ಕವಿತಾकविताPoem
ಲೇಖನಾಂ>>
This poem is available in its original Kannada only.
ಕೊಂಕ್ಣೆಚಾ ವಿಂಚ್ಣಾರ್ ಸಾಹಿತ್ಯಾಚೊ ಕೊನ್ಸೊ - ’ದಾಯ್ಜ್’ - ಫಕತ್ತ್ ಕೊಂಕಣಿ ಥಾವ್ನ್, ಕೊಂಕಣಿ ಪರ್ಯಾಂತ್, ಕೊಂಕಣಿ ಖಾತಿರ್.
’ಕಾಣಿಂ ಎಕಾ ವಾಚ್ಪ್ಯಾಕ್ ಸ್ವಪ್ಣಾಂಚಾ ಸಾಗೊರಾಲಾಗಿಂ ಪಾವಂವ್ಕ್ ಸಕ್ತಾ ತರ್ ಕವಿತಾ ತಾಂತುಂ ಉಪ್ಯೆಂವ್ಚೊ ಅನ್ಭೋಗ್ ದಿತಾ’
ಕವಿತಾಪಾಠ್ - 12
ಏಕ್ ಉಲೊ - ಎ.ಟಿ.ಲೋಬೊ
ಕವಿತಾ - ಏಕ್ಉಲೊ
ಕವಿ: ಎ.ಟಿ.ಲೊಬೊ
ಬೂಕ್: ಆಂಕ್ವಾರ್ ಮೆಸ್ತ್ರಿ
ಪ್ರಕಾಶಕ್:ಸಾಂ|ಲುವಿಸ್ ಕೊಂಕ್ಣಿ ಸಂಸ್ಥೊ
ಪಾಠ್ ಚಲವ್ಪಿ: ಮೆಲ್ವಿನ್ ಜೆ. ವಾಸ್
ತಾರಿಕ್: 10 ಫೆಬ್ರೆರ್ 2006
ಜಾಗೊ: ಸಾಲ್ಮಿಯಾ, ಕುವೇಯ್ಟ್
ಕೋಣ್ ಆಧಾರ್, ಕೋಣ್ ಫುಡಾರ್
ಕೊಣಾಚ್ಯಾ ಹಾಂವ್ ವಚೊಂ ದಾರಾರ್
ಕೋಣ್ ಪಾವಾತ್, ಕೋಣ್ ಸಾಂಗಾತ್
ಕೊಣಾಲಾಗಿಂ ಹಾಂವ್ ಮಾಗೊಂ ಉಪ್ಕಾರ್
ತುಟ್ಲಿ ಆಶಾ ಆಯ್ಲಿ ದಿಶಾ
ಘರ್ ಮ್ಹಜೆಂ ದೆಸ್ವಾಟ್ ಜಾಲೆಂ
ಫುಟ್ಲೆಂ ನಶೀಬ್, ಸಾಂಡ್ಲೆಂ ಭಾಗ್
ಕಾಳ್ಜಾಕ್ ಮೊಗಾನ್ ಮಾರ್ಲೆಂ ಭಾಲೆ
ಗತ್ ಲಾಚಾರ್ ಮತ್ ವಿರಾರ್
ಖಂಚ್ಯಾ ವಾಟೆಕ್ ಪಾಂಯ್ ಕಾಡುಂ
ಮನ್ ಝಳ್ಳೆಂ, ಬಳ್ ಸರ್ಲೆಂ
ಖಂಚ್ಯಾ ಸಾವ್ಳೆಕ್ ಹಾಂವ್ ದೀಸ್ ಸಾರುಂ
ಕಾಂಪ್ತಾ ಕೂಡ್, ದಿಸ್ತಾ ಭಿರಾಂತ್
ದೆಕ್ಲೊ ದೆವಾ ತುಜೊ ಸಂಸಾರ್
ಸಂಪ್ಲೆಂ ತ್ರಾಣ್ ವೆತಾ ಪ್ರಾಣ್
ಉಕಲ್ನ್ ಮ್ಹಾಕಾ ವ್ಹರ್ ಸರ್ಗಾರ್
ಅಧ್ಯಯನ್ ಲೇಖನಾಂ>>
ಕವಿಚಿ ವ್ಹಳೊಕ್:
ಸಾಂಗ್ಣ್ಯಾಂಚೊ ರಾಯ್ ಮ್ಹಣ್ ಕೊಂಕ್ಣೆಂತ್ ಫಾಮಾದ್ ಜಾಲ್ಲೊ ಏಟ್ಯೆಲ್ ಯಾ ಎ.ಟಿ.ಲೊಬೊ ಏಕ್ ಭಳ್ವಂತ್ ಕಾದಂಬರಿಕಾರ್, ಕಾಣ್ಯೆಂಗಾರ್, ನಾಟಕಿಸ್ತ್ ತರ್ಯ್ ಹಾಣೆಂ ಅಪುರ್ಭಾಯೆಚ್ಯೊ ಶಾಯರಿ ತಶೆಂಚ್ ಥೊಡಿಂ ಗಝಲಾಂ ಕೊಂಕ್ಣೆಂತ್ ಲಿಖ್ಲ್ಯಾತ್. ಜಾಂವ್ಕ್ ಪುರೊ ’ಖುಂಡೊ’ ಖಾವ್ನ್ ಸವಯ್ ಜಾಲ್ಲ್ಯಾಂಕ್ ’ಉಂಡೊ’ ರುಚಾನಾತ್ಲ್ಲೆಪರಿಂ ಹಿಂ ಕೊಂಕ್ಣಿ ವಾಚ್ಪ್ಯಾಕ್ ಪಾವ್ಲಿಂಚ್ ನಾಂತ್. ಪುಣ್ ಹಾಣೆಂ ತಿಂ ಅಪ್ಲ್ಯಾ ನಾಟಕಾಂನಿ, ಕಾದಂಬರಿಯಾಂನಿ ತಿ ವಾಚ್ಪ್ಯಾಕ್ ದೀಂವ್ಕ್ ಪ್ರೇತನ್ ಕೆಲಾಂ.
(ದಾವ್ಯಾ ಥಾವ್ನ್ ಉಜ್ವ್ಯಾಕ್) (ಬಸ್ಲ್ಲಿಂ): ಜೊಮೆಲ್ ಬೊಂದೆಲ್, ಜಾಜಲ್, ಮೆಲ್ವಿನ್ ಜೆ. ವಾಸ್, ಕೆಲರಾಯ್.
(ಉಭಿಂ ಆಸ್ಚಿಂ): ಪ್ರಿಯಾ ಸಿಕ್ವೇರಾ ಫೆರಾರ್, ಆಂಟನಿ ಮಿನೇಜಸ್, ವೀಣಾ ಮಿನೇಜಸ್, ಸಿರಿಲ್ ಪೆರಿಸ್ ಬೆಂದುರ್ ಆನಿ ವಲ್ಲಿ ಕ್ವಾಡ್ರಸ್ (ತಸ್ವೀರೆರ್ ನಾ )
ದೆವಾಕ್ ಆನಿ ಕವಿತಾಕ್
ಸಂಬಂಧ್ ರಚ್ತಾನಾ [- ಮೆಲ್ವಿನ್ ಜೆ. ವಾಸ್, ಕೆಲರಾಯ್]
"ಏಕ್ ಉಲೊ" ಹ್ಯಾ ಕವಿತೆಕ್ ಮ್ಹಜ್ಯಾ ಅಧ್ಯಯನಾಕ್
ಹಾಂವ್ ಚ್ಯಾರ್ ಭಾಗಾನಿಂ ಪ್ರಸ್ತುತ್ ಕರ್ತಾಂ. ಪಯ್ಲೊ ಭಾಗ್ ಆಶಾ. ಆಶೆಂ ಥಾವ್ನ್ ನಿರಾಶಾ, ನಿರಾಶೆ ಥಾವ್ನ್ ದು:ಖ್. ದುಃಖಾ ಥಾವ್ನ್ ಪೊಳಾಪಳ್ ಯಾ ವಿಂಚವ್ಣ್.
"ಕೊಣ್ ಆಧಾರ್ ಕೊಣ್ ಫುಡಾರ್
ಕೊಣಾಚ್ಯಾ ಹಾಂವ್ ವಚೊಂ ದಾರಾರ್
ಕೊಣ್ ಪಾವಾತ್ ಕೊಣ್ ಸಾಂಗಾತ್
ಕೊಣಾಲಾಗಿಂ ಹಾಂವ್ ಮಾಗೊಂ ಉಪ್ಕಾರ್"
ಮ್ಹಜ್ಯಾ ಅಧ್ಯಾಯನಾಚೊ ಪಯ್ಲೊ ಭಾಗ್ ಆಶಾ. ಆಶಾಚ್
ಮ್ಹನ್ಶಾ ಕುಳಿಯೆಚಾ ಉತ್ಪತ್ತಿಕ್ ಮೂಳ್ ಕಾರಾಣ್. ದೆಕುನ್
ಹರ್ಯೆಕ್ ಜಲ್ಮ್ ವಾ ಉತ್ಪತ್ತಿ ಆಶೆ ಥಾವ್ನ್ ಯೆತಾ. ಆನಿಂ ಹಿಚ್ಚ್ ಆಶಾ
ಮ್ಹನ್ಶಾ ಜಿವಿತಾಕ್ ಮಾತ್ ಆಪ್ಣೆ ಪಯ್ಣ್ ಸಂಪಯ್ತಾನಾ ಆನ್ಯೇಕ್ ಖೆಳ್ ಖೆಳ್ತಾ. ಜಶೆಂ ಹಿಂ
ವಯ್ಲಿಂ ಸವಾಲಾಂ;
ಪುಡಾರಾಕ್ ಆಧಾರ್, ಆಧಾರಾಕ್ ದಾರ್, ದಾರಾರ್ ಸಾಂಗಾತ್ ಖಂಡಿತ್ ಜಾಯ್ ತರ್
ಹೊ ಉಪ್ಕಾರ್ ಮಾಗ್ಚೊ ಕಿತ್ಯಾಕ್? ಆಪ್ಲಿ ಅಸ್ಕತ್ಕಾಯ್ ಸರ್ವಾಂ
ಹುಜಿರ್ ಉಗ್ಡಾಪೆಂ ದಾಕಂವ್ಕ್? ಅಸೊಂ. ಅಧ್ಯಯನಾಚ್ಯಾ
ನಿಮಾಣ್ಯಾ ಭಾಗಾಂತ್ ಭೋವ್ಶಾ ಜವಾಬ್ ಸೊಧುಂಕ್ ಪಡ್ತಲೆಂ. ಜಶೆಂ ಆಯ್ಚೊ ಕವಿತಾನಾಯಕ್ ಆಪ್ಲ್ಯಾ ಆಶೆಕ್
ಸುಫಳ್ ಕರ್ಚ್ಯಾ ಸಾಂಗಾತ್ಯಾಚಿ ಸೊಧ್ನಾಂ ಕರ್ತಾ. "ಆಶಾ ಮ್ಹಳ್ಯಾರ್
ಸೊಧ್ನಾಂ" ಹೆಂ ಉಗ್ಡಾಸ್ ದವರ್ಚೆಂ. ಆತಾಂ ದುಸ್ರೊ ಭಾಗ್ ಪಳೆವ್ಯಾಂ
"ತುಟ್ಲಿ ಆಶಾ ಆಯ್ಲಿ ದಿಶಾ
ಘರ್ ಮ್ಹಜೆಂ ದೆಸ್ವಾಟ್ ಜಾಲೆಂ
ಫುಟ್ಲೆಂ ನಶೀಬ್, ಸಾಂಡ್ಲೆಂ ಭಾಗ್
ಕಾಳ್ಜಾಕ್ ಮೊಗಾನ್ ಮಾರ್ಲೆ ಭಾಲೆ"
ಆಶೆಂಚ್ ದಿಶಾ, ದಿಶಾಂತ್ ದೆಸ್ವಟ್ಕಾಯ್ ದೆಸ್ವಾಟಾಂತ್ ದು:ಖ್.
ಹಾಂವೆಂ ಪಯ್ಲೆಂಚ್ ಸಾಂಗ್ಲ್ಯಾ ಪ್ರಕಾರ್ ಆಶಾ ಮ್ಹಳ್ಯಾರ್
ಸೊಧ್ನಾಂ ಆನಿಂ ಸೊದ್ನೆಂತ್ ಸುಖ್ ಆನಿಂ ದು:ಖ್. ವಾಟೆವಯ್ಲ್ಯಾ ದೋನ್
ಪುಲಾಂಕ್ ತಿಂ ಆಶಾ ಕಶೆಂ ಗಳ್ಸಿತಾ ಮ್ಹಳ್ಳೆಂ ಸವಾಲ್.
ಹ್ಯಾ ದೊನ್ಂಯಿ ಪುಲಾಂಕ್ ಗಳ್ಸುಂಕ್ ಕಳ್ಲ್ಲೊ ಮಾತ್ರ್ ಆಪ್ಲ್ಯಾ
ದಿಶೆಕ್ ದು:ಖಾವಿಣೆಂ ಪಾವ್ತಾ. ಕಾರಾಣ್ ಥಂಯ್ಸರ್ ಸುಖ್ ಆನಿ ದುಖಾಚ್ಯಾ
ಮಿಲನಾಂತ್ ಏಕ್ ನವೊಚ್ ಜೀವ್ ಉತ್ಪತ್ತಿ ಜಾತಾ ಆನಿ ತೊ ಜಾವ್ನಾಸಾ
’ತೃಪ್ತಿ’. ಸುಖಾ ದುಖಾಕ್ ಸಾಂಗಾತ್ ಗಳ್ಸುಂಕ್ ಸರಾನಾತ್ಲ್ಲೊ ತ್ಯಾ
ವಾಟೆ ವಯ್ಲ್ಯಾ ದುಖಾಕ್ ನ್ಹಯ್ ಬಗಾರ್ ಆಪ್ಲ್ಯಾ
ಹೊಗ್ಡಾಯಿಲ್ಲ್ಯಾ ತೃಪ್ತೆನ್ ಸಾಂಡ್ಲೆಲ್ಲ್ಯಾ ದುಃಕ್ ಮಳ್ಳ್ಯಾ
ಸಾವ್ಳೆಕ್ ಘೆವ್ನ್ ಕಾಳೊಕಾಂತ್ ರುದಾನ್ ಕರ್ತಾ. ಜಶೆಂ ಆಯ್ಚೊ ಕವಿತಾನಾಯಕ್.
ಹೊ ಕವಿತೆಚೊ ದುಸ್ರೊ ಭಾಗ್ ಜಾಲೊ ತರ್ ಆತಾಂ ತಿಸ್ರ್ಯಾ, ಚಡ್ ಜವಾಬ್ದಾರಿಚ್ಯಾ
ಮ್ಹಜ್ಯಾ ಅಧ್ಯಯನಾಚ್ಯಾ ಹ್ಯಾ ಭಾಗಾಂತ್ ನದರ್ ಮಾರ್ಲಿ ತರ್.
"ಗತ್ ಲಾಚಾರ್ ಮತ್ ವಿರಾರ್
ಖಂಚ್ಯಾ ವಾಟೆಕ್ ಪಾಂಯ್ ಕಾಡುಂ
ಮನ್ ಝಳ್ಳೆಂ, ಬಳ್ ಸರ್ಲೆಂ
ಖಂಚ್ಯಾ ಸಾವ್ಳೆಕ್ ಹಾಂವ್ ದೀಸ್ ಸಾರುಂ"
ಸಂಪೂರ್ಣ್ ಸಲ್ವಣ್ ಆನಿಂ ಸಲ್ವಣೆಚ್ಯಾ ಪರಿಣಾಮಾಂತ್ ಜಾಲ್ಲಿ ಬದ್ಲಾವಣ್
ಮ್ಹನ್ಶ್ಯಾ ಜಾತ್ಯ್ ಅಸಲಿಕೀ ಮೊಳ್ಬಾವಯ್ಲೆಂ ನೆಕೆತ್ರ್ ಆಶೆತಾನಾ ತೊ
ಹಾಸ್ತಾ ತರ್ ತೆಂಚ್ ನೆಕೆತ್ರ್ ಹಾತಾಕ್ ಮೆಳಾನಾಸ್ತಾನಾ
ವೆತಾನಾ ರಡ್ತಾ ಕಿತ್ಯಾಕ್? ಆಶೆಂತ್ ಕೆಲ್ಲಿ ಸೊಧ್ನಾಂ ಸೊಧ್ನಾನಿಂ ದಾಖಯಿಲ್ಲಿ
ಸಲ್ವಣ್, ಸಲ್ವಣೆಂತ್ ದೂಖ್ ಆನಿಂ ಆತಾಂ ದುಖಾಂತ್ ನಿರಾಸ್...!
ತರ್ ದೂಖ್ಚ್ ನಿರಾಸಾಕ್ ಮುಳ್ ಕಾರಾಣ್?
ಆಶೆಂ ವ್ಹಯ್ ತರ್ ಆಶಾವಾದ್ ಕಶೆಂ ಜಲ್ಮಾತಾ?
ಹೆಂ ಸವಾಲ್ ಹಾಂವ್ ನ್ಹಯ್ ಬಗಾರ್ ಆಯ್ಚೊ ಕವಿತಾನಾಯಕ್ ಉಟಯ್ತಾ ಪಳೆಯಾ
"ಖಂಚ್ಯಾ ಸಾವ್ಳೆಕ್ ಹಾಂವ್ ದೀಸ್ ಕಾಡುಂ?"
"ಸಾವ್ಳಿ" ಭಾರಿಚ್ ಗರ್ಜೆಚಿ ತಶೆಂ ಚಡ್ ಮುಖ್ಯ್ ಪ್ರತಿಮಾ ಯಾ ಇಮಾಜ್ ಆಯ್ಚ್ಯಾ
ಹ್ಯಾ ಆಮ್ಚ್ಯಾ ಕವಿತಾ ಅಧ್ಯಯನಾಂತ್. ಹಾಂವ್ ಚಿಂತಾ ಹಾಚ್ಯಾ
ವರ್ನಿಂ ಚಡ್ ಭಳಾಧಿಕ್ ಇಮಾಜ್ ಲಿಸಾಂವಾಚಾ ನದ್ರೆಂತ್ ಪಳೆಲ್ಲ್ಯಾರ್
ಹ್ಯಾ ಕವಿತೆಂತ್ ದುಸ್ರಿ ಮೆಳ್ಚಿ ನಾಂ.
ತರ್ ಹಿ ಸಾವ್ಳಿ ಕಸಲಿ?
ಕವಿತಾ ನಾಯಾಕ್ ಹಾಂಗಾಸರ್ ಆಪ್ಲ್ಯಾ ಜಲ್ಮಾ ಗುಣಾಕ್ಚ್
ಹೊಂದ್ವೊನ್ ರಾವ್ಲಾ ತರ್ಯೀ ತೊ ಸವಾಲ್ ಉಟಯ್ತಾ ಮ್ಹಳ್ಯಾರ್
ಹಾಂಗಸರ್ ಆತಾಂ ವಿಂಚವ್ಣ್ ಗರ್ಜ್. ಸಾವ್ಳ್ಯೊ ಸಭಾರ್ ಆಸಾತ್,
ಪುಣ್ ಸಾರ್ಕ್ಯಾ ವಿಂಚವ್ಣೆಂತ್ ವಿಶೆವ್ ಘೆಂವ್ಕ್ ಸೊಧ್ತಾ ತೊ. ಆತಾಂ ತಾಚಿ ಹಿಂ
ಸೊಧ್ನಾಂ ಪಳೆಲ್ಯಾರ್
"ಕಾಂಪ್ತಾ ಕೂಡ್, ದಿಸ್ತಾ ಭಿರಾಂತ್
ದೆಕ್ಲೊ ದೆವಾ ತುಜೊ ಸಂಸಾರ್
ಸಂಪ್ಲೆಂ ತ್ರಾಣ್ ವೆತಾ ಪ್ರಾಣ್
ಉಕಲ್ನ್ ಮ್ಹಾಕಾ ವ್ಹರ್ ಸರ್ಗಾರ್"
ಮ್ಹಜ್ಯಾ ಅಧ್ಯಯನಾಚೊ ಚವ್ತೊ ಬಾಗ್ ಹೊ. ಹ್ಯಾ ಭಾಗಾಂತ್ ಆತಾಂಚಿ ಆಯ್ಚ್ಯಾ ಕವಿತಾ
ನಾಯಾಕಾಚ್ಯಾ ನಿರಾಸಾಚ್ಯಾ ವಿಂಚವ್ಣೆಚಿಂ ಸೊಧ್ನಾಂ ಪಳೆಲ್ಲಿಂ ತರ್ ಲಜೆನ್ ಆನಿಂ
ಭಿರಾಂತೆನ್ ಆಪ್ಲೆಂ ತೊಂಡ್ ಲಿಪವ್ನ್ ದಿಸಾನಾತ್ಲ್ಲ್ಯಾ(?) ದೆವಾಚಾ
ಪಾಂಯಾಂಕ್ ಪಡ್ಚೊ ಹೊ ಕವಿತಾ ನಾಯಾಕ್ ತ್ಯಾ ತಾಚಾ
ಮತಿಕ್ ಕಾಲ್ಪನಿಕ್ ರಿತಿನ್ ವೆಡೊ ಮಾರ್ಲ್ಲ್ಯಾ ಸರ್ಗಾಚೆಂ
ಭಿಕ್ ಮಾಗ್ತಾ. ಹಿಚ್ ಹ್ಯಾ ಕವಿತಾ ನಾಯಾಕಾಚಿ ವಿಂಚ್ಲೆಲಿ ಸಾವ್ಳಿ...? ಹಿಚ್
ಹ್ಯಾ ಕವಿತಾ ನಾಯಾಕಾಚಿ ನಿಮಾಣಿ ದಿಶಾ? ಆಸೊಂ. ಆಪ್ಲ್ಯಾ ಆಶೆಚಿಂ
ಸೊಧ್ನಾಂ ಆಪುಣ್ಂಚ್ ಸೊಧ್ಲ್ಲೊ ಕವಿತಾನಾಯಕ್ ಆಪ್ಲ್ಯಾ ವಿಂಚವ್ಣೆಂಚ್ಯಾ
ಸೊಧ್ನೆಂತ್ ಆಪ್ಲೆಂ ಸಗ್ಳೆಂ ಅಸ್ತಿತ್ವ್ ಸಾಂಡ್ಲ್ಲೊ ಭಿಕಾರಿ ಜಾಲಾ.
ಹಾಂಗಾಸರ್ ಸಾರ್ಕೆಂ ಗಿದಾ ನದರ್ ಜೊಕ್ಚೆಂ ಗರ್ಜೆಚೆಂ. ಸಂಸಾರಾಂತ್ಲೆ
ಸಗ್ಳೆ ಆಪ್ಲೆಂ ಆಸ್ತಿತ್ವ್ ಮ್ಹಳ್ಯಾರ್ ಶಾರೀರಿಕ್ ತಶೆಂ ಮಾನಾಸಿಕ್,
ಸಂಸಾರಿ ತಶೆಂ ಉತ್ಪತ್ತಿಚೆಂ ಆಸ್ತಿತ್ವ್ ಸಾಂಡುಂಕ್ ತಯಾರ್ ಜಾತಾನಾಂಯ್ ದೆವಾಚ್ಯಾ ಪಾಂಯಾಮುಳಾಂತ್
ನವ್ಯಾನ್ ತೊ ಸೊಧ್ನಾಂ ಕರ್ತಾ.
ಆಶೆಚಿಂ ಸೊದ್ನಾಂ...!
ಪರ್ತ್ಯಾನ್...?
ತಿಂಚ್ ಪಾರಂಪರಿಕ್...?
ವಾ...?
ಹ್ಯಾ ಸವಾಲಾಂಕ್ ಆಮ್ಚೊ ಹೊ ಅಧ್ಯಾಯಚೊ ನಿಮಾಣೊ ಭಾಗ್ ಪಳೆಲೊ ತರ್, ಆಯ್ಚ್ಯಾ ಕವಿತಾನಾಯಾಕಾಚಾ ನಿರಾಸೆಚ್ಯಾ ವಿಂಚವ್ಣೆಚಿಂ
ಸೊಧ್ನಾಂ ಆನಿಂ ತಾಚಿಂ ಪಯ್ಲೆಂಚಿಂ ತಾಚ್ಯಾಚ್ ಆಶೆಚ್ಯಾ ವಿಂಚವ್ಣೆಚಾ
ಸೊಧ್ನಾಂಕ್ ಉಸ್ತಿತಾನಾ ಮ್ಹಳ್ಯಾರ್ ಹಾಂವ್ ಪಯ್ಲೆಂಚ್
ಸಾಂಗ್ಲ್ಲೆಪರಿಂ ಆಶೆಚ್ಯಾ ಸೊಧ್ನೆಂತ್ ಹಾತಾಕ್ ಮೆಳ್ಚೆಂ
ಸುಖ್ ಆನಿಂ ದುಃಖ್ ಮ್ಹಳ್ಳಿಂ ದೋನ್ ಫುಲಾಂ ಸಾಂಗಾತಾ ವಿಂಚ್ಲ್ಯಾರ್...
ಹಾಂಗಾಸರ್ ಆಯ್ಚ್ಯಾ ಕವಿತಾ ನಾಯಾಕಾನ್ ತಾಚ್ಯಾ ಜಿವಿತಾಚಾ ಆಶೆಚ್ಯಾ
ಸೊಧ್ನಾಂ ಥಾವ್ನ್ ದುಃಖ್ ಪಾವೊನ್ ನಿರಾಸಾಂತ್ ನವಿ ವಿಂಚವ್ಣ್ ಕರ್ತಾನಾ
ಪ್ರಸ್ತುತ್ ವಿಂಚವ್ಣೆಕ್ ಸೊಡ್ನ್ ಕಾಲ್ಪನಿಕ್ ವಿಂಚವ್ಣೆಕ್ಚ್
ನಿಮಾಣೆಂ ಶರಣಾಗತ್ ತೊ ಜಾತಾ ಜಾಲ್ಲ್ಯಾನ್ ಹಾಂವ್ ಹ್ಯಾ
ಶರಣಾಗತ್ ಜಾಲ್ಲ್ಯಾ ವಿಂಚವ್ಣೆಕ್ ತಾಚಿ ಸಾರ್ಕಿ ವಿಂಚವ್ಣ್ (ಹಾಂಗಸರ್ ಕವಿತಾ
ನಾಯಾಕಾಚಿ ಸಾರ್ಕಿ ವಿಂಚವ್ಣ್) ಮ್ಹಣೊನ್ ಚಿಂತುನ್ ಹಾಂಕಾ
ಪಯ್ಲೆಂ ಆನಿಂ ತಾಚ್ಯಾ ಆಶೆಚ್ಯಾ ಸೊದ್ನೆಂತ್ಲಿ ಫುಲಾಂ ಉಪ್ರಾಂತ್ ಧರುನ್
ಸಾಂಗಾತಾ ಗುಂತಾ.
"ಕಾಂಪ್ತಾ ಕೂಡ್ ದಿಸ್ತಾ ಭಿರಾಂತ್
ಕೋಣ್ ಆಧಾರ್ ಕೋಣ್
ಪುಡಾರ್
ದೆಕ್ಲೊ ದೆವಾ ತುಜೊ
ಸಂಸಾರ್
ಕೊಣಾಚ್ಯಾ
ಹಾಂವ್ ವಚೊಂ ದಾರಾರ್
ಸಂಪ್ಲೆಂ ತ್ರಾಣ್
ವೆತಾ ಪ್ರಾಣ್
ಕೋಣ್
ಪಾವಾತ್ ಕೋಣ್ ಸಾಂಗಾತ್
ಉಕಲ್ನ್
ಮ್ಹಕಾ ವ್ಹರ್ ಸರ್ಗಾರ್
ಕೊಣಾಲಾಗಿಂ
ಹಾಂವ್ ಮಾಗೊಂ ಉಪ್ಕಾರ್"
ಆಯ್ಚ್ಯಾ ಕವಿತಾನಾಯಾಕಾಚಿಂ ಸೊಧ್ನಾಂ ಲಜ್ ಆನಿಂ ಭಿರಾಂತ್ ಥಾವ್ನ್ ಆರಂಭ್ ಜಾವ್ನ್ ಏಕಾ
ಸ್ಪಷ್ಟ್ ವಿಂಚವ್ಣೆಕ್ ಬಗ್ಲೆಗ್ ಘೆವ್ನ್ ನಿಮಾಣ್ಯಾ ಸವಾಲಾಂಕ್ ಉಭೆಂ ಕರ್ತಾ.
ಹೆಂ ಸವಾಲ್ ಪಾರಾಂಪರಿಕ್ ಶರಣಾಗತೆಚೆಂ ಸವಾಲ್ ಭಿಲ್ಕುಲ್
ನಂಯ್. ಕಾರಾಣ್ ತ್ರಾಣ್ ಕೊಸ್ಳೊನ್ ಪ್ರಾಣ್ ವೆಚ್ಯಾ ವಗ್ತಾಂ ದೆವಾಲಾಗಿಂ
ಭಿಕ್ ಮಾಗ್ಚೊ ಹೊ ಕವಿತಾನಾಯಾಕ್ ದೆವಾಲಾಗಿಂ ’ಉಕಲ್ನ್
ಮ್ಹಾಕಾ ವ್ಹರ್ ಸರ್ಗಾರ್’ ಮ್ಹಣ್ತಾ.
ಹಾಂಗಾಸರ್ ’ಉಕಲ್ನ್ ಮ್ಹಾಕಾ ಸರ್ಗಾರ್ ವ್ಹರ್’ ಮ್ಹಳ್ಯಾರ್ ತ್ರಾಣ್ ಆನಿಂ
ಪ್ರಾಣ್ ತುಟವ್ನ್ ನ್ಹಯ್, ಬಗಾರ್ ತ್ರಾಣಾ ಆನಿಂ ಪ್ರಾಣಾ ಬರಾಬರ್. ಮ್ಹಳ್ಯಾರ್ ತೊ
ಮರ್ಣಾಕ್ ತಯಾರ್ ನಾ ಆಪ್ಲ್ಯಾ ಬೌತಿಕ್ ದೊಳ್ಯಾನಿಂ ಹ್ಯಾ
ಸರ್ಗಾಕ್ ಪಳೆಲ್ಲ್ಯಾ ಶಿವಾಯ್ ತೊ ಮೊರೊಂಕ್ ತಯಾರ್
ನಾಂ.
ಹಾಂಗಾಸರ್ ಆನ್ಯೇಕ್ ಸ್ಪಶ್ಟ್ ರಿತಿರ್ ಅಧ್ಯಯನ್ ಕೆಲೆಂ ತರ್
ಹಾಂಗಾ ಕವಿತಾ ನಾಯಕ್ ಸಾಂಗ್ತಾ ’ದೆಕ್ಲೊ ದೆವಾ ತುಜೊ
ಸಂಸಾರ್’ ಮ್ಹಣ್ತಾನಾ ತೊ ಸಾಂಗಾನಾ ’ಉಕಲ್ನ್ ವ್ಹರ್ ತುಜ್ಯಾ
ಸರ್ಗಾರ್’ ಯಾ ಆತ್ಮ್ಯಾಕ್ ಮ್ಹಜ್ಯಾ ವ್ಹರ್ ಸರ್ಗಾರ್’ ಮ್ಹಳ್ಯಾರ್
ಹ್ಯಾ ಬೌತಿಕ್ ಜಲ್ಮಾಂತ್ಚ್ಯಾ ಅಸ್ತಿತ್ವಾಂತ್ಚ್ ಆಯ್ಚೊ ಕವಿತಾನಾಯಕ್
ಸರ್ಗಾಕ್ ಪಳೆಂವ್ಕ್ ಆಶೆತಾ ಅನಿಂ ಸವಾಲ್ ಉಟಯ್ತಾ. ಕೊಣಾಲಾಗಿಂ
ಮಾಗೊಂ ಉಪ್ಕಾರ್?
ದೆವಾಮುಕಾರ್ ಹಾತ್ ಜೊಡುನ್ ಸಂಸಾರಾರ್ ಸರ್ಗ್ ಪಳೆಂವ್ಚಿ ಆಶಾ
ಹ್ಯಾ ಕವಿತಾನಾಯಾಕಾಚಿ. ಸಂಸಾರಾಕ್ ಕಿತ್ಲೊ ಸರ್ಗ್ ದಾಖಯ್ತಲೊ ಆನಿಂ ತಾಚಾ
ಮಾಗ್ಣ್ಯಾಂತ್ ತೊ ಕಿತ್ಲೊ ಯಶಸ್ವಿ ಜಾತಾಲೊ ತೆಂ ಭೋವ್ಶಾ
ಹಾಂವೆ ಲಿಖ್ಲ್ಯಾರ್ ಚೂಕ್ ಜಾಂವ್ಕ್ ಆಸಾ. ದೆವಾಮುಕಾರ್
ಹಾತ್ ಜೊಡುನ್ ರಾಂವ್ಚ್ಯಾ ಪ್ರಾಸ್ ಆಪ್ಲ್ಯಾ ಹಾತಾನಿಂಚ್
ಹ್ಯಾ ಸಂಸಾರಾಕ್ ಸರ್ಗ್ ಜಾವ್ನ್ ಪರಿವರ್ತನ್ ಕರ್ಚೊ ವಿಚಾರ್
ಮ್ಹಜ್ಯಾ ಚಿಂತ್ಪಾ ಪ್ರಕಾರ್ ಚಡ್ ಗರ್ಜೆಚೊ.
[ವಯ್ರ್]
’ಏಕ್ ನಿರಾಶಿ
ಉಲೊ’ [- ವಲ್ಲಿ ಕ್ವಾಡ್ರಸ್]
ಸಂಸಾರಾಂತ್ ಸುಖಿ ಕೊಣ್? ಮ್ಹಳ್ಳ್ಯಾ ಸವಾಲಾಕ್ ಫಾಮಾದ್ ಗಾವ್ಪಿ ’ವಿಕ್ಟರ್ ಕೊನ್ಸೆಸೊ’ ಜವಾಬ್ ದಿತಾ ’ಸಂಸಾರಾಂತ್ ಸುಖಿ ಕೊಣ್, ಕಾರ್ಕಳ್ಚೊ ಗುಮ್ಮಟ’. ಕಿತ್ಯಾಕ್ ಮ್ಹಳ್ಯಾರ್ ತೊ ಕಿತೆಂಚ್ ಉಲಯ್ನಾ, ಯಾ ತಾಣೆಂ ಉಲಯ್ಲ್ಯಾರ್ಯೀ ಕೊಣಾಕ್ಯ್ ಕಳಾನಾ.
ಪಾರಂಪರಿಕ್ ಚಿಂತ್ಪಾಚೆರ್ ಆಧಾರ್ ಘೆತ್ಲೊ ತರ್ ಮನಿಸ್ ಅಪ್ಲ್ಯಾ ಜಿಣ್ಯೆಂತ್ ಕಶ್ಟ್-ಸಂಕಶ್ಟ್ ಭೊಗ್ಚಾವೆಳಾರ್ ತೆ ಪರಿಹಾರ್ ಕರ್ಚೊ ಸರ್ವ್ ವಾಟೊ ಧಾಂಪ್ಲ್ಯೊ ಮ್ಹಣ್ತಚ್ ಎಕ್ಚ್ ಆಪ್ಲ್ಯಾ ಬಾಯ್ಲೆಕ್ ದುಸ್ರತಾ, ಯಾ ಸೊರ್ಯಾಚೊ ಗುಲಾಮ್ ಜಾತಾ ವ ಕವಿನ್ ಹ್ಯಾ ಕವಿತೆಂತ್ ಕೆಲ್ಲೆಪರಿಂ ದೆವಾಕ್ ದುರ್ಸತಾ, ಖಂಯ್ಚೇಯ್ ಕಾರಾಣ್ ನಾತ್ಲ್ಯಾರ್ ’ಅಪ್ಣಾಕ್ ರಚ್ಲ್ಲೆಂ ಕಿತ್ಯಾಕ್?’ ಮ್ಹಳ್ಳೆಂ ಸವಾಲ್ ಕರ್ತಾ.
ಸಾಂಗ್ಣ್ಯಾಂಚೊ ರಾಯ್ ಎಟ್ಯೆಲಾನ್ ಬರಯಿಲ್ಲ್ಯೊ ಕವಿತಾ ಥೊಡ್ಯೊಚ್, ಹೆಂ ಕವಿತಾ ಎಕಾ ಪದಾರುಪಾರ್ ಆಸಾ ತರ್ಯ್ ಹಾಚಾ ಚಡ್ತಾವ್ ಬರ್ಪಾಂನಿ ಮ್ಹಾಕಾ ಪಾರ್ಕುಂಕ್ ಮೆಳ್ಲ್ಲಿ ಸಂಗತ್ ಜಾವ್ನಾಸಾ ’ಲಿಸಾಂವ್’. ಕೊಂಕ್ಣೆಚಾ ಪಾರಂಪರಿಕ್ ವಾಚ್ಪ್ಯಾಂಕ್ ಖರೆಂಚ್ ಹೆಂ ಆಂವಡ್ತಾಲೆಂ. ಪುಣ್ ಆತಾಂಚಿ ಪರಿಗತ್ ಬದಲ್ಲ್ಯಾ, ಪಾರಂಪರಿಕ್ ಚಿಂತಾಪ್ ಕೊಣಾಕ್ಚ್ ವರ್ಗಾನಾ, ಬದ್ಲಾವಣ್ ಗರ್ಜೆಚಿ ಜಾಲ್ಯಾ, ಹ್ಯಾ ಕವಿತಾಚೆರ್ ಆತಾಂ ಮಾತ್ಶೆಂ ಗುಂಡಾಯೆನ್ ಪಾರ್ಕಿಯಾಂ;
"ಕೊಣ್ ಆಧಾರ್ ಕೊಣ್ ಫುಡಾರ್
ಕೊಣಾಚ್ಯಾ ಹಾಂವ್ ವಚೊಂ ದಾರಾರ್
ಕೊಣ್ ಪಾವಾತ್ ಕೊಣ್ ಸಾಂಗಾತ್
ಕೊಣಾಲಾಗಿಂ ಹಾಂವ್ ಮಾಗೊಂ ಉಪ್ಕಾರ್"
ಕವಿ ಹಾಂಗಾ ಅಪ್ಲ್ಯಾ ಜಿಣ್ಯೆಚಾ ಕಠೀಣ್ ಸಂದಿಗ್ದ್ ಪರಿಗತೆಂತ್ ಶಿರ್ಕಾಲಾ, ತಾಕಾ ಆಧಾರ್ (ವರ್ತ್ಮಾನ್ ಕಾಳ್) ಆನಿ ಫುಡಾರ್ (ಭವಿಶ್ಯತ್ ಕಾಳ್) ದೊನಾಂತ್ಯ್ ದಿಸೊನ್ ಯೆತಾ ಫಕತ್ ಶೂನ್ಯ್. ಪುಣ್ ಸೊಧುನ್ ಆಸಾ ಅಪುಣ್ ಕೊಣಾಚಾ ದಾರಾರ್ ಗೆಲ್ಯಾರ್ ಅಪ್ಣಾನ್ ಸೊಧುನ್ ಆಸ್ಚೆಂ ಆಪ್ಣಾಕ್ ಲಾಭಾತ್ ಮ್ಹಣ್ ಅಪ್ಲೇಸ್ತಕಿಂ ನಿಯಾಳ್ತಾ.
ಅಪ್ಲ್ಯಾ ಗರ್ಜೆಕ್ ಕೊಣ್ ಪಾವಾತ್ ಯಾ ಅಪ್ಲ್ಯಾ ಸಂಕಶ್ಟಾಂಚಾ ಪರಿಹಾರಾಕ್ ಕೊಣ್ ವಾಟ್ ಸೊಧುನ್ ದೀತ್, ಅಪುಣ್ ಕೊಣಾಲಾಗಿಂ ಮಾಗೊಂ ಉಪ್ಕಾರ್ ಮ್ಹಣೊನ್ ರುದಾನ್ ಕರ್ತಾ.
"ತುಟ್ಲಿ ಆಶಾ ಆಯ್ಲಿ ದಿಶಾ
ಘರ್ ಮ್ಹಜೆಂ ದೆಸ್ವಾಟ್ ಜಾಲೆಂ
ಫುಟ್ಲೆಂ ನಶೀಬ್, ಸಾಂಡ್ಲೆಂ ಭಾಗ್
ಕಾಳ್ಜಾಕ್ ಮೊಗಾನ್ ಮಾರ್ಲೆ ಭಾಲೆ"
ವಯ್ಲ್ಯಾ ಪಂಗ್ತೆಚೆರ್ ತೆವ್ಶಿನ್ ಹೆವ್ಶಿನ್ ಸೊಧ್ನಾಂ ಕರ್ನ್ ಆಸ್ಲ್ಲೊ ಕವಿ ಆತಾಂ ಹಾಂಗಾಸರ್ ಅಪ್ಲಿ ಪರಿಗತ್ ಪಿಂತ್ರಾಯ್ತಾ. ತುಟ್ಲಿ ಆಶಾ, ಆಯ್ಲಿ ದಿಶಾ, ಘರ್ ಮ್ಹಜೆಂ ಧೆಸ್ವಾಟ್ಲೆಂ, ನಶಿಬ್ ಫುಟ್ಲೆಂ, ಭಾಗ್ ಸಾಂಡುನ್ ಗೆಲೆಂ - ಕಾಳ್ಜಾಕ್ ಮಾರ್ಲೆ ಭಾಲೆ ತೇಯ್ ಮೊಗಾನ್. ಮ್ಹಳ್ಯಾರ್ ಕವಿಚಾ ಜಿಣ್ಯೆಂತ್ ಉರ್ಲಾ ಫಕತ್ತ್ ಕಾಳೊಕ್ ಆನಿ ಅಂಧ್ಕಾರ್. ಕವಿ ಅಪ್ಲ್ಯಾ ಪರಿಗತೆಚೆಂ ಕಾರಾಣ್ ಯಾ ಮೂಳ್ ಸೊಧುಂಕ್ ವಚಾನಾ ಯಾ ವೆಚೆಂ ಪ್ರೇತನ್ಯ್ ಹಾಂಗಾಸರ್ ಕರಿನಾ. ಫುಡ್ಲಿ ಪಂಗತ್ ಪಳೆವ್ಯಾಂ;
"ಗತ್ ಲಾಚಾರ್ ಮತ್ ವಿರಾರ್
ಖಂಚ್ಯಾ ವಾಟೆಕ್ ಪಾಂಯ್ ಕಾಡುಂ
ಮನ್ ಝಳ್ಳೆಂ, ಬಳ್ ಸರ್ಲೆಂ
ಖಂಚ್ಯಾ ಸಾವ್ಳೆಕ್ ಹಾಂವ್ ದೀಸ್ ಸಾರುಂ"
ಮ್ಹಳ್ಯಾರ್ ಹಾಂಗಾಸರ್ ಕವಿ ಅಪ್ಲೆ ಅಕ್ಲಾಸ್ ಭೊಗುನ್ ಅಪುಣ್ ಬಿಲ್ಕುಲ್ ಕಂಗಾಲ್ ಜಾಲಾಂ, ಅಪ್ಲೊ ಶೆವೊಟ್ಯ್ ಅಪ್ಣಾಕ್ ದಿಸಾನಾ ಮ್ಹಣ್ ಖಂತ್ ಕಾಡ್ತಾ, ಗತ್ ಲಾಚಾರ್ ಮತ್ ವಿರಾರ್, ಖಂಯ್ಚಿ ವಾಟ್ ಧರುಂ ಮ್ಹಳ್ಳಿಂ ಸವಾಲಾಂ ಕರುನ್ ಪರತ್ ಸೊಧ್ನಾಂ ಕರ್ತಾ ಅಪ್ಣಾಕ್ ಖಂಯ್ಸರ್ ಸಾವ್ಳಿ ಮೆಳಾತ್ ಮ್ಹಣ್ತಾ. ಹಾಂಗಾಸರ್ ಸಾವ್ಳಿ ಏಕ್ ಇಮಾಜ್, ಹ್ಯಾ ಸಾವ್ಳೆಚೊ ಅರ್ಥ್ ’ಭರ್ವಸೊ ಯಾ ಆಧಾರ್’.
"ಕಾಂಪ್ತಾ ಕೂಡ್, ದಿಸ್ತಾ ಭಿರಾಂತ್
ದೆಕ್ಲೊ ದೆವಾ ತುಜೊ ಸಂಸಾರ್
ಸಂಪ್ಲೆಂ ತ್ರಾಣ್ ವೆತಾ ಪ್ರಾಣ್
ಉಕಲ್ನ್ ಮ್ಹಾಕಾ ವ್ಹರ್ ಸರ್ಗಾರ್"
ಕವಿ ನಿರಾಶೆಚಾ ಅಖ್ರೇಚಾ ಸುಸ್ಕಾರಾಂತ್ ಆಸಾ, ವಯ್ಲ್ಯಾ ತೀನ್ ಪಂಗ್ತ್ಯಾಂನಿ ಅಪ್ಲಿ ಪರಿಗತ್ ಪಿಂತ್ರಾವ್ನ್, ತ್ಯಾ ಸಂಕಶ್ಟಾಂಕ್ ಪರಿಹಾರ್ ಸೊಧ್ಚಿ ವಾಟ್ ಸೊಧುನ್ ಸೊಧುನ್ ಆತಾಂ ಅಖ್ರೇಕ್ ಭರ್ವಸೊ ಸಾಂಡೊನ್ ದೆವಾಚಾ ಹುಜಿರ್ ಪಾವ್ಲಾ, ಕಾಂಪ್ತಾ ಕೂಡ್, ದಿಸ್ತಾ
ಭಿರಾಂತ್, ದೆಕ್ಲೊ ದೆವಾ ತುಜೊ ಸಂಸಾರ್. ಮನಿಸ್ ದೆಧೆಸ್ಪೊರ್ ಜಾತಾನಾ ಅಪ್ಲೆಂ ಮ್ಹಳ್ಳೆಂ ಕಿತೆಂಚ್ ನಾ ಮ್ಹಣ್ ಭೊಗ್ಚೆಂ ಸಹಜ್, ದೆಕುನ್ ಹಾಂಗಾ ದೆವಾಕ್
’ತುಜೊ ಸಂಸಾರ್’ ಮ್ಹಣ್ತಾ. ಸಂಪ್ಲೆಂ ತ್ರಾಣ್, ವೆತಾ ಪ್ರಾಣ್ - ಉಕಲ್ನ್ ವ್ಹರ್ ಸರ್ಗಾರ್. ಅಖ್ರೇಚೊ ಖಾಲ್ತಿಮಾನ್.
ಮ್ಹಾಕಾ ಹೆಂ ಕವಿತಾ ಕಿತ್ಯಾಕ್ಗೀ ಪಾರಂಪರಿಕ್ ಚಿಂತ್ಪಾಚೆಂ ಪದ್ ಮ್ಹಳ್ಳೆಪರಿಂ ಭೊಗ್ತಾ. ಹಾಂತುಂ ಲಿಸಾಂವ್ ನಾ, ವಿಚಾರ್ ನಾಂತ್, ಸತಾಂ ನಾಂತ್, ಆಸಾ ಕಿತೆಂಯ್ ತರ್ ಕವಿಚಾ ಎಕಾ ಸಂದಿಗ್ದ್ ಪರಿಗತೆಚಿ ಕುರುಃ ಮಾತ್ರ್. ಹೊ
’ಏಕ್ ಉಲೊ’ ಭೊವ್ಶಾ ಕಿತ್ಲೆಶೆ ಭೊಗುನ್ ಜಿಯೆವ್ನ್ ಆಸಾತ್ ಹ್ಯಾ ಸಂಸಾರಾಂತ್, ತರ್ಯ್ ನೀಜ್ ಜಿಣ್ಯೆಂತ್ ಅಸಲೆಂ ಪೊಳಾಫಳ್ ಭೋವ್ಶಾ ಸಮಸ್ಸ್ಯಾಂಕ್ ಪರಿಹಾರ್ ದಿಂವ್ಚಾ ಬದ್ಲಾಕ್ ಅಕ್ಲಾಸ್ ಚಡಯ್ತಾ ಮ್ಹಳ್ಳೆಪರಿಂ
ಭಗ್ತಾ. [ವಯ್ರ್]
ದೆವಾಲಾಗ್ಚೆಂ ಕವಿಚೆಂ
ಸಂಭಾಶಣ್? [- ಜೊಮೆಲ್, ಬೊಂದೆಲ್]
ಹಿ ಕವಿತಾ ಮ್ಹಕಾ ಹ್ಯಾ ಕವಿತೆಂತ್ಲೊ ನಾಯಕಾನ್ ತಾಚ್ಯಾ
ಮೊರ್ನಾಚ್ಯಾ ನಿಮಾಣ್ಯಾ ಘಡಿಯೆಂತ್ ದೆವಾಲಾಗಿಂ ಕರ್ಚೆಂ ಸಂಬಾಶಣ್
ಮ್ಹಳ್ಳೆಪರಿಂ ಭೊಗ್ತಾ.
ದಾರ್ ಠೊಕ್ಲ್ಯಾರ್ ಮಾತ್ರ್ ಉಗ್ತೆಂ ಜಾತಾಂ. ದಾರ್ ಠೊಕ್ಚ್ಯಾ ಫುಡೆಂಚ್ ಆಮ್ಕಾಂ ಉಗ್ತೆಂ ಜಾತಾ ಮ್ಹಳೊ ಭರ್ವಸೊ ಆಸ್ಲ್ಲ್ಯಾನ್ ಆಮಿ ದಾರಾಲಾಗಿಂ
ಪಾವ್ತಾಂವ್. ’ಕೊಣಾಚ್ಯಾ ಹಾಂವ್ ವಚೊಂ ದಾರಾರ್’ ಮ್ಹಣ್ಜೆ
ಹ್ಯಾ ಕವಿತೆಂತ್ಲೊ ನಾಯಾಕ್ ಆಸಾಯಕ್ ಜಾಲ್ಲೆಂ ಆಮ್ಕಾಂ
ಸ್ಪಷ್ಟ್ ದಿಸ್ತಾ. ತಾಕಾ ಆನಿಂ ಫುಡೆಂ ಕೊಣಾ ಥಾವ್ನ್ ಕಸಲೊಚ್ ಆಧಾರ್ ಯಾ ಜಿವಿತ್ ಚಲೊವ್ನ್
ವರ್ಚಿ ವಾಟ್ ಮೆಳಾನಾಸ್ತಾ, ಕವಿ ಆತಾ ಸಂಪೂರ್ಣ್ ಸಲ್ವೊನ್ ದೆವಾಚ್ಯಾ ದಾರಾರ್
ಪಾವ್ಲಾ, ದೆವಾಲಾಗಿಂ ಕರ್ಚೆಂ ಸಂಭಾಶಣ್ ಜಾವ್ನಾಸಾ ಹೊ
’ಏಕ್ ಉಲೊ’.
ಮನ್ಶ್ಯಾಚ್ಯಾ ಜಯ್ತಾಕ್ ಪ್ರಮುಕ್ ಕಾರಾಣ್ ಜಾವ್ನ್ ಜಾವ್ನಾಸಾತ್
ಪ್ರೇತನ್, ಸಮರ್ಪಣ್ ಅನಿಂ ನಶಿಬ್ (effort, commitment and
Luck) ಜೆದ್ನಾಂ ಹಿಂ ತಿನೀಂ ಸಂಗ್ತ್ಯೊ
ಸಾಂಗಾತಾ ಮೆಳ್ತಾನಾ ಮಾತ್ರ್ ಮನಿಸ್ ಜಯ್ತೆವಂತ್ ಜಾಂವ್ಕ್
ಸಾಧ್ಯ್ ಜಾತಾ. ’ಮ್ಹಕಾ ನಶೀಬ್ ನಾ’ ಯಾ ’ಮ್ಹಜೆಂ ನಶೀಬ್ ಫುಟ್ಲೆಂ’ ಮ್ಹಳ್ಯಾರ್ ನಶಿಬಾವರ್ವಿಂ
ಮಾತ್ರ್ ಮನಿಸ್ ಜಯ್ತೆವಂತ್ ಜಾಯ್ನಾಂ. ತಶೆಂಚ್ ಮ್ಹನಿಸ್ ಗಾಡ್ವಾಬರಿ ಫಕತ್ತ್
ಮಿನತ್ ಕರುನ್ ಕಾಮ್ ಕೆಲ್ಯಾರ್ಯೀ ಮನಿಸ್ ಜಯ್ತೆವಂತ್ ಜಾಯ್ನಾ. ಜಿವಿತಾಂತ್ಲ್ಯಿ ಆಶಾ ಜ್ಯಾರಿ ಕರುಂಕ್
ಪಾವ್ಲಾಂ ಕಾಡ್ತಾನಾ ವಿವಿಧ್ ರಿತಿ, ವಾಟ್ಯೊ, ವಿಧಾನಾಂ ಯಾ
ದಿಶಾ ಯೆತಾತ್. ಪುಣ್ ಹ್ಯಾ ದಿಶಾಂನಿ ಚಮ್ಕಾಲ್ಯಾರ್ ಮನಿಸ್ ತಾಚಿ ಆಶಾ
ಸುಫಳ್ ಕರುಂಕೀ ಪುರೊ ಯಾ ತಾಕಾ ಸಲ್ವಣ್ ಯೆಂವ್ಕ್ಯೀ
ಪುರೊ. ತಶೆಂಚ್ ಜಾಲಾ ಹ್ಯಾ ಕವಿತಾಂತ್ಲ್ಯಾ ನಾಯಾಕಾಕ್.
ಸಂಪೂರ್ಣ್ ರಿತಿನ್ ಸಲ್ವೊನ್ ಗೆಲ್ಲೊ ಕವಿತಾನಾಯಕ್
’ಖಂಚ್ಯಾ ಸಾವ್ಳೆಂತ್ ಹಾಂವ್ ದೀಸ್ ಸಾರುಂ’ ಮ್ಹಣ್ ಸವಾಲ್
ಕರ್ತಾ. ಹಾಂಗಾಸಾರ್ ’ಸಾವ್ಳಿ’ ಮ್ಹಳ್ಯಾರ್ ’ಆಧಾರ್’ ಜಾವ್ನ್ ಇಮಾಜ್
ದಾಕಯ್ತಾ. ಸಾವ್ಳಿ ಆಮ್ಚ್ಯಾ ಬರಾಬರ್ ಯೆತಾ ಜಾಲ್ಯಾನ್,
ಕವಿತಾನಾಯಕ್ ಅಖಂಡ್ ಆನಿಂ ಸಂಪೂರ್ಣ್ ಭರ್ವಸೊ ದಿಂವ್ಚ್ಯಾ
ಸಾವ್ಳೆಕ್ ರಾಕೊನ್ ಆಸಾ.
ಆಪ್ಣಾವರ್ವಿಂ ಕಿತೆಂಚ್ ಸಾಧ್ಯ್ ನಾ, ಸಂಪೂರ್ಣ್ ಸಲ್ವಾಲಾಂ.
ಆಪ್ಣಾಚೆಂ ಧೈರ್, ಭಳ್ ಆಪ್ಣಾಕ್ ಸಾಂಡ್ತಾನಾ ತುಂಚ್ ಮ್ಹಕಾ
ಸರ್ಗಾಕ್ ಉಕಲ್ನ್ ವ್ಹರ್ ದೆವಾ ಮ್ಹಣ್ ತೊ ಪರಾತ್ತಿತಾ.
ಸಂಸಾರಿ ಜಿವಿತಾಂತ್ ಹರ್ಯೆಕ್ ಆವ್ಕಾಸ್/ದಾರಾಂ
(Opportunity)
ಠೊಕುನ್ ಥಕ್ಲ್ಲೊ ಕವಿತಾನಾಯಾಕ್, ದೆವಾಚ್ಯಾ ದಾರಾರ್
ಪಾಂವ್ಚೆಂ ಹೆಂ ಸನ್ನಿವೇಶ್ ಬೋವ್ ಸೊಭಿತ್ತ್ ರಿತಿನ್
ಕವಿನ್ ಸಾಂಗೊಂಕ್ ಪ್ರಯತ್ನ್ ಕೆಲಾಂ.
[ವಯ್ರ್]
ದೋನ್
ವರ್ಗಾಚೆಂ ಚಿತ್ರಣ್ ಕರ್ಚಿ ಕವಿತಾ [ - ಆಂಟನಿ ಮಿನೇಜಸ್,
ಬೊಂದೆಲ್]
ಹೆಂ ಕವಿತಾ ಹಾಂವೆ ವಾಚ್ಲ್ಲ್ಯಾ ವೆಳಾರ್ ಮ್ಹಜ್ಯಾ ಚಿಂತ್ಪಾ
ಸಕ್ತೆಚ್ಯಾ ರೊದಾಂನಿ ಎಕಾ ನಿರಾಧಾರಿ ಆವಯ್ಚಾ ಯಾ ಬಾಪಾಯ್ಚಾ
ಮುಕಾರ್ ಮ್ಹಾಕಾ ರಾವಯ್ಲೆಂ. ಹಾಂಗಾಸರ್ ’ನಿರಾಧಾರಿ’ ಕಿತ್ಯಾಕ್
ಮ್ಹಣ್ ಹಾಂವೆ ಸಾಂಗ್ಲ್ಲೆಂ ಮ್ಹಳ್ಯಾರ್ ಕವಿನ್ ಹೆಂ ಕವಿತಾ ನಿರಾಸ್ಪಣಾಂತ್
ಸುರು ಕರ್ನ್ ನಿರಾಸಾವಾದಾಂತ್ಂಚ್ ಆಖೇರ್ ಕರ್ತಾನಾ ಮ್ಹಾಕಾ
ಹ್ಯಾ ಕವಿತೆಂತ್ ಝಳ್ಕಾಲ್ಲಿ ಫಕತ್ತ್ ನಿರಾಶಾ ಮಾತ್ರ್. ಕವಿತೆಚ್ಯಾ
ಸುರ್ವಾತೆರ್ಚ್ ಕವಿನ್ ಕೋಣ್ ಆಧಾರ್, ಕೋಣ್ ಫುಡಾರ್, ಕೊಣಾಚ್ಯಾ
ಹಾಂವ್ ವಚೊಂ ದಾರಾರ್ ಮ್ಹಣ್ ಸಾಂಗೊನ್ ವ್ಹಡ್ಲ್ಯಾ ಕುಟ್ಮಾಕ್ಚ್
ಮುಕಾರ್ ದವರ್ಲಾಂ. ಮ್ಹಳ್ಯಾರ್ ಎಕಾ ಆವಯ್ಕ್ (ಬಾಪಾಯ್ಕ್) ಜಾಯ್ತಿಂ ಭುರ್ಗಿಂ ಆಸಾತ್ ಆನಿ ತಿಂ
ಸಗ್ಳಿಂ ಬರ್ಯಾ ಪರಿಸ್ಥಿತೆಂತ್ ಆಸೊನ್ ಗ್ರೇಸ್ತ್ಕಾಯೆಂತ್ ಆನಿ
ಸಂಸಾರಾಚ್ಯಾ ಉಂಚ್ಲ್ಯಾ ಪಾಂವ್ಡ್ಯಾರ್ ಧಲೊನ್ ಆಪ್ಲ್ಯಾಚ್ಚ್
ಸಂಸಾರಾಂತ್ಲ್ಯಾ ಪರಿಮಿತಿ ಮಧೆಂ ಚಲ್ತಾನಾ ವಿಸ್ರಾಲ್ಲೆಲ್ಯಾ ಆವಯ್ಚಿ (ಬಾಪಾಯ್ಚಿ) ಖಬಾರ್ ತಾಂಕಾ
ನಾತ್ಲ್ಲ್ಯಾ ವೆಳಾರ್ ಕವಿನ್ ಕೋಣ್ ಪಾವಾತ್, ಕೋಣ್
ಸಾಂಗಾತ್, ಕೊಣಾಲಾಗಿಂ ಹಾಂವ್ ಮಾಗೊಂ ಉಪ್ಕಾರ್ ಮ್ಹಣ್
ಸಾಂಗೊನ್ ಏಕ್ ಆವಯ್ ಕೊಣ್ ಆಪ್ಣಾಕ್ ಪಾವ್ತಿತ್ ಯಾ ಖಂಚೊ
ಪೂತ್ ಯಾ ಧು ಆಪ್ಣಾಕ್ ಆಸ್ರೊ ದಿತಿತ್ ಯಾ ಕೋಣ್ ಆಪ್ಣಾಕ್
ಪಾವ್ತಿತ್ ಮ್ಹಣ್ ಆಶೆವ್ನ್ ರಾವ್ತಾನಾ ಹಾಂಗಾಸರ್ ಕವಿ ಇಲ್ಲೆಶ್ಯಾ ಆಶಾ-ಅತ್ರೆಗಾಂಕ್ ಇಡೆಂ ಕರ್ನ್ ದಿತಾ.
ಪೂಣ್ ಕವಿಚೊ ಹೊ ಅತ್ರೆಗ್ ಚಡ್ ವೇಳ್ ಬಾಳ್ವೊಂಕ್
ನಾಂ ಕಾರಾಣ್ ಇತ್ಲ್ಯಾ ವರ್ಸಾಂ ಆಶೆನ್ ರಾಕೊನ್ ರಾವ್ಲ್ಲ್ಯಾ ಆವಯ್ಚೆಂ
ಮನ್ ಆಪ್ಲ್ಯಾ ಭುರ್ಗ್ಯಾಂನಿ ದುಖಯಿಲ್ಲ್ಯಾ ವೆಳಾರ್ ತಿ ನಿರಾಶೆಂತ್
ಬುಡ್ಲ್ಲ್ಯಾನ್ ತಿಚ್ಯಾ ಕಾಳ್ಜಾಚೆಂ ಭೆಸಾಂ ಕೆಲ್ಲ್ಯಾ ಕವಿನ್ ಘರ್
ಮ್ಹಣ್ತಾನಾ ಏಕ್ ಕುಟಾಮ್ ಮ್ಹಳ್ಳಿ ಜಿವಿ ಇಮಾಜ್ ಉಗ್ತಿ ಕರ್ನ್ ದಾಕವ್ನ್ ಭುರ್ಗಿಂ ಆಪ್ಣಾಕ್ ಎಕ್ಲ್ಯಾಕ್ಚ್
ಸಾಂಡುನ್ ಆಪಾಪ್ಲ್ಯಾ ವಾಟೆನ್ ಗೆಲ್ಲ್ಯಾ ವೆಳಾರ್ ತಿ ಜಿವಿತಾಂತ್ ಕಂಗಾಲ್ ಜಾವ್ನ್ ಆಪ್ಣಾಚ್ಯಾ ನಶೀಬಾಕ್ ದುರ್ಸಾತಾ.
ಸಾಂಡ್ಲೆಂ ಭಾಗ್ ಮ್ಹಣ್ ಸಾಂಗುನ್ ಕವಿನ್ ಹಾಂಗಾಸ್ರ್ ’ವಾಂಟೊ’ ಮ್ಹಳ್ಳಿ ಇಮಾಜ್ ಉಗ್ತಿ ಕೆಲ್ಯಾ.
ಹಾಂಗಾಸರ್ ವಾಂಟೊ ಮ್ಹಳ್ಯಾರ್ ಹರ್ಯೆಕಾ ಆವಯ್ಕ್ ಆಪ್ಲ್ಯಾ ಭುರ್ಗ್ಯಾ ಥಂಯ್ ಆಸ್ಚೊ
ಮೊಗಾಚೊ ವಾಂಟೊ ಮ್ಹಳ್ಳೊ ಮ್ಹಜೊ ಅರ್ಥ್. ಆನಿ ಆಜ್ ಆಪ್ಲ್ಯಾ
ಮೊಗಾಚ್ಯಾ ಭುರ್ಗ್ಯಾಂನಿ ತಿಚ್ಯಾ ಕಾಳ್ಜಾಕ್ ಭಾಲೊ ಮಾರುನ್ ಭೆಸಾಂ ಕೆಲ್ಲ್ಯಾ ವೆಳಾರ್ ತಿ ಭುರ್ಗ್ಯಾಂಚೊ
ಮೋಗ್ ಮ್ಹಳ್ಳ್ಯಾ ಹ್ಯಾ ವಾಂಟ್ಯಾ ಥಾವ್ನ್ ವಿಖ್ರಿತ್ ಜಾಲ್ಲಿ.
ಆಪ್ಲ್ಯಾ ಮೊಗಾಚ್ಯಾ ಭುರ್ಗ್ಯಾಂನಿಂಚ್ ಆಪ್ಣಾಕ್ ಆಧಾರ್ ಜಾವ್ನ್ ರಾವಾಜಾಯ್ ಆಸ್ಲ್ಲ್ಯಾ ಭುರ್ಗ್ಯಾಂನಿಂಚ್ ತಿಕಾ
ಪಯ್ಸ್ ಕರ್ನ್ ಸಾಂಡುನ್ ಗೆಲ್ಲ್ಯಾ ವೆಳಾರ್ ತಿಚಿ ಗತ್
ಲಾಚಾರ್ ಜಾವ್ನ್ ಮತ್ ವಿರಾರ್ ಜಾಲ್ಲ್ಯಾ ವೆಳಾರ್ ಖಂಚ್ಯಾ
ವಾಟೆಕ್ ಪಾಂಯ್ ಕಾಡುಂ ಮ್ಹಣ್ ತಿಚ್ಚ್ ನೆಣಾ ಜಾಲಿ. ಮ್ಹಳ್ಯಾರ್
ಹಾಂಗಾಸ್ರ್ ಕವಿನ್ ’ಖಂಚ್ಯಾ ವಾಟೆರ್" ಮ್ಹಣ್ ಸಾಂಗ್ಲ್ಲ್ಯಾನ್ ಎಕಾ
ವರ್ನಿಂ ಚಡ್ ವಿಂಚವ್ಣ್ ತಿಚ್ಯಾ ಮುಕಾರ್ ದವರ್ಲ್ಲ್ಯಾನ್ ಅನಾಥಾಶ್ರಮ್
ನಾಂ ತರ್ ಜೀವ್ಘಾತ್ ಮ್ಹಳ್ಳಿ ದೋನ್ ಇಮಾಜಿ ಮ್ಹಾಕಾ
ದಿಷ್ಟಿಕ್ ಪಡ್ತಾತ್. ಕಿತ್ಯಾಕ್ ಮ್ಹಳ್ಯಾರ್ ಗತ್ ಲಾಚಾರ್ ಜಾಲ್ಲೊ
ಮನಿಸ್ ಆನಾಥಾಶ್ರಮಾಕ್ ವೆತಾ ಆನಿ ಮತ್ ವಿರಾರ್ ಜಾಲ್ಲೊ
ಮನಿಸ್ ಜೀವ್ಘಾತ್ ಕರ್ನ್ ಘೆತಾ ಆನಿ ಹೆಂ ಸ್ವಾಭಾವಿಕ್ ಜಾಲ್ಲ್ಯಾನ್
ಹಾಂವೆಯೀ ಅಶೆಂ ಚಿಂತುನ್ ಚೂಕ್ ಕರುಂಕ್ ನಾಂ ಮ್ಹಣ್
ಮಾಕಾ ಭೊಗ್ತಾ. ಪುಣ್ ಕವಿನ್ ಮನ್ ಝಳ್ಳೆಂ, ಬಳ್
ಸರ್ಲೆಂ, ಖಂಚ್ಯಾ ಸಾವ್ಳೆಕ್ ಹಾಂವ್ ದೀಸ್ ಸಾರುಂ ಮ್ಹಣ್
ಸಾಂಗ್ತಾನಾ ಹಾಂಗಾಸ್ರ್ ತಿಂ ನಿರಾಧಾರಿ ಆವಯ್ ಜೀವ್ಘಾತ್ ಕರುಂಕ್
ಪಾಟಿಂ ಸಾರುನ್ ಕೊಣಾಯ್ಚೆ ತರೀ ಹಾತಾ ಸಕಯ್ಲ್ ಜಿಯೆಂವ್ಚಿ ಆಶಾ ತಿ
ಪರತ್ ಉಚಾರ್ತಾ. ಹಾಂಗಾಸ್ರ್ ಸಾವ್ಳಿ ಮ್ಹಣ್ ಸಾಂಗ್ಲ್ಲ್ಯಾನ್ ಗುಲಾಮ್ ಮ್ಹಳ್ಳಿ ಇಮಾಜ್ ಆನಿ ಬಳ್
ಸರ್ಲೆಂ ಮ್ಹಳ್ಯಾರ್ ಭಿಯೆಲಿಂ ಮ್ಹಳ್ಳಿ ಇಮಾಜ್ ಕವಿನ್ ಉಗ್ತಿ ಕರ್ನ್ ದಾಕಯ್ಲ್ಯಾ.
ಸಾವ್ಳಿ ಸದಾಂಚ್ ಸಕಯ್ಲ್ಚ್ಚ್ ಆಸ್ತಾ ಯಾ ಪಾಟ್ಲ್ಯಾನ್ ಆಸ್ತಾ ಜಾಲ್ಲ್ಯಾನ್ ಖಂಚಾಯ್ ತರ್ಯೀ ಅಸ್ರ್ಯಾಖಾಲ್ ತಿ ಜಿಯೆಂವ್ಕ್ ಆಶೆವ್ನ್ ರಾವ್ತಾ.
ಕೋಣ್ ತರೀ ಆಪ್ಣಾಕ್ ಅಸ್ರೊ ದಿತೆಲಿಂ ಮ್ಹಳ್ಳಿ ತಿಚಿ ಆಖ್ರೇಚಿ ಆಶಾ
ಸುಫಳ್ ಜಾಯ್ನಾತ್ಲ್ಲ್ಯಾ ವೆಳಾರ್ ಭಿರಾಂತೆನ್ ತಿಚಿ ಕೂಡ್ ಕಾಂಪೊಂಕ್
ಲಾಗ್ತಾನಾ ದೆಕ್ಲೊ ದೆವಾ ತುಜೊ ಸಂಸಾರ್ ಮ್ಹಣ್ ಸಾಂಗುನ್ ದೆವಾಕ್ಚ್ಚ್ ತಿ ಶಿಣ್ ಉಚಾರ್ತಾನಾ ಆಪುಣ್ ನಿತ್ರಾಣ್ ಜಾಲ್ಲೆಪರಿಂ ಭಾಸ್ ಜಾವ್ನ್ ಆಪುಣ್ ನಿರಾಶಾ ಜಾಲ್ಲೆಪರಿಂ ಭಾಸ್ ಜಾವ್ನ್ ಆಪುಣ್
ಮೊರ್ತಾಂ ತಶೆಂ ಭೊಗ್ತಾನಾ ಆಪ್ಣಾಕ್ ಸರ್ಗಾಕ್ ಆಪವ್ನ್
ವ್ಹರ್ ಮ್ಹಣ್ ಸಾಂಗೊನ್ ತಿ ದೆವಾಲಾಗಿಂ ಆಪ್ಲೆಂ ಮರಣ್
ಮಾಗ್ತಾ.
ಹಾಂಗಾಸರ್ ಹಾಂವೆ ಚಿಂತ್ಲ್ಯಾ ಪ್ರಕಾರ್ ಕವಿನ್ ಎಕಾ ಆವಯ್ಕ್ ಕವಿತಾನಾಯಕಿ
ಮ್ಹಣ್ ಕೆಲ್ಯಾರೀ ಹೆಂ ಕವಿತಾ ಫಕತ್ ಎಕಾ ಆವಯ್ಕ್ ಮಾತ್ರ್ ಸೀಮಿತ್
ನ್ಹಯ್ ಮ್ಹಣ್ ಮ್ಹಾಕಾ ಭೊಗ್ತಾ. ಜೆರಾಲ್ ಥರಾನ್
ಸಾಂಗ್ಚೆಂ ಜಾಲ್ಯಾರ್ ಎಕಾ ಗರ್ಜೆವಂತ್ ಮನ್ಶ್ಯಾಕ್, ಎಕಾ ನಿರ್ಗತಿಕಾಕ್, ಜಿಣ್ಯೆಂತ್
ಸಬಾರ್ ಥರಾಂನಿ ಕಷ್ಟಾಲ್ಲ್ಯಾ ಆನಿ ಆಡ್ಚಾಲ್ಲ್ಯಾಂಕ್ ಯಾ
ಸಂಪೂರ್ಣ್ ಥರಾನ್ ಧರ್ಣಿಕ್ ಶೆವ್ಟಾಲ್ಲ್ಯಾಂಕ್ ಆಯ್ಚಿ ಆಮ್ಚಿ ಉಂಚ್ಲ್ಯಾ
ವರ್ಗಾಚಿ ಸಮಾಜ್ ಖಂಚಾಯೀ ಥರಾಚೊ ಸಹಕಾರ್ ಯಾ ಕುಮೊಕ್
ದಿನಾಂ ಮ್ಹಣ್ ಕವಿ ಎ.ಟಿ. ಲೋಬೊನ್ ಹ್ಯಾ ಕವಿತೆಧ್ವಾರಿಂ ಆಮ್ಕಾಂ
ಸ್ವಷ್ಟ್ ಥರಾನ್ ಸಾಂಗ್ತಾನಾ ಮ್ಹಾಕಾ ಉಡಾಸಾಕ್ ಆಯಿಲ್ಲಿಂ ಏಕ್
ಸಾಂಗ್ಣಿಂ ಮ್ಹಳ್ಯಾರ್ - ಆಪುಣ್ ಆಪ್ಣಾಕ್ ದೇವ್ ಸಮೆಸ್ತಾಂಕ್.
[ವಯ್ರ್]
ಎಕಾ ಆವಯ್ಚೊ ಉಲೊ? [-ಪ್ರಿಯಾ ಸಿಕ್ವೇರಾ, ಫೆರಾರ್]
ಹ್ಯಾ ಕವಿತೆಂತ್ ಮ್ಹಾಕಾ ಭುರ್ಗ್ಯಾಂನಿ ಸಾಂಡ್ಲ್ಲ್ಯಾ ಎಕಾ ಅವಯ್ಚೊ ಉಲೊ ಆಯ್ಕಾತಾ. ಆವಯ್ಚಾ
ಮಾತರ್ಪಣಾರ್ ಆಪ್ಲ್ಯಾ ಭುರ್ಗ್ಯಾಂನಿ ಸಾಂಡ್ಲ್ಲ್ಯಾ ವೆಳಾರ್
ಬೊಗ್ಚೆ ತೆ ವಳ್ವಳೆ ಆನಿಂ ಸುಸ್ಕಾರ್ ಹ್ಯಾ ಕವಿತಾಂತ್ಲ್ಯಾ ಎಕೆಕಾ ಉತ್ರಾಂನಿ ಭಾಯ್ರ್
ಪಡ್ಲ್ಯಾತ್. ತೆ ನೋವ್ ಮಹಿನೆಂ ಆಪ್ಲ್ಯಾ ಗರ್ಭಾಂತ್
ವಾವವ್ನ್, ತಾಕಾ ವ್ಹಡ್ ಕರ್ನ್, ಬರೆಂ ಶಿಕಾಪ್ ದೀವ್ನ್ ಹುಶಾರ್
ನಾತ್ಲ್ಲ್ಯಾ ವೆಳಾರ್ ಚಾಕ್ರಿ ಕರ್ನ್, ತಾಂಚ್ಯಾ ಪಾಂಯಾರ್ ರಾಂವ್ಚೆಂ ಪಳೆವ್ನ್ ಆವಯ್
ಸಂತೊಸ್ತಾ. ಪುಣ್ ತಿಚ್ಯಾ ಉತರ್ ಪ್ರಾಯೆರ್ ತಿಕಾ ಮೋಗ್
ದೀವ್ನ್ ಚಾಕ್ರಿ ಕರುಂಕ್ ತ್ಯಾ ಭುರ್ಗ್ಯಾಂಕ್ ಫುಟ್ವಾನಾ. ತಿಕಾ ಆಶ್ರಮಾಂತ್ ಘಾಲ್ನ್
ವಾ ಎಕ್ಸುರೆಂ ಸೊಡ್ನ್ ಸೊಭಾಯ್ ಪಳೆಯ್ತಾತ್ ಆನಿಂ
ಮಜೆನ್ ಜಿಯೆತಾತ್. ಆಪ್ಣಾಚಿಂ ಆವಯ್ ಬಾಪಯ್ ತಾಂಕಾ
ವೊಜೆಂ ಅನಿಂ ಲಜೆಚೆಂ ಮೂಳ್ ಮ್ಹಣ್ ಬೊಗ್ತಾಂ. ವಿಚ್ತ್ರ್
ನ್ಹಂಯ್ಗಿ?. ಆಪ್ಣಾಕ್ಯಿ ಉತರ್ ಪ್ರಾಯ್ ಯೆತೆಲಿ ಆನಿಂ ಆಪ್ಣಾಚೆಂ ಭುರ್ಗೆ
ಮ್ಹಜೆಲಾಗಿಂ ಕಿತೆಂ ಕರ್ತಿತ್ ಮ್ಹಣ್ ಚಿಂತ್ಲ್ಲೆ ಜಾಲ್ಯಾರ್? ಮಾತ್ಯಾರ್
ವೊತ್ಲ್ಲೆಂ ಉದಾಕ್ ಪಾಂಯಾಕ್ ದೆಂವ್ತಲೆ ಮ್ಹಳ್ಳಿಂ ಗಾದ್ ಕಿತ್ಲಿಂ ಅರ್ಥಾಭರಿತ್. ಕವಿತಾಂತ್ಲ್ಯಾ ಕವಿನ್ ’ಹೊ ಉಲೊ’ ಕೊಣಾಚೊ
ಮ್ಹಣ್ ಶೀದಾ ಸಾಂಗಾನಾಸ್ತಾನಾ ವಾಚ್ಪ್ಯಾಂಕ್ ಸೊಧುನ್ ಕಾಡುಂಕ್
ಸೊಡ್ಲ್ಲಿ ರೀತ್ ಮ್ಹಾಕಾ ವಿಜ್ಮಿತ್ ಕರ್ತಾ.
"ಕೊಣ್ ಆಧಾರ್ ಕೊಣ್ ಫುಡಾರ್
ಕೊಣಾಚ್ಯಾ ಹಾಂವ್ ವಚೊಂ ದಾರಾರ್
ಕೊಣ್ ಪಾವಾತ್ ಕೊಣ್ ಸಾಂಗಾತ್
ಕೊಣಾಲಾಗಿಂ ಹಾಂವ್ ಮಾಗೊಂ ಉಪ್ಕಾರ್"
ಹ್ಯಾ ಮ್ಹಜ್ಯಾ ಉತರ್ ಪ್ರಾಯೆರ್ ಕೋಣ್ ದಿತಿತ್ ಮ್ಹಾಕಾ ಅಧಾರ್,
ಮುಖ್ಲೆಂ ದೀಸ್ ಹಾಂವೆಂ ಎಕ್ಸುರೆಂ ಕಶೆಂ ಸಾರ್ಚೆಂ, ಕೊಣಾಲಾಗಿಂ ಗೆಲ್ಯಾರ್
ಮ್ಹಾಕಾ ಉಪ್ಕಾರ್ ಮೆಳಾತ್, ಕೋಣ್ ಸಾಂಗಾತ್ ಮ್ಹಜ್ಯಾ ಭುರ್ಗ್ಯಾಂಕ್
ಮ್ಹಜಿ ಪರಿಸ್ಥಿತಿ, ಕೊಣಿ ತರೀ ಆಸಾತ್ಗಿ ಹಾಂವ್ ಆಸ್ಕತ್ ಜಾಲ್ಯಾಂ
ಮ್ಹಣ್ ಮ್ಹಜ್ಯಾ ಭುರ್ಗ್ಯಾಂಕ್ ಖಬಾರ್ ದಿಂವ್ಚಿ ಮ್ಹಣ್ ಎಕ್ಸುರಿ ಆವಯ್ ರುದಾನ್ ಕರ್ಚೆಂ
ಹ್ಯಾ ವಯ್ಲ್ಯಾ ಉತ್ರಾಂನಿ ದಿಸ್ತಾ.
"ತುಟ್ಲಿ ಆಶಾ ಆಯ್ಲಿ ದಿಶಾ
ಘರ್ ಮ್ಹಜೆಂ ದೆಸ್ವಾಟ್ ಜಾಲೆಂ
ಫುಟ್ಲೆಂ ನಶೀಬ್, ಸಾಂಡ್ಲೆಂ ಭಾಗ್
ಕಾಳ್ಜಾಕ್ ಮೊಗಾನ್ ಮಾರ್ಲೆ ಭಾಲೆ"
ಆಪ್ಲೊ ಪೂತ್ ವ್ಹಾಡೊನ್ ಯೆಂವ್ಚೊ ಪಳೆತಾನಾ, ತಾಚ್ಯಾ ಗುಸ್ತಾರ್ ಆಪುಣ್
ಸುಖಾನ್ ಜಿಯೆತೆಲಿಂ ಮ್ಹಳ್ಳಿ ಆವಯ್ಚಿ ಆಶಾ ಜಾವ್ನಾಸ್ತಾ.
ಪುಣ್ ಪುತಾಚಾ ನಿರ್ಲಕ್ಶ್ಪಣಾಂತ್ ತಿ ಆಶಾ ಘಡ್ಯೆನ್ ತುಟ್ತಾ.
ಸುಖಾಚಿ, ಸಮಧಾನೆಚಿ ವಾಟ್ ಪಳೆವ್ನ್ ಆಸಲ್ಲ್ಯಾ ಆವಯ್ಕ್, ಬದ್ಲಾವಣ್
ದಿಸ್ತಾನಾ ದುಸ್ರಿಚ್ ದಿಶಾ ತಿ ಪಳೆಯ್ತಾ ಆನಿಂ ಹ್ಯಾ ವೆಳಾರ್ ತ್ಯಾ ಆವಯ್ಚೆ ಕಷ್ಟ್
ಸಮ್ಜವ್ಯೆತ್ ನ್ಹಯ್ಗಿ? ಪೂತ್ ಕಾಜಾರ್ ಜಾವ್ನ್ ಆವಯ್ಕ್ ಚಿಲ್ಲಿತಾನಾ ಖಂಡಿತ್ ಜಾವ್ನ್ ತಿ ತಿಚೆಂ ನಶೀಬ್,
ಪುತಾ ಸಾಂಗಾಂತಾ ರಾಂವ್ಚೆಂ ಭಾಗ್ ಸಾಂಡ್ತಾ. ಪಾನೊ ದೀವ್ನ್
ವ್ಹಡ್ ಕೆಲ್ಲ್ಯಾ ಆವಯ್ಕ್ ಏಕ್ಚ್ಚ್ ಮಿನುಟಾನ್ ಪರ್ಕಿ ಕರ್ತಾನಾ ತ್ಯಾ ಆವಯ್ಚಾ ಕಾಳ್ಜಾಕ್ ಭಾಲ್ಯಾನ್
ಮಾರ್ಲ್ಲೆತಸಲಿ ದೂಖ್ ಭಗ್ಲಿ ಮ್ಹಣ್ ಕವಿತಾನಾಯಕ್
ಸಾಂಗ್ತಾಂ.
"ಗತ್ ಲಾಚಾರ್ ಮತ್ ವಿರಾರ್
ಖಂಚ್ಯಾ ವಾಟೆಕ್ ಪಾಂಯ್ ಕಾಡುಂ
ಮನ್ ಝಳ್ಳೆಂ, ಬಳ್ ಸರ್ಲೆಂ
ಖಂಚ್ಯಾ ಸಾವ್ಳೆಕ್ ಹಾಂವ್ ದೀಸ್ ಸಾರುಂ"
ಪ್ರಾಯ್ ಜಾವ್ನ್ ಯೆತಾನಾ, ಮನ್ಶಾಚೆ ಬಳ್ ಉಣೆಂ ಜಾತಾ. ಆನಿಂ
ಹ್ಯಾ ವೆಳಾರ್ ತಾಕಾ ದುಸ್ರ್ಯಾಂಚೊ ಆಧಾರ್ ಗರ್ಜ್ ಆಸ್ತಾ. ಏಕ್ ಆವಯ್
ಆಪ್ಲೆಂ ತ್ರಾಣ್, ಸಕತ್, ಆಪ್ಲ್ಯಾ ಭುರ್ಗ್ಯಾಂಕ್ ಲ್ಹಾನ್
ವ್ಹಡ್ ಕರುಂಕ್ ಗಳ್ಸಿತಾ. ಪುಣ್ ತಿಚ್ಯಾ ಮಾತರ್ಪಣಾರ್ ತಿಕಾ ಕೊಣ್ಂಚ್ ಆಧಾರ್
ನಾಸ್ತಾನಾ ತಿ ಅಸ್ಕತ್ ಜಾತಾ ಆನಿಂ ವಿರಾರ್ ಜಾತಾ. ಭುರ್ಗ್ಯಾಂಚೆಂ
ದುಷ್ಟ್ಪಣ್ ಪಳೆವ್ನ್ ಆವಯ್ಚೆಂ ಮನ್ ಝಳ್ತಾ.
ಆಪ್ಲ್ಯಾಚ್ ಸ್ವಂತ್ ಭುರ್ಗ್ಯಾಂನಿ ಆಶೆಂ ಕರ್ಚೆಂ ಪಳೆತಾನಾ ತ್ಯಾ ಆವಯ್ಕ್
ಪಾತ್ಯೆಂವ್ಕ್ ಕಿತ್ಲೆ ಕಷ್ಟ್? ಹ್ಯಾ ಉತಾರ್ ಪ್ರಾಯೆರ್, ಪಿಡೆಂತ್
ವಳ್ವಳ್ತಾನಾ ಕೊಣಾಚಾ ಸಸಾಯೆನ್ ಆಪುಣ್ ದೀಸ್ ಸಾರ್ತಾಲಿಂ
ಮ್ಹಣ್ ಆವಯ್ ’ಖಂಚ್ಯಾ ಸಾವ್ಳೆಕ್ ಹಾಂವ್ ದಿಸ್ ಸಾರುಂ’ ಮ್ಹಳ್ಳ್ಯಾ
ಉತ್ರಾಂನಿ ರಡ್ತಾ.
"ಕಾಂಪ್ತಾ ಕೂಡ್, ದಿಸ್ತಾ ಭಿರಾಂತ್
ದೆಕ್ಲೊ ದೆವಾ ತುಜೊ ಸಂಸಾರ್
ಸಂಪ್ಲೆಂ ತ್ರಾಣ್ ವೆತಾ ಪ್ರಾಣ್
ಉಕಲ್ನ್ ಮ್ಹಾಕಾ ವ್ಹರ್ ಸರ್ಗಾರ್"
ಎಕ್ಸುರ್ಪಣಾಂತ್, ಭುರ್ಗ್ಯಾಂಚೊ ಮೋಗ್ ನಾಸ್ತಾನ್,
ಆಪ್ಲೆಂ ಕಶೆಂ ದೀಶ್ ಸಾರ್ಚೆಂ, ತೆ ಮುಖ್ಲೆ ದೀಸ್ ಚಿಂತಾನಾಂಚ್ ಆವಯ್ಕ್
ಭಿರಾಂತ್ ದಿಸ್ತಾ ಆನಿಂ ತಿಚಿ ಕೂಡ್ ಕಾಂಪ್ತಾ. ಸಂಸರಾಚಿ ನಿಯಮಾಂ
ವಿಚಿತ್ರ್. ದೆವಾನ್ ಮನ್ಶಾಕ್ ಆಪ್ಲ್ಯಾ ಸುರಪಾಯೆಚೊ ಜಾವ್ನ್ ರಚ್ಲೊ ಆನಿಂ
ಹೊ ಸಂಸಾರ್ ತಾಚಾ ಹಾತಾಂತ್ ದಿಲೊ. ಪುಣ್ ಮನಿಸ್ ಕಿತೆಂ
ಕರ್ತಾ? ದೆವಾಕ್ ಭಿಯೆವ್ನ್, ಮಾನ್ ದೀವ್ನ್ ಚಲಾನಾ.
ಆಪ್ಲ್ಯಾ ಹಾಂಕಾರಾನ್, ಮೊಸ್ರಾನ್ ತಾಕಾ ಜಲ್ಮ್ ದಿಲ್ಲ್ಯಾ ಆವಯ್
ಬಾಪಾಯ್ಕ್ ಮಾನ್ ದೀನಾ. ಹೆಂ ಸರ್ವ್ ಪಳೆವ್ನ್ ಆವಯ್
ಸಂಸಾರಾಚೆರ್ ಆಜ್ಯಾಪ್ ಪಾವ್ತಾ ಆನಿಂ ಕಾಂಠಾಳ್ತಾ ಆನಿಂ ಆಪ್ಲೆಂ
ರುದಾನ್ ದೆವಾ ಮುಖಾರ್ ದವರ್ತಾ. ಲಾಂಬ್ ಆವ್ಕ್ ಆಶೆಲ್ಲಿ ಆವಯ್
ಪುತಾಚೆಂ ನಿರ್ಲಕ್ಶ್ಪಣ್ ಸೊಸುಂಕ್ ತಾಂಕಾನಾಸ್ತಾನಾ
ಆಪ್ಣಾಕ್ ಪುರೊ ಹೊ ಸಂಸಾರ್, ಉಕಲ್ನ್ ಮ್ಹಾಕಾ ತುಜೆಲಾಗಿಂ
ಮ್ಹಣ್ ದೆವಾಲಾಗಿಂ ಪರಾತ್ತಾ.
ಕವಿತಾನಾಯಕಾನ್ ನಿಜಾಯ್ಕ್ಯಿ ಕಾಳಿಜ್ ಶಿಂದ್ಚಾ ರಿತಿನ್ ಎಕಾ ಆವಯ್ಚೆ
ವಿಳಾಪ್ ಹ್ಯಾ ಕವಿತೆಂತ್ ಪಿಂತ್ರಾಯ್ಲಾಂ. ಜೊ ಕೋಣ್ ಆಪ್ಲ್ಯಾ ಆವಯ್ಬಾಪಾಯ್ಕ್ ಉತರ್
ಪ್ರಾಯೆರ್ ಆಶ್ರಮಾಂತ್ ವಾ ಎಕ್ಸುರೆಂ ಜಿಯೆಂವ್ಕ್ ಸೊಡ್ತಾ ತಾಂಕಾ ಜರೂರ್ ಆವಯ್ಚೆಂ ರುದಾನ್
ಪಾವೊಂವ್ಕ್ ಜಾಯ್ ಆನಿಂ ಅಸಲೆಂಚ್ ಏಕ್ ಪ್ರಯತನ್
ಎ.ಟಿ. ಲೋಬೊನ್ ’ಏಕ್ ಉಲೊ’ ಕವಿತಾಂತ್ ಕೆಲ್ಲೆಂ ದಿಸೊನ್ ಯೆತಾ.
[ವಯ್ರ್]
About us | Feedback
| Contact us
Copyright © 2005
DAAIZ.COM All rights reserved.
Page concept, designed and maintained by Ashawadi
Publications
More in Daaiz
Send your comments to author on this writing
This is not a comment box. Nothing you write here appears on the site or is shown to any other reader: it is sent to him by email, privately, and he replies to you directly if a reply is called for.