ಹಾಚೆಂ

ಕೊಂಕ್ಣೆಚಾ ವಿಂಚ್ಣಾರ್ ಸಾಹಿತ್ಯಾಚೊ ಕೊನ್ಸೊ - ’ದಾಯ್ಜ್’ - ಫಕತ್ತ್ ಕೊಂಕಣಿ ಥಾವ್ನ್, ಕೊಂಕಣಿ ಪರ್‍ಯಾಂತ್, ಕೊಂಕಣಿ ಖಾತಿರ್.

ಕವಿತಾಪಾಠ್ ಮ್ಹಳ್ಯಾರ್ ಕಿತೆಂ ಮ್ಹಳ್ಳ್ಯಾಚಾ ಸವಿಸ್ತಾರ್ ವಿವರಾಂಕ್ ಹ್ಯಾ ಪಾನಾಕ್ ಭೆಟ್ ದಿಯಾ

ಕವಿತಾಪಾಠ್ - 17

ಹಾಂವ್ ಯೆತಾಂಗೊ ಘಾಟಿ ದೆಂವೊನ್

ವಿಲ್ಫಿ ರೆಬಿಂಬಸ್

ಹಾಂವ್ ಯೆತಾಂಗೊ ಘಾಟಿ ದೆಂವೊನ್
ಮ್ಹಜ್ಯಾ ಮೊಗಾಚ್ಯಾ ಗಾಂವಾಕ್ ಪಾವೊಂಕ್
ತುಜ್ಯಾ ದೊಳ್ಯಾಂಚಿಂ ದುಃಖಾಂ ರಾವಂವ್ಕ್
ಹಾಂವ್ ಯೆತಾಂ ಧಾಂವೊನ್ ಧಾಂವೊನ್

ಯೇ ಮೊಗಾ, ಯೇ ಮೊಗಾ, ಮಂಗ್ಳುರಾಕ್
ಯೇ ಮೊಗಾ, ಯೇ ಮೊಗಾ, ಮಂಗ್ಳುರಾಕ್
ಯೇ ತುಜ್ಯಾ ಸೊಭೀತ್ ಶೆರಾ
ಆನಂದಾಚ್ಯಾ ತುಜ್ಯಾ ಘರಾ

ಮಯ್ಲಾಂ ಮಯ್ಲಾಂ, ಪಾಟ್ ಕರುನ್ ಧಾಂವ್ಲಿಂ
ಹಾಂವ್ ಯೆತಾಂ ಮುಖಾರ್ ಮುಖಾರ್ ತುಕಾ
ಧಾಂವ್ತೆಲಿಂ ತಿಂ ರೂಕ್-ಝಡಾಂ ಉಲಯ್ಲಿಂ
ತುಂ ರಾಕೊನ್ ಆಸಾಯ್ ಮ್ಹಣ್ ಮ್ಹಾಕಾ

ಅತ್ರೆಗಾಚಿ ತಿ ಘಡಿ ನಿಯಾಳ್ತಾಂ
ಭೆಟ್ ಮ್ಹಜಿ ತುಜಿ ಜಾತಾಸ್ತಾನಾ
ಮೆಟ್ ಮ್ಹಜೆಂ ಮ್ಹಜ್ಯಾ ಗಾಂವಾಂತ್ ದವರ್‍ತಾಂ
ಹಾಂವ್ ಪಾಟಿಂ ಪಳೆನಾಸ್ತಾನಾ

ಕುವೆಯ್ಟಾಂತ್ ಕೊಂಕ್ಣಿ ಕವಿತಾಚೆಂ ಕಾಮಾಸಾಳ್ - ಕವಿತಾಪಾಠ್ 17

’ದಾಯ್ಜ್’ ಪಂಗ್ಡಾನ್ ಚಲಂವ್ಚೆಂ ಕೊಂಕ್ಣಿ ಕವಿತಾಂಚೆಂ ಕಾಮಾಸಾಳ್ - ಕವಿತಾಪಾಠ್ 17, ಹ್ಯಾಚ್ ನವೆಂಬರಾಚಾ 3 ತಾರಿಕೆರ್, ಸುಕ್ರಾರಾ ಸಾಂಜೆರ್ 5:30 ವೊರಾಂಕ್ ಕುವೆಯ್ಟಾಂತ್ಲ್ಯಾ ಸಾಲ್ಮಿಯಾಂತ್ ಆಸಾ ಕೆಲೆಂ. ಕುವೆಯ್ಟಾಂತ್ಲೆಂ ಫಾಮಾದ್ ಗೊಂಯ್ಚೆ ಕೊಂಕ್ಣಿ ವಾವ್ರಾಡಿ, ಗೋವಾ-ವರ್ಲ್ಡ್ ಹಾಚೊ ಸಂಪಾದಕ್ ಬಾಬ್ ಗಾಸ್ಪರ್ ಅಲ್ಮೇಡಾ ತಶೆಂಚ್ ಅಖಿಲ್ ಭಾರತೀಯ್ ಲೇಖಕಾಂಚಾ ಎಕ್ತಾರಾಚೊ ಘಡ್ಣಾರ್ ಕವಿ ಮಾನೆಸ್ತ್ ಜಸ್ಭೀರ್ ಸಿಂಘ್ ಧಿಮಾನ್ ಮುಖೆಲ್ ಸಯ್ರೆ ಜಾವ್ನ್ ಹಾಜರ್ ಆಸ್‌ಲ್ಲ್ಯ್ಯಾ ಹ್ಯಾ ಕಾಮಾಸಾಳಾಂತ್ ಪಯ್ಲೆ ಪಾವ್ಟಿಂ ಗೊಂಯ್ಚೆ ತಶೆಂಚ್ ಮಂಗ್ಳುರಿ ಕವಿಂನಿ ಭಾಗ್ ಘೆತ್ಲೊ.

ಕಾಮಾಸಾಳಾಚಾ ಸುರ್‍ವಾತೆರ್ ವಲ್ಲಿ ಕ್ವಾಡ್ರಸಾನ್ ಕುವೆಯ್ಟಾಂತ್ ಕೊಂಕ್ಣಿ ಸಾಹಿತ್ಯ್/ಕವಿತಾಚಿಂ ಕಾಮಾಸಾಳಾಂ 2002 ಇಸ್ವೆಂತ್ ಸುರು ಕರ್ನ್ ಚ್ಯಾರ್ ವರ್ಸಾಂ ಸಂಪವ್ನ್ ಪಾಂಚ್ವ್ಯಾ ವರ್ಸಾಕ್ ಪಾಂಯ್ ತೆಂಕ್ಚಾ ವಗ್ತಾಂ, ಅಸಲಿಂ ಕಾಮಾಸಾಳಾಂ ಮುಖಾರುನ್ ವ್ಹರ್ಚಿ ಭಾಸ್ ದೀವ್ನ್ ’ಕವಿಂಕ್ ಕೊಣೆಂಯ್ ರಚುಂಕ್ ಜಾಯ್ನಾಂ, ಬಗಾರ್ ಕವಿಚಾ ವಾಟೆರ್ ಉಜ್ವಾಡ್ ಜರೂರ್ ಫಾಂಕವ್ಯೆತ್’ ಮ್ಹಣಾಲೊ.

’ಕೊಂಕ್ಣಿ ಕೊಗುಳ್’ ಮ್ಹಣ್ ಆಪ್ಲ್ಯಾ ಪದಾಂಕ್ ಸಂಸಾರ್‌ಭರ್ ಕೊಂಕ್ಣಿ ವರ್ತುಲಾಂತ್ ಫಾಮಾದ್ ಜಾಲ್ಲೊ ವಿಲ್ಫಿ ರೆಬಿಂಬಸ್ ಏಕ್ ಸಾಹಿತ್‌ಕಾರ್ ಮ್ಹಳ್ಳೆಂ ಸಭಾರಾಂಕ್ ಕಳಿತ್ ಆಸ್ಚೆಂನಾ ಅಶೆಂ ತಾಚಾ ಪದಾಂಚಾ/ಕವಿತಾಂಚಾ ಬರಯಿಲ್ಲೆಂ ಸಾಹಿತ್ಯಾಚೆರ್ ಮಟ್ವೆಂ ಸಮೀಕ್ಶಾತ್ಮಕ್ ಲೇಕನ್ ’ವಿಲ್ಫಿ ರೆಬಿಂಬಸ್ ಸಾಹಿತ್‌ಕಾರ್ ಜಾವ್ನ್’ - ಬಾಯ್ ಪ್ರಿಯಾ ಸಿಕ್ವೇರಾನ್ ವಾಚುನ್ ಸಾಂಗ್ಲೆಂ.

ಉಪ್ರಾಂತ್ ಗಾವ್ಪಿ ಬಾಬ್ ಸಿರಿಲ್ ಪೆರಿಸ್ ಹಾಣೆಂ ವಿಲ್ಫಿಚೆಂ ಅಧ್ಯಯನಾಕ್ ಘೆತ್‌ಲ್ಲೆಂ ಕವಿತಾ/ಪದ್ ’ಹಾಂವ್ ಯೆತಾಂಗೊ ಘಾಟಿ ದೆಂವೊನ್’ ಗಾಯ್ಲೆಂ ತಶೆಂಚ್ ಮೆಲ್ವಿನ್ ಜೆ. ವಾಸ್ ಕೆಲರಾಯ್ ಹಾಣೆಂ ಹ್ಯಾ ಪದಾಚೆರ್ ಅಧ್ಯಯನ್ ಕೆಲ್ಲೆಂ ಲೇಖನ್ ವಾಚ್ಲೆಂ.

ಮುಖೆಲ್ ಸಯ್ರೊ ಜಾವ್ನ್ ಹಾಜರ್ ಆಸ್‌ಲ್ಲೊ ಬಾಬ್ ಗಾಸ್ಪರ್ ಅಲ್ಮೇಡಾನ್ ವಿಲ್ಫಿಚಿಂ ಪದಾಂ ಗೊಂಯ್ಚಾ ಆಲ್ಫ್ರೆಡ್ ರೋಚ್‌ಪರಿಂ ಏಕ್ ನ್ಹಂಯ್ ಏಕ್ ಪ್ರಭಾವ್‌ಭರಿತ್ ಸಂದೇಶ್ ಘೆವ್ನ್ ಯೆತಾತ್ ದೆಖುನ್ ಅಪುರ್ಭಾಯೆಚಿಂ ಆಸೊನ್ ಲೊಕಾಂಕ್ ಪಸಂದ್ ಜಾತಾತ್ ಮ್ಹಣಾಲೊ.

ಜಸ್ಭೀರ್ ಸಿಂಘ್ ಅಪ್ಲ್ಯಾ ಸಂದೇಶಾಂತ್ ಕೊಂಕ್ಣೆಂತ್ ವ್ಯವಸ್ಥಿತ್ ಥರಾನ್ ಜಾಂವ್ಚಿಂ ಹಿಂ ಕವಿತಾ ಅಧ್ಯಯನಾಂ ಹೆರ್ ಭಾಸೆಚಾಂಕ್‌ಯ್ ಮೇಲ್‌ಫಾಂಕ್ತ್ ಜಾತಾತ್ ಮ್ಹಣಾಲೊ. 

ಹ್ಯಾ ಕಾಮಾಸಾಳಾಂತ್ ಜಸ್ಭೀರ್ ಸಿಂಘ್ ಧಿಮಾನ್, ಗಾಸ್ಪರ್ ಅಲ್ಮೇಡಾಸವೆಂ, ಮಾರಿಯಾನೊ ಲೂಕಸ್ ದಿನಿಜ್, ಸಿರಿಲ್ ಪೆರಿಸ್, ಮೆಲ್ವಿನ್ ಜೆ. ವಾಸ್ ಕೆಲರಾಯ್, ಪ್ರಿಯಾ ಸಿಕ್ವೇರಾ ಫೆರಾರ್, ರಾಯನ್ ಫೆರ್ನಾಂಡಿಸ್ ಆನಿ ವಲ್ಲಿ ಕ್ವಾಡ್ರಸ್ ಹಾಣಿಂ ಭಾಗ್ ಘೆತ್ಲೊ.

ಕಾಮಾಸಾಳಾಚಾ ಅಖ್ರೇಕ್ ವಿಲ್ಫಿ ರೆಬಿಂಬಸಾಚೆಂ ಅನ್ಯೇಕ್ ಪದ್ ’ಹ್ಯಾ ಸಂಸಾರಾಂತ್ ಏಕ್ ಆವಯ್ ಏಕ್ ಬಾಪುಯ್’ ಮ್ಹಳ್ಳೆಂ ಪದ್ - ಸಿರಿಲ್ ಪೆರಿಸಾನ್ ಗಾಯ್ಲೆಂ.

[(ದಾವ್ಯಾ ಥಾವ್ನ್) ಬಸ್‌ಲ್ಲಿಂ: ಮಾರಿಯಾನೊ ಲೂಕಸ್ ದಿನಿಜ್,  ಜಸ್ಭೀರ್ ಸಿಂಘ್ ಧಿಮಾನ್, ಗಾಸ್ಪರ್ ಅಲ್ಮೇಡಾ, ಸಿರಿಲ್ ಪೆರಿಸ್.

(ಉಭಿಂ ಆಸ್ಚಿಂ: ರಾಯನ್ ಫೆರ್ನಾಂಡಿಸ್, ಪ್ರಿಯಾ ಸಿಕ್ವೇರಾ, ಮೆಲ್ವಿನ್ ಜೆ. ವಾಸ್ ಆನಿ ವಲ್ಲಿ ಕ್ವಾಡ್ರಸ್ (ತಸ್ವೀರೆರ್ ನಾ)]

ಆಧ್ಲ್ಯಾ ಕವಿತಾಪಾಠಾಂಚೊ ವಿವರ್

ಮೆಲ್ವಿನ್ ವಾಸ್ ಹಾಚೆಂ ಅಧ್ಯಯನ್ ಲೇಖನ್

ವಿಲ್ಫಿ ರೆಬಿಂಬಸ್ ಏಕ್ ಸಾಹಿತ್‌ಕಾರ್ ಜಾವ್ನ್

ಕೊಂಕ್ಣಿ ವರ್ತುಲಾಂತ್ ಜಾಂವ್ ಗೊಯಾಂ, ಮಂಗ್ಳುರ್, ಬೊಂಬೊಯ್ ವಾ ಪರ್ಗಾಂವಾಂತ್ ವಿಲ್ಫಿ ರೆಬಿಂಬಸಾಕ್ ಚಡ್ತಾವ್ ಲೋಕ್ ವಳ್ಕತಾ, ಮಾನ್ ದಿತಾ, ಮೋಗ್ ಕರ್ತಾ ಆನಿ ಅಭಿಮಾನ್ ಪಾವ್ತಾ ತೊ ಕೊಂಕ್ಣೆಚೊ ಕೊಗುಳ್ ಮ್ಹಳ್ಳ್ಯಾ ಕಾರಣಾಕ್ ಲಾಗೊನ್. ಆಪ್ಲ್ಯಾ ಜಿಣ್ಯೆಚಿಂ ಚಡಿತ್ ವರ್ಸಾಂ ಕೊಂಕ್ಣಿ ಸಂಗೀತಾಂತ್ ಖರ್ಚಿಲ್ಲ್ಯಾ ಹ್ಯಾ ಮಹಾನ್ ಗಾವ್ಪಿಕ್ ಖರೊಚ್ ಹೊ ಮಾನ್ ಫಾವೊ ಜಾಲ್ಲೊ. ತಾಚೊ ಖಾಲ್ತೊ ಜಿನೊಸ್, ಸಾದೆಂ ವೆಕ್ತಿತ್ವ್, ಮಾಯ್ಪಾಶಿ ಉಲವ್ಣೆಂ ಹರ್‍ಯೆಕಾ ಕೊಂಕ್ಣ್ಯಾಕ್ ತಾಚೆಥಂಯ್ ಅಭಿಮಾನ್ ಉಭ್ಜಾಯ್ತಾ. ದೆಖುನ್ ತಾಚಿಂ ಪದಾಂ ಆಜ್ ಗಾಂವ್-ಪರ್ಗಾಂವ್ಚೊ ಗಡಿ ಉತ್ರೊನ್ ಪಾವ್ಲ್ಯಾಂತ್, ತಾಚೆಂ ಸಂಗೀತ್ ಸಾತ್ ದರ್‍ಯೆ ಉತ್ರೊನ್ ಗಾಜ್ತಾತ್ - ವಿವಿಧ್ ಭಾಸಾಂಚಾ ಲೊಕಾಂಮಧೆಂ. 

ಪುಣ್ ವಿಲ್ಫಿ ಏಕ್ ಸಾಹಿತ್‌ಕಾರ್ ಮ್ಹಳ್ಳೆಂ ಭೋವ್ಶಾ ಥೊಡ್ಯಾಂಕ್ ತರ್‌ಯ್ ಕಳಿತ್ ಆಸ್ಚೆಂ ನಾ. ಆನಿ ಹ್ಯಾ ದಿಶೆನ್ ಕೊಂಕ್ಣೆಂತ್ ತಾಕಾ ಫಾವೊ ಜಾಲ್ಲೊ ಮಾನ್ ಮೆಳೊಂಕ್ ನಾ ಮ್ಹಳ್ಳೆಂ ಮ್ಹಜೆಂ ಪ್ರಾಮಾಣಿಕ್ ಚಿಂತಾಪ್. ಕಾಂಯ್ ಸತ್ರಾ ವರ್ಸಾಂಧಿಂ ಪಂಚು ಬಂಟ್ವಾಳಾನ್ ಆಪ್ಲ್ಯಾ ’ಅಮರ್ ಪಬ್ಲಿಕೇಶನ್ಸ್’ ಥಾವ್ನ್ ಹಾಚ್ಯೊ ಮಿನಿ ಕಾದಂಬರಿಯೊ ಪರ್ಗಟ್ ಕೆಲ್ಲ್ಯೊ. ’ಪಿಂತ್ರಾಂ’, ’ಫಾತಿಮಾಚೆಂ ಕಾಜಾರ್’ ಆನಿ ’ಮೂಗುತಿ (ಕಥಾದಾಯ್ಜಾಂತ್ ಪರ್ಗಟ್ಲ್ಯಾ)’ ವಿಲ್ಫಿಚ್ಯೊ ಭೋವ್ ಫಾಮಾದ್ ಮಿನಿ ಕಾದಂಬರಿಯೊ. ತಾಚೆಸವೆಂ ತಾಣೆಂ ಥೊಡ್ಯೊ ಮಟ್ವ್ಯೊ ಕಾಣ್ಯೊ ಸಯ್ತ್ ಬರಯ್ಲ್ಯಾತ್, ನಾಟಕ್ ಬರಯ್ಲ್ಯಾತ್ ಆನಿ ಖೆಳವ್ನ್ ಧಾಖಯ್ಲ್ಯಾತ್ ಆನಿ ಜಾಯ್ತಿಂ ಕವಿತಾ-ಪದಾಂ ಬರಯ್ಲ್ಯಾಂತ್.

ಆಯ್ಲೆವಾರ್ ’ರಾಕ್ಣೊ’ ಹಾಫ್ತ್ಯಾಳ್ಯಾನ್ ಮಾಂಡುನ್ ಹಾಡ್‌ಲ್ಲ್ಯಾ ಎಕಾ ಕವಿಸಂಧಿಂತ್ ವಿಲ್ಫಿಯಾಬಾಕ್ ಭೆಟ್‌ಲ್ಲೆವೆಳಾರ್ ತಾಣೆಂ ಉಚಾರ್‌ಲ್ಲೆಂ ಏಕ್ ಉತಾರ್ ಜಾವ್ನಾಸಾ "ಅಪ್ಣಾಕ್ ಕವಿ ಮ್ಹಳ್ಳೆಂ ಸಭಾರ್ ಜಣ್ ವೊಪ್ವಾನಾಂತ್.." ಆನಿ ಹ್ಯಾ ಅಧ್ಯಯನಾಕ್‌ಯ್ ಹೆಂಚ್ ಉತಾರ್ ಘೆತ್ಲಾಂ ಆನಿ ಹ್ಯಾ ಸವಾಲಾಂ ಭಂವಾರಿಂಚ್ ಆಯ್ಚೆಂ ಕವಿತಾಪಾಠ್ ಸುರು ಕರ್ತಾಂ;

ಜೆದ್ನಾಂ ಏಕ್ ಉತಾರ್ ಮನ್ಶಾಚಾ ಕಾಳ್ಜಾಕ್ ರಿಗೊನ್ ಥಂಯ್ಚರ್ ಘೊಂಟೆರ್ ಭಾಂದ್ತಾ ಆನಿ ಮನ್ಶ್ಯಾಕ್ ಅಪ್ಲ್ಯಾ ಜಿಣ್ಯೆ ವಾಟೆರ್ ಉಜ್ವಾಡ್ ಘಾಲ್ತಾ - ತೆಂ ಜಿಣ್ಯೆ ಲಿಸಾಂವ್ ಜಾಂವ್ಕ್ ಪಾವ್ತಾ ಮಾತ್ರ್ ನ್ಹಂಯ್, ಏಕ್ ಅಪೂರ್ವ್ ಸಕತ್ ಸಯ್ತ್ ಜಾಂವ್ಕ್ ಸಕ್ತಾ. ವಿಲ್ಫಿಚಾ ಚಡ್ತಾವ್ ಪದಾಂಚೆಂ ತ್ರಾಣ್‌ಯ್ ಹೆಂಚ್. ತಾಚಾ ಪದಾಂತ್ಲಿಂ ಉತ್ರಾಂ ವೆವೆಗ್ಳ್ಯಾ ಕಾಲೆತಿಚಾ ವೆವೆಗ್ಳ್ಯಾ ವರ್ಗಾಚಾ ಲೊಕಾಚಾ ಕಾಳ್ಜಾಂತ್ ರೊಂಭ್ತಾತ್ - ಕೆನ್ನಾ ಹಾಸಯ್ತಾತ್, ಕೆನ್ನಾ ಕೊಚಾಯ್ತಾತ್, ಚಿಂತುಂಕ್ ಗೆಲ್ಯಾರ್ ಕೆನ್ನಾ ದುಖಯ್ತಾತ್ ಆನಿ ಕೆನ್ನಾ ರಡಯ್ತಾತ್.

ವಿಲ್ಫಿಯಾಬಾಚೆಂ ಸಗ್ಳೆಂ ಘರಾಣೆಂಚ್ - ಜಶೆಂ ತೊ ಗಾವ್ಪಿಗೀ ತಶೆಂಚ್ ತಾಚಿ ಪತಿಣ್ ಬಾಯ್ ಮೀನಾ ಸಯ್ತ್ ಗಾವ್ಪಿಣ್ ಆನಿ ಕೊಂಕಣ್ ಮೈನಾ. ತಾಂಚಿ ಧುವ್ ವೀಣಾ ಲ್ಹಾನ್ ಪ್ರಾಯೆರ್‌ಚ್ ಗಾಯ್ತಾಲೆಂ - ತಶೆಂಚ್ ಪೂತ್ ವಿಶ್ವಾಸ್ ಸಯ್ತ್. ವಿಲ್ಫಿಯಾಬಾಕ್ ಸಂಗೀತಾಚೆರ್ ಮಾತ್ಸೊ ಚಡ್ ಆವಡ್ ಆನಿ ತೊ ತೆಂ ಸುಟಾವೆಂ ಸಾಂಗ್ತಾ ಅಶೆಂ;

’ಆಮಿ ಮೋಗ್ ಕೆಲೊ ಸಂಗಿತಾಚೊ ಸ್ವಾಧಿಕ್ ಸಾತ್ ಸ್ವರಾಂಚೊ
ಸಂಗಿತಾಕ್ ಲಾಗೊನ್ ಉಭ್ಜಾಲೊ ಹೊ ಎಕ್ವಟ್ ಆಮ್ಚೊ ತುಮ್ಚೊ
ಹೊ ಭಾಂಧ್ ಮೊಗಾಚೊ ಕೆದ್ನಾಂಚ್ ತುಟೊಂಕ್ ನ್ಹಜೊ
ಆಮ್ಚಾ ತುಮ್ಚಾ ಮತಿಂತ್ ಸದಾಂಚ್ ಉಗ್ಡಾಸಾನ್ ಉರ್ಚೊ’ [ಮೋಗ್ ಕೆಲೊ ಸಂಗಿತಾಚೊ]

’ಮ್ಹಜೊ ತಾಳೊ ಗಾಯ್ತಲೊ
ತುಜಿ ಹೊಗ್ಳಿಕ್ ಸಾಂಗ್ತೊಲೊ
ತುಜೊ ಉಪ್ಕಾರ್ ಹಾಂವ್ ಆಟಯ್ತೊಲೊಂ
ಋಣ್ ತುಜೆಂ ಪಾವಯ್ತಲೊಂ

ಮೊರಾಸರ್ ತುಕಾ ಹಾಂವ್ ಋಣಿಂ
ಮ್ಹಜಿ ಮಾಂಯ್ ಭಾಸ್ ತುಂ ಕೊಂಕಣಿ’ [ಮ್ಹಜೊ ತಾಳೊ ಗಾಯ್ತಲೊ]

ವಿಲ್ಫ್ಯಾಬಾನ್ ಕೊಂಕ್ಣಿ ತಶೆಂಚ್ ತುಳು ಬಾಶೆಂತ್‌ಯೀ ಪದಾಂ ಘಡ್ಲ್ಯಾಂತ್ ತಶೆಂಚ್ ಗಾಯ್ಲ್ಯಾಂತ್, ತರ್‌ಯೀ ತಾಚೊ ಕೊಂಕ್ಣಿ ಭಾಸೆಚೊ ಮೋಗ್ ಕೆದಿಂಚ್ ಉಣೊ ಜಾಂವ್ಕ್ ನಾ.

’ಕೊಂಕಣ್ ಕರಾವಳೆರ್ ರಾವ್ಪ್ಯಾನೊ
ಗಾಂವ್ಕಾರಾನೊ ತುಮಿ ಗೊಂಯ್ಕಾರಾನೊ
ಎಕಾ ಉತ್ರಾನ್ ಕೊಂಕ್ಣಿ ಉಲವ್ಪ್ಯಾನೊ
ಸದಾಂ ಕೊಂಕ್ಣೆಚ್ ಜಾವ್ನ್ ಉರಾ ಕೊಂಕ್ಣ್ಯಾನೊ’ [ಕೊಂಕಣಿ ಕೊಂಕಣಿ]

ವಾ ಮಾಂಯ್‌ಭಾಸೆಚೆರ್ ತಾಣೆಂ ಬರಯಿಲ್ಲಿಂ ಹಿಂ ಉತ್ರಾಂ ಪಳೆಯಾ;

’ಭಾಂಗ್ರಾಳ್ಯಾ ತುಜಾ ಶೆತಾಂನಿ ತಿಂ ಪಿಕ್ಲೆಲಿಂ ಭಾತಾಂ
ಖಾವ್ನ್ ತುಜೆ ಕುಂವರ್ ಉಬೊನ್ ಗೆಲೆ
ಪರ್ದೆಶ್ಯಾಂತ್ ಕಟಾಕಟಾ ಕೊಂಕ್ಣೊ ಭೆಟ್ತಾನಾ
ಕೊಂಕ್ಣಿ ಭಾಸ್ ಉಲಯ್‌ನಾಂತ್ ಜಾಲೆ
ಆಪ್ಲ್ಯಾ ಭುರ್ಗ್ಯಾಂಕ್ ಶಿಕಂವ್ಕ್ ತಾಂಕಾಂ ಫುಟ್ವಾನಾ
ಕೊಂಕಣಾಂತ್ಲಿಂ ನೆಂಟಿಂ ನಾತ್ರಾಂ
ತಾಂಕಾಂ ಕೊಂಕ್ಣಿ ಉತ್ರಾಂ ಸಮ್ಜಾನಾಂತ್ 
ಹಾಯ್‌ಗತಿ ಹಾಯ್‌ಗತಿ ತುಜಾ, ಹಾಯ್‌ಗತಿ ಮಾಂಯ್‌ಭಾಶೆ ಮ್ಹಜಾ’ [ಮಾಂಯ್‌ಭಾಶೆ ಮ್ಹಜಾ]

ತಶೆಂಚ್;

’ಮಾಂಯ್ ಶಿಕಯ್ತಾ ಕೊಂಕ್ಣಿ ತೊಂಡ್ಪಾಶಿಂ
ಮಾಂಯ್ ಬರಿಚ್ ಹಿ ಭಾಸ್ ಮಯ್ಪಾಶಿ
ಜೀವನಾಂತ್, ಹ್ಯಾ ಜೀವನಾಂತ್
ಹಾಂವ್ ಖುಶಿ, ದಾಧೊಶಿ, ಹ್ಯಾ ಮ್ಹಜ್ಯಾ ಕೊಂಕಣಾಂತ್’ [ಮ್ಹಜಿ ಭಾಸ್ ಕೊಂಕಣಿ]

ತಾಚಿಂ ಪದಾಂ ತಶೆಂ ಮ್ಹಣ್ ಫಕತ್ ಎಕಾ ವಿಶ್ಯಾಚೆರ್‌ಚ್ ನಾಂತ್. ಕೆನ್ನಾಂ ಮೊಗ್ ತರ್ ಕೆನ್ನಾ ಹುಸ್ಕೊ, ಕೆನ್ನಾ ವ್ಯಂಗ್ಯ್ ತರ್ ಕೆನ್ನಾ ಕುಶಾಲಿ. ಎಕಾ ವೊರಾಥಾವ್ನ್ ಇಗರ್ಜೆಕ್ ವಚೊಂಕ್ ನ್ಹೆಸ್ಚಾ ಬಾಯ್ಲೆಕ್ ಪಳೆ ಕಶೆಂ ಆಪಯ್ತಾ;

’ಏಕ್ ಘಂಟ್ಯಾ ಥಾವ್ನ್ ಹಾಂಗಾ ರಾವ್ತಾಂ
ಬಾಯ್ಲ್ ಮ್ಹಜಿ ಭಿತರ್ಲ್ಯಾ ಕುಡಾಂತ್ ನ್ಹೆಸ್ತಾ’ [ಯೇಗೊ ಲಿಲ್ಲಿ]

ರಾಕೊನ್ ರಾಕೊನ್ ಥಕೊನ್ ಸುಕೊನ್ ಗೆಲ್ಲೊ ಪತಿ ಅಖ್ರೇಕ್ ಅಶೆಂ ಸಾಂಗ್ತಾ;

’ತೊ ಶೆಂಡೊ ಬಸಂವ್ಕ್ ಆಸಾ ತೊ ಪೌಡರ್ ಪುಸುಂಕ್ ಆಸಾ ಮಾಗಿರ್ ತೊ ಘಾಸುಂಕ್ ಆಸಾ’ [ಯೇಗೊ ಲಿಲ್ಲಿ]

ವೆದಿಚೆರ್ ಹೆಂ ಪದ್ ಗಾಯ್ತಾನಾ ಕಾಂಯ್ ಶೆಂಭೊರ್ ಘಾಲ್ನ್ ಆಯಿಲ್ಲೆ ಥೊಡೆ ವಿಲ್ಫಿಸವೆಂ ಯೇಗೊ ಲಿಲ್ಲಿ ಮ್ಹಣ್ ಕೊಣಾ ಕೊಣಾಕ್ ವೊಡುನ್ ಮಾರ್ ಖೆಲ್ಲಿಂ ಘಡಿತಾಂವಿಶಿಂಯ್ ಆಯ್ಕಲಾಂ ಹಾವೆಂ. ಪುಣ್ ಲೊಕಾಂಕ್ ಅಶೆಂ ಪಿಶ್ಯಾರ್ ಘಾಲ್ಚಿ ಸಕತ್ ವಿಲ್ಫಿಯಾಬಾಚಾ ಪದಾಂ ಶಿವಾಯ್ ಆನಿ ಕೊಣಾಕ್ ಆಸ್ಯೆತಾ?

ಕೊಂಕ್ಣೆಂತ್ ವಿಲ್ಫಿಯಾಬಾನ್ ಭೋವ್ ಕಸ್ಟ್ ಭಗ್ಲ್ಯಾತ್ ಮ್ಹಳ್ಳೆಂ ಹಾವೆಂಯ್ ಜಾಯ್ತೆ ಪಾವ್ಟಿಂ ವಾಚ್ಲಾಂ, ಆಯ್ಕಲಾಂ. ತರ್‌ಯ್ ತಾಚೆಂ ಕಾಳಿಜ್ ಆನಿ ಮನ್ ವಿಶಾಲ್. ತಾಚಾ ಸುರ್ವಿಲ್ಲ್ಯಾ ದಿಸಾಂನಿ ತೊ ತಾಚ್ಯಾ ಜಿಣ್ಯೆಚ್ಯಾ ಎಕೆಕಾ ಪಾಂವ್ಡಾರ್ ಹರ್‍ಯೆಕಾ ಪರಿಗತೆಚೆಂ ಫುಡ್ ಕರ್ನ್ ಪರಿಪೂರ್ಣ್ ರಿತಿನ್ ಜಿಯೆಲಾ. ಜಾಂವ್ ಮೋಗ್, ಜಾಂವ್ ರಾಗ್, ಜಾಂವ್ ನಿರಾಶಾ - ಹರ್‍ಯೆಕಾ ಪಾಂವ್ಡಾರ್ ತೊ ಪರಿಪೂರ್ಣ್ ಜಿಯೆಲಾ. ’ಹಾಂವ್ ಯೆತಾಂಗೊ ಘಾಟಿ ದೆಂವೊನ್’ ಏಕ್ ಅಸಲ್ಯಾಚ್ ಭಗ್ಣಾಂಚೆಂ ಕವಿತಾ/ಪದ್. ಎಕೆಕಾ ಉತ್ರಾಂತ್ ತಾಚಿಂ ಭಗ್ಣಾಂ ಲಿಪ್ಲ್ಯಾಂತ್.

ಜೆದ್ನಾಂ ಪರ್ಗಾಂವಾಂತ್ ಎಕ್ಸುರೊ ಆಸ್ಚೊ ಆಪ್ಲ್ಯಾ ಮಾಂಯ್‌ಗಾಂವಾಕ್ ಪಾಟಿಂ ಯೆತಾನಾ ತ್ಯಾ ಮಾಂಯ್‌ಗಾಂವ್ಚೊ, ಅಪ್ಣಾನ್ ಮೋಗ್ ಕೆಲ್ಲ್ಯಾಚೊ ಉಡಾಸ್ ಕಾಡ್ತಾನಾ ಕಾಳ್ಜಾಂತ್ ಮೋಗ್ ನಾತ್‌ಲ್ಲ್ಯಾ ಯೆಮ್ಕುಳ್ಯಾಕ್ ಸಯ್ತ್ ಮೊಗಾಚಿ ಭೆಟ್ ಜಾಂವ್ಕ್ ಆಸಾ. ಅಸಲಿ ತಾಂಕ್ ವಿಲ್ಫಿಯಾಬಾ ಶಿವಾಯ್ ಹೆರ್ ಕೊಣಾಚ್ಯಾಂತ್ ಆಸ್ಯೆತಾ? ಸಂಗೀತ್, ಸಾಹಿತ್ಯಾಚಿ ಮೂರ್ ನಾಸ್ಚಾಂಕ್ ಸಯ್ತ್ ವಿಲ್ಫಿಯಾಬಾಚಿಂ ಪದಾಂ ಮತಿಕ್ ಉಲ್ಲಾಸ್ ಫಾಂಕಯ್ತಾತ್, ಜಿಣ್ಯೆಲಿಸಾಂವ್ ದಿತಾತ್ ಆನಿ ಎಕಾ ಕವಿಕ್ ಹಾಚ್ಯಾಕೀ ವರ್ತೆಂ ಕಿತೆಂ ಜಾಯ್?

ಪುಣ್ ಹಾಚೆಂ ಕಾರಾಣ್ ಭೋವ್ ಸಂಪೆಂ - ತೊ ಸಾದ್ಯಾ ಮನ್ಶಾಚಿ ಜಿಣಿ ಜಿಯೆಲಾ ಆನಿ ತ್ಯಾ ಲೊಕಾಂಚಾ ಕಾಳ್ಜಾಚೆ ಎಕೆಕ್ ಧಡ್ದಡೆ ತೊ ಭೋವ್ ಬರೆ ರಿತಿನ್ ಆಯ್ಕತಾ. ಸಮ್ಜತಾ ತಶೆಂಚ್ ಆಪ್ಲ್ಯಾ ಎಕೆಕಾ ಪದಾಂನಿ ತೊ ಅಪುರ್ಭಾಯೆಚಾ ಕಾಣ್ಯೆರುಪಾರ್ ಪಿಂತ್ರಾಯ್ತಾ. ವಿಲ್ಫಿಯಾಬಾಚಾ ಪದಾಂತ್ಲ್ಯಾ ಸಾಹಿತ್ಯಾಚೆಂ ಅಧ್ಯಯನ್ ಕರ್ಚೆಂಚ್ ತರ್ ಅನ್ಯೇಕ್ ಅಧ್ಯಯನ್ ಕರ್‍ಯೆತಾ, ಆವಯ್ ವಿಶಿಂ ಬರಯಿಲ್ಲಿಂ ಪದಾಂ ಕಾಂಯ್ ಕಿತ್ಲೆಶ್ಯಾ ಫಾತ್ರಾ ಕಾಳ್ಜಾಚಾ ಬುರ್ಗ್ಯಾಂಕ್ ರಡಂವ್ಕ್ ಸಕ್ಲಾಂ ಮ್ಹಳ್ಳೆಂ ತೆಂ ದೆವಾಕ್‌ಚ್ ಕಳಿತ್.

’ಜರ್ ಮ್ಹಾಕಾ ದೇವ್ ಮ್ಹಜೊ ದಿಷ್ಟಿಕ್ ಪಡೊನ್
ಮ್ಹಣಾತ್ ತರ್ ಮಾಗ್ ತುಕಾ ಕಿತೆಂ ಜಾಯ್
ಮಾಗ್ತೊಲೊಂ ಧಾಡ್ ದೆವಾ ಜಿವಂತ್ ಕರುನ್
ಏಕ್ ದಿಸಾಕ್ ತರೀ ಯೇಂವ್ ಮ್ಹಜಿ ಮಾಂಯ್
ಮಾಂಯ್ ಮ್ಹಜಿ ಸಂಸಾರಾಂತ್ ಆಸ್ತಾನಾ
ಘಡ್ಯೆಚೆಂ ಸುಖ್ ತಿಕಾ ಲಾಭ್ಲೆನಾಂ
ಧಾಡ್ ತುಂ ತಿಕಾ ಏಕ್ ದಿಸಾಕ್ ಧಾಡ್ ತಿಕಾ
ಋಣ್ ತಿಚೆಂ ಪಾಯ್ತೊಲೊಂ ಸನ್ಮಾನಾನ್’ [ಮ್ಹಜಿ ಮಾಂಯ್]

ಜಿವಂತ್ ಆಸ್ತಾನಾ ಕೊಣಾಕ್ ಪುರ್ಸೊತ್ ಆಸಾ, ಕೊಣಾಕ್ ಸುಶೆಗ್ ಆಸಾ ಚಿಂತುಂಕ್ ಆಪ್ಲ್ಯಾ ಜಿವಂತ್ ಆಸ್ಚ್ಯಾ ಆವಯ್ ಬಾಪಾಯ್‌ವಿಶಿಂ? ದೆಖುನ್ ಮೊರ್ತಾ ಮ್ಹಣಾಸರ್ ರಾಕ್ಚೆಂ ಆನಿ ಮೊರ್ತಚ್ ರಡ್ಚೆಂ - ಹೆಂ ಮನ್ಶಾ ಸಂಯ್ಬ್ ತಶೆಂಚ್ ತತ್ವ್. ವಸ್ತುಚೆಂ ಮೋಲ್ ಕಳೊಂಕ್ ತಿ ಹೊಗ್ಡಯ್ಜಾಯ್ ಪಡ್ತಾ.

’ಕಿತ್ಲೊ ಹಾಂವ್ ಸಂತೊಸಾನ್ ಫುಲ್ತೊಂಗಾಯ್
ಆಜ್ ಜಿವಂತ್ ಆಸ್ಲಿ ತರ್ ಮ್ಹಜಿ ಮಾಂಯ್
ಅರ್ಪಿತೊಂ ಸರ್ವ್ ತಿಕಾ ಕಿತೆಂ ಜಾಯ್
ಆನಿ ದುದಾಂತ್ ಹಾಂವ್ ಧುತೊಂ ತಿಚೆ ಪಾಂಯ್’ [ದುದಾಂತ್ ಧುತೊಂ ತುಜೆ ಪಾಂಯ್]

ಆಜ್ ದುದಾಂತ್ ಧುತೊಂ ತಿಚೆ ಪಾಂಯ್ ಮ್ಹಳ್ಳೆಂ ರುದಾನ್ ಕೆಲೆಂ ಆವಯ್ ಸಾಂಡ್‌ಲ್ಲ್ಯಾಂನಿ - ತೆಚ್ಚ್ ಆವಯ್ಕ್, ಜಿಣೆಂ ಅಪ್ಲೆಂ ದೂದ್ ಪಿಯೆಂವ್ಕ್ ದೀವ್ನ್ ಆಪ್ಲ್ಯಾ ಭುರ್ಗ್ಯಾಕ್ ವ್ಹಡ್ ಕೆಲ್ಲೆಂ ಆನಿ ಆಜ್ ತೆಚ್ಚ್ ಪುತಾನ್ ತ್ಯಾ ಆವಯ್ಕ್ ಸಾಂಡ್‌ಲ್ಲೆಂ ಏಕ್ ಮಾರ್ಮಿಕ್ ಸತ್.

’ಅಗೇ ಮ್ಹಜೆ ಮಾಂಯ್
ತುಜ್ಯಾ ಮೊಗಾಚೆಂ ಮೋಲ್
ಎಕಾ ಪುತಾನ್‌ಯಿ ಭರುಂಕ್ನಾ ಎದೊಳ್’ [ಆವಯ್ಚಾ ಮೊಗಾಚೆಂ ಋಣ್]

ಹ್ಯಾ ಸಂಸಾರಾಂತ್ ಆವಯ್ಚೆಂ ಮೋಲ್ ಕಸಲೆಂ ಮ್ಹಳ್ಳೆಂ ತೊ ಹ್ಯೇಪರಿಂ ಸುಟಾವೆಂ ಸಾಂಗ್ತಾ. 

’ಬಾಪಾಯ್ಚೊ ಪೂತ್ ಎಕಾ ದಿಸಾ ಬಾಪುಯ್ ಜಾತಾ
ಬಾಪಾಯ್ಕ್ ದಿಲಾಂ ತಶೆಂಚ್ ಪುತಾ ಥಾವುನ್ ಘೆತಾ
ತುಂವೆ ದಿಲಾಂಯ್ ಕಿತೆಂ ತೆಂ ಪೂತ್ ತುಕಾ ದಿತಾ
ತವಳ್ ಆವಯ್ ಬಾಪಾಯ್ಚೊ ತೊ ಉಗ್ಡಾಸ್ ಯೆತಾ’ [ಹ್ಯಾ ಸಂಸಾರಾಂತ್ ಏಕ್ ಆವಯ್ ಏಕ್ ಬಾಪುಯ್]

ವಿಲ್ಫಿಯಾಬಾಚೆಂ ಹೆ ಪದ್ ಆಪ್ಲ್ಯಾ ಆವಯ್ ಬಾಪಾಯ್ಕ್ ಕಶ್ಟಿಲ್ಲ್ಯಾ ಹರ್‍ಯೆಕಾ ಬುರ್ಗ್ಯಾಂಚಾ ಅಂತಸ್ಕರ್ನಾಚೊ ತಾಳೊ ಜಾಲೊ. ಕೊಣೆ ಅಪ್ಲಿ ಚೂಕ್ ವಳ್ಕೊನ್ ಘೆತ್ಲೆಂ ಆನಿ ರಸ್ತ್ಯಾರ್ ಘಾಲ್ಲ್ಯಾ ಆಪ್ಲ್ಯಾ ಆವಯ್ಕ್ ಬಾಪಾಂಯ್ಕ್ ಪಾಟಿಂ ಘರಾಂ ಆಪವ್ನ್ ಹಾಡ್ಲೆಂ. ಕೊಣೆಂ ಪಶ್ಚಾತಾಪ್ ಪಾವೊನ್ ಉಗ್ತ್ಯಾನ್ ಮಾಫಿ ಮಾಗ್ಲಿ.. ಪಳೆಯಾ ವಿಲ್ಫಿಯಾಬಾಚಾ ಪದಾಂಚಾ ಉತ್ರಾಂಚಿ ತಾಂಕ್ ಆನಿ ಸೊಭಾಯ್. ಪಳೆಯಾ ತಾಚಾ ಉತ್ರಾಂಚಿ ಶ್ಯಾಥಿ ಅನಿ ಪ್ರಭಾವ್!.

’ವ್ಹಳ್ವಳೊನ್‌ಗೆ ತುಂ ಮೆಲಿಯ್
ಕಳ್ವಳೊನ್ ಮಾಂಯ್ ತುಂ ಗೆಲಿಯ್
ನಿರ್ಭಾಗಿ ಹ್ಯಾ ಪುತಾನ್ ಮಾಂಯ್
ತುಜಾ ಫೊಂಡಾಕ್ ಮಾತಿ ಘಾಲಿ’ [ದುದಾಂತ್ ಧುತೊಂ ತುಜೆ ಪಾಂಯ್’

ಆವಯ್ ಬಾಪಾಯ್ ಶಿವಾಯ್ ತಾಣೆಂ ಎಕಾ ಕುಟ್ಮಾಕ್ ಕಿತೆಂ ಗರ್ಜೆಚೆಂ ಮ್ಹಳ್ಳೆಂ ಅಶೆಂ ಬರಯ್ತಾ;

’ಕಿತೆಂ ಜಾಯ್ ಕಿತೆಂ ಜಾಯ್
ಎಕಾ ಕುಟ್ಮಾಕ್ ಮೊಗಾಶಿವಾಯ್
ಇಲ್ಲೊ ಮೋಗ್ ಇಲ್ಲೊ ರಾಗ್ ಇಲ್ಲಿ ಲಡಾಯ್
ಹಿಚ್ಚ್ ಘರಾಂತ್ಲಿ ದಾದೊಸ್ಕಾಯ್’ [ಕಿತೆಂ ಜಾಯ್ ಕಿತೆಂ ಜಾಯ್]

ವಿಲ್ಫಿಯಾಬ್ ಏಕ್ ಬರೊ ಗಾವ್ಪಿ, ಏಕ್ ಬರೊ ಕಾಣ್ಯೆಗಾರ್, ಏಕ್ ಬರೊ ನಾಟಕಿಸ್ತ್, ಏಕ್ ಬರೊ ಕವಿ, ಏಕ್ ಬರೊ ಪದಾಂ ಘಡ್ಪಿ ಮಾತ್ರ್ ನ್ಹಂಯ್. ಏಕ್ ಬರೊ ಮನಿಸ್ ಆನಿ ದೆಖಿಭರಿತ್ ಕೊಂಕ್ಣಿ ಮೋಗಿ ದೆಖುನ್ ತಾಚೆ ಪಾಟ್ಲಾವ್ದಾರ್ ಅಪಾರ್..

ಆಯ್ಲೆವಾರ್‌ಚೊ ಅನ್ಯೇಕ್ಲೊ ಕೊಂಕ್ಣಿ ಗಾವ್ಪಿ ವಿಲ್ಸನ್ ಒಲಿವೆರಾ ಸಯ್ತ್ ಅಪ್ಲ್ಯಾ ’ಮಾಂಯ್’ ಪದಾಂತ್ ಅಶೆಂ ಗಾಯ್ತಾ;

’ದುರ್ಭಳ್ಕಾಯ್ ಜೆದ್ನಾಂ ಕುಟ್ಮಾಕ್ ಪಾಪ್ಸುನ್ ಖಾತಾಲಿ
ಮಾಂಯ್ ತುವೆಂ ಕುಟ್ಮಾಕ್ ಖಾಂದ್ ದಿಲ್ಲೊಯ್’ [ಮಾಂಯ್]

ವಿಲ್ಫಿಯಾಬಾಚೊ ಮೋಗ್ ಆವಯ್-ಬಾಪಾಯ್ಚೆರ್ ಮಾತ್ರ್ ನ್ಹಂಯ್, ದಣ್ಸಲ್ಲ್ಯಾ ಗರಿಬಾಂಚೆರ್‌ಯ್ ಆಸಾ; ದಾಖ್ಲೊ - ಥೊಡ್ಯಾಚ್ ದಾಕ್ಟ್ಯಾಧಿಂ ಭೊಪಾಲಾಂತ್ ಜಾಲ್ಲ್ಯಾ ಆವ್ಘಡಾವಿಶಿಂ ತಾಚೊ ಹುಸ್ಕೊ ಪಳೆಯಾ;

’ದುಃಖಾಂ ಭರ್ತಾತ್ ದೊಳ್ಯಾಂತ್
ಮಿರಿಯೊ ಪಡ್ತಾತ್ ಕಪಲಾರ್
ಕಸ್ಲಿ ಘಡಿತ್ ತೆಂ ಘಡ್ಲೆಂ
ನಿರ್ಭಾಗಿ ತ್ಯಾ ಭೋಪಾಲಾಂತ್
ಹಾಸೊನ್ ಖೆಳೊನ್ ನಿದ್ಲಲೊ ಲೋಕ್ ತೊ
ಮುಖ್ಲೆಂ ಘಡಿತ್ ನೆಣಾಂ ಜಾಲೊ
ವ್ಹಾಳ್ಚೆಂ ವಾರೆಂ ವಿಕಾಳ್ ಜಾವುನ್ 
ಹಜಾರಾಂನಿ ಲೋಕ್ ತೊ ಮೆಲೊ’ [ಭೋಪಾಲ್]

ವಿಲ್ಫಿಯಾಬಾಚಿಂ ಚಡ್ತಾವ್ ಪದಾಂ ಹಾಂವ್ ಮ್ಹಜ್ಯಾ ಭುರ್ಗ್ಯಾಪಣಾರ್ ಗುಣ್ಗುಣ್ತಾಲೊಂ ತರ್‌ಯ್ ಥೊಡ್ಯಾಚೊ ಮತ್ಲಬ್ ಸಮ್ಜೊಂವ್ಚಿ ಪ್ರಾಯ್ ಸಯ್ತ್ ನಾಸ್ತಾಂ. ತಿಂಚ್ ಉತ್ರಾಂ ಆತಾಂ ಎಕೇಕ್ ಕಾಣಿ ಸಾಂಗ್ತಾನಾ ವಿಲ್ಫಿಯಾಬ್ ಮ್ಹಾಕಾ ಕಿತ್ಯಾಕ್‌ಗೀ ಏಕ್ ಬರೊ ಕಾಣ್ಯೆಗಾರ್‌ಸೊ ದಿಸ್ತಾ.

ವಿಲ್ಫಿಯಾಬಾಕ್ ಸಮಾಜೆಚೊ ಹುಸ್ಕೊ ಜಾಯ್ತೊ ಆಸ್‌ಲ್ಲೊ, ದೆಖುನ್ ತೊ ತವಳ್ ತವಳ್ ವ್ಯಂಗ್ಯ್ ಜಾತಾ ಅಸೊ;

’ದುಬ್ಳೊ ಜರ್ ಮೊರೊನ್ ಗೆಲೊ ತೊ ಪಯ್ಶೆ ನಾಸ್ತಾನಾ
ಕಾಜಿತೊರ್ ಮೊರ್ನಾಕ್ ಯೆತಾ, ವಿಗಾರ್ ಯೆಂವ್ಚೊನಾ
ಗ್ರೇಸ್ತಾಂ ಘರ್ ಮರಣ್ ಜಾಲೆಂ ಗಾಂವಾರ್ ಗೆಲಿಂ ಫೊನಾಂ
ಪಂದ್ರಾ ಪಾದ್ರಿ ಧಾಂವೊನ್ ಆಯ್ಲೆ ಮೀಸ್ ಭೆಟಯ್ತಾನಾ’ [ದುಡು ದುಡು ದುಡು]

ಕಸ್ಲೆಂ ನಿರ್ಭಾಗಿ ಸತ್ ಹೆಂ!.. ದುಡ್ವಾನ್ ಮನ್ಶಾಕ್, ಮನ್ಶಾಪಣಾಕ್ ಸಯ್ತ್ ಮೊಲಾಕ್ ಘೆಂವ್ಚೆಂ ಮಾರ್ಮಿಕ್ ಸತ್ ಕವಿ ಉಚಾರ್ತಾ.

’ನ್ಯಾಯ್-ನೀತ್ ಹಾಂಗಾ ಕೊಣ್ ಹುಂಗ್ತಾ
ಸಗ್ಳೆಂ ಪೈಶ್ಯಾಂನಿ ತುಕ್ತಾತ್
ಮನ್ಶಾಕ್ ಮನಿಸ್ ನಾ ಲೆಕ್ತಾ
ಭಾವ್-ಭಾವಾಕ್ ವಾಯ್ಟ್ ಮಾಗ್ತಾ
ಪೂತ್-ಭಾವಾಕ್ ವಾಯ್ಟ್ ಮಾಗ್ತಾ
ಪೂತ್ ಬಾಪಾಯ್ಚೆರ್ ಉಟ್ತಾ, ನ್ಯಾಯ್ ಚುಕ್ತಾ
ಆವಯ್ ಧುವೆಕ್ ವಿಕ್ತಾ’ [ಸಂಸಾರ್ ಸಂಸಾರ್]

ಅಸಲೆಂಚ್ ಏಕ್ ಪದ್ ಎಕಾ ’ಭಿಕಾರ್‍ಯಾಚೆಂ ಮರಣ್’ ಪದಾಂತ್ ದಿಸೊನ್ ಯೆತಾ,

’ಬಾವ್ಡೊ ಮೆಲಾ, ಮೊರೊನ್ ಪಡ್ಲಾ, ಘರಾ ಮುಖ್ಲ್ಯಾ ಆಂಗ್ಣಾಂತ್
ಗಾಂವ್ಚೊ ಲೋಕ್ ಜಮ್ಲಾ ತರೀ ರಡ್ಚೊ ಕೊಣೀ ನಾ
ಸಗ್ಳ್ಯಾ ಘರಾಂತ್ ಸೊಧ್ಲ್ಯಾರೀ ಏಕ್ ಪಯ್ಸೊ ಸಯ್ತ್ ನಾ
ಮೋರ್ನ್ ಕಶೆಂ ಕಾಡ್ಚೆಂ ಮ್ಹಣೊನ್ ಕೊಣೀ ಉಲಯ್ನಾ’ [ಭಿಕಾರ್‍ಯಾಚೆಂ ಕುಟಾಮ್]

ಜೀವ್ ಆಸೊನ್ ಭಿಕ್ ಮಾಗೊನ್ ಗತ್ ಆಧಾರ್ ನಾಸ್ತಾಂ ಮೆಲ್ಲೊ ಏಕ್ ಭಿಕಾರಿ ಕೊಣಾಚೊಯ್ ಕೊಣ್‌ಯ್ ನ್ಹಂಯ್ ಜಾಲ್ಲ್ಯೆ ಘಡ್ಯೆ, ಜೆದ್ನಾಂ ತಾಚಾ ಭಿತರ್ಲ್ಯಾ ಬೊಲ್ಸಾಂತ್ ಪಾಂಚ್ ಹಜಾರ್ ಮೆಳ್ತಾನಾ ತಾಚಾ ಮೊರ್ನಾಕ್ ಪಾವ್‌ಲ್ಲೊ ಸಗ್ಳೊ ಲೋಕ್ ತಾಚೆ ಸಯ್ರೆ ಜಾತಾತ್, ಕೊಣ್ ಬಾಪ್ಪು, ಕೊಣ್ ಮೌಶಿ, ಕೊಣ್ ಭಾವ್ ಆನಿ ಕೊಣ್ ಪಾಗುರ್ ಮಾಂವ್..

’ಕುಟ್ಮಾಚ್ಯಾಂಕ್ ಪಯ್ಶೆ ವಾಂಟುಂಕ್ ಬಸ್ಲೊ ಗುರ್ಕಾರಾಮ್
ಸರ್ಲಲೊ ಭಿಕಾರಿ ಆತಾಂ ಸಭಾರಾಂಚೊ ಮಾಮ್
ಥೊಡ್ಯಾಂಚೊ ತೊ ಬಾಪ್ಪು ಜಾಲ್ಯಾರ್ ಥೊಡ್ಯಾಂಕ್ ಪಾಗುರ್‌ಮಾಂವ್
ಪಳೆಂವ್ಕ್ ಗೆಲ್ಯಾರ್ ಸಗ್ಳೊ ಗಾಂವ್, ಭಿಕಾರ್‍ಯಾಚೆಂ ಕುಟಾಮ್’ [ಭಿಕಾರ್‍ಯಾಚೆಂ ಕುಟಾಮ್]

ಪುಣ್ ವಿಲ್ಫಿಯಾಬಾನ್ ವ್ಯಂಗ್ಯ್ ಸವೆಂ ಹಾಸ್ಯ್ ಪದಾಂನಿ ಸಯ್ತ್ ಲಿಖ್ಲಾಂ;

’ಹೆರಾ ದಿಸಾಂನಿ ಕೋಣ್ ಮ್ಹಾಕಾ ಹುಂಗ್ತಾ
ಆಜ್ ಹರ್‍ಯೆಕ್ಲೊ ವಾಟ್ ಮ್ಹಜಿ ರಾಕ್ತಾ
ದೂಧ್‌ವಾಲಿ, ಡೊಬಿವಾಲೊ, ಘರ್‌ವಾಲಿ ಆನಿ ಸೊರ್‍ಯಾವಾಲೊ
ಘರಾಭಿತರ್ ರಿಗ್ತಾನಾರೆ ತಯಾರ್ ಆಸಾ ಪಟ್ಟಿ ಮ್ಹಜೆ ಬಾಯ್ಲೆಚಿ;
ತಾಂದುಳ್ ನಾ, ಅಮೂಲ್ ನಾ, ತೇಲ್ ನಾ, ತೂಪ್ ನಾ
ಆನಿ ಘರಾ ನ್ಹೆಸೊಂಕ್ ಸಾಡಿ ನಾ, ಅಯ್ಯಯ್ಯೋ..’ [ಮಹಿನ್ಯಾಚಿ ಪಯ್ಲಿ ತಾರಿಕ್]

ಹೆಚ್ಚ್‌ಪರಿಂ ಸೊಭಿತ್ ಚೆಡ್ವಾಂಕ್ ಫಟ್ಕಿರೊ ಡೋಂಗ್ ಕರ್ನ್ ಫಟಂವ್ಚೊ, ಹಕೀಗತೆಂತ್ ಸೊರೊ ಉಕಡ್ಚಾ ಜೋನಿಕ್ ಜೆದ್ನಾಂ ಪೊಲಿಸಾಂನಿ ಕುಡಾಯ್ತಾನಾ ಸಂತೊಸ್ ಪಾಂವ್ಚಾ ಬಾಕಿಚ್ಯಾ ತರ್ನಾಟ್ಯಾಂಚೆ ಉಮಾಳೆ ಅಪುರ್ಭಾಯೆನ್ ಪಿಂತ್ರಾಯ್ತಾ.

’ಮಯ್ಲಾಂ ಮಯ್ಲಾಂ, ಪಾಟ್ ಕರುನ್ ಧಾಂವ್ಲಿಂ
ಹಾಂವ್ ಯೆತಾಂ ಮುಖಾರ್ ಮುಖಾರ್ ತುಕಾ
ಧಾಂವ್ತೆಲಿಂ ತಿಂ ರೂಕ್-ಝಡಾಂ ಉಲಯ್ಲಿಂ
ತುಂ ರಾಕೊನ್ ಆಸಾಯ್ ಮ್ಹಣ್ ಮ್ಹಾಕಾ’ [ಹಾಂವ್ ಯೆತಾಂಗೊ ಘಾಟಿ ದೆಂವೊನ್]

ಮೊಗಾಚೆ ಉಮಾಳೆಂ ಪರತ್ ಅನ್ಯೇಕಾ ಅಸಲ್ಯಾಚ್ ಪದಾಂತ್ ಅಶೆಂ ಆಸಾ;

’ಮೋಗ್ ಹಾಂವೆ ಕೆಲೊಲೊ ತುಜೊ ಬಾಯ್
ಪುಣ್ ಮ್ಹಜಾ ಕಾಳ್ಜಾಕ್ ಜಾಲೊ ಘಾಯ್
ಕಶೆಂಯ್ ಪುಣಿ ಹ್ಯಾ ಕಾಳ್ಜಾ ಆಲ್ತಾರೆರ್
ತುಕಾ ನ್ಹೆಟಂವ್ಕ್ ಜಾಯ್’ [ಆಂಜೆಲಿನಾ]

ಉಮಾಳೆ ಮೊಗಾಚೆಚ್ ತರ್‌ಯ್ ರುಪಾಂ ಪಳೆಯಾ ವೆವೆಗ್ಳಿಂ. ಹಾವ್-ಭಾವ್ ವೆವೆಗ್ಳೊ.

’ದುಖಾಂನಿ ಉಘಡ್ತಾನಾ ತೆಂ ಉಗ್ಡಾಸಾಚೆಂ ಧಾಂಪ್ಣೆಂ
ದೀಸ್ ಆದ್ಲೆ ನಿಯಾಳ್ತಾನಾ ಚಿಂತಾಂ ಹಾಂವ್ ಸದಾಂ ತುಜೆವಿಣೆಂ
ತುಕಾ ನಿಯಾಳ್ತಾನಾ ರಡೊನ್ ಮೊಗಾಚೆಂ ರಡ್ಣೆಂ
ಸುಕ್ ದುಃಖ್ ಸೊಧ್ತಾಂ, ಬಾಯ್ ತೆಂ ಲುಟ್ಲಾಂಗಾಯ್ ಕೊಣೆಂ?’ [ಫಿಲೋಮೆನಾ]

ಮೋಗ್-ಮಾಯ್ಪಾಸ್ ಪಿಂತುರಾಂತ್ ’ಪಿ.ಬಿ.ಶ್ರೀನಿವಾಸ್’ ಹಾಣೆಂ ಗಾಯ್ಲೆಲೆಂ ಪದ್ ಪಳೆಯಾ;

’ಆಧ್ಲೊ ತೊ ಉಗ್ಡಾಸ್ ಕೆಲ್ಯಾರ್
ದೆಂವ್ತೆಲಿಂ ದುಃಖಾಂ ದೊಳ್ಯಾರ್
ಜಲ್ಮಾತಾಂ ಶೆಂಭೊರ್ ಪಾವ್ಟಿಂ
ಮೋಗ್ ತುಜೊ ಮೆಳ್ತಾ ಜಾಲ್ಯಾರ್’ [ಮೋಗ್ ತುಜೊ ಕಿತ್ಲೊ ಆಶೆಲೊಂ]

ಆತಾಂ ಕೊಣ್ ಸಾಂಗತ್ ವಿಲ್ಫಿಯಾಬ್ ಕವಿ ನ್ಹಂಯ್ ಮ್ಹಣ್? ಜರ್ ಹಿಂ ಕವಿತಾಚಿಂ ಉತ್ರಾಂ ನ್ಹಂಯ್ ತರ್ - ಖರೆಂಚ್ ಸಾಂಗ್ತಾಂ ಸಂಸಾರಾಂತ್ ಕವಿತಾ ಮ್ಹಳ್ಳೆಂಚ್ ನಾ.

ವಿಲ್ಫಿಯಾಬಾಚೆಂ ಅನ್ಯೇಕಾ ಪದಾಚಿಂ ಉತ್ರಾಂ ಪಳೆಯಾ;

’ಜರ್ ಮ್ಹಾಕಾ ಮ್ಹಜ್ಯಾ ದೆವಾನ್ ಏಕ್ ಶಿಲ್ಪಿ ಜಾವ್ನ್ ರಚ್ಲೊ
ರುಪ್ಣೆಂ ತುಜೆಂಚ್ ಕಾಂತವ್ನ್ ಆರಾಧನ್ ಕರ್ತೊಂ ಆಸ್ಲೊಂ’ [ಮರಿಯಾ]

ವಿಲ್ಫಿಯಾಬಾಚ್ ನದರ್ ಸಂಸಾರಾಂತ್ ಜಿಯೆಂವ್ಚಾ ಹರ್‍ಯೆಕಾ ಸಮಾಜೆಚಾ ಹರ್‍ಯೆಕಾ ಲೊಕಾಂಚಾ ಜಿವಿತಾಚೆರ್ ಪಡ್ಲ್ಯಾ ಆನಿ ಪಡ್ತಾ. ತಾಚಿಂ ಥೊಡಿಂ ಕವಿತಾ-ಪದಾಂ ಖಂಚಾಯ್ ಕಾಳಾರ್ ಪ್ರಸ್ತುತ್ ಜಾಂವ್ಚೆ ತಸಲಿಂ. ದಾಖ್ಲೊ;

’ಕೊಣ್ ಮುಖಾರ್ ಮುಖಾರ್ ಚಲ್ತಾ
ತೊ ಮುಖ್ಲೆಂ ಪೋಂತ್ ಧರ್ತಾ
ಕೊಣ್ ಪಾಟಿಂಚ್ ಪಾಟಿಂಚ್ ರಾವ್ತಾ
ತೊ ರಾವ್ಲಾ ಥಂಯ್ಚ್ ಉರ್ತಾ’ [ಮುಕಾರ್ ಮುಕಾರ್ ಚಲ್]

ತಾಕಾ ಸಮಾಜೆಚಾ ದಳ್ದಿರ್ ಸಂಗ್ತೆಂಚೆರ್ ಆಸ್ಚೊ ಕಾಂಠಾಳೊ ಅಸೊ ಪಿಂತ್ರಾಯ್ತಾ;

’ಕಸ್ಲೊ ನಷ್ಟೊ ಹೊ ಸೊರೊ, ದಾದ್ಲ್ಯಾಂಚೊ ತೊ ದುಸ್ಮಾನ್ ಖರೊ
ರಿಣ್ಕಾರಿ ಯೇವ್ನ್ ತಾಚೆಂ ಘರ್ ಉಕ್ಲುನ್ ವರೊಂ
ಉಪಾಶಿಂ ತಾಚಿಂ ಬಾಯ್ಲ್ ಭುರ್ಗಿಂ ಮೊರೊಂ
ತರೀ ಸಾಂಗ್ಚೊನಾ ಬೆಬ್ದೊ ಮ್ಹಾಕಾ ಪುರೊ, ಪುರೊ, 
ಪುರೊ ದಳ್ದಿರ್ ಸೊರೊ’ [ದಳ್ದಿರ್ ಸೊರೊ]

ತರ್‌ಯ್ ವಿಲ್ಫಿಚಿಂ ಸಭಾರ್ ಪದಾಂ ಸಾದ್ಯಾ ಲೊಕಾಂಕ್ ಜಿಣ್ಯೆಲಿಸಾಂವ್ ದಿತಾತ್ ಮ್ಹಣ್ಚಾಕ್ ಹಿಂ ಉತ್ರಾಂ ಕಾಂಯ್ ಗೊವಾಯ್ ದಿತಿತ್;

’ಆಯ್ಚೊ ಸಂಸಾರ್ ಫಟ್ಕಿರೊ, ತುಂ ಭೆರೊ ಜಾಯ್ನಾಕಾ
ಚಾರ್ ದೀಸ್ ಜಿಯೆಂವ್ಕ್ ಜಾಯ್ ಜಾಲ್ಯಾರ್, ಮ್ಹಜೆ ದೋನ್ ಉಪಾದೆಸ್ ತುಕಾ
ಸತ್ ಸಾಂಗ್ತೆಲ್ಯಾಕ್ ಹಾತ್ ದೀ, ಘಾತ್ ಚಿಂತಿನಾಕಾ
ಘಾತ್ ಚಿಂತ್ತಾ ತಾಕಾ ಲಾತ್ ದೀ, ಸತ್ ದಾಕಯ್ನಾಕಾ’ [ಮ್ಹಜೆ ದೋನ್ ಉಪಾದೆಸ್]

’ಚಾರ್ ದಿಸಾಂಚೊ ಸಂಸಾರ್, ಕಿತ್ಲೊ ಉಡ್ತಾ
ಮನ್ ಕರುನ್ ಹ್ಯಾ ರಚ್ಣಾರಾನ್, ಫುಂಕ್ಲ್ಯಾರ್ ಪಡ್ತಾ
ಹಂಕಾರಾನ್ ಆನಿ ದರ್ಭಾರಾನ್, ಹಾಂಗಾ ಕಿತೆಂ ಘಡ್ತಾ
ದೆಖ್ತಲೊ ರಚ್ನಾರ್ ಆಸಾ ವಯ್ರ್, ದೊರಿ ಲಾಂಬ್ ಸೊಡ್ತಾ’ [ಚಾರ್ ದಿಸಾಂಚೊ ಸಂಸಾರ್]

ಕೊಂಕ್ಣೆಂತ್ ಆಸ್ಚ್ಯಾ ವೆವೆಗ್ಳ್ಯಾ ಕವಿತಾಂಚಾ ಪ್ರಕಾರಾಂಚೆರ್ ಅಧ್ಯಯನ್ ಕರ್ತಾಸ್ತಾಂ ಮ್ಹಾಕಾ ವಿಲ್ಫಿಯಾಬಾಚೆಂ ಏಕ್ ಅಪ್ರೂಪ್ ಕವಾಲಿ ಮೆಳ್ಳಿ, ’ಆಧಿಂಮಾಗಾ ಹ್ಯಾ ಭುಮಿಂ ವಯ್ಕುಟಾಂತ್...’

ವಿಲ್ಫಿಯಾಬಾಚೆಂ ’ಹಾಂವ್ ಯೆತಾಂಗೊ ಘಾಟಿ ದೆಂವೊನ್’ ಕವಿತಾ 2005 ಇಸ್ವೆಂತ್ ಆಶಾವಾದಿ ಪ್ರಕಾಶನಾನ್ ಪರ್ಗಟ್ ಕೆಲ್ಲ್ಯಾ ’ಮೊತಿಯಾಂ ಆನಿ ತಾರಾಂ’ ಬುಕಾಂತ್ ತಾಚ್ಯಾ ಹೆರ್ ಚ್ಯಾರ್ ಕವಿತಾಸವೆಂ ಪರ್ಗಟ್ ಜಾಲಾಂ.

ಪುಣ್ ಅಖೇರ್ ಕರ್ಚ್ಯಾಧಿಂ ಪರತ್ ಹೆಂ ಉತಾರ್ ಉಚಾರ್ಚಿ ಭೊವ್ ಗರ್ಜ್ ಮ್ಹಣ್ ಸಮ್ಜತಾಂ - ವಿಲ್ಫಿಯಾಬಾಕ್ ಕೊಂಕ್ಣಿ ಸಾಹಿತ್ಯಾಂತ್ ಜೊಕ್ತೊ ಮಾನ್ ಅಜೂನ್‌ಯ್ ಮೆಳೊಂಕ್ ನಾ ಮ್ಹಳ್ಳೆಂ ಮ್ಹಜೆಂ ವಯಕ್ತಿಕ್ ಚಿಂತಾಪ್. ತಾಚಾ ಸಂಗೀತಾಕ್ ತಾಕಾ ಮಾನ್ ಮೆಳ್ಳಾ ಆಸೊಂಕ್ ಪುರೊ. ಪುಣ್ ಏಕ್ ಪದಾಂ ಘಡ್ಪಿ, ಕವಿ ಜಾವ್ನ್ ಆಸ್ಚಾ ವಿಲ್ಫಿಯಾಬಾಚಾ ಕವಿತಾಚಿ ಪ್ರತಿಭಾ ಕೊಂಕ್ಣಿ ಕವಿಂನಿ ಅಧ್ಯಯನ್ ಕೆಲ್ಯಾರ್ ಭೋವ್ ಬರೆಂ.

ದೇವ್ ಬರೆಂ ಕರುಂ,
ವಲ್ಲಿ ಕ್ವಾಡ್ರಸ್.

ಕವಿತಾಪಾಠ್ ಪಾನಾಕ್ 

ದಾಯ್ಜ್ ಪಾನಾಕ್

About us | Feedback | Contact us
Copyright © 2005 DAAIZ.COM All rights reserved. Page concept, designed and maintained by Ashawadi Publications