ಊಂಚ್ ಭಾಂದ್ಪಾಂತ್

ಧರ್ತೆರ್ ಥಾವ್ನ್ ಉಂಚಾಯೆಕ್ ಚಡ್ಚೆಂ ತಶೆಂಚ್ ಧರ್ತೆರ್ ರಾಂವ್ಚೆಂ ದೊನ್‍ಯೀ ತ್ರಾಸಾಂಚೆಂ. ಜಸೆಂ ಮೆಟಾ ಮೆಟಾಂನಿ ಹರ್ಯೆಕಾ ಘಡ್ಯೆ ವೆವೆಗ್ಳೆ ರಿತಿಚೆ ಸಂಘರ್ಷ್ ಕರುಂಕ್ ಪಡ್ತಾ, ಜೊ ಹ್ಯಾ ಸಂಘರ್ಶಾಂಕ್ ಫುಡ್ ಕರುನ್ ಉಂಚಾಯೆಕ್ ಚಡುಂಕ್ ಸಕ್ತಾ ತೊ ಜಯ್ತ್ ಆಪ್ಣಾಂವ್ಕ್ ಸಕ್ತಾ. ಜಯ್ತಾಚೊ ಶೆವೊಟ್ ಪಾವುಂಕ್ ಹಿಂಚ್ ಸೂತ್ರಾಂ.

ಹಾಂಗಾಸರ್‌ಯೀ ಹೆಚ್ಚ್ ಸಂಧೇಶ್ ಪಾಚಾರ್ಚಿ ಕವಿತಾ ಘೆವ್ನ್ ಆಯ್ಲಾ ಸ್ಟೇನಿ ಬೆಳಾ. ಏಕ್ ಕಾಣ್ಯೆಗಾರ್, ಲೇಖಕ್ ತೆಚ್ಚ್ ಪರಿಂ ಏಕ್ ಕವಿ ಜಾವ್ನ್ ಸ್ಟೇನಿ ಬೆಳಾ ಕೊಂಕ್ಣಿ ಲೊಕಾಕ್ ವಳ್ಕಿಚೊ. ಹ್ಯಾ ಕವಿತೆಚಿ ಸಕತ್ ಮೆಜುಂಕ್ ತುಕಾಚ್ಚ್ ಸೊಡ್ತಾಂ

ಊಂಚ್ ಭಾಂದ್ಪಾಂತ್

ಮ್ಹಜಿ ಸಾತ್ವಿ ಮಾಳಯ್

ಜನೆಲಾ ಭಾಯ್ರ್ ಸಕ್ಲಾ ತಿಳ್ತಾನಾ

ಮನಿಸ್ ಮೂಯ್,

ಆಡ್ ಉಭೆಂ ಚಲ್ಚಿ ವ್ಹಾಳಯ್

ಮುಳಿಂ ಜಾಳಿ ರುಪಾಂಚೆ ಮಾರೊಗ್

ಗಟಾರಾಂ ಭರೊನ್ ವ್ಹಾಳ್ಚೆಂ ಮ್ಹೆಳೆಂ ಉದಾಕ್

ದೊಳೆ ರುಂದಾವ್ನ್ ದೆಕ್ತಾನಾ

ಮನಿಸ್ ಮಧ್ಗಾತ್

ಆವಜಾನ್ ಉಭ್ಚೊ ಮೂಸ್

ಧುಂವರ್ ಭರ್ತಾ, ಧುಳ್ ಉಭ್ತಾ

ವ್ಹಾರೆಂ ಸಗ್ಳೆಂ ಘಾಣ್ಲಾಂ

ಆವ್ರ್-ದುಕೊಳ್ ಸರ್ವ್ ಮುಳಿಂ ಧೊಸ್ತಾ

ಮಧ್ಗಾತ್ ಥೊಡೆ

ಮ್ಹಜ್ಯಾ ಮಾಳಯೆಕ್ ಚೊಂವ್ಚೆಂ ದಿಸ್ತಾ.

ಸಕಯ್ಲೆಂ ಜಿವಿತ್,

ಹಾಂವೆಂಯ್ ಜಿಯೆಲ್ಲೆಂ

ಅಪ್ರೂಪ್ ಜನೆಲಾಕುಶಿಂ ಬಸುಂಕ್ ಲಾಯ್ತಾ

ಬಗ್ಲೆನ್

ಶಿದಿಯೊ ಚಡ್ಚೊ ತಪ್ಪಾಲ್ ಪೆದೊ

ಅಖ್ರೇಚ್ಯಾ ಮಾಳ್ಯೆಕ್ ಪಾವ್ತಚ್ಚ್

ಘಾಮ್ ಪುಸಿತ್ ವೊಂಟಾಂ ಫುಲಯ್ತಾ

- ಸ್ಟೇನಿ ಬೆಳಾ[ನವೆಂಬರ್, 2016]

ಸ್ಟೇನಿ ಬೆಳಾ: ಏಕ್ ಕಾಣ್ಯೆಗಾರ್, ಲೇಖಕ್ ತೆಚ್ಚ್‍ಪರಿಂ ಏಕ್ ಕವಿ ಜಾವ್ನ್ ಸ್ಟೇನಿ ಬೆಳಾ ಕೊಂಕ್ಣಿ ಲೊಕಾಕ್ ವಳ್ಕಿಚೊ. ಕೊಂಕ್ಣೆಶಿವಾಯ್ ಹೆರ್ ಭಾಸಾಂನಿ ಪರ್ಗಟ್ ಜಾಲ್ಲೆಂ ಸಾಹಿತ್ಯ್ ವಾಚುನ್ ಆಯ್ಲಾ ಮಾತ್ ನ್ಹಯ್, ಕೊಂಕ್ಣೆಂತ್ ಪ್ರಗತಿಪರ್ ಸಾಹಿತ್ ರಚುಂಕ್ ಮಿನತ್ ಕರ್ತೆಲ್ಯಾಂ ಪಯ್ಕಿಂತ್ಲೊ ಎಕ್ಲೊ ಮ್ಹಣ್ ತಾಚಿಂ ಬರ್ಪಾಂ ಸಾಂಗ್ತಾತ್.