ಖಂಯ್ಚೊ

ಕೊಂಕ್ಣೆಚಾ ವಿಂಚ್ಣಾರ್ ಸಾಹಿತ್ಯಾಚೊ ಕೊನ್ಸೊ - ’ದಾಯ್ಜ್’ - ಫಕತ್ತ್ ಕೊಂಕಣಿ ಥಾವ್ನ್ ಕೊಂಕಣಿ ಪರ್‍ಯಾಂತ್, ಕೊಂಕಣಿ ಖಾತಿರ್.

"ಆಮಿಂ ಆಮ್ಕಾಂ ಆಮ್ಚಾ ಶ್ಯಾಥಿಯೆಚೆರ್ ಮೆಜ್ತಾಂವ್ ತರ್ ಹೆರಾಂ ಆಮ್ಕಾಂ ಮೆಜ್ತಾತ್ ಆಮಿಂ ತಾಂಕಾಂ ಕಿತೆಂ ಕೆಲಾಂ ತಾಚೆರ್"

ಖಂಯ್ಚೊ ಧರ್ಮ್ ಉಂಚ್ಲೊ?

ವರಸ್ : 2006

ಅಂಕೊ : 28

ಮಯ್ನೊ : ಅಕ್ತೋಬರ್

ಸಂಪಾದಕೀಯ್ - 28.

ವಲ್ಲಿ ಕ್ವಾಡ್ರಸ್

ಹ್ಯಾ ಸಂಸಾರಾಂತ್ ಜಿಯೆವ್ನ್ ಆಸ್ಚಾ ಹರ್‍ಯೆಕಾ ಮನ್ಶಾಕ್ ಏಕ್ ನ್ಹಂಯ್ ಏಕ್ ಧರ್ಮ್ ಆಸಾ, ತೆಂ ತೊ ಪಾಳುಂ ವಾ ಸೊಡುಂ ಪುಣ್ ಹ್ಯಾ ಸಂಸಾರಾಂತ್ ಜಲ್ಮೊನ್ ಯೆಂವ್ಚಾ ಹರ್‍ಯೆಕಾ ಮನ್ಶಾಚೆರ್ ಜಲ್ಮಲ್ಲ್ಯಾ ಘಡ್ಯೆಚ್ ಹೊ ’ಧರ್ಮ್’ ತಾಚೆರ್ ಥಾಪ್ಲಾ. ಕೊಣ್ ಕ್ರಿಸ್ತಾಂವ್ ತರ್ ಕೊಣ್ ಮುಸ್ಲಿಮ್ ಆನಿ ಕೊಣ್ ಪಾರ್ಸಿ ತರ್ ಕೊಣ್ ಸಿಖ್ ಹರ್‍ಯೆಕ್ಲ್ಯಾಕ್ ಹೊ ಧರ್ಮ್ ಮ್ಹಳ್ಳೊ ಆಸಾ ಜಾಂವ್ ತೊ ಕಾಳೊ ವ ಗೊರೊ.

’ಥಾಪ್ಲಾ’ - ಮ್ಹಳ್ಳೊ ಸಬ್ಧ್ ಹಾವೆಂ ಕಿತ್ಯಾಕ್ ವಾಪಾರ್ಲೊ ಮ್ಹಳ್ಯಾರ್ ಖಂಚಾಯ್ ಮನ್ಶಾನ್ ಜಲ್ಮಲ್ಲ್ಯಾ ಘಡ್ಯೆ ಆಪ್ಣಾಕ್ ಪಸಂದೆಚೊ ಧರ್ಮ್ ಖಂಚೊ ಮ್ಹಳ್ಳಿ ವಿಂಚವ್ಣ್ ಕರುಂಕ್ ಅಸಾಧ್ಯ್ ಮಾತ್ರ್ ನ್ಹಂಯ್ ಅಸಂಬದ್ದ್. ತಾಂಕಾಂ ತೊ ಧರ್ಮ್ ತಾಂಚಾ ಜಲ್ಮ್ ದಾತಾರಾಂ ಥಾವ್ನ್ ಲಾಭ್ತಾ, ಆನಿ ತ್ಯಾ ಜಲ್ಮ್ ದಾತಾರಾಂಕ್‌ಯ್ ತೊ ಧರ್ಮ್ ತಾಂಚಾ ಜಲ್ಮ್ ದಾತಾರಾಂ ಥಾವ್ನ್ ದೆಂವೊನ್/ಗಳೊನ್/ಥಾಪೊನ್ ಆಯಿಲ್ಲೊ ಜಾವ್ನಾಸಾ.

ಹರ್‍ಯೆಕಾ ಧರ್ಮಾಚೊ ಮುಳಾವೊ ಸಾರ್ ಹೊಚ್ - ಮನಿಸ್ ಜಾವ್ನ್ ಜಿಯೆವ್ನ್ ಆಸ್ತಾನಾ ಜಸೊ ತುಂ ಜಿಯೆತಾಯ್ ತಶೆಂ ಹೆರಾಂಕ್ ಜಿಯೆಂವ್ಕ್ ಸೊಡ್ ಆನಿ ಮನ್ಶಾಪಣಾಕ್ ಕೆದಿಂಚ್ ಸಾಂಡಿನಾಕಾ. ಹ್ಯಾ ಉತ್ರಾಂಚಿ ಪರಿಭಾಶಾ ತ್ಯಾ ತ್ಯಾ ಧರ್ಮಾಂನಿ ವೆವೆಗ್ಳಿ ಆಸ್ಯೆತಾ ತರ್‌ಯ್ ಸಾರ್ ತೊಚ್ಚ್. ಖಂಚೊ ತೊ ಧರ್ಮ್ ಶಿಕಯ್ತಾ ತುಜಾ ಭಾವಾಂಚಿ ಖುನ್ ಕರ್ ಮ್ಹಣ್? ಖಂಚೊ ಧರ್ಮ್ ಶಿಕಯ್ತಾ ತುಜಾ ಸೆಜಾರ್ಚಾಂಕ್ ಲುಟುನ್ ಜಿಯೆ ಮ್ಹಣ್? ಖಂಚೊ ಧರ್ಮ್ ಶಿಕಯ್ತಾ ಎಕಾಮೆಕಾಚೆಂ ರಗಾತ್ ಪಿಯೆ ಮ್ಹಣ್?

ಲ್ಹಾನ್‌ಪಣಾರ್ ಥಾವ್ನ್ ಹರ್‍ಯೆಕ್ಲೊ ವೆವೆಗ್ಳ್ಯಾಂ ಥಾವ್ನ್ ವೆವೆಗ್ಳ್ಯಾ ರಿತಿರ್ ವೆವೆಗ್ಳ್ಯಾ ಪ್ರಕಾರಾನಿ ಹ್ಯಾ ಧರ್ಮಾಚಿ ಶಿಕವ್ನ್ ಘೆತಾ. ಆನಿ ಹರ್‍ಯೆಕ್ಲೊ ಹೆಂಚ್ ಶಿಕ್ತಾ ’ಅಪ್ಲೊ ಧರ್ಮ್ ಉಂಚ್ಲೊ’. ಹಿಂದ್ವಾಂಕ್ ತಾಂಚೊ ಧರ್ಮ್ ಉಂಚ್ಲೊ ಕಿತ್ಯಾಕ್ ಮ್ಹಳ್ಯಾರ್ ತೊ ’ಸಂಯಮ್ ಆನಿ ಸೊಸ್ಣಿಕಾಯ್’ ಶಿಕಯ್ತಾ ತರ್ ಜೈನಾಂಕ್ ತಾಂಚೊ ಧರ್ಮ್ ಉಂಚೊ ಕಿತ್ಯಾಕ್ ಮ್ಹಳ್ಯಾರ್ ತಾಂಚೊ ಧರ್ಮ್ ತಾಂಕಾಂ ’ಅಹಿಂಸಾ’ ಶಿಕಯ್ತಾ. ಕ್ರಿಸ್ತಾಂವಾಂಕ್ ತಾಂಚೊ ಧರ್ಮ್ ’ಎಕಾಮೆಕಾಚೊ ಮೋಗ್ ಕರಾ, ದುಸ್ಮಾನಾಂಕ್ ಭೊಗ್ಸಿಯಾ’ ಮ್ಹಣ್ ಶಿಕಯ್ತಾ ದೆಖುನ್ ಕ್ರಿಸ್ತಾಂವಾಂಕ್ ತಾಂಚೊ ಧರ್ಮ್ ಉಂಚ್ಲೊ. ತರ್ ಆತಾಂ ಸವಾಲ್ ಉಟ್ತಾ ಹೆಂ ’ಹ್ಯಾ ಸಂಸಾರಾಂತ್ಲೆ ಸರ್ವ್ ಧರ್ಮ್ ಉಂಚ್ಲೆ ಆನಿ ಸರ್ವ್ ಮನ್ಶಾಕ್ ಹೊ ಧರ್ಮ್ ಆಸಾ ತರ್ ಮನಿಸ್ ಕಿತ್ಯಾಕ್ ಇತ್ಲೊ ಖೊಟೊ?’

ಹ್ಯಾ ಸಂಸಾರಾಂತ್ ಧರ್ಮ್ ಶಿಕವ್ಣ್‌ದಾರಾಂ ಜಾಯ್ತಿಂ ಆಸಾತ್, ತರ್‌ಯ್ ರಾಷ್ಟ್ರಾಂ ಎಕಾಮೆಕಾ ಕಿತ್ಯಾಕ್ ರಾಗಾರ್, ಧ್ವೇಶಾರ್ ಆನಿ ಮೊಸ್ರಾನ್ ಝಳ್ತಾತ್? ಎಕಾ ರಾಶ್ಟ್ರಾಭಿತರ್ ಜಾತಿ-ಕಾತಿಚಾ ನಿಬಾನ್ ಕಿತ್ಯಾಕ್ ಝಗಡ್ತಾತ್? ಖಂಚೊ ತೊ ಲಿಪ್ತೊ ಧರ್ಮ್ ಜೊ ಮನ್ಶಾಂಕ್ ಹ್ಯಾಪರಿಂ ಜಿಯೆಂವ್ಕ್ ಮಜ್ಬೂರ್ ಕರ್ತಾ?

ಆಮ್ಚಿ ಧಾರ್ಮಿಕ್ ಪ್ರಗತಿ ಮೆಜ್ಚೆಂ ಮಾಪ್ ಆಮ್ಚಾ ಫಿರ್ಗಜೆಂತ್ ಆಸ್ಚಾ ಭಾಂದ್ಪಾಂಚೆರ್ ಮೆಜ್ತಾಂವ್, ಕಿತ್ಲಿ ವ್ಹಡ್ ಇಗರ್ಜ್, ಕಿತ್ಲೆಂ ವ್ಹಡ್ ದೀವ್ಳ್ ವ ಕಿತ್ಲಿ ವ್ಹಡ್ ಮಸ್ಜಿದ್ ಆನಿ ತ್ಯಾ ಭಾಂದ್ಪಾಂನಿ ವರ್ಸಾಕ್ ಕಿತ್ಲಿಂ ಕಾರ್‍ಯಿಂ ಕರ್ತಾಂವ್, ಕಿತ್ಲೊ ಲೋಕ್ ಯೆತಾ ಆನಿ ಕಿತ್ಲೊ ಹಜಾರ್/ಲಾಖಾಂನಿ ಖರ್ಚಿತಾಂವ್ ಮ್ಹಳ್ಳ್ಯಾಚೆರ್ ಆಸಾ ಶಿವಾಯ್ ಆಮ್ಚಾ ಗಾಂವಾಂತ್ ಅಜೂನ್ ತೆಚ್ಚ್ ಭುಕೆಂತ್, ಗರೀಬ್‌ಪಣಾಂತ್ ಜಿಯೆವ್ನ್ ಆಸ್ಚಾಂಚೆಂ ಗಣ್ಣೆಂ ಕರುಂಕ್ ಖಂಚೊಯ್ ಧರ್ಮ್ ಫುಡೆಂ ಯೇನಾ. ಹಾಂಕಾಂ ವರ್ಸಾಕ್ ಏಕ್ ಪಾವ್ಟಿಂ ಲೊಕಾಂ ಮುಖಾರ್ ಆಪವ್ನ್ ಕಾಂಯ್ ಥೊಡ್ಯಾ ರುಪ್ಯಾಂಚಿ ಭಿಕ್ ದಿಂವ್ಚಿ ತರ್‌ಯ್ ಹಾಂಗಾ ಪತ್ರ್‌ಕರ್ತಾಂಚಿ ಲಾಯ್ನ್ ಉಭಿ ಆಸೊಂಕ್ ಜಾಯ್, ಪತ್ರಾಂನಿ ಖಬ್ರೊ ಛಾಪೊಂಕ್ ಜಾಯ್. ಸೊವಿನಿಯರಾನಿ ಆಮ್ಚ್ಯೊ ರಂಗಾಳ್ ತಸ್ವೀರ್‍ಯೊ ಛಾಪೊನ್ ಯೇಂವ್ಕ್ ಜಾಯ್.

ಹಾಚೆಮಧೆಂ ಥೊಡೆ ಧರ್ಮಾಂದ್ಳೆ - ಧರ್ಮಾಚಾ ನಾಂವಾನ್ ಧ್ವೇಷ್ ವಿಸ್ತಾರ್ಚೆ. ಆನಿ ಥೊಡೆ ಚಿಂತಾತ್ ಕಾಂಯ್ ಹೆರಾಂಕ್ ಆಪ್ಲ್ಯಾ ಧರ್ಮಾಕ್ ಹಾಡ್ಲೆಂ ತರ್ ಆಮಿಂ ಸಾಲ್ವಾರ್ ಜಾತಾಂವ್ ಮ್ಹಣೊನ್, ಕೊಣಾ ಗರಿಬಾಂಕ್ ಫುಸ್ಲಾವ್ನ್, ಬನಾವ್ನ್ ಮಾಂಕೊಡ್ ಕರ್ನ್ ಆಮ್ಚಾ ಧರ್ಮಾಕ್ ಹಾಡ್ನ್ ತಾಂಚಾ ಬೇಬಸ್‌ಪಣಾಚೆರ್ ಖೆಳ್ಖುಳಾಂ ಕರ್ತಾಂವ್. ಪುಣ್ ಹ್ಯಾ ಪ್ರಕ್ರಿಯೆಚಿ ಖರಿ ವಾಟ್ ಆಮಿಂ ಕೆದ್ನಾಂಗೀ ವಿಸ್ರಲ್ಯಾಂವ್ ಮ್ಹಣ್ ದಿಸ್ತಾ - ಖರಿ ವಾಟ್ ಹಿ ಜಾವ್ನಾಸಾ ಪಯ್ಲೆಂ ಆಮಿಂ ಆಮ್ಚೊ ಧರ್ಮ್ ಪರಿಪೂರ್ಣ್ ರಿತಿನ್ ಜಿಯೆಲ್ಯಾಂವ್ಕ್ ತರ್ ತಾಚೆರ್ ಪ್ರೇರಣ್ ಘೆವ್ನ್ ಜರ್ ಕೊಣ್‌ಯ್ ಆಮ್ಚೊ ಧರ್ಮ್ ಘೆತಿತ್ ತರ್ ತಾಚ್ಯಾಕೀ ವರ್ತೆಂ ಖಂಯ್ಚೆಂ ಆಸಾ? ಹೆಂ ಹ್ಯಾ ಧರ್ಮಾಂದ್ಳ್ಯಾಂಕ್ ಕಶೆಂ ಸಮ್ಜಂವ್ಚೆಂ?

ಹ್ಯಾ ಸರ್ವ್ ಸವಾಲಾಂಕ್ ಮೆಳ್ಚಿ ಜಾಪ್ ಭೋವ್ ಸಂಪಿ - ಧರ್ಮ್ ಮನ್ಶಾಚಾ ಜಿಣ್ಯೆಂತ್ ಏಕ್ ನೀಬ್ ಮಾತ್ರ್ ಶಿವಾಯ್ ಆಯ್ದ್ ನ್ಹಂಯ್. ಮನಿಸ್ ಅಪ್ಲೊ ಧರ್ಮ್ ಕಸ್ಲೊಯ್ ಮ್ಹಣೊಂ ಪುಣ್ ತ್ಯಾ ಧರ್ಮಾಪ್ರಕಾರ್ ತೊ ಜಿಯೆಚ್ಚ್ ನಾ ವಾ ಜಿಯೆಂವ್ಕ್ ಪ್ರೇತನ್‌ಯ್ ಕರಿನಾ. ಪ್ರೇತನ್ ಕೆಲ್ಲೆಂ ತರ್ ಹ್ಯಾ ಸಂಸಾರಾಂತ್ ರಾಷ್ಟ್ರಾಂನಿ ಫವ್ಜ್ ಭಾಂದ್ಚಿ ಗರ್ಜ್ ಉದೆತಿನಾ. ಆಯ್ಚಾ ಕಾಳಾರ್ ದೇಶ್ ಕೊರೆಡಾಂನಿ ದುಡು ಹ್ಯಾ ಫವ್ಜ್ ಭಾಂದ್ಚಾಕ್ ಆನಿ ಮಾರೆಕಾರ್ ಆಯ್ದಾಂಕ್ ಗಳ್ಸಿತಾ ತರ್‌ಯ್ ಕೊರೊಡಾಂನಿ ಲೋಕ್ ಅಜೂನ್ ಭುಕೊ ಆನಿ ನಾಗ್ಡೊ. ದಿಸಾಚೆಂ ಏಕ್ ಜೆವಾಣ್ ಗತ್ ನಾತ್‌ಲ್ಲೆ ಕಿತ್ಲೆಗೀ ಹ್ಯಾ ಸಂಸಾರಾಂತ್ ಅಜೂನ್ ಜಿಯೆತಾತ್, ಪೊಟಾಕ್ ಆಸ್ಚಾಂಚಾ ಸ್ವಾರ್ಥಾಕ್ ಲಾಗೊನ್ ಗಾಂವಾರ್ ಗಾಂವ್ ರಾಗಾನ್, ಧ್ವೇಷಾನ್ ಲಾಸ್ತೊನಾ. ಹೊ ಧರ್ಮ್ ಫಕತ್ತ್ ಜಿಯೆಂವ್ಚ್ಯೊ ವಾಟೊ ಮಾತ್ರ್ ಸೊಧುನ್ ದಿತಾ ಶಿವಾಯ್ ಜಿಯೆಂವ್ಕ್ ಖಾಣ್ ದೀನಾ. ಜಿಯೆಂವ್ಕ್ ಗರ್ಜೆಚೆಂ ಖಾಣ್ ಮನ್ಶಾನ್ ಅಪ್ಲಿಂ ಧಾ ಬೊಟಾಂ ಝರವ್ನ್ ಗಳ್ಸುಂಕ್ ಜಾಯ್. ತಿಂ ಝರಂವ್ಚೆಂ ಮಾಧ್ಯಮ್ ಮಾತ್ರ್ ತೊ ಅಪ್ಲ್ಯಾ ಚಿಂತ್ಪಾತೆಕಿದ್ ಸೊಧುಂದಿ - ಕೊಣ್ ವೊತಾಂತ್ ಘಾಮ್ ಕಾಡ್ನ್ ಘೊಳೊಂದಿ ಆನಿ ಕೊಣ್ ಕೊಣಾಚೆಂ ಲುಟುನ್ ಖಾಂವ್ದಿ ಪುಣ್ ಏಕ್ ಮಾತ್ರ್ ಸತ್ - ಧರ್ಮ್ ನಾಸ್ತಾಂ ಮನಿಸ್ ಜಿಯೆಂವ್ಕ್ ಸಕ್ತಾ ಪುಣ್ ಖಾಣ್ ನಾಸ್ತಾಂ ನ್ಹಂಯ್.

ಇಂಗ್ಲಿಶಾಂತ್ ಏಕ್ ಸಾಂಗಾಪ್ ಆಸಾ ’We rate ourselves by what we are capable of doing, whereas others rate us for what we have done to them’ (ಆಮಿಂ ಆಮ್ಕಾಂ ಆಮ್ಚಾ ಶ್ಯಾಥಿಯೆಚೆರ್ ಮೆಜ್ತಾಂವ್ ತರ್ ಹೆರಾಂ ಆಮ್ಕಾಂ ಮೆಜ್ತಾತ್ ಆಮಿಂ ತಾಂಕಾಂ ಎದೊಳ್ ಕಿತೆಂ ಕೆಲಾಂ ತಾಚೆರ್). ಮ್ಹಳ್ಯಾರ್ ಮನ್ಶಾಚೊ ಧರ್ಮ್ ಆನಿ ಮನ್ಶಾಚಿ ಜಿಣಿ ಮಧೆಂ ಭೋವ್ ವ್ಹಡ್ ಖಂದಕ್ ಆಸಾ. ಆಮ್ಚೊ ಧರ್ಮ್, ಆಮ್ಚಿ ಜಿಣಿ, ಆಮ್ಚೆಂ ಚಿಂತಾಪ್, ಆಮ್ಚ್ಯೊ ಕರ್ನ್ಯೊ ಕೆದಿಂಚ್ ಎಕಾಮೆಕಾ ತಾಳ್ ಪಡಾನಾಂತ್. ದೆಖುನ್ ಖಂಚೊ ಧರ್ಮ್ ಉಂಚ್ಲೊ ಆನಿ ಖಂಚೊ ಉಂಚ್ಲೊ ನ್ಹಂಯ್ ಮ್ಹಳ್ಳೆಂ ತರ್ಕ್ ಪಿಶೆಂ ತರ್ಕ್‌ಚ್ ಮ್ಹಣ್ಯೆತಾ.

ಹ್ಯಾ ಪರಿಗತೆಂತ್ ಹ್ಯಾ ಸರ್ವ್ ಸವಾಲಾಂಕ್ ಜಾಪ್ ಆಪಾಪಿಂಚ್ ಲಾಭ್ತಾ - ಸರ್ವಾಂಚಾಕೀ ವರ್ತೆಂ ಧರ್ಮ್ ಜಾವ್ನಾಸಾ ’ಮನ್ಶಾಧರ್ಮ್’. ಪುಣ್ ಆತಾಂ ಉಟ್ತಾ ಅನ್ಯೇಕ್ ಸವಾಲ್ ’ಮನಿಸ್ ಜಾವ್ನ್ ಜಿಯೆಂವ್ಕ್ ಕೊಣಾಕ್ ಜಾಯ್?’

ದೇವ್ ಬರೆಂ ಕರುಂ,
- ವಲ್ಲಿ ಕ್ವಾಡ್ರಸ್, ಅಜೆಕಾರ್

ಆಧ್ಲಿಂ ಸಂಪಾದಕೀಯಾಂ

ಸಂಪಾದಕೀಯ್ ಮಂಡಳಿಕ್

ಪಾಟಿಂ ದಾಯ್ಜ್ ಪಾನಾಕ್

मुक्त उलवप वा सवायेचें (चीप) उलवप?

बिजी आसाय‌गी?

ಕಸ್ಟ್