ಕವಿತಾकविताPoem

[ಪ್ರಜಾಪ್ರಭುತ್ವಾಂತ್]

ಪ್ರಜಾಪ್ರಭುತ್ವಾಂತ್ ಸಂಸ್ರಾಂತ್ ನಾಂವ್ ವೆಲ್ಲೊ ದೇಸ್ ಮ್ಹಣುನ್ ಹರ್ದೆಂ ಪೆಟುನ್ ಆಸ್ಚ್ಯಾ ಆಮ್ಚಾ ದೇಸಾಚಿ ಆಯ್ಚಿ ನೀಜ್ ಪರಿಗತ್ ಪಳೆತನಾ ಮನ್ಶಾಪಣ್ ಸಯ್ತ್ ಲಜೆತಾ. ಎಕಾ ವಾಟೆನ್ ಮನ್ಶಾಕ್ ಖಿಮ್ಚುನ್ ಭೊಖಾಂವ್ಚಿ ಭುಕ್, ಅನ್ಯೇಕಾ ವಾಟೆನ್ ಅಸ್ಕತಾಂಚೆಂ ಸುಕ್‌ಲ್ಲೆ ರಗಾತ್ ಪಿಯೆಂವ್ಚಿ ತಾನ್ ಪಳೆತಾನಾ ಎಕ್ ಸವಲ್ ಉದೆತಾ; ನಿಜಾಯ್ಕೀ ಆಮ್ಕಾಂ ’ಬರೆಂ’ ಮ್ಹಳ್ಯಾರ್ ಕಿತೆಂ ಮ್ಹಣುನ್ ಕಳಿತ್ ಆಸಾ? ದೆವಾಚ್ಯಾ ನಿಬಾನ್ ಜರ್ ಹೆರಾಂಚೆರ್ ಜುಲುಮ್ ಚಲ್ತಾ, ತರ್ ನಿಜಾಯ್ಕೀ ಅಮ್ಕಾಂ ’ದೆವಾಚಿ’ ವಳೊಕ್ ಆಸಾಗಿ? ಹೆರಾಂಕ್ ಲುಟುನ್ ಖಾಂವ್ನ್ ಧೆಂಕ್ ಕಾಡ್ಚೆಂಚ್ ಖರೆಂ ಸಮಧಾನ್ ಮ್ಹಣುನ್ ಪಾತ್ಯೆತೆಲ್ಯಾಂಕ್ ’ಅತ್ಮೊ’ ಮ್ಹಳ್ಳೊ ಆಸಾಗಿ?

ಆಜ್ ಖಂಚ್ಯಾ ಪ್ರಾಂತ್ಯಾಂತ್‌ಯೀ ಆಸುನ್, ಖಂಯ್ಚೆಂಯ್ ದಿಸಾಳೆಂ ಉಗ್ತೆಂ ಕೆಲೆಂ ತರ್, ಹರ್ಯೆಕಾ ಪಾನಾಂನಿ ಉಣ್ಯಾರ್ ಉಣಿಂ ತೀನ್-ಚ್ಯಾರ್ ಘಡಿತಾಂ; ಧರ್ಮಾಚೆ ರಾಕ್ವಲೆಖಾತಿರ್ ಜಾಂವ್ಚ್ಯೊ ಖುನಿ, ಭಲತ್ಕಾರ್, ಹಲ್ಲೊ - ಹ್ಯೊಚ್ಚ್ ಖಬ್ರೊ. ಧರ್ಮಾಖಾತಿರ್ ಜರ್ ಕೊಣಾಯ್ಚಿಯ್ ಖುನ್ ಕರುಂಕ್ ಪಡ್ತಾ, ಕಿತೆಂ ತೊ ಧರ್ಮ್ ತಿತ್ಲೊಯ್ ಅಸ್ಕತ್? ಹಿಂ ಸವಾಲಾಂ ಅಧುರಿಂಚ್ ಉರ್ತಾತ್ ಆನಿ ಕವಿಚಿಂ ಚಿಂತ್ನಾಂ ಅಪ್ಶಿಂಚ್ ಮೊರ್ತಾತ್.

ಸ್ವತಂತ್ರ್ ದಿಸಾಚೊ ಮಹತ್ವ್ ಆಮ್ಚ್ಯಾ ಆಯ್ಚ್ಯಾ ಕಾಳಾಚಿ ಹಕೀಗತ್ ಪಿಂತ್ರಾಂವ್ಚಿ ಹಿ ಕವಿತಾ ವಾಚುಂಕ್, ಮಾಪುಂಕ್, ಪಾರ್ಕುಂಕ್, ತುಕುಂಕ್ ವಾ ಥುಕುಂಕ್ ತುಜ್ಯಾ ಚಿಂತ್ಪಾಸಕ್ತೆಚೆರ್ ಸೊಡ್ತಾಂ.

ಸೊಧುನ್ ಗೆಲ್ಯಾರ್ ಕಾಮ್ ನಾ

ಮೊಲಾಕ್ ಘೆಂವ್ಕ್ ಧಾಮ್ ನಾ

ಆಜ್ ಹಾಂವ್ ಸ್ವತಂತ್ರ್!

ಮ್ಹಜ್ಯಾ ಘರಾಂತ್ ಆಜ್

ರಾಂದಣ್ ಝಳಂವ್ಕ್ ಕಾಂಯ್‌ಚ್ ನಾ.

ಎಕ್‍ಚ್ಚ್ ಪೂತ್ ಅಸ್ಲೊ

ಮಾಸಾ-ಆಂಗ್ಡಿಂತ್ ಘೊಳ್ತಾಲೊ

ಪೊಟಾಂ ಆಮ್ಚಿಂ ಭರ್ತಾಲೊ

ಗಾಯ್ರಾಂಕ್ ಮಾರ್ಚೆ ದುಭಾವಾನ್

ತಾಕಾಚ್ ಹಾಣಿಂ ಖಾತರ್ಲೊ

ಏಕ್‌ಚ್ ಧುವ್ ಆಸ್ಲಿ

ವಳ್ವಳ್ಚ್ಯಾ ಆವಯ್ಕ್ ರಾಕುಂಕ್

ಮಧ್ಯಾನೆರ್ ಆಸ್ಪತ್ರೆಕ್ ಗೆಲ್ಲಿ

ಪುಣ್ ಪಾಟಿಂ ಆಯ್ಲಿಚ್‌ನಾ ಬಗಾರ್ ಖಬರ್ ಆಯ್ಲಿ

ರಾತ್ಚೆಂ ಚೆಡ್ವಾಂನಿ ಭಂವುಂಕ್ ನ್ಹಜೊ ಮ್ಹಳ್ಳಿ

ಸೊಧ್ಲಾಂ ಕಂಯ್ ತಾಣಿಂ ಯಂತ್ರ್

ದೇಸ್ ಭಕ್ತೆಕ್ ಪಾರ್ಕುಂಚೆಂ ತಂತ್ರ್

ಏಕ್ ಭಾಸ್, ಜಾತ್ ದೇಸಾಚೆಂ ಮಂತ್ರ್

ತೆಯ್ ಸರ್ವ್ ಜಾಣಾಂತ್ ಹೆಂ ಕುತಂತ್ರ್

ಚಿಂತಾಂ ಹಾಂವ್; ಹೆಂಚ್‌ಗಿ ಸ್ವತಂತ್ರ್

ದೆವಾ ಮ್ಹಾಕಾ ರೂಕ್ ಕರ್

ಸುಕ್ಣೆಂ ಕರ್ ಯಾ ಜಾನ್ವಾರ್ ಕರ್

ನ್ಹೆಸ್ಪಾಕ್, ಖಾವ್ಪಾಕ್, ಚಿಂತ್ಪಾಕ್ ಸ್ವತಂತ್ರ್

ದಳ್ದಿರ್ ’ಮನಿಸ್’ ಸೊಡುನ್

ಆನಿ ಕಿತೆಂ ತರ್‌ಯೀ ಕರ್

ಮ್ಹಾಕಾ ಸ್ವತಂತ್ರ್ ಕರ್

- ವಲ್ಲಿ ಕ್ವಾಡ್ರಸ್ [ಅಗೋಸ್ತ್, 2017]

'Free will

doesn't mean

doing whatever

you want. It

means having the

freedom to do

what is right.'

ಬರವ್ಪಿ

ವಲ್ಲಿ ಕ್ವಾಡ್ರಸ್

1984 ಇಸ್ವೆ ಥಾವ್ನ್ ಸಾಹಿತ್ಯಿಕ್ ವಾವ್ರ್ ಕರುನ್ ಆಸಾ. ಕಥಾಕಾರ್, ಕವಿ, ಕಾದಂಬರಿಕಾರ್, ವಿಮರ್ಶಕ್, ಸಂಪಾದಕ್, ಪ್ರಕಾಶಕ್ ತಶೆಂಚ್ ತರ್ಜಣ್/ಲಿಪ್ಯಂತರಣಾಚೊ ವಾವ್ರ್ ಕರುನ್ ಆಸಾ. ಕಾಣಿಕ್ (1988-1991), ದಾಯ್ಜ್.ಕೊಮ್ (2003-2013), ಪಯ್ಣಾರಿ.ಕೊಮ್ (2015 ಥಾವ್ನ್), ಕೊಂಕಣ್‌ಗಾರ್ ಪ್ರಕಾಶನ್ (2020-2024), ಆಶಾವಾದಿ ಪ್ರಕಾಶನ್ (2000 ಥಾವ್ನ್) ಸಂಪಾದಕ್ ಜಾವ್ನಾಸಾ. ಕನ್ನಡ, ನಾಗರಿ ತಶೆಂಚ್ ರೊಮಿ ಲಿಪಿಂನಿ ಬರಯ್ತಾ.

ಪುಸ್ತಕಾ ರುಪಾಚ್ಯೊ ಕಾದಂಬರಿ; ಸಂಘರ್ಷ್ (1991), ತುಂ ಮ್ಹಜೆಂ (1988), ಪಾಟಿಂ ಗಾಂವಾಕ್ (2002).

ಮೊಟ್ವ್ಯಾ ಕಾಣಿಯಾಂಚಿಂ ಪುಸ್ತಕಾಂ; ಆಶಾವಾದಿ (2001), ಖಿಳೊ (2003), ಕಂಗಾಲ್ ಆನಿ ತಾಚಿ ಕುಕ್ಕೆಹಳ್ಳಿ (2005), ಸತಾಂ ಆನಿ ಖತಾಂ (2005), ಬಂಧ್ (2017), ಸಾಂಕವ್ (2020, ನಾಗರಿಂತ್) ಮಾಯಾನಗರಿ (2022), WFH ಆನಿ ಹೆರ್ ಕಥಾ (2024), ಕವಿತೆಚಿಂ ಪುಸ್ತಕಾಂ ಚ್ಯಾರ್ ಮುಖಾಂ (2002), ಕಟ್‌ಪುತ್ಳಿ (2003), ದರ್ಭಾರಾಂತ್ಲಿ ಪಿಂರ್ಗೊಣ್ (2005), ಬಜಾರ್ (2017), ಭಿತರ್ಲೊ ಕವಿ (2021),

ಕವಿತಾ ಅಧ್ಯಯನಾಚಿಂ ಪುಸ್ತಕಾಂ; ಕವಿತಾಪಾಠ್ (2005), ದರ್ಯಾಕ್ ಉದಕ್ (2006), ಕಾಳೊಕ್ ನಾತ್ಲೊ ಗಾಂವ್ (2007), ಮುಗ್ದನಾತ್ಲಿಂ ಗಿತಾಂ (2017), ಸುಕ್ತಿ ಭರ್ತಿ (2019). ಕವಿತಾಪಾಠ್ ಮ್ಹಳ್ಳಿಂ ಕವಿತೆಂಚೆರ್ ಅಧ್ಯಯನಾಚಿಂ 50 ವಯ್ರ್ ಕಾಮಾಸಾಳಾಂ ಚಲಯ್ಲ್ಯಾಂತ್.

ಸಂಪಾದಕೀಯಾಂಚಿಂ ಪುಸ್ತಕಾಂ; ಮೊಳ್ಬಾವಯ್ಲಿಂ ಸಪ್ಣಾಂ (2005), ಮುಖಾಮುಖಿ (2017), ಪಡ್ಸಾದ್ (201)

ಕವಿತಾ ಸಂಕಲನಾಚಿಂ ಪುಸ್ತಕಾಂ; ಮೊತಿಯಾಂ ಆನಿ ತಾರಾಂ (2005), ತಿಂತೆರಾಂತ್ ಪಿಂತುರಾಂ (2006), ಉತ್ರಾಂತ್ ಸೂತ್ರಾಂ (2006), ಮಯ್ಲಾ ಫಾತೊರ್ (2020).

ಕಥಾ ಸಂಕಲನಾಂಚಿಂ ಪುಸ್ತಕಾಂ; ವಿಸಾವ್ಯಾ ಶೆಕ್ಡ್ಯಾಚ್ಯೊ ಕಾಣಿಯೊ (2006), ಸುರ್ಯೊ ಉದೆತಾ (2019), ಸುರ್ಯೊ ಉದೆಲಾ (2024), ಕಥಾ ಅಧ್ಯಯನಾಚಿಂ ಪುಸ್ತಕಾಂ; ಕಥಾವಿಹಾನ್ (2025), ಕಥಾಪಾಠ್ (2025), ಚಲ್ ದೋನ್ ಚಂದ್ರಾಂಕ್ (2025), ಸಾಳಕಾಚ್ಯಾ ಸಿರಿವಂತಾಚ್ಯೊ ಕಥಾ (2025), ಕಥನ್ (2026). ಕಥಾಪಾಠ್ ಮೊಟ್ವ್ಯಾ ಕಾಣಿಯಾಂಚೆರ್ 50 ವಯ್ರ್ ಕಾಮಾಸಾಳಾಂ ತಶೆಂಚ್ ವೆಬಿನಾರಾಂ ಚಲಯ್ಲ್ಯಾಂತ್.

ಭಾರತೀಯ್ ಸರ್ಕಾರಾಚ್ಯಾ ಸಂಸ್ಕೃತಿ ವಿಭಾಗ್ (CCRT) ಥಾವ್ನ್ (The Cultural Aspects of Sidhdhis in Karnataka) ಸಂಶೊಧನಾಂಕ್ ಸೀನಿಯರ್ ಫೆಲೊಶಿಪ್ (2019-2021) ಲಾಭ್ಲಾಂ. ದಿವೊ ಸಾಹಿತ್ಯಿಕ್ ಪುರಸ್ಕಾರ್ (2003), ಕರ್ನಾಟಕ್ ಕೊಂಕಣಿ ಸಾಹಿತ್ಯ್ ಅಕಾಡೆಮಿಚಿಂ ಉತ್ತೀಮ್ ಪುಸ್ತಕಾಂ (2005, 2006, 2018), ಮಥಾಯಸ್ ಕುಟ್ಮಾಚೊ ಕವಿತಾ ಟ್ರಸ್ಟ್ ಪುರಸ್ಕಾರ್ (2019), ವಿಶ್ವ ಕೊಂಕಣಿ ಕೇಂದ್ರಚ್ಯಾ ವಿಮಲಾ ವಿ. ಪೈ. ಫೌಂಡೆಶನಾಚೊ ಪುರಸ್ಕಾರ್, ಸಂಧೇಶ ಪುರಸ್ಕಾರ್ (ಕೊಂಕಣಿ ಸಾಹಿತ್ಯ್, 2023), ದಾಯ್ಜಿ ದುಭಾಯ್ ಸಾಹಿತ್ಯಿಕ್ ಪುರಸ್ಕಾರ್ (2023), ಕೊಂಕಣಿ ಅಕಾಡೆಮಿ ಗೊಂಯ್ ಥಾವ್ನ್ ಮಾಧವ್ ಮಂಜುನಾಥ್ ಕೊಂಕಣಿ ಸೇವಾ ಪುರಸ್ಕಾರ್ (2023) ಲಾಭ್ಲ್ಯಾತ್.

All 79 pages by this writer