ಕವಿತಾकविताPoem

Hem Voiros (- Valley Quadros)

[kovita] Hem Voiros (- Valley Quadros)

Somsarant jietelea sorv jivim poikint monis mholl'lli jivi bhovo chodd marekar. Ani hem voiros koronacheaki hozar vantteamni marekar voiros jem az-kalchem voiros hem nhoi. Kainan obelak jivexim marixem kel'lem, turkix, khillji, tuglok, mughol, brittix, porchugis oxem vevegolleanchem gulam' zaun atam hea voirosak somajent vistaramvchea amkam sorovank hem voiros dista punn ami konn‌ch pollenamv. Koronak tor‌yi vhokot asot punn hea voirosak na tor hem voiros kosolem tem tuminch somzun ghemvchem.

[kovita] Hem Voiros (- Valley Quadros)

Hem voiros

nhoi kalchem porchem

hem voiros yugayuganchem

kainan obelak marchem

voiros konnench dekanaschem

turkix sultananchea bondhichem

khilljichea gulam'‌ponnachem

tuglokanchea mudd'dargechem

voiros amkam souyechem

bud'dak rajy sanddixem kel'lem

mugholanchea kotthorayechem

brittixanchea xoxonnanchem

porchugisanchea dhurt‌ponnachem

voiros kallea bozarachem

char magun don dimvchem

voiros zomomvchem komamvchem

voiros dallchem tantunch lollchem

dhormak dhormant benddchem

zatik zatint khenddchem

bhaxe bhaxemni fottomvchem

lipi-bolimni dhuspottamvchem

Voiros sogolleank dischem

voiros konnench dekanaschem

monxaponnak vinngem korchem

nhoi kalchem porchem

korona fokot apoddtoch yemvchem

hem amchea jinsant aschem

koronak tor‌yi vhokot asot

hem voiros yugayuganchem

- Valley Quadros. [April, 2020]

Borovpi

Valley Quadros

1984 isve thaun sahityik vaur korun asa. Kothakar, Kovi, Kadomborikar, Vimrxok, Sompadok, Prokaxok toxench Torzonn/Lipyontoronnacho vaur korun asa. Kannik (1988-1991), Daaiz.com (2003-2013), Poinnari.com (2015 thaun), Konkonn‌gar Prokaxon (2020-2024), Ashawadi Prakashan (2000 thaun) sompadok zaunasa. Kannada, Nagari toxench Romi lipimni boroita.

Pustoka rupacheo kadombori; Songhrox (1991), Tum Mhojem (1988), Pattim Gamvak (2002).

Mottvea kannianchim pustokam; Ashawadi (2001), Khillo (2003), Kongal ani Tachi Kukkehll'lli (2005), Sotam ani Khotam (2005), Bondh (2017), Sankou (2020, Nagrint) Mayanogori (2022), WFH ani her kotha (2024), Kovitechim pustokam Chear Mukham (2002), Kott‌putlli (2003), Dorbharantoli Pimrgonn (2005), Bozar (2017), Bhitrolo Kovi (2021).

Kovita odhyoinachim pustokam; Kovitapatth (2005), Doreak Udok (2006), Kallok Natlo Gamv (2007), Mugdonatolim Gitam (2017), Sukti Bhorti (2019). Kovitapatth mholl'llim kovitencher odhyoinachim 50 voir kamasallam choloileant.

Sompadokiyanchim pustokam; Mollbauyolim Sopnnam (2005), Mukhamukhi (2017), Poddsad (201)

Kovita sonklonachim pustokam; Motiam ani Taram (2005), Tinterant Pinturam (2006), Utrant Sutram (2006), Moila Fator (2020).

Kotha sonklonanchim pustokam; Visavea Xekddeacheo Kannio (2006), Sureo Udeta (2019), Sureo Udela (2024), Kotha odhyoinachim pustokam; Kothavihan (2025), Kothapatth (2025), Chol Don Chondrank (2025), Sallkachea Sirivontacheo Kotha (2025), Kothon (2026). Kothapatth mottvea kanniancher 50 voir kamasallam toxench vebinaram choloileant.

Bharti-i sorkarachea somsokriti vibhag (CCRT) thaun (The Cultural Aspects of Sidhdhis in Karnataka) sonxodhonank Senior Fellowship (2019-2021) labhlam. Divo Sahityik Pursokar (2003), Karnataka Konknni Sahity Okaddemichim ut'tim' pustokam (2005, 2006, 2018), Mothais Kuttmacho Kovita Trust-acho Pursokar (2019), Vishwa Konknni Kendrochea Vimala V. Pai. Founddeshan-acho Pursokar, Sandesh Pursokar (Konknni Sahity, 2023), Daiji Dubai Sahityik Pursokar (2023), Goa Konknni Okaddemi thaun Madhav Manjunath Konknni Seva Pursokar (2023) labhleat.

All 79 pages by this writer