ಪ್ರತಿಕಾರಾಚಿಂ ಮುಳಾಂ

ಪ್ರತಿಕಾರಾಚಿಂ ಮುಳಾಂ

ದೀಸ್ ಗೆಲ್ಲೆಪರಿಂಚ್ ಆಮಿ ಜಿಯೆಂವ್ಚೊ ಕಾಳ್ ಸಯ್ತ್ ಮಾರೆಕಾರ್ ಜಾವ್ನ್ ಪರಿವರ್ತಿತ್ ಜಾತಾ. ಹಾಂಗಾ ’ಕಾಳ್’ ಗುನ್ಯಾಂವ್ಕಾರಿ ನ್ಹಯ್, ಕಾಳಾಂತ್ ಜಿಯೆವ್ನ್ ಆಸ್ಚೊ ’ಮನಿಸ್’. ಮನ್ಶಾಕ್ ಮನಿಸ್ ದುಸ್ಮಾನ್ ಕಸೊ ಜಾಲಾ. ಹೊ ರಾಗ್, ದುಸ್ಮಾನ್‌ಕಾಯ್, ಧ್ವೇಶ್ ಆನಿ ಹಗೆಂ ಕೊಣಾಯ್ಕ್‌ಯೀ ಕೆದಿಂಚ್, ಕಿತೆಂಚ್ ಕಾಯಮ್ ಫಾಯ್ದೊ ಜೊಡುನ್ ದಿಂವ್ಕ್ ಸಕೊಂಕ್ ನಾ ಮ್ಹಳ್ಳೆಂ ಅಡ್ಹೂಕ್ ಸತ್ ಜಾಣಾಸೊನ್‌ಯೀ ಕಿತ್ಯಾಕ್ ಮನಿಸ್ ಜಾತ್, ಧರ್ಮ್, ಭಾಸ್, ಲಿಪಿ, ಪ್ರಾಂತ್ಯ್ ಮ್ಹಳ್ಳ್ಯಾ ನಿಬಾಂನಿ ಎಕಾಮೆಕಾಚೊ ಸಂಹಾರ್ ಕರುಂಕ್ ಲಾಗ್ಲಾ, ಆನಿ ಹ್ಯಾ ಪರಿಸ್ಥಿತೆಂತ್ ಅಸ್ಕತ್ ಆನಿ ಲಾಚಾರ್ ಜಾಲ್ಲೆಂ ’ಮನ್ಶಾಪಣ್’ ಮಾತ್ರ್ ಪಯ್ಸ್ ರಾವೊನ್ ಪಳೆತಾ.

ಕೆದ್ನಾಂಯ್ ಹ್ಯಾ ಪ್ರತೀಕಾರಾಚಿಂ ಮುಳಾಂ ಸೊಧುಂಕ್, ವಾ ಸಮ್ಜೊಂಕ್ ಮತಿಂತ್ ಚಿಂತಪ್ ಆಟಯ್ಲಾಂ? ಹಿ ಕವಿತಾ ವಾಚುನ್ ಗೆಲ್ಲೆಪರಿಂಚ್ ಹೆಂ ಸವಾಲ್ ಆಮಿಂ ಆಮ್ಕಾಂ ಕರ್ಚೆಂ ಅನಿವಾರ್ಯ್ ಜಾಲಾಂ.

ಪ್ರತಿಕಾರಾಚಿಂ ಮುಳಾಂ

ತಾಂಣಿ ತುಕಾ ಲ್ಹಾನ್ ಕರ್ಪಾಚೊ ಯತ್ನ್ ಕೆಲೊ
ಗರ್ದೆಚ್ಯಾ ಬೊವಾಳಾಂತ್ ಎಕ್ಸುರೊ ಶೆಣಿಲ್ಲೊ ಆವಾಜ್
ಪೂಣ್ ತುಂ ಪಯ್ಲೀಂಚ್ ಶಿಕಿಲ್ಲೊ 
ದೊಂಗರ್ ಫಾತ್ರಾಂಚಿ ಭಾಸ್ 
ಆನಿ ಖಡ್ಪಾಂ ಲೆಗೀತ್ ಕಾತ್ರತಾತ್ 
ತ್ಯಾ ನ್ಹಂಯಾಂಚೊ ಆವಾಜ್.

ರಾನ್ ಪಾತಳ್ ಜಾಲೆಂ ಥಂಯ್ ತುಂ ಉಬೊ ರಾವ್ಲೊ,
ಜಂಯ್ ಕಾಗ್ದಾಚೆರ್ ಶಾಯೆನ್ ಸಯ್ ಕೆಲ್ಲಿ
ತ್ಯಾ ಕಾಗ್ದಾಕ್ ಯೆತಾಲೊ ವಾಸ್ 
ರಗತ್ ಆನಿ ತೆಲಾಚೊ
ತಾಂಣಿ ಸಾಂಗ್ಲೆಂ ತೊ ವಾಸ್ ಉದರ್ಗತಿಚೊ.

ಫುಡಾರಾಚೆ ಬಾರೀಕ್ ಬಾರೀಕ್ ಕುಡ್ಕೆ ಕರೂನ್ 
ಹಾಡಾಂ ದಳ್ಪಿ ಯಂತ್ರಾಂಚ್ಯಾ  
ಕಾನ್ ಫೊಡ್ಪಿ ಗಡ್ಗಡಾಂತ್
ತುವೆಂ ಆಯ್ಕಲೊ ಎಕ್ ತಾಲ್ 
ಆಪ್ಲಿಂ ಮುಳಾಂ ಘಟ್ಟ್ ಧರೂನ್  
ಮೌನ್ ನ್ಹಯ್‌ಕಾರ್ಪಿ ಬಿಯಾಂಚೊ.

ತುಜೊ ಸಂಘರ್ಷ್ ನಾಶಿಲ್ಲೊ 
ಸ್ವತಾಚ್ಯಾ ಫಾಯ್ದ್ಯಾ ಖಾತೀರ್ 
ತಿ ಆಶಿಲ್ಲಿ ಎಕ್ ಸ್ಥಿರ್ ಪ್ರತಿಜ್ಞಾ 
ಫಾಂತೊಡೆರ್ ಜಾಗೊ ಜಾವ್ನ್ 
ಯೆವ್ಕಾರ್ ದಿವ್ಪಾಚೊ 
ಸತ್ಯಾಚಿಂ ಕಿರ್ಣಾಂ ಪಾತ್ಳಾವಪಿ ಸುರ್ಯಾಕ್.

ತುವೆಂ ಆಡಾಯ್ಲೆಂ ತಾಂಚೆ ರಾಜ್-ರಸ್ತೆ 
ಜಾಂಕಾಂ ತಾಣಿಂ ದಿಲ್ಲಿಂ ನಾವಾಂ
ಇತಿಹಾಸಾಕಡೆನ್ ಫಟಿಂಗಪಣಾ ಕರ್ಪಿ 
ತಾಂಚ್ಯಾ ಮ್ಹಾಪುರುಶಾಂಚಿಂ 
ಜೆ ಉಬೆ ರಾವಿಲ್ಲೆ ವಣ್ಟಿ ಜಾವ್ನ್
ತುಜ್ಯಾ ಆನಿ ಹೆರಾಂಚ್ಯಾ ಮಧೆಂ

ಜೆನ್ನಾ ತಾಂಣಿ ತುಜಿ ಫಕಾಣಾಂ ಕೆಲಿಂ,
ರಾವ್ಲೊ ತುಂ ಧೀರಾನ್ ಹಿಮಾಲಯಾವರಿ 
ಜೆನ್ನಾ ತಾಂಣಿ ತುಕಾ ಧಮ್ಕಾಯಲೊ 
ತುವೆಂ ದಾಖಯ್ಲಿ ಜಿದ್ದ್ ದರ್ಯಾ ಲ್ಹಾರಾಂಚಿ
ತಾಂಣಿ ತುಕಾ ಮಿಟೊವ್ಪಾಚೊ ಯತ್ನ್ ಕೆಲೊ 
ತೆನ್ನಾ ತುವೆಂ ಯಾದ್ ಕರೂನ್ ದಿಲಿ 
ಧರ್ತರಿ ಉರ್ಲ್ಯಾ ಜಿವಿ 
ತುಜ್ಯಾಚ್ ಘಾಮಾಚೆರ್ ಪೊಶಿಲ್ಲ್ಯಾ 
ಆನಿ ತುವೆಂಚ್ ಸಾಂಬಾಳಿಲ್ಲ್ಯಾ 
ಸೈಮಾಕ್ ಲಾಗೂನ್

[ಸೆಪ್ಟೆಂಬರ್, 2026]