ಕವಿತಾकविताPoem
ಕಾಳಿಂ
This poem is available in its original Kannada only.
ಕೊಂಕ್ಣೆಚಾ ವಿಂಚ್ಣಾರ್ ಸಾಹಿತ್ಯಾಚೊ ಕೊನ್ಸೊ - ’ದಾಯ್ಜ್’ - ಫಕತ್ತ್ ಕೊಂಕಣಿ ಥಾವ್ನ್, ಕೊಂಕಣಿ ಪರ್ಯಾಂತ್, ಕೊಂಕಣಿ ಖಾತಿರ್.
ಉತ್ರಾಂತ್ ಸೂತ್ರಾಂ
ಮಯ್ನ್ಯಾಚೊ ಕವಿ - 5
ಸೂತ್ರ್ 5: ಹಿಂ ಕಾಳಿಂ ಮೊಡಾಂ
ಆಂಟನಿ, ಬಾರ್ಕುರ್
ಕಸ್ಲಿಂ ಕಾಳಿಂ ಮೊಡಾಂ ಹಿಂ!?
"ಜೆದ್ನಾಂ ಏಕ್ ಕವಿತಾ ಬರವ್ನ್ ’ಮಹಾಕವಿ’ ಜಾಲ್ಲ್ಯಾ ಮ್ಹಾಕಾ
ಆತಾಂ ಶೆಂಭೊರಾಂನಿ ಕವಿತಾ ಬರಯ್ತಾನಾ ಕಳ್ಳೆಂ
ಹಾಂವ್ ಕವಿಚ್ಚ್ ನ್ಹಂಯ್ ಮ್ಹಳ್ಳೆಂ"
ಹೆಂ ಕವಿತಾ ಮ್ಹಜ್ಯಾ ಕಾಳ್ಜಾಂತ್ ಉದೆವ್ನ್ ಆಯಿಲ್ಲೆಂ, ಹಾವೆಂ ಹಾಚ್ಯಾಧಿಂಯೀ ಸಾಂಗ್ಲಾಂ, ಕವಿತಾ ಕಾಳ್ಜಾಚಿಚ್ ಭಾಸ್ ಮ್ಹಣ್. ದೆಕುನ್ ಸರ್ವಾಂಕ್ ಕವಿತಾ ಬರಂವ್ಕ್ ಜಾಯ್ನಾಂತ್, ಕಿತ್ಯಾಕ್ ಎಕಾ ಕವಿಕ್ ಕಾಳಿಜ್ ಆಸ್ಚೆಂ ಭೋವ್ ಗರ್ಜೆಚೆಂ, ಖಡ್ಪಾಚೆಂ ನ್ಹಂಯ್, ರಗ್ತಾ ಮಾಸಾಚೆಂ. ಫಕತ್ತ್ ಮಾಸಾಚೊ ಮುದೊ ನ್ಹಂಯ್, ಚಿಂತ್ಪಾಚೆಂ ಕಾಳಿಜ್.
"ಧೋವ್ ಧವೊ ಆಸ್ಚೊ ತರ್ ಹ್ಯಾ ಕಾಳ್ಯಾ ಮೊಡಾಂಕ್ ಕಾಳೊ ರಂಗ್ ಕಸೊ ಯೆಂವ್ಚೊ?" ಎಕಾ ಮಾಸೂಮ್ ಭುರ್ಗ್ಯಾನ್ ಕೆಲ್ಲ್ಯಾ ಸವಾಲಾಕ್ ತಾಚ್ಯಾ ಆವಯ್ನ್ ದಿಲ್ಲಿ ಖಾಲ್ತಿ ಜಾಪ್ ಜಾವ್ನಾಸಾ;
"ಸಂಸಾರಾಚೆಂ ಮ್ಹೆಳೆಂ ಜೆದ್ನಾಂ ವಯ್ರ್ ವಯ್ರ್ ವೆತಾ, ತೆಂ ತ್ಯಾ ಮೊಡಾಂನಿ ಶಿರ್ಕಾತಾ ದೆಕುನ್ ಮೊಡಾಂ ಕಾಳಿಂ ಜಾತಾತ್"
ಹಿ ಜಾಪ್ ಬೌತಿಕ್ ಸಂಸಾರಾಕ್ ವೆಗ್ಳಿಚ್ ದಿಸೊಂಕ್ ಪುರೊ. ಹಾಂಗಾಸರ್ ಕಾಳಿಂ ಕುಪಾಂ ಕಸಲಿಂ? ಉತ್ರಾಂತ್ ಸೂತ್ರಾಂತ್ಲೆಂ ಹೆಂ ಸೂತ್ರ್ ಖರೆಂಚ್ ಜಾವ್ನ್ ಸಭಾರ್ ಕವಿಂಕ್ ಆಪಾಪ್ಲಿ ಚಿಂತ್ಪಾ ಸಕತ್ ಪಾರ್ಕುಂಕ್ ಇಡೆಂ ದೀಂವ್ಕ್ ಪಾವ್ಲಾಂ ಮ್ಹಣ್ಚ್ಯಾಕ್ ಹಾಂತ್ಲಿಂ ಎಕೇಕ್ ಕವಿತಾ ಗೊವಾಯ್ ದಿತಾತ್. ತಶೆಂ ಮ್ಹಣೊನ್ ಆಮಿಂ ಕವಿಚ್ಯಾ ಚಿಂತ್ಪಾ ಸಕ್ತೆಕ್ ಕಸಲಿಚ್ ಬಂಧಡ್ ದಿಲ್ಲಿನಾ ವಾ ಕವಿಂಚ್ಯಾ ಚಿಂತ್ಪಾಕ್ ಅಮ್ಖಿಚ್ಚ್ ಮ್ಹಳ್ಳಿ ದಿಶಾ ದಿಲ್ಲಿನಾ. ಸರ್ವ್ ತ್ಯಾ ತ್ಯಾ ಕವಿಚ್ಯಾ ಸಮ್ಜಣೆಚೆರ್ ಸೊಡ್ಲ್ಲೆಂ.
ಕಸಲಿಂ ತಿಂ ಕಾಳಿಂ ಮೊಡಾಂ? ಕಾಳೊ ರಂಗ್ ತಿರಸ್ಕಾರಾಚೊ, ಅಗ್ಯಾನಾಚೊ, ಉಜ್ವಾಡಾವಿಣ್ ಆಸ್ಚೊ. ಉಜ್ವಾಡ್ ಮ್ಹಳ್ಯಾರ್ ಧವೊ ಆನಿ ನಿತಳ್ - ಮ್ಹಳ್ಯಾರ್ ಕಾಳೊ ಮ್ಹೆಳೊ ಮ್ಹಣ್ ಜಾಲೆಂ. ಹಾಂಗಾಸರ್ ಮೊಡಾಂ ಕಸ್ಲೀಂಯ್ ಜಾವ್ಯೆತಾ, ಆಮ್ಚಾ ಸಮಾಜೆಕ್ ಆವೃತ್ತ್ ಜಾಲ್ಲಿಂ ಹಿಂ ಕಾಳಿಂ ಮೊಡಾಂಯ್ ತಸಲಿಂಚ್ ಆಸ್ಯೆತ್.
ಕವಿ ಬಾಬ್ ಮನು ಬಾಹ್ರೇಯ್ನ್ ಫಾಮಾದ್ ಕಾಣ್ಯೆಗಾರ್ ಮಾತ್ರ್ ನ್ಹಂಯ್, ಏಕ್ ಪ್ರಭುದ್ದ್ ಚಿಂತ್ಪಾಚೊ ಕವಿ ಸಯ್ತ್ ಮ್ಹಣ್ಚ್ಯಾಕ್ ತಾಚೆಂ ಕವಿತಾ ಗೊವಾಯ್; ತಾಂತ್ಲಿಂ ಥೊಡಿಂ ಉತ್ರಾಂ ಪಳೆಯಾ;
’ಕಾಳಿಂ ಕಾಳಿಂ ಮೊಡಾಂ ಪರತ್ ಜಮ್ಲಿಂ ಅಂತ್ರಳಾರ್
ಪಾವ್ಸಾಚೆಂ ನ್ಹಂಯ್ ಜಾಂವ್ಕ್ ಪುರೊ ಝುಜಾಚಿಂ ಆಯ್ಲಾಂ ಆನ್ವಾರ್
ಮನ್ಶಾ ಮೊಡಾಂನಿ ಸೊಧ್ಲೆಂ ದೀವ್ಳ್ ಮಸೀದ್ ಅನಿ ಮಂದಿರ್
ಧಾಡ್ ದೆವಾ ಪಾವ್ಸ್ ಜಾಂವ್ಚೆಂ ನಾಕಾ ಝುಜ್ ಮಾಗ್ತಾಂವ್ ಆಧಾರ್’
ಜೆದ್ನಾಂ ಮನಿಸ್ ಹ್ಯಾ ಸಂಸಾರಾಂತ್ ಜಿಯೆತಾ, ಅಪ್ಲ್ಯಾ ಬರ್ಯಾ ವಾಯ್ಟಾಚೆಂ ಚಿಂತುಂಕ್ ಧರ್ತಾ, ತೆದ್ನಾಂ ಹ್ಯಾ ಸಂಸಾರಾಂತ್ ತಾಂಚೆಂ ಬರೆಂ ಮಾತ್ರ್ ಉರ್ತಾ ಆನಿ ತಾಂಚೆಂ ವಾಯ್ಟ್, ಅಸಲ್ಯಾ ಕಾಳ್ಯಾ ಮೊಡಾಂನಿ ಭರ್ಸತಾ ಮ್ಹಳ್ಳೊ ಅಪುರ್ಭಾಯೆಚೊ ಸಂದೇಶ್ ಹ್ಯಾ ಪಾವ್ಟಿಂಚ್ಯಾ ಕವಿಂನಿ ಉಟಯ್ಲಾ.
ಕವಿ ಬಾಬ್ ಆಸ್ಟಿನ್ ಪ್ರಭು ಹ್ಯಾ ಕಾಳ್ಯಾ ಮೊಡಾಂಕ್ ಶನಿ ಮ್ಹಣ್ ವೊಲಾಂವ್ಚಾ ಲೊಕಾಕ್ ಕಳಿತ್ ನಾ - ಹಿಂ ಮೊಡಾಂ ಆಸ್ಲ್ಯಾರ್ ಮಾತ್ರ್ ಸಂಸಾರ್ ಚಲ್ತಾ ಮ್ಹಳ್ಳೆಂ. ದೆಕುನ್ ಬೆಳೆಂ ಜಾಂವ್ಕ್ ಪಾವ್ಸ್ ಜಾಯ್, ಆನಿ ಪಾವ್ಸಾಕ್ ಹಿಂ ಮೊಡಾಂ ಗರ್ಜೆಚಿಂ ಮ್ಹಳ್ಳೊ ಸಂದೇಶ್ ಅಪ್ಲ್ಯಾ ಕವಿತೆಂತ್ ದಿತಾ.
ಕವಿ ಬಾಬ್ ಫ್ರಾನ್ಸಿಸ್ ಫುರ್ತಾದೊ ಹ್ಯೇ ಪಾವ್ಟಿಂ ಉತ್ರಾಂಚಿ ಜಾದು ಕರುಂಕ್ ಆಯ್ಲಾ ಅಸೊ;
’ಸುರ್ಯಾಚೆಂ ತೊಂಡ್ ಲಾನ್ ಜಾತಾ,
ಕಾಳಿಂ ಮೊಡಾಂ ತಾಚೆಂ ವೋತ್ ಆಡಾಯ್ತಾ,
ಪುಣ್ ವಾರೆಂ ಮೊಡಾಂಕ್ ದಾಂವ್ಡಾಯ್ತಾ,
ಘಡ್ಯೆನ್ ಸುರ್ಯೊ ಪಳೆ ಕಸೊ ಪರತ್ ಹಾಸ್ತಾ!’
ಕವಯತ್ರಿ ಬಾಯ್ ನಿರ್ಮಲಾಕ್ ಮನ್ಶ್ಯಾ ಜಿಣಿಂಚ್ ಏಕ್ ಸಂಸಾರ್ ಕಸೊ ಭಗ್ತಾ ದೆಕುನ್ ಹ್ಯಾ ಜಿಣ್ಯೆ ಆವ್ದೆಂತ್ ಹಜಾರ್ ರಿತಿಚಿಂ ಕಾಳಿಂ ಮೊಡಾಂ ಯೆತಿತ್ ತರ್ಯೀ ಭರ್ವಸೊ ಸಾಂಡಿನಾಸ್ತಾಂ ರಾವ್ಲ್ಯಾಂವ್ ತರ್ ಖರೆಂಚ್ ಜಾವ್ನ್ ಜಿಣ್ಯೆಂತ್ ಬರೊ ಆಸೊರ್ ಯೆಂವ್ಚೊ ದಿಸೊನ್ ಯೆತಾ.
ಕವಿ ಬಾಬ್ ಪ್ರಸನ್ನ್ ನಿಡ್ಡೋಡಿಚೆಂ ಚಿಂತಾಪ್ಯೀ ಚಡುಣೆಂ ಅಸಲೆಂಚ್ ಮ್ಹಳ್ಳೆಂ ತಾಚ್ಯಾ ಕವಿತೆಂತ್ ದಿಸೊನ್ ಯೆತಾ.
ಕವಿ ಬಾಬ್ ಸ್ಟ್ಯಾನಿ ಮೆಂಡೊನ್ಸಾ ಹ್ಯಾ ಧರ್ತೆಚೆರ್ ಜಿಯೆಂವ್ಚ್ಯಾ ಜಿವಿಂಕ್ ನಿವೆಂಚ್ ದವ್ರುಂಕ್ ಪಾವ್ಸಾಚೆಂ ರೂಪ್ ಘೆವ್ನ್ ಯೇಂವ್ಕ್ ತ್ಯಾ ಕಾಳ್ಯಾ ಮೊಡಾಂಕ್ ದಿಂವ್ಚೊ ಉಲೊ ದಿಸೊನ್ ಯೆತಾ.
ಕವಯತ್ರಿ ಬಾಯ್ ವಾಯ್ಲೆಟಾಚೆಂ ಕವಿತೆನ್ ಮಾತ್ಸಿ ಗುಂಡಾಯ್ ದಿಸೊನ್ ಯೆತಾ, ಕವಯತ್ರಿ ಸತ್ ಉಲಂವ್ಕ್ ಆಶೆತಾ ದೆಕುನ್ ಥೊಡ್ಯಾಂಕ್ ಹಿ ಕವಿತಾ ಮಾತ್ಶೆಂ ಕೊಡು ದಿಸೊಂಕ್ ಪುರೊ,
’ಮೊಡಾಂ ಹಿಂ ಕಾಳಿಂ ಮನ್ಶ್ಯಾ ಜಿಣಿಯೆಂತ್ಲಿಂ
ದಾಟಾಯ್ಲ್ಯಾಂತ್ ಸಭಾರಾಂಚ್ಯಾ ಕಾಳ್ಜಾಂತ್ಯೀ
ಮೊಡಾಂ ಹಿಂ ಮೊಸ್ರಾಚಿಂ, ರಾಗಾಚಿಂ, ಜಿದ್ದಾಚಿಂ
ಸ್ವ-ಫಾಯ್ದ್ಯಾನ್ ಮನ್ಶ್ಯಾಂಕ್ ಗ್ರಾಸುಂಚಿಂ’
ಜೆದ್ನಾಂ ಅಪ್ಲ್ಯಾ ಸ್ವಾರ್ಥಾಕ್ ಹೆರಾಂಚೆರ್ ವೆವೆಗ್ಳ್ಯಾ ರಿತಿರ್ ಖೆಬ್ಡಾಯೊ ಕರ್ಚ್ಯಾ ನಾಪಾಸ್ ಮನ್ಶ್ಯಾಂಚೆರ್ ಹಿಣೆಂ ಶೀದಾ ಹಲ್ಲೊ ಕರ್ಚೊ ಹ್ಯಾ ಕವಿತೆಂತ್ ದಿಸೊನ್ ಯೆತಾ. ಪುಣ್ ಸಂತೊಸಾಚಿ ಗಜಾಲ್ ಖಂಚಿಗೀ ಮ್ಹಳ್ಯಾರ್, ಹಿಣೆಂ ವ್ಹಾಪಾರ್ ಕೆಲ್ಲ್ಯಾ ಭಾಸೆಂತ್ ಸತ್ ಆಸಾ, ಆಕ್ರೋಶ್ ಆಸಾ ತರ್ಯೀ ಭಾಸೆಚಿ ಶಿಸ್ತ್ ಹಿಣೆಂ ಸಾಂಭಾಳ್ಳ್ಯಾ ಆನಿ ಭಾಸ್ ನಾತ್ಲ್ಲ್ಯಾಂಕ್ ದೇಖ್ ದಿಂವ್ಚೆಂ ಪ್ರೇತನ್ ಕೆಲಾಂ.
ಕವಿ ಬಾಬ್ ವಿನ್ಸಿ ಮೆಲ್ಕಾರಾಚ್ಯಾ ಕವಿತೆಚ್ಯಾ ಉತ್ರಾಂಚಿ ಸೊಭಾಯ್ ಪಳೆಯಾ;
’ಖೆಳ್ಚ್ಯಾ ನಾಸ್ಚ್ಯಾ ಉಡ್ಕಾಣಾಂ ಮಾರ್ಚ್ಯಾ
ಮೊಳ್ಬಾವಯ್ಲ್ಯಾ ಕಾಳ್ಯಾ ಮೊಡಾಂನೊ
ಆಮ್ಚೆರ್ ಇಲ್ಲಿಶಿ ತರೀ ದೀಷ್ಟ್ ಘಾಲಾ
ತುಮ್ಚ್ಯಾ ದೊಳ್ಯಾಂತ್ ಇಲ್ಲಿಂ ದುಃಖಾಂ ಭರಾ’
ಕವಿನ್ ಹ್ಯಾ ಧರ್ತೆಚೆರ್ ಸಮಧಾನೆಚೊ ಪಾವ್ಸ್ ಮಾಗೊಂಕ್, ತ್ಯಾ ಮೊಡಾಂಚಾ ದೊಳ್ಯಾಂನಿ ದುಃಖಾಂ ಮಾಗ್ಚೆಂ ಖಾಲ್ತೆಂ ಪಿಂತುರ್ ಉಭೆಂ ಜಾತಾ. ಪುಣ್ ತ್ಯಾ ಮೊಡಾಂಕ್ ದೊಳೆ ಆಸ್ತೆ ತರ್?
ಕವಯತ್ರಿ ಬಾಯ್ ನಂದಿನಿಕ್ ಹಿಂ ಕಾಳಿಂ ಮೊಡಾಂ ದಿಸ್ತಾತ್ ತರ್ಯೀ, ಅಪ್ಲ್ಯಾ ಗಾಂವಾಂತ್ ಜರ್ ಹಿಂ ಮೊಡಾಂ ಫುಟ್ಲಿಂ ತರ್, ಗಾಂವ್ಭರ್ ತಣ್ ಪಾಚ್ವ್ಯಾ ಪಾಲಂವಾಕ್ ಪಾಂಗ್ರುಂಕ್ ಸಕಾತ್, ಆನಿ ಮನಿಸ್ ಜಶೆಂ ಎಕೇಕ್ ಜೀವಿ ಸಂತೊಸಾನ್ ಭರಾತ್ ಮ್ಹಳ್ಳೆಂ ಚಿಂತಾಪ್ ಕವಿತೆಂತ್ ಉಟಯ್ತಾ.
ಕವಯತ್ರಿ ಬಾಯ್ ಪ್ರಿಯಾ ಸಿಕ್ವೇರಾಕ್ ಹ್ಯಾ ಸಂಸಾರಾಂತ್ ಧವ್ಯಾ ಮೊಡಾಂಚೆರ್ ಕಾಳ್ಯಾ ಮೊಡಾಂನಿ ಚಲಂವ್ಚೊ ಜುಲುಮ್ ದಿಸೊನ್ ಯೆತಾ, ತರ್ಯೀ ಅಸಲಿಂ ಕಾಳಿಂ ಮೊಡಾಂ, ಜಾಂವ್ ಹಜಾರಾಂನಿ ಆಸೊಂದಿತ್, ಪುಣ್ ಧವಿಂ ಮೊಡಾಂ ನಾಸ್ ಜಾಂವ್ಚಿಂ ನಾಂತ್ ಮ್ಹಳ್ಳೆಂ ಧಯ್ರಾಧಿಕ್ ಚಿಂತಾಪ್ ವ್ಹಾಳಂವ್ಚೆಂ ದಿಸೊನ್ ಯೆತಾ.
ಕವಿ ಬಾಬ್ ವಲ್ಲಿ ಕ್ವಾಡ್ರಸಾಚೆಂ ಎಕ್ಸ್ಪ್ರೆಸ್ಸ್ ಬಸ್ಸ್ ಕೊಂಕ್ಣಿ ವಾವ್ರಾಕ್ ಲಾಗ್ಲಾಂ ಆನಿ ಹೆಂ ಬಸ್ಸ್ ರಾವಂವ್ಕ್ ಹೆಚ್ಚ್ ವಾವ್ರಾಕ್ ಲಾಗ್ಲೆಲ್ಯಾಂನಿ ಕರ್ಚಿಂ ವೆವೆಗ್ಳಿಂ ಸಾಧನಾಂ ಉಸ್ತುಂಕ್ ಧರ್ತಾ. ಪಡ್ಲಾ ಥಾವ್ನ್ ಮುಡ್ಲಾಪರ್ಯಾಂತ್, ವಯ್ರ್ ಥಾವ್ನ್ ಸಕಯ್ಲ್ ಪರ್ಯಾಂತ್ ಅಸಲ್ಯಾ ಸರ್ವಾಂಕ್ ಸುಶೆಗಾತ್ ಧುಂವ್ಚೆಂ ಪ್ರೇತನ್ ಕವಿತೆಂತ್ ಕೆಲ್ಲೆಂ ದಿಸೊನ್ ಯೆತಾ.
ಕವಿ ಬಾಬ್ ಆಂಟನಿ ಬಾರ್ಕುರ್ ಪಯ್ಲೆ ಪಾವ್ಟಿಂ ಹಾಂಗಾಸರ್ ಆಯ್ಲಾ, ಅಪ್ಲ್ಯಾ ಅಪುರ್ಭಾಯೆಚ್ಯಾ ಕವಿತೆಕ್ ಘೆವ್ನ್;
’ಸ್ವಾರ್ಥಾ ವೊತಾಕ್ ತೇಲ್ಚ್ ಶಿಜ್ತಾನಾ,
ಝುಜಾ ಮೋಡ್ ಭೆಜ್ತಾ;
ರೆಂವೆ ರಾಶಿರ್ ರಗತ್ ಇರ್ತಾನಾ,
ಮೊಗಾ ಉದಕ್ ಕುಸ್ತಾ.
ಹಾಂವ್, ತುಂ, ಕಾರಣ್ ನೆಣಾಂವ್,
ಫಕತ್ ಝುಜೊಂಕ್ ಝುಜ್ತಾಂವ್.
ಮೊಡಿಂ ಖಾತಾತ್ ಗೀದ್-ಆಮಿ,
ಹರ್ದ್ಯಾರ್ ಬಸೊನ್ ಜೆವ್ತಾಂವ್;’
ಕವಿಚ್ಯಾ ಎಕೆಕಾ ಉತ್ರಾಂನಿ ಆಸ್ಚಿಂ ಸೂತ್ರಾಂ ತರ್ಯೀ ಕಿತ್ಲಿಂ ಭಳಿಶ್ಟ್ ಪಳೆಯಾ; ಹ್ಯೇ ಕವಿತೆಕ್ ಖರೆಂಚ್ ಜಾವ್ನ್ ಜೊಕ್ತೊ ಮಾನ್ ಮೆಳಾಜಯ್ಚ್ ದೆಕುನ್ ಹ್ಯಾ ಮಯ್ನ್ಯಾಚೊ ಕವಿ ಜಾವ್ನ್ ಆಂಟನಿ ಬಾರ್ಕುರ್ ವಿಂಚೊನ್ ಯೆತಾನಾ, ತಾಕಾ ಉಲ್ಲಾಸ್.
ಉತ್ರಾಂತ್ ಸೂತ್ರಾಂ - 5: ಕಾಳಿಂ ಮೊಡಾಂ ಹಿಂ
[ವಾಂಟೆಲಿ ಜಾಲ್ಲಿಂ]
3. ಆಸ್ಟಿನ್ ಪ್ರಭು ನಂತೂರ್/ಚಿಕಾಗೊ.
4. ವಾಯ್ಲೆಟ್ ಜೆ. ಪಿರೇರಾ, ದುಭಾಯ್.
5. ನಿರ್ಮಲಾ ಗೋವಿಯಸ್, ಬೆಂದುರ್/ಮಸ್ಕತ್.
7. ಪ್ರಿಯಾ ಸಿಕ್ವೇರಾ ಫೆರಾರ್/ ಕುವೇಯ್ಟ್.
8. ಫ್ರಾನ್ಸಿಸ್ ಫುರ್ಟಾಡೊ, ಕಲೀನಾ.
10. ವಲ್ಲಿ ಕ್ವಾಡ್ರಸ್, ಅಜೆಕಾರ್/ಕುವೇಯ್ಟ್.
ಕಾಳಿಂ ಮೊಡಾಂ ಹಿಂ [ಮಯ್ನಾಚೆಂ ಕವಿತಾ]-
ಆಂಟನಿ, ಬಾರ್ಕುರ್
ತುಜ್ಯಾ ಮ್ಹಜ್ಯಾ ಮಧೆಂ ಮಾಂಡ್ಲ್ಯಾಂತ್,
ಕಾಳಿಂ ಮೊಡಾಂ ಹಿಂ;
ಪಾವ್ಸ್ ಜಾಂವ್, ನಿತ್ಳೊಂ ಅಂತ್ರಳ್,
ಮ್ಹೆಳಿಂ ಮೊಡಾಂ ಹಿಂ.
ಸ್ವಾರ್ಥಾ ವೊತಾಕ್ ತೇಲ್ಚ್ ಶಿಜ್ತಾನಾ,
ಝುಜಾ ಮೋಡ್ ಭೆಜ್ತಾ;
ರೆಂವೆ ರಾಶಿರ್ ರಗತ್ ಇರ್ತಾನಾ,
ಮೊಗಾ ಉದಕ್ ಕುಸ್ತಾ.
ಹಾಂವ್, ತುಂ, ಕಾರಣ್ ನೆಣಾಂವ್,
ಫಕತ್ ಝುಜೊಂಕ್ ಝುಜ್ತಾಂವ್.
ಮೊಡಿಂ ಖಾತಾತ್ ಗೀದ್ - ಆಮಿ,
ಹರ್ದ್ಯಾರ್ ಬಸೊನ್ ಜೆವ್ತಾಂವ್;
ಮುಕಾರ್ ಫಟವ್ನ್, ಗುಪಿತ್ ಆಟವ್ನ್,
ಶಾಂತೆ ಸೂತ್ರಾಂ ವೊಳ್ತಾಂವ್;
ಸೂತ್ರಾಂ ಪಾಟಿಂ ಘುಟಾ ಮೊಡಾಂ,
ಆಬ್ಲೆಸಾ ಆಂಯ್ಡೆ ಗಿಳ್ತಾಂವ್.
ಮತಿಂತ್ ಭಿರಾಂತ್, ಸದಾಂ ಆಕಾಂತ್,
ಮನ್ಶ್ಯಾಪಣ್ ಧೊಂಕ್ಳ್ಯಾಯ್ತಾ;
ಮ್ಹಾಕಾಚ್ ಹಾಂವ್ ಸಮ್ಜಾಂವ್ಕ್ ಹಾರ್ತಾಂ,
ಫಾತರ್ ಕಾಳಿಜ್ ಕಳ್ವಳ್ತಾ.
ಕಾಳಿಂ ಮೊಡಾಂ ಕಡೊನ್ ಪಡೊಂ,
ಚಡ್ಯಾಂ ಶಾಂತೆ ದೊಣಿ;
ಮ್ಹೆಳಿಂ ಮೊಡಾಂ ಮಾಯಾಗ್ ಜಾಂವೊಂ,
ಹಾಸೊಂ ಸರ್ವಾಂ ಜಿಣಿ.
ಕಾಳಿಂ ಕಾಳಿಂ ಮೊಡಾಂ [ - ಮನು, ಬಾಹ್ರೇಯ್ನ್]
ಅಂತ್ರಾಳಿಂ ಜಮ್ಲ್ಯಾಂತ್ ಕಾಳಿಂ ಕಾಳಿಂ ಮೊಡಾಂ
ಪಾವ್ಸಾಚಾ ಯೆಣ್ಯಾಕ್ ರಾಕ್ತಾತ್ ರೂಕ್ ಝಡಾಂ..
ಫುಟ್ಲೆಲ್ಯಾ ಗಾದ್ಯಾಂತ್ ಘೊಳ್ತಾತ್ ಬಾವ್ಲೆಲಿಂ ರಯ್ತಾಚಿಂ ತೊಂಡಾಂ
ಖಾಣ್ ನಾಸ್ತಾಂ ನಿತ್ರಾಣ್ ಜಾವ್ನ್ ವಯ್ರ್ ಪಡ್ಲ್ಯಾಂತ್ ಭುದ್ಗ್ಯಾಂಚಿಂ ಹಾಡಾಂ
ಉದೆಲಿಂ ಪರತ್ ಕಾಳಿಂ ಮೊಡಾಂ ನೀಳ್ ಗಗನಾರ್
ಪಾವ್ಸ್ ಪಡ್ಲೊ ನಾ, ಧರಣ್ ಬಿಜ್ಲಿನಾ ಬೋಬ್ ಮಾರ್ತಾ ಜಾನ್ವಾರ್
ರಾನಾಂತ್ ಪಡ್ಲಾ ಉಜೊ, ತಾಪ್ಲಾ ಭೆಜೊ, ಚಡ್ಲಾ ವಯ್ರ್ ಧುಂವರ್
ರಾನ್ವಾಟ್ ಮನ್ಜಾತ್ ಧಾಂವ್ತಾ ಅರ್ಧಿ ಮೊರ್ತಾ, ಸೊಡ್ತಾ ಉದ್ಕಾಚೊ ಆಧಾರ್
ಗಗನ್ ನಿತಳ್ಳೆಂ ಪರತ್ ಉದೆಲಿಂ ತಿಂಚ್ ಮೊಡಾಳ್ ಕಾಳಿಂ
ಖಂಡಿತ್ ಜಾವ್ನ್ ಪಾವ್ಸ್ ಯೆತಲೊ ಬರಿಂ ಜಾತೆಲಿಂ ಬೆಳಿಂ
ರಯ್ತ್ ಜೆವ್ಲೆ ಘೊಟುನ್ ನಿದ್ಲೆ, ಸ್ವಪ್ಣಾಂತ್ ಖಾವ್ನ್ ಖೆಳಿಂ
ವಾರೆಂ ಉಭ್ಲೆಂ, ಮೊಡಾಂಕ್ ಲೊಟ್ಲೆಂ, ಕೊಲ್ವಾಚಿಂ ಪಾಕಿಂ ಉಭ್ಲಿಂ
ಕಾಳಿಂ ಕಾಳಿಂ ಮೊಡಾಂ ಪರತ್ ಜಮ್ಲಿಂ ಅಂತ್ರಳಾರ್
ಪಾವ್ಸಾಚೆಂ ನ್ಹಂಯ್ ಜಾಂವ್ಕ್ ಪುರೊ ಝುಜಾಚಿಂ ಆಯ್ಲಾಂ ಆನ್ವಾರ್
ಮನ್ಶಾ ಮೊಡಾಂನಿ ಸೊಧ್ಲೆಂ ದೀವ್ಳ್ ಮಸೀದ್ ಅನಿ ಮಂದಿರ್
ಧಾಡ್ ದೆವಾ ಪಾವ್ಸ್ ಜಾಂವ್ಚೆಂ ನಾಕಾ ಝುಜ್ ಮಾಗ್ತಾಂವ್ ಆಧಾರ್
ಕಾಳೊ ಧುಂವರ್ ಜಮ್ಲಾ ವಯ್ರ್ ಕಾಳ್ಯಾ ಕಾಳ್ಯಾ ಮೊಡಾಂನಿ
ಆಡಾಂವ್ಕ್ ಜಾಲೆಂ ನಾ ಕಾತ್ರುನ್ ಅಸ್ಕತ್ ಜಾಲ್ಲ್ಯಾ ರಾನಾಂನಿ
ಸುರ್ಯಾಚೆಂ ಅಂಗ್ಲೆಂ ಪಿಂದುಂಕ್ ಲಾಗ್ಲಾಂ ಬುರಾಕಾಂನಿ
ಧುಂವ್ರಾ ರಾಸ್ ಕುಡ್ಸುನ್ ಪಾವ್ಸಾ ಮೊಡಾಂಕ್ ಜಾಲ್ಯಾ ಅಡ್ಚಣ್
ಕಾಳಿಂ ಕಾಳಿಂ ಮೊಡಾಂ ಪರತ್ ಉದೆತಾಲಿಂ
ಎಕಾಮೆಕಾ ಆದ್ಳೊನ್ ಆವಾಜ್ ಉಟಯ್ತಾಲಿಂ
ಉಭಾರ್ ಪರ್ವತಾಂಕ್ ವಚೊನ್ ಆಪ್ಟತಾಲಿಂ
ವಾರ್ಯಾ ಝಾಡಾಂನಿ ವಿವಿಧ್ ಜಾಗ್ಯಾಂನಿ ದುಖಾಂ ಗಳಯ್ತಾಲಿಂ
ಕಾಳಿಂ ಮೊಡಾಂ! [- ಆಸ್ಟಿನ್ ಪ್ರಭು]
ಕಾಳಿ ಮೊಡಾಂ ಮರ್ಜೆಚಿಂ
ಪಾವ್ಸಾ ಉದ್ಕಾಕ್ ಗರ್ಜೆಚಿಂ
ಪುಣ್ ಕಸ್ಲೇಂಯ್ ಅನ್ವಾರ್ ಆಯ್ಲೆಂ ತೆನ್ನಾಂ
ಕಾಳಿಂ ಮೊಡಾಂ ಕಿತ್ಯಾ ತ್ಯಾ ದಾಖ್ಲ್ಯಾಚಿಂ?
ಮೊಡಾಂ ನಾಸ್ತಾಂ ಪಾವ್ಸ್ ಯೇನಾ
ಪಾವ್ಸ್ ನಾಸ್ತಾಂ ಬೆಳೆಂ ಪಾಲೆನಾ
ಪುಣ್ ದುರ್ಸೊಂಚೆಂ ತ್ಯಾ ಮೊಡಾಂಕ್ ಕಿತ್ಯಾ
ತಕ್ಲೆಂತ್ ಆಮ್ಚ್ಯಾ ಕಿತ್ಯಾ ದುಸ್ರೆಂ ನಾ?
ಕೊಣೇಂಯ್ ಕಿತೆಂ ಪಾಡ್ ಕೆಲೆಂ
ಮ್ಹಣ್ತಾತ್ ಕಾಳೆಂ ಮೋಡ್ ಆಯ್ಲೆಂ
ಮೊಡಾಂಚೊ ಕಾಲೊರ್ ಕಾಳೊ ತರೀ
ಮೊಡಾಂ ಆಮ್ಕಾಂ ಜಾಯ್ ನಿರಂತರಿಂ
ಕಾಳಿಂ ಮೊಡಾಂ ಆಸ್ಲ್ಯಾರ್ ಮಾತ್ರ್
ಭುಂಯ್ಚ್ಯಾ ಉದ್ಕಾಕ್ ಯೆತಾ ಗಾತ್ರ್
ಪೃಥ್ವಿರ್ ಪಾವ್ಸ್ ಯೆತಾ ರಭಸಾನ್
ರಾಕೊನ್ ರಾವ್ತಾಂವ್ ಹೊರ್ಭೊಸಾನ್
ಕಾಳಿಂ ಮೊಡಾಂ ಪಳೆವ್ನ್ ಸಗ್ಳಿಂ
ಆಪಾಪ್ಲ್ಯಾ ಘರಾ ಧಾಂವೊಂಕ್ ಲಾಗ್ತಾತ್
ಪಾವ್ಸ್ ಪಡ್ಚ್ಯಾ ಪಯ್ಲೆಂಚ್ ಆಮಿಂ
ಘರಾ ಪಾವ್ಯಾಂ ಮ್ಹಣ್ ಆತ್ರೆಗ್ತಾತ್
ದೆಖುನ್ ಮಿಸ್ತಾ ಕಾಳ್ಯಾ ಮೊಡಾಂಕ್
ಸರ್ವಾಂ ಶನಿ ಕಸೆಂ ದಾಖಲ್ ಕರ್ತಾತ್
ಕಾಳ್ಯಾ ಮೊಡಾಂಚಾ ಉದ್ಕಾಂತ್ ನ್ಹಂಯ್ಗಿ
ಭುರ್ಗಿಂ ಬೊಡಾಂ ಖೆಳೊಂಕ್ ಲಾಗ್ತಾತ್?
ಗಾಂಯ್ದೊಳ್ ಸಗ್ಳೆ ಜಿವೆ ಜಾತಾತ್?
ರೂಕ್ ಝಾಡಾಂ ತಿಂ ಪಾಲೆತಾತ್?
ಫುಲ್-ಫಳಾಂ ತಿಂ ದಿಸೊನ್ ಯೆತಾತ್?
ಆನಿ ಲೋಕಾ ಮನಾಂ ಉಲ್ಲಾಸಿತಾತ್?
ತರ್ ಕಾಳಿಂ ಮೊಡಾಂ ಅಪಶಕುಣ್?
ವ ಸಮೃದ್ಧೆಚಿ ಏಕ್ ಬರಿ ನಿಶಾನಿ?
ಮೊಡಾಂ ಹಿಂ ಕಾಳಿಂ ಕಾಳಿಂ [- ವಾಯ್ಲೆಟ್ ಜೆ. ಪಿರೇರಾ]
ಮೊಡಾಂ ಹಿಂ ಕಾಳಿಂ ಮನ್ಶ್ಯಾ ಜಿಣಿಯೆಂತ್ಲಿಂ
ದಾಟಾಯ್ಲ್ಯಾಂತ್ ಸಭಾರಾಂಚ್ಯಾ ಕಾಳ್ಜಾಂತ್ಲಿಂ
ಮೊಡಾಂ ಹಿಂ ಮೊಸ್ರಾಚಿಂ, ರಾಗಾಚಿಂ, ಜಿದ್ದಾಚಿಂ
ಸ್ವ-ಫಾಯ್ದ್ಯಾನ್ ಮನ್ಶ್ಯಾಂಕ್ ಗ್ರಾಸುಂಚಿಂ
ದಾಟಾಯ್ಲೆಲಿಂ ಪಳೆ ಕಾಳಿಂ ಮೊಡಾಂ ಮನ್ಶ್ಯಾ ಮತಿಂತ್
ಕೆನ್ನಾ ಕೆನ್ನಾ ರಂಗ್ ಬದ್ಲುನ್, ವಿದ್ರೂಪ್ ಜಾತಾತ್
ನಿತಳ್ ಧವಿಂ ಮೊಡಾಂ ಹಿಮಾಬರಿಂ, ಥರ್ಥರೊನ್ ಗೆಲ್ಲಿಂ
ಕಾಳ್ಯಾ ಮೊಡಾಂನಿ ವೆಡೊಂ ತಾಂಚೆರ್ ಘಾಲ್ನ್ ಲಿಪಯಿಲ್ಲಿಂ
ಮೊಡಾಂಚ್ಯಾ ದಾಟಾಯೆಕ್ ಜಿಣ್ಯೆ ಆಕಾಸ್ ಘರಾಜ್ತಾಲೊ
ಆಸ್ಕತ್ ಮನ್ಶ್ಯಾಂಚೆರ್ ಭಳ್ವಂತ್ ಘಡ್ಗಡೊ ಬೊಬಾಟ್ತಾಲೊ
ನಿರಾಪ್ರಾಧ್ಯಾಕ್ ಬೆಷ್ಟಾವ್ನ್ ಝಗ್ಲಾಣೆಂ ಹಾಸ್ತಾಲೆಂ
ಎಕ್ಸುರ್ಯಾ ಮತಿಂತ್ ಸವಾಲ್ ಆಶೆಂ ಉದೆಲೆಂ
ಆಕಾಶಿ ಮಾಂಡುನ್ ದವರ್ಲ್ಯಾ ಕಾಪ್ಸಾ ಗುಡ್ಯಾಪರಿಂ, ದಿಸ್ತಾತ್ ಮೊಡಾಂ ಧವಿಂ
ಗುಡ್ಯಾ ದೊಂಗ್ರಾಂಕ್ ಕರಿ ಪುಸ್ಲೆಲೆ, ರಂಗ್ ಬದ್ಲುನ್ ಹಿಂ ಮೊಡಾಂ ವಿಸ್ತಾರಿ
ಸುರ್ಯಾಚ್ಯಾ ಕಿರ್ಣಾಂಕ್ ತಿಂ, ಪರ್ಜಳ್ತಾತ್ ಮೊತಿಯಾಂಪರಿಂ
ಬರಿಂ ಖೊಟಿಂ ಕಶೆಂ ಪಳೆವ್, ರಾವ್ಲ್ಯಾಂತ್ ಪರ್ವತಾಪರಿಂ
ಮೊಡಾಂ, ಸಂಸಾರಿ ಗಗನಾರ್ ದಾಂವ್ತಾಲಿಂ ಎಕಾಚ್ಚ್ ಕುಶಿನ್
ಮೊಸ್ರಾಚೆ ವ್ಹಾರೆಂ ವಾಳೊಂಕ್ ಲಾಗ್ಲೆಂ ತೆಂ ಕಿತ್ಲ್ಯಾ ಭಳಾನ್
ಮನ್ಜಾತಿ ಅಪ್ಲ್ಯಾ ಹಿಂಡಾಕ್ ಎಕ್ಟಾವ್ನ್ ಆಸ್ಲ್ಲ್ಯಾಂತ್ ದಾಧೊಶಿ
ಪುಣ್ ಮನ್ಶ್ಯಾ ಸೈಂಭ್ ಕೆನ್ನಾ ಬದ್ಲಾತ್ ನಾ ಜಾಲ್ಯಾ ಪಾತ್ಯೆಣಿಂ
ಭ್ಯೆಂ ದಿಸ್ತಾಲೆಂ ಚೊಯ್ತಾನಾ ಅಧಿಕಾರಾಚ್ಯಾ ಕಾಳ್ಯಾ ಮೊಡಾಂಕ್
ಅನ್ನ್ಯಾಯಾ ವಯ್ರ್ ಅನ್ನ್ಯಾಯ್, ಫಟ್ಚ್ಚ್ ಜಿಕ್ಲ್ಲೆ ಪರಿಂ
ಕಪಟಾನ್ ಭರುನ್ ಮನ್ಶ್ಯಾ ವಯ್ರ್ ಘಡ್ಯೆನ್ ವಿಸ್ತಾರುನ್
ಮನ್ಶ್ಯಾಕ್ ಮನಿಸ್ ಗ್ರಾಸಿತಾ ಧರ್ತಿರ್ ರಗಾತ್ ವ್ಹಾಳವ್ನ್
ಕಾಳಿಂ ಮೊಡಾಂ [- ನಿರ್ಮಲಾ ಗೋವಿಯಸ್, ಬೆಂದುರ್]
ಜಿಣ್ಯೆ ಪಯ್ಣಾರ್ ವಾದಾಳ್
ಮೊಡಾಂ ದುಖಾಚಿಂ ಮಾಂಡ್ಲ್ಯಾಂತ್
ಸರ್ವ್ ಜಾಲ್ಯಾಂತ್ ಶಾಂತ್
ರುದಾನಾಂನಿ ಕಾಳ್ಜಾಂ ಮನಾಂ ಥಕ್ಲ್ಯಾಂತ್
ಸಪ್ಣಾಂ ಬೊಂದೆರಾಂ ಕೊಸಾಳ್ಳ್ಯಾಂತ್
ಅವ್ಜಿತ್ ಮರ್ಣಾನ್ ಮೊಗಾಚ್ಯಾಂಕ್ ಝೊಂಪಯ್ ಮಾರ್ಲ್ಯಾ
ಸತ್ ತೆಂ ಆಡ್ಹೂಕ್ ಮಾರ್ತಾನಾ
ದುಖಾಚೆಂ, ಆಕ್ಲಾಸಾಚೆಂ ಮೊಡ್ ಪ್ರಸಾರ್ತಾನಾ
ರಚ್ಣಾರಾಕ್ ಸವಾಲಾಂಚಿ ಪಟ್ಟಿ
ಕಿತ್ಯಾಕ್ ಅಶೆಂ ಘಡ್ಲೆಂ ಧನ್ಯಾ?
ವಾಯ್ಟ್ ಕಿತೆಂ ಆಮಿ ಆಧಾರ್ಲಾಂ
ತುಜ್ಯಾ ನಿರಾಧಾರಿ ಶೆಳಿಯಾಂಕ್ ಚರಯ್ಲಾಂ
ಲ್ಹಾನಾಂ ಭಾವಾಂಕ್ ತುಜ್ಯಾ ಆಧಾರ್ ಜಾಲ್ಯಾಂವ್
ಸತಾ ನಿತಿನ್, ಮಾಯಾಮೊಗಾನ್ ಜೀಣ್ ಹಿ ಸಾರ್ಲ್ಯಾ?
ಕಿತ್ಯಾಕ್ ಹಿ ಶಿಕ್ಷಾ ತರ್?
ಮೊಡಾಂ ಪಿಡೆಚಿಂ ಆವೃತ್ ಜಾತಾನಾ
ದೂಕ್ ವಿಳಾಪ್ ಘರಾಂತ್ ಭರ್ತಾನಾ
ದೊತೊರ್ ಆಸ್ಪತ್ರೆಚ್ಯೊ ವಾಟೊ ಝರಯ್ತಾನಾ
ಕುಮ್ಕೆಕ್ ದಾರಾಂ ಥಾಪಡ್ಲ್ಯಾರಿ, ಫಾಯ್ದೊ ನಾಸ್ತಾನಾ
ಖಂತ್ ಬೆಜಾರಾಯೆಚಿ ವ್ಹಾಳಯ್, ಮೆಂದ್ವಾಕ್ ಖಾತಾನಾ.....
ಪರತ್ ತಿಚ್ ಸವಾಲಾಂಚಿ ಪಟ್ಟಿ.....
ಹಿಂ ಕಾಳಿಂ ಮೊಡಾಂ ಆಮ್ಕಾಂ ಕಿತ್ಯಾಕ್?
ಕಾಮ್ ನಾಸ್ತಾಂ ಬೆಕಾರ್ ಭಂವ್ತಾನಾ
ಪಯ್ಶ್ಯಾಂಚಿ ಅಡ್ಚಣ್ ಭಗ್ತಾನಾ,
ಸರ್ವ್ ಬೊಟಾಂ ಜೊಕ್ತಾನಾ
ಜಾಯ್ತಿ ನಿಂದಾ ಸೊಸ್ತಾನಾ
ಭಗ್ಣಾಂ ತಿಂ ರಿತಿಂ ಧೊಸ್ತಾನಾ
ನೀದ್ ರಾತಿಂ ನಾಸ್ತಾನಾ
ದೆಧೆಸ್ಪೊರ್ ಜಾವ್ನ್ ಮಾರ್ಗಾರ್ ಭಂವ್ತಾನಾ
ತಿಚ್ ಸವಾಲಾಂಚಿ ಪಟ್ಟಿ...
ಹಿಂ ಕಾಳಿಂ ಮೊಡಾಂ ಅಮ್ಕಾಂ ಕಿತ್ಯಾಕ್??
ಜೊಬಾಚೆರ್ಯೀ ಪ್ರಸಾರ್ಲ್ಲಿಂ ಕಾಳಿಂ ಮೊಡಾಂ
ಜುದಾಸಾಬರಿ ತಾಣೆಂ ಜಿವ್ಘಾತ್ ಕೆಲೊನಾ
ವಾ ಪೆದ್ರುಬರಿ ರಚ್ನಾರಾಕ್ ನೆಗಾರ್ ಕೆಲೊನಾ
ಧಯ್ರ್ ತಾಣೆಂ ಘೆತ್ಲೆಂ..........
ಶಾಂತ್ ತೊ ಉರ್ಲೊ ದೆಕುನ್.......
ದೆವಾನ್ ತಾಕಾ ವರ್ತೊ ಕೆಲೊ........
ಆಜೂನ್ ಪರ್ಯಾಂತ್ ಯಾದ್ ತಾಚಿ ಅಮರ್ ಉರ್ಲಿ.......
ಸವಾಲಾಂ ಉಡಂವ್ಚ್ಯಾ ಮನ್ಶಾ ಜೀವಿ...
ಆಯ್ಕ್ ಮ್ಹಾಕಾ ಹಿ ಏಕ್ ಘಡಿ...
ಜೆಜು, ದೇವ್ ಸಂಯ್ಬಾಚೊ ತರಿ....
ಕಿರ್ಕೊಳ್ ಮನಿಸ್ ಜಾಲೊ ಧರ್ತೆ ವೆರಿ...
ಪಾತ್ಕಿ ಅಪುಣ್ ನ್ಹಂಯ್ ತರೀ..
ಖುರ್ಸಾಕ್ ತೊ ವೇಂಗ್ ಮಾರಿ...
ಮೊರೊನ್ ತ್ಯಾ ಭಾಗಿ ಖುರ್ಸಾರಿ
ಜಿವಂತ್ ಜಾಲೊ ತಿಸ್ರ್ಯಾ ಫಾಂತ್ಯಾರಿ..
ಉಪಾದೆಸ್ ಮ್ಹಜೆ ಖಂಚಯ್ ಆತಾಂ
ಕಶ್ಟಾಂ ಬಗಾರ್ ಸುಖ್ ನಾಂ..
ಮೊರ್ನಾ ಬಗಾರ್ ಜಿವಂತ್ಪಣ್ ನಾಂ..
ಸರೊನ್ ತಿಂ ಕಾಳಿಂ ಮೊಡಾಂ..
ದಿಸ್ತೆಲಿಂ ಧವಿಂ ಮೊಡಾಂ ಸದಾಂ
ಆಸ್ತಲೊಯ್ ಸಂತೊಸಾನ್ ಆತಾಂ ಆನಿಂ ಸದಾಂ...
ಮೊಳ್ಬಾವಯ್ಲ್ಯಾ ಮೋಡಾಂನೊ [- ವಿನ್ಸಿ ಮೆಲ್ಕಾರ್]
ಖೆಳ್ಚ್ಯಾ, ನಾಚ್ಚ್ಯಾ ಉಡ್ಕಾಣಾಂ ಮಾರ್ಚ್ಯಾ
ಮೊಳ್ಬಾ ವಯ್ಲ್ಯಾ ಕಾಳ್ಯಾ ಮೊಡಾ೦ನೊ
ಆಮ್ಚೆರ್ ಇಲ್ಲಿಶಿ ತರೀ ದೀಷ್ಟ್ ಘಾಲಾ.
ತುಮ್ಚ್ಯಾ ದೊಳ್ಯಾ೦ತ್ ಇಲ್ಲಿ೦ ದುಃಖಾ೦ ಭರಾ.
ಆಮ್ಚೊ೦ ಸ೦ತೊಸ್ ನಪ೦ಯ್ಚ್ ಜಾಲಾ,
ಆಮ್ಚಿಂ ಫಳಾಭರಿತ್ ಶೆತಾ೦, ಭೆಟಾ೦ ಮೊರೊನ್ ಪಡ್ಲ್ಯಾ೦ತ್
ಉದಾಕ್ ನಾಸ್ತಾ೦ ನಂಯೊ ಭಾಂಯೊ೦ ಸುಕೊನ್ ಗೆಲ್ಯಾ೦ತ್,
ತಾನೆನ್, ಗಾ೦ವಾರ್ - ಗಾ೦ವ್ ಭ೦ವೊನ್ ಆಸಾ೦ವ್.
ರಾಗಾರ್ ಜಾಲ್ಲ್ಯಾ, ಲಿಪೊನ್ ರಾವ್ಲ್ಲ್ಯಾ,
ಹಿಮಾಬರಿ೦ ಘೆಟೆ ಜಾಲ್ಲ್ಯಾ ಮೊಡಾ೦ನೊ,
ಇಲ್ಲೆಶೆ೦ ಸುರ್ಯಾ ಕುಶಿನ್ ಘು೦ವಾತ್.
ತುಮ್ಚೆಂ ಮನ್ ಕರ್ಗೊನ್. . . . . . .
ಆಮ್ಚೆರ್ ಇಲ್ಲೆ ಪಾವ್ಸಾ ಶೆಣೆಂ ವೊತ್ಶ್ಯಾತ್?
ಕಾಳಿಂ ಮೊಡಾಂ ಹಿಂ [- ಪ್ರಿಯಾ ಸಿಕ್ವೇರಾ, ಫೆರಾರ್]
ವಯ್ರ್ ಪಳೆತಾಂ ತರ್
ಕಾಳಿಂ ಮೊಡಾಂ ಆನಿಂ ಅಸ್ಕತ್ ಧವಿಂ ಮೊಡಾಂ
ಎಕಾಮೆಕಾ ಘಾಸ್ ಘಾಲ್ನ್
ಗಿಳುಂಕ್ ತಯಾರ್ ಜಾತಾನಾ
ಕಾಳ್ಯಾಂ ಮೊಡಾಂಚೆಂ ಹಿಂಡ್ಚ್
ಸಾಂಗಾಂತಾ ಯೇವ್ನ್ ಗ್ರಾಸಿತಾತ್
ತ್ಯಾ ಧವ್ಯಾಂ ಮೊಡಾಂಕ್
ತೆದಾಳಾ ಹಾಂವ್ ಆನಿಂ ತುಂ ಕೇವಲ್
ಮೌನ್ ಪ್ರೇಕ್ಶಕ್!!
ಸಗ್ಳ್ಯಾನಿತ್ಲ್ಯಾನ್ ರಾಜ್ ಚಲಯ್ತಾತ್
ಕಾಳಿಂ ಮೊಡಾ ಹಿಂ!
ಧವಿಂ ಮೊಡಾಂ ಹೆಣೆಂ ತೆಣೆಂ ಜಲ್ಮಾತಾತ್
ವಾಡೊನ್ ಸಾಂಗಾತಾ ಮೆಳ್ಚಾ ಪಯ್ಲೆಂಚ್
ಕಾಳ್ಯಾಂ ಮೊಡಾಂಚಾ ಭಿಂಯಾನ್
ಮುಖಾರ್ ರಾವೊಂಕ್ ಧಯ್ರ್ ನಾಸ್ತಾಂ
ನಪಂಯ್ಚ್ ಜಾತಾತ್
ತೆದಾಳಾ ಹಾಂವೆ ಆನಿಂ ತುಂ ಮಾರ್ತಾಂವ್
ಸಂತೊಸಾಚೆಂ ಸಲಾಮ್!!
ಮೌನ್ ಪ್ರೇಕ್ಶಕ್ ಜಾಂವ್ಚಾ ಬದ್ಲಾಕ್
ಉಲೊ ಮಾರ್ಯಾಂ ಧವ್ಯಾ ಮೊಡಾಂಕ್
ಕಾಳ್ಯಾಂ ಮೊಡಾಂಕ್ ಸಲಾಮ್ ಮಾರ್ಚ್ಯಾ ಬದ್ಲಾಕ್
ಬಳ್ ದಿಯಾಂ ಧವ್ಯಾಂ ಮೊಡಾಂಕ್
ಎಕ್ವಟೊನ್ ಝುಜೊಂಕ್
ಕಾಳಾಂ ಮೊಡಾಚೆಂ ಗರ್ವ್ ಲಿಪಂವ್ಕ್
ಆಧಾರ್ ಜಾವ್ಯಾಂ ಹಾಂವ್ ಆನಿಂ ತುಂ!!
ತೆದಾಳಾ ಜಾತೆಲ್ಯಾಂವ್ ಧವಿಂ ಮೊಡಾಂ ಹಾಂವ್ ಆನಿಂ ತುಂ
ಆನಿಂ ಅಸ್ಕತ್ ಜಾತೆಲಿಂ ಕಾಳಿಂ ಮೊಡಾಂ ಹಿಂ!!
ಕಾಳಿಂ ಮೊಡಾಂ ಹಿಂ [- ಫ್ರಾನ್ಸಿಸ್ ಫುರ್ಟಾದೊ, ಕಲೀನಾ]
ಖಂಡಿತ್ ತಾಕಾ ಧಾದೊಸ್ಪಣ್ ಮೆಳಾತ್,
ಜರ್ ಕೊಣ್ ನಿತಳ್ ಮೊಳಾಬ್ ಪಳೈತ್.
ಕಾಳಿಂ ಮೊಡಾಂ ಹಿಂ ಮಾತ್ರ್ ಹಾಡ್ತಾತ್,
ಪಳೈತೆಲ್ಯಾಚ್ಯಾ ಮನಾಂತ್ ಎಕ್ ಭಿರಾಂತ್.
ಹಾಂ, ಹಾಂವ್ ಸಮ್ಜೊನ್ ಆಸ್ಲ್ಲೊಂ,
ಸುರ್ಯೊಚ್ ಮ್ಹಣ್ ಸಗ್ಳ್ಯಾನ್ ವ್ಹಡ್ಲೊ,
ನ್ಹಂಯ್, ಹ್ಯಾ ಕಾಳ್ಯಾ ಮೊಡಾಂನಿ ಮೊಡ್ಲೊ,
ಸುರ್ಯಾಚೊ ಭರಮ್, ಕಾಳೊಕ್ ಫಾಂಕ್ಲೊ.
ಸುರ್ಯಾಚೆಂ ತೊಂಡ್ ಲಾನ್ ಜಾತಾ,
ಕಾಳಿಂ ಮೊಡಾಂ ತಾಚೆಂ ವೋತ್ ಆಡಾಯ್ತಾ,
ಪುಣ್ ವಾರೆಂ ಮೊಡಾಂಕ್ ದಾಂವ್ಡಾಯ್ತಾ,
ಘಡ್ಯೆನ್ ಸುರ್ಯೊ ಪಳೆ ಕಸೊ ಪರತ್ ಹಾಸ್ತಾ!
ಜಿಣ್ಯೆಂತ್ಯೀ ಕಾಳಿಂ ಮೊಡಾಂ ಯೆತಾತ್,
ಹಾಸೊನ್ ಖೆಳೊನ್ ಆಸಲ್ಲೆ, ಆವ್ಚಿತ್ ರಡ್ತಾತ್,
ಕಾಳಿಂ ಮೊಡಾಂ ಕಾಂಯ್ ಸದಾಂಚಿಂ ಅಸಾನಾಂತ್,
ಹೆಂ ಕಳೊಂಕ್ ದೆವಾಚೆರ್ ಭರ್ವಸೊ ದವರಿಜೆ ಪಡಾತ್.
ಕಾಳಿಂ ಮೊಡಾಂ ಹಿಂ [- ಪ್ರಸನ್ನ್ ನಿಡ್ಡೋಡಿ]
ದಿಗಂತಾರ್ ಪಳೆ ಕಾಳಿಂ ಮೊಡಾಂ
ಘಡ್ಯೆ ದಿಸ್ತಿತ್ ಘಡ್ಯೆ ನಪಂಯ್ಚ್
ಉಜ್ವಾಡ್ ಮಸ್ತಿತ್ ಕಾಳೊಕ್ ದಾಟಾವ್ನ್
ಮೊಡಾಂ ಇಡ್ಯಾಕ್ ಸುರ್ಯೊ ಚಂದ್ರ್ ಅಪಾಲಿಪಾ
ಚೊಯ್ತ್ ತರ್ ಹರ್ಯೆಕ್ಲೊ ವಿವಿಧ್ ರುಪಾಂನಿ
ರಯ್ತ್ ಸಂತೊಸ್ತಾ ಪಾವ್ಸಾಕ್ ಅತ್ರೆಗೊನ್
ಭಿಕಾರಿ ಚಿಂತಾ ದಂದೊ ಬಂದ್ ಮ್ಹಣ್
ಭುರ್ಗಿಂ ವೆವೆಗಿಂ ಧಾಂತಿತ್ ಘರಾ ಕುಶಿನ್
ಸುಕ್ಣಿ ಸಾವ್ಜಾಂ ಪೊಳ್ತಿತ್ ಘೊಂಟೆರಾ ತೆವ್ಶಿಂ
ಬೆಕಾರಿ ಬೆಜಾರ್ ಫಾಲ್ಯಾಂ ದಿಸಾಕ್ ಆಂವ್ಡೆವ್ನ್
ಕುಲ್ಕಾರಾಕ್ ಸಂಪ್ಲೊ ದೀಸ್ ಕೂಲ್ ಘೆಂವ್ಕ್
ಆಜೊ ಚಲ್ತಾ ಬಾಜಾರಾಕ್ ಸತ್ರಿ ಘೆವುನ್
ಮನ್ಶಾ ಜಿಣ್ಯೆಂತ್ಯೀ ಜಶೆಂ
ಮೊಡಾಂ ಕಾಳಿಂ ಮನ್ಶ್ಯಾಕ್ ಗ್ರಾಸಿತಾತ್ ತೆದ್ನಾಂ
ಕೊಣ್ ವಳ್ಕತ್ ತಾಂಕಾಂ ಬರ್ಯಾ ಮಾಪಾನ್
ಕೋಣ್ ಘೆತ್ ’ಪಾಡ್’ ಚಿಂತುನ್
ಬರ್ಯಾಕ್ ಘೆತಾ ತೊ ’ಪರಿವರ್ತನ್’ ಹಾಡಿತ್
ಪಾಡ್ ಚಿಂತ್ಚೊ ’ಅಂತಕ್’ ರಾಕಾತ್
ತರ್ ಮನ್ಶ್ಯಾ ಚಿಂತಾಯ್ ಕಿತ್ಯಾಕ್ ಪಾಟಿಂ ಫುಡೆಂ
ಘಟ್ ಕರ್ ಫುಡಾರ್ ಕರುನ್ ಧಿಕ್ಕಾರ್
ದಾಂಟುನ್ ಸರ್ ಮುಖಾರ್ ಹಿಂ ಕಾಳಿಂ ಮೊಡಾಂ
ಕಿತ್ಯಾಕ್ ಆತಾಂ ದಿಸ್ತಿತ್ ಪುಣ್ ದುಸ್ರೆ ಘಡ್ಯೆ ತಿಂ ನಪಂಯ್ಚ್..!!
ಬಸ್ಸ್ ರಾವಯಾ [- ವಲ್ಲಿ ಕ್ವಾಡ್ರಸ್, ಅಜೆಕಾರ್]
ಹಾಂಗಾಚಿಂ ಕಾಳಿಂ ಮೊಡಾಂ ಸೊಡಾ
ಥಂಯ್ ಧಾಂವ್ತಾ ಪಳೆ ಬಸ್ಸ್
ಕೊಣ್ ತರೀ ತೆಂ ರಾವಯಾ
ಬಂದ್ರಾ ಥಾವ್ನ್ ಚಂದ್ರಾಕ್ ಪಾವತ್
ಅತಾಂಚ್ ರಾವಂವ್ಚೆಂ ಬರೆಂ
ಮಾಗಿರ್ ತೆಂ ರಾಂವ್ಚೆಂ ನಾ
ಕೊಣಾ ಕೊಣಾಕ್ ಇಡ್ಯಾಕ್ ಘಾಲಿತ್
ಟಯರಾಂ ಲಾಸಾ
ಧುಂವರ್ ಘಾಲಾ
ಕಶೆಂ ಪುಣಿ ಕರುನ್
ತೆಂ ಬಸ್ಸ್ ರಾವಯಾ
ಬಸ್ಸಾಂತ್ ಕೊಣಾಚೊ ಜೀವ್ ತುಟ್ಲಾಗಿ
ಕೊಣ್ ತರೀ ಬಿಗಿಲ್ ಫುಂಕಾ
ತೆಂ ಲಟಾರಿ-ಗುಜ್ರಿ ಬಸ್ಸ್
ಆಮ್ಚಿ ಗಾಡಿ ಮರ್ಸಿಡಿಸ್
ಆಮ್ಚಿ ಗಾಡಿ ಬಂದ್ ಜಾಲ್ಯಾ
ತಾಚೊ ಎಕ್ಸ್ಪ್ರೆಸ್ ಬೋರ್ಡ್ ಕಾಡಾ
’ಉಂತಾಲೆ’ ಮ್ಹಣಾ
ಡ್ರಾಯ್ವರಾಕ್ ಕುಚುಲ್ಯೊ ಕರಾ
ತಾಚ್ಯಾ ದೊಳ್ಯಾಂಕ್ ಬೊಟಾಂ ಘಾಲಾ
ತಾಕಾ ಸೊವಾ ಹಲ್ಕ್ ಕರಾ
ಬಸ್ಸ್ ಖಣಿಕ್ ಪಡೊಂಕ್
ಆಂಗವ್ಣ್ಯೊ ಮಾಗ್ಣಿ ಕರಾ
ಉಪ್ವಾಸ್ ತೇರ್ಸ್ ಕರಾ
ಕೋಂತ್ ಕಾಡಾ ದಿಂಬಿ ಘಾಲಾ
ಅತಾಂಚ್ ಆತಾಂ ತೆಂ
ಬಸ್ಸ್ ರಾವಯಾ
ಬಸ್ಸಾರ್ ಆಸ್ಚೆ ಕೊಣ್ಗಾ
ಪೊಲಿಸ್ಕಿ ಚೋರ್
ವಕೀಲ್ಕಿ ಪಟೆಲ್
ಪಾದ್ರಿಗೀ ದೊತೊರ್
ಮಾದ್ರಿಗೀ ಫುಡಾರಿ
ಮ್ಹಜೆ ತಸ್ಲೆ ಕವಿಕೀ
ಕೆಪ್ಪೆಗೀ ಬೆಪ್ಪೆ
ಅಳೆಗಾ ತುಮಿ ಕಾನ್ ಪಾಫುಡಾ
ದೊಳೆ ಘಸ್ಟಿಯಾ
ಧಾಂವಾ ಆನಿ ಕಶೆಂ ಪುಣಿ
ಬಸ್ಸ್ ರಾವಯಾ
ಕೊಣಾ ಕೊಣಾಚೆಂ ವೊಜೆಂ
ಕೊಣಾ ಕೊಣಾಚೆಂ ಪೊತೆಂ
ವಾವಯ್ತಾ ಆನಿ ನಾಂವ್ ಜೊಡ್ತಾ
ಡಿಜಿಲ್ ಕಾಡಾವೊ
ಡಿಜಿಲಾಕ್ ಮೀಟ್ ಘಾಲಾವೊ
ಕಂಡೆಕ್ಟ್ರಾಂಚಾ ಕಾನ್ಪಟ್ಯಾಕ್ ದಿಯಾವೊ
ಕಿತೆಂಯ್ ಕರ್ಚೆಂ ಕರ್ನ್
ತೆಂ ಬಸ್ಸ್ ರಾವಯಾವೊ
ಬಸ್ಸಾಕ್ ಯೆಟ್ಚೆ ಹಾಂಗಾ ಯೆಯಾವೊ
ತುಮ್ಚೆ ಪೊದೊರ್ನ್ ಆಮಿಂ ಜಾತಾಂವ್
ತುಮ್ಕಾಂ ಅಮರ್ ಕರ್ತಾಂವ್
ತುಮ್ಚೆ ನಾಂವಿ ವಾತಿ ಪೆಟಯ್ತಾಂವ್
ತುಮ್ಚೆ ಬೂಕ್ ಛಾಪುನ್ ದಿತಾಂವ್
ಗಾಂಯ್ದೊಳಾಂಕ್ಯ್ ಇರ್ವೊಳ್ ಕರ್ತಾಂವ್
ಪುಣ್ ತೆಂ ಬಸ್ಸ್ ರಾವಯಾ
ಬ್ರೇಕ್ ಫೇಯ್ಲ್ ಜಾಲಾಗಾಯ್?
ಹಾತ್ ಆಡ್ ಧರಾ
ಹಾತಾಂತ್ ರಾವಾನಾ ತರ್
ಫಾತೊರ್ ಆಡ್ ಘಾಲಾ
ಫಾತ್ರಾಂತ್ ರಾವಾನಾ ತರ್
ಫಾತೊರ್ ಉಡಯಾ ಆರ್ಶೆ ಫೊಡಾ
ರಾವಾನಾತ್ಲ್ಯಾರ್
ಮಾಂಡೊ ಫೊಡಾ ಹಾತ್-ಪಾಂಯ್ ಮೊಡಾ
ಬೊಬೊ ಘಾಲಾ ಆಸಿಡ್ ಉಡಯಾ
ಟಯರಾಂ ಪಂಕ್ಚರ್ ಕರಾ
ರಸ್ತ್ಯಾರ್ ಫೊಂಡ್ ಕಾಡಾ
ತಶೆಂಯೀ ರಾವಾನಾತ್ಲ್ಯಾರ್
ಬಸ್ಸಾಕ್ ಪಿಶೆಂ ಲಾಗ್ಲಾಂ
ದೆವಾಕ್ ಸೊಡ್ಲ್ಲೊ ಪಾಡೊ ಮ್ಹಣಾ
ಡ್ರಾಯ್ವರ್ ಕಂಡೆಕ್ಟ್ರಾಂಕ್ ಪುರಾ
ತಾಂಚಿಂ ಘರಾಂ ಲೊಟುನ್ ಘಾಲಾ
ತಾಂಚಾ ಕುಟ್ಮಾಕ್ ಗಾಳಿ ದಿಯಾ
ಇಮೇಯ್ಲಾಂ ಕರಾ
ಕಿತೆಂಯೀ ಕರಾ
ಪುಣ್ ಬಸ್ಸ್ ರಾವಯಾ
ಯೆಯಾವೊ ಮೆಳಾವೊ ಬಸ್ಸ್ ಪರ್ತಿಯಾ
ಪರ್ತನಾ ಜಾಲ್ಯಾರ್ ಲೊಟುನ್ ಘಾಲಾ
ಬಿಗಿಲ್ ಆಯ್ಕನಾ ತರ್ ಬೋಂಬ್ ಫೊಡಾ
ಗಲಾಟೊ ಕರಾ
ಸರಳಾಂ ಮೊಡಾ
ಬಸ್ಸ್ ರಾವಾನಾ ಮ್ಹಳ್ಯಾರ್
ಸ್ಟೋಪಾರ್ ಕಾಂಟೆ ಘಾಲಾ
ರಸ್ತ್ಯಾರ್ ಆಡ್ ನಿದಾ
ಆಂಬುಲೆನ್ಸ್ ವ್ಹರಾ
ಬುಲ್ಡೋಜರ್ ಆದ್ಳಿಯಾ
ಕೊಂಕ್ಣಿ ವಾವ್ರಾಕ್ ಅಶೆಂಯ್ ಲಾಗ್ಲ್ಲೆಂ
ಬಸ್ಸ್ ಕಶೆಂ ತರ್ಯೀ ರಾವಯಾ
ಕಾಳಿಂ ಮೊಡಾಂ ಹಿಂ [- ಸ್ಟ್ಯಾನಿ ಮೆಂಡೊನ್ಸಾ, ಯು.ಕೆ]
ಕಾಳಿಂ ಮೊಡಾಂ ಹಿಂ ಕಾಳಿಂ ಮೊಡಾಂ
ಅಖ್ಯಾ ಭೂಲೋಕಾಚೆರ್ ಭುಂಯಾರಾಚಿಂ ಕೊಂಡಾಂ
ಉಧ್ವೇಗಾನ್ ಭರ್ಲ್ಯಾಂತ್ ರಚ್ಣೆಂಚಿಂ ತೊಂಡಾಂ
ನಿಳ್ಶ್ಯಾ ದಿಗಂತಾಂತ್ಲಿಂ ತಿಂ ಕಾಳಿಂ ಮೊಡಾಂ
ವಾರೆಂ ವಾದಾಳ್ ಉಟಯ್ತಿತ್, ಗಾಂಚ್ ತುಟಯ್ತಿತ್
ಸುಕ್ತಿ ಭಿಜಯ್ತಿತ್ ಸುರ್ಯಾಕ್ ಕಾಳೊಕ್ ಹಾಡಯ್ತಿತ್
ಸೃಷ್ಠಿ ಬುಡಯ್ತಿತ್ ಕರ್ತಿತ್ ಧರ್ತೆಚಿ ವಧಾ
ಉಜೊ ಪೆಟಯ್ತಿತ್, ಧರ್ಣ್ ಫುಟಯ್ತಿತ್
ಘಡ್ಗಡ್ಯಾ ಆವಾಜಾನ್ ಹಾಡಯ್ತಿತ್ ಪಾವ್ಸಾಳೊ
ಉದ್ಕಾ ಶಿಂವೊರ್ ವೊತುನ್
ರೂಕ್ ಝಡಾಂ ಪಾಲೆತಿತ್
ಧರ್ತಿ ಪಾಚ್ವ್ಯಾ ರಂಗಾನ್ ಸೊಭಯ್ತಿತ್
ಶೆತಾಂ ವಾವ್ರ್ಯಾಡ್ಯಾಚಾ ತೊಂಡಾರ್ ಅಮೃಕೊ ಹಾಸೊ ಹಾಡುನ್
ಮನಿಸ್ ಮನ್ಶ್ಯಾಚೆರ್, ಸೆಜಾರಿ ಸೆಜಾರ್ಯಾಚೆರ್
ರಾಜ್ಯ್ ರಾಜ್ಯಾಂಚೆರ್, ರಾಷ್ಟ್ರ್ ರಾಷ್ಟ್ರಾಂಚೆರ್
ರಾಗ್ ಮೊಸ್ರಾಚಾ ತಾಲ್ವಾರಿಂಚೆರ್ ಮಾಂಡ್ತಾತ್ ಝುಜಾಂ
ಎಕಾಮೆಕಾ ಕಾತ್ರುನ್ ಪಡ್ತಾತ್ ಮನಿಸ್, ಮಾರ್ತಾತ್ ಗುಳೊ
ಧರ್ತೆ ವಯ್ಲಿಂ ಹಿಂ ಮೊಡಾಂ ವ್ಹಾಳಯ್ತಾತ್ ರಗ್ತಾ ವ್ಹಾಳೊ
ಹಾ! ಕೆದ್ನಾಂ ನಿತಳ್ತಿತ್ ಹಿಂ ಕಾಳಿಂ ಮೊಡಾಂ
ಕಾಳ್ಕಿಂ ಮೊಡಾಂ [- ನಂದಿನಿ]
ಫುಟಾ, ಘಡ್ಗಡೊನ್ ಫುಟಾ ಕಾಳ್ಕ್ಯಾ ಮೊಡಾಂನೊ
ಫುಟಾ, ಘನ್ ಗಂಬೀರ್ ಆವಾಜಾನ್
ವಯ್ಭವೀತ್ ಉಜ್ವಾಡಾಚಾ ದಳ್ಭಾರಾನ್
ಫುಟಾ, ಫುಟಾ ಹಾಂಗಾಸರ್ ಫುಟಾ!
ಹಾಂಗಾಸರ್ ಮ್ಹಜಾ ಗಾಂವಾ ವಯ್ರ್ ಫುಟಾ!!
ಗಿಮಾಳ್ ಮಹಿನೊ ಅಶೆಂ ನಾಕಾ ಕರುಂ ಚಿಂತಾ
ಕಾಳ್ಶೆಲ್ಯಾತ್ ಉದ್ಕಾ ಜಡಾಯೆನ್, ವೊಜೆಂ ತುಮ್ಚೆಂ ದೆಂವಯಾ
ಹೇ, ಅಂತ್ರಳಿ ಮೊಡಾಂನೊ, ಸ್ವತಂತ್ರ್ ಸುಕ್ಣ್ಯಾಂನೊ
ಏಕ್ಚ್ ಏಕ್ ಪಾವ್ಟ್ ... ಹಾಂಗಾಸರ್ ಫುಟಾ!
ಹಾಂಗಾಸರ್ ಮ್ಹಜಾ ಗಾಂವಾ ವಯ್ರ್ ಫುಟಾ!!
ರಿತೊ ಸುಕೊ ಜಾಲಾ ಮ್ಹಜೊ ಗಾಂವ್ ತುಜೆವೀಣ್
ಸುಕ್ಸುಕಾಟ್ ರಾವ್ಲಾಂ ಪೋಯ್ ಆಮ್ಚೆಂ ಘರ್ದಾರ್
ವಿಜೆಚೆ ಆಟೆವಿಟೆ, ಕಳ್ವಳೆ ತಾನೆ ಉದ್ಕಾಕ್
ಮೊಡಾಂನೊ ಧಾಂವಾನಾಕಾತ್, ಫುಟಾ ಹಾಂಗಾಸರ್ ಫುಟಾ!
ಹಾಂಗಾಸರ್ ಮ್ಹಜಾ ಗಾಂವಾ ವಯ್ರ್ ಫುಟಾ!!
ಘರಾದಾರಾಂತ್, ಖೆಡೆಗಾಂವಾಂತ್ ಯೆಯಾತ್ ದೆಂವೊನ್
ರುಂಬಾ ನಾಚಾ, ಡಿಸ್ಕೊ ನಾಚಾ, ನಾಚೊನ್ ರಾವತ್ ದೀಸ್ರಾತ್
ಜಾಯ್ ಥಂಯ್, ಜಾಯ್ ತಸೊ ವ್ಹಾಳಯಾ ವ್ಹಾಳೊ ಉದ್ಕಾ ಲೊಟಾನ್
ಜಾಯ್ ತರ್ ಮ್ಹಜೊ ಜೀವ್ ವ್ಹರಾ, ಜೀವ್ ಭರಾ ಪ್ರಿತುಮೆಕ್
ಪುಣ್ ಏಕ್ಚ್ ಏಕ್ ಪಾವ್ಟ್. . .
ಹಾಂಗಾಸರ್ ಮ್ಹಜಾ ಗಾಂವಾ ವಯ್ರ್ ಫುಟಾ!!
About
us | Feedback | Contact us
Copyright
© 2005 DAAIZ.COM All rights reserved.
Page concept, designed and maintained by Ashawadi
Publications
More in Daaiz
Send your comments to author on this writing
This is not a comment box. Nothing you write here appears on the site or is shown to any other reader: it is sent to him by email, privately, and he replies to you directly if a reply is called for.