ವಿಚಾರ್विचारView

Dr. Edward L Najreth-achea kothemni Mornam ani Totvoginean

[Vichar]

View 22 October 2026

Dr. Edward L Najreth-achea kothemni Mornam ani Totvoginean

ap105l

Konknnintolo namnecho kothakar Dr. Edward L Najreth vrit'ten ek sorzon ddokttor. Dekun monxachi duk, vholloulle, zolm', jivit ani morn hea sorvam modhem monxa somvedonam bhovo bariksayen polleun ayil'lo kothakar. Hachea kothenk vividh ritimni vachyet. Somajik chintpachea nodren heo kotha kaim eka somajechea prostut ghodditam/ghottnancher arso dhorcheo mhonn distit. Punn gunddayen, totvoginean nodren hea kothemni bhovo opurbhayen mornam/vholloulle ani hachim vividh rupam dakomvchem preton kel'lem dison yetam. Zolm' amkam ostitv dita. Jivit amkam tem somzonk ek aukas dita, ani morn amkam to aukas thir nhoi mhonn attounni korun dita. Morn/vholloulle koslea prokarache asuyeta?

vholloulle, duk va mornanchim vevegollim rupam, Dr. Edward L Najrethachea ekeka kothemni distat. Thoddeancho ul'lek korcho tor;
Bhoutik morn: Kuddin bhogchem mhollear piddent, bhukent, tanent, utor prayent.
Bhaunatmok morn: Amchim bhognnam, umalle ani axa-otregamni bhogchem moronn mhollear eksurponn, dokho, negarponn, tirsokar osleant bhogunk mellchem.
Monovoigeanik morn: Dolleank disanasocho mansik songhrox mhollear khont, kaujenni, nirasoponn, lekaurti kallji korchi.
Samajik morn: Sombondhamni, dubllikai, vorg-ontosth bhed, auman.
Kuttmik morn: Kuttmik bhandamni futt, balyoponnacher nirolkxa, vhoddilam thaun mellanatolo mog.
Aptanchea vegllacharachem morn: Ami chodd mog kel'lim amchethaun mornant va tirsokarant vegllachar zatana bhogchi duk.
Arthik ritichem morn: Duddu, bekarponn, rinn, dispoddoto gras zoddunk bhogchem duk.
Osthitvovadi morn: Jivitant ud'dex koslo? ami kiteak jietamv, jivitant duk ani vegllachar yemvcho kiteak mholl'llim chintnam.
Noitik morn: Otmo, ontoromon, vinchounn, zovabhodari jednam herank dukyil'leacho, herank dokho dil'leacho porinnam' zaun svota bhogchi duk.
Oshaikoponnachem morn: Somajent bodlunk osadhy zal'lea songtencher bhogche kolloulle ani duk.

Dr.Edward L Najreth-achlem xikop zoddlolo punn bhovo sado ani mogall mitr. Somajent kitlexeki tanchea svotachea bholaikechi va tanchea kuttmachea sandeanchea bholaikechi zokti solha gheunk kumok vichartat ani ddokttor eddourdd kedinch negar kel'lo nhoi.

Hachem onyek khaxelemponn mhollear ho ek boro vachpi. Dr. Edward L Najrethacheo kotha kolejimni odhyoinak yogy zal'leo kotha. Axavadi prokaxonan 2024 isvent cholyil'lea raxttr mott'ttachea kotha odhyoinachea xinkllemni ’mrigozoll’ pustokachea kothencher panch proptram sador zal'lim. Tech‌porim ’Golimar’ kothencher soit odhyoin cholchi gorz asa. Konknnint ’somgr konknni’ mholl'llem chintop sompem nhoi. Tem chintop chintunk vixal monachi, gunddayechea chintpachi gorz asa. Fokot ’amcho faido’ chintun amkam zai zal'lem korn taka ’konknni seva’ mhonn dangro marchea murkhoponnacheaki, Dr. Edward L Najreth toslea ut'tim' kothakarancheo kotha poilem amim vachun, somzon ghetleo tor gomtolem, heo kotha bhartachea khonchyai bhasemni torzonn zaunk sukt kal'leo kotha.

Konknni kothemni veg-veglle proyog

1943 isvent R. K. Narayanan-achea ’Malguddi Days’ kothasongroh bhartant choddtavo bhasemni torzonn zala, uprant Shanker Nag-chea nirdexonakhal 1986 thaun TV-cher serial zaun prosarit zal'lenimotim fokot bhartant matr nhoi, videxamni soit prosar zaun heo kotha lokamogall zaleo. Malguddi ek kalponik kotha, ani tantle patr soit kalponik punn somajent ghoddon aschea ghottnancher adharit zaunasole. Hacher prerit zaun konknnint 2005 isvent mhozoch ’Kongal ani tachi Kukkehll'lli’ mholl'llo kothasongroh kon'nodd lipint, axavadi prokaxonakhal porgott zal'lo. Kuveyttant kothapatth kamasallant hea pustokacher probondh/lekh sador zalim. ’kongal’ mhollear got-adhar natlo vekti. ’Kukkehll'lli’ ek kalponik gamv, ani kothemni udel'le choddtavo patr niz ghottnancher adharit zal'le.

Dr. Edward L Najreth-acho ’Golimar’ 2010 isvent Kon'nodd lipint porgott zal'lo panchvo kothazomo soit osleach prokaracho. Hangasor ’Golimar’ ek kalponik gamv, ani hea zomeantlea kothemni asche patr soit somajechea ghoddnnukechea adharan udel'le. Ddo. Eddourdd el, nojret ek sorzon ddokttor, jivit ani moronn hea don pontam modhem chirddon aschea lokanchim somvedonam bhovo lagxilean pollemvcho, somzoncho. Dekun tachea ekeka kothemni koxem sombondhank hea somvedonachea sutamni reuddon jietat mholl'llem bhovo marmik ritin chitronn kel'lem ami kholayen odhyoin kortana gomta. Konknnint bhouxa voidyoki-i xetacher kotha boromvchant mhaka dischim don namvam mhollear Dr. Edward L Najreth ani dusrem Monika Dsa Mathais Dublin (Ireland).

Dr. Edward L Najreth-acheo kotha kon'nodd bhasent torzonn zaleat. 20vea xekddeacheo kotha (2006, Karnataka Konknni Sahitya Akademi) pustokant, toxench sureo udeta raxttr mott'ttachea kothasonkolonant porgott zalea. Svotachea mottvea kothenchim so songroham kon'nodd lipint porgott zaleant. Don digital-audio pustokamni prosar zaleant. Don e-pustokamni toxench 2024 isvent nagri lipint ’Mrigozoll' ani ho nagri lipintolo dusro kothasongroh, somgr konknni kotha odhyoin korteleank heo kotha bhovo upkarak poddotleo mhonncheant dubhavo na.

[’Golimar-cheo Kotha’ pustokacher Valley Quadros-an boryil'lem prostaun]

Dr.Edward L Najreth-achim digital e-pustokam
Mrigozoll (Kon'noddo lipint)
Mrigozoll (Nagori lipint)

Dr.Edward L Najreth-achim digital a-pustokam
Mrigozoll
Golimar‌cheo kotha

Comments

No comments yet. Be the first to say what you thought of it.

Leave a comment

Write in Kannada, Nagari or Romi, whichever you like. He reads every comment before it appears here, so yours will not show straight away. Your name is printed above it.

Your name

Your comment

0 of 2,000 characters

Only your name and your comment are kept - no email address. They stay on the site until he removes them; to have yours taken down, write to him through the contact form and say which one. Privacy.

Author

Valley Quadros

1984 isve thaun sahityik vaur korun asa. Kothakar, Kovi, Kadomborikar, Vimrxok, Sompadok, Prokaxok toxench Torzonn/Lipyontoronnacho vaur korun asa. Kannik (1988-1991), Daaiz.com (2003-2013), Poinnari.com (2015 thaun), Konkonn‌gar Prokaxon (2020-2024), Ashawadi Prakashan (2000 thaun) sompadok zaunasa. Kannada, Nagari toxench Romi lipimni boroita.

Pustoka rupacheo kadombori; Songhrox (1991), Tum Mhojem (1988), Pattim Gamvak (2002).

Mottvea kannianchim pustokam; Ashawadi (2001), Khillo (2003), Kongal ani Tachi Kukkehll'lli (2005), Sotam ani Khotam (2005), Bondh (2017), Sankou (2020, Nagrint) Mayanogori (2022), WFH ani her kotha (2024), Kovitechim pustokam Chear Mukham (2002), Kott‌putlli (2003), Dorbharantoli Pimrgonn (2005), Bozar (2017), Bhitrolo Kovi (2021).

Kovita odhyoinachim pustokam; Kovitapatth (2005), Doreak Udok (2006), Kallok Natlo Gamv (2007), Mugdonatolim Gitam (2017), Sukti Bhorti (2019). Kovitapatth mholl'llim kovitencher odhyoinachim 50 voir kamasallam choloileant.

Sompadokiyanchim pustokam; Mollbauyolim Sopnnam (2005), Mukhamukhi (2017), Poddsad (201)

Kovita sonklonachim pustokam; Motiam ani Taram (2005), Tinterant Pinturam (2006), Utrant Sutram (2006), Moila Fator (2020).

Kotha sonklonanchim pustokam; Visavea Xekddeacheo Kannio (2006), Sureo Udeta (2019), Sureo Udela (2024), Kotha odhyoinachim pustokam; Kothavihan (2025), Kothapatth (2025), Chol Don Chondrank (2025), Sallkachea Sirivontacheo Kotha (2025), Kothon (2026). Kothapatth mottvea kanniancher 50 voir kamasallam toxench vebinaram choloileant.

Bharti-i sorkarachea somsokriti vibhag (CCRT) thaun (The Cultural Aspects of Sidhdhis in Karnataka) sonxodhonank Senior Fellowship (2019-2021) labhlam. Divo Sahityik Pursokar (2003), Karnataka Konknni Sahity Okaddemichim ut'tim' pustokam (2005, 2006, 2018), Mothais Kuttmacho Kovita Trust-acho Pursokar (2019), Vishwa Konknni Kendrochea Vimala V. Pai. Founddeshan-acho Pursokar, Sandesh Pursokar (Konknni Sahity, 2023), Daiji Dubai Sahityik Pursokar (2023), Goa Konknni Okaddemi thaun Madhav Manjunath Konknni Seva Pursokar (2023) labhleat.

All 122 pages by this writer