ನಾಂವಾಚಿ

ಕೊಂಕ್ಣೆಚಾ ವಿಂಚ್ಣಾರ್ ಸಾಹಿತ್ಯಾಚೊ ಕೊನ್ಸೊ - ’ದಾಯ್ಜ್’ - ಫಕತ್ತ್ ಕೊಂಕಣಿ ಥಾವ್ನ್, ಕೊಂಕಣಿ ಪರ್‍ಯಾಂತ್, ಕೊಂಕಣಿ ಖಾತಿರ್.

ಉತ್ರಾಂತ್ ಸೂತ್ರಾಂ

ಮಯ್ನ್ಯಾಚೊ ಕವಿ - 6

ಸೂತ್ರ್ 6: ಆಮ್ಚಿ ಮಾತ್ರ್ ಸೆವಾ, ಹೆರಾಂಚಿ ಫಕತ್ತ್ ನಾಂವಾಚಿ

ಕ್ಲೆರೆನ್ಸ್ ಕೈಕಂಬ

ಆಮ್ಚಿ ಮಾತ್ರ್ ಸೆವಾ! ಹೆರಾಂಚಿ ನಾಂವಾಚಿ?

ಹ್ಯಾ ಸಂಸಾರಾಂತ್ ಜಿಯೆತೆಲ್ಯಾ ಹರ್ಯೆಕ್ಲ್ಯಾಕ್ ಅಪ್ಲೊ ಮ್ಹಳ್ಳೊ ಧರ್ಮ್ ಆಸಾ, ಜಾತ್ ಆಸಾ, ದೇವ್ ಆಸಾ, ಆಚಾರ್ ವಿಚಾರ್ ಆಸಾತ್, ಸಂಸ್ಕಾರ್ ಆಸಾ, ಶಿಕಾಪ್ ಆಸಾ ಸಮ್ಜಣಿ ಆಸಾ. ಎಕಾಚ್ ಮಾಪಾಚಿ ನ್ಹಂಯ್ ತರ್‌ಯೀ ತ್ಯಾ ತ್ಯಾ ಮನ್ಶ್ಯಾಚ್ಯಾ ತಾಂಕಿ ಪ್ರಕಾರ್ ತ್ಯಾ ತ್ಯಾ ಮನ್ಶ್ಯಾಕ್ ಹೆಂ ಸರ್ವ್ ಲಾಭ್ಲಾಂ. ಹರ್ಯೆಕಾ ದೆವಾನ್ ದಿಲ್ಲೆ ವಾ ದಿಂವ್ಚೆ ಉಪಾದೆಸ್ ಹೆಚ್ - ಮನ್ಶಾ ಮೊಗಾಚಿ ಜಿಣಿ ಜಿಯೆಂವ್ಚಿ. ಹರ್ಯೆಕಾ ಧರ್ಮ್ ಗೃಂಥಾನ್ ದಿಂವ್ಚೆ ಉಪಾದೆಸ್ ಹೆಚ್ಚ್; ಮನ್ಶಾಚೊ ಮೋಗ್‌ಚ್ ದೆವಾಚೊ ಮೋಗ್. ಇತ್ಲೆಂ ಸರ್ವ್ ಆಸೊನ್‌ಯೀ ಆಮ್ಚೊ ಸಂಸಾರ್ ಕಿತ್ಯಾಕ್ ಇತ್ಲೊ ಉಚಾಂಬಳ್ ಜಾಲಾ? ಕಿತ್ಯಾಕ್ ಮನಿಸ್ ಮನ್ಶ್ಯಾಕ್ ವೆವೆಗ್ಳ್ಯಾ ನಿಬಾಂನಿ ಎಕಾಮೆಕಾಚಾ ಮಾಸಾಕ್ ಭುಕೆಲಾ ಕಿತ್ಯಾಕ್ ಮನ್ಶಾಕ್ ಮನ್ಶಾ ರಗ್ತಾಚಿ ತಾನ್?

ಮನಿಸ್ ಏಕ್ ಸಂಘ್ ಜೀವಿ - ಕರೆಂ. ಕೊಣ್‌ಯೀ ಮನಿಸ್ ಅಪುಣ್ ಎಕ್ಸುರೊ ಜಾವ್ನ್ ಜಿಯೆಂವ್ಕ್ ಆಶೆನಾ ವಾ ಸಕಾನಾ. ತಾಕಾ ಅಪ್ಲೊ ಪೆಲೊ ಮ್ಹಳ್ಳೊ ಜಾಯ್, ಕುಟಾಮ್ ಮ್ಹಳ್ಳೆಂ ಜಾಯ್. ಸೆಜ್ ಸಾಂಬಾರ್ ಮ್ಹಳ್ಳೆಂ ಜಾಯ್, ಫಿರ್ಗಜ್ ಕುಟಾಮ್ ಜಾಯ್, ಅಪ್ಲೆಚ್ ಭಂವಾರಿಂ ಜೊಕ್ತೆಂ ಪರಿಸರ್ ಜಾಯ್. ಹ್ಯಾ ಪರಿಸರಾಂತ್ ಜಿಯೆತೆಲ್ಯಾ ವೆವೆಗ್ಳ್ಯಾ ಕಾಲೆತಿಚ್ಯಾ ಜನಾಂಗಾ ಮಧೆಂ ಮನಿಸ್ ಅಪ್ಲಿಂ ಪಾಳಾಂ ರೊಂಬವ್ನ್ ಜಿಯೆತಾ. ಆಜ್ ಮನಿಸ್ ಬರೆಂ ಫಾಲೆಂ ಸಮ್ಜತಾ ಮ್ಹಳ್ಳೆಂ ವ್ಹಡಾ ಧಯ್ರಾನ್ ಹರ್ಧೆಂ ಪೆಟುನ್ ಸಾಂಗ್ತಾ ತರ್‌ಯೀ ಹಕೀಗತೆಂತ್ ಆಮಿಂ ಖಂಯ್ ಆಸಾಂವ್? ಆಮಿಂ ಖಂಯ್ಚರ್ ಆಮ್ಚೆಂ ಮಿಸಾಂವ್ ಸುರು ಕೆಲ್ಲೆಂ? ಖಂಯ್ ಪಾವ್ಲ್ಯಾಂವ್? ಖಂಚ್ಯಾ ದಿಶೆನ್ ಚಮ್ಕೊನ್ ಆಸಾಂವ್? ಆನಿ ಹಿ ವಾಟ್ ಆಮ್ಕಾಂ ಖಂಯ್ಚರ್ ಪಾಯ್ತೆಲಿ? ಹೆಂ ಚಿಂತುಂಕ್ ಸಕ್ತಾಂವ್?

ಹ್ಯಾ ಸಂಸಾರಾಂತ್ ಸರ್ವ್ ಗಾಂವಾಂನಿ, ಸರ್ವ್ ಪ್ರಾಂತ್ಯಾಂನಿ, ಸರ್ವ್ ಜನಾಂಗಾಂನಿ, ಸರ್ವ್ ಧರ್ಮಾನಿ, ಸರ್ವ್ ಭಾಸೆಂನಿ ನಾ ಸಮಧಾನ್ ಆಸಾ ಜಾಲ್ಯಾರ್ ಹಾಚೆಂ ಮೂಳ್ ಕಾರಾಣ್ ಜಾವ್ನಾಸಾ ಭೋವ್ ಮಾರ್ಮಿಕ್ - ತೆಂ ಜಾವ್ನಾಸಾ, ಆಮಿಂ ಸುಭಾಗಿ, ಆನಿ ಹೆರಾಂ ನಾಪಾಸ್ ಮ್ಹಳ್ಳೆಂ ಚಿಂತಾಪ್.

ಆಮಿ ಸಂಸ್ರಾಕ್ ಬೋಟ್ ಜೊಕ್ಚ್ಯಾಧಿಂ ಆಮ್ಚಾ ಕೊಂಕ್ಣಿ ಬಾಂಯ್ತ್ ಎಕೊಡಿ ನದರ್ ಚರವ್ಯಾಂಗಿ? (ಮಾಫ್ ಕರಾ ’ಬಾಂಯ್’ ಮ್ಹಳ್ಳೊ ಜೊಕ್ತೊ ಸಬ್ಧ್ ವ್ಹಾಪಾರ್‌ಲ್ಲ್ಯಾಕ್).

ವ್ಹಯ್! ಆಮಿ ಆಜ್ ಕೊಂಕ್ಣಿ ಪಾಲೆಲ್ಯಾ, ಕೊಂಕ್ಣಿ ಫುಲ್ಲ್ಯಾ, ಕೊಂಕ್ಣಿ ಶಾಯ್ನಿಂಗ್ ಮ್ಹಳ್ಳೆ ನಾರೆ ಘಾಲುಂಕ್ ಪುರೊ, ಪುಣ್ ಹಕೀಗತೆಂತ್ ಹೆ ಸಕ್ಕಡ್ ನಾರೆ ಕೊಣಾ ಕೊಣಾಚೆಂ ಧೊಲ್ಕೆಂ ಭರುಂಕ್ ಆನಿ ಕೊಣಾ ಕೊಣಾಚಿ ಮರ್ಯಾದ್ ಉಗ್ತ್ಯಾ ಬಾಜಾರಾಂತ್ ಸೊಲ್ಚಾಕ್ ಆನಿ ಕೊಣಾ ಕೊಣಾಕ್ ಮಾನ್ ಪುರಸ್ಕಾರ್ ಗಿಳುಂಕ್ ಮಾತ್ರ್ ಸೊಡ್ಲ್ಯಾರ್ ಹಕೀಗತೆಂತ್ ಆಮ್ಚಾ ಜಾಲಾಂತ್ ಆಮ್ಚಾ ಕೊಂಕ್ಣೆಂತ್ ಬಿಂಡಿ ಸೊಲಾಂಯ್ ಜಾಯ್ನಾಂತ್.

ಕಿತ್ಯಾಕ್? ಆನಿ ಕಶೆಂ?

ಭೋವ್ ಸಂಪೆಂ;

ಆಮಿಂಚ್ ಆಮ್ಚಾ ಪರಿಸರಾಂತ್ ದೊರೆ ಉಭಾರ್ಲ್ಯಾತ್, ಆಮ್ಚೆಂ ಕೊಂಕ್ಣಿ ರಾಜ್ವಟ್ಕಿ ಆಸಾ ಕರುಂಕ್, ಆನಿ ಹ್ಯಾ ದೊರ್‍ಯಾ ಭಿತರ್ ಆಮ್ಚೆಚ್ ಥೊಡೆ ತುಂಡುರಾಯ್ ಆಮಿಂಚ್ ನಮ್ಯಾರ್ಲ್ಯಾತ್, ತೆ ತೀನ್ ಕಾಸಾಂಕ್ ಯೋಗ್ಯ್ ನಾತ್ಲೆಲೆ ತರ್‌ಯೀ ವ್ಹಡ್ ನ್ಹಂಯ್. ಆಮಿಂ ತಾಂಕಾಂ ಚಾವಿ ದಿಲ್ಯಾ, ದೆಕುನ್ ತಾಣಿಂ ಉಟ್ಚೆಂ, ಬೊಸ್ಚೆಂ, ಖಾಂವ್ಚೆ, ಜೆಂವ್ಚೆಂ ವಾ ವಾಯ್ ಸೊಡ್ಚೊ ತರ್‌ಯೀ ಆಮ್ಚಾ ಮಾರ್ಗ್‌ದರ್ಶನಾಖಾಲ್. ಆನಿ ಆಮ್ಚಾ ದೊರ್‍ಯಾಭಾಯ್ರ್ ಕಿತೆಂ ಜಾತಾ ಮ್ಹಳ್ಳೆಂ ಆಮ್ಕಾಂ ಪಡೊನ್ ಗೆಲ್ಲೆಂ ನಾ. ಕಿತ್ಯಾಕ್ ಜಿತ್ಲೊ ವ್ಹಡ್ ದೊರೊಗೀ, ತಿತ್ಲೆ ಭದ್ರ್ ಆಮಿ. ದೆಕುನ್ ಆಮ್ಚಾ ಪರಿಸರಾಂತ್ ಆಮಿಂಚ್ ಭೊಟ್ ಆನಿ ಆಮಿಂಚ್ ಸಾಂಗ್‌ಲ್ಲಿ ಆಮಾಸ್. ಆಮ್ಚಾ ದೊರ್‍ಯಾ ಭಾಯ್ರ್ ಆಸ್ಚೆಂ ಸಕ್ಕಡ್ ಕೇದ್!. ದೆಕುನ್ ಆಮ್ಚಾ ತಳ್ಳೆಕ್ ಕೊಣೆಂಯ್ ಆಯ್ಲ್ಯಾರ್ ತಾಂಕಾಂ ಕಶೆಂ ಪುರ್ತೆಂ ನಾಗ್ಡೆಂ ಕರ್ಚೆಂ ಮ್ಹಳ್ಳಿ ವಿಧ್ಯಾ ಆಮ್ಚಾ ರಗ್ತಾನ್ ಆಸಾ. ಆಮಿ ಸಂಸಾರಾಕ್ ಬುದಿ ಸಾಂಗ್ಚಾ ವರ್ಗಾಂತ್ಲೆ. ಸಂಸಾರ್ ಕಸೊ ಚಲ್ತಾ, ಕಸೊ ಚಲಾಜಯ್ ಮ್ಹಳ್ಳೆಂ ಆಮ್ಕಾಂ ಕಳಿತ್ ಆಸಾ. ದೆಕುನ್ ಆಮಿ ಹ್ಯಾ ಸುಭೆಧಾರಾಂಕ್ ವಾ ತುಂಡುರಾಯಾಂಕ್ ಪಯ್ಲೆಂಚ್ ತಾಕಿದ್ ದಿಲ್ಯಾ - ತುಮಿ ಪುಸ್ಕಿ ಸೊಡ್ಚಿ ತರ್‌ಯೀ ಆಮ್ಚಾಚ್ ಪಾಗೊರಾ ಭಿತರ್ ಮಾತ್ರ್.

ದೆಕುನ್ ಆಮ್ಚಿ ಮಾತ್ರ್ ಸೆವಾ - ಹೆರಾಂಚಿ ಫಕತ್ತ್ ನಾಂವಾಚಿ.

ಆಮಿ ಮಾರ್ಚೆ ಮಾತ್ರ್ ವಾಗ್ - ಹೆರಾಂನಿ ಮಾರ್ಚೆ ಉಂದಿರ್ (ತೇಯೀ ಮೆಲ್ಲೆ ಉಂದಿರ್).

ಆಮಿ ಮಾತ್ರ್ ಮುಖೆಲಿ - ಹೆರಾಂ ಸಕ್ಕಡ್ ದಲಾಲಿ.

ಆಮಿ ಕರ್ಚಿ ವಾ ಕೆಲ್ಲಿ ಮಾತ್ರ್ ಖಬಾರ್ - ಹೆರಾಂನಿ ಕರ್ಚಿ ಕಾಮ್ ನಾಸ್ತಾನಾ.

ಆಮಿ ಮಾತ್ರ್ ಭೊಟ್ - ಹೆರಾಂ ಸಕ್ಕಡ್ ಜಾತ್ ನಾತ್‌ಲ್ಲಿಂ.

ಹ್ಯಾ ಪರಿಗತೆಂತ್ ಆಮ್ಚೆಂಚ್ ಬೊಳ್ಕೆಂ ಆನಿ ಆಮ್ಚೆಂಚ್ ಕೊಳ್ಕೆಂ. ಆಮ್ಚಿಚ್ ಪದ್ವಿ ಆನಿ ಆಮ್ಚಿಚ್ ರಾಜ್ವಟ್ಕಿ. ಆಮ್ಚಿಚ್ ಕೊಂಕಣಿ ಆನಿ ಆಮ್ಚಿಚ್ ಸೆವಾ. ಬಾಕಿಚೆ ಪಡೊಂದಿ ಖಣಿಕ್. ಅಶೆಂ ಮ್ಹಣೊನ್ ಕೊಂಕ್ಣಿ ಉರ್ಲ್ಯಾ ವಾ ಉರ್ತಾ ಆಮ್ಚೆವರ್ವಿಂ ಮ್ಹಳ್ಳೆಂ ದಾಂಗ್ರೊ ಮಾರುಂಕ್ ಆಸಾ ಆಮ್ಕಾಂ. ಹ್ಯಾ ಖಾತಿರ್ ಕೊಂಕ್ಣಿ ವಾಗ್, ಕೊಂಕ್ಣಿ ಬೊಕುಲ್, ಕೊಂಕ್ಣಿ ಪೆಟೊ, ಕೊಂಕ್ಣಿ ಪೆರ್ಮಾರಿ, ಕೊಂಕ್ಣಿ ಸೊಂಸೊ, ಕೊಂಕ್ಣಿ ಉಂದಿರ್, ಕೊಂಕ್ಣಿ ಪಾಡೊ, ಕೊಂಕ್ಣಿ ಚಿತಾಳ್ ಆನಿ ಕಿತೆಂ ಮಾತ್ತಿ ಗೊಬೊರ್ ಬಿರುದೊ ಘೆಂವ್ಚ್ಯೊ ಕಿತೆಂ? ಪುಣ್ ಹಕೀಗತೆಂತ್ ಕೊಂಕ್ಣಿ ಉರ್ತಾ ವಾ ಉರ್ಲ್ಯಾ, ಹೆಂ ಸಕ್ಕಡ್ ಪಯ್ಸ್ ರಾವೊನ್, ಕಿತೆಂಚ್ ಉಲಯ್ನಾಸ್ತಾಂ ತಮಾಸೊ ಪಳೆಂವ್ಚಾ ಸಾದ್ಯಾ ಲೊಕಾಂ ಥಾವ್ನ್. ಜಾಂಕಾಂ ಕಸಲ್ಯೊಚ್ ಬಿರುದೊ ಲಾಭಾನಾಂತ್, ಖಂಚೇಯ್ ಮಾನ್-ಸಮ್ಮಾನಾಕ್ ತೊ ಆಂಯ್ಡೆ ಘೊಟುನ್ ನಾ.

ದೆಕುನ್ ಸಂಸಾರಾನ್ ಆಮ್ಕಾಂ ದೊಗ್ಗು ಸಲಾಮ್ ಕರಿಜಾಯ್. ಆಮಿ ಚಂದ್ರಾರ್ ಉಡ್‌ಲ್ಲೆ. ಕೊಂಕ್ಣೆಕ್ ಚಂದ್ರಾಕ್ ಪಾವಯ್ತೆಲೆ. ಚಂದ್ರಾರ್ ಎದೊಳ್‌ಚ್ ಮಲ್ಬಾರಿ ಆಸಾತ್ ಕಂಯ್. ಪುಣ್ ಕೊಂಕ್ಣೆಕ್ ಚಂದ್ರಾಕ್ ಪಾವಂವ್ಚಾಂತ್ ದುಭಾನ್ ನಾ - ಕಾಂಯ್ ತ್ಯಾ ಮಲ್ಬಾರಿಂಕ್ ಆಡೊವ್ ಘಾಲ್ಯಾರೀ ಘಾಲೆಂ. ಕೊಣಾಕ್ ಕಿತೆಂ? ಆಮಿಂಚ್ ವಯ್ರ್, ಹೆರಾಂ ಸಕ್ಕಡ್ ಕೋಯ್ರ್. ಹೆಂ ವಾಸ್ತವ್ ಪರಿಗತೆಚೆಂ ಸ್ಪಷ್ಟ್ ವರ್ಣಣ್ ವಾಚುನ್ ಆತಾಂ ಥೊಡಿಂ ದಾಂತ್ ಖಿರ್ಲಿತೆಲಿಂಚ್ - ತರ್‌ಯೀ ಕವಿ ಹ್ಯಾ ಪರಿಗತೆಂತ್ ಖಂಯ್ ಆಸಾ? ಹ್ಯಾ ಪರಿಗತೆಂತ್ ತೊ ಕಿತೆಂ ಕರ್ತಾ?

ಹೆಂ ಕಿತ್ಯಾಕ್? ಸಕ್ಕಡ್ ವೆವಸ್ತಿತ್ ರಿತಿನ್ ಜಾಂವ್ಚೆಂ ಹೆಂ ಕಿತ್ಯಾಕ್? ಫಕತ್ತ್ ಆಪ್ಲೆಂ ಬೊಳ್ಕೆಂ ಭರುಂಕ್. ಕೊಂಕ್ಣಿ ಕೊಂಕ್ಣಿ ಮ್ಹಣ್ತೆಲ್ಯಾ ಎಕೆಕ್ಲ್ಯಾಕ್ ಧರ್ನ್ ವಿಚಾರಾ ತುಮಿಂ ತುಮ್ಚಾ ಬೊಲ್ಸಾಂತ್ಲೆ ಕಿತ್ಲೆ ಪೊಯ್ಶೆ ಕೊಂಕ್ಣೆಕ್ ಘಾಲ್ಯಾತ್ ಮ್ಹಣ್? ಸಕ್ಕಡ್ ನಾಗ್ಡೆ ಜಾತೆಲೆ ತೆದ್ನಾಂ. ಮಾಜಾರ್ ದೊಳೊ ಧಾಂಪುನ್ ದೂದ್ ಪಿಯೆತಾನಾ ಇತ್ಲೆಂಚ್ ಚಿಂತಾ ಕಂಯ್ - ಸಂಸಾರ್ ಆಪ್ಣಾಕ್ ಪಳೆನಾ ಮ್ಹಣ್. ಪುಣ್ ಸಂಸಾರ್ ಬೇಕೂಫ್ ನ್ಹಂಯ್. ಸಂಸಾರ್ ಉಲಯ್ನಾ ಜಾವ್ಯೆತ್, ಪುಣ್ ಸಕ್ಕಡ್ ಬರ್‍ಯಾನ್ ಸಮ್ಜಾತಾ.

ಹ್ಯಾ ಮಯ್ನ್ಯಾಚೆಂ ಸೂತ್ರ್ ಕಾಂಯ್ ಚಿಲ್ಲರ್ ನ್ಹಂಯ್, ದೆಕುನ್ ಕವಿಂನಿ ಜಾಯ್ತೆಂ ಮಾತೆಂ ಖೊರ್ಪಿಲ್ಲೆಂ ದಿಸ್ತಾ. ಥೊಡ್ಯಾಂನಿ ಭಳಿಶ್ಟ್ ಕವಿತಾ ಬರಂವ್ಚ್ಕ್ ಪ್ರೇತನ್ ಕೆಲಾಂ. ಥೊಡೆ ದಾಕ್ಶೆಲ್ಯಾತ್, ಥೊಡೆ ಕಾವ್ಜೆಲ್ಯಾತ್, ಕಾಂಯ್ ಸತ್ ಉಚಾರುಂಕ್ ವಚೊನ್ ಫಾಲ್ಯಾಂ ಲಾಭೊಕ್ ಆಸ್ಚಿ ಏಕ್ ಪ್ರಶಸ್ಥಿ ಪುಣಿ ಚುಕಾತ್‌ಗೀ ಮ್ಹಣೊನ್ ಆಸ್ಯೆತಾ.

ಪುಣ್ ಸತ್ ತೆಂ ಸತ್‌ಚ್ ನ್ಹಂಯ್‌ಗಿ?

ದಿಕಾಕ್ ದೂದ್ ಮ್ಹಣೊನ್ ಪಿಯೆಲೆಂ ಜಾಲ್ಯಾರ್ ಜೀವ್ ವಚಾನಾಯೆ ರಾವ್ತಾವೆ?

ದೆಖುನ್ ಜಾಯ್ಜಯ್ ಆಮ್ಚೆ ಚಡ್ತಾವ್ ಕವಿ ಅಜೂನ್ ಬಾಂಯ್ತ್‌ಚ್ ಆಸಾತ್ ಆನಿ ಬಾಂಯ್ತ್‌ಚ್ ಲಾಗ್ ಘಾಲ್ತಾತ್.

ಆತಾಂ ಹ್ಯಾ ಮಯ್ನ್ಯಾಚ್ಯಾ ಎಕೆಕಾ ಕವಿತೆಂಚೆರ್ ತಿಳುನ್, ರಿಗೊನ್ ಪಳೆತಾನಾ ವಾಚ್ಪ್ಯಾಂ ಸಮೊರ್ ಉಭಿಂ ಜಾಂವ್ಚಿಂ ರುಪ್ಣಿಂ ಅಪುರ್ಭಾಯೆಚಿಂ.

ಹ್ಯಾ ಪರಿಗತೆಚೆರ್ ಬಾಯ್ ಪ್ರಿಯಾ ಸಿಕ್ವೇರಾಚೆಂ ಕವಿತಾ ’ಕಿತ್ಲೆಂ ಅರ್ಥ್ ಆಸಾ?’ ಸವಾಲ್ ಕರ್ತಾ. ಸಂಸಾರ್ ಅಸಲ್ಯಾ ಎಕಾ ಅಸಂಬದ್ದ್ ಪರಿಗತೆಂತ್ ಜಿಯೆತಾ ಮ್ಹಳ್ಯಾರ್, ಎಕಾ ಸಾರುಣೆಂತ್ಲೊ ಇರ್ ಸಯ್ತ್ ಅಪ್ಣಾನ್ಂಚ್ ಕೋಯ್ರ್ ಝಾಡ್ಚೊ ಮ್ಹಣ್ ದಾಂಗ್ರೊ ಮಾರ್ಚೆಂ ಚಿಂತಾಪ್ ಕವಿತೆಂತ್ ಉಟಯ್ತಾ.

ಕವಿ ಬಾಬ್ ಸಿರಿಲ್ ಪೆರಿಸ್ ಅಪ್ರೂಪಾಯೆನ್ ಆಯ್ಲಾ ತರ್‌ಯೀ, ಸತಾಚೆಂ ತುಪೆಂಚ್ ಘೆವ್ನ್ ಆಯ್ಲಾ. ಹ್ಯಾ ಸಂಸಾರಾಂತ್ ಖರೊ ಕಲಾಕಾರ್ ಆನಿ ತಾಚೆರ್ ಜಾಂವ್ಚಾ ಶೋಶಣಾಚೆರ್ ಆರ್ಸೊ ಧರ್ತಾನಾ ಆಮ್ಚಾ ಸಮಾಜೆಂತ್ ಎಕಾ ಕಲಾಕಾರಾಚಿ ಬೋಬ್ ಆಯ್ಕತೆಲೆ ಕವಿ ಖಂಯ್ ಆಸಾತ್? ಹಾಂಗಾಸರ್ ಅಪ್ಲೆ ನಾಟಕ್, ಅಪ್ಲ್ಯೊ ಕಾಣ್ಯೊ, ಅಪ್ಲೆಂ ಸಕ್ಕಡ್ ಜಾಗೆಂ ಆಸ್ತಾಂಚ್ ಮ್ಹಾನ್ ಕಲಾಕಾರ್ ಲುಟುನ್ ಮಾನ್-ಪುರಸ್ಕಾರ್ ಜೊಡ್ತಾನಾ ಕುಡ್ಡ್ಯಾ ಸಂಸಾರಾಕ್ ದಿಸ್ಚೆಂ ತರ್‌ಯೀ ಕಿತೆಂ ವಾ ಕಶೆಂ?

ಆಯ್ಚೊ ಸಂಸಾರ್ ಭಾಯ್ಲ್ಯಾನ್ ಧವೊ ನಿತಳ್ ನಿತಳ್ ತರ್‌ಯೀ ಭಿತರ್ ಕಾಳೊ ಕಾಳೊ ಪೊಕೊಳ್ ಮ್ಹಣ್ತಾ ಕವಯತ್ರಿ ಬಾಯ್ ನಿರ್ಮಲಾ ಗೋವಿಯಸ್.

ಸಂಸಾರಾಕ್ ಚಡ್ತಾವ್ ಜಾವ್ನ್ ಪಯ್ಸಿಲೊ ಗುಡೊ ಸೊಭಿತ್ ದಿಸ್ತಾ, ಪುಣ್ ಕವಯತ್ರಿ ಬಾಯ್ ವಾಯ್ಲೆಟ್ ಪಿರೇರಾಕ್ ಲಾಗ್ಸಿಲೊ ಗುಡೊಚ್ ಮ್ಹೆಳೊ ಆನಿ ಕುಸ್ಡೊ ದಿಸ್ಚೆಂ ವಾಜ್ಬಿ. ದೆಕುನ್ಂಚ್ ಮ್ಹಣ್ಚೆಂ ಮನ್ಶಾಂಕ್ ಪಾರ್ಕುಂಕ್ ತೋಂಡ್ ನ್ಹಂಯ್, ಕಾಳಿಜ್ ಪಳೆ ಮ್ಹಣ್. ರುಕಾಚಿ ಸೊಭಾಯ್ ಪಾನಾಂನಿ ಆಸ್ಯೆತಾ, ಪುಣ್ ಘಟಾಯ್ ಯೆಂವ್ಚಿ ಪಾಳಾಂನಿ ನ್ಹಂಯ್‌ವೆ?.

ಕವಿ ಬಾಬ್ ಫ್ರಾನ್ಸಿಸ್ ಫುರ್ಟಾಡೊಕ್ ಭೋವ್ಶಾ ಉತ್ರಾಂತ್ ಸೂತ್ರಾಂತ್ಲೆಂ ಸೂತ್ರ್ ಸಮ್ಜೊಂಕ್ ನಾ ದೆಕುನ್ ತಾಕಾ ಅಪ್ಲಿ ಸೆವಾ ಉಡಾಸಾಕ್ ಯೆತಾನಾ, ಹ್ಯಾ ಸೆವೆಚೊ ಪ್ರತಿಫಳ್ ಜೊಡ್ಚಾ ಮಂತ್ರಿಂಚೊ, ಕಂತ್ರಿಂಚೊ ಉಡಾಸ್ ಯೆತಾ. ದೆಕುನ್ ಹ್ಯಾ ಸಂಸ್ರಾಂತ್ ಕರ್ಚೆಂ ಕೊಣೆಂಗೀ, ಆನಿ ಭರ್ಚೆಂ ಕೊಣೆಂಗೀ.

ಕವಿ ಬಾಬ್ ಆಸ್ಟಿನ್ ಪ್ರಭುಕ್ ಹ್ಯಾ ಸಂಸಾರಾಂತ್ ಕಾಜುಲೆ ಸಯ್ತ್ ಅಪ್ಲ್ಯಾ ಗಾಂಡಿರ್ ಆಸ್ಚಾ ಉಜ್ವಾಡಾಂತ್ ಸಂಸಾರ್ ಚಲ್ತಾ ಮ್ಹಳ್ಳಿ ಬಡಾಯ್ ಉಲಂವ್ಚಾಂಚೆರ್ ಚೀಡ್ ಯೆತಾನಾ ತಾಚೆಂ ಎಕಾಚ್ಚ್ ಧಮ್ಮಾಚೆಂ ಕವಿತಾ ಭುಂಯ್ ಪಡ್ತಾ.

ಕವಿ ಬಾಬ್ ಸ್ಟ್ಯಾನಿ ಮೆಂಡೊನ್ಸಾಕ್ ಹೊ ಸಂಸಾರ್ ಏಕ್ ಸರ್ಕಸ್ ಕಸೊ ದಿಸ್ತಾ. ಅಪ್ಲ್ಯಾ ನಾಂವಾಖಾತಿರ್ ಕೊಣಾ ಕೊಣಾಚೆಂ ಚೋರ್ನ್, ಫಾರ್ನ್ ಜಿಯೆತೆಲ್ಯಾಂಚೆರ್, ಆನಿ ಸಂಸಾರಾಚ್ಯಾ ದೊಳ್ಯಾಂಕ್ ಪಟ್ಟಿ ಭಾಂದ್ಚಾಂನಿ ಕರ್ಚೊ ಧಂಧೊ ದಿಸೊನ್ ತಾಚೆಂ ರಗಾತ್ ಸಳ್ಸಳ್ತಾನಾ, ತಾಚೆಂ ಕವಿತಾ ಅಪ್ಶೆಂಚ್ ಖತ್ಕತ್ತಾ.

ಕವಿ ಬಾಬ್ ಆರ್‍ಯನ್ ತಾಕೊಡೆ ಪ್ರಾಕೃತಿಕ್, ನೈಸರ್ಗಿಕ್ ರಚ್ನೆಚಿಂ ನೇಮಾಂ ಉಲ್ಲೇಕ್ ಕರುನ್, ತಾಚಿ ಹಾಚಿ ಮ್ಹಳ್ಳೆಂ ಸೊಡ್ನ್, ಹ್ಯಾ ಸಂಸ್ರಾಚ್ಯಾ ಸರ್ವ್ ಕುಂಪಾರ್ ಕುಮಾದ್ರಿಂಕ್ ಅಪಾಪ್ಲಿ ಕಾಶ್ಟಿ ವೋಡ್ನ್ ಭಾಂದುನ್ ಕಾಮ್ ಕರುಂಕ್ ಉಲೊ ದಿಂವ್ಚೊ ದಿಸೊನ್ ಯೆತಾ. ಹಾಂಗಾಸರ್ ಕಾಶ್ಟಿ ಫಕತ್ತ್ ’ಮರ್‍ಯಾದೆಚೊ’ ಸಾಂಕೇತ್ ಶಿವಾಯ್ ಪೊಜ್ಡೊ ಸಬ್ಧ್ ಮ್ಹಣ್ ಭಾಗೆವಂತ್ ಶಿಣಾನಾಕಾತ್.

ಕವಿ ಬಾಬ್ ವಲ್ಲಿ ಕ್ವಾಡ್ರಸಾಚ್ಯಾ ಆಧ್ಲ್ಯಾ ಮಯ್ನ್ಯಾಚೆಂ ಎಕ್ಸ್‌ಪ್ರೆಸ್ಸ್ ಬಸ್ಸ್ ಇತ್ಲ್ಯಾ ವೆಗಾನ್ ಧಾಂವ್ಲಾಂ ಮ್ಹಳ್ಯಾರ್, ತೆಂ ಪಾಶಾರ್ ಜಾಲ್ಲ್ಯಾ ರಸ್ತ್ಯಾಂನಿ ಉಟ್‌ಲ್ಲೊ ಧುಂವರ್ ಸಯ್ತ್ ಆಜ್ ಧುಂವರ್ತಾನಾ ಉತ್ರಾಂ ಉತ್ರಾಂನಿ ದಾಗ್ ದಿಂವ್ಚೆಂ ದಿಸೊನ್ ಯೆತಾ;

’ಅಳೆಗಾ ಅಳೆಗಾ, ಮಂಡೊ ಆಸ್ಚೆ ಪೊಯಾಗಾ, ಮ್ಹಜ್ಯಾ ದರ್ಭಾರಾಕ್ ಯೆಯಾಗಾ, ಮ್ಹಜಿ ಮಾತ್ರ್ ಕವಿತಾಗಾ, ಹೆರಾಂಚಿಂ ಪೊಟ್ಟು ಉತ್ರಾಂಗಾ’.

ಕವಿ ಬಾಬ್ ಕ್ಲೆರೆನ್ಸ್ ಕೈಕಂಬ ಆಧ್ಲ್ಯಾ ವರ್ಸಾಂತ್ ಪಾಲಿನ್ ಮುತ್ಲೆಲೆಂ ಏಕ್ ಪರ್ನೆಂ ಪಾನ್ ಪಳೆವ್ನ್ ಗಾಂವ್ ಸೊಡ್ನ್ ಪೊಳ್‌ಲ್ಲೊ, ಪಾಟಿಂ ಯೇಂವ್ಕ್ ವರ್ಸ್‌ಭರ್ ರಾಕೊಂಕ್ ಪಡ್ಲೆಂ - ಕವಿತಾರಸಿಕಾಂಕ್ ಆನಿ ಮ್ಹಜೆತಸಲ್ಯಾ ಅಭಿಮಾನಿಂಕ್. ಪುಣ್ ತಾಣೆಂ ನಿರಾಸ್ ಕರುಂಕ್ ನಾ. ಎಕೆಕಾ ವೊಳಿಚೆರ್ ಎಕೇಕ್ ಕಾಣಿ ಉಭಿ ಕರುನ್, ಕವಿತೆಕ್ ಸೊಭಯ್ಲಾಂ, ಸಜಯ್ಲಾಂ ತಶೆಂಚ್ ನೆಟಯ್ಲಾಂ. ಎಕೆಕಾ ಇಮಾಜೆಂನಿ ಆಸ್ಚಿಂ ಸೂತ್ರಾಂ ತರ್‌ಯೀ ಕಿತ್ಲಿಂ ಭಳಿಶ್ಟ್ ಪಳೆಯಾ; ಹ್ಯೇ ಕವಿತೆಕ್ ಖರೆಂಚ್ ಜಾವ್ನ್ ಜೊಕ್ತೊ ಮಾನ್ ಮೆಳಾಜಯ್‌ಚ್ ದೆಕುನ್ ಹ್ಯಾ ಮಯ್ನ್ಯಾಚೊ ಕವಿ ಜಾವ್ನ್ ಕ್ಲೆರೆನ್ಸ್ ಕೈಕಂಬ ವಿಂಚೊನ್ ಯೆತಾನಾ, ತಾಕಾ ಉಲ್ಲಾಸ್.

ಉತ್ರಾಂತ್ ಸೂತ್ರಾಂ - 6: ಆಮಿ ಮಾತ್ರ್ ಸೆವಾ! ಹೆರಾಂಚಿ ನಾಂವಾಚಿ?

[ವಾಂಟೆಲಿ ಜಾಲ್ಲಿಂ]

1. ಕ್ಲೆರೆನ್ಸ್, ಕೈಕಂಬ.

2. ಆರ್‍ಯನ್ ತಾಕೊಡೆ.

3. ವಾಯ್ಲೆಟ್ ಜೆ. ಪಿರೇರಾ.

4. ಸ್ಟ್ಯಾನಿ ಮೆಂಡೊನ್ಸಾ, ಯು.ಕೆ.

5. ನಿರ್ಮಲಾ ಗೋವಿಯಸ್, ಬೆಂದುರ್/ಮಸ್ಕತ್.

6. ಫ್ರಾನ್ಸಿಸ್ ಫುರ್ಟಾಡೊ, ಕಲೀನಾ.

7. ಪ್ರಿಯಾ ಸಿಕ್ವೇರಾ, ಫೆರಾರ್/ಕುವೇಯ್ಟ್.

8. ಆಸ್ಟಿನ್ ಡಿ’ಸೋಜ್ ಪ್ರಭು, ನಂತೂರ್/ಚಿಕಾಗೊ.

9. ಸಿರಿಲ್ ಪೆರಿಸ್, ಬೆಂದುರ್/ಕುವೇಯ್ಟ್.

10. ವಲ್ಲಿ ಕ್ವಾಡ್ರಸ್, ಅಜೆಕಾರ್/ಕುವೇಯ್ಟ್.

ಸೆವಾ ಕೊಣಾಚ್ಯಾ ನಾಂವಾಚಿ? [ಮಯ್ನಾಚೆಂ ಕವಿತಾ]-

ಕ್ಲೆರೆನ್ಸ್, ಕೈಕಂಬ

ಬೊಂತಿಗೊಳಾಂತ್ ಪಾವ್ಸ್ ಯೇಂವ್ಕ್ ಭುತಾಕ್ ಪರಾತ್ತುಂಚ್ಯಾ

ಭೊಟಾಚಿ ಸೆವಾ ದೆವಾಕ್ ಮಾನ್ವಾಲಿ ತರ್

ಪಾವ್ಸ್ ಆಯ್ಲೊ ವ ನಾ, ಕೊಣಾಕ್ ಕಿತೆಂ ಪಡೊನ್ ಗೆಲಾಂ

ಭೊಟಾಚ್ಯಾ ಘರ್ಚಿಂ ಮಾತ್ ಭರೊನ್ ಗೆಲಿಂ ಚಿಲಾಂ

ಆನಿಂ ತಾಚಿ ಸೆವಾ ದೆವಾಕ್ ಮಾನ್ವೊಂಚ್ಯಾ ಪಯ್ಲೆಂಚ್

ಜಾರ್ಧ್ಯಾಂತ್ ಗಾಂವ್ಚೊ ಬಾಂಯ್ಯೊ ಸುಕೊಂಕ್ ಲಾಗ್ಲ್ಯೊ...

ಪರತ್ ದೆವಾಚಿ ಸೆವಾ ಜಾಯ್ ತರ್

ಭುತಾಕ್ ನಮಾನ್ ಕರಿಜಯ್ ತರ್

ಭೊಟಾಚ್ಯಾ ಫೊಟಾಕ್ ಆನಿಂ ಘರ್ಚ್ಯಾ ಭಾಟಾಕ್

ತೇಲ್ ತೂಪ್ ಮೆಳಾಜಯ್‌ಚ್ಚ್

ಸುಂರ್ಗೆ ತೇಲ್ ಹರ್ಧ್ಯಾರ್ ತಾಚ್ಯಾ ವೊತಿಜಯ್‌ಚ್ಚ್

ಹಾಕಾಚ್ ಮ್ಹಣ್ಚೆಂ ಆಮ್ಚಿ ಸೆವಾ... ಆಮ್ಚ್ಯಾ ದೆವಾಚಿ ಸೆವಾ.....

ತ್ಸುನಾಮಿಚ್ಯಾ ಮ್ಹಾರೆಕಾರ್ ಲ್ಹಾರಾಂಕ್ ಸಾಂಪ್ಡೊನ್

ಗತ್ ಆಧಾರ್ ನಾಸ್ತಾಂ ಗಂಗಾಗತ್ ಜಾಲ್ಲ್ಯಾಂಕ್

ಖಾಣ್ ನಾತ್‌ಲ್ಲ್ಯಾಂಕ್ ವಿಣ್ಗೆಂ ಜಾಲ್ಲ್ಯಾಂಕ್

ಕುಮೊಕ್ ಕರುಂಕ್ ವಸ್ತುರ್ ಹಾಡುನ್ ದಿಂವ್ಕ್ ಮ್ಹಣೊನ್೦ಚ್ಚ್

ಆಸಾ ಕೆಲ್ಲ್ಯಾ ’ಫ್ಯಾಶನ್ ಶೋ’ ರಂಗಾಳ್ ಕಾರ್‍ಯಾಂನಿಂ

ಉಡ್ತಿಂ ಉಡ್ಚಿಂ ಸುಂದರ್ ಚೆಡ್ವಾಂ ಫಾಮಾಧ್ ತಾರಾಂ

ವಸ್ತುರಾಂ ಘಾಲುಂಕ್ ವಿಸ್ರಾಲಿಂಗಾಯ್ ಬಾವ್ಡ್ಯಾಂ?

ಜಾಂಗೆ ಮಧೆಂ ವಸ್ತುರಾ ತೀರ್ ನೆಸೊನ್

ಮಾನ್ ಉರಂವ್ಚೊ ಖೆಳ್ ಖೆಳೊನ್

ನಾಚ್ತಾಂ ಉಡ್ತಾನಾ, ತಾಂಕಾ ದೆಖೊನ್ ಆಂಯ್ಡೆ ಗಳಂವ್ಚ್ಯಾ

"ಹುರ್ರೆ " ಮ್ಹಣ್ಚ್ಯಾ ಸಮಾಜೆಚ್ಯಾ ವ್ಹಡಿಲಾಂಕ್ ನಮಾನ್ ಫಾವೊ

ತಾಂಚೆಂಚ್ಚ್ ವರ್‍ವಿಂ ನ್ಹಂಯ್‌ಗೀ ಜಾತಾ

ಧಯಾಳ್ ಮನ್ಶಾಂ ಥಾವ್ನ್ ಮನ್ಶಾಂಚಿ ಸೆವಾ...

ಬಿಕಾಡ್ಡ್ಯಾಂಚಿ ಸೆವಾ ..... ಸಮಾಜ್ ಸೆವಾ...

ಕೊಂಕ್ಣಿ ಜಾಯ್ ಮ್ಹಣೊಂಕ್ ಹರ್ಧೆಂ ಪೆಟುನ್

ವೆದಿ ಪಾಲ್ಕ್ಯಾಂನಿಂ ರಾಕೊನ್ ರಾವೊನ್

ಬೋಬ್ ಮಾರ್‍ಚ್ಯಾ ಕೊಂಕ್ಣಿ ಫುಡಾರ್‍ಯಾಂಕ್ ದೆಖ್ತಾಂ

ಮನ್ ಪಾಕ್ಳೆತಾ.... ಜೀವ್ ಸುಶೆಗಾತ್ ಜಿವಾಳ್ತಾ..

ತಾಂಚೆಚ್ಚ್ ವರ್‍ವಿಂ ನ್ಹಂಯ್‌ಗೀ ಆಜ್

ಕೊಂಕ್ಣಿ ಮಾತಾ ಕಿತ್ಲಿ ಖುಶ್ ಆಸಾ...

ತಿಚ್ಯಾ ಪಾಸ್ಳೆಂತ್ ಉಮಾಳೆ ಭರ್‍ಲ್ಯಾತ್...

ಮ್ಹಾತ್ಯಾರ್ ಕಿತೆಂ ಕುರೊವ್ ಬಸ್ಲಾ?

ಪುಣ್, ಘರಾಕಡೆ ಯೇವ್ನ್ ಪುತಾಲಾಗಿಂ ಮಾತ್

ಇಂಗ್ಲೀಷ್ ಉಲಂವ್ಚ್ಯಾ ಪುಡಾರ್‍ಯಾಕ್ ಖರೊಚ್ಚ್

ನಮಾನ್ ಫಾವೊ ಸಲಾಂ ಫಾವೊ

ಘರಾಂತ್ ಕೊಂಕ್ಣಿ ನಾ ತರ್ ಕಿತೆಂ ಜಾಲೆಂ?

ತಾಚಿ ಸೆವಾ ... ಬಾಯ್ಲ್ಯಾ ಆಂಗ್ಣಾಂತ್ಲಿ ಸೆವಾ...

ಹಾಕಾಚ್ಚ್ ಮ್ಹಣ್ತಾಂವ್ ಆಮ್ಚಿಚ್ಚ್ ಸೆವಾ....... ಕೊಂಕಣಿ ಸೆವಾ

ಪಿಂತುರ್

ವಿಂಚ್ಣಾರ್ ಕವಿತಾ

ಸೆವೆಚ್ಯಾ ಪಾಟ್ಲ್ಯಾನ್!? [ - ಆರ್‍ಯನ್ ತಾಕೊಡೆ]

ಕುಂಬಾರಾಚಿ ಮೊಡ್ಕಿ ನಾಸ್ತಾಂ ಪೇಜ್ ನಿಸ್ತೇಜ್

ತತ್ವಾಂನಿ ರೆವ್ಡಾಲ್ಲಿ ಮೊಡ್ಕಿ ಭರ್ಣೆಚೆಂ ಧೊಲ್ಕೆಂ ಧಲಯ್ತ್!

ಖಂತ್ ಹುಸ್ಕೊ ನಾಸ್ಲೊ ಪಣ್ಗಿಲ್ ಘಾಣ್ಕುಟೊ ಗಾದೊ

ಉಭಿರಾಂತ್ ಸುಂದರ್ ಸಾಳಕ್ ಫುಲಯ್ತ್!

ಪುಣ್ ಮ್ಹಜಿ ಮಾತ್ರ್ ಸೆವಾ ಹಾಂಗಾ! ಹೆರಾಂಚಿ ಬೆಶ್ಟಿ ನಾಂವಾಚಿ

ದೆವೊತ್ ಸನ್ನೇಶಿ ನ್ಯಾಯ್ ಧರ್ಮ್ ಉಕ್ಲುನ್ ಧರಿತ್

ದಯಾಳಿ ಧಿನ್ವಾಶಿ, ಸರ್ಗಾಕ್ ಸೊಂರ್ಗೊ ಸೊಡಿತ್

ಸ್ವಪ್ಣಾರಾಣಿ ನಗ್ ದುಡ್ವಾಚ್ಯಾ ನಶೆನ್ ಕುಸಾಯ್ತ್

ಪಾಟಾರಾಣಿ ಸಪುತ್ ದಿವುನ್ ಜಿಣ್ಯೆ ಗೊವಾಯ್ ಜಾಯ್ತ್!

ತರ್‌ಯೀ ಮ್ಹಜಿ ಮಾತ್ರ್ ಸೆವಾ ಹಾಂಗಾ! ಹೆರಾಂಚಿ ಫಕತ್ತ್ ನಾಂವಾಚಿ

ಗ್ರೇಸ್ತ್ ದಾನ್ ಕರುನ್ ತುಂರ್‍ಬೆಂತಾ ಪುರ್ಶಾಂವ್ ಕಾಡಿತ್

ಭಾರ್ ವ್ಹಾವಂವ್ಕ್ ತಾಂಕಾನಾಸ್ಲೊ ದಾತಾರ್ ಇಜ್ಮೊಲಾಚಿ ವಾಟ್ಲಿ ಭರಿತ್!

ಮೆಜಾವಯ್ಲೆಂ ಕೆಳೆಂ ಕಾಡುನ್ ಪಿಲ್ಯಾದ್ ಜೊಡುಂಕ್ ಭೋವ್ ಸಲೀಸ್

ಆಕಾಸಾರ್ ಹಿಂದ್ಳೊ ಭಾಂದುನ್, ಧಲಂವ್ಕ್ ಭಾಂದ್ಪಾಸ್ ಜಾತಿತ್!

ದೆಕುನ್ ಮ್ಹಜಿ ಮಾತ್ರ್ ಸೆವಾ ಹಾಂಗಾ! ಹೆರಾಂಚಿ ಫಕತ್ತ್ ನಾಂವಾಚಿ

ಜಳ್ಚೆಂ ಸುತ್, ಕಡ್ಚೆಂ ಮೇಣ್, ಪೆಟ್‌ಲ್ಲೊ ಉಜೊ ಉಜ್ವಾಡ್ ಫಾಂಕಯ್ತ್

ದಾಯ್ಜಿ ಜಾಲ್ಯಾತ್ ಸೆವಕ್ ಹೆರಾಂಚಾ ನಾಂವಾಕ್ ಮನಾಕ್ ಜಳ್ಚಿ ವಾತ್

ಸಂಸಾರ್‌ಭರ್ ಶಿಂಪಡ್ಲೆಲ್ಯಾ ಕುಂಪಾದ್ರ್-ಕುಮಾದ್ರಿಂನೊ

ಕಾಸ್ಟಿ ಅಂರ್ಧುನ್ ಭಾಂದಾ, ಎಕಾಮೆಕಾಚಾ ಸೆವೆಕ್ ಲಾಗ್ಯಾಂ.

ಕಿತ್ಯಾಕ್ ಸೆವಾ ಹಾಂಗಾ ಮ್ಹಜಿಚ್ಚ್! ಹೆರಾಂಚಿ ಬೆಶ್ಟಿ ನಾಂವಾಚಿ

ಕೊಣಾಚಿ ಖರಿ? ಕೊಣಾಚಿ ನಾಂವಾಚಿ!? [- ವಾಯ್ಲೆಟ್ ಜೆ. ಪಿರೇರಾ]

     ಕಸಲಿ ರೆ ತುಜಿ ತಿ ಸೆವಾ?

ಹಾಂಗಾ ಪಳೆ ಧಾಂವ್ತಾತ್ ಪಾಟೆ ನಾತ್‌ಲ್ಲಿಂ ರಯ್ಲಾಂ

     ತುಜೆ ಅಪೊಸ್ತಲ್ ಕಿತ್ಲೆರೆ ಭಾವಾ?

ಹಾಂಗಾ ಮೆಟಾ ಮೆಟಾಂಕ್ ಪೆಟ್ಯಾಂಕ್ ಬಾಂಧುನ್ ಘಾಲಾಂ

     ಹಾಂಗಾ ಜಾಂವ್ಚೆಂ ಕಾಂಯ್ ನಾ ತರೀ

ಹಾಂಗಾಚಿ ಶ್ರೇಷ್ಟ್ ಕೊಂಕ್ಣಿ ಸೆವಾ

     ತುಮಿ ಕಿತ್ಲೇಂಯ್ ಘೊಳಾ ತರೀ

ತುಮ್ಚಿ ಫಕತ್ತ್ ಖಾಂವ್ಕ್ ಮೇವಾ

     ಸಂಸಾರ್ ಕಸೊರೆ ಭಿತರ್ ತಿಳ್ತಾ

ಆಮ್ಚಾ ತೊಂಡಾರ್ ಚಾನ್ನೆಂ ಫಾಂಕ್ತಾ

     ತುಮ್ಚಿಂ ಕಾಮಾಂ ತುಮ್ಕಾಂಚ್ ಪಿಳ್ತಾ

ದೆಕುನ್ ಪೊಸ್‌ಲ್ಲೊ ಪೆಟೊಯ್ ಘೊಂಕ್ತಾ

     ಹಾಂಗಾ ಪಿಕ್ಚಿಂ ಬಿಂಡಿ ಸೊಲಾಂ

ಸೊಡ್ಚಿಂ ಪಾಟೆ ನಾತ್‌ಲ್ಲಿಂ ರಯ್ಲಾಂ

     ತುಮ್ಚಿಂ ತಿಂ ಫಕತ್ತ್ ಬಂಡಾಲಾಂ

ದೆಕುನ್ ತುಮ್ಚಾ ಸೆವೆಕ್ ಮಾರಾನ್ ವೆಲಾಂ

     ಸೆವೆಚೊ ಅರ್ಥ್, ಸೆವಾ ಘೆತ್‌ಲ್ಲೊ ನೆಣಾಂ

ಆಮ್ಚಿ ಮಾತ್ರ್ ಸೆವಾ ಹೆರಾಂಚಿ ಫಕತ್ತ್ ನಾಂವಾಂಚಿ

     ಮಾಜಾರ್ ದೊಳೆ ಧಾಂಪ್ತಾ ತರ್‌ಯೀ ಜಾಣಾಂ

ಸಂಸಾರ್ ಬೇಕೂಫ್ ನ್ಹಂಯ್ ಮತ್ಲಬ್ ಅಪ್ಣಾ ಅಪ್ಣಾಚಿ

ಪಿಂತುರ್

ವಿಂಚ್ಣಾರ್ ಕವಿತಾ

ಮ್ಹಜಿ ಮಾತ್ರ್ ಸೆವಾ!? [- ಸ್ಟ್ಯಾನಿ ಮೆಂಡೊನ್ಸಾ, ಯು.ಕೆ.]

ಹಾಂಚೆಂ ತಾಂಚೆಂ ಆರಾವ್ನ್

ಆಪ್ಲ್ಯಾ ಹರ್ದ್ಯಾರ್ ಸೊಭವ್ನ್

ಆಪ್ಣಾಚಿ ಸೆವಾ ಮ್ಹಣೊನ್

ವೆದಿರ್ ಘೆತಾತ್ ಸಮ್ಮಾನ್

ಕರ್‍ತಾಂ ಮ್ಹಣೊನ್ ಆಪುಣ್ ಸೆವಾ

ಸಗ್ಳ್ಯಾ ಗಾಂವಾರ್ ಗಾಜವ್ನ್ ಘಾಲಾಂ

ಕೆಲ್ಲೆಂ ತಾಣಿಂ ಕಾಂಯಿಂಚ್ ನಾ

ಫಕತ್ತ್ ಬಂಡಲಾಂ ಆನಿಂ ಭಿಂಡಿ ಸೊಲಾಂ

ಸೆವೆಕ್ ಗರ್ಜ್ ನಾ ಆವಾಜ್

ಆಶೆನಾ ಕೊಣಾಯ್ಚೊ ನಮಾಜ್

ನಿಸ್ವಾರ್ಥಿ ಸೆವೆಕ್ ತುಜಾ

ಆಪ್ಶಿಚ್ ವಳ್ಕಾತೆಲಿ ಸಮಾಜ್

ಕಸಲಿಯ್ ಜಾಂವ್ ತುಜಿ ಸೆವಾ

ಕರಿನಾಕಾ ಆಶೆವ್ನ್ ನಾಂವಾಕ್

ಕರ್ ತಿ ತುಂ ಭಯ್ಣಿ ಭಾವಾ

ಮೆಚ್ವಾಲ್ಲಿ ಜಾವ್ನ್ ರಚ್ಲೆಲ್ಯಾ ದೆವಾಕ್

ಆಮ್ಚಿ ಸೆವಾ? [- ನಿರ್ಮಲಾ ಗೋವಿಯಸ್, ಬೆಂದುರ್]

ಸ್ವಾರ್ಥಿ ನ್ಹಂಯ್‌ಗೀ ಹಾಂವ್?

ಮೊಸ್ರಾನ್, ಹಂಕಾರಾನ್

ಮೊಗಾಚೊ ಕಿಸೊರ್ ಕರುನ್

ಮೀಟ್, ಮಿರ್ಸಾಂಗ್ ಭರ್ಸುನ್

ಭಾಜಾರಾಂತ್ ಉಗ್ತೆಂ ಪಾಚಾರ್ತಾಂ

ವಾವ್ರ್ ಫಕತ್ತ್ ಮ್ಹಜೊ ಹೆರಾಂಚೊ ಫಕತ್ತ್ ನಾಂವಾಚೊ........

ಅಬ್ಲೇಶಿ ನ್ಹಂಯ್‌ಗೀ ಹಾಂವ್??

ವಿಧ್ವಿಂಕ್, ಅನಾಥ್, ಅಬಲ್ ಸ್ತ್ರೀಯಾಂಕ್ ಅಧಾರ್

ತಾಂಚಾ ಫುಡಾರಾಕ್

ಪಾಸಾರ್ಣಿ ವರ್ತಿ, ಕುಮೊಕ್ ಚಿಮ್ಟೆಚಿ

ಸ್ವ ಫಾಯ್ದೊ ವ್ಹರ್ತೊ, ಭಾಯ್ರ್ ನಿತಳ್, ಭಿತರ್ ಸರ್ವ್ ಪೊಕೊಳ್

ವಾವ್ರ್ ಪಕತ್ತ್ ಮ್ಹಜೊ ಹೆರಾಂಚೊ ಫಕತ್ತ್ ನಾಂವಾಚೊ....

ರಾಗಿಶ್ಟ್ ನ್ಹಂಯ್‌ಗೀ ಹಾಂವ್?????

ದಾನಾ ವರ್ನಿ ವರ್ತೆಂ ದಾನ್ ........ಸಮಾಧಾನ್

ಗಾಜವ್ನ್ ಗಾಂವಾನ್ ಗಾಂವ್

ಉತ್ರಾಂನಿಂ ಸಮಾಧಾನಾಕ್ ವಾವ್ರುನ್

ರಾಗಾನ್, ಹಗ್ಯಾನ್ ಸರ್ವಸ್ವ್ ಹೊಗ್ಡಾಯ್ಲೆಂ ತರ್‌ಯೀ,

ವಾವ್ರ್ ಮ್ಹಜೊ ಮಾತ್ರ್, ಹೆರಾಂಚೆಂ ಸಕ್ಕಡ್ ನಾಂವಾಚೆಂ........

ಪಿಂತುರ್

ವಿಂಚ್ಣಾರ್ ಕವಿತಾ

ಆಮ್ಚಿ ಸೆವಾ! [- ಫ್ರಾನ್ಸಿಸ್ ಫುರ್ಟಾಡೊ]

ಸೆವಾ ಕೆಲ್ಲಿ ಆಮಿ ಏಕ್ ಪಾವ್ಟಿಂ ಗಾಂವಾಂತ್,

ಇಗರ್ಜ್ ಭಾಂದುಂಕ್ ಮ್ಹಣ್ ಜಾವ್ನ್ ಸಗ್ಳೆ ಎಕ್ವಟ್.

ಭರುನ್ ಪೊಂಡ್ ಅನಿಂ ಖೊಂಡುನ್ ದೊಂಗೊರ್,

ಕೆಲ್ಲೊ ವಿಸ್ತಾರ್ ಜಾಗೊ ಇಗರ್ಜೆಕ್ ತಯಾರ್.

ಬಾಂದಾಪ್ ಜಾಲೆಂ, ಸೊಭಿತ್ ಇಗರ್ಜ್ ಉಭಿ ಜಾಲಿ,

ಧಾನಿಂಚಿ ನಾಂವಾಂ ಮಾರ್ಬಲ್ ಫಾತ್ರಾರ್ ಕಾಂತಯ್ಲಿಂ,

ಮಂತ್ರಿಂಚಿಂ ನಾಂವಾಂ ಮುಕ್ಲ್ಯಾ ವೊಣದಿರ್ ಲಾಯ್ಲಿಂ,

ಆಮ್ಚ್ಯಾ ತಸಲ್ಯಾಂಚಿ ಸೆವಾ ಲಿಪೊನ್ಂಚ್ ರಾವ್ಲಿ.

ದರ್ಣಿ ಭಿತರ್ಲ್ಯಾ ಇಟ್ಯಾಂಪರಿಂ, ಆಮ್ಚಿ ಸೆವಾ ಲಿಪ್ಲಿ,

ಪುಣ್ ದರ್ಣಿ ಭಿತರ್ಲ್ಯಾ ಇಟ್ಯಾಂಶಿವಾಯ್ ವೊಣದ್ ಕಸ್ಲಿ,

ಮಾತ್ಯೆ ಪಂದಾ ಲಿಪ್ಲ್ಯಾರಿ, ಹಾಂಚಿ ಸೆವಾ ವ್ಹಡ್ಲಿ,

ಜಸೆಂ ಆಮ್ಚ್ಯಾ ಸೆವೆ ಶಿವಾಯ್ ಇಗರ್ಜ್ ಜಾತಿನಾಸ್ಲಿ.

ಏಕ್ ಪಾವ್ಟಿಂ ಗಾಂವಾಂತ್ ರಸ್ತೊ ಕೆಲೊ,

ಸಭಾರಾನಿಂ ತಾಂಚೊ ಜಾಗೊ ರಸ್ತ್ಯಾಕ್ ದಿಲೊ,

ಥೊಡ್ಯಾಂಚೆಂ ಹಿತಾಲ್ ಅನಿಂ ಗಾದೆ ರಸ್ತ್ಯಾಕ್ ಗೆಲೆ,

ರಸ್ತೊ ತಯಾರ್ ಜಾಲೊ, ಸಗ್ಳೆ ಸಂತೊಸ್ ಪಾವ್ಲೆ.

ಮಂತ್ರಿನ್ ರೊಡ್ ರೊಲ್ಲರ್ ರಸ್ತ್ಯಾರ್ ಚಲಯ್ಲೊ,

ಡಾಮರ್ ಘಾಲ್ನ್, ದೊರೊ ಭಾಂದುನ್ ರಸ್ತೊ ಸೊಭ್ಲೊ,

ಮಂತ್ರಿಚ್ಯಾ ನಾಂವಾಚೊ ಬೊರ್ಡ್ ರಸ್ತ್ಯಾರ್ ಲಾಯ್ಲೊ,

ಮಂತ್ರಿ ತಾಚ್ಯಾ ಲಾಂಬ್ ಗಾಡಿಯೆರ್ ಭಂವ್ತಾಲೊ.

ಗಾಂವ್ಚೊ ದುಬ್ಳೊ ರಸ್ತ್ಯಾಚ್ಯಾ ದೆಗೆನ್ಂಚ್ ಚಲ್ತಾಲೊ,

ಪಯ್ಲೆಂ ಕಿತ್ಲೊ ರಸ್ತೊ ತಾಕಾ ಜಾಯ್ ಆಸ್‌ಲ್ಲೊ,

ತಿತ್ಲೊಚ್ ಆತಾಂಯೀ ನವ್ಯಾ ರಸ್ತ್ಯಾರ್ ವ್ಹಾಪಾರ್ತಾಲೊ,

ಟೆಕ್ಸಿ, ರಿಕ್ಷಾ ಅನಿಂ ಬಸ್ಸಾಂಕ್ ದುಡು ಖಂಯ್ಚೊ ಹಾಡ್ತಲೊ.

ಕಿತ್ಲೊ ಅರ್ಥ್ ಆಸಾ? [- ಪ್ರಿಯಾ ಸಿಕ್ವೇರಾ, ಫೆರಾರ್]

ತ್ಯಾ ನಂಯಾಂಚೊ ಶೆವೊಟ್

ಮೆಳೊಂಕ್ ತ್ಯಾ ಸಾಗೊರಾಂತ್

ಉಭಾರ್ - ತಗ್ಗ್ ಪ್ರದೇಶಾಂನಿ ವ್ಹಾಳೊನ್

ಸಾಗೊರಾಕ್ ಮೆಳೊಂಕ್ ಯೆತಾನಾ

ದರ್ಯೊ ತರ್ ಮ್ಹಣಾತ್ ತರ್

’ತುಜೆಂ ಉದಾಕ್ ನ್ಹಂಯ್

ಮ್ಹಜೆಂ ಮಾತ್ರ್ ಉದಾಕ್’

ನಂಯ್ ತಿ ಪಯ್ಸ್ ಸರಾತ್?

ಉದ್ಕಾಚೆಂ ಸಂಗಮ್ ಜಾಲ್ಯಾಂ ನಂತರ್

ಹೆಂ ಮ್ಹಜೆಂ ಉದಾಕ್ ತುಜೆಂ ನ್ಹಂಯ್

ಮ್ಹಣ್ ದರ್ಯೊ ಮ್ಹಣಾತ್ ತರ್

ಸಾಂಗಾ ಮ್ಹಾಕಾ ಸಾಧ್ಯ್ ಆಸಾ ಫರಕ್ ಕರುಂಕ್?

ಎಕೇಕ್ ಇರ್ ಮೆಳೊನ್

ಜಾತಾ ಸಾರೊಣ್

ಮುಲ್ಯಾ - ಮುಲ್ಯಾಂನಿ ರಿಗೊನ್

ಖಚ್ರೊ ಕಾಡ್ತಾನಾ

ಇರ್ ಏಕ್ ಮ್ಹಣಾತ್ ತರ್

’ಮ್ಹಜೆಂ ಕಾಮ್ಂಚ್ ವ್ಹಡ್

ಮ್ಹಜ್ಯಾ ವರ್ವಿಂಚ್ ಖಚ್ರೊ ವೆತಾ’

ದುಸ್ರೆ ಇರ್ ಸಾರೊಣೆಂ ಥಾವ್ನ್ ಪಯ್ಸ್ ಸರ್ತಿತ್?

ಇರಾಂಚೆಂ ಸಂಗಮ್ ಜಾಲ್ಯಾಂ ನಂತರ್

ಹೆಂ ಹಾಂವೆ ಕೆಲ್ಲೆಂ ಕಾಮ್ ತುಂವೆಂ ನ್ಹಂಯ್

ಇರ್ ಮ್ಹಣಾತ್ ತರ್

ಸಾಂಗಾ ಮ್ಹಾಕಾ ಹಾಕಾ ಅರ್ಥ್ ಆಸಾ?

ಕೊಂಕ್ಣೆಚೊ ಮೋಗ್ ಕರ್ಚಾ ಥೊಡ್ಯಾಂಚೊ

ಇರಾದೊ ಕೊಂಕ್ಣೆಚಿ ಸೆವಾ

ಇಜಾ ನಿಂದಾ ಸೊಸೊನ್

ನಿಸ್ವಾರ್ಥಿಪಣಿಂ ಕಾಮ್ ಕರ್ನ್

ತಾಂಕಾಂ ನಾಂವ್ ಮೆಳ್ತಾನಾ

ತಾಂತ್ಲೊ ಎಕ್ಲೊ ಮ್ಹಣಾತ್ ತರ್

’ಮ್ಹಜಿ ಮಾತ್ರ್ ಸೆವಾ, ಹೆರಾಂಚಿ ನಾಂವಾಂಚಿ

ಹೆರ್ ಸೆವಾ ಕರ್ಚಿ ಸೊಡ್ನ್ ಸೊಡ್ತಿತ್

ಸೆವಾ ತಿ ಸೆವಾ ಕೊಂಕ್ಣೆಚಿ ಸೆವಾ

ಮ್ಹಣ್ ಚಿಂತುನ್ ಸಾಂಗಾಂತಾ ವಾವ್ರುನ್

ಜರ್ ಎಕ್ಲ್ಯಾಕ್ ನಾಂವ್ ಮೆಳ್ತಾನಾ

ತಾಚಿ ಪಾಟ್ ಥಾಪ್ಡುನ್

ಉತ್ತೇಜನ್ ದಿವುನ್ ಮುಖಾರ್ ಸರ್ಲ್ಯಾರ್

ಸಾಂಗಾ ಮ್ಹಾಕಾ ಹಾಕಾ ಕಿತ್ಲೊ ಅರ್ಥ್ ಆಸಾ ನ್ಹಂಯ್‌ಗಿ?

ಪಿಂತುರ್

ವಿಂಚ್ಣಾರ್ ಕವಿತಾ

ವ್ಹಯ್ ಆಮ್ಚಿ ಮಾತ್ರ್ ಸೆವಾ! [- ಆಸ್ಟಿನ್ ಪ್ರಭು, ನಂತೂರ್]

ಕಾಜುಲೆ ಸಗ್ಳೊ ದೀಸ್

ಖಂಯ್ಸರ್‌ಗಿ ಲಿಪೊನ್ ರಾವ್ತಾತ್

ಕಾಳೊಕ್ ಪಡ್ತಚ್ ಏಕಾಚ್ಛಾಣೆ

ತೆಣೆಂ-ಹೆಣೆಂ ಘುಂವೊಂಕ್ ಲಾಗ್ತಾತ್

ತಾಣಿಂ ಚಿಂತ್‌ಚೆಂ ತಾಂಚ್ಯಾ ಗಾಂಡಿಂತ್

ಯೆಂವ್ಚ್ಯಾ ತ್ಯಾ ಥೊಡ್ಯಾ ಉಜ್ವಾಡಾನ್

ಸಗ್ಳೊ ಸಂಸಾರ್‌ಚ್ ಪ್ರಕಾಶ್ತಾ ಮ್ಹಣ್

ದೆಖುನ್ಂಚ್ ತೆ ಕಾಳೊಕ್ ಪಡ್ತಚ್

ಏಕಾಚ್ಛಾಣೆ ಭಾಯ್ರ್ ಪಡ್ತಾತ್!

ತಸೆಂಚ್ ಆಸಾತ್ ಆಮ್ಚ್ಯೆ ಮಧೆಂ

ಸಭಾರ್ ಲೇಖಕ್, ಸಭಾರ್ ನಟ್

ಸಭಾರ್ ರಾಜ್‌ಕಾರಣಿ ತಾಂಚಿ ಖೆಟ್

ಸಭಾರ್ ಗಾವ್ಪಿ, ಸಭಾರ್ ಸಂಗೀತ್‌ಗಾರ್

ಕಾಂಯ್ ಥೊಡೆಂ ಬರಯ್ಲೆಂ ತರ್

ಏಕಾಚ್ಛಾಣೆ ಲೇಖಕ್ ಜಾಲೆ

ಕಾಂಯ್ ಇಲ್ಲಿ ಸೇವಾ ಕೆಲಿ

ಸಂಸಾರಾಚೆ ಸೊಡ್ವಣ್ದಾರ್‌ಚ್ ಜಾಲೆ

ಫಕತ್ತ್ ರಾತ್‌ಚೆ ಕಾಜುಲೆ!

ಥೊಡಿಂ ಥೊಡಿಂ ಕಾಮಾಂ ಕರ್ತಾತ್

ಸಗ್ಳೊ ಸಂಸಾರ್‌ಚ್ ವ್ಹಾವಯ್ಲೊ ಮ್ಹಣ್ತಾತ್

ಹ್ಯಾ ಕಾಜುಲ್ಯಾಂಚಿ ಸವಯ್ ವಿಶೇಷ್ ಆಸಾ

ಹಾಂಚ್ಯಾ ಮತಿಂತ್ ಭಾರಿಚ್ ಮೊಸೊರ್ ಆಸಾ

ಹೆರಾಂನಿ ಕಿತೇಂಯ್ ಕೆಲೆಂ ಜಾಲ್ಯಾರ್

ಹಾಂಕಾಂ ಏಕಾಚ್ಛಾಣೆ ಭಾಯ್ರಿ ಯೆತಾ

ಭಿಲ್ಕುಲ್ ಸೊಸುಂಕ್ ಸಕಾನಾಸ್ತಾಂ

ಆಣ್ಕಿಟಿಕ್ ತಾಂಚ್ಯಾ ಗಾಂಟಿ ಪಡೊನ್

ಖಂಯ್ಸರ್‌ಯ್ ಥೊಡೊ ಜಾಗೊ ಮೆಳ್ಳೊ

ದೊಳೆ ಧಾಂಪುನ್ಂಚ್ ತೆ ಭಾಯ್ರ್ ಘಾಲ್ತಾತ್

ಆಪ್ಣೆ ಕೆಲ್ಲೆಂ ಸರ್ವ್ ಸೇವಾ ಗಾಯ್ತಾತ್

ಹೆರಾಂನಿ ಕರ್ಚೆಂ ನಾಂವಾಕ್ ಮ್ಹಣ್ತಾತ್

ಹಾಂಕಾಂ ಬರೆಂ ಸಂಕ್‌ಪಾಶಣ್

ದೀಂವ್ಕ್ ಕೋಣ್‌ಯ್ ಫುಡೆಂ ಸರ್ತಾತ್?

ನಾ!

ಬದ್ಲಾಕ್ ತಾಂಚ್ಯಾ ಪಾಟ್ಲ್ಯಾನ್ ವಚೊನ್

ತಾಂಚಿ ಗಾಂಡ್ ಹುಂಕುನ್ಂಚ್ ತೆ ರಾವ್ತಾತ್

ಆತಾಂ..

ಸಂಸಾರಾಂತ್ಲ್ಯಾ ಕಾಜುಲ್ಯಾಂನೊ

ತಾತ್ಕಾಲಿಕ್ ಜೀವನ್ ತುಮ್ಚೆಂ

ಬಾಡಾಯ್ ತುಮಿ ಬಡಂವ್ಕ್ ವಚೊನ್

ತುರ್ಥಾನ್ ತುಮಿಂ ಫೊಂಡಾಂತ್ ಪಡ್ಚೆಂ!

ಮ್ಹಜಿ ಸೆವಾ !? [- ಸಿರಿಲ್ ಪೆರಿಸ್, ಬೆಂದುರ್]

ರಾತ್ ದೀಸ್ ನೀದ್ ಖಳೊನ್

ಏಕ್ ನಾಟಕ್ ಬರಯ್ಲೊ,

ನಾಟಕ್ ಸಾಲಾಂತ್ ಖೆಳೊಂಕ್ ನಾಸ್ತಾಂ

ದುಸ್ರ್ಯಾಂಚಾ ಹಾತಾಕ್ ಪಾವ್ಲೊ,

ತಾಂತುಂ ತಾಣೆಂ ಮಸಾಲಾ ಘಾಲುನ್

ನಾಂವ್ ಬದಲ್ನ್ ಮಾಂಚಿಯೆರ್ ಖೆಳಯ್ಲೊ,

ನಾಟಕ್ ಸರ್ವಾಂಕ್ ಖೂಬ್ ರುಚ್ಲೊ.

ವಾಂವ್ಟ್ ಮ್ಹಜಿ ಆನಿ ನಾಂವ್ ತಾಚೆಂ!!

ತಕ್ಲಿ ಆಟಯ್ಲಿ ಮತ್ ಪಿಕಯ್ಲಿ

ಹಾಂವೆಂ ಏಕ್ ಕಾಣಿ ಬರಯ್ಲಿ

ಕಾಣಿಂ ಕಶೀಯ್ ಧಾಡ್ಲಿ ಕೊನ್ಶಾಂತ್ ಪಡ್ಲಿ

ಸಭಾರ್ ದಿಸಾಂನಿ ಪರ್ಗಟ್ಲಿ

ಕಾಣಿ ಪಳೆವ್ನ್ ಮತ್ ಮ್ಹಜಿ ಚಡ್ಪಡ್ಲಿ

ಕಾಣಿಂ ಮ್ಹಜಿಂ ಆನಿ ನಾಂವ್ ಕೊಣಾಚೆಂ!!

ಕವಿತಾ ಘಡ್ಲಿ ಪದಾಂ ಘಡ್ಲಿಂ

ತಾಳೊ ಬಸವ್ನ್ ಉಗ್ತ್ಯಾ ಸಾಲಾಂತ್ ಗಾಯ್ಲಿಂ

ಕೆಲಿನಾ ಸಿಡಿ ಜಾಲಿನಾ ವಿಸಿಡಿ

ಥೊಡ್ಯಾಚ್ ತೆಂಪಾನ್ ಭಾಯ್ರ್ ಪಡ್ಲಿ ನವಿ ಸಿಡಿ

ಉತ್ರಾಂ ಮ್ಹಜಿಂ ನಾಂವ್ ತಾಂಚೆಂ!!

ಥೊಡ್ಯಾಂಕ್ ಘೆವ್ನ್ ಸಂಘ್ ಘಡ್ಲೊ

ಥೊಡಿಂ ವರ್ಸಾಂ ಬರೊ ಚಲ್ಲೊ

ಕಾರಣಾವಿಣೆಂ ಮಧೆಂ ಬಂಧ್ ಪಡ್ಲೊ

ಥೊಡ್ಯಾಚ್ ತೆಂಪಾನ್ ಆಟೊವ್ ಕೆಲೊ

ನಾಂವ್ ಬದ್ಲಿ ಕರುನ್ ಅನ್ಯೇಕ್ ಸಂಘ್ ಘಡ್ಲೊ

ವಾಂವ್ಟ್ ಮ್ಹಜಿ ನಾಂವಾಂ ಕೊಣಾ ಕೊಣಾಚೆಂ!!

ಹಾಂಗಾ ವಾಂವ್ಟ್ ಕೊಣಾಚಿಗೀ

ನಾಂವ್ ಕೊಣಾಕ್‌ಗೀ

ಮೆಜಾವಯ್ಲೆಂ ಕೆಳೆಂ ಕೊಣಾಚೆಂಗೀ

ಪಿಲ್ಯಾದ್ ಜೊಡ್ಚೆ ಕೋಣ್‌ಗೀ

ಮಿನತ್ ಕರ್ಚೆ ಕೋಣ್‌ಗೀ

ಮಾನ್ ಸಮ್ಮಾನ್ ಕೊಣಾಕ್‌ಗೀ

ನಿಮಾಣೆಂ ಆಯ್ಕಾ ಏಕ್ ಸಮಧಾನ್

ಕೊಣೆಂ ವೊಡ್ಲೆಂ ಕೊಣೆಂ ಮೊಡ್ಲೆಂ

ಮ್ಹಜ್ಯಾ ನಾಂವಾರ್ ಕೊಣೆಂ ಕೊಣೆಂ ಜೊಡ್ಲೆಂ

ಮ್ಹಜಿ ಮಾತ್ರ್ ಸೆವಾ!

ಹೆರಾಂಚಿ ಸದಾಂಚ್ ನಾಂವಾಚಿ!!

ಪಿಂತುರ್

ವಿಂಚ್ಣಾರ್ ಕವಿತಾ

ಮ್ಹಜಿ ಮಾತ್ರ್ ಸೆವಾಗಾ [- ವಲ್ಲಿ ಕ್ವಾಡ್ರಸ್, ಅಜೆಕಾರ್]

ಅಳೆಗಾ ಅಳೆಗಾ

ದೊಳೆ ಸೊಡ್ನ್ ಪಳೆಗಾ

ಮ್ಹಜ್ಯಾ ಸಾಗೊರಾಂತ್ ಜಿಯೆಗಾ

ಮ್ಹಜಿ ಮಾತ್ರ್ ಸೆವಾಗಾ

ಹೆರಾಂಚೆ ಫಕತ್ತ್ ನಾಂವಾಕ್‌ಗಾ

ಅಳೆಗಾ ಅಳೆಗಾ

ಕಾನ್ ಸೊಡ್ನ್ ಆಯ್ಕ್‌ಗಾ

ಮ್ಹಜೆಂ ಗೀತ್ ಆಯ್ಕ್‌ಗಾ

ಮ್ಹಜೆಂ ಮಾತ್ರ್ ಗಾಯನ್‌ಗಾ

ಹೆರಾಂಚೆಂ ಒಟ್ಟೆಂ ಪೆಂಪಾರೆಂಗಾ

ಅಳೆಗಾ ಅಳೆಗಾ

ಮಂಡೊ ಆಸ್ಚೆ ಪೊಯಾಗಾ

ಮ್ಹಜ್ಯಾ ದರ್ಭಾರಾಕ್ ಯೆಯಾಗಾ

ಮ್ಹಜಿ ಮಾತ್ರ್ ಕವಿತಾಗಾ

ಹೆರಾಂಚಿಂ ಪೊಟ್ಟು ಉತ್ರಾಂಗಾ

ಅಳೆಗಾ ಅಳೆಗಾ

ಬೊಂಡು ಆಸ್ಚೆ ಚಿಂತಾಗಾ

ಮ್ಹಾಕಾ ಮೆಳ್ಚೆ ಪುರಸ್ಕಾರ್‌ಗಾ

ಮ್ಹಜಿ ಮಾತ್ರ್ ಪ್ರಶಸ್ಥಿಗಾ

ಹೆರಾಂನಿ ಮೊಲಾಕ್ ಘೆತ್‌ಲ್ಲಿಗಾ

ಅಳೆಗಾ ಅಳೆಗಾ

ಕೊಂಕ್ಣಿ ಲೊಕಾಂಕ್ ಸಾಂಗಾಗಾ

ಮ್ಹಜೆಂ ಧೊಲ್ಕೆಂ ಭರಾಗಾ

ಮ್ಹಜಿ ಮಾತ್ರ್ ಸೆವಾಗಾ

ಹೆರಾಂಚಿ ಸಕ್ಕಡ್ ಡೋಂಗ್‌ಗಾ

ಕವಿತಾ ಪಾನಾಕ್

ದಾಯ್ಜ್ ಪಾನಾಕ್

About us | Feedback | Contact us
Copyright © 2005 DAAIZ.COM All rights reserved. Page concept, designed and maintained by Ashawadi Publications