ಕವಿತಾकविताPoem
ಹೆರಾಂಚೆ
This poem is available in its original Kannada only.
ಕೊಂಕ್ಣೆಚಾ ವಿಂಚ್ಣಾರ್ ಸಾಹಿತ್ಯಾಚೊ ಕೊನ್ಸೊ - ’ದಾಯ್ಜ್’ - ಫಕತ್ತ್ ಕೊಂಕಣಿ ಥಾವ್ನ್, ಕೊಂಕಣಿ ಪರ್ಯಾಂತ್, ಕೊಂಕಣಿ ಖಾತಿರ್.
ಕವಿತಾಪಾಠ್ ಮ್ಹಳ್ಯಾರ್ ಕಿತೆಂ ಮ್ಹಳ್ಳ್ಯಾಚಾ ಸವಿಸ್ತಾರ್ ವಿವರಾಂಕ್ ಹ್ಯಾ ಪಾನಾಕ್ ಭೆಟ್ ದಿಯಾ
ಕವಿತಾಪಾಠ್ - 24
ಕವಿತಾ - ಅವಿನಾ, ಮಿಯಾರ್
ಅವಿನಾ, ಮಿಯಾರ್
[ಹ್ಯಾ ಕವಿತೆಕ್ 5000 ಇನಾಮ್ ಫಾವೊ ಜಾಲಾಂ]
ಖಂಚ್ಯಾಕ್ ಕವಿತಾ ಮ್ಹಣೊಂ?
ಮೊಡಾಂ ಝಡ್ಲ್ಯಾರ್ ದಿಸ್ಚ್ಯಾ ನಿಳ್ಶ್ಯಾ ರಂಗಾಕ್
ಸುರ್ಯೊ ಬುಡೊನ್ ಉರ್ಚ್ಯಾ ಧಗಿಕ್
ಚಂದ್ರ್ ಲಿಪೊನ್ ಉರ್ಚ್ಯಾ ಚಾನ್ನ್ಯಾಕ್
ಉದಾಕ್ ಜಿರವ್ನ್ ಉರ್ಚ್ಯಾ ಶೆಳಿಕ್
ಕೋಯ್ರ್ ಝಾಡುನ್ ಉರ್ಚ್ಯಾ ಧುಳಿಕ್
ವಾ ದೊಳ್ಯಾಂಕ್ ದಿಸಾನಾತ್ಲ್ಯಾರೀ ಉರ್ಚ್ಯಾ ಅನ್ಭೋಗಾಂಕ್
ಖಂಚ್ಯಾಕ್ ಕವಿತಾ ಮ್ಹಣೊಂ?
ಮಿಟಾ ದುಃಖಾಂನಿ ಫುಟ್ಚ್ಯಾ ದುದಾಕ್
ಉತ್ರಾಂ ವ್ಹಾಳೊನ್ ಫುಟ್ಚ್ಯಾ ಕಾಳ್ಜಾಕ್
ರಗಾತ್ ವ್ಹಾಳೊನ್ ಆಟಂವ್ಚ್ಯಾ ಕುಡಿಂಕ್
ನೀದ್ ಚಿಂವೊನ್ ತುಟ್ಚ್ಯಾ ಸ್ವಪ್ಣಾಂಕ್
ಸೊಭಾಯ್ ದಿವುನ್ ತೊಪ್ಚ್ಯಾ ಕಾಂಟ್ಯಾಂಕ್
ವಾ ಜಿಣ್ಯೆಂತ್ ಪಾಟ್ಲಾವ್ ಕರ್ಚ್ಯಾ ಮೊರ್ನಾ ಸಾವ್ಳೆಕ್
ಖಂಚ್ಯಾಕ್ ಕವಿತಾ ಮ್ಹಣೊಂ?
ದುಃಖಾಂ ಗಳವ್ನ್ ಪರ್ಜಳ್ಚ್ಯಾ ದೊಳ್ಯಾಂಕ್
ವೋಂಟ್ ಶಿಂದುನ್ ಉಟ್ಚ್ಯಾ ಹಾಸ್ಯಾಂಕ್
ಕರ್ಪಲ್ಲ್ಯಾ ಇಟ್ಯಾಂವಯ್ರ್ ಜಲ್ಮಾಲ್ಲ್ಯಾ ತಣಾಕ್
ಗಡಿ ಆಸ್ಲ್ಯಾರೀ ಮೆಳ್ಚ್ಯಾ ಕಾಳ್ಜಾಂಕ್
ಕಾಳಿಜ್ ನಾತ್ಲ್ಯಾರೀ ಉರ್ಚ್ಯಾ ಮೊಗಾಕ್
ಮಾತ್ಯೆಂತ್ ಪುರ್ಲ್ಯಾರೀ ಕಿರ್ಲೊಂಚ್ಯಾ ಬಿಯೆಕ್
ಕವಿತಾ ಸೊಧುನ್ ಕವಿ ಜಾಲೊಂ.
ಪುಣ್ ಮ್ಹಜಿ ಕವಿತಾ ಖಂಯ್ ಪಾವ್ಲಿ?
ಓ ಥಂಯ್, ರಸ್ತ್ಯಾ ಘುಂವ್ಡೆರ್, ಗುಜ್ರಿ ಆಂಗ್ಡೆಂತ್
ಕುಸೊನ್ ಘಾಣ್ಚ್ಯಾ, ಮುನ್ಸಿಪಾಲಿಟಿ ಡಬ್ಬ್ಯಾಂತ್
ಪುಸುನ್ ಲೆಂವ್ಲ್ಲ್ಯಾ ಶಿರೊತಿಚ್ಯಾ ಪರ್ಜಳಾಂತ್
ಶಿತಾ ಉಂಡಿ ಮೊಗ್ರ್ಯಾ ಹಜಾರೊ ಹಾತಾಂ ಮಧೆಂ
ಕವಿತಾ ಮ್ಹಜಿ ನಪಂಯ್ಚ್ ಜಾಲಿ
ಆತಾಂ ಖಂಚ್ಯಾಕ್ ಹಾಂವ್ ಮ್ಹಜಿ ಕವಿತಾ ಮ್ಹಣುಂ?
ಕವಿತಾಪಾಠ್ಚೆರ್ ಕೆಲ್ಲಿಂ ಅಧ್ಯಯನ್ ಲೇಕನಾಂ ಬುಕಾರುಪಾರ್ ಪರ್ಗಟ್ ಜಾಲ್ಯಾಂತ್
ಕುವೆಯ್ಟಾಂತ್ಲಿಂ ವೆವೆಗ್ಳಿಂ ಕಾಮಾಸಾಳಾಂ
ಕವಿತಾ ಮ್ಹಳ್ಯಾರ್ ಕಿತೆಂ?
ಕೊಂಕ್ಣೆಂತ್ ಜಶೆಂ ಸಂಸಾರಾಚ್ಯಾ ಖಂಚ್ಯಾಯ್ ಭಾಸೆಂತ್ಲ್ಯಾ ಸಾಹಿತಾಂತ್ ಕವಿತಾಂಕ್ ಏಕ್ ವೆಗ್ಳೆಂ ಸ್ಥಾನ್ ಆಸಾ, ಸಾಹಿತ್ಯಾಚ್ಯಾ ಜೆರಾಲ್ ರಿತಿಚ್ಯಾ ಪ್ರಕಾರಾಂಚೊ ಉಲ್ಲೇಕ್ ಕರ್ತಾನಾ, ಕಾಣ್ಯೊ, ಕವಿತಾ, ಲೇಖನಾಂ ಮ್ಹಳ್ಳೆ ಪ್ರಮುಖ್ ಪ್ರಕಾರ್ ಆಸಾತ್. ಆನಿ ಕಾದಂಬರಿ, ಸಾಂಕಳ್ ಕಾಣ್ಯೊ, ಮಟ್ವ್ಯೊ ಕಾಣ್ಯೊ. ಮಿನಿ ಕಾಣ್ಯೊ, ವಾ ಚಿಕ್ಣಿ ಕಾಣ್ಯೊ - ಕಾಣ್ಯಾಂಚ್ಯಾ ಪ್ರಕಾರಾಚಿಂ ವೆವೆಗ್ಳಿಂ ರುಪಾಂ, ಚುಟುಕಾಂ, ಪದಾಂ, ಗಿತಾಂ, ಕವಿತಾ ಸರ್ವ್ ಕವಿತಾಂಚೆ ವೆವೆಗ್ಳೆ ಪ್ರಕಾರ್. ಥೊಡ್ಯಾ ಭಾಸಾಂನಿ ಹಾಚ್ಯಾಕೀ ಚಡ್ ಆಸೊಂಕ್ ಪುರೊ. ಕವಿತಾ ಮ್ಹಳ್ಯಾರ್ ಕಿತೆಂ? ತಿ ಕಶಿ ಆಸಾಜಯ್? ಮ್ಹಳ್ಳ್ಯಾಚೆರ್ ಎಕಾಚ್ ಉತ್ರಾನ್ ವರ್ಣುಂಕ್ ಸಾಧ್ಯ್ ನಾ. ಎಕ್ಲ್ಯಾ ದೊಗಾಂನಿ ದಿಲ್ಲೆಂ ವ್ಯಾಖ್ಯಾನ್ ಹೆರಾಂಕ್ ಸ್ವೀಕಾರ್ ಜಾತಾ ವಾ ನಾಂ ತೆಂಯೀ ಸಾಂಗೊಂಕ್ ಸಾಧ್ಯ್ ನಾ.
ಆಯ್ಲೆವಾರ್ ಕೊಂಕ್ಣಿ ಕವಿತೆಂಚ್ಯಾ ವೀದ್-ವಾವ್ಳೆಚೆರ್ ಬರಿ ನದರ್ ಘಾಲ್ಚೆಂ ವಿಮರ್ಶಾತ್ಮಕ್ ಲೇಖನ್ ಕವಿ ವಿಲ್ಸನ್ ಕಟೀಲಾನ್ ಬರಯಿಲ್ಲೆಂ ಆನಿ ತಾಚೆರ್ ಗಾಂವಾಂತ್ ಜಶೆಂ ಪರ್ಗಾಂವಾಂತ್ ಜಾಯ್ತೆಂ ವಿಚಾರ್ ಮಂಥನ್ ಜಾಲೆಂ. ಸತ್ ಸಾಂಗ್ಚೆಂ ತರ್ ಹೆಂ ಲೇಖನ್ ಖಂಚ್ಯಾಯ್ ರಿತಿನ್ ಕೊಣಾಯ್ಕೀ ಹಲ್ಕ್ ಕರ್ಚ್ಯಾ ಇರಾದ್ಯಾನ್ ವಾ ದೂಕ್ ದಿಂವ್ಚ್ಯಾ ಇರಾದ್ಯಾನ್ ಲಿಖ್ಲಲೆಂ ನ್ಹಂಯ್ - ಹೆಂ ಮ್ಹಜೆಂ ಖಾಸ್ಗಿ ಚಿಂತಾಪ್. ಇತ್ಲೆಂ ವಿಚಾರ್ ಮಂಥನ್ ಜಾಲೆಂ ತರ್ಯೀ ತಾಚೆಂ ಫಳಿತಾಂಶ್ ತೆಂಚ್ - ಆಧ್ಲೆಂ; ’ಅಪ್ಲೆಂಚ್ ಸಾರ್ಕೆಂ’. ಮ್ಹಳ್ಯಾರ್ ಇಂಗ್ಲಿಶಾಂತ್ಲ್ಯಾ ಎಕಾ ಸಾಂಗ್ಣೆಚೊ ಉಡಾಸ್ ಯೆತಾ ’Operation successful, patient died (ಒಪರೇಶನ್ ಬರ್ಯಾನ್ ಜಾಲೆಂ ಪುಣ್ ಪಿಡೆಸ್ತ್ ಅಂತರ್ಲೊ)’.
ಬಾಯ್ ಅವಿನಾ ಮಿಯಾರ್ ಹಿಚೆಂ ಕವಿತಾ ಹೆಚ್ಚ್ ಪರಿಗತೆಚೆರ್ ಆರ್ಸೊ ಧರ್ತಾ ತಶೆಂಚ್ ಜಾಯ್ತಿಂ ಸತಾಂ ಉಸ್ತುನ್ ಘಾಲ್ತಾ.
ಕವಿತೆಕ್ ಕೊಣ್ ಮ್ಹಣ್ತಾ ಭಗ್ಣಾಂಚೊ ವ್ಹಾಳೊ, ಆನಿ ಕೊಣ್ ಮ್ಹಣ್ತಾ ಕಾಳ್ಜಾಚೊ ಉಲೊ, ಆನಿ ಕೊಣ್ ಮ್ಹಣ್ತಾ ಜಿಣ್ಯೆಚೆಂ ಕಾಪ್, ಆನಿ ಕೊಣ್ ಮ್ಹಣ್ತಾ ಉಮಾಳ್ಯಾಂಚೆಂ ಕೋಪ್. ಸತ್ ಕಿತೆಂಯ್ ಆಸೊಂ, ಪುಣ್ ಏಕ್ ಸಂಗತ್ ಮಾತ್ರ್ ನಖ್ಖೆಂ ಸಾಂಗ್ಯೆತಾ, ಕವಿತಾ ಖಬ್ರೆಪತ್ರಾಂತ್ ವರ್ದಿ ಬರಯಿಲ್ಲೆಪರಿಂ ಬರಂವ್ಚಾ ಉತ್ರಾಂಚಿ ರಾಸ್ ಭಿಲ್ಕುಲ್ ನ್ಹಂಯ್. ವ್ಹಯ್ ಜಾಲ್ಯಾರ್, ಸಾಹಿತ್ಯಾಂತ್ ಲೇಖನ್ ಮ್ಹಳ್ಳೊ ಪ್ರಕಾರ್ ಗರ್ಜ್ ನಾತ್ಲೊ. ಹ್ಯಾ ಅಧ್ಯಯನಾಕ್ ಹ್ಯಾ ಚಿಂತ್ಪಾಚೆರ್ ಮಾತ್ಸೊ ಆರ್ಸೊ ಧರ್ಚಿ ಗರ್ಜ್ ಆಸ್ಲಿ ದೆಖುನ್ ಹಾಂಚೊ ಉಲ್ಲೇಕ್ ಕೆಲೊ.
ಆಯ್ಚೊ ಕಾಳ್ ಖಂಚ್ಯಾ ದಿಶೆನ್ ಚಮ್ಕೊನ್ ಆಸಾ? ಮನ್ಶಾಕ್ ಸರ್ವ್ ಸಂಸಾರಿಂ ರಾಟಾವಳೆಂ ಮಧೆಂ ವೇಳ್ ನಾ. ಸಯ್ರಣ್ ನಾ, ಹೆರಾಂಕ್ ಸಮ್ಜೊಂಚಿ ಸೊಸ್ಣಿಕಾಯ್ ನಾ. ಸಂಯಮ್ ನಾ, ಸಾಹಿತ್ಯಾಂತ್ ಕವಿತಾ ಪ್ರಕಾರಾಕ್ ಸಮ್ಜೊಂಕ್, ಹೆ ಸರ್ವ್ ಅಂಶ್ ಭೋವ್ ಗರ್ಜೆಚೆ. ಕವಿತಾ ಏಕ್ ಪಾವ್ಟಿಂ ವಚುನ್ ಸಮ್ಜೊಂಚೆ ತಸ್ಲಿ ನ್ಹಂಯ್, ಪರತ್ ಪರತ್ ವಾಚ್ತಾಂ ತಾಂತುಂ ನವಿಂ ನವಿಂ ರುಪಾಂ, ನವಿಂ ನವಿಂ ಸತಾಂ ದಿಸೊಂಕ್ ಜಾಯ್. ಹಿಚ್ ಕವಿತೆಚಿ ತಾಂಕ್, ಹಿಚ್ಚ್ ಕವಿತೆಚಿ ಸೊಭಾಯ್.
ಕವಿತಾಶೆತಾಂತ್ ಬಾಯ್ ಅವಿನಾ ಮಿಯಾರ್ ಆಯ್ಲೆವಾರ್ ಉದೆವ್ನ್ ಆಯಿಲ್ಲ್ಯಾಂತ್ಲಿ ಎಕ್ಲಿ, ತರ್ಯೀ ಅಪ್ಲ್ಯಾ ವೆಗ್ಳ್ಯಾ ರಿತಿಚ್ಯಾ ಚಿಂತ್ಪಾನ್ ತಶೆಂಚ್ ಉತ್ರಾಂಚ್ಯಾ ತಿಕ್ಸಾಣೆನ್ ಹಿಣೆಂ ಎದೊಳ್ಚ್ ನಾಂವ್ ವೆಲಾಂ. ಕಸ್ಲಿಚ್ ದಯಾ ದಾಕ್ಶೆಣ್ ನಾಸ್ತಾಂ ಆಸ್ಚೆಂ ಆಸ್ಚೆಪರಿಂ ಶೀದಾ ತೊಂಡಾರ್ ಸಾಂಗೊನ್ ಸೊಡ್ಚಿ ಕಲಾ ಕಿತ್ಲ್ಯಾ ಕವಿಂಕ್ ಆಸಾ? ತಾಂತುಂ ಎಕ್ಲಿ ಅವಿನಾ ಮೆಂದೊಸ್. ಹಿಚ್ಯಾ ಕವಿತೆಚೆರ್ ಆತಾಂ ಮಾತ್ಸಿ ಗುಂಡಾಯೆಚಿ ನದರ್ ಭಂವ್ಡಾಂವ್ಚಿ ತರ್;
ಖಂಚ್ಯಾಕ್ ಕವಿತಾ ಮ್ಹಣೊಂ?
ಮೊಡಾಂ ಝಡ್ಲ್ಯಾರ್ ದಿಸ್ಚ್ಯಾ ನಿಳ್ಶ್ಯಾ ರಂಗಾಕ್
ಸುರ್ಯೊ ಬುಡೊನ್ ಉರ್ಚ್ಯಾ ಧಗಿಕ್
ಚಂದ್ರ್ ಲಿಪೊನ್ ಉರ್ಚ್ಯಾ ಚಾನ್ನ್ಯಾಕ್
ಉದಾಕ್ ಜಿರವ್ನ್ ಉರ್ಚ್ಯಾ ಶೆಳಿಕ್
ಕೋಯ್ರ್ ಝಾಡುನ್ ಉರ್ಚ್ಯಾ ಧುಳಿಕ್
ವಾ ದೊಳ್ಯಾಂಕ್ ದಿಸಾನಾತ್ಲ್ಯಾರೀ ಉರ್ಚ್ಯಾ ಅನ್ಭೋಗಾಂಕ್
ಖಂಚ್ಯಾಕ್ ಕವಿತಾ ಮ್ಹಣೊಂ?
ಸಂಸಾರಾಂತ್ ಆಸ್ಚಾ ಹರ್ಯೆಕಾ ವಸ್ತುಂಕ್ ದೊದೋನ್ ರುಪಾಂ ಆಸ್ತಾತ್, ಏಕ್ ಮುಳಾವೆಂ ದುಸ್ರೆಂ ಸಂಸಾರಾಚೆಂ ರೂಪ್. ಸಂಸಾರ್ ಭಾಯ್ಲ್ಯಾ ರುಪಾಕ್ ಮಾತ್ರ್ ವಳ್ಕತಾ ಶಿವಾಯ್ ಮುಳಾವೆಂ ರೂಪ್ ಪಾರ್ಕುಂಚೆ ಭೋವ್ ಥೊಡೆ. ಆತಾಂ ಮೊಡಾಂ ಭಾಯ್ಲೆಂ ರೂಪ್ ತರ್ ಮುಳಾವೆಂ ನಿಳೊ ರಂಗ್ (ಮೊಳಾಬ್). ಸುರ್ಯೊ ದೀಸ್ಭರ್ ಉದೆವ್ನ್ ಉಜ್ವಾಡ್ ಆನಿ ಊಬ್ ದಿತಾ, ಆನಿ ತೊ ಬುಡ್ತಾನಾ ತೊ ಉಜ್ವಾಡ್ ಘೆವ್ನ್ ವೆತಾ ಆನಿ ಊಬ್ ಸೊಡ್ನ್ ವೆತಾ. ಚಂದ್ರಾಚೆಂ ಚಾನ್ನೆಂ, ಉದ್ಕಾಚಿ ಶೆಳ್, ಕೊಯ್ರಾಚಿ ಧುಳ್ ಮುಳಾವಿಂ ರುಪಾಂ.
ಹ್ಯಾ ಪರಿಗತೆಂತ್ ಕವಿತಾನಾಯಕ್ (ವಾ ನಾಯಕಿ) ಸವಾಲ್ ಕರ್ತಾ, ಖಂಯ್ಚೆಂ ಕವಿತಾ? ಭಾಯ್ಲೆಂ ರೂಪ್ ವಾ ಮುಳಾವೆಂ ರೂಪ್? ಭಾಯ್ಲ್ಯಾ ರುಪಾಂತ್ ಕವಿತಾ ಪ್ರಾಸಾಂನಿ, ಸಬ್ಧಾಂನಿ ವಿಣ್ಲಲೆಂ ದಿಸೊಂಕ್ ಪುರೊ, ಪುಣ್ ಎಕಾ ಕವಿತೆಚೆಂ ಮುಳಾವೆಂ ಚಿಂತಾಪ್ ಕಸಲೆಂ ಆಸೊಂಕ್ ಜಾಯ್? ಹ್ಯಾ ಚಿಂತ್ಪಾಚೆರ್ ಕವಯತ್ರಿ ಆರ್ಸೊ ಧರ್ತಾ ಪಳೆಯಾ. ಫುಡೆಂ ವಾಚ್ಯಾಂ;
ಮಿಟಾ ದುಃಖಾಂನಿ ಫುಟ್ಚ್ಯಾ ದುದಾಕ್
ಉತ್ರಾಂ ವ್ಹಾಳೊನ್ ಫುಟ್ಚ್ಯಾ ಕಾಳ್ಜಾಕ್
ರಗಾತ್ ವ್ಹಾಳೊನ್ ಆಟಂವ್ಚ್ಯಾ ಕುಡಿಂಕ್
ನೀದ್ ಚಿಂವೊನ್ ತುಟ್ಚ್ಯಾ ಸ್ವಪ್ಣಾಂಕ್
ಸೊಭಾಯ್ ದಿವುನ್ ತೊಪ್ಚ್ಯಾ ಕಾಂಟ್ಯಾಂಕ್
ವಾ ಜಿಣ್ಯೆಂತ್ ಪಾಟ್ಲಾವ್ ಕರ್ಚ್ಯಾ ಮೊರ್ನಾ ಸಾವ್ಳೆಕ್
ಖಂಚ್ಯಾಕ್ ಕವಿತಾ ಮ್ಹಣೊಂ?’
ವಯ್ಲ್ಯಾ ಪಂಗ್ತೆರ್ ರುಪಾಂಚೆರ್ ಆರ್ಸೊ ಧರ್ಚಿ ಕವಯತ್ರಿ ಹಾಂಗಾಸರ್ ಪ್ರಭಾವಾಚೆರ್ ಆರ್ಸೊ ಧರ್ತಾ ಪಳೆಯಾ, ಜೆದ್ನಾಂ ಮಿಟಾ ಉದಾಕ್ ದುದಾಕ್ ಭರ್ಶಿಲೆಂ ತರ್ ದೂದ್ ಫುಟ್ತಾ, ಕೊಣಾಚಿಂ ಉತ್ರಾಂ ಕೊಣಾಚೆಂ ಕಾಳಿಜ್ ಫುಟಂವ್ಕ್ ಸಕ್ತಾ, ಮನ್ಶಾ ವಾ ಜೀವಿಂಚಾ ಕುಡಿಂತ್ಲೆಂ ರಗಾತ್ ಕಾಡ್ಲ್ಯಾರ್ ತ್ಯಾ ಕುಡಿಂತ್ ಕಿತೆಂ ಉರ್ಲೆಂ? ಸ್ವಪ್ಣಾಂಕ್ ನಿದೆಚೊ, ತಶೆಂಚ್ ಜಿವಿತಾಕ್ ಮೊರ್ನಾಚೊ ಪ್ರಭಾವ್ ಕವಯತ್ರಿ ಹಾಂಗಾಸರ್ ಅಪುರ್ಭಾಯೆನ್ ಪಿಂತ್ರಾಯ್ತಾ.
’ದುಃಖಾಂ ಗಳವ್ನ್ ಪರ್ಜಳ್ಚ್ಯಾ ದೊಳ್ಯಾಂಕ್
ವೋಂಟ್ ಶಿಂದುನ್ ಉರ್ಚ್ಯಾ ಹಾಸ್ಯಾಂಕ್
ಕರ್ಪಲ್ಲ್ಯಾ ಇಟ್ಯಾಂವಯ್ರ್ ಜಲ್ಮಾಲ್ಲ್ಯಾ ತಣಾಕ್
ಗಡಿ ಆಸ್ಲ್ಯಾರೀ ಮೆಳ್ಚ್ಯಾ ಕಾಳ್ಜಾಂಕ್
ಕಾಳಿಜ್ ನಾತ್ಲ್ಯಾರೀ ಉರ್ಚ್ಯಾ ಮೊಗಾಕ್
ಮಾತ್ಯೆಂತ್ ಪುರ್ಲ್ಯಾರೀ ಕಿರ್ಲೊಂಚ್ಯಾ ಬಿಯೆಕ್
ಕವಿತಾ ಸೊಧುನ್ ಕವಿ ಜಾಲೊಂ.’
ವಯ್ಲ್ಯಾ ದೋನ್ ಪಂಗ್ತೆಂನಿ ಕವಯತ್ರಿ, ರುಪಾಂಚೆರ್, ಪ್ರಭಾವಾಚೆರ್ ಆರ್ಸೊ ಧರ್ನ್ ಆತಾಂ ಪರಿಣಾಮಾಚೆರ್ ಆರ್ಸೊ ಧರ್ಚೆಂ ಪ್ರೇತನ್ ಕರ್ತಾ. ದುಃಖಾಂ ಸಂಪ್ತಚ್ ದೊಳ್ಯಾಂನಿ ಪರ್ಜಳ್ ಯೆಂವ್ಚೊ, ವೋಂಟ್ ಶಿಂದುನ್ ಹಾಸ್ಚೆಂ, ಕರ್ಪಾಲ್ಲ್ಯಾ ಇಂಗ್ಳ್ಯಾಚೆರ್ ಜಲ್ಮೊಂಚೆಂ ತಣ್, ಮಾತ್ಯೆಂತ್ ಪುರ್ಲ್ಯಾರೀ ಖಿರ್ಲೊಂಚ್ಯಾ ಬಿಯೆಕ್ ಸೊಧುನ್ ಕವಿ ಜಾಲೊಂ. ಹಾಂಗಾಸರ್ ಕವಿತಾನಾಯಕ್ ಮಟ್ವ್ಯಾನ್ ಇತ್ಲೆಂಚ್ ಸಾಂಗೊಂಕ್ ಆಶೆತಾ - ಕವಿಚಿ ನದರ್ ಮುಳಾವೆಂ ರೂಪ್, ಮುಳಾವೊ ಪ್ರಭಾವ್ ಆನಿ ಪರಿಣಾಮ್ಕಾರಿ ಚಿಂತ್ಪಾಚೆರ್ ಆಸೊಂಕ್ ಜಾಯ್ ಶಿವಾಯ್ ಸಲೀಸಾಯೆನ್, ಉತಳಾಯೆನ್ ಚಿಂತಾಪ್ ಆಟಾವ್ನ್ ನ್ಹಂಯ್.
ಇತ್ಲೆಂ ಸರ್ವ್ ಸಾಂಗೊನ್ ಕವಯತ್ರಿ ಅಖ್ರೇಚ್ಯಾ ವೊಳಿಂತ್ ಕಿತೆಂ ಸಾಂಗ್ತಾ ಪಳೆಯಾ;
’ಪುಣ್ ಮ್ಹಜಿ ಕವಿತಾ ಖಂಯ್ ಪಾವ್ಲಿ?
ಓ ಥಂಯ್, ರಸ್ತ್ಯಾ ಘುಂವ್ಡೆರ್, ಗುಜ್ರಿ ಆಂಗ್ಡೆಂತ್
ಕುಸೊನ್ ಘಾಣ್ಚ್ಯಾ, ಮುನ್ಸಿಪಾಲಿಟಿ ಡಬ್ಬ್ಯಾಂತ್
ಪುಸುನ್ ಲೆಂವ್ಲ್ಲ್ಯಾ ಶಿರೊತಿಚ್ಯಾ ಪರ್ಜಳಾಂತ್
ಶಿತಾ ಉಂಡಿ ಮೊಗ್ರ್ಯಾ ಹಜಾರೊ ಹಾತಾಂ ಮಧೆಂ
ಕವಿತಾ ಮ್ಹಜಿ ನಪಂಯ್ಚ್ ಜಾಲಿ
ಆತಾಂ ಖಂಚ್ಯಾಕ್ ಹಾಂವ್ ಮ್ಹಜಿ ಕವಿತಾ ಮ್ಹಣುಂ?’
ಹಿ ಪಂಗತ್ ದೋನ್ ರಿತಿನ್ ಘೆವ್ಯೆತಾ, ಏಕ್ ಆಸ್ಚಿ ಆಸಾ ತಶೆಂ ಆನಿ ದುಸ್ರೆಂ ಹಾಚೊ ಸಾರ್. ಮ್ಹಣ್ಜೆ - ಕವಯತ್ರಿನ್ ಬರಯಿಲ್ಲಿ ಹಿ ಕವಿತಾ, ಜಾಂತುಂ ಮುಳಾವೆಂ ರೂಪ್ ಆಸ್ಚೆಂ, ಮುಳಾವೊ ಪ್ರಭಾವ್ ಆಸ್ಚೆಂ, ಪರಿಣಾಮ್ಕಾರಿ ಕವಿತಾ ಖಂಚ್ಯಾ ಖಂಚ್ಯಾ ವಾಟೆರ್ ಎಕ್ಲ್ಯಾ ಥಾವ್ನ್ ಅನ್ಯೇಕ್ಲ್ಯಾಕ್ ಅಶೆಂ ಗುಜ್ರಿ ಅಂಗ್ಡೆ ಥಾವ್ನ್ ಫುಲ್ಕಾರಾ ಪರ್ಯಾಂತ್ ಆನಿ ಅಶೆಂ ಪಾಚಾರ್ಲಿ. ಪುಣ್ ಆಸ್ಚಿ ಆಸಾ ತಶಿ ಘೆತ್ಲಿ ತರ್ ಆಯ್ಚಾ ಪರಿಗೆತೆಚೆರ್ ಆರ್ಸೊ ಧರ್ಚೆಪರಿಂ ಜಾತಾ. ಕವಿತೆಕ್ ಜೊಕ್ತೊ ವಾಚ್ಪಿ ತ್ಯಾ ಮಾಪಾನ್ ಮೆಳಾನಾಸ್ತಾಂ ಗುಜ್ರಿ ಆಂಗ್ಡೆಂನಿ, ಖಚ್ರ್ಯಾ ಡಬ್ಬ್ಯಾಂನಿ, ಕೊಣೆ ಕೊಣೆ ಪುಸುನ್ ಉಡಂವ್ಕ್, ಕೊಣಾ ಕೊಣಾಕ್ ಖಾಣಾಂ- ಫುಲಾಂ ಭಾಂದುಂಕ್ ವಚೊನ್ ಕವಿತಾ, ಜಿ ಮುಳಾವ್ಯಾ ರುಪಾಕ್ಚ್ ಪಿಂತ್ರಾಂವ್ಚಿ, ಮುಳಾವ್ಯಾ ಪ್ರಭಾವಾಕ್, ಪರಿಣಾಮಾಂಕಾರಿ ಕವಿತಾ ಅಪ್ಲೆಂ ಅಸ್ಥಿತ್ವ್ ಹೊಗ್ಡಾವ್ನ್ ಹ್ಯಾ ಸಂಸಾರಾಂತ್ಲಿ ನಪಂಯ್ಚ್ ಜಾತಾ.
ಆತಾಂ ಕವಯತ್ರಿ ಏಕ್ ಅಧುರೆಂ ಸವಾಲ್ ಉಭೆಂ ಕರ್ತಾ - ಖಂಚಿ ಕವಿತಾ? ಖಂಚ್ಯಾಕ್ ಆತಾಂ ಕವಿತಾ ಮ್ಹಣೊಂ? ಹೆಂ ಸವಾಲ್ ತ್ಯಾ ತ್ಯಾ ವಾಚ್ಪ್ಯಾನ್ ಅಪ್ಲ್ಯಾ ಮತಿಂತ್ ಆಸ್ಚಾ ಚಿಂತ್ಪಾಪ್ರಕಾರ್ ಚಿಂತ್ಚೆಂ ಶಿವಾಯ್ ಏಕ್ ಜವಾಬ್ ದೀಂವ್ಕ್ ಕೊಣಾಯ್ಚ್ಯಾನ್ ಜಾಂವ್ಚೆಂ ನಾ. ಅಶೆಂ ಮ್ಹಣ್ತಾಸ್ತಾಂ ಮ್ಹಜ್ಯಾ ಮತಿಂತ್ ಆಧ್ಲ್ಯಾ ವರ್ಸಾ ಹಾವೆಂ ಬರಯಿಲ್ಲ್ಯಾ ಹ್ಯಾ ವೊಳಿಂಚೊ ಉಡಾಸ್ ಯೆತಾ;
’ಕವಿತಾ ಕೊಣಾಕ್ ಉಂಡೊ
ತರ್ ಕೊಣಾಕ್ ಕುಂಡೊ
ಅನಿ ಕೊಣಾಕ್ ಸೊಭಿತ್ ಗೊಂಡೊ
ಪುಣ್ ಕವಿತೆಚಿ ಮೂರ್ ನಾಸ್ತಾಂ
ಫಕತ್ತ್ ಕಿಡೆ ಉಸ್ತುಂಚ್ಯಾಂಕ್
ಕವಿತಾ ಖರೊಚ್ಚ್ ಲೆಂಡೊ’ [ಕವಿತಾ ಮ್ಹಳ್ಯಾರ್]
ದೇವ್ ಬರೆಂ ಕರುಂ,
- ವಲ್ಲಿ ಕ್ವಾಡ್ರಸ್
ಹೆರಾಂಚೆ ವಿಚಾರ್:
ಕವಿತಾ ಸತಾಕ್ ಉಸ್ತಿತಾ: [ಪ್ರಿಯಾ ಸಿಕ್ವೇರಾ, ಫೆರಾರ್]
ಕವಯತ್ರಿ ಅವಿನಾ ಮಿಯಾರ್ಚೆಂ ಹೆಂ ಕವಿತಾ ಖರೆಂಚ್ ಜಾವ್ನ್ ಕೊಂಕ್ಣಿ ಸಮಾಜೆಂತ್ ಕೊಂಕ್ಣಿ ಕವಿತಾಂಕ್ ಮೆಳ್ಚಾ ಮಾನಾಚೆಂ ಸತ್ ಉಸ್ತಿತಾ ಆನಿ ಅಪುರ್ಭಾಯೆನ್ ಪ್ರಸ್ತುತ್ ಕರ್ಚೆಂ ದಿಸೊನ್ ಯೆತಾ. ಬಂಡಾಯ್ ಲೆಪಾಚೆಂ ಹೆಂ ಕವಿತಾ ಖರೆಂಚ್ ಜಾವ್ನ್ ಸಾದ್ಯಾಂಕ್ ಮಾತ್ರ್ ನ್ಹಂಯ್ ಕವಿತಾಚಿ ಅಭಿರುಚ್ ಆಸ್ಚಾಂಕ್ ಸಯ್ತ್ ಪಸಂದಾಯೆಚೆಂ ಜಾತಾ.
ಎಕೆಕಾ ವೊಳಿಂತ್ಲ್ಯಾ ಸಬ್ಧಾಂಚೆರ್ ಪ್ರೇರಣ್ ದಿಂವ್ಚಿ ಕವಿತಾ: [ಆಸ್ಟಿನ್ ಸಾಲಿನ್ಸ್, ಬ್ರಹ್ಮಾವರ್]
ಹೆಂ ಕವಿತಾ ಉತ್ರಾಂನಿ ಸಾದೆಂ ದಿಸೊಂಕ್ ಪುರೊ ತರ್ಯೀ ಹಾಂತ್ಲ್ಯಾ ಎಕೆಕಾ ವೊಳಿಚೆರ್ ಎಕೇಕ್ ಸ್ವತಂತ್ರ್ ಕವಿತಾ ಬರವ್ಯೆತ್. ಹ್ಯಾ ಕವಿತೆಂತ್ ಕವಯತ್ರಿನ್ ಉಭಾರ್ಲ್ಲ್ಯಾ ಎಕೆಕಾ ಇಮಾಜೆಂಚೆರ್ ಸ್ವತಂತ್ರ್ ಕವಿತಾ ಬರಂವ್ಕ್ ಸಾಧ್ಯ್ ಆಸಾ. ಹಿಚ್ಚ್ ಎಕಾ ಖರ್ಯಾ ಕವಿತೆಚಿ ಸಕತ್.
ಗಂಭೀರ್ ಚಿಂತ್ಪಾಚೆಂ ಕವಿತಾ: [ಸಿರಿಲ್ ಪೆರಿಸ್, ಬೆಂದುರ್]
ಕವಿತಾ ವಾಚ್ತಾಂ ಸಾದ್ಯಾ ಉತ್ರಾಂನಿ ಸಾದಿ ದಿಸೊಂಕ್ ಪುರೊ ಪುಣ್ ಕವಿತೆಂತ್ ಆಟಾಪ್ಚೊ ವಿಶಯ್ ಗಂಭೀರ್ ಆನಿ ಭೋವ್ ಮಾರ್ಮಿಕ್. ಕವಿ, ಕವಿತಾ, ವಾಚ್ಪಿ, ಹಿ ಸಮಾಜ್ - ಹ್ಯಾ ಮಧೆಂ ಆಸ್ಚಾ ಸಂಬಂದಾಕ್ ಉತ್ರಾಂನಿ ವ್ಹಾಳಂವ್ಚೆಂ ಸಾಧನ್ ಕವಯತ್ರಿನ್ ಭೋವ್ ಪ್ರಾಮಾಣಿಕ್ ಪ್ರೇತನ್ ಕೆಲಾಂ.
ಸಾದಿಂ ಉತ್ರಾಂ ಪುಣ್ ಚಿಂತಾಪ್ ಸಾದೆಂ ನ್ಹಂಯ್: [ಹೆನ್ರಿ ಲುವಿಸ್, ಸಾಸ್ತಾನ್]
ಕವಿತೆಂತ್ ವಾಪಾರ್ಲ್ಲಿ ಭಾಸ್, ಉತ್ರಾಂ ತಶೆಂಚ್ ಅಲಂಕಾರ್ ಸಾದೆ ದಿಸ್ತಾತ್ ತರ್ಯೀ, ಕವಿತೆಕ್ ಘೆತ್ಲ್ಲೊ ವಿಶಯ್ ಭಳ್ವಂತ್ ತಶೆಂಚ್ ಪರಿಣಾಮ್ಕಾರಿ ಜಾವ್ನಾಸಾ. ಪುಣ್ ಕವಿತಾ ನಿರಾಶೆಚ್ಯಾ ತೆವ್ಶಿನ್ ಮಾಲ್ವೊಂಚೆಂ ದಿಸೊನ್ ಯೆತಾ.
ಸಮಾಜ್ ಆನಿ ಸತಾಮಧ್ಲೊ ಗಾಂಚ್ ಪಿಂತ್ರಾಯ್ತಾ: [ಆಲ್ಫ್ರೆಡ್ ಲೋಬೊ, ಆಂಜೆಲೊರ್]
ಹಿ ಕವಿತಾ ಖರಿಚ್ಚ್ ಜಾವ್ನ್ ಏಕ್ ಸಮಾಜ್ ಆನಿ ಸತ್ ಹಾಂಚೆಮಧೆಂ ಆಸ್ಚಾ ಅಂತರಾಕ್ ಭೋವ್ ಸೊಭಿತ್ ರಿತಿರ್ ಅಪುರ್ಭಾಯೆಚ್ಯಾ ಉತ್ರಾಂನಿ ವಿಣುನ್ ಪ್ರಸ್ತುತ್ ಕೆಲ್ಲಿ ದಿಸೊನ್ ಯೆತಾ.
ವಿಷಾದಾಭರಿತ್ ಸಂದೇಶ್ ದಿಂವ್ಚಿ ಕವಿತಾ: [ಕೆವಿನ್ ಡಿ’ಮೆಲ್ಲೊ, ಕಾರ್ಕಳ್]
ಕವಯತ್ರಿ ಅವಿನಾ ಮಿಯಾರ್ ಜಿತ್ಲೆಂ ಹಾಂವ್ ವೆಕ್ತಿಗತ್ ಜಾವ್ನ್ ಸಮ್ಜತಾಂ, ತಿ ಚುರುಕ್ ಚಿಂತ್ಪಾಚಿ, ಸೂಕ್ಷ್ಮ್ ಗ್ರಹಣ್ ಕರ್ಚಿ ಶ್ಯಾಥಿ ಆಸ್ಚಿ ಕವಯತ್ರಿ. ಎಕಾ ಕವಿಕ್ ಹೆ ಗೂಣ್ ಆಸ್ಚೆ ಭೋವ್ ಗರ್ಜೆಚೆ. ಕವಿತೆಂತ್ ಮ್ಹಾಕಾ ಕಿತ್ಯಾಕ್ಗೀ ಕವಯತ್ರಿ ಅಪ್ಲೊ ವಿಷಾದ್ ವೆಕ್ತ್ ಕರ್ಚೆಂ ದಿಸೊನ್ ಯೆತಾ, ಕಿತ್ಯಾಕ್ ಮ್ಹಳ್ಯಾರ್ ಮ್ಹಾಕಾ ಹೆಂ ಕವಿತಾ ನಿರಾಶೆಂತ್ ಸಂಪ್ಣಿ ಕರ್ಚಿ ದಿಸೊನ್ ಯೆತಾ.
ನಿರಾಶೆಂತ್ ಲಿಪಯಿಲ್ಲೆಂ ಆಶಾವಾದ್: [ಮೆಲ್ವಿನ್ ಜೆ. ವಾಸ್, ಕೆಲರಾಯ್]
ಹೆಂ ಕವಿತಾ ಪಯ್ಲ್ಯಾ ತೀನ್ ಪಂಗ್ತೆಂನಿ ತೀನ್ ರಿತಿಚೆಂ ಚಿಂತಾಪ್ ಉಟಯ್ತಾ ತರ್ಯೀ ಅಖ್ರೇಚ್ಯಾ ಪಂಗ್ತೆಚೆರ್ ಎಕೆಕಾ ಸಬ್ಧಾಂನಿ ಎಕೆಕಾ ಇಮಾಜೆಂತ್, ನಿರಾಸ್ ಉಟೊನ್ ದಿಸ್ತಾ ತರ್ಯೀ, ತ್ಯಾ ನಿರಾಸೆಚಾ ಭಿತರ್ ಎಕಾ ರಿತಿಚೊ ಆಶಾವಾದ್ ದಿಸ್ತಾ. ಕವಿತೆಕ್ ಜೆರಾಲ್ ರಿತಿನ್ ಎಕಾ ಪ್ರಕಾರಾಚೆಂ ಮ್ಹಣ್ ಕರಾರ್ ದಿವ್ಯೆತಾ ಪುಣ್ ತೆಂ ಹಾಂಗಾಸರ್ ಗರ್ಜೆಚೆಂ ನ್ಹಂಯ್; ಕಿತ್ಯಾಕ್ - ಹೊ ವಿಮರ್ಸೊ ನ್ಹಂಯ್, ಬಗಾರ್ ಅಧ್ಯಯನ್ ಮಾತ್ರ್.
ನವ್ಯಾ ರುಪಾಚೆಂ ಕವಿತಾ: [ಬೆನ್ನಾ ಫಜೀರ್]
ಕವಿತಾ ಖರೆಂಚ್ ಜಾವ್ನ್ ನವ್ಯಾ ಸಭ್ದಾಂನಿ, ನವ್ಯಾ ಇಮಾಜಿಂನಿ ಗುಂತುನ್ ಪ್ರಸ್ತುತ್ ಕೆಲ್ಲೆನಿಮ್ತಿಂ ಚಡಿತ್ ಆಕರ್ಶಕ್ ಕರ್ತಾ. ದೆಕುನ್ ಹ್ಯಾ ಕವಿತೆಚಿ ಸೊಭಾಯ್ ಉಟೊನ್ ದಿಸ್ತಾ.
ನಿರಾಸ್ ನಾಕಾ: [ಹೆಲೆನ್ ಪಿಂಟೊ, ಕುವೇಯ್ಟ್]
ಹಾಂವ್ ಕವಯತ್ರಿ ನ್ಹಂಯ್, ಕಾಣ್ಯೆಗಾರ್ನ್ ನ್ಹಂಯ್, ಸಾಹಿತ್ಯ್ ಹಾಂವ್ ನೆಣಾಂ ದೆಕುನ್ ಸಾಹಿತಿಕ್ ವಿಚಾರಾಂತ್ ಮ್ಹಜ್ಯಾನ್ ಸಾಂಗೊಂಕ್ ಅಸಾಧ್ಯ್. ಪುಣ್ ಹಾಂವ್ ಏಕ್ ಕೊಂಕ್ಣಿ ಕಲಾಕಾರ್ನ್ ಜಾವ್ನ್, ಸಾಹಿತ್ಯಾಚಿ ಅಭಿಮಾನಿ ಜಾವ್ನ್, ಏಕ್ ವಾಚ್ಪಿಣ್ ಜಾವ್ನ್ ಹೆಂ ಕವಿತಾ ಜಶೆಂ ಕವಿತಾಪಾಠಾಂತ್ ಅಧ್ಯಯನ್ ಲೇಖನಾಂತ್ ಸವಿಸ್ತಾರ್ ಜಾವ್ನ್ ಸಮ್ಜಾಯಿಲ್ಲೆಂ ಪಳೆತಾನಾ ಕವಯತ್ರಿ ನಿರಾಸ್ ಜಾಲ್ಲೆಂ ದಿಸೊನ್ ಯೆತಾ. ಕೊಂಕ್ಣಿ ಸಾಹಿತ್ಯಾಂತ್ ಕವಯತ್ರಿಂಚೊ ಖರೊಚ್ಚ್ ಬೊರ್ಗೊಲ್ ಆಸಾ, ತೆಂಯೀ ತೀಕ್ಷ್ಣ್ಚಿಂತ್ಪಾಚ್ಯೊ ಕವಯತ್ರಿ ಭೋವ್ ಉಣ್ಯೊ ಮ್ಹಣ್ತಾನಾ, ಅವಿನಾ ಮಿಯಾರ್ ತಸಲ್ಯಾ ತಾಲೆಂತ್, ಪ್ರತಿಭಾ ಆಸ್ಚಾ ಕವಯತ್ರಿಂನಿ ನಿರಾಸ್ ಜಾಂವ್ಚೆಂ ನ್ಹಂಯ್ - ಹೆಂಚ್ ಮ್ಹಜೆಂ ಮಾಗ್ಣೆಂ. ಹ್ಯಾ ಕವಿತೆಕ್ ಹಾಂವ್ ಮ್ಹಜ್ಯಾ ತರ್ಫೆನ್ 5000 ರುಪ್ಯಾಂಚೆಂ ಇನಾಮ್ ದೀಂವ್ಕ್ ಆಶೆತಾಂ.
[ಹಿ ಕವಿತಾ ಆಶಾವಾದಿ ಪ್ರಕಾಶನಾ ತರ್ಫೆನ್ ವೆಗಿಂಚ್ ಪರ್ಗಟೊನ್ ಯೆಂವ್ಚ್ಯಾ ’ಶಿಂಪಡ್ಲೆಲಿಂ ಮೊತಿಯಾಂ’ ಕವಿತಾಜಮ್ಯಾಂತ್ ಪರ್ಗಟೊನ್ ಯೆತೆಲೆಂ]
About us | Feedback | Contact us
Copyright © 2005
DAAIZ.COM All rights reserved.
Page concept, designed and maintained by Ashawadi
Publications
More in Daaiz
Send your comments to author on this writing
This is not a comment box. Nothing you write here appears on the site or is shown to any other reader: it is sent to him by email, privately, and he replies to you directly if a reply is called for.