’amim thodde pauttim chintamv, dubllikai fokot't bhukel'li, nagddem aschi ani ravonk ghor naschi mhonn. Punn konnakch naka zal'lim zaun jiemvchi, konnachoch mog nastam jiemvchi, konnathaunyi zoton mellanastam jiemvchich vhoddli dubllikai zaunasa.’ - modor tereza
Bodlanatl'lo Lok
voros : 2007
Onko : 41
Moino : Movembor
Amcha kiristamv somajek ’gaddva kulliechi somaz’ mhonn konnengi volayil'lem ozun mhaka uddas asa, kiteak mhollear zolma thaun morta poreant amchea somajen eka nhoi eka ritin ’gaddamv’ zaun dis sarche xivai, ozun soit hem chintap fott mhonn ruzu korunk konnyi edoll sokonk na.
Ojik kaim panch-so dhakddeadhlea kallar amcho kiristamv lok gulam'girichi, kot'techakrechi jinni jieun asl'lo. Choddtavo lok oxikpi, kotthinn dubllo, disbhor thoim hanga mhonn konna konnager butt'tti chakori korun aplea kuttmak postalo; konn tottamni, konn gadeamni, konn bettamni tor ani konn oplem ghordar, kuttam' sanddun poisilea ghattamni vochon kam' korun poixe zoddtalo.
Uprant hea kiristamv lokachi porigot matxi sudhron aili, tottachi zodd utron lok poisilea bomboi paulo ani bomboigar zalo. Ani bomboi vochon, konn hottlamni, konn ghoramni aya zavun, konn bottler zaun, konn gaddio dhamvddaun ani konn bekremni pitt mollun poixe zoddilaglo ani maigamvcha aplea kuttmadarank, bondvank posunk laglo.
Maigamvamni kolvachim ghoram bodlon nolle aile, chimnni, lampeamv palvon viz dive aile - zauyet ambil pez bodlon pez ani lonnchem zalem, punn amcho kiristamv lok kaim disachem pottbhor jeunko laglo. Gamvant pidda xidda asli, kostt onvar asle punn monis kosttamni toryi ekameka pavon jietalo.
Uprant konn sat dorye utron gelo ani golfachea poixeamni amchea kiristamv somajecher rajvottki keli. Nolleanchim ghoram tteresachim zalim, ghoramni ttivi, viddio, tteprekorddor, komfyuttoram, e.Si, karam, baikam, skoch yetana, somajent sorvanki ekch spordho; hamvch unchlo mhonn dhakhomvcho. Somsari dhon doulotechem dhakoup korun amchi jinni ami bodlili. Sorvam ami svaulombi zaleamv, amkam amchea sez-sambaryachi gorz na, firgoz soddeam, amchea kuttmachea sandeanchinch ekamekak gorz na. Amchelagim duddu asa, vevegllea beankamni, fiks ddepasittar, astichea lekar, zaito duddu asa. Amkam voxilai asa, somsarant jiemvchi rit kollit asa.
Aicho kall golpacho kall nhoi, aicho kall inttornett'ttacho kall, tantrikotecho kall, az ami ghattak zamv, bomboi zamv, golfak axenamv, az amkam ekchch xevott, koxem toryi omerika, kenodda, yu.Ke va asttrelia vochonk. Ani veginch amchea ghoram ghoramni gaddio nhoi, helikopttoram, charttordd flaittam astit tor tantum noval na. Punn ek ghoddi amche bhomvarim ekoddi nodor ghumvddamvchi tor;
Ailevar dubhayant thoddea bharoti-i kameleamni kel'li ’sttraik’ matr amchea progotipor chintpak bollvont kuradd marinaye ravana. Ami eka vatter most progotixil zaleamv mhonn hordhem pettun ascha ghoddye, ami onyeka vatter sanddun ayil'lem nagddem sot amche mukar ubhem ravon amkanch heddaita. Mhollear amchea somajent ek vorg ozun tosochch asa, zo vellakallak sori zaun ozun soit bodlonk na, bodloncheporim disana - kiteak?
’Dubhai’ mhojea motint kedinch visron vochonk sokanaslem xher, ojik kaim dha vorsam adhim hamv dubhai xerantlea ekeka gol'lemni, golpachim svopnnam vhavaun gel'lom, tim svopnnam chyuran chur zaun ritea hatamni pattim ayil'lo uddas ozun mhojea kallza monant asat. Aplea kuttmak, aplea isttank, aplea bamvddank gamvant soddun hea remvechea xherant kam' korunk yetana mhojelagimyi her kitench natl'lem.
Hem ’dexbhokt, adorxvadi chintap’ bhovo borem - punn fokot't ami pottbhor jeun, dhenk kaddn, dolle dhampun, svopnnam dekhcha vogta matr xivai, nhesonk munz ason kaxtti nastam aschea ghoddye, kuttmak matea voir pakem naschea ghoddye, va bhukek pottak ek ghas xit nastam vhollvollchea vogtam he desbhokt, adorxvadi mholl'lle fokot't pokoll sobhd xivai her kitench nhoi. Oxem pollemv gelear pottak ek thembo nis soit nascha vogtam khonchoi monis aplea, aplea kuttmacheank pottak ek ghott nis matr axeta xivai dexbhokt nhoi. Ani osolea ghoddye soit dexbhokt niallije, konnem-i golfak vochanaye mhonn chinta tor mhojeprokar to bekuf. Hamv kaim amchea sorv lokamni golfak yeun kam' korizoi mholl'llea chintpacho vadi nhoi. Punn konne khoinchor, koxem kam' korizoi mholl'lli sorvank apapli vinchounn zaina, thoddepauttim nirvog nastam soit kam' korije poddta.
Sokallim fantear dolle ughoddlear kaim maigamvant dhonparanchea suryak pollel'leporim zal'lo onbhog, titlo ujvadd, titli dhog sosun dis kaddl'lexivai nirvog na. Hea porigotek sosun toryi kam' korchim kitlim nant? punn sorvank ekachch lekachem kam', jivit asa mhonn na. Konn moreadichem kam' korn soit hangachea vaddon yemvchea margayent dis kaddunk vod'datt'ta tor ani konn dogamni ramvcha eka kuddant, kaim dha-bhara zonn jieta, ekek dhiram' uromvchea axen, tankaim axa otreg asat; borem nesonk, borem khaunko, bori jinni jieunko, toryi tannim khamvche sukhe khubus, va thoddepauttim upaxim. Kiteak? he ekek dhiram' toryi uroilear, kaim moineak aplea maigamvak poixe dhaddyet nhoigi? mholl'llea chintpan. Tanchi ekeka disachi, ekeka khinnachi jinni bhirankull. Konnak moineacho sarko samball mellta va na tem kollit na, ani konnak mellat toryi, faleam hem kam' asa va na mholl'llem nighontt na. Hi viza labhonk koxem-i konna konnache pam-i dhorun, apli ast, aplea bailechem bhangar, pidd'dduk soit addovo ghalun, thoddeamni apleo kati zhoroun va vikhun hozaramni-lakhamni poixe yezonttank yettun ayil'lem koxem-i zalem. Thodde pauttim eka kamak haddn onyek kam' korizai poddta.
Hea porigotent konn pepsiche ddobbe zomoun dis kaddta tor ani konn choriam soro vikhun dis kaddta. Konnak gorjechem tor konnak morjechem.
Hea sondorbhar amchea dexachi arthik porigot sudhron yemvchi gozal sontosachichch. Punn poilench ordhem jevann jeun maigamvak poixe dhaddteleanchea pottak onyek mar, rinnacho bhoro, choddchi margai, poilem ek pekett khubus toryi sovayer melltalo atam tachemyi mol choddlam. Hea porigotent tanchem rudan aikotelim toryi konn?
Hea disamni khorench zaun bhovo dublle zaunasat golfagar, kaim hantle thodde borya kamar astit va boro samball zoddtit, toryi choddtavo lokanchi ozun tichch porigot, pamyank voddleat mateak pavana, mateak voddlear pamyank pavana mholl'lli got.
Amcho des progotechim paulam chomkon asa, somsarant bhovo vegan unchayek pamvchea tin raxttram poikint amcho bharot des ek mholl'llem sot. Punn amchea dexantlim thoddim ozun oplea kuddiche visve vikhun jietat, konn aplea dhuvek vikhta, konn aplea bhoinnik vikhta. Amchelagim inttornett'ttam asat toryi amchea somajent zoxem grest grest zatech vetatgi titlech mapan gorib gorib zate vetat. Ani hea porigotecher il'lo orso dhorunk khonchi-i songhottonam mukhar yemvchem mhojea kudd'ddea dolleank toryi disanant. Amcho thoddo xikpi lok ozun zat-dhormachea namvar amchea razoki-i mukheleanche kottputlli zaunsomajek churan churo korunk lagleat. Amchim sonchalonam ozun firgojemni bhandpam/holam bhandchear vest asat, partteo, piknikam korcheant, va lokank kusollam dukhtasor hasomvcheant ani man-som'manamni vest asat.
Tor hea vorgachi jinni jietelo amcho konn? amkam kitem lekta? amchim sonchalonam, amche songh somsthe ’ami’ mholl'lle dore bhandchar vest zatana, osolea vorgachea konnaiki ek kam', ek ghor, eka vorsachem nhesap, eka moineachem nirmoll jevann toryi osolea vorgant jieteleank dil'lem tor kitem zatem? hem konne korchem? amche dharmik mukheli ozun festachea mudd'domank vati vanttchear vest asat, amche layik mukheli soit ozun varxikotsou/festam achoronnamni, housi-housi khellamni vest asat, amcheo magnnea zomati soit ’konn konnapattlean dhamvlam, konne konnacho gorb kaddla’ mholl'llea chintpamnich vest asa xivai, amche modhem hea vorgache ozun choddon'nch asat mholl'llem krur sot.
Ani hea porigotent ami, bhageunt, devan vinchun kaddleli porza, hofteak misak vochon ’ekamekacho mog koryam’ mhonn tallo pinzun bobattche, konn he ’ekameka’ntle? kosolo to mog? mholl'llem chintunk sokl'leamv tor?
Hea vogtam khorench zaun mhaka sahir ludheanvin boroyil'leo heo volli uddasak yetat;
"isko hi jina kehete hoi to yuhim jilenge, uf na korenge, lob silenge, amsu piyenge"
[zor hakachch jinne mhonnchem tor, oxench jieveam, oyeo mhonnchem naka, ontt ximveam ani dukham pieveam]
Punn okhrek utt'ta ek soval, amkam vachun/aikon sudronk zatem tor kitem amkam vanjel asa, vedo, khuran asat; zor tea grinthamni amkam bodlunk nam tor, atam heo don volli koxeo amkam chintunk kortit nhoigi?
- Valley Quadros, Ajekar
