ಯೆಮ್ಕೊಂಡ್

ಕೊಂಕ್ಣೆಚಾ ವಿಂಚ್ಣಾರ್ ಸಾಹಿತ್ಯಾಚೊ ಕೊನ್ಸೊ - ’ದಾಯ್ಜ್’ - ಫಕತ್ತ್ ಕೊಂಕಣಿ ಥಾವ್ನ್ ಕೊಂಕಣಿ ಪರ್‍ಯಾಂತ್, ಕೊಂಕಣಿ ಖಾತಿರ್.

ತುಂವೆಂ ರಚ್ಲೆಲ್ಯಾ ಯೆಮ್ಕೊಂಡಾಂತ್ ಉಜೊ ಖಂಯ್ ಕಸಲೊ ಉಜೊ? ಹ್ಯಾ ಉಜ್ಯಾಂತ್ ಆಸಾತ್ ದೆಂವ್ಚಾರ್, ಹಾತಾಂತ್ ಕೊಲಿತ್ ಘೆವ್ನ್, ತೊಪುನ್ ದುಕಂವ್ಕ್ ಹ್ಯಾ ಯೆಮ್ಕೊಂಡಾಂತ್ ಆಸಾ - ಬೊಬೊ, ಖಿಂಕ್ರಾಟ್ ಆನಿ ಹಾಕ್ ಬೋಬ್! ಹೆಂ ಕಿತೆಂ ಸೊಮಿಯಾಂ?

ಹ್ಯಾ ತುಜ್ಯಾ ಯೆಮ್ಕೊಂಡಾ ವಿಶ್ಯಾಂತ್ ಕಿತೆಂ ವಿಚಾರ್ ಯೆತಾತ್? ಥೊಡೆ ಮ್ಹಣ್ತಾತ್ ತಿ ಏಕ್ ಸ್ಥಿತಿ; ಏಕ್ ಪರಿಸ್ಥಿತಿ. ನಾಂ ಥಂಯ್ ಉಜೊ ನಾ ಬೊಬೊ. ಕಿತೆಂ ಆಯ್ಕತಾಂ ಸೊಮಿಯಾಂ? ಖಂಯ್ ಗೆಲೊ ಉಜೊ?

ಸತಾಂತ್ಲಿಂ ವಿಚಿತ್ರಾಂ - 17. ಸರ್ಗ್ ಯೆಮ್ಕೊಂಡ್ ಆನಿ ಲೀಂಬ್!?

ಜೆಮ್ಮಾ ಪಡೀಲ್

ಆಮ್ಕಾಂ ಸರ್ವಾಂಕ್ ಏಕ್ ಬಿಡಾರ್ ಆಸಾ. ಜಾವ್ಯೆತ್ ತೆಂ ಘರ್. ಜಾವ್ಯೆತ್ ತೆಂ ಮಹಾಲ್ ಯಾ ಖೊಮಾಟ್. ಆಮ್ಕಾಂ ಆಮ್ಕಾಂ ನಿರ್ಮಿಲ್ಲ್ಯಾ ತ್ಯಾ ಘರಾಂತ್ ಆಮಿ ವಸ್ತಿ ಕರ್ತಾಂವ್. ಸಕಾಳಿಂ ಉಟೊನ್ ಭಾಯ್ರ್ ಸರ್ನ್ ಗೆಲ್ಲೊ ಜಾವ್ಯೆತ್ ಕಾಮಾನ್, ಯಾ ಶಿಕ್ಪಾಕ್ ಯಾ ಧಂದೊ ಯಾ ಲೂಟ್‌ಮಾರ್ ಗೆಲ್ಲೊ ಜೈಲಾಂತ್ ನಾಂತರ್ ತಾಚ್ಯಾ ಘರಾ ಬಿಡಾರ್‍ಯಾಕ್ ಪಾಟಿಂ ಯೆತಾ. ತಸಲ್ಯಾ ತ್ಯಾ ಘರಾಂತ್ ಕಿತ್ಲಿಂ ಸ್ವಪ್ಣಾಂ ಜಿವಿತಾಚಿಂ ಉಭಿಂ ಜಾತಾತ್?. ತ್ಯಾ ಘರಾಂತ್ ಹಾಸೊ, ದೂಕ್, ರಡ್ಣೆಂ, ಗಾಳಿ, ಶಿರಾಪ್ ಚಲ್ಚೆಂ ತೆಂ ಸದಾಂಚೆಂ. ಮೊಸೊರ್, ರಾಗ್, ಹಗೆಂ, ಮೋಗ್ ಥಂಯ್ ಉಭ್ಜತಾ; ಕಿರ್ಲಾತಾ. ಮೋಗ್ ಚಡ್ ಕರುನ್ ವಚೊನ್ ಘರಾ ಭಿತರ್ ಭುರ್ಗ್ಯಾಂಚೆಂ ಯೆಣೆಂ.

ಸಕಾಳಿಂ ಜಾಲ್ಲೆಂಚ್ ಸುಕ್ಣಿಂ ಸಾವ್ಜಾಂ ಪಂಗಡ್ ಜಾವ್ನ್ ಯಾ ಜೊಡೆಂ ಜಾವ್ನ್ ತಾಂಚ್ಯಾ ಘೊಂಟೆರಾ ಥಾವ್ನ್ ಭಾಯ್ರ್ ಯೆತಾತ್. ನೀಳ್ ಮೊಳ್ಬಾ ಪಂದಾ ಹರ್ದೆಂ ಉಸವ್ನ್ ತಿಂ ಉಭ್ತಾತ್. ಸಾಂಜ್ ಜಾತಾನಾ ಪಾಟಿಂ ತಾಂಚ್ಯಾ ಘೊಂಟೆರಾಕ್ ಪಾಟಿಂ ಯೆತಾತ್. - ಹೆಂ ಏಕ್ ನಿಯಮ್ ನಾಕಾ ಜಾಲ್ಯಾರೀ ಘಡ್ತಾ.

ಹರ್ಯೆಕ್ ಜೀವಿ ಹ್ಯಾ ಸಂಸಾರಾಂತ್ಲಿ ಜಾವ್ಯೆತ್ ಧರ್ಣಿ ವಯ್ರ್ ಯಾ ಉದ್ಕಾ ಪಂದಾ, ಎಕಾ ಆರಂಬಾ ಥಾವ್ನ್ ಉದೆತಾತ್. ಎಕಾ ಅಂತಾಕ್ ಪಾವ್‌ಲ್ಲ್ಯಾ ತಕ್ಷಣ್ ತಿಂ ಆಳ್ವತಾತ್!.

ಹೆಂ ಸತ್ ತುಕಾ, ಮ್ಹಾಕಾ ಆನಿ ತಾಕಾ - ಸರ್ವಾಂಕ್. ಎಕಾ ಉತ್ರಾನ್ ಹ್ಯಾ ಸಂಸಾರಾ ಥಾವ್ನ್ ಹರ್ಯೆಕ್ಲ್ಯಾಕ್ ವಿಲೀನ್ ಜಾಂವ್ಕ್ ಆಸಾ. ವಚೊಂಕ್ ಮನ್ ನಾ ತರೀ ಕೆಲ್ಲಿಂ ಕಾಮಾಂ ಸಂಪೂರ್ಣ್ ಕರುಂಕ್. ಜನ್ಮ್ ದಿಲ್ಲೊ ದೇವ್ ಆಯ್ಕಾನಾ. ಕಾಂಪಿಣ್ ಧಾಂಬ್‌ಲ್ಲ್ಯಾ ಫರಾ ಉಟೊನ್ ವಚ್.

ಖಂಯ್ ವೆಚೆಂ?

ಲಿಂಬಾಕ್?

ಯೆಮ್ಕೊಂಡಾಕ್ ಯಾ ಸರ್ಗಾಕ್?

ಹರ್ಯೆಕ್ ಸಮೊಡ್ತೆನ್ ಎಕ್‌ಚ್ ಸಾಂಗ್ಚೆಂ; ’ವಯ್ರ್ ಸರ್ಗ್ ಆಸಾ. ಭಾರಿ ಬರೊ. ಥಂಯ್ ಕಷ್ಟ್ ನಾ; ಕಾಮ್ ನಾ. ಘಾಮ್ ನಾ. ಘಾಮ್ ಆಯ್ಲ್ಯಾರೀ ಘಾಣ್ ನಾ. ಭಾರಿ ಉಲ್ಲಾಸ್. ಸಂಗೀತ್, ಪದಾಂ. ಹೆಂ ಕಿತೆಂ ದೆವಾ? ತುವೆಂ ತುಜ್ಯಾ ರಾಜಾಂತ್ ಎಕಾ ಥರಾಚೊ ’ಕ್ಲಬ್ಬ್’ ದವರ್ಲಾಯ್? ಹರ್ಯೆಕ್ಲೊ ಹರ್ಯೆಕ್ಲ್ಯಾಕ್ ಫಕತ್ತ್ ಜಾಯ್ ಸರ್ಗ್!

ಸರ್ಗ್ ಮ್ಹಳ್ಯಾರ್ ಕಿತೆಂ ಸೊಮಿಯಾಂ?

ತ್ಯಾ ತುಜ್ಯಾ ಸರ್ಗಾ ಖಾತಿರ್ ಹ್ಯಾ ತುಜ್ಯಾ ಸಂಸಾರಾಂತ್ ಜಿಯೆಂವ್ಕ್ ಕಷ್ಟಾಂಚೆಂ ಜಾಲೆಂ. ಆಮ್ಚೆಂ ರಗಾತ್ ಪಿಯೆವ್ನ್ ತುಕಾ ಸಂತುಷ್ಟ್ ಕರುಂಕ್, ತುವೆಂ ನಿರ್ಮಿತ್ ಕೆಲ್ಲ್ಯಾ ಸರ್ಗಾಕ್ ವಚೊಂಕ್ ’ದುಸ್ರೆ’ ಪರ್ಜೆಕ್ ಖುನಿ ಕೆಲ್ಯಾರೀ ಪರ್ವಾನಾ. ತುಜೊ ಸರ್ಗ್ ಮ್ಹಾಕಾ ಜಾಯ್. ದುಸ್ರ್ಯಾಂಕ್ ಗುಡ್ಡಾವ್ನ್, ತಾಂಚ್ಯಾ ತಕ್ಲೆಕ್ ಚಡೊನ್, ಸರ್ಗಾಚೊ ನಿಸಣ್ ಚಡೊಂಕ್ ಹಾಂವ್ ತಯಾರ್.

ಥೊಡೆ ಮ್ಹಣ್ತಾತ್ ತುಜ್ಯಾ ಸರ್ಗಾಂತ್ ಭಾರಿ ಗಮ್ಮತ್ ಕಂಯ್. ಸೊಭಿತ್ ಸೊಭಿತ್ ಚೆಡ್ವಾಂ.... ಮಿಸ್ ವರ್ಲ್ಡ್, ಮಿಸ್ಸ್ ಯುನಿವರ್ಸ್ ಅಸಲ್ಯೊ ಬಾವ್ಲ್ಯೊ ಥಂಯ್ ತಾಂಚ್ಯಾ ಪಾಂಯಾಂಚಿಂ ಚಿನೆಲಾಂ. ದೆಕುನ್ ಜಾವ್ಯೆತ್ ವೆಗ್ಗಿಂ ಥಂಯ್ ಪಾವೊಂಕ್ ಆಪ್ಣಾಕ್‌ಚ್ ಬಲಿ ದಿತಾನಾ ಪಾಪಾಚ್ಯಾಂಕ್ ಲಗಾಡ್ ಕಾಡ್ತಾತ್.

ತುವೆಂ ಸರ್ಗ್ ಹ್ಯಾ ಸಂಸಾರಾಂತ್ಲ್ಯಾಕ್ ಧಾಕಯ್ಲಾಂಯ್?

ದೆವಾಚಿ - ತುಜಿ ತಾರ್ ಯಾ ಮೆಸೇಜ್ ಯೆತಾತ್ ಮ್ಹಣ್ಚೆಂ, ತುಜ್ಯಾ ನಾಂವಾರ್ ’ಚ್ಯಾರ್ ಜಣಾಂಕ್ ಬರೆಂಪಣ್ ಜಾಲೆಂ - ಕ್ಯಾನ್ಸರ್ ಗೂಣ್ ಜಾಲೆಂ. ಕಾಳಿಜ್-ಕಿಡ್ನಿ ಸಮಾ ಜಾಲೆಂ’ ಮ್ಹಣ್ ಬೊಬೊ ಘಾಲ್ನ್ ಸಾಂಗ್ಚ್ಯಾ ಭಾಗೆವಂತಾಕ್ ಸರ್ಗ್ ಕಿತ್ಯಾಕ್ ದಾಖಯ್ನಾಂಯ್?

ಪಳೆನಾತ್‌ಲ್ಲ್ಯಾ ಸರ್ಗಾ ವಿಶ್ಯಾಂತ್ ’ಇತ್ಲೆಂ’ ಸರ್ವ್ ಜಾತಾನಾ, ಸರ್ಗ್ ತಾಂಕಾಂ ದಾಕಯ್ - ಉಪ್ರಾಂತ್ ಕಳ್ತಾ ಹಾಂಗಾಚ್ಯಾ ’ಲೊಕಾಂಚಿ’ ಸಂಸ್ಕೃತಿಚಿ ಬದ್ಲಾವಣ್. ತುವೆಂ ಸರ್ಗ್ ರಚ್ಲ್ಯಾ ನಂತರ್, ತುಜ್ಯಾ ಸರ್ಗಾ ರಾಜಾಂತ್ ಉಪಾದ್ರ್ (ದಂಗೊ) ಸುರು ಕಾಲ್ಯಾ ನಂತರ್ ತುವೆಂ ಯೆಮ್ಕೊಂಡ್ ರಚ್ಲೆಂಯ್ ಧನಿಯಾ. ಕಿತ್ಯಾಕ್?

ದುಷ್ಟ್ಯಾಂಕ್, ನಷ್ಟ್ಯಾಂಕ್, ಖೊಟ್ಯಾಂಕ್ ಆನಿ ಖುನಿಗಾರಾಂಕ್ ಸಾಸ್ಣಾಕ್ ದೀಂವ್ಕ್ ಶಿಕ್ಷಾ! ಕಸಲಿ ಶಿಕ್ಷಾ? ತುಂವೆಂ ಕೊಣಾಕೀ ಕಳಿತ್ ಕೆಲಾಂಯ್?

ತುಂವೆಂ ರಚ್ಲೆಲ್ಯಾ ಯೆಮ್ಕೊಂಡಾಂತ್ ಉಜೊ ಖಂಯ್. ಕಸಲೊ ಉಜೊ? ಹ್ಯಾ ಉಜ್ಯಾಂತ್ ಆಸಾತ್ ದೆಂವ್ಚಾರ್, ಹಾತಾಂತ್ ಕೊಲಿತ್ ಘೆವ್ನ್, ತೊಪುನ್ ದುಖಂವ್ಕ್. ಹ್ಯಾ ಯೆಮ್ಕೊಂಡಾಂತ್ ಆಸಾ - ಬೊಬೊ, ಖಿಂಕ್ರಾಟ್ ಆನಿ ಹಾಕ್ ಬೋಬ್! ಹೆಂ ಕಿತೆಂ ಸೊಮಿಯಾಂ?

ಹ್ಯಾ ತುಜ್ಯಾ ಯೆಮ್ಕೊಂಡಾ ವಿಶ್ಯಾಂತ್ ಕಿತೆಂ ವಿಚಾರ್ ಯೆತಾತ್? ಥೊಡೆ ಮ್ಹಣ್ತಾತ್ ತಿ ಏಕ್ ಸ್ಥಿತಿ; ಏಕ್ ಪರಿಸ್ಥಿತಿ. ನಾಂ ಥಂಯ್ ಉಜೊ; ನಾ ಬೊಬೊ. ಕಿತೆಂ ಆಯ್ಕತಾಂ ಸೊಮಿಯಾಂ? ಖಂಯ್ ಗೆಲೊ ಉಜೊ?

ಉಜ್ಯಾಕ್ ವಾರೆಂ ಜಾಯ್. ವಾರ್‍ಯಾಕ್ ಒಕ್ಸಿಜನ್ ಜಾಯ್. ಖಂಯ್ ತುಂವೆಂ ಲಿಪವ್ನ್ ದವರ್ಲಾಂಯ್. ತುಂವೆಂ ರಚ್‌ಲ್ಲೊ ಯೆಮ್ಕೊಂಡ್? ದೆವಾನ್ ರಚಿತ್ ಕೆಲ್ಲ್ಯಾ ವಿಗ್ಯಾನಾಕ್, ವಿಗ್ಯಾನಾಚ್ಯಾ ’ಥಿಯರ್’ ಭಾಯ್ರ್ ಉಜೊ ಪೆಟಯ್ತಾ?

ಖಂಯ್ ಆಸಾ ತುಜೊ ಯೆಮ್ಕೊಂಡ್? ಧಾಖಯ್ ತುಜ್ಯಾ ಭಾಗೆವಂತಾಂಕ್. ಉಪ್ರಾಂತ್ಲೆಂ ಉಪ್ರಾಂತ್!

ಲಿಂಬ್... ಹೆಂ ಕಿತೆಂ ಸೊಮಿಯಾಂ? ಎಕಾ ಥರಾಚೆಂ ’Transit Point’? ಸರ್ಗಾಕ್ ಯಾ ಯೆಮ್ಕೊಂಡಾಕ್ ವೆಚ್ಯಾ ಪಯ್ಲೆಂ ಹೊ ಸಾಂಖೊವ್ ಉತ್ರೊಂಕ್ ಆಸಾ? ಸರ್ಗಾಕ್ ವಚೊಂಕ್ ಮಾತ್ರ್ ಹೊ ಸಾಂಖೊವ್? ಯೆಮ್ಕೊಂಡಾಕ್ ವೆಚ್ಯಾಂಕ್ ಕಾಂಯ್ ಸೊಡ್ ದೊಡ್ ನಾ! ಶೀದಾ..

ಹೊ ಲಿಂಬ್ ಆಸಾ? ಆತಾಂತಾಂ ಸಾಂಗ್ತಾತ್ ಲಿಂಬ್ ಮ್ಹಳ್ಳೆಂ ’Transit Point’ ಬಂಧ್ ಕೆಲಾಂ ಕಂಯ್. ಎಕಾ ತೆಂಪಾರ್ ಆದಾಂವ್ನ್ ಎಪ್ಪಲ್ ಖಾವ್ನ್ ಸರ್ವ್ ಜನಾಂಗಾಕ್ ಪಾತ್ಕಾಂತ್ ಘಾಲೆಂ ತೆಂ ಉತಾರ್ ಆತಾಂ ಬದ್ಲಾಲಾಂ. ಎಪ್ಪಲ್ ನ್ಹಯ್ ಕಂಯ್? ಆಮಿ ಬದ್ಲಾತಾಂವ್. ಆಮ್ಚಿ ಶಿಕವ್ನ್ ಬದ್ಲಾತಾ.

ತರ್ ಯೆಮ್ಕೊಂಡ್, ಸರ್ಗ್??

ದೆವಾ.. ಹಾಂವ್ ಹ್ಯಾ ತುಜ್ಯಾ ಸಂಸಾರಾಂತ್ ಜಿಯೆತಾಂ. ಪಯ್ಲೆಂ ಹಾಂಗಾ ತುಂ ಸರ್ಗ್ ತಯಾರ್ ಕರ್; ಯೆಮ್ಕೊಂಡ್ ಉಭೆಂ ಕರ್. ಖರ್‍ಯಾ ಭಾಗೆವಂತಾಂಕ್, ಬರ್‍ಯಾ ಕಾಳ್ಜಾಚ್ಯಾಂಕ್, ಪೆಲ್ಯಾಚೆಂ ಬರೆಂಪಣ್ ಆಶೆಂವ್ಚ್ಯಾಂಕ್ ಹ್ಯಾ ತುಜ್ಯಾ ಸಂಸಾರಾಂತ್ ತಾಂಕಾಂ ಸರ್ಗಾಕ್ ದವರ್; ಸರ್ಗ್ ದಿ. ಹ್ಯಾ ತುಜ್ಯಾ ಸಂಸಾರಾಂತ್ ಖೊಟೆಂಪಣ್ ಕರ್ಚ್ಯಾ ಪಾಡ್, ಅತ್ತ್ಯಾಚಾರಿಂಕ್ ಯೆಮ್ಕೊಂಡಾಂತ್ ಘಾಲ್; ಯೆಮ್ಕೊಂಡಾಂತ್ ತಾಂಕಾಂ ತುಜಿ ತಾಂಕಾಂ ’ಖರಿ’ ಪರಿಚಯ್ (ಕಠಿಣಾಯ್) ದಾಕಯ್. ದೊಳೆ ಧಾಂಪ್ಚ್ಯಾ ಪಯ್ಲೆಂ ಹಾಂಗಾ ಸರ್ಗ್, ಯೆಮ್ಕೊಂಡ್ ಹಾಂಗಾ ಆಸೊಂದಿ. ವಯ್ರ್ ಗೆಲ್ಲ್ಯಾ ನಂತರ್ ತಿ ದುಸ್ರಿ ಗಜಾಲ್. ಹಾಂಗಾ ’ಸಮಾ’ ಆಸ್ಲ್ಯಾರ್ ’ವಯ್ರ್’ ಸಮಾ ಆಸ್ತೆಲೆಂ. ಹ್ಯಾ ಸಂಸಾರಾಂತ್ ಸರ್ಗಾಚಿ/ಯೆಮ್ಕೊಂಡಾಚಿ ಏಕ್ ದೆಕ್ಣಿ ದಾಕಯ್. ಉಪ್ರಾಂತ್ ಪಳೆ ಹೊ ತುಜೊ ಸಂಸಾರ್.

ಮೋಗ್, ಮಾಯಾಮೋಗ್ ಆನಿ ಬರೆಂ ಕಾಳಿಜ್ ರಾಜ್ ಕರ್ತೆಲೆಂ. ದೆವಾ ಹೆಂ ಕರುಂಕ್ ಹಾಂವ್ ತುಜೆಲಾಗಿಂ ಆಡ್ದೊಸ್ ಮಾಗ್ತಾಂ. ಹಿ ಏಕ್ ವಿನತಿ; ಏಕ್ ಮಾಗ್ಣೆಂ. ನಾಂತರ್ ಹ್ಯಾ ತುಜ್ಯಾ ಸಂಸಾರಾಂತ್ ಕಿತೆಂ ಮುಕಾರ್ ಜಾಯ್ತ್ ಹೆಂ ಮ್ಹಜ್ಯಾ ಕುಂಬು ತಕ್ಲೆಕ್ ಕಿತ್ಲೆಂಚ್ ಸಮ್ಜಾನಾ.

ಮ್ಹಜೆರ್ ರಾಗ್ ಕರಿನಾಕಾ; ತುಂ ದಯಾಳ್. ಪುಣ್ ’ತೆ’ ಮಾತ್ರ್ ಆಯ್ಕಾನಾಂತ್; ಸಾಂಗ್ಲೆಲೆಂ ಆಯ್ಕಾ ಆನಿ ಪಾತ್ಯೆ ಮ್ಹಣ್ಚೆ!

ಆಧ್ಲೆ ಆಂಕ್ಡೆ: ಸಂವಾದ್, 1, 2, 3, 4, 5, 6, 7, 8, 9, 10, 11, 12, 13, 14, 15, 16

ದಾಯ್ಜ್ ಪಾನಾಕ್

About us | Feedback | Contact us
Copyright © 2005 DAAIZ.COM All rights reserved. Page concept, designed and maintained by Ashawadi Publications