ಕೊಂಕ್ಣೆಚಾ ವಿಂಚ್ಣಾರ್ ಸಾಹಿತ್ಯಾಚೊ ಕೊನ್ಸೊ - ’ದಾಯ್ಜ್’ - ಫಕತ್ತ್ ಕೊಂಕಣಿ ಥಾವ್ನ್ ಕೊಂಕಣಿ ಪರ್ಯಾಂತ್, ಕೊಂಕಣಿ ಖಾತಿರ್.
’ಜೆದ್ನಾಂ ಪರ್ಯಾಂತ್ ಆಪ್ಲಿಂ ಸ್ವಪ್ಣಾಂ ಹೆರಾಂಚ್ಯಾ ಸ್ವಪ್ಣಾಂಚಿ ದೆಸ್ವಾಟ್ ಕರಿನಾಂತ್, ತೆದೊಳ್ ಪರ್ಯಾಂತ್ ಆಮಿ ಸ್ವಪ್ಣಾಂ ಪಳೆಜಾಯ್’
ಭರ್ವಶ್ಯಾಶಿವಾಯ್ ಆಮ್ಕಾಂ ಹೆರ್ ಕಿತೆಂ ಆಸಾ?
ವರಸ್ : 2009
ಅಂಕೊ : 48
ಮಯ್ನೊ : ಜನೆರ್
ಸಂಪಾದಕೀಯ್ - 48.
ವಲ್ಲಿ ಕ್ವಾಡ್ರಸ್
’ಹ್ಯಾ ಸಂಸಾರಾಂತ್ ಜಿಯೆತೆಲ್ಯಾ ಹರ್ಯೆಕ್ಲ್ಯಾನ್ ಸ್ವಪ್ಣಾಂ ಪಳೆಜಾಯ್, ಮಾತ್ರ್ ನ್ಹಯ್, ತಿಂ ಹಕೀಗತ್ ಜಾಂವ್ಚ್ಯಾಕ್ ಪ್ರೇತನ್ ಕರಿಜಾಯ್’ ಮ್ಹಣ್ತಾ ಭಾರತಾಚೊ ಆಧ್ಲೊ ಅಧ್ಯಕ್ಶ್ ಅಬ್ದುಲ್ ಕಲಾಮ್.
ಸ್ವಪ್ಣಾಂ ಕಾಂಯ್ ಕೊಣಾಯ್ಚಿ ಆಸ್ತ್-ವಸ್ತ್ ನ್ಹಯ್, ಕೊಣೆಂಯ್ ಸ್ವಪ್ಣಾಂ ಪಳೆವ್ಯೆತಾ, ಜೆದ್ನಾಂ ಪರ್ಯಾಂತ್ ಆಪ್ಲಿಂ ಸ್ವಪ್ಣಾಂ ಹೆರಾಂಚ್ಯಾ ಸ್ವಪ್ಣಾಂಚಿ ದೆಸ್ವಾಟ್ ಕರಿನಾಂತ್, ತೆದೊಳ್ ಪರ್ಯಾಂತ್; ಸ್ವಪ್ಣಾಂ ಆಸ್ಚಿಂ ಫುಂಕ್ಯಾಕ್, ಸ್ವಪ್ಣಾಂಚೆಂ ಮೋಲ್ ಚಡಾನಾ ವಾ ದೆಂವಾನಾ. ಆನಿ ಹಿಂ ಸ್ವಪ್ಣಾಂ ಪಳೆಂವ್ಕ್ ಹರ್ಯೆಕ್ಲ್ಯಾಕ್ ಹಕ್ಕ್ ಆಸಾ, ಖಂಚ್ಯಾಯ್ ಜಾತಿಚೊ ತೊ ಜಾಂವ್, ಖಂಚ್ಯಾಯ್ ಪ್ರಾಂತ್ಯಾಒಚ್ ತೊ ಜಾಂವ್, ಖಂಚ್ಯಾಯ್ ಕಾಲೆತಿಚೊ ತೊ ಜಾಂವ್.
ಅನ್ಯೇಕ್ ನವೆಂ ವರಸ್ ಸುರು ಜಾಲೆಂ, ಫಕತ್ತ್ ಏಕ್ ಸಾಂಕೇತಿಕ್ ನೀಬ್; ಆಮಿಂ ಜಿಯೆಂವ್ಚ್ಯಾ ಸಂಸಾರಾಂತ್, ಆಮ್ಚಿ ಸ್ವಪ್ಣಾಂ ಸಾಕಾರ್ ಕರುಂಕ್ ಫುಡೆಂ ವೆಚ್ಯಾಕ್.
ಹೆಚ್ಚ್ ಭರ್ವಶ್ಯಾನ್ ಸುರು ಜಾಲ್ಲೆಂ 2008 ವರಸ್ ಸಭಾರ್ ಕರಾಳ್ ಘಡಿತಾಂಕ್ ಪಳೆಶೆಂ ಕರುಂಕ್ ಪಾವ್ಲೆಂ. ಪುಣ್ ವರಸ್ ಕಿತೆಂಚ್ ಕರಿನಾ, ಬಗಾರ್ ಕಿತೆಂಯ್ ಕರ್ತಾ ತರ್ ಮನಿಸ್, ಆನಿ ತಾಚಿ ಮಾನಸಿಕತಾ ಮಾತ್ರ್. ವರ್ಸಾಚ್ಯಾ ಮಧೆಂಚ್ ಸುರು ಜಾಲ್ಲಿ ಆರ್ಥಿಕ್ ದಿವಾಳಿ, ಚಡ್ಲ್ಲೆಂ ಸೆನ್ಸೆಕ್ಸ್, ಪಡ್ಲ್ಲಿ ಮಾರ್ಕೆಟ್, ದೆಂವ್ಲ್ಲಿ ಬೆಂಕಾಚಿ ವಾಡ್, ಪೆಂಕಾಡ್ ಮೊಡೊನ್ ಪಡ್ಲ್ಲೊ ಭಾಂದ್ಪಾ ಬಾಜಾರ್, ಪುಣ್ ಹ್ಯಾ ಸರ್ವಾಂಕ್ ಹೆರ್ ಕಸ್ಲೊಚ್ ವಿಕಲ್ಪ್ ನಾಸ್ತಾಂ ಸೊಸುನ್, ಖಿರವ್ನ್, ಜಿರವ್ನ್ ಜಿಯೆತೆಲ್ಯಾ ಲೊಕಾಂಚಿ ಸಿಂತಿಮೆಂತಾಂ ವೆವಸ್ತಿತ್ ರಿತಿನ್ ಪಿಳುನ್, ಗಿಳುನ್ ಕಶೆಂ ಮಾಧ್ಯಮ್ ದಿಸಾನ್ದೀಸ್ ಸೊರ್ಕೆತಾ ಮ್ಹಳ್ಳೆಂಚ್ ಆಡ್ಹೂಕ್ ಸತ್.
ಕೊಣ್ ಮ್ಹಣ್ತಾ ಇನ್ಫ್ಲೇಶನ್ ಪಂದ್ರಾ ಪರ್ಸೆಂಟ್ ಚಡ್ಲ್ಲೆಂ ಮ್ಹಣ್? ಹೆ ಪರ್ಸೆಂಟ್ ಮ್ಹಳ್ಳೆ ಅಂಖೆ ಸಯ್ತ್ ದಿಂವ್ಚ್ಯಾಧಿಂ ಜಾಯ್ತಿ ಮನೋಗತೆಚೊ ಹಾತ್ ಆಸ್ತಾ, ಕೊಣಾಕ್ ಚಡಯ್ಲ್ಯಾರ್ ಫಾಯ್ದೊ ತರ್ ಕೊಣಾಕ್ ದೆಂವಯ್ಲ್ಯಾರ್ ಫಾಯ್ದೊ, ಪುಣ್ ಭಗ್ಚೊ ಲೋಕ್ ಕಸೊಯ್ ತೆಚ್ಚ್ ವರ್ಗಾಚೊ ಪಳೆ, ಗಾಡ್ವಾಪರಿಂ ಜಿಯೆವ್ನ್ ಸವಯ್ ಜಾಲ್ಲೊ. ದೆಕುನ್ ಘರ್ಚೆಂ ಭಾಡೆಂ ಚಡ್ಲಾಂ, ಪೆಟ್ರೊಲಾಚೆಂ ಮೋಲ್ ಚಡ್ಲಾಂ, ಗ್ಯಾಸಾಚೆಂ ಮೋಲ್ ಚಡ್ಲಾಂ, ಹರ್ಯೆಕಾಚೆಂ ಮೋಲ್ ಚಡ್ಲಾಂ, ಪುಣ್ ಸಾಂಬಾಳ್ ಅಜೂನ್ ತೊಚ್ಚ್, ತೊ ಚಡೊಂಕ್ ನಾ, ಆನಿ ಹ್ಯಾ ಪರಿಗತೆಂತ್ ಕೊಣಾಕ್ ಪುರ್ಸೊತ್ ವಾ ಸಯ್ರಣ್ ಆಸಾ ಆಮಿ ಆಧ್ಲ್ಯಾ ಮಯ್ನ್ಯಾಂನಿ ಹಾಡ್ಲ್ಲ್ಯಾ ವಸ್ತುಂಚೆಂ ಮೋಲ್ ಹ್ಯಾ ಮಯ್ನ್ಯಾಂತ್ ಕಿತ್ಲೆಂ ವಾಡ್ಲಾಂ/ಚಡ್ಲಾಂ ಮ್ಹಳ್ಳೆಂ ಪಾರ್ಕುಂಕ್? ಆನಿ ಹ್ಯಾ ಮಧೆಂ ಟಿವಿ/ಪತ್ರ್ ಮಾಧ್ಯಮಾಂನಿ ಸಾಂಗ್ಚೆಂಚ್/ಪರ್ಗಟ್ಚೆಂಚ್ ’ಸತ್’ ಜಾಲಾಂ.
ದೇಶ್-ವಿದೇಶಾಂನಿ, ಅಂತರ್ರಾಶ್ಟ್ರೀಯ್ ಸ್ಥರಾರ್ ಸಯ್ತ್ ’ಹೆಡ್ಲಾಯ್ನ್’ ಜಾಂವ್ಚೆ ತಸಲ್ಯಾ ಸಮಸ್ಸ್ಯಾಂಕ್ ಉಕಲ್ಚ್ಯಾ ಆಮ್ಚ್ಯಾ ಚಡ್ತಾವ್ ಮಾಧ್ಯಮಾಂಕ್ ಖರೆಂಪಣಿಂ ಕಿತ್ಲೊ ಹುಸ್ಕೊ ಆಸಾ? ದೇಶಾಚೆ ಭೋವ್ ಪ್ರತಿಷ್ಟಿತ್ ಪುರಸ್ಕಾರಾಂನಿ ಫುಮಾರ್ಚ್ಯಾ ಆಮ್ಚ್ಯಾ ಮಹಾನ್ ಜರ್ನಲಿಸ್ಟಾಂಕ್ ಸಾದ್ಯಾ ಲೊಕಾಚೊ ಕಿತ್ಲೊ ಹುಸ್ಕೊ ಆಸಾ? ಕಿತ್ಲಿ ಖಂತ್ ಆಸಾ? ಖಬ್ರೊ ಸಯ್ತ್ ಕಶ್ಯೊ ಘಡ್ತಾತ್? ಖಬ್ರೊ ಸಯ್ತ್ ಕಶ್ಯೊ ರೂಪ್ ಬದಲ್ತಾತ್? ಕಶೆಂ ದುಡು/ಸಕತ್/ಅಧಿಕಾರ್ ಹ್ಯಾ ಖಂಬ್ರಾಂಚೆರ್ ಗುಪಿತ್ ರಿತಿನ್ ರಾಜ್ವಟ್ಕಿ ಚಲಯ್ತಾ ಮ್ಹಳ್ಳೆಂ ಆಮಿ ಪಯ್ಲೆಂ ಸಮ್ಜಲ್ಲ್ಯಾಂವ್ ತರ್, ಹಾಂಚಿಂ ಕಿತ್ಲಿಂ ಸತಾಂ ಆಮ್ಕಾಂ ಹ್ಯಾ ಸತಾಂತ್ಲಿಂ ’ಖತಾಂ’ ತರ್ಯೀ ದಿಸ್ತಿಂ ನ್ಹಯ್?
ಗಾಂವ್ಚ್ಯೊ-ದೇಶಿ ಖಬ್ರೊ ಸೊಡ್ಯಾಂ, ಯು.ಎನ್.ಐ (ಯುನಾಯ್ಟೆಡ್ ನ್ಯೂಜ್ ಆಫ್ ಇಂಡಿಯಾ), ಪಿ.ಟಿ.ಐ (ಪ್ರೆಸ್ ಟ್ರಸ್ಟ್ ಆಫ್ ಇಂದಿಯಾ), ರೂಟರ್ಸ್ ತಸಲ್ಯಾ ಪ್ರತಿಷ್ಟಿತ್ ಖಬ್ರಾ ಮಾಧ್ಯಮಾಂತ್ಲ್ಯೊ ಖಬ್ರೊ ಸಯ್ತ್ ಕಿತ್ಲ್ಯೊ ಪ್ರಾಮಾಣಿಕ್ ಜಾವ್ನ್ ವಾಚ್ಪ್ಯಾಂಕ್ ಪಾವ್ತಾತ್? ಸಗ್ಳೆಂ ಸೊಡ್ಯಾಂ; ಆಯ್ಲೆವಾರ್ ಮುಂಬಯ್ಚೆರ್ ಜಾಲ್ಲ್ಯಾ ಧಾಡಿಚಿ ಖಬರ್ಚ್ ಘೆವ್ಯಾಂ; ಹಿ ಖಬಾರ್ ಕಶಿ ಕಶಿ ಪರ್ಗಟ್ ಜಾಲಿ ಪಳೆಯಾ, ಕೊಣೆಂ ಲಷ್ಕರ್ ಇ-ತೋಯ್ಬಾಕ್ ಬೊಟಾಂ ಜೊಕ್ಲಿಂ ತರ್ ಕೊಣೆಂ ತಾಲಿಬಾನಾಕ್ ಬೊಟಾಂ ಜೊಕ್ಲಿಂ, ಕೊಣೆಂ ಸಾಂಗ್ಲೆಂ ಹಿ ತೊಗಾಡಿಯಾ/ಸಿಂಘಾಲ್/ಮೋದಿಚಿ ಚಾಲ್, ದೆಕುನ್ ಹಾಣೆಂಚ್ ಪಾಕಿಸ್ತಾಚ್ಯಾ ಉಗ್ರ್ವಾದಿಂಕ್ ಮೊಲಾಕ್ ಹಾಡ್ನ್ ಕರಯಿಲ್ಲಿ ಮ್ಹಳೆಂ ತರ್ ಹಿಚ್ಚ್ ಖಬಾರ್ ಪಾಕಿಸ್ತಾನಾಂತ್ ವೆಗ್ಳ್ಯಾಚ್ ರುಪಾರ್ ಪರ್ಗಟ್ಲಿ, ಬಂಧಿತ್ ಜಾಲ್ಲೊ ’ಕಸಬ್’ ಹಾಚೆಂ ನೀಜ್ ನಾಂವ್ ’ಅಮರ್ ಸಿಂಘ್’ ಮ್ಹಳೆಂ, ತಾಚೆಸವೆಂ ಮೊರೊನ್ ಪಡ್ಲ್ಲೊ ’ಹೀರಾಲಾಲ್’ - ಪುಣ್ ಪೊಲಿಸಾಂನಿ ಹಾಚೆಂ ತೋಂಡ್ ಚೆಂಚುನ್ ಘಾಲಾಂ; ಕೊಣಾಕ್ಚ್ ವ್ಹಳೊಕ್ ಮೆಳಾನಾಯೆ ಮ್ಹಣೊನ್... ಹ್ಯಾ ಖಬ್ರೆಂಚೆ ಉಣ್ಯಾರ್ ಉಣೆಂ ಇಕ್ರಾ ಕಾಣ್ಯೊ ತರ್ಯೀ ವಾಚ್ಲ್ಲೊ/ಆಯ್ಕಾಲ್ಲೊ ಉಡಾಸ್.
ಹಾಂಗಾಸರ್ ಹಾಂವೆಂ ಬರಂವ್ಚೊ ಮ್ಹಜೊ ಇರಾದೊ ಖಂಚೆಂ ಸತ್ ಖಂಚೆಂ ನ್ಹಯ್ ಮ್ಹಳ್ಳೊ ಭಿಲ್ಕುಲ್ ನ್ಹಯ್, ಪುಣ್ ಕಶೆಂ ’ಸತ್’ ಆಸ್ಚೆಂ ಮಾಧ್ಯಮಾಚ್ಯಾ ಹಾತಿಂ ವೆವೆಗ್ಳೆಂ ರೂಪ್ ಘೆತಾ ಮ್ಹಳ್ಳೆಂ. ಹಾಚೆವಿಶಿಂ ಇಲ್ಲೆಂ ತರ್ಯೀ ಸಮ್ಜೊಂಕ್ ಪ್ರೇತನ್ ಕರ್ಚೆಂ ತರ್; ಹಿಂ ಮಾಧ್ಯಮಾಂ ಖಂಚಿಂ? ಆನಿ ಹಾಂಚೆರ್ ಕೊಣಾಚಿ/ಕಸಲಿ ರಾಜ್ವಟ್ಕಿ ಚಲ್ತಾ ಮ್ಹಳ್ಳೆಂ ಸಮ್ಜೊಂಚಿ ಗರ್ಜ್ ಆಸಾ;
ಎನ್.ಡಿ.ಟಿ.ವಿ (ನ್ಯೂ ಡೆಲ್ಹಿ ಟೆಲಿವಿಶನ್) - ಭಾರತಾಂತ್ಲೆಂ ಲೊಕಾಮೊಗಾಳ್ ಟಿವಿ ಚಾನಲಾಕ್ ದುಡ್ವಾಚಿ ಭಳಿಶ್ಟ್ ಮಜತ್ ದಿತಾ ’ಗೋಸ್ಪಲ್ಸ್ ಆಫ್ ಚಾರಿಟಿ’ (ಸ್ಪೇಯ್ನ್ ಸ್ಪೋರ್ಟ್ಸ್ ಕಮ್ಯೂನಿಸಮ್). ಸುರು ಜಾಲ್ಲೆ ತೆಂಪಾರ್ ಆಮ್ಕಾಂ ಆಯ್ಕೊಂಕ್ ಮೆಳ್ಚೊ ತಾಂಚೊ ತಾಳೊ ಸದ್ದ್ಯಾಕ್ ಪಾಕಿಸ್ತಾನಾಚ್ಯಾ ಲೊಕಾಂಚೆರ್ ಮಾತ್ಸೊ ಮೋವ್ ಜಾಲಾ, ಕಿತ್ಯಾಕ್; ಪಾಕಿಸ್ತಾನಾಂತ್ ಹೆಂ ಏಕ್ ಮಾತ್ರ್ ಚ್ಯಾನಲ್ ಬ್ರೋಡ್ಕಾಸ್ಟ್ ಜಾಂವ್ಕ್ ಪಾಕಿಸ್ತಾನ್ ಸರ್ಕಾರಾನ್ ಪರ್ವಣ್ಗಿ ದಿಲ್ಯಾ ದೆಖುನ್. ಹಾಚೊ ಸಂಸ್ಥಾಪಕ್/ಅಧ್ಯಕ್ಶ್ ಡಾ|ಪ್ರಣಯ್ ರೋಯ್, ಪ್ರಕಾಶ್ ಕಾರತ್ ಆನಿ ವೃಂದಾ ಕಾರತ್ ಹಾಂಚೊ ಸಯ್ರೊ. (ವೃಂದಾ ಕಾರತಾಚಿ ಭಯ್ಣ್ ರಾಧಿಕಾ ರೋಯ್ ಪ್ರಣಯ್ ರೋಯ್ಚಿ ಬಾಯ್ಲ್).
ಇಂಡಿಯಾ ಟುಡೇ, ಭಾರತಾಚೆಂ ಭೋವ್ ಲೊಕಾಮೊಗಾಳ್ ಹಫ್ತ್ಯಾಳೆಂ, ಎಕಾ ತೆಂಪಾರ್ ಬಿಜೆಪಿನ್ ಪಾಟಿಂಬೊ ದಿಲೆಲೆಂ, ಆತಾಂ ಎನ್.ಡಿ.ಟಿ.ವಿಚಿ ಆಸ್ತ್. ಆತಾಂ ಹ್ಯಾ ಹಫ್ತ್ಯಾಳ್ಯಾಚೊ ತಾಳೊ ಸಯ್ತ್ ಪಯ್ಲೆಂಚೆಪರಿಂ ನಾ ಮ್ಹಳ್ಳೆಂ ಹಾಚ್ಯಾ ಚಡ್ತಾವ್ ವಾಚ್ಪ್ಯಾಂಕ್ ಕಳೊನ್ ಆಯಿಲ್ಲೆಂ ಸತ್.
ಸಿ.ಎನ್.ಎನ್-ಐ.ಬಿ.ಎನ್: ಹ್ಯಾ ಚಾನೆಲಾಕ್ ’ಸದರ್ನ್ ಬ್ಯಾಪ್ಟಿಸ್ಟ್ ಚರ್ಚ್’ ಸಂಪೂರ್ಣ್ ರಿತಿನ್ ಆರ್ಥಿಕ್ ಕುಮೊಕ್ ಕರ್ನ್ ಆಸಾ, ಹಾಂಚೆಂ ಹೆಡ್ ಆಫಿಸ್ ಅಮೆರಿಕಾಂತ್ ಆಸಾ ಆನಿ ವರ್ಸಾಕ್ ಉಣ್ಯಾರ್ ಉಣೆಂ 800 ಮಿಲಿಯನ್ ಡೋಲರ್ ಕುಮೊಕ್ ಹ್ಯಾ ಚಾನಲಾಚ್ಯಾ ಪ್ರಚಾರಾಕ್ ಖರ್ಚಿತಾ. ಹೆಂ ಚ್ಯಾನಲ್ ರಾಜ್ದೀಪ್ ಸರ್ದೇಸಾಯ್ ಆನಿ ತಾಚಿ ಬಾಯ್ಲ್ ಸಾಗರಿಕಾ ಘೋಷ್ ಚಲಯ್ತಾತ್. ಎಕಾ ತೆಂಪಾರ್ ಎನ್.ಡಿ.ಟಿ.ವಿ.ಚೊ ಮ್ಯಾನೆಜಿಂಗ್ ಎಡಿಟರ್ ಜಾವ್ನ್ ಭೋವ್ ಲೊಕಾಮೊಗಾಳ್ ಜಾಲ್ಲೊ, ತಶೆಂಚ್ ’ಬಿಗ್ ಫಾಯ್ಟ್’ ತಸಲೆಂ ಕಾರ್ಯೆಂ ಸುರು ಕೆಲ್ಲ್ಯಾ ರಾಜ್ದೀಪ್ ಸರ್ದೇಸಾಯ್ನ್ ಟಿವಿ 18 ಚ್ಯಾ ರಾಘವ್ ಬಾಲ್ಸವೆಂ ಮೆಳೊನ್ ಹೆಂ ಚ್ಯಾನಲ್ ಸುರು ಕೆಲ್ಲೆಂ. ಪುಣ್ ಎನ್.ಡಿ.ಟಿ.ವಿಚ್ಯಾ ಲೊಕಾಮೊಗಾಳಾಯೆಖಾತಿರ್ ಖಾತಿರ್ ವಿಶೇಸ್ ರಿತಿನ್ ವಾವ್ರ್ ಕೆಲ್ಲೊ ರಾಜ್ದೀಪ್ ಸರ್ದೇಸಾಯ್, ಫಕತ್ತ್ ತಾಕಾ ಮೆಳ್ಚೊ ಸಾಂಭಾಳ್ (36 ಲಾಖ್ ರುಪಯ್ ವರ್ಸಾಚೊ ಸಾಂಭಾಳ್) ಪರ್ಗಟ್ ಕೆಲ್ಲ್ಯಾನ್, ಅವ್ಮಾನ್ ಭಗೊನ್ (ಎನ್.ಡಿ.ಟಿವಿಂತ್ ಸವೊ ವಡ್ಲೊ ಸಾಂಬಾಳ್) ಹೆಂ ಚ್ಯಾನಲ್ ಸೊಡ್ನ್ ಗೆಲ್ಲೊ, ಕಿತ್ಯಾಕ್ ಹಾಂಚ್ಯಾಕೀ ಪಾಂಚ್ ವಾಂಟೆ ಚಡ್ ಸಾಂಭಾಳ್ ರಾಘವ್ ಬಾಲ್ ಹಾಣೆಂ ದಿಲ್ಲೊ, ತೊವೀ ಟೊಯೊಟಾ ಕೊರೊಲಾ ಗಾಡಿಯೆಸವೆಂ. ಗರೀಬ್ ಲೊಕಾಂ ಖಾತಿರ್ ಝುಜೊನ್ ಪುರಸ್ಕಾರ್ ಜೊಡ್ತೆಲ್ಯಾ ಪತ್ರ್ಕರ್ತಾಂಚೆಂ ಹೆಂ ಖಾಸ್ಗಿ ಚಿಂತಾಪ್ - ಸೊಡ್ಯಾಂ.
ಟಾಯ್ಮ್ಸ್ ಗ್ರೂಪ್ (ಟಾಯ್ಮ್ಸ್ ಆಫ್ ಇಂಡಿಯಾ, ಮಿಡ್-ಡೇ, ನವ್ಭಾರತ್ ಟಾಯ್ಮ್ಸ್, ಸ್ಟಾರ್ ಡಸ್ಟ್, ಫೆಮಿನಾ, ವಿಜಯ್ ಟಾಯ್ಮ್ಸ್, ವಿಜಯ ಕರ್ನಾಟಕ, ಟಾಯ್ಮ್ಸ್ ನೌ (24 ವೊರಾಂ ನ್ಯೂಜ್ ಚ್ಯಾನಲ್) ಆನಿ ಹೆರ್ ಥೊಡಿಂ..)
ಟಾಯ್ಮ್ಸ್ ಗ್ರೂಪಾಚೆ ಧನಿ ’ಬೆನ್ನೆಟ್ ಆಂಡ್ ಕೊಲ್ಮನ್’ (ವರ್ಲ್ಡ್ ಕ್ರಿಶ್ಚಿಯನ್ ಕೌನ್ಸಿಲ್ ಹಾಕಾ 80% ಆರ್ಥಿಕ್ ಮಜತ್ ದಿತಾ, ತಶೆಂಚ್ ಏಕ್ ಇಂಗ್ಲಿಶ್ ಆನಿ ಏಕ್ ಇಟಾಲಿಯನ್ ಬಾಕಿಚೆ 20% ಸಮಾಸಮ್ ವಾಂಟುನ್ ದಿತಾತ್. ಇಟಾಲಿಚೊ ರೋಬರ್ಟಿಯೊ ಮಿಂದೊ, ಸೋನಿಯಾ ಗಾಂಧಿಚೊ ಸಯ್ರೊ ಮ್ಹಣ್ತಾತ್)
ಸ್ಟಾರ್ ಟಿವಿ: ಹೆಂ ಚ್ಯಾನಲ್ ಆಸ್ಟ್ರೇಲಿಯಾಚೊ ಎಕ್ಲೊ ಚಲಯ್ತಾ, ಹಾಕಾ ಮೆಲ್ಬೋರ್ನ್ಚಿ ಸೈಂಟ್ ಪೀಟರ್ಸ್ ಪೊಂಟಿಫಿಕ್ ಇಗರ್ಜ್ ಪಾಟಿಂಬೊ ದಿತಾ.
ಹಿಂಧುಸ್ಥಾನ್ ಟಾಯ್ಮ್ಸ್: ಬಿರ್ಲಾ ಗ್ರೂಪಾಚೆಂ, ಪುಣ್ ಶೋಭನಾ ಭಾರ್ತೀಯಾನ್ ಹೆಂ ಘೆತ್ಲ್ಲ್ಯಾ ಉಪ್ರಾಂತ್ ಸದ್ದ್ಯಾಕ್ ಟಾಯ್ಮ್ಸ್ ಗ್ರೂಪಾಸವೆಂ ಆಸಾ.
ದ ಹಿಂದು: ಸುಮಾರ್ 125 ವರ್ಸಾಧಿಂ ಸುರು ಜಾಲ್ಲೆಂ ಇಂಗ್ಲಿಶ್ ದಿಸಾಳೆಂ, ಸ್ವಿಟ್ಜರ್ಲೇಂಡಾಚ್ಯಾ ಜೋಡುವಾ ಸೊಸಾಯ್ಟಿ, ಬೆರ್ನೆ ಹಾಂಚ್ಯಾ ತಾಬೆಂತ್ ಆಸಾ. ಎನ್. ರಾಮಾಚಿ ಬಾಯ್ಲ್ ಸ್ವಿಟ್ಜರ್ಲೇಂಡಾಚಿ.
ಇಂಡಿಯನ್ ಎಕ್ಸ್ಪ್ರೆಸ್: ಆತಾಂ ದೋನ್ ಜಾವ್ನ್ ವಿಂಗಡ್ ಜಾಲಾಂ; ದ ಇಂಡಿಯನ್ ಎಕ್ಸ್ಪ್ರೆಸ್ ಆನಿ ನ್ಯೂ ಇಂಡಿಯನ್ ಎಕ್ಸ್ಪ್ರೆಸ್ (ದಕ್ಷಿಣ್ ಭಾರತೀಯ್); ಎ.ಸಿ.ಟಿ.ಎಸ್ ಕ್ರಿಶ್ಚಿಯನ್ ಮಿನಿಸ್ಟ್ರೀಸ್ ಹಾಂಚೊ ಪ್ರಮುಖ್ ಬಂಡ್ವಾಳ್ ಆಸಾ.
ಈನಾಡು: ಆಜ್ ಪಾಸೊನ್ ಭಾರತೀಯ್ ರಾಮೋಜಿ ರಾವ್ ಮ್ಹಳ್ಳ್ಯಾಚ್ಯಾ ತಾಬೆಂತ್ ಆಸಾ. ರಾಮೋಜಿ ರಾವ್ ಫಿಲ್ಮ್ ಇಂಡಸ್ಟ್ರಿಚೊ, ಆಂದ್ರ ಪ್ರದೇಶಾಂತ್ ಆಪ್ಲೊಚ್ಚ್ ವ್ಹಡ್ಲೊ ಫಿಲ್ಮ್ ಸ್ಟುಡಿಯೊ ಚಲವ್ನ್ ಆಸಾ.
ಆಂದ್ರ ಜ್ಯೋತಿ: ಎಮ್.ಐ.ಎಮ್ (ಮುಸ್ಲಿಮ್ ಪಾರ್ಟಿ ಆಫ್ ಹೈದರಾಬಾದ್) ಆನಿ ಎಕಾ ಕಾಂಗ್ರೆಸ್ ಮಿನಿಸ್ಟರಾನ್ ಹೆಂ ತೆಲುಗು ದಿಸಾಳೆಂ ಆಯ್ಲೆವಾರ್ ಮೊಲಾಕ್ ಘೆತ್ಲೆಂ.
ದ ಸ್ಟೇಟ್ಸ್ಮ್ಯಾನ್: ಭಾರತೀಯ್ ಕಮ್ಯೂನಿಸ್ಟ್ ಪಾರ್ಟಿಚ್ಯಾ ತಾಬೆಂತ್ ಆಸಾ.
ಕೈರಾಲಿ ಟಿವಿ: ಭಾರತೀಯ್ ಕಮ್ಯೂನಿಸ್ಟ್ ಪಾರ್ಟಿ (ಮಾರ್ಕ್ಸಿಸ್ಟ್) ಚ್ಯಾ ತಾಬೆಂತ್ ಆಸಾ.
ಮಾತೃಭೂಮಿ: ಲೀಡರ್ಸ್ ಆಫ್ ಮುಸ್ಲಿಮ್ ಲೀಗ್ ಆನಿ ಕಮ್ಯೂನಿಸ್ಟ್ ಲೀಡರ್ಸ್ ಹಾಂಚೊ ಬಂಡ್ವಾಳ್ ಚಡ್ ಆಸಾ.
ಏಶಿಯನ್ ಏಜ್ ಆನಿ ಡೆಕ್ಕನ್ ಕ್ರೋನಿಕಲ್: ಎಕಾ ಸೌದಿ ಅರೇಬಿಯನ್ ಕಂಪೆನಿಚ್ಯಾ ತಾಬೆಂತ್ ಆಸಾ; ಹಾಚೊ ಮುಖೆಲ್ ಸಂಪಾದಕ್ ಎಮ್.ಜೆ. ಅಕ್ಭರ್.
ಥೊಡಿಂ ಹೆರ್ ಸತಾಂ (?) ನಿಯಾಳ್ ಕರ್ಚಿಂ ತರ್;
2002 ಇಸ್ವೆಂತ್ ಗುಜ್ರಾತಾಂತ್ ಗಲಾಟೊ ಜಾಲೊ, ಜಾಯ್ತಿಂ ಹಿಂಧು, ಮುಸ್ಲಿಮ್ ಘರಾಂ ಭಸ್ಮ್ ಜಾಲಿಂ, ಲೋಕ್ ಜಿವೊ ಜಿವೊ ಲಾಸೊನ್, ಹುಲ್ಪೊನ್ ಮೆಲೊ. ಹೆಚ್ಚ್ ಸಂದರ್ಭಾರ್ ರಾಜ್ದೀಪ್ ಸರ್ದೇಸಾಯ್ ಆನಿ ಭರ್ಕಾ ದತ್ತ್ ಎನ್.ಡಿ.ಟಿ.ವಿಂತ್ ಕಾಮ್ ಕರ್ನ್ ಆಸ್ಲಿಂ. ತ್ಯಾ ವೆಳಾರ್, ಮುಸ್ಲಿಮ್ ಕುಟ್ಮಾಂಕ್ ಫೋಕಸ್ ಕರ್ಚ್ಯಾಕ್ ಎಕಾ ಸೌದಿ ಅರೇಬಿಯನ್ ಕಂಪೆನಿನ್ ಪಾಂಚ್ ಮಿಲಿಯನ್ ಡಾಲರ್ಸ್ ದಿಲ್ಲೊ. ಆನಿ ತಾಣಿಂ ಭೋವ್ ಅರ್ಥಾಭರಿತ್ ರಿತಿನ್ ತಶೆಂಚ್ ಕೆಲೆಂ. ಏಕ್ಚ್ ಏಕ್ ಹಿಂದು ಕುಟ್ಮಾಕ್ ಜಾಂವ್, ತಾಂಚ್ಯಾ ಸಯ್ರ್ಯಾಂಕ್ ಜಾಂವ್ ಲಾಸ್ಲ್ಲೆಂ, ಹಾಣಿಂ ಕವರ್ ಕೆಲೆಂಚ್ ನಾ.
ತೆಂ ಕಿತ್ಯಾಕ್? ಭೋವ್ ಡೇರಿಂಗಾಚೊ ಜರ್ನಲಿಸ್ಟ್ ತರುಣ್ ತೇಜ್ಪಾಲಾನ್ ತೆಹೆಲ್ಕಾ.ಕೊಮ್ ಹಾಂತುಂ ಸರಾಗ್ ರಿತಿನ್ ಚಡ್ತಾವ್ ಜಾವ್ನ್ ಬಿಜೆಪಿಚ್ಯಾ ವ ಚಡ್ತಾವ್ ಜಾವ್ನ್ ಹಿಂಧುತ್ವಾಕ್ ವಿರೋದ್ ಜಾವ್ನ್ ಘೊಟಾಳೊ ಕೆಲ್ಲ್ಯಾಂಚಿ ಕೃತ್ಯಾಂ ಉಜ್ವಾಡಾಕ್ ಹಾಡ್ಚ್ಯಾಕ್ ಅರಬ್ ರಾಷ್ಟ್ರಾಂ ಥಾವ್ನ್ ಸರಾಗ್ ರಿತಿನ್ ಲಾಭ್ಚ್ಯಾ ಬ್ಲ್ಯಾಂಕ್ ಚೆಕ್ಕಾಂ ಕಾರಾಣ್ ಮ್ಹಳ್ಳೆಂ ಭೋವ್ ಥೊಡ್ಯಾಂಕ್ ಮಾತ್ರ್ ಕಳಿತ್.
ಇತ್ಲ್ಯಾ ಸರ್ವ್ ಸಂಗ್ತೆಚೆರ್ ಉಜ್ವಾಡ್ ಫಾಂಕಯ್ತಾನಾ, ಮಾಧ್ಯಮಾಂಚೊ ಪಾತ್ರ್, ರಾಜಕೀಯ್ ಶೆತಾಂನಿ ಜಾಂವ್, ಸಾಮಾಜಿಕ್ ಶೆತಾಂನಿ ಜಾಂವ್, ಶೈಕ್ಷಣಿಕ್ ಶೆತಾಂನಿ ಜಾಂವ್ ಕಸ್ಲೊ ಪಾತ್ರ್ ಘೆತಾ ಮ್ಹಳ್ಳೆಂ ಅಂದಜ್ ಕರ್ಯೆತಾ. ದೆಕುನ್ ಹ್ಯಾ ಮಾಧ್ಯಮಾಂಕ್ ಸಯ್ತ್ ಮುಂಬಯಾಂತ್ ಆತಂಕ್ವಾದಿ ಹಲ್ಲೊ ಕರ್ತಾನಾ ಪಡೊನ್ ಗೆಲ್ಲೆಂ ಫಕತ್ತ್ ಟಿ.ಆರ್.ಪಿ ಮಾತ್ರ್, ದೆಕುನ್ ಮೀತ್ ಮಿರ್ವೊನ್, ಅತಿಶಯೋಕ್ತ್ ಪಾಚಾರ್ನ್, ಉದಾಕ್ ಪಿಯೆನಾಸ್ತಾಂ ರಾತಿಚಿ ನೀದ್ ಸಯ್ತ್ ಕಾಡಿನಾಸ್ತಾಂ, ರಸ್ತ್ಯಾಚೆರ್ ನಿದೊನ್, ಲೊಳೊನ್ ಟಿವಿಂನಿ ಖಬಾರ್ ದಿತೆಲ್ಯಾ ಸಭಾರ್ ಪತ್ರಿಕೋಧ್ಯಮಿಂ ಪಯ್ಕಿಂತ್ ಕಾಂಯ್ ಥೊಡೆ ಬರೆ, ನಿಶ್ಟಾವಂತ್, ಪತ್ರಿಕೋಧ್ಯಮಿ ಆಸೊಂಕ್ ಪುರೊ. ಆಸ್ಲ್ಯಾರೀ ಕೊಣಾಕ್ ದಿಸ್ತಾತ್?
ಆನಿ ಅಸಲ್ಯಾ ಖಬ್ರೆಂಕ್ ಮಸಾಲಾ ಲ್ಹಾವ್ನ್, ಲೊಕಾಂ ಕರ್ನಾಂ ಎಸ್ಸೆಮೆಸ್ ಹಾಡಂವ್ಚೊ ದಂದೊ ಕಿತ್ಲೆ ವೆವಸ್ತಿತ್ ರಿತಿನ್ ಚಲೊಂಕ್ ನಾ? ಪುಣ್ ರಾತಿಚಿ ನೀದ್ ಖಳೊನ್, ರಸ್ತ್ಯಾರ್ ನಿದೊನ್, ಲೊಳೊನ್ ಖಬ್ರೊ ದಿಲ್ಲೆ ಹೆಚ್ಚ್ ಪತ್ರಿಕೋಧ್ಯಮಿ, ಹ್ಯೇ ಉಪ್ರಾಂತ್ ಕಿತ್ಲ್ಯಾ ಮಾಪಾನ್ ಗರ್ಜೆವಂತಾಂಕ್ ಪಾವ್ತಾತ್? ಅಶೆಂ ಮ್ಹಣೊನ್ ಹಾಂವೆಂ ಸಾಂಗ್ಚೊ ಇರಾದೊ ಹೊ ನ್ಹಯ್ಕೀ, ಸಗ್ಳೆ ಪತ್ರಿಕೋಧ್ಯಮಿ ಭೃಷ್ಟ್ ಮ್ಹಣೊನ್, ಆಸಾತ್, ಭೋವ್ ಥೊಡೆ ಅಜೂನ್ ಆಸಾತ್, ಆಪ್ಲಿ ನೈತಿಕತಾ ಹೊಗ್ಡಾಯ್ನಾಸ್ತಾಂ ವಾವುರ್ಲೆಲೆ, ವಾವುರ್ಚೆ ಅಜೂನ್ ಆಸಾತ್, ಪುಣ್ ಭಳಾಮುಕಾರ್ ಅಸ್ಕತ್ ತಾಳ್ಯಾಚೆಂ ತ್ರಾಣ್ ಕಿತ್ಲೆಂ?
ಇತ್ಲೆಂ ಸರ್ವ್ ಆಮ್ಚೆ ಭಂವ್ತೊಣಿ ಆಸೊನ್ಯೀ, ಆಮಿ ಭರ್ವಸೊ ಸಾಂಡಿನಾಸ್ತಾಂ, ಭರ್ವಶ್ಯಾನ್, ಫಾಲ್ಯಾಂಚೊ ಬರೊ ಫುಡಾರ್ ಆಶೆಂವ್ಚೆ ಶಿವಾಯ್ ಹೆರ್ ನಿರ್ವೋಗ್ ಆಸಾ?
ಭಾಗಿ ನವೆಂ ವರಸ್ ತುಮ್ಕಾಂ ಸರ್ವಾಂಕ್, ಸರ್ವಾಂಕ್ ಸರ್ವ್ ಬರೆಂಚ್ ಜಾಂವ್.
ಖಾಲ್ತೆಪಣಿಂ,
- ವಲ್ಲಿ ಕ್ವಾಡ್ರಸ್, ಅಜೆಕಾರ್
About us | Feedback | Contact us
Copyright ©
2004 DAAIZ.COM All rights reserved.
Page concept, designed and maintained by Ashawadi Publications
