ಕವಿತಾकविताPoem

मोल ना (- वल्ली क्वाड्रस)

[कविता] मोल ना (- वल्ली क्वाड्रस)

ह्या संसारांत आसचें दरेक एका निर्दिश्ट इराद्यान आसचें आनी दरेकाक अपलेंच म्हळ्ळें मोल आसता. कोणाक तें समजूं वा कोणाक समजानां आसूं. सूऱ्याच्या किर्णांक जांव, मोडांतल्यान देंवच्या उदकाक जांव, व्हाळच्या वार‍्याक जांव कोणेंय मोल भांद‌ल्लें ना वा भांदचेपरिंयी ना पूण मोल समजुंची श्याथी नां देकून सूऱ्यो अपलीं किरणां लिपयना वा दऱ्यो आपलीं ल्हारां लिपयनां, वा व्हारें व्हाळचें रावयना.

पूण आमच्या समाजेंत एका घरांतल्या मांयक आनी बांयक मोल ना म्हणून कवी कित्याक सांग्ता म्हळ्ळें समजुंक हांतल्या एकेका वळिंचेर मात्सो आटोव कर्ची गर्ज आसा. आनी तें आतां तुकाच सोडतां.

[कविता] मोल ना (- वल्ली क्वाड्रस)

मोल ना

म्हज्या बांयक

आनी म्हज्या मांयक

कितेंच मोल ना!

सकाळिंचो नासटो करून

आन वेता भायर

सातें पोतें भुती घेवून

मिनत वांवट ताच्याच खात्यांत

घरांत मनशां, माज्रां

गुडांत पेटे, कुंकडां

गोट्यांत गायरां

सगळीं सोड्यां

कावळे पार्व्याची लेगून जतन कर्ची

चोवीस वोरांय जागीच आसची

सगळ्यांक मोगान पोसची

एक म्हजी मांय

तर’यी आन म्हजो जोडपी

मांय म्हजी मोडपी

देकून म्हज्या बांयक

आनी म्हज्या मांयक

कितेंच मोल ना!

तोटांत माड माडी

शेतांत पिक्ता भात

भागिंत वेग-वेगळीं फुलां

जाग्यांत सक्कड मोलाचें

झडांतलीं फुलां जांव

रुकांतलीं फळां

भागीक, शेताक

तोटाक व घराक

सगळ्यांक उदक दिंवची

एक आसची बांय

न्हावंक, धुवंक

पियेवंक, जियेवंक

काटें भांधच्या

पोट्टू फात्रांक सयत आसा

पूण म्हज्या बांयक

आनी म्हज्या मांयक

कितेंच मोल ना

हांतूं कितेंच जोल ना

बांयक व मांयक

संस्रांत कितेंच तोल ना

तर’यी तांका मोल ना

म्हज्या बांयक आनी मांयक

कितेंच मोल ना!

- वल्ली क्वाड्रस. [फेबरेर, २०२३]

वल्ली क्वाड्रस: च्यार मुखां (२००२), कट‌पुतळी (२००४), दर्भारांतली पिंर्गोण (२००६), बजार (२०१७), भितर‍्लो कवी (२०२०) नांवाचे पांच कविताजमे. कवितापाठ (२००५), दर‍्याक उदक (२००६), काळोक नातलो गांव (२००७), मुगदनातलीं गितां (२०१६), सुक्ती भर्ती (२०१८) म्हळ्ळे पांच कविता विशलेषणाचीं पुसतकां तशेंच कवितेचीं सभार संकलनां तशेंच डिजिटल पुसतकां संपादन करून पर्गटल्यांत. कर्नाटक कोंकणी साहित्य अकाडेमिचे पुरसकार, कविता ट्रसटाचो मथायस कुटमाचो पुरस्कार(२०१८), तशेंच विश्व कोंकणी केंद्राचो विमला वी. पै. पुरस्कार(२०२२) हाका लाभला.

बरवपी

वल्ली क्वाड्रस

१९८४ इस्वे थावन साहित्यीक वावर करून आसा. कथाकार, कवी, कादंबरिकार, विमर्शक, संपादक, प्रकाशक तशेंच तर्जण/लिप्यंतरणाचो वावर करून आसा. काणीक (१९८८-१९९१), दायज.कोम (२००३-२०१३), पयणारी.कोम (२०१५ थावन), कोंकण‌गार प्रकाशन (२०२०-२०२४), आशावादी प्रकाशन (२००० थावन) संपादक जावनासा. कन्नड, नागरी तशेंच रोमी लिपिंनी बरयता.

पुसतका रुपाच्यो कादंबरी; संघरष (१९९१), तूं म्हजें (१९८८), पाटीं गांवाक (२००२).

मोटव्या काणियांचीं पुसतकां; आशावादी (२००१), खिळो (२००३), कंगाल आनी ताची कुक्केहळ्ळी (२००५), सतां आनी खतां (२००५), बंध (२०१७), सांकव (२०२०, नागरिंत) मायानगरी (२०२२), WFH आनी हेर कथा (२०२४), कवितेचीं पुसतकां च्यार मुखां (२००२), कट‌पुतळी (२००३), दर्भारांतली पिंर्गोण (२००५), बजार (२०१७), भितरलो कवी (२०२१),

कविता अध्ययनाचीं पुसतकां; कवितापाठ (२००५), दऱ्याक उदक (२००६), काळोक नातलो गांव (२००७), मुगदनातलीं गितां (२०१७), सुक्ती भर्ती (२०१९). कवितापाठ म्हळ्ळीं कवितेंचेर अध्ययनाचीं ५० वयर कामासाळां चलयल्यांत.

संपादकीयांचीं पुसतकां; मोळबावयलीं सपणां (२००५), मुखामुखी (२०१७), पडसाद (२०१)

कविता संकलनाचीं पुसतकां; मोतियां आनी तारां (२००५), तिंतेरांत पिंतुरां (२००६), उत्रांत सूत्रां (२००६), मयला फातोर (२०२०).

कथा संकलनांचीं पुसतकां; विसाव्या शेकड्याच्यो काणियो (२००६), सूऱ्यो उदेता (२०१९), सूऱ्यो उदेला (२०२४), कथा अध्ययनाचीं पुसतकां; कथाविहान (२०२५), कथापाठ (२०२५), चल दोन चंद्रांक (२०२५), साळकाच्या सिरिवंताच्यो कथा (२०२५), कथन (२०२६). कथापाठ मोटव्या काणियांचेर ५० वयर कामासाळां तशेंच वेबिनारां चलयल्यांत.

भारतीय सर्काराच्या संसकृती विभाग (CCRT) थावन (The Cultural Aspects of Sidhdhis in Karnataka) संशोधनांक सीनियर फेलोशीप (२०१९-२०२१) लाभलां. दिवो साहित्यीक पुरसकार (२००३), कर्नाटक कोंकणी साहित्य अकाडेमिचीं उत्तीम पुसतकां (२००५, २००६, २०१८), मथायस कुटमाचो कविता ट्रसट पुरसकार (२०१९), विश्व कोंकणी केंद्रच्या विमला वी. पै. फौंडेशनाचो पुरसकार, संधेश पुरसकार (कोंकणी साहित्य, २०२३), दायजी दुभाय साहित्यीक पुरसकार (२०२३), कोंकणी अकाडेमी गोंय थावन माधव मंजुनाथ कोंकणी सेवा पुरसकार (२०२३) लाभल्यात.

All 79 pages by this writer