ಕೊಂಕ್ಣೆಚಾ ವಿಂಚ್ಣಾರ್ ಸಾಹಿತ್ಯಾಚೊ ಕೊನ್ಸೊ -’ದಾಯ್ಜ್ ’-ಫಕತ್ತ್ ಕೊಂಕಣಿ ಥಾವ್ನ್, ಕೊಂಕಣಿ ಪರ್ಯಾಂತ್, ಕೊಂಕಣಿ ಖಾತಿರ್.
ಮಿತ್ರ್ ದಾಯ್ಜ್ ಸಾಹಿತಿಕ್ ಶಿಭಿರ್ 2007 [Click here for ENGLISH report]
ಮಿತ್ರ್ ದಾಯ್ಜ್ ಸಾಹಿತಿಕ್ ಶಿಭಿರ್ 2007 - ಭೋವ್ ಯಶಸ್ವೆಭರಿತ್
[ಅಲಂಗಾರ್
ಐ.ಸಿ.ವೈ.ಎಮ್ ಸಾಂದ್ಯಾಂ ಥಾವ್ನ್ ಸ್ವಾಗತ್ ಗೀತ್ ಆನಿ
ಎಲ್ಯೆರ್ ತಾಕೊಡೆಚೆಂ ಸ್ವಾಗತ್ ಭಾಷಣ್] 
[ಎಲ್ಯೆರ್ ತಾಕೊಡೆ, ಡಾ|ಎಡ್ವರ್ಡ್ ನಜ್ರೆತ್, ಮಾ|ಬಾ|ಮಾರ್ಕ್ ವಾಲ್ಡರ್, ಮಾ|ಬಾ|ವಿನ್ಸೆಂಟ್ ಡಿ’ಸೋಜ್, ವಲ್ಲಿ ವಗ್ಗ, ಲ್ಯಾನ್ಸಿ ಮಾಡ್ತಾ ಆನಿ ವಲ್ಲಿ ಕ್ವಾಡ್ರಸ್]
ಫಿರ್ಗಜೆವಾರ್ ಕೊಂಕ್ಣಿ ಸಾಹಿತ್ಯಾಚೊ ಮೋಗ್ ಚಡಂವ್ಚ್ಯಾ, ತಶೆಂಚ್ ಸಾಹಿತಿಂಕ್ ಪ್ರೋತ್ಸಾಹ್/ಉತ್ತೇಜನ್ ದಿಂವ್ಚ್ಯಾ ಇರಾದ್ಯಾನ್, ಮಿತ್ರ್ ಆನಿ ದಾಯ್ಜ್ ಪಂಗ್ಡಾನ್ ವರ್ಸಾನ್ ವರಸ್ ಆಸಾ ಕರ್ಚೆಂ ’ಮಿತ್ರ್ ದಾಯ್ಜ್ ಸಾಹಿತಿಕ್ ಶಿಭಿರ್ 2007’ ಹೆಚ್ಚ್ ಸಪ್ತೆಂಬರಾಚ್ಯಾ 16 ತಾರಿಕೆರ್ ಆಯ್ತಾರಾ, ಮೂಡ್ಬಿದ್ರಿ ವಾರಾಡ್ಯಾಂತ್ಲ್ಯಾ ಅಲಂಗಾರ್ ಫಿರ್ಗಜೆಂತ್ ಆಸಾ ಕೆಲೆಂ.
[ಕಳ್ಶೆಚೆರ್ ದಿವ್ಟಣಿ ದವರ್ನ್ ಶಿಭಿರಾಚೆಂ ಉಗ್ತಾವಣ್ ಕರ್ತಾ ಮಾ|ಮಾರ್ಕ್ ವಾಲ್ಡರ್]
[ಉಗ್ತಾವ್ಪಿ
ಆನಿ ಅಧ್ಯಕ್ಷಾಚೆಂ ಉಲವ್ಪ್] 
[ಉಗ್ತಾವ್ಪಿ ಆನಿ ಅಧ್ಯಕ್ಶಾಕ್ ಉಡಾಸಾಚಿ ಕಾಣಿಕ್ ಜಾವ್ನ್ ಕೊಂಕ್ಣಿ ಬೂಕ್]
ಸಕಾಳಿಂ ಧಾ ವೊರಾರ್ ಅಲಂಗಾರ್ ಭಾರತೀಯ್ ಕಥೊಲಿಕ್ ಯುವಸಂಚಾಲನಾಚ್ಯಾ ಸಾಂದ್ಯಾಂಚ್ಯಾ ಮಾಗ್ಣ್ಯಾ ಗಿತಾನ್ ಸುರು ಜಾಲ್ಲ್ಯಾ ಹ್ಯಾ ಶಿಭಿರಾಚೆಂ ಉಗ್ತಾವಣ್ ಮಾ|ಬಾ|ಮಾರ್ಕ್ ವಾಲ್ಡರ್ (ಆಧ್ಲೊ ರಾಕ್ಣೊ ಸಂಪಾದಕ್) ಹಾಣಿಂ ಕೆಲೆಂ. ಕಾರ್ಯಾಚೆಂ ಅಧ್ಯಕ್ಶ್ ಸ್ಥಾನ್ ಅಲಂಗಾರ್ ಫಿರ್ಗಜೆಚ್ಯಾ ವಿಗಾರ್ ಮಾ|ಬಾ|ವಿನ್ಸೆಂಟ್ ಡಿ’ಸೋಜ್ ಹಾಣಿಂ ಘೆತ್ಲೆಂ ತರ್, ಮುಖೆಲ್ ಮಾನಾಚೆ ಸಯ್ರೆ ಜಾವ್ನ್ ಕೊಂಕ್ಣಿ ಲೇಖಕಾಂಚ್ಯಾ ಎಕ್ತಾರಾಚೊ ಅಧ್ಯಕ್ಷ್ ಮಾನೆಸ್ತ್ ಎಡ್ವರ್ಡ್ ನಜ್ರೆತ್, ಫಾಮಾದ್ ಕೊಂಕ್ಣಿ ಸಾಹಿತಿ ವಲ್ಲಿ ವಗ್ಗ, ತಶೆಂಚ್ ಮಿತ್ರ್ ಹಫ್ತ್ಯಾಳ್ಯಾಚೊ ಸಂಪಾದಕ್ ಎಲ್ಯೆರ್ ತಾಕೊಡೆ ಆನಿ ದಾಯ್ಜ್ ಸಂಪಾದಕ್ ವಲ್ಲಿ ಕ್ವಾಡ್ರಸ್ ವೆದಿಚೆರ್ ಆಸ್ಲೆ.
[ಡೋಲ್ಫಿ ಕಾಸ್ಸಿಯಾ ಆನಿ ವಲ್ಲಿ ಕ್ವಾಡ್ರಸ್, ವಲ್ಲಿ ವಗ್ಗ ಆನಿ ರಿಚ್ಚಿ ಪಿರೇರ್, ಎಡ್ವಿನ್ ಜೆ.ಎಫ್ ಆನಿ ಹಿಲರಿ ರೇಗೊ]
ಲೋಯ್ಡ್ ರೇಗೊನ್ ಸಯ್ರ್ಯಾಂಚಿ ವಳೊಕ್ ಕರ್ನ್ ಸ್ವಾಗತಾಚಿಂ ಉತ್ರಾಂ ಉಲಯ್ತಚ್ಚ್, ದಿವೊ ಪೆಟವ್ನ್ ದಿವ್ಟಣಿಚೆರ್ ದವರ್ನ್ ಶಿಭಿರಾಚೆಂ ಉಗ್ತಾವಣ್ ಮಾ|ಬಾ|ಮಾರ್ಕ್ ವಾಲ್ಡರಾನ್ ಕೆಲೆಂ, ತಶೆಂಚ್ ಆಯ್ಚಾ ಪರಿಗತೆಂತ್ ಎಕಾ ಸಾಹಿತ್ಕಾರಾಚಿ ಗರ್ಜ್ ಆನಿ ಸ್ಥಾನ್ ಕಸಲೆಂ ಮ್ಹಳ್ಳ್ಯಾಚೆರ್ ಅಪ್ಲಿಂ ಭಗ್ಣಾಂ ಉಚಾರ್ಲಿಂ.
ಕಾರ್ಯಾಚೊ ಅಧ್ಯಕ್ಷ್ ಮಾ|ಬಾ|ವಿನ್ಸೆಂಟ್ ಡಿ’ಸೋಜಾನ್ ಪಯ್ಲೆ ಪಾವ್ಟಿಂ ಕೊಂಕ್ಣಿ ಸಾಹಿತಿ ಇತ್ಲ್ಯಾ ಸಂಖ್ಯಾನ್ ಎಕಾ ಜಾಗ್ಯಾಚೆರ್ ಎಕ್ಟಾಂಯ್ ಜಾಂವ್ಚೆಂ ನಿಜಾಯ್ಕೀ ಆಮ್ಚೊ ಗೌರವ್ ಚಡಯ್ತಾಸ್ತಾಂ, ಆಯ್ಚಾ ಶಿಭಿರಾರ್ಥಿಂನಿ ಹ್ಯಾ ದಿಸಾಚೊ ಭರ್ಪೂರ್ ಫಾಯ್ದೊ ಜೊಡ್ಚೊ ಮ್ಹಳ್ಳೊ ಸಂಧೇಶ್ ದಿಲೊ.
[ಕೊಂಕ್ಣಿ ಕವಿತಾಶೆತ್ - ಎಚ್ಚೆಮ್ ಪ್ರಭಂಧ್ ವಾಚ್ತಾ, ತಶೆಂಚ್ ತಾಕಾ ಉಡಾಸಾಚಿ ಕಾಣಿಕ್ ದಿತಾ ಮಾ|ಜೋರ್ಜ್ ಒಲಿವೆರಾ]
ಸಕಾಳಿಂಚ್ಯಾ ಕಾರ್ಯಾಚೆಂ ಅಪುರ್ಭಾಯೆಚೆಂ ’ಕಾರ್ಯೆಂ ನಿರ್ವಾಹಣ್’ ಮಾನೆಸ್ತ್ ರೇಮಂಡ್ ಡಿ’ಕುನ್ಹಾ ತಾಕೊಡೆನ್ ಘೆತ್ಲ್ಲೆಂ.
[ಅಪುರ್ಭಾಯೆಚಿ ಕವಿತಾಗೋಶ್ಟಿ ಚಲವ್ನ್ ವರ್ತಾತ್ ಟೈಟಸ್ ತಾಕೊಡೆ ಆನಿ ಆನ್ಸಿ ಪಾಲಡ್ಕಾ]
ಸಕಾಳಿಂಚ್ಯಾ ಉಲವ್ಪಾಚೊ ಪಯ್ಲೊ ಭಾಗ್ ಲೇಖನಾಂ ಬರಂವ್ಚೆವಿಶಿಂ ಪ್ರೊ|ಸ್ಟೀಫನ್ ಕ್ವಾಡ್ರಸಾನ್ ಅಪ್ಲೆಂ ಸವಿಸ್ತಾರ್ ರಿತಿಚೆಂ ಲೇಖನ್ ಪ್ರಸ್ತುತ್ ಕರುನ್ ಕೊಂಕ್ಣಿ ಲೇಖಕಾಂನಿ ವಾಚ್ಪಾಚೆರ್ ಚಡಿತ್ ಆನಿ ಚಡಿತ್ ಧ್ಯಾನ್ ದಿಂವ್ಚಿ ಭೋವ್ ಗರ್ಜ್ ಆಸಾ ಮ್ಹಣಾಲೊ. ತಾಚ್ಯಾ ಉಲವ್ಪಾ ಉಪ್ರಾಂತ್ ಡಾ|ಎಡ್ವರ್ಡ್ ನಜ್ರೆತಾನ್ ಏಕ್ ಲೇಖನ್ ಕಶೆಂ ಬರಯ್ಹಾಯ್? ತಾಂತುಂ ಆಸಾಜಯ್ ಜಾಲ್ಲಿ ತಾಂತ್ರಿಕಥಾ ಆನಿ ಗಮನ್ ದೀಜಾಯ್ ಜಾಲ್ಲ್ಯಾ ಹೆರ್ ಸಭಾರ್ ವಿಶ್ಯಾಂಚೆರ್ ವಿವರ್ ಆಟಾಪ್ಚೆಂ ಪ್ರೆಸೆಂಟೇಶನ್ (ಧಾಖವ್ಪ್) ದೀವ್ನ್ ಉಲಯ್ಲೊ.
[ಕವಿತಾವಾಚನ್: ವಲ್ಲಿ ವಗ್ಗ ಆನಿ ಭೊಟಾಮ್ ಭೊಳಿಯೆ]
ಸಂವಾದಾಚೆರ್ ಮಾನೆಸ್ತ್ ಜೋಯ್ ಪಾಲಡ್ಕಾ ಉಲವ್ನ್ ಪತ್ರಾಂಕ್ ಕಸಲಿಂ ಲೇಖನಾಂ ಧಾಡಿಜಯ್ ಮ್ಹಳ್ಳ್ಯಾಚೆರ್ ಮಟ್ವೊ ವಿವರ್ ದಿಲೊ.
[ಕವಿತಾವಾಚನ್: ಎಲ್ಯೆರ್ ತಾಕೊಡೆ, ಇ.ಎಸ್.ಮೂಡ್ಬಿದ್ರಿ ಆನಿ ವಿಲ್ಸನ್ ಕಟೀಲ್]
ದುಸ್ರ್ಯಾ ಭಾಗಾಂತ್ ಕೊಂಕ್ಣಿ ಮಟ್ವ್ಯೊ ಕಾಣ್ಯೊ ಕಶ್ಯೊ ಬರಂವ್ಯೆತಾ ಮ್ಹಳ್ಳ್ಯಾಚೆರ್ ಮಾನೆಸ್ತ್ ವಲ್ಲಿ ವಗ್ಗನ್ ಅಪ್ಲಿ ಸಮ್ಜೊಣಿ ವಾಂಟುನ್ ಘೆತ್ಲಿ. ತ್ಯೇ ಉಪ್ರಾಂತ್ ಮಾನೆಸ್ತ್ ಎಡ್ವಿನ್ ಜೆ.ಎಫ್.ಡಿ’ಸೋಜಾನ್ ಸಾಹಿತ್ಯಾಚೆರ್ ಅಪ್ಲೆ ವಿಚಾರ್ ಪ್ರಸ್ತುತ್ ಕೆಲೆ. ವಲ್ಲಿ ಕ್ವಾಡ್ರಸಾನ್ ಅಪ್ಲ್ಯಾ ಉತ್ರಾಂನಿ ಸಮಾಜೆಂತ್ ಸಾಹಿತಿ ಮ್ಹಳ್ಯಾರ್ ಏಕ್ ಹವ್ಯಾಸಿ ವರ್ಗ್ ಜಾಯ್ನಾಯೆ, ಬಗಾರ್ ಜವಾಭ್ದಾರೆಚೊ ವರ್ಗ್ ಜಾಂವ್ಕ್ ಉಲೊ ದಿಲೊ.
[ಕವಿತಾವಾಚನ್: ವಲ್ಲಿ ಕ್ವಾಡ್ರಸ್]
[ಕವಿತಾ ವಾಚ್ಲ್ಲಿಂ ಕವಿಂ]
ಹೆಚ್ಚ್ ಸಂದರ್ಭಾರ್ ಫಾಮಾದ್ ಕೊಂಕ್ಣಿ ನಾಟಕಿಸ್ತ್, ಕಾಣ್ಯೆಗಾರ್ ಮಾನೆಸ್ತ್ ಡೊಲ್ಫಿ ಕಾಸ್ಸಿಯಾನ್ ತಾಚೆ ಥಾವ್ನ್ ’ಮಿತ್ರ್’ ಘೆವ್ನ್ ಬರ್ಯಾ ರಿತಿನ್ ಚಲಂವ್ಚ್ಯಾ ಮಿತ್ರ್ ಪಂಗ್ಡಾಕ್ ತಶೆಂಚ್ ’ಝೆಲೊ’ ಪತ್ರ್ ಬರ್ಯಾ ರಿತಿನ್ ಚಲಂವ್ಚ್ಯಾ ಪಂಚು ಬಂಟ್ವಾಳಾಕ್ ಫುಲ್ ದೀವ್ನ್ ಮಾನ್ ಕೆಲೊ. ತಶೆಂಚ್ ರೇಮಂಡ್ ಡಿ’ಕುನ್ಹಾಕ್ ತಾಚೆಸವೆಂ ಇಕ್ರಾ ವರ್ಸಾಂ ’ಝೆಲೊ’ ಪತ್ರಾಂಚೊ ಸಹ ಸಂಪಾದಕ್ ಜಾವ್ನ್ ವಾವ್ರ್ ಕೆಲ್ಲ್ಯಾ ಖಾತಿರ್ ಆನಿ ವಲ್ಲಿ ಕ್ವಾಡ್ರಸಾನ್ ದಾಯ್ಜ್.ಕೊಮ್ ಧ್ವಾರಿಂ ಕೊಂಕ್ಣೆಂತ್ ಎದೊಳ್ ಕೆಲ್ಲ್ಯಾ ನಸೆವಾಂವಾಕ್ ಫುಲ್ ದೀವ್ನ್ ಮಾನ್ ಕೆಲೊ.
[ಸ್ವಾಗತ್ ಆನಿ ಸಯ್ರ್ಯಾಂಚಿ ವಳೊಕ್ ಕರ್ತಾ ವಲ್ಲಿ ಕ್ವಾಡ್ರಸ್]
ಜೆವ್ಣಾ ಉಪ್ರಾಂತ್ಲ್ಯಾ ಕಾರ್ಯಾಂತ್ ಕೊಂಕ್ಣೆಂತ್ಲೆ ಉದೆವ್ನ್ ಯೆಂವ್ಚೆ ಗಾವ್ಪಿ ಅಶ್ವಿನ್ ಆನಿ ಜೋಯೆಲ್ (ಮೋಗ್ ಆಸೊಂ ಕೊವ್ಳೆಕ್ ಫಾಮಾದ್) ಹಾಣಿಂ ’ಯೇ ನಾರಿ’ ಮ್ಹಳ್ಳೆಂ ಪದ್ ಗಾವ್ನ್ ಮನರಂಜಿತ್ ಕೆಲೆಂ.
[ಯೇ ನಾರಿ ಯೇ - ಅಪುರ್ಭಾಯೆಚೆಂ ಪದ್ ಗಾಯ್ತಾತ್ ಜೊಸ್ವಿನ್ ಆನಿ ಜೋಯ್ಲನ್, ಲ್ಯಾನ್ಸಿ ಮಾಡ್ತಾ ಉಲ್ಲಾಸ್ ಪಾಟಯ್ತಾ]
ದನ್ಪಾರಾಂಚ್ಯಾ ಕಾರ್ಯಾಂತ್ ಕವಿತಾ ವಿಶ್ಯಾಂತ್ ಪ್ರಮುಖ್ ಉಲವ್ಪ್ ಜಾವ್ನ್ ಎಚ್ಚೆಮಾನ್ ’ಪ್ರಸ್ತುತ್ ಕೊಂಕ್ಣಿ ಕಾವ್ಯೆಂ’ ಮ್ಹಳ್ಳ್ಯಾಚೆರ್ ಅಪ್ಲೆಂ ಪ್ರಭಂಧ್ ಮಂಡನ್ ಕೆಲೆಂ. ತ್ಯೇ ಉಪ್ರಾಂತ್ ಆನ್ಸಿ ಪಾಲಡ್ಕಾ ತಶೆಂಚ್ ಟೈಟಸ್ ತಾಕೊಡೆನ್ ಚಲವ್ನ್ ವೆಲ್ಲ್ಯಾ ಕವಿತಾಗೋಶ್ಟಿಂತ್ ಕವಿ ಎಚ್ಚೆಮ್, ಎಡಿ ಕಾಡ್ದೊಸ್, ಎಲ್ಯೆರ್ ತಾಕೊಡೆ, ಕ್ಯಾಥರಿನ್ ರೊಡ್ರಿಗಸ್, ಮೆಲ್ವಿನ್ ಪೆರ್ನಾಲ್, ಗ್ಲೇಡಿಸ್ ರೇಗೊ, ಆರ್ಯನ್ ತಾಕೊಡೆ, ನವೀನ್ ಸುರತ್ಕಲ್, ಅವಿನಾ ಮಿಯಾರ್, ವಲ್ಲಿ ವಗ್ಗ, ವಿಲ್ಸನ್ ಕಟೀಲ್, ವಲ್ಲಿ ಕ್ವಾಡ್ರಸ್ ಹಾಣಿಂ ಭಾಗ್ ಘೆತ್ಲೊ. ಕವಿತಾಗೋಶ್ಟಿಂತ್ ವಾಂಟೆಲಿ ಜಾಲೆಲ್ಯಾ ಸರ್ವಾಂಕ್ ಅಶಾವಾದಿ ಪ್ರಕಾಶನಾಚೆ ಬೂಕ್ ಇನಾಮ್ ವಾಂಟ್ಲೆ. ತಶೆಂಚ್ ಆಧ್ಲ್ಯಾ ಮಯ್ನ್ಯಾಂತ್ ಕುವೆಯ್ಟಾಂತ್ ಚಲ್ಲ್ಲ್ಯಾ ಕವಿತಾಪಾಠಾಂತ್ ಅವಿನಾ ಮಿಯಾರಾಚ್ಯಾ ಕವಿತೆಕ್ ಮಾನೆಸ್ತಿಣ್ ಹೆಲೆನ್ ಪಿಂಟೊನ್ ಇನಾಮ್ ಜಾವ್ನ್ ದಿಲ್ಲೆ 5000 ರುಪ್ಯಾಂಚಿ ಚೆಕ್ ವಲ್ಲಿ ಕ್ವಾಡ್ರಸಾನ್ ಅವಿನಾ ಮಿಯಾರಾಕ್ ಪಾವಿತ್ ಕೆಲಿ.
[ಕುವೆಯ್ಟಾಂತ್ ಚಲ್ಲ್ಲ್ಯಾ ಕವಿತಾಪಾಠಾಚೆರ್ ಮಾನೆಸ್ತಿಣ್ ಹೆಲೆನ್ ಪಿಂಟೊನ್ ದಿಲ್ಲ್ಯಾ 5000 ರುಪ್ಯಾಂಚೆಂ ಇನಾಮ್ ಅವಿನಾ ಮಿಯಾರ್ ಘೆತಾನಾ]
ಉಪ್ರಾಂತ್ ಚಲ್ಲ್ಲ್ಯಾ ವೆದಿಚ್ಯಾ ಕಾರ್ಯಾಚಿ ಸುರ್ವಾತ್ ಭಾರತೀಯ್ ಕಥೊಲಿಕ್ ಯುವಸಂಚಾಲನಾಚ್ಯಾ ಸಾಂದ್ಯಾಂನಿ ಮಾಗ್ಣ್ಯಾ ಗಿತಾರ್ ಸುರ್ವಾತ್ ಕೆಲಿ. ಕಾರ್ಯೆಂ ನಿರ್ವಾಹಕ್ ಮೆಲ್ವಿನ್ ಪೆರ್ನಾಲಾನ್ ಸಯ್ರ್ಯಾಂಕ್ ವೆದಿಕ್ ಆಪವ್ಣೆಂ ಪಾಟಯ್ಲೆಂ; ಸಂಪ್ಣಿ ಕಾರ್ಯಾಚೆಂ ಅಧ್ಯಕ್ಶ್ಸ್ಥಾನ್ ಬಾಬ್ ಎರಿಕ್ ಒಝೇರ್ (ಕರ್ನಾಟಕ್ ಕೊಂಕ್ಣಿ ಸಾಹಿತ್ಯ್ ಅಕಾಡೆಮಿಚೊ ಅಧ್ಯಕ್ಷ್) ಹಾಣೆಂ ಘೆತ್ಲೆಂ ತರ್ ಮುಖೆಲ್ ಸಯ್ರೊ ಜಾವ್ನ್ ಫಾಮಾದ್ ಕೊಂಕ್ಣಿ ಸಾಹಿತಿ ಜೆರಿ ಕುಲ್ಶೇಕರ್ ಆನಿ ಮಾನಾಚೆ ಸಯ್ರೆ ಜಾವ್ನ್ ಮಾ|ಫ್ರಾನ್ಸಿಸ್ ರೊಡ್ರಿಗಸ್ ಅಲಂಗಾರ್, ಮಾ|ಮಾರ್ಕ್ ವಾಲ್ಡರ್, ಮಾ|ವಿನ್ಸೆಂಟ್ ಡಿ’ಸೋಜ್, ಮಾನೆಸ್ತ್ ಎಲಿಯಾಸ್ ಸಾಂಕ್ತಿಸ್, ಆನಿ ಮಾನೆಸ್ತ್ ಪಾಸ್ಕಲ್ ಪಿಂಟೊ ಹಾಜರ್ ಆಸ್ಲೆ.
[ಆಶಾವಾದಿ ಪ್ರಕಾಶನಾಚ್ಯಾ ಆಟ್ ನವ್ಯಾ ಬುಕಾಂಚಿ ವಳೊಕ್ ಕರುನ್ ದಿತಾ ಬಾಯ್ ವಾಯ್ಲೆಟ್ ಜೆ. ಪಿರೇರಾ]
ವಲ್ಲಿ ಕ್ವಾಡ್ರಸಾನ್ ಸ್ವಾಗತ್ ಆನಿ ಸಯ್ರ್ಯಾಂಚಿ ವಳೊಕ್ ಕರ್ನ್ ದಿಲ್ಲ್ಯಾ ಉಪ್ರಾಂತ್ ಬಾಯ್ ವಾಯ್ಲೆಟ್ ಪಿರೇರಾನ್ ಮೊಕ್ಳೀಕ್ ಜಾಂವ್ಕ್ ಆಸ್ಚ್ಯಾ ಆಶಾವಾದಿ ಪ್ರಕಾಶನಾಚ್ಯಾ ಆಟ್ ನವ್ಯಾ ಬುಕಾಂಚಿ ಮಟ್ವಿ ವಳೊಕ್ ಕರ್ನ್ ದಿಲಿ ತಶೆಂಚ್ ತೆ ಬೂಕ್ ಮೊಕ್ಳೀಕ್ ಕರ್ಚ್ಯಾ ಸಯ್ರ್ಯಾಂನಿ ಬುಕಾಂಚೆಂ ಚಾರಿತ್ರಿಕ್ ಮೊಕ್ಳೀಕ್ ಕಾರ್ಯೆಂ ಚಲಯ್ಲೆಂ.
ಆಡೊಸಾಂತ್ಲಿಂ ಫುಲಾಂ (ಉಗ್ತಾವ್ಪಿ: ಮಾನೆಸ್ತ್ ಲ್ಯಾನ್ಸಿ ಮಾಡ್ತಾ)
ಆಟ್ವ್ಯಾ ರಂಗಾಚೊ ಧೊಣು (ಉಗ್ತಾವ್ಪಿ: ಮಾನೆಸ್ತ್ ಎಚ್ಚೆಮ್)
ಶಿಂಪಡ್ಲೆಲಿಂ ಮೊತಿಯಾಂ (ಉಗ್ತಾವ್ಪಿ: ಮಾನೆಸ್ತ್ ಆನ್ಸಿ ಪಾಲಡ್ಕಾ)
ಮುಖಾಂ ಪಾಟ್ಲಿಂ ರುಪಾಂ (ಉಗ್ತಾವ್ಪಿ: ಮಾನೆಸ್ತ್ ಜೆರಿ ಕುಲ್ಶೇಕರ್)
ಕುಲ್ಕುಲೊ (ಉಗ್ತಾವ್ಪಿ: ಮಾನೆಸ್ತ್ ವಲ್ಲಿ ವಗ್ಗ)
ಮೊಳ್ಬಾವಯ್ಲಿಂ ಸ್ವಪ್ಣಾಂ (ಉಗ್ತಾವ್ಪಿ: ಮಾ|ಫ್ರಾನ್ಸಿಸ್ ಅಲಂಗಾರ್)
ತಿಂತೆರಾಂತ್ ಪಿಂತುರಾಂ (ಉಗ್ತಾವ್ಪಿ: ಮಾನೆಸ್ತ್ ಪಂಚು ಬಂಟ್ವಾಳ್)
ಕಾಳೊಕ್ ನಾತ್ಲ್ಲೊ ಗಾಂವ್ (ಉಗ್ತಾವ್ಪಿ: ಮಾನೆಸ್ತ್ ರಿಚ್ಚಿ ಪಿರೇರ್)
[ಚಾರಿತ್ರಿಕ್ ಬೂಕ್ ಮೊಕ್ಳೀಕ್ ಕಾರ್ಯೆಂ ಚಲವ್ನ್ ವರ್ತಾತ್ ಕೊಂಕ್ಣೆಂತ್ಲೆ ನಾಮ್ಣೆಚೆ ಸಾಹಿತಿ]
ಬುಕಾಚೆಂ ಮೊಕ್ಳೀಕ್ ಕಾರ್ಯೆಂ ಸಂಪ್ತಚ್ ಪರ್ಗಟ್ಣಾರ್ ವಲ್ಲಿ ಕ್ವಾಡ್ರಸಾನ್ ಆಪ್ಲ್ಯಾ ಎದೊಳ್ಚ್ಯಾ ಮಿಸಾಂವಾರ್ ಭಗುಂಕ್ ಮೆಳ್ಲ್ಲ್ಯಾ ಗೋಡ್ ತಶೆಂಚ್ ಕೊಡ್ಹು ಅನ್ಭೋಗಾಂಕ್ ಜಿರವ್ನ್ ದೋನ್ ಉತ್ರಾಂ ಉಲಯ್ಲೊ ತಶೆಂಚ್ ಹ್ಯಾ ಬುಕಾಂಚ್ಯಾ ಪರ್ಗಟ್ಣೆಕ್ ಆಧಾರ್ ಜಾಲ್ಲ್ಯಾ ಪೋಶಕಾಂಕ್ ತಶೆಂಚ್ ವೆದಿಚೆರ್ ಆಸ್ಚ್ಯಾ ಮಾನ್ ಸಯ್ರ್ಯಾಂಕ್ ಮಾನಾಚಿ ಪ್ರತಿ ವಾಂಟ್ಲಿ.
[ಚಾರಿತ್ರಿಕ್ ಮೊಕ್ಳೀಕ್ ಕಾರ್ಯಾಂತ್ ವಾಂಟೆಲಿ ಜಾಲೆಲಿಂ - ಉಭಿಂ ರಾವೊನ್ ತಾಳಿಯೊ ಪೆಟುನ್ ಉಲ್ಲಾಸಿತಾನಾ]
ಉಪ್ರಾಂತ್ ದಾಯ್ಜ್ ಸಾಹಿತಿಕ್ ಸ್ಪರ್ಧೊ 2006 ಹಾಂತುಂ ಇನಾಮಾಂ ಜಿಕ್ಲೆಲ್ಯಾಂಕ್ ಇನಾಮಾಂ, ಮಾನ್ಪತ್ರ್ ವಾಂಟ್ಚೆಂ ಕಾರ್ಯೆಂ ಕಾರ್ಯಾಚೊ ಅಧ್ಯಕ್ಷ್ ಬಾಬ್ ಎರಿಕ್ ಒಝೇರಾನ್ ಚಲವ್ನ್ ವೆಲೆಂ. ಬಾಬ್ ಎರಿಕ್ ಆಪ್ಲ್ಯಾ ಉಲವ್ಣ್ಯಾಂತ್ ಪ್ರಸ್ತುತ್ ಪರಿಗತೆಂತ್ ಅಸಲ್ಯಾ ಸಾಹಿತಿಕ್ ಶಿಭಿರಾಂಚಿ ಗರ್ಜ್ ಆನಿ ಮಹತ್ವ್ ಕಸಲೊ ಮ್ಹಳ್ಳ್ಯಾಚೆರ್ ದೋನ್ ಸಬ್ಧ್ ಉಲಯ್ಲೊ ತಶೆಂಚ್ ಸರ್ವ್ ಶಿಭಿರಾರ್ಥಿಂಕ್ ಉಲ್ಲಾಸ್ ಪಾಟಯ್ಲೊ.
[ತಿಂತೆರಾಂತ್ ಪಿಂತುರಾಂ - ಎಕಾ ಮಯ್ನ್ಯಾಚೊ ಕವಿ ಜಾವ್ನ್ ಎಚ್ಚೆಮ್ ಇನಾಮ್ ಘೆತಾನಾ]
[ತಿಂತೆರಾಂತ್ ಪಿಂತುರಾಂ - ಎಕಾ ಮಯ್ನ್ಯಾಚೊ ಕವಿ ಜಾವ್ನ್ ವಿಲ್ಸನ್ ಕಟೀಲ್ ಇನಾಮ್ ಘೆತಾನಾ]
[ತಿಂತೆರಾಂತ್ ಪಿಂತುರಾಂ - ಎಕಾ ಮಯ್ನ್ಯಾಚೊ ಕವಿ ಜಾವ್ನ್ ವಿಲ್ಫ್ರೆಡ್ ಲೋಬೊ ಪಡೀಲ್ ಆನಿ ಅವಿನಾ ಮಿಯಾರ್ ಇನಾಮ್ ಘೆತಾನಾ]
[ದಾಯ್ಜ್ ವರ್ಸಾಚೊ ಕವಿ ಪ್ರಶಸ್ಥಿ ಇನಾಮ್ ಘೆಂವ್ಚೊ ಎಚ್ಚೆಮ್ (ದಾಯ್ಜ್ ತರ್ಫೆನ್ 7500 ಆನಿ ಆಸ್ಟಿನ್ ಪ್ರಭು ತರ್ಫೆನ್ 10000 ನಗ್ದಿ), ಮಾನ್ ಪತ್ರ್ ಆನಿ ಯಾದಿಸ್ತಿಕಾ]
ಉಪ್ರಾಂತ್ಲ್ಯಾ ಕಾರ್ಯಾಂತ್ ’ತಿಂತೆರಾಂತ್ ಪಿಂತುರಾಂ’ ಅಂಕಣಾಂತ್ ’ಮಯ್ನ್ಯಾಚೆ ಕವಿ’ ಇನಾಮ್ ಜಿಕ್ಲೆಲ್ಯಾಂಕ್ ಇನಾಮ್ ವಾಂಟಾಪ್ ಕಾರ್ಯೆಂ ಮಾನೆಸ್ತ್ ಎಲಿಯಾಸ್ ಸಾಂಕ್ತಿಸಾನ್ ಚಲಯ್ಲೆಂ. ಹರ್ಯೆಕಾ ಮಯ್ನ್ಯಾಚ್ಯಾ ಕವಿಕ್ ಮಾನ್ಪತ್ರ್, ತಶೆಂಚ್ ಆಶಾವಾದಿ ಪ್ರಕಾಶನಾಚೆ ಬೂಕ್ ಇನಾಮ್ ಜಾವ್ನ್ ವಾಂಟ್ಲೆ. ವರ್ಸಾಚೊ ಕವಿ ಜಾವ್ನ್ ಎಚ್ಚೆಮಾಕ್ ಪಾಂಚ್ ಹಜಾರ್ ರುಪ್ಯಾಂಚೆಂ ಇನಾಮ್, ಯಾದಿಸ್ತಿಕಾ, ಮಾನ್ಪತ್ರ್ ಹಾಚೆಸವೆಂ ಅಮೇರಿಕಾ ಥಾವ್ನ್ ಮಾನೆಸ್ತ್ ಆಸ್ಟಿನ್ ಡಿ’ಸೋಜ್ ಪ್ರಭುನ್ ಧಾಡ್ಲೆಲೆ ಧಾ ಹಜಾರ್ ರುಪ್ಯಾಂಚಿ ಚೆಕ್ಕ್ ದೀವ್ನ್ ಉಲ್ಲಾಸ್ ಪಾಟಯ್ತಾನಾ ಜಮ್ಲೆಲ್ಯಾ ಸರ್ವ್ ಲೊಕಾಂನಿ ಉಭೆಂ ರಾವೊನ್ ತಾಳಿಯಾಂಚಾ ಆವಾಜಾನ್ ಉಲ್ಲಾನ್ ಪಾಟಯ್ಲೊ.
[ದಾಯ್ಜ್ ಸಾಹಿತಿಕ್ ಸ್ಪರ್ಧೊ 2006 ಚೆರ್ ಕವಿತಾ ಬರಂವ್ಚ್ಯಾಂತ್ ಜಿಕ್ಲೆಲಿಂ ಇನಾಮಾಂ ಘೆತಾತ್; ಎಲ್ಯೆರ್, ಎಚ್ಚೆಮ್ ಆನಿ ವಿಲ್ಸನ್ ಕಟೀಲ್]
[ದಾಯ್ಜ್ ಸಾಹಿತಿಕ್ ಸ್ಪರ್ಧೊ 2006 ಚೆರ್ ಜಿಕ್ಲೆಲಿಂ ಇನಾಮಾಂ ಘೆತಾತ್; ರಿಚ್ಚಿ ಪಿರೇರ್, ಕೆವಿನ್ ಡಿ’ಮೆಲ್ಲೊ (ತರ್ಫೆನ್) ಆನಿ ಕ್ಯಾಥರಿನ್ ರೊಡ್ರಿಗಸ್]
ತ್ಯೇ ಉಪ್ರಾಂತ್ ಎಲ್ಯೆರ್ ತಾಕೊಡೆನ್ ಮೂಡ್ಬಿದ್ರಿ ವಾರಾಡ್ಯಾಚ್ಯಾ ಸಾಹಿತಿಂಕ್ ವೆದಿಕ್ ಆಪಯ್ಲೆಂ ತರ್, ಮಾನೆಸ್ತ್ ಪಾಸ್ಕಲ್ ಪಿಂಟೊ ಆನಿ ಮಾನೆಸ್ತ್ ಎಲಿಯಾಸ್ ಸಾಂಕ್ತಿಸ್ ಹಾಣಿಂ ಮಾನ್ಪತ್ರ್, ಆಶಾವಾದಿ ಪ್ರಕಾಶನಾಚೆ ಬೂಕ್ ದೀವ್ನ್ ಮಾನ್ ಕೆಲೊ. ತಾಂಚೆಸವೆಂ ಮೂಡ್ಬಿದ್ರಿಚೆ ತೇಗ್ ಮಾಲ್ಘಡೆ ಸಾಹಿತಿ ಜಾವ್ನಾಸ್ಚ್ಯಾ ಮಾನೆಸ್ತ್ ಹಿಲರಿ ರೇಗೊ ತಾಕೊಡೆ (ಫಾಮಾದ್ ಕಾಣ್ಯೆಗಾರ್/ಕಾದಂಬರಿಕಾರ್), ಮಾನೆಸ್ತ್ ಹಿಲರಿ ಕಾರ್ಡೋಜ್ ಪಾಲಡ್ಕ (ಫಾಮಾದ್ ಲೇಖಕ್/ಕಾಣ್ಯೆಗಾರ್), ಮಾನೆಸ್ತ್ ಸಾಲ್ವಾದೊರ್ ರೊಡ್ರಿಗಸ್ ಪಾಲಡ್ಕಾ (’ಆಮ್ಚಿ ಸಮಾಜ್’ ಪತ್ರಾಚೊ ಸಂಪಾದಕ್) ಹಾಂಕಾಂ ಮಾನೆಸ್ತ್ ಜೆರಿ ಕುಲ್ಶೇಕರ್ ಹಾಣೆಂ ಗಂದಾಚೊ ಹಾರ್ ಘಾಲುನ್, ಯಾದಿಸ್ತಿಕಾ, ಮಾನ್ಪತ್ರ್ ಆನಿ ಆಶಾವಾದಿ ಪ್ರಕಾಶನಾಚೆ ಮೊಕ್ಳೀಕ್ ಜಾಲ್ಲೆ ಬೂಕ್ ದೀವ್ನ್ ಮಾನ್ ಕೆಲೊ.
[ಸಮಾರೋಪ್ ಕಾರ್ಯಾಚೊ ಅಧ್ಯಕ್ಷ್ ಬಾಬ್ ಎರಿಕ್ ಒಝೇರ್ ಉಲಯ್ತಾ, ಆನಿ ತಾಕಾ ಉಡಾಸಾಚಿ ಕಾಣಿಕ್ ದಿತಾನಾ]
ಉಪ್ರಾಂತ್ ಮುಖೆಲ್ ಸಯ್ರೊ ಮಾನೆಸ್ತ್ ಎಲಿಯಾಸ್ ಸಾಂಕ್ತಿಸ್ ಆಪ್ಲ್ಯಾ ಉತ್ರಾಂನಿ ’ದಾನಾಂ ಪಯ್ಕಿ ವ್ಹಡ್ಲೆಂ ದಾನ್ ಸಮಧಾನ್’ ಮ್ಹಣ್ತಾತ್, ಪುಣ್ ಹಾಚ್ಯಾಕೀ ವರ್ತೆಂ ದಾನ್ ಜಾವ್ನಾಸಾ ’ಗಿನ್ಯಾನಾಚೆಂ ದಾನ್’. ಆನಿ ಹೆಂ ಕಾಮ್ ಜಶೆಂ ಕುವೇಯ್ಟಾಂತ್ ನಿಸ್ವಾರ್ಥ್ಪಣಿಂ ಕರ್ನ್ ಆಯಿಲ್ಲ್ಯಾ ದಾಯ್ಜ್ ಪಂಗ್ಡಾಚೊ ತಾರಿಫೊ ಕೆಲೊ. ತಶೆಂಚ್ ಮಿತ್ರ್-ದಾಯ್ಜಾನ್ ಮಾಂಡುನ್ ಹಾಡ್ಲ್ಲ್ಯಾ ಹ್ಯಾ ಶಿಭಿರಾನಿಮ್ತಿಂ ಆಮ್ಚ್ಯಾ ಸಮಾಜೆಂತ್ ಸಭಾರ್ ಉಂಚ್ಲೆ ಸಾಹಿತ್ಕಾರ್ ಉದೆವ್ನ್ ಯೇಂವ್ದಿ ಮ್ಹಳ್ಳೊ ಉಲೊ ದಿಲೊ.
[ಮೂಡ್ಬಿದ್ರಿ ವಾರಾಡ್ಯಾಂತ್ಲ್ಯಾ ಸಾಹಿತಿಂಕ್ ಮಾನ್: ಜೋಯ್ ಪಾಲಡ್ಕಾ ಆನಿ ವಿಕ್ಟರ್ ಕಡಂದಲೆ]
[ಮೂಡ್ಬಿದ್ರಿ ವಾರಾಡ್ಯಾಂತ್ಲ್ಯಾ ಸಾಹಿತಿಂಕ್ ಮಾನ್: ಟೈಟಸ್ ತಾಕೊಡೆ ಆನಿ ಆನ್ಸಿ ಪಾಲಡ್ಕಾ]
[ಜೆರಿ ಕುಲ್ಶೇಕರ್ ಮೂಡ್ಬಿದ್ರಿ ವಾರಾಡ್ಯಾಂತ್ಲ್ಯಾ ಮಾಲ್ಘಡ್ಯಾ ಸಾಹಿತಿಂಕ್ ಮಾನ್ ಕರ್ತಾ: ಹಿಲರಿ ಕಾರ್ಡೋಜ್, ಸಾಲ್ವಾದೊರ್ ರೊಡ್ರಿಗಸ್ ಆನಿ ಹಿಲರಿ ತಾಕೊಡೆ]
[ಮೂಡ್ಬಿದ್ರಿ ವಾರಾಡ್ಯಾಂತ್ಲ್ಯಾ ತರ್ನ್ಯಾ ತಶೆಂಚ್ ಪರ್ನ್ಯಾ ಸಾಹಿತಿಂಕ್ ಮಾನ್]
[ಮುಖೆಲ್ ಸಯ್ರೊ ಎಲಿಯಾಸ್ ಸಾಂಕ್ತಿಸ್ ಉಲಯ್ತಾ]
[ಬಾಯ್ ವಾಯ್ಲೆಟ್ ಪಿರೇರಾಕ್ ಆನಿ ಮಾನೆಸ್ತ್ ಲ್ಯಾನ್ಸಿ ಮಾಡ್ತಾಕ್ ಮಾನಾಚಿ ಪ್ರತಿ ದಿತಾ ಎಲ್ಯೆರ್ ತಾಕೊಡೆ]
ಅಖ್ರೇಚೊ ಉಲವ್ನ್ ಮಾ|ಫ್ರಾನ್ಸಿಸ್ ರೊಡ್ರಿಗಸ್ ಆಪ್ಲ್ಯಾ ಅಪುರ್ಭಾಯೆಚ್ಯಾ ಕವಿತಾಮಯ್ ಉತ್ರಾಂನಿ ಆಮ್ಚಾ ಸಾಹಿತಿಂನಿ ಕಸಲ್ಯಾ ಸಂಗ್ತ್ಯಾಂಕ್ ಚಡ್ ಮಹತ್ವ್ ದೀಜಾಯ್ ಮ್ಹಳ್ಳ್ಯಾಚೆರ್ ಆಟೊವ್ ಚಲಂವ್ಚಿಂ ಉತ್ರಾಂ ಉಲಯ್ಲೊ.
ಉಪ್ಕಾರ್ ಆಟವ್ಣಿ:
1. ಪೋಶಕಾಂಕ್:
ಫೆಲಿಕ್ಸ್ ಲೋಬೊ, ಖತಾರ್
ಲಾರೆನ್ಸ್ ಡಿ’ಸೋಜ್ ಶಿರ್ವಾಂ, ಕುವೇಯ್ಟ್
ಸತೀಶ್ಚಂದ್ರ ಶೆಟ್ಟಿ ನಕ್ರೆ, ಕುವೇಯ್ಟ್
ವಲ್ಲಿ ಡೇ’ಸಾ, ಕುವೇಯ್ಟ್
ಲ್ಯಾನ್ಸಿ ಮಾಡ್ತಾ, ದುಭಾಯ್
ಜೋಸೆಫ್ ಲಾರೆನ್ಸ್ ಡಿ’ಸೋಜ್, ಕುವೇಯ್ಟ್
ಪಾಸ್ಕಲ್ ಪಿಂಟೊ ಪೆರ್ಮುದೆ, ಕುವೇಯ್ಟ್
ಎನ್. ದಾಸ್, ಕುವೇಯ್ಟ್
ಎಲಿಯಾಸ್ ಸಾಂಕ್ತಿಸ್ ಕಿರೆಂ, ಕುವೇಯ್ಟ್
ಲಾರೆನ್ಸ್ ಪಿಂಟೊ ಆಗ್ರಾರ್, ಕುವೇಯ್ಟ್
ಜೊಸ್ಸಿ ಪಿಂಟೊ ನಂತೂರ್, ಕುವೇಯ್ಟ್
2. ಪತ್ರಾಂಕ್:
ರಾಕ್ಣೊ ಹಾಫ್ತ್ಯಾಳೆಂ
ಮಿತ್ರ್ ಹಾಫ್ತ್ಯಾಳೆಂ
ದಿವೊ ಹಾಫ್ತ್ಯಾಳೆಂ
ಸೆವಕ್ ಮಯ್ನ್ಯಾಳೆಂ
ಝೆಲೊ ಮಯ್ನ್ಯಾಳೆಂ
3. ಅಂತರ್ಜಾಳಿಂಕ್:
www.bellevision.com
www.mangalorean.com
www.daijiworld.com
ವಲ್ಲಿ ಕ್ವಾಡ್ರಸಾನ್ ಉಪ್ಕಾರ್ ಆಟಯ್ಲೊ.
ಕೊಂಕ್ಣಿ ಲೈಬ್ರೆರಿ ಉಗ್ತಾವಣ್
ಹೆಚ್ಚ್ ಸಂದರ್ಭಾರ್ ಸಕಾಳಿಂ 9 ವೊರಾರ್ ಅಲಂಗಾರ್ ಫಿರ್ಗಜೆಂತ್, ಭಾರತೀಯ್ ಕಥೊಲಿಕ್ ಯುವಸಂಚಾಲನಾಚ್ಯಾ ಮುಖೇಲ್ಪಣಾಖಾಲ್ ಏಕ್ ಕೊಂಕ್ಣಿ ವಾಚನಾಲಯಾಚೆಂ ಉಗ್ತಾವಣ್ ಫಾಮಾದ್ ಕೊಂಕ್ಣಿ ಸಾಹಿತಿ ವಲ್ಲಿ ವಗ್ಗನ್ ಕೆಲೆಂ. ಸಾಹಿತಿ ವಲ್ಲಿ ಕ್ವಾಡ್ರಸಾನ್ ಪಯ್ಲೊ ಬೂಕ್ ಭಾರತೀಯ್ ಕಥೊಲಿಕ್ ಯುವಸಂಚಾಲನಾಚ್ಯಾ ಅಧ್ಯಕ್ಶಾಕ್ ಹಸ್ತಾಂತರ್ ಕೆಲೊ. ವಿಗಾರ್ ಬಾಪ್ ಮಾ|ವಿನ್ಸೆಂಟಾನ್ ಅಪ್ಲೆ ಸಂದೇಶ್ ದಿಲೆ. ಹ್ಯಾ ಕಾರ್ಯಾಕ್ ಗಾಂವ್ಚೆ ತಶೆಂಚ್ ಪರ್ಗಾಂವ್ಚೆಂ ಸಾಹಿತಿ ಹಾಜರ್ ಆಸ್ಲೆ.
[ಮಿತ್ರ್ ದಾಯ್ಜ್ ಸಾಹಿತಿಕ್ ಶಿಭಿರ್ 2006ಚಿ ಸವಿಸ್ತಾರ್ ವರ್ದಿ ಆನಿ ತಸ್ವೀರೊ]
About us | Feedback | Contact us
Copyright ©
2005 DAAIZ.COM All rights reserved.
Page concept, designed, hosted and maintained by Ashawadi Publications
