Mhojea Gamvant!

Mhojea Gamvant!

Jiber agrum manddtana tonddak ruch labhana, dolleank keattoroktt zatana dixtt suttavi disana. Punn hanga jiber agrumyi na dolleamni keattoroktt‌yi na. Mot matr vikall zavun dolleam somor omaikancher zamvcho zulum' polleun souyer poddon ’tem sodanchem’ mhonn lekunk lagleat. Ek vichitr piddent monis osvosth zala. Khoim thaun‍ki ayil'lo eka thoracho honkar monxak ’opunn‍ch vorto, opunn‍ch sarko’ mholl'llea jinsar jiemvchem sodanchem zalam. Eka tempadhim dhimkurim paulamni paulam kaddunk xikchi hi char disanchi minzaski, dhavent iron vechea mennachea vatiporim iron vetana opnnak kitlem pokorn gelam tem toddou zaun tor‌yi somzota. Dekun atam ’sogllem sarkench asa’ mholl'llim bonautti adorxanchim mukddim tonddacher nhesun, ’voicharikota’ boglen lottun kallokachea bhumyarant rajvottki choddoiteleank eka khinnachi ponntechi vat pettounko hi kovita pechaddta.  

Kovi Melvin J. Vas oprup punn opurbhayecho kovi, ’Attvea Rongacho Dhonnu’ pustokant hannem ubharleleo kaveall imazo toxench sanketik rupancheo saulleo konkonni kaveall bhagint ek othvoch onbhog dita. Hangasor soit kovitechea ekeka kaddveant voicharik chintnancho vhallo ani aikonatle, pollenatle, uloinatle monis somajent bhoron geleat mholl'llem suttavem sangon gel'leporinch amchesomor ek soval ubhem korun veta; ’amim soit hea tin vorgachea monxam poikint asamv?’

Mhojea Gamvant!

Godd'dechi rong‍manchi mhojea gamvcho man
tachim panam usoitana dixtt ucharota xinn
ximpoddlelim patram, pinjlelim tanchi chitram
araunko mellanatlelim sutram, porodear khellchim
jiughat korunk dhamvchim pinturam.

Hea pinturant,

Zonon anim moronna modhlem pampallem pimrgata
auran lottun haddlolo moddu tachea ponda bosla
svopnnam ghanttayilea chilank vhalloi bokhorota
divttonne uskear amase ball svopnnant hasta.

Konnacheagi ghamacho thembo nitoll ankvar
dha kuddke korun tantum-i sodhcho rai kumvor
dolleank pott'tto, hatim tras, mezap koxem
trasicha kuleak tenkon raulam rupiam uxem.

Penttetlea hokle matear chinchechem thorum
dis buddtana angnna pontar doddboddchem gorum
ubhcha palvar hozaramni mora dolle
pachvea xeta konnxeam konnxeanche pinjtat golle.

Festak atam nib‍ch naka, kheastak jib pauta
ijmola korddeank var‌y cholta, devanamvim demvchar‌ch bhomvta. 
Randcha khhurar uzo palvoita fanteachem adan
dispoddto gras mhonntana atmeachem-i zata moronn

Xejra angnnant sunneam majrancho khell
konn monis konn monzat dhosta soval
tornea panar pallnnem bandlolo dhova thembo
chunea vengent soukas dampta dollo.

Konn kitem-i sanga konn koxem-i cholea
rong‍manchie voilea viduxokak man bagaya
sobhasalantle tin mankodd toxech‌ga
eklo dampta dolle, eklo kan, ani eklo tondd.
Mhojea gamvant!