"amcha jinnyent choddtavo zaun ami heranchi jinni jieunko vochon tantum amkam labhchi solvonn ghemvchi sokot naschich vhoddlem osomodhan."

Firgojevar Konknni Vaurachi Gorz

de23

Voros : 2006

Moino : May

Konknni thoim mogall vachpea,

Jinnim aschi xikonk mhonntoch jinnyecha hor‍yeka hontar monis zal'leak toull toull poddonk astelem, toxench uttonk astelem tor‌y oplem misamv ghevun cholonk astelem. Techch‌porim amcha misamvant amim xikon'nch aileamv ani xikon'nch asamv. Hea misamvant jitli jik monis apnnaunko sokta mholl'llem tea tea monxacha monogotecher hondvon asa tor‌y ek sot matr konn‌y negar korichona, ani tem zaunasa ’jitli minot‌gi titlo protifoll’.

Prostut konknni porigotent hea misamvak oddkolleo zaun zaite somosse amchemukhar ubhe ravon heddaitat tor‌y tanchem gonn'nnem korinastana oplem misamv techch xrid'den, gourovan, mogan toxench hotthan mukharun vhorchi gorz udelea. Az konknni oplea lipi-boli, zat-dhorm' hachem ponda oddchon asa tor‌y thoim hanga konknneche bautte ubhtat mhonntoch konknni ud'dar zali ya zateli mhonnon svopnnant khellim khamvchi soddn konknni vaurak ami hor‍yekleamni aitem zaizoi poddlam. Konknni konnachi? konnem hem kam' korunk zai? koxem ani kiteak korchem? konknni vaur kel'leant amkam kitem mellta? mholl'llim boutik razamvachim sovalam vicharchim soddn amcha gamvant amcha firgojent, amcha vaddeamni punn poilem amcha ghoramni ho konknni vaur ami suru korunk zai.

Amcha jinnyent zaitea songtenk ami mohotv ditamv, zoxem lhan‌ponnar dotorn xiktamv, iskolak vetamv, mis-kumsarak vetamv punn hachesovem konknni bhasekhatir ami kitem-i korunk amcha yuvo mukheleamni mon kelem tor, konknnent novea bhorvoxeache fantte udetele, konknni novemsamvacheo ankhreo futt'teleo. 

Konknni vaur korchevixeant khoinchai bukamni/grinthamni boroilelem vachunk amkam mellchemna tor‌y kriatmok ritin chintlem tor amcha sahitimni hea dixim il'lem chintap attomvchem gorjechem.. Hachadhim-i thoddeamni hat bhandun fokot't herank ’konknni vaur korizai’ mholl'lli bud sanglea tor‌y, to vaur kosolo mholl'llem sangonk na.

Amcha firgojent amim konknni misamv koxem kor‍yet?

Amcha firgojent amim rat-dis konknnechem bhozon gaije mhonn sangcho irado nhoi, zoxem ’konknni mhoji mai.. Konknni mhaka zai’ mholl'llim kirtonam gaitoch konknni fulana vo palena.. Niz ritin konknnent kitem-i korchem tor zaiteo vatto amchan sodhunk sadhy asat;

1. Firgojent vorsak ek punnim konknni nattok/nattkullo khelloun dhakhoizai.
2. Firgojent ascha talentak protsah dimvcha dixen konknni spordhe asa kor‍yeta, te spordhe zauyet konknni bhaxonn spordho, konknni gain spordho, konknni sahitik spordho, konknni kviz spordho.....Vo her spordo.
3. Firgojent hor‍yeka ghoramni ek konknni potr punnim haddchi rivaz suru korizai.
4. Firgojent vorsak eka konknni bukak, eka konknni songit koullek, tor‌y mol diun gheunko zai [funkeak vicharun haddchem rauyzoi].
5. Firgojehontar lokank zagrit korchak rosteanattok/konknni yokxogano ya osole proyog konknni procharak bhovo upkarak poddtelem.
6. Firgojehontar/varaddea hontar ek konknni loibreri asa kor‍yeta, tantum sorv konknni potram, buk aslear konknni vachpeank choddounko khonddit upkarak poddtelem. 
7. Konknni potramni konknni bhasecha/sahiteacha vhaddaullecha nodren srizonatmok ritin chintchi gorz asa. Sahitik spordhe ani sahitik somvad osolea kriatmok chottuvottikank protsah dimvche tosolim.
8. Varaddea hontar osole spordhe/xibhiram vorsak ek pauttim punnim manddun haddunk tea tea varaddeamni proitn‌cholazai.
9. Diesejicha hontar osole spordhe/xibhiram manddun haddunk kendri-i yuvo sonchalonan/kotholik sobhen mukhelponn ghezai.

Sobhar firgojemni zaitim songhottonam asat, yuvo sonchalon, kotholik sobha...... Hem kam' tim korundit, him korundit mhonn hat bhandun bosanastam eka songhottonan mukhelponn ghetlem tor heramni tancho sohokar diun hea vaurak kumok kor‍yet. Yuvozonnamni protyek zaun osolea kamamni mukhelponn ghetlem tor khonddit zaun amcha mai‌bhaxek kedinch kitench unnem poddchemna..

Monis konn‌y zamv, kitem-i zamv punn zo monis aplea auyk vatter ghalta, taka somaz man dina - techch‌porim aplea mam-i‌bhaxek zo konn unnem lekhta, taka svabhiman mholl'llo bhilkul asonk sadhy na. 

Daaiz ek osolench misamv amchem, amim porgamvant asche tor‌y amcho mog konknnecho, konknnekhatir amcha tankibhitorlem kitem tor‌y korunk amchem preton astana amchem ginean fokot amcha vauracher asa xivai amchevixim konn kitem mhonnta mholl'llem chintunk ami vochanamv, zoxem chodd ambe ascha rukar chodd fator martat toxem amcha misamvacher hastele hason'nch bosom. Tachi bilkul fikir amkam na. Amim voiley nhoi, poiley nhoi - ami nimannem.. Zor‌tor konknnechi obhivrid'di zait tor amchem ostitv‌ch na mhonnonk‌y amim toyar. Kiteak mhollear ami hanga demvtana kaim punzamvcho irado gheun ayil'le nhoi, te iradey amkam nant..

Pattlea don vorsamni kel'leporinch hea vorsai amchim paulam amim kaddteleamv.. Amcha paulank tumcha magnneacho toxench sorvesporacha axirvadancho ximvor poddondi mhonn magtastana amchem magnnem itlench; ’konknni uloi, konknni uroi, konknni amchi auy’.

Dev borem korum,
- Valley Quadros, Ajekar