚ್ ಆಶೆತಾಂವ್ ಕೀ ಮ್ಹಜ್ಯಾ ಕಕ್ಶಿದಾರಾಂ ವಯ್ರ್ ಮಾಂಡ್ಲ್ಲ್ಯಾ ಆಫ್ರಾಧಾಕ್ ಹ್ಯಾ ಕೊರ್ಟಾಂತ್ ಸಾಕ್ಶೆ ಸವೆಂ ರುಜು ಕರುನ್ ದಾಖಂವ್ಕ್ ಜಾಯ್! ಜರ್ ತರ್ ಹೆಂ ರುಜು ಜಾಯ್ನಾಂ ಜಾಲ್ಯಾರ್ ಮ್ಹಜ್ಯಾ ಕಕ್ಶಿದಾರಾಂಕ್ ತಾಂಚಾ ಮಾನ್ ಮರ್ಯಾದೆ ಸವೆಂ ತಾಂಕಾ ನಿರಫ್ರಾಧಿ ಮ್ಹಣೊನ್ ವಳ್ಕೊನ್ ಘೆಂವ್ಕ್ ಜಾಯ್! ತಿತ್ಲೆಂಚ್ ಯುವರ್ ಹಾನರ್!"
ಫಕತ್ತ್ ಥೊಡಿಂಚ್ ಉತ್ರಾಂ ಉಲಯಿಲ್ಲೊ ನಾಯರ್ ಆಪ್ಲ್ಯಾ ಬಸ್ಕೆ ತೆವ್ಶಿಂ ಆಯ್ಲೊ.
ಆಪ್ಲ್ಯಾ ವಕೀಲಾಚೊ ಭರ್ತಾವ್ ಪಳೆಲ್ಲ್ಯಾ ಇಕ್ಬಾಲಾಕ್ ನಾಯರಾ ವಯ್ರ್ ದುಬಾವ್ ಜಾಲೊ. ರಾಮ್ ಪ್ರಸಾದಾನ್ ಆಲಿಯಾಚಾ ಪಾಡ್ತೆನ್ ಲಾಂಭ್ ಪ್ರಸಂಗ್ ದಿಲ್ಲೊ ಆನಿ ಹೊ ನಾಯರ್ ಮ್ಹಾಕಾ ಡಿಫೆಂಡಂಟ್ ಜಾವ್ನ್ಯ್.....?
ರಾಮ್ ಪ್ರಸಾದಾನ್ ಆತಾಂ ಕೊರ್ಟಾ ಮುಕಾರ್ ರುಜು ಕರುನ್ ದಾಖಂವ್ಕ್ ಆಸ್ಲ್ಲೆಂ.
ರಾಮ್ ಪ್ರಸಾದ್ ಉಟೊನ್ ಉಭೊ ಜಾಲೊ.
ಕೊರ್ಟಾಂತ್ ಹಾಜರ್ ಆಸ್ಲ್ಲ್ಯಾ ಹರ್ಯೆಕ್ಲ್ಯಾಚಿ ನದರ್ ರಾಮ್ ಪ್ರಸಾದಾ ವಯ್ರ್ ಖಂಚ್ಲಿ. ಹ್ಯಾ ವಗ್ತಾರ್ ತಾಣೆಂ ಚಲ್ಚ್ಯಾ ತಾಚ್ಯಾ ಚಾಲಿಚಾ ವಯ್ರ್ ಸಗ್ಳ್ಯಾಂಚಿ ನದರ್ ಆಸ್ಲ್ಲಿ.
"ಯುವರ್ ಹಾನರ್! ಹ್ಯಾ ಟ್ರಾಯಲಾಚಿ ಪಯ್ಲಿ ಸಾಕ್ಸ್ ಜಾವ್ನ್ ಹಾಂವ್ ಬಲ್ರಾಜ್ ಸಾವಂತ್ ಹಾಕಾ ಕೊರ್ಟಾ ಮುಕಾರ್ ಪ್ರಸ್ತುತ್ ಕರ್ತಾಂ!" ರಾಮ್ ಪ್ರಸಾದಾನ್ ಜಡ್ಜಾಕ್ ವಿನತಿ ಕೆಲಿ.
"ಪರ್ಮಿಶನ್ ಗ್ರ್ಯಾಂಟಡ್!" ಜಡ್ಜಾನ್ ಆಪ್ಲ್ಯಾ ಮೆಜಾ ವಯ್ಲ್ಯಾ ಕೊರ್ಟಾಚಾ ದಾಸ್ತಾವೇಜಾಂಚೆರ್ ಬಲ್ರಾಜ್ ಸಾವಂತಾಚೆಂ ನಾಂವ್ ಲಿಖ್ಲೆಂ.
ವಾರ್ಡನಾನ್ ಬಲ್ರಾಜ್ ಸಾವಂತಾಕ್ ಉಲೊ ದಿಲೊ.
ಬಲ್ರಾಜ್ ಸಾವಂತ್ ಎದೊಳ್ ತ್ಯಾ ಸಾಕ್ಶಿದಾರಾಂನಿ ಬಸ್ಚ್ಯಾ ಬಾಂಕಾ ವಯ್ರ್ ಬಸೊನ್ ಆಸ್ಲ್ಲೊ ತೊ ಉಟೊನ್ ಮುಕಾರ್ ಆಯ್ಲೊ.
ವಾರ್ಡನಾನ್ ಸಾವಂತಾಕ್ ಸಾಕ್ಶಿದಾರಾಚಾ ಜಾಗ್ಯಾಕ್ ಆಪವ್ನ್ ವೆಲೆಂ.
ಸಾವಂತ್ ಸಾಕ್ಶಿದಾರಾಚಾ ಜಾಗ್ಯಾರ್ ಉಭೊ ಜಾತಾನಾ ವಾರ್ಡನಾನ್ ತಾಚಿ ಜಾತ್ ವಿಚಾರುನ್ ಸಾವಂತಕ್ ತಾಣೆಂ ಮಾಂದ್ಚ್ಯಾ ಭಗವದ್ಗೀತಾ ವಯ್ರ್ ಹಾತ್ ದವರುಂಕ್ ಲಾವ್ನ್ ತಾಚೆಂ ಫರ್ಮಾಣ್ ಘೆತ್ಲೆಂ.
"ಹಾಂವ್ ಜೆಂ ಕಿತೆಂ ಹಾಂಗಾ ಉಲಯ್ತಾಂ ತೆಂ ಸತ್ ಉಲಯ್ತಾಂ. ಸತಾ ಶಿವಾಯ್ ಕಾಂಯ್ಚ್ ಉಲಯ್ನಾ!"
ಸಾವಂತಾನ್ ವಾರ್ಡನಾಚಾ ಉತ್ರಾಂಕ್ ಆಪ್ಲ್ಯಾ ಜಿಬೆರ್ ಥಾವ್ನ್ ವ್ಹಾಳಯ್ಲೆಂ.
ಫರ್ಮಾಣ್ ಜಾವ್ನ್ ವಾರ್ಡನ್ ಭಗವದ್ಗೀತಾಕ್ ಘೆವ್ನ್ ಚಲ್ಲೊ.
ಆತಾಂ ರಾಮ್ ಪ್ರಸಾದಾಚಿ ಸರ್ಥಿ! ತೊ ಆಪ್ಲ್ಯಾ ಸಾಕ್ಶಿದಾರಾ ತೆವ್ಶಿಂ ಚಮ್ಕಾಲೊ.
"ತುಜೆಂ ನಾಂವ್........?"
"ಸಾವಂತ್!"
"ಕೊರ್ಟಾಕ್ ತುಜೆಂ ಸಂಪೂರ್ಣ್ ನಾಂವ್ ಜಾಯ್ ಮಿಸ್ಟರ್ ಸಾವಂತ್!"
"ಬಲ್ರಾಜ್ ಸಾವಂತ್!"
"ತುಜೆಂ ಫ್ರೊಫೆಶನ್......?"
"ಫಿಲ್ಮ್ ಡೈರೆಕ್ಶನ್! ಹಾಂವ್ ಬಾಲಿವುಡಾಚೊ ಫಿಲ್ಮ್ ಡೈರೆಕ್ಟರ್!"
"ತುಕಾ ಆನಿ ಆಲಿಯಾಕ್ ಸಂಭಂಧ್......?"
"ತೆಂ ಮ್ಹಜ್ಯಾ ಫಿಲ್ಮಾಂತ್ ಕಾಮ್ ಕರ್ತಾ!"
"ಬರೆಂ! ತ್ಯಾ ದೀಸ್.... ಮ್ಹಳ್ಯಾರ್ ಮಾಯ್ ಮಹಿನ್ಯಾಚಾ ತೇವಿಸಾವ್ಯಾ ತಾರಿಕೆರ್ ಸಾಂಜೆಚಾ ಸಾತ್ ಜಾವ್ನ್ ಧಾ ಮಿನುಟಾಂಚಾ ವೆಳಾರ್ ಕಿತೆಂ ಜಾಲ್ಲೆಂ ತೆಂ ತುಂ ಹ್ಯಾ ಕೊರ್ಟಾಕ್ ಸಾಂಗ್ತಾಯ್?"
"ತ್ಯಾ ದೀಸ್! ಆಲಿಯಾಚಾ ಅಭಿನಯಚೊ ನಿಮಾಣೊ ದೀಸ್! ಧನ್ಫರಾಂ ಪಾಸೊನ್ ಆಲಿಯಾ ಸ್ಟೂಡಿಯೊಂತ್ ಆಸ್ಲ್ಲೆಂ. ಧನ್ಫರ್ ಜಾತಾನಾ ತಾಚೆಂ ಚಿತ್ರೀಕರಣ್ ಸಂಪ್ಲ್ಲೆಂ. ಜಾಲ್ಯಾರ್ಯ್ ತೆಂ ಸ್ಟೂಡಿಯೊಂತ್ ರಾವ್ಲ್ಲೆಂ. ತೆದ್ನಾಂ ಅಚಾನಕ್ ತಾಕಾ ಇಕ್ಬಾಲಾಚೆಂ ಪೋನ್ ಆಯ್ಲೆಂ. ತಾಚ್ಯಾ ಪೊನಾ ಥಾವ್ನ್ ಬೆಜಾರಾಯೆಂತ್ ಆಲಿಯಾ ಆಪ್ಲ್ಯಾ ಪ್ಲ್ಯಾಟಾಕ್ ಭಾಯ್ರ್ ಸರ್ಲೆಂ. ತ್ಯಾ ಉಪ್ರಾಂತ್ ಸುಮಾರ್ ಸಾಂಜೆಚಾ ಸಾತ್ ಜಾವ್ನ್ ಧಾ ಪಂದ್ರಾ ಮಿನುಂಟಾಂ ತಿತ್ಲ್ಯಾಕ್ ಮ್ಹಾಕಾ ರಾಯನಾಚೆಂ ಪೋನ್ ಆಯ್ಲೆಂ......."
"ಏಕ್ ಮಿನಿಟ್ ಸಾವಂತ್! ಹೊ ರಾಯನ್ ಕೋಣ್......?" ರಾಮ್ ಪ್ರಸಾದಾನ್ ಮಧೆಂಚ್ ವಿಚಾರ್ಲೆಂ.
"ಮ್ಹಜ್ಯಾ ಫಿಲ್ಮಾಕ್ ತೊ ಫೈನಾನ್ಸ್ ಕರ್ತಾ!"
"ಬರೆಂ! ಮುಕಾರ್ ಕಿತೆಂ ಜಾಲೆಂ.....?"
"ಇಕ್ಬಾಲಾನ್ ಆಲಿಯಾ ವಯ್ರ್ ಫೈರಿಂಗ್ ಕರುನ್ ತಾಚ್ಯೆರ್ ಅಟ್ಯಾಕ್ ಕೆಲಾಂ ಮ್ಹಣೊನ್ ರಾಯನಾನ್ ಮ್ಹಾಕಾ ಪೊನಾರ್ ಸಾಂಗ್ಲೆಂ. ಹಾಂವ್ ಮ್ಹಜೆಂ ಸಗ್ಳೆಂ ಕಾಮ್ ಸೊಡುನ್ ಆಲಿಯಾಚಾ ಪ್ಲ್ಯಾಟಾಕ್ ಪಾವ್ಲೊಂ. ಪ್ಲ್ಯಾಟಾಂತ್ ಆಲಿಯಾ ರಗ್ತಾಚಾ ಖೊಂಡಾಂತ್ ಧರ್ಣಿರ್ ಪಡೊನ್ ಆಸ್ಲ್ಲೆಂ. ಹಾವೆಂ ಆನಿ ರಾಯನಾನ್ ಪೊಲಿಸಾಂಕ್ ರಾಕಾನಾಸ್ತಾನಾ ಆಲಿಯಾಕ್ ಆಸ್ಪತ್ರೆಕ್ ಪಾವಂವ್ಚ್ಯಾ ವಗ್ತಾರ್ ಪೊಲಿಸ್ ಆಯ್ಲೆ. ತ್ಯಾ ಉಪ್ರಾಂತ್ ಪೊಲಿಸಾಂಚಾ ಕುಮ್ಕೆನ್ ಆಮಿಂ ವೆವೆಗ್ಗಿಂ ಆಲಿಯಾಕ್ ಆಸ್ಪತ್ರೆಕ್ ಪಾವಯ್ಲೆಂ. ವೆಳಾರ್ ಆಲಿಯಾಕ್ ಆಸ್ಪತ್ರೆಕ್ ಪಾವಯಿಲ್ಲ್ಯಾನ್ ಆಲಿಯಾ ವಾಂಚ್ಲೆಂ. ತ್ಯಾ ಉಪ್ರಾಂತ್ ಕಿತೆಂ ಜಾಲೆಂ ತೆಂ ಸಗ್ಳ್ಯಾಂಕ್ ಖಬಾರ್ ಆಸಾ!"
"ತರ್, ಪೊಲಿಸಾಂನಿ ಯೆಂವ್ಚ್ಯಾ ಪಯ್ಲೆಂ ತುವೆಂ ಆನಿ ರಾಯನಾನ್ ಮೆಳೊನ್ ಆಲಿಯಾಕ್ ಆಸ್ಪತ್ರೆಕ್ ಪಾವಯಿಲ್ಲೆಂ. ಮ್ಹಜ್ಯಾ ಉಡಾಸಾ ಪರ್ಮಾಣೆಂ ಹಾಂವ್ ಸಾರ್ಕೆಂ ಉಲಯ್ತಾಂ ಮಿಸ್ಟರ್ ಬಲ್ರಾಜ್ ಸಾವಂತ್?"
"ವ್ಹಯ್! ಪುಣ್ ಆಮ್ಚೆ ಸಾಂಗಾತಾ ಸಾರಂಗ್ಯ್ ಆಸ್ಲ್ಲೊ!"
"ಹೊ ಸಾರಂಗ್ ಕೋಣ್? ಅತ್ತಾಂ ತುವೆಂ ಸಾಂಗ್ಲೆಂಯ್ ತುವೆಂ ಆನಿ ರಾಯನಾನ್ ಮೆಳೊನ್ ಆಲಿಯಾಕ್ ಆಸ್ಪತ್ರೆಕ್ ಪಾವಯಿಲ್ಲೆಂ!"
"ಸಾರಂಗ್ ಆಲಿಯಾನ್ ವಸ್ತಿ ಕರ್ಚ್ಯಾ ಆಪಾರ್ಟ್ಮೆಂಟಾಚೊ ವಾಚ್ಮ್ಯಾನ್!"
"ಬರೆಂ! ತರ್.... ತುಮಿಂ ತೆಗಾಂನಿ ಮೆಳೊನ್ ಆಲಿಯಾಕ್ ತಾಚ್ಯಾ ಪ್ಲ್ಯಾಟಾ ಥಾವ್ನ್ ಆಸ್ಪತ್ರೆಕ್ ಪಾವಯ್ಲೆಂ!?"
"ವ್ಹಯ್!"
"ಆಶೆಂ ಕಿತ್ಯಾಕ್ ಮಿಸ್ಟರ್ ಬಲ್ರಾಜ್? ಪೊಲಿಸಾಂನಿ ಯೆಂವ್ಚ್ಯಾ ಪಯ್ಲೆಂಚ್ ತುಮಿಂ ಆಲಿಯಾಕ್ ಆಸ್ಪತ್ರೆಕ್ ಕಿತ್ಯಾಕ್ ವೆಲೆಂ....?"
"ಪೊಲಿಸಾಂಕ್ ರಾಕೊನ್ ರಾಂವ್ಚ್ಯಾ ತಿತ್ಲೊ ವೇಳ್ ಆಲಿಯಾಲಾಗಿಂ ನಾತ್ಲ್ಲೊ! ತಾಚ್ಯಾ ಕುಡಿಂತ್ಲೆಂ ರಗಾತ್ ವ್ಹಾಳೊನ್ ಗೆಲ್ಲೆಂ. ತೆಂ ಮತಿರ್ ನಾತ್ಲ್ಲೆಂ. ತೆಂ ಮೊರ್ಚ್ಯಾ ರಿಸ್ಕೆರ್ ಆಸ್ಲ್ಲೆಂ!"
"ಆಲಿಯಾ ಮೊರ್ಚ್ಯಾ ರಿಸ್ಕೆರ್ ಆಸ್ಲ್ಲೆಂ!" ಉದ್ಗಾರ್ಲ್ಲೊ ರಾಮ್ ಪ್ರಸಾದ್ ಜಡ್ಜಾಚಾ ಕುಶಿನ್ ಘುಂವ್ಲೊ.
"ಹೊ ಪಾಂಯ್ಟ್ ನೋಟ್ ಕರುಂಕ್ ಜಾಯ್ ಯುವರ್ ಹಾನರ್! ಜರ್ ತರ್ ಸಾವಂತಾನ್ ತಾಚ್ಯಾ ಸಾಂಗಾತ್ಯಾಂ ಸವೆಂ ಮೆಳೊನ್ ಆಲಿಯಾಕ್ ವೆಳಾರ್ ಆಸ್ಪತ್ರೆಕ್ ಪಾವಯ್ನಾತ್ಲ್ಲೆಂ ಜಾಲ್ಯಾರ್ ಹೆಂ ಆಲಿಯಾ ಆಜ್ ಹ್ಯಾ ಕೊರ್ಟಾಚಾ ಮುಕಾರ್ ಉಭೆಂ ಆಸ್ತೆಂ ನಾ!"
ರಾಮ್ ಪ್ರಸಾದ್ ಆತಾಂ ಪರ್ತ್ಯಾಕ್ ಸಾವಂತಾ ತೆವ್ಶಿಂ ಘುಂವ್ಲೊ.
"ಹೆಂ ಮಸ್ತ್ ರಿಸ್ಕೆಚೆಂ ಕಾಮ್ ಮಿಸ್ಟರ್ ಬಲ್ರಾಜ್! ಆಸ್ಪತ್ರೆಚಾ ವಾಟೆರ್ ಆಲಿಯಾ ಮರಣ್ ಪಾವೊಂಕ್ಯ್ ಸಕ್ತೆಂ! ಹೆಂ ಜಾಣಾಂ ಆಸೊನ್ಯ್ ತುಮಿ ಆಲಿಯಾಕ್ ಬಚಾವ್ ಕರುಂಕ್ ಪ್ರಯತ್ನ್ ಕೆಲೆಂ....?"
"ವ್ಹಯ್! ಹಾಂವ್ ಆನಿ ರಾಯನ್ ಹೆಂ ಜಾಣಾಂ ಆಸ್ಲ್ಲ್ಯಾಂವ್. ಪುಣ್ ಎಕಾ ಜಿವಾಕ್ ಬಚಾವ್ ಕರ್ಚೆಂ ಚಡ್ ಗರ್ಜೆಚೆಂ ಮ್ಹಣೊನ್ ಮ್ಹಾಕಾ ದಿಸ್ಲೆಂ!"
"ಆನಿ ತುಮಿಂ ಬಚಾವ್ ಕೆಲೆಂ!"
"ವ್ಹಯ್!"
"ಬಚಾವ್ ಕರುಂಕ್ ನಾತ್ಲ್ಲೆಂ ಜಾಲ್ಯಾರ್?"
"ಆಲಿಯಾ ಮರಣ್ ಪಾವ್ತೆಂ!"
"ಆಶೆಂ ತುಂ ಸಾಂಗ್ತಾಯ್? ವಾ....?"
"ಆಸ್ಪತ್ರೆಚಾ ದಾಕ್ತೆರಾನ್ ಹೆಂ ಸ್ಪಶ್ಟ್ ಕೆಲಾಂ!"
"ತರ್ ವೆಳಾರ್ ತುಮಿಂ ತುಮ್ಚ್ಯಾ ಜಿವಾಚಿ ಪರ್ವಾ ಕರಿನಾಸ್ತಾನಾ ಆಲಿಯಾಕ್ ಆಸ್ಪತ್ರೆಕ್ ವೆಲ್ಲ್ಯಾನ್ ತೆಂ ವಾಂಚ್ಲೆಂ!"
"ವ್ಹಯ್!"
"ಹೊ ಪಾಂಯ್ಟ್ಯ್ ನೋಟ್ ಕರುಂಕ್ ಜಾಯ್ ಯುವರ್ ಹಾನರ್! ಆಲಿಯಾ ವಯ್ರ್ ಕೆಲ್ಲೊ ಹಲ್ಲೊ ಕಿತ್ಲೊ ಮರಣಾಂತಿಕ್ ಮ್ಹಳ್ಳೆಂ ತಾಕಾ ವಾಂಚಯಿಲ್ಲ್ಯಾ ಆಸ್ಪತ್ರೆಚಾ ದಾಕ್ತೆರಾಂನಿ ಪಾಸೊನ್ ಹೆಂ ಮಾಂದುನ್ ಘೆತ್ಲಾಂ!"
"ಥ್ಯಾಂಕ್ ಯು ಮಿಸ್ಟರ್ ಸಾವಂತ್!"
"ದೆಟ್ಸಾಲ್ ಯುವರ್ ಹಾನರ್!" ರಾಮ್ ಪ್ರಸಾದಾನ್ ಜಡ್ಜಾ ಮುಕಾರ್ ಬಾಗೊನ್ ತಾಕಾ ನಮಾನ್ ಕೆಲೊ.
ರಾಮ್ ಪ್ರಸಾದ್ ಆತಾಂ ನಾಯರಾ ತೆವ್ಶಿಂ ಘುಂವ್ಲೊ.
"ಇಟ್ಸ್ ಯುವರ್ ವಿಟ್ನೆಸ್!"
ಆತಾಂ ನಾಯರಾಚಿ ಸರ್ತಿ.
ಆಪ್ಲ್ಯಾ ಬಸ್ಕೆರ್ ಥಾವ್ನ್ ಉಟ್ಲ್ಲೊ ನಾಯರ್ ಆಪ್ಲ್ಯಾ ಪೆಂಕ್ಡಾರ್ ಗಳ್ಚ್ಯಾ ಪೆಂಟಾಕ್ ವಯ್ರ್ ವೊಡುನ್ ಮುಕಾರ್ ಆಯ್ಲೊ.
ಸಾವಂತಾಲಾಗಿಂ ಆಯಿಲ್ಲ್ಯಾ ತಾಣೆಂ ಸಾವಂತಾ ವಯ್ರ್ ಏಕ್ ತೀಕ್ಷ್ಣ್ ನದರ್ ಮಾರ್ಲಿ.
ಉಪ್ರಾಂತ್....!
"ತುಜೆಂ ಫ್ರೊಫೆಶನ್ ತುವೆಂ ಕಿತೆಂ ಮ್ಹಳೆಂಯ್ ಮಿಸ್ಟರ್ ಬಲ್ರಾಜ್?"
"ಡೈರೆಕ್ಶನ್ ದಿಂವ್ಚೆಂ! ಹಾಂವ್ ಡೈರೆಕ್ಟರ್!"
"ಡೈರೆಕ್ಟರ್ ಫಾರ್ ವಾಟ್....?"
"ಫಿಲ್ಮ್ಸ್! ಬಾಲಿವುಡಾಚಾ ಫಿಲ್ಮಾಕ್ ಹಾಂವ್ ಡೈರೆಕ್ಷನ್ ದಿತಾಂ!" ಸಾವಂತ್ ನಾಯರಾಚೆರ್ ಥೊಡೊ ರಾಗಾರ್ ಜಾಲೊ.
"ಓ....!" ನಾಯರಾಚೊ ನೆಣಾರ್ಪಣಾಚೊ ಉದ್ಗಾರ್!
ಆಪ್ಲ್ಯಾ ಬಸ್ಕೆರ್ ಬಸ್ಲಲೊ ರಾಮ್ ಪ್ರಸಾದ್ ನಾಯರಾಕ್ಚ್ ಪಳೆತಾಲೊ. ತಾಕಾ ನಾಯರಾಚಿ ಚಾಲ್ ಸಮ್ಜೊಂಕ್ ಜಾಯ್ ಆಸ್ಲ್ಲಿ.
ಹ್ಯಾ ಕುಶಿನ್......! ಪಾರ್ವ್ಯಾಂಕ್ ಧರ್ಚ್ಯಾ ಪಯ್ಲೆಂ ತಾಂಕಾಂ ಗೊಂವಾಚೊ ಕಣ್ ಕಸೊ ಉಡಂವ್ಕ್ ಜಾಯ್ ಮ್ಹಳ್ಳೆಂ ನಾಯರ್ ಜಾಣಾಂ.
"ಬಾಲಿವುಡಾಚೊ ಡೈರೆಕ್ಟರ್ ಜಾಂವ್ಚ್ಯಾ ಪಯ್ಲೆಂ ತುಂ ಸರ್ಜನ್ ಜಾವ್ನ್ ಆಸ್ಲ್ಲೊಯ್?" ನಾಯರಾಚೆಂ ತೀಕ್ಷ್ಣ್ ಸವಾಲ್.
"ನಾ!"
"ಮೆಡಿಕಲಾಂತ್ ಸ್ಪೆಶಲಿಸ್ಟ್ ವಾ ದಾಕ್ತೆರ್ ಪುಣಿಂ ಜಾವ್ನಾಸ್ಲ್ಲೊಯ್?"
"ನಾ!"
"ಸೊಡ್ಯಾಂ.....! ಮೇಲ್ ನರ್ಸ್ ವಾ ಕಂಪೌಂಡರ್ ಪುಣಿಂ ಜಾವ್ನಾಸ್ಲ್ಲೊಯ್?"
"ನಾ!"
ಸಾವಂತಾಕ್ ನಾಯರಾಚ್ಯಾ ಸವಾಲಾಂಚೊ ಮತ್ಲಾಬ್ ಸಮ್ಜಾಲೊ ನಾ.
ನಾಯರಾಚಾ ಸವಾಲಾಂ ಥಾವ್ನ್ ಕೋರ್ಟ್ ರುಮಾಂತ್ ಸಂಫೂರ್ಣ್ ಮೌನ್. ಮುಕಾರ್ ನಾಯರ್ ಕಿತೆಂ ಸವಾಲ್ ವಿಚಾರ್ತಾ ಮ್ಹಳ್ಳೆಂಚ್ ಸಗ್ಳ್ಯಾಂಕ್ ಆತುರಾಯ್!
"ತರ್ ತುವೆಂ ಮೆಡಿಕಲ್ ಲ್ಯಾಬೊರೇಟರಿಂತ್ ಕಾಮ್ ಕೆಲಾಂಯ್ ಆಸ್ತೆಲೆಂ!" ನಾಯರ್ ಆಪ್ಣಾಕ್ಚ್ ಸಮಾಧಾನ್ ಜಾಲ್ಲ್ಯಾಪರಿಂ ಉಲಯ್ಲೊ.
"ನಾ!"
"ನಾ...? ಹೆಂ ನಿಜಾಯ್ಕ್ಯ್ ಆಶ್ಚರ್ಯ್ ಯುವರ್ ಹಾನರ್!" ನಾಯರ್ ಜಡ್ಜಾಚಾ ತೆವ್ಶಿಂ ಘುಂವ್ಲೊ.
"ತರ್ ತುಕಾ ಕಶೆಂ ಕಳಿತ್ ಜಾಲೆಂ ಮಿಸ್ಟರ್ ಬಲ್ರಾಜ್? .......ಆಲಿಯಾ ಮೊರ್ಚ್ಯಾ ಸ್ಥಿತೆರ್ ಪಾವ್ಲಾಂ ಮ್ಹಳ್ಳೆಂ ತೆಂ?"
ನಾಯರಾಚಾ ಸವಾಲಾಕ್ ಸಾವಂತ್ ಥೊಡೊ ಘಡ್ಬಡ್ಲೊ.
"ಆಲಿಯಾ ಧರ್ಣಿರ್ ಪಡೊನ್ ಆಸ್ಲ್ಲ್ಯಾ ಕಡೆನ್ ತಾಚ್ಯಾ ಭೊಂವಾರಿ ಮಸ್ತ್ ರಗಾತ್ ವ್ಹಾಳ್ಲ್ಲೆಂ ಆಸ್ಲ್ಲೆಂ. ತ್ಯಾ ಭಾಯ್ರ್ ತೆಂ ಮತಿರ್ ನಾತ್ಲ್ಲೆಂ!"
"ತೆಂ ರಗಾತ್ ಆಲಿಯಾಚೆಂಚ್ ಮ್ಹಣೊಂಕ್ ತುಜ್ಯೆ ಲಾಗಿಂ ಕಾಂಯ್ ಸಾಕ್ಸ್ ಆಸಾ? ತೆಂ ರಗಾತ್ ತಾಚೆಂ ನ್ಹಯ್ ಜಾಂವ್ಕ್ಯ್ ಪುರೊ!"
"ಜಾಂವ್ಕ್ ಪುರೊ ಮಿಸ್ಟರ್ ಪ್ರಾಸಿಕ್ಯೂಟರ್! ಪುಣ್ ತೆಂ ಪೋಟ್ ಆನಿ ತ್ಯಾ ಪೊಟಾ ವಯ್ಲೆ ಘಾಯ್ ಆಲಿಯಾಚೆಚ್!"
"ತುಂ ಥೊಡೊ ಸ್ಮಾರ್ಟ್ ಆಸ್ಲ್ಲ್ಯಾ ಪರಿಂ ದಿಸ್ತಾಯ್!"
"ಅಸಲ್ಯಾ ವಕಾಲಾತಾಚೆಂಯ್ ಹಾವೆಂ ಡೈರೆಕ್ಶನ್ ದಿಲಾಂ! ಮ್ಹಾಕಾ ಸಗ್ಳೆಂ ಸ್ಟಡಿ ಕರುಂಕ್ ಪಡ್ತಾ!"
ಕೋರ್ಟ್ ರುಮಾಂತ್ ಬಸ್ಲೆಲ್ಯಾಂಚ್ಯೊ ಪಾತಳ್ ಹಾಸೊ.
"ಆರ್ಡರ್! ಆರ್ಡರ್!" ಜಡ್ಜಾಚೆಂ ಫರ್ಮಾಣ್!
"ತರ್ ತುಜ್ಯಾ ಡೈರೆಕ್ಶನಾಚಾ ಕಾಮಾಂತ್ ತುಕಾ ಪಯ್ಲೆಂ ಸಗ್ಳೆಂ ಸ್ಟಡಿ ಕರುಂಕ್ ಪಡ್ತಾ!"
"ವ್ಹಯ್!"
"ಆನಿ ತುವೆಂ ಸ್ಟಡಿ ಕೆಲ್ಯಾಯ್......!?"
"ವ್ಹಯ್!"
"ಹ್ಯಾ ಆಲಿಯಾಚಾ ಹಲ್ಲ್ಯಾಚೆಂ ಪ್ಲ್ಯಾನ್ಯ್.....?" ನಾಯರ್ ಸಾವಂತಕ್ಚ್ ಪಳೆತಾಲೊ.
ಆಪ್ಲ್ಯಾ ಬಸ್ಕೆರ್ ಬಸ್ಲೆಲ್ಯಾ ರಾಮ್ ಪ್ರಸಾದಾನ್ ತಕ್ಲಿ ಹಾಲಯ್ಲಿ. ತಾಕಾ ಸಾವಂತ್ ಫಸ್ಲಲೊ ಆನ್ಭೋಗ್ ಜಾಲೊ.
"ಹೆಂ ಪ್ಲ್ಯಾನ್ ಕೊಣಾಚೆಂ ಮಿಸ್ಟರ್ ಬಲ್ರಾಜ್? ತುವೆಂ ಸ್ಟಡಿ ಕೆಲಾಂಯ್ ಆಸ್ತೆಲೆಂ! ಸಾಂಗ್ ಸಾಂಗ್! ಭಿಯೆಂವ್ಚಿ ಕಾಂಯ್ ಗರ್ಜ್ ನಾ!"
"ಅಬ್ಜೆಕ್ಶನ್ ಯುವರ್ ಹಾನರ್!" ರಾಮ್ ಪ್ರಸಾದ್ ಉಭೊ ಜಾಲೊ.
ಕೋರ್ಟ್ ರುಮಾಂತ್ ಎಕಾಚ್ಚ್ ಫರಾ ಮೌನ್. ಇಕ್ಬಾಲಾಚಾ ತೊಂಡಾರ್ ಹಾಸೊ.
"ಅಬ್ಜೆಕ್ಶನ್ ಓವರ್ ರೂಲ್ಡ್!"
"ಥ್ಯಾಂಕ್ ಯು ಯುವರ್ ಹಾನರ್!" ನಾಯರನ್ ಜಡ್ಜಾಕ್ ನಮಾನ್ ಕೆಲೊ. ರಾಮ್ ಪ್ರಸಾದ್ ಆಪ್ಲ್ಯಾ ಬಸ್ಕೆರ್ ಬಸ್ಲೊ.
"ಸಾಂಗ್ ಮಿಸ್ಟರ್ ಬಲ್ರಾಜ್! ಹೆಂ ಆಲಿಯಾಚಾ ಹಲ್ಲ್ಯಾಚೆಂ ಪ್ಲ್ಯಾನ್ ಕೊಣಾಚೆಂ?"
"ತಿ ತುಕಾಚ್ಚ್ ಖಬಾರ್ ಆಸ್ತೆಲಿ ಮಿಸ್ಟರ್ ಪ್ರಾಸಿಕ್ಯೂಟರ್. ಹಾವೆಂ ಮ್ಹಜ್ಯಾ ಫಿಲ್ಮಾ ವಿಶಿಂ ತುಜ್ಯೆಲಾಗಿಂ ಉಲಯಿಲ್ಲೆಂ!" ಸಾವಂತಾಕ್ ರಾಗ್ ತಕ್ಲೆಕ್ ಚಡ್ಲ್ಲೊ. ತಾಕಾ ಹ್ಯಾ ಕೊರ್ಟಾಂತ್ ಆವ್ಮಾನ್ ಮ್ಹಳ್ಳ್ಯಾ ಪರಿಂ ಜಾಲ್ಲೊ.
"ಬರೆಂ ತರ್! ಆಮಿ ತುಜ್ಯಾ ಫಿಲ್ಮಾ ವಿಶ್ಯಾಂತ್ಚ್ ಉಲವ್ಯಾಂ! ಮ್ಹಾಕಾ ತುಂ ಹೆಂ ಸಾಂಗ್ ಮಿಸ್ಟರ್ ಬಲ್ರಾಜ್......! ಆಲಿಯಾಕ್ ಆನಿ ತುಕಾ ಕಾಂಯ್ ಸಂಭಂಧ್ ಆಸಾ?"
"ಆಲಿಯಾ ಮ್ಹಜ್ಯಾ ಫಿಲ್ಮಾಂತ್ ಕಾಮ್ ಕರ್ತಾ!"
"ತುಜ್ಯಾ ಫಿಲ್ಮಾಂತ್.....?" ನಾಯರಾಚಾ ತಾಳ್ಯಾಂತ್ ಆಶ್ಚರ್ಯ್ ಆಸ್ಲ್ಲೆಂ. "ಅತ್ತಾಂ ಥೊಡ್ಯಾಚ್ ವೆಳಾ ಪಯ್ಲೆಂ ತುವೆಂಚ್ ಸಾಂಗ್ಲೆಂಯ್ ತುಜೆಂ ಕಾಮ್ ಫಿಲ್ಮಾಂಕ್ ಡೈರೆಕ್ಶನ್ ದಿಂವ್ಚೆಂ! ಕಿತೆಂ ಹಾಂವ್ ಸಾರ್ಕೆಂ ಉಲಯ್ತಾಂ.......?"
"ವ್ಹಯ್!"
"ತರ್, ಫಿಲ್ಮಾಚೊ ಪ್ರೊಡ್ಯೂಸರ್ಯ್ ತುಂಚ್......?"
"ವ್ಹಯ್!"
"ಹಾಂಗಾ ಹಾಂವ್ ಕನ್ಪ್ಯೂಸ್ ಜಾಲಾಂ ಮಿಸ್ಟರ್ ಬಲ್ರಾಜ್! ತುವೆಂ ಡೈರೆಕ್ಶನ್ ದಿಂವ್ಚ್ಯಾ ಫಿಲ್ಮಾಚೊ ತುಂಚ್ ಪ್ರೊಡ್ಯೂಸರ್ ಜಾಲ್ಯಾರ್ ತುವೆಂ ಪಯ್ಲೆಂ ಸಾಂಗ್ಲ್ಲೊ ರಾಯನ್.....?"
"ತೊ ಮ್ಹಜ್ಯಾ ಫಿಲ್ಮಾಕ್ ಫೈನಾನ್ಸ್ ಕರ್ತಾ! ತಾಚೆಂ ಕಾರ್ಪೊರೇಟ್ ಹೌಸ್ ಆಸಾ!"
"ತರ್ ರಾಯನ್ ಹಾಂಗಾ ಎಕ್ಸಿಕ್ಯೂಟಿವ್ ಮ್ಹಣೊನ್ ಜಾಲೊ!"
"ವ್ಹಯ್!"
"ತಾಕಾ ಆನಿ ಆಲಿಯಾಕ್ ಕಾಂಯ್ ಸಂಭಂಧ್?"
"ನಾ!"
"ತುಕಾ ಆನಿ ಆಲಿಯಾಕ್ ಕಾಂಯ್ ಸಂಭಂಧ್?" ಐ ಮೀನ್ ಕಾಮಾಚೊ ಸೊಡುನ್.....?"
"ನಾ!"
"ತುಕಾ ಆನಿ ಆಲಿಯಾಕ್ ಸಂಭಂಧ್ ನಾ! ರಾಯನಾಕ್ ಆನಿ ಆಲಿಯಾಕ್ಯ್ ಸಂಭಂಧ್ ನಾ! ಸಾರ್ಕೆಂ....?"
"ವ್ಹಯ್!"
"ತರ್ ಸಾಂಗ್ ಮಿಸ್ಟರ್ ಬಲ್ರಾಜ್ ತುವೆಂ ಆನಿ ರಾಯನಾನ್ ಮೆಳೊನ್ ಹ್ಯಾ ಆಲಿಯಾ ಖಾತಿರ್ ತುಮ್ಚೊ ಜೀವ್ ಕಿತ್ಯಾಕ್ ರಿಸ್ಕೆರ್ ಘಾಲೊ?"
ಸಾವಂತಾಚೆಂ ಮೌನ್.
"ತುವೆಂಚ್ ಸಾಂಗ್ಲೆಂಯ್ ತುಜ್ಯಾ ಫಿಲ್ಮಾಚೆಂ ಚಿತ್ರೀಕರಣ್ ಕಾಬಾರ್ ಜಾಲ್ಲೆಂ! ಯಾಮ್ ಐ ರೈಟ್...?"
"ವ್ಹಯ್!"
"ಹ್ಯಾ ಉಪ್ರಾಂತ್ ತುಕಾ ಆಲಿಯಾಚಿ ಗರ್ಜ್ ನಾ! ಕರೆಕ್ಟ್.....?"
"ಕರೆಕ್ಟ್!"
"ಚಿತ್ರೀಕರಣ್ ಕಾಬಾರ್ ಜಾಲಾಂ ಮ್ಹಣ್ತಾನಾ ಡಬ್ಬಿಂಗ್ ತುಂ ಕೊಣಾಯ್ ಥಾವ್ನ್ ಕರಂವ್ಕ್ ಸಕ್ತಾಯ್! ರೈಟ್....?"
"ವ್ಹಯ್!"
"ತುಕಾ ಜಾಂವ್ ರಾಯನಾಕ್ ಜಾಂವ್ ತುಮ್ಚ್ಯಾ ಮುಕ್ಲ್ಯಾ ಫಿಲ್ಮಾಕ್ ತುಮ್ಕಾಂ ದುಸ್ರೆಂ ಕೊಣ್ಯ್ ಹೀರೋಯಿನ್ ಮೆಳೊಂಕ್ ಸಕ್ತಾ! ವ್ಹಯ್...?"
"ವ್ಹಯ್!"
"ತರ್, ಸಾಂಗ್ ಮಿಸ್ಟರ್ ಬಲ್ರಾಜ್ ತೆಂ ಕಸಲೆಂ ಕಾರಾಣ್? ಜ್ಯಾ ಕಾರಾಣಾ ಖಾತಿರ್ ತುಮಿಂ ದೊಗಾಂಯ್ನಿ ಮೆಳೊನ್ ಹ್ಯಾ ಆಲಿಯಾ ಖಾತಿರ್ ತುಮ್ಚ್ಯಾ ಜಿವಾಚಿ ಪರ್ವಾ ಕರಿನಾಸ್ತಾನಾ ತಾಕಾ ವೆಳಾರ್ ವಾಂಚಯ್ಲೆಂ? ಆಲಿಯಾ ವಯ್ರ್ ಹಲ್ಲೊ ಜಾತಲೊ ಮ್ಹಣೊನ್ ತುಮ್ಕಾಂ ಪಯ್ಲೆಂಚ್ ಕಳಿತ್ ಆಸ್ಲ್ಲೆಂ?"
ಕೋರ್ಟ್ ರುಮಾಂತ್ ಘುಸು ಘುಸು. ಸಗ್ಳ್ಯಾಂಚಿ ಗೊಮ್ಟಿ ನೀಟ್ ಜಾಲಿ. ಸರ್ವಾಂಚೊ ದಿಶ್ಟಿ ನಾಯರಾ ವಯ್ರ್ ಖಂಚ್ಲ್ಯೊ. ಇಕ್ಬಾಲ್ ಆನಿ ರಾಶಿದ್ ಭಿತರ್ಲ್ಯಾ ಭಿತರ್ಚ್ ಖುಶ್ ಜಾಲೆ.
ಸಾವಂತಾಚೆಂ ಪರ್ತ್ಯಾಕ್ ಮೌನ್.
"ಸಾಂಗ್ ಮಿಸ್ಟರ್ ಬಲ್ರಾಜ್! ತುವೆಂಚ್ ಹ್ಯಾ ಕೊರ್ಟಾಂತ್ ಉಗ್ತ್ಯಾನ್ ಸಾಂಗ್ಲಾಂಯ್ ಕೀ ಆಲಿಯಾಚೆಂ ರಗಾತ್ ವ್ಹಾಳೊನ್ ತೆಂ ಮತಿರ್ ನಾತ್ಲ್ಲೆಂ. ತುಜ್ಯಾ ಸಾಂಗ್ಣೆಕ್ ಆಸ್ಪತ್ರೆಚ್ಯಾ ದಾಕ್ತೆರಾಂಚಿ ಸಾಕ್ಸ್ಯ್ ಆಸಾ. ಹಾಕಾ ಹಾಂವ್ಯ್ ಒಪ್ತಾಂ. ತುಮಿ ಆಲಿಯಾಕ್ ವಾಂಚಯ್ಲೆಂ! ಭೋವ್ ಬರೆಂ! ಪುಣ್ ಹೆಂಚ್ ಆಲಿಯಾ ಆಸ್ಪತ್ರೆಚಾ ವಾಟೆರ್ ತುಮ್ಚ್ಯಾ ಹಾತಾಂತ್ ಮೊರೊಂಕ್ಯ್ ಸಕ್ತೆಂ! ತೆಂ ತುಮ್ಚ್ಯಾ ಹಾತಾಂತ್ ಮೆಲ್ಲೆಂ ಜಾಲ್ಯಾರ್ ತುಂ ಜಾಣಾಂಯ್ ತಾಚೊ ಖುನಿಗಾರ್ ಕೋಣ್ ಜಾತೊ ತೊ? ತುಂ ಆನಿ ರಾಯನ್! ತರ್ ಸಾಂಗ್ ಮಿಸ್ಟರ್ ಬಲ್ರಾಜ್ ಕಸಲ್ಯಾ ಕಾರಾಣಾಕ್ ಲಾಗೊನ್ ತುಮಿ ತುಮ್ಚೊ ಜೀವ್ ರಿಸ್ಕೆರ್ ಘಾಲೊ?"
"ಎಕಾ ಮೊರ್ಚ್ಯಾ ಮನ್ಶ್ಯಾಕ್ ವಾಂಚಂವ್ಕ್ ಸಾದ್ಯ್ ಆಸಾ ಜಾಲ್ಯಾರ್ ತಶೆಂ ಕರುಂಕ್ ಕಸಲೆಂಯ್ ಕಾರಾಣ್ ಜಾಯ್?" ಸಾವಂತಾನ್ ನಾಯರಾಕ್ಚ್ ಪಳೆಲೆಂ.
"ಕಾಂಯ್ಚ್ ಕಾರಾಣ್ ನಾಸ್ತಾನಾ ತುಂ ಮ್ಹಾಕಾ ತುಜ್ಯಾ ಫಿಲ್ಮಾಂತ್ ಅಭಿನಯ್ ಕರುಂಕ್ ದಿತಾಯ್.....?"
"ಅಬ್ಜೆಕ್ಶನ್ ಯುವರ್ ಹಾನರ್!" ರಾಮ್ ಪ್ರಸಾದ್ ಉಟ್ಲೊ.
"ಅಬ್ಜೆಕ್ಶನ್ ಓವರ್ ರೂಲ್ಡ್!"
"ಥ್ಯಾಂಕ್ ಯು ಯುವರ್ ಹಾನರ್!" ನಾಯರ್ ಸಾವಂತಾಚಾ ಕುಶಿಂನ್ ಘುಂವ್ಲೊ.
"ಮ್ಹಜ್ಯಾ ಸವಾಲಾಕ್ ಜವಾಬ್ ದೀ ಮಿಸ್ಟರ್ ಬಲ್ರಾಜ್. ಕಾಂಯ್ಚ್ ಕಾರಾಣ್ ನಾಸ್ತಾನಾ ತುಂ ಮ್ಹಾಕಾ ತುಜ್ಯಾ ಫಿಲ್ಮಾಂತ್ ಅಭಿನಯ್ ಕರುಂಕ್ ದಿತಾಯ್?"
"ತುಜ್ಯಾ ತಾಲೆಂತಾಕ್ ತುವೆಂ ರುಜು ಕರುನ್ ದಾಖಯ್ಲ್ಯಾರ್! ಆನಿ ತುಂ ಫಿಟ್ ಆಸ್ಲ್ಯಾರ್!"
"ಎಕ್ಸಾಕ್ಟ್ಲೀ!" ನಾಯರಾನ್ ಜಡ್ಜಾಕ್ ಪಳೆಲೆಂ.
ರಾಮ್ ಪ್ರಸಾದಾನ್ ಆಪ್ಲ್ಯಾ ತೊಂಡಾರ್ ಹಾತ್ ಚರಯ್ಲೊ. ತ್ಯಾ ಸವೆಂ ತಾಚಿ ತಕ್ಲಿ ಹಾಲ್ಲಿ. ತಾಕಾ ಸಾವಮ್ತ್ ಫಸ್ಲಲೊ ಆನ್ಭೋಗ್ ಜಾಲೊ.
"ಆಲಿಯಾನ್ ತುಕಾ ಕಿತೆಂ ರುಜು ಕರುನ್ ದಾಖಯ್ಲಾಂ ಮಿಸ್ಟರ್ ಬಲ್ರಾಜ್?"
ಸಾವಂತಾಚಿ ಕಾಂಯ್ ಜವಾಬ್ ನಾ.
"ಆಲಿಯಾ ಪಯ್ಲೆಂ ಥಾವ್ನ್ ಎಕ್ಟ್ರೆಸ್?"
"ನ್ಹಯ್!"
"ತುಜ್ಯಾ ಫಿಲ್ಮಾಂತ್ ಆಕ್ಟಿಂಗ್ ಕರ್ಚ್ಯಾ ಪಯ್ಲೆಂ ತಾಣೆಂ ದುಸ್ರ್ಯಾ ಖಂಯ್ಚಾಯ್ ಫಿಲ್ಮಾಂತ್ ಆಕ್ಟಿಂಗ್ ಕೆಲಾಂ?"
"ನಾ!"
"ತರ್, ತುಜ್ಯಾಚ್ ಫಿಲ್ಮಾಂತ್ ತಾಣೆಂ ಪಯ್ಲೆ ಪಾವ್ಟಿಂ ಆಕ್ಟಿಂಗ್ ಕರ್ಚೆಂ!?"
"ವ್ಹಯ್!"
"ತುವೆಂ ಆಲಿಯಾಕ್ ಕಶೆಂ ಸೊಧುನ್ ಕಾಡ್ಲೆಂಯ್.....?"
ಸಾವಂತಾಚೆಂ ಮೌನ್.
"ಸಾಂಗ್ ಮಿಸ್ಟರ್ ಬಲ್ರಾಜ್. ಹಾಂಗಾಸರ್ ಎಕಾ ನಿರಾಫ್ರಾಧ್ಯಾಕ್ ಆಫ್ರಾಧಿ ಮ್ಹಣೊನ್ ಉಭೊ ಕೆಲಾ! ಕೊರ್ಟ್ ತುಜ್ಯಾ ಜಾಪಿಕ್ ರಾಕ್ತಾ. ತುವೆಂ ಆಲಿಯಾಕ್ ಕಶೆಂ ಸೊಧುನ್ ಕಾಡ್ಲೆಂಯ್?" ನಾಯರಾಚೊ ತಾಳೊ ಸಾದ್ಲೊ.
"ಎಕ್ಟುವಲ್ಲೀ ಆಲಿಯಾ ಇಸ್ ರೆಕೆಮಂಡಡ್ ಬೈ ರಾಯನ್!"
"ಎಕ್ಸಾಕ್ಟ್ಲೀ ಯುವರ್ ಹಾನರ್! ಕೊಣೆ ಫಿಲ್ಮಾಕ್ ಪಯ್ಶೆ ಗಾಲ್ಯಾತ್ ತಾಣೆಂಚ್ ಆಲಿಯಾಕ್ ರೆಕಮಂಡ್ ಕೆಲಾಂ!"
"ಥ್ಯಾಂಕ್ ಯು ಮಿಸ್ಟರ್ ಬಲ್ರಾಜ್!" ನಾಯರ್ ಆತಾಂ ಜಡ್ಜಾ ತೆವ್ಶಿಂ ಘುಂವ್ಲೊ.
"ಯುವರ್ ಹಾನರ್! ಹ್ಯಾ ಸಾಕ್ಶೆಕ್ ಆನಿ ಹ್ಯಾ ಕೇಸಿಕ್ ಕಾಂಯ್ ಸಂಭಂಧ್ ನಾ! ಸಂಭಂಧ್ ಆಸಾ ಜಾಲ್ಯಾರ್ ರಾಯನಾಕ್ ಆನಿ ಆಲಿಯಾಕ್! ಐ ಮೀನ್ ಹ್ಯಾ ಕೇಸಿಕ್......! ಗರ್ಜ್ ನಾತ್ಲೆಲ್ಯಾ ಸಾಕ್ಶೆಂಕ್ ಪ್ರಸ್ತುತ್ ಕರುನ್ ಕೊರ್ಟಾಚೊ ಅಮೂಲ್ಯ್ ವೇಳ್ ಪಾಡ್ ಕರುಂಕ್ ನಜೊ ಮ್ಹಣೊನ್ ಆಮ್ಚ್ಯಾ ಸಾಂಗಾತಿ ಪ್ರಾಸಿಕ್ಯೂಟರಾನ್ ಜಾಣಾಂ ಜಾಂವ್ಕ್ ಜಾಯ್! ದೆಟ್ಸಾಲ್ ಯುವರ್ ಹಾನರ್!" ನಾಯರಾನ್ ಜಡ್ಜಾಕ್ ನಮಾನ್ ಕೆಲೊ.
"ನೋ ಮೋರ್ ಫರ್ದರ್ ಕ್ವಾಶ್ಚನ್ಸ್!" ನಾಯರ್ ಆತಾಂ ಆಪ್ಲ್ಯಾ ಬಸ್ಕೆ ತೆವ್ಶಿಂ ಚಮ್ಕಾಲೊ.
"ಕೋರ್ಟ್ ಇಸ್ ಅಡ್ಜರ್ನ್ಡ್!"
"ಟಕ್....!"
ಜಡ್ಜ್ ಆಪ್ಲ್ಯಾ ಬಸ್ಕೆರ್ ಥಾವ್ನ್ ಉಟ್ಲೊ.
************
ಟ್ರಾಯಲ್ ಆರಂಭ್ ಜಾವ್ನ್ ದುಸ್ರೊ ದೀಸ್!
ಆಯ್ಚಾ ದಿಸಾಚಾ ದಿಸಾಳ್ಯಾ ಪತ್ರಾಂನಿ ಕಾಲ್ಚ್ಯಾ ದಿಸಾ ಕೊರ್ಟಾಂತ್ ಜಾಲ್ಲ್ಯಾ ಕಾರ್ಯಾಳಾ ವಯ್ರ್ ನದರ್ ಮಾರುನ್ ಖಬಾರ್ ಛಾಪ್ಲ್ಲಿ.
ಸೆನ್ಶೇಶನಲ್ ನಿವ್ಸ್!
ಆಲಿಯಾ ಆನಿ ರಾಯನಾ ಮಧೆಂ ಅವ್ಚಿತ್ತ್ ಸಂಭಂಧ್ ಉದೆಲ್ಲೊ! ಕಾಲ್ಚ್ಯಾ ದಿಸಾ ಕೊರ್ಟಾಂತ್ ನಾಯರಾನ್ ಉಗ್ತ್ಯಾ ಕೊರ್ಟಾಂತ್ ಸಗ್ಳ್ಯಾಂಚಾ ಮುಕಾರ್ ರಾಯನಾಕ್ ಆನಿ ಆಲಿಯಾಕ್ ಸಂಭಂಧ್ ಆಸಾ ಮ್ಹಳ್ಳ್ಯಾ ವಿಶಿಂ ವಾದ್ ಮಾಂಡ್ಲ್ಲೊ. ಹ್ಯಾ ವಾದಾಕ್ ಸ್ಪಶ್ಟ್ ಕರ್ಚ್ಯಾ ಖಾತಿರ್ ತಾಣೆಂ ಸಾವಂತಾಚ್ಯಾ ಸಾಕ್ಶೆಕ್ ಕೊರ್ಟಾ ಮುಕಾರ್ ಅಲಕ್ಶ್ಪಣಿಂ ತಿರಸ್ಕಾರ್ ಕೆಲ್ಲಿ. ರಾಯನಾಕ್ ಕೊರ್ಟಾಂತ್ ಹಾಜಾರ್ ಕರ್ಚಿ ವಿನತಿ ತಾಣೆಂ ಕರುಂಕ್ ನಾತ್ಲ್ಲಿ ಜಾಲ್ಯಾರ್ಯ್ ತಾಚ್ಯಾ ವಾದಾಂತ್ ಹೆಂ ಸ್ಪಶ್ಟ್ ಜಾಲ್ಲೆಂ ಕೀ ರಾಯನ್ ಆನಿ ಆಲಿಯಾ ಮಧೆಂ ಕಾಂಯ್ ತರ್ಯ್ ಸಂಭಂಧ್ ಆಸಾ. ಪ್ರೆಸ್ಸಾಚ್ಯಾಂನಿ ಹ್ಯಾ ದುಬಾವಾಕ್ ಮಿಶೇಲಾಚಾ ಆಚಾನಕ್ ಜಾಲ್ಲ್ಯಾ ನಪಂಯ್ಚ್ಪಣಾಕ್ ತುಲನ್ ಕರುನ್ ಪಳೆವ್ನ್ ಆಯ್ಚಾ ಪತ್ರಾಂನಿ ತಾಂಚಿ ಖಬಾರ್ ಛಾಪ್ಲ್ಲಿ.
ಆಲಿಯಾಚೆಂ ಅಭಿನಯ್ ಪಸಂದ್ ಕೆಲ್ಲ್ಯಾ ಲೊಕಾಚೆಂ ಗುಮಾನ್ ರಾಯನಾ ವಯ್ರ್ ಗೆಲೆಂ. ಮಿಶೇಲಾನ್ ಅವ್ಚಿತ್ತ್ ನಾಪತ್ತೊ ಜಾಂವ್ಕ್ ಆನಿಂ ಆಲಿಯಾ ಮುಂಬಯಿಂತ್ ಫಾಮಾದ್ ಜಾಂವ್ಕ್ ರಾಯನ್ಚ್ ಕಾರಾಣ್ ಮ್ಹಳ್ಳಿ ಖಬಾರ್ ಸಭಾರಾಂಚಾ ಜಿಬೆರ್ ಥಾವ್ನ್ ಜಿಬೆರ್ ವ್ಹಾಳೊಂಕ್ ಲಾಗ್ಲಿ. ಪೊಲಿಸಾಂಕ್ಯ್ ಆತಾಂ ಹೊ ಏಕ್ ಮಿಸ್ತೆರ್ ಜಾಲೊ. ವ್ಹಳೂ ವ್ಹಳೂ ತಾಂಚೊ ದುಬಾವ್ ರಾಯನಾ ವಯ್ರ್ ಯೇವ್ನ್ ರಾವ್ಲೊ. ತಾಂಚೆ ಸವೆಂ ಹೊಚ್ಚ್ ದುಬಾವ್ ಆಜ್ ಸಗ್ಳ್ಯಾ ಮುಂಬಯಿಚಾ ಲೊಕಾಂಚಾ ದಾರಾಕ್ ಠೊಕೆ ಮಾರ್ಚ್ಯಾಂತ್ ಜಯ್ತೆವಂತ್ ಜಾಲ್ಲೊ.
ಕಾಲ್ಚ್ಯಾ ದಿಸಾ ಕೊರ್ಟಾಂತ್ ಸಾವಂತಾಚಿ ಸಾಕ್ಸ್ ಪ್ರಸ್ತುತ್ ಕೆಲ್ಲ್ಯಾ ರಾಮ್ ಪ್ರಸಾದಾನ್ ನಾಯರಾಚಾ ಬುದ್ವಂತ್ಕಾಯೆಚೊ ಅಂದಾಜ್ ಕೆಲೊ. ನಾಯರ್ ಆಪ್ಣೆಂ ಚಿಂತ್ಚ್ಯೆ ಪರಿಂ ನ್ಹಯ್ ಮ್ಹಳ್ಳೆಂ ತಾಕಾ ಕಳ್ತಾನಾ ರಾಮ್ ಪ್ರಸಾದ್ ಜಾಗ್ರುತ್ ಜಾಲೊ. ನಾಯರ್ ಆಪ್ಣಾಚಾ ಸವಾಲಾಂನಿ ಖಂಯ್ಚಾಯ್ ಸಾಕ್ಶೆದಾರಾಕ್ ಗೊಂದೊಳಾಂತ್ ಉಡಯ್ತಾ ಆನಿ ತಾಣೆಂ ಝುಜ್ಚ್ಯಾ ಕೇಸಿಕ್ ಏಕ್ ನವೆಂಚ್ ತಾಚೆಂಚ್ ಮ್ಹಳ್ಳೆಂ ರೂಪ್ ದೀವ್ನ್ ತ್ಯಾ ರುಪಾಕ್ ತಣಾ ಭಿತರ್ ಲಿಪಯ್ತಾ ಆನಿ ಪಾಕ್ಕಿಸಾಳ್ಯಾ ಪರಿಂ ತ್ಯಾ ರುಪಾಕ್ ಎಕಾಚ್ ಫರಾ ತ್ಯಾ ತಣಾ ಭಿತರ್ ಥಾವ್ನ್ ತೊ ಭಾಯ್ರ್ ಕಾಡ್ತಾ. ಹೆಂ ರಾಮ್ ಪ್ರಸಾದಾನ್ ಕಾಲ್ ತಾಚ್ಯಾಚ್ ದೊಳ್ಯಾಂನಿ ಪಳೆಲ್ಲೆಂ. ಹ್ಯಾ ಉಪ್ರಾಂತ್ ತಾಣೆಂ ಹುಶಾರ್ ಜಾಂವ್ಕ್ ಆಸ್ಲ್ಲೆಂ.
ರಾಮ್ ಪ್ರಸಾದಾಚಿ ವಕಾಲಾತ್ ನಾಯರ್ ಬರ್ಯಾನ್ ಜಾಣಾಂ. ಪ್ರಸಾದ್ ವಿರೋಧ್ ಪಾರ್ಟೆಚ್ಯಾಕ್ ಆಪ್ಲೆಂ ಭಳ್ ದಾಖಯ್ನಾಸ್ತಾನಾ ವಿರೋಧ್ ಪಾರ್ಟೆಚ್ಯಾಚೆಂ ಭಳ್ ಖಂಯ್ ಆಸಾ ಮ್ಹಳ್ಳೆಂ ತೆಂ ಪಾರ್ಕಿತಾ ಆನಿ ತ್ಯಾ ಉಪ್ರಾಂತ್ ತೊ ಆಪ್ಣಾಚೊ ಸರೊಪ್ ಆನಿ ಮುಂಗುಸಿಚೊ ಖೆಳ್ ಖೆಳ್ತಾ. ಹ್ಯಾಚ್ ಖಾತಿರ್ ನಾಯರಾನ್ ಪಯ್ಲೆಂಚ್ ರಾಮ್ ಪ್ರಸಾದಾಕ್ ತಾಚ್ಯಾ ಪಯ್ಲ್ಯಾ ಸಾಕ್ಶೆಂತ್ಚ್ ಘುಸ್ಪಡಾಯಿಲ್ಲೆಂ.
ಸಾವಂತಾಚಾ ಪಯ್ಲ್ಯಾ ಸಾಕ್ಶೆಂತ್ ದೊಗಾಂಯ್ನಿ ಎಕಾ ಮೆಕಾಕ್ ಪಾರ್ಕುನ್ ಪಳೆಲ್ಲೆಂ. ತೆ ಆತಾಂ ತಾಂಚಾ ಮುಕ್ಲ್ಯಾ ಝುಜಾಕ್ ಆಯ್ತೆ ಜಾಲೆ.
ಹ್ಯಾ ಕುಶಿನ್ ರಾಯನ್ ಮುಂಬಯಿಂತ್ ನಾತ್ಲ್ಲೊ. ಮಂಗ್ಳುರಾಂತ್ ಜಾಲ್ಲ್ಯಾ ಮಿಶೇಲಾಚಾ ಆಜ್ಯಾ ಆನಿ ಆಜಿಯೆಚಾ ಅವ್ಚಿತ್ತ್ ಅಕ್ಸಿಡೆಂಟಾಚಾ ಮರ್ಣಾಕ್ ತೊ ಮಂಗ್ಳುರ್ ಪಾವ್ಲ್ಲೊ. ಜೆರೊಮಾಚ್ಯಾ ಸಗ್ಳ್ಯಾ ಕುಟ್ಮಾಚಿಂ ಮರ್ಣಾಕ್ ಯೇಂವ್ಕ್ ಆಸ್ಲ್ಲಿಂ. ರಾಯನ್ ಮಂಗ್ಳುರಾಂತ್ ಹಾಚ್ಯಾ ತಯಾರಾಯೆರ್ ಆಸ್ಲ್ಲೊ.
ಸೊಮಾರಾಚೊ ದೀಸ್!
ಟ್ರಾಯಲ್ ಆರಂಭ್ ಜಾವ್ನ್ ಚವ್ತೊ ದೀಸ್!
ರಾಮ್ ಪ್ರಸಾದಾನ್ ಆಜ್ ದುಸ್ರ್ಯಾ ಸಾಕ್ಶೆಕ್ ಕೊರ್ಟಾ ಮುಕಾರ್ ಪ್ರಸ್ತುತ್ ಕೆಲೆಂ.
"ತುಜೆಂ ನಾಂವ್....?"
"ಸಾರಂಗ್!"
"ಸಂಪೂರ್ಣ್ ನಾಂವ್....?"
"ಗಜೇಂದ್ರನಾಥ್ ಸಾರಂಗ್!"
"ಕಾಮ್.....?"
"ವಾಚ್ಮ್ಯಾನ್!"
"ಕಸಲೊ ವಾಚ್ಮ್ಯಾನ್....?"
"ಆಪಾರ್ಟ್ಮೆಂಟಾಚೊ!"
"ಖಂಯ್ಚೆಂ ಆಪಾರ್ಟ್ಮೆಂಟ್? ಕೊರ್ಟಾಕ್ ತಿಕ್ಕೆ ಸುಡಾಳ್ ಸಾಂಗ್ ಮಿಸ್ಟರ್ ಸಾರಂಗ್. ತುವೆಂ ಹಾಂಗಾಸರ್ ಕಾಂಯ್ಚ್ ಭಿಯೆಂವ್ಚಿ ಗರ್ಜ್ ನಾ!"
" ’ಬೃಂದಾವನ್’ ಅಪಾರ್ಟ್ಮೆಂಟಾಂಕ್ ಹಾಂವ್ ವಾಚ್ಮ್ಯಾನ್ ಜಾವ್ನ್ ಕಾಮ್ ಕರ್ತಾಂ!"
"ಜ್ಯಾ ಅಪಾರ್ಟ್ಮೆಂಟಾಚಾ ನೋವ್ ನಂಬರ್ ಪ್ಲ್ಯಾಟಾಂತ್ ಆಲಿಯಾ ಖಾನ್ ರಾವ್ತಾ.....?"
"ವ್ಹಯ್!"
"ಮಾಯ್ ಮಹಿನ್ಯಾಚಾ ತೇವಿಸಾವ್ಯಾ ತಾರಿಕೆಚ್ಯಾ ಸಾಂಜೆಚಾ ಸಾತ್ ವೊರಾಂಕ್ ಕಿತೆಂ ಘಡ್ಲೆಂ ತೆಂ ಕೊರ್ಟಾಕ್ ಸಾಂಗ್ಯೆತ್....?"
"ತ್ಯಾ ದೀಸ್ ಸಾಂಜೆರ್ ಹಾಂವ್ ಡ್ಯೂಟೆರ್ ಆಸ್ಲ್ಲ್ಯಾ ವಗ್ತಾರ್ ಸುಮಾರ್ ಸಾಂಜೆಚ್ಯಾ ಸಾತ್ ವೊರಾರ್ಶೆಂ ಏಕ್ ಮರ್ಸಿಡೀಸ್ ಕಾರ್ ಯೇವ್ನ್ ಆಮ್ಚ್ಯಾ ಅಪಾರ್ಟ್ಮೆಂಟಾಚಾ ಗೆಟಿ ಮುಕಾರ್ ರಾವ್ಲೆಂ......!"
"ಏಕ್ ಮಿನಿಟ್ ಮಿಸ್ಟರ್ ಸಾರಂಗ್! ಮರ್ಸಿಡೀಸ್ ಕಾರಾಕ್ ಪಳವ್ನ್ ತುವೆಂ ದುಬಾವ್ ಜಾಂವ್ಚೆಂ ಕಿತೆಂ ಆಸಾ?"
"ಆಮ್ಚ್ಯಾ ಅಪಾರ್ಟ್ಮೆಂಟಾಂತ್ ರಾಂವ್ಚ್ಯಾ ಪಯ್ಕಿ ಫಕತ್ತ್ ದೊಗಾಂ ಲಾಗಿಂ ಮಾತ್ರ್ ಮರ್ಸಿಡೀಸ್ ಕಾರಾಂ ಆಸಾತ್. ಎಕ್ಲೊ ಫಾರ್ಸಿ. ತಾಚೆಂ ಧವೆಂ ಮರ್ಸಿಡಿಸ್ ಕಾರ್ ಜಾಲ್ಯಾರ್ ದುಸ್ರೊ ಗುಜರಾತಿ. ತಾಚೆಂ ನಿಳ್ಶೆಂ ಮರ್ಸಿಡೀಸ್ ಕಾರ್. ಗುಜರಾತಿಚೆಂ ಮರ್ಸಿಡೀಸ್ ಕಾರ್ ತಿಕ್ಕೆ ಪರ್ನೆಂ ಜಾಲ್ಯಾರ್ ಫಾರ್ಸಿಚೆಂ ಮರ್ಸಿಡೀಸ್ ನವೆಂ!"
"ತರ್.....?"
"ಹೆಂ ತಿಸ್ರೆಂ ಮರ್ಸಿಡೀಸ್ ಹಾವೆಂ ಪಳೆಲ್ಲೆಂ ಪಾಚ್ವ್ಯಾ ರಂಗಾಚೆಂ. ಆನಿ ಹ್ಯಾ ಕಾರಾಕ್ ಹಾವೆಂ ಪಯ್ಲ್ಯಾ ಪಾವ್ಟಿಂ ಪಳಂವ್ಚೆಂ!"
"ಬರೆಂ! ಮುಕಾರ್ ಸಾಂಗ್!"
"ತ್ಯಾ ಕಾರಾಚೆರ್ ಆಸ್ಲ್ಲ್ಯಾನ್ ಮ್ಹಜ್ಯೆಲಾಗಿಂ ಅಪಾರ್ಟ್ಮೆಂಟಾ ಭಿತರ್ ಪ್ರವೇಶ್ ಮಾಗ್ಲೊ!"
"ಕಿತ್ಯಾಕ್.....?"
"ಅಪಾರ್ಟ್ಮೆಂಟಾಂತ್ ವಸ್ತಿ ಕರ್ಚ್ಯಾಂಚಾ ವಾಹನಾಂಕ್ ಮಾತ್ರ್ ಸೊಡ್ಲ್ಯಾರ್ ಭಾಯ್ಲ್ಯಾ ವಾಹನಾಂಕ್ ಆಪಾರ್ಟ್ಮೆಂಟಾಚಾ ಗೇಟಿ ಭಿತರ್ ಪ್ರವೇಶ್ ನಾ!"
"ಬರೆಂ! ತುವೆಂ ತಾಕಾ ಪ್ರವೇಶ್ ದಿಲೊಯ್....?"
"ಹಾವೆಂ ಇನ್ಕಾರ್ ಕೆಲೆಂ!"
"ಉಪ್ರಾಂತ್......?"
"ಆಲಿಯಾ ಮ್ಯಾಡಮಿಕ್ ತೊ ಮೆಳೊಂಕ್ ಆಯಿಲ್ಲಿ ಖಬಾರ್ ತಾಣೆಂ ಮ್ಹಾಕಾ ಸಾಂಗ್ಲಿ!"
"ಉಪ್ರಾಂತ್.....?"
"ಮ್ಹಾಕಾ ಕಿತೆಂ ಕರ್ಚೆಂ ತೆಂ ಕಳೊಂಕ್ ನಾ!"
"ಕಿತ್ಯಾಕ್....?"
"ಆಲಿಯಾ ಮ್ಯಾಡಮ್ ಫಿಲ್ಮಾಂನಿ ಕಾಮ್ ಕರ್ತಾ. ಫಿಲ್ಮಾಂನಿ ಕಾಮ್ ಕರ್ಚೆ ವ್ಹಡ್ಲೆ ಮನಿಸ್ ಮ್ಹಣೊನ್ ಹಾಂವ್ ಸಮ್ಜಾಲ್ಲೊಂ. ಆಲಿಯಾ ಮ್ಯಾಡಮಿಕ್ ಮೆಳೊಂಕ್ ಹೊ ಆಯ್ಲಾ ಮ್ಹಣ್ತಾನಾ ಆನಿ ತಾಚೆಂ ಮರ್ಸಿಡಿಸ್ ಕಾರ್ ಪಳವ್ನ್ ಹಾವೆಂ ಪರ್ವಣ್ಗಿ ದಿಲಿ."
"ಉಪ್ರಾಂತ್.....?"
"ಕಾರಾಕ್ ಪಾರ್ಕಿಂಗಾಚೆರ್ ದವರುನ್ ಕಾರಾ ಥಾವ್ನ್ ದೆಂವ್ಲ್ಲೆ ದೋಗ್ ಜಣ್ ಲಿಫ್ಟಾ ತೆವ್ಶಿಂ ಚಮ್ಕಾಲೆ."
"ತರ್ ಕಾರಾಚೆರ್ ಕಿತ್ಲೆ ಜಣ್ ಆಸ್ಲ್ಲೆ ಮಿಸ್ಟರ್ ಸಾರಂಗ್?"
"ಚಾರ್ ಜಣ್!"
"ಚಾರ್ ಜಣ್.....? ದೋಗ್ ಲಿಫ್ಟಾಂತ್ ರಿಗ್ಲೆ. ದೋಗ್ ಕಾರಾ ಭಿತರ್ ಉರ್ಲೆ. ಕರೆಕ್ಟ್.....?"
"ವ್ಹಯ್!"
"ಉಪ್ರಾಂತ್......?"
"ಕಾರಾ ಭಿತರ್ಲೆ ವ್ಯಕ್ತಿ........"
"ಏಕ್ ಮಿನಿಟ್ ಮಿಸ್ಟರ್ ಸಾರಂಗ್! ಹೆಂ.... ತುವೆಂ ಕಾರಾರ್ ಆಯಿಲ್ಲ್ಯಾ ಮನ್ಶ್ಯಾಂಕ್ ಪಳೆಲಾಂಯ್ ಮ್ಹಣ್ತಾಯ್. ತಾಂಕಾ ತುಂ ವಳ್ಕಾತಾಯ್? ತ್ಯಾ ಆದಿಂ ತುವೆಂ ತಾಂಕಾ ತುಜ್ಯಾ ಅಪಾರ್ಟ್ಮೆಂಟಾತ್ ಪಳೆಲಾಂಯ್?"
"ನಾ!"
"ತರ್, ತುವೆಂ ತಾಂಕಾಂ ತ್ಯಾ ಆದಿಂ ಪಳಂವ್ಕ್ ನಾಂಯ್? ಮ್ಹಳ್ಯಾರ್ ತ್ಯಾ ತೇವಿಸಾವ್ಯಾ ತಾರಿಕೆ ಪಯ್ಲೆಂ ತುಜ್ಯಾ ಆಪಾರ್ಟ್ಮೆಂಟಾಂತ್ ತುವೆಂ ತಾಂಕಾ ಪಳಂವ್ಕ್ ನಾಂಯ್......!?"
"ನಾ! ತ್ಯಾ ಆದಿಂ ಹಾವೆಂ ತಾಂಕಾ ಪಳೆಲ್ಲೆಂ ನಾ.!"
"ಆತಾಂ ತುಂ ತಾಂಕಾ ಪಳೆಲ್ಯಾರ್ ವಳ್ಕಾತಾಯ್....?"
"ವ್ಹಯ್!"
"ತರ್ ಪಳೆ ಮಿಸ್ಟರ್ ಸಾರಂಗ್..... ಹ್ಯಾ ಕೊರ್ಟಾಂತ್ ತುವೆಂ ತ್ಯಾ ದೀಸ್ ಪಳೆಲ್ಲೆ ವ್ಯಕ್ತಿ ತುಕಾ ದಿಸ್ತಾತ್? ತುಂ ತಾಂಚಿ ವ್ಹಳಕ್ ಧರುಂಕ್ ಸಕ್ತಾಯ್.....?"
"ವ್ಹಯ್!" ಸಾರಂಗಾನ್ ರಾಮ್ ಪ್ರಸಾದಾಕ್ಚ್ ಪಳೆಲೆಂ.
"ತುವೆಂ ಪಳಂವ್ಕ್ಚ್ ನಾಂಯ್ ಮಿಸ್ಟರ್ ಸಾರಂಗ್! ತರ್ಯ್ ತುಂ ಇತ್ಲ್ಯಾ ಪಾತ್ಯೆಣೆನ್....?"
"ಹಾಂವ್ ಹಾಂಗಾ ಉಭೊ ಜಾಂವ್ಚ್ಯಾ ಪಯ್ಲೆಂಚ್ ತಾಂಕಾಂ ಹಾವೆಂ ಪಳೆಲಾಂ!"
"ಓಹ್....! ತೆ ಕೋಣ್ ಮ್ಹಳ್ಳೆಂ ತೆಂ ಹ್ಯಾ ಕೋರ್ಟಾಕ್ ಸಾಂಗ್ಯೆತ್?"
"ತ್ಯಾ ಮುಕ್ಲ್ಯಾ ಬಾಂಕಾರ್ ಆಲಿಯಾ ಮ್ಯಾಡಮಿಚ್ಯಾ ಹೆವ್ಶಿಲ್ಯಾ ಬಾಂಕಾರ್ ಬಸ್ಲ್ಯಾತ್ ತೆಚ್ ತೆ!" ಸಾರಂಗಾನ್ ಇಕ್ಬಾಲಾಕ್ ಆನಿ ರಾಶಿದಾಕ್ ದಾಖಯ್ಲೆಂ.
"ಸಾರ್ಕೆಂ ಪಳೆ ಮಿಸ್ಟರ್ ಸಾರಂಗ್. ತುವೆಂ ಪಯ್ಲೆಂ ಸಾಂಗ್ಲಾಂಯ್ ದೋಗ್ ಜಣ್ ಕಾರಾರ್ ಬಸ್ಲ್ಲೆ. ದೋಗ್ ಜಣ್ ಲಿಫ್ಟಾಂತ್ ರಿಗ್ಲ್ಲೆ! ತರ್ ಹೆ ಕಾರಾರ್ ಬಸ್ಲ್ಲೆ ವಾ ಲಿಫ್ಟಾಂತ್ ರಿಗ್ಲ್ಲೆ?"
"ಹೆ ಲಿಫ್ಟಾಂತ್ ರಿಗ್ಲ್ಲೆ!"
"ಉಪ್ರಾಂತ್ ಕಿತೆಂ ಜಾಲೆಂ ಸಾಂಗ್!"
"ಕಾಂಯ್ ಧಾ ಮಿನುಟಾಂ ಭಿತರ್ಚ್ ತೆ ಲಿಫ್ಟಾಂತ್ ರಿಗ್ಲ್ಲೆ ಮನಿಸ್ ಪರ್ತ್ಯಾಕ್ ತ್ಯಾಚ್ ಲಿಫ್ಟಾ ಥಾವ್ನ್ ಭಾಯ್ರ್ ಆಯ್ಲೆ. ಆನಿ ವೆವೆಗ್ಗಿಂ ಆಯಿಲ್ಲೆ ತೆ ಕಾರಾರ್ ಬಸ್ಲೆ ಆನಿ ತುರ್ತಾನ್ ಆಪ್ಲೆಂ ಕಾರ್ ಘೆವ್ನ್ ಚಮ್ಕಾಲೆ!"
"ಉಪ್ರಾಂತ್....?"
"ತಾಂಚೆಂ ಕಾರ್ ಗೇಟಿ ಥಾವ್ನ್ ಭಾಯ್ರ್ ಪಾವ್ಲಾಂ ಮಾತ್ರ್! ತಿತ್ಲ್ಯಾರ್ ಮ್ಹಾಕಾ ಮ್ಹಜ್ಯಾ ಇಂಟರ್ಕೋಮಾಚೊ ಆವಾಜ್ ಆಯ್ಕಾಲೊ. ಇಂಟರ್ಕೋಮಾಚೆರ್ ಆಲಿಯಾ ಮ್ಯಾಡಮ್ ಉಲಯ್ತಾಲಿ. ಆತ್ತಾಂ ಆಯಿಲ್ಲ್ಯಾ ವ್ಯಕ್ತಿಂನಿ ತಿಚ್ಯೆರ್ ಹಲ್ಲೊ ಕೆಲ್ಲೊ ವಿಶಯ್ ತಿಣೆಂ ಮ್ಹಾಕಾ ಸಾಂಗ್ಲೊ. ಹಾಂವ್ ಭಾಯ್ರ್ ಧಾಂವ್ಲೊಂ. ತೆಂ ಕಾರ್ ನಪಂಯ್ಚ್ ಜಾಲ್ಲೆಂ. ಉಪ್ರಾಂತ್ ಹಾವೆಂ ಮ್ಯಾಡಮಿಚ್ಯಾ ಪ್ಲ್ಯಾಟಾಕ್ ಧಾಂವ್ ಮಾರ್ಲಿ. ಪ್ಲ್ಯಾಟಾಂತ್ ಮ್ಯಾಡಮ್ ಧರ್ಣಿರ್ ಪಡೊನ್ ಆಸ್ಲ್ಲಿ. ಸಗ್ಳ್ಯಾನ್ ರಗಾತ್ ಆಸ್ಲ್ಲೆಂ. ಲಾಗಿಂಚ್ ಹಾವೆಂ ಪಿಸ್ತುಲ್ ಆನಿ ಹಾತಾಚೊ ಗ್ಲೌಸ್ ಪಳೆಲೊ. ಹಾಂವ್ ಭಿಯೆಲೊಂ. ಹಾಂವೆಂ ಬೋಬ್ ಮಾರುನ್ ಸಗ್ಳ್ಯಾಂಕ್ ಜಾಗಯ್ಲೆಂ. ಲಾಗ್ಶಿಲ್ಯಾಚ್ ಎಕಾ ಪ್ಲ್ಯಾಟಾ ಥಾವ್ನ್ ಹಾವೆಂಚ್ ಪೊಲಿಸಾಂಕ್ ಆಪಯ್ಲೆಂ. ರಾಯನ್ ಸಾಯ್ಬಾಕ್ ಖಬಾರ್ ದೀಂವ್ಕ್ ಜಾಯ್ ಮ್ಹಣೊನ್ ಹಾವೆಂ ಪರ್ತ್ಯಾಕ್ ಮ್ಹಜ್ಯಾ ಕ್ಯಾಬಿನಾಕ್ ಧಾಂವ್ ಮಾರ್ಲಿ. ರಾಯನ್ ಸಾಯ್ಬಾಚೆಂ ಮೊಬಾಯ್ಲ್ ಪೋನ್. ತಾಚೆಂ ನಂಬರ್ ಲಾಂಭ್. ತಿಂ ನಂಬ್ರಾಂ ಮ್ಹಾಕಾ ಉಡಾಸ್ ದವರುಂಕ್ ಜಾಯ್ನಾಂತ್. ಮ್ಹಜ್ಯಾ ಡೈರಿಂತ್ ಹಾಂವ್ ಹ್ಯಾ ನಂಬರಾಂಕ್ ಬರವ್ನ್ ದವರ್ತಾಂ. ಹಾಂವ್ ಮ್ಹಜ್ಯಾ ಕ್ಯಾಬಿನಾಕ್ ಪಾವ್ತಾನಾ ಮ್ಹಜೆಂ ಟೆಲಿಪೋನ್ ವ್ಹಾಜ್ತಾಲೆಂ. ಪೊನಾರ್ ರಾಯನ್ ಸಾಯ್ಬ್ ಆಸ್ಲ್ಲೊ. ತಾಕಾ ಆಲಿಯಾ ಮ್ಯಾಡಮಿನ್ ಖಬಾರ್ ದಿಲ್ಲಿ. ತಾಣೆಂ ಮ್ಹಾಕಾ ಜಾಗ್ರುತ್ಕಾಯ್ ಸಾಂಬಾಳುಂಕ್ ಸಾಂಗ್ಲಿ. ಹಾಂವ್ ಪರ್ತ್ಯಾಕ್ ಪಾಟಿಂ ಮ್ಯಾಡಮಿಚ್ಯಾ ಪ್ಲ್ಯಾಟಾಕ್ ಆಯ್ಲೊಂ. ಥೊಡ್ಯಾ ವೆಳಾನ್ ರಾಯನ್ ಸಾಯ್ಬ್ ಆನಿ ಸಾವಂತ್ ಆಯ್ಲೆಂ. ಆಮಿಂ ಪೊಲಿಸಾಂಕ್ ರಾಕೊನ್ ರಾಂವ್ಚೆಂ ಪ್ರಯತ್ನ್ ಕೆಲೆಂ ನಾ. ಮ್ಯಾಡಮಿಕ್ ಬಚಾವ್ ಕರ್ಚ್ಯಾ ಉದ್ದೇಶಾನ್ ಆಮಿ ವೆವೆಗ್ಗಿಂ ಮ್ಯಾಡಮಿಕ್ ಉಕ್ಲುನ್ ರಾಯನಾಚಾ ಜಿಪಾರ್ ಘಾಲೆಂ. ತಿತ್ಲ್ಯಾರ್ ಪೊಲಿಸ್ ಯೇವ್ನ್ ಪಾವ್ಲೆ. ತ್ಯಾ ಉಪ್ರಾಂತ್ ಪೊಲಿಸಾಂ ಸವೆಂ ಆಮಿ ಆಲಿಯಾ ಮ್ಯಾಡಮಿಕ್ ಆಸ್ಪತ್ರೆಕ್ ಪಾವಯ್ಲೆಂ. ಆಶೆಂ ಮ್ಯಾಡಮ್ ವಾಂಚ್ಲಿ. ಆಲಿಯಾ ಮಾಡಮ್ ಆಜ್ ವಾಂಚ್ಲ್ಯಾ ಮ್ಹಣೊನ್ ಸಾಂಗೊಂಕ್ ಮ್ಹಾಕಾ ಧಯ್ರ್ಚ್ ಮೆಳಾನಾ." ಸಾರಂಗಾನ್ ತ್ಯಾ ದಿಸಾ ಘಡ್ಲೆಲೆಂ ಸಗ್ಳೆಂ ವಿವರುನ್ ಸಾಂಗ್ಲೆಂ.
"ತರ್ ತುಕಾ ಆಲಿಯಾ ಮ್ಯಾಡಮಿನ್ ಇಂಟರ್ಕೋಮಾಚೆರ್ ತುಕಾ ಪೋನ್ ಕರುನ್ ಹ್ಯಾ ವಿಶಿಂ ಸಾಂಗ್ಲೆಂ.....!?"
"ವ್ಹಯ್!"
"ತುಜ್ಯಾ ಮ್ಯಾಡಮಿನ್ ಸಾಂಗ್ಲ್ಲ್ಯಾ ಪರ್ಮಾಣೆಂ ಆನಿ ತುವೆಂ ಪಳೆಲ್ಲ್ಯಾ ಪರ್ಮಾಣೆಂ ತುಜ್ಯಾ ಮ್ಯಾಡಮಿಚಾ ವಯ್ರ್ ಹಲ್ಲೊ ಕೆಲ್ಲೆ ತೆ ಹೆಚ್ ವ್ಯಕ್ತಿ.....?" ರಾಮ್ ಪ್ರಸಾದಾನ್ ಇಕ್ಬಾಲಾಕ್ ಆನಿ ರಾಶಿದಾಕ್ ಬೋಟ್ ಜೊಕ್ಲೆಂ.
"ವ್ಹಯ್!"
"ಥ್ಯಾಂಕ್ ಯು ಮಿಸ್ಟರ್ ಸಾರಂಗ್!"
"ದೆಟ್ಸಾಲ್ ಯುವರ್ ಹಾನರ್!"
"ಇಟ್ಸ್ ಯುವರ್ ವಿಟ್ನೆಸ್!"
ಆತಾಂ ನಾಯರ್ ಉಟ್ಲೊ.
ಸವ್ಕಾಸ್ ತಾಣೆಂ ಆಪ್ಲ್ಯಾ ದೊನ್ಯ್ ಹಾತಾಂನಿ ಆಪ್ಲ್ಯಾ ಮಾತ್ಯಾಚಾ ಕೆಸಾಂ ವಯ್ರ್ ಮೊಗಾನ್ ಪೊಶೆಲೆಂ. ಜಶೆಂ ಕಾಸಾಯಿ ಸಾಲಾಂತ್ ಬೊಕ್ರ್ಯಾಕ್ ಕಾತರ್ಚ್ಯಾ ಪಯ್ಲೆಂ ಕಸಾಯ್ಗಾರ್ ಬೊಕ್ರ್ಯಾಚಾ ಗಳ್ಯಾಚೆರ್ ಹಾತ್ ಚರಯ್ತಾ ತಶೆಂ.
ತೊ ಆತಾಂ ಸವ್ಕಾಸ್ ಸಾರಂಗಾ ತೆವ್ಶಿಂ ಚಮ್ಕಾಲೊ.
"ತರ್ ತುಂ ವಾಚ್ಮ್ಯಾನ್.....!?"
"ವ್ಹಯ್!"
"ವಾಚ್ಮ್ಯಾನ್ ವಾ ಗೂರ್ಖಾ.....?"
"ಕಿತ್ಯಾಕ್?!"
"ಕಾಂಯ್ ನಾ. ಆಶೆಂಚ್...!"
"ಹಾಂತುಂ ಚಡ್ ಕಾಂಯ್ ಫರಕ್ ನಾ!"
"ಓಹ್! ಮ್ಹಾಕಾ ಖಬಾರ್ ನಾತ್ಲ್ಲಿ!" ನಾಯರಾನ್ ನೆಣಾರ್ಪಣಾಚೊ ಭರ್ತಾವ್ ಕೆಲೊ.
ಕೋರ್ಟ್ ರುಮಾಂತ್ ಥೊಡ್ಯಾ ಕ್ಷಣಾಂಕ್ ಹಾಸೊ ವ್ಹಾಳ್ಳ್ಯೊ.
"ಆರ್ಡರ್! ಆರ್ಡರ್!" ಜಡ್ಜಾನ್ ತಾಕಿದ್ ದಿಲಿ.
"ಮಾಫ್ ಕರ್ ಮಿಸ್ಟರ್ ಸಾರಂಗ್.... ತುವೆಂ ಕಾಮ್ ಕರ್ಚ್ಯಾ ಆಪಾರ್ಟ್ಮೆಂಟಾಚೆಂ ನಾಂವ್ ಕಿತೆಂ ಸಾಂಗ್ಲೆಂಯ್....?"
"ಬೃಂದಾವನ್!"
"’ಬೃಂದಾವನಾಂತ್ ಆಲಿಯಾ ಮ್ಯಾಡಮಿನ್ ವಸ್ತಿ ಕರ್ಚೆಂ ಪ್ಲ್ಯಾಟ್ ತಿಣೆಂ ವಿಕ್ತೆಂ ಘೆತ್ಲಾಂ?"
"ನಾ!"
"ನಾ.....? ತರ್ ಪ್ಲ್ಯಾಟ್ ಕೊಣಾಚೆಂ?"
"ರಾಯನ್ ಸಾಯ್ಬಾಚೆಂ!"
"ಆಲಿಯಾ ಮ್ಯಾಡಮಿಕ್ ರಾಯನಾನ್.... ಐ ಮೀನ್ ತುಜ್ಯಾ ಸಾಯ್ಬಾನ್ ಹೆಂ ಪ್ಲ್ಯಾಟ್ ಪುಕಟಾಕ್ ರಾವೊಂಕ್ ದಿಲಾಂ?"
"ಅಬ್ಜೆಕ್ಶನ್ ಯುವರ್ ಹಾನರ್!" ರಾಮ್ ಪ್ರಸಾದ್ ಉಟೊನ್ ಉಭೊ ಜಾಲೊ.
"ಹೆಂ ಕಸಲೆಂ ಸವಾಲ್? ಪ್ಲ್ಯಾಟಾಕ್ ಆನಿ ಹಲ್ಲ್ಯಾಕ್ ಕಸಲೊ ಸಂಭಂಧ್?" ಪ್ರಸಾದಾನ್ ವಿಚಾರ್ಲೆಂ.
"ಸಂಭಂಧ್ ಆಸಾ ಯುವರ್ ಹಾನರ್ ಸಂಭಂಧ್ ಆಸಾ!" ನಾಯರ್ ವೊಗೊ ರಾವ್ಲೊ ನಾ.
"ರಾಯನ್ ಏಕ್ ಮಲ್ಟಿ ಮಿಲಿಯನೇರ್! ಕಾರ್ಪೊರೇಟ್ ಹೌಸಾಚೊ ಭಳಿಶ್ಟ್ ಖಾಂಬೊ! ಅಸಲೊ ರಾಯನ್ ಹ್ಯಾ ಆಲಿಯಾ ಪಾಟ್ಲ್ಯಾನ್ ಇತ್ಲೊಯ್ ಕಾಕುತ್ದಾರ್ ಕಸೊ ಜಾಲಾ? ಹೆಂಚ್ ಹಾಂವ್ ಹ್ಯಾ ಕೊರ್ಟಾ ಮುಕಾರ್ ರುಜು ಕರುಂಕ್ ಪ್ರಯತ್ನ್ ಕರ್ತಾಂ!" ಜಡ್ಜಾ ಮುಕಾರ್ ಆಯಿಲ್ಲ್ಯಾ ನಾಯರಾನ್ ಜಡ್ಜಾಕ್ ಸಮ್ಜಾಯ್ಲೆಂ.
"ಹಿ ಕೇಸ್ ಆಲಿಯಾ ವಯ್ರ್ ಜಾಲ್ಲ್ಯಾ ಹಲ್ಲ್ಯಾಚಿ ಯುವರ್ ಹಾನರ್!" ರಾಮ್ ಪ್ರಸಾದ್ ಆಪ್ಲಿ ಬಸ್ಕಾ ಸೊಡುನ್ ಥೊಡೊ ಹೆವ್ಶಿಂ ಆಯ್ಲೊ. "ರಾಯನ್ ಕೊಣಾಯ್ಚೆರ್ ಕಿತ್ಲೊಯ್ ಕಾಕುತ್ದಾರ್ ಜಾಂವ್ಕ್ ಸಕ್ತಾ. ತೊ ತಾಚೊ ಖಾಸ್ಗಿ ವಿಶಯ್. ರಾಯನಾಚಾ ಖಾಸ್ಗಿ ವಿಶಯಾಕ್ ಆನಿ ಹ್ಯಾ ಹಲ್ಲ್ಯಾಕ್ ಕಾಂಯ್ ಸಂಭಂಧ್ ನಾ!" ರಾಮ್ ಪ್ರಸಾದಾಚೊ ತಾಳೊ ಉಟ್ಲೊ.
"ಸಂಭಂಧ್ ಆಸಾ ಯುವರ್ ಹಾನರ್! ಭೋವ್ ಗೂಂಡಾಯೆಚೊ ಸಂಭಂಧ್ ಆಸಾ!" ನಾಯರಾನ್ ಆಪ್ಲೊ ಹಾತ್ ಉಕಲ್ಲೊ.
ದೋನ್ ಭಳಿಶ್ಟ್ ಟಗರಾಂ ಎಕಾಮೆಕಾ ಕೊರ್ಟಾಚಾ ರುಮಾಂತ್ ತಕ್ಲೆಕ್ ತಕ್ಲಿ ಆದ್ಳಾಯ್ತಾಲಿಂ.
ಕೊರ್ಟಾಚಾ ರುಮಾಂತ್ ಏಕ್ ಸುವಿ ಪಡ್ಲ್ಯಾರ್ಯ್ ಆಯ್ಕೊನ್ ಯೆಂವ್ಚ್ಯಾ ತಸಲೆಂ ಮೌನ್! ಸರ್ವಾಂನಿ ಪ್ರತೀಕ್ಶಾ ಕೆಲ್ಲ್ಯಾ ಪರಿಂಚ್ ಹ್ಯಾ ಕೋರ್ಟ್ ರುಮಾಂತ್ ತಿಸ್ರೆಂ ಮಹಾ ಝುಜ್ಚ್ ಚಲ್ತಾಲೆಂ.
"ರಾಯನಾಕ್ ಆನಿ ಆಲಿಯಾಕ್ ಸಂಭಂಧ್ ಜೊಡ್ಚ್ಯಾ ಪಯ್ಲೆಂ ಹ್ಯಾ ಕೇಸಿಚಾ ಸಂಭಂಧಾಕ್, ಹ್ಯಾ ಸಾಕ್ಶೆಚ್ಯಾ ಸಂಭಂಧಾಕ್ ರುಜು ಕರ್ಚೆಂ ಚಡ್ ಗರ್ಜೆಚೆಂ ಯುವರ್ ಹಾನರ್!" ರಾಮ್ ಪ್ರಸಾದ್ ಆಪ್ಲ್ಯಾ ವಾದಾಂತ್ ಚಡ್ ಭಳಾನ್ ಉಲಯ್ಲೊ.
"ಅಬ್ಜೆಕ್ಶನ್ ಸಸ್ಟೇಯ್ನ್ಡ್!" ಜಡ್ಜಾನ್ ರಾಮ್ ಪ್ರಸಾದಾಚಾ ವಾದಾಕ್ ಮಾಂದುನ್ ಘೆತ್ಲೆಂ.
"ಥ್ಯಾಂಕ್ ಯು ಯುವರ್ ಹಾನರ್!" ರಾಮ್ ಪ್ರಸಾದಾನ್ ಭಳಾನ್ ಶ್ವಾಸ್ ಸೊಡ್ಲೊ.
"ಯು ಮೇ ಪ್ರೊಸೀಡ್ ಮಿಸ್ಟರ್ ಡಿಫೆಂಡಿಂಗ್ ಪ್ರಾಸಿಕ್ಯೂಟರ್!" ಜಡ್ಜಾನ್ ನಾಯರಾಕ್ ಪರ್ವಣ್ಗಿ ದಿಲಿ.
ನಾಯರ್ ಆತಾಂ ಪರ್ತ್ಯಾಕ್ ಸಾರಂಗಾ ತೆವ್ಶಿಂ ಚಮ್ಕಾಲೊ. ಸಾರಂಗ್ ಉಭೊ ಆಸ್ಲ್ಲ್ಯಾ ಸಾಕ್ಶಿದಾರಾಂನಿ ಉಭೆಂ ಜಾಂವ್ಚ್ಯಾ ಜಾಗ್ಯಾರ್ ಆಸ್ಲ್ಲ್ಯಾ ಪರ್ನ್ಯಾ ರೂಕಾಟಾಚಾ ಗ್ರಿಲ್ಲಾಚೆರ್ ತಾಣೆಂ ಆಪ್ಲೊ ದಾವೊ ಹಾತ್ ದವರ್ಲೊ.
"ತರ್ ತುಂ ಮ್ಹಣ್ತಾಯ್.... ಮಾಯ್ ಮಹಿನ್ಯಾಚಾ ತೇವಿಸಾವ್ಯಾ ತಾರಿಕೆರ್ ಆಲಿಯಾ ಮ್ಯಾಡಮಿಚ್ಯಾ ವಯ್ರ್ ಜಾಲ್ಲ್ಯಾ ಮರಣಾಂತಿಕ್ ಹಲ್ಲ್ಯಾಕ್ ಹೊ ಇಕ್ಬಾಲ್ ಆನಿ ಹೊ ರಾಶಿದ್ಚ್ ಕಾರಾಣ್!?"
"ವ್ಹಯ್!"
"ತುಜ್ಯಾ ಮ್ಯಾಡಮಿಚ್ಯಾ ವಯ್ರ್ ಹಲ್ಲೊ ಜಾತಾನಾ ತುವೆಂ ಪಳೆಂವ್ಕ್ ನಾಂಯ್! ತರ್ಯ್...?"
"ವ್ಹಯ್!"
"ತುವೆಂ ಜರ್ ತುಜ್ಯಾ ಮ್ಯಾಡಮಿಚ್ಯಾ ವಯ್ರ್ ಹಲ್ಲೊ ಜಾತಾನಾ ಮುಖಾಮುಖಿಂ ಪಳಂವ್ಕ್ ನಾಂಯ್ ಜಾಲ್ಯಾರ್ಯ್ ತುಂ ಹೊ ಹಲ್ಲೊ ಇಕ್ಬಾಲಾನ್ ಆನಿ ರಾಶಿದಾನ್ಚ್ ಕೆಲಾ ಮ್ಹಣೊನ್ ಕಸೊ ಸಾಂಗ್ತಾಯ್ ಮಿಸ್ಟರ್ ಸಾರಂಗ್?"
"ಮ್ಹಜ್ಯಾ ದೊಳ್ಯಾಂ ಮುಕಾರ್ ಹಲ್ಲೊ ಜಾಂವ್ಕ್ ನಾ ಜಾವ್ಯೆತ್. ಪುಣ್ ಹಲ್ಲೊ ಜಾಲ್ಯಾ ಉಪ್ರಾಂತ್ ಮ್ಯಾಡಮಿಚ್ಯಾ ಪ್ಲ್ಯಾಟಾಕ್ ಮ್ಹಜ್ಯಾ ದೊಳ್ಯಾಂ ಮುಕಾರ್ ಕೊಣ್ಯ್ ವಚೊಂಕ್ ನಾಂತ್!"
ಸಾರಂಗಾಚಾ ಜವಾಬೆಕ್ ಆಯ್ಕೊನ್ ಥೊಡಿಂ ಕ್ಶಣಾಂ ಮೌನ್ ಜಾಲ್ಲ್ಯಾ ನಾಯರಾನ್ ಸಾರಂಗಾಕ್ಚ್ ಪಳೆಲೆಂ.
ತಿಚ್ಚ್ ದೀಶ್ಟ್!
ಮೊರೊಂಕ್ ವೆಚ್ಯಾ ಬೊಕ್ರ್ಯಾ ವಯ್ರ್ ತಾಚ್ಯಾ ಕಸಾಯ್ಗಾರಾನ್ ಮಾರ್ಚಿ ತಿ ಕಾಕ್ಳುತಿಚಿ ದೀಶ್ಟ್!
"ತುಂ ಗೆಲ್ಲೊಯ್ ಮಿಸ್ಟರ್ ಸಾರಂಗ್!" ನಾಯರಾನ್ ಸಾರಂಗಾಕ್ ಬೋಟ್ ಜೊಕ್ಲೆಂ.
ಎಕ್ಚ್ಚ್ ಪಾವ್ಟಿಂ ಕೋರ್ಟ್ ರುಮಾಂತ್ ಗುಸು ಗುಸು ಆರಂಭ್ ಜಾಲೆಂ.
ಸಾರಂಗಾಕ್ ನಾಯರಾಚೊ ಮತ್ಲಾಬ್ ಸಮ್ಜಾಲೊ ನಾ. ತೊ ತಸೊಚ್ಚ್ ನಾಯರಾಕ್ ಪಳೆತಾಲೊ.
"ಹಾಂ ಮಿಸ್ಟರ್ ಸಾರಂಗ್! ಹಲ್ಲೊ ಜಾಲಾ ಮ್ಹಣೊನ್ ತುವೆಂ ಸಾಂಗ್ಚ್ಯಾ ತುಜ್ಯಾ ಮ್ಯಾಡಮಿಚಾ ಪ್ಲ್ಯಾಟಾಕ್ ತುಂ ಗೆಲ್ಲೊಯ್! ತರ್ ತುವೆಂಚ್ ಕಿತ್ಯಾಕ್ ಹೊ ಹಲ್ಲೊ ಕರುಂಕ್ ನಜೊ?" ನಾಯರಾನ್ ತ್ಯಾ ಸಾರಂಗಾ ಮುಕ್ಲ್ಯಾ ರೂಕಾಟಾಚಾ ಪರ್ನ್ಯಾ ಗ್ರಿಲ್ಲಾರ್ ಆಪ್ಲೊ ಹಾತ್ ದಾಡಾಯ್ಲೊ. ಖಿಳಿ ಸುಟ್ಲೆಲೆಂ ತೆಂ ಗ್ರಿಲ್ಲ್ ಥೊಡೆಂ ಹಾಲ್ಲೆಂ.
"ಅಬ್ಜೆಕ್ಶನ್ ಯುವರ್ ಹಾನರ್!"
"ಅಬ್ಜೆಕ್ಶನ್ ಓವರ್ ರೂಲ್ಡ್!"
"ಸಾಂಗ್ ಮಿಸ್ಟರ್ ಸಾರಂಗ್. ಇಕ್ಬಾಲ್ ಆನಿ ರಾಶಿದ್ ಆಲಿಯಾ ಮ್ಯಾಡಮಿಚಾ ಪ್ಲ್ಯಾಟಾ ಥಾವ್ನ್ ದೆಂವೊನ್ ಗೆಲ್ಯಾ ಉಪ್ರಾಂತ್ ತುವೆಂಚ್ ತಿಚ್ಯೆ ವಯ್ರ್ ಕಿತ್ಯಾಕ್ ಹಲ್ಲೊ ಕರುಂಕ್ ನಜೊ?"
ನಾಯರಾಚಾ ಸವಾಲಾಕ್ ಸಾರಂಗಾನ್ ನಾಯರಾಕ್ಚ್ ಪಳೆಲೆಂ.
ಇಕ್ಬಾಲಾನ್ ಆಪ್ಲ್ಯಾ ಪೊಪ್ಸಾಂತ್ ಧಾಂಬುನ್ ಧರ್ಲ್ಲೊ ಶ್ವಾಸ್ ಹಳ್ವಾಯೆರ್ ಸೊಡ್ಲೊ.
ಕೋರ್ಟ್ ರುಮಾಂತ್ ಸಭಾರಾಂಚ್ಯೊ ಆಸ್ಡ್ಯೊ ವಯ್ರ್ ಗೆಲ್ಯೊ.
ನಾಯರಾಚಾ ಸವಾಲಾ ಪಾಟ್ಲ್ಯಾ ಮತ್ಲಾಬಾಕ್ ಸಾರಂಗ್ ಸಮ್ಜಾಲೊ. ತಾಣೆಂ ತಶೆಂಚ್ ನಾಯರಾಚಾ ದೊಳ್ಯಾಂಕ್ ಆಪ್ಲೆ ದೊಳೆ ಮೆಳಯ್ಲೆ. ನೇಪಾಳಿ ಗೂರ್ಖಾ ತೊ! ಸಗ್ಳ್ಯಾ ಸಂಸಾರಾಚಾ ಆಮಾಸೆಚ್ಯಾ ದಾಟ್ ಅಂದ್ಕಾರಾಕ್ ಪಾಸೊನ್ ಭಿಯೆಂವ್ಚಿ ಜಾತ್ ತಾಚಿ ನ್ಹಯ್! ತಶೆಂ ಆಸ್ತಾಂ ಹ್ಯಾ ಉಜ್ವಾಡಾಂತ್, ಧವ್ಯಾ ಪ್ಯಾಂಟಾಚಾ ವಯ್ರ್ ಕಾಳೊ ಕೋಟ್ ವೊಡ್ಲೆಲ್ಯಾ ನಾಯರಾಕ್ ಪಳವ್ನ್ ಭಿಲ್ಕುಲ್ ಭಿಯೆಂವ್ಚೊ ಗುರ್ಖಾ ಸಾರಂಗ್ ನ್ಹಯ್! ಬೋವ್ಶ್ಯಾ ನಾಯರ್ಯ್ ಹೆಂಚ್ ಆಶೆತಾಲೊ. ತಾಣೆಂ ಎದೊಳ್ಚ್ ಗುಣಾಕಾರ್ ಕರುನ್ ಜಾಲ್ಲೆಂ.
"ಹಾಂ! ಕಿತ್ಯಾಕ್ ಕರುಂಕ್ ನುಜೊ? ಮ್ಹಜ್ಯಾಕ್ಯ್ ತುಂಚ್ ಮ್ಹಜ್ಯಾ ಮ್ಯಾಡಮಿಚೊ ದುಸ್ಮಾನ್ ಚಡ್ ಆಸ್ಲ್ಲ್ಯಾ ಪರಿಂ ದಿಸ್ತಾ. ತುವೆಂಚ್ ಕಿತ್ಯಾಕ್ ತಿಚ್ಯೆರ್ ಹಲ್ಲೊ ಕರುಂಕ್ ನಜೊ......?"
"ಎಕ್ಸಾಕ್ಟ್ಲೀ ಯುವರ್ ಹಾನರ್!" ನಾಯರಾನ್ ಆಪ್ಲೆ ಹಾತ್ ಉಭಾರ್ಲೆ.
ರಾಮ್ ಪ್ರಸಾದಾಕ್ ನಾಯರಾಚಿ ಚಾಲ್ ಕಳಿತ್ ಜಾವ್ನ್ ಆಪ್ಲ್ಯಾ ಬೊಟಾಂನಿ ತಾಣೆಂ ಆಪ್ಲೆಂ ಕಪಾಲ್ ಪೊಶೆತಾಂ ಪೊಶೆತಾಂ ತಶಿಚ್ಚ್ ತಾಣೆಂ ತಕ್ಲಿ ಹಾಲಯ್ಲಿ ಆಪುಣ್ ಸಲ್ವಾಲ್ಲ್ಯಾ ಭಾಶೆನ್.
"ಯುವರ್ ಹಾನರ್!" ನಾಯರ್ ಆತಾಂ ಜಡ್ಜಾ ಮುಕಾರ್ ಆಯ್ಲೊ. "ಸಾರಂಗಾನ್ಚ್ ಸಾಂಗ್ಚ್ಯಾ ಪರ್ಮಾಣೆಂ ಇಕ್ಬಾಲ್ ಆನಿ ರಾಶಿದ್ ಆಲಿಯಾ ಖಾನಾಚಾ ಪ್ಲ್ಯಾಟಾ ಥಾವ್ನ್ ದೆಂವೊನ್ ಗೆಲ್ಯಾ ಉಪ್ರಾಂತ್ ಕೊಣ್ಯ್ ಆಲಿಯಾಚಾ ಪ್ಲ್ಯಾಟಾಕ್ ಘುಸೊನ್ ತಾಚ್ಯಾ ವಯ್ರ್ ಹಲ್ಲೊ ಕರುಂಕ್ ಸಕ್ತಾ. ಆಲಿಯಾ ವಯ್ರ್ ಇಕ್ಬಾಲಾನ್ ಆನಿ ರಾಶಿದಾನ್ಚ್ ಹಲ್ಲೊ ಕೆಲಾ ಮ್ಹಣ್ಚ್ಯಾಕ್ ಸ್ಪಶ್ಟ್ ಸಾಕ್ಶಿ ನಾಂತ್. ಐ ಮೀನ್... ಹಲ್ಲ್ಯಾಚಾ ವೆಳಾರ್ ಖುದ್ಧ್ ಮುಖಾಮುಖಿಂ ಪಳೆಲ್ಲಿ ಸಾಕ್ಸ್ ನಾ ಯುವರ್ ಹಾನರ್!"
"ದೆಟ್ಸಾಲ್ ಯುವರ್ ಹಾನರ್!"
"ನೋ ಮೋರ್ ಫರ್ದರ್ ಕ್ವಾಶ್ಚನ್ಸ್!" ನಾಯರ್ ಆಪ್ಲ್ಯಾ ಬಸ್ಕೆ ತೆವ್ಶಿಂ ಚಮ್ಕಾಲೊ.
"ದಿ ಕೋರ್ಟ್ ಇಸ್ ಅಡ್ಜರ್ನ್ಡ್ ಅಂಟಿಲ್ ತಜ಼್ಡೇ!"
"ಟಕ್!"
**************
"ತುಜೆಂ ನಾಂವ್?"
"ಸಬ್ ಇನ್ಸ್ಪೆಕ್ಟರ್ ನರೇಶ್ ಭಟ್ನಾಗರ್!"
"ಖಂಯ್ಚಾ ಪೊಲಿಸ್ ಸ್ಟೆಶನಾಂತ್?"
"ಬಾಂದ್ರಾ!"
"ಬಾಲಿವುಡಾಚೆಂ ಹೀರೊಯಿನ್ ಮಿಸ್ ಆಲಿಯಾ ಖಾನಾ ವಯ್ರ್ ಹಲ್ಲೊ ಜಾಲ್ಲ್ಯಾ ವಗ್ತಾರ್ ತುಂ ಡ್ಯೂಟೆರ್ ಆಸ್ಲ್ಲೊಯ್! ಕರೆಕ್ಟ್.....?"
"ವ್ಹಯ್!"
"ಆಲಿಯಾ ಖಾನಾ ವಯ್ರ್ ಹಲ್ಲೊ ಜಾಲಾ ಮ್ಹಣೊನ್ ತುಕಾ ಕೊಣೆಂ ಖಬಾರ್ ದಿಲಿ?"
"ತ್ಯಾ ದಿಸಾ ಸಾಂಜೆರ್ ಪೊಲಿಸ್ ಸ್ಟೇಶನಾಕ್ ದೋನ್ ಪೊನಾಂ ಆಯಿಲ್ಲಿಂ. ಪಯ್ಲೆಂ ಪೋನ್ ಮಿಸ್ಟರ್ ರಾಯನಾನ್ ಕೆಲ್ಲೆಂ. ದುಸ್ರೆಂ ಪೋನ್ ಅಪಾರ್ಟ್ಮೆಂಟಾ ಥಾವ್ನ್ ಆಯಿಲ್ಲೆಂ!"
"ಕಿತೆಂ ಹಿ ಖಬಾರ್ ಸಾರ್ಕಿ ಆಸ್ಲ್ಲಿ?"
"ವ್ಹಯ್!"
"ತುಜ್ಯಾ ಇನ್ವೆಸ್ಟಿಗೇಶನಾಂತ್ ತುಕಾ ಹ್ಯಾ ಹಲ್ಲ್ಯಾಚಾ ವಿಶ್ಯಾಂತ್ ಕಾಂಯ್ ಮಾಹೆತ್ ಲಾಭ್ಲ್ಯಾ?"
"ವ್ಹಯ್!"
"ಕಿತೆಂ ಮಾಹೆತ್ ಲಾಭ್ಲ್ಯಾ?"
"ಮ್ಹಾಕಾ ಮಿಸ್ಟರ್ ರಾಯನಾನ್ ಆಲಿಯಾ ಖಾನಾಚಾ ಹಲ್ಲ್ಯಾ ವಿಶಿಂ ಖಬಾರ್ ದಿತಾನಾ ಹಾವೆಂ ತಾಕಾ ಜಾಗ್ರುತ್ಕಾಯ್ ದಿಲಿ!"
"ಕಸಲಿ ಜಾಗ್ರುತ್ಕಾಯ್.....?"
"ಹಿಚ್ಚ್ ಕೀ ಪ್ಲ್ಯಾಟಾ ಭಿತರ್ ಕೊಣೆಂಯ್ ವಚೊಂಕ್ ನಜೊ!"
"ಉಪ್ರಾಂತ್.....?"
"ಮಿಸ್ ಆಲಿಯಾ ಖಾನ್ ವಸ್ತಿ ಕರ್ಚೆಂ ಆಪಾರ್ಟ್ಮೆಂಟ್ ಮ್ಹಜ್ಯಾ ಪೊಲಿಸ್ ಸ್ಟೆಶನಾ ಲಾಗ್ಸಾರ್ಚ್ ಆಸಾ. ಹಾಂವ್ ತುರ್ತಾನ್ ಭಾಯ್ರ್ ಸರ್ಲೊಂ.!"
"ಉಪ್ರಾಂತ್.....?"
"ಪೊಲಿಸ್ ಜೀಪ್, ಆಲಿಯಾನ್ ರಾಂವ್ಚ್ಯಾ ಅಪಾರ್ಟ್ಮೆಂಟಾಚಾ ಮುಕಾರ್ ಪಾಂವ್ಚ್ಯಾ ವಗ್ತಾರ್ ರಾಯನ್ ಆನಿ ಸಾವಂತಾನ್ ಅಪಾರ್ಟ್ಮೆಂಟಾಚಾ ವಾಚ್ಮ್ಯಾನಾ ಸಾಂಗಾತಾ ಮೆಳೊನ್ ಆಲಿಯಾಕ್ ಎದೊಳ್ಚ್ ಪ್ಲ್ಯಾಟಾ ಥಾವ್ನ್ ಸಕಯ್ಲ್ ಹಾಡ್ಲ್ಲೆಂ."
"ಉಪ್ರಾಂತ್......?"
"ಮ್ಹಾಕಾ ಹೆಂ ವಿಜ್ಮಿತ್ ಜಾಲೆಂ. ಹಾವೆಂ ರಾಯನಾಕ್ ಆಡಾಂವ್ಚೆಂ ಪ್ರಯತ್ನ್ ಕೆಲೆಂ!"
"ಕಿತ್ಯಾಕ್ ಮಿಸ್ಟರ್ ಭಟ್ನಾಗರ್?"
"ಹಿ ಏಕ್ ಕ್ರಿಮಿನಲ್ ಕೇಸ್!"
"ಉಪ್ರಾಂತ್.....?"
"ಹ್ಯಾ ಪೊಲಿಸಾಂಚಾ ಗಳಾಯೆಂತ್ ಆಲಿಯಾ ಖಾನ್ ಮೊರಾತ್ ಜಾಲ್ಯಾರ್ ತಾಚ್ಯಾ ಮರ್ಣಾಕ್ ಪೊಲಿಸ್ ಡಿಪಾರ್ಟ್ಮೆಂಟ್ ಜವಬ್ದಾರ್ ಜಾತೆಲೆಂ ಮ್ಹಣೊನ್ ರಾಯನಾನ್ ಮ್ಹಾಕಾ ಬೆಶ್ಟಾಯ್ಲೆಂ. ತ್ಯಾ ವಯ್ರ್ ಆಲಿಯಾ ಬಾಲಿವುಡಾಚೆಂ ಹೀರೋಯಿನ್ ಮ್ಹಣ್ತಾನಾ ಹೆಂ ಘಡಿತ್ ನಾಜೂಕ್ ಜಾವ್ನ್ ಆಸ್ಲ್ಲೆಂ. ಹಾವೆಂಯ್ ಆಲಿಯಾಕ್ ಪಳೆಲೆಂ. ತೆಂ ಮತಿರ್ ನಾತ್ಲ್ಲೆಂ. ಪುಣ್ ಭಾರೀಕ್ ಶ್ವಾಸ್ ಚಲ್ತಾಲೊ. ದೆಕುನ್ ಹಾವೆಂಚ್ ತಾಂಕಾ ಹಾಸ್ಪಿಟಲಾಕ್ ವರುಂಕ್ ಪರ್ವಣ್ಗಿ ದಿಲಿ."
"ತುಂ ಪ್ಲ್ಯಾಟಾಕ್ ಗೆಲೊಯ್.....?"
"ವ್ಹಯ್!"
"ಥಂಯ್ಚರ್ ತುವೆಂ ಕಿತೆಂ ಪಳೆಲೆಂಯ್?"
"ಪ್ಲ್ಯಾಟಾಚಾ ದಾರಾರ್ ಅಪಾರ್ಟ್ಮೆಂಟಾಚ್ಯಾನಿ ಪಾರೊ ದವರ್ಲ್ಲೊ. ಹಾಂವ್ ಚಿಂತಾ ತಾಣೆಂ ಕೊಣಾಯ್ಕ್ಯ್ ಭಿತರ್ ವಚೊಂಕ್ ದೀಂವ್ಕ್ ನಾ.!"
"ಹಲ್ಲೊ ಜಾಲ್ಯಾ ಸುವಾತೆಚ್ಯಾ ವಿಶಿಂ ತುಂ ಉಲಯ್ತಾಯ್.....?"
"ವ್ಹಯ್!"
"ಹಲ್ಲೊ ಜಾಲ್ಲ್ಯಾ ಜಾಗ್ಯಾರ್ ತುವೆಂ ಕಿತೆಂ ಪಳೆಲೆಂಯ್?"
"ಪ್ಲ್ಯಾಟಾಚಾ ಸಾಲಾಂತ್ ಮಧೆಂ ಟೀಪಾಯಿ ದವರ್ಲೆಲ್ಯಾ ಜಾಗ್ಯಾರ್ ಸಗ್ಳ್ಯಾನಿ ರಾಗಾತ್ ಆಸ್ಲ್ಲೆಂ. ಹಲ್ಲ್ಯಾಚಾ ಜಾಗ್ಯಾರ್ ಏಕ್ ಸೆಲ್ಪೋನ್, ಏಕ್ ಸ್ವಿಸ್ ಆರ್ಮಿ ಬ್ರ್ಯಾಂಡಾಚೆಂ ಪಿಸ್ತುಲ್, ಏಕ್ ಪಾತಳ್ ಹ್ಯಾಂಡ್ ಗ್ಲೌಸ್! ಇತ್ಲೆಂ ಆಮ್ಕಾಂ ತ್ಯಾ ಹಲ್ಲೊ ಜಾಲ್ಲ್ಯಾ ಜಾಗ್ಯಾರ್ ಲಾಭ್ಲಾಂ. ಹಲ್ಲೊ ಜಾಲ್ಲ್ಯಾ ಜಾಗ್ಯಾರ್ ಮೆಳ್ಲ್ಲ್ಯಾ ವಸ್ತುಂಕ್ ಪರಿಶೀಲನ್ ಕರ್ತಾನಾ ತ್ಯಾ ವಸ್ತುಂ ಪಯ್ಕಿ ಆಮ್ಕಾಂ ಲಾಭ್ಲೆಲೆಂ ತೆಂ ಸೆಲ್ಪೋನ್, ತೆಂ ಆಲಿಯಾಚೆಂಚ್ ಮ್ಹಣೊನ್ ಆಮ್ಕಾಂ ಆಮ್ಚ್ಯಾ ಇನ್ವೆಸ್ಟಿಗೇಶನಾಂತ್ ಕಳಿತ್ ಜಾಲೆಂ. ಪಿಸ್ತುಲ್ ಆನಿ....."
"ಏಕ್ ಮಿನಿಟ್ ಮಿಸ್ಟರ್ ಭಟ್ನಾಗರ್! ......ಹೆಂ ತುವೆಂ ಬ್ರ್ಯಾಂಡ್ ನಿವ್ ಸ್ವಿಸ್ ಆರ್ಮಿ ಬ್ರ್ಯಾಂಡಾಚೆಂ ಪಿಸ್ತುಲ್ ಮ್ಹಣೊನ್ ಸಾಂಗ್ಲೆಯ್! ತೆಂ ತುಕಾ ಕಶೆಂ ಕಳ್ಳೆಂ?"
"ಹಾವೆಂ ಆಂಟಿ ನಾರ್ಕೋಟಿಕ್ಸ್ ಡಿಪಾರ್ಟ್ಮೆಂಟಾಂತ್ ಸೆವಾ ದಿಲ್ಯಾ! ತಶೆಂ ಮ್ಹಾಕಾ ಹ್ಯಾ ಹತ್ಯಾರಾಂ ವಿಶಯಾಂತ್ ಮಾಹೆತ್ ಆಸಾ!"
"ಬರೆಂ! ಮುಕಾರ್ ಕಿತೆಂ ಜಾಲೆಂ.....?"
"ಪಯ್ಲೆಂ ಹಾವೆಂ ವಾಚ್ಮ್ಯಾನಾಚೆಂ ವಿಚಾರಣ್ ಕೆಲೆಂ. ತಾಣೆಂ ಸಾಂಗ್ಲ್ಲ್ಯಾಂತ್ ಸತ್ ಆಸ್ಲ್ಲೆಂ. ಇಂಟರ್ಕೋಮಾಚಾ ರಿಸೀವರಾ ವಯ್ರ್ ಆಲಿಯಾಚಾ ರಗ್ತಾಚೆ ಫಿಂಗರ್ ಪ್ರಿಂಟ್ಸ್ ಆಸ್ಲ್ಲೆ. ವಾಚ್ಮ್ಯಾನಾನ್ ಮ್ಹಾಕಾ ಸಗ್ಳೊ ವಿಶಯ್ ಸಾಂಗ್ಲ್ಲೊ ತರ್ಯ್ ಹಾಂವೆ ಆಲಿಯಾ ಖಾನಾಚಾ ತೊಂಡಾ ಥಾವ್ನ್ ಹೆಂ ಆಯ್ಕೊಂಕ್ ಜಾಯ್ ಆಸ್ಲ್ಲೆಂ!"
"ಆನಿ ತುವೆಂ ಆಯ್ಕಾಲೆಂಯ್.....?"
"ವ್ಹಯ್! ಹಲ್ಲೊ ಜಾಲ್ಲ್ಯಾ ದುಸ್ರ್ಯಾ ದಿಸಾ ಸಾಂಜೆರ್!"
"ತಿತ್ಲ್ಯಾ ಮ್ಹಣಾಸರ್......?"
"ತಿತ್ಲ್ಯಾ ಮ್ಹಣಾಸರ್ ಮಿಸ್ ಆಲಿಯಾ ಖಾನ್ ಪೊಲಿಸಾಂಚಾ ಸಕ್ತ್ ನದ್ರೆಂತ್ ಆಸ್ಲ್ಲೆಂ!"
"ಮಿಸ್ ಆಲಿಯಾ ಖಾನಾನ್ ಕೆಲ್ಲೊ ಉಚಾರ್......?"
"ತೊ ಉಚಾರ್, ಆನಿ ರಿಪೋರ್ಟ್ ಸರ್ವ್ ಸಾಕ್ಶೆ ಸವೆಂ ಎದೊಳ್ಚ್ ಆಮ್ಚ್ಯಾ ಡಿಪಾರ್ಟ್ಮೆಂಟಾನ್ ಕೊರ್ಟಾಕ್ ಪ್ರಸ್ತುತ್ ಕೆಲಾಂ!"
"ಪಿಸ್ತುಲಾಚೆರ್ ಕೊಣಾಯ್ಚೆ ಫಿಂಗರ್ ಪ್ರಿಂಟ್ಸ್.....?"
"ನಾ!"
"ಗ್ಲೌಸಾಚೆರ್......?"
"ನಾ!"
"ಪ್ಲ್ಯಾಂಟಾಂತ್ಲ್ಯಾ ಖಂಯ್ಚಾಯ್ ವಸ್ತುಂಚೆರ್.....?"
"ಆಮ್ಕಾಂ ಜಾಯ್ ಜಾಲ್ಲೆ ಮೆಳೊಂಕ್ ನಾಂತ್!"
"ಮ್ಹಳ್ಯಾರ್.....?"
"ಆಮ್ಕಾಂ ಇಕ್ಬಾಲ್ ಆನಿ ರಾಶಿದಾಚಾ ಫಿಂಗರ್ ಪ್ರಿಂಟ್ಸಾಂಚಿಂ ಸೊಧ್ನಾಂ ಆಸ್ಲ್ಲಿಂ!"
"ತುಮಿಂ ಸೊಧ್ಲ್ಲೆಂ ತುಮ್ಕಾಂ ಮೆಳ್ಳೆಂ.....?"
"ಖುನ್ ಕರುಂಕ್ಚ್ ಮ್ಹಣೊನ್ ಆಯಿಲ್ಲೊ ಆಪ್ಲ್ಯಾ ಫಿಂಗರ್ ಪ್ರಿಂಟ್ಸಾಕ್ ಕಶೆಂ ಸೊಡುನ್ ವೆತಲೊ?"
"ತರ್ ತುವೆಂ ಸಾಂಗ್ಚಾ ಪರ್ಮಾಣೆಂ ಹೆಂ ಆಕ್ಸಿಡೆಂಟಾಲ್ ನ್ಹಯ್! ಮಿಸ್ ಆಲಿಯಾ ಖಾನಾಚಿ ಖುನ್ ಕರುಂಕ್ಚ್ ಮ್ಹಣೊನ್ ಯೋಜನ್ ಕರುನ್ ಕೆಲ್ಲೆಂ ವಿಫಲ್ ಪ್ರಯತ್ನ್.....?"
"ವ್ಹಯ್! ಹ್ಯಾಚ್ ಖಾತಿರ್ ಹಲ್ಲೊ ಕೆಲ್ಲೊ ವ್ಯಕ್ತಿ ಆಪ್ಲೆಂ ಪಿಸ್ತುಲ್ ಆನಿ ಹ್ಯಾಂಡ್ ಗ್ಲೌಸ್ ಸೊಡುನ್ ಗೆಲಾ!"
"ಮ್ಹಾಕಾ ಸಮ್ಜೊಂಕ್ ನಾ ಮಿಸ್ಟರ್ ಭಟ್ನಾಗರ್!"
"ಖುನಿಯೆಚೊ...... ಐ ಮೀನ್ ಹ್ಯಾ ಹಲ್ಲ್ಯಾಚೊ ದುಬಾವ್ ದುಸ್ರ್ಯಾ ವಯ್ರ್ ಘಾಲುಂಕ್ ಹೆಂ ಪ್ಲ್ಯಾನ್ ಕೆಲಾಂ! ಹ್ಯಾಚ್ ಖಾತಿರ್ ತಾಣೆಂ ಆಲಿಯಾಚಾ ಪ್ಲ್ಯಾಟಾಂತ್ ಆಪ್ಲೆ ಫಿಂಗರ್ ಪ್ರಿಂಟ್ಸ್ ಖಂಯ್ಚರ್ಯ್ ಪಡಾನಾತ್ಲೆಲ್ಯಾ ಪರಿಂ ಜಾಗ್ರುತ್ಕಾಯ್ ವಹಿಸಿಲ್ಯಾ!"
"ಆಶೆಂ ಜಾಂವ್ಕ್ ಸಾದ್ಯ್ ಆಸಾ......?’
"ಸಭಾರ್ ಹತ್ಯಾಚಾ ಕೇಸಿನಿಂ ಆಮ್ಕಾಂ ಆಶೆಂ ದುಬಾವಾನ್ ಘುಸ್ಪಡಾಯ್ಲಾಂ!"
"ಖಂಡಿತ್!"
"ವ್ಹಯ್! ನಾಂ ತರ್ ಮಿಸ್ ಆಲಿಯಾ ಖಾನಾಚಾ ಪ್ಲ್ಯಾಟಾಕ್ ಆಯಿಲ್ಲ್ಯಾ ಇಕ್ಬಾಲ್ ಆನಿ ರಾಶಿದಾಚೆ ಫಿಂಗರ್ ಪ್ರಿಂಟ್ಸ್ ಎಕಾ ಜಾಗ್ಯಾರ್ ಪಾಸೊನ್ ಆಮ್ಕಾಂ ಸಾಂಪ್ಡೊಂಕ್ ನಾಂತ್ ಮ್ಹಳ್ಯಾರ್ ಹಾಂಗಾ ಹೆಂಚ್ ರುಜು ಜಾತಾ ಕೀ ಹೊ ಹಲ್ಲೊ ಕರುಂಕ್ ತಾಣಿಂ ಪಯ್ಲೆಂಚ್ ಆಯೋಜನ್ ಕೆಲಾಂ!"
"ಥ್ಯಾಂಕ್ ಯು ಮಿಸ್ಟರ್ ಭಟ್ನಾಗರ್!" ರಾಮ್ ಪ್ರಸಾದಾನ್ ಪೊಲಿಸ್ ಸಬ್ ಇನ್ಸ್ಪೆಕ್ಟರಾಚೊ ಉಪ್ಕಾರ್ ಬಾವುಡ್ಲೊ.
"ಯುವರ್ ಹಾನರ್!" ರಾಮ್ ಪ್ರಸಾದ್ ಜಡ್ಜಾ ತೆವ್ಶಿಂ ಘುಂವ್ಲೊ. "ಮಿಸ್ ಆಲಿಯಾ ಖಾನಾಚಿ ಹತ್ಯಾ ಕರುನ್ ಪೊಲಿಸಾಂಕ್ ಆನಿ ಕೊರ್ಟಾಕ್ ಘುಸ್ಪಡಾಂವ್ಚೆಂ ಹೆಂ ಪ್ರಯತ್ನ್ ಇಕ್ಬಾಲಾನ್ ಆನಿ ರಾಶಿದಾನ್ಚ್ ಕೆಲಾಂ ಮ್ಹಣ್ಚ್ಯಾಕ್ ದುಸ್ರೊ ದುಬಾವ್ ನಾ. ರಾಯನಾನ್ ಆನಿ ಸಾವಂತಾನ್ ಮೆಳೊನ್ ಆಪ್ಲ್ಯಾ ಜಿವಾಚಿ ಪರ್ವಾ ಕರಿನಾಸ್ತಾನಾ ಪೊಲಿಸಾಂಕ್ ರಾಕಾನಾಸ್ತಾನಾ ಆಲಿಯಾಕ್ ಬಚಾವ್ ಕೆಲ್ಲ್ಯಾನ್ ತೆಂ ಆಜ್ ಜಿವಂತ್ ಉರ್ಲಾಂ. ಹಾಚ್ಯೆ ಥಾವ್ನ್ ಕೊರ್ಟಾ ಮುಕಾರ್ ಆಜ್ ನೀಜ್ ಆಫ್ರಾಧ್ಯಾಂಕ್ ವೊಡುನ್ ಹಾಡುಂಕ್ ಕಾರಾಣ್ ಜಾಲಾಂ. ಜರ್ ತರ್ ಇಕ್ಬಾಲ್ ಆನಿ ರಾಶಿದ್ ಆಲಿಯಾಚಿ ಹತ್ಯಾ ಕರುಂಕ್ ಆಶೆವ್ನ್ ಯೇಂವ್ಕ್ ನಾತ್ಲ್ಲೆ ಜಾಲ್ಯಾರ್ ಆಲಿಯಾಚಾ ಪ್ಲ್ಯಾಟಾ ಭಿತರ್ ಹ್ಯಾ ದೊಗಾಂಯ್ಚೆಂ ಏಕ್ಯ್ ಫಿಂಗರ್ ಪ್ರಿಂಟ್ ಕಿತ್ಯಾಕ್ ನಾ? ಹ್ಯಾ ವಿಶಯಾಚೆರ್ ಚಡ್ ಧ್ಯಾನ್ ದೀಂವ್ಕ್ ಜಾಯ್ ಯುವರ್ ಹಾನರ್!"
"ದೇಟ್ಸಾಲ್ ಯುವರ್ ಹಾನರ್!"
"ಇಟ್ಸ್ ಯುವರ್ ವಿಟ್ನೆಸ್!" ರಾಮ್ ಪ್ರಸಾದ್ ಆಪ್ಲ್ಯಾ ಬಸ್ಕೆ ತೆವ್ಶಿಂ ಚಮ್ಕಾಲೊ.
"ಮಿಸ್ಟರ್ ಭಟ್ನಾಗರ್! ತುಂ ಏಕ್ ಪೊಲಿಸ್ ಇನ್ಸ್ಪೆಕ್ಟರ್.....! ರೈಟ್....?"
"ಎಸ್.ಐ.! ಸಬ್ ಇನ್ಸ್ಪೆಕ್ಟರ್ ಆಫ್ ಪೊಲಿಸ್!"
"ಎಸ್ ಎಸ್! ಐ ಯಾಮ್ ಸಾರ್ರಿ! ಕಿತೆಂ ಮ್ಹಳ್ಯಾರ್ ಹಾಂವ್ ಎಕೇಕ್ ಪಾವ್ಟಿಂ ಕನ್ಪ್ಯೂಸ್ ಜಾತಾಂ!"
"ಇಟ್ಸ್ ಆಲ್ರೈಟ್!"
"ಹಾಂ ಮಿಸ್ಟರ್ ಭಟ್ನಾಗರ್! ತುಂ ಆಶೆಂ ಕೆದಾಳಾಯ್ ಕನ್ಪ್ಯೂಸ್ ಜಾಲ್ಲೊ ಆಸಾಯ್....?"
"ಊಂ....ಂ.... ಜಾಂವ್ಕ್ ಸಕ್ತಾ!"
"ಅತ್ತಾಂ ತುವೆಂ ಸಾಂಗ್ಲೆಂಯ್....., ತುಜ್ಯಾ ಡ್ಯೂಟೆಚಾ ವಗ್ತಾರ್ ಆಶೆಂ ಹ್ಯಾ ಆಲಿಯಾಚಾ ವಯ್ರ್ ಜಾಲ್ಲ್ಯಾ ಹಲ್ಲ್ಯಾ ಪರಿಂ, ಹತ್ಯಾ ಕೆಲ್ಲ್ಯಾ ಹತ್ಯಾರ್ಯಾಂನಿ, ತುಕಾ....., ಮ್ಹಜೊ ಮತ್ಲಾಬ್ ತುಜ್ಯಾ ಪೊಲಿಸ್ ಡಿಪಾರ್ಟ್ಮೆಂಟಾಕ್ ಘುಸ್ಪಡಾಂವ್ಚೆಂ ಪ್ರಯತ್ನ್ ಕೆಲಾಂ! ಯಾಮ್ ಐ ರೈಟ್....?"
"ವ್ಹಯ್!"
"ಹೆಂ ಸಾದಾರ್ಣ್ ಕಿತ್ಲ್ಯಾ ಕೇಸಿಂನಿ ಆಶೆಂ ಘಡ್ಲಾಂ.....?"
"ಆಕ್ಸಿಡೆಂಟಾಲ್ ಕೇಸಿಂಕ್ ಸೊಡ್ಲ್ಯಾರ್ ಚಡಾವತ್ ಕೇಸಿಂನಿ!"
"ಪಿಯೆಂವ್ಕ್ ಉದಾಕ್ ಪುಣಿಂ ಜಾಯ್ ಮಿಸ್ಟರ್ ಭಟ್ನಾಗರ್? ತುಂ ತಾನೆಲ್ಲ್ಯಾ ಪರಿಂ ದಿಸ್ತಾಯ್!"
ಎಕಾ ಹಾತಾಂತ್ ಸುರಿ ಧರುನ್ ದುಸ್ರ್ಯಾ ಹಾತಾನ್ ಬೊಕ್ರ್ಯಾಚಾ ಜಿಬೆಕ್ ನಿಮಾಣೆಂ ಉದಾಕ್ ಸೊಡ್ಚ್ಯಾ ಕಸಾಯಿಗಾರಾಕ್ ಆನಿ ನಾಯರಾಕ್ ಕಾಂಯ್ಚ್ ವ್ಯತ್ಯಾಸ್ ನಾತ್ಲ್ಲೊ.
ನಾಯರಾಚಿ ಚಾಲ್ ಜಾಣಾಂ ಆಸ್ಲ್ಲೊ ರಾಮ್ ಪ್ರಸಾದ್ ಬಸ್ಲೆಲ್ಯಾ ಕಡೆನ್ ಥಾವ್ನ್ ನಾಯರಾಚಾ ಮುಕ್ಲ್ಯಾ ಸವಾಲಾಕ್ ಆಯ್ಕೊಂಕ್ ಆತುರ್ ಜಾಲೊ.
"ನಾ! ತುಕಾ ಕಿತೆಂ ವಿಚಾರುಂಕ್ ಜಾಯ್ ತೆಂ ತುವೆಂ ವಿಚಾರ್ಯೆತ್!"
"ಬರೆಂ ತರ್ ಮಿಸ್ಟರ್ ಭಟ್ನಾಗರ್! ....ಆಮಿಂ ಮುಕಾರ್ಸಿಯಾಂ. ......ಹಾಂ ವ್ಹಯ್! ಹಾಂವ್ ಕಿತೆಂ ವಿಚಾರುಂಕ್ ಸೊಧ್ತಾಲೊಂ ಮ್ಹಳ್ಯಾರ್ ಆಕ್ಸಿಡೆಂಟಲ್ ಕೇಸಿಂನಿ ಸೊಡ್ಲ್ಯಾರ್ ಚಡಾವತ್ ಅಸಲ್ಯಾ ಹಲ್ಲ್ಯಾಚಾ ಕೇಸಿಂನಿ ತುಮ್ಕಾಂ ತುಮ್ಚ್ಯಾ ಇನ್ವೆಸ್ಟಿಗೇಶನಾಂತ್ ಘುಸ್ಪಡಾಯ್ಲಾಂ!?"
"ಚಡಾವತ್.....!"
"ವ್ಹಯ್....! ತೆಂಚ್! ಹ್ಯಾ ಚಡಾವತ್ ಮ್ಹಳ್ಳ್ಯಾ ಸಬ್ದಾಕ್ ಪರ್ಸಂಟೇಜ್ ದಿವ್ಯೆತ್......? ಪಾಂಚ್...., ಧಾ....., ವೀಸ್....., ಪನ್ನಾಸ್....., ಸತ್ತರ್, .....?
"ಅಂದಾಜ್ ಸತ್ತರ್ ಧರ್ಯೆತ್!"
"ಸಾರ್ಕೆಂ ಚಿಂತುನ್ ಪಳೆ ಮಿಸ್ಟರ್ ಭಟ್ನಾಗರ್! ಮ್ಹಾಕಾ ದಿಸ್ತಾ ಹಿ ಪರ್ಸಂಟೇಜ್ ಚಡ್ ಜಾಂವ್ಕ್ ಜಾಯ್! ಹಾಂವೆಂ ಆಯ್ಕಾಲಾಂ ಕೀ, ತುಜ್ಯಾ ಹಾತಾಖಾಲ್ ಆಯಿಲ್ಲ್ಯಾ ಥೊಡ್ಯಾ ಆಸಲ್ಯಾ ಹಲ್ಲ್ಯಾಚಾ ಆನಿ ಹತ್ಯಾಚಾ ಕೇಸಿಂಕ್ ತುವೆಂ ಭಾರಿಚ್ ಕಶ್ಟಾಂನಿ ಸಾಲ್ವಾರ್ ಕೆಲ್ಯಾಯ್!"
"ವ್ಹಯ್!"
ಸಬ್ ಇನ್ಸ್ಪೆಕ್ಟರ್ ಭಟ್ನಾಗರಾಕ್ ಘಮಂಡ್ ಆಯ್ಲೊ. ಸಗ್ಳ್ಯಾ ಕೊರ್ಟಾ ಮುಕಾರ್ ಆಪ್ಣಾಚಿ ಪ್ರಶಂಸಾ ಜಾಲ್ಲಿ ಪಳವ್ನ್ ತೊ ಭಿತರ್ಲ್ಯಾ ಭಿತರ್ಚ್ ಖುಶಿ ಜಾಲೊ. ಜಶೆಂ ಖಾವ್ನ್ ಪಿಯೆವ್ನ್ ಮೊಟೊ ಜಾಲ್ಲ್ಯಾ ಬೊಕ್ರ್ಯಾಕ್ ಆಪ್ಣಾ ವಯ್ರ್ಚ್ ಘಮಂಡ್ ಆಯಿಲ್ಲ್ಯಾ ಪರಿಂ!
"ತರ್ ಹಿ ಪರ್ಸಂಟೇಜ್ ಕಾಂಯ್ ಸತ್ತರಾ ವಯ್ರ್ ಆಸೊಂಕ್ ಜಾಯ್ ಮಿಸ್ಟರ್ ಭಟ್ನಾಗರ್! ಏಯ್ಟಿ ಪರ್ಸಂಟ್...? ಹಾಂವ್ ಚಿಂತಾಂ ನೈಂಟಿ ಪರ್ಸಂಟ್ ಆಸೊಂಕ್ ಪುರೊ!"
"ಶೆಂಭರಾಂತ್ ಕಾಂಯ್ ಏಕ್ ದೋನ್ ಕೇಸಿ ಮಾತ್ರ್ ಹಾವೆಂ ಸುಲಾಭಾಯೆನ್ ಸಾಲ್ವಾರ್ ಕೆಲ್ಯಾತ್!"
"ಶೆಂಭರಾಂತ್ ಏಕ್ ದೋನ್! ಮ್ಹಳ್ಯಾರ್ ಫಕತ್ತ್ ದೋನ್ ಪರ್ಸಂಟ್.....?"
ನಾಯರಾಚಾ ಸವಾಲಾಕ್ ಭಟ್ನಾಗರ್ ನಾಯರಾಕ್ಚ್ ಪಳಂವ್ಕ್ ಪಡ್ಲೊ.
"ಮ್ಹಳ್ಯಾರ್ ದೋನ್ ಪರ್ಸಂಟ್ ಕೇಸಿಂಕ್ ತುವೆಂ ಸುಲಾಭಾಯೆನ್ ಸಾಲ್ವಾರ್ ಕೆಲಾಂಯ್ ತರ್ ನೊವೊದ್ ಆನಿ ಆಟ್ ಪರ್ಸಂಟ್ ಕೇಸಿಂಕ್ ತುವೆಂ ಭಾರಿಚ್ಚ್ ಕಶ್ಟಾಂನಿ ಸಾಲ್ವಾರ್ ಕೆಲಾಂಯ್! ಯಾಮ್ ಐ ರೈಟ್.....?"
".........." ಭಟ್ನಾಗರಾಚಿ ಕಾಂಯ್ ಜವಾಬ್ ನಾ.
"ಜವಾಬ್ ದೀ ಮಿಸ್ಟರ್ ಭಟ್ನಾಗರ್! ಯಾಮ್ ಐ ರೈಟ್......?"
ನಾಯರಾಚಾ ಸವಾಲಾಕ್ ಭಟ್ನಾಗರಾನ್ ’ವ್ಹಯ್’ ಮ್ಹಳ್ಳ್ಯಾ ಭಾಶೆನ್ ಆಪ್ಲಿ ತಕ್ಲಿ ಹಾಲಯ್ಲಿ.
"ಆಮ್ಚ್ಯಾ ಮಾನಾಧೀಕ್ ಜಡ್ಜ್ ಸಾಯ್ಬಾಕ್ ಆಯ್ಕೊಂಕ್ ನಾ ಮಿಸ್ಟರ್ ಭಟ್ನಾಗರ್! ಥೊಡ್ಯಾ ಉಂಚ್ಲ್ಯಾ ತಾಳ್ಯಾನ್ ಜವಾಬ್ ದಿಲ್ಯಾರ್ ಬರೆಂ ಆಸಾ!"
ಭಟ್ನಾಗರ್ ನಾಯರಾಕ್ಚ್ ಪಳೆತಾಲೊ. ತಾಕಾ ಹ್ಯಾ ಕಾಳ್ಯಾ ಕೊಟಾಚ್ಯಾ ವ್ಯಕ್ತಿಂಚೆರ್ ಪಯ್ಲೆಂ ಥಾವ್ನ್ ದ್ವೇಶ್! ಕೆದ್ನಾಂ ಕೆದ್ನಾಂ ತಾಣೆಂ ಆಪ್ಲ್ಯಾ ಡ್ಯೂಟೆಚ್ಯಾ ವಗ್ತಾರ್ ಆಶೆಂ ಆಫ್ರಾಧ್ಯಾಂಕ್ ಕೊರ್ಟಾ ಮುಕಾರ್ ಪ್ರಸ್ತುತ್ ಕೆಲಾಂ ತೆದ್ನಾಂ ತೆದ್ನಾಂ ಆಸಲ್ಯಾ ವ್ಯಕ್ತಿ ಥಾವ್ನ್ ತಾಕಾ ಝುಜ್ಚೆಂ ಪಡ್ಲಾಂ.
"ತರ್ ನೈಂಟಿ ಏಯ್ಟ್ ಪರ್ಸಂಟ್ ಕೇಸಿಂಕ್ ತುವೆಂ ಭಾರಿಚ್ಚ್ ಕಶ್ಟಾಂನಿ ಸಾಲ್ವಾರ್ ಕೆಲ್ಯಾಯ್ ಆನಿ ದೋನ್ ಪರ್ಸಂಟ್ ಕೆಸಿಂಕ್ ಥೊಡ್ಯಾ ಸುಲಾಭಾಯೆನ್...! ಯಾಮ್ ಐ ರೈಟ್ .....? ಜವಾಬ್ ದೀ ಮಿಸ್ಟರ್ ಭಟ್ನಾಗರ್! ಕೋರ್ಟ್ ತುಜ್ಯಾ ಜವಾಬೆಕ್ ರಾಕ್ತಾ!"
"ವ್ಹಯ್!" ಭಟ್ನಾಗರಾಕ್ ಕಿತ್ಯಾಕ್ಗೀ ನಾಯರಾ ವಯ್ರ್ ದುಬಾವ್ ಜಾಲೊ.
"ಹ್ಯಾ ನೈಂಟಿ ಏಯ್ಟ್ ಪರ್ಸಂಟ್ ಕೇಸಿಂನಿ, ಐ ಮೀನ್, ಹಲ್ಲೊ ವಾ ಹತ್ಯಾ ಕರುನ್, ಉಪ್ರಾಂತ್ ಆಪುಣ್ ಸಾಂಪ್ಡಾನಾಶೆಂ ತುಜ್ಯಾ ಡಿಪಾರ್ಟ್ಮೆಂಟಾಕ್ ಘುಸ್ಪಾಡಾಂವ್ಕ್ ಪ್ರಯತ್ನ್ ಕೆಲ್ಲ್ಯಾ ಕೇಸಿಂನಿ, ಕಿತ್ಲೆ ಜಣ್ ಆಶೆಂ ಪಯ್ಲೆಂಚ್ ಪೊಲಿಸಾಂ ಮುಕಾರ್ ಸರೆಂಡರ್ ಜಾಲ್ಲೆ ಆಸಾತ್?"
ನಾಯರಾಚಾ ಸವಾಲಾಕ್ ಇನ್ಸ್ಪೆಕ್ಟರ್ ಮೌನ್ ಜಾಲೊ. ತಾಕಾ ಆಪುಣ್ ಫಸ್ಲೊಲೊ ಆನ್ಭೋಗ್ ಜಾಲೊ.
"ಸಾಂಗ್ ಮಿಸ್ಟರ್ ಭಟ್ನಾಗರ್! ಅಪುಣ್ ಹಲ್ಲೊ ವಾ ಹತ್ಯಾ ಕರುನ್, ತ್ಯಾ ಹತ್ಯಾ ವಾ ಹಲ್ಲ್ಯಾಚಿ ರುಜ್ವಾತ್ ಆಸ್ತಾನಾ ಆಶೆಂ ತುಮ್ಚ್ಯಾ ಡಿಪಾರ್ಟ್ಮೆಂಟಾ ಮುಕಾರ್ ಸರೆಂಡರ್ ಜಾಲ್ಲೆ ಕಿತ್ಲೆ ಜಣ್ ಆಸಾತ್?"
ನಾಯರಾಚಾ ಸವಾಲಾಚೊ ಮತ್ಲಾಬ್ ಭಟ್ನಾಗರಾಕ್ ಆತಾಂ ಸಮ್ಜಾಲೊ.
"ಹಾಂವ್ ಆಕ್ಸಿಡೆಂಟಲ್ ಕೇಸಿಂಚಾ ವಿಶಿಂ ಉಲಯ್ನಾಂ ಮಿಸ್ಟರ್ ಭಟ್ನಾಗರ್! ಕಿತ್ಯಾಕ್ ಮ್ಹಳ್ಯಾರ್ ಹಿ ಕೇಸ್ ಆಕ್ಸಿಡೆಂಟಲ್ ಕೇಸ್ ನ್ಹಯ್! ಕಿತ್ಯಾಕ್ ಮ್ಹಳ್ಯಾರ್ ಮ್ಹಜೊ ಕಕ್ಶಿದಾರ್ ಪೊಲಿಸಾಂಕ್ ಸರೆಂಡರ್ ಜಾಲಾ ವ್ಹಯ್! ಪುಣ್, ಆಲಿಯಾ ವಯ್ರ್ ಜಾಲ್ಲ್ಯಾ ಹಲ್ಲ್ಯಾಕ್ ಆನಿ ತಾಕಾ ಕಾಂಯ್ ಸಂಭಂಧ್ ನಾ! ತಾಣೆಂ ಹೊ ಹಲ್ಲೊ ಕರುಂಕ್ ನಾ!" ತಶೆಂಚ್ ಥೊಡೊ ವೇಳ್ ಭಟ್ನಾಗರಾಕ್ ಪಳೆಲ್ಲೊ ನಾಯರ್,
"ಥ್ಯಾಂಕ್ ಯು ಮಿಸ್ಟರ್ ಭಟ್ನಾಗರ್!" ನಾಯರ್ ಆಪುಣ್ ಜಿಕ್ಲೊಂ ಮ್ಹಳ್ಳ್ಯಾ ಭಾಶೆನ್ ಜಡ್ಜಾ ಮುಕಾರ್ ಆಯ್ಲೊ.
ತಿತ್ಲೆಂಚ್!
ಭಟ್ನಾಗರ್ ಚುರುಕ್ ಜಾಲೊ. ಹ್ಯಾ ಕಾಳ್ಯಾ ಕೊಟಾಚ್ಯಾ ವಕಿಲಾಂಚಾ ಚಾಲಾಕೆ ವಿಶಿಂ ತೊ ಬರ್ಯಾನ್ ಜಾಣಾಂ. ಆಶೆಂ ಆಸ್ತಾನಾ ಆತಾಂ ವೇಳ್ ಉತ್ರೊಂಕ್ ಸೊಡ್ಲ್ಯಾರ್......?
"ಪೊಲಿಸ್ ಡಿಪಾರ್ಟ್ಮೆಂಟಾಂತ್ಲ್ಯಾ ಮ್ಹಜ್ಯಾ ಖಾಸ್ಗಿ ಅನ್ಭೋಗಾಕ್ ಆನಿ ಹ್ಯಾ ಕೇಸಿಕ್ ಕಸಲೊ ಸಂಭಂಧ್.....?" ಭಟ್ನಾಗರ್ ಬೊಬಾಟ್ಲೊ.
ತಿತ್ಲೆಂಚ್!
ಆತಾಂ ಆಪ್ಣೆಂ ವೊಗೆಂ ಬಸ್ಲ್ಯಾರ್ ಹಿ ಕೇಸ್ ಆಪ್ಲ್ಯಾ ಹಾತಾ ಥಾವ್ನ್ ಗೆಲ್ಲ್ಯಾಪರಿಂಚ್ ಮ್ಹಳ್ಳೆಂ ಖಿಣಾ ಭಿತರ್ ಜಾಣಾಂ ಜಾಲ್ಲೊ ರಾಮ್ ಪ್ರಸಾದ್ ಆಪ್ಲ್ಯಾ ಬಸ್ಕೆರ್ ಥಾವ್ನ್ ಉಟೊನ್ ಉಭೊ ಜಾಲೊ. ಭಟ್ನಾಗರಾನ್ ಉಡಯಿಲ್ಲ್ಯಾ ಹ್ಯಾ ಸವಾಲಾ ಥಾವ್ನ್ ತಾಕಾ ಭಳ್ ಮೆಳ್ಲ್ಲೆಂ.
"ಅಬ್ಜೆಕ್ಶನ್ ಯುವರ್ ಹಾನರ್! ಮ್ಹಜೊ ಸಾಂಗಾತಿ ಪ್ರಾಸಿಕ್ಯೂಟರ್ ಹ್ಯಾ ಕೇಸಿಕ್ ಸಂಭಂಧ್ ನಾತ್ಲೆಲ್ಯಾ ಸವಾಲಾಂಕ್ ವಿಚಾರುಕ್ ಕೊರ್ಟಾಚೆಂ ಧ್ಯಾನ್ ದುಸ್ರ್ಯಾ ಕುಶಿಕ್ ಘುಂವ್ಡಾಂವ್ಚೆಂ ಪ್ರಯತ್ನ್ ಕರ್ತಾ!"
"ತುಂ ಕಿತೆಂ ಸಾಂಗೊಂಕ್ ಆಶೆತಾಯ್ ಮಿಸ್ಟರ್ ಪ್ರಾಸಿಕ್ಯೂಟರ್?" ಜಡ್ಜ್ ರಾಮ್ ಪ್ರಸಾದಾ ತೆವ್ಶಿಂ ಘುಂವ್ಲೊ.
"ಮಿಸ್ಟರ್ ಭಟ್ನಾಗರಾನ್ಚ್ ಆತ್ತಾಂ ಹ್ಯಾ ಕೊರ್ಟಾಚಾ ಮುಕಾರ್ ಸವಾಲ್ ವಿಚಾರ್ಲ್ಲ್ಯಾ ಪರಿಂ ಎಕಾ ಪೊಲಿಸ್ ಸಬ್ ಇನ್ಸ್ಪೆಕ್ಟರಾಚಾ ಖಾಸ್ಗಿ ಅನುಭವಾಕ್ ಆನಿ ಇಕ್ಬಾಲಾನ್ ಆಪ್ಣಾಕ್ಚ್ ಸರೆಂಡರ್ ಕೆಲ್ಲ್ಯಾಕ್ ಕಾಂಯ್ ಸಂಭಂಧ್ ನಾ ಯುವರ್ ಹಾನರ್! ಹಿ ಇಕ್ಬಾಲಾಚಿ ಚಾಲ್! ತಾಕಾ ದುಸ್ರಿ ವಾಟ್ಚ್ಚ್ ನಾತ್ಲ್ಲಿ. ತ್ಯಾ ಖಾತಿರ್ ತೊ ಸರೆಂಡರ್ ಜಾಲಾ. ಜೆದ್ನಾಂ ಇಕ್ಬಾಲಾಚೆಂ ವಿಚಾರಣ್ ಚಲ್ತೆಲೆಂ ತೆದ್ನಾಂ ಹೆಂ ಸತ್ ಭಾಯ್ರ್ ಪಡ್ತೆಲೆಂ. ತೊ ಆನಿ ತಾಚೊ ಭಾವ್ ಆಲಿಯಾ ಖಾನಾಚಾ ಪ್ಲ್ಯಾಟಾಂತ್ ಹಲ್ಲೊ ಜಾಲ್ಲ್ಯಾ ವಗ್ತಾರ್ ಹಾಜರ್ ಆಸ್ಲ್ಲೊ ಮ್ಹಣೊನ್ ಎದೊಳ್ಚ್ ದೋನ್ ಭಳಿಶ್ಟ್ ಸಾಕ್ಶೆಂಕ್ ಹಾವೆಂ ಪ್ರಸ್ತುತ್ ಕೆಲಾಂ. ಕೊರ್ಟಾನ್ ಇಕ್ಬಾಲ್ ಆನಿ ರಾಶಿದಾಚಾ ವಿಚಾರಣೆಕ್ ಪರ್ವಣ್ಗಿ ದೀಂವ್ಕ್ ಜಾಯ್! ಆಲಿಯಾ ವಯ್ರ್ ಜಾಲ್ಲೊ ಹಲ್ಲೊ ಕಿತ್ಲೊ ಮರಣಾಂತಿಕ್ ಆಸ್ಲ್ಲೊ ಮ್ಹಳ್ಳ್ಯಾಚಿ ಸಾಕ್ಸ್ ಜಾವ್ನ್ ಭಟ್ನಾಗರ್ ಹಾಂಗಾ ಆಜ್ ಉಭೊ ಜಾಲಾ ನ್ಹಯ್ ಆಸ್ತಾಂ ತಾಚ್ಯಾ ಖಾಸ್ಗಿ ಅನ್ಭೋಗಾಕ್ ಉಗ್ಡಾಪೆಂ ಕರುಂಕ್ ಭಿಲ್ಕುಲ್ ನ್ಹಯ್! ದೇಟ್ಸಾಲ್ ಯುವರ್ ಹಾನರ್!"
"ಅಬ್ಜೆಕ್ಶನ್ ಸಸ್ಟೇಯ್ನ್ಡ್!"
"ತಾಂಚ್ಯಾ ವಿಚಾರಾಣಾಚಿ ಪರ್ವಣ್ಗಿ ಮೆಳ್ತೆಲಿ!" ಜಡ್ಜ್ ಉಲಯ್ಲೊ.
"ಯು ಮೇ ಕಂಟಿನ್ಯೂ ಮಿಸ್ಟರ್ ಡಿಫೆಂಡಿಂಗ್ ಪ್ರಾಸಿಕ್ಯೂಟರ್!" ಜಡ್ಜಾಚಿ ಪರ್ವಣ್ಗಿ ತಿ.
ರಾಮ್ ಪ್ರಸಾದ್ ಆತಾಂ ಸಮಾಧಾನ್ ಜಾಲ್ಲ್ಯಾ ಪರಿಂ ಆಪ್ಲ್ಯಾ ಬಸ್ಕೆರ್ ಬಸ್ಲೊ.
"ಯುವರ್ ಹಾನರ್" ನಾಯರ್ ಜಡ್ಜಾ ಮುಕಾರ್ ಘುಂವ್ಲೊ. "ಇನ್ಟೆನ್ಶನಲೀ ಕಮಿಟಡ್ ಮರ್ಡರ್ ಕೇಸಿಂತ್ ಸಾಕ್ಶೆಕ್ ಸಾಂಪಡ್ಲೆಲೆ ಕಾನೂನಾ ಥಾವ್ನ್ ಧಾಂವ್ಲ್ಲೆಚ್ ಚಡ್ ಆಸಾತ್. ಆಪುಣ್ಚ್ ಹತ್ಯಾ ಚಲವ್ನ್ ಪೊಲಿಸಾಂಕ್ ಸರೆಂಡರ್ ಜಾಲ್ಲೆ ಕೊಣ್ಯ್ ನಾಂತ್! ಆಜ್ ಹ್ಯಾ ಭರ್ಲೆಲ್ಯಾ ಕೊರ್ಟಾಂತ್ ಮ್ಹಜ್ಯಾ ಸಾಂಗಾತಿ ಪ್ರಾಸಿಕ್ಯೂಟರಾನ್ ಹ್ಯಾ ಆಲಿಯಾಚಾ ಹಲ್ಲ್ಯಾಚಾ ಕೇಸಿಕ್ ಹೆಂ ಏಕ್ ಇನ್ಟೆನ್ಶನಲೀ ಅಟೆಂಪ್ಟಡ್ ಮರ್ಡರ್ ಕೇಸ್ ಮ್ಹಣೊನ್ ರುಜು ಕೆಲಾಂ ಜಾಲ್ಯಾರ್ಯ್ ಹೆಂ ಅಟೆಂಪ್ಟ್ ಇಕ್ಬಾಲ್ ಆನಿ ರಾಶಿದಾನ್ ಕರುಂಕ್ ನಾ ಮ್ಹಳ್ಳೆಂ ಹಾಚ್ಯೆ ಥಾವ್ನ್ ರುಜು ಜಾತಾ. ತರ್ ಹೆಂ ಅಟೆಂಪ್ಟ್ ಕೊಣೆ ಕೆಲಾಂ ಆನಿ ಹಾಚೊ ಆಫ್ರಾಧ್ ಇಕ್ಬಾಲ್ ಆನಿ ರಾಶಿದಾ ವಯ್ರ್ ಕಿತ್ಯಾಕ್ ಆಯ್ಲಾ ಮ್ಹಳ್ಳೆಂ ಸವಾಲ್ ಖಂಡಿತ್ ಉಬ್ಜಾತಾ. ಹೆಂ ಹಾಂವ್ ಹ್ಯಾ ಕೊರ್ಟಾ ಮುಕಾರ್ ರುಜು ಕರುನ್ ದಾಖಯ್ತಾಂ. ಹ್ಯಾ ಖಾತಿರ್ ಮ್ಹಾಕಾ ಥೊಡೊ ವೇಳ್ ಜಾಯ್ ಯುವರ್ ಹಾನರ್!"
"ದೇಟ್ಸಾಲ್ ಯುವರ್ ಹಾನರ್!" ನಾಯರಾನ್ ಜಡ್ಜಾಕ್ ನಮಾನ್ ಕೆಲೊ.
"ದಿ ಕೋರ್ಟ್ ಇಸ್ ಅಡ್ಜರ್ನ್ಡ್ ಅಂಟಿಲ್ ಫರ್ದರ್ ನೋಟಿಸ್!" ಜಡ್ಜಾಕ್ ಹಿ ಕೇಸ್ ಫಸ್ಲೆಲ್ಯಾ ಪರಿಂ ದಿಸ್ಲಿ.
"ಟಕ್!" ಜಡ್ಜ್ ಆಪ್ಲ್ಯಾ ಬಸ್ಕೆರ್ ಥಾವ್ನ್ ಉಟ್ಲೊ.
****************
ಆಲಿಯಾಚಾ ಹಲ್ಲ್ಯಾಚೆಂ ಟ್ರಾಯಲ್ ಆರಂಭ್ ಜಾವ್ನ್ ಪಂದ್ರಾ ದೀಸ್ ಸಂಪ್ಲ್ಲೆ. ಹ್ಯಾ ದಿಸಾಂನಿ ತೀನ್ ದೀಸ್ ಮಾತ್ರ್ ಕೊರ್ಟಾಂತ್ ಟ್ರಾಯಲ್ ಚಲೊಂಕ್ ಸಾದ್ಯ್ ಜಾಲ್ಲೆಂ. ಹ್ಯಾ ತೀನ್ ದಿಸಾಂನಿ ರಾಮ್ ಪ್ರಸಾದಾನ್ ಆಲಿಯಾಚಾ ತರ್ಫೆನ್ ತೀನ್ ಸಾಕ್ಶ್ಯೊ ಕೊರ್ಟಾ ಮುಕಾರ್ ಪ್ರಸ್ತುತ್ ಕೆಲ್ಲ್ಯೊ. ಹ್ಯಾ ತೀನ್ ಸಾಕ್ಶೆಂಚಾ ಸಾಕ್ಶೆ ಥಾವ್ನ್ ಆಲಿಯಾ ನಾ ಖುಶ್ ನಾತ್ಲ್ಲೆಂ. ಹ್ಯಾ ದಿಸಾಂನಿ ಕೊರ್ಟಾಂತ್ ಹೆಂ ರುಜು ಜಾಲ್ಲೆಂ ಕೀ ಇಕ್ಬಾಲ್ ಆನಿ ರಾಶಿದ್ ದೊಗ್ಯ್ ಆಲಿಯಾಚಾ ಪ್ಲ್ಯಾಟಾಕ್ ಆಯಿಲ್ಲೆ. ಫಕತ್ತ್ ಇಕ್ಬಾಲಾನ್ ಆನಿ ರಾಶಿದಾನ್ ಹೆಂ ಒಪುನ್ ಘೆಂವ್ಕ್ ಬಾಕಿ ಆಸ್ಲ್ಲೆಂ. ಆಲಿಯಾ ವಯ್ರ್ ಜಾಲ್ಲೊ ಹಲ್ಲೊ ಕಿತ್ಲೊ ಮರಣಾಂತಿಕ್ ಮ್ಹಳ್ಳೆಂ ತೆಂ ಕೊರ್ಟಾಚಾ ಮುಕಾರ್ ರುಜು ಜಾಲ್ಲೆಂ. ಕೊರ್ಟಾ ಮುಕಾರ್ ಹೆಂ ಏಕ್ ’ಇನ್ಟೆನ್ಶನಲೀ ಅಟೆಂಪ್ಟಡ್ ಫೇಯ್ಲ್ಡ್ ಮರ್ಡರ್’ ಮ್ಹಣೊನ್ ರುಜು ಜಾಲ್ಲೆಂ.
ಇಕ್ಬಾಲ್ ಆನಿ ರಾಶಿದ್ ಹಲ್ಲೊ ಜಾಲ್ಲ್ಯಾ ಸುವಾತೆರ್ ಪ್ರಸ್ತುತ್ ಆಸ್ಲ್ಲೆ ಮ್ಹಣ್ ಕೊರ್ಟಾ ಮುಕಾರ್ ರುಜು ಜಾತಾನಾ ಹಲ್ಲ್ಯಾಚೊ ಸಂದೇಹ್ ಇಕ್ಬಾಲಾಚೆರ್ ಆಬಿ ರಾಶಿದಾಚೆರ್ಚ್ ಉಟೊನ್ ಯೆತಾ. ಹೊ ಸಂದೇಹ್ ಇಕ್ಬಾಲಾ ವಯ್ಲೊ ನಿವ್ರಾಂವ್ಕ್ ಜಾಯ್ ಜಾಲ್ಯಾರ್ ಹಲ್ಲೊ ಜಾಲ್ಲ್ಯಾ ವಗ್ತಾರ್ ಇಕ್ಬಾಲ್ ಆಲಿಯಾಚಾ ಪ್ಲ್ಯಾಟಾಕ್ ಯೇಂವ್ಕ್ ನಾತ್ಲ್ಲೊ ಮ್ಹಳ್ಳೆಂ ರುಜು ಕರುಂಕ್ ಜಾಯ್! ಪುಣ್ ಹೆಂ ಕಶೆಂ ಸಾದ್ಯ್? ನಾಯರ್ ಚಿಂತಾಲೊ. ಇಕ್ಬಾಲಾನ್ ಹೊ ಹಲ್ಲೊ ಕರುಂಕ್ ನಾ ಮ್ಹಣೊನ್ ಹಾವೆಂ ಇಕ್ಬಾಲಾಚಾ ತರ್ಫೆನ್ ಸಾಕ್ಶಿ ಪ್ರಸ್ತುತ್ ಕರುಂಕ್ ಜಾಯ್! ನಾ ಜಾಲ್ಯಾ ಮುಕಾರ್ ಸಾಕ್ಶಿ ನಾಂತ್ ಮ್ಹಳ್ಳ್ಯಾ ಕಾರಾಣಾಕ್ ಇಕ್ಬಾಲಾಚೆಂ ಆನಿ ರಾಶಿದಾಚೆಂ ವಿಚಾರಣ್ ಚಲ್ತೆಲೆಂ. ಕೊರ್ಟಾಂತ್ ಹ್ಯಾ ವಿಚಾರಣಾ ವೆಳಾರ್ ಇಕ್ಬಾಲ್ ಆನಿ ರಾಶಿದ್ ಕಶೆಂ ತೋಂಡ್ ಉಘಡ್ತೆಲೆ ತೆಂ ಸಾಂಗೊಂಕ್ ಜಾಯ್ನಾ. ಇಕ್ಬಾಲಾನ್ ಆನಿ ರಾಶಿದಾನ್ ಆಪಾಪ್ಲೊ ಉಚಾರ್ ವಿಂಗಡ್ ವಿಂಗಡ್ ಜವಾಬೆನ್ ದಿಲೊ ಜಾಲ್ಯಾರ್ ಇಕ್ಬಾಲ್ ಹಾಂಗಾ ಫಸ್ತಾ. ಕಿತೆಂ ಕರ್ಯಾಂ?
ಕೊರ್ಟಾ ಮುಕಾರ್ ಆಪ್ಣೆ ಇಕ್ಬಾಲಾಚಾ ತರ್ಫೆನ್ ಕೊಣಾಕ್ ಉಭೆಂ ಕರ್ಚೆಂ? ಆಶೆಂ ಕರುನ್ ತರ್ಯ್ ಆಪ್ಣಾಕ್ ಥೊಡೊ ವೇಳ್ ಮೆಳಾತ್ ಜಾಲ್ಯಾರ್ ಕಾಂಯ್ ನಾಂ ಕಾಂಯ್ ವಾಟ್ ಮ್ಹಾಕಾ ಸೊಧುನ್ ಯೆತೆಲಿ. ನಾಯರಾನ್ ಕೊರ್ಟಾ ಮುಕಾರ್ ಆಪುಣ್ ಸಾಕ್ಶಿ ಪ್ರಸ್ತುತ್ ಕರ್ತಾಂ ಮ್ಹಣೊನ್ ಭಾಸಾಯ್ಲಾಂ. ತರ್ ಕಿತೆಂ ಕರಿಯಾಂ?
ಹ್ಯಾ ಮಧೆಂ ನಾಯರಾಕ್ ಇಕ್ಬಾಲಾಚಾ ವಯ್ರ್ ದುಬಾವ್ ಖಂಡಿತ್ ಜಾಲ್ಲೊ. ಇಕ್ಬಾಲಾನ್ ಜರ್ ಆಲಿಯಾಚಾ ವಯ್ರ್ ಹಲ್ಲೊ ಕರುಂಕ್ ನಾ ಜಾಲ್ಯಾರ್ ಇಕ್ಬಾಲಾಚಾ ಪಾಟ್ಲ್ಯಾನ್ ಆಲಿಯಾಚಾ ಪ್ಲ್ಯಾಟಾಕ್ ಕೋಣ್ ರಿಗ್ಲೊ? ಜರ್ ತರ್ ಆಲಿಯಾ ವಯ್ರ್ ದುಸ್ರ್ಯಾ ಕೊಣೆಂಯ್ ಹಲ್ಲೊ ಕೆಲಾ ಜಾಲ್ಯಾರ್ ಆಲಿಯಾ ಇಕ್ಬಾಲಾಚೆಂ ನಾಂವ್ ಕಿತ್ಯಾಕ್ ಘೆತಾ? ಇತ್ಲೆಂಚ್ ನ್ಹಯ್ ಆಸ್ತಾಂ ಆಲಿಯಾ ವಯ್ರ್ ಜರ್ ತರ್ ಇಕ್ಬಾಲಾನ್ ಹಲ್ಲೊ ಕರುಂಕ್ ನಾ ಜಾಲ್ಯಾರ್ ಇಕ್ಬಾಲ್ ಪೊಲಿಸಾಂ ಥಾವ್ನ್ ಇತ್ಲೆ ದೀಸ್ ಲಿಪೊನ್ ಕಿತ್ಯಾಕ್ ರಾವ್ಲೊ?. ನಾಯರಾಚಾ ಮತಿಂತ್ ಸವಾಲಾಂ ಸಭಾರ್ ಉದೆತಾಲಿಂ.
ಆಲಿಯಾಚಾ ಸೆಲ್ಪೋನಾಚಿ ಭಳಾಧೀಕ್ ಸಾಕ್ಸ್ ಆಸ್ಲ್ಲಿ. ಇಕ್ಬಾಲಾನ್ಚ್ ಆಲಿಯಾಕ್ ಪೋನ್ ಕೆಲ್ಲೆಂ. ತೆಂಯ್ ಎಕಾಚ್ಚ್ ದಿಸಾ ಭಿತರ್ ದೋನ್ ಪಾವ್ಟಿಂ ಆಲಿಯಾಚಾ ಪೊನಾರ್ ಇಕ್ಬಾಲಾಚೆಂ ನಂಬರ್ ಆಸಾ. ತ್ಯಾ ಪಯ್ಲೆಂ ಇಕ್ಬಾಲ್ ಆನಿ ಆಲಿಯಾ ಎಕಾ ಮೆಕಾ ಮೆಳೊಂಕ್ ಪಾಸೊನ್ ನಾತ್ಲ್ಲಿಂ. ಜರ್ ತರ್ ಆಲಿಯಾಕ್ ಆನಿ ಇಕ್ಬಾಲಾಕ್ ಕಾಂಯ್ ಸಂಭಂಧ್ ನಾ ಜಾಲ್ಯಾರ್ ಎಕಾಚ್ಚ್ ಫರಾ ಇಕ್ಬಾಲ್ ಕಸೊ ಉದೆಲೊ. ಹ್ಯಾ ಕೇಸಿಂತ್ ಇಕ್ಬಾಲಾನ್ ಮ್ಹಾಕಾ ಸಾಂಗೊಂಕ್ ನಾತ್ಲೆಲೆಂ ಕಾಂಯ್ ತರ್ಯ್ ಆಸಾ! ಕಿತೆಂ ಆಸಾ? ಇಕ್ಬಾಲ್ ಖಂಡಿತ್ ಮ್ಹಜ್ಯೆ ಥಾವ್ನ್ ಕಾಂಯ್ ತರ್ಯ್ ಲಿಪಯ್ತಾ! ಜಾಣಾಂ ಜಾಲ್ಲ್ಯಾ ನಾಯರಾನ್ ಇಕ್ಬಾಲಾಕ್ ಪರ್ತ್ಯಾಕ್ ಏಕ್ ಪಾವ್ಟಿಂ ನವ್ಯಾನ್ ಮೆಳೊಂಕ್ ಚಿಂತ್ಲೆಂ.
ನಾಯರಾಚಾ ಆಪವ್ಣೆಕ್ ಪಾಳೊ ದೀವ್ನ್ ಇಕ್ಬಾಲ್ ಆನಿ ರಾಶಿದ್ ದೊಗ್ಯ್ ನಾಯರಾಚಾ ಆಫೀಸಾಕ್ ಆಯ್ಲೆ.
"ಪಳೆ ಇಕ್ಬಾಲ್!" ನಾಯರಾನ್ ಆಸಾ ತಶೆಂ ಉಲಂವ್ಚೆಂ ಬರೆಂ ಮ್ಹಣೊನ್ ಚಿಂತ್ಲೆಂ. "ಹಾಂವ್ ಜಾಣಾಂ ಇಕ್ಬಾಲ್ ಹ್ಯಾ ಕೇಸಿಂತ್ ಕಾಂಯ್ ತರ್ಯ್ ಮಿಸ್ತೆರ್ ಆಸಾ! ಎಕ್ಚ್ ತುವೆಂ ಆಲಿಯಾ ವಯ್ರ್ ಹಲ್ಲೊ ಕೆಲಾಯ್ ಆನಿ ತುಂ ಫಟ್ ಮಾರ್ತಾಯ್! ವಾ ಆಲಿಯಾ ತುಜ್ಯೆರ್ ಆಫ್ರಾದ್ ಮಾಂಡ್ತಾ! ಹಾಂಗಾಸರ್ ಆಲಿಯಾನ್ ತುಜ್ಯೆರ್ ಆಫ್ರಾಧ್ ಮಾಂಡ್ಚೆ ಆವ್ಕಾಸ್ ಉಣೆಂ ಆಸಾತ್. ಕಾರಾಣ್ ತಾಚ್ಯೆ ವಯ್ರ್ ಮರಣಾಂತಿಕ್ ಹಲ್ಲೊ ಜಾಲಾ. ಹೆಂ ನಿಜಾಯ್ಕ್ಯ್ ಅಟೆಂಪ್ಟಡ್ ಮರ್ಡರ್! ಸಾಕ್ಶಿ ಸಗ್ಳ್ಯೊ ಆಲಿಯಾಚಾ ತರ್ಫೆನ್ ಆಸಾತ್! ಆನಿ ಹಾಂವ್ ರಾಮ್ ಪ್ರಸಾದಾಕ್ ಜಾಣಾಂ. ತುಂ ಜರ್ ಏಕ್ ಪಾವ್ಟಿಂ ವಿಟ್ನೆಸ್ ಬಾಕ್ಸಾಂತ್ ಉಭೊ ಜಾಲೊಯ್ ಜಾಲ್ಯಾರ್ ತೊ ರಾಮ್ ಪ್ರಸಾದ್ ಕಶೆಂ ತರ್ಯ್ ಕರುನ್ ತುಜೆಂ ತೋಂಡ್ ಸೊಡಯ್ತೊಲೊ ಆನಿ ತುಂ ಚಡ್ ಫಸ್ತಲೊಯ್. ಉಪ್ರಾಂತ್ ತುಕಾ ಸಾಲ್ವಾರ್ ಕರುಂಕ್ ಮಸ್ತ್ ಕಷ್ಟ್ ಆಸಾತ್! ಕಶ್ಟ್ ಸೊಡುನ್ ತೆಂ ಆಸಾಧ್ಯ್ ಮ್ಹಣ್ಯೆತ್! ಕಿತ್ಯಾಕ್ ಮ್ಹಳ್ಯಾರ್ ಹಾಂಗಾಸರ್ ಸಾಕ್ಶಿ ಭಳ್ ಆಸಾತ್! ಎಕಾ ದೋನ್ ಸಾಕ್ಶೆಂಕ್ ಜಾಲ್ಯಾರ್ ಘುಂವ್ಡಾವ್ಯೆತ್! ಪುಣ್ ಹಾಂಗಾ ಹ್ಯಾ ತುಜ್ಯಾ ಕೇಸಿಕ್ಚ್ ಘುಂವ್ಡಾಂವ್ಚೆಂ ತಿತ್ಲೆಂ ಸುಲಭ್ ನಾ. ಆನಿ ತುಂ ಜಾಣಾಂಯ್ ಕೊರ್ಟಾಂತ್ ಹಾವೆಂ ಹೆಂ ಪ್ರಯತ್ನ್ ಕೆಲಾಂ. ಪುಣ್ ಹ್ಯಾ ಪ್ರಯತ್ನಾಕ್ ಕೊರ್ಟಾ ಥಾವ್ನ್ ಮ್ಹಾಕಾ ಮೆಳೊಂಕ್ ಜಾಯ್ ಜಾಲ್ಲೊ ರೆಸ್ಪಾನ್ಸ್ ಮೆಳೊಂಕ್ ನಾ. ಹ್ಯಾಚ್ ಖಾತಿರ್ ಮ್ಹಾಕಾ ಆತಾಂ ತುಜ್ಯಾ ತರ್ಫೆನ್ ಕೊರ್ಟಾಂತ್ ಸಾಕ್ಶಿ ಪ್ರಸ್ತುತ್ ಕರುಂಕ್ ಜಾಯ್. ತ್ಯಾ ಪಯ್ಲೆಂ ಹಾಂವ್ ಹೆಂ ಜಾಣಾಂ ಜಾಂವ್ಕ್ ಆಶೆತಾಂ ಕೀ ಆಲಿಯಾ ವಯ್ರ್ ತುವೆಂ ಹಲ್ಲೊ ಕೆಲಾಯ್ ವಾ ನಾ? ಮ್ಹಜ್ಯೆಲಾಗಿಂ ಸತ್ ಉಲಯ್ ಇಕ್ಬಾಲ್! ಜರ್ ತರ್ ತುವೆಂ ಹಲ್ಲೊ ಕೆಲಾಯ್ ಜಾಲ್ಯಾರ್ ಹಾವೆಂ ಮ್ಹಜ್ಯಾ ವಕಾಲತೆಚಿ ರೀತ್ ಬದ್ಲುಂಕ್ ಪಡ್ತೆಲಿ. ನಾ ಜಾಲ್ಯಾರ್ ಉಪ್ರಾಂತ್ ತುಂಚ್ ಫಸ್ತಲೊಯ್! ಕೊರ್ಟಾಂತ್ ವಕಾಲಾತೆಚ್ಯಾ ವಗ್ತಾರ್ ಕೊಣಾಚಾ ತೊಂಡಾ ಥಾವ್ನ್ ಕಿತೆಂ ಭಾಯ್ರ್ ಯೆತಾ ತೆಂ ಸಾಂಗೊಂಕ್ ಜಾಯ್ನಾ!"
ನಾಯರಾನ್ ಇಕ್ಬಾಲಾಕ್ ಲಾಂಬಾಯೆನ್ ಸಾರ್ಕೆಂ ವಿವರ್ಸುನ್ ಸಾಂಗ್ಲೆಂ. ಆಪುಣ್ ಇಕ್ಬಾಲಾ ಲಾಗಿಂ ಉಲಯ್ತಾನಾ ತೊ ಇಕ್ಬಾಲಾಚ್ಯಾ ತೊಂಡಾ ವಯ್ಲ್ಯಾ ಭಾವನಾಂಕ್ ಸಮ್ಜೊಂಕ್ ಪ್ರಯತ್ನ್ ಕರ್ತಾಲೊ. ತಾಚ್ಯಾ ಉಲೊಣ್ಯಾಂತ್ ಇಕ್ಬಾಲಾಚಾ ತೊಂಡಾ ವಯ್ರ್ ಬೆಜಾರಾಯೆಚೊ ಛಾರೊ ಸ್ಪಶ್ಟ್ ಝಳ್ಕಾತಾಲೊ.
ಇಕ್ಬಾಲಾನ್ ನಾಯರಾಚಿಂ ಉತ್ರಾಂ ಆಯ್ಕಾಲಿಂ ಮಾತ್ರ್ ಶಿವಾಯ್ ತೊ ಕಾಂಯ್ ಉಲಯ್ಲೊ ನಾ. ತೊ ತಸೊಚ್ಚ್ ತಾಚ್ಯಾ ಬಸ್ಕೆಕ್ ವೊಣ್ಕಾಲೊ.
ಇಕ್ಬಾಲಾಚಾ ಮತಿಂತ್ ಆತಾಂ ಝುಜ್ ಚಲ್ತಾ ಮ್ಹಳ್ಳೆಂ ನಾಯರಾಕ್ ಸ್ಪಶ್ಟ್ ಜಾಲೆಂ.
"ತುವೆಂ ಕಾಂಯ್ ಭಿಯೆಂವ್ಚಿ ಗರ್ಜ್ ನಾ ಇಕ್ಬಾಲ್! ಮ್ಹಜ್ಯೆ ಲಾಗಿಂ ತುಜಿ ಚೂಕ್ ವಳ್ಕಾಲ್ಲ್ಯಾಂತ್ ತುಕಾ ಕಾಂಯ್ ಫಾಶಿ ಜಾಯ್ನಾ! ಪುಣ್ ಕೊರ್ಟಾಂತ್ ಕಾಂಯ್ ಹೆಂ ರುಜು ಜಾಲೆಂ ಜಾಲ್ಯಾರ್ ಮಾತ್ರ್ ತುವೆಂ ಬಚಾವ್ ಜಾಂವ್ಕ್ ಕಶ್ಟ್ ಆಸಾತ್!" ಪರ್ತ್ಯಾಕ್ ನಾಯರ್ಚ್ ಉಲಯ್ಲೊ.
ನಾಯರಾಚಿಂ ಉತ್ರಾಂ ಆಯ್ಕಾಲ್ಲೊ ಇಕ್ಬಾಲ್ ಥೊಡೊ ವೇಳ್ ತಸೊಚ್ಚ್ ನಾಯರಾಕ್ ಪಳಯಿಲ್ಲೊ ಉಪ್ರಾಂತ್ ಸವ್ಕಾಸ್ ರಾಶಿದಾಚಾ ಕುಶಿಕ್ ಘುಂವ್ಲೊ.
ರಾಶಿದಾನ್ ಕಾಂಯ್ಚ್ ಉಲಯಿಲ್ಲ್ಯಾ ಪರಿಂ ನಾತ್ಲ್ಲೆಂ. ಹೆಂ ಸಗ್ಳೆಂ ಆಪ್ಣಾ ಥಾವ್ನ್ ಘಡ್ಲಾಂ ಮ್ಹಳ್ಳೆಂ ತೊ ಜಾಣಾಂ.
ಆತಾಂ ಇಕ್ಬಾಲಾನ್ ಏಕ್ ದೀರ್ಘ್ ಶ್ವಾಸ್ ಸೊಡ್ಲೊ.
"ತರ್, ತುಂ ಮ್ಹಣ್ತಾಯ್ ಹಾವೆಂ ಬಚಾವ್ ಜಾಂವ್ಕ್ ಸಾದ್ಯ್ ನಾ!" ಇಕ್ಬಾಲಾನ್ ಪರ್ತ್ಯಾಕ್ ನಾಯರಾಕ್ ಪಳೆಲೆಂ.
ಇಕ್ಬಾಲಾಚಾ ಸವಾಲಾಕ್ ನಾಯರಾನ್ ಫಕತ್ತ್ ತಕ್ಲಿ ಹಾಲಯ್ಲಿ ಮಾತ್ರ್ ಶಿವಾಯ್ ತೊ ಕಾಂಯ್ ಉಲಯ್ಲೊ ನಾ.
"ದುಸ್ರಿ ಕಾಂಯ್ ವಾಟ್ ನಾ?" ಇಕ್ಬಾಲಾನ್ ಆಪ್ಲ್ಯಾ ಖಾಡ್ಕೆರ್ ಹಾತ್ ಚರಯ್ಲೊ.
"ಆಲಿಯಾ ವಯ್ರ್ ಹಲ್ಲೊ ಜಾಲ್ಲ್ಯಾ ವಗ್ತಾರ್ ತುಂ ಆಲಿಯಾಚಾ ಪ್ಲ್ಯಾಟಾಕ್ ವಚೊಂಕ್ ನಾತ್ಲ್ಲೊಯ್ ಮ್ಹಣೊನ್ ತುಂ ರುಜು ಕರುಂಕ್ ಸಕ್ತಾಯ್....?" ನಾಯರ್ ಆಪ್ಲ್ಯಾ ಬಸ್ಕೆರ್ ಮುಕಾರ್ ಬಾಗ್ವಾಲೊ.
"ಕಶೆಂ......?" ಇಕ್ಬಾಲಾನ್ ತಶೆಂಚ್ ಆಪ್ಲ್ಯಾ ಖಾಡ್ಕೆರ್ ಬೊಟಾಂ ಚರಯಿತ್ತ್ ಸವಾಲ್ ಕೆಲೆಂ.
"ಹ್ಯಾ ವಿಶಿಂ ಚಿಂತುನ್ ಫಾಯ್ದೊ ನಾ ಇಕ್ಬಾಲ್! ತುವೆಂ ಎದೊಳ್ಚ್ ಪೊಲಿಸಾಂ ಮುಕಾರ್ ಮಾಂದುನ್ ಘೆತ್ಲಾಂಯ್ ಕೀ ತುಂ ಆಲಿಯಾಕ್ ಮೆಳೊಂಕ್ ಗೆಲ್ಲೊಯ್! ಪುಣ್ ತುವೆಂ ಹಲ್ಲೊ ಕರುಂಕ್ ನಾಂಯ್ ಮ್ಹಳ್ಳ್ಯಾ ಖಾತಿರ್ಚ್ ತುಕಾ ಭೇಯ್ಲ್ ಮೆಳ್ಲ್ಲಿ. ನಾಂ ತರ್ ಹ್ಯಾ ಕೇಸಿಂತ್ ತುಕಾ ಬೇಯ್ಲ್ ಮೆಳ್ಚೊ ಸಂಭವ್ಚ್ ನಾತ್ಲ್ಲೊ! ತೆಂಯ್ ತುಕಾ? ನೆವರ್! ತುಂ ಅಂಡರ್ ವರ್ಲ್ಡಾಚೊ ಖಾಂಬೊ!"
"ತರ್ ದುಸ್ರಿ ವಾಟ್....?"
"ತುಂ ಮ್ಹಾಕಾ ಪಯ್ಲೆಂ ಹೆಂ ಸಾಂಗ್ ಇಕ್ಬಾಲ್... ತುವೆಂ ಆಲಿಯಾ ವಯ್ರ್ ಹಲ್ಲೊ ಕೆಲಾಯ್ ವಾ ನಾ.....? ಉಪ್ರಾಂತ್ಲೆಂ ಉಪ್ರಾಂತ್ ಪಳೆಯಾಂ!" ನಾಯರಾಕ್ ಸತ್ ಕಿತೆಂ ತೆಂ ಜಾಣಾಂ ಜಾಂವ್ಕ್ ಜಾಯ್ ಆಸ್ಲ್ಲೆಂ.
ಇಕ್ಬಾಲ್ ಆತಾಂ ಚಿಂತುಂಕ್ ಪಡ್ಲೊ.
ತಿತ್ಲೆಂಚ್!
ಎಕಾಚ್ಚ್ ಫರಾ ತೊ ಆಪ್ಲ್ಯಾ ಬಸ್ಕೆರ್ ಥಾವ್ನ್ ಉಟ್ಲೊ.
"ಮ್ಹಕಾ ಥೊಡೆಂ ಅರ್ಜಂಟ್ ಕಾಮ್ ಆಸಾ! ಹಾಂವ್ ತುಕಾ ಉಪ್ರಾಂತ್ ಪೋನ್ ಕರ್ತಾಂ!" ಇಕ್ಬಾಲ್ ಉಟೊನ್ ಉಭೊ ಜಾಲ್ಲೊ ಪಳೆಲ್ಲೊ ರಾಶಿದ್, ದುಸ್ರಿ ವಾಟ್ ನಾಸ್ತಾನಾ ಭಾವಾ ಬರಾಬರ್ ಯಾಂತ್ರಿಕ್ಪಣಿಂ ಉಟೊನ್ ಉಭೊ ಜಾಲೊ. ತಾಕಾ ಭಾವಾಚೆಂ ವರ್ತನ್ ಸಮ್ಜಾಲೆಂ ನಾ.
"ಪೋನಾರ್ ಹೊ ವಿಶಯ್ ಉಲಂವ್ಕ್ ಜಾಯ್ನಾಂ ಇಕ್ಬಾಲ್!" ಅಚಾನಕ್ ಇಕ್ಬಾಲಾಚೆಂ ವರ್ತನ್ ಪಳವ್ನ್ ನಾಯರಾಕ್ ಆಜಾಪ್ ಜಾಲೆಂ.
"ಬರೆಂ! ಹಾಂವ್ ತುಕಾ ಪೋನ್ ಕರಿನಾ. ಹಾಂವ್ಚ್ ತುಕಾ ಮೆಳೊಂಕ್ ಯೆತಾಂ!" ಇಕ್ಬಾಲ್ ಪಾಟಿಂ ಘುಂವ್ಲೊ.
ನಾಯರಾಕ್ ಕಾಂಯ್ ಸಮ್ಜಾಲೆಂ ನಾ. ತೊ ಇಕ್ಬಾಲಾಚಾ ಪಾಟಿಕ್ಚ್ ಪಳವ್ನ್ ರಾವ್ಲೊ.
ಮಂಗ್ಳುರಾಂತ್ ಜಾಲ್ಲ್ಯಾ ಮಿಶೆಲಾಚಾ ಆಜ್ಯಾಚಾ ಆನಿ ಆಜಿಯೆಚಾ ಆಕ್ಸಿಡೆಂಟಾ ಥಾವ್ನ್ ರಾಯನ್ ಖಂತಿಶ್ಟ್ ಜಾಲ್ಲೊ. ಮುಂಬಯಿ ಥಾವ್ನ್ ಮಾಯಾಗ್ ಜಾಲ್ಲೆಂ ಮಿಶೇಲ್ ಖಂಯ್ ಪಾವ್ಲಾಂ? ತಾಕಾ ಕಿತೆಂ ಜಾಲಾಂ? ಮ್ಹಳ್ಳಿ ಖಬಾರ್ಚ್ ನಾತ್ಲ್ಲಿ ಜಾಲ್ಯಾರ್ ಮಂಗ್ಳುರಾಂತ್ ಅಚಾನಕ್ ತಾಚ್ಯಾ ಆಜ್ಯಾ ಆಜಿಯೆಚೆಂ ಮರಣ್ ರಾಯನಾಚಾ ಕಾಜಾರಿ ಜಿವಿತಾಚಾ ಸಂಸಾರಾಕ್ ಧರುನ್ ಹಾಲಂವ್ಕ್ ಸಕ್ಲ್ಲೆಂ. ರಾಯನ್ ಆಜ್ ಸಂಪೂರ್ಣ್ ಅಸಹಾಯಕ್ ಜಾಲ್ಲೊ. ಆಪ್ಣಾಲಾಗಿಂ ಸಗ್ಳೆಂ ಆಸೊನ್ಯ್ ಆಜ್ ತೊ ಕಾಂಯ್ಚ್ ಕರುಂಕ್ ಸಕಾನಾತ್ಲ್ಲೊ. ಜಶೆಂ ಬಾವೀಸ್ ವರ್ಸಾಂ ಪಯ್ಲೆಂ ತಾಚೊ ಬಾಪಯ್ ಅಸಹಾಯಕ್ ಜಾಲ್ಲೊ ತಶೆಂ. ತ್ಯಾ ವಗ್ತಾರ್ ತರ್ಯ್ ಸಗ್ಳೆಂ ತಾಚ್ಯಾ ದೊಳ್ಯಾಂ ಮುಕಾರ್ ಆಸ್ಲ್ಲೆಂ. ಫಕತ್ತ್ ತಾಚ್ಯಾ ಹಾತಾಂತ್ ಕಾಂಯ್ ನಾತ್ಲ್ಲೆಂ. ಪುಣ್ ಆಜ್ ರಾಯನಾಚಾ ದೊಳ್ಯಾಂ ಮುಕಾರ್ಯ್ ಕಾಂಯ್ ನಾತ್ಲ್ಲೆಂ ಆನಿ ತೊ ಆಪ್ಲ್ಯಾ ಹಾತಾಂನಿಯ್ ಕಾಂಯ್ ಕರುಂಕ್ ಸಕಾನಾತ್ಲ್ಲೊ.
ರಾಯನಾ ಸವೆಂ ಶೀತಲ್ ಮಿಶೇಲಾಚಾ ಆಜ್ಯಾ ಆಜಿಯೆಚಾ ಮರ್ಣಾಕ್ ಗೆಲ್ಲೆಂ ತೆಂ ರಾಯನಾ ಸವೆಂಚ್ ಪಾಟಿಂ ಆಯಿಲ್ಲೆಂ. ಮಂಗ್ಳುರಾಕ್ ಗೆಲ್ಲ್ಯಾ ರಾಯನಾಕ್, ಮಿಶೆಲಾಚ್ಯಾ ನಪಂಯ್ಚ್ ಪಣಾಕ್ ತಾಚ್ಯಾ ಕುಟ್ಮಾಂಚ್ಯಾಚಾ ಮುಕಾರ್ ಉಗ್ತೆಂ ಕರುಂಕ್ ಮಸ್ತ್ ಕಶ್ಟ್ ಜಾಲ್ಲೆ. ತೊ ಕಿತ್ಲ್ಯಾ ಜಾಣಾಂಕ್ ಮ್ಹಣೊನ್ ಜವಾಬ್ ದಿತಲೊ?
ಶೀತಲ್ ಆಪ್ಲ್ಯಾ ಆವಯ್ ಬಾಪಾಯ್ಕ್ ಮೆಳೊನ್ ಆಯ್ಲೆಂ ಜಾಲ್ಯಾರ್ಯ್ ತಾಚ್ಯಾ ತ್ಯಾ ಮೆಳೊವ್ಣೆಂತ್ ಪಯ್ಲೆಂಚೊ ತೊ ಸಂಭಂಧ್ ನಾತ್ಲ್ಲೊ. ಆವಯ್ ಬಾಪಾಯ್ನ್ ಶೀತಲಾಕ್ ಕಿತ್ಲೆಂ ವತ್ತಾಯ್ ಕೆಲೆಂ ಜಾಲ್ಯಾರ್ಯ್ ತೆಂ ಮುಂಬಯಿ ಸೊಡುನ್ ಮಂಗ್ಳುರಾಂತ್ ರಾವೊಂಕ್ ಕಬೂಲ್ ಜಾಲೆಂ ನಾ. ತೆಂ ರಾಯನಾ ಸವೆಂಚ್ ಪಾಟಿಂ ಮುಂಬಯಿ ಆಯ್ಲೆಂ.
ಮುಂಬಯಿ ಪಾಟಿಂ ಆಯಿಲ್ಲ್ಯಾ ರಾಯನಾಕ್, ರಾಮ್ ಪ್ರಸಾದಾನ್ ಆಲಿಯಾಚಾ ಕೇಸಿಚ್ಯಾ ವಿಶ್ಯಾಂತ್ ವರ್ಧಿ ದಿಲಿ. ರಾಯನಾಕ್ ಹ್ಯಾ ವರ್ಧೆಚ್ಯಾಕ್ಯ್ ಆಪ್ಲ್ಯಾ ಮಿಶೇಲಾಚಿ ಚಡ್ ರಾಕೊಣ್ ಆಸ್ಲ್ಲಿ. ರಾಮ್ ಪ್ರಸಾದ್ ಹ್ಯಾ ಕೇಸಿಕ್ ಖಂಡಿತ್ ಜಿಕಯ್ತಲೊ ಮ್ಹಣೊನ್ ರಾಯನ್ ಪಯ್ಲೊಚ್ ಜಾಣಾಂ ಆಸ್ಲ್ಲೊ.
ಆಲಿಯಾಕ್ ಆಪ್ಲ್ಯಾ ಜಯ್ತಾಚೊ ಭರ್ವಸೊ ಜಾಲ್ಲೊ. ಏರ್ಪೊರ್ಟಾಚಾ ದಾರಾರ್ ಥಾವ್ನ್ ಆಪ್ಣಾಕ್ ಉಕೊಲ್ತಾಂ ಮ್ಹಳ್ಳ್ಯಾ ರಾಶಿದಾನ್ ಆನಿ ಇಕ್ಬಾಲಾನ್ ಆಪ್ಣಾಕ್ ಏರ್ವೇಸಾಚಾ ಕಾಮಾ ಥಾವ್ನ್ ಕಾಡುನ್ ಉಡಯಿಲ್ಲೆಂಚ್ ನ್ಹಯ್ ಆಸ್ತಾಂ ವಿಶು ಕುಮಾರಾಚಿ ಹತ್ಯಾ ಕೆಲ್ಲ್ಯಾ ಹ್ಯಾ ಹತ್ಯಾರಾಂಕ್ ಆಲಿಯಾ ಕೆದ್ನಾಂಚ್ ಭೊಗ್ಸುಂಕ್ ತಯಾರ್ ನಾತ್ಲ್ಲೆಂ. ಆಲಿಯಾ ವಿಶುಕುಮಾರಾ ವಯ್ರ್ ಆಪ್ಲೆಂ ಹಗೆಂ ತಿರ್ಸುನ್ ತಾಕಾ ಚಲಿ ಮ್ಹಳ್ಯಾರ್ ಕಿತೆಂ ಮ್ಹಣೊನ್ ದಾಖಂವ್ಕ್ ಆಶೆತಾಲೆಂ ಸಾರ್ಕೆಂ! ಪುಣ್ ಆಲಿಯಾನ್ ಕೆದ್ನಾಂಚ್ ವಿಶು ಕುಮಾರಾಚಾ ಹತ್ಯಾಚೆಂ ಚಿಂತುಂಕ್ ನಾತ್ಲ್ಲೆಂ! ವಿಶು ಕುಮಾರಾಚಿ ಹತ್ಯಾ ಕರುನ್ ತಾಕಾ ಕಾಂಯ್ ಫಾಯ್ದೊ ನಾತ್ಲ್ಲೊ. ಅಸಲ್ಯಾ ಇಕ್ಬಾಲಾಕ್ ಆನಿ ರಾಶಿದಾಕ್ ಸಾಸ್ಣಾಚಿ ವಾಟ್ ದಾಖವ್ನ್ ದೀಂವ್ಕ್ ಜಾಯ್ ಮ್ಹಳ್ಳ್ಯಾ ಎಕಾಚ್ಚ್ ಉದ್ದೇಶಾನ್ ಆಲಿಯಾನ್ ಇಕ್ಬಾಲ್ ಆನಿ ರಾಶಿದಾ ವಯ್ರ್ ಆಪ್ಣಾಚೆಂ ಝುಜ್ ಮಾಂಡ್ಲ್ಲೆಂ. ಹ್ಯಾ ಝುಜಾಂತ್ ತಾಕಾ ರಾಯನಾಚೊ ಸಹಾಕಾರ್ ಬರ್ಪೂರ್ ಲಾಭ್ಲ್ಲೊ ಆಸ್ತಾಂ ರಾಯನಾಚಾ ಹ್ಯಾ ಸಹಕಾರಾ ಥಾವ್ನ್ಚ್ ಆಜ್ ತಾಚ್ಯಾ ಸಾಂಗಾತಾ ರಾಮ್ ಪ್ರಸಾದ್ ಆಲಿಯಾಚಾ ತರ್ಫೆನ್ ಕೊರ್ಟಾಂತ್ ಝುಜ್ಚ್ಯಾಕ್ ತಯಾರ್ ಜಾಲ್ಲೊ. ರಾಮ್ ಪ್ರಸಾದಾಚಾ ಕಾಮಾಂತ್ ತಾಕಾ ಭರ್ವಸೊ ಜಾಲ್ಲೊ. ಹ್ಯಾ ಮಧೆಂ ಆಲಿಯಾಕ್ ರಾಮ್ ಪ್ರಸಾದ್ ಮೆಳೊಂಕ್ ಆಯಿಲ್ಲೊ.
"ತ್ಯಾ ನಾಯರಾಕ್ ಆಮಿ ತಿತ್ಲ್ಯಾ ಸುಲಾಭಾಯೆರ್ ಘೆಂವ್ಕ್ ಜಾಯ್ನಾಂ ಆಲಿಯಾ! ತೊ ಭಾರಿಚ್ಚ್ ಬುದ್ವಂತ್!"
"ಬುದ್ವಂತ್ ನ್ಹಯ್ ಚಾಲಾಕ್!" ಆಲಿಯಾ ಮಧೆಂಚ್ ಉಲಯ್ಲೆಂ.
"ಕಿತೆಂಯ್ ಜಾಂವ್ ಪುಣ್ ಆಮಿಂ ಜಾಗ್ರುತ್ ರಾವೊಂಕ್ ಪಡ್ತಾ! ಹ್ಯಾ ಕೇಸಿಚಾ ಮುಕ್ಲ್ಯಾ ಆಯ್ಕೊವ್ಣೆಂತ್ ನಾಯರ್ ಇಕ್ಬಾಲಾಚಾ ತರ್ಫೆನ್ ಸಾಕ್ಶಿ ಖಂಡಿತ್ ಪ್ರಸ್ತುತ್ ಕರ್ತಲೊ! ಪುಣ್ ತೊ ಕಸಲಿ ಸಾಕ್ಸ್ ಪ್ರಸ್ತುತ್ ಕರ್ತಾ ಮ್ಹಳ್ಳೆಂ ಹಾಂಗಾ ಸವಾಲ್!" ರಾಮ್ ಪ್ರಸಾದಾಚೊ ದುಬಾವ್ಯ್ ಸಾರ್ಕೊ ಆಸ್ಲ್ಲೊ. ತಾಣೆಂಯ್ ನಾಯರಾನ್ ಪ್ರಸ್ತುತ್ ಕರ್ಚ್ಯಾ ಸಾಕ್ಶೆ ವಿಶಿಂ ತಯಾರ್ ಜಾಂವ್ಕ್ ಆಸ್ಲ್ಲೆಂ. ತರ್ಯ್ ತೊ ವಿಶ್ವಾಸಿ ಮನಿಸ್!
ಆಲಿಯಾಕ್ ನಾಯರಾಚಿ ಭಿರಾಂತ್ ನಾತ್ಲ್ಲಿ. ಚದುರಂಗಾಚಾ ಖೆಳಾಂತ್ ರಾಣಿ ಎದೊಳ್ಚ್ ಆಲಿಯಾಚಾ ಹಾತಿಂ ಆಸ್ಲ್ಲಿ.
ಆಲಿಯಾನ್ ಕಶೆಂ ಚಿಂತ್ಲ್ಲೆಂ ತಶೆಂಚ್ ಜಾಲ್ಲೆಂ.
ದೊನ್ಯ್ ಕುಶಿಂನಿ ಇಕ್ಬಾಲ್ ಫಸ್ಲ್ಲೊ.
ಆಲಿಯಾಕ್ ಆಪ್ಲ್ಯಾ ಬುದ್ವಂತ್ಕಾಯೆ ವಯ್ರ್ ಭರ್ವಸೊ ಆಸಾ! ತ್ಯಾ ದೀಸ್ ಇಕ್ಬಾಲ್ ಪೊಲಿಸಾಂಕ್ ಸರೆಂಡರ್ ಜಾಂವ್ಚ್ಯಾ ಪಯ್ಲೆಂ ಪುರ್ತೆಂ ಏಕ್ ದೀಸ್ ಆನಿ ಏಕ್ ರಾತ್ ತಾಣೆಂ ಹ್ಯಾ ವಿಶಿಂ ಚಿಂತ್ಲಾಂ. ಇಕ್ಬಾಲಾಕ್ ಖಂಯ್ಚಾಯ್ ಕುಶಿನ್ ಬಚಾವ್ ಜಾಂವ್ಚಿ ವಾಟ್ಚ್ ಆಲಿಯಾಕ್ ಸೊಡುಂಕ್ ನಾತ್ಲ್ಲಿ. ತ್ಯಾ ಭಾಯ್ರ್ ಇಕ್ಬಾಲಾಚಾ ಹಾತಾನ್ಚ್ ಮಿಶೇಲಾಕ್ ಕಿಡ್ನಾಪ್ ಕರವ್ನ್ ಆಲಿಯಾನ್ ಇಕ್ಬಾಲಾಕ್ ಪುರ್ತೆಂ ಫಸಯಿಲ್ಲೆಂ!
ಇಕ್ಬಾಲಾನ್ ಆತಾಂ ಪೊಲಿಸಾಂಕ್ ದಿಲ್ಲೊ ಉಚಾರ್ ಬದ್ಲುಂಚಾ ಪರಿಂಚ್ ನಾತ್ಲ್ಲೊ! ಹ್ಯಾ ಕುಶಿನ್ ಮಿಶೆಲಾಕ್ ತಾಣೆಂ ಸೊಡ್ಚ್ಯಾ ಪರಿಂ ನಾತ್ಲ್ಲೆಂ. ಮಿಶೆಲಾಕ್ ಜರ್ ಭಂಧೆಂತ್ಲೆಂ ತಾಣೆಂ ಸೊಡ್ಲೆಂ ಜಾಲ್ಯಾರ್ ಇಕ್ಬಾಲ್ ದೊಡ್ಯಾನ್ ಫಸ್ತಾ. ಮಿಶೇಲಾಕ್ ತೊ ಮಾರುಂಕ್ ಸಕಾನಾ. ಜೆದ್ನಾಂ ಪಾಸೊನ್ ಮಿಶೆಲ್ ಜಿವಂತ್ ಆಸಾ ತೆದ್ನಾಂ ಪಾಸೊನ್ ತೊ ಆಪ್ಣಾಕ್ ಭೆಶ್ಟಾಂವ್ಕ್ ಸಕ್ತಾ. ಪುಣ್ ಹೆಂ ಆಲಿಯಾ! ನೆವರ್! ಹೆಂ ಆಲಿಯಾ ಕೆದ್ನಾಂಚ್ ಭಿಯೆಂವ್ಚೆಂ ಚೆಡುಂ ನ್ಹಯ್!
"ನಾ ಆಲಿಯಾ! ತುವೆಂ ತುಜ್ಯಾ ಹ್ಯಾ ಝುಜಾಂತ್ ಎಕಾ ಅಮಾಯಕ್ ಚಲಿಯೆಕ್ ಇಕ್ಬಾಲಾಚಾ ಆನಿ ರಾಶಿದಾಚಾ ವಿರುದ್ಧ್ ಗಳ್ಸಿಲಾಂಯ್! ಹೆಂ ತುವೆಂ ಸಾರ್ಕೆಂ ಕರುಂಕ್ ನಾಂಯ್ ಆಲಿಯಾ! ಉಡಾಸ್ ಕರ್.... ತುಜ್ಯಾ ಆನಿ ನಾಸಿರಾ ಮಧೆಂಯ್ ಏಕ್ ಚಲಿ ಆಯಿಲ್ಲಿ ಆನಿ ತಾಚೆ ಥಾವ್ನ್ ತುಜ್ಯಾ ಜಿವಿತಾಂತ್ ತುಂ ಎಕ್ಸುರೆಂ ಜಾಲಾಂಯ್! ಚೀಂತ್ ಆಲಿಯಾ ಚೀಂತ್!" ಆಲಿಯಾಚಿ ಮತ್ ಗುಪ್ತ್ ಉಲಯ್ತಾಲಿ.
ಮಿಶೇಲಾ ವಿಣೆಂ ರಾಯನಾಚಿ ಗತ್ ಕಿತೆಂ ಜಾಲ್ಯಾ ತೆಂ ಅಲಿಯಾನ್ ಪಳೆಲಾಂ. ಇಕ್ಬಾಲಾಚಾ ಭಂಧೆಂತ್ ಮಿಶೇಲಾಚಿ ಕಿತೆಂ ಗತ್ ಜಾತೆಲಿ ತೆಂಯ್ ಆಲಿಯಾ ಜಾಣಾಂ. ಜಾಲ್ಯಾರ್ಯ್ ಆಲಿಯಾನ್ ಆಪ್ಲ್ಯಾ ಕಾಳ್ಜಾಕ್ ಆಯ್ಕೊಂವ್ಚೆಂ ಪ್ರಯತ್ನ್ ಕೆಲೆಂ ನಾ. ಕಾಳ್ಜಾಚೆಂ ಆಯ್ಕಾಲ್ಯಾರ್ ಆಪುಣ್ ಹ್ಯಾ ಝುಜಾಂತ್ ಖಂಡಿತ್ ಜಿಕೊಂಕ್ ಸಕ್ಚಿಂ ನಾ. ಕಸಲ್ಯಾಯ್ ಪರಿಸ್ಥಿತೆ ಥಾವ್ನ್ ಪಾಶಾರ್ ಜಾವ್ನ್ ಜಾಲ್ಯಾರ್ಯ್ ಆಪ್ಣೆ ಜಿಕೊಂಕ್ಚ್ ಜಾಯ್! ಆಲಿಯಾ ಚಿಂತಾಲೆಂ.
ಇಕ್ಬಾಲಾಕ್ ಆನಿ ರಾಶಿದಾಕ್ ಲಾಚಾರ್ ಕರುಂಕ್ ಜಾಯ್! ಜಶೆಂ ಕ್ಯಾಪ್ಟನ್ ರಾಣಾಕ್ ಆನಿ ಮನೋಜ್ ಕುಮಾರಾಕ್ ಆಪ್ಣೆಂ ಲಾಚಾರ್ ಕೆಲ್ಲೆಂ! ಜಶೆಂ ನಾಸಿರಾಕ್ ಆನಿ ತಾಚ್ಯಾ ಬಾಪಾಯ್ಕ್ ಆಪ್ಣೆಂ ಲಾಚಾರ್ ಕೆಲ್ಲೆಂ! ಜಶೆಂ ನಾಸಿರಾಕ್ ಆನಿ ತಾಚ್ಯಾ ಬಾಯ್ಲೆಕ್ ಅಮೀನಾಕ್ ತಾಂಚೆಂ ಸತ್ಯಾನಾಸ್ ಕರವ್ನ್ ತಾಂಕಾ ಆಪ್ಣಾಚಾ ದಾರಾ ಪಾಸೊನ್ ವೊಡುನ್ ಹಾಡುನ್ ತಾಅಂಕಾ ಹ್ಯಾ ಮ್ಹಜ್ಯಾ ಪಾಂಯಾಮುಳಾಂತ್ ಭಿಕ್ ಮಾಗ್ಚ್ಯಾ ತಶೆಂ ಕೆಲ್ಲೆಂ! ತಶೆಂಚ್ ಹ್ಯಾ ಇಕ್ಬಾಲ್ ಆನಿ ರಾಶಿದಾಕ್ ಇತ್ಲೆಂ ಲಾಚಾರ್ ಕರುಂಕ್ ಜಾಯ್ ಕೀ ಹ್ಯಾಚ್ ಚಲಿಯೆಚ್ಯಾ ಪಾಂಯಾಂ ಮುಳಾಂತ್ ತಾಣಿಂ ಜಿವಿತಾಚೆಂ ಭಿಕ್ ಮಾಗೊಂಕ್ ಜಾಯ್! ಜಶೆಂ ತ್ಯಾ ಸಿಗ್ನಲಾರ್ ಪೊಟಾಚಾ ಭುಕೆಕ್ ಭಿಕ್ ಮಾಗ್ಚೆಂ ನೆಣ್ತೆಂ ಚೆಡುಂ ಭಿಕ್ ಮಾಗ್ತಾ ತಶೆಂ!
ಆಲಿಯಾಚಾ ದೊಳ್ಯಾಂ ಮುಕಾರ್ ತೆಂಚ್ ದ್ರಶ್ಯ್ ವ್ಹಾಳೊನ್ ಆಯ್ಲೆಂ.
ತ್ಯಾ ಸಿಗ್ನಲಾಚಾ ಖಾಂಬ್ಯಾಕ್ ದಾವ್ಯಾ ಹಾತಾತ್ ಧರುನ್ ಸಿಗ್ನಲಾಚಾ ಮುಕಾರ್ ರಾವ್ಲೆಲ್ಯಾ ವಾಹನಾಂಚಾ ಮನ್ಶ್ಯಾಂ ಥಾವ್ನ್ ಕಾಂಯ್ ತರ್ಯ್ ಆಪ್ಣಾಚಿ ಭುಕ್ ಥಾಂಬಂವ್ಕ್ ಮೆಳ್ತಾಗಾಯ್ ಮ್ಹಳ್ಳ್ಯಾ ಆಶೆನ್ ತ್ಯಾ ಸಿಗ್ನಲಾರ್ ರಾವ್ಲೆಲ್ಯಾ ವಾಹನಾಂಕ್ ಪಳಂವ್ಚೆಂ ಚೆಡುಂ!
ಹ್ಯಾ ದ್ರಶ್ಯಾ ಪಾಟ್ಲ್ಯಾನ್ ರಾಶಿದ್ ಆಪ್ಣಾಕ್ ತ್ಯಾ ಭರ್ಲ್ಲ್ಯಾ ಏರ್ಪೊರ್ಟಾಚಾ ದಾರಾರ್ ಥಾವ್ನ್ ಉಕ್ಲುನ್ ವರ್ತಾ ತಸಲೆಂ ಭೊಗಾಪ್!
ತಿತ್ಲೆಂಚ್!
ಆಲಿಯಾ ಆತಾಂ ಪಿಶೆಂ ಜಾಲೆಂ!
ಚಲಿಯೆಕ್ ಇತ್ಲ್ಯಾ ಹಲ್ಕ್ಯಾಪಣಾಂತ್ ದೆಖ್ಚ್ಯಾ ದಾದ್ಲ್ಯಾ ಸಂತತಿ ವಯ್ರ್ಚ್ ತಾಕಾ ಕಾಂಟಾಳೊ ಆಯ್ಲೊ.
"ನೆವರ್! ಹ್ಯಾ ಝುಜಾಂತ್ ಮ್ಹಾಕಾ ಮಿಶೇಲಾಕ್ ತ್ಯಾಗ್ ಕರುಂಕ್ ಪಡ್ಲ್ಯಾರ್ಯ್ ಹಾಂವ್ ಹಾಕಾ ತಯಾರ್!" ಆಲಿಯಾಚೆಂ ಮನ್ ಧಾರುಣ್ ಜಾಲೆಂ.
ಆಲಿಯಾಚೊ ಹೊಚ್ಚ್ ನಿಮಾಣೊ ನಿರ್ಧಾರ್ ಜಾಲೊ.
ಆಪ್ಲ್ಯಾ ನಿರ್ಧಾರಾಕ್ ಘೆವ್ನ್ ಆಲಿಯಾ ಮತಿಚ್ಯಾ ಶಾಂತೆಕ್ ಸೊಧುನ್ ಆಪ್ಲ್ಯಾ ಬಾಲ್ಕನಿಚೆರ್ ಆಯ್ಲೆಂ.
ಆಲಿಯಾಚೊ ಚಡ್ಚ್ ಪಸಂದೆಚೊ ಜಾಗೊ!
ತ್ಯಾ ಬಾಲ್ಕನಿಚೆರ್ ಥಾವ್ನ್ ತಾಣೆಂ ತ್ಯಾ ಮೊಳಾಬಾಕ್ ಪಳೆಲೆಂ. ತ್ಯಾ ಮೊಳಾಬಾ ವಯ್ಲ್ಯಾ ತಾರಾಂಲಾಗಿಂ ತೆಂ ಉಲಯ್ಲೆಂ. ತಾಂಕಾಂ ಪಳೆವ್ನ್ ಸಂತೊಸ್ಲೆಂ. ತಾಂಚ್ಯಾ ಸಂಸಾರಾಕ್ ಆಪುಣ್ ಏಕ್ ನೆಕೆತ್ರ್ ಜಾವ್ನ್ ಉಭೊಂಕ್ ತೆಂ ಆಶೆಲೆಂ.
ತಿತ್ಲ್ಯಾರ್!
ಆಲಿಯಾಚೆಂ ಟೆಲಿಪೋನ್ ವ್ಹಾಜೊಂಕ್ ಲಾಗ್ಲೆಂ.
"ಇಕ್ಬಾಲ್....?" ಟೆಲಿಪೋನಾಚೊ ಆವಾಜ್ ಆಯ್ಕೊನ್ಚ್ ಆಲಿಯಾನ್ ಪಾರ್ಕಿಲೆಂ. ಆಲಿಯಾನ್ ಹ್ಯಾ ದಿಸಾಂನಿ ಘೆತ್ಲೆಲೆಂ ತಾಚೆಂ ನವೆಂ ಪೋನ್ ವ್ಹಾಜ್ತಾಲೆಂ. ಹ್ಯಾ ನವ್ಯಾ ಪೋನಾಚೆಂ ನಂಬರ್ ಫಕತ್ತ್ ಇಕ್ಬಾಲಾಲಾಗಿಂ ಮಾತ್ರ್ ಆಸ್ಲ್ಲೆಂ.
ಬಾಲ್ಕನಿ ಥಾವ್ನ್ ಭಿತರ್ ಆಯಿಲ್ಲ್ಯಾ ಆಲಿಯಾನ್ ಪೋನ್ ಘೆತ್ಲೆಂ.
"ತುಜೆಂ ಪ್ಲ್ಯಾನ್ ಕಿತೆಂ ಆಲಿಯಾ.....?" ಇಕ್ಬಾಲ್ ತ್ಯಾ ಕುಶಿನ್ ಉಲಯ್ತಾಲೊ.
"ತುಕಾ ಆನಿ ತುಜ್ಯಾ ಭಾವಾಕ್ ಫಾಶಿಯೆರ್ ಚಡಂವ್ಚೆಂ!" ಆಲಿಯಾ ಮತಿಂತ್ಚ್ ಉಲಯ್ಲೆಂ.
"ಪಳೆ ಆಲಿಯಾ! ಹಾವೆಂ ತುಜೆಂ ಕಾಮ್ ಕೆಲಾಂ! ನಾಸಿರಾಕ್ ಹ್ಯಾ ಸಮಾಜೆಂತ್ ಪರ್ತ್ಯಾಕ್ ಉಟಾನಾತ್ಲ್ಲ್ಯಾ ಪರಿಂ ಹಾವೆಂ ಕೆಲಾಂ! ಆತಾಂ ತುಂ ತುವೆಂ ವೊಪ್ಲೆಲೆಂ ಕಾಮ್ ಕರ್! ಸಗ್ಳೆಂ ಹಾಂಗಾಚ್ಚ್ ಕಾಬಾರ್ ಜಾತೆಲೆಂ! ನಾ ಜಾಲ್ಯಾರ್.....?" ಆಪ್ಲ್ಯಾ ಸವಾಲಾಕ್ ಆಲಿಯಾನ್ ಕಾಂಯ್ ಜವಾಬ್ ದೀಂವ್ಕ್ ನಾತ್ಲೆಲಿ ಪಳವ್ನ್ ಇಕ್ಬಾಲ್ಚ್ ಪರ್ತ್ಯಾಕ್ ಉಲಯ್ಲೊ.
"ನಾ ಜಾಲ್ಯಾರ್.....?" ಆಲಿಯಾ ಮುಕಾರ್ ಆಯ್ಕೊಂಕ್ ಆತುರ್ ಜಾಲೆಂ.
"ತರ್ ತುಂ ತುಜೊ ಉಚಾರ್ ಪಾಟಿಂ ಕಾಡಿನಾಂಯ್.....?"
"ತುಜ್ಯಾ ಭಾವಾನ್ ಕೆಲ್ಲೊ ಉಚಾರ್ ತುಂ ಪಾಟಿಂ ಕಾಡುಂಕ್ ಸಕ್ತಾಯ್? ಮ್ಹಜ್ಯಾ ಘರಾಂತ್ ತಾಣೆಂ ಯೇವ್ನ್ ಮ್ಹಜ್ಯಾ ಹರ್ಧ್ಯಾರ್ ಪಿಸ್ತುಲ್ ದಾಂಬುನ್ ಧರ್ಲ್ಲೆಂ. ತುಂ ಜಾಣಾಂಯ್? ತೆದ್ನಾಂ ಹೆಂ ಆಲಿಯಾ ಭಿಯೆಲ್ಲೆಂ ನಾ. ಆತಾಂಯ್ ಹೆಂ ಆಲಿಯಾ ಭಿಯೆಂವ್ಚೆಂ ನಾ! ಪುಣ್, ತುಜ್ಯಾ ಗಳ್ಯಾಕ್ ಎದೊಳ್ಯ್ ದೊರಿ ಶಿರ್ಕೊಂಕ್ ನಾ. ಆನಿ ತುಕಾ ಆತಾಂಚ್ ಭಿರಾಂತ್ ಉಟ್ಲ್ಯಾ.....?" ಆಲಿಯಾಚಾ ತಾಳ್ಯಾಂತ್ ತಿರಸ್ಕಾರ್ ಆಸ್ಲ್ಲೊ.
"ತರ್ ತುವೆಂ ನಿರ್ಧಾರ್ ಕೆಲಾಯ್....?"
"ಹಾಂ!"
"ತುಂ ಜಾಣಾಂಯ್....? ಮಿಶೇಲ್ ಅಜೂನ್ ಮ್ಹಜ್ಯಾ ಹಾತಾಂತ್ ಜಿವಂತ್ ಆಸಾ!"
"ತೆಂ ಜಿವಂತ್ ಆಸ್ಲ್ಯಾರ್ಯ್ ತುಕಾಚ್ ಆಪಾಯ್! ತೆಂ ಮೆಲ್ಯಾರ್ಯ್ ತುಕಾಚ್ ಅಪಾಯ್!" ಆಲಿಯಾ ಆಪ್ಲ್ಯಾ ಉತ್ರಾಂನಿ ದ್ರಡ್ ಆಸ್ಲ್ಲೆಂ.
"ಅಚ್ಚಾ...?" ತ್ಯಾ ಕುಶಿನ್ ಥೊಡೊ ವೇಳ್ ಮೌನ್.
"ಹಾಂಗಾಸರ್ ತುಂ ಕಿತೆಂ ವಿಸ್ರಾಲ್ಲ್ಯಾ ಪರಿಂ ತುಕಾ ದಿಸಾನಾ....?" ಇಕ್ಬಾಲ್ಚ್ ಉಲಯ್ಲೊ.
"ವಿಸ್ರೊಣ್......?" ಆಲಿಯಾಕ್ ದುಬಾವ್ ಜಾಲೊ. "ಕಸಲಿ ವಿಸ್ರೊಣ್......?" ಆಲಿಯಾನ್ ಆಪ್ಲ್ಯಾ ಮತಿಕ್ ಚುರುಕ್ ಕೆಲೆಂ.
"ತುಂ ಜಾಣಾಂಯ್ ತುಜ್ಯಾ ವಿಶಿಂ ಸರ್ವ್ ಜಾಣಾಂ ಆಸ್ಲ್ಲಿ ಏಲ್ ವ್ಯಕ್ತಿ ಅಜೂನ್ ಮ್ಹಜ್ಯಾ ಹಾತಾಂತ್ ಆಸಾ ತಿ....?" ಇಕ್ಬಾಲಾಚಾ ಉತ್ರಾಂನಿ ಭಳ್ ಆಸ್ಲ್ಲೆಂ ತೆಂ ಆಲಿಯಾನ್ ಪಾರ್ಕಿಲೆಂ.
ಮ್ಹಜ್ಯೆ ವಿಶಿ ಜಾಣಾಂ ಆಸ್ಲ್ಲಿ ಏಕ್ ವ್ಯಕ್ತಿ....? ಕೋಣ್? ಆಲಿಯಾಕ್ ಸಮ್ಜಾಲೆಂ ನಾ. ಕಾಂಯ್ ಇಕ್ಬಾಲ್ ದುಸ್ರಿ ಚಾಲ್ ಪುಣಿ ಖೆಳಾನಾ?
"ಕೋಣ್....?" ಆಲಿಯಾನ್ ವಿಚಾರ್ಲೆಂ.
"ಹಾಂವ್ ಜಾಣಾಂ ಆಲಿಯಾ!" ಇಕ್ಬಾಲ್ ಆತಾಂ ಹಾಸ್ಲೊ. "ತುಕಾ ಇತ್ಲ್ಯಾ ಸುಲಾಭಾಯೆರ್ ಹಾಂವ್ ಆವ್ಕಾಸ್ ದಿತಾಂ ಮ್ಹಣೊನ್ ತುವೆಂ ಕಶೆಂ ಚಿಂತ್ಲೆಂಯ್? ಆತಾಂ ಮ್ಹಜ್ಯೆ ಲಾಗಿಂ ಫಕತ್ತ್ ಮಿಶೇಲ್ ನ್ಹಯ್ ಆಸ್ತಾಂ ಹಿ ಅನ್ಯೇಕ್ ಸಾಕ್ಸ್ ಆಸಾ! ಆತಾಂ ತರ್ಯ್ ತುಜೊ ಉಚಾರ್ ತುವೆಂ ಬದ್ಲುಂಕ್ ಜಾಯ್ ಆಲಿಯಾ! ನಾ ಜಾಲ್ಯಾರ್....?"
"ನಾ ಜಾಲ್ಯಾರ್.....?" ಆಲಿಯಾ ಕಾಳ್ಜಾಂತ್ಚ್ ಉಲಯ್ಲೆಂ. ತಾಚ್ಯಾ ಪಾಟ್ಲ್ಯಾನ್ ತ್ಯಾ ಕುಶಿನ್ ಪೋನ್ ಭಂಧ್ ಜಾಲ್ಲೊ ಆವಾಜ್.
ಆಪ್ಲ್ಯಾ ಕಾನಾಕ್ ಲಾಯಿಲ್ಲ್ಯಾ ಪೊನಾಕ್ ಸಕಯ್ಲ್ ಗಳಯಿಲ್ಲೆಂ ಆಲಿಯಾ ಆತಾಂ ಚಿಂತುಂಕ್ ಪಡ್ಲೆಂ.
ರಾಶಿದಾಲಾಗಿಂ ಆಪ್ಣಾ ವಿಶಿಂ ಜಾಣಾಂ ಜಾಲ್ಲೊ ಕೋಣ್ ಆಸಾ? ಕೋಣ್ ಅಸಾ....?
ಚಿಂತ್ಚ್ಯಾ ಆಲಿಯಾಚಾ ಮತಿಕ್ ಜಗ್ಲಾಣೆ ಮಾರ್ಲೆಲ್ಯಾ ಪರಿಂ ಜಾಲೆಂ.
"ನಾಸಿರ್.....?" ಆಲಿಯಾ ಉದ್ಗಾರ್ಲೆಂ.
ಆಲಿಯಾಕ್ ಆತಾಂ ಆಪುಣ್ ಫಸ್ಲಲೊ ಆನ್ಭೋಗ್ ಜಾಲೊ.
ನಾಸಿರಾಕ್ ಜರ್ ನಾಯರಾನ್ ಕೊರ್ಟಾಂತ್ ಹಾಜರ್ ಕೆಲೆಂ ಜಾಲ್ಯಾರ್.....? ವ್ಹಯ್! ಆಪ್ಣೆಂ ಎದೊಳ್ ಲಿಪೊನ್ ದವರ್ಲ್ಲೆಂ ಸಗ್ಳೆಂ ಹ್ಯಾ ಸಂಸಾರಾಚಾ ಮುಕಾರ್ ಯೆತೆಲೆಂ. ಸಂಸಾರಾಚಾ ಮುಕಾರ್ ಆಯ್ಲ್ಯಾರ್ಯ್ ವ್ಹಡ್ ನಾತ್ಲ್ಲೆಂ. ಪುಣ್ ರಾಯನ್.....? ರಾಯನಾಚಾ ದೊಳ್ಯಾಂ ಮುಕಾರ್ ಆಪ್ಣೆಂ ಲಿಪಯಿಲ್ಲೆಂ ಸತ್ ಉಗ್ಡಾಪೆಂ ಜಾಲೆಂ ಜಾಲ್ಯಾರ್.....? ಉಪ್ರಾಂತ್ ಹಾಂವ್ ಎಕ್ಸುರಿಂ! ರಾಯನ್ ಭಿಲ್ಕುಲ್ ರಾಮ್ ಪ್ರಸಾದಾಕ್ ಆಪ್ಣಾ ತರ್ಫೆನ್ ಝಗ್ಡೊಂಕ್ ದಿಂವ್ಚೊ ನಾ. ಬಗಾರ್, ತೊ ಮ್ಹಜೊ ದುಸ್ಮಾನ್ ಜಾತಲೊ? ತೊ ಮ್ಹಜೊ ದುಸ್ಮಾನ್ ಜಾಲ್ಯಾರ್.....? ಕಿತೆಂ ಕರ್ಯಾಂ.....?
ರಾಯನ್ ಮ್ಹಜೊ ದುಸ್ಮಾನ್ ಜಾಯ್ನಾತ್ಲ್ಲ್ಯಾ ಪರಿಂ ಹಾವೆಂ ಪಳಂವ್ಕ್ ಜಾಯ್! ತೊ ಸದಾಂಚ್ ಮ್ಹಜ್ಯಾ ಸಾಂಗಾತಾ ಆಸೊಂಕ್ ಜಾಯ್. ಆಪ್ಣಾಚೆಂ ಹೆಂ ಝುಜ್ ಕಾಬಾರ್ ಜಾತಾ ಪಾಸೊನ್ ರಾಯನ್ ಮ್ಹಜ್ಯಾ ಸಾಂಗಾತಾ ಮ್ಹಾಕಾ ಜಾಯ್! ತರ್...!
ವ್ಹಯ್! ಮಿಶೇಲ್!
ರಾಯನಾಕ್ ಹಾವೆಂ ಲಿಪಯಿಲ್ಲೆಂ ಸತ್ ಕಳಿತ್ ಜಾಂವ್ಚ್ಯಾ ಪಯ್ಲೆಂ ಇಕ್ಬಾಲಾನ್ ಲಿಪಯಿಲ್ಲ್ಯಾ ರಾಯನಾಚಾ ಜಿವಿತಾಚೆಂ ಸತ್ ಉಗ್ಡಾಪೆಂ ಕರುಂಕ್ ಜಾಯ್. ಹ್ಯಾ ವರ್ವಿಂ ರಾಯನ್ ಇಕ್ಬಾಲಾಚಾ ಜಿವಾಚೊ ದುಸ್ಮಾನ್ ಜಾಂವ್ಕ್ ಜಾಯ್! ತರ್ ಆಪ್ಣೆಂ ಆತಾಂ ಮಿಶೇಲಾಕ್ ಉಗ್ಡಾಪೆಂ ಕರುಂಕ್ ಜಾಯ್!
ಜಿವಂತ್ ನ್ಹಯ್! ಬಗಾರ್ ಮರ್ಣಾಂತ್!
ಪುಣ್ ಇಕ್ಬಾಲಾಚಾ ಭಂದಡೆ ಥಾವ್ನ್ ಮಿಶೇಲಾಕ್ ಉಗ್ಡಾಪೆಂ ಕರ್ಚೆಂ ಕಶೆಂ ಸಾದ್ಯ್....?
ಆಲಿಯಾಕ್ ಆಪ್ಲಿ ಸಲ್ವಣ್ ಆಪ್ಲ್ಯಾ ದೊಳ್ಯಾಂ ಮುಕಾರ್ ದಿಸೊನ್ ಆಯ್ಲಿ. ತೆಂ ತಶೆಂಚ್ ಕೊಸಾಳ್ಳೆಂ.
************
ಭಯಾಂದರ್-ಥಾಣಾ ರಾಜ್ ರಸ್ತೊ!
ವೊರಾಂ ರಾತಿಚಿಂ ನೋವ್ ಜಾವ್ನ್ ಪನ್ನಾಸ್ ಮಿನುಟಾಂ!
ಇಕ್ಬಾಲಾನ್ ಡ್ರೈವ್ ಕರ್ಚೆಂ ಮೆರೂನ್ ರಂಗಾಚೆಂ ಮಹೀಂದ್ರ ಸ್ಕೋರ್ಪಿಯೊ ಆಪ್ಲ್ಯಾಚ್ ವೆಗಾನ್ ರಸ್ತ್ಯಾಕ್ ಚಾಬೊನ್ ಧರುನ್ ಧಾಂವ್ತಾಲೆಂ. ಇಕ್ಬಾಲಾಚಾ ಬಗ್ಲೆಕ್ಚ್ ತಾಚ್ಯಾ ದಾವ್ಯಾ ಕುಶಿಕ್ ರಾಶಿದ್ ಮೌನ್ ಬಸೊನ್ ಆಸ್ಲ್ಲೊ.
"ಸಗ್ಳೆಂ ತುಜ್ಯೆ ಥಾವ್ನ್ ಜಾಲೆಂ ರಾಶಿದ್! ತುಂ ಜರ್ ತ್ಯಾ ಆಲಿಯಾಚಾ ಪಾಟಿಕ್ ಪಡೊಂಕ್ ನಾತ್ಲ್ಲೊಯ್ ಜಾಲ್ಯಾರ್.....!?" ಇಕ್ಬಾಲ್ ಅಪ್ಲ್ಯಾ ಭಾವಾಚೆರ್ ರಾಗಾರ್ ಜಾಲೊ.
ಭಾವಾ ಮುಕಾರ್ ಕಾಂಯ್ಚ್ ಉಲಂವ್ಚೆಂ ಧಯ್ರ್ ರಾಶಿದಾಕ್ ನಾತ್ಲ್ಲೆಂ. ತೊ ಮೌನ್ ರಾವ್ಲೊ. ತಾಕಾ ಜಾಲ್ಯಾರ್ಯ್ ಹ್ಯಾ ಆಲಿಯಾಚಾ ವಿಶಯಾಂತ್ ಮೆತೆರ್ ಜಾಂವ್ಚ್ಯಾ ಪಯ್ಲೆಂ ಹೆಂ ಆಲಿಯಾ ಅಸಲೆಂ ಚೆಡುಂ ಮ್ಹಣೊನ್ ಖಂಯ್ ಕಳಿತ್? ಚಲಿ ಮ್ಹಳ್ಯಾರ್ ಕಿತೆಂ ಮ್ಹಣೊನ್ ತಾಚ್ಯಾ ಮತಿಂತ್ ವಿಚಾರ್ ಆಸ್ಲ್ಲ್ಯಾ ಪ್ರಾಸ್ ಹೆಂ ಆಲಿಯಾ ಬೊಲ್ತೆಂಚ್ ಆಸ್ಲ್ಲೆಂ.
"ಇತ್ಲ್ಯಾ ಚೆಡ್ವಾಂಕ್ ಹಾಡುನ್ ಆಪ್ಲ್ಯಾ ಘರಾಚಾ ಸಾಲಾಂತ್ ನಾಚಯ್ಲಾಂ ಆಸ್ತಾಂ ಹೆಂ....?" ಇಕ್ಬಾಲ್ ಆಲಿಯಾಚಾ ವಿಶಿಂ ಚಿಂತಾಲೊ.
ಜಿತ್ಲೆಂ ಇಕ್ಬಾಲ್ ಆಲಿಯಾಚಾ ವಿಶಿಂ ಚಿಂತಾ ತಿತ್ಲ್ಯಾ ಚಡ್ ಮಾಫಾನ್ ಆಲಿಯಾ ಆಪ್ಲ್ಯಾ ತಕ್ಲೆಚ್ಯಾ ಬುದ್ವಂತ್ಕಾಯೆನ್ ಹುಶಾರ್ ಆಸ್ಲ್ಲೆಂ.
"ಹೆಂ ಆಲಿಯಾ ಏಕ್ ಚಲಿ ವಾ.....?" ಇಕ್ಬಾಲಾಕ್ ಆಲಿಯಾಚಾ ಚಲಿಯೆಪಣಾ ವಯ್ರ್ಚ್ ದುಬಾವ್ ಆಯ್ಲೊ. "ಚಲಿ ಜಾಲ್ಲ್ಯಾಕ್ ಇತ್ಲೆಂ ಧಯ್ರ್.....?" ಇಕ್ಬಾಲ್ ಆಪ್ಲ್ಯಾ ತಿತ್ಲ್ಯಾಕ್ ಘುಣ್ಗುಣ್ಲೊ. ತಶೆಂಚ್ ತಾಣೆಂ ಆಪ್ಲ್ಯಾ ಜಿಪಾ ವಯ್ಲ್ಯಾ ಸೆಂಟರ್ ಮಿರರಾಂತ್ ಪಳೆಲೆಂ.
ಇಕ್ಬಾಲಾಚಾ ಜಿಪಾಕ್ ಪಾಟ್ಲಾವ್ ಕರುನ್ ಯೆಂವ್ಚೆಂ ತಾಚ್ಯಾ ಗುಲಾಮಾಂನಿ ಬಸ್ಲೆಲೆಂ ಮಾರುತಿ ಒಮ್ನಿ, ತ್ಯಾ ಆರ್ಶ್ಯಾಂತ್ ತಾಚ್ಯಾ ಜಿಪಾ ಪಾಟ್ಲ್ಯಾನ್ ದಿಸೊನ್ ಯೇವ್ನ್ ತಾಕಾ ಸಮಾಧಾನ್ ಜಾಲೆಂ.
"ಭಾಯಿ.....?" ಎದೊಳ್ ಮೌನ್ ಆಸ್ಲ್ಲೊ ರಾಶಿದ್ ಆತಾಂ ಉಲಯ್ಲೊ. "ಆಮಿಂ ಹ್ಯಾ ಆಲಿಯಾ ವಯ್ರ್ ಭರ್ವಸೊ ದವರುನ್ ಕಾಂಯ್ ಫಾಯ್ದೊ ನಾ. ಮ್ಹಾಕಾ ದಿಸ್ತಾ ವಿಶು ಕುಮಾರಾಕ್ ಕೆಲ್ಲ್ಯಾ ಪರಿಂಚ್ ಹ್ಯಾ ಆಲಿಯಾಕ್ ಮಾರುನ್ ತಾಚೆಂಯ್ ಆಕ್ಸಿಡೆಂಟ್ ಮ್ಹಳ್ಳ್ಯಾ ಭಾಶೆನ್ ಕೆಲ್ಯಾರ್ ಹೆ ಪ್ರಾಬ್ಲೆಮ್ಚ್ ನಾಂತ್!" ರಾಶಿದಾನ್ ಆಪ್ಲ್ಯಾ ಭಾವಾಕ್ಚ್ ಪಳೆಲೆಂ.
ತಿತ್ಲೆಂಚ್!
ಇಕ್ಬಾಲಾಚೆಂ ತೋಂಡ್ ’ಸಟ್ಟ್’ ಕರುನ್ ಹೆವ್ಶಿಂ ಘುಂವ್ಲೆಂ.
ತಶೆಂಚ್ ಇಕ್ಬಾಲಾನ್ ಆಪ್ಲ್ಯಾ ಭಾವಾಕ್ ಪಳೆಲೆಂ.
"ವಿಶು ಕುಮಾರಾಕ್ ಮಧೆಂ ಹಾಡುನ್ ಆಲಿಯಾಕ್ ಫಸಯ್ಲ್ಯಾರ್ ಕಶೆಂ.....?" ಇಕ್ಬಾಲಾಚಾ ಮತಿಂತ್ ಸವಾಲ್ ಉದೆಲೆಂ.
"ನಾ. ಹೊ ಸಾದ್ಯ್ ನಾತ್ಲಲೊ ವಿಶಯ್!" ಇಕ್ಬಾಲಾಚಾ ಮತಿನ್ ತಾಕಾಚ್ ಜವಾಬ್ ದಿಲಿ. ಇಕ್ಬಾಲಾಚಾ ಆಕ್ಸಿಡೆಂಟಾಕ್ ಆಲಿಯಾ ಸಾಂಗಾತಾ ಸಂಭಂಧ್ ಜೊಡ್ಚ್ಯಾ ಪರಿಂ ಕೆಲ್ಯಾರ್, ವಿಶು ಕುಮಾರಾಚೆಂ ಆಕ್ಸಿಡೆಂಟಾಚೆಂ ಮರಣ್ ಮ್ಹಣೊನ್ ಎದೊಳ್ ಭಂಧ್ ಆಸ್ಲ್ಲೆಂ ಪೊಲಿಸ್ ಫೈಲ್ ಪರ್ತ್ಯಾಕ್ ಉಗ್ತೆಂ ಜಾತೆಲೆಂ. ಜರ್ ತರ್ ಪೊಲಿಸ್ ಫೈಲ್ ಉಗ್ತೆಂ ಜಾಲೆಂ ವಿಶು ಕುಮಾರಾಚಾ ಮರ್ಣಾಚೆಂ ಇನ್ವೆಸ್ಟಿಗೇಶನ್ ಚಲಯ್ತಾನಾ, ವಿಶು ಕುಮಾರಾಕ್ ಆಪ್ಣಾ ಸಾಂಗಾತಾ ಸಂಭಂಧ್ ಆಸ್ಲ್ಲೊ ವಿಶಯ್ ಭಾಯ್ರ್ ಪಡಾತ್ ಜಾಲ್ಯಾರ್ ಪೊಲಿಸಾಂಚೊ ದುಬಾವ್ ಪರ್ತ್ಯಾಕ್ ಆಪ್ಣಾ ವಯ್ರ್ಚ್ ಯೆತಾ. ಆನಿ ಆಪುಣ್ಚ್ ಹ್ಯಾ ಕೇಸಿಂತ್ ಚಡ್ ಫಸ್ತಲೊಂ. ಹ್ಯಾ ವಗ್ತಾರ್ ಹಾವೆಂ ಖಂಯ್ಚಾರ್ ಸಾಕ್ಶೆ ಸಾಂಗಾತಾ ಕಾಂಯ್ ದುರ್ವ್ಯವಹಾರ್ ಕರುಂಕ್ಯ್ ಸಾದ್ಯ್ ನಾ. ಆಶೆಂ ಕೆಲ್ಯಾರ್ ಆಲಿಯಾ ವಯ್ರ್ ಹಲ್ಲೊ ಕೆಲ್ಲೊ ತೊ ಹಾಂವ್ಚ್ ಮ್ಹಣೊನ್ ಖಂಡಿತ್ ರುಜು ಜಾತಾ. ಆಪ್ಣೆ ಪೊಲಿಸಾಂಕ್ ಸರೆಂಡರ್ ಜಾವ್ನ್ ವ್ಹಡ್ಲಿ ಚೂಕ್ ಜಾಲಿ. ಹಾವೆಂ ತೆದ್ನಾಂ ಹ್ಯಾ ಆಲಿಯಾಚಾ ಉತ್ರಾಂ ವಯ್ರ್ ಭರ್ವಸೊ ದವರುಂಕ್ ಫಾವೊ ನಾತ್ಲ್ಲೊ. ಕಶೆಂ ಕರುನ್ ಜಾಲ್ಯಾರ್ಯ್ ತ್ಯಾ ನೇಪಾಳಾಕ್ ಹಾಂವ್ ಹ್ಯಾ ರಸ್ತ್ಯಾ ವಯ್ಲ್ಯಾನ್ ಪಾವ್ಲ್ಲೊಂ ಜಾಲ್ಯಾರ್ ಬಚಾವ್ ಜಾತೊಂ. ಛೆ!. ಸಗ್ಳೆಂ ಆಲಿಯಾನ್ ಚಿಂತ್ಲೆಲ್ಯಾಪರಿಂಚ್ ಜಾಲಾಂ. ಮ್ಹಜಿ ವಾಟ್ ಚುಕವ್ನ್ ಮ್ಹಾಕಾಚ್ ಫಸವ್ನ್ ತಾಣೆಂ ತಾಚೆಂ ಕಾಮ್ ಕೆಲಾಂ. ಆತಾಂ.....?
’ಮಿಶೇಲ್!’
ಆಪ್ಣಾಕ್ಚ್ ಹಾವೆಂ ಬಚಾವ್ ಕರುಂಕ್ ಜಾಯ್ ಜಾಲ್ಯಾರ್ ಕಶೆಂ ತರ್ಯ್ ಕರುನ್ ಹ್ಯಾ ಮಿಶೇಲಾಕ್ ಆಲಿಯಾಚಾ ವಿರುದ್ಧ್ ಹಾವೆಂ ಗಳ್ಸುಂಕ್ ಜಾಯ್. ಆಲಿಯಾಚಾ ವಿರುದ್ಧ್ ಹ್ಯಾ ಮಿಶೇಲಾನ್ ಮ್ಹಜ್ಯಾ ತರ್ಫೆನ್ ಎಕ್ಚ್ ಏಕ್ ಸಾಕ್ಸ್ ದಿಲ್ಯಾರ್ಯ್ ಪಾವ್ತಾ! ಪುಣ್ ಆಶೆಂ ಎಕಾನ್ ಏಕ್ ಮಿಶೇಲಾಕ್ ಭಂಧೆಂತ್ಲೆಂ ಭಾಯ್ರ್ ಕಾಡುಂಕ್ ಸಾದ್ಯ್ ನಾ. ನಾಯರ್ ಹ್ಯಾ ವಿಶಿಂ ಕಾಂಯ್ಚ್ ನೆಣಾಂ. ಹೆಂ ಜಾಣಾಂ ಜಾಲ್ಯಾರ್ ತೊ ಘುಸ್ಪಡ್ತಲೊ. ತ್ಯಾ ಭಾಯ್ರ್ ’ಮಿಶೇಲ್’ ಕಾಂಯ್ ಸಾಧಾರಣ್ ಚಲಿ ನ್ಹಯ್! ತೆಂ ಆಲ್ಫ್ರೆಡ್ ರಾಯನಾಚೆಂ ಬಾಯ್ಲ್! ಇತ್ಲ್ಯಾ ದಿಸಾಮ್ ಥಾವ್ನ್ ತೆಂ ಭಂಧೆಂತ್ ಆಸೊನ್ ಆತಾಂ ಎಕಾಚ್ಚ್ ಫರಾ ಭಾಯ್ರ್ ಆಯ್ಲೆಂ ಮ್ಹಣ್ತಾನಾ ಪೊಲಿಸ್ ಇನ್ವೆಸ್ಟಿಗೇಶನಾಂತ್ ಮಿಶೇಲಾನ್ ಸತ್ಚ್ ಉಚಾರ್ಲ್ಯಾರ್....? ಆಪುಣ್ಚ್ ಫಸ್ತಾಂ!
ಪಯ್ಲೆಂ ನಾಯರಾನ್ ಪ್ರಸ್ತುತ್ ಕರ್ಚ್ಯಾ ಸಾಕ್ಶೆ ಥಾವ್ನ್ ಆಪ್ಣಾಕ್ ಕಿತ್ಲೊ ಲಾಭ್ ಜಾತಾ ತೆಂ ಪಳವ್ನ್ ತ್ಯಾ ಉಪ್ರಾಂತ್ ಮುಕ್ಲೆಂ ಚಿಂತ್ಲ್ಯಾರ್ ಬರೆಂ. ಪುಣ್, ಹ್ಯಾ ಪ್ರಸ್ತುತ್ ಆಪಾಯಾ ಥಾವ್ನ್ ಆಪುಣ್ ವೊಗೊ ಕಸೊ ರಾವೊಂಕ್ ಸಕ್ತಲೊ.....? ಆಪ್ಣೆಂ ಕಶೆಂ ತರ್ಯ್ ಆಪ್ಣಾಚಾ ಬಾಚಾವೆಚಿ ವಾಟ್ ಸೊಧುಂಕ್ಚ್ ಜಾಯ್!
ಜೀಪ್ ಡ್ರೈವ್ ಕರ್ಚೊ ಇಕ್ಬಾಲ್ ಜೀಪ್ ಡ್ರೈವ್ ಕರ್ತಾಂ ಕರ್ತಾಂ ತಸೊಚ್ ಚಿಂತಾಲೊ. ತಾಚ್ಯಾ ಚಿಂತ್ನಾ ಸವೆಂ ತಾಣೆಂ ಡ್ರೈವ್ ಕರ್ಚೆಂ ಜೀಪ್ ಇಕ್ಬಾಲಾಕ್ ಆಪ್ಲ್ಯಾ ಉಸ್ಕ್ಯಾರ್ ಘೆವ್ನ್ ಮುಕಾರ್ ಧಾಂವ್ತಾಲೆಂ.
ಭಯಾಂದರಾಕ್ ಎದೊಳ್ಚ್ ಪಾಟಿಂ ಸೊಡ್ಲೆಲೆಂ ಜೀಪ್ ಆತಾಂ ನಿರ್ಜನ್ ಸುವಾತೆಚಾ ರಸ್ತ್ಯಾ ವಯ್ಲ್ಯಾನ್ ಧಾಂವಾಲಾಗ್ಲೆಂ. ಉಜ್ವ್ಯಾ ಕುಶಿಂತ್ಲ್ಯಾನ್ ಹೈ ವೇ ವಯ್ಲ್ಯಾನ್ ವೇಗಾನ್ ಯೆಂವ್ಚ್ಯಾ ವಾಹನಾಂಚಾ ಹೆಡ್ ಲೈಟಾಂಚೊ ಉಜ್ವಾಡ್ ಮಾತ್ರ್ ಶಿವಾಯ್ ದುಸ್ರೆಂ ಕಾಂಯ್ಚ್ ದಿಸಾನಾತ್ಲ್ಲೆಂ. ಭಂವ್ತಿಂಚೊ ಕಾಳೊಕ್ ದಾಟೊನ್ ಯೆತಾಲೊ. ರಸ್ತ್ಯಾಚಾ ಹೆವ್ಶಿಂ ತೆವ್ಶಿಂ ಖಂಯ್ಚರ್ಯ್ ಮನ್ಶ್ಯಾಂನಿ ವಸ್ತಿ ಕರ್ಚಿ ರುಜ್ವಾತ್ ಜಾವ್ನ್ ಆಸ್ಚಿಂ ಘರಾಂ ಜಾಂವ್ ಯಾ ವೀಜ್ ದಿವೆ ಜಾಂವ್ ಕಾಂಯ್ಚ್ ನಾತ್ಲ್ಲೆ.
ತಶೆಂಚ್ ಹೈ ವೇ ವಯ್ರ್ ಧಾಂವ್ಚ್ಯಾ ಜಿಪಾಚೊ ವೇಗ್ ಉಣೊ ಜಾವ್ನ್ ಆಯ್ಲೊ. ತ್ಯಾ ಉಣ್ಯಾ ವೇಗಾನ್ ಧಾಂವ್ಲ್ಲೆಂ ಜೀಪ್ ಥೊಡೆಂಚ್ ಮುಕಾರ್ ಪಾವ್ಲ್ಯಾ ಉಪ್ರಾಂತ್ ಹೈ ವೇಕ್ ಸೊಡುನ್ ದಾವ್ಯಾ ಕುಶಿಚ್ಯಾ ಭಿತರ್ಲ್ಯಾ ರಸ್ತ್ಯಾಕ್ ಘುಂವ್ಲೆಂ. ಜಿಪಾಚೊ ವೇಗ್ ಆತಾಂ ಸಂಪೂರ್ಣ್ ಉಣೊ ಜಾಲೊ. ಪಯ್ಲೆಂಚ್ ಕಾಳೊಕ್! ತ್ಯಾ ವಯ್ರ್ ಹ್ಯಾ ರಸ್ತ್ಯಾ ವಯ್ಲ್ಯಾ ಡಾಮರಾಕ್ ಕೊಡಾಚಿ ಪಿಡಾ ಲಾಗೊನ್ ತೊ ರಸ್ತೊ ಥಂಯ್ ಹಾಂಗಾ ಹೆವ್ಶಿಂ ತೆವ್ಶಿಂ ಫೊಂಡಾಂನಿ ಭರ್ಲ್ಲೊ. ಇಕ್ಬಾಲ್ ಹ್ಯಾ ರಸ್ತ್ಯಾರ್ ಆಪ್ಲ್ಯಾ ಜಿಪಾಕ್ ಭಾರಿಚ್ಚ್ ಚತ್ರಾಯೆನ್ ಮ್ಹಳ್ಳ್ಯಾ ಪರಿಂ ಚಲಂವ್ಕ್ ಲಾಗ್ಲೊ. ತಶೆಂಚ್ ತಾಚ್ಯಾ ಪಾಟ್ಲ್ಯಾನ್ ತಾಚೊ ಪಾಟ್ಲಾವ್ ಕರುನ್ ಯೆಂವ್ಚೆಂ ಮಾರುತಿ ಒಮ್ನಿ. ಪಾಟ್ಲ್ಯಾ ಮಾರುತಿಚೆ ಹೆಡ್ ಲೈಟ್ ತ್ಯಾ ರಸ್ತ್ಯಾ ವಯ್ಲ್ಯಾ ಫೊಂಡಾಂಕ್ ಲಾಗೊನ್ ಹೆವ್ಶಿಂ ತೆಂವ್ಶಿಂ ಧಲ್ಲ್ಲ್ಯಾಪರಿಂ ಜಾತಾಲೆ. ಮಾರುತಿ ಕಾರಾಚೆ ಹೆಡ್ಲೈಟ್ ಹೆವ್ಶಿಂ ತೆವ್ಶಿಂ ಧಲ್ತಾನಾ ತ್ಯಾ ಹೆಡ್ ಲೈಟಾಂಚೊ ಉಜ್ವಾಡ್ ಇಕ್ಬಾಲಾಚಾ ಜಿಪಾಚಾ ಸೆಂಟರ್ ಮಿರರಾಂತ್ ವಯ್ರ್ ಸಕಯ್ಲ್ ಜಾವ್ನ್ ತೆ ತ್ಯಾ ಮಿರರಾಂತ್ ಖೆಳ್ತಾತ್ ತಶೆಂ ಜಾತಾಲೆಂ. ಪಾಟ್ಲ್ಯಾ ಕಾರಾಚೊ ಉಜ್ವಾಡ್ ಹ್ಯಾ ಜಿಪಾಚಾ ಸೆಂಟರ್ ಮಿರರಾಂತ್ ಖೆಳ್ತಾನಾ ತೊ ಉಜ್ವಾಡ್ ತ್ಯಾ ಸೆಂಟರ್ ಮಿರಾರಾಂತ್ ರಿಫ್ಲೆಕ್ಟ್ ಜಾವ್ನ್ ಆಪ್ಣಾಚಾ ದೊಳ್ಯಾಂಕ್ ಮಾರ್ತಾ ತಶೆಂ ಜಾವ್ನ್ ಇಕ್ಬಾಲಾನ್ ತೊ ಸೆಂಟರ್ ಮಿರಾರ್ ಥೊಡೊ ತೆವ್ಶಿಂ ಘುಂವ್ಡಾಯ್ಲೊ. ಸುಮಾರ್ ಚಾರ್ ಕಿಲೋಮೀಟರ್ ಭಿತರ್ಲ್ಯಾ ರಸ್ತ್ಯಾರ್ ಧಾಂವ್ಲ್ಲ್ಯಾ ಜಿಪಾನ್ ಆತಾಂ ತೊ ಭಿತರ್ಲೊ ಡಾಮಾರಾಚೊ ರಸ್ತೊ ಸೊಡುನ್ ಉಜ್ವ್ಯಾ ಕುಶಿಚ್ಯಾ ಮಾತ್ಯೆಚಾ ರಸ್ತ್ಯಾರ್ ಧಾಂವೊಂಕ್ ಆರಂಭ್ ಕೆಲೆಂ.
ಮಾತಿಯೆಚ್ಯಾ ಕಚ್ಚಾ ರಸ್ತ್ಯಾರ್ ಅರ್ಧೆಂ ವೋರ್ ಧಾಂವ್ಲ್ಲೆಂ ಜೀಪ್ ಆತಾಂ ಲ್ಹಾನ್ ಲ್ಹಾನ್ ದೋನ್ ಖೊಮ್ಟ್ಯಾಂಕ್ ಪಾಟಿಂ ಸೊಡುನ್ ಎಕಾ ಪರ್ನ್ಯಾ ಘರಾ ಮುಕಾರ್ ಥಾಂಬ್ಲೆಂ. ಇಕ್ಬಾಲಾಚಾ ಜಿಪಾ ಪಾಟ್ಲ್ಯಾನ್ಚ್ ಆಯಿಲ್ಲೆಂ ಮಾರುತಿ ಒಮ್ನಿ ತ್ಯಾ ಜಿಪಾ ಪಾಟ್ಲ್ಯಾನ್ಚ್ ಯೇವ್ನ್ ರಾವ್ಲೆಂ.
ಜಿಪಾರ್ ಥಾವ್ನ್ ದೆಂವ್ಲ್ಲೊ ಇಕ್ಬಾಲ್ ಸರಾಂರಾಂ ತ್ಯಾ ಘರಾಚ್ಯಾ ಕಂಪೌಂಡಾಚಿ ಪರ್ನಿ ಗೇಟ್ ಉಗ್ತಿ ಕರುನ್ ಭಿತರ್ ಸರ್ಲೊ. ತಾಚ್ಯಾ ಪಾಟ್ಲ್ಯಾನ್ ಜಿಪಾರ್ ಥಾವ್ನ್ ದೆಂವ್ಲ್ಲೊ ರಾಶಿದ್ ತ್ಯಾ ಮಾರುತಿ ಒಮ್ನಿ ಲಾಗಿಂ ಚಮ್ಕೊನ್, ತಾಚೆರ್ ಆಯಿಲ್ಯಾ ತಾಚ್ಯಾ ಮನ್ಶ್ಯಾಂ ಲಾಗಿಂ ಥೊಡೊ ಉಲಯಿಲ್ಲೊ ತೊ, ಆತಾಂ ತ್ಯಾ ಮನ್ಶ್ಯಾಂ ಸವೆಂ ತ್ಯಾ ಘರ್ಚ್ಯಾ ಕಂಪೌಂಡಾ ಭಿತರ್ ಸರ್ಲೊ.
ಘರಾಚೆಂ ದಾರ್ ಉಗ್ತೆಂ ಕರುನ್ ಘರಾಚೊ ರಾಕ್ವಲಿ ರಾಶಿದಾಚಿ ರಾಕೊನ್ ಕರ್ತಾಲೊ. ಲಾಗಿಂಚ್ ದಾಕ್ಟೆಂ ಪೋರ್ಟೇಬಲ್ ಜನರೇಟರ್ ಆವಾಜ್ ಕರುನ್ ಆಸ್ಲ್ಲೆಂ. ತೆಂ ಪೆಟ್ರೋಲಾಚೆಂ ಜನರೇಟರ್ ಜಾಲ್ಲ್ಯಾನ್ ತಾಚೊ ಆವಾಜ್ ತಿತ್ಲೊ ವ್ಹಡ್ಲೊ ನಾತ್ಲ್ಲೊ. ರಾಶಿದ್ ಆನಿ ತಾಚ್ಯಾ ಬರಾಬರ್ ಆಯಿಲ್ಲೆ ತಾಚ್ಯೆ ಸಾಂಗಾತಿ ಘರಾ ಭಿತರ್ ಪಾವ್ಲ್ಲೆಚ್ ಇಕ್ಬಾಲಾನ್ ತಾಂಕಾ ಘರ್ಚ್ಯಾ ಸಾಲಾಂತ್ಚ್ ಬಸೊಂಕ್ ಆಜ್ಞಾ ದಿಲಿ. ಆನಿ ತೊ ಭಿತರ್ ಚಮ್ಕಾಲೊ. ಆಪ್ಲ್ಯಾ ಮತಿಂತ್ ಪಿಂತ್ರಾಯಿಲ್ಲ್ಯಾ ಯೋಜನಾಕ್ ಇಕ್ಬಾಲ್ ಕಾರ್ಯಗತ್ ಕರುಂಕ್ ಆಶೆಲೊ.
ಭಿತರ್ ಆಯಿಲ್ಲ್ಯಾ ಇಕ್ಬಾಲಾನ್ ಆಪ್ಣೆ ಮಿಶೇಲಾಕ್ ಭಂಧಿ ಕರುನ್ ದವರ್ಲೆಲ್ಯಾ ಕುಡಾಚೆಂ ದಾರ್ ಉಗ್ತೆಂ ಕೆಲೆಂ.
ಎಕಾಚ್ಚ್ಫರಾ ಅಚಾನಕ್ ಆಪ್ಲ್ಯಾ ಕುಡಾಚೆಂ ದಾರ್ ಉಗ್ತೆಂ ಜಾಲ್ಲೆಂ ಪಳವ್ನ್ ತ್ಯಾ ಕೂಡಾಚಾ ಕೊನ್ಶ್ಯಾಂತ್ ಮುರ್ಗೊಟುನ್ ಬಸ್ಲೆಲೆಂ ಮಿಶೇಲ್ ಭಿಯಾನ್ ಉಡೊನ್ ಪಡ್ಲೆಂ.
ಮಿಶೇಲಾನ್ ಹ್ಯಾ ಕೂಡಾಂತ್ ಭಂಧಿ ಜಾವ್ನ್ ವೀಸ್ ದೀಸ್ ಜಾಲ್ಲೆ. ಭಾಯ್ಲ್ಯಾ ಸಂಸಾರಾಕ್ ಆನಿ ತಾಕಾ ಹ್ಯಾ ವೀಸ್ ದಿಸಾಂನಿ ಎಕಾ ಖಿಣಾಚೊ ಪಾಸೊನ್ ಸಂಭಂಧ್ ಉಬ್ಜೊಂಕ್ ನಾತ್ಲ್ಲೊ. ಆಪುಣ್ ಖಂಯ್ ಆನಿ ಕಿತ್ಯಾಕ್ ಲಾಗೊನ್ ಹಾಂಗಾ ಭಂಧಿ ಜಾವ್ನ್ ಆಸಾಂ ಮ್ಹಳ್ಳೆಂ ತಾಕಾ ಕಳ್ಲ್ಲೆಂ ನಾ ಯಾ ತಾಕಾ ಕೊಣೆಂಯ್ ಸಮ್ಜಾಯಿಲ್ಲೆಂ ನಾ. ಪುಣ್ ಆಪುಣ್ ಭಂಧಿ ಜಾಲ್ಯಾಂ ಮ್ಹಳ್ಳೆಂ ಮಾತ್ರ್ ತೆಂ ಜಾಣಾಂ.
ಹ್ಯಾ ದಿಸಾಂನಿ ತೆಂ ಸಂಪೂರ್ಣ್ ಕಂಗಾಲ್ ಜಾಲ್ಲೆಂ. ತಾಚೆಂ ರೂಪ್ಚ್ ಬದ್ಲಾಲ್ಲೆಂ. ಇಂಗ್ಲಿಶ್ ಜಾತಿಚೆಂ ಗೊರ್ಯಾ ಗೊರ್ಶ್ಯಾ ಖಾತಿಚೆಂ ಮಿಶೇಲ್ ಆತಾಂ ತಾಂಬ್ಡೆಂ ತಾಂಬ್ಡೆಂ ಜಾಲ್ಲೆಂ. ತಾಚ್ಯೆ ರಸ್ಮಾ ಜಾತಿಚೆ ಕೇಸ್ ತ್ಯಾ ಮಾಡಾಚ್ಯಾ ಧಾರ್ಬ್ಯಾ ಇರಾಂ ಪರಿಂ ಭಿಜುಡ್ಲ್ಲೆ. ದೊಳೆ ಜಡ್ ಜಾಲ್ಲೆ. ಸುಕ್ಲೆಲ್ಯಾ ತಳ್ಯಾ ಭಾಶೆನ್ ತಾಚ್ಯೆ ಪೊಲೆ ಜಿರೊನ್ ಗೆಲ್ಲೆ. ದೊಳ್ಯಾಂಚಿ ತಿ ಶಾಂತ್ ನದರ್ ಭಿಯಾನ್ ಹುಸ್ಕಾರ್ತಾಲಿ.
ಹ್ಯಾಚ್ ಭಿಯೆಲ್ಲ್ಯಾ ದೊಳ್ಯಾಂ ನದ್ರೆನ್ ಮಿಶೇಲಾನ್ ಎಕಾಚ್ಚ್ಫರಾ ಉಗ್ತೆಂ ಜಾಲ್ಲ್ಯಾ ಆಪ್ಲ್ಯಾ ಭಂಧಿ ಜಾಲ್ಲ್ಯಾ ಕುಡಾಚಾ ದಾರಾಕ್ ಪಳೆಲೆಂ. ಉಗ್ತೆಂ ಜಾಂವ್ಚ್ಯಾ ದಾರಾ ವಯ್ರ್ ತೆಂ ರಾಯನಾಕ್ ಪಳಂವ್ಕ್ ಆಶೆಲ್ಲೆಂ. ಇತ್ಲ್ಯಾ ದಿಸಾಂನಿ ಹರ್ಯೆಕ್ ಘಡಿ ಮ್ಹಳ್ಳ್ಯಾ ಪರಿಂ ರಾಯನಾಕ್ ಪಳಂವ್ಚ್ಯಾ ತಾಚ್ಯಾ ಆಶೆಕ್ ಶೆಳೆಂ ಉದಾಕ್ ವೊತುನ್ ತ್ಯಾ ದಾರಾರ್ ತೆಂ ಮಿಶೇಲಾಚಾ ಸೆವೆಕ್ ಮ್ಹಣೊನ್ ಇಕ್ಬಾಲಾನ್ ದವರ್ಲೆಲೆಂ ಕಾಮಾಚೆಂ ಬಾಯ್ಲ್ ಮಾತ್ರ್ ಹಾಜರ್ ಜಾತಾಲೆಂ ಶಿವಾಯ್ ರಾಯನಾಕ್ ತ್ಯಾ ದಾರಾರ್ ಪಳಂವ್ಚಿ ತಾಚಿ ಆಶಾ ಅಜೂನ್ಯ್ ಪೂರ್ಣ್ ಜಾಲ್ಲಿ ನಾ.
ಆಜ್ ಜಾಲ್ಯಾರ್ಯ್ ತಶೆಂಚ್! ಅಚಾನಕ್ ಉಗ್ತೆಂ ಜಾಲ್ಲ್ಯಾ ದಾರಾರ್ ರಾಯನ್ಚ್ಚ್ ಉಭೊ ಜಾಲೊ ಮ್ಹಣೊನ್ ಆಪ್ಲಿ ತಕ್ಲಿ ಉಕ್ಲುನ್ ಪಳೆಲ್ಲ್ಯಾ ಮಿಶೇಲಾಕ್ ರಾಯನಾ ಬದ್ಲಾಕ್ ಸದಾಂಚಾ ಪರಿಂ ಇಕ್ಬಾಲ್ಚ್ ದಿಸ್ಲೊ.
ಮಿಶೇಲ್ ಆಪ್ಲ್ಯಾ ಭಿಯೆಲ್ಲ್ಯಾ ದೊಳ್ಯಾಂನಿ ಇಕ್ಬಾಲಾಕ್ ಪಳೆತಾಲೆಂ ಮಾತ್ರ್ ಶಿವಾಯ್ ತೆಂ ಆಪ್ಣೆಂ ಬಸ್ಲೆಲ್ಯಾ ಜಾಗ್ಯಾರ್ ಥಾವ್ನ್ ಉಟೊಂಕ್ ಪಾಸೊನ್ ಸಕ್ಲೆಂ ನಾ. ಎದೊಳ್ಚ್ ಮಿಶೇಲಾನ್ ಸಭಾರ್ ಪಾವ್ಟಿಂ ಇಕ್ಬಾಲಾಚಾ ಪಾಂಯಾಂಕ್ ಪಡೊನ್ ಜಾಲ್ಲೆಂ. ಘರಾಂತ್ ಕಾಮ್ ಕರ್ಚ್ಯಾ ಬಾಯ್ಲೆಚೆ ಪಾಂಯ್ ಧರುನ್ ಜಾಲ್ಲೆ. ಪುಣ್ ದೊಗಾಂಯ್ಚೆಂ ಕಾಳಿಜ್ ಮಿಶೇಲಾಚಾ ರಡ್ಣ್ಯಾ ಥಾವ್ನ್ ಖಡ್ಲ್ಲೆಂ ನಾ.
ದಾರ್ ಉಗ್ತೆಂ ಕರುನ್ ಭಿತರ್ ಆಯಿಲ್ಲೊ ಇಕ್ಬಾಲ್ ತಸೊಚ್ಚ್ ಮಿಶೇಲಾಕ್ ಪಳವ್ನ್ ರಾವ್ಲೊ.
ಥೊಡೊ ವೇಳ್ ಮಿಶೇಲಾಕ್ಚ್ ಪಳವ್ನ್ ರಾವ್ಲೆಲ್ಯಾ ತಾಣೆಂ ಆಪ್ಲ್ಯಾ ಬೊಲ್ಸಾಕ್ ಹಾತ್ ಘಾಲುನ್ ತಾಂತ್ಲಿ ಸಿಗರೇಟ್ ಪ್ಯಾಕೆಟ್ ಕಾಡುನ್ ತ್ಯಾ ಪ್ಯಾಕೇಟಿಂತ್ಲಿ ಏಕ್ ಸಿಗರೇಟ್ ವೊಡುನ್ ಆಪ್ಲ್ಯಾ ವೊಂಟಾಂನಿ ಚಿಡ್ಕಾಯ್ಲಿ.
ಮಿಶೇಲ್ ಇಕ್ಬಾಲಾಕ್ಚ್ಚ್ ಪಳೆತಾಲೆಂ.
ಸಿಗರೇಟ್ ಪ್ಯಾಕೆಟ್ ಪರ್ತ್ಯಾಕ್ ಬೊಲ್ಸಾಕ್ ಲೊಟುನ್ ತಾಂತ್ಲೊ ಲೈಟರ್ ಕಾಡುನ್ ಇಕ್ಬಾಲಾನ್ ಆಪ್ಲ್ಯಾ ವೊಂಟಾನಿ ಚಿಡ್ಕಾಯಿಲ್ಲಿ ಸಿಗರೇಟ್ ಜಳಯ್ಲಿ.
"ತುಕಾ ಪಾಟಿಂ ತುಜ್ಯಾ ಘರಾಕ್ ವಚೊಂಕ್ ಜಾಯ್.....?" ಇಕ್ಬಾಲಾನ್ ಲೈಟರಾಕ್ ಆಪ್ಲ್ಯಾ ಬೊಲ್ಸಾಂತ್ ಗಳಯ್ಲೊ. ತ್ಯಾ ಸವೆಂ ಸಿಗರೇಟಿಚಾ ಪಯ್ಲ್ಯಾ ದಮ್ಮಾಕ್ ತಾಣೆಂ ಭಾಯ್ರ್ ಫುಂಕ್ಲೊ.
ಪರ್ತ್ಯಾಕ್ ತ್ಯಾ ಸಿಗರೇಟಿಕ್ ಆಪ್ಲ್ಯಾ ವೊಂಟಾಂ ಮಧೆಂ ಶಿರ್ಕಾವ್ನ್ ಇಕ್ಬಾಲಾನ್ ತ್ಯಾ ಕುಡಾಚೆಂ ದಾರ್ ದಾಂಪ್ಲೆಂ. ತೊ ಆತಾಂ ತ್ಯಾ ಮಿಶೇಲಾಚಾ ಖಾಟಿಯೆರ್ ಯೇವ್ನ್ ಬಸ್ಲೊ.
"ತುಂ ಜಾಣಾಂಯ್ ತುಕಾ ಕೊಣೆಂ ಕಿಡ್ನಾಪ್ ಕರಯ್ಲಾಂ ತೆಂ....?" ಇಕ್ಬಾಲಾನ್ ತ್ಯಾ ಖಾಟಿಯೆರ್ ಬಸ್ಲೆಲ್ಯಾ ಕಡೆನ್ ಥಾವ್ನ್ ಮಿಶೇಲಾ ವಯ್ರ್ ದೀಶ್ಟ್ ಜೊಕ್ಲಿ.
ಮಿಶೆಲಾಚಾ ಕಾಳ್ಜಾಂತ್ಲ್ಯಾ ಭಿಯಾಕ್ ಹೆಂ ಜಾಣಾಂ ಜಾಂವ್ಚಿ ಗರ್ಜ್ ನಾತ್ಲ್ಲಿ. ತೆಂ ಫಕತ್ತ್ ತಾಚ್ಯಾ ಘರಾಕ್ ಪಾಟಿಂ ವಚೊಂಕ್ ಆಶೆತಾಲೆಂ. ತಾಕಾ ಆಪ್ಲ್ಯಾ ರಾಯನಾಚಿ ರಾಕೊಣ್ ಆಸ್ಲ್ಲಿ.
"ಆಲಿಯಾ! ಆಲಿಯಾನ್ ತುಕಾ ಅಪಹರಣ್ ಕರಯ್ಲಾಂ!" ಇಕ್ಬಾಲಾನ್ ಅನ್ಯೇಕ್ ಸಿಗರೇಟಿಚೊ ಧಮ್ಮ್ ವೊಡ್ಲೊ.
ಇಕ್ಬಾಲಾಚಾ ತೊಂಡಾರ್ ಅಚಾನಕ್ ಆಲಿಯಾಚೆಂ ನಾಂವ್ ಆಯ್ಕೊನ್ ಮಿಶೇಲಾಕ್ ಆಶ್ಚರ್ಯ್ ಜಾಲೆಂ. ತಾಕಾ ಕಾಂಯ್ ಸಮ್ಜಾಲೆಂ ನಾ.
"ಆಲಿಯಾ ಮಸ್ತ್ ಚಾಲಾಕ್ ಚೆಡುಂ!" ಇಕ್ಬಾಲಾನ್ ಉಲಯ್ತಾನಾ ತಾಚ್ಯಾ ನಾಕಾ ಥಾವ್ನ್ ಸಿಗರೇಟಿಚೊ ಧುಂವರ್ ಭಾಯ್ರ್ ಯೇಂವ್ಕ್ ಲಾಗ್ಲೊ. "ತುಂ ಜಾಣಾಂಯ್ ಆಲಿಯಾ ವಯ್ರ್ ಹಲ್ಲೊ ಜಾಲ್ಲೊ ತೊ. ಕೊರ್ಟಾಂತ್ ತಾಚಿ ಕೇಸ್ ಚಲ್ತಾ. ಆಲಿಯಾನ್ ತುಕಾ ಮ್ಹಜ್ಯೆ ಥಾವ್ನ್ ಅಪಹರಣ್ ಕರವ್ನ್ ಮ್ಹಕಾ ಹ್ಯಾ ಕೇಸಿಂತ್ ಫಸಂವ್ಚೆಂ ಪ್ರಯತ್ನ್ ಕೆಲಾಂ!" ಉಲಯ್ತಾಂ ಉಲಯ್ತಾಂ ಇಕ್ಬಾಲ್ ಕಿತೆಂ ತರೀ ಚಿಂತಾ ಮ್ಹಳ್ಳ್ಯಾ ಪರಿಂ ಮಿಶೇಲಾಕ್ ದಿಸ್ಲೊ.
ಆಲಿಯಾ ವಯ್ರ್ ಇಕ್ಬಾಲಾನ್ ಹಲ್ಲೊ ಕೆಲ್ಲೊ ಜಾಲ್ಯಾರ್ ಆಲಿಯಾನ್ ಆಪ್ಣಾಚೆಂ ಅಪಹರಣ್ ಹ್ಯಾ ಇಕ್ಬಾಲಾ ಥಾವ್ನ್ ಕರವ್ನ್ ಇಕ್ಬಾಲಾಕ್ಚ್ ಕಶೆಂ ಫಸಂವ್ಚೆಂ? ಮಿಶೇಲ್ ಚಿಂತಾಲೆಂ. ಹೆಂ ತಾಚ್ಯ ಸಮ್ಜಣೆ ಭಾಯ್ರ್ ಆಸ್ಲ್ಲೆಂ. ತ್ಯಾ ಶಿವಾಯ್ ಭಿಯೆಲ್ಲ್ಯಾ ತಾಚ್ಯಾ ಮತಿಕ್ ಕೋಣ್ ಕಿತೆಂ ಉಲಯ್ತಾ ತೆಂ ಕಾಂಯ್ ಸಮ್ಜಾನಾತ್ಲ್ಲೆಂ.
"ಚಲ್ ಸೊಡ್ಯಾಂ! ಹೆಂ ತುಜ್ಯಾ ಸಮ್ಜಣೆ ಭಾಯ್ಲೆಂ! ತುಕಾ ಸಮ್ಜೊಂಚೆಂ ನಾ! ಪುಣ್ ತುಂ ಆತಾಂ ಇತ್ಲೆಂ ಉಡಾಸ್ ದವರ್ ಕೀ ತುಕಾ ಆಲಿಯಾನ್ ಅಪಹರಣ್ ಕರವ್ನ್ ಮ್ಹಾಕಾ ಫಸಯ್ಲಾಂ! ಆತಾಂ ತುಕಾ ಸುಟ್ಕಾ ದೀವ್ನ್ ಹಾಂವ್ ಆಲಿಯಾಕ್ಚ್ ಫಸಯ್ತಾಂ!" ಇಕ್ಬಾಲಾನ್ ಪರ್ತ್ಯಾಕ್ ಸಿಗರೇಟಿಚೊ ನವೊ ಧಮ್ಮ್ ವೊಡ್ಲೊ.
ಮಿಶೇಲಾಕ್ ಕಾಂಯ್ಚ್ ಸಮ್ಜಾಲೆಂ ನಾ. ತಾಕಾ ಹೆಂ ಏಕ್ ಕಸಲ್ಯಾಗೀ ಬಿಜ್ನೆಸಾಚೆಂ ಬಾರ್ಟರ್ ಡೀಲ್ ಮ್ಹಳ್ಳ್ಯಾಪರಿಂ ದಿಸ್ಲೆಂ. ಖಂಯ್? ಕೋಣ್? ಕಿತೆಂ? ಕಶೆಂ? ತೆಂ ತಾಚ್ಯಾ ಮತಿಕ್ ಗೆಲೆಂ ನಾ.
"ತುಂ ಕೊರ್ಟಾಕ್ ಯೇಂವ್ಕ್ ತಯಾರ್ ಆಸಾಯ್....?" ಸುಮಾರ್ ವೇಳ್ ಚಿಂತ್ಲ್ಲ್ಯಾ ಇಕ್ಬಾಲಾನ್ ವಿಚಾರ್ಲೆಂ. "ಕೊರ್ಟಾಂತ್ ತುವೆಂ ಫಕತ್ತ್ ಏಕ್ ಸಾಕ್ಸ್ ದೀಂವ್ಕ್ ಜಾಯ್!" ಇಕ್ಬಾಲ್ ಮಿಶೇಲಾಕ್ಚ್ ಪಳೆತಾಲೊ.
ಮಿಶೇಲ್ ಅಜೂನ್ ಮೌನ್ ಜಾಲ್ಲೆಂ.
"ಆಲಿಯಾ ವಿರೋಧ್ ಆನಿ ತುಜ್ಯಾ ಘೊವಾ ವಿರೋಧ್ ತುವೆಂ ಏಕ್ ಸಾಕ್ಸ್ ದೀವ್ನ್ ಮ್ಹಾಕಾ ಹ್ಯಾ ಭಂಧಡೆಂತ್ಲೊ ಭಾಯ್ರ್ ಕಾಡುಂಕ್ ಜಾಯ್! ಇತ್ಲೆಂಚ್!" ಇಕ್ಬಾಲಾಚಾ ತೊಂಡಾ ಥಾವ್ನ್ ಸಿಗರೇಟಿಚೊ ಧುಂವರ್ ಭಾಯ್ರ್ ಯೆತಾಲೊ.
ಇಕ್ಬಾಲಾಚಿಂ ಉತ್ರಾಂ ಆಯ್ಕೊನ್ ಮಿಶೇಲಾಚಾ ಕಾನಾಂಕ್ ಘಡ್ಗಡೊ ಮಾರ್ಲ್ಲ್ಯಾಪರಿಂ ಜಾಲೆಂ.
"ಹ್ಯಾ ವರ್ವಿಂ ಹಾಂವ್ ನಿರಫ್ರಾಧಿ ಮ್ಹಣೊನ್ ಕೊರ್ಟಾ ಥಾವ್ನ್ ಭಾಯ್ರ್ ಯೆತಲೊಂ ಆನಿ ಆಲಿಯಾಕ್ ತಾಚ್ಯಾ ಕರ್ಮಾಕ್ ತಾಕಾ ಫಾವೊ ಜಾಲ್ಲಿ ಶಿಕ್ಶಾ ಲಾಭ್ತೆಲಿ! ಹಾಚೊ ಪ್ರತಿಫಳ್ ಜಾವ್ನ್ ತುಕಾ ತುಜೆಂ ಜಿವಿತ್ ಪಾಟಿಂ ಮೆಳ್ತೆಲೆಂ!"
ಆಪ್ಣಾಚ್ಯಾ ಬಚಾವೆ ಖಾತಿರ್ ಆಪ್ಣೆ ಆಪ್ಲ್ಯಾ ಘೊವಾ ವಿರೋಧ್ ಸಾಕ್ಸ್ ದೀಂವ್ಕ್ ಜಾಯ್? ತಿಯ್ ಫಟ್ ಸಾಕ್ಸ್....? ಕಿತ್ಯಾಕ್? ಮಿಶೆಲ್ ಆಪ್ಲ್ಯಾ ಮತಿಂತ್ಚ್ ಉಲಯ್ಲೆಂ.
"ಹ್ಯಾ ವರ್ವಿಂ ತುಂ ಜಿಯೆಂವ್ಕ್ ಸಕ್ತೆಲೆಂಯ್! ನಾ ಜಾಲ್ಯಾರ್ ತುಕಾ ಹಾಂಗಾಚ್ಯಾ ಹ್ಯಾ ರಾನಾಂತ್ ಮಾರುನ್ ಉಡಂವ್ಕ್ ಮ್ಹಾಕಾ ಕಾಂಯ್ ಚಡ್ ವೇಳ್ ನಾಕಾ! ಹಾಂಗಾ ಥಾವ್ನ್ ತುಜೆಂ ಮೊಡೆಂ ಪಾಸೊನ್ ಕೊಣಾಯ್ಕ್ಯ್ ಪಳಂವ್ಕ್ ಮೆಳ್ಚೆಂ ನಾ!" ಖಾಟಿಯೆರ್ ಥಾವ್ನ್ ಉಟ್ಲ್ಲೊ ಇಕ್ಬಾಲ್ ಸವ್ಕಾಸ್ ಮಿಶೇಲಾಚಾ ಲಾಗಿಂ ಆಯ್ಲೊ. ಬೊಟಾಂ ಇಡ್ಯಾಂತ್ಲ್ಯಾ ಸಿಗರೇಟಿಕ್ ಆಪ್ಲ್ಯಾ ವೊಂಟಾರ್ ಚಡವ್ನ್ ತೊ ಮಿಶೆಲಾಚಾ ಮುಕಾರ್ ಬಸ್ಲೊ.
ಮಿಶೇಲ್ ಆತಾಂ ಪಯ್ಲೆಂಚ್ಯಾ ಪ್ರಾಸ್ ಚಡ್ ಭಿಯೆಲೆಂ. ಬಸ್ಲೆಲ್ಯಾ ಕಡೆಚ್ ತಾಣೆಂ ಆಪ್ಲ್ಯಾ ಹಾತಾಂನಿ ಆಪ್ಣಾ ತೆವ್ಶಿಂ ಬಾಂದುನ್ ಧರ್ಲೆಲ್ಯಾ ಆಪ್ಲ್ಯಾ ಪಾಂಯಾಂಕ್ ಚಡ್ ಭಳಾನ್ ಆಪ್ಣಾ ತೆವ್ಶಿಂ ವೊಡುನ್ ಧರ್ಲೆ.
"ಕಿತೆಂ ಕರುಂ? ತುಂ ಹಾಂಗಾ ಕಿತ್ಲೆಂ ಅಸಹಾಯಕ್ ಆಸಾಯ್ ತಿತ್ಲೆಂಚ್ ಆತಾಂ ಹಾಂವ್ಯ್! ತುಜ್ಯಾ ಲಾಗಿಂಯ್ ದುಸ್ರಿ ವಾಟ್ ನಾ. ಮ್ಹಜ್ಯಾ ಲಾಗಿಂಯ್ ದುಸ್ರಿ ವಾಟ್ ನಾ! ಹ್ಯಾ ಮುಂಬಯಿ ಶ್ಹೆರಾಂತ್ ಫಕತ್ತ್ ಬಿಜ್ನೆಸ್ ಮಾತ್ರ್ ಚಲ್ತಾ! ತುಜ್ಯಾ ಘೊವಾನ್ ಆಲಿಯಾಕ್ ಬಾಲಿವುಡಾಂತ್ ಹಾಡ್ತಾನಾಯ್ ಆಲಿಯಾಕ್ ಮಧೆಂ ಹಾಡುನ್ ತಾಣೆಂ ಮ್ಹಜ್ಯಾ ಸವೆಂ ಬಿಜ್ನೆಸ್ ಕೆಲ್ಲೆಂ. ತ್ಯಾ ಉಪ್ರಾಂತ್ ಆಲಿಯಾನ್ ತುಕಾ ಮಧೆಂ ಹಾಡುನ್ ಮ್ಹಜ್ಯಾ ಸಾಂಗಾತಾ ಬಿಜ್ನೆಸ್ ಕೆಲೆಂ. ಆತಾಂ ಹಾಂವ್ ತುಕಾ ಭಾಯ್ರ್ ಕಾಡುನ್ ಮ್ಹಜೆಂ ಬಿಜ್ನೆಸ್ ಕರ್ತಾಂ!"
ಇಕ್ಬಾಲ್ ಆಪ್ಣಾ ಮುಕಾರ್ ರಾವೊನ್ ಉಲಯ್ತಾನಾ ತಾಚ್ಯಾ ತೊಂಡಾಕ್ ಪಳಂವ್ಚೆಂ ಧಯ್ರ್ ಮಿಶೆಲಾಕ್ ನಾತ್ಲ್ಲೆಂ. ತಾಚಿ ನದರ್ ಬಾಗ್ವಾಲ್ಲಿ. ಸಿಗರೇಟಿಚ್ಯಾ ಧುಂವರಾನ್ ಮಿಶೇಲಾಚಾ ಶ್ವಾಸಾಕ್ ಧಾಂಬುನ್ ಧರ್ಲ್ಲೆಂ.
"ತುಂ ಚೀಂತ್ ! ಮ್ಹಾಕಾ ಕಾಂಯ್ ಅರ್ಜಂಟ್ ನಾ! ದೋನ್ ದಿಸಾಂನಿ ಮ್ಹಜ್ಯಾ ತರ್ಫೆನ್ ಹಾಂವ್ ಕೊರ್ಟಾಕ್ ಏಕ್ ಸಾಕ್ಸ್ ಪ್ರಸ್ತುತ್ ಕರ್ತಾಂ. ಜರ್ ತರ್ ತ್ಯಾ ಸಾಕ್ಶೆ ಥಾವ್ನ್ ಕಾಂಯ್ ಫಾಯ್ದೊ ಜಾಲೊ ಜಾಲ್ಯಾರ್ ಬರೆಂ ಆಸಾ. ತುಜ್ಯಾ ಸಾಕ್ಶೆಚಿ ಮ್ಹಾಕಾ ಗರ್ಜ್ ನಾ!" ಇಕ್ಬಾಲಾಚಾ ತೊಂಡಾರ್ ಹಳ್ತಾಚೊ ಹಾಸೊ ಉದೆಲ್ಯೊ. ತೊ ಆತಾಂ ಉಟೊನ್ ಉಭೊ ಜಾಲೊ.
ಮಿಶೇಲಾಚಾ ಮತಿಕ್ ಇಕ್ಬಾಲಾಚಾ ಹ್ಯಾ ಉತ್ರಾಂನಿ ಥೊಡೆಂ ಸಮಾಧಾನ್ ಜಾಲ್ಲ್ಯಾ ಪರಿಂ ಜಾಲೆಂ. ತರ್ ಆಪುಣ್ ಹ್ಯಾ ಭಂಧಡೆ ಥಾವ್ನ್ ಸುಟೊಂಕ್ ಸಕ್ತೆಲಿಂ. ಚಿಂತ್ಲೆಂ ತಾಣೆಂ.
"ತುವೆಂ ಖುಶ್ ಜಾಂವ್ಚಿ ಕಾಂಯ್ ಗರ್ಜ್ ನಾ! ಮ್ಹಾಕಾ ಗರ್ಜ್ ನಾತ್ಲೆಲ್ಯಾ ವಸ್ತುಕ್ ಹಾಂವ್ ದವರಿನಾ. ತುವೆಂ ಬಚಾವ್ ಜಾಂವ್ಕ್ ಜಾಯ್ ಜಾಲ್ಯಾರ್ ಆಜ್ ಥಾವ್ನ್ ತುಂ ಮಾಗ್ ಕೀ ಕೊರ್ಟಾಂತ್ ತುಜ್ಯಾ ಸಾಕ್ಶೆಚಿ ಗರ್ಜ್ ಪಡೊಂದಿ ಆನಿ ಹ್ಯಾ ವರ್ವಿಂ ತುಜೆಂ ಸಾಲ್ವಾಸಾಂವ್ ಜಾಂವ್ದಿಂ! ನಾ ಜಾಲ್ಯಾರ್.....?" ಇಕ್ಬಾಲ್ ಮುಕಾರ್ ಉಲಯ್ಲೊ ನಾ. ತೊ ಆತಾಂ ಮುಕ್ಲ್ಯಾ ದಾರಾ ತೆವ್ಶಿಂ ಚಮ್ಕಾಲೊ.
ದಾರಾರ್ ರಾವ್ಲ್ಲೊ ತೊ ಕಿತೆಂಗೀ ಚಿಂತ್ಲೆಲ್ಯಾ ಪರಿಂ,
"ತುಂ ಹ್ಯಾ ಆಶೆನ್ ರಾವಾನಾಕಾ ಕೀ ಪರ್ತ್ಯಾಕ್ ರಾಯನ್ ತುಕಾ ಮೆಳೊಂಕ್ ಯೆತಲೊ. ಹೆಂ ಕೆದ್ನಾಂಚ್ ಜಾಂವ್ಚೆಂ ನಾ. ತ್ಯಾ ಖಾತಿರ್ ತುಂ ಮ್ಹಜೆಂ ಕಾಮ್ ಕರ್ಚ್ಯಾ ವಿಶಿಂ ಚೀಂತ್ ಆನಿ ತುಕಾಚ್ ತುಂ ಬಚಾವ್ ಕರ್! ಮ್ಹಜ್ಯಾ ಹಾತಾಂತ್ ಥಾವ್ನ್ ತುಕಾ ಫಕತ್ತ್ ಹಾಂವ್ ಮಾತ್ರ್ ಬಚಾವ್ ಕರುಂಕ್ ಸಕ್ತಾಂ ಶಿವಾಯ್ ದುಸ್ರೆಂ ಕೊಣ್ಚ್ ನಾ! ಸಾಂಗ್ಲೆಲ್ಯಾ ಪರಿಂ ತುಂ ಏಕ್ ವಿಶಯ್ ಜಾಣಾಂಯ್.....?" ಇಕ್ಬಾಲ್ ಪರ್ತ್ಯಾಕ್ ಮಿಶೇಲಾ ತೆವ್ಶಿಂ ಚಲೊನ್ ಆಯ್ಲೊ. ಹಾತಾಂತ್ಲ್ಯಾ ಸಿಗರೇಟಿಚೊ ನಿಮಾಣೊ ಧಮ್ಮ್ ವೊಡುನ್ ಜಾವ್ನ್ ತಿ ಸಿಗರೇಟ್ ಖಂಯ್ ಉಡಂವ್ಚಿ ಮ್ಹಳ್ಳ್ಯಾ ಪರಿಂ ತೊ ಜಾಗೊ ಸೊಧಿಲಾಗ್ಲೊ. ತಾಕಾ ಖಂಯ್ಚರ್ಯ್ ಕಾಂಯ್ ದಿಸ್ಲೆಂ ನಾ. ತಶೆಂಚ್ ತ್ಯಾ ಸಿಗರೇಟಿಚೆಂ ಮುಳ್ಕುಟ್ ಥಂಯ್ಚ್ ಧರ್ಣಿರ್ ಗಳವ್ನ್ ತೆಂ ಮುಳ್ಕುಟ್ ಆಪ್ಲ್ಯಾ ಪಾಂಯಾಂನಿ ತಾಣೆಂ ಚಿರ್ಡಿಲೆಂ.
"ಮಂಗ್ಳುರಾಂತ್ ಜಾಲ್ಲ್ಯಾ ಆಕ್ಸಿಡೆಂಟಾಂತ್ ತುಜ್ಯಾ ಆಜ್ಯಾ ಆನಿ ಆಜಿಯೆಚೆಂ ಮರಣ್ ಜಾಲಾಂ! ತಾಂಕಾ ಮಾತಿಯೆಕ್ ಪಾವೊನ್ ರಾಯನ್ ಮುಂಬಯಿ ಪಾಟಿಂ ಆಯ್ಲಾ ಮಾತ್ರ್! ಮ್ಹಜ್ಯಾ ಗರ್ಜೆಕ್ ಹಾಂವ್ ಸಗ್ಳಿ ಖಬಾರ್ ದವರ್ತಾಂ!" ಉಲಯಿಲ್ಲೊ ಇಕ್ಬಾಲ್ ದಾರ್ ಉಗ್ತೆಂ ಕರುನ್ ತ್ಯಾ ದಾರಾಕ್ ’ದಡ್ಡ್’ ಕರುನ್ ಭಂಧ್ ಕರುನ್ ಭಾಯ್ರ್ ಚಲ್ಲೊ.
ತಿತ್ಲೆಂಚ್!
ಮಿಶೇಲ್ ಹ್ಯಾ ಇಕ್ಬಾಲಾಚಾ ನಿಮಾಣ್ಯಾ ಉತ್ರಾಂಕ್ ಆಯ್ಕೊನ್ ಥಂಡ್ ಜಾಲೆಂ. ತೆಂ ತಶೆಂಚ್ ಇಕ್ಬಾಲಾನ್ ಧಾಂಪುನ್ ಗೆಲ್ಲ್ಯಾ ದಾರಾಕ್ಚ್ ಪಳವ್ನ್ ರಾವ್ಲೆಂ. ತಾಚ್ಯಾ ಜಿವಾಕ್ ಜೀವ್ ದೀಂವ್ಕ್ ಗರ್ಜ್ ಆಸ್ಚ್ಯಾ ವಾರ್ಯಾಕ್ ವೊಡುಂಕ್ ತೆಂ ವಿಸ್ರಾಲೆಂ. ತ್ಯಾ ವಿಸ್ರೊಣೆ ಪಾಟ್ಲ್ಯಾನ್ ತೆಂ ಆಪ್ಣಾಕ್ಚ್ ವಿಸ್ರೊನ್ ತಾಚಾ ಮಂಗ್ಳುರಾಕ್ ಪಾವ್ಲೆಂ.
ಮಂಗ್ಳುರ್!
ತಾಣೆಂ ಆಪ್ಲೆಂ ಜಿವಿತ್ ಸಾರ್ಲೆಲೆಂ ತಾಚೆಂ ಘರ್ ತಾಚ್ಯಾ ದೊಳ್ಯಾಂ ಮುಕಾರ್ ಆಯ್ಲೆಂ. ತಾಚ್ಯಾ ಪಾಟ್ಲ್ಯಾನ್ ತಾಚೊ ಆಜೊ ಆನಿ ತಾಚಿ ಆಜಿ!
"ಮಿಶೇಲ್.....?" ಕಸಲ್ಯಾಗೀ ಗೂಂಡಾಯೆ ಥಾವ್ನ್ ಆಯ್ಕೊಂವ್ಚೊ ಉಲೊ ತಾಚ್ಯಾ ಕಾನಾಂಕ್ ಆಯ್ಕಾಲೊ.
ತಿತ್ಲೆಂಚ್!
"ಅಬಾ......?" ಮಿಶೇಲಾನ್ ತ್ಯಾ ತಾಳ್ಯಾಕ್ ಪಾರ್ಕಿಲೆಂ.
"ಅಬಾ....? ಅಬಾ....? ಅಬ...ಆ.....ಆಅ......ಆ....!" ಮಿಶೇಲಾಚಾ ತಾಳ್ಯಾ ಥಾವ್ನ್ ಬೋಬ್ ಭಾಯ್ರ್ ಪಡ್ಲಿ.
ತಿತ್ಲ್ಯಾರ್ ಪರ್ತ್ಯಾಕ್ ತ್ಯಾ ಇಕ್ಬಾಲಾಚಿಂ ಉತ್ರಾಂ ತಾಚ್ಯಾ ಕಾನಾಂಕ್ ಪಡ್ಲೆಲ್ಯಾ ಪರಿಂ ಜಾವ್ನ್ ತೆಂ ಬಸ್ಲೆಲ್ಯಾ ಕಡೆನ್ ಥಾವ್ನ್ ಉಟ್ಲೆಂ. ಇಕ್ಬಾಲ್ ಭಾಯ್ರ್ ಸರೊನ್ ಗೆಲ್ಲ್ಯಾ ದಾರಾ ತೆವ್ಶಿಂ ತಾಣೆಂ ಧಾಂವ್ ಮಾರ್ಲಿ. ಧಾಂವೊನ್ ಆಯಿಲ್ಲೆಂ ಮಿಶೇಲ್ ’ದಡ್ಡ್’ ಕರುನ್ ತ್ಯಾ ದಾರಾಕ್ ಆದಾಳ್ಳೆಂ. "ಅಬಾ....!" ದಾರಾಕ್ ಆದಾಳ್ಳೆಲ್ಯಾ ಘರ್ಶನಾಕ್ ತೆಂ ಪಿಂರ್ಗಾಲೆಂ.
"ಅಬಾ.....?" ಮಿಶೇಲಾನ್ ತ್ಯಾ ದಾರಾಕ್ ದಾಡಾಯ್ಲೆಂ. ದಾರ್ ಉಗ್ತೆಂ ಜಾಲೆಂ ನಾ. ಹ್ಯಾ ಭಂಧ್ ದಾರಾ ಭಿತರ್ ಥಾವ್ನ್ ತೆಂ ಕೊಣಾಕ್ ಉಲೊ ದಿತೆಲೆಂ.
"ಅಬಾ....?" ಮಿಶೇಲಾನ್ ಜ್ಯೋರಾನ್ ತ್ಯಾ ದಾರಕ್ ದಾಡಾಯ್ಲೆಂ ಮಾತ್ರ್ ಶಿವಾಯ್ ತೆಂ ದುಸ್ರೆಂ ಕಾಂಯ್ಚ್ ಕರುಂಕ್ ಸಕ್ಲೆಂ ನಾ.
ನೆಣ್ತೆಂ ಬಾಳ್ಶೆಂ ಆವಯ್ಚಾ ದುದಾಕ್ ಹುಸ್ಕಾರೊನ್ ಹುಸ್ಕಾರೊನ್ ರಡ್ಚ್ಯಾ ಪರಿಂ ಮಿಶೇಲ್ ರಡೊಂಕ್ ಲಾಗ್ಲೆಂ. ತಾಚೆಂ ರುದಾನ್ ಅಯ್ಕೊಂವ್ಚೆಂ ಕೊಣ್ಯ್ ನಾತ್ಲ್ಲೆಂ. ಭಂಧ್ ದಾರಾ ಭಿತರ್ಲೆಂ ತಾಚೆಂ ರಡ್ಣೆಂ ತಾಚ್ಯಾಚ್ ಕಾನಾಂಕ್ ಪ್ರತಿಧ್ವನಿತ್ ಜಾತಾಲೆಂ.
ಆಬ್ ಆನಿ ಮಾಂಯ್ ಆಪ್ಣಾಕ್ ಸೊಡುನ್ ಗೆಲಿಂ? ಮಿಶೇಲಾಚಿ ತಕ್ಲಿ ಪಿಸಾಂತುರ್ ಜಾಲಿ. ತಾಚ್ಯಾ ಆಜ್ಯಾ ಆನಿ ಆಜಿಯೆ ಶಿವಾಯ್ ಮಿಶೇಲಾಚೊ ದುಸ್ರೊ ಸಂಸಾರ್ ನಾತ್ಲ್ಲೊ. ತಾಕಾ ಆತಾಂ ತಾಚೊ ಆಜೊ ಆಜಿ ನಾತ್ಲ್ಲೊ ಸಂಸಾರ್ಚ್ ನಾಕಾ ಜಾಲೊ. ಹ್ಯಾ ಸಂಸಾರಾಕ್ ತಾಚಿಂ ಮ್ಹಳ್ಳಿಂ ಫಕತ್ತ್ ತಾಚಿಂ ಆಜಿ ಆನಿ ಆಜೊ ಮಾತ್ರ್ ಆಸ್ಲ್ಲಿಂ ಶಿವಾಯ್ ದುಸ್ರೆಂ ಕೊಣ್ಯ್ ನಾತ್ಲ್ಲೆಂ. ಆತಾಂ ತಿಂಯ್ ನಾಂತ್ ತೆಂ ಕಳೊನ್ ಮಿಶೇಲಾಚಿ ಮತ್ ತಾಚ್ಯಾ ಸ್ಥಿಮಿತಾ ಥಾವ್ನ್ ಚುಕೊನ್ ಗೆಲಿ. ಸವ್ಕಾಸ್ ತೆಂ ಸಂಸಾರಾಕ್ಚ್ ವಿಸ್ರೊನ್ ಗೆಲೆಂ.
ಹುಸ್ಕಾರೊನ್ ಹುಸ್ಕಾರೊನ್ ತೆಂ ಆತಾಂ ತಶೆಂಚ್ ತ್ಯಾ ದಾರಾ ಲಾಗಿಂ ಗಳ್ಳೆಂ. ಆಪ್ಣಾಕ್ ಕಿತೆಂ ಜಾತಾ ತೆಂ ತಾಕಾಚ್ಚ್ ಸಮ್ಜಾಲೆಂ ನಾ. ಸವ್ಕಾಸ್ ತಾಚಿ ಮತ್ ಸಂಸಾರಾಕ್ ವಿಸ್ರಾಲಿ.
ಮಿಶೆಲಾಕ್ ದೀಂವ್ಕ್ ಆಯಿಲ್ಲಿ ಖಬಾರ್ ದಿಲ್ಲೊ ಇಕ್ಬಾಲ್ ಮಿಶೇಲಾಕ್ ಭಂಧಿ ಕೆಲ್ಲ್ಯಾ ಘರಾ ಚಡ್ ವೇಳ್ ರಾವ್ಲೊ ನಾ. ತಾಕಾ ಪಾಟಿಂ ಮುಂಬಯಿ ಪಾವೊಂಕ್ ಆಸ್ಲ್ಲೆಂ. ತ್ಯಾ ಕುಶಿನ್ ಆಲಿಯಾನ್ ತಾಚಿ ನೀದ್ ಫಾರ್ಲೆಲಿ ಆಸ್ತಾಂ ತಾಚೆಂ ಫಾರಿಕ್ಪಣ್ ತಾಣೆಂ ಮಿಶೇಲಾಚಾ ನೆಣ್ತ್ಯಾಪಣಾ ವಯ್ರ್ ಘೆತ್ಲೆಂ.
ದಾರಾಲಾಗಿಂ ಗಳ್ಲ್ಲೆಂ ಮಿಶೇಲ್ ಮತಿರ್ ಆಯ್ಲೆಂ ನಾ.
ಮೊದ್ಯಾನ್ ರಾತಿಚೊ ವೇಳ್.
ಇಕ್ಬಾಲ್ ಮುಂಬಯಿಕ್ ಪಾಟಿಂ ಪರ್ತೊನ್ ಫಕತ್ತ್ ಏಕ್ ವೊರ್ ಮಾತ್ರ್ ಜಾಲ್ಲೆಂ. ಮಿಶೆಲಾಚಾ ಕುಡಾಂತ್ಲೊ ವೀಜ್ ದಿವೊ ಎದೊಳ್ಚ್ ತ್ಯಾ ಭಾಯ್ಲ್ಯಾ ಜನರೇಟರಾಚಾ ಮೌನತಾಕ್ ಸಾಂಗಾತ್ ದೀವ್ನ್ ಸ್ತಬ್ದ್ ಜಾಲ್ಲೊ. ಸಗ್ಳ್ಯಾ ಘರಾಂತ್ ಕಾಳೊಕ್ ಭರೊನ್ ಆಪ್ಲೆಂ ರಾಜ್ವಟ್ ಚಲಯ್ತಾಲೊ. ಹ್ಯಾ ಕಾಳೊಕಾಂತ್ ಮಿಶೇಲ್ ತ್ಯಾಚ್ ತೆಂ ಪಯ್ಲೆಂ ಪಡ್ಲೆಲ್ಯಾ ಜಾಗ್ಯಾರ್ ಪಡೊನ್ ಆಸ್ಲ್ಯಾಪರಿಂಚ್ ಸವ್ಕಾಸ್ ಮತಿರ್ ಯೆತಾಲೆಂ. ತಾಚ್ಯಾ ತಾಳ್ಯಾ ಥಾವ್ನ್ ಹಳ್ಟಾಚಿ ಪಿಂರ್ಗೊಣಿ ಆಯ್ಕೊನ್ ಯೆತಾಲಿ. ಸಗ್ಳ್ಯಾ ಘರಾಂತ್ ಮಿಶೇಲಾಚಿ ಭಾರೀಕ್ ಪಿಂರ್ಗೊಣೆ ಶಿವಾಯ್ ಕಾಂಯ್ಚ್ ಆವಾಜ್ ನಾ. ಹ್ಯಾಚ್ ಮಿಶೇಲಾಚಾ ಪಿಂರ್ಗೊಣೆಕ್ ಲಾಗೊನ್ ಘರಾ ಕಾಮ್ ಕರ್ಚ್ಯಾ ಬಾಯ್ಲೆಕ್ ಆನಿ ತ್ಯಾ ಘರಾಚಿ ರಾಕ್ವಲಿ ಕರ್ಚ್ಯಾ ತ್ಯಾ ದಾದ್ಲ್ಯಾಕ್ ದೊಳ್ಯಾಂಕ್ ನೀದ್ ಪಡೊಂಕ್ ನಾತ್ಲ್ಲಿ.
ಹ್ಯಾಚ್ ಆಯಿನ್ನ್ ವಗ್ತಾರ್!
ಏಕ್ ಮೆರೂನ್ ರಂಗಾಚೆಂ ಸ್ಕೋರ್ಫಿಯೊ ಜೀಪ್ ತ್ಯಾ ಪೊಂಡ್ಕುರ್ ರಸ್ತ್ಯಾ ವಯ್ಲ್ಯಾನ್ ಆಯಿಲ್ಲೆಂ ತೆಂ ಮಿಶೇಲಾಕ್ ಭಂಧ್ ಕೆಲ್ಲ್ಯಾ ಘರಾ ಮುಕಾರ್ ಥಾಂಬ್ಲೆಂ.
ಸಗ್ಳೆಂಚ್ ಇಕ್ಬಾಲಾಚಾ ಜಿಪಾ ಪರಿಂಚ್! ಪುಣ್ ಹೆಂ ಎಕ್ಧಮ್ ಬ್ರ್ಯಾಂಡ್ ನಿವ್ ಜೀಪ್!
ತೆಂ ಜೀಪ್ ಇಕ್ಬಾಲಾಚ್ಯಾ ಹ್ಯಾ ಪರ್ನ್ಯಾ ಘರಾ ಮುಕಾರ್ ಥಾಂಬ್ಲೆಂ ಮಾತ್ರ್ ಶಿವಾಯ್ ತ್ಯಾ ಜಿಪಾರ್ ಥಾವ್ನ್ ಕೊಣ್ಯ್ ಭಾಯ್ರ್ ಆಯ್ಲೊ ನಾ. ಥಾಂಬ್ಲೆಲ್ಯಾ ಜಿಪಾ ಭಿತರ್ ಕೋಣ್ ಆಸಾ ಮ್ಹಳ್ಳೆಂ ತೆಂ ಭಾಯ್ರ್ ದಿಸೊನ್ ಆಯಿಲ್ನಾಂ.
ತಿತ್ಲ್ಯಾರ್!
ಜಿಪಾಚೊ ದಾವ್ಯಾ ಕುಶಿಚೊ ಆರ್ಸೊ ಸವ್ಕಾಸ್ ಸಕಯ್ಲ್ ದೆಂವ್ಲೊ. ಪುಣ್ ಹ್ಯಾ ದಾಟ್ ಕಾಳೊಕಾನ್ ತ್ಯಾ ಜಿಪಾ ಭಿತರ್ಲ್ಯಾ ವ್ಯಕ್ತಿಕ್ ಸಾಂಗಾತ್ ದಿಂವ್ಚೊ ಸೊಡ್ಲೊ ನಾ. ಆಪ್ಲ್ಯಾ ಗರ್ಬಾಂತ್ ತಾಣೆಂ ತ್ಯಾ ಜಿಪಾ ಭಿತರ್ಲ್ಯಾ ವ್ಯಕ್ತಿಕ್ ಲಿಪೊನ್ ದವರ್ಲೊ. ಥೊಡೊ ವೇಳ್ ತಸೊಚ್ಚ್ ಪಾಶಾರ್ ಜಾಲೊ.
ತಿತ್ಲ್ಯಾರ್!
’ಟಕ್ಕ್’ ಆವಾಜಾನ್ ತ್ಯಾ ಜಿಪಾಚ್ಯಾ ದಾರಾಚೆಂ ಲಾಕ್ ಹಳ್ಟಾರ್ ಕಾಡುನ್ ತ್ಯಾ ಜಿಪಾಚೆಂ ದಾರ್ ಉಗ್ತೆಂ ಜಾಲೆಂ. ಪುಣ್ ಜಿಪಾರ್ ಥಾವ್ನ್ ಕೊಣ್ಯ್ ದೆಂವ್ಲೆಂ ನಾ.
ಥೊಡಿಂಚ್ ಖಿಣಾಂ!
ಆತಾಂ ತ್ಯಾ ಜಿಪಾಚ್ಯಾ ಉಗ್ತೆಂ ಜಾಲ್ಲ್ಯಾ ದಾರಾ ಮುಕಾಂತ್ರ್ ದೋನ್ ಪಾಂಯ್ ಸಕಯ್ಲ್ ದೆಂವ್ಲೆ.
ತಿತ್ಲೆಂಚ್!
ಸಕಯ್ಲ್ ದೆಂವ್ಲೆಲೆ ಪಾಂಯ್ ಪರ್ತ್ಯಾಕ್ ಜಿಪಾ ಭಿತರ್ ಗೆಲೆ. ತಾಚ್ಯಾ ಪಾಟ್ಲ್ಯಾನ್ ತ್ಯಾ ಜಿಪಾಚೆಂ ದಾರ್ ಭಂಧ್ ಜಾವ್ನ್ ತಾಚೊ ಆರ್ಸೊ ವಯ್ರ್ ಗೆಲೊ.
ತಾಚ್ಯಾ ಪಾಟ್ಲ್ಯಾನ್ ತ್ಯಾ ಜಿಪಾಚೆಂ ಹಾರನ್ ವ್ಹಾಜ್ಲೆಂ!
ಭಂವ್ತಣಿಚ್ಯಾ ಮೌನ್ ಪರಿಸರಾಂತ್ ಹ್ಯಾ ಜಿಪಾಚೆಂ ಹಾರನ್ ಭಯಾನಕ್ ಕಿಂಕ್ರಾಟ್ ಮ್ಹಳ್ಳ್ಯಾ ಭಾಶೆನ್ ಆಯ್ಕೊನ್ ಆಯ್ಲೆಂ. ತಾಚ್ಯಾ ಪಾಟ್ಲ್ಯಾನ್ ಸಗ್ಳೆಂಚ್ ಮೌನ್!
ಥೊಡೊಚ್ ವೇಳ್!
ತಿತ್ಲ್ಯಾರ್!
ಇಕ್ಬಾಲಾಚಾ ಘರಾಚೆಂ ದಾರ್ ಉಗ್ತೆಂ ಜಾವ್ನ್ ಎಕ್ಲೊ ದಾದ್ಲೊ ಭಾಯ್ರ್ ಆಯ್ಲೊ. ತಾಚ್ಯಾ ಹಾತಿಂ ಟಾರ್ಚ್ ಲೈಟ್ ಜಳ್ತಾಲೊ.
ಆಪ್ಲ್ಯಾ ಟಾರ್ಚಾಕ್ ತಾಣೆಂ ಆಪ್ಲ್ಯಾ ಗೇಟಿಚಾ ಮುಕಾರ್ ಧಾಂವ್ಡಾಯ್ಲೊ.
ಗೇಟಿ ಮುಕಾರ್ ಧಾಂವ್ಡಾಯಿಲ್ಲ್ಯಾ ಟಾರ್ಚಾಚಾ ಉಜ್ವಾಡಾಂತ್ ತಾಕಾ ತಾಚ್ಯಾ ಗೇಟಿ ಮುಕಾರ್ ಆಪ್ಲ್ಯಾ ಧನಿಯಾಚೆಂ ಜೀಪ್ ದಿಸೊನ್ ಯೇವ್ನ್ ತಾಣೆಂ ಮುಕಾರ್ ಕಾಂಯ್ಚ್ ಚಿಂತ್ಲೆಂ ನಾ. ತೊ ವೆವೆಗ್ಗಿಂ ಘರಾಚಿಂ ಮೆಟಾಂ ದೆಂವೊನ್ ಭಾಯ್ರ್ ಆಯಿಲ್ಲೊ ಗೇಟ್ ಉಗ್ತಿ ಕರುನ್ ಜಿಪಾಚಾ ಲಾಗಿಂ ಆಯ್ಲೊ.
ತೊ ಆತಾಂ ಜಿಪಾಚಾ ದಾರಾ ಮುಕಾರ್ ಉಭೊ ಜಾಲೊ.
ತಿತ್ಲ್ಯಾರ್!
ಸವ್ಕಾಸ್ ಜಿಪಾಚೊ ಆರ್ಸೊ ಸಕಯ್ಲ್ ದೆಂವ್ಲೊ.
ತಿತ್ಲೆಂಚ್!
ಜಿಪಾಚ್ಯಾ ಭಿತರ್ ಪಳೆಲ್ಲ್ಯಾ ತ್ಯಾ ವ್ಯಕ್ತೆಚ್ಯೊ ಆಸ್ಡ್ಯೊ ವಯ್ರ್ ಗೆಲ್ಯೊ! ಥೊಡಿಂಚ್ ಖಿಣಾಂ!
ತಿತ್ಲ್ಯಾರ್!
ಜಿಪಾಚಾ ದಾರಾ ಮುಕಾರ್ ರಾವ್ಲೆಲ್ಯಾ ತಾಚ್ಯಾ ಪೊಟಾಕ್ ಕಿತೆಂಗೀ ಆದ್ಳಾಲ್ಲೊ ತಾಕಾ ಆನ್ಭೋಗ್ ಜಾಲೊ. ತಾಣೆಂ ಆಪ್ಲಿ ನದರ್ ಸಕಯ್ಲ್ ಕೆಲಿ. ಪುಣ್ ಎದೊಳ್ಚ್ ವೇಳ್ ಉತ್ರಾಲ್ಲೊ. ’ಟುಸ್ಸ್’ ಕರುನ್ ಆಯ್ಕಾಲ್ಯಾ ಆವಾಜಾ ಸವೆಂ ತಾಚ್ಯಾ ಪೊಟಾಂತ್ ಉಜ್ಯಾಚೆಂ ಕೇಂಡ್ ರಿಗ್ಲ್ಲ್ಯಾ ಪರಿಂ ಜಾಲೆಂ.
ತಿತ್ಲೆಂಚ್!
ತಾಣೆಂ ಆಪ್ಲಿ ನದರ್ ಉಭಾರುನ್ ತ್ಯಾ ಜಿಪಾ ಭಿತರ್ಲ್ಯಾ ವ್ವ್ಯಕ್ತಿಕ್ಚ್ ಪಳೆಲೆಂ. ಪುಣ್ ತಾಣೆಂ ತಾಕಾ ವಳ್ಕೊಂಚಾ ಪಯ್ಲೆಂಚ್ ತಾಚಿ ಕೂಡ್ ವ್ಹಳೂ ಸಕಯ್ಲ್ ಗಳ್ಳಿ. ತಾಚ್ಯೆ ಪಾಟ್ಲ್ಯಾನ್ ಜಿಪಾಚೆಂ ಉಜ್ವ್ಯಾ ಕುಶಿಚೆಂ ದಾರ್ ಉಗ್ತೆಂ ಜಾವ್ನ್ ಎದೊಳ್ ತ್ಯಾ ಜಿಪಾ ಭಿತರ್ ಆಸ್ಲ್ಲಿ ತಿ ವ್ಯಕ್ತಿ ಆತಾಂ ಭಾಯ್ರ್ ದೆಂವ್ಲಿ. ತಿಚ್ಯಾ ಎಕಾ ಹಾತಿಂ ಏರ್ಗನ್ನ್ ಆಸ್ಲ್ಲೆಂ ಜಾಲ್ಯಾರ್ ದುಸ್ರ್ಯಾ ಹಾತಿಂ ಟಾರ್ಚ್ ಆಸ್ಲ್ಲೊ.
ಜಿಪಾಚೆಂ ದಾರ್ ಭಂಧ್ ಕರುನ್ ಹ್ಯಾ ಕುಶಿಕ್ ಆಯಿಲ್ಲ್ಯಾ ತಿಣೆಂ ತ್ಯಾ ಪಡ್ಲೆಲ್ಯಾ ವ್ಯಕ್ತಿಚೆಂ ಪರಿಶೀಲನ್ ಕೆಲೆಂ. ತ್ಯಾ ಉಪ್ರಾಂತ್ ತಿ ವ್ಯಕ್ತಿ ಆತಾಂ ಉಗ್ತಿ ಆಸ್ಲ್ಲ್ಯಾ ಗೇಟಿ ಮುಕಾಂತ್ರ್ ಭಿತರ್ ಸರ್ಲಿ.
ತಿತ್ಲ್ಯಾರ್ ಘರಾ ಭಿತರ್ ಥಾವ್ನ್ ಎಕಾ ಬಾಯ್ಲೆಚೊ ತಾಳೊ ಆಯ್ಕೊನ್ ಆಯ್ಲೊ.
ತಿತ್ಲೆಂಚ್!
ಘರಾಚಿಂ ಮೆಟಾಂ ಚಡ್ಚಿ ತಿ ವ್ಯಕ್ತಿ ’ಸಕ್ಕ್’ ಕರುನ್ ತ್ಯಾ ಮುಕ್ಲ್ಯಾ ದಾರಾಚಾ ಆಡೊಸಾಕ್ ರಾವ್ಲಿ. ತಿತ್ಲ್ಯಾರ್ ತಿ ಘರಾ ಭಿತರ್ಲಿ ಬಾಯ್ಲ್ ಘರ್ಚ್ಯಾ ದಾರಾರ್ ಪಾವ್ಲಿ. ಹ್ಯಾಚ್ ಘಡಿಯೆಕ್ ರಾಕೊನ್ ರಾವ್ಲೆಲ್ಯಾ ತ್ಯಾ ಆಡೊಸಾಂತ್ಲ್ಯಾ ವ್ಯಕ್ತಿನ್ ತ್ಯಾ ಬಾಯ್ಲೆಕ್ ಭಳಾನ್ ಭಿತರ್ ಲೊಟ್ಲೆಂ. ತಾಚ್ಯೆ ಪಾಟ್ಲ್ಯಾನ್ ತಾಚ್ಯಾ ಹಾತಾಂತ್ಲೊ ಟಾರ್ಚ್ ಜಳ್ಳೊ. ಜಳ್ಲ್ಲ್ಯಾ ಟಾರ್ಚ್ಯಾಂತ್ ಮುಕಾರ್ ಧರ್ಣಿರ್ ಪಡ್ಲ್ಲಿ ತಿ ಬಾಯ್ಲ್ ದಿಸ್ತಾನಾ ತ್ಯಾ ವ್ಯಕ್ತಿನ್ ವೇಳ್ ಕಾಡ್ಲೊಚ್ ನಾ. ಫಟಾಫಟ್ ದಾರ್ ದಾಂಪ್ಲೆಲ್ಯಾ ತಾಚ್ಯಾ ಹಾತಾಂತ್ಲೆಂ ಏರ್ ಗನ್ನ್ ಉಜೊ ವೊಂಕ್ಲೆಂ.
ಆತಾಂ ತಾಣೆಂ ಆಪ್ಲ್ಯಾ ಟಾರ್ಚ್ಯಾಚಾ ಉಜ್ವಾಡಾಂತ್ ಆಪ್ಲಿಂ ಸೊಧ್ನಾಂ ಆರಂಭ್ ಕೆಲಿಂ.
ವೆವೆಗ್ಗಿಂ ಸೊಧ್ಚ್ಯಾ ತಾಚ್ಯಾ ಕಾನಾಂಕ್ ಭಿತರ್ ಥಾವ್ನ್ ಕೊಣಾಚಿಗೀ ಪಿಂರ್ಗೊಣಿ ಆಯ್ಕೊನ್ ಆಯ್ಲಿ.
ತಿತ್ಲೆಂಚ್!
ಪಿಂರ್ಗೊಣಿ ಆಯ್ಕೊನ್ ಆಯಿಲ್ಲ್ಯಾ ಕುಶಿನ್ ಗೆಲ್ಲಿ ತಿ ವ್ಯಕ್ತಿ ಎಕಾ ಭಂಧ್ ಕುಡಾ ಸಾಮ್ಕಾರ್ ಉಭಿ ಜಾಲಿ.
ವ್ಹಯ್! ಭಿತರ್ ಥಾವ್ನ್ಚ್ ಪಿಂರ್ಗೊಣಿ ಆಯ್ಕೊನ್ ಯೆತಾಲಿ.
ತಾಣೆಂ ಆತಾ ವೆವೆಗ್ಗಿಂ ತ್ಯಾ ದಾರಾಚಿ ಖಿಳ್ ಕಾಡ್ಲಿ. ಉಗ್ತೆಂ ಜಾಲ್ಲ್ಯಾ ದಾರಾ ಮುಖಾಂತ್ರ್ ತಾಣೆಂ ಆಪ್ಲ್ಯಾ ಟಾರ್ಚ್ಯಾಚೊ ಉಜ್ವಾಡ್ ತ್ಯಾ ಕುಡಾ ಭಿತರ್ ಧಾಂವ್ಡಾಯ್ಲೊ.
ಆಖ್ಖ್ಯಾ ಕುಡಾ ಭಿತರ್ ತ್ಯಾ ಪಿಂರ್ಗೊಣೆಚಾ ಪಾಟ್ಲ್ಯಾನ್ ಧಾಂವ್ಲ್ಲೊ ಉಜ್ವಾಡ್ ಭಂವೊನ್ ಯೇವ್ನ್ ಅತ್ತಾಂ ದಾರ್ ಉಗ್ತೆಂ ಕೆಲ್ಲ್ಯಾ ಹ್ಯಾ ಆಗಂತುಕ್ ವ್ಯಕ್ತಿಚಾ ಥೊಡ್ಯಾಚ್ ಮುಕಾರ್ ಧರ್ಣಿರ್ ಸ್ತಬ್ದ್ ಜಾಲೊ.
"ಮಿಶೇಲ್!" ಉದ್ಗಾರ್ಲಿ ತಿ ವ್ಯಕ್ತಿ.
ಆಪ್ಣಾ ವಯ್ರ್ ಪಡ್ಲೆಲ್ಯಾ ಟಾರ್ಚ್ಯಾಚಾ ಉಜ್ವಾಡಾಕ್ ಪಳಂವ್ಕ್ ಜಾಯ್ನಾಸ್ತಾನಾ ಮಿಶೇಲಾನ್ ಆಪ್ಲ್ಯಾ ತೊಂಡಾಕ್ ಹಾತ್ ಧರ್ಲೊ. ಭಂವ್ತಣಿಚ್ಯಾ ತ್ಯಾ ದಾಟ್ ಕಾಳೊಕಾಂತ್ ಹೊ ಟಾರ್ಚ್ಯಾಚೊ ಉಜ್ವಾಡ್ ತಾಚ್ಯಾ ದೊಳ್ಯಾಂಕ್ ಕೊಂಕ್ತಾ ತಶೆಂ ಜಾಲ್ಲೊ. ಪುಣ್ ಉಗ್ತೆ ಆಸ್ಲ್ಲ್ಯಾ ತಾಚ್ಯಾ ಕಾನಾಕ್ ತ್ಯಾ ಕುಡಾಂತ್ ಆಯಿಲ್ಲ್ಯಾ ವ್ಯಕ್ತಿನ್ ಉದ್ಗಾರ್ಲೆಲೆಂ ಆಪ್ಣಾಚೆಂ ನಾಂವ್ ಪಡಾನಾಸ್ತಾನಾ ಗೆಲೆಂ ನಾ. ಮಿಶೇಲಾಕ್ ತ್ಯಾ ಕಾಳೊಕಾಂತ್ ತ್ಯಾ ತಾಚ್ಯಾ ಮುಕ್ಲ್ಯಾ ಟಾರ್ಚ್ಯಾ ಶಿವಾಯ್ ಕಾಂಯ್ಚ್ ದಿಸೊನ್ ಯೇನಾತ್ಲ್ಲೆಂ ಜಾಲ್ಯಾರ್ಯ್ ಆಪ್ಣಾಚೆಂ ನಾಂವ್ ಉದ್ಗಾರ್ಲ್ಲ್ಯಾ ತ್ಯಾ ತಾಳ್ಯಾಕ್ ತೆಂ ಪಾರ್ಕುಂಕ್ ಸಕ್ಲೆಂ.
ತೊ ತಾಳೊ ತಾಕಾ ಪರಿಚಿತ್!
ತಿತ್ಲೆಂಚ್!
ಮಿಶೇಲ್ ಆಪ್ಲ್ಯಾ ಕಾನಾಂಕ್ಚ್ ಪಾತ್ಯೆಲೆಂ ನಾ. ತಾಚೆಂ ಕಾಳಿಜ್ ದಡ್ದಡೊಂಕ್ ಲಾಗ್ಲೆಂ.
"ಆಲಿಯಾ....?!" ಮಿಶೇಲಾಚಾ ತೊಂಡಾ ಥಾವ್ನ್ ಉತಾರ್ ಸುಟ್ಲೆಂ.
ತಿತ್ಲ್ಯಾರ್!
"ಕಮಾನ್ ಮಿಶೇಲ್! ಗೆಟ್ ರೆಡಿ ಟು ಡಾಯ್!" ಆಲಿಯಾಚಿ ಉತ್ರಾಂ ಮಿಶೇಲಾಚಾ ಕಾನಾಂಕ್ ಘಡ್ಗಡ್ಯಾ ಪರಿಂ ಆದ್ಳಾಲಿಂ.
**********
ಟ್ರಾಯಲಾಚೊ ಪಂಚ್ವೀಸಾವೊ ದೀಸ್!
ಆಜ್ ಇಕ್ಬಾಲಾಕ್ ಡಿಫೆನ್ಸ್ ಜಾವ್ನ್ ನಾಯರಾನ್ ಸಾಕ್ಶಿ ಪ್ರಸ್ತುತ್ ಕರುಂಕ್ ಆಸ್ಲ್ಲೆಂ.
ಇಕ್ಬಾಲಾಕ್, ಆಪ್ಣೆ ಹ್ಯಾ ಆಲಿಯಾಚಾ ಹಲ್ಲ್ಯಾಚಾ ಕೇಸಿ ಥಾವ್ನ್ ಬಚಾವ್ ಜಾಂವ್ಚಿ ವಾಟ್ ನಾ ಮ್ಹಳ್ಳೆಂ ತೆಂ ಸ್ಪಶ್ಟ್ ಜಾಲ್ಲೆಂ. ತಾಚ್ಯಾ ಥಾಣಾಂತ್ಲ್ಯಾ ಪರ್ನ್ಯಾ ಘರಾ ಥಾವ್ನ್ ಮಿಶೇಲ್ ಮಾಯಾಗ್ ಜಾಲ್ಲೆಂ. ತ್ಯಾ ಘರಾಂತ್ ಫಕತ್ತ್ ಎಕ್ಲ್ಯಾಚೆಂ ಮೊಡೆಂ ಮಾತ್ರ್ ಮೆಳ್ಲ್ಲೆಂ ಶಿವಾಯ್ ಮಿಶೇಲಾಚಿ ಆನಿ ತ್ಯಾ ಕಾಮಾಚಾ ಬಾಯ್ಲೆಚಿ ಕಾಂಯ್ ಖಬಾರ್ ನಾತ್ಲ್ಲಿ. ಹೆಂ ಕೊಣೆಂ ಆನಿ ಕಶೆಂ ಕೆಲಾಂ ತೆಂ ಇಕ್ಬಾಲಾಕ್ ಸಮ್ಜಾಲೆಂ ನಾ.
ಕಾಂಯ್ ಆಪ್ಲ್ಯಾಚ್ ಕಾಮಾಚ್ಯಾ ಬಾಯ್ಲೆನ್? ಛೇ! ಹೆಂ ಕಶೆಂ ಸಾದ್ಯ್? ಕಾಮಾಚ್ಯಾ ಬಾಯ್ಲೆಕ್ ಆನಿ ಮಿಶೇಲಾಕ್ ಕಾಂಯ್ ಸಂಭಂಧ್ಚ್ ನಾತ್ಲ್ಲೊ. ತಶೆಂಯ್ ಸಂಭಂಧ್ ಆಸ್ಲ್ಯಾರ್ಯ್ ಆಪ್ಲ್ಯಾ ಘೊವಾಕ್ಚ್ ಮಾರುನ್ ತಿ ಮಿಶೆಲಾಕ್ ಘೆವ್ನ್ ಧಾಂವೊಂಕ್ ಸಕ್ತಾ....? ಇಕ್ಬಾಲಾಕ್ ಕಾಂಯ್ಚ್ ಸಮ್ಜಾನಾತ್ಲ್ಲೆಂ.
ಆಪ್ಲ್ಯಾ ಹಾತಾಂತ್ಲೆಂ ಮಿಶೇಲ್ ಆತಾಂ ನಾಂ ಮ್ಹಳ್ಯಾ ಉಪ್ರಾಂತ್ ಇಕ್ಬಾಲಾಚೊ ಭರ್ವಸೊ ಆತಾಂ ಫಕತ್ತ್ ನಾಯರಾ ವಯ್ರ್ ಆಸ್ಲ್ಲೊ. ಆಪ್ಣಾಕ್ ಆನಿ ವಾಂಚಯ್ಲ್ಯಾರ್ ಫಕತ್ತ್ ನಾಯರಾನ್ ಮಾತ್ರ್! ಹೊ ಭರ್ವಸೊ ನಾಯರಾನ್ ಆಜ್ ಕೊರ್ಟಾಂತ್ ಪ್ರಸ್ತುತ್ ಕರ್ಚ್ಯಾ ಹ್ಯಾ ಕೇಸಿಂತ್ಲ್ಯಾ ಪ್ರಭಾವ್ಶಾಲಿ ಸಾಕ್ಶೆ ವಯ್ರ್ ಹೊಂದೊನ್ ಆಸ್ಲ್ಲೊ.
ಥಾಣಾಂತ್ಲ್ಯಾ ಇಕ್ಬಾಲಾಚಾ ಘರಾ ಥಾವ್ನ್ ಮಾಯಾಗ್ ಜಾಲ್ಲ್ಯಾ ಮಿಶೇಲಾಚಿ ಕಾಂಯ್ಚ್ ಖಬಾರ್ ನಾತ್ಲ್ಲಿ. ಮಿಶೇಲಾಚೆಂ ಮೊಡೆಂ ಮೆಳೊಂಕ್ ನಾತ್ಲ್ಲೆಂ. ಮಿಶೇಲ್ ರಾಯನಾಚಾ ಘರಾ ಪಾಟಿಂ ಪರ್ತಾಲ್ಲೆಂ ನಾ. ಕೊಣಾಕ್ಚ್ ಮಿಶೇಲಾಚಿ ಖಬಾರ್ ಮೆಳ್ಳಿ ನಾ. ಇಕ್ಬಾಲಾನ್ಯ್ ಪೊಲಿಸಾಂಕ್ ಆಪ್ಲ್ಯಾ ಘರಾ ಮಿಶೇಲ್ ಕಯ್ದ್ ಆಸ್ಲ್ಲಿ ಖಬಾರ್ ತಿಳ್ಸಿಲಿ ನಾ. ಕೊಣಾಯ್ಕ್ಯ್ ಮಿಶೇಲ್ ಇಕ್ಬಾಲಾಚ್ಯಾ ಭಂಧೆಂತ್ ಹ್ಯಾ ಘರಾಂತ್ ಆಸ್ಲ್ಲೆಂ ಮ್ಹಣೊನ್ ಸಾಂಗೊಂಕ್ ಆವ್ಕಾಸ್ಚ್ ನಾತ್ಲ್ಲೊ. ಹೆಂ ಇಕ್ಬಾಲಾಚಾ ಫಾಯ್ದ್ಯಾಚೆಂ ಜಾಲೆಂ ಜಾಲ್ಯಾರ್ ಮಿಶೇಲ್ ಆಪ್ಲ್ಯಾ ಭಂಧಡೆ ಥಾವ್ನ್ ಮಾಯಾಗ್ ಜಾಲ್ಲೆಂ ತೆಂ ಇಕ್ಬಾಲಾಚಾ ಭಳಾಕ್ ಧರ್ಣಿಕ್ ಶೆವ್ಟಾಂವ್ಕ್ ಕಾರಾಣ್ ಜಾಲ್ಲೆಂ.
ಮಿಶೇಲ್ ಖಂಯ್ ಆನಿ ಕಶೆಂ ಆಪ್ಲ್ಯಾ ಭಂಧಡೆ ಥಾವ್ನ್ ಸುಟೊನ್ ಧಾಂವ್ಲೆಂ? ತೆಂ ಆಪುಣ್ ಧಾಂವ್ಲಾಂ ವಾ ತಾಕಾ ಕೊಣೆಂಯ್ ಧಾಂವ್ಡಾಯ್ಲಾ? ಆಪ್ಣಾಚೆಂ ಕಾಮಾಚೆಂ ಬಾಯ್ಲ್ ಖಂಯ್ ಗೆಲೆಂ? ಇಕ್ಬಾಲಾಕ್ ಸಮ್ಜೊಂಕ್ ಕಶ್ಟ್ ಮಾರ್ಲೆ.
ಆಪ್ಲ್ಯಾ ಭಂಧೆಂತ್ಲ್ಯಾ ಘರಾಂತ್ ಎಕ್ಲ್ಯಾಚಿ ಖುನ್ ಕರುನ್ ಮಿಶೇಲ್ ಪೊಳಾಪಳ್ ಘೆಂವ್ಕ್ ಸಕ್ತಾ? ಇಕ್ಬಾಲಾಕ್ ದುಬಾವ್ ಮಾರ್ಲೊ.
ಮಿಶೇಲ್ ಧಾವ್ಲಾಂ ಜಾಲ್ಯಾರ್ ಖಂಯ್ ಧಾಂವ್ಲಾ? ರಾಯನಾಕ್ ತೆಂ ಮೆಳೊಂಕ್ ನಾ! ತರ್ ಮಿಶೇಲಾಚೆಂ ಕಿತೆಂ ಜಾಲಾಂ?ಇಕ್ಬಾಲಾನ್ ಫಕತ್ತ್ ಚಿಂತುನ್ ದೀಸ್ ಕಾಡ್ಲೆ ಶಿವಾಯ್ ಹ್ಯಾ ವಿಶಯಾಕ್ ತಾಣೆಂ ಕೊಣಾಯ್ ಲಾಗಿಂ ಉಗ್ಡಾಪೊ ಕೆಲೊ ನಾ. ಆಲಿಯಾಕ್ ಪಾಸೊನ್ ತಾಣೆಂ ಹ್ಯಾ ವಿಶಯಾಂತ್ ವಿಚಾರ್ಲೆಂ ನಾ. ಮಿಶೇಲ್ ಆಪ್ಣಾಚ್ಯಾ ಭಂಧಡೆ ಥಾವ್ನ್ ಧಾಂವ್ಲಾಂ ಮ್ಹಳ್ಳೆಂ ತೆಂ ಆಲಿಯಾಕ್ ಕಳಿತ್ ಜಾಲೆಂ ಜಾಲ್ಯಾರ್ ಹೆಂ ಆಲಿಯಾಚೆಂಚ್ ಜಯ್ತ್ ಮ್ಹಳ್ಳೆಂ ಇಕ್ಬಾಲ್ ಬರ್ಯಾನ್ ಜಾಣಾ. ಹ್ಯಾಚ್ ಖಾತಿರ್ ತಾಣೆಂ ಹೊ ಮಿಶೇಲಾಚೊ ವಿಶಯ್ ತಿತ್ಲ್ಯಾರ್ಚ್ ಲಿಪೊನ್ ದವರ್ಲೊ. ಆನಿ ತಾಚ್ಯಾ ಮುಕ್ಲಾ ಸಾಕ್ಶೆ ವಿಶಿಂ ತೊ ಚಿಂತುಂಕ್ ತಯಾರ್ ಜಾಲೊ.
ಇಕ್ಬಾಲಾಚಾ ಖುಶೆ ಪರ್ಮಾಣೆಂಚ್ ನಾಯರಾನ್ ಮುಕ್ಲ್ಯಾ ಸಾಕ್ಶೆಕ್ ತಯಾರ್ ಕೆಲ್ಲೆಂ.
ಆಜ್ ಪರ್ತ್ಯಾಕ್ ಟ್ರಾಯಲ್ ಆರಂಭ್ ಜಾಲೆಂ
"ತುಜೆಂ ನಾಂವ್......?"
"ನಾಸಿರ್ ಸುಲೇಮಾನ್!"
"ತುಕಾ ಆನಿ ಆಲಿಯಾಕ್ ಕಾಂಯ್ ಸಂಭಂಧ್....?"
"ದೋನ್ ವರ್ಸಾಂ ಪಯ್ಲೆಂ ಆಮ್ಚೆಂ ನಿಖಾ ಜಾಲ್ಲೆಂ!"
ತಿತ್ಲೆಂಚ್!
ನಾಸಿರಾಚಾ ಜವಾಬೆನ್ ನಾಯರಾಚೆಂ ತೋಂಡ್ ಉಗ್ತೆಂ ಜಾಲೆಂ. ತೊ ಆಶ್ಚರ್ಯ್ಭರಿತ್ ನದ್ರೆನ್ ನಾಸಿರಾಕ್ ಪಳಂವ್ಕ್ ಲಾಗ್ಲೊ.
ಜಡ್ಜ್ ಆಪ್ಲ್ಯಾ ಬಸ್ಕೆರ್ ನೀಟ್ ಜಾಲೊ.
ಕೋರ್ಟ್ ರುಮಾಂತ್ ಗುಸು ಗುಸು! ಸರ್ವಾಂಕ್ಯ್ ಆಶ್ಚರ್ಯ್! ಬಾಲಿವುಡಾಂತ್ಲ್ಯಾ ಮಿಸ್ ಆಲಿಯಾ ಖಾನಾಕ್ ನಿಖಾ ಜಾಲಾಂ? ತೆಂಯ್ ದೋನ್ ವರ್ಸಾಂ ಪಯ್ಲೆಂ? ಕೊಣಾಯ್ಕ್ಯ್ ಪಾತ್ಯೆಂವ್ಕ್ ಜಾಲೆಂ ನಾ. ರಾಮ್ ಪ್ರಸಾದಾನ್ ಆಲಿಯಾ ತೆವ್ಶಿಂ ಘುಂವೊನ್ ಪಳೆಲೆಂ. ಪುಣ್ ಆಲಿಯಾ ಮಾತ್ರ್ ಶಾಂತ್ ಬಸೊನ್ ಆಸ್ಲ್ಲೆಂ. ತಾಣೆಂ ಫಕತ್ತ್ ಏಕ್ ಪಾವ್ಟಿಂ ರಾಮ್ ಪ್ರಸಾದಾ ವಯ್ರ್ ದೀಶ್ಟ್ ಜೊಕ್ಲಿ ಆನಿ ಪರ್ತ್ಯಾಕ್ ತೆಂ ಮುಕಾರ್ ಪಳಂವ್ಕ್ ಲಾಗ್ಲೆಂ. ಹಾಚ್ಯಾ ಪಾಟ್ಲ್ಯಾನ್ ಸಭಾರ್ ಸತಾಂ ಭಾಯ್ರ್ ಪಡ್ತೆಲಿಂ ಮ್ಹಣೊನ್ ತೆಂ ಜಾಣಾಂ. ಹ್ಯಾಚ್ ಜಾಣ್ವಾಯೆನ್ ತೆಂ ಆಜ್ ಕೋರ್ಟ್ ರುಮಾಕ್ ಹಾಜರ್ ಜಾಂವ್ಚ್ಯಾ ಪಯ್ಲೆಂ ಸಂಪೂರ್ಣ್ ತಯಾರಾಯೆಂತ್ ಹಾಜರ್ ಜಾಲ್ಲೆಂ.
"ಪುಣ್ ಹಾವೆಂ ಆಯ್ಕಲಾಂ ಕೀ ತುಜೆಂ ಬಾಯ್ಲ್ ಏಕ್ ಲಾಯರ್ ಮ್ಹಣೊನ್! ಆಮಿ ತುಜ್ಯಾ ಬಾಯ್ಲೆಚಿ ಖಬಾರ್ ಉಲಯ್ನಾಂವ್ ಮಿಸ್ಟರ್ ನಾಸಿರ್. ಆಮಿ ಹ್ಯಾ ಮಿಸ್ ಆಲಿಯಾ ಖಾನಾಚಾ ಹಲ್ಲ್ಯಾ ವಿಶಿಂ ಉಲಯ್ತಾಂವ್! ಹೆಂ ಆಲಿಯಾ ಖಾನ್ ಲಾಯರ್ ನ್ಹಯ್! ಹೆಂ ಬಾಲಿವುಡಾಚೆಂ ಸ್ಟಾರ್!"
"ಹಾಂವ್ಯ್ ಹ್ಯಾಚ್ ಮಿಸ್ ಆಲಿಯಾ ಖಾನಾ ವಿಶಿಂ ಉಲಯ್ತಾಂ! ಹೆಂ ದೋನ್ ವರ್ಸಾಂ ಪಯ್ಲೆಂ ಮ್ಹಜೆಂ ಬಾಯ್ಲ್ ಜಾವ್ನ್ ಆಸ್ಲ್ಲೆಂ! ಆತಾಂ ಆಮ್ಕಾಂ ಡೈವರ್ಸ್ ಜಾಲಾಂ!"
"ತುಮ್ಚ್ಯಾ ದೊಗಾಂಯ್ಚೆಂ ನಿಖಾ ಜಾಲ್ಲ್ಯಾಚೆಂ ಯಾ ಡೈವರ್ಸ್ ಜಾಲ್ಲ್ಯಾಚೆಂ ಕಾಂಯ್ ಪ್ರೂಪ್ ಆಸಾ......?"
"ವ್ಹಯ್!" ನಾಸಿರಾನ್ ಆಪ್ಲ್ಯಾ ಬೊಲ್ಸಾಕ್ ಹಾತ್ ಘಾಲುನ್ ತಾಚ್ಯಾ ಆನಿ ಆಲಿಯಾಚಾ ನಿಖಾ ಜಾಲ್ಲ್ಯಾಚಿ ತಸ್ವೀರ್ ಕಾಡುನ್ ನಾಯರಾಚಾ ಹಾತಿಕ್ ದಿಲಿ. ನಾಯರಾನ್ ತಿ ತಸ್ವೀರ್ ಪಳೆವ್ನ್ ತ್ಯಾ ತಸ್ವೀರೆಕ್ ವರುನ್ ಕೊರ್ಟಾಚಾ ಕ್ಲಾರ್ಕಾಚಾ ಹಾತಿಂತ್ ದಿತಾನಾ ಕ್ಲಾರ್ಕಾನ್ ತಿ ತಸ್ವೀರ್ ಜಡ್ಜಾಕ್ ಪಾವಿತ್ ಕೆಲಿ.
"ತರ್ ಆತಾಂ ಹೆಂ ಸಾಂಗ್ ಮಿಸ್ಟರ್ ನಾಸಿರ್.... ತುಮ್ಚೆಂ ಡೈವರ್ಸ್ ಕಿತ್ಯಾಕ್ ಜಾಲೆಂ?"
"ಆಲಿಯಾಕ್ ಮ್ಹಜ್ಯಾ ಫ್ಯಾಮಿಲಿ ಸವೆಂ ಫ್ಯಾಮಿಲಿ ಲೈಫ್ ಜಿಯೆಂವ್ಕ್ ಖುಶಿ ನಾತ್ಲ್ಲಿ. ತೆಂ ಕಿತೆಂ ಆಶೆತಾ ತೆಂ ಕೊಣಾಯ್ಕ್ಯ್ ಕಳಿತ್ ಜಾಯ್ನಾತ್ಲ್ಲೆಂ. ತೆಂ ಕೊಣಾಯ್ಲಾಗಿಂ ಉಲಯ್ನಾತ್ಲ್ಲೆಂ. ತಾಣೆಂಚ್ ಚಿಂತ್ಲ್ಲ್ಯಾಪರಿಂ ಜಾಂವ್ಕ್ ಜಾಯ್ ಆಸ್ಲ್ಲೆಂ. ತಾಚೆಂ ವರ್ತನ್ಯ್ ತಶೆಂಚ್ ಜಶೆಂ ಸೈಕಿ ಮ್ಹಳ್ಳ್ಯಾ ಪರಿಂ! ಶಿ ಇಸ್ ಎ ಬೋರ್ನ್ ಸೈಕಿ ಗರ್ಲ್!"
"ರಿಯಲ್ಲೀ.....? ಹೆಂ ತುಂ ರುಜು ಕರುಂಕ್ ಸಕ್ತಾಯ್?"
"ಖಂಡಿತ್! ಆಲಿಯಾಚಾ ಹ್ಯಾಚ್ ಸ್ವಭಾವಾಕ್ ಲಾಗೊನ್ ಆಮ್ಕಾಂ ಆಮ್ಚೆಂ ಘರ್ ಸೊಡ್ಚೆಂ ಪಡ್ಲೆಂ. ತೆಂ ಆಪ್ಣಾಚೆಂ ಬಾಯ್ಲ್ ಮ್ಹಣ್ತಾನಾ ಹಾವೆಂ ತಾಕಾ ಸಾಂಗಾತ್ ದೀಂವ್ಚೊಚ್ ಪಡ್ಲೊ. ಆಲಿಯಾಕ್ ಏರ್ಹೊಸ್ಟೆಸಾಚಾ ಕಾಮಾಕ್ ವೆಚಿ ಗರ್ಜ್ ನಾತ್ಲ್ಲಿ. ಜಾಲ್ಯಾರ್ಯ್ ತೆಂ ಗೆಲೆಂ. ಏಕ್ ದೀಸ್ ಪ್ಲೈಟಾರ್ ರಾಶಿದಾ ಸವೆಂ ಝಗ್ಡೊನ್ ಆಯ್ಲೆಂ."
"ತರ್ ಆಲಿಯಾ ಬಾಲಿವುಡಾಕ್ ಯೆಂವ್ಚ್ಯಾ ಪಯ್ಲೆಂ ಏರ್ಹೊಸ್ಟೆಸ್ ಜಾವ್ನ್ ಆಸ್ಲ್ಲೆಂ....?"
"ವ್ಹಯ್!"
"ಹೆಂ ಮ್ಹಾಕಾ ಪಾತ್ಯೆಂವ್ಕ್ ಜಾಯ್ನಾಂ ಮಿಸ್ಟರ್ ನಾಸಿರ್! ತುಜ್ಯಾ ತಸಲ್ಯಾ ಬಿಜ್ನೆಸ್ಮ್ಯಾನಾಚೆಂ ಬಾಯ್ಲ್ ಏಕ್ ಏರ್ಹೊಸ್ಟೆಸ್ ಜಾವ್ನ್ ಕಾಮ್ ಕರ್ತಾಲೆಂ...? ತುಂ ಜಾಣಾಂಯ್ ತುಂ ಸಾರ್ಕೊ ಉಲಯ್ತಾಯ್ ಮ್ಹಳ್ಳೆಂ ತೆಂ......?"
"ವ್ಹಯ್!"
"ತುವೆಂ ಆತ್ತಾಂ ಸಾಂಗ್ಲೆಂಯ್ ಕೀ ಆಲಿಯಾ ಎಕಾ ದಿಸಾ ರಾಶಿದಾಲಾಗಿಂ ಝಗ್ಡೊನ್ ಆಯ್ಲೆಂ. ತುವೆಂ ಸಾಂಗ್ಚ್ಯಾ ಪರ್ಮಾಣೆಂ ಹೆಂಯ್ ಸಾರ್ಕೆಂ....?"
"ವ್ಹಯ್!"
"ಆಲಿಯಾ ಪ್ಲೈಟಾರ್ ಝಗ್ಡೊನ್ ಆಯಿಲ್ಲೊ ರಾಶಿದ್ ಕಾಂಯ್ ಹೊಚ್ಚ್ ಇಕ್ಬಾಲಾಚೊ ಭಾವ್ ರಾಶಿದ್ ನ್ಹಯ್?"
"ವ್ಹಯ್....! ಹೊಚ್ಚ್ ತೊ ರಾಶಿದ್!"
"ಥ್ಯಾಂಕ್ ಯು ಮಿಸ್ಟರ್ ನಾಸಿರ್!"
"ಯುವರ್ ಹಾನರ್! ಹೆಂ ಆಲಿಯಾ ಖಾನ್ ತಾಚ್ಯಾ ಜಲ್ಮಾ ಥಾವ್ನ್ ಏಕ್ ಸೈಕಿ ಚೆಡುಂ. ತಾಣೆಂ ತಾಚ್ಯಾಚ್ ಕುಟ್ಮಾ ಸವೆಂ, ತಾಚ್ಯಾಚ್ ಭಾಂವ್ಡಾಂ ಸವೆಂ ತಾಚೆ ಸಂಭಂಧ್ ಬರೆ ದವರುಂಕ್ ನಾಂತ್. ನಿಖಾ ಕರುನ್ ದಿಲ್ಲ್ಯಾ ಘರಾಕ್ ಪಾಸೊನ್ ತೆಂ ಮಾಂದುನ್ ರಾವ್ಲೆಂ ನಾ. ರಾಶಿದಾ ಸವೆಂ ಪ್ಲೈಟಾರ್ ಜಾಲ್ಲ್ಯಾ ಝಗ್ಡ್ಯಾಚೆಂ ಹಗೆಂ ತಿರ್ಸುಂಚಾ ಖಾತಿರ್ ಆಲಿಯಾನ್ ಹೆಂ ಆಪ್ಲ್ಯಾಚ್ ಮರ್ಡರಾಚೆಂ ಪ್ಲ್ಯಾನ್ ಕೆಲ್ಲೆಂ. ಹೆಂ ಫಕತ್ತ್ ಇಕ್ಬಾಲಾಕ್ ಆನಿ ರಾಶಿದಾಕ್ ಫಸಂವ್ಚೆಂ ಪ್ರಯತ್ನ್ ಶಿವಾಯ್ ಹ್ಯಾ ಮಿಸ್ತೆರಾಂತ್ ಇಕ್ಬಾಲ್ ಜಾಂವ್ ರಾಶಿದ್ ಜಾಂವ್ ಮೆತೆರ್ ನಾಂತ್! ಆಲಿಯಾಚಾ ಘೊವಾನ್ಚ್ ಸಾಂಗ್ಲೆಲ್ಯಾ ಪರಿಂ ತೆಂ ಕಿತ್ಲೆಂ ಸೈಕಿ ಚೆಡುಂ ಮ್ಹಳ್ಳೆಂ ತೆಂ ಹಾಂಗಾ ಸ್ಪಶ್ಟ್ ಜಾತಾ. ಹೊ ಆಲಿಯಾಚೊ ಫಕತ್ತ್ ಏಕ್ ಖೆಳ್ ಶಿವಾಯ್ ದುಸ್ರೆಂ ಕಾಂಯ್ ನಾ ಯುವರ್ ಹಾನರ್!"
"ದೇಟ್ಸಾಲ್ ಯುವರ್ ಹಾನರ್!"
"ಯುವರ್ ವಿಟ್ನೆಸ್!"
ಕೊರ್ಟ್ ರುಮಾಚಾ ಪ್ರಾಸಿಕ್ಯೂಟರಾನಿಂ ಬಸ್ಚ್ಯಾ ಪಾಟ್ಲ್ಯಾ ಬಾಂಕಾರ್ ಬಸೊನ್ ಸಾಕ್ಶಿದಾರಾಕ್ ಆಯ್ಕೊಂಚಾ ಆಲಿಯಾಕ್ ಆಪ್ಲ್ಯಾ ಸಲ್ವಣೆಚೊ ಆನ್ಭೋಗ್ ಪಯ್ಲೊಚ್ ಜಾಲ್ಲೊ. ರಾಯನಾ ವಯ್ರ್ ತಾಣೆಂ ದವರ್ಲ್ಲೊ ಭರ್ವಸೊ ಉಭೊನ್ ಧಾಂವ್ಲ್ಲೊ. ಪುಣ್ ಆತಾಂ ಹೆಂ ಬಹಿರಂಗ್ಪಣಿಂ ಕೊರ್ಟಾಂತ್ ರುಜು ಜಾಲ್ಲೆಂ. ಆಪ್ಣಾಚ್ಯಾ ವಿಶ್ಯಾಂತ್ ಜಾಣಾಂ ಜಾಲ್ಯಾ ಉಪ್ರಾಂತ್ ರಾಯನ್ ಖಂಡಿತ್ ಆಪ್ಣಾಕ್ ಕುಮಕ್ ಕರ್ಚೊ ಮನಿಸ್ ನ್ಹಯ್ ಮ್ಹಳ್ಳೆಂ ಆಲಿಯಾ ಜಾಣಾಂ. ರಾಮ್ ಪ್ರಸಾದ್ ರಾಯನಾಚೊ ಮನಿಸ್! ರಾಯನ್ ಕಸೊ ಸಾಂಗ್ತಾ ತಶೆಂ ರಾಮ್ ಪ್ರಸಾದ್ ಆಯ್ಕಾತಾ ಜಾಲ್ಲ್ಯಾನ್ ಹ್ಯಾ ಉಪ್ರಾಂತ್ ರಾಮ್ ಪ್ರಸಾದಾಚೊ ಸಾಂಗಾತ್ ಆಪ್ಣಾ ಸವೆಂ ಆಸ್ತಲೊ ಮ್ಹಳ್ಳೆಂ ಆಲಿಯಾಕ್ ದುಬಾವಾಚೆಂ ಜಾಲೆಂ.
ಆಲಿಯಾನ್ ರಾಮ್ ಪ್ರಸಾದಾ ಲಾಗಿಂ ಕೋರ್ಟ್ ರುಮಾಂತ್ ಕಾಂಯ್ ಉಲಂವ್ಚ್ಯಾ ಪರಿಂ ನಾತ್ಲ್ಲೆಂ. ಪುಣ್ ರಾಮ್ ಪ್ರಸಾದಾನ್ ಆತಾಂ ಆಲಿಯಾಚಾ ತರ್ಫೆನ್ ಝಗ್ಡೊಂಕ್ ಆಸ್ಲ್ಲೆಂ. ತೊ ಆತಾಂ ಉಟೊನ್ ಉಭೊ ಜಾಲೊ. ತಾಕಾ ಆಲಿಯಾನ್ ಆಪ್ಲ್ಯಾ ಹ್ಯಾ ಆದ್ಲ್ಯಾ ಘೊವಾ ವಿಶಿಂ ಸಾಂಗ್ಲ್ಲೆಂ ನಾ. ಹೊ ವಿಶಯ್ ತಾಣೆಂ ಕಿತ್ಯಾಕ್ ಲಿಪವ್ನ್ ದವರ್ಲೊ ತೆಂ ವಿಚಾರುಂಕ್ ಹೊ ಆಯಿನ್ನ್ ವೇಳ್ ನ್ಹಯ್! ಚಿಂತ್ಲ್ಲೊ ರಾಮ್ ಪ್ರಸಾದ್ ಎಕ್ ಪಾವ್ಟಿಂ ಆಲಿಯಾಚಾ ಕುಶಿನ್ ಘೊಂವ್ಲೊ. ಥೊಡಿಂ ಕ್ಷಣಾಂ ತಾಣೆಂ ಆಲಿಯಾಕ್ ತಶೆಂಚ್ ಪಳೆಲೆಂ. ರಾಮ್ ಪ್ರಸಾದಾಕ್ ಪಳೆಲ್ಲ್ಯಾ ಆಲಿಯಾಕ್ ರಾಮ್ ಪ್ರಸಾದಾಚೆ ದೊಳೆ ಆಪ್ಲ್ಯಾ ದೊಳ್ಯಾಂ ಸವೆಂ ಸಭಾರ್ ಸವಾಲಾಂ ಕರ್ತಾತ್ ತಶೆಂ ದಿಸ್ಲೆಂ. ಆಲಿಯಾನ್ ಆಪ್ಲಿ ನದರ್ ಘುಂವ್ಡಾಯ್ಲಿ.
ಆಪ್ಲ್ಯಾ ದಾಟ್ ಮಿಶಿಯಾಂ ವಯ್ರ್ ಕಸಲಿಗೀ ಖೊರೊಜ್ ಕಾಡ್ಲ್ಲ್ಯಾ ಪರಿಂ ಕೆಲ್ಲೊ ರಾಮ್ ಪ್ರಸಾದ್ ನಾಸಿರಾಚಾ ಮುಕಾರ್ ಯೇವ್ನ್ ರಾವ್ಲೊ. ಜಶೆಂ ಸರೊಪಾಚಾ ವಾಟೆರ್ ಅಚಾನಕ್ ಮುಂಗುಸಿ ಪ್ರತ್ಯಕ್ಷ್ ಜಾಲ್ಲ್ಯಾ ಪರಿಂ!
ತಾಣೆಂ ಆಪ್ಲಿ ತಕ್ಲಿ ಉಕ್ಲುನ್ ನಾಸಿರಾಕ್ ಪಳೆಲೆಂ. ತೊ ಜಾಣಾಂ ಜಾಲ್ಲೊ ಹೊ ನಾಸಿರ್ ಆಪ್ಣಾಚಾ ಆಫೀಸಾಂತ್ ಆಪ್ಣಾಚೆಂ ಜ್ಯೂನಿಯರ್ ಜಾವ್ನ್ ಕಾಮ್ ಕರ್ಚ್ಯಾ ಅಮೀನಾಚೊ ಘೊವ್. ಪುಣ್ ಆತಾಂ ಹ್ಯಾ ಭರ್ಲೆಲ್ಯಾ ಕೊರ್ಟಾಂತ್ ರಾಮ್ ಪ್ರಸಾದಾಚಾ ಜಯ್ತಾಚೆಂ ಆನಿ ಸಲ್ವಣೆಚೆಂ ಸವಾಲ್! ಆನಿ ರಾಮ್ ಪ್ರಸಾದ್ ಸಲ್ವೊಂಕ್ ಕೆದ್ನಾಂಚ್ ತಯಾರ್ ನಾತ್ಲ್ಲೊ. ತೆಂಯ್ ಆಪ್ಲ್ಯಾ ಜ್ಯೂನಿಯರ್ ಲಾಯರಾ ಖಾತಿರ್? ರಾಯನಾ ತಸಲ್ಯಾಂಚಿ ದಯಾ ಆಸ್ಲ್ಯಾರ್ ಅಮೀನಾ ತಸಲ್ಯಾ ಧಾ ಜಾಣಾಂ ಜ್ಯೂನಿಯರ್ ಲಾಯರಾಂಕ್ ತೊ ಕಾಮಾಕ್ ದವರುಂಕ್ ಸಕ್ತಾ!
"ತರ್, ತುಂ ಹ್ಯಾ ಆಲಿಯಾ ಖಾನಾಚೊ ಘೊವ್ ಜಾವ್ನ್ ಆಸ್ಲ್ಲೊಯ್! ಐ ಮೀನ್ ಹ್ಯಾ ಸೈಕಿ ಆಲಿಯಾ ಲಾಗಿಂ ನಿಖಾ ಜಾಲ್ಲೊ ತಾಚೊ ಘೊವ್....!"
"ವ್ಹಯ್!"
"ಮಿಸ್ಟರ್ ನಾಸಿರ್.... ತುಕಾ ಹಾವೆಂ ಡಾಕ್ಟರ್ ಮ್ಹಣೊನ್ ಆಪಂವ್ಚೆಂ ಪಸಂದ್ ನಾ.....?"
"ಡಾಕ್ಟರ್....? ಕಿತ್ಯಾಕ್.....?" ನಾಸಿರಾಕ್ ಕಾಂಯ್ ಸಮ್ಜಾಲೆಂ ನಾ.
"ತುಂ ಡಾಕ್ಟರ್ ನ್ಹಯ್.....?"
"ನ್ಹಯ್!"
"ತುವೆಂ ಕಾಂಯ್ ಭಿಯೆಂವ್ಚಿ ಗರ್ಜ್ ನಾ ಮಿಸ್ಟರ್ ನಾಸಿರ್! ತುಂ ಡಾಕ್ಟರ್ ಜಾವ್ನಾಸಾಯ್!"
"ಹಾಂವ್ ಡಾಕ್ಟರ್ ನ್ಹಯ್!"
"ತರ್ ತುಕಾ ವಿಸ್ರೊಂಚಿ ಪಿಡಾ ಆಸ್ತೆಲಿ! ಆಶೆಂ ಕಶೆಂ ಜಾಂವ್ಕ್ ಸಕ್ತಾ? ತುಂ ಏಕ್ ಡಾಕ್ಟರ್ ಜಾವ್ನಾಸಾಯ್ ಮಿಸ್ಟರ್ ನಾಸಿರ್!"
"ನಾ! ಹಾಂವ್ ಡಾಕ್ಟರ್ ನ್ಹಯ್!"
"ವ್ಹಯ್! ತುಂ ಏಕ್ ಡಾಕ್ಟರ್!"
"ನ್ಹಯ್!"
"ವ್ಹಯ್!"
"ನ್ಹಯ್!"
"ವ್ಹಯ್!"
"ಆಬ್ಜೆಕ್ಶನ್ ಯುವರ್ ಹಾನರ್!" ನಾಯರ್ ಉಟ್ಲೊ.
"ಕೊರ್ಟಾಕ್ ಸತ್ ಸಾಂಗ್ ಮಿಸ್ಟರ್ ನಾಸಿರ್! ತುಂ ಏಕ್ ಡಾಕ್ಟರ್!" ರಾಮ್ ಪ್ರಸಾದಾನ್ ಸೊಡ್ಲೆಂ ನಾ.
"ಹಾಂವ್ ಡಾಕ್ಟರ್ ನ್ಹಯ್!"
"ವ್ಹಯ್! ತುಂ ಏಕ್ ಡಾಕ್ಟರ್!"
"ಹೆಂ ಖಂಡಿತ್ ಏಕ್ ಭಲತ್ಕಾರ್ ಯುವರ್ ಹಾನರ್. ಐ ಸ್ಟ್ರಾಂಗ್ಲೀ ಕಂಡೆಮ್ ದಿಸ್ ಕ್ವಾಶ್ಚನ್!" ನಾಯರ್ ಬೊಬಾಟ್ಲೊ.
"ಪ್ಲೀಸ್ ಟೇಕ್ ಯುವರ್ ಸೀಟ್ ಮಿಸ್ಟರ್ ಪ್ರಾಸಿಕ್ಯೂಟರ್. ಅಬ್ಜೆಕ್ಶನ್ ಓವರ್ ರೂಲ್ಡ್!"
"ಹೆಂ ಭಲಾತ್ಕಾರ್ ಯುವರ್ ಹಾನರ್!" ನಾಯರ್ ಬಸ್ಲೊ ನಾ.
ಕೊರ್ಟಾಂತ್ ಸಂಪೂರ್ಣ್ ಮೌನ್.
"ಟೇಕ್ ಯುವರ್ ಸೀಟ್ ಪ್ಲೀಸ್!" ನಾಯರಾಕ್ ಜಡ್ಜಾನ್ ತಾಕಿದ್ ದಿಲಿ.
"ಯು ಮೇ ಪ್ರೊಸೀಡ್ ನೌ!" ಜಡ್ಜ್ ರಾಮ್ ಪ್ರಸಾದಾ ತೆವ್ಶಿಂ ಘುಂವ್ಲೊ.
"ಹಾಂ! ಸಾಂಗ್ ಮಿಸ್ಟರ್ ನಾಸಿರ್. ತುಂ ಏಕ್ ಡಾಕ್ಟರ್.....?"
"ನ್ಹಯ್! ನ್ಹಯ್! ನ್ಹಯ್!!"
"ತರ್ ತುಂ ಕೋಣ್......?"
"ಹಾಂವ್ ಏಕ್ ಬಿಜ್ನೆಸ್ ಮ್ಯಾನ್!"
"ಬಿಜ್ನೆಸ್ಮ್ಯಾನ್ ಜಾಂವ್ಚ್ಯಾ ಪಯ್ಲೆಂ.....?"
"ಹಾಂವ್ ಪಯ್ಲೆಂ ಥಾವ್ನ್ ಬಿಜ್ನೆಸ್ಮ್ಯಾನ್!"
"ಅಜ್ಯಾಪ್ ಯುವರ್ ಹಾನರ್! ಹೆಂ ನಿಜಾಯ್ಕ್ಯ್ ಆಜ್ಯಾಪ್ಚ್!"
ಕೋರ್ಟ್ ರುಮಾಂತ್ ಸಗ್ಳ್ಯಾಂನಿ ಗುಸು ಗುಸು.
"ಆರ್ಡರ್! ಆರ್ಡರ್!"
"ತುಕಾ ಹಾಂವ್ ಸೈಕೊ ಮ್ಹಳ್ಳ್ಯಾ ಪರಿಂ ದಿಸ್ತಾಂ.....?"
"ನಾ!"
"ಹೊ ಮ್ಹಜೊ ಸಾಂಗಾತಿ ಪ್ರಾಸಿಕ್ಯೂಟರ್ ತುಕಾ ಸೈಕೊ ಮ್ಹಳ್ಳ್ಯಾ ಪರಿಂ ದಿಸ್ತಾ.....?"
"ನಾ!"
"ಪಳೆ ಪಳೆ! ಸಾರ್ಕೆಂ ಪಳೆ ಮಿಸ್ಟರ್ ನಾಸಿರ್!"
".........." ನಾಸಿರ್ ರಾಮ್ ಪ್ರಸಾದಾಕ್ ಪಳವ್ನ್ಚ್ ರಾವ್ಲೊ.
ರಾಮ್ ಪ್ರಸಾದ್ ಆತಾಂ ಜಡ್ಜಾಚ್ಯಾ ಕುಶಿಂನ್ ಘುಂವ್ಲೊ.
"ಐ ಯಾಮ್ ಸಾರ್ರಿ ಯುವರ್ ಹಾನರ್!" ಮ್ಹಳ್ಳೊ ರಾಮ್ ಪ್ರಸಾದ್ ನಾಸಿರಾಚಾ ತೆವ್ಶಿಂ ಘುಂವೊನ್ "ತುಕಾ ಆಮ್ಚೊ ಹಾನರೇಬಲ್ ಜಡ್ಜ್ ಸೈಕೊ ಮ್ಹಳ್ಳ್ಯಾ ಪರಿಂ ದಿಸ್ತಾ.....?"
".........." ನಾಸಿರ್ ಮೌನ್ ಆಸ್ಲ್ಲೊ.
"ಸಾಂಗ್ ಮಿಸ್ಟರ್ ನಾಸಿರ್! ಕೊರ್ಟಾಕ್ ತುಜಿ ಜವಾಬ್ ಜಾಯ್!"
"ನಾ!" ನಾಸಿರ್ ಆತಾಂ ಘಾಮೆಂವ್ಕ್ ಲಾಗ್ಲೊ.
"ತರ್ ಆಲಿಯಾ ಖಾನ್ ಮಾತ್ರ್ ತುಕಾ ಸೈಕಿ ಚೆಡುಂ ಮ್ಹಣೊನ್ ದಿಸ್ಲೆಂ.....?"
"........." ನಾಸಿರಾಚಿ ಜವಾಬ್ ನಾ. ತಾಕಾ ತಾಚ್ಯಾ ತಾಳ್ಯಾಚಿ ಶೆಳ್ ಸುಕ್ಲೆಲ್ಯಾ ಪರಿಂ ಜಾಲೆಂ.
"ತುಂ ಡಾಕ್ಟರ್ ನ್ಹಯ್ ಮ್ಹಣ್ತಾನಾ ಯು ಆರ್ ನಾಟ್ ಎ ಸೈಕೋಲಾಜಿಸ್ಟ್! ರೈಟ್.....?"
"..........." ನಾಸಿರಾಚೆಂ ತೆಂಚ್ ಮೌನ್.
"ಆಲಿಯಾ ಖಾನ್ ಏಕ್ ಸೈಕಿ ಚೆಡುಂ ಮ್ಹಣೊನ್ ತುಂ ರುಜು ಕರುಂಕ್ ಸಕ್ತಾಯ್?"
".........."
"ಜವಾಬ್ ದೀ ಮಿಸ್ಟರ್ ನಾಸಿರ್! ಕೊರ್ಟಾಕ್ ತುಜಿ ಜವಾಬ್ ಜಾಯ್! ಹಾಂ ಯಾ ನಾ?"
"ನಾ!"
"ಆಲಿಯಾಕ್ ಆಜ್ ಪಾಸೊನ್ ತೆಂ ಸೈಕಿ ಚೆಡುಂ ಮ್ಹಣೊನ್ ಖಂಯ್ಚ್ಯಾಯ್ ಡಾಕ್ಟರಾನ್ ಜಾಂವ್ ಯಾ ಆಸ್ಪತ್ರೆ ಥಾವ್ನ್ ತುವೆಂ ರಿಪೋರ್ಟ್ ಘೆತ್ಲಾಯ್....?"
"........."
"ಹಾಂ ಯಾ ನಾ!?"
"ನಾ!"
"ಮತಿಚಾ ಅಸಮತೋಲನಾಕ್ ಲಾಗೊನ್ ಆಲಿಯಾ ಎದೊಳ್ ಪಾಸೊನ್ ಖಂಯ್ಚ್ಯಾಯ್ ಆಸ್ಪತ್ರೆಕ್ ದಾಖಲ್ ಜಾಲ್ಲೊ ದಾಖ್ಲೊ ಆಸಾ? ಹಾಂ ಯಾ ನಾ?"
"ನಾ!"
"ತರ್ ತುಂ ತಾಕಾ ತೆಂ ಏಕ್ ಸೈಕಿ ಚೆಡುಂ ಮ್ಹಣೊನ್ ಕಶೆಂ ವೊಲಾಯ್ತಾಯ್....?"
"........."
"ಸಾಂಗ್ ಮಿಸ್ಟರ್ ನಾಸಿರ್!"
"ಮ್ಹಜ್ಯೆ ಸವೆಂ ತಾಚೊ ಭರ್ತಾವ್ ಬರೊ ನಾತ್ಲ್ಲೊ!"
"ಕಿತ್ಯಾಕ್.....?"
"ಹಾಂವ್ ನೆಣಾಂ!"
"ಇತ್ಲ್ಯಾಕ್ ಲಾಗೊನ್ ತುಂ ಆಲಿಯಾಕ್ ಏಕ್ ಸೈಕಿ ಚೆಡುಂ ಮ್ಹಣೊನ್ ವೊಲಾಯ್ತಾಯ್.....? ಆಲಿಯಾಚೆಂ ಆನಿ ತುಜೆಂ ನಿಖಾ ಕಶೆಂ ಜಾಲೆಂ? ಮೊಗಾಚಾ ಸಂಭಂಧಾನ್ ವಾ ಸೈರಿಕ್ ಪಳವ್ನ್.....?"
"ಸೈರಿಕ್ ಪಳವ್ನ್!"
"ತುಜ್ಯಾ ನಿಖಾಚಾ ಪಯ್ಲೆಂ ತುಂ ತಾಕಾ ವಳ್ಕಾನಾತ್ಲ್ಲೊಯ್?"
"ವಳ್ಕಾತಾಲೊಂ!"
"ಕಸೊ ವಳ್ಕಾತಾಲೊಯ್?"
"ಮ್ಹಜ್ಯಾ ಆನಿ ತಾಚ್ಯಾ ಕುಟ್ಮಾ ಮಧೆಂ ಸಂಭಂಧ್ ಆಸ್ಲ್ಲೊ!"
"ಕಸಲೊ ಸಂಭಂಧ್? ಬಿಜ್ನೆಸಾಚೊ ವಾ ರಗ್ತಾಚೊ.....?"
"ರಗ್ತಾಚೊ!"
"ತರ್ ತುಂ ಆಲಿಯಾಕ್ ತುಜ್ಯಾ ಲ್ಹಾನ್ಪಣಾರ್ ಥಾವ್ನ್ ವಳ್ಕಾತಾಯ್. ಯಾಮ್ ಐ ರೈಟ್ ಮಿಸ್ಟರ್ ನಾಸಿರ್?"
"ವ್ಹಯ್!"
"ಹೆಂ ನಿಜಾಯ್ಕ್ಯ್ ಆಜಾಪ್ ಯುವರ್ ಹಾನರ್! ಭುರ್ಗ್ಯಾಪಣಾರ್ ಥಾವ್ನ್ ಹ್ಯಾ ಆಲಿಯಾಕ್ ವಳ್ಕೊನ್ಯ್ ನಿಖಾ ಜಾಲ್ಯಾ ಉಪ್ರಾಂತ್ ಆಲಿಯಾಚಾ ಗೂಣಾಂ ವಿಶಿಂ ಮಿಸ್ಟರ್ ನಾಸಿರಾಕ್ ಕಳಿತ್ ಜಾಲೆಂ ಮ್ಹಳ್ಯಾರ್....? ಹೆಂ ಖಂಡಿತ್ ಪಾತ್ಯೆಂವ್ಕ್ ಜಾಯ್ನಾ!"
ರಾಮ್ ಪ್ರಸಾದಾಚಿ ವಕಾಲಾತ್ ಆಯ್ಕೊಂವ್ಚ್ಯಾ ಆಲಿಯಾಕ್ ಆಪ್ಲ್ಯಾ ಭವಿಶ್ಯ ವಯ್ರ್ ಸವ್ಕಾಸ್ ಭರ್ವಸೊ ಉದೆಲೊ. ತಾಚ್ಯಾ ದೊಳ್ಯಾಂ ಮುಕಾರ್ ಉಟೊನ್ ರಾವ್ಲ್ಲಿ ಸಲ್ವಣಿ ತಾಕಾ ಸೊಡುನ್ ಪಯ್ಸ್ ಧಾಂವ್ಲಿ ಮ್ಹಳ್ಳ್ಯಾ ಪರಿಂ ಜಾಲೆಂ.
"ತುಕಾ ಆಲಿಯಾ ಸಾಂಗಾತಾ ನಿಖಾ ಜಾಂವ್ಕ್ ಕಾಂಯ್ ಕೊಣಾಯ್ ಥಾವ್ನ್ ಭಲಾತ್ಕಾರ್ ಪುಣಿಂ ಆಸ್ಲ್ಲೆಂ?"
"ನಾ!"
"ತರ್ ತುವೆಂ ಆನಿ ತುಜ್ಯಾ ಕುಟ್ಮಾನ್ ಆಲಿಯಾಕ್ ಸ್ವೀಕಾರ್ ಕೆಲ್ಲೆಂ!"
"ವ್ಹಯ್!"
"ಭುರ್ಗ್ಯಾ ಪಣಾರ್ ಥಾವ್ನ್ ಸೈಕಿ ಆಸ್ಲ್ಲ್ಯಾ ಚೆಡ್ವಾಕ್ ತುವೆಂ ಆನಿ ತುಜ್ಯಾ ಘರ್ಚ್ಯಾಂನಿ ಕಶೆಂ ಸ್ವೀಕಾರ್ ಕೆಲೆಂ ಮಿಸ್ಟರ್ ನಾಸಿರ್...?"
"........."
"ಬರೆಂ! ತುವೆಂ ಥೊಡ್ಯಾ ವೆಳಾ ಪಯ್ಲೆಂ ಸಾಂಗ್ಲೆಂಯ್.... ಆಲಿಯಾ ಪ್ಲೈಟಾರ್ ರಾಶಿದಾಲಾಗಿಂ ಝಗ್ಡೊನ್ ಆಯಿಲ್ಲೆಂ!"
"ವ್ಹಯ್!"
"ಕಿತ್ಯಾ ಖಾತಿರ್ ತೆಂ ಝಗಡ್ಲೆಂ......?"
"ಹಾಂವ್ ನೆಣಾಂ!"
"ಹೆಂ ಅನ್ಯೇಕ್ ಆಜಾಪ್ ಯುವರ್ ಹಾನರ್! ಹಾಚೆಂ ಬಾಯ್ಲ್ ಪ್ಲೈಟಾರ್ ಝಗ್ಡೊನ್ ಯೆತಾ ಆನಿ ತೆಂ ಕಸಲ್ಯಾ ಕಾರಾಣಾ ಖಾತಿರ್ ಝಗಡ್ಲೆಂ ಮ್ಹಳ್ಳ್ಯಾ ವಿಶಿಂ ಘೊವಾಕ್ಚ್ ಖಬಾರ್ ನಾ!"
ನಾಯರಾಕ್ ಹ್ಯಾ ನಾಸಿರಾಚಾ ಸಾಕ್ಶೆ ಥಾವ್ನ್ ಕಾಂಯ್ ಫಾಯ್ದೊ ಜಾಂವ್ಚೊ ದಿಸೊನ್ ಆಯ್ಲೊ ನಾ.
"ಬರೆಂ! ತುವೆಂ ತುಜ್ಯಾ ಬಾಯ್ಲೆಕ್ ತಾಚ್ಯಾ ಝಗ್ಡ್ಯಾಚೆಂ ಕಾರಾಣ್ ವಿಚಾರ್ಲೆಂಯ್.....?"
"ನಾ!"
"ಕಿತ್ಯಾಕ್.....?"
"ಹಾಂವ್ ಸಗ್ಳೊಚ್ ಭಿಯೆಲ್ಲೊಂ!"
"ಕಿತ್ಯಾಕ್.....?"
"........."
"ಸಾಂಗ್ ಮಿಸ್ಟರ್ ನಾಸಿರ್! ಕೊರ್ಟಾಕ್ ತುವೆಂ ಸತ್ ಉಚಾರುಂಕ್ ಜಾಯ್. ತುಂ ಕಿತ್ಯಾಕ್ ಪಾಸೊನ್ ಭಿಯೆಲ್ಲೊಯ್?"
ಇಕ್ಬಾಲಾಕ್ ಆನಿ ರಾಶಿದಾಕ್ ಆಪ್ಲ್ಯಾ ಸಲ್ವಣೆಚೊ ಅಂದಾಂಜ್ ಜಾಂವ್ಕ್ ಲಾಗ್ಲೊ.
"ಕೋರ್ಟ್ ತುಜ್ಯಾ ಜವಾಬೆಕ್ ರಾಕ್ತಾ ಮಿಸ್ಟರ್ ನಾಸಿರ್! ತುಜ್ಯಾ ಭಿರಾಂತೆಚೆಂ ಕಾರಾಣ್ ಕಿತೆಂ?"
"ಮ್ಹಾಕಾ ರಾಶಿದಾನ್ ಪೋನ್ ಕರುನ್ ಬೆಶ್ಟಾಯಿಲ್ಲೆಂ!"
ಕೊರ್ಟಾಂತ್ ಆವಾಜ್ ವಾಡ್ಲೊ. ಸಗ್ಳ್ಯಾಂನಿ ಗುಸು ಗುಸು.
"ಕಿತೆಂ ಮ್ಹಣೊನ್ ಬೆಶ್ಟಾಯಿಲ್ಲೆಂ?"
"ಆಲಿಯಾಕ್ ಏರ್ ಹೊಸ್ಟೆಸಾಚಾ ಕಾಮಾ ಥಾವ್ನ್ ಕಾಡುನ್ ಘರಾ ದವರುಂಕ್!"
"ನಾ ಜಾಲ್ಯಾರ್.....?"
"ನಾ ಜಾಲ್ಯಾರ್ ಮ್ಹಾಕಾ ಜಿವೆಶಿ ಮಾರ್ತಾಂ ಮ್ಹಣೊನ್ ಬೆಶ್ಟಾಯಿಲ್ಲೆಂ!"
"ತಾಂಕಾಂ ತುಂ ಆಯ್ಕಾಲೊಯ್?"
"ಆಲಿಯಾನ್ ಮ್ಹಜೆಂ ಆಯ್ಕಾಲೆಂ ನಾ!"
"ಹ್ಯಾಚ್ ಖಾತಿರ್ ತೆಂ ತುಕಾ ಸೈಕಿ ಲಾಗ್ಲೆಂ....?"
"........."
"ಉಪ್ರಾಂತ್ ಕಿತೆಂ ಜಾಲೆಂ.....?"
"ಆಲಿಯಾಕ್ ಕೊಣಾ ಥಾವ್ನ್ಗೀ ಮಜತ್ ಮೆಳ್ಳಿ!
"ಉಪ್ರಾಂತ್......?"
"ಆಲಿಯಾ ರಾಶಿದಾಚಾ ಹಾತಾಂ ಥಾವ್ನ್ ಬಚಾವ್ ಜಾಲೆಂ!"
"ಆಲಿಯಾಕ್ ಬಚಾವ್ ಕೆಲ್ಲೊ ತೊ ಕೋಣ್.....?"
"ಹಾಂವ್ ನೆಣಾಂ!"
"ಉಪ್ರಾಂತ್......?"
"ಮ್ಹಜೆಂ ಮನ್ ಮೊಡ್ಲೆಂ!"
"ಆನಿ ತುಂ ದುಸ್ರೆಂ ನಿಖಾ ಜಾಲೊಯ್....?"
"ವ್ಹಯ್!"
"ತುಜ್ಯಾ ಬಾಯ್ಲೆಚಾ ಕಶ್ಟಾಂಚಾ ಪರಿಸ್ಥಿತೆಂತ್, ತುಂ ತುಜ್ಯಾ ಬಾಯ್ಲೆಕ್ ಸಾಂಗಾತ್ ದೀಂವ್ಕ್ ಸಕ್ಲೊನಾಯ್ ತರ್, ತಿಚ್ಯಾ ಮತಿಂತ್ಲ್ಯಾ ಭಗ್ಣಾಂಕ್ ತುಂ ಕಶೆಂ ಸಮ್ಜೊಂಕ್ ಸಕ್ತಲೊಯ್ ಮಿಸ್ಟರ್ ನಾಸಿರ್? ಹ್ಯಾ ಜಲ್ಮಾಂತ್ ತುಂ ಧಾ ಪಾವ್ಟಿಂ ನಿಖಾ ಜಾಶಿ ಜಾಲ್ಯಾರ್ಯ್ ಹೆಂ ತುಕಾ ಸಾದ್ಯ್ ಜಾಂವ್ಚೆಂ ನಾ! ಯಾಮ್ ಐ ರೈಟ್....?"
"........." ನಾಸಿರಾನ್ ತಕ್ಲಿ ಪಂದಾ ಘಾಲಿ.
"ತುಂ ಜಾಣಾಂಯ್ ಮಿಸ್ಟರ್ ನಾಸಿರ್? ತುವೆಂ ಕೆದಾಳಾಯ್ ತುಜ್ಯಾ ಬಾಯ್ಲೆಕ್ ಸಮ್ಜೊಂಚೆಂ ಪ್ರಯತ್ನ್ಚ್ ಕರುಂಕ್ ನಾ! ತಶೆಂ ತುವೆಂ ಕೆಲ್ಲೆಂಯ್ ಜಾಲ್ಯಾರ್ ತುಕಾ ದುಸ್ರೆಂ ನಿಖಾ ಜಾಂವ್ಚಿ ಗರ್ಜ್ಚ್ ಪಡ್ತಿ ನಾ! ತುಂ ತುಜ್ಯಾ ಪಯ್ಲ್ಯಾ ನಿಖಾಂತ್ಚ್ ಆಲಿಯಾ ಸವೆಂ ಖುಶ್ ಆಸ್ತೊಯ್!"
"ಥ್ಯಾಂಕ್ ಯು ಮಿಸ್ಟರ್ ನಾಸಿರ್!"
ರಾಮ್ ಪ್ರಸಾದ್ ಆತಾಂ ಜಡ್ಜಾ ತೆವ್ಶಿಂ ಘುಂವ್ಲೊ.
"ಯುವರ್ ಹಾನರ್! ಆಲಿಯಾಚೊ ಘೊವ್ ಜಾವ್ನ್ ಆಸ್ಲ್ಲ್ಯಾ ನಾಸಿರಾಚಾ ಉಚಾರಾ ಥಾವ್ನ್ ಹೆಂ ಸ್ಪಶ್ಟ್ ಜಾತಾ ಕೀ ರಾಶಿದಾಕ್ ಆನಿ ಇಕ್ಬಾಲಾಕ್ ಪಯ್ಲೆಂ ಥಾವ್ನ್ಚ್ ಆಲಿಯಾ ವಯ್ರ್ ದುಸ್ಮಾನ್ಕಾಯ್ ಆಸ್ಲ್ಲಿ. ಹ್ಯಾ ದುಸ್ಮಾನ್ಕಾಯೆಕ್ ಕೊಣಾಚ್ಯಾಗೀ ಮಜತೆನ್ ಆಲಿಯಾ ಥೊಡ್ಯಾ ತೆಂಪಾಕ್ ಪಯ್ಸ್ ಕರುಂಕ್ ಸಕ್ಲೆಂ ಜಾಲ್ಯಾರ್ಯ್ ಆಲಿಯಾ ಬಾಲಿವುಡಾಕ್ ಆಯ್ಲ್ಯಾ ಉಪ್ರಾಂತ್ ಹ್ಯಾಚ್ ದುಸ್ಮಾನ್ಕಾಯೆಕ್ ಇಕ್ಬಾಲಾನ್ ಆನಿ ರಾಶಿದಾನ್ ಮೆಳೊನ್ ಏಕ್ ವಾಟ್ ದಾಖಯ್ಲಿ. ಆಶೆಂ ಆಸ್ತಾನಾ ಹಾಂಗಾಸರ್ ಹೆಂಚ್ ರುಜು ಜಾತಾ ಕೀ ಜಿವಿತಾಂತ್ ಕೊಣಾಯ್ ಮುಕಾರ್ ತಕ್ಲಿ ಭಾಗಾಯ್ನಾತ್ಲ್ಲ್ಯಾ ಧಯ್ರಾಧೀಕ್ ಚಲಿಯೆಚಿ ಹತ್ಯಾ ಕರುಂಕ್ ಕೆಲ್ಲೆಂ ಹೆಂ ಪ್ರಯತ್ನ್. ಆನಿ ಹೆಂ ಪ್ರಯತ್ನ್ ಇಕ್ಬಾಲಾನ್ ಆನಿ ರಾಶಿದಾನ್ಚ್ ಕೆಲಾಂ ಮ್ಹಣೊನ್ ಹಾಂವ್ ತಾಂಚಾ ತೊಂಡಾ ಥಾವ್ನ್ಚ್ ಉಚಾರಾಶೆಂ ಕರ್ತಾಂ. ಹ್ಯಾ ಖಾತಿರ್ ಮ್ಹಾಕಾ ಕೊರ್ಟಾ ಥಾವ್ನ್ ಆದೇಶ್ ಮೆಳೊಂಕ್ ಜಾಯ್!"
"ದೇಟ್ಸಾಲ್ ಯುವರ್ ಹಾನರ್!"
"ನೋ ಮೋರ್ ಫರ್ದರ್ ಕ್ವಾಶ್ಚನ್ಸ್!" ರಾಮ್ ಪ್ರಸಾದ್ ಆಪ್ಲ್ಯಾ ಬಸ್ಕೆ ತೆವ್ಶಿಂ ಚಮ್ಕಾಲೊ.
"ದಿ ಕೋರ್ಟ್ ಇಸ್ ಅಡ್ಜರ್ನ್ಡ್!"
"ಟಕ್!"
************
ಆಲಿಯಾನ್ ಡ್ರೈವ್ ಕರ್ಚೆಂ ನವೆಂ ಮಹೀಂದ್ರ ಜೀಪ್ ಸವ್ಕಾಸ್ ಆಯಿಲ್ಲೆಂ ತೆಂ ರಾಯನಾಚಾ ಬೊಂಗ್ಲ್ಯಾಚಾ ಗೇಟಿ ಮುಕಾರ್ ಯೇವ್ನ್ ರಾವ್ಲೆಂ. ತಾಕಾ ಆಜ್ ಕಿತ್ಯಾಕ್ಗೀ ರಾಯನಾಕ್ ಮೆಳೊನ್ ವಚೊಂಕ್ ಮನ್ ಜಾಲ್ಲೆಂ.
ಆಪ್ಲ್ಯಾ ಬೊಂಗ್ಲ್ಯಾಚಾ ಗೇಟಿ ಮುಕಾರ್ ಯೇವ್ನ್ ರಾವ್ಲೆಲ್ಯಾ ಜಿಪಾಕ್ ಪಳೆಲ್ಲೊ ಬೊಂಗ್ಲ್ಯಾಚೊ ವಾಚ್ಮ್ಯಾನ್ ತ್ಯಾ ಜಿಪಾಚಾ ಡ್ರೈವಿಂಗ್ ಸಿಟಾರ್ ಕೋಣ್ ಆಸಾ ಮ್ಹಳ್ಳೆಂ ಖಾತ್ರಿ ಕರುಂಕ್ ಜಿಪಾಚಾ ಡ್ರೈವಿಂಗ್ ಸಿಟಾ ತೆವ್ಶಿಂ ತಿಳುಂಕ್ ಲಾಗ್ಲೊ. ಜಿಪಾಚೊ, ಉಗ್ತೊ ಆಸ್ಲ್ಲ್ಯಾ ಆರ್ಶ್ಯಾ ಮುಕಾಂತ್ರ್ ತಾಕಾ ಆಲಿಯಾ ದಿಸ್ತಾನಾ ತೊ ಪಯ್ಲೆಂ ರಾಯನಾಚಾ ಪರ್ವಣ್ಗೆಕ್ ಘೆಂವ್ಕ್ ಆಪ್ಲ್ಯಾ ಇಂಟರ್ಕೋಮಾ ತೆವ್ಶಿಂ ಚಮ್ಕಾಲೊ.
ಇಂಟರ್ಕೋಮಾಚೆರ್ ರಾಯನಾ ಲಾಗಿಂ ಉಲಯಿಲ್ಲ್ಯಾ ವಾಚ್ಮ್ಯಾನಾಕ್ ರಾಯನಾಚಿ ತಾಕಾ ಪರ್ವಣ್ಗಿ ಮೆಳ್ತಾನಾ ತಾಣೆಂ ಯೇವ್ನ್ ಗೇಟ್ ಉಗ್ತಿ ಕೆಲಿ. ಉಗ್ತಿ ಜಾಲ್ಲ್ಯಾ ಬೊಂಗ್ಲ್ಯಾಚಾ ಗೇಟಿ ಮುಕಾರ್ ಆಸ್ಲ್ಲ್ಯಾ ವಾಚ್ಮ್ಯಾನಾಕ್ ಹಾಸೊ ಪಾಟಯಿಲ್ಲ್ಯಾ ಆಲಿಯಾನ್ ಆಪ್ಲ್ಯಾ ಜಿಪಾಕ್ ರಾಯನಾಚಾ ಕಂಪೌಂಡಾ ಭಿತರ್ ಹಾಡ್ಲೆಂ. ಬೊಂಗ್ಲ್ಯಾಚಾ ಪಾರ್ಕಿಂಗಾಚೆರ್ ಆಪ್ಲೆಂ ಜೀಪ್ ಪಾರ್ಕ್ ಕರುನ್ ಜಿಪಾ ವಯ್ಲೆಂ ಆಪ್ಲೆಂ ವ್ಯಾನಿಟಿ ಬ್ಯಾಗ್ ಹಾತಿಂ ಘೆತ್ಲ್ಲೆಂ ತೆಂ ಜಿಪಾರ್ ಥಾವ್ನ್ ಸಕಯ್ಲ್ ದೆಂವ್ಲೆಂ.
ಬೊಂಗ್ಲ್ಯಾಚೆಂ ಮುಕ್ಲೆಂ ದಾರ್ ಉಗ್ತೆಂ ಕರುನ್ ಶಮ್ಮಿ ಆಲಿಯಾಕ್ ರಾಕ್ತಾಲೆಂ. ತಾಕಾ ರಾಯನಾಚೆಂ ಫರ್ಮಾಣ್ ತೆಂ.
ಜಿಪಾರ್ ಥಾವ್ನ್ ದೆಂವೊನ್ ಹೆವ್ಶಿಂ ಆಯಿಲ್ಲೆಂ ಆಲಿಯಾ ತ್ಯಾ ಮುಕ್ಲ್ಯಾ ಮಿಶೇಲಾಚಾ ಗಾರ್ಡನಾಕ್ ಪಳವ್ನ್ ತಶೆಂಚ್ ರಾವ್ಲೆಂ. ಗಾರ್ಡನಾಂತ್ ಫುಲ್ಲ್ಲ್ಯಾ ಸೊಭಿತ್ ಫುಲಾಂಕ್ ಪಳಂವ್ನ್ ತ್ಯಾ ಫುಲಾಂಕ್ ಸೊಡುನ್ ಮುಕಾರ್ ವಚೊಂಕ್ ತಾಚೆಂ ಮನ್ ಆಯ್ಕಾಲೆಂ ನಾ. ತೆಂ ತಶೆಂಚ್ ತ್ಯಾ ಫುಲಾಂಚಾ ಸೊಭಾಯೆಕ್ ಆಪ್ಲ್ಯಾ ಕಾಳ್ಜಾ ಮನಾಂತ್ ಸೊಭವ್ನ್ ರಾವ್ಲೆಂ. ತಾಕಾ ತಿಂ ಫುಲಾಂ ತ್ಯಾ ಮಿಶೇಲಾ ಪರಿಂ ನಿತಳ್ ನಿಶ್ಕಳಂಕ್ ಮ್ಹಳ್ಳ್ಯಾ ಪರಿಂ ದಿಸ್ಲಿಂ. ಹ್ಯಾ ಗಾರ್ಡನಾಂತ್ಲ್ಯಾ ಫುಲಾಂಕ್ ಮಿಶೇಲ್ ಕೆದ್ನಾಂಚ್ ಹುಮ್ಟಿನಾತ್ಲ್ಲೆಂ. ತ್ಯಾ ಫುಲಾಂಕ್ ತಾಂಚಾ ಜಡಾಂಚೆರ್ಚ್ ಪಳವ್ನ್ ತೆಂ ಸಂತೊಸ್ತಾಲೆಂ. ಪುಣ್ ಆಜ್.....?
ತುವೆಂ ತುಜ್ಯಾ ಜಿವಿತಾಂತ್ ಎಕ್ಚ್ಚ್ ಚೂಕ್ ಕೆಲಿಯ್ ಮಿಶೇಲ್! ತುವೆಂ ಹ್ಯಾ ಮುಂಬಯಿಕ್ ಪಾಂಯ್ ದವರುಂಕ್ ನಜೊ ಆಸ್ಲ್ಲೆ! ತುಂ ಹ್ಯಾ ಮುಂಬಯಿಕ್ ಯೇಂವ್ಕ್ ನಾತ್ಲ್ಲೆಂಯ್ ಜಾಲ್ಯಾರ್ ತುಜ್ಯಾ ಗಾಂವಾಂತ್ ತುಂ ಅಜೂನ್ ಸಂತೊಸಾನ್ ಜಿವಂತ್ ಉರ್ತೆಂಯ್! ಹ್ಯಾ ಮುಂಬಯಿನ್ ತುಕಾ ಜಿಯೆಂವ್ಕ್ಯ್ ದಿಲೆಂ ನಾ! ಆಲಿಯಾ ಆಪ್ಲ್ಯಾ ಮತಿಂತ್ಚ್ ಮಿಶೇಲಾಲಾಗಿಂ ಉಲಯ್ಲೆಂ.
ತಿತ್ಲ್ಯಾರ್!
"ಆಲಿಯಾ......?"
ಅಚಾನಕ್ ರಾಯನಾಚೊ ತಾಳೊ ಅಯ್ಕೊನ್ ಆಲಿಯಾ ಪಾಟಿಂ ಘುವ್ಲೆಂ.
ರಾಯನ್ ತಾಚ್ಯಾ ಬೊಂಗ್ಲ್ಯಾಚಾ ದಾರಾರ್ ಉಭೊ ಆಸ್ಲ್ಲೊ.
"ಕಮಿನ್!" ರಾಯನಾಚೊ ತಾಳೊ. ಇತ್ಲೊ ವೇಳ್ ಜಾಲ್ಯಾರ್ಯ್ ಆಲಿಯಾ ಘರಾ ಭಿತರ್ ಆಯ್ಲೆಂ ನಾ ತೆಂ ಪಳವ್ನ್ ರಾಯನ್ ಆತಾಂ ಭಾಯ್ರ್ ಆಯಿಲ್ಲೊ.
ತಿತ್ಲೆಂಚ್!
ಮಿಶೇಲಾಚಾ ಸಂಸಾರಾ ಥಾವ್ನ್ ಭಾಯ್ರ್ ಆಯಿಲ್ಲೆಂ ಆಲಿಯಾ ಬೊಂಗ್ಲ್ಯಾಚಾ ಮುಕ್ಲ್ಯಾ ದಾರಾ ತೆವ್ಶಿಂ ಚಲೊಂಕ್ ಲಾಗ್ಲೆಂ. ರಾಯನಾಚಾ ಮುಕಾರ್ ಉಭೆಂ ರಾವೊಂಕ್ ತಾಕಾ ಪಯ್ಲೆಂಚಾ ತಿತ್ಲೆಂ ಧಯ್ರ್ ನಾತ್ಲ್ಲೆಂ. ಭಿತರ್ಲ್ಯಾ ಭಿತರ್ ಆಪುಣ್ ರಾಯನಾಚೆಂ ಆಫ್ರಾಧಿ ಮ್ಹಳ್ಳೆಂ ಚಿಂತಾಪ್ ಕಾಂತಯ್ತಾಲೆಂ ಜಾಲ್ಯಾರ್ಯ್ ಕಾಳ್ಜಾಂತ್ ಧಯ್ರ್ ಆರಾವ್ನ್ ತೆಂ ರಾಯನಾಚಾ ಬೊಂಗ್ಲ್ಯಾಚಿಂ ಮೆಟಾಂ ಚಡೊಂಕ್ ಲಾಗ್ಲೆಂ.
ಥೊಡ್ಯಾಚ್ ತೆಂಪಾ ಪಯ್ಲೆಂ ಹೆಂಚ್ ಆಲಿಯಾ ಹ್ಯಾಚ್ ಮೆಟಾಂಕ್ ಚಡೊಂಕ್ ಆಶೆವ್ನ್ ರಾವ್ಲ್ಲೆಂ. ಆಪ್ಲ್ಯಾ ಮಿಸಾಂವಾಚಾ ವಾಟೆರ್ ಆಪ್ಣೆ ಜಯ್ತೆವಂತ್ ಜಾಂವ್ಕ್ ಜಾಯ್ ಜಾಲ್ಯಾರ್ ಹ್ಯಾ ಮೆಟಾಂಕ್ ಚಡೊಂಕ್ ಜಾಯ್ ಮ್ಹಳ್ಳೆಂ ತೆಂ ಪಾತ್ಯೆಲ್ಲೆಂ. ತಾಚ್ಯಾ ಮಿಸಾಂವಾಂತ್ ಆಲಿಯಾ ಆಯ್ಚ್ಯಾ ಹ್ಯಾ ಘಡಿಯೆ ಪಾಸೊನ್ ಜಯ್ತೆವಂತ್ ಜಾಲ್ಲೆಂ. ಫುಡಾರಾಕ್ಯ್ ತೆಂ ಜಯ್ತೆವಂತ್ ಜಾತೆಲೆಂ ಮ್ಹಳ್ಳೊ ತಾಕಾ ಭರ್ವಸೊ ಆಸ್ಲ್ಲೊ. ಹ್ಯಾ ಭರ್ವಸ್ಯಾಂತ್ ಆಜ್ ತಾಕಾ ರಾಯನಾಚಿ ಗರ್ಜ್ ಪಯ್ಲೆಂಚಾ ತಿತ್ಲಿ ನಾತ್ಲ್ಲಿ. ರಾಯನಾ ಥಾವ್ನ್ ಜೊಡುಂಕ್ ಜಾಯ್ ಜಾಲ್ಲೆಂ ತೆಂ ಆಲಿಯಾನ್ ಜೊಡ್ಲ್ಲೆಂ. ಹ್ಯಾ ವಗ್ತಾರ್ ತೆಂ ರಾಯನಾಕ್ ಮೆಳೊಂಕ್ ಆಯಿಲ್ಲೆಂ ಜಾಲ್ಯಾರ್ ಫಕತ್ತ್ ಆಪ್ಲ್ಯಾ ಕಾಳ್ಜಾಚಾ ಕಸಲ್ಯಾಗೀ ಎಕಾ ಪಿಶ್ಯಾ ಆಶೆಕ್ ಲಾಗೊನ್.
ವ್ಹಯ್! ಆಲಿಯಾಚಾ ಕಾಳ್ಜಾನ್ ಏಕ್ ಪಿಶಿ ಆಶಾ ಕೆಲ್ಲಿ!
ಆಪ್ಣಾಚಾ ಜಿವಿತಾಂತ್ಲ್ಯಾ ಹ್ಯಾ ಝುಜಾಂತ್ ಆಪ್ಣಾಕ್ ಸಾಂಗಾತ್ ದಿಲ್ಲ್ಯಾ ರಾಯನಾಕ್ ಪಳವ್ನ್ ವಚೊಂಕ್ ತಾಕಾ ಮನ್ ಜಾಲ್ಲೆಂ. ನಾಸಿರಾನ್ ಕೊರ್ಟಾಂತ್ ಸಾಕ್ಸ್ ದಿಲ್ಯಾ ಉಪ್ರಾಂತ್ ಆಲಿಯಾನ್ ಲಿಪಯಿಲ್ಲೆ ಸಭಾರ್ ವಿಶಯ್ ರಾಯನಾಚಾ ಮುಕಾರ್ ಉಗ್ತೆ ಜಾಲ್ಲೆ. ಹೆಂ ಇತ್ಲ್ಯಾರ್ಚ್ ರಾವ್ತೆಲೆಂ ಮ್ಹಳ್ಳೆಂ ಧಯ್ರ್ ಆಲಿಯಾಕ್ ನಾತ್ಲ್ಲೆಂ. ಹ್ಯಾ ಭಾಯ್ರ್ಯ್ ಹ್ಯಾ ಉಪ್ರಾಂತ್ ಸಭಾರ್ ಘುಟ್ ತ್ಯಾ ಕೊರ್ಟಾಂತ್ ಭಾಯ್ರ್ ಪಡ್ಚೆ ಆಸಾತ್! ಆಪ್ಣಾಚ್ಯಾ ಜಿವಿತಾಚಾ ಸರ್ವ್ ಸತಾಂಕ್ ಜಾಣಾಂ ಜಾಲ್ಯಾ ಉಪ್ರಾಂತ್ ಹೊ ರಾಯನ್ ಆಪ್ಣಾಕ್ ಆಸೊ ಸ್ವಾಗತ್ ದಿತಲೊ ಮ್ಹಳ್ಳ್ಯಾಚೊ ಕಸಲೊ ಭರ್ವಸೊ?
"ಕಸೊ ಆಸಾಯ್ ರಾಯನ್.....?" ಮುಕ್ಲ್ಯಾ ಮೆಟಾಂ ತೆವ್ಶಿಂ ಆಯಿಲ್ಲ್ಯಾ ಆಲಿಯಾನ್ ಆಪ್ಲೆ ದೊಳೆ ಉಭಾರುನ್ ರಾಯನಾಕ್ ಪಳೆಲೆಂ.
ಆಲಿಯಾಚಾ ಸವಾಲಾಕ್ ತಾಣೆಂ ಕಾಂಯ್ ಜವಾಬ್ ದಿಲಿ ನಾ. ಪುಣ್ ಆಪ್ಲ್ಯಾ ವೊಂಟಾರ್ ತಾಣೆಂ ವಿಲಕ್ಷಣ್ ಹಾಸೊ ಹಾಡ್ಲ್ಯೊ. ಹ್ಯಾ ವಿಲಕ್ಶಣ್ ಹಾಸ್ಯಾ ಪಾಟ್ಲೊ ಮತ್ಲಾಬ್ ಆಲಿಯಾಕ್ ಸಮ್ಜಾನಾಸ್ತಾನಾ ಘೆಲೊ ನಾ. ಇತ್ಲ್ಯಾ ದಿಸಾಂ ಥಾವ್ನ್ ತಾಣೆಂ ರಾಯನಾಕ್ ಪಳೆಲಾಂ.
"ಜೀವ್ ನಾತ್ಲಲೊ ಮನಿಸ್ ಕಸೊ ಆಸ್ತಲೊ? ಮ್ಹಜ್ಯಾ ಜಿವಾಚಿ ವಾಟ್ ಪಳೆವ್ನ್ ಆಸಾಂ! ಯೇ....! ಭಿತರ್ ಯೇ!" ರಾಯನ್ ಘರಾ ಭಿತರ್ ಗೆಲೊ. ರಾಯನಾ ಸವೆಂ ಆಲಿಯಾನ್ ಬೊಂಗ್ಲ್ಯಾ ಭಿತರ್ ಪಾಂಯ್ ದವರ್ಲೆ.
"ಬಸ್!" ರಾಯನಾನ್ ಆಲಿಯಾಕ್ ಬಸೊಂಕ್ ಜಾಗೊ ದಾಕಯ್ಲೊ.
ಏಕ್ ಪಾವ್ಟಿಂ ಭೊಂವ್ತಣಿ ನದರ್ ಮಾರ್ಲೆಲ್ಯಾ ಆಲಿಯಾನ್ ಉಪ್ರಾಂತ್ ರಾಯನಾನ್ ದಾಖಯಿಲ್ಲ್ಯಾ ಸೊಫಾಚೆರ್ ಬಸ್ಕಾ ಘೆತ್ಲಿ.
"ರಾಮ್ ಪ್ರಸಾದ್ ಆಯಿಲ್ಲೊ!" ರಾಯನ್ಚ್ ಉಲಯ್ಲೊ.
ರಾಮ್ ಪ್ರಸಾದಾನ್ ರಾಯನಾಕ್ ಆಪ್ಣಾ ವಿಶಿಂ ಸಗ್ಳೆಂ ಸಾಂಗ್ಲಾಂ ಆಸ್ತೆಲೆಂ! ಆಲಿಯಾನ್ ಚಿಂತ್ಲೆಂ. ಹೆಂ ಆಯ್ಕೊನ್ ತಾಚ್ಯಾ ತೊಂಡಾರ್ ಕಾಂಯ್ ಬದ್ಲಾವಣ್ ಜಾಲಿ ನಾ. ಹಾಂಗಾ ಯೆಂವ್ಚ್ಯಾ ಪಯ್ಲೆಂಚ್ ಹ್ಯಾ ವಿಶಯಾಂತ್ ತೆಂ ಚಿಂತುನ್ಚ್ ಆಯಿಲ್ಲೆಂ.
"ಕಿತೆಂ ಪಿಯೆತಾಯ್....? ಕಾಫಿ....? ಚ್ಹಾಯ್...?" ತಗ್ಸಾಲ್ಯಾ ನದ್ರೆನ್ ರಾಯನಾನ್ ಆಲಿಯಾಕ್ಚ್ ಪಳೆಲೆಂ. "ಶಮ್ಮೀ ದೋನ್ ಕಾಫಿ ಹಾಡ್!" ಶಮ್ಮಿಕ್ ತಾಣೆಂ ಆರ್ಡರ್ ಕೆಲೆಂ.
"ತುಕಾ ತ್ಯಾ ದೀಸ್ ಹಾವೆಂ ಪಯ್ಲ್ಯಾ ಪಾವ್ಟಿಂ ಪಳೆತಾನಾ ತುಂ ಮ್ಹಾಕಾ ತಶೆಂ ದಿಸೊಂಕ್ ನಾತ್ಲ್ಲೆಂಯ್! ಕಿತ್ಯಾಕ್ ತುವೆಂ ಆಶೆಂ ಕೆಲೆಂಯ್....?" ರಾಯನಾನ್ ಆಪ್ಲ್ಯಾ ತಕ್ಲೆಕ್ ವಯ್ರ್ ಉಭಾರ್ಲಿ.
"ಐ ಯಾಮ್ ಸಾರ್ರಿ ರಾಯನ್!" ಆಲಿಯಾನ್ ರಾಯನಾಕ್ಚ್ ಪಳೆಲೆಂ. ಪುಣ್ ರಾಯನ್ ವಯ್ಲ್ಯಾ ತ್ಯಾ ಸೀಲಿಂಗಾಕ್ಚ್ ಪಳವ್ನ್ ರಾವ್ಲ್ಲೊ.
"ತುಂ ಜಾಣಾಂಯ್ ಆಲಿಯಾ......? ಹೊ ರಾಯನ್ ಕೆದ್ನಾಂಚ್ ಆಪ್ಲ್ಯಾ ದುಸ್ಮಾನಾಂಕ್ ಭೊಗ್ಸಿನಾ! ಪುಣ್ ರಾಮ್ ಪ್ರಸಾದಾನ್ ಸಾಂಗ್ಲ್ಯಾ ಉಪ್ರಾಂತ್ ಮ್ಹಾಕಾ ಆತಾಂ ಮ್ಹಜ್ಯಾ ವಯ್ರ್ಚ್ ದುಬಾವ್ ಉದೆಲಾ. ತುಂ ಜಾಣಾಂಯ್ ಮಿಶೇಲ್ ಖಂಯ್ ಆಸಾ ತೆಂ.....?" ರಾಯನಾನ್ ಆತಾಂ ಆಪ್ಲ್ಯಾ ದಿಶ್ಟೆಕ್ ತ್ಯಾ ಸೀಲಿಂಗಾರ್ ಥಾವ್ನ್ ಸಕಯ್ಲ್ ಗಳವ್ನ್ ಆಲಿಯಾಕ್ ಪಳೆಲೆಂ.
"ತುಕಾ ಮ್ಹಜ್ಯೆ ವಯ್ರ್ ದುಬಾವ್....?" ಆಲಿಯಾ ರಾಯನಾಕ್ಚ್ ಪಳೆತಾಲೆಂ. ಥೊಡ್ಯಾ ವೆಳಾಕ್ ದೊಗಾಂಯ್ಚೆ ದೊಳೆ ಎಕಾಮೆಕಾ ಸಾಂಗಾತಾ ಝುಜಾಂಕ್ ದೆಂವ್ಲೆ. ಆಲಿಯಾಕ್ ಪಳೆಲ್ಲ್ಯಾ ರಾಯನಾಕ್ ಆಲಿಯಾ ಮಿಶೇಲಾ ವಿಶ್ಯಾಂತ್ ಕಾಂಯ್ಚ್ ನೆಣಾಂ ಆಸ್ಲ್ಲ್ಯಾ ನಿರಫ್ರಾಧ್ಯಾ ಪರಿಂ ದಿಸ್ಲೆಂ.
ಆಲಿಯಾಚಾ ತೊಂಡಾರ್ ತ್ಯಾ ದಿಸಾ ಜಾಲ್ಯಾರ್ಯ್ ಹೆಂಚ್ ವರ್ತನ್ ಆಸ್ಲ್ಲೆಂ. ತರ್ಯ್ ತ್ಯಾ ವರ್ತನಾಚಾ ಪಾಟ್ಲ್ಯಾನ್ ಆಲಿಯಾನ್ ಘುಟಾಕ್ ಲಿಪವ್ನ್ ದವರ್ಲ್ಲೆಂ. ತರ್ ಆಜ್.....? ಆಜ್ ಹ್ಯಾ ಮುಖಮಳಾಕ್ ಆಪುಣ್ ಸತ್ತಿ ಮ್ಹಣೊನ್ ಕಶೆಂ ಪಾತ್ಯೆಂವ್ಚೆಂ?
"ರಾಮ್ ಪ್ರಸಾದಾನ್ ತುಕಾ ಮ್ಹಜ್ಯಾ ವಿಶಿಂ ಸಾಂಗ್ಲಾಂ ಆಸ್ತೆಲೆಂ!" ಆಲಿಯಾಕ್ ಹ್ಯಾ ಪಾವ್ಟಿಂ ರಾಯನಾಕ್ ಪಳಂವ್ಚೆಂ ಧಯ್ರ್ ಆಯ್ಲೆಂ ನಾ.
"ಹಾಂ!"
"ಹಾಂವೆ ತುಕಾ ಕಾಂಯ್ ಅನ್ನ್ಯಾಯ್ ಕರುಂಕ್ ನಾ ರಾಯನ್!"
"ಹ್ಯಾ ಭಾಯ್ರ್ ತುವೆಂ ಕರುಂಕ್ ಕಿತೆಂ ಬಾಕಿ ಆಸ್ಲ್ಲೆಂ?"
"ಮ್ಹಜ್ಯಾ ಮುಕಾರ್ ದುಸ್ರಿ ವಾಟ್ ನಾತ್ಲ್ಲಿ!"
"ದೆಕುನ್......?"
"ಕಿತೆಂ ಕರ್ತಿಂ ಹಾಂವ್? ದುಸ್ರ್ಯಾ ಚಲಿಯಾಂ ಪರಿಂ ಮ್ಹಜ್ಯಾ ಜಿವಿತಾಚೆಂ ಭಿಕ್ ಮಾಗ್ಚಿ ಮ್ಹಾಕಾ ಸವಯ್ ನಾ. ಯಾ ಖಂಯ್ಚರ್ಯ್ ಕೊನ್ಶ್ಯಾಕ್ ವಚೊನ್ ರಡೊಂಕ್ ಹೆಂ ಮ್ಹಜೆಂ ಕಾಳಿಜ್ ಆಯ್ಕಾನಾ!"
"ಮಿಶೇಲಾ ಆನಿ ತುಜ್ಯಾ ಮಧೆಂ ಮಸ್ತ್ ಫರಕ್ ಆಸಾ ಆಲಿಯಾ! ಕೋಣ್ ಖಂಯ್ ಸಾರ್ಕೆಂ ಮ್ಹಳ್ಳೆಂ ತೆಂ ಮ್ಹಾಕಾ ಕಳಾನಾ. ಮಿಶೇಲ್ ಆಪ್ಣಾ ಭಿತರ್ಚ್ ಝುಜ್ತಾಲೆಂ ಜಾಲ್ಯಾರ್ ತುಂ ಭಾಯ್ರ್ ಝುಜ್ತಾಲೆಂಯ್! ಹಾಂವ್ ಇತ್ಲೆ ದೀಸ್ ಮ್ಹಜ್ಯಾ ಮಿಶೇಲಾ ಸಂಗಿಂ ರಾವ್ಲೊಂ ಜಾಲ್ಯಾರ್ಯ್ ತಾಕಾ ಪುರ್ತೆಂ ಅಜೂನ್ ಸಮ್ಜೊಂಕ್ ಸಕ್ಲೊಂ ನಾ. ಆಶೆಂ ಆಸ್ತಾನಾ ಆಜ್ ತುಂ....?"
ತಿತ್ಲ್ಯಾರ್ ಶಮ್ಮಿ ಕುಜ್ನಾ ಥಾವ್ನ್ ಕಾಫಿ ಘೆವ್ನ್ ಆಯ್ಲೆಂ.
ದೊಗಾಂಯ್ನ್ಯ್ ಕಾಫಿ ಘೆತ್ಲಿ.
"ತುಂ ಜಾಣಾಂಯ್ ಮಿಶೇಲಾಚೊ ಸಂಸಾರ್ ಕಸೊ ಆಸ್ಲ್ಲೊ ತೊ.....? ಯೇ ತುಕಾ ದಾಖಯ್ತಾಂ!"
ರಾಯನ್ ಆತಾಂ ಆಲಿಯಾಕ್ ತ್ಯಾ ರುಕಾಟಾಚ್ಯಾ ಸೊಭಿತ್ ಮೆಟಾಂ ವಯ್ಲ್ಯಾನ್ ಆಪವ್ನ್ ವರುನ್ ವಯ್ರ್ ಆಪ್ಲ್ಯಾ ಬೆಡ್ರುಮಾ ತೆವ್ಶಿಂ ಚಮ್ಕಾಲೊ. ಬೆಡ್ರುಮಾಕ್ ಗೆಲ್ಲ್ಯಾ ರಾಯನಾನ್ ತ್ಯಾ ಮಿಶೇಲಾಚಾ ಉಡಾಸಾಚಾ ಆಸ್ತಿಕ್ ಕಾಡುನ್ ಆಲಿಯಾಚಾ ಮುಕಾರ್ ದವರ್ಲೆಂ.
"ಹೊ ಜಾವ್ನಾಸ್ಲ್ಲೊ ಮಿಶೇಲಾಚೊ ಸಂಸಾರ್!" ರಾಯನ್ ಥಂಯ್ಚ್ ಬೆಡ್ರೂಮಾಚಾ ವೊಣೊದಿಕ್ ವೊಣ್ಕಾಲೊ.
ರಾಯನಾನ್ ಆಪ್ಣಾಕ್ ದಾಖಯಿಲ್ಲ್ಯಾ ತ್ಯಾ ಡ್ರೆಸ್ಸಿಂಗ್ ಟೇಬಲಾ ವಯ್ಲ್ಯಾ ಮಾಂಡುನ್ ದವರ್ಲೆಲ್ಯಾ ಮಿಶೇಲಾಚಾ ಆಲ್ಬಮಾಚೆರ್ ಆನಿ ತಾಚ್ಯಾ ಪಂದ್ಲ್ಯಾ ತ್ಯಾ ತಸ್ವೀರೆಂಚೆರ್ ಆಲಿಯಾನ್ ನದರ್ ಮಾರ್ಲಿ. ತಾಂಚಾ ಲಾಗಿಂ ಗೆಲ್ಲ್ಯಾ ತಾಣೆಂ ಆಪ್ಲ್ಯಾ ಹಾತಾಂತ್ಲ್ಯಾ ಕಾಫಿಯೆಚ್ಯಾ ಕಪ್ಪಾಕ್ ತ್ಯಾ ಡ್ರೆಸ್ಸಿಂಗ್ ಟೇಬಲಾಚೆರ್ ದವರ್ಲೆಂ. ಸವ್ಕಾಸ್ ಮುಕಾರ್ ಬಾಗ್ವೊನ್ ತಾಣೆಂ ತ್ಯಾ ಮಿಶೇಲಾಚಾ ಆಲ್ಬಮಾಕ್ ಹಾತ್ ಘಾಲೊ.
ಮಿಶೇಲಾಚ್ಯಾ ಜಿವಿತಾಚ್ಯಾ ಎಕೇಕ್ಚ್ ಘಟನಾಂಚ್ಯೊ ರುಜ್ವಾತಿ!
ತ್ಯಾ ಬಾಳ್ಶ್ಯಾಪಣಾರ್ ಥಾವ್ನ್ ತ್ಯಾ ತಾಚ್ಯಾ ಕಾಜಾರಾ ಪರ್ಯಾಂತ್!
"ಮಿಶೇಲಾನ್ ಹ್ಯಾ ತಸ್ವೀರೆಂಕ್ ಸೊಡುನ್ ದುಸ್ರೆಂ ಕಿತೆಂಚ್ ಆಶೆಲ್ಲೆಂ ನಾ! ತೆಂ ಹರ್ಯೆಕಾ ವೆಳಾರ್ ಆಪ್ಣಾಕ್ಚ್ ಹ್ಯಾ ತಸ್ವೀರೆಂತ್ ಸೊಧ್ತಾಲೆಂ. ಹ್ಯಾಚ್ ತಾಚ್ಯಾ ಸಂಸಾರಾಂತ್ ತೆಂ ಖುಶ್ ಆಸ್ಲ್ಲೆಂ!" ಉಲಂವ್ಚ್ಯಾ ರಾಯನಾಚೊ ತಾಳೊ ಭರೊನ್ ಯೆತಾಲೊ.
ತಿತ್ಲೆಂಚ್!
ಆಲಿಯಾಕ್ ಮಿಶೇಲಾಚೆಂ ಮುಖಮಳ್ ತಾಚ್ಯಾ ದೊಳ್ಯಾಂ ಮುಕಾರ್ ಯೇವ್ನ್ ರಾವ್ಲ್ಲ್ಯಾ ಪರಿಂ ಜಾಲೆಂ. ತಾಚ್ಯಾ ಸವೆಂ ತಾಚೆಂ ಕಾಳಿಜ್ ಭರೊನ್ ಯೇವ್ನ್ ತಾಕಾ ಹಾಂಗಾ ಥಾವ್ನ್ ಧಾಂವ್ಯಾಂ ತಶೆಂ ಜಾಲೆಂ. ಆಪ್ಣೆಂ ಕಿತೆಂಗೀ ಏಕ್ ವ್ಹಡ್ಲಿ ಚೂಕ್ ಕೆಲ್ಯಾ ಮ್ಹಳ್ಳ್ಯಾ ಪರಿಂ ತಾಕಾ ಭೊಗ್ಲೆಂ. ತ್ಯೊ ತಸ್ವೀರ್ಯೊ ಆಪ್ಣಾಕ್ ಪಳವ್ನ್ ಹಾಸ್ತಾತ್ ತಶೆಂ ಜಾತಾನಾ ತಾಕಾ ಆಪ್ಣಾಕ್ಚ್ ಸಾಂಬಾಳುಂಕ್ ಕಶ್ಟ್ ಜಾಲೆ. ಥೊಡಿಂಚ್ ಖಿಣಾಂ! ಪುಣ್ ತಿತ್ಲ್ಯಾ ಭಿತರ್ ಆಲಿಯಾನ್ ಆಪ್ಣಾಕ್ಚ್ ಸಾಂಬಾಳ್ಳೆಂ. ತಾಣೆಂ ಆಪ್ಣಾಕ್ಚ್ ಸಾರ್ಕೆಂ ಮ್ಹಣೊನ್ ಮಾಂದುನ್ ಘೆತ್ಲೆಂ.
ರಾವ್ಳೆರಾ ಸಾರ್ಕ್ಯಾ ಭೊಂಗ್ಲ್ಯಾಂತ್ ಮಿಶೇಲ್ ಆಸಲೆಂ ಜಿವಿತ್ ಸಾರ್ತಾಲೆಂ? ತೆಂ ಹ್ಯಾ ಜಿವಿತಾಂತ್ ಸುಖಿ ಆಸ್ಲ್ಲೆಂ? ತರ್ ನಿಜಾಯ್ಕ್ಯ್ ತೆಂ ಹ್ಯಾ ರಾಯನಾಕ್ ಫಾವೊ ನ್ಹಯ್ ಆಸ್ಲ್ಲೆಂ! ಆಲಿಯಾ ಆಪ್ಲ್ಯಾ ಕಾಳ್ಜಾಂತ್ಚ್ ಉಲಯ್ಲೆಂ.
"ರಾಯನ್.....?" ಆಲಿಯಾ ರಾಯನಾ ತೆವ್ಶಿಂ ಘುಂವ್ಲೆಂ. ".....ಹಾಂವ್ ಹ್ಯಾ ಮಿಶೇಲಾಚಾ ಆಸ್ತೆಕ್ ಆಪ್ಣಾ ಸವೆಂ ವರುಂಕ್ ಸಕ್ತಾಂ? ಆಜ್ ಮ್ಹಾಕಾಯ್ ಹ್ಯಾ ಸಂಸಾರಾಕ್ ಪಳಂವ್ಚಿ ಆತುರಾಯ್ ಜಾಲ್ಯಾ. ಹಾಂವ್ ತುಕಾ ಹ್ಯಾ ಮಿಶೇಲಾಚಾ ಆಸ್ತಿಕ್ ಪಾಟಿಂ ಹಾಡುನ್ ಪಾವಯ್ತೆಲಿಂ. ಐ ಪ್ರಾಮಿಸ್ ಯು!"
"ನಾ ಆಲಿಯಾ! ಹಿ ಮ್ಹಜ್ಯಾ ಮಿಶೇಲಾಚಿ ಆಸ್ತ್!"
"ತುಂ ಮಸ್ತ್ ಮೋಗ್ ಕರ್ತಾಯ್ ತಾಚೊ.....?"
"ತೆಂ ತಶೆಂಚ್ ಆಸ್ಲ್ಲೆಂ!"
"ತಿ ತುಜಿಚ್ಚ್ ಚೂಕ್ ರಾಯನ್! ತುಜ್ಯಾ ಫಾಯ್ದ್ಯಾ ಖಾತಿರ್ ತುವೆಂ ಗುಡ್ಯಾ ವಯ್ಲ್ಯಾ ಫುಲಾಕ್ ಹಾಡುನ್ ತುಜ್ಯಾ ಗಾರ್ಡನಾಂತ್ ಲಾಂವ್ಚೆಂ ಪ್ರಯತ್ನ್ ಕೆಲ್ಲೆಂಯ್! ಕೋಣ್ ಖಂಯ್ಚಾ ಜಾಗ್ಯಾರ್ ಆಸೊಂಕ್ ಜಾಯ್ ತಾಣಿಂ ಥಂಯ್ಚ್ ಆಸೊಂಕ್ ಜಾಯ್! ತಿಂ ಥಂಯ್ಚ್ ಸೊಭಿತ್!"
ತಿತ್ಲೆಂಚ್!
ರಾಯನ್ ರಾವ್ಲೆಲ್ಯಾ ಕಡೆಚ್ ನೀಟ್ ಜಾಲೊ. ಆಲಿಯಾಚಾ ಉತ್ರಾಂನಿ ತಾಕಾ ವೀಜ್ ಸಕ್ತೆಕ್ ಆಪಡ್ಲೆಲ್ಯಾ ಪರಿಂ ಜಾಲ್ಲೆಂ.
ಆಲಿಯಾ ಇತ್ಲ್ಯಾ ವೆಗ್ಗಿಂ ಹ್ಯಾ ಮಿಶೇಲಾಕ್ ಕಶೆಂ ವಳ್ಕೊಂಕ್ ಪಾವ್ಲೆಂ? ರಾಯನಾಕ್ ಕಾಂಯ್ ಸಮ್ಜಾಲೆಂ ನಾ. ಫಕತ್ತ್ ಹ್ಯಾ ಮಿಶೇಲಾಚಾ ಆಲ್ಬಮಾಕ್ ಆನಿ ತ್ಯಾ ತಸ್ವೀರೆಂಕ್ ಪಳವ್ನ್ ಆಲಿಯಾ ಮ್ಹಜ್ಯಾ ಮಿಶೇಲಾ ವಿಶಿಂ ಜಾಣಾಂ ಜಾಲೆಂ? ಹೆಂ ಕಶೆಂ ಸಾದ್ಯ್? ರಾಯನಾಚಾ ಮತಿಂತ್ ಎಕಾ ಪಾಟ್ಲ್ಯಾನ್ ಏಕ್ ಸವಾಲ್ ಉಟೊನ್ ರಾವ್ಲೆಂ ಜಾಲ್ಯಾರ್ಯ್ ತ್ಯಾ ಸವಾಲಾಂಕ್ ತಾಚ್ಯಾ ದೊಳ್ಯಾಂ ಮುಕಾರ್ ಜವಾಬ್ ಉಟೊನ್ ದಿಸ್ಲಿ ನಾ.
ರಾಯನಾಚಾ ಮತಿಂತ್ಲ್ಯಾ ತಳ್ಮಳ್ಯಾಂ ತೆವ್ಶಿಂ ಧ್ಯಾನ್ ದೀನಾಸ್ತಾನಾ ಆಲಿಯಾನ್ ಆತಾಂ ಡ್ರೆಸ್ಸಿಂಗ್ ಟೇಬಲಾ ವಯ್ರ್ ದವರ್ಲೆಲಿ ಆಪ್ಲಿ ಕಾಫಿ ಹಾತಾಕ್ ಘೆತ್ಲಿ. ಸವ್ಕಾಸ್ ತಾಣೆಂ ತಿ ಆಪ್ಲ್ಯಾ ತೊಂಡಾಕ್ ತೆಂಕ್ಲಿ. ತಿ ಎದೊಳ್ಚ್ ಥಂಡ್ ಜಾವ್ನ್ ಆಯಿಲ್ಲಿ ಜಾಲ್ಯಾರ್ಯ್ ತಾಕಾ ಊಭ್ ಆಸ್ಲ್ಲಿ. ಕಾಫಿ ತೊಂಡಾಕ್ ಧರುನ್ ಆಸ್ಲ್ಲ್ಯಾಪರಿಂಚ್ ಆಲಿಯಾನ್ ರಾಯನಾಕ್ ಪಳೆಲೆಂ. ರಾಯನಾಚಾ ಹಾತಾಂತ್ಲೆಂ ಕಪ್ಪ್ ತಶೆಂಚ್ ತಾಚಾ ಹಾತಾಂತ್ ಭಧ್ರ್ ಆಸ್ಲ್ಲೆಂ. ತಾಣೆಂ ಎದೊಳ್ಚ್ ತೆಂ ಖಾಲಿ ಕರುನ್ ಜಾಲ್ಲೆಂ. ಪುಣ್ ತ್ಯಾ ಕಪ್ಪಾಕ್ ಆಪ್ಲ್ಯಾ ಹಾತಾ ಥಾವ್ನ್ ತಾಣೆಂ ಸಕಯ್ಲ್ ದವರುಂಕ್ ನಾತ್ಲ್ಲೆಂ.
ಆಲಿಯಾನ್ ತಶೆಂಚ್ ತ್ಯಾ ಬೆಡ್ರೂಮಾಂತ್ ಆಪ್ಲಿ ನದರ್ ಧಾಂವ್ಡಾಯ್ಲಿ. ತ್ಯಾ ಉಪ್ರಾಂತ್ ತೆಂ ಸವ್ಕಾಸ್ ಥಂಯ್ ಥಾವ್ನ್ ಭಾಯ್ರ್ ಆಯ್ಲೆಂ.
"ಚಲ್ಯಾಂ.....?" ತಾಣೆಂ ರಾಯನಾಕ್ಚ್ ಪಳೆಲೆಂ.
"ಹಾಂ!" ರಾಯನ್ ಆತಾಂ ಆಪ್ಲ್ಯಾ ಬೆಡ್ರೂಮಾ ಥಾವ್ನ್ ಭಾಯ್ರ್ ಆಯ್ಲೊ.
"ಐ ಯಾಮ್ ಸಾರ್ರಿ ರಾಯನ್!" ಆಲಿಯಾ ಪರ್ತ್ಯಾಕ್ ಉಲಯ್ಲೆಂ.
"ಇಟ್ಸ್ ಓ.ಕೆ.!" ರಾಯನಾಚಾ ತೊಂಡಾರ್ ಕಾಂಯ್ ಬದ್ಲಾವಣ್ ನಾತ್ಲ್ಲಿ.
"ತುವೆಂ ಮ್ಹಾಕಾ ಮಸ್ತ್ ಸಾಂಗಾತ್ ದಿಲಾಯ್! ತ್ಯಾ ದೀಸ್ ಭೋವ್ಶ್ಯಾ ತುಂ ಯೇಂವ್ಕ್ ನಾತ್ಲಲೊಯ್ ಜಾಲ್ಯಾರ್ ಆಜ್ ಹಾಂವ್ ಜಿವಂತ್ಯ್ ಉರ್ತಿಂ ನಾ! ಹೊ ಜೀವ್ ತುವೆಂ ಮ್ಹಾಕಾ ದಿಲ್ಲೆಂ ಭಿಕ್! ಕೆದ್ನಾಂಯ್ ತುಜ್ಯಾ ಖಾತಿರ್ ಹ್ಯಾ ಜಿವಾಕ್ ಬಲಿ ಜಾವ್ನ್ ಭೆಟಂವ್ಕ್ ಗರ್ಜ್ ಪಡಾತ್ ಜಾಲ್ಯಾರ್ ಹಾಂವ್ ಪಾಟಿಂ ಸರ್ಚಿಂ ನಾ! ಹಾಂವ್ ಇತ್ಲೆಂಚ್ ತುಕಾ ಸಾಂಗೊಂಕ್ ಆಯಿಲ್ಲಿಂ. ಜಿವಿತಾಂತ್ಲ್ಯಾ ದಿಸಾಂಚೊ ಕೊಣಾಕ್ ಭರ್ವಸೊ ಆಸಾ.....? ಥ್ಯಾಂಕ್ಸ್!"
ಆಲಿಯಾ ಆತಾಂ ತ್ಯಾ ಸಾಲಾಕ್ ದೆಂವ್ಚಿಂ ಮೆಟಾಂ ದೆಂವೊಂಕ್ ಲಾಗ್ಲೆಂ. ಮೆಟಾಂ ದೆಂವ್ಲ್ಲ್ಯಾ ತಾಣೆಂ ಆಪ್ಲ್ಯಾ ಹಾತಾಂತ್ಲ್ಯಾ ಕಾಫಿಯೆಚ್ಯಾ ಕಪ್ಪಾಕ್ ಥಂಯ್ಚ್ ಟೀಪಾಯಿಚಾ ವಯ್ರ್ ದವರುನ್ ಭಾಯ್ರ್ ಮೆಟಾಂ ಕಾಡ್ಲಿಂ.
ಮುಕ್ಲ್ಯಾ ದಾರಾರ್ ಥಾವ್ನ್ ಭಾಯ್ರ್ ಪಾಂಯ್ ದವರ್ಚ್ಯಾ ಪಯ್ಲೆಂ ಅಚಾನಕ್ ಮತಿಂತ್ ಉದೆವ್ನ್ ಆಯಿಲ್ಲ್ಯಾ ಪಿಶ್ಯಾ ಆಶೆಕ್ ಲಾಗೊನ್ ತೆಂ ಪಾಟಿಂ ಘುಂವ್ಲೆಂ. ಪಾಟಿಂ ಘುಂವ್ಲೆಲ್ಯಾ ತಾಣೆಂ ತಶೆಂಚ್ ತ್ಯಾ ರುಕಾಟಾಚ್ಯಾ ಮೆಟಾಂಚೆರ್ ಉಭೊ ಆಸ್ಲ್ಲ್ಯಾ ರಾಯನಾ ತೆವ್ಶಿಂ ಆಪ್ಲಿ ನದರ್ ಮಾರ್ಲಿ. ರಾಯನಾಕ್ ಪಳವ್ನ್ ಆಪ್ಲ್ಯಾ ತೊಂಡಾರ್ ತಾಣೆಂ ಹಾಸೊ ಹಾಡ್ಲ್ಯೊ.
ತಿತ್ಲೆಂಚ್!
ತ್ಯಾ ಉಪ್ರಾಂತ್ ತೆಂ ರಾವ್ಲೆಂ ನಾ.
ಭಾಯ್ರ್ ಆಯಿಲ್ಲ್ಯಾ ತಾಣೆಂ ಆಪ್ಲ್ಯಾ ಜಿಪಾ ತೆವ್ಶಿಂ ಮೆಟಾಂ ಕಾಡ್ಲಿಂ. ಜೀಪ್ ಸ್ಟಾರ್ಟ್ ಕರುನ್ ತೆಂ ರಾಯನಾಚಾ ಬೊಂಗ್ಲ್ಯಾ ಥಾವ್ನ್ ಭಾಯ್ರ್ ಆಯ್ಲೆಂ. ಮುಕ್ಲ್ಯಾ ಮುಖ್ಯ್ ರಸ್ತ್ಯಾಕ್ ಆಯಿಲ್ಲ್ಯಾ ತಾಣೆಂ ಜಿಪಾಚಿ ಗೇರ್ ಬದ್ಲುನ್ ಜಿಪಾಕ್ ಮುಕಾರ್ ಧಾಂವ್ಡಾಯ್ಲೆಂ.
ಆಲಿಯಾನ್ ಡ್ರೈವ್ ಕರ್ಚೆಂ ತಾಚೆಂ ಜೀಪ್ ರಾಯನಾಚಾ ಬೊಂಗ್ಲ್ಯಾಕ್ ಸೊಡುನ್ ಥೊಡೆಂ ಮುಕಾರ್ ಪಾವ್ಲಾಂ ಮಾತ್ರ್!
ತಿತ್ಲ್ಯಾರ್!
ಡ್ರೈವಿಂಗ್ ಕರುನ್ ಆಸ್ಲ್ಲ್ಯಾಪರಿಂಚ್ ಆಲಿಯಾಚೊ ಹಾತ್ ಆಪ್ಣೆಂ ನ್ಹೆಸ್ಲೆಲ್ಯಾ ಜೀನ್ಸ್ ಪ್ಯಾಂಟಾಚಾ ಬೊಲ್ಸಾಕ್ ರಿಗ್ಲೊ. ತೊ ಹಾತ್ ಭಾಯ್ರ್ ಯೆತಾನಾ ತ್ಯಾ ಹಾತಾ ಸಾಂಗಾತಾ ಏಕಾ ತಸ್ವೀರೆಕ್ ಘೆವ್ನ್ ಭಾಯ್ರ್ ಆಯಿಲ್ಲೊ.
ಮಿಶೇಲಾಚಿ ತಸ್ವೀರ್!
ರಾಯನಾನ್ ಆಲಿಯಾಕ್ ದಾಖಯಿಲ್ಲ್ಯಾ ಮಿಶೇಲಾಚಾ ಸಂಸಾರಾಂತ್ಲಿ ತಸ್ವೀರ್!
ಮಿಶೇಲಾಚಾ ಮ್ಯಾಂಚೆಸ್ಟರಾಚಾ ಸಂಸಾರಾಚಿ ಎಕ್ಚ್ ಏಕ್ ರುಜ್ವಾತ್!
ಏಕ್ ಪಾವ್ಟಿಂ ತ್ಯಾ ತಸ್ವೀರೆಕ್ಚ್ ಪಳವ್ನ್ ಹಾಸ್ಲ್ಲ್ಯಾ ಆಲಿಯಾನ್ ಆಪ್ಲ್ಯಾ ಜಿಪಾಚೆಂ ಆಕ್ಸಿಲೇಟರ್ ದಾಂಬ್ಲೆಂ.
ಸುಮಾರ್ ಮುಕ್ಕಾಲ್ ವೊರಾಚಾ ತಾಚ್ಯಾ ಡ್ರೈವಿಂಗಾ ಉಪ್ರಾಂತ್ ಆಲಿಯಾನ್ ಡ್ರೈವ್ ಕರ್ಚೆಂ ತೆಂ ಜೀಪ್ ಯೇವ್ನ್ ಶಬೀರಾಚಾ ಆಪಾರ್ಟ್ಮೆಂಟಾ ಮುಕಾರ್ ಯೇವ್ನ್ ರಾವ್ಲೆಂ. ಜಿಪಾಕ್ ಪಾರ್ಕಿಂಗಾರ್ ದವರುನ್ ಜಿಪಾರ್ ಥಾವ್ನ್ ದೆಂವ್ಲೆಲ್ಯಾ ಆಲಿಯಾನ್ ಲಿಫ್ಟಾಕ್ ಧರ್ಲಿ. ಲಿಫ್ಟಾ ಮುಕಾಂತ್ರ್ ತೆಂ ವಯ್ರ್ ಆಯಿಲ್ಲೆಂ ತೆಂ ಆಪ್ಲ್ಯಾ ಬಾಪಾಯ್ಚ್ಯಾ ಪ್ಲ್ಯಾಟಾ ಮುಕಾರ್ ಯೇವ್ನ್ ರಾವ್ಲೆಂ. ಥೊಡೊ ವೇಳ್ ತಸೊಚ್ ತ್ಯಾ ದಾರಾ ಭಾಯ್ರ್ ರಾವ್ಲೆಲ್ಯಾ ಆಲಿಯಾನ್ ಸವ್ಕಾಸ್ ದಾರಾಚಿ ಕಾಂಪಿಣ್ ವಾಜಯ್ಲಿ.
ಥೊಡೊಚ್ ವೇಳ್!
ಆಲಿಯಾಚಾ ಆವಯ್ನ್ ದಾರ್ ಉಗ್ತೆಂ ಕೆಲೆಂ.
"ಅಮ್ಮಿ!" ಆಲಿಯಾನ್ ಆಪ್ಲ್ಯಾ ಆವಯ್ಕ್ ವೆಂಗುನ್ ಧರ್ಲೆಂ. ಆಲಿಯಾಕ್ ಪಳವ್ನ್ ಮುಕ್ಲ್ಯಾ ಸೊಫಾರ್ ಬಸ್ಲಲೊ ತಾಚೊ ಬಾಪಯ್ ಉಟೊನ್ ಉಭೊ ಜಾಲೊ.
"ಅಬ್ಬೂ!" ಬಾಪಾಯ್ಕ್ ವೆಂಗ್ಲ್ಲ್ಯಾ ಆಲಿಯಾಚಾ ದೊಳ್ಯಾಂನಿ ಕಸಲ್ಯಾಗೀ ಸಿಂತಿಮೆಂತಾನಿ ಮ್ಹಳ್ಳ್ಯಾಪರಿಂ ದುಖಾಂ ಉದೆಲಿಂ.
"ಕಿತೆಂ ಜಾಲೆಂ ಅಬ್ಬೂ.....?" ಆಲಿಯಾನ್ ಫುಮಾರುನ್ ಯೆಂವ್ಚ್ಯಾ ತಾಳ್ಯಾನ್ ಉತ್ರಾಂ ವಿಂಚ್ಲಿಂ. ತಾಚ್ಯಾ ತಾಳ್ಯಾಂತ್ಲ್ಯಾ ಸವಾಲಾಂತ್ ತಾಕಾ ಕಿತೆಂಗೀ ಜಾಣಾಂ ಜಾಂವ್ಚಿ ಆತುರಾಯ್ ಆಸ್ಲ್ಲಿ.
"ಜಾಲೆಂ ಬೇಟಾ! ತುವೆಂ ಆಶೆಲ್ಲ್ಯಾ ಪರಿಂಚ್ ಜಾಲೆಂ!" ಶಬೀರಾಕ್ ಉಲಂವ್ಕ್ ಕಶ್ಟ್ ಮಾರ್ತಾಲೆ.
"ನಿಮಾಣೆಂ ಪಾಸೊನ್ ತುವೆಂ ತುಜ್ಯಾ ಧುವೆಕ್ಚ್ ಆಯ್ಕಾಲೆಂಯ್ ಅಬ್ಬು!" ಆಲಿಯಾಚಾ ದೊಳ್ಯಾಂನಿ ದುಖಾಂ ದೆಂವ್ತಾಲಿಂ ಜಾಲ್ಯಾರ್ಯ್ ತೆಂ ಆಪ್ಲ್ಯಾ ವೊಂಟಾಂನಿ ಹಾಸೊಂಕ್ ಪ್ರಯತ್ನ್ ಕರ್ತಾಲೆಂ.
"ಬಿಕಾಸ್ ಐ ಲವ್ ಯು ಬೇಟಾ!" ಶಬೀರಾನ್ ವೆಂಗುನ್ ಧರ್ಲೆಲ್ಯಾ ಆಪ್ಲ್ಯಾ ಧುವೆಕ್ ಸೊಡ್ಲೆಂ ನಾ.
ತಿತ್ಲ್ಯಾರ್!
ಆಲಿಯಾಚಾ ದೊಳ್ಯಾಂನಿ ಉದೆವ್ನ್ ತಾಚ್ಯಾ ಆಸ್ಡ್ಯಾಂ ಮುಳಾಂ ಥಾವ್ನ್ ದೆಂವ್ಲ್ಲಿಂ ದೋನ್ ದುಖಾಂ ಶಬೀರಾಚಾ ಖಾಂದಾರ್ ಜಿರ್ಲಿಂ.
ಥೊಡೊ ವೇಳ್ ತಶೆಂಚ್ ಆಪ್ಲ್ಯಾ ಬಾಪಾಯ್ಕ್ ವೆಂಗುನ್ ರಾವ್ಲೆಲ್ಯಾ ಆಲಿಯಾನ್ ಸವ್ಕಾಸ್ ಬಾಪಾಯ್ಕ್ ಸೊಡ್ಲೆಂ. ತಾಚ್ಯಾ ಪಾಟ್ಲ್ಯಾನ್ ತಾಚೊ ಹಾತ್ ತಾಚ್ಯಾ ಪ್ಯಾಂಟಾಚಾ ಬೊಲ್ಸಾಕ್ ರಿಗ್ಲೊ.
ಆತಾಂ ತಾಚ್ಯಾ ಹಾತಾಂತ್ ಪ್ರತ್ಯಕ್ಶ್ ಜಾಲ್ಲಿ ತಿ ಮಿಶೇಲಾಚಿ ತಸ್ವೀರ್!
"ಅಬ್ಬೂ....?" ಮ್ಹಳ್ಳೆಂ ಆಲಿಯಾ, "ಮಿಶೇಲ್!" ಆಪ್ಲ್ಯಾ ಬಾಪಾಯ್ ಮುಕಾರ್ ತಾಣೆಂ ತ್ಯಾ ತಸ್ವೀರೆಕ್ ಉಗ್ಡಾಪೆಂ ಕೆಲಿ.
ಶಬೀರಾನ್ ಧುವೆಚ್ಯಾ ಹಾತಾಂತ್ಲ್ಯಾ ತಸ್ವೀರೆ ವಯ್ರ್ ಆಪ್ಲಿ ನದರ್ ಮಾರ್ಲಿ. ಎಕಾ ಕುಟ್ಮಾಚಿ ತಸ್ವೀರ್ ತಿ! ಪುಣ್ ಸರ್ವಾಂ ಗೊರಿಂ ಮನ್ಶ್ಯಾಂ! ತಾಂಚ್ಯಾ ಮಧೆಂ ಫಕತ್ತ್ ಎಕ್ಲೊ ಮಾತ್ರ್ ಇಂಡಿಯನಾ ಪರಿಂ ದಿಸ್ತಾಲೊ. ತೊ ಆಪ್ಲ್ಯಾ ಹಾತಾಂತ್ ಎಕಾ ಬಾಳ್ಶ್ಯಾಕ್ ಘೆವ್ನ್ ಆಸ್ಲ್ಲೊ. ಶಬೀರ್ ಕೊಣಾಯ್ಕ್ಯ್ ವಳ್ಕಾನಾತ್ಲ್ಲೊ ಜಾಲ್ಲ್ಯಾನ್ ಕೋಣ್ ಖಂಯ್ ಕಿತೆಂ ಮ್ಹಳ್ಳೆಂ ತಾಕಾ ಕಳ್ಚೊ ಸಂಭವ್ಚ್ ನಾತ್ಲ್ಲೊ.
ತಶೆಂಚ್ ಶಬೀರಾನ್ ಧುವೆಚ್ಯಾ ಹಾತಾಂತ್ಲ್ಯಾ ತಸ್ವೀರೆಕ್ ಆಪ್ಲ್ಯಾ ಹಾತಿಂ ಘೆತ್ಲೆಂ.
"ಬೇಟಾ.... ಹೆಂ ಸಾರ್ಕೆಂ ನ್ಹಯ್!" ಶಬೀರಾಚಾ ಮುಖಮಳಾರ್ ಖಂತ್ ಉಟೊನ್ ರಾವ್ಲಿ. ತೊ ಆಪ್ಲ್ಯಾ ಧುವೆಕ್ ಕಿತೆಂಗೀ ಸಾಂಗೊಂಕ್ ಆಶೆಲೊ.
"ತುಜ್ಯಾ ಆಲಿಯಾನ್ ಆಜ್ ಜಿಕೊಂಕ್ಚ್ ಜಾಯ್ ಅಬ್ಬೂ!" ಆಲಿಯಾಚಾ ತಾಳ್ಯಾಂತ್ ಎಕಾ ವಿಚಿತ್ರ್ ಥರಾಚೊ ನಿರ್ಧಾರ್ ಆಸ್ಲ್ಲೊ.
"ಪುಣ್ ಬೇಟಾ.....!"
ಆಲಿಯಾಕ್ ಪಳವ್ನ್ ಕಿತೆಂಗೀ ಸಾಂಗೊಂಕ್ ವೆಚ್ಯಾ ತಾಚ್ಯಾ ತೊಂಡಾಂತ್ ಥಾವ್ನ್ ಉತ್ರಾಂ ಸುಟ್ಲಿಂ ನಾಂತ್. ತೊ ತಶೆಂಚ್ ಆಲಿಯಾಕ್ ಪಳವ್ನ್ ರಾವ್ಲೊ.
ಆಲಿಯಾಚಾ ತೊಂಡಾರ್ ಹಾಸೊ ಪರ್ಜಾಳ್ತಾಲ್ಯೊ!
ತಾಚ್ಯಾ ಜಯ್ತಾಚ್ಯೊ ಹಾಸೊ!
ಶಬೀರಾಕ್ ಹ್ಯಾ ವಗ್ತಾರ್ ಹಾಸೊಂಕ್ ಸಾದ್ಯ್ ನಾತ್ಲ್ಲೆಂ. ತಾಕಾ ತಾಚೆಂ ಧುವ್ ಪಾಟಿಂ ಜಾಯ್ ಆಸ್ಲ್ಲೆಂ. ಪುಣ್ ಆಲಿಯಾ....?
ಆಲಿಯಾಕ್ ಶಬೀರ್ ಬರ್ಯಾನ್ ಜಾಣಾಂ! ಆಪ್ಲ್ಯಾ ಆಶೆ ಆನಿ ಖುಶೆ ಖಾತಿರ್ ಆಪ್ಲೆಂ ಧುವ್ ಕಿತೆಂಯ್ ಕರುಂಕ್ ಸಕ್ತಾ! ಆಪ್ಣಾ ಮುಕಾರ್ ಆತಾಂ ಆಪ್ಲ್ಯಾ ಧುವೆಕ್ ಸಾಂಗಾತ್ ದಿಂವ್ಚೆಂ ಸೊಡ್ಲ್ಯಾರ್ ದುಸ್ರಿ ವಾಟ್ ನಾ.
ತಿತ್ಲೆಂಚ್!
ಆಪ್ಲ್ಯಾ ಧುವೆಚ್ಯಾ ಹಾಸ್ಯಾಂಕ್ ಶಬೀರಾನ್ ಭಲಾತ್ಕಾರೆನ್ ಮ್ಹಳ್ಳ್ಯಾಪರಿಂ ಸಾಂಗಾತ್ ದಿಲೊ. ತಾಕಾ ಆಲಿಯಾ ಪರಿಂ ಹಾಸೊಂಕ್ ಸಾದ್ಯ್ ನಾತ್ಲ್ಲೆಂ. ಕಿತ್ಯಾಕ್, ಹ್ಯಾ ಹಾಸ್ಯಾಂ ಪಾಟ್ಲ್ಯಾನ್ ಆಲಿಯಾನ್ ತಾಚೆಂ ಜಿವಿತ್ಚ್ ಆಡವ್ ದವರ್ಲಾಂ ಮ್ಹಳ್ಳೆಂ ತೆಂ ಶಬೀರ್ ಜಾಣಾಂ!
***********
ನಾಸಿರಾಚಾ ಸಾಕ್ಶೆ ಥಾವ್ನ್ ಆಪ್ಣಾಕ್ ಜಾಯ್ ತಿತ್ಲೊ ಫಾಯ್ದೊ ಜೊಡುಂಕ್ ನಾಯರ್ ಸಕ್ಲೊ ನಾ. ತಾಚ್ಯಾ ಮುಕಾರ್ ಆತಾಂ ಎಕ್ಚ್ಚ್ ವಾಟ್ ಉರ್ಲ್ಲಿ. ರಾಮ್ ಪ್ರಸಾದಾನ್ ಎದೊಳ್ ಪ್ರಸ್ತುತ್ ಕೆಲ್ಲ್ಯಾ ಸಾಕ್ಶೆಂಕ್ಚ್ ಘುಸ್ಪಡಾಂವ್ಚೆಂ! ಹ್ಯಾ ವರ್ವಿಂ ಹ್ಯಾ ಕೇಸಿಕ್ ಮುಕಾರ್ ಲೊಟ್ಚ್ಯಾ ಪರಿಂ ಕರುಂಕ್ ಜಾಯ್. ಆಶೆಂ ಜಾಯ್ಜಯ್ ಜಾಲ್ಯಾರ್ ಆಪ್ಣೆ ಕೊಣಾಕ್ ಧರ್ಚೆಂ?
ತಿತ್ಲೆಂಚ್!
ನಾಯರಾಚಾ ಮತಿಕ್ ಏಕ್ ಬುದ್ವಂತ್ ವಿಚಾರ್ ಝಳ್ಕಾಲೊ.
ಹ್ಯಾ ವಿಚಾರಾಕ್ ಆತಾಂ ಕಾರ್ಯಗತ್ ಕರುಂಕ್ ತೊ ಆಯ್ತೊ ಜಾಲೊ. ಹ್ಯಾ ವಿಚಾರಾಕ್ ಉಜ್ವಾಡಾಕ್ ಹಾಡುಂಕ್ ಜಾಯ್ ಜಾಲ್ಯಾರ್ ಆಪ್ಣೆಂ ಪರ್ತ್ಯಾಕ್ ಏಕ್ ಪಾವ್ಟಿಂ ಸಾವಂತಾಕ್ ಧರುಂಕ್ ಜಾಯ್! ವ್ಹಯ್! ಸಾವಂತ್! ನಾಯರಾನ್ ನಿರ್ಧಾರ್ ಕೆಲೊ.
ಆಜ್ ಪರ್ತ್ಯಾಕ್ ಸಾವಂತಾಚ್ಯಾ ಸಾಕ್ಶೆಚೆಂ ವಿಚಾರಣ್!
"ಮಾಫ್ ಕರುಂಕ್ ಜಾಯ್ ಮಿಸ್ಟರ್ ಸಾವಂತ್! ತುಕಾ ಪರ್ತ್ಯಾಕ್ ಹಾವೆಂ ಕಶ್ಟ್ ದಿಲೆ!"
"ಹಾಂತುಂ ಕಶ್ಟ್ ಕಾಂಯ್ ನಾಂತ್! ಆಫ್ರಾಧ್ಯಾಂಕ್ ಶಿಕ್ಷ್ಯಾ ಖಂಡಿತ್ ಮೆಳೊಂಕ್ ಜಾಯ್!"
"ವ್ಹಾವ್! ತುಜ್ಯಾ ಸ್ಪಿರಿಟಾಕ್ ಮಾಂದುನ್ ಘೆಂವ್ಕ್ ಜಾಯ್!"
"ಐ ಯಾಮ್ ಎ ಡೈರೆಕ್ಟರ್! ಸ್ಪಿರಿಟ್ಚ್ ಮ್ಹಜ್ಯಾ ಸಕ್ಸೆಸಾಚೊ ಸೀಕ್ರೆಟ್!"
"ವಂಡರ್ಫುಲ್!"
"........."
"ತುವೆಂ ಸಾಂಗ್ಚೆಂ ಹ್ಯಾಚ್ ಸ್ಪಿರಿಟಾ ಥಾವ್ನ್ ತುವೆಂ ಆಲಿಯಾ ಖಾನಾಕ್ ಬಚಾವ್ ಕೆಲೆಂಯ್.....?"
"ವ್ಹಯ್!"
"ಹರ್ಯೆಕಾ ಸ್ಪಿರಿಟಾಚಾ ಪಾಟ್ಲ್ಯಾನ್ ಏಕ್ ಮತ್ಲಾಬ್ ಖಂಡಿತ್ ಆಸ್ತಾ ಮಿಸ್ಟರ್ ಸಾವಂತ್! ಹೆಂ ಹಾವೆಂ ನ್ಹಯ್ ಬಗಾರ್ ತುವೆಂಚ್ ಸಾಂಗ್ಲೆಂಯ್! ಯಾಮ್ ಐ ರೈಟ್?"
"ಮತ್ಲಾಬ್ ಮ್ಹಣೊನ್ ಹಾಂವ್ ಸಾಂಗಿನಾ! ಪುಣ್ ಟಾರ್ಗೆಟ್ ಆಸ್ತಾ!"
"ಆಲ್ಮೋಸ್ಟ್ ಸೇಮ್ ಮಿಸ್ಟರ್ ಸಾವಂತ್!"
"ಜಾಂವ್ಕ್ ಪುರೊ!"
"ಆಲಿಯಾಚಾ ವಯ್ರ್ ಹಲ್ಲೊ ಜಾಲ್ಲ್ಯಾ ದಿಸಾ ತುಂ ಆನಿ ರಾಯನ್ ಆಲಿಯಾಚಾ ಪ್ಲ್ಯಾಟಾಕ್ ಪಾವ್ತಾನಾ ತೆಂ ರಗ್ತಾಚಾ ಕೊಂಡಾಂತ್ ಆಸ್ಲ್ಲೆಂ. ವ್ಹಯ್....?"
"ವ್ಹಯ್!"
"ತ್ಯಾ ಪಯ್ಲೆಂ ಆಲಿಯಾಚಾ ಪ್ಲ್ಯಾಟಾ ಭಿತರ್ ಕೊಣೆಂಯ್ ವಚೊಂಕ್ ನಜೊ ಮ್ಹಣೊನ್ ತುಮ್ಕಾ ಪೊಲಿಸ್ ಸಬ್ ಇನ್ಸ್ಪೆಕ್ಟರಾನ್ ವಾರ್ನಿಂಗ್ಯ್ ದಿಲ್ಲೆಂ. ವ್ಹಯ್...?"
"ವ್ಹಯ್!"
"ತರ್ಯ್ ತುಮಿ ಆಲಿಯಾಚಾ ಪ್ಲ್ಯಾಟಾ ಭಿತರ್ ಗೆಲ್ಯಾತ್! ಆನಿ ತುಮ್ಕಾಂ ಕಳ್ಳೆಂ ಕೀ ಆಲಿಯಾ ಎದೊಳ್ ಮೊರೊಂಕ್ ನಾ. ಪುಣ್ ತೆಂ ಮೊರ್ಚ್ಯಾ ಸ್ಥಿತೆರ್ ಆಸಾ. ವ್ಹಯ್....?"
"ವ್ಹಯ್!"
"ಆಲಿಯಾಕ್ ವೆಗಿಂಚ್ ಆಸ್ಪತ್ರೆಕ್ ಪಾವಯ್ನಾಂ ಜಾಲ್ಯಾರ್ ತೆಂ ಮೊರೊಂಕ್ಯ್ ಸಕ್ತೆಂ. ವ್ಹಯ್...?"
"ವ್ಹಯ್!"
"ಆಸ್ಪತ್ರೆಚ್ಯಾ ವಾಟೆರ್ಯ್ ತೆಂ ಮೊರೊಂಕ್ ಸಕ್ತೆಂ. ವ್ಹಯ್.....?"
"ವ್ಹಯ್!"
"ಐ ಮೀನ್ ತುಜ್ಯಾ ಯಾ ರಾಯನಾಚಾ ಹಾತಿಂತ್ ತೆಂ ಪ್ರಾಣ್ ಸೊಡುಂಕ್ ಸಕ್ತೆಂ. ವ್ಹಯ್....?"
"ವ್ಹಯ್!"
"ತುಂ ಜಾಣಾಂಯ್ ಮಿಸ್ಟರ್ ಸಾವಂತ್? ಆಲಿಯಾನ್ ಎಕಾದಾವೆಳಾರ್ ತುಜ್ಯಾ ಹಾತಿಂ ಪ್ರಾಣ್ ಸೊಡ್ಲ್ಲೊ ಜಾಲಾರ್ ಆಫ್ರಾಧ್ ತುಜ್ಯಾ ಮಾತ್ಯಾರ್ ಯೆತೊ ಮ್ಹಳ್ಳೆಂ ತೆಂ......?"
"ವ್ಹಯ್!"
"ಬೋವ್ಶ್ಯಾ ಆಜ್ ಇಕ್ಬಾಲ್ ಆನಿ ರಾಶಿದ್ ಬಸೊನ್ ಆಸ್ಲ್ಲ್ಯಾ ಜಾಗ್ಯಾರ್ ಹ್ಯಾ ವಗ್ತಾರ್ ತುಂ ಬಸೊನ್ ಆಸೊಂಕ್ಯ್ ಸಕ್ತೊಯ್!"
"ವ್ಹಯ್!"
"ತುಜ್ಯಾ ಡೈರೆಕ್ಶನಾಚೊ ಸ್ಪಿರಿಟ್ ತುಕಾ ತುವೆಂ ಕರ್ಚ್ಯಾ ಫಿಲ್ಮಾಕ್ ಹಿಟ್ ಕರುನ್ ತ್ಯಾ ಫಿಲ್ಮಾ ಮಾರಿಫಾತ್ ತುಕಾ ಆವಾರ್ಡ್ ಮೆಳ್ಚ್ಯಾ ಪರಿಂ ಕರ್ತಾ. ವ್ಹಯ್.....?"
"ವ್ಹಯ್!"
"ತರ್ ಮಿಸ್ಟರ್ ಸಾವಂತ್, ತುವೆಂ ಹ್ಯಾ ಆಲಿಯಾ ಥಂಯ್ ಕಾಡ್ಲೆಲ್ಯಾ ಮೆಟಾಚೊ ಮತ್ಲಾಬ್ ವಾ ಟಾರ್ಗೆಟ್ ಕಸಲೊ....?"
"ಜೀವ್ ವಾಂಚಂವ್ಚೊ!"
"ಜೀವ್ ವಾಂಚಂವ್ಚೊ ವಾ ಜೀವ್ ಕಾಡ್ಚೊ?"
"ಅಬ್ಜೆಕ್ಶನ್ ಯುವರ್ ಹಾನರ್!"
"ಅಬ್ಜೆಕ್ಶನ್ ಓವರ್ ರೂಲ್ಡ್!"
"ಸಾಂಗ್ ಮಿಸ್ಟರ್ ಸಾವಂತ್! ಜೀವ್ ವಾಂಚಂವ್ಚೊ ವಾ ಜೀವ್ ಕಾಡ್ಚೊ....?"
"ಆಮಿ ಜೀವ್ ವಾಂಚಯ್ಲಾ!"
"ತುಮಿ ಏಕ್ ಜೀವ್ ವಾಂಚಯ್ತಾನಾ ದೋನ್ ಜಿವಾಂಕ್ ದೊರಿ ಅಂರ್ದಿಲ್ಯಾ!"
"ಅಬ್ಜೆಕ್ಶನ್ ಯುವರ್ ಹಾನರ್!"
"ಅಬ್ಜೆಕ್ಶನ್ ಓವರ್ರೂಲ್ಡ್!"
"ಹಾಚ್ಯಾ ಪಾಟ್ಲ್ಯಾನ್ ಕಾಂಯ್ ಮತ್ಲಾಬ್? ಸಾಂಗ್ ಮಿಸ್ಟರ್ ಸಾವಂತ್?"
"........."
"ಹಾವೆಂ ಆಯ್ಕಾಲಾಂ ಕೀ ತುಂ ಕಾಮ್ ಕರ್ಚ್ಯಾ ಇಂಡಸ್ಟ್ರಿಂತ್ ಕೋ-ಆಪರೇಶನ್ ಬರೆಂ ಚಲ್ತಾ! ತುಂ ರಾಯನ್ ಆನಿ ಆಲಿಯಾ! ಹ್ಯಾ ತೆಗಾಂ ಮಧ್ಲೆಂ ಹೆಂ ಕೋ-ಆಪರೇಶನ್ ಕೊಣಾಕ್ ಟಾರ್ಗೆಟ್ ಕೆಲಾಂ?"
"ಮ್ಹಳ್ಯಾರ್.....?"
"ತುಮಿಂ ತೆಗಾಂಯ್ನಿಂಯ್ ಮೆಳೊನ್ ಇಕ್ಬಾಲಾಕ್ ಆನಿ ರಾಶಿದಾಕ್ ಫಸಯ್ಲಾಂ ಮಿಸ್ಟರ್ ಸಾವಂತ್! ಆಲಿಯಾ ವಯ್ರ್ ಹಲ್ಲೊ ಕೆಲ್ಲೊ ದುಸ್ರೊಚ್ ಆಸಾ! ಎಕ್ಚ್ ತಾಕಾ ಬಚಾವ್ ಕರ್ಚೆಂ ಪ್ರಯತ್ನ್ ಚಲ್ತಾ. ಯಾ ತಾಚ್ಯಾ ಕುಮ್ಕೆನ್ ನಿರಾಫ್ರಾಧ್ಯಾಂ ವಯ್ರ್ ಆಫ್ರಾಧ್ ಮಾಂಡ್ಚೆಂ ಪ್ರಯತ್ನ್ ಚಲ್ತಾ! ಆನಿ ಹಾಂವ್ ಹೆಂ ಕೊರ್ಟಾ ಮುಕಾರ್ ರುಜು ಕರುಂಕ್ ಸಕ್ತಾ!"
ಸಗ್ಳ್ಯಾ ಕೋರ್ಟ್ ರುಮಾಂತ್ ಸಂಪೂರ್ಣ್ ಮೌನ್. ಹಿ ಕೇಸ್ ದಿಸಾಂದೀಸ್ ಭಿತರ್ಲ್ಯಾ ಭಿತರ್ಚ್ ಗೊಂದೊಳಾಂತ್ ರೆವ್ಡಾತಾಲಿ ಶಿವಾಯ್ ಆನಿ ನವೆ ನವೆ ಮಿಸ್ತೆರ್ ಭಾಯ್ರ್ ಯೆತಾಲೆ ಶಿವಾಯ್ ಕೊರ್ಟಾಕ್ ಮಹತ್ವಾಚಿ ಘುಂವ್ಡಿ ದೀಂವ್ಕ್ ಸಕ್ಲಿ ನಾ.
"ಯುವರ್ ಹಾನರ್! ಹ್ಯಾ ಕೆಸಿಕ್ ಸಂಭಂಧ್ ಜಾಲ್ಲಿ ಏಕ್ ವ್ಯಕ್ತಿ ಅಜೂನ್ ಆಂಧ್ಕಾರಾಂತ್ ಆಸಾ. ತ್ಯಾ ವ್ಯಕ್ತಿಕ್ಯ್ ಹ್ಯಾ ಕೊರ್ಟಾಂತ್ ಹಾಜರ್ ಕರುಂಕ್ ಜಾಯ್."
"ತಿ ವ್ಯಕ್ತಿ ಕೋಣ್ ಮಿಸ್ಟರ್ ಡಿಫೆನ್ಸ್ ಪ್ರಾಸಿಕ್ಯೂಟರ್?"
"ಮಿಶೇಲ್! ರಾಯನಾಚಿ ಪತಿಣ್!"
"ಅಬ್ಜೆಕ್ಷಣ್ ಯುವರ್ ಹಾನರ್! ಮಿಶೇಲಾಕ್ ಆನಿ ಹ್ಯಾ ಕೇಸಿಕ್ ಕಾಂಯ್ ಸಂಬಂಧ್ ನಾ!"
"ಸಂಭಂಧ್ ಆಸಾ ಯುವರ್ ಹಾನರ್! ಹಾಂವ್ ಹೆಂ ರುಜು ಕರುನ್ ದಾಖಯ್ತಾಂ!"
"ಅಬ್ಜೆಕ್ಶನ್ ಓವರ್ರೂಲ್ಡ್!"
"ಮಿಶೇಲಾಕ್ ಹ್ಯಾ ಕೊರ್ಟಾಂತ್ ಹಾಜರ್ ಜಾಂವ್ಕ್ ಪರ್ವಣ್ಗಿ ದೀಂವ್ಕ್ ಜಾಯ್ ಯುವರ್ ಹಾನರ್!"
"ಪರ್ಮಿಶನ್ ಗ್ರ್ಯಾಂಟಡ್!"
"ಹೆಂ ಸಾದ್ಯ್ ನಾ ಯುವರ್ ಹಾನರ್!"
"ಸಾದ್ಯ್ ಆಸಾ ಯುವರ್ ಹಾನರ್!"
"ಯುವರ್ ಹಾನರ್! ಸಗ್ಳೆಂ ಮುಂಬಯಿಚ್ ಜಾಣಾಂ ಕೀ ಮಿಶೇಲ್ ನಾಪತ್ತೊ ಜಾಲಾಂ!"
"ಮಿಶೇಲಾನ್ ಅಚಾನಕ್ ನಾಪತ್ತೊ ಜಾಂವ್ಕ್ ಆನಿ ಹ್ಯಾ ಕೇಸಿಕ್ ಮಸ್ತ್ ಲಾಗ್ಶಿಲೊ ಸಂಭಂಧ್ ಆಸಾ ಯುವರ್ ಹಾನರ್!"
"ಹೆಂ ಕೊರ್ಟಾಚಾ ಅಮೂಲ್ಯ್ ವೆಳಾಕ್ ವಿಭಾಡ್ ಕರ್ಚೆಂ ಪ್ರಯತ್ನ್ ಯುವರ್ ಹಾನರ್!"
"ಆಲಿಯಾಚಿ ಹಿ ಕೇಸ್ ಆರಂಭ್ ಜಾಂವ್ಚ್ಯಾ ಪಯ್ಲ್ಯಾ ದಿಸಾ ಮಿಶೇಲ್ ನಾಪತ್ತೊ ಜಾಲಾಂ ಯುವರ್ ಹಾನರ್! ಪುಣ್ ತೆಂ ನಾಪತ್ತೊ ಜಾಂವ್ಕ್ ನಾಂ ತಾಕಾ ಅಪಹರಣ್ ಕೆಲಾಂ! ಹ್ಯಾಚ್ ಖಾತಿರ್ ಹಾಂವ್ ಸಾಂಗೊಂಕ್ ಸೊಧ್ತಾಂ ಕೀ ಮಿಶೇಲಾಕ್ ಆನಿ ಹ್ಯಾ ಕೇಸಿಕ್ ಸಂಭಂಧ್ ಆಸಾ!"
"ಮಿಶೇಲಾಕ್ ಹಾಂಗಾಸರ್ ಖಂಯ್ಚರ್ಯ್ ಕನೆಕ್ಶನ್ ನಾ ಯುವರ್ ಹಾನರ್. ಕೊರ್ಟಾನ್ ಹ್ಯಾ ಪರ್ಮಿಶನಾ ವಯ್ರ್ ಪರ್ತ್ಯಾಕ್ ನದರ್ ಮಾರ್ಲ್ಯಾರ್ ಬರೆಂ!"
"ಕನೆಕ್ಶನ್ ಆಸಾ ಯುವರ್ ಹಾನರ್!"
"ನಾ ಯುವರ್ ಹಾವರ್!"
"ಆಸಾ!"
"ನಾ!"
"ಮಿಶೇಲಾಕ್ ಕೊರ್ಟಾಂತ್ ಪ್ರಸ್ತುತ್ ಕರುಂಕ್ ಜಾಯ್! ಪರ್ಮಿಶನ್ ಗ್ರ್ಯಾಂಟಡ್!"
"ದಿ ಕೋರ್ಟ್ ಇಸ್ ಅಡ್ಜರ್ನ್ಡ್ ಅಂಟಿಲ್ ಫರ್ದರ್ ನೋಟೀಸ್!"
"ಟಕ್!" ಜಡ್ಜ್ ಆಪ್ಲ್ಯಾ ಬಸ್ಕೆರ್ ಥಾವ್ನ್ ಉಟ್ಲೊ.
ಆಯ್ಚ್ಯಾ ದಿಸಾಚಿ ಕಾರ್ಯಾವಳ್ ಸಂಪ್ಲ್ಲಿ.
ಕೊರ್ಟಾಚಿ ಆಯ್ಚಿ ಕಾರ್ಯಾವಳ್ ಸಂಪೊನ್ ಜಡ್ಜ್ ಆಪ್ಲ್ಯಾ ಬಸ್ಕೆರ್ ಥಾವ್ನ್ ಉಟೊನ್ ಭಿತರ್ ಚಮ್ಕಾಲೊ. ತಾಚ್ಯಾ ಸವೆಂ ಕೋರ್ಟ್ ರುಮಾ ಭಿತರ್ ಬಸೊನ್ ಆಸ್ಲ್ಲೆ ಲಾಯರ್ ಆನಿ ಸಾಕ್ಶೆದಾರ್ ಸವ್ಕಾಸ್ ಕೋರ್ಟ್ ರುಮಾ ಥಾವ್ನ್ ಭಾಯ್ರ್ ಚಲೊಂಕ್ ಲಾಗ್ಲೆ.
"ಆಲಿಯಾ.....? ಹಾಂವ್ ತುಕಾ ಉಪ್ರಾಂತ್ ಮೆಳೊಂಕ್ ಯೆತಾಂ! ಮ್ಹಾಕಾ ಥೊಡೆಂ ಕಾಮ್ ಆಸಾ. ಹಾಂವ್ ತೆಂ ಕರುನ್ ಯೆತಾಂ. ಡೋಂಟ್ ವರ್ರಿ ಕಾಂಯ್ ಜಾಯ್ನಾ! ನಾಯರಾಕ್ ಆತಾಂ ದುಸ್ರೊ ಉಪಾಯ್ ನಾ. ಹ್ಯಾ ಪಾಸೊನ್ ತೊ ಆತಾಂ ಹೆ ನಾಟಕ್ ಕರ್ತಾ!" ರಾಮ್ ಪ್ರಸಾದಾನ್ ಆಪ್ಲ್ಯಾ ಹಾತಾಂತ್ಲಿಂ ಪೈಲಾಂ ಕಾಡುನ್ ರಘುಪತಿಚಾ ಹಾತಿಕ್ ದಿಲಿಂ.
"ಸಾವಂತ್ ಕಿತೆಂ ಕರ್ತಾಯ್....?" ಪ್ರಸಾದಾನ್ ಸಾವಂತಾಕ್ ಪಳೆಲೆಂ. "ತು ರಾವ್ತಾಯ್ ಜಾಲ್ಯಾರ್ ಆಮಿಂ ಸಾಂಗಾತಾ ಚಲ್ಯಾಂ! ತುಂ ಆಲಿಯಾ ಸವೆಂ ವೆತಾಯ್ ಜಾಲ್ಯಾರ್.....!"
"ಹಾಂವ್ ವೆತಾಂ ಪ್ರಸಾದ್! ತುಂ ಆಲಿಯಾಕ್ ಕಿತ್ಲ್ಯಾ ವೆಳಾರ್ ಮೆಳೊಂಕ್ ಯೆತಾಯ್ ತೆಂ ಮ್ಹಾಕಾ ಪೋನ್ ಕರುನ್ ಸಾಂಗ್! ಮ್ಹಜಿ ಗರ್ಜ್ ಪಡಾತ್ ಜಾಲ್ಯಾರ್ ಹಾಂವ್ ಯೆತಾಂ!" ಸಾವಂತಾನ್ ಹಾಂಗಾ ಹ್ಯಾ ಕೊರ್ಟಾಂತ್ ರಾವೊನ್ ಕಾಂಯ್ ಕರುಂಕ್ ಸಾದ್ಯ್ ನಾತ್ಲ್ಲೆಂ. ಕೊರ್ಟಾಚಿಂ ಕಿತೆಂಯ್ ಆಫೀಶಿಯಲ್ ಕಾಮಾ ಕರುಂಕ್ ಜಾಯ್ ಜಾಲ್ಯಾರ್ ಫಕತ್ತ್ ರಾಮ್ ಪ್ರಸಾದಾನ್ ಕರುಂಕ್ ಜಾಯ್. ಆಶೆಂ ಆಸ್ತಾನಾ ಹಾವೆಂ ಹಾಂಗಾಸರ್ ರಾಂವ್ಚ್ಯಾ ಪ್ರಾಸ್.....! ಚಿಂತ್ಲ್ಲೊ ಸಾವಂತ್ ಆಲಿಯಾ ಸಾಂಗಾತಾ ವಚೊಂಕ್ ತಯಾರ್ ಜಾಲೊ.
"ಬರೆಂ ತರ್!"
ರಾಮ್ ಪ್ರಸಾದ್ ಆನಿ ರಘುಪತಿ ಕರುನ್ ಮುಕಾರ್ ಕಾರ್ಯಾಲಯಾ ತೆವ್ಶಿಂ ಚಮ್ಕಾಲೆ.
ಸಾವಂತ್ ಆನಿ ಆಲಿಯಾ ದೊಗಾಂಯ್ ಆತಾಂ ಸಾಂಗಾತಾ ಕೊರ್ಟಾ ಭಾಯ್ರ್ ಮೆಟಾಂ ಕಾಡುಂಕ್ ಲಾಗ್ಲಿಂ.
ಸುಮಾರ್ ಮುಕ್ಕಾಲ್ ವೊರಾರ್ ಥಾವ್ನ್ ಮುಂಬಯಿ ಹೈ ಕೋರ್ಟಾಚಾ ಮುಕಾರ್ ರಾವೊನ್ ಕೊಣಾಚ್ಯಾಗೀ ರಾಕೊಣೆರ್ ಆಸ್ಲ್ಲೊ ಬಾಂದ್ರಾ ಪೊಲಿಸ್ ಸ್ಟೆಶನಾಚೊ ಸಬ್ ಇನ್ಸ್ಪೆಕ್ಟರ್ ನರೇಶ್ ಭಟ್ನಾಗರ್, ಕೊರ್ಟಾ ಥಾವ್ನ್ ಭಾಯ್ರ್ ಯೆಂವ್ಚ್ಯಾ ಆಲಿಯಾಚಾ ಸಾಕ್ಶೆಚಾ ಲೊಕಾಕ್ ಪಳವ್ನ್, ಆಪುಣ್ ಬಸೊನ್ ಆಸ್ಲೆಲ್ಯಾ ಜಿಪಾರ್ ಥಾವ್ನ್ ದೆಂವ್ಲೊ.
ಥೊಡ್ಯಾಚ್ ವೆಳಾನ್ ಆಲಿಯಾ ಖಾನ್ ಆನಿ ಸಾವಂತ್ ತಾಂಚಾ ಲಾಯರಾ ಸವೆಂ ಕೊರ್ಟಾ ಥಾವ್ನ್ ಯೆಂವ್ಚೆಂ ತಾಕಾ ದಿಸ್ಲೆಂ. ತಾಂಚ್ಯಾ ಪಾಟ್ಲ್ಯಾನ್ ರಾಶಿದ್, ಇಕ್ಬಾಲ್ ಆನಿ ನಾಯರ್!
ಆಲಿಯಾ ಆನಿ ಸಾವಂತ್ ಇನ್ಸ್ಪೆಕ್ಟರಾಚಾ ಮುಕ್ಲ್ಯಾನ್ ಪಯ್ಲೆಂ ಪಾಶಾರ್ ಜಾಲಿಂ. ಇನ್ಸ್ಪೆಕ್ಟರಾಕ್ ಪಳವ್ನ್ ಆಲಿಯಾ ಹಾಸ್ಲೆಂ.
ಆತಾಂ ಭಟ್ನಾಗರ್ ಸವ್ಕಾಸ್ ಆಪ್ಲಿಂ ಮೆಟಾಂ ಕಾಡುನ್ ಮುಕಾರ್ ಚಮ್ಕಾಲೊ.
"ಯು ಆರ್ ಅಂಡರ್ ಅರೆಸ್ಟ್ ಮಿಸ್ಟರ್ ಇಕ್ಬಾಲ್!" ಭಟ್ನಾಗರ್ ಇಕ್ಬಾಲಾಚಾ ಮುಕಾರ್ ರಾವೊನ್ ಉಲಯ್ಲೊ.
"ತಾಕಾಯ್ ಅರೆಸ್ಟ್ ಕರಿಯಾ!" ಭಟ್ನಾಗರಾನ್ ರಾಶಿದಾಕ್ ದಾಖವ್ನ್ ಆಪ್ಲ್ಯಾ ಪೊಲಿಸಾಂಕ್ ಆದೇಶ್ ದಿಲೊ.
ತಿತ್ಲೆಂಚ್!
ಪೊಲಿಸಾಂನಿ ಫುಡೆಂ ಸರೊನ್ ರಾಶಿದಾಕ್ ಆನಿ ಇಕ್ಬಾಲಾಕ್ ಅರೆಸ್ಟ್ ಕೆಲೆಂ.
ಲಾಯರ್ ನಾಯರಾಕ್ ಅಜ್ಯಾಪ್ ಜಾಲೆಂ. ಕೊರ್ಟಾ ಥಾವ್ನ್ ಭಾಯ್ರ್ ಯೆತಾನಾ ತಾಚ್ಯಾ ತೊಂಡಾರ್ ಆಸ್ಲ್ಲೆಂ ಸಮಾಧಾನ್ ಆತಾಂ ಉಭೊನ್ ತ್ಯಾ ತೊಂಡಾರ್ ಆಶ್ಚರ್ಯ್ ಉದೆಲೆಂ.
"ತುಂ ಜಾಣಾಂಯ್ ಇನ್ಸ್ಪೆಕ್ಟರ್ ತುಂ ಕಿತೆಂ ಕರ್ತಾಯ್......?" ನಾಯರ್ ಬೊಬಾಟ್ಲೊ.
ಇಕ್ಬಾಲಾಕ್ ಆನಿ ರಾಶಿದಾಕ್ ಕಾಂಯ್ಚ್ ಸಮ್ಜಾಲೆಂ ನಾ. ತೆ ಕಾಲುಬುಲು ಜಾಲೆ.
"ಖಂಯ್ಚಾ ಕಾರಾಣಾ ಖಾತಿರ್ ಇನ್ಸ್ಪೆಕ್ಟರ್.....?" ಇಕ್ಬಾಲಾನ್ ಆಪ್ಲ್ಯಾ ತೊಂಡಾರ್ ಥೊಡೊ ರಾಗ್ ಹಾಡ್ಲೊ.
ಭಟ್ನಾಗರ್ ಉಲಯ್ಲೊ ನಾ. ತೊ ಪಾಟಿಂ ಘುಂವ್ಲೊ. ತಿತ್ಲ್ಯಾರ್ ಪೊಲಿಸಾಂನಿ ಇಕ್ಬಾಲಾಕ್ ಆನಿ ರಾಶಿದಾಕ್ ಖೊಡೆ ಘಾಲೆ.
"ಎಕ್ಸ್ಕ್ಯೂಜ್ ಮಿ ಮ್ಯಾಡಮ್!"
ಮುಕಾರ್ ಚಲೊನ್ ವೆಚೆಂ ಆಲಿಯಾ ಆಪ್ಲ್ಯಾ ಪಾಟ್ಲ್ಯಾನ್ ಭಟ್ನಾಗರಾಚೊ ತಾಳೊ ಆಯ್ಕೊನ್ ರಾವ್ಲೆಂ. ತಾಕಾ ಪಾಟ್ಲ್ಯಾನ್ ಥಾವ್ನ್ ಆಪ್ಣಾಕ್ಚ್ ಆಪಯಿಲ್ಲ್ಯಾ ಪರಿಂ ಜಾಲೆಂ.
ತಾಣೆಂ ಇನ್ಸ್ಪೆಕ್ಟರಾಕ್ ಪಳೆಲೆಂ ಮಾತ್ರ್ ಶಿವಾಯ್ ತೆಂ ಕಾಂಯ್ ಉಲಯ್ಲೆಂ ನಾ. ಇನ್ಸ್ಪೆಕ್ಟರಾಕ್ ಪಳಂವ್ಚ್ಯಾ ಆಲಿಯಾಕ್ ಇನ್ಸ್ಪೆಕ್ಟರಾಚಾ ಪಾಟ್ಲ್ಯಾನ್ ಪೊಲಿಸಾಂನಿ ಅರೆಸ್ಟ್ ಕೆಲ್ಲೆ ಇಕ್ಬಾಲ್ ಆನಿ ರಾಶಿದ್ ದಿಸ್ಲೆ. ಆಲಿಯಾಕ್ ಇನ್ಸ್ಪೆಕ್ಟರಾಚಾ ವಯ್ರ್ ಕಿತ್ಯಾಕ್ಗೀ ದುಬಾವ್ ಜಾಲೊ.
"ಯು ಆರ್ ಅಂಡರ್ ಅರೆಸ್ಟ್ ಮಿಸ್ ಆಲಿಯಾ ಖಾನ್!" ಭಟ್ನಾಗರ್ ಆಲಿಯಾಚಾ ಲಾಗಿಂ ಆಯ್ಲೊ.
ಆಲಿಯಾನ್ ತ್ಯಾಚ್ ತಾಚ್ಯಾ ಮುಖಮಳಾ ವಯ್ಲ್ಯಾ ಶಾಂತತಾಯೆಕ್ ವ್ಹಾಳೊನ್ ವಚೊಂಕ್ ದೀನಾಸ್ತಾನಾ ತ್ಯಾಚ್ ಶಾಂತ್ ನದ್ರೆನ್ ಭಟ್ನಾಗರಾಕ್ಚ್ ಪಳೆಲೆಂ.
"ಕಿತ್ಯಾಕ್.....?" ಆಲಿಯಾ ತಶೆಂಚ್ ಭಟ್ನಾಗರಾಕ್ ಪಳೆತಾಲೆಂ.
"ಹೆಂ ಕಿತೆಂ ಆಲಿಯಾ? ರಾಮ್ ಪ್ರಸಾದ್ ಖಂಯ್ ಆಸಾ.....?" ಸಾವಂತ್ ಉಚಾಂಭಳ್ ಜಾಲ್ಲ್ಯಾ ಪರಿಂ ಜಾಲೊ.
ಎದೊಳ್ ಪೊಲಿಸ್ ಜಿಪಾರ್ ಬಸೊನ್ ಆಸ್ಲ್ಲಿಂ ದೊಗಾಂ ಬಾಯ್ಲಾಂ ಕಾನ್ಸ್ಟೇಬಲಾಂನಿ ಆಲಿಯಾ ತೆವ್ಶಿಂ ಮೆಟಾಂ ಕಾಡ್ಲಿಂ.
"ಇನ್ಸ್ಪೆಕ್ಟರ್...? ಹೆಂ ಕಿತೆಂ?" ಸಾವಂತಾಕ್ ಕಾಂಯ್ಚ್ ಸಮ್ಜಾನಾಸ್ತಾನಾ ತಾಣೆಂ ವಿಚಾರ್ಲೆಂ.
ಬಾಯ್ಲಾಂ ಪೊಲಿಸ್ ಕಾನ್ಸ್ಟೇಬಲಾಂನಿ ಆಲಿಯಾಚಾ ಹಾತಾಕ್ ಖೊಡೊ ಘಾಲೊ.
ಆತಾಂ ಹೆವ್ಶಿಂ ತೆವ್ಶಿಂಚಾ ಲೊಕಾಂಚಿ ನದರ್ ಹೆವ್ಶಿಂ ಘುಂವ್ಲಿ.
ಅಚಾನಕ್ ಕೊರ್ಟಾ ಮುಕಾರ್ ಕಿತೆಂ ತರ್ಯ್ ಜಾತಾ ಮ್ಹಳ್ಯಾಪರಿಂ ತಾಂಕಾಂ ಜಾಲೆಂ. ಮೀಡಿಯಾಚೆ ಆಪ್ಲ್ಯಾ ಕ್ಯಾಮರಾಕ್ ಘೆವ್ನ್ ಹೆವ್ಶಿಂ ಧಾಂವೊನ್ ಆಯ್ಲೆ.
ಆತಾಂ ಇನ್ಸ್ಪೆಕ್ಟರಾನ್ ಆಪ್ಲ್ಯಾ ಬೊಲ್ಸಾಂತ್ಲೆಂ ಅರೆಸ್ಟ್ ವಾರಂಟ್ ಭಾಯ್ರ್ ಕಾಡ್ಲೆಂ.
""ಮಿಶೇಲ್ ಆಲ್ಫ್ರೆಡಾಚಾ ಅಪಹರಣ್ ಆನಿ ಮರ್ಡರ್ ಕೇಸಿಂತ್ ತುಮ್ಕಾಂ ಅರೆಸ್ಟ್ ಕೆಲಾಂ!" ಭಟ್ನಾಗರಾನ್ ವಾರಂಟ್ ದಾಖಯ್ಲೆಂ
"ಮಿಶೇಲಾಚೆಂ ಮರ್ಡರ್ ಜಾಲಾಂ.....?" ಸಾವಂತ್ ಉದ್ಗಾರ್ಲೊ. ಸಬ್ ಇನ್ಸ್ಪೆಕ್ಟರಾಚಾ ಉತ್ರಾಂಕ್ ತಾಕಾ ಪಾತ್ಯೆಂವ್ಕ್ ಜಾಲೆಂ ನಾ.
ಇಕ್ಬಾಲಾಕ್ ಆನಿ ರಾಶಿದಾಕ್ ಮಾತ್ಯಾರ್ ಮೊಳಾಬ್ ಕೊಸ್ಳೊನ್ ಪಡ್ಲಲೊ ಆನ್ಭೋಗ್ ಜಾಲೊ.
"ಆಲಿಯಾ.....?" ಸಾವಾಂತಾನ್ ಆಲಿಯಾಕ್ ಪಳೆಲೆಂ. ತೆಂ ಕಾಂಯ್ ಉಲಯ್ನಾತ್ಲ್ಲೆಂ. "ಹಾಂವ್ ರಾಮ್ ಪ್ರಸಾದಾಲಾಗಿಂ ಉಲಯ್ತಾಂ ತುಂ ಕಾಂಯ್ ಭಿಯೆನಾಕಾ!" ಸಾವಂತಾನ್ ಆಲಿಯಾಕ್ ಧಯ್ರ್ ದಿಲೆಂ.
ನಾಯರ್ ಉಭೊ ಜಾಲ್ಲ್ಯಾ ಕಡೆಚ್ ರೂಕ್ ಜಾಲ್ಲೊ. ತಾಣೆಂ ಹ್ಯಾ ಕೊರ್ಟಾ ಮುಕಾರ್ ಆಪ್ಲ್ಯಾ ಕಕ್ಶಿದಾರಾಂಚಾ ಪಾಡ್ತೆನ್ ಕಾಂಯ್ಚ್ ಕರ್ಚ್ಯಾ ಪರಿಂ ನಾತ್ಲ್ಲೆಂ. ಪೊಲಿಸಾಂಕ್ ಆಡಾಂವ್ಚೆಂ ತೆಂ ತಾಚ್ಯಾ ಕಾನೂನಾ ಥಾವ್ನ್ ಭಾಯ್ರ್ ಆಸ್ಲ್ಲೆಂ. ಕಿತ್ಯಾಕ್ ಭಟ್ನಾಗರ್ ಆಪ್ಲ್ಯಾ ಹಾತಾಂತ್ ವಾರಂಟಾ ಸವೆಂ ಹಾಜರ್ ಆಸ್ಲ್ಲೊ.
ತಾಣೆಂ ಕೊರ್ಟಾ ಮುಕಾರ್ ಪ್ರಸ್ತುತ್ ಕರುಂಕ್ ಪರ್ಮಿಶನ್ ಘೆತ್ಲೆಲ್ಯಾ ಮಿಶೇಲಾಚೆಂ ಮರ್ಡರ್ ಜಾಲಾಂ ಮ್ಹಣೊನ್ ತಾಕಾ ಕಳಿತ್ ಜಾತಾನಾ ತಾಚ್ಯಾ ಮತಿನ್ ಕಾಮ್ ಕರ್ಚೆಂಚ್ ಭಂಧ್ ಕೆಲ್ಲೆಂ.
*****************
[ಫುಡೆಂ ಕಿತೆಂ ಜಾತಾ ಮ್ಹಳ್ಳೆಂ ವಾಚುಂಕ್ ರಾಕೊನ್ ರಾವಾ....]
ಕಾದಂಬರಿಕಾರಾಚಿಂ ಉತ್ರಾಂ: 1, 2, 3, 4, 5, 6, 7, 8, 9, 10, 11, 12, 13, 14, 15, 16, 17, 18, 19, 20, 21
About us | Feedback
| Contact us
Copyright © 2005
DAAIZ.COM All rights reserved.
Page concept, designed and maintained by Ashawadi
Publications
