ಕವಿತಾकविताPoem
ನಿರ್ಮಲಾಕ್
ಕೊಂಕ್ಣೆಚಾ ವಿಂಚ್ಣಾರ್ ಸಾಹಿತ್ಯಾಚೊ ಕೊನ್ಸೊ - ’ದಾಯ್ಜ್’ - ಫಕತ್ತ್ ಕೊಂಕಣಿ ಥಾವ್ನ್, ಕೊಂಕಣಿ ಪರ್ಯಾಂತ್, ಕೊಂಕಣಿ ಖಾತಿರ್.
ತಿಂತೆರಾಂತ್ ಪಿಂತುರ್
ಪಿಂತುರ್ - 8
ವಿಶಯ್: ಕವಿ ಆನಿ ಕವಿತಾ
ಪಿಂತುರ್, ತಿಂತೆರ್ ಆನಿ ಪ್ರೇರಣಾಂ
’ಕವಿಚಾ ಭಿತರ್ಲ್ಯಾ ಉಲ್ಯಾಚಿ ಅಭಿವ್ಯಕ್ತಿಚ್ ಕವಿತಾ’. ತಿಂತೆರಾಂತ್ ಭೋವ್ಶಾ ಅಸಲೆಂ ಏಕ್ ಪಿಂತುರ್ ಹಾಚ್ಯಾಧಿಂ ಉದೆಲ್ಲೆಂ ನಾ ಜಾವ್ಯೆತ್ ದೆಖುನ್ ಹ್ಯಾ ಪಾವ್ಟಿಂಚಾ ಪಿಂತುರಾಚೆರ್ ಇತ್ಲ್ಯೊ ಅಪುರ್ಭಾಯೆಚ್ಯೊ ಕವಿತಾ ಆಯ್ಲ್ಯಾತ್ ಮ್ಹಳ್ಯಾರ್ ಮ್ಹಜೆಂ ಮನ್ ಮೊರಾಚಿಂ ಪಾಕಾಂ ಭಾಂಧುನ್ ನಾಚೊಂಕ್ ಲಾಗ್ಲಾಂ. ಎಕಾವರ್ನಿಂ ಏಕ್ ಉತ್ತೀಮ್ ಕವಿತಾ - ಜಾಂವ್ ಚಿಂತ್ಪಾನ್, ಜಾಂವ್ ಉತ್ರಾಂನಿ ಜಾಂವ್ ಇಮಾಜೆಂನಿ. ಕವಿತಾ ಮ್ಹಳ್ಯಾರ್ ಕಶೆಂ ಆಸ್ಯೆತಾ ಮ್ಹಣ್ಚಾಕ್ ಖಂಡಿತ್ ಹಿಂ ಕವಿತಾ ಗೊವಾಯ್ ದಿತಿತ್.
ಕವಿ ಕೆದಾಳಾಯ್ ಸಂಸಾರಾಚಾ ಕೊನ್ಶಾನ್ ಕೊನ್ಶಾಂನಿ ಸೊಧ್ನಾಂ ಕರುಂಕ್ ಸಕ್ತಾ - ಸಾಂಗ್ಣಿ ಆಸಾ ’ರವಿನ್ ದೆಖೊಂಕ್ ಸಕಾನಾಸ್ಚೆಂ ಕವಿ ದೆಖೊಂಕ್ ಸಕ್ತಾ’ - ಪುಣ್ ಜೆದ್ನಾಂ ತೊ ಕವಿ ಎಕಾ ಕವಿಕ್ ಆನಿ ಕವಿತಾಕ್ ದೆಖೊಂಕ್ ಲಾಗ್ತಾನಾ ಥಂಯ್ಚರ್ ಕಿತೆಂ ಜಾಂವ್ಕ್ ಸಾಧ್ಯ್ ಆಸಾ ಮ್ಹಳ್ಳೆಂ ಹಿಂ ಕವಿತಾ ವಾಚ್ತಾನಾ ಖಂಡಿತ್ ತುಮ್ಕಾಂ ಗೊಮ್ತೆಲೆಂ. ಆತಾಂ ಎಕೆಕಾ ಕವಿತೆಚೆಂ ತೀರ್ಳ್ ಮಟ್ವ್ಯಾನ್ ಉಗ್ಡಾಪೆಂ ಕರ್ಚೆಂ ತರ್;
ಕವಿ ಆಸ್ಟಿನ್ ಪ್ರಭುನ್ ಸಾಂಗ್ಚೆಪರಿಂ ಕವಿತಾ ಮ್ಹಳ್ಯಾರ್ ’ಉತ್ರಾಂ, ತಂತ್ರಾಂ, ಮಂತ್ರಾಂಚಿ ಕವಿತಾ’ ಕಿತ್ಯಾಕ್ ಮ್ಹಳ್ಯಾರ್ ಕವಿಚೆಂ ತ್ರಾಣ್ ಅಸಲೆಂ ಮ್ಹಳ್ಯಾರ್ ವಸ್ತುರ್ ಆಸ್ತಾನಾಂಯ್ ಹೆರಾಂಕ್ ನಾಗ್ಡೊ ಕರುಂಕ್ ಕವಿ ಮಾತ್ರ್
ಸಕ್ತಾ.
ಕವಿ ಆರ್ಯನ್
ತಾಕೊಡೆ ಖರೆಂಚ್ಪಣಿಂ ವಾಚ್ಪ್ಯಾಂಚಾ ದೊಳ್ಯಾಂಚ್ಯೊ
ಆಸ್ಡ್ಯೊ ವಯ್ರ್ ಕರುಂಕ್ ಸಕ್ತಾ ಮ್ಹಣ್ಚಾಕ್
ತಾಚೆಂ ಕವಿತಾ ಗೊವಾಯ್ ದಿತಾ. ಕವಿತಾ ಆನಿ ಸಂಪಾದಕ್ ಹಾಂಚೆಮಧ್ಲೊ
ಕವಿ ಕಸೊ ಫಕತ್ತ್ ಬಾಜಾರಾಚಿ ಏಕ್ ವಸ್ತ್ ಜಾತಾ
ಮ್ಹಳ್ಳೆಂ ಮಟ್ವ್ಯಾನ್ ತರ್ಯ್ ನಾಟ್ವೊಂಚೆಪರಿಂ ವರ್ಣಿತಾ.
ಕವಿ ಕ್ಲೆರೆನ್ಸ್ ಕೈಕಂಬ ಹಾಂತ್ಲೆಂ ಪಿಂತುರ್ ಪಳೆವ್ನ್ ಶೆರ್ಮೆಲಾ - ಹೆಂ ಪಿಂತುರ್ ತಾಕಾ ಪಾಲಿನ್ ಮುತ್ಲ್ಲ್ಯಾ ಎಕಾ ಫಾಳೆರಿಪರಿಂ ದಿಸ್ತಾನಾ ತಾಣೆಂ ಸವಾಲಾಂ ಸವಾಲಾಂನಿ ಉಭ್ಯೊ ಕೆಲ್ಲ್ಯೊ ಇಮಾಜ್ಯೊ ಖರೆಂಚ್ ಜಾವ್ನ್ ಕವಿತಾರಸಿಕಾಂಕ್ ಎಕಾ ಅಥ್ವ್ಯಾಚ್ ಸಂಸಾರಾಕ್ ವರ್ತಾ. ಕವಿ ಇತ್ಲ್ಯಾ ಇಮಾಜಿಂಕ್ ಉಭೆಂ ಕರುನ್ ಹೆಂ ಪಿಂತುರ್ ಕಾಂಯ್ ’ಡಾನ್ ಬ್ರೌನ್’ ಹಾಚೆಂ ಅನ್ಯೇಕ್ ’ಡಾ ವಿಂಚಿ ಕೋಡ್’ ಜಾಯ್ತ್ ಕೊಣ್ಣಾ ಮ್ಹಳ್ಳೊ ದುಭಾವ್ ಉಚಾರ್ತಾ. ಪುಣ್ ಅಖ್ರೇಕ್ ಹಾಂಗಾಸರ್ ಜೀಕ್ ಕವಿತೆಚಿಚ್ಚ್ ಜಾತಾ.
ಕವಯತ್ರಿ ಬಾಯ್ ನಿರ್ಮಲಾಕ್ ’ಕವಿತಾ ವ್ಹಾಳೊ ವೊತ್ಚೊ ಕವಿ ನಿಸ್ವಾರ್ಥಿ ಮಯಾಮೊಗ್ ಖಾಲ್ತೆಪಣಾಚೊ ರವಿ.’ ಮ್ಹಳ್ಳೆಪರಿಂ ಭೊಗ್ತಾ. ಕವಯತ್ರಿ
ವಾಯ್ಲೆಟ್ ಪಿರೇರಾ ಅಪುಣ್ ಉದೆವ್ನ್ ಯೆಂವ್ಚಿ
ಕವಯತ್ರಿ ತರ್ಯ್ ಅಪ್ಲ್ಯಾ ಕಾಳ್ಜಾಂತ್ ಖರೊ ಕೊಂಕ್ಣಿ
ಮೋಗ್ ಆಸಾ ದೆಖುನ್ ಮ್ಹಜಿ ಕೊಂಕ್ಣಿ ಭಾಸ್
ಭಾಂಗ್ರಾಳ್ಯಾ ಅಕ್ಶರಾಂನಿ ಸೊಭಂವ್ಕ್ ಅಪ್ಲಿ ಆತುರಾಯ್
ಧಾಖವ್ನ್ ವಾಚ್ಪ್ಯಾಂಚೆಂ ಮನ್ ಜಿಕ್ತಾ.
ಕವಿ ವಿನ್ಸಿ ಮೆಲ್ಕಾರ್
ಹಾಚಾ ಕವಿತಾಂನಿ ಜಾಲ್ಲಿ ವ್ಹಾಡಾವಳ್ ಮ್ಹಾಕಾ ನಿಜಾಯ್ಕೀ
ಧಾದೊಸ್ ಕರ್ತಾ. ಕವಿ ಅಪ್ಣಾಕ್ಯ್ ಕವಿತಾ ಸಮ್ಜಾತಾ
ಮ್ಹಳ್ಳೊ ಫಟ್ಕಿರೊ ಡೋಂಗ್ ಕರುಂಕ್ ವಚಾನಾಸ್ತಾಂ
ಸತ್ ವಿಂಚ್ತಾನಾ ಕವಿತಾಚೆಂ ಮೋಲ್ ಚಡ್ತಾ.
ಕವಿ ಪ್ರಸನ್ನ್ ನಿಡ್ಡೋಡಿ ಹ್ಯಾ ಪಿಂತುರಾಂ ಭಂವ್ತೊಣಿಂ ಸವಾಲಾಂಚೊ ಪುರ್ಶಾಂವ್ ಹಾಡಯ್ತಾನಾ ಕವಯತ್ರಿ
ನಂದಿನಿ (ಬಾಯ್ ಸ್ಟೆಲ್ಲಾ ಡಿ’ಕೋಸ್ತಾ) ಏಕ್ ಕವಯತ್ರಿ ಜಾವ್ನ್ ಅಪುಣ್ ಕವಿತಾ ಕಿತ್ಯಾಕ್ ಬರಯ್ತಾಂ ಮ್ಹಳ್ಳ್ಯಾ ಸವಾಲಾಕ್ ಸವಾಲಾಂನಿ ಜಾಪಿ ದೀವ್ನ್ ವೆತಾನಾ ಕವಿತಾ ಅಪುರ್ಭಾಯೆನ್
ಸೊಭ್ತಾ.
ಕವಿ ಮೆಲ್ವಿನ್ ಜೆ. ವಾಸ್ ಏಕ್ ಕವಿಕ್ ಜೆದ್ನಾಂ ಕವಿತಾ ಅಪ್ಲಿ ವಳೊಕ್ ಲಿಪಂವ್ಚಾ ಚೆಡ್ವಾಪರಿಂ ದಿಸೊನ್ ಯೆತಾನಾ ’ತೆಂ ಕೊಣ್?’ ಮ್ಹಳ್ಳೆಂ ಸವಾಲ್ ಉಭೆಂ ಕರೀತ್, ಎಕೆಕಾ ಇಮಾಜೆಂಕ್ ಉಭೆಂ ಕರಿತ್ ವೆತಾ.
ಮ್ಹಾಕಾ ಹಾಂಗಾಸರ್ ಕವಿಚ್ ದಿಸಾನಾಂತ್ - ನೈತಿಕ್ ಜವಾಬ್ಧಾರಿ ಆಸ್ಚೆ ಕವಿಚ್ ದಿಸಾನಾಂತ್.. ಆಸ್ಚೆ ಸಗ್ಳೆ ಎಕ್ಚ್ ಅಪ್ಣಾಂಚೆರ್ ಬರಯಿಲ್ಲಿಂ ಹೆರಾಂಚಿಂ ಕಿರ್ತನಾಂ ಆಯ್ಕೊನ್ ಬಸ್ಲ್ಯಾತ್ ವ ಹೆರಾಂಚಿ ಕಿರ್ತನಾ ಗಾಂವ್ಕ್ ಲಾಗ್ಲ್ಯಾತ್. ದೆಖುನ್ ಬಾಕಿ ಉರ್ಲ್ಲ್ಯಾ ಮಧೆಂ ಮ್ಹಜಿ ’ಕವಿ ಕೊಣ್ಗಾ?’ ಮ್ಹಳ್ಳಿಂ ಸೊಧ್ನಾಂ ಭೊವ್ಶಾ ಕೊಣಾಯ್ ನದ್ರೆಕ್ ಪಡ್ಲ್ಯಾರೀ ಪಡಾತ್.
ಕವಿ ವಿಲ್ಸನ್ ಕಟೀಲ್ ಹಾಚೆಂ ಕವಿತಾ ಕಾಂಯ್ ಕವಿತಾರಸಿಕಾಂಕ್ ಉಭೆಂಚ್ ಚಿರಿತ್ - ತಿತ್ಲಿ ಸಕತ್ ’ಕಾವ್ಯಾಳ್ ಹಲ್ಲೊ’ ಕವಿತೆಂತ್ ಅಟಾಪ್ಲ್ಯಾ - ಜೆದ್ನಾಂ ಕವಿಚೆರ್ ಹಲ್ಲೊ ಜಾತಾನಾ ಕಿತೆಂ ಸಕ್ಕಡ್ ಘಡೊಂಕ್ ಸಾಧ್ಯ್ ಆಸಾ ಮ್ಹಳ್ಳೆಂ ಸೊಭಿತ್ ರಿತಿನ್ ಪಿಂತ್ರಾವ್ನ್ ಕವಿತಾಸವೆಂ ಕವಿ ಜಿಕೊಂಕ್ ಪಾವ್ತಾ.
ಕವಿ ಎಚ್ಚೆಮಾಚೆಂ ’ಕಾಗ್ದಾಚೆಂ ಕಾಜಾರ್’ ಕವಿತಾ ದೋನ್ ವರ್ಗಾ ಮಧ್ಲೊ ಅಶೀರ್ ಜಾಂವ್ಚೊ ಸಂಬಂಧ್ ಅಪುರ್ಭಾಯೆನ್ ಪಿಂತ್ರಾಯ್ತಾ.. ದೆಖುನ್ ’ಫುಲ್ ಕಾಗ್ದಾಚೆಂ’ ಜಾವ್ನಾಸ್ಚೊ ಕವಿ ಅಖ್ರೇಕ್ ’ಫುಲಾಚೆಂ ಕಾಗಾದ್’ ಜಾತಾ. ಹಾಂಗಾಸರ್ ಮಾತಿ ಆನಿ ಮೀಠ್ ಏಕ್ ಸಾಂಕೇತ್ ಮಾತ್ರ್! ಪುಣ್ ತಾಚ್ಯಾ ಪಂದಾ ವ ತಾಚ್ಯಾ ಪಾಟ್ಲ್ಯಾನ್ ಏಕ್ ವ್ಹಡ್ಲೊ ಜಮೊಂಚ್ ರಾವೊನ್ ಹೆಡಾಂವ್ಚೆಂ ದಿಸೊನ್ ಯೆತಾ.
ಕವಿತಾ ಮ್ಹಳ್ಯಾರ್ ಕಿತೆಂ? ಹೆಂ ಸವಾಲ್ ಸುತಾರಿಕ್ ವಿಚಾರ್, ಚಾಮಾದೊರಾಕ್ ವಿಚಾರ್, ಬೆಂಡ್ಕಾರಾಕ್ ವಿಚಾರ್, ಕೆಲ್ಶಿಕ್ ವಿಚಾರ್ ವ ಮೊಗೊರಾಕ್ ವಿಚಾರ್ - ಎಕೆಕ್ಲೊ ಎಕೆಕ್ ಜಾಪ್ ದೀತ್. ಜಶೆಂ ಆಮಿ ದಿಲ್ಲೆಪರಿಂ. ಕೊಣ್ ಮ್ಹಣೊಂ ಕವಿತಾ ಗೊಂಡೊ ಯಾ ಕೊಣ್ ಮ್ಹಣೊ ಕವಿತಾ ಉಂಡೊ. ವ ಕವಿತಾಚಿ ಆರ್-ಮೂರ್ ಕಳಿತ್ ನಾಸ್ತಾಂ ಜಾಲ್ಲೆ ’ಕವಿತಾಚೆ ಪಂಡಿತ್’ ಕಾಂಯ್ ಕವಿತಾಕ್ ’ಲೆಂಡೊ’ ಮ್ಹಣೊಂ. ಪುಣ್ ಕವಿತಾ ತಿ ಕವಿತಾಚ್.. ಹೆಂಚ್ ಮ್ಹಜ್ಯಾ ದುಸ್ರ್ಯಾ ಕವಿತೆಂತ್ ಪಿಂತ್ರಾಂವ್ಕ್ ಪ್ರೇತನ್ ಕೆಲಾಂ..
ಕವಿ ವಿನ್ಸಿ ಪಿಂಟೊಚೆಂ ಕವಿತಾ ಮ್ಹಾಕಾ ಖರೆಂಚ್ ವಿಜ್ಮಿತ್ ಕರ್ತಾ - ಪ್ರತ್ಯೇಕ್ ಜಾವ್ನ್ ಕವಿತೆಚ್ಯೊ ಅಖ್ರೇಚ್ಯೊ ಪಂಗ್ತ್ಯೊ; ’ರವಿ ದೆಕಾನಾತ್ಲೊ ಕವಿ ಚೊಯ್ತಾ. ಪುನ್ವೆಂ ರಾತಿಂ ಅಮಾಸ್ ಹಾಡ್ತಾ, ಪುಣ್ ಕವಿಚಿಂ ಜಿಣಿ, ದುಖಾಳ್ ಕಾಣಿ ಹ್ಯಾ ಸಂಸಾರಿ ನಾಂವ್ ನಾಸ್ತಾಂ ಉರ್ತಾ.’ ಪುನ್ವೆಚಾ ರಾತಿಂ ಅಮಾಸ್ ಹಾಡಂವ್ಚಾ ಕವಿಚೆಂ ತ್ರಾಣ್ ಪಳೆಯಾ - ಆನಿ ಖರೆಂಚ್ ಜಾವ್ನ್ ಮಯ್ನ್ಯಾಚೊ ಕವಿ ಜಾವ್ನ್ ವಿಂಚೊನ್ ಯೆತಾ - ಬಾಬ್ ವಿನ್ಸಿ ಪಿಂಟೊ ಆಂಜೆಲೊರ್ - ತುಕಾ ಉಲ್ಲಾಸ್.
ಹ್ಯಾ ಪಾವ್ಟಿಂಚಿ ವಿಶೇಷತಾ ಖಂಯ್ಚಿಗೀ ಮ್ಹಳ್ಯಾರ್ ತೇಗ್ ಮಯ್ನ್ಯಾಚೆ ಕವಿ ಹ್ಯಾ ಅಂಕ್ಡ್ಯಾಕ್ ಕವಿತಾ ಧಾಡುಂಕ್ ಪಾವ್ಲ್ಯಾತ್ - ಉಲ್ಲಾಸ್ ಸರ್ವಾಂಕ್!!
[ವಾಂಟೆಲಿ ಜಾಲ್ಲಿಂ]
1. ವಿನ್ಸಿ ಪಿಂಟೊ ಅಂಜೆಲೊರ್/ದುಭಾಯ್.
4. ವಲ್ಲಿ ಕ್ವಾಡ್ರಸ್ ಅಜೆಕಾರ್/ಕುವೇಯ್ಟ್.
5. ಕ್ಲೆರೆನ್ಸ್ ಪಿಂಟೊ ಕೈಕಂಬ/ಮಸ್ಕತ್.
7. ನಿರ್ಮಲಾ ಗೋವಿಯಸ್ ಬೆಂದುರ್/ಮಸ್ಕತ್.
9. ಆಸ್ಟಿನ್ ಪ್ರಭು ನಂತೂರ್/ಚಿಕಾಗೊ.
10. ವಲ್ಲಿ ಕ್ವಾಡ್ರಸ್ ಅಜೆಕಾರ್/ಕುವೇಯ್ಟ್.
13. ಮೆಲ್ವಿನ್ ಜೆ.ವಾಸ್, ಕೆಲರಾಯ್.
14. ವಾಯ್ಲೆಟ್ ಜೆ. ಪಿರೇರಾ, ಮಂಗ್ಳುರ್.
1. ಕವಿ ಆನಿ ಕವಿತಾ [ಮಯ್ನ್ಯಾಚೆಂ ಕವಿತಾ]
ವಿನ್ಸಿ ಪಿಂಟೊ, ಅಂಜೆಲೊರ್ಕವಿ
ಆನಿ ಕವಿತಾ,
ಜೆನ್ನಾ ತಾಂಚೆ ಲಗಿನ್ ಜಾತಾ.....
ಲಾಗ್ಸಿಲಿ ಘಡಿತಾಂ, ಪಯ್ಶಿಲಿ ವೊಡಿತಾಂ,
ನೀಜ್ ಸತಾಂ, ತಾಂತ್ಲಿ ಖತಾಂ
ಉತ್ರಾಂ ರುಪಿಂ ಭುಂಯ್ ಪಡ್ತಾ.
ಕವಿ ಆನಿ ಕವಿತಾ,
ಭಗ್ಣಾಂಲಾಗಿಂ ಕಾಳಿಜ್ ಉಲಯ್ತಾ.
ಮೊಗಾಚಿ ಗೊಡ್ಸಾಣ್, ರಾಗಾಚಿ ತಿಕ್ಸಾಣ್,
ತೊಂಡಾರ್ ಹಾಸೊ, ಹಾಡ್ಚೊ ಪಿಸೊ
ಕಾಸಾಪ್ಪ್ಯಾಕ್ಯೀ ರಡಯ್ತಾ.
ಕವಿ ಆನಿ ಕವಿತಾ,
ಕುಡಿ ಭಿತರ್ಲ್ಯಾ ಅತ್ಮ್ಯಾಕ್ ಸೊಧ್ತಾ.
ಕರುನ್ ನವಾಲಾಂ, ದೆವಾಕ್ಯೀ ಸವಾಲಾಂ
ತಾರಾಂ ಸುರ್ಯಾಂತ್, ಲ್ಹಾರಾಂ ದರ್ಯಾಂತ್,
ಮೊತಿಂಯಾ ಫುಲಾಂ ಮಧೆಂ ಸ್ತ್ರೀಯೆಕ್ ರಚ್ತಾ.
ಕವಿ ಆನಿ ಕವಿತಾ,
ರವಿ ದೆಕಾನಾತ್ಲೊ ಕವಿ ಚೊಯ್ತಾ.
ಪುನ್ವೆಂ ರಾತಿಂ ಅಮಾಸ್ ಹಾಡ್ತಾ,
ಪುಣ್ ಕವಿಚಿಂ ಜಿಣಿ, ದುಖಾಳ್ ಕಾಣಿ
ಹ್ಯಾ ಸಂಸಾರಿ ನಾಂವ್ ನಾಸ್ತಾಂ ಉರ್ತಾ.
2. ಕಾಗ್ದಾಚೆಂ ಫುಲ್ [ಎಚ್ಚೆಮ್]
ಹಾಂವ್ರೆ ಫುಲ್ ಕಾಗ್ದಾಚೆಂ
ತುಂ ಭಂವರ್ ತಿಂತಾಚೊ
ಪಯ್ಲ್ಯಾ ಸ್ಪರ್ಶ್ಯಾಂತ್ ಉತರ್ ಜಾಲೆಂ
ಲಗ್ನಾ ಘಾಂಟಿ ವಾಜ್ಲ್ಯೊ ಕಾಳ್ಜಾಂತ್
ಪರ್ಮಳ್ ನಾ ಮ್ಹಾಕಾ, ಕಾಂಟೆಯೀ
ಪಾಕಾಟೆ ನಾಂತ್ ತುಕಾ, ವೋಂಟ್ಯೀ
ಚಿಂವ್ತಾಲೊಯ್ ರೋಸ್ ಕಸೊ?
ವಾಳಯ್ ರಿಗ್ಲಿ ವೊಂಟಿಯೆಂತ್
ಹಾಂವ್ರೆ ಕಾಗಾತ್ ಫುಲಾಚೆಂ
ತೂಂರೆ ತಿಂತಾಚೊ ಭಂವರ್
ಮಾತ್ಯೆಂತ್ ಮೆಳ್ಳ್ಯಾತ್ ಪಾಕ್ಳ್ಯೊ ಮ್ಹಜ್ಯೊ
ಮಿಟಾಂತ್ ಖಿರ್ಲ್ಯಾತ್ ಥೆಂಬೆ ತುಜೆ.
3. ಕಾವ್ಯಾಳ್ ಹಲ್ಲೊ [ವಿಲ್ಸನ್ ಕಟೀಲ್]
ಜಿಣಿ ಬುಡ್ಚ್ಯಾ ವೆಳಾ, ಆನ್ಭೋಗ್ ಪಿಕ್ಲೊ ಸಾಂಜೆರ್
ಇರೊನ್ ಗೆಲೆ ಥೆಂಬೆ, ದುಕಿ ರಾಣಿಯೆ ಸೊಜೆರ್
ಉಮ್ಯಾ ಮೊತಿಂ ಮಾಗೊನ್, ದಿಂಬಿ ಘಾಲಿ ವೆಳೆರ್
ಲ್ಹಾರಾಂ ಲ್ಹಾರಾಂಚಿ ಥಾಪ್ಡಾಂ, ಝೆಂಜ್ರಾಲಿಂ ರೇಂವ್ ಪೊಲ್ಯಾರ್
ಉತ್ರಾಂನಿ ಫಾತರ್ ಮಾರ್ಲೆ, ಮೌನ್ ಫುಟ್ಲೆಂ ವೋಂಟಾರ್
ಪಿಂರ್ಗೊನ್ ಪಿಂರ್ಗೊನ್ ಗಾಯ್ಲೆಂ, ಶಿರ್ ತುಟ್ಲ್ಲೆಂ ಗಿತಾರ್
ಉಂಚಾಯ್ ಸ್ವಪ್ಣೆಲ್ಲೆ ದೊಳೆ, ರಂಗ್ಲೆ ದೊಂಗ್ರಾ ಪಿಂತುರ್
ಧುಳಿ ಕಣಾಂಕ್ ರಡ್ಲೆ, ವಾಸ್ತವ್ ಕಿತ್ಲೆಂ ನಿಷ್ಟುರ್
ಚಾನ್ನ್ಯಾಂತ್ ಫುಲ್ಲ್ಲೆಂ ಕಾವ್ಯೆಂ, ವ್ಹಾಳಯ್ ಚರ್ಲಿ ಫಾಂತ್ಯಾರ್
ಕಾಳ್ಜಾಬರಿಚ್ ಕಾಂತವ್ಣಿ, ಘಾಯ್ ಪಾನಾ ಪೊಂತಾರ್
4. ಕವಿ ಕೊಣ್ಗಾ? [ವಲ್ಲಿ ಕ್ವಾಡ್ರಸ್]
ಉದಾರ್ಯಾ ರಸ್ತ್ಯಾರ್ ವೊಮ್ತೆ ಪಡೊನ್ ಘೊರೆಂವ್ಚಾಂತ್ಲೆ
ದಿಸಾ ಉಜ್ವಾಡಾಕ್ ರಾತ್ಚಿಂ ನಕ್ತಿರಾಂ ಮೆಜುಂಕ್ ಲಾಗ್ಚಾಂತ್ಲೆ
ವಾರ್ಯಾರ್ ಉಭ್ಚಾ ಪಾಕಾಂಕ್ ವಿಂಚುಂಕ್ ಉಡಿ ಮಾರ್ಚಾಂತ್ಲೆ
ಕೊಣಾಚಿ ಕಾಸ್ಟಿ ಚೊರುನ್ ಮಾತ್ಯಾಕ್ ಮುಂಡಾಸ್ ಭಾಂದ್ಚಾಂತ್ಲೆ
ಕವಿ ಕೊಣ್ಗಾ ಸಾಂಗಾ ಮ್ಹಾಕಾ ತುಮ್ಚೆಮಧ್ಲೆ ಕವಿ ಕೊಣ್?
ದಿಸಾಕ್ ಘೊರೆಂವ್ನ್ ರಾತಿಕ್ ಹೆರಾಂಚಿಂ ಸ್ವಪ್ಣಾಂ ಫಾರ್ಚಾಂತ್ಲೆ
ಅಪ್ಲ್ಯಾ ವಾಟೆಚೆ ಖಾಂಟೆ ಹೆರಾಂಚಾ ವಾಟೆರ್ ಭರ್ನ್ ಜಿಕ್ತೆಲ್ಯಾಂತ್ಲೆ
ಅಪ್ಲೆಂ ನಾಕ್ ವಯ್ರ್ ಕರ್ಚಾಕ್ ಸದಾಂಚ್ ಹೆರಾಂಚಿ ಪುಜಾ ಕರ್ತೆಲ್ಯಾಂತ್ಲೆ
ಕೊಣಾಚಿ ಮೂಂಜ್ ಖಾತರ್ನ್ ಅಪ್ಲ್ಯಾ ಗಳ್ಯಾರ್ ಸೊಭಂವ್ಚಾಂತ್ಲೆ
ಕವಿ ಕೊಣ್ಗಾ ಸಾಂಗಾ ಮ್ಹಾಕಾ ಸುಭಾಂಗಿಂನೊ ಕವಿ ಕೊಣ್?
ದರ್ಯಾಂತ್ ಉಡ್ಲ್ಲ್ಯಾಂತ್ಲೆ ವ ಮೊಳ್ಬಾಕ್ ಚಡ್ಲ್ಲ್ಯಾಂತ್ಲೆ
ಕೆದಾಂತ್ ಸೊಧ್ತೆಲ್ಯಾಂತ್ಲೆ ಯಾ ದುದಾಂತ್ ನ್ಹಾತೆಲ್ಯಾಂತ್ಲೆ
ರಾನಾಂತ್ಲ್ಯಾ ವನ್ವಾಸಾಂತ್ಲೆ ವ ಶ್ಹೆರಾಂತ್ಲ್ಯಾ ದರ್ಭಾರಾಂತ್ಲೆ
ಕೊಂಕ್ಣಿ ಕೊಂಕ್ಣಿ ಮ್ಹಣೊನ್ ಅಪ್ಲೆಂ ಬೊಳ್ಕೆಂ ಭರ್ಚಾಂತ್ಲೆ
ಕವಿ ಕೊಣ್ಗಾ ಸಾಂಗಾ ಆತಾಂ ಖರೆಪಣಿಂ ಕವಿ ಕೊಣ್?
5. ಪರ್ನೆಂ ಥೊಡೆಂ ನವ್ಯಾ ಫುಡೆಂ [ಕ್ಲೆರೆನ್ಸ್ ಕೈಕಂಬ]
ಸಾಂಗ್ ವಲ್ಲ್ಯಾಬಾ ಸಾಂಗ್ ತುಂ ಮ್ಹಾಕಾ
ಫಾಳೆರಿಚೆಂ ಹೆಂ ಪರ್ನೆಂ ಪಾನ್ ಲಾಭ್ಲೆಂ ಖಂಯ್ ತುಕಾ?
ಪರ್ವತಾವಯ್ರ್ ಪೊಳ್ಕೊರ್ ಪರ್ನ್ಯಾ ಪಂಲ್ಗಣಾರ್ ಪಿಂಜ್ಲ್ಲೆಂ ಆಸ್ಲ್ಲೆಂ?
ಪಾಳು ಪಿಂಜೊನ್ ರುದಾನಾಚೊ ದುಖಾಂ ಪಾಳ್ವೊ ಗಳವ್ನ್
ಪೊಣ್ಜಾಚ್ಯಾ ಕಾಶ್ಟೆ ಲೇಸಾಂತ್ ಭಿರ್ಯಾಂತ್ ಲಿಪಯಿಲ್ಲೆಂ?
ಮೊಹೆಮ್ಜೆಧಾರೊ ಕಲ್ಪಣ್ಯಾಂತ್ ಕೊಲಿತ್ ಘೆವ್ನ್ ಗೆಲ್ಲೊಯ್ ತುಂ?
ಎಜಿಪಾಚ್ಯಾ ’ಮಮ್ಮಿ’ಚ್ಯಾ ಪಾಳ್ಣ್ಯಾಂತ್ ಸಾಂಪಡ್ಲೆಂ?
ಯಾ ಫಿಂರ್ಗ್ಯಾಂಚ್ಯಾ ಕೊವಾತಾಂತ್, ತಾಂಚ್ಯಾ ಕೊವೊರಾಂತ್
ಕೊವ್ಳೊ ಹೊ ಆಸ್ಲ್ಲೊ ಸಾಯ್ಭಾ?
ಹ್ಯಾ ಪಾಳೆರಿಚೆರ್ ಪಾರ್ಪೊಳ್ ಪಾಲ್ ಮುತ್ಲಿ ತಶೆಂ ದಿಸ್ತಾ
ನ್ಹಂಯ್
ಪಾಗ್ಗುಂತ್ಲ್ಯೊ ಪಾವ್ಸಾ-ಪಾಳ್ವೊ ಪಡೊನ್ ಪಾನಾಂ ಇರ್ಲಿಂ ತಶೆಂ ಭಗ್ತಾಗಾಯ್?
ವಿಚಾರ್ತಾಂ ಕ್ವಾಡ್ರಸಾಬಾ, ವಿಚಾರ್ತಾಂ ತುಜ್ಯಾ ಲಾಗಿಂ..
ಹಾಂತು ಬರಯಿಲ್ಲೆಂ ಕಿತೆಂ ಹಾಂವ್ ನೆಣಾಂ
ಸಾತ್ ಸರ್ಗಾ ವಯ್ಲೊ ಸರ್ವೆಸ್ಪರ್ ಮಾತ್ ಜಾಣಾ..
ಆನಿಂ ಇಲ್ಲೆಂ ತರ್ಯ್ ತುಕಾ ಕಳಿತ್ ಕೊಣ್ಣಾ!
ಹಾಂತು ಕಿತೆಂ ಆಲಿಬಾಬಾಚಿ ಕಾಣಿ ಲಿಖ್ಲ್ಯಾ ?
ಶಿಖಮೊರ್ ರುಕಾಚ್ಯಾ ಪಾನಾಂಚಿ ಕಥಾ ಅಸಾ?
ಪ್ರವಾದ್ಯಾಂಚ್ಯೊ ಪದ್ವೆಚ್ಯೊ ಪ್ರೋಫೆಸಿ ವಿಣ್ಲ್ಯಾತ್?
ನೊಯೆಚ್ಯಾ ಆರ್ಕಾಂತ್ ಲಿಪ್ಲ್ಲೆಂ ಸತ್ ಹಾಂತುಂ ಆಸಾ?
ಲೈಲಾನ್ ಮಜ್ನೂಕ್ ಭುಲಯಿಲ್ಲ್ಯಾ ಮೊಗಾ ಭೋಗ್ ಕಾಣ್ಸಿಲಾ?
ದಾವಿದಾಚಿಂ ಕೀರ್ತನಾಂಚಿಂ ಕೊರ್ಡಾಂವಾಂ ಭರೊನ್ ಆಸಾತ್?
ತುಜ್ಯಾ "ದಾಯ್ಜಾಂತ್ಲೆ" ಧಾಕ್ಲ್ಯಾ ದಸ್ತಾವೇಜ್ ಹೆಂ?
ಯಾ ಸಂಸಾರಾಚ್ಯಾ ಆಕೇರಿಚಿ ಪ್ರವಾದ್ ಆಸಾ?
ಅಜೆಕಾರ್ಚ್ಯಾ ಧನಿಯಾಂ,
ಏಕ್ಚ್ಚ್ ಏಕ್ ಉಪ್ಕಾರ್ ಮಾಗ್ತಾಂ ತುಜ್ಯಾ ಲಾಗಿಂ
ಪರ್ನ್ಯಾ ಫಾಳೆರಿರ್ ಕಿತೆಂಯ್ ಆಸೊಂ ಕಿತೆಂಯ್ ಭರೊಂ
ಮೆಳ್ಲ್ಲಿ ಫಾಳೆರ್ ಲಿಪವ್ನ್ ದವರ್ ಉಗ್ತಾಡಾಕ್ ಘಾಲಿನಾಕಾ
ಭಾಯ್ಲ್ಯಾ ಬಾವ್ಡ್ಯಾಕ್ ಕೊಣಾಕ್ ದಾಕಯ್ನಾಕಾ
ಪರ್ನ್ಯಾ ಪುಸ್ಕಾಟ್ ಅಸ್ಕತ್ ಪಾನಾಂತ್ಲಿ ಜಿವಿಂ ಉತ್ರಾಂ
’ಡಾನ್ ಬ್ರೌನಾ’ಚ್ಯಾ ಘುಗಿಚಾ ನದ್ರೆಕ್ ಘಾಲಿಂಚ್ಚ್ ನಾಕಾ ನಾ ತರ್
ಆನಿಂ ಏಕ್ "ದ ವಿಂಚಿ ಕೋಡ್" ಬರಂವ್ಕ್
ಖೊಟೆಂ ಪುಣ್ ಭಳ್ವಂತ್ ಪ್ರೇರಣಾಚೆಂ ಪುಡ್ಪುಡಿತ್ ಕಿರ್ಲ್
ತಾಚ್ಯಾ ಮತಿ ಫಾಲ್ಕ್ಯಾರ್ ಫುಟೊಂಕ್ ಆಸಾ.....
6. ಬರಯ್ತಾಯ್ ಕಿತ್ಯಾಕ್? [ನಂದಿನಿ]
ವಿಚಾರಿನಾಕಾ ಬರಯ್ತಾಯ್ ಕಿತ್ಯಾಕ್?
ಹಾಂವ್ ತೆಂ ಖಂಡಿತ್ ನೆಣಾಂ
ತುಕಾ ತಾಚಿ ಖಂತ್ ನಾಕಾ
ತುಂವೆಂ ತೆಂ ವಾಚ್ಚೆಂ ನಾಕಾ
ಕಾಗ್ದಾರ್ ತೆಂ ಛಾಪ್ಚೆಂ ನಾಕಾ
ತುಜೊ ಮಾಕಾ ಝೆಲೊಯ್ ನಾಕಾ
ವಿಚಾರಿನಾಕಾ ಬರಯ್ತಾಯ್ ಕಿತ್ಯಾಕ್?
ಹಾಂವ್ ತೆಂ ಖಂಡಿತ್ ನೆಣಾಂ
ಚಂದ್ರ್ ಸುರ್ಯೊ ಉದೆತಾ ಕಿತ್ಯಾಕ್
ರೂಕ್ ಝಾಡ್ ಪಾಲೆತಾ ಕಿತ್ಯಾಕ್
ತಾಳಿಯೆನ್ ತಾಳಿ ಫುಲ್ತಾ ಕಿತ್ಯಾಕ್
ಉಪ್ರಾಂತ್ ಫಳಾಂ ದಿತಾ ಕಿತ್ಯಾಕ್
ವಿಚಾರಿನಾಕಾ ಹೆಂ ಸರ್ವ್ ಕಿತ್ಯಾಕ್
ತೆಂ ತಿಂ ಖಂಡಿತ್ ನೆಣಾಂತ್.
ಕೊಂಬಿ ತಾಂತಿಯಾಂ ದವರ್ತಾ ಕಿತ್ಯಾಕ್
ಗಾಯ್ ದೂಧ್ ದಿತಾ ಕಿತ್ಯಾಕ್
ಫುಲಾ ಗಳ್ಯಾಂತ್ ಮ್ಹೊಂವ್ ಕಿತ್ಯಾಕ್
ಕೊಗ್ಳಿ ತಾಳ್ಯಾಂತ್ ಗೀತ್ ಕಿತ್ಯಾಕ್
ವಿಚಾರಿನಾಕಾ ಹೆಂ ಸರ್ವ್ ಕಿತ್ಯಾಕ್
ತೆಂ ತಿಂ ಖಂಡಿತ್ ನೆಣಾಂತ್
ತಶೆಂ ಹಾಂವ್ ಬರಯ್ತಾಂ
ನೆಣಾಂ ಕಿತ್ಯಾಕ್ ಬರಯ್ತಾಂ
ಬರಯ್ಜೆ ದೆಕುನ್ ಬರಯ್ತಾಂ
ಬರಾಪ್ ಮ್ಹಜೆಂ ದೆಕುನ್ ಬರಯ್ತಾಂ
ವಿಚಾರಿನಾಕಾತ್ ಬರಯ್ತಾಂ ಕಿತ್ಯಾಕ್
ಹಾಂವ್ ತೆಂ ಖಂಡಿತ್ ನೆಣಾಂಚ್ ನೆಣಾಂ!
7. ಕವಿತಾ ಮ್ಹಳ್ಯಾರ್ ಕಿತೆಂ? [ನಿರ್ಮಲಾ ಗೋವಿಯಸ್]
ಸವಾಲ್ ಅಪುರ್ಬಾಯೆಚೆಂ
ಮೆಂದು ಥಕವ್ನ್ ಜವಾಬ್ ಸೊಧ್ಚೆಂ
ಝಳ್ಕಾಲ್ಲೊ ಅರ್ಥ್, ಕವಿಚಿಂ ಮತಿಚಿಂ ಭಗ್ಣಾಂ, ಕಾಳ್ಜಾಚಾ ಅತ್ರೆಗಾಚಾ
ಗುಂಡಾಯೆಥಾವ್ನ್ ವ್ಹಾಳ್ಚಿ ಝರ್
ವ್ಹಾಳ್ತಾ ವಿಚಿತ್ರ್ ಲಿಖ್ಣೆ ರುಪಾರ್
ಸಾಂಗ್ಣಿ ಕವಿ ಉದೆಂತಿಚೊ ರವಿ
ಫಾಂಕಂವ್ನ್ ಉಜ್ವಾಡ್ ನಪಂಯ್ಚ್ ಕಾಳೊಕ್ ಭಂವಾರಿಂ
ಭಳ್ವಂತ್ ಆಪ್ಲ್ಯಾ ಲಿಖ್ಣೆ ಧ್ವಾರಿಂ
ದೋನ್ ಧಾರಿಚಾ ತಾಲ್ವಾರೆಕ್ ಸರಿ, ವ್ಹಾಳಯ್ತ್ ಕವಿತಾ ಖರಿ
ಸಾಂಗ್ಣೆ ಸರಿ, ಜಾಯ್ ಕವಿ ರವಿ ಉದೆಂತಿಚೊ
ನಿತಳ್ ಖಾಲ್ತ್ಯಾ ಮನಾಚೊ
ಪಾಚಾರುಂಕ್ ಮೋಗ್ ಖರ್ಯಾ ಕಾಳ್ಜಾಚೊ
ವ್ಹಾಳೊಂಕ್ ನಿಸ್ವಾರ್ಥ್ ಪಾವ್ಸಾ ವ್ಹಾಳೊ
ಸ್ವಾರ್ಥಿ ಕವಿ ಸಂಗಿ ಬುಡ್ತಲೊ ರವಿ
ಸಂಸಾರ್ ಸುರ್ಯಾವಿಣ್ ಆನಾಥ್
ಶಾಂತ್ ಸಮಾಧಾನ್ ಉರ್ತೆಲೆಂ ಸ್ವಪಾಣ್
ಕವಿಚ್ ಹಾಕಾ ಕಾರಣ್
ಕವಿತಾ ವ್ಹಾಳೊ ವೊತ್ಚೊ ಕವಿ
ನಿಸ್ವಾರ್ಥಿ ಮಯಾಮೊಗ್ ಖಾಲ್ತೆಪಣಾಚೊ ರವಿ.
8. ಕವಿ ಆನಿ ಕವಿತಾ [ಪ್ರಸನ್ನ್ ನಿಡ್ಡೋಡಿ]
ಕವಿತಾ..
ಏಕ್ ಗದ್ಯ್ಪಾಠ್ ಯಾ ಸಂಗೀತಾಚೊ ನೋಟ್
ಬುಕಾ ಆವಸ್ವರ್ ಯಾ ಯಾ ಪಾನಾಂಚೊ ಭೊರ್
ಮತಿ ಝರ್ ಯಾ ಚಿಂತ್ನೆಚಿ ಧಾರ್
ಹಾತಾಚಿ ವೋಳ್ ಯಾ ಚಿಂತ್ಪಾ ಬಳ್.
ಸಂಗೀತಾಚೊ ಶಿಂವೊರ್ ಯಾ ಗಾಣಾಚಿ ಪಂಕ್ತಿ
ನಾಚ್ಪ್ಯಾಚಿಂ ಪಾಂಯ್ಜಾಣಾಂ ಯಾ ಗಾವ್ಪ್ಯಾಚೊ ಸ್ವರ್
ಸುಕ್ಣಿಂ ಸಾವ್ಜಾಂಚೊ ಆವಾಜ್ ಯಾ ಮನ್ಜಾತಿಚಿ ಗೊರೊಜ್
ಉಜ್ಯಾಚೊ ಸುರ್ಮುಣ್ ಯಾ ಗೊಬ್ರಾಚೊ ಕರ್ವಾಣ್
ಜೆವ್ಣಾಚಿ ಬೊಶಿ ಯಾ ಪಾನ್ ಪೊಡಿಚೆಂ ಹರ್ವಾಣ್
ಸಾದೊ ಕ್ರಿಕೆಟ್ ಖೆಳ್ ಯಾ ಸ್ಪರ್ಧೆಚೊ ಮೇಳ್
ಲೊಕಾಚಿ ಖೆಟ್ ಯಾ ಮನ್ಶಾ ಜಿವಿತಾಂಚಿ ಭೆಟ್
ಅಮಾಲಿಚೊ ಸೊರೊ ಯಾ ಪಿಡೆಸ್ತಾಚೆಂ ವ್ಹಕಾತ್
ದರ್ಯಾಚಿಂ ಲ್ಹಾರಾಂ ಯಾ ಉಭಾರ್ ಪರ್ವತ್ ದೊಂಗ್ರಾಂ
ಮೊಡಾ ಇಡ್ಯಾಂತ್ಲಿಂ ನೆಕೆತ್ರಾಂ ಯಾ ಸುರ್ಯಾಚಿಂ ಕಿರ್ಣಾಂ
ಕುಡಿಚಿ ರಗ್ತಾ ಸ್ರಾವಾಂ ಯಾ ಕಾಳ್ಜಾಂತ್ಲಿಂ ಉಡ್ಕಾಣಾಂ
ಮೊರಾಚೊ ನಾಚ್ ಯಾ ರಾನಾಂತ್ಲೊ ಭಂವರ್
ಮೊಂವಾಚಿ ರೂಚ್ ಯಾ ಸೊರ್ಪಾಚಿ ಖೊಂಚ್
ದೆವಾನ್ ದಿಲ್ಲೆಂ ತಾಲೆಂತ್ ಯಾ ಮನ್ಶಾಚಿ ಗಿರಾಂತ್
ಆಶಾವಾದಿಚೆಂ ಸ್ವಪಾಣ್ ಯಾ ನಿರಾಶೆಚೆಂ ಧಾಂಪಾಣ್
ಕವಿ ಮ್ಹಣ್ತಾ.. ಕವಿತಾ ಏಕ್ ಕವಿಚೆಂ ಚಿಂತಾಪ್
ಜಾಣ್ವಾಯೆಚೆಂ ಶಿಕಾಪ್ ಯಾ ರಚನಾತ್ಮಕ್ ಬರಾಪ್
ಆನಿ ತಾಚೆಂ ಖರೆಂಚ್ ವಿವಿಧ್ ಸ್ವಪ್ಣಾ ರೂಪ್
9. ಉತ್ರಾಂ, ತಂತ್ರಾಂ ಮಂತ್ರಾಂಚಿಂ ಕವಿತಾ [ಆಸ್ಟಿನ್ ಪ್ರಭು]
ಜಶಿ ಪಾಂತಿ ವೊಳುನ್ ಶೆಂಡೊ ಬಾಂಧ್ತಾತ್
ಜಶಿಂ ಫುಲಾಂ ಗುಂತುನ್ ಝೆಲೊ ಕರ್ತಾತ್
ಜಶೆಂ ಗಾಂಚ್ ಘಡ್ಸುನ್ ಸಾಂಖಳ್ ರಚ್ತಾತ್
ತಶೆಂಚ್ ಸಬ್ಢ್ ರೆವ್ಡಾವ್ನ್ ಕವಿತಾ ಲಿಖ್ತಾತ್
ಕವನ್ ಜಾವ್ನಾಸಾ ಥೊಡ್ಯಾಚ್ಚ್ ಉತ್ರಾಂನಿ
ಶೃಂಗಾರಿತ್ ಸಬ್ಧಾಂಚಾ ಮಂತ್ರಾಂನಿ
ಗುಂಡಾಯೆಚಾ ಅರ್ಥಾ ತಂತ್ರಾಂನಿ
ಮತಿಂತ್ಲೊ ಪ್ರಸಾದ್ ಹೆರಾಂಕ್ ವಾಂಟ್ಚೆಂ
ಏಕ್ಯೆ ಸಂಗ್ತಿಚೆಂ ಸಗ್ಳೆಂ ಜೀವನ್
ಥೊಡ್ಯಾಚ್ಚ್ ಉತ್ರಾಂ ಪಂಕ್ತಿಂನಿ
ಉತ್ರಾಂಚ್ಯಾ ನಾಚ್ಪಾ ಲಹರಾಂನಿ
ಮಟ್ವ್ಯಾನ್ ವಾಚಕಾಕ್ ವಾಡ್ಚೆಂ
ಪ್ರಕೃತಿಚಿ ಸೊಭಾಯ್ ವರ್ಣುನ್
ಚಲಿಯೆಚಿ ತಿ ಕೂಡ್ ಆರಾಧುನ್
ಮೊಳ್ಬಾವಯ್ಲಿಂ ತಾರಾಂ ಮೆಜುನ್
ಲೊಕಾ ಮತಿಂನಿ ತೆಂ ಖಂಚಂವ್ಚೆಂ
ಕವಿ ಜಾವ್ಯೆತ್ ಶಿಲ್ಪ್ಶಾಲಾಂತ್ಲೊ ಇಜ್ನೆರ್
ವ ಪಂಚತಾರಾ ಹೊಟೆಲಾಂತ್ಲೊ ಕುಜ್ನೆರ್
ತಾಣೆ ವಿಂಚ್ಚೆ ಸಬ್ಧ್ಚ್ಚ್ ತಾಚೆಂ ಭಂಡಾರ್
ತಾಣೆಂ ಲಿಖ್ಲ್ಲಿ ಕವಿತಾಚ್ಚ್ ಕರಿತ್ ವಿಂಚ್ಣಾರ್
ಕವಿನ್ ತುಕಾ ಕೆನ್ನಾಂ ಹಾಸವ್ಯೆತ್, ರಡವ್ಯೆತ್
ತುಜೆಂ ಕಾಳಿಜ್ ಕಡವ್ಯೆತ್, ಕೂಡ್ ನಾಚವ್ಯೆತ್
ಸರ್ಗಾಕ್ ವ್ಹರ್ಯೆತ್ ವ ಯಮ್ಕೊಂಡಾಕ್ ಥಾಪ್ಯೆತ್
ತಾಚ್ಯಾ ಸಬ್ದಾಂ ಬಾಂಧಾವಳಿನ್ ತುಕಾ ಗುಂತ್ಯೆತ್
ವಸ್ತುರ್ ಆಸ್ತಾನಾಂಚ್ ತುಕಾ ವಿಣ್ಗೆಂ ಕರ್ಯೆತ್
ಕಾಳೊಕಾಂತ್ ಪಡ್ಲ್ಲಿ ಸುವಿ ಸೊಧುನ್ ಕಾಡ್ಯೆತ್
ಧೊವಿ ವೋಲ್ ತಿ ತಾಂಬ್ಡಿ ಮ್ಹಣ್ ರಂಗವ್ಯೆತ್
ಉತ್ರಾಂ, ಮಂತ್ರಾಂ, ತಂತ್ರಾಂನಿ ಘುಸ್ಪಡವ್ಯೆತ್
ಜಸೊ ರವಿ ಸಕಾಳಿಂ ಉಟೊನ್ ಆಪ್ಲೊ ಪ್ರಕಾಶ್ ಫಾಂಕ್ತಾ
ತಸೊ ಕವಿ ಆಪ್ಲ್ಯಾ ಉತ್ರಾಂ, ಉತ್ರಾಂನಿ ಮತ್ ಪ್ರಕಾಸ್ತಾ
ರಾತ್ಚ್ಯಾ ನಕ್ತಿರಾಂಪರಿಂ ಸಗ್ಳ್ಯಾಂಕ್ ತೊ ಜಿಳ್ಮಿಳಾಯ್ತಾ
ಆಪ್ಲ್ಯೆಚ್ಚ್ ಭಾಶೆನ್ ಸುಮಧುರ್ ಸಬ್ಧ್ ಉಲಯ್ತಾ
10. ಕವಿತಾ ಮ್ಹಳ್ಯಾರ್? [ವಲ್ಲಿ ಕ್ವಾಡ್ರಸ್]
ದನ್ಪಾರಾಂ ಭರಾರ್
ದುಕೊಳ್ ಪಡ್ಲೆಲ್ಯಾ ಗಾಂವಾಂತ್
ಭುಕೆಚಾ ದಾವೆಂತ್ ಭುರ್ಗೊ ಎಕ್ಲೊ
ಕುಪಾಂಥಾವ್ನ್ ಪಡ್ಲ್ಲ್ಯಾ ಕವಿತೆಕ್ ವಿಂಚುನ್
ಚಿಂತುಂಕ್ ಲಾಗ್ಲೊ
ಜರ್ ಕವಿತಾ ಉಂಡೊ ಜಾಲ್ಲೊ ತರ್?
ಅಮೊರೆಚಾ ವೆಳಾರ್
ಗೊರ್ವಾಂಕ್ ಗೊಟ್ಯಾಕ್ ಹಾಡೀತ್ತ್
ತಾಳ್ಣೆಂ ದಿಂವ್ಚಿ ಗತ್ ನಾಸ್ತಾಂ
ಕುಪಾಂಥಾವ್ನ್ ಗಳ್ಲ್ಲ್ಯಾ ಕವಿತೆಕ್ ವಿಂಚುನ್
ಚಿಂತುಂಕ್ ಲಾಗ್ಲೊ
ಜರ್ ಕವಿತಾ ಕುಂಡೊ ಜಾಲ್ಲೊ ತರ್??
ಫಾಂತ್ಯಾಫರಾರ್ ಪೊಕ್ರಿ ಥೊಡೆ
ಗುಡ್ಯಾರ್ ಹಾಗೊಂಕ್ ಗೆಲ್ಲೆ
ಎಕಾಮೆಕಾ ಫಾತೊರ್ ಮಾರ್ನ್ ಖೆಳ್ತಾನಾ
ಕುಪಾಂತ್ಲ್ಯಾನ್ ಕವಿತಾ ಗಳ್ತಾಂ ಗಳ್ತಾಂ
ಚಿಂತುಂಕ್ ಲಾಗ್ಲೆ
ಜರ್ ಕವಿತಾ ಲೆಂಡೊ ಜಾಲ್ಲೊ ತರ್???
ಕವಿತಾ ಕೊಣಾಕ್ ಉಂಡೊ
ತರ್ ಕೊಣಾಕ್ ಕುಂಡೊ
ಅನಿ ಕೊಣಾಕ್ ಸೊಭಿತ್ ಗೊಂಡೊ
ಪುಣ್ ಕವಿತೆಚಿ ಮೂರ್ ನಾಸ್ತಾಂ
ಫಕತ್ತ್ ಕಿಡೆ ಉಸ್ತುಂಚ್ಯಾಂಕ್
ಕವಿತಾ ಖರೊಚ್ಚ್ ಲೆಂಡೊ
11. ಕವಿತಾ ಮ್ಹಳ್ಯಾರ್ ಕಿತೆಂ?[ವಿನ್ಸಿ ಮೆಲ್ಕಾರ್]
ಮನಾಂತ್ ಖಂಚೆಂ ರುಪ್ಣೆಂ ಹಾಡುಂ?
ಮೊಗಾ ಮಯ್ಪಾಸಾಚೆಂ, ರಾಗ್ ಮೊಸ್ರಾಚೆಂ?
ಪ್ರಕೃತಿಚೆಂ, ಮನ್ಜಾತಿಚೆಂ, ನಿರ್ಜಿವ್ ವಸ್ತುಚೆಂ?
ಹ್ಯಾ ಕಾಳ್ಜಾಂತ್ ಖಂಚೆಂ ರೊಂಬವ್ನ್ ದವರುಂ?
ಸಗ್ಳೊ ಸಂಸಾರ್ ಭಂವೊನ್ ಆಸಾಂ
ಹರ್ಯೆಕಾ ವಸ್ತುಂಚಿ ಅನ್ಭೋಗ್ ಜೊಡ್ತಾಂ
ಬರೆಂ ವಾಯ್ಟ್ ಸಮ್ಜೊನ್ ಘೆತಾಂ
ಪುಣ್ ಮತಿಂತ್ ಕಿತೆಂಚ್ ಝಳ್ಕಾಲೆಂಚ್ ನಾ
ಸಂತೊಸ್ ಮ್ಹಜೆಲಾಗಿಂ ಆಯ್ಲೊನಾ
ಮೋಗ್ ಮ್ಹಳ್ಳೊ ಕಾಳ್ಜಾಂತ್ ಖಿರ್ಲಾಲೊನಾ
ಆಶಾ ಮಾತ್ರ್ ದವರ್ಲ್ಯಾ ಕವಿತಾ ಬರಂವಿ
ಪುಣ್ ಕಾಳ್ಜಾಚಿ ಭಗ್ಣಾಂ ಭಾಯ್ರ್ ಆಯ್ಲಿಂಚ್ ನಾಂತ್
ಪೆಣೆರ್ ಘುಂವ್ಡಾಯ್ತಾಂ ಕಾಗ್ದಾ ವಯ್ಲ್ಯಾನ್
ತೀಂತ್ ಸಂಪ್ಲೆಂ ಪೆಣೆರಾಂತ್
ಲಿಖ್ಣಿ ಸರಾಗ್ ಝರೊನ್ ಗೆಲ್ಯಾರೀ
ಕವಿತಾ ಥಂಯ್ಚರ್ ಘಡ್ಲೆಂಚ್ ನಾ
ಕವಿತಾ ಮ್ಹಳ್ಯಾರ್ ಕಿತೆಂ ಅಜೂನ್ ಸಮ್ಜಾಲೊಂನಾ..
12. ಕವಿ ಆನಿ ಕವಿತಾ [ಆರ್ಯನ್ ತಾಕೊಡೆ]
ಫಾಸ್ಳಾಲ್ಲ್ಯಾ ಮನಾಕ್ ಹುಮೆದಿನ್ ಭರುನ್
ಬೋರ್ ಗುಡ್ಯಾರ್ ಕಾದ್ರ್ಯಾ ರುಕಾಮುಳಾ
ಮನಾಂತ್ಲ್ಯಾ ವಿಚಾರಾಂಕ್ ಕೊರಾವ್ನ್
ವ್ಹಾಳ್ಲ್ಲ್ಯಾ ಉತ್ರಾಂಕ್ ಸೊಭಾಯೆನ್ ತಾಸುನ್
ರೂಪ್ ದಿಲೆಂ ಕವಿತಾಕ್ ಕವಿನ್,
ಅಪುಟ್ ನಿತಳ್ ಗೋಡ್ ಉತ್ರಾಂನಿ ಸಜವ್ನ್
ಗಡ್ ಆನಿ ಮೀತ್ ಸಾಂಭಾಳುನ್
ಶಾಣಿ ಗಿನ್ಯಾನ್ ಮತ್ ವಾಪಾರುನ್
ಕಾಯ್ದೆ ಫರ್ಮಾಣ್ ಪಾಳುನ್ ಗುಂತ್ಲಾ
ಕವಿತಾಚೆಂ ಭರ್ಮ್ ಚಡಯ್ಲಾಂ,
ಭಾಂಗ್ರಾಳ್ಯಾ ಮುಕುಟಾನ್ ನೆಟವ್ನ್
ಸಾಗೊರಾಚಾ ಬರ್ಪೂರ್ ಸಾಮರ್ತಿನ್ ಭರುನ್
ಧಾದೊಶಿ ವೊಡ್ಣ್ಯಾಂಕ್ ಧಾಂಬುನ್ ಧರುನ್
ಕಾಳ್ಜಾ ಮನಾಂತ್ಲ್ಯಾ ಭಗ್ಣಾಂಕ್ ಮೆಕ್ಳೆ ಕರುನ್
ಕವಿನ್ ಕವಿತಾ ಪತ್ರಾಕ್ ಧಾಡ್ನ್ ದಿಲಾಂ,
ಭಳಿಷ್ಠ್ ಕವಿತಾ ಶಾಭೀತ್ ಪಾವ್ಲಿ ಸಂಪಾದಕಾಕ್
ನಾ ಮುನಾಫೊ ಝಳ್ಕಾನಾ ಕವಿಚಿ ಸಾಮರ್ತಿ
ಕಪಟ್ ಭರ್ಲಾ, ಉತ್ರಾಂಚಿ ಮೇರ್ ಉತರ್ಲ್ಯಾ
ಮನಾಂತ್ಲಿ ಖೊಡ್ ವೊಂಕ್ಚಿ ಭಸ್ಮುಂಚಿ ಖುಣಾಂ ದಿಸೊನ್
ತಿರಸ್ಕಾರ್ ಜಾಲ್ಲಿ ಕವಿತಾ ಕೊನ್ಶ್ಯಾಕ್ ಪಡ್ಲ್ಯಾ
ಪಾನಾಚಿ ದಿಶಾ ಹೊಗ್ಡಾಯ್ಲಿ ಕವಿತಾ
ನದ್ರೆಕ್ ಸಾಂಪಡ್ಲಿ ಸಾತ್ ಪಾವ್ಸಾಳ್ಯಾ ಉಪ್ರಾಂತ್
ತಿಂತಾಚೆಂ ಆವ್ಕ್ ಮುಗ್ದೊಂಚಾಧಿಂ ಮತಿಕ್ ರಿಗ್ಲಿ ಬರಿ ಲಾಗ್ಲಿ
ಯೆಂವ್ಚ್ಯಾ ’ಹಾಫ್ತ್ಯಾಚಿ ಕವಿತಾ’
ಪ್ರಸಾರ್ಚ್ಯಾಕ್ ರಾಕ್ಲೊ ನವೊ ಸಂಪಾದಕ್
ಕವಿ ಸಾಂಗಾತಾ ಕವಿತಾಯ್ ಪರ್ನಿ ಜಾಲ್ಲಿ..!
13. ತೆಂ ಕೊಣ್? [ಮೆಲ್ವಿನ್ ಜೆ. ವಾಸ್]
ಆವ್ರಾ ವ್ಹಾಳ್ಯಾ ಲೊಟಾಂತ್ ಆಯಿಲ್ಲೆಂ
ಜಿವಾಚಿ ಆಶಾ ಸಾಂಡ್ಲ್ಲ್ಯಾ ಹಾವೆಂ ತಾಕಾ ಬಚಾವ್ ಕೆಲ್ಲೆಂ
ದೆವಾಕ್ ಅರ್ಗಾಂ ಜಾವ್ನ್
ಮ್ಹಜ್ಯಾ ಘರಾಚಿಂ ಮೆಟಾಂ ಚಡೊನ್
ಕಾಂಪೆರ್ಯಾ ಹಾತಾನ್ ತಾಣೆಂ ಆಲ್ತಾರೆರ್ ದಿವೊ ಜಳವ್ನ್
ಸಾಂಜ್ ವಾರ್ಯಾಕ್ ಸಾಂತೆಂತ್ ಮ್ಹಕಾ ಭಂವ್ಡಾಯಿಲ್ಲೆಂ
ಪೀಕ್ ಥುಕ್ಚಾಂಕ್ ಪಳೆವ್ನ್ ಕಾವ್ಜೆಲ್ಲೆಂ
ಖಾಂಚಿ ಕಾಂಕ್ಣಾಂಕ್ ಹಾತ್ಭರ್ ಸೊಭವ್ನ್
ಲಜೆಕ್ ಪಾಂಗ್ರಲ್ಲೆಂ ಹಾಂವ್ ವಳೊಕ್ ವಿಚಾರ್ತಾನಾ
ತಿರ್ಶ್ಯಾ ದೊಳ್ಯಾಂನಿ ಮ್ಹಾಕಾ ಚೊಯ್ತಾಲೆಂ
ಮಾಸ್ಳೆ ದೊಳ್ಯಾಂಚೆಂ ಕೊಣ್ ತೆಂ?
ಖಾಂದಾಕ್ ಖಾಂದ್ ದೀವ್ನ್ ಚಲ್ತಾಲೆಂ
ಶ್ಹೆರಾ ಚೊವ್ಕೆಂತ್ ಧವ್ಯಾ ಪಾರ್ವ್ಯಾಂ ಸಂಗಿಂ ನಾಚೊನ್ ಉಡ್ಲ್ಲೆಂ.
ಪಾಂಯಾಂಕ್ ಭಾಂದ್ಲ್ಲಿಂ ಪಾಂಯ್ಜಣಾಂ ಸುಟವ್ನ್
ಮ್ಹಜ್ಯಾ ಕಾನಿಂ ಪುಸ್ಪುಸೊನ್ ಹಾಸ್ಲ್ಲೆಂ
ಅಬೊಲಿಂ ಪಳೆವ್ನ್ ಭಿಂಯೆಲ್ಲೆಂ
ದರ್ಯಾ ವೆಳೆರ್ ಉಸ್ಕ್ಯಾರ್ ನಿದೊನ್ ಪಾಂತಿ ವೊಳಾಯಿಲ್ಲೆಂ
ರೆಂವೆಕ್ ಭಿಜವ್ನ್ ಸ್ವಪ್ಣಾ ಘರ್ ಭಾಂಧುನ್ ನಾಚ್ಲೆಲೆಂ
ಪಿಂಜ್ರ್ಯಾಂತ್ಲ್ಯಾ ಮೈನಾಚಿ ಕಾಣಿ ಸಾಂಗೊನ್
ಕಾಳೊಕಾಕ್ ಭಿಂಯೆವ್ನ್ ಹುಸ್ಕಾರೊನ್ ರಡ್ಲೆಲೆಂ
ತೆಂ ಕೊಣ್ ತೆಂ?
ಮ್ಹಾಕಾ ವಳೊಕ್ ಸಾಂಗೊಂಕ್ ವಿಸ್ರಾಲ್ಲೆಂ ತೆಂ ಕೊಣ್ ಜಾವ್ಯೆತ್?
ಮ್ಹಜ್ಯಾ ಘರಾಚಿಂ ಮೆಟಾಂ ಚಡ್ಲ್ಲೆಂ
ಖಾಂಚಿ ಕಾಂಕ್ಣಾಂಕ್ ರಾತ್ಭರ್ ಸೊಭಯಿಲ್ಲೆಂ ತೆಂ
ಪಾಂಯಾಂಕ್ ಭಾಂದ್ಲ್ಲಿಂ ಪಾಂಯ್ಜಣಾಂ ಸುಟವ್ನ್
ಪಿಂಜ್ರ್ಯಾಂತ್ಲ್ಯಾ ಮೈನಾಚಿ ಕಾಣಿ ಸಾಂಗೊನ್
ವೆಳೆ ವಯ್ಲ್ಯಾ ಘರಾಂತ್ ನಪಂಯ್ಚ್ ಜಾಲ್ಲೆಂ ಕೊಣ್
14. ಕವಿ ಆನಿ ಕವಿತಾ [ವಾಯ್ಲೆಟ್ ಜೆ. ಪಿರೇರಾ]
ಹಾಂವ್ ಜಾವ್ನಾಸ್ಲೊಂ ಸಾಹಿತ್ಯಾಚೊ ಗ್ಯಾನಿ
ಕವಿತಾ ಯೇವ್ನ್ ರಿಗ್ಲಿ ಮ್ಹಜ್ಯಾ ಕುಡಿಚ್ಯಾ ಶಿರಾನಿಂ
ಸಂಸೋಧನ್ ಜಾಲೆಂ ಕಾಳ್ಜಾಸ್ಪಂದನಾಂನಿ
ಆತಾಂ ನಾಂವಾಡ್ಲಾಂ ಹಾಂವ್ ಮ್ಹಣ್ ಕವಿ
ಕವಿ ಅನಿ ಕವಿತಾ
ಎಕಾಚ್ಚ್ ನಾಣ್ಯಾಚಿಂ ದೋನ್ ಮುಖಾಂ
ಸುಖಾಂತ್ ತಶೆಂ ದುಃಖಾಂತ್ ಸಾಂಗಾತಾ
ವೆಗ್ಳಾಚಾರ್ ಕೆದಿಂಚ್ಚ್ ಜಾಂವ್ಚೊ ನಾಕಾ
ಕಾಳ್ಜಾಂತ್ಲಿ ಭಗ್ಣಾಂ ಉಮಾಳೊನ್ ಆಯ್ಲಿಂ
ಭಯಾನಕ್ ದ್ರಶ್ಯಾಂನಿ ದುಃಖಾಂ ವ್ಹಾಳೊನ್ ಗೆಲಿಂ
ಮತಿಚೆಂ ಖಜಾನ್ ಭರೊನ್ ವೊಮ್ತೊಕ್ ಜಾಲೆಂ
ಆಶೆಂ ಮ್ಹಜೆ ಥಂಯ್ ಕವಿತಾಚೆ ಜನನ್ ಜಾಲೆಂ
ಎಕೇಕ್ ಥೆಂಬೊ ಎಕ್ಟಾಂಯ್ ಜಾವ್ನ್ ಜಾತಾ ಕಾಟ್
ಹರ್ಯೆಕಾ ಉತ್ರಾಂಕ್ ಗುಂತುನ್ ಗಾಲಿ ಗಾಂಟ್
ಮಾಂಯ್ಭಾಸೆಕ್ ಉರಂವ್ಕ್ ಉಟಯ್ತಾ ಅವಾಜ್
ಮ್ಹಜಿ ಕೊಂಕ್ಣಿ ಭಾಸ್ ಕರುಂ ಸಗ್ಳ್ಯಾಂನ್ ರಾಜ್
ಹಾಂವ್ ಜಾವ್ನಾಸಾಂ ಉದೆವ್ನ್ ಯೆಂವ್ಚೊ ಕವಿ
ಆಶೆತಾಂ ಜಾಂವ್ಕ್ ಬುಡಾನಾತ್ಲ್ಲೊ ರವಿ
ಕೊಂಕ್ಣೆಚೊ ಪ್ರಕಾಸ್ ಫಾಂಕೊಂ ಸಗ್ಳ್ಯಾನಿತ್ಲಾಂನಿ
ರಚ್ಯಾಂ ಇತಿಹಾಸ್ ಕೊಂಕ್ಣೆಚೊ ಭಾಂಗ್ರಾಳ್ಯಾ ಅಕ್ಷರಾಂನಿ
About us | Feedback | Contact us
Copyright ©
2005 DAAIZ.COM All rights reserved.
Page concept, designed and maintained by Ashawadi Publications
More in Daaiz
Send your comments to author on this writing
This is not a comment box. Nothing you write here appears on the site or is shown to any other reader: it is sent to him by email, privately, and he replies to you directly if a reply is called for.