रसत्यादेगेचें फूल [ डयाना शरल‌ लोबो ]

[कविता]  रसत्यादेगेचें फूल  [डयाना शरल‌ लोबो]

निबाक फकत रसत्या देगेंतलें एक फूल, पूण उत्रां उत्रांनी समाजेच्या किर्कोळ मनशांचीं मुखडीं उग्तें कर्न वेची ही कविता परत वाचुंक कर्ची अपुर्भायेची कविता. समाजीक विडंबनांचें मार्मीक चित्रण ह्या कवितेंत दिसून येता आनी हें चित्रण वेळाकाळाक सरी जावन अपलें रूप बदलून जियेता आनी मनीस अजून दोळे आसून कुड्डो जावन जियेता.

बाय डयाना शारल लोबो एक वयचारीक चिंत्पाची, प्रसतूत दुभय शेरांत वसती करून आसा, कोंकणी तशेंच इंगलीश आनी हेर भासेंतलें साहित्य सयत वाचता. सांकेतिकता (Symbolism) व्हापरून बरयिल्ली ही कविता वाचप्याच्या मतिंत लांब काळ पऱ्यांत उर्चांत दुभाव ना. बाखिचें मेजुंक/मापुंक तुकाच सोडतां.

[कविता]  रसत्यादेगेचें फूल  [डयाना शरल‌ लोबो]

रसत्यादेगेचें फूल

रसत्यादेगेचें सोभीत फूल तूं

देकून सबारांक तुजेर अबलेशी मोग

रस्मळ्या केसांक आनी म्होंव तोंवच्या वोंटांक

गिमे-दिसांनी मोल मात्र वीस.दिराम

तांबड्या दिव्यांचो संसार न्हय तुजो

तांची पोजडी भास तूं नेणांय

गिरायकांक अपयनांय

तरी तूं थंयसर जियेताय!

शेणार बसच्या मुसां परीं

कुडीक तुज्या लालेतात दादले

अंगा वयली सुतां वोडुंक

दरग बोटांनी कूड तुजी चेंचुंक

जवाब्दारेचें खजान भर्च्याक

सांडुंन भर्वसो जिविताचो

थोड्यां पयश्यां खातीर पर्की गांवांत

विक्ताय कूड, वीस दिरामाक!

- डयाना शरल‌ लोबो  [फेब्रेर, २०२३]

डयाना शरल‌ लोबो: "डी एस‌ पी" नांवान‌ कोंकणेंत‌ बरंवची डयाना शरल‌ लोबो, वालेन्सियाची. वृत्तेन‌ नर्स. वाचप‌, पयण‌ आनी सिनेमा तिचे हव्यास. वावराक‌ लागून‌ प्रसतूत‌ दुबांयत‌ वसती कर्ता. कन्नड आनी इंगलीश‌ भासांनीय‌ बरयता̤.