ಕವಿತಾकविताPoem
ಮ್ಹಾಕಾಯ್
This poem is available in its original Kannada only.
ಕೊಂಕ್ಣೆಚಾ ವಿಂಚ್ಣಾರ್ ಸಾಹಿತ್ಯಾಚೊ ಕೊನ್ಸೊ - ’ದಾಯ್ಜ್’ - ಫಕತ್ತ್ ಕೊಂಕಣಿ ಥಾವ್ನ್, ಕೊಂಕಣಿ ಪರ್ಯಾಂತ್, ಕೊಂಕಣಿ ಖಾತಿರ್.
ಉತ್ರಾಂತ್ ಸೂತ್ರಾಂ
ಮಯ್ನ್ಯಾಚೊ ಕವಿ - 9
ಸೂತ್ರ್ 9: ಮ್ಹಾಕಾಯ್ ಕವಿ ಕರಾ
ಫ್ರಾನ್ಸಿಸ್ ಫುರ್ತಾದೊ, ಕಲೀನಾ
ಮ್ಹಾಕಾಯ್ ಕವಿ ಕರಾ!?
’ಕವಿ ಜಲ್ಮೊನ್ ಯೆಂವ್ಚೊ ಶಿವಾಯ್ ಕೊಣೆಂಯ್ ಕರ್ಚೊ ನ್ಹಂಯ್’ - ಹೆಂ ಉತಾರ್ ಫಟ್ ತರ್, ಕೊಣಾಕ್ಯೀ ಕವಿ ಜಾಂವ್ಕ್ ಸಾಧ್ಯ್. ಫಕತ್ತ್ ಆಶಾ ಅತ್ರೆಗಾಂನಿ ಎಕ್ಲೊ ಕವಿ ಜಾಂವ್ಕ್ ಸಕ್ತಾ? ಸಮಾಜೆಂತ್ ’ಕವಿ’ ಏಕ್ ಜವಾಭ್ದಾರಿ ಶಿವಾಯ್ ವರ್ಗ್ ನ್ಹಂಯ್, ಕುಳಿ ನ್ಹಂಯ್, ಧರ್ಮ್ ನ್ಹಂಯ್, ಜಾತ್ ನ್ಹಂಯ್. ಕವಿ ಸಮಾಜೆನ್ ’ಉಂಚ್ಲೊ’ ಮ್ಹಣ್ಚ್ಯಾ ಜಾತಿಂತ್ ಅಸೊಂಕ್ ಸಾಧ್ಯ್ ತೆಚ್ಚ್ಪರಿಂ ’ನೀಚ್’ ಮ್ಹಳ್ಳ್ಯಾ ಜಾತಿಂತ್ ಅಸೊಂಕ್ಯೀ ಸಾಧ್ಯ್.
ಹೆಂ ಸಮ್ಜೊನ್ ಘೆತ್ಲ್ಲೊ ಆನಿ ಹೆಂ ವೊಪುನ್ ಘೆಂವ್ಚೊ ಕೊಣ್ಯೀ ಹ್ಯೇವಿಶಿಂ ಚಡ್ತಿಕ್ ವಿಚಾರ್ಚೊನಾ. ವಿಚಾರ್ತಲ್ಯಾಂಕ್ ಸಾಂಗೊನ್ ಫಾಯ್ದೊ ನಾ, ಕಿತ್ಯಾಕ್ ಜ್ಯೆ ಸಮ್ಜತೆಲೆ ಆಸಾತ್ ತಾಂಕಾಂ ಸಮ್ಜಾಂವ್ಚಿ ಗರ್ಜ್ ನಾ ಆನಿ ಜೆ ಕೊಣ್ ಸಮ್ಜತೆಲೆ ನಾಂತ್, ತಾಂಕಾಂ ಸಮ್ಜಾಂವ್ಕ್ ವೆಚೆಂಯೀ ವೆರ್ಥ್.
ಕವಿತಾ ಬರಂವ್ಕ್ ಪ್ರಾಯ್, ಶಿಕಾಪ್, ಜಾತ್-ಕುಳಿ, ಅಂತಸ್ತ್, ಧರ್ಮ್ ಗರ್ಜ್ ನ್ಹಂಯ್, ಫಕತ್ತ್ ಚಿಂತ್ಪಾಚಿ ಧಾರ್ ಆಸ್ಲ್ಯಾರ್ ಪುರೊ. ತಶೆಂ ಮ್ಹಣ್ ಕೊಣಾ ಕೊಣಾಚೆಂ, ಖಂಚ್ಯಾ ಖಂಚ್ಯಾ ಭಾಸೆಚೆಂ ಲೋವ್, ಕೊಣಾಕ್ಚ್ಚ್ ಕಳಿತ್ ನಾಸ್ಚೆಪರಿಂ ಚೊರುನ್ ಆಪ್ಲ್ಯಾ ನಾಂವಾರ್ ಬರವ್ನ್ ’ಮಹಾನ್ ಕವಿ/ಚಿಂತ್ಪಿ/ಸಾಹಿತಿ’ ಆಮ್ಚಾ ಕೊಂಕ್ಣೆಂತ್ಯೀ ದರಬಸ್ತ್ ಆಸಾತ್. ಅಜ್ಯಾಪ್ ಮ್ಹಳ್ಯಾರ್ ಅಸಲ್ಯಾಂಕ್ ಪ್ರಶಸ್ಥಿ/ಪುರಸ್ಕಾರ್ ಸಯ್ತ್ ಮೆಳ್ಳ್ಯಾತ್ ದೆಕುನ್ ಹಾಣಿಂ ಬರಯಿಲ್ಲೆಂಚ್ ’ಕಾವ್ಯ್’ ಮ್ಹಣ್ಚೆ ಕುಂಡೊವಾದಿ ಅಪಾರ್. ಆನಿ ಅಸಲ್ಯಾಂನಿ ತರ್ಭೆತ್ ದೀವ್ನ್ ರುತಾಂ ಕೆಲ್ಲೆ ವಾ ಕರ್ಚೆ ಕಿತ್ಲೆ ಅಪ್ವಂತ್ ಆಸ್ತಿತ್ ಮ್ಹಳ್ಳೊ ಅಂದಾಜ್ ಕೊಣೆಂಯ್ ಕರ್ಯೆತಾ.
’ಮ್ಹಾಕಾಯ್ ಕವಿ ಕರಾ’ ಹ್ಯಾ ಮಯ್ನ್ಯಾಂತ್ ಥೊಡಿಂ ಉಂಚ್ಲಿಂ ಕವಿತಾ ಆಯ್ಲ್ಯಾಂತ್ ಮ್ಹಣ್ಚ್ಯಾಕ್ ಸಕಯ್ಲಿಂ ಥೊಡಿಂ ತರ್ಯೀ ಕವಿತಾ ಗೊವಾಯ್ ದಿತಿತ್. ತರ್ಯೀ ಏಕ್ ಸಂಗತ್ ಹಾಂಗಾಸರ್ ಉಲ್ಲೇಕ್ ಕರ್ಚಿ ಗರ್ಜೆಚಿ ಮ್ಹಣ್ ಭಗ್ತಾ, ಜೊ ಕೊಣ್ ಎದೊಳ್ ’ಮಯ್ನ್ಯಾಚೊ ಕವಿ’ ಜಾಲಾ, ತಾಕಾ ಪರತ್ ಆಮಿ ಮಯ್ನ್ಯಾಚೊ ಕವಿ ಜಾವ್ನ್ ವಿಂಚುಂಕ್ ನಾ. ತಶೆಂ ಆಸ್ತಾನಾ ಮಯ್ನ್ಯಾಚೆಂ ಕವಿತಾ ಹೆರ್ ಕವಿತಾಂಪ್ರಾಸ್ ಶ್ರೇಷ್ಟ್ ಮ್ಹಳ್ಳೊ ವಾದ್ ಪೊಕೊಳ್. ಹೆಂ ಚಿಂತಾಪ್ ಮತಿಂತ್ ಧರುನ್ ವೆತಾಸ್ತಾಂ ಆಯ್ಲೆವಾರ್ ಸುರು ಜಾಲ್ಲಿ ’ಕೊಂಕ್ಣಿ ಕುಂಡೊ/ಉಂಡೊ’ ಮೊನಿ ಚಳ್ವಳ್ ಗರ್ಜೆಚಿ ತರ್ಯೀ ಹಾಂಗಾಸರ್ ದಾವ್ಯಾಪಂತೀಯ್ ಚಿಂತಾಪ್ ಕೊಂಕ್ಣೆಚ್ಯಾ ಮಟ್ಟಾಕ್ ಭಲಾಯ್ಕೆಚೆಂ ಮ್ಹಣ್ ಮ್ಹಾಕಾ ಭಗಾನಾ, ಹೆಂ ಮ್ಹಜೆಂ ವೆಕ್ತಿಗತ್ ಚಿಂತಾಪ್. ಹ್ಯಾ ಸಂಸಾರಾಂತ್ ’ಹಾಂವ್ ಬರೊ’ ಮ್ಹಣೊಂಕ್ ಸರ್ವಾಂಕ್ ಹಕ್ಕ್ ಆನಿ ಸ್ವಾತಂತ್ರ್ ಆಸಾ. ಪುಣ್ ’ಹಾಂವ್ ವರ್ತೊಂ’ ಮ್ಹಣೊಂಕ್ ಹೆರಾಂಕ್ ಖೆಂಡ್ಚಿ ಎಕ್ಚ್ಚ್ ವಾಟ್ ನ್ಹಂಯ್ ಮ್ಹಳ್ಳೆಂ ಆಮಿ ಮತಿಂತ್ ಧರ್ಚೆಂ ಗರ್ಜೆಚೆಂ. (ಹಾಂಗಾಸರ್ ಹಾಂವ್ ಸಾಹಿತ್ಯಾಕ್ ಖೆಂಡ್ಚೆವಿಶಿಂ ಉಲಯ್ತಾಂ, ಪೊಕೊಳ್ ವೆಕ್ತಿತ್ವಾಕ್, ಹಿಪೊಕ್ರಿಸಿಕ್ ವಾ ಹೆರ್ ಸಮಾಜಿಕ್ ಪೊಕೊಳ್ಪಣಾಚೆರ್ ಖೆಂಡ್ಚ್ಯಾಕ್ ನ್ಹಂಯ್). ಹೆರಾಂಚೆಂ ’ಸಾರೆಂ’ ಮ್ಹಳ್ಳೆಕ್ಶಣ್ ’ಅಪ್ಣಾಚೆಂ ಬರೆಂ’ ಜಾತೆಲೆಂ ವಾ ಜಾಲೆಂ ಮ್ಹಣ್ ಚಿಂತ್ಚೆಂ ಬಾಂಯ್ತ್ಲ್ಯಾ ಮಾಣ್ಕ್ಯಾಚೆಂ ಚಿಂತಾಪ್ ಥೊಡ್ಯಾಂಕ್ ಸಂತುಷ್ಟ್ ಕರಿತ್ ಪುಣ್ ಸರ್ವಾಂಕ್ ನ್ಹಂಯ್.
ಹ್ಯಾ ಮಯ್ನ್ಯಾಂತ್ ಆಯಿಲ್ಲ್ಯಾ ಕವಿತೆಂನಿ ಮ್ಹಾಕಾ ಕಾಳ್ಜಾಂತ್ಲಿ ಬೋಬ್ ಆಯ್ಕತಾ ಕವಿ ಬಾಬ್ ವಿನ್ಸಿ ಮೆಲ್ಕಾರಾಚಿ. ಹಾಂಗಾಸರ್ ಕವಿ ಅಪುಣ್ ಕವಿತಾ ಬರಂವ್ಕ್ ಶಿಕ್ಚಿ ಸರ್ವ್ ಮಿನತ್ ಕರುಂಕ್ ತಯಾರ್ ಆಸಾಂ, ದೆಕುನ್ ಮ್ಹಜ್ಯಾ ಹ್ಯಾ ಮಿನತೆಚ್ಯಾ ಆಂಖ್ರೆಕ್ ಪಾಲೆಶೆಂ ಕರಾ ಶಿವಾಯ್ ಕರ್ಪಾಶೆಂ ನ್ಹಂಯ್ ಮ್ಹಳ್ಳೊ ಖಾಲ್ತೊ ಉಲೊ ಕಿತ್ಯಾಕ್ಗೀ ಮ್ಹಾಕಾ ಆಯ್ಕತಾ. ಹೆಂ ಸಂಪಾದಕಾಚೆ ಉಭ್ದೇಸ್, ಎಕಾ ತಾಕ್ಡೆಪರಿಂ, ಎಕಾ ಪೊಂತಾರ್ ’ಉತ್ತೇಜನಾಚಿ ಜವಾಭ್ದಾರಿ’ ತರ್ ಅನ್ಯೇಕಾ ಪೊಂತಾರ್ ’ಮಟ್ಟ್’ ಉರಂವ್ಚಿ ಜವಾಭ್ದಾರಿ. ಏಕ್ ವಯ್ರ್ ಉಭಾರ್ತಾನಾ ದುಸ್ರೆಂ ಅಪ್ಶೆಂಚ್ ಸಕ್ಲಾ ಯೆತಾ, ’ಮಟ್ಟ್’ಚ್ಚ್ ಪಳೆಲೆಂ ತರ್ ’ಉತ್ತೇಜನ್’ ಲ್ಹಾನ್ ಜಾತಾ. ’ಉತ್ತೇಜನ್’-ಚ್ಚ್ ಪಳೆಲೆಂ ತರ್ ’ಮಟ್ಟ್’ ಲ್ಹಾನ್ ಜಾತಾ. ಪುಣ್ ಅಪ್ಲ್ಯಾ ಖಾಸ್ಗಿ ಫಾಯ್ದ್ಯಾಕ್ ಗಳ್ಸುಂಕ್ ’ರೂಪ್/ಬೋಲ್ಸ್/ಅಂತಸ್ತ್’ ಪಳೆವ್ನ್ ಕೊಣಾಯ್ಕಿ ’ಉಂಚ್ಲೊ’ ಮ್ಹಣ್ಚೆಂ ಪ್ರೇತನ್ ಭಿಲ್ಕುಲ್ ಹಾಂಗಾಸರ್ ಚಲೊಂಕ್ ನಾ, ಚಲ್ಚೆಂಯ್ ನಾ.
ಕವಿ ಬಾಬ್ ಆಸ್ಟಿನ್ ಪ್ರಭು ಏಕ್ ವಿಂಚ್ಣಾರ್ ವಿಶಯ್ ಸಂಕೀರ್ಣತೆಚೊ ಲೇಪ್ ದೀವ್ನ್ ಘೆವ್ನ್ ಆಯ್ಲಾ. ಖರೆಂಚ್ ಜಾವ್ನ್ ಅಪುರ್ಭಾಯೆಚೆಂ ಚಿಂತಾಪ್ ಹಾಂತುಂ ದಿಸೊನ್ ಯೆತಾ.
’ಮತಿಂತ್ಲೆಂ ಚಿಂತಾಪ್ ಕಶೆಂ ಖಿರಂವ್
ಯೆಯಾ, ಮ್ಹಾಕಾ ಕವಿ ಕರಾ!’
ಕವಿ ಎಕಾ ರಿತಿಚೊ ಪಿಸೊ, ಕಿತ್ಯಾಕ್ ಮ್ಹಳ್ಯಾರ್ ವಾಸ್ತವ್ ಸಂಸಾರಾಕ್ ಜೆದ್ನಾಂ ಕವಿ ಅಪ್ಲ್ಯಾ ಪ್ರೇಮಿಕಾಕ್ ’ತುಜ್ಯಾ ಮೊಗಾಪಾಸತ್ ಹಾಂವ್ ಮೊಳ್ಬಾರ್ ಚಡೊನ್ ಚಂದ್ರೆಮ್ ಖುಂಟುನ್ ಹಾಡ್ತಲೊಂ’ ಮ್ಹಣ್ ಸಾಂಗ್ಚೆಂ ಉತಾರ್ ಕಿತ್ಲೆಂ ಫಟ್ಕಿರೆಂ? ಹೆಂ ಚಿಂತಾಪ್ ಕವಿ ಬಾಬ್ ಪ್ರಸನ್ನ್ ನಿಡ್ಡೋಡಿ ಅಪ್ಲ್ಯೆ ಕವಿತೆಂತ್ ಉಟಯ್ತಾ.
ಕವಿ ಬಾಬ್ (ಮಾ|) ಜೋರ್ಜ್ ಒಲಿವೆರಾ ಕವಿಚಿಂ ವೆವೆಗ್ಳಿಂ ರುಪಾಂ ಜಾಣಾಂ ದೆಕುನ್ ತಾಕಾಯ್ ಅಪ್ಣಾನ್ ಹ್ಯಾ ಪ್ರಥ್ವೆಚೆರ್ ಆಸ್ಚಾ ಹರ್ಯೆಕ್ ಬರ್ಯಾ ವಾಯ್ಟಾಚೆರ್ ಅಭಿವ್ಯಕ್ತ್ ಕರುಂಕ್ ಆಸಾ ದೆಕುನ್ ಕವಿ ಜಾಯ್ಜಯ್ ಮ್ಹಳ್ಳಿಂ ಚಿಂತ್ನಾಂ ಉಟಂವ್ಚಿಂ ದಿಸೊನ್ ಯೆತಾತ್.
ಕವಿ ಬಾಬ್ ಮೆಲ್ವಿನ್ ಜೆ. ವಾಸ್ ಸಂಸಾರಾಂತ್ ಪರ್ಜಳ್ಚಾ ಕವಿಂಕ್ ಸಮ್ಜೊಂಕ್ ಸಕ್ತಾ, ಪುಣ್ ಆಪ್ಲ್ಯಾಚ್ಚ್ ಶೆಜಾರ್ಚೊ ಕಳ್ವಳ್ಚೊ, ವ್ಹಳ್ವಳ್ಚಾ ಕವಿಚಿ ಬೋಬ್ ಆಯ್ಕೊಂಕ್ ಸಕಾನಾ ಮ್ಹಳ್ಳೆಂ ಸಂಕೀರ್ಣ್ ಚಿಂತಾಪ್ ಆಪ್ಲ್ಯಾ ಕವಿತೆಂತ್ ವ್ಹಾಳಂವ್ಚೆಂ ದಿಸೊನ್ ಯೆತಾ.
ಕವಿ ಬಾಬ್ ಮೆಲ್ವಿನ್ ಪಿಂಟೊ ನೀರುಡೆ ’ಕುಂಡೊ/ಉಂಡೊ’ ಚಳ್ವಳೆಚೊ ಏಕ್ ಪರೋಕ್ಶ್ ವಾಂಟೊ ದೆಕುನ್ ಹಾಚ್ಯಾ ಕವಿತೆಂತ್, ಕುಂಡೊ ಖಾತೆಲ್ಯಾಂಚೆರ್ ತಾತ್ಸಾರ್ ಆನಿ ರಾಗ್ ಉಟೊನ್ ದಿಸ್ತಾ.
ಕವಯತ್ರಿ ಬಾಯ್ ಪ್ರಿಯಾ ಸಿಕ್ವೇರಾ ಹ್ಯೇ ಪಾವ್ಟಿಂ ’ಗಾ’ ತಾಳ್ಯಾರ್ ವ್ಯಂಗ್ಯ್ ರಿತಿನ್ ಎಕೆಕ್ಲ್ಯಾಕ್ಚ್ ಧರ್ನ್ ಥಾಪ್ಡಾಂ ದಿತೇಚ್ಚ್ ವೆತಾ. ಹಿಚೆಂ ’ಸತ್ ಪಳಂವ್ಚಿ’ ಸಕತ್ ಮ್ಹಾಕಾಚ್ಚ್ ಥೊಡೆಪಾವ್ಟಿಂ ವಿಜ್ಮಿತ್ ಕರ್ತಾ.
ಕವಿ ಬಾಬ್ ವಲ್ಲಿ ಕ್ವಾಡ್ರಸ್ ಹರ್ಶೆಂಚೆಪರಿಂ ಅಪ್ಲೆಂ ಬಂಡಾಯ್ ವ್ಯಂಗ್ಯ್ ರಿತಿರ್ ಜಾಹೀರ್ ಕರ್ತಾ, ತೊ ಏಕ್ ಗಾಡಾಂವ್ ಘೆವ್ನ್ ಆಯ್ಲಾ ಆನಿ ಹಾಕಾಯ್ ಧಾಡಾವ್ನ್ ಧಾಡಾವ್ನ್, ಬಡವ್ನ್ ಬಡವ್ನ್, ವಾ ಖೊಟಾವ್ನ್ ಖೊಟಾವ್ನ್ ’ಕವಿ ಕರಾ’ ಮ್ಹಣ್ ತರ್ಭೇತ್ದಾರಾಂಕ್ ಉಲೊ ದಿತಾ. ಹ್ಯಾ ತರ್ಭೆತ್ದಾರಾಂಚಿ ವಳೊಕ್ ಜಾಲಿ ತರ್ ಹಿಂ ಗಾಡ್ವಾಂ ಕೊಣ್ ಮ್ಹಳ್ಳೆಂ ಅಪ್ಶೆಂಚ್ ದಿಸ್ತಾ.
ಕವಿ ಬಾಬ್ ಆಂಟನಿ ಬಾರ್ಕುರ್ ಕವಿ ಜಾಂವ್ಚಾಂಕ್ ಆಸಾಜಯ್ ಜಾಲ್ಲ್ಯಾ ಮೂಳ್ ಸ್ವಭಾವಾಕ್/ಗರ್ಜೆಕ್ ದಿವೊ ಚರಯ್ತಾ, ಪಯ್ಲೊ ’ಬರೊ ಮನಿಸ್’ ಜಾಲ್ಲೆಖರಿತ್, ಅಪುಣ್ ’ಉಂಚ್ಲೊ’/’ಮಹಾನ್’ ಕವಿ ಜಾವ್ನ್ ಕಸಲೊ ಫಾಯ್ದೊ? ಮ್ಹಳ್ಳೆಂ ಚಿಂತಾಪ್ ವ್ಹಾಳಯ್ತಾ.
ಕವಿ ಬಾಬ್ ವಿಲ್ಸನ್ ಕಟೀಲಾಚೆಂ ಹೆಂ ಕವಿತಾ ಕಾಂಯ್ ಏಕ್-ದೋನ್ ಪಾವ್ಟಿಂ ವಾಚಿಜೆ ಜಾಲ್ಲಿ ಕವಿತಾ ನ್ಹಂಯ್. ಪರತ್ ಪರತ್ ವಾಚಿಜಯ್ ಜಾಲ್ಲಿ ಕವಿತಾ. ಅಪುಣ್ ಮಹಾನ್ ಕವಿ (ಕೇಸ್ ಪಿಕ್ಲ್ಯಾತ್/ಝಡ್ಲ್ಯಾತ್) ಮ್ಹಣ್ತೆಲ್ಯಾ ಹರ್ಯೆಕ್ಲ್ಯಾಂನಿ ವಾಚುಂಕ್ ಜಾಯ್ ಜಾಲ್ಲಿ ಕವಿತಾ. ತಿತ್ಲಿ ಸಕತ್ ಹ್ಯಾ ತರ್ನ್ಯಾ ಕವಿಚ್ಯಾ ಉತ್ರಾಂಕ್ ಆನಿ ಕವಿತೆಕ್ ಮ್ಹಳ್ಳೆಂ ತುಮಿಂಚ್ ಪಳೆಯಾ.
"ವ್ಹಡ್ ಕವಿ ವ್ಹಡ್ ವ್ಹಡ್ ಸಂಗ್ತಿಂಕ್
ಜಿಕ್ತಾತ್.
ಲ್ಹಾನ್ ಕವಿ ಲ್ಹಾನ್ ಲ್ಹಾನ್ ಸಂಗ್ತಿಂಕ್
ಹಾರ್ತಾತ್".
ಪುಣ್ ಕವಿ ಬಾಬ್ ಫ್ರಾನ್ಸಿಸ್ ಫುರ್ತಾದೊ ಸಾದ್ಯಾ ಭಾಸೆನ್ ತರ್ಯೀ, ಥೊಡೊ ವ್ಯಂಗ್ಯ್, ಥೊಡೊ ರಾಗ್, ಥೊಡೊ ನಿರಾಸ್ ಹಾಂಚೊ ಲೇಪ್ ಆಪ್ಲ್ಯಾ ಕವಿತೆಕ್ ದಿತಾ. ಆನಿ ಹ್ಯಾ ಮಯ್ನ್ಯಾಚೊ ಕವಿ ಜಾವ್ನ್ ವಿಂಚೊನ್ ಯೆತಾ. ಅಪ್ಲಿ ಮಿನತ್ ಅಶಿಚ್ಚ್ ಮುಖಾರಿತ್ ತರ್ ಹಾಚೆಥಾವ್ನ್ ’ಕವಿತಾ’ ವರ್ಗಾಚಿಂ ಕವಿತಾ ಖಂಡಿತ್ ಜಾವ್ನ್ ಆಶೆವ್ಯೆತಾ. ಬಾಬ್ ಫ್ರಾನ್ಸಿಸಾಕ್ ಉಲ್ಲಾಸ್.
ಉತ್ರಾಂತ್ ಸೂತ್ರಾಂ - 9: ಮ್ಹಾಕಾಯ್ ಕವಿ ಕರಾ
[ವಾಂಟೆಲಿ ಜಾಲ್ಲಿಂ]
1. ಫ್ರಾನ್ಸಿಸ್ ಫುರ್ತಾದೊ, ಕಲೀನಾ.
9. ಮೆಲ್ವಿನ್ ಜೆ. ವಾಸ್, ಕೆಲರಾಯ್.
ಮ್ಹಾಕಾಯ್ ಕವಿ ಕರಾ [ಮಯ್ನಾಚೆಂ ಕವಿತಾ]-
ಫ್ರಾನ್ಸಿಸ್ ಫುರ್ತಾದೊ, ಕಲೀನಾ
ಖೊಲಿ ಆರಾಯಿಲ್ಲೆಪರಿ ಆರಾಯ್ತಾಂ,
ಬರೆಂ ವಾಯ್ಟ್ ಕಿತೆಂ ಪುಣಿ ನೆರಾಯ್ತಾಂ,
ಕೆದಳಾ ಛಾಪೊನ್ ಯೆತಾಕೀ ಮ್ಹಣ್ ಪಳಯ್ತಾಂ,
ಮ್ಹಾಕಾಯ್ ಕವಿ ಕರಾ ಮ್ಹಣ್ ಲಾಲೆತಾಂ.
ಜಾಯ್ ಜಾಲ್ಯಾರ್ ಹೆಂ ಖೊಮಿಸ್ ಕಾಡ್ತಾಂ,
ಅನಿ ಲಾಂಬ್ ಧವೊ ಜಿಬ್ಬೊ ಘಾಲ್ತಾಂ,
ತುಮಿ ಸಾಂಗ್ಲ್ಯಾರ್ ಕಲ್ಸಾಂವ್ಯಿ ಕಾಡ್ತಾಂ,
ಅನಿಂ ಹಾತ್-ಮಾಗಾಚೆಂ ಪುಡ್ವೆಂ ನೆಸ್ತಾಂ.
ಕೇಸ್ ವಾಡವ್ನ್ ಲ್ಹಾನ್ ಶೆಂಡೊ ಭಾಂದ್ತಾಂ,
ಪಾಂಯಾಂತ್ಲ್ಯೊ ದೊನೀ ವ್ಹಾಣೊಂ ಬದ್ಲಿತಾಂ,
ಅನಿಂ ಕಾನ್ಪುರ್ ನವಾಬಾಚೆ ಮೊಚೆ ಘಾಲ್ತಾಂ,
ಕಸೋಯ್ ಮ್ಹಾಕಾ ಕವಿ ಕರಾ ಮ್ಹಣ್ ಮಾಗ್ತಾಂ.
ಬೊಲ್ಸಾಂತ್ ದೊದೋನ್ ಪೆನ್ನಾಂ ಶಿರ್ಕಾಯ್ತಾಂ,
ಹಾತಾಂತ್ ಏಕ್ ಸತ್ರಿ ಅನಿಂ ಗೃಂಥ್ ಘೆತಾಂ,
ಖಂದಾರ್ ಬೆಂಗ್ಳುರ್ ರಸಿಮಾಚೊ ಶೆಲೊ ಘಾಲ್ತಾಂ,
ಆತಾಂ ಪುಣಿ ಮ್ಹಾಕಾ ಕವಿ ಕರಾ ಮ್ಹಣ್ ಮಾಗ್ತಾಂ.
ಕವಿ ಸಮ್ಮೇಳನಾಕ್ ಆಪಯಾ ಹಾಂವ್ ಧಾಂವೊನ್ ಯೆತಾಂ,
ತೊಂಡಾಂತ್ ಏಕ್ ಬನಾರಸಿ ಬಿಡಾ ಘಾಲ್ನ್ ಚಾಬ್ತಾಂ,
ಖಾಡ್ಕಿ ಇಲ್ಲಿ ವಯ್ರ್ ಉಕಲ್ನ್ ಕವಿತಾ ವಾಚ್ತಾಂ,
ವೇಳ್ ಮೆಳ್ತಚ್ ಪೀಕ್ ಉಡಂವ್ಕ್ ಭಾಯ್ರ್ ಧಾಂವ್ತಾಂ.
ಮ್ಹಜಿ ಕವಿತಾ ಬರಿ ಲಾಗ್ಲ್ಯಾರ್ ತಾಳಿಯೊ ಪೆಟಾ,
ವ್ಹಿಡಿಯೊ ಕಾಡಾ, ಟಿ. ವ್ಹಿ.ರ್ ಅನಿಂ ಪತ್ರಾಂನಿಂ ಘಾಲಾ,
ಕವಿತಾ ವಾಯ್ಟ್ ಲಾಗ್ಲಿ ತರ್ ತಾಂತ್ಯಾಂ ಉಡಯ್ನಾಕಾ,
ಕೊಂಕ್ಣಿ ಮಾಯೆಚಿ ಸೆವಾ ಕರ್ಚಿ ಹಾವೆಂ - ಹೆಂ ವಿಸರ್ನಾಕಾ.
ಯೆಯಾ ಮ್ಹಾಕಾ ಕವಿ ಕರಾ! [ - ಆಸ್ಟಿನ್ ಪ್ರಭು]
ಆಂಗಾರ್ ನಾಸ್ತಾಂ ಅಧುರ್ ವಿಣ್ಗಿಂ
ಖಾವ್ನ್ ಸದಾಂಚ್ ತಿ ರುಕಾ ಕಣ್ಗಿ
ಕಿರ್ಮೆಂ ಗಳವ್ನ್, ಮುಸಾಂಕ್ ಧಾಂವ್ಡಾಂವ್ನ್
ಮಾಗ್ತಾಂವ್ ದೆವಾಲಾಗಿಂ ತ್ಯಾ ಸರ್ಗಿಂ
ಹಾಂವ್ ಹೆಂ ಹಾಂಗಾ ಕಶೆಂ ಬರಂವ್
ಮತಿಂತ್ಲೆಂ ಚಿಂತಾಪ್ ಕಶೆಂ ಖಿರಂವ್
ಯೆಯಾ, ಮ್ಹಾಕಾ ಕವಿ ಕರಾ!
ನ್ಹೆಸಾಣ್ ನ್ಹೆಸೊನ್ ಅಧುರ್ ವಿಣ್ಗೆಂ
ದಾಖವ್ನ್ ದಿಲ್ಲೆಂ ಮಾಸಾಳ್ ಹರ್ಧೆಂ
ಮೇಕಪ್ ಕರುನ್, ಪರ್ಮಳ್ ಶಿಂಪ್ಡಾಂವ್ನ್
ಪಿಸ್ವಾಯ್ತಾಂ ದಾದ್ಲ್ಯಾಂಕ್ ಭುಲೊಂಕ್ ಪುರ್ತೆಂ
ತ್ಯಾ ಹೊಟ್ಲಾ ಕುಡಾಂತ್ ಕರ್ತಾಂ ರಂಪಾಟ್
ಹಾಂವೆಂ ಭಗ್ಲ್ಲಿ ಮಝಾ ಕಶಿ ವರ್ಣುಂ
ಯೆಯಾ, ಮ್ಹಾಕಾ ಕವಿ ಕರಾ!
ನವಿ ಹೊಕಾಲ್ ಹಾಂವ್ ತ್ಯಾ ಘರಾ
ಲಾಗಿಂ ಯೇ ತುಂ ಮ್ಹಜ್ಯಾ ಘರ್ಕಾರಾ
ಮ್ಹಾಕಾ ಪೊಟ್ಲುನ್ ಧರುನ್, ಉಮೆ ದಿವುನ್
ಜಾವ್ಯಾಂ’ಮಿಂ ವಿಣ್ಗಿಂ ಎಕಾಚ್ಚ್ಫರಾ
ಉಪ್ರಾಂತ್ ಕಿತೆಂ ಜಾಲ್ಲೆಂ ತೆಂ ಪುರಾ
ಉತ್ರಾಂ ಉತ್ರಾಂನಿ ಸರ್ವಾಂಕ್ ಕಳಂವ್ಕ್
ಯೆಯಾ, ಮ್ಹಾಕಾ ಕವಿ ಕರಾ!
ಮ್ಹಾಕಾಯ್ ಕವಿ ಕರಾ [ - ಆಂಟನಿ ಬಾರ್ಕುರ್]
ಮ್ಹಾಕಾಯ್ ಕವಿ ಕರಿನಾಂತ್,
ಉಪ್ಕಾರ್ ಮಾಗ್ಲೊ ಏಕ್ ರಾತಿಂ ಸೊಪ್ಣಾಂತ್.
ತಿತ್ಲ್ಯಾರ್... ಕೊಣ್ಗೀ ಎಕ್ಲೊ ಪುನೆಕೆಲ್ಲೊ ಆಯ್ಲೊ,
ದಾಕಯ್ಲಿ ಧಾಂಪಲ್ಲಿ ವಾಟ್;
ತಿ ಮಾಟ್ ಪಡ್ಲ್ಲಿ, ತಾಣೆಂ ಸಾಟ್ ಸುಮಾನ್
ಝರಯಿಲ್ಲಿ ವಾಟ್.
ಹಾಂವ್ಯ್ ಚಲ್ಲೊಂ, ಹಾತಿಂ -ಪಣ್ತೆಚಿ ಪೆಲಿ
ಉಜ್ವಾಡ್ - ಉತ್ರಾಂ ಚಾಂದ್ನೆಂ;
ಮೆಳ್ಳೆಂ ನಿಗೂಢ್ -ಬಾಮುಣಾಚೆಂ ಚೆಡುಂ,
ಚಾಬಯ್ಲೊ -ಫಿಲೊಸೊಫಿಚೊ ಭಿಕುಣ್.
ಸೊಭಿತ್ ಉತ್ರಾಂ ಫುಲಾಂ ದಾಲಿ
ಕೊಂಕ್ಣಿಂ ಮಾಂಯೆನ್ ಭರುನ್ ದಿಲಿ;
ಸೊಭಿತ್ ಉತ್ರಾಂ, ಸೊಭಿತ್ ಚಿಂತ್ನಾಂ,
ಸೊಭಿತ್ ಭೊಗ್ಣಾಂಚಿಯ್ ಸೈರಿಕ್ ಜಾಲಿ.
ಕೆನ್ನಾ ವಾಟೆರ್ "ವ್ಹಳೂ ವ್ಹಳೂ ವ್ಹಾಳ್"
ತರ್ ಕೆನ್ನಾ "ಸಾಗೊರಾಚ್ಯೊ ಝರಿ".
ಪಾವ್ಲಾಂ ಪಯ್ಶಿಲ್ಯಾ ಪರ್ವತಾ ಪರ್ಯಾಂತ್
ಕಾಡುನ್ ಪಯ್ಲಿಂ ಪಾವ್ಲಾಂ.
ಖಂಯ್ ಆಂತ್?
ಆನಿಂ ಅಬ್ಳೆ, ಆವ್ಚಿತ್ ವಾಟೆರ್ ಘುಂವ್ಡಿ ಮೆಳ್ಳಿ.
ಕಿತೆಂಗೀ ಭೆಟ್ತಾ ಮ್ಹಣ್ ಆಸ್ಲ್ಲೊಂ ಹಾಂವ್.
ಅಜಾಪ್.
ಮ್ಹಾಕಾ ಮ್ಹಜಿಚ್ ಭೆಟ್ ಜಾಲ್ಲಿ.
ಮ್ಹಾಕಾ ಕವಿ ಕರಾ ಮ್ಹಣ್ತಾಲೊಂ ಹಾಂವ್
ಆತಾಂ ಮ್ಹಣ್ತಾಂ - ’ಮ್ಹಾಕಾ ಮನಿಸ್ ಕರಾ’.
ಮ್ಹಾಕಾಯ್ ಕವಿ ಕರಾ [- ವಿನ್ಸಿ ಮೆಲ್ಕಾರ್]
ಭಿಜ್ಲ್ಯಾ ಬಿಯಾಕ್ ಖಿರ್ಲೊ೦ಕ್ ಸೊಡಾ
ಖಿರ್ಲೊನ್ ವಾಡ್ಚ್ಯಾ ಝಡಾಚೊ ಪೋಸ್ ಕರಾ
ವಾ೦ಕ್ಡೆ, ತಿ೦ಕ್ಡೆ ವಚಾತ್ ತರ್ ನೀಟ್ ಕರಾ
ಬಾಗ್ವೊನ್ ಸಕ್ಲಾ ಪಡಾತ್ ತರ್ ಆಧಾರ್ ಜಾಯಾ
ಹಾಸಾನಾಕಾತ್ ಪಿಕೊನ್, ಸುಕಾತ್ ತರ್
ಕಾತರ್ನ್ ಸೊಡಿನಾಕಾತ್ ಫಳ್ ದೀ೦ವ್ಕ್ ನಾ ಮ್ಹಣ್
ಇಲ್ಲಿ ತರೀ ಮಾತ್ಯೆ೦ತ್ಲಿ೦ ಥ೦ಡಾಯ್ ಚಾಕವ್ನ್ ಫಾ೦ಟೆ ಪುಟ್ತಿತ್
ಜಾಗ್ರುತ್ ರಾವಾ ತುಮಿ೦ ಪಿಕ್ತಾನಾ ದಾ೦ತ್ ದಾಖಯ್ತ್?
ಕಾಳಿಜ್ ಪಾರ್ಕಿಯ್ ಮ್ಹಣ್ ಸಮ್ಜೊನ್ ಘೆಯಾ
ಆಶೆ೦ವ್ಚೊ ನಾ ಮುಕುಟ್, ಸನ್ಮಾನ್ ಯಾ ಧನ್
ವ್ಹಾಳೊನ್ ಯೆ೦ವ್ಚ್ಯಾ ಲಿಖ್ಣ್ಯಾ೦ಕ್ ವ್ಹಾಳೊ೦ಕ್ ಸೊಡಾ
ದಯಾ ಕರುನ್ ಮ್ಹಜೆರ್ ಇಲ್ಲಿ ಮ್ಹೊವಾಳಾಯೆಚಿ ದೀಷ್ಟ್ ಘಾಲಾ
ಮ್ಹಾಕಾಯೀ ಕವಿ ಕರಾ
ಮ್ಹಾಕಾಯ್ ಕವಿ ಕರಾ [- ಪ್ರಸನ್ನ್, ನಿಡ್ಡೋಡಿ]
"ಮೊಳ್ಬಾವಯ್ಲಿಂ ತಾರಾಂ ಆಕಾಸಾಚೊ ಚಂದ್ರ್
ವಿಚಾರುನ್ ಪಳೆ. ತುಜೆಂ ಹುಜ್ರಿಂ ಪ್ರಕಟ್ ಕರ್ತಾಂ..!"
ಸಾಂಗಾಪ್ ಸುಲಭ್.. ಕೋಣ್ ತೊ ಬಾಪಾಯ್ಚೊ ಪೂತ್
ಚಡಾತ್ ಆಕಾಸಾಕ್ ತಾರಾಂ ಚಂದ್ರೆಮ್ ಹುಮ್ಟುಂಕ್..?!
ಲಿಖ್ಣಿ ಝರಂವ್ಕ್ ಹಾತಾಕ್ ಧರುನ್ ಶಿಕಯ್ತ್ ಜಾಕಾ
ತೀಂತ್ ಮಾತ್ರ್ ಕಾಗ್ದಾರ್ ಶಿಂಪ್ಡಾತ್.. ಸಭ್ದ್ ಜಮ್ತಿತ್ ತಾಕಾ..?
ಕಸೆಂ ಬಾಂಧುನ್ ದಿಲ್ಲಿ ಭುತಿ ಆನಿ ಪಯ್ಶ್ಯಾಂಚಿ ಪೊತಿ
ಕವಿ ತಾಲೆಂತ್ ಜಲ್ಮಾನ್ ಯೆತಾ ನ್ಹಂಯ್ ಶಿಕವ್ನ್ ಉದೆತಾ..!
ಜೆದ್ನಾಂ ರವಿಕ್ ಚೊವುನ್ ಕವಿ ಲಿಖ್ಣಿ ಝರಯ್ತ್
ತೀಂತ್ ಸವೆಂ ಮತಿ ಪಡ್ದೊಯ್ ವರ್ಣಾಂ ಸಬ್ಧಾಂನಿ ಭರಾತ್
ಸಾಳಕ್ ಜಶೆಂ ಫುಲ್ತಾ ಚಿಕ್ಲಾ ಕೆದಾಂತ್ ಸ್ವ-ಇಚ್ಚೆನ್ ಸೊಭಿತ್
ಕವಿ ಸುಫಳ್ ಜೆದ್ನಾಂ ತೊ ಸಾಂಗಾತ್ ’ಮ್ಹಾಕಾ ಕವಿ ಕರ್ನಾಕಾತ್’
ಕವಿಚ್ಯಾ ದೊಳ್ಯಾಂನಿ ಚೊವುನ್ ಪಳೆ ಬಾಳಾ
ಹರ್ ವಸ್ತ್ ಏಕ್ ನಾಜೂಕ್ ಕವಿತಾ
ಸಬ್ಧ್ ಜೊಡುನ್ ವೊಳ್ಕಿ ವೊಡುನ್ ಮತಿ ಪಡ್ದ್ಯಾರ್ ಖೆಳಾಯ್ತ್
ನಾಂ ಕೆದಿಂ ಉಚಾರಿತ್, ಮ್ಹಾಕಾಯ್ ಕವಿ ಕರಾತ್
ಮ್ಹಾಕಾ ಕವಿ ಕರಾಗಾ [- ಪ್ರಿಯಾ ಸಿಕ್ವೇರಾ, ಫೆರಾರ್]
ಕೊಂಕ್ಣೆಚೊ ಹಾಂವ್ ಸೆವಕ್ಗಾ
ಕೊಂಕ್ಣಿ ಮಾತ್ರ್ ಸಾರ್ಕಿ ಯೇನಾಗಾ
ಥಂಯ್ಚೆಂ ಚೊರುನ್ ಹಾಂಗಾಚೆಂ ಫಾರುನ್
ಕಾಗ್ದಾರ್ ಕಿತೆಂಗೀ ಗಿಚ್ಚಿತಾಂ ಗಾ
ದುಸ್ರೆ ದಿಸಾ ಮ್ಹಜೆಂಯ್ ಕವಿತಾ
ಸಾಯ್ಟಿಂ ಪತ್ರಾಂನಿ ಪರ್ಗಟ್ ಜಾತಾಗಾ
ಪಾಂಯ್ ಧರ್ಚಿ ಗರ್ಜ್ ನಾಂಗಾ
ಕವಿ ಜಾಂವ್ಚೆಂ ಸಲೀಸ್ಗಾ
ಸಮಾಜೆಚೆಂ ಸತ್ ಕಿತ್ಯಾಕ್ಗಾ
ಮಾಜ್ರಾ ಬರಿ ದೊಳೆ ದಾಂಪ್ಗಾ
ಸತ್ ತೆಂ ಫಟ್ ಕರ್ಗಾ
ಫಟ್ ಅಪ್ಶೆಂಚ್ ಸತ್ ಜಾತಾಗಾ
ಮ್ಹಾಕಾ ಕವಿ ಮ್ಹಣ್ ಕೋಣ್ ವಳ್ಕಾತಾಗಾ
ಮ್ಹಜಿಂ ಕವಿತಾ ವಾಚ್ತಾ ಕೊಣ್ಗಾ
ಸತ್, ನೀತ್, ಬಂಡಾಯ್ ಕೊಣಾಕ್ ಜಾಯ್ಗಾ
ಹಾಕಾ ತಾಸ್ಚೆಂ, ತಾಕಾ ಪುಸ್ಚೆಂ
ಕೊಂಕ್ಣಿ ದೀಸ್ ಹೊಚ್ಚ್ ಗಾ
ದೆಕುನ್ ಕೊಂಕ್ಣೆಕ್ ಥುಕ್ತಾತ್ಗಾ
’ಮ್ಹಾಕಾ ಕವಿ ಕರಾ ಮ್ಹಣ್’ ಹಾಂವೆಂ
ಕೊಣಾಯ್ಚೆಯ್ ಪಾಂಯ್ ಧರುಂಕ್ನಾಂತ್ಗಾ
ಹಾಂಕಾಂ ತುಕ್ಲಾಂವ್ಕ್ ತಾಂಕಾಂ ಹಲ್ಕುಂಕ್
ಮ್ಹಜ್ಯಾನ್ ಹೆಂ ಅಸಾಧ್ಯ್ ಗಾ
ಜಿತ್ಲೆ ಚಡ್ ಭಕ್ತ್ಗೀ
ತಿತ್ಲೆಂ ಊಂಚ್ ಹಾಂಚೆಂ ನಾಂವ್ಗಾ
ಆಮ್ಚಾ ಕೊಂಕ್ಣೆಚಿ ಆವಸ್ಥಾ ಹಿಚ್ ಗಾ
ಥೊಡ್ಯಾಂಕ್ ಮಾತ್ರ್ ಫಾಯ್ದೊಚ್ ಫಾಯ್ದೊ ಗಾ!!!
ಮ್ಹಾಕಾಯ್ ಕವಿ ಕರಾ [- ಮಾ|ಜೋರ್ಜ್ ಒಲಿವೆರಾ]
ಚಿ೦ತ್ನಾ೦-ಭೊಗ್ಣಾ೦ ಅಸಾತ್ ರಾಸ್-ರಾಸ್..
ಉತ್ರಾ೦-ಸಬ್ದ್ ಅಸಾತ್ ಶೆ೦ಬೊರ್..
ಮಧುರ್ ಉಡಾಸ್ ಮ್ಹತಿ೦ತ್, ಅಸಾತ್ ಸಬಾರ್
ಜಿಣ್ಯೆ೦-ಅನ್ಭೋಗ್ ಅದಲ್-ಬದಲ್ ಕರು೦ಕ್.
ಕವನಾರ್ ತುಕಾ ಸ೦ಪರ್ಕ್ ಕರು೦ಕ್ ಮಾಕಾ ಜಾಯ್ತ್?
ಸುರ್ಯೊ ಉದೆವ್ನ್-ಅಸ್ತಮ್ತಾವರೆಗ್
ಹಾ೦ವ್ ಸೊಬಾಯ್ ದೆಕ್ತಾ ಸ್ರಷ್ಟೆಚಿ೦.
ನೆಕೆತ್ರಾ೦ ರಾತಿ೦ ಗಗನ್ ಸೊಬಾಯ್ತಾನಾ,
ಚಾ೦ದ್ರೆ೦ ಸಾವ್ಳೆರ್ ತಣಾರ್ ಬಸೊನ್ ಹಾ೦ವ್ ಚಿ೦ತಾ೦-
ಲಿಖು೦ಕ್ ಏಕ್ ಕವನ್ ಫಕತ್ ತುಜೆ೦ ಖಾತಿರ್!
ಸುರ್ಯೊ ಉದೆತಾನಾ, ಸುಕ್ಣೆ೦ ನಾದ್ ಗಾತಾನಾ,
ಫುಲಾ೦ ವೊಡ್ತಾ೦ತ್ ಫುಲ್ತಾನಾ, ಭ್ರಮರ್ ಚು೦ಬನ್
ಘೆತಾನಾ, ಏಕಾ ಘರಿ೦ ಭುಕೆನ್ ಬಾಳ್ ರಡ್ತಾನಾ,
ಅವಯ್ ಪಾನೊ೦ ದಿತಾನಾ..
ಹೆ೦ ದ್ರಶ್ಯ್ ಉತ್ರಾ೦ವ್ಕ್ ಆಶೆತಾ೦ ಹಾ೦ವ್, ಹಾ೦ವ್ ಕವಿ ಜಾಯ್ನ್?
ಮ್ಹಜಿ೦ ಬೊಗ್ಣಾ೦ ತುಕಾ ಸಮ್ಜಾಲ್ಯಾರ್,
ಮ್ಹಜಿ೦ ಚಿ೦ತ್ನಾ೦ ತುವೆ೦ ಪಾರ್ಕಿಲ್ಯಾರ್,
ಮ್ಹಜೊ ಅನ್ಬೋಗ್ ತುವೆ೦ ತುಜೊ ಕರು೦ಕ್
ಮಾಕಾ ತುವೆ೦ ಕಬ್ಲಾತ್ ದಿಲ್ಯಾರ್..
ಹಾ೦ವ್ ಕವಿ ಜಾಯ್ನ್! ಮ್ಹಾಕಾಯ್ ಕವಿ ಕರ್!!
ಮ್ಹಾಕಾಯ್ ಕವಿ ಕರ್ [- ಮೆಲ್ವಿನ್ ಪಿಂಟೊ, ನೀರುಡೆ]
ಮ್ಹಕಾಯೀ ಏಕ್ ಕವಿ ಕರಾ
ಪಯ್ಶ್ಯಾಂವಾಲೆ ಮುಕಾರ್ ಸರಾ
ಉತ್ರಾಂ ದುಕೊಳ್ ಚಿಂತಾಪ್ ಪೊಕೊಳ್
ವರ್ಸಾಕ್ ಹಜಾರ್ ಕವನಾಂ ಲಿಕುಂಕ್
ಪಯ್ಶೆ ಒತುನ್ ವಿಮರ್ಸೊ ಲಿಕುನ್
ಸಭೆರ್ ಫುಲಾಂ ತುರೊ ಆಪ್ಣಾಂವ್ಕ್
ಮ್ಹಾಕಾಯೀ ಏಕ್ ಕವಿ ಕರಾ!
ವಾಚ್ಪಿ ಆಮ್ಚೆ ಅಮಾಯಕ್ ಬಿರೆಂ
ಮೆಂದ್ವಾಂತ್ ತಾಂಚ್ಯಾ ಭರ್ಲಾಂ ಸಾರೆಂ
ಮಾತ್ಸೆಂ ಚಡಿತ್ ಜಾಯ್ನಾ ವೊಜೆಂ
ದೆಕುನ್ಂಚ್ ಸಾಸ್ಣಿಕ್ ಹಟ್ ಮ್ಹಜೆಂ
ಮ್ಹಾಕಾಯೀ ಏಕ್ ಕವಿ ಕರಾ!
ವೆಗಿಂಚ್ ಕವಿತಾ ಸಂಗ್ರಹ್ ಕಾಡ್ತಾಂ
ಕೊಂಕ್ಣಿ ಕಾವ್ಯ್ ಸಾಲ್ವಾರ್ ಕರ್ತಾಂ
ಉಚಾಂಬಳ್ ಕವಿಂಕ್ ಶಿಂದುನ್ ಸೊಡ್ತಾಂ
ಕೊಂಕ್ಣಿ ಮಾಯೆಚಿ ‘ಸೆವಾ’ ಕರ್ತಾಂ
ಮ್ಹಾಕಾಯೀ ಏಕ್ ಕವಿ ಕರಾ!
ಉಂಡೊ ಖಾವ್ನ್ ಕುಂಡೊ ಒಂಕುಂಕ್
ಉತ್ರಾಂ ನಾಸ್ತಾಂ ಪತ್ರಾಂ ಭರುಂಕ್
ಮ್ಹಾಕಾಯೀ ಏಕ್ ಕವಿ ಕರಾ
ಜಾಯ್ನಾ ತರ್ ಕುಂಡೊ ಖಾವ್ನ್ ಮೊರಾ!!
ಮ್ಹಾಕಾಯ್ ಕವಿ ಕರಾ [- ಮೆಲ್ವಿನ್ ಜೆ. ವಾಸ್]
"ಕಾಳ್ಜಾ ಥಾವ್ನ್ ಆಯಿಲ್ಲೆಂಚ್ ಕಾಳ್ಜಾಕ್ ವೆತಾ"
ಪಾಕ್ಳ್ಯಾ ಮೆಸ್ತ್ರಿಚಿಂ ಉತ್ರಾಂ ಮತಿಕ್ ಸಮ್ಜಾಲಿಂ ನಾಂತ್ ತರೀ
ಅತ್ರೆಗ್ಚ್ಯಾ ಕಾಳ್ಜಾಕ್ ಚುಂಬಕಾಪರಿಂ ವೆಂಗ್ಲಿಂ
ತೋಂಡ್ ವಾಚುನ್ ಲಕ್ಷಣ್ ಸಾಂಗ್ಚ್ಯಾ ವಿಧ್ಯೆಕ್
ಕೊನ್ಶ್ಯಾಕ್ ಲೊಟುನ್ ಕಾಳ್ಜಾಂ ವಾಚೊಂಕ್ ಧರ್ಲಿಂ
ಕಾಳೊಕ್ಚ್ ಕಾಳೊಚ್ ಕಾಳೊಕ್! ದಿಷ್ಟಿಕ್ ಕಾಂಯ್ ದಿಸ್ಲೆಂ ನಾಂ
ಹ್ಯಾ ಕಾಳೊಕಾ ಥಾವ್ನ್ ಕಿತೆಂ ಯೇಂವ್ಕ್ ಸಕ್ತಾ?
ದೀಸ್ಭರ್ ಚಿಂತ್ನಾಂ ಆಟವ್ನ್ ಮಧ್ಯಾನೆರ್ ಜಾಗೊ ಜಾವ್ನ್
ನಿದೆಂತ್ಲ್ಯಾ ಸ್ವಪ್ಣಾಂತ್ ಉಲಂವ್ಚಾ ಬಾಯ್ಲೆಕ್ ವಿಚಾರ್ಲೆಂ
ಬಾಯ್ಲ್ ಮ್ಹಣ್ತಾ:
ತ್ಯಾ ಆಂಕ್ವಾರ್ಯಾಂಚ್ಯಾ ಹಾಸ್ಟೆಲಾ ಪಾಟ್ಲ್ಯಾ ಕಾಳೊಕಾಂತ್
ತೊ ಆಜ್ಯೀ ಆಯ್ಲಾ!
ಮ್ಹಾಕಾ ತಾಚಿ ಬೋಬ್ ಆಯ್ಕೊನ್ ಯೆತಾ.
ತೊ ಮ್ಹಳ್ಯಾರ್ ಕೊಣ್? ಕಾಳೊಕಾಂತ್ ಹಾಂವ್ ಪುಸ್ಪುಸ್ಲೊಂ
ಶ್ಶ್..! ತೊ ಹುಸ್ಕಾರೊನ್ ಕೊಣಾಕ್ ತರೀ ಭುಜಯ್ತಾ
ಮಧ್ಯಾನೆಚ್ಯಾ ಹ್ಯಾ ಕಾಳೊಕಾಂತ್? ಕಶೆಂ ಭುಜಯ್ತಾ
"ಆಜ್ ತುಮಿ ತರೀ ಮ್ಹಾಕಾ ಕವಿ ಕರಾ
ತ್ಯಾ ಕುರ್ಡ್ಯಾಂಚಾ ದೊಳ್ಯಾಂಕ್ ದೀಷ್ಟ್ ಲಾಂವ್ಕ್
ತುಮ್ಚ್ಯಾ ಸಂಸಾರಾಂತ್ ಝಗ್ಲಾಣೆಂ ಪೆಟಯ್ತಾಂ!"
ಮ್ಹಾಕಾಯ್ ಕವಿ ಕರಾ [- ವಲ್ಲಿ ಕ್ವಾಡ್ರಸ್]
ಸಂಸ್ರಾಂತ್ಲ್ಯಾ ಹೆರ್ ಗಾಡ್ವಾಂಪರಿಂ
ಚಾರ್ ಪಾಂಯಾಂಚೆಂ ಗಾಡಾಂವ್ಗಾ
ದಾಡಾವ್ನ್ ದಾಡಾವ್ನ್ ಪಿಕಯಾ
ತಿರ್ಸ್ಯಾ ದೊಳ್ಯಾಂಚೆಂ ಎಕಾ ಶಿಮ್ಟೆಚೆಂ
ದಾಟೆಂ ಮೊಟೆಂ ಗಾಡಾಂವ್ಗಾ ಹೆಂ
ಬಡವ್ನ್ ಬಡವ್ನ್ ಶಿಕಯಾ
ಕಸ್ಲೀಂಯ್ ತುಮ್ಚಿಂ ವೊಜಿಂ ಆಸೊಂ
ಬಿಂದಾಸ್ ಖಾಂದಾರ್ ಚಡಯಾ
ಜಲ್ಮಾನ್ಂಚ್ ವ್ಹಾವಂವ್ಕ್ ಶಿಕಯ್ಲಾಂ
ಕೊಣಾಕ್ ಖೊಟಾಯ್ಜೆ ಹಿಶಾರೆ ದಿಯಾ
ಖೊಟಾಂವ್ಚಾಂತ್ ಭಾರಿಚ್ ಹುಶಾರ್
ಏಕ್ ಪಾವ್ಟಿಂ ಕವಿ ಕರ್ನ್ ಪಳೆಯಾ
ಪಳೆತಾನಾ ಕೊಣ್ಂಚ್ ಮ್ಹಣ್ಚೆನಾಂತ್
ದಿಸ್ತಾ ಪುಶ್ಟಿ ಘೊಡ್ಯಾಬರಿ
ತೋಂಡ್ ಹಾಲಯ್ನಾಸ್ತಾಂ ಆಯ್ಕತಾಂ
ನಿಜಾಯ್ಕಿ ವಿಧ್ವಾನ್ ಕವಿಕ್ ಸರಿ
ಬೊಂಚಾಯಾ ಕೊಚಾಯಾ ತಾಸಾಯಾ
ಗಾಡ್ವಾಕ್ ಹ್ಯಾ ಶಿಕಯಾ
ದುರಾಂ ಸಾಂಗೊಂಕ್ ಸಕಚ್ನಾ
ಘಾಬ್ರಿ ಕರ್ಚಿ ಕಿತ್ಯಾಕ್ ಸಾಂಗಾ
ಬಾಸ್ ನಾ ಅಪ್ಲೊ ಮ್ಹಳ್ಳೊ ದೇಸ್ ನಾ
ಗುರುದಕ್ಶಿಣಾ ಕಸಲಿ ಸಾಂಗಾ
ಹಾಲಂವ್ಕ್ ಧಲಂವ್ಕ್ ಉಲಂವ್ಕ್
ಕಶೆಂ ಜಾಯ್ ತಶೆಂ ಶಿಕಯಾ
ಕೊಣಾಕ್ ವ್ಹಾವಯ್ಜೆ ಕೊಣಾಕ್ ಪಾವಯ್ಜೆ
ತುಮಿ ಫಕತ್ತ್ ಹುಕುಮ್ ಕರಾ
ಕೊಣ್ ಘೊಡೊ ಆನಿ ಕೊಣ್ ಗಾಡಾಂವ್
ತೆಂ ತುಮಿ ಕರುನ್ ಸೊಡಾ
ಫೊನಾರ್ ಚಾಟಿಂಗಾರ್ ಇಮೇಯ್ಲಾರ್
ಕಶೆಂ ತರೀ ಶಿಕಯಾ
ತುಮ್ಚೆಪರಿಂಚ್ ಮ್ಹಾಕಾಯ್ ಏಕ್ ಕವಿ ಕರಾ
ಕವಿ ಜಾಂವ್ಚೆ ವಾಟೆರ್ [- ವಿಲ್ಸನ್ ಕಟೀಲ್]
"ಲ್ಹಾನ್ ಲ್ಹಾನ್ ಕವಿ ಲ್ಹಾನ್ ಲ್ಹಾನ್ ಕವಿತಾ ಲಿಕ್ತಾತ್" - ಕೆ. ವಿ. ತಿರುಮಲೇಶ್.
ಚಂದ್ರ್ ತಾರಾಂಚೊ ಪರ್ಜಳ್ ಪಾವಾನಾ
ಫೊಂಡಾಂತ್ ಪುರ್ಲ್ಲ್ಯಾ ಲಾಚಾರ್ ವಾತಿಂಚ್ಯಾ
ಅಸ್ಕತ್ ಉಜ್ವಾಡಾಂನೊ...
ಉತ್ರಾಂನಿ ಲಾಸ್ ಹಾಡಾ
ಜಳ್ಚಿ ವೋಡ್ ಜಿವಿ ಜಾಂವ್
ಹಾಂವೀ ಏಕ್ ಕವಿ ಜಾಂವ್
ಗುಲೊಬಾ ಪಾಕ್ಳ್ಯೊ ರಂಗ್ ಲಾಯ್ನಾಂತ್
ಪಾನಾಂ ಇಡ್ಯಾಂತ್ ಲಿಪೊನ್ ಆಸ್ಚ್ಯಾ
ನಿಶ್ಟುರ್ ಕಾಂಟ್ಯಾಂನೊ...
ವೊಳಿಂಕ್ ರಗ್ತಾ ದಾನ್ ದಿಯಾ
ದೆಕ್ಚಿ ದೀಶ್ಟ್ ನವಿ ಜಾಂವ್
ಹಾಂವೀ ಏಕ್ ಕವಿ ಜಾಂವ್
ಉಬ್ಚೊ ಪಾಲಂವ್ ವಿಜ್ಮಿತ್ ಕರಿನಾ
ಹರ್ದೆಂ ಚಿರ್ಲ್ಲ್ಯಾ ಕುಂಬು ಖೊಮ್ಸಾರ್
ಉಮ್ಕಾಳ್ಚ್ಯಾ ಸುತಾಂನೊ...
ಸುಂರ್ಗಾರಾಚೊ ಘುಟ್ ಫಡಾ
ಅನ್ಭೊಗ್ ಶಿಂವ್ಚಿ ಸುವಿ ಜಾಂವ್
ಹಾಂವೀ ಏಕ್ ಕವಿ ಜಾಂವ್
ಫಾಲ್ಯಾಂಚ್ಯಾ ಸಪ್ಣಾಂಕ್ ಜಾಗ್ ಜಾಯ್ನಾ
ಪರ್ನ್ಯಾ ಪೆಟೆಂತ್ ಧಾಂಪುನ್ ದವರ್ಲ್ಲ್ಯಾ
ಆದ್ಲ್ಯಾ ಯಾದಿಂನೊ...
ಕಾಳ್ಜಾಚಿಂ ದಾರಾಂ ಬಡಯಾ
ಕಯ್ದಿ ಹಾತಿಂ ಚಾವಿ ಜಾಂವ್
ಹಾಂವೀ ಏಕ್ ಕವಿ ಜಾಂವ್
ವ್ಹಡ್ ಗ್ರಂಥ್ ಸೊಡ್ ದೊಡ್ ಕರಿನಾ
ಖಾಸ್ಗಿ ಡೈರಿಂತ್ ಪಿಂಜ್ಲ್ಲ್ಯಾ ಕಾಗ್ದಾಚ್ಯಾ
ಕಿರ್ಕೊಳ್ ಕುಡ್ಕ್ಯಾಂನೊ...
ವಾಚ್ಪಾಚಿ ರೂಚ್ ವಾಡಯಾ
ದುಬ್ಳೆಂ ತೀಂತ್ ರುವಿ ಜಾಂವ್
ಹಾಂವೀ ಏಕ್ ಕವಿ ಜಾಂವ್
"ವ್ಹಡ್ ಕವಿ ವ್ಹಡ್ ವ್ಹಡ್ ಸಂಗ್ತಿಂಕ್
ಜಿಕ್ತಾತ್
ಲ್ಹಾನ್ ಕವಿ ಲ್ಹಾನ್ ಲ್ಹಾನ್ ಸಂಗ್ತಿಂಕ್
ಹಾರ್ತಾತ್"
About
us | Feedback | Contact us
Copyright
© 2005 DAAIZ.COM All rights reserved.
Page concept, designed and maintained by Ashawadi
Publications
More in Daaiz
Send your comments to author on this writing
This is not a comment box. Nothing you write here appears on the site or is shown to any other reader: it is sent to him by email, privately, and he replies to you directly if a reply is called for.