ಕವಿತಾकविताPoem

ಕಾಥೊಲಿಕ್ ಪಂಚಾಂಗ್! [ಆಂಡ್ರು ಎಲ್. ಡಿ’ಕುನ್ಹಾ]

[ಕವಿತಾ] ಕಾಥೊಲಿಕ್ ಪಂಚಾಂಗ್! [ಆಂಡ್ರು ಎಲ್. ಡಿ’ಕುನ್ಹಾ]

ಎಕಾ ತೆಂಪಾದಿಂ ಏಕ್ ಘರ್, ಏಕ್ ಘರಾಣೆಂ, ಏಕ್ ಕುಟಮ್ ಮ್ಹಳ್ಯಾರ್ ದರಬಸ್ತ್ ಭಾಂದ್ ಆನಿ ಮಯ್ಪಾಸ್ ಥಂಯ್ಸರ್ ರಾಜ್ ಕರ್ನ್ ಆಸ್ತಾಲೊ. ತಾಂತುಂ ಜೀವ್-ನಿರ್ಜಿವ್ ವಸ್ತುಂಕ್ ಸಯ್ತ್ ಜೊಕ್ತೊ ಮಾನ್ ಆಸ್ತಾಲೊ ಜಶೆಂ ಏಕ್ ಕ್ಯಾಲೆಂಡರ್. ಕಾಥೊಲಿಕ್ ಪಂಚಾಂಗ್ ಮ್ಹಳ್ಯಾರ್ ಎಕಾ ಕ್ರಿಸ್ತಿ ಕುಟ್ಮಾಕ್ ವೆಗ್-ವೆಗಳ್ಯಾ ಮಯ್ನ್ಯಾಚ್ಯಾ ಎಕೆಕಾ ದಿಸಾಚ್ಯಾ ಮಹತ್ವಾವಿಶಿಂ ಕಳಯ್ತಾಲೆಂ ಆನಿ ತ್ಯಾ ಪಂಚಾಂಗಾಚೊ ಪಾಟ್ಲಾವ್ ಕರುನ್ ಕುಟ್ಮಿಕ್ ಕಾರ್ಯಿಂ ಮಾಂಡುನ್ ಹಾಡ್ಚಿ ರಿವಾಜ್ ಆಸ್ಲಿ.

ಪುಣ್ ವೆಳಾಕಾಳಾಕ್ ಸರಿ ಜಾವ್ನ್ ಹ್ಯಾ ಭಾಂದಾಚ್ಯೊ ಸರಿಯೊ ಅಸ್ಕತ್ ಜಾವ್ನ್ ತುಟುನ್ ಪಡುಂಕ್ ಲಾಗ್ಲ್ಯಾತ್ ಆನಿ ಸ್ವ-ಚಿಂತ್ಪಾನ್ ಮನೀಸ್ ದಿಸಾನ್ ದೀಸ್ ಚಡಿತ್ ಆನಿ ಚಡಿತ್ ಸ್ವಾರ್ಥಿ/ಆಬ್ಲೇಶಿ/ಮತ್ಲಭಿ ಜಾವ್ನ್ ಹ್ಯಾ ಮನ್ಶಾ ಮೊಲಾಂಕ್ ಹೊಗ್ಡಾವ್ನ್ ಆಯ್ಲಾ ತೆಂ ಸ್ವತಾ ಮನ್ಶಾಕ್‍ಚ್ ಕಳಿತ್ ನಾ ಜಾಲಾಂ. ಪುಣ್ ಹ್ಯಾ ಪರಿಗತೆಂತ್ ಖಿಳ್ಯಾಸಮೇತ್ ಧರ್ಣಿಕ್ ಶೆವ್ಟೊನ್ ಅಪ್ಲೆಂ ಸರ್ವ್ ಪ್ರೇತನ್ ಕರ್ಚೆಂ ಕಾಥೊಲಿಕ್ ಪಂಚಾಂಗ್ ಖೂಬ್ ಬರೆ ವಿಚಾರ್ ಉತ್ರಾಂವಿಣೆಂಚ್ ಸಾಂಗ್ತಾ ಆನಿ ತಿ ಬೋಬ್ ಅಂಗ್ತರ್‌ಮನಾಂತ್ ಕಾನ್ ಆಸ್ಚ್ಯಾಂಕ್ ಮಾತ್ರ್ ಆಯ್ಕತಾ. ಪುಣ್ ಕವಿತೆಚಿ ಉಂಚಾಯ್ ಅಖೇರಿಚ್ಯಾ ದೋನ್ ವಳಿಂನಿ ದಿಸುನ್ ಯೆತಾ; ಝರಲ್ಲ್ಯಾ ಹುಂಬ್ರಾವಯ್ಲ್ಯಾ ಗಿಟಾಂನಿ ಎಕೇಕ್ ಭಾಂದ್ ಆಯಿಲ್ಲೊ-ಗೆಲ್ಲೊ ಫಕತ್ ಎಕಾ ಆವಯ್ಕ್ ಮಾತ್ರ್ ದಿಸ್ತಾ ಆನಿ ತಿ ಮೊನಿ ಜಾವ್ನ್ ಬೊಸ್ಚೆಂ ಪಳೆತಾನಾ ಕವಿತಾರಸಿಕಾಚ್ಯಾ ಕಾಳ್ಜಾಂತ್ಲಿಂ ಭಗ್ಣಾಂ ಸಯ್ತ್ ಏಕ್ ಘಡಿ ಮೊನಿಂ ಜಾಂವ್ಚ್ಯಾಂತ್ ದುಭಾವ್ ನಾ. ಹ್ಯಾ ಕವಿತೆಕ್ ವಾಚುನ್ ಹ್ಯಾ ಕವಿತೆಚ್ಯಾ ಸಕ್ತೆಚೊ ಭರ್ಪೂರ್ ಸಂತೊಸ್ ಜೊಡುಂಕ್ ತುಕಾಚ್ ಉಲೊ ದಿತಾಂ.

[ಕವಿತಾ] ಕಾಥೊಲಿಕ್ ಪಂಚಾಂಗ್! [ಆಂಡ್ರು ಎಲ್. ಡಿ’ಕುನ್ಹಾ]

ಕಾಥೊಲಿಕ್ ಪಂಚಾಂಗ್!

ವೆಳಾಕಾಳಾಚ್ಯಾ ಪೊಕೊಳಾಯೆಚೆರ್

ಮಾರ್‌ಲ್ಲ್ಯಾ ಖಿಳ್ಯಾಚೆರ್

ಉಮ್ಕಾಳ್ತಾ ಕಾಥೊಲಿಕ್ ಪಂಚಾಂಗ್

ಆಜ್ ಕುಟಾಮ್ ಸಾಂಗಾತಾ ಮೆಳ್ಳಾಂ!

ಜಮೀನಿಚೆರ್ ವೊಡಲ್ಲ್ಯಾ ನವ್ಯಾ ಗಿಟಾಂಚೆರ್

ನವೆ ದೊರೆ ಬಾಂಧುಂಕ್ ತಯಾರಾಯ್

ಮಾಲ್ಘಡ್ಯಾಕ್ ಹೆಣೆಂ ನಿಮಾಣ್ಯಾಕ್ ತೆಣೆಂ…

ಸಾಂಗಾತಾ ಮೆಳಲ್ಲಿಂ ಘಡ್ಯೆನ್ ಪಾಸಾಳ್ಳಿಂ

ಹಾತಿಂ ಘೆವ್ನ್ ವಾಂಟ್ಯಾಂಚಿ ದಸ್ತಾವೆಜಾಂ

ಧರ್ಣಿಕ್ ಶೆವ್ಟಾಲಾಂ ಕಾಥೊಲಿಕ್ ಪಂಚಾಂಗ್

ಖಿಳ್ಯಾ ಸಮೇತ್! ವೊಣೊದಿಂಚೆಂ ರಡ್ಣೆಂ!

ಝರಲ್ಲ್ಯಾ ಹುಂಬ್ರಾವಯ್ಲ್ಯಾ ಗಿಟಾಂಕ್ ಪಳೆವ್ನ್

ಮೊನಿ ಜಾವ್ನ್ ಬಸ್ಲ್ಯಾ ಅವಯ್!

- ಆಂಡ್ರು ಎಲ್. ಡಿ’ಕುನ್ಹಾ [ಫೆಬ್ರೆರ್, 2023]

ಬರವ್ಪಿ

ಆಂಡ್ರ್ಯೂ ಎಲ್. ಡಿಕುನ್ಹಾ

1984 (ಪಾಟ್ಲ್ಯಾ 42 ವರ್ಸಾಂ) ಥಾವ್ನ್ ಕೊಂಕ್ಣೆಂತ್ ಸಾಹಿತ್ಯ್ ರಚುನ್ ಆಸ್ಚೊ ಆಂಡ್ರ್ಯೂ ಎಲ್. ಡಿಕುನ್ಹಾ ಏಕ್ ಲೊಕಾಮೊಗಾಳ್ ಕವಿ. ಗಾಂವಾನ್ ಗುರ್ಪುರ್ ಕಿನ್ನಿಕಂಬ್ಳಾಚೊ ತೊ ಅತಾಂ ಇಜಯ್ ವಸ್ತಿ ಕರ್ನ್ ಆಸಾ. ದೆವಾಧೀನ್ ಡೆನಿಸ್ ಆನಿ ಮೇರಿ ಡಿಕುನ್ಹಾ ಹಾಂಚ್ಯಾ ಸಾತ್ ಭುರ್ಗ್ಯಾಂ ಪಯ್ಕಿ ತೊ ನಿಮಾಣೊ. ತಾಣೆಂ 1000 ವಯ್ರ್ ಕವಿತಾಂ, 150 ಕ್ ಮಿಕ್ವೊನ್ ಲೇಖನಾಂ ಆನಿ 30 ಮಟ್ವ್ಯೊ ಕಾಣಿಯೊ ಬರಯ್ಲ್ಯಾತ್. ’ವ್ಹಳೂ ವ್ಹಳೂ ವ್ಹಾಳ್ ವ್ಹಾಳ್ಯಾ’ (2004 - ಆಶಾವಾದಿ ಪ್ರಕಾಶನ್), ’ಅಂಜುರಾಚೆಂ ಪಾನ್’ (2013 - ಕವಿತಾ ಟ್ರಸ್ಟ್) ಆನಿ ’ಆಯೆರಾಚೊ ಬೂಕ್’ (2014 - ಕರ್ನಾಟಕ ಕೊಂಕಣಿ ಸಾಹಿತ್ಯ್ ಅಕಾಡೆಮಿ) ತಾಚೆ ಪ್ರಕಟಿತ್ ಕವಿತಾ ಪುಂಜೆ. ತಾಚ್ಯಾ "ಅಂಜುರಾಚೆಂ ಪಾನ್" ಪುಸ್ತಕಾಕ್ ಕರ್ನಾಟಕ ಕೊಂಕಣಿ ಸಾಹಿತ್ಯ ಅಕಾಡೆಮಿ ಪ್ರಶಸ್ತಿ, AIKWO (ಅಖಿಲ್ ಭಾರತ್ ಕೊಂಕಣಿ ಬರೊವ್ಪ್ಯಾಂಚೊ ಎಕ್ತಾರ್ ಪುರಸ್ಕಾರ್), ವಿಮಲಾ ವಿ. ಪೈ ವಿಶ್ವ್ ಕೊಂಕಣಿ ಕವಿತಾ ಪುರಸ್ಕಾರ್ ಆನಿ ಡಾ. ಟಿ. ಎಮ್. ಎ. ಪೈ ಪುಸ್ತಕ್ ಪುರಸ್ಕಾರ್ ತಾಕಾ ಲಾಬ್ಲ್ಯಾತ್. ಆಯ್ಲೆವಾರ್ ತಾಚ್ಯಾ "ಉಜ್ವಾಡಾಚ್ಯೆ ವೆಂಗೆಂತ್" ಕವಿತಾ ಪುಸ್ತಕಾಕ್ ಕರ್ನಾಟಕ ಕೊಂಕಣಿ ಸಾಹಿತ್ ಪ್ರಶಸ್ತಿ ಲಾಬ್ಲ್ಯಾ. 2023 ವರ್ಸಾಚಿ ರಾಜ್ಯ್ ಮಟ್ಟಾಚಿ “ಸಂದೇಶ ಕೊಂಕ್ಣಿ ಸಾಹಿತ್ಯ್ ಪ್ರಶಸ್ತಿ” ತಾಕಾ ಲಾಬ್ಲ್ಯಾ.

ಮಂಗ್ಳುರ್ ಆಕಾಶ್‍ವಾಣಿ ಥಾವ್ನ್ ಸುಮಾರ್ 40 ಕೊಂಕ್ಣಿ ಕಾರ್‍ಯಕ್ರಮಾಂ ತಾಣೆಂ ಸಾದರ್ ಕೆಲ್ಯಾಂತ್. ಸುಮಾರ್ 38 ವರ್ಸಾಂ ಆದಿಂ ರಾಕ್ಣೊ ಪತ್ರಾರ್ ‘ಆಂದ್ರು ಮಾಮ್’ ಲಿಖ್ಣೆ ನಾಂವಾನ್ ಭುರ್ಗ್ಯಾಂಚೊ ಸಂಸಾರ್ ವಿಭಾಗ್ ತಾಣೆಂ ಚಲವ್ನ್ ವ್ಹೆಲಾ. ಆಮ್ಚೊ ಯುವಕ್ ಪತ್ರಾರ್ ನಿರ್ವಾಹಕ್ ಸಂಪಾದಕ್ ಜಾವ್ನ್ ವಾವ್ರ್ ದಿಲಾ. "ಇಜಯ್ಚೊ ಕಳೊ" ಪತ್ರಾಚೊ ಸಂಪಾದಕ್ ಜಾವ್ನ್ ವಾವುರ್‍ಲಾ. ದಾಯ್ಜಿ ದುಬಾಯ್ ಬರವ್ಪ್ಯಾಂಚ್ಯಾ ಎಕ್ತಾರಾಚೊ ಸಂಪಾದಕ್ ಜಾವ್ನ್ ವಾವ್ರ್ ದಿಲಾ. ಮಾಯ್‍ಭಾಸ್.ಕೊಮ್ ಜಾಳಿ ಜಾಗ್ಯಾರ್, ರಾಕ್ಣೊ, ದಿರ್ವೆಂ, ಉಜ್ವಾಡ್ ಪತ್ರಾಂನಿ ಕವಿತಾ ಅಂಕಣ್ ತಾಣೆಂ ಚಲಯ್ಲಾಂ. ರಾಕ್ಣ್ಯಾರ್ ತಾಚೊ "ಕಾಸ್ ಸಂಸಾರ್" ಅಂಕಣ್, ನಮಾನ್ ಜೆಜು ಬಾಳೊಕ್ ಪತ್ರಾರ್ "ಖಾಸ್ ಸಂಸಾರ್" ಅಂಕಣ್ ಅನಿ ಆಮ್ಚೊ ಸಂದೇಶ್ ಪತ್ರಾರ್ ಸಕಾಳಿಕ್ ಲೇಖನಾಂ ಸರಾಗ್ ಪ್ರಕಟ್ ಜಾವ್ನ್ ಆಸಾತ್. ತಾಣೆಂ ಆಟ್ ಪುಸ್ತಕಾಂಕ್ ಪ್ರಸ್ತಾವನ್ ಬರಯ್ಲಾಂ. ವೆವೆಗ್ಳ್ಯಾ ಕೊಂಕ್ಣಿ ಕವಿತಾ ಸ್ಪರ್ದ್ಯಾಂಚೊ, ಕೊಂಕ್ಣಿ ಕವಿತಾ ಸಾದರ್ ಸರ್ತೆಂಚೊ ತಶೆಂಚ್ ಕರ್ನಾಟಕ ಕೊಂಕ್ಣಿ ಸಾಹಿತ್ಯ್ ಅಕಾಡೆಮಿಚ್ಯಾ ಪುಸ್ತಕ್ ಪ್ರಶಸ್ತೆಚೊ ವರಯ್ಣಾರ್ ಜಾವ್ನ್ ವಾವ್ರ್ ದಿಲಾ. ಗಾಂವಾಂತ್ ಆನಿ ಪರ್ಗಾಂವಾಂತ್ ಸಬಾರ್ ಕವಿತಾಗೋಶ್ಟಿ ತಾಣೆಂ ಚಲವ್ನ್ ವೆಲ್ಯಾತ್. ಕವಿತಾಂ ವಿಶಿಂ ಸಬಾರ್ ಪ್ರಬಂಧ್ ಮಂಡನ್ ಕೆಲ್ಯಾತ್ ಆನಿ ಉಪನ್ಯಾಸ್ ದಿಲ್ಯಾತ್. “ಕವಿತಾ ಟ್ರಸ್ಟ್” ಚೊ ತೊ ಟ್ರಸ್ಟಿ ಜಾವ್ನ್ ಆಸಾ. ಕವಿತಾ.ಕೊಮ್ ಜಾಳಿ ಜಾಗ್ಯಾರ್ ಸಂಪಾದಕೀಯಾಂ ತೊ ಬರಯ್ತಾ.

All 14 pages by this writer