[ಜಾವ್ನ್ ವಾವ್ರ್ ಕರ್ನ್ ಆಸ್ಚೆನಿಮ್ತಿಂ ಸಾಹಿತ್ಯಾಕ್]

ಕೊಂಕ್ಣೆಚಾ ವಿಂಚ್ಣಾರ್ ಸಾಹಿತ್ಯಾಚೊ ಕೊನ್ಸೊ - ’ದಾಯ್ಜ್’ - ಫಕತ್ತ್ ಕೊಂಕಣಿ ಥಾವ್ನ್, ಕೊಂಕಣಿ ಪರ್‍ಯಾಂತ್, ಕೊಂಕಣಿ ಖಾತಿರ್.

ಕವಿತಾಪಾಠ್ ಮ್ಹಳ್ಯಾರ್ ಕಿತೆಂ ಮ್ಹಳ್ಳ್ಯಾಚಾ ಸವಿಸ್ತಾರ್ ವಿವರಾಂಕ್ ಹ್ಯಾ ಪಾನಾಕ್ ಭೆಟ್ ದಿಯಾ

ಸ್ಟೀಫನ್ ಕ್ವಾಡ್ರಸ್:

ಕೊಂಕ್ಣಿ ಸಾಹಿತ್ಯಾಂತ್ ಸ್ಟೀಫನ್ ಕ್ವಾಡ್ರಸ್ ಆಯ್ಲೆವಾರ್‌ಚೊ. ಶಿಕ್ಶಕ್ ಜಾವ್ನ್ ವಾವ್ರ್ ಕರ್ನ್ ಆಸ್ಚೆನಿಮ್ತಿಂ ಸಾಹಿತ್ಯಾಕ್ ಭೋವ್ ಲಾಗ್ಸಿಲೊ ದೆಕುನ್ ಗುಂಡಾಯೆಚಿ ನದರ್ ತಶೆಂಚ್ ಪರಿಪಕ್ವ್ ಚಿಂತ್ಪಾಚೊ. ಕೊಂಕ್ಣಿ ವಿಮರ್ಶ್ಯಾಂಚೊ ಬೂಕ್, ಕೊಂಕ್ಣಿ ಶಬ್ಧಾಂಕೋಶ್ ಅಶೆಂ ಸಭಾರ್ ಕೊಂಕ್ಣಿ ಬೂಕ್ ಹಾಣೆಂ ಬರಯ್ಲ್ಯಾತ್.

[ಹೆಂ ಕಾಳೊಕ್ ನಾತ್‌ಲ್ಲೊ ಗಾಂವ್ ಬುಕಾಚೆಂ ಏಕ್ ಪ್ರಸ್ತಾವನ್ ಜಾವ್ನಾಸಾ]

ಸ್ಟೀಫನ್ ಕ್ವಾಡ್ರಸ್

ವಿಮರ್ಸೊ ಕರ್ಚಿ ಹುಮೆದ್ ವಿಶೇಸ್ ದಿಸ್ತಾ

ಮ್ಹಜ್ಯಾ ಮೊಗಾಚ್ಯಾ ವಲ್ಲಿ ಕ್ವಾಡ್ರಸಾನ್ ’ಕಾಳೊಕ್ ನಾತ್‌ಲ್ಲೊ ಗಾಂವ್’ (ಕವಿತಾಪಾಠ್ - 3) ಬುಕಾಚಿಂ ಅಧ್ಯಯನ್ ಲೇಖನಾಂ ದೊದೋನ್ ಪಾವ್ಟಿಂ ಅಂತರ್‌ಜಾಳಿದ್ವಾರಿಂ ಧಾಡ್ನ್ ದೀವ್ನ್ ಪ್ರಸ್ತಾವನ್ ವಿಚಾರ್ಲಾಂ. ವಿಶೇಸ್ ಹುಮೆದಿನ್ ತಾಣಿಂ ಚಲಯಿಲ್ಲ್ಯಾ ಅಧ್ಯಯನಾಂಚೆರ್ ದೀಷ್ಟ್ ಚರಯ್ತಾಂ ಚರಯ್ತಾಂ ವಿವಿಂಗಡ್ ಚಿಂತ್ಪಾಂ ಮತಿಕ್ ಯೆತಾತ್. ಪಯ್ಲ್ಯಾನ್ ಪಯ್ಲೆಂ ಕಾವ್ಯಾಚೆರ್ ಮಿಮಾಂಸಾ ಚಲಂವ್ಚಿ. ಗದ್ಯ್ ಸಾಹಿತ್ಯಾಚೆರ್ ವಿಮರ್ಸೊ ಚಲಂವ್ಚೊ. ’ಕವಿತಾಪಾಠ್’ ಕವಿತೆಂಚೆರ್ ಅಧ್ಯಯನ್ ಚಲಂವ್ಚೆಂ ವಿಂಗಡ್‌ಚ್ ಜಿನ್ಸಾಚೆಂ ಪ್ರೇತನ್. ಅಸಲ್ಯಾ ಪ್ರೇತನಾಚೊ ರುಲಿ, ರೆಗ್ರೊ, ನೆಮಾಂ ಕಿತೆಂ? ವಾಡಾವಳ್ ಕಶಿ ಹೆಂ ಚಡ್ ಹಾಂವ್ ನೆಣಾಂ.

ಮ್ಹಜೊ ’ಸಾಹಿತ್ಯ್ ಆನಿ ವಿಮರ್ಸೊ’ ಬೂಕ್ ಪರ್ಗಟ್ಲ್ಯಾ ಉಪ್ರಾಂತ್ ಕೊಂಕ್ಣೆಂತ್ ವಿಮರ್ಶ್ಯಾ ಸಾಹಿತ್ಯಾಚಿ ವಾಡಾವಳ್ ಚಡ್ಲ್ಯಾ ಅಶೆಂ ಸಬಾರಾಂನಿ ಸಾಂಗ್ಚೆಂ ಆಯ್ಕಲಾಂ. ಕಾವ್ಯ ಮಿಮಾಂಸೊ ಕೊಂಕ್ಣೆಂತ್ ಸಭಾರ್ ಬರಯಿತ್ತ್ ಆಸಾತ್. ಹ್ಯಾ ದಿಶೆಂತ್ ಸಾಂಗೊಂಕ್ ಸಬಾರ್ ಆಸಾ. ನಿರ್ದಿಷ್ಟ್ ಕವಿಚೆಂ ಕಾವ್ಯೆಂ ಮಿಮಾಂಸ್ಯಾಕ್ ವಳಗ್ ಕರ್ತೆಲ್ಯಾಕ್ ತ್ಯಾ ಎಕಾ ಕಾವ್ಯಾಚಿ ವಳಕ್ ಆಸ್ಲ್ಯಾರ್ ಆನಿ ಥೊಡೆ ಪರ್ತ್ಯಾನ್ ಪರ್ತ್ಯಾನ್ ವಾಪಾರ್‍ಯೆತ್ ಜಾಲ್ಲೆ ಸಬ್ದ್ ವಾಪಾರುಂಕ್ ಜಾಲ್ಯಾರ್ ತೊ ಮಿಮಾಂಸೊ ಕಿತ್ಲೊ ಅರ್ಥಾಭರಿತ್. ತ್ಯಾ ಕವಿಚಿ, ತ್ಯಾ ಕವಿತಾ ಸರ್ವ್ ಕಾವ್ಯಾಂಚಿ, ತ್ಯಾ ಭಾಸೆಂತ್ಲ್ಯಾ ಕಾವ್ಯಾ ವಾಡಾವಳೆಂಚಿ ತ್ಯಾ ಸಂಸ್ಕೃತೆಚ್ಯಾ ಮುಖಾಂಚಿ ವಳಕ್-ಝಳಕ್ ಆಸ್ಲ್ಯಾರ್ ಬರೆಂಗೀ ಹೆಂ ಸವಾಲ್ ಮ್ಹಾಕಾ ಧೊಸುನ್ ಆಸಾ.

ಮಿಮಾಂಸಕ್ ಜಾಂವ್ ವಿಮರ್ಶಕ್ ಜಾಂವ್ ಸಹೃದಯಿಚೊ ಮೊಗಾಳ್-ಮಯ್ಪಾಸಿ ಸಾಂಗಾತಿ (Companion). ತೊ ಇಷ್ಟ್ ನ್ಹಂಯ್, ಸಯ್ರೊ ನ್ಹಂಯ್, ಶೆರ್ಮಾಂವ್ ದಿಂವ್ಚೊ ವಿಗಾರ್ ನ್ಹಂಯ್, ಫರ್ಮಾಣ್ ದಿಂವ್ಚೊ ಮುನ್ಸುಬ್ದಾರ್ ನ್ಹಂಯ್; ತೊ ಫಕತ್ತ್ ಏಕ್ ಸಾಂಗಾತಿ. ಮಿಮಾಣ್ಸಕ್ ಫಲಾಣ್ಯಾ ಕಾವ್ಯಾಂತ್ ಹೆಂ ಸಮಾ ಆಸಾ, ತೆಂ ಸಮಾನಾ ಮ್ಹಣೊನ್ ತೀರ್ಪ್ ದೀನಾ, ಹೆಂ ಪಳೆ, ತೆಂ ತೀಳ್ ಮ್ಹಣೊನ್ ದಬಾವ್ ಘಾಲಿನಾ. ಮಿಮಾಂಸಕ್ ಗರ್ಜೆಪ್ರಾಸ್ ಚಡ್ ಸಬ್ದ್ ವಾಪಾರಿನಾ. ಕವಿನ್ ಕಿತೆಂ ಅಪ್ಲ್ಯಾ ಅನ್ಬವಾ ಮೊಡ್ಕೊಂತ್ ಶಿಜವ್ನ್, ಆಟವ್ನ್ ನಿವಾಳ್ಳಾಂ, ತಾಂತುಂ ಅಪ್ಲೆಚ್ ಅರ್ಥ್ ಸೊಧಿನಾ. ಸಹಜ್‌ಪಣಿಂ ಉಜ್ವಾಡಾಕ್ ಯೆತಾತ್ ತೆ ಆನಿ ಆಪ್ಲ್ಯಾ ಕಾಳ್ಜಾಕ್ ಲಾಗ್ತಾತ್ ತೆ ಅರ್ಥ್ ಮುಖಾರ್ ಮಾಂಡ್ತಾ. ಎಕಾ ಉತ್ರಾನ್ ಸಾಂಗ್ಚೆಂ ಜಾಲ್ಲೆಂ ಸಾಂಗೊಂಕ್ ಇಕ್ರಾ ಉತ್ರಾಂ ವಾಪಾರ್ನಾ.

ಕಾಳ್ಜಾಚಿ ಭಾಸ್ ಕಾವ್ಯಾಳ್ ಹ್ಯಾ ಭಾಸೆಂತ್ಲ್ಯಾ ಸಬ್ದಾಂಕ್ ಫಕತ್ತ್ ವಾಚ್ಯಾರ್ಥ್ ಲಾಗಾನಾಂತ್ ತಿಚೆ ಥಂಯ್ ಲಕ್ಷಿತಾರ್ಥ್, ರೂಡಾರ್ಥ್, ಭಾವಾರ್ಥ್ ಕಿತೆಂ ಮ್ಹಳ್ಳೆಂ ಸಮ್ಜೊನ್ ಘೆವ್ನ್ ಮಾಗಿರ್ ಕಾವ್ಯೆಂ ಮಿಸ್ಳಾಂವ್ಕ್ ಜಾಯ್.

"ಬಚ್ಚಲು ಮನೆ ಗಂಗಾಳದಲ್ಲಿ

ಅಪ್ಪ ಮರೆತ

ಹೊಸಹಲ್ಲು

ಸ್ವತಂತ್ರವಾಗಿ ನಕ್ಕಿತು

ನಾನು ನೋಡಿದೆ."

ಮ್ಹಣ್ತಾನಾ ಕವಿ ಭೋವ್ಶಾ ನಾಣಿ, ದಾಂತ್, ಬಾಪಯ್ ಆನಿ ಹಾಸ್ಚೆವಿಶಿಂ ಕಿತೆಂಚ್ ಉಲಯ್ನಾಂ. ತಾಕಾ ಸಾಂಗೊಂಖ್ ಆಸ್ಚೆಂ ಆನಿ ಸಾಂಗ್ಚೆಂ ದುಸ್ರೆಂಚ್ ತೆಂ ಕಿತೆಂಗೀ ಮ್ಹಳ್ಳೆಂ ಸಮ್ಜೊಂಚಿ ಸಕತ್ ಅಧ್ಯಯನಿಕ್ ಗರ್ಜೆಚಿ.

ಕಾವ್ಯಾಚೆಂ ಅಧ್ಯಯನ್ ಪಿ.ಎಚ್.ಡಿ. ಕರುಂಕ್ ದೆಂವ್ಚೆಪರಿಂ ನ್ಹಂಯ್ ಮ್ಹಳ್ಳೊ ವಾದ್ ಘೆವ್ನ್, ಚಿಂತ್ಪಾ ವ್ಹಾಳೊ ಘೆವ್ನ್ ಸಿದ್ದಾಂತಾಂಚೊ ಭೊರೊ ವ್ಹಾವವ್ನ್ ಕಾವ್ಯಾಧ್ಯಯಾನಾಕ್ ದೆಂವ್ಲ್ಯಾರ್ ಶೆರ್‍ಮಾಂವ್ ಮಾತ್ರ್ ಮೆಳ್ತಾತ್. ಆಯ್ಚ್ಯಾ ಪರಿಗತೆಂತ್ ಪಕ್ಷ್ ಆನಿ ದಿಶ್ಟಾವೊ ಅನಿವಾರ್‍ಯ್ ಮ್ಹಳ್ಳೆಪರಿಂ ದಿಸ್ತಾ ತರೀ ದಿಷ್ಟಿ ಉಗ್ತ್ಯೊ ದವ್ರುಂಕ್ ವಿಸ್ತೃತ್ ಅಧ್ಯಯನ್ ಸಹಾಯ್ ಕರ್ತಾ.

ಕವಿತಾಪಾಠ್ ಏಕ್ ನವ್ಯಾಚ್ ನಮೂನ್ಯಾಚೆಂ ಪ್ರೇತನ್ ಹರ್‍ಯೆಕಾ ನವ್ಯಾ ನವ್ಯಾ ಪ್ರೇತನಾಂನಿ ತಾಚೆಚ್ ವಾಂದೆ ಆಸ್ತಾತ್. ಪಾಠ್ ಮ್ಹಳ್ಳ್ಯಾ ಸಬ್ಧಾ ವಾಪಾರ್ಣೆಕ್ ಕಶೆಂ ಸ್ವೀಕಾರ್ ಕರ್‍ಚೆಂ. ಕವಿತೆಕ್ ಪಠ್ಯ್‌ವಸ್ತ್ ಜಾವ್ನ್ ಘೆವ್ನ್ ಶಿಕಂವ್ಚಿ ವ್ಯವಸ್ಥಾಚ್ ಬರ್‍ಯಾ ಭಲಾಯ್ಕೆಚಿ ನ್ಹಂಯ್ ಮ್ಹಣೊನ್ ಪಂಡಿತಾಂಚೊ ವಾದ್ ಆಸಾ. ಎಕಾ ಕವಿತಾವಿಶಿಂ ಎಕಾ ದೊಗಾಂಚೆಂ ಅಧ್ಯಯನ್ ಪಾಠ್ ಮ್ಹಣ್ಚೆಂ ಕಶೆಂ? ಪಾಠ್ ಕೊಣಾಚೊ?

ಕಶೆಂಯೀ ಜಾಂವ್ ತುಮ್ಚೆಂ ಹೆಂ ನವೆಸಾಂವ್ ಆಮ್ಚ್ಯಾ ವಾಂಟ್ಯಾಕ್ ಫಾಯ್ದ್ಯಾಚೆಂ. ಕೊಂಕ್ಣಿ ಸಾಹಿತ್ಯಾಚ್ಯಾ ವಾಡಾವಳಿಕ್ ಪೂರಕ್ ಜಾಂವ್ಚೆಂ ಕಿತೇಂಯ್ ತೆಂ ಜಾಂವ್ ಖುಶೇನ್ ಘೆಂವ್ಚೆಂ ಗರ್ಜೆಚೆಂ.

- ಸ್ಟೀವನ್ ಕ್ವಾಡ್ರಸ್, ಪೆರ್ಮುದೆ.

ಕವಿತಾಪಾಠ್

ಕವಿತಾಪಾಠ್ ಕಿತ್ಯಾಕ್ ಗರ್ಜ್?

ಪಾಟಿಂ ದಾಯ್ಜ್ ಪಾನಾಕ್

About us | Feedback | Contact us
Copyright © 2005 DAAIZ.COM All rights reserved. Page concept, designed and maintained by Ashawadi Publications