ಕವಿತಾकविताPoem
ಪಳೆನಾಕಾ
This poem is available in its original Kannada only.
ಕೊಂಕ್ಣೆಚಾ ವಿಂಚ್ಣಾರ್ ಸಾಹಿತ್ಯಾಚೊ ಕೊನ್ಸೊ - ’ದಾಯ್ಜ್’ - ಫಕತ್ತ್ ಕೊಂಕಣಿ ಥಾವ್ನ್, ಕೊಂಕಣಿ ಪರ್ಯಾಂತ್, ಕೊಂಕಣಿ ಖಾತಿರ್.
ಉತ್ರಾಂತ್ ಸೂತ್ರಾಂ
ಮಯ್ನ್ಯಾಚೊ ಕವಿ - 11
ಸೂತ್ರ್ 11: ಪಾಟಿಂ ಪಳೆನಾಕಾ
ಆರ್ಯನ್ ತಾಕೊಡೆ
ಪಾಟಿಂ ಪಳೆನಾಕಾ
’ಪಾಟಿಂ ಪಳೆನಾಕಾ’ ಮ್ಹಳ್ಳೊ ನಾಟಕ್ ದೆ|ಮಿಕ್ಮ್ಯಾಕ್ಯಾನ್ ಬರಯಿಲ್ಲೊ ಏಕ್ ಶ್ರೇಷ್ಟ್ ನಾಟಕ್, ಜೊ ಸಮಾಜೆಚೆಂ ಪೊಕೊಳ್ಪಣ್ ಕಸ್ಲಿಚ್ ಲಜ್ ಮುಲಾಜ್ ನಾಸ್ತಾಂ ವಿಣ್ಗೆ ಕರ್ತಾ. ಎಕಾ ಸಾಮಾನ್ಯ್ ಮನ್ಶ್ಯಾಕ್ ಆನಿ ಎಕಾ ಕವಿ ಮಧ್ಲೊ ತಫಾವತ್ ಕಸಲೊ? ಜೆರಾಲ್ ರಿತಿನ್ ಪಳೆತಾನಾ ದೊಗಾಂಯ್ ಮನ್ಶಾಂ ಆನಿ ದೊಗಾಂಯ್ ಜಿಯೆತಾತ್, ಪುಣ್ ದೊಗಾಂನಿ ಚಿಂತ್ಚಿ ರೀತ್ ವೆಗ್ಳಿ, ಸಮ್ಜೊಂಚಿ ರೀತ್ ವೆಗ್ಳಿ. ತರ್ ಜಿಣಿ ಮ್ಹಳ್ಯಾರ್ ಕಿತೆಂ?
"Life is full of ups and downs.
But mostly at the end,
You reach developed towns!"
ಛತ್ತೀಸ್ಗರಾಂತ್ಲಿ ಯುವ ಕವಯತ್ರಿ ಶೆಲ್ಲಿ ಸಾಂಗ್ವಿನಾನ್ ಬರಯಿಲ್ಲ್ಯಾ ’This is my life to me’ ಕವಿತೆಚ್ಯೊ ವೊಳಿ ಹ್ಯೊ ಕಾಂಯ್ ಮಟ್ವ್ಯಾನ್ ಜಿಣ್ಯೆಸಾರ್ ದಿತಾತ್. ಕೊಣ್ ಮ್ಹಣ್ತಾ ಜಿಣ್ಯೆಕ್ ಸಮ್ಜೊಂಕ್ ಫಕತ್ತ್ ಪ್ರಾಯ್ ಭರಾಜಯ್ ಮ್ಹಣ್? ಸಂಸಾರಾಂತ್ ಕಿತ್ಲೆಶೆಗೀ ಪ್ರಾಯೆಸ್ತ್ ಜಿಯೆವ್ನ್ ಆಸಾತ್ ತಾಂಕಾ ಅಜೂನ್ ಸಯ್ತ್ ಜಿಣಿಂ ಮ್ಹಳ್ಳಿ ಕಿತೆಂ ಮ್ಹಳ್ಳೆಂ ಸಮ್ಜೊಂಕ್ ಅಜೂನ್ ಸುರು ಕರುಂಕ್ ನಾ. ಪುಣ್ ವ್ಹಯ್! ಪ್ರಾಯ್ ಜಾಲ್ಯಾ, ಚ್ಯಾರ್ ನ್ಹಯ್ ಆಟ್ ಕತ್ತ್ಯಾಂಚಿ ಪ್ರಾಯ್ ಜಾಲ್ಯಾ. ತಿ ಪ್ರಾಯ್ ತೀನ್ ಕಾಸಾಂಕ್ ಉಪ್ಕಾರಾಕ್ ಪಡಾನಾ ತರ್ಯೀ ವ್ಹಡ್ ನಾ, ಪುಣ್ ಪ್ರಾಯ್ ಜಾಲ್ಯಾ.
’The Times’ ಪತ್ರಾನ್ ’ಹ್ಯಾ ಸಂಸಾರಾಂತ್ ಆಸ್ಚೆಂ ವಾಯ್ಟ್ ಕಸ್ಲೆಂ?’ ಮ್ಹಳ್ಳ್ಯಾ ವಿಶ್ಯಾಚೆರ್ ಪ್ರಭಂಧ್ ಬರಂವ್ಕ್ ಸಭಾರಾಂಕ್ ವಿಚಾರ್ಲ್ಲೆ ವೆಳಾರ್, ಸಭಾರ್ ಮಾಲ್ಘಡ್ಯಾ ಲೇಖಕಾಂನಿ ಪಾನಾಂಗಟ್ಲೆ ಅಪ್ಲ್ಯಾ ಜಿಣ್ಯೆಚೊ ಅನ್ಭೋಗ್ ಹ್ಯಾ ಲೇಖಕಾಂನಿ ಭರ್ಲೊ ಕಂಯ್, ತಾಂಚೆ ಪಯ್ಕಿ ಎಕ್ಲೊ ಜಾವ್ನಾಸ್ಲೊ ಜಿ.ಕೆ. ಚೆಸ್ಟರ್ಸನ್, ಹೊ ಸಂಯ್ಬಾನ್ ಕವಿ ಆನಿ ಹಾಣೆಂ ಬರಯಿಲ್ಲೆಂ ಪ್ರಭಂಧ್ ಅಶೆಂ ಆಸ್ಲೆಂ;
ಮೊಗಾಳ್ ಮಾನೆಸ್ತಾನೊಂ,
ಹಾಂವ್ಚ್.
ತುಮ್ಚೆಥಂಯ್ ಖಾಲ್ತೊ,
ಜಿ.ಕೆ.ಚೆಸ್ಟರ್ಸನ್.
’ಹಾಂವ್ಚ್ಚ್’ ಸಬ್ಧ್ ಏಕ್ ಪ್ರಭಂಧ್ ಕಸೊ ಜಾವ್ಯೆತ್? ಹೆಂ ಸವಾಲ್ ಮ್ಹಜ್ಯಾಯ್ ಮತಿಂತ್ ಅಜೂನ್ ಆಸಾ ತರ್ಯೀ, ಹಾಂಗಾಸರ್ ತಾಚೆವಿಶಿಂ ಗರ್ಜೆಭಾಯ್ಲೊ ವಿವಾದ್ ಸಾಂಡುನ್ ಹ್ಯಾ ಉತ್ರಾಚೊ ಪರಿಣಾಮ್ ಸಮ್ಜೊಂಚೆಂ ಪ್ರೇತನ್ ಕೆಲೆಂ ತರ್, ಜಾಯ್ತೆಂ ಆಸಾ. ಪಾನಾಂ ಗಟ್ಲೆ ಬರಯಿಲ್ಲ್ಯಾ ವೊಳಿಂ ಮಧೆಂ ಏಕ್ ಉತಾರ್ ಹರ್ಯೆಕ್ಲ್ಯಾಚ್ಯಾ ಕಾಳ್ಜಾ ಮನಾಕ್ ಲಾಗ್ಲೆಂ ತಶೆಂಚ್ ರೊಮ್ಬೊನ್ ಉರ್ಲೆಂ. ಕಿತ್ಯಾಕ್ ಮ್ಹಳ್ಯಾರ್ ಆಮಿ ಹೆರಾಂಚೆರ್ ಫಯ್ಸಲ್ ಉಚಾರುಂಕ್ ಭೋವ್ ಹುಶ್ಯಾರ್, ಪುಣ್ ಆಮ್ಚೆರ್ ಆಮಿ ಫಯ್ಸಲ್ ಉಚಾರೆಂ ಸೊಡ್ಯಾಂ, ಆರ್ಶ್ಯಾ ಮುಖಾರ್ ಆಮ್ಕಾಂ ನಾಗ್ಡೆಂ ಪಳೆಂವ್ಕ್ ಸಯ್ತ್ ಆಮ್ಕಾಂ ಲಜ್ ದಿಸ್ತಾ, ಕಿತ್ಯಾಕ್ ತಿತ್ಲಿಂ ಮ್ಹೆಳಿಂ ಆಮಿಂ.
ಎಕಾ ಕವಿಚಿ ಮೂಳ್ ಜವಾಭ್ದಾರಿಯೀ ತಿಚ್ಚ್, ಥಕ್ಲ್ಲ್ಯಾ ಮನ್ಶ್ಯಾ ಚಿಂತ್ಪಾಕ್ ಚಿಂತುಂಕ್ ಕರಂವ್ಚಿ, ತಾಚೆಭಿತರ್ ಜೆಮೆಂವ್ಚ್ಯಾ ನೈತಿಕ್ ಸಕ್ತೆಕ್ ಜಾಗಂವ್ಚಿ, ಆನಿ ಅಶೆಂ ಕರುನ್ ವೆತಾಸ್ತಾಂ ಕೆದಿಂಚ್ ಪಾಟಿಂ ಪಳೆನಾಸ್ತಾಂ ಮುಖಾರ್ ವೆಚೆಂ. ಕಿತ್ಯಾಕ್ ಮ್ಹಳ್ಯಾರ್ ಪಾಟಿಂ ಪಳೆಲ್ಯಾರ್ ಅಪ್ಣೆಂ ಗುಡ್ಡಾಯಿಲ್ಲೆ ಕಾಂಟೆ, ಫಾತೊರ್ ದಿಸ್ತಿತ್ ಆನಿ ಕಾಂಯ್ ಮುಖ್ಲಿಂ ಪಾವ್ಲಾಂ ಥರ್ಥರ್ತಿತ್, ನಿತ್ರಾಣಿ ಚಿಂತಾಪ್ ಮತಿಕ್ ರೆವೊಡ್ ಘಾಲಿತ್.
ಹೆಂಚ್ ಜರ್ ಆನಂದ್ ಬಕ್ಶಿಚ್ಯಾ ಉತ್ರಾಂನಿ ಸಾಂಗ್ಚೆಂ ತರ್;
’ತನ್ ಉತ್ನಾ ಜೀನಾ ಚಾಯೇ
ಮನ್ ಉತ್ನಾಹೀ ಮರ್ತಾ ಜಾಯೇ
ಅಬ್ ಕೋನ್ ಕೇಸೇ ಜಾನೇ
ಕ್ಯಾ ಖೋಯಾ ಔರ್ ಕ್ಯಾ ಪಾಯಾ’
ಜಿಣಿ ಮ್ಹಳ್ಯಾರ್ ಏಕ್ ಪಯ್ಣ್, ಆನಿ ಹ್ಯಾ ಪಯ್ಣಾರ್ ಜಿತ್ಲೆಂ ಜೊಡ್ಲೆಂ ಆನಿ ಕಿತ್ಲೆಂ ಹೊಗ್ಡಾಯ್ಲೆಂ ಮ್ಹಳ್ಳೆಂ ಲೇಖ್ ಜಾತಾ ಪೆಲ್ಯಾ ಸಂಸಾರಾಂತ್, ಜೊ ಕೊಣೆಂಚ್ ಎದೊಳ್ ಪಳೆಂವ್ಕ್ ನಾ, ಆನಿ ಪಳೆಲ್ಲೊ ಕೊಣ್ಯೀ ಹ್ಯಾ ಸಂಸಾರಾಂತ್ ನಾ. ಪುಣ್ ಜಿಯೆವ್ನ್ ಆಸ್ಚ್ಯಾ ಮನ್ಶ್ಯಾಕ್, ಮನಿಸ್ ಜಾವ್ನ್, ಅಪ್ಲ್ಯಾ ಪೆಲ್ಯಾಕ್ ತಾಂಚ್ಯಾ ಗರ್ಜೆಕ್ ಪಾಂವ್ಚೆಂ ನ್ಹಯ್ ತರ್ಯೀ, ತಾಂಚೆರ್ ಏಕ್ ಮೊವಾಳಾಯೆಚೆಂ ಚಿಂತಾಪ್ ಘಾಲ್ಚೆಂ ಚಿಂತಾಪ್ ಹರ್ಯೆಕಾ ಮನ್ಶ್ಯಾ ಥಂಯ್ ಜಿವೆಂ ಜಾಲ್ಲೆಂ ತರ್ ಕಿತೆಂ ಜಾತೆಂ? ಜರೂರ್ ಹ್ಯಾ ಸಂಸಾರಾಂತ್ ಭುಕ್ ಆಸ್ತಿನಾ, ತಾನ್ ಆಸ್ತಿನಾ, ಕಷ್ಟ್ ಆಸ್ತೆನಾಂತ್, ದೊರಿ ವೊಡ್ಚೆ ಸ್ಪರ್ಧೆ ಆಸ್ತೆನಾಂತ್, ಆಲಿಬಾಬ ಆಸ್ತೆನಾಂತ್ ಮ್ಹಣ್ತಚ್ ತಾಚೆ ಚಾಳಿಸ್ ಅಭಿಮಾನಿ ಚೋರ್ಯೀ ಆಸ್ತೆನಾಂತ್ ಆನಿ ಗುಪಿತ್ ನಾಂವಾಂನಿ ಕೊಣಾ ಕೊಣಾಚೆರ್ ಕೇದ್ ಉಡಂವ್ಚ್ಯೊ ಹಲ್ಕಟ್ ಕರ್ನ್ಯೊಯ್ ಆಸ್ತ್ಯೊನಾಂತ್.
’ಪಾಟಿಂ ಪಳೆನಾಕಾ’ ಸೂತ್ರ್ ಖರೆಂಚ್ ಜಾವ್ನ್ ಜಾಯ್ತ್ಯಾ ಕವಿಂಕ್ ತಾಂಚೆ ಭಿತರ್ಲ್ಯಾ ಕವಿಕ್ ಪ್ರೇರಿತ್ ಕರುಂಕ್ ಸಕ್ಲಾಂ ಮ್ಹಳ್ಳೆಂ ಹಾಂಗಾಚಿಂ ಎಕೇಕ್ ಕವಿತಾ ವಾಚ್ತಾನಾ ಸಮ್ಜತಾ. ಕವಿ ’ಆರ್ಯನ್ ತಾಕೊಡೆ’ ಲಿಖ್ಣೆ ನಾಂವಾರ್ ಲಿಖ್ಚೊ ರೋಶನ್ ನೆವಿಲ್, ಆಯ್ಲೆವಾರ್ಚ್ಚ್ ಕವಿತಾಶೆತಾಂತ್ ಉದೆಲ್ಲೊ ಬೊಂಗೊ ತರ್ಯೀ, ಅಪ್ಲ್ಯಾ ಪ್ರತಿಭೆಂತ್ ಎದೊಳ್ಚ್ಚ್ ಕವಿತಾರಸಿಕಾಂಚಿಂ ಕಾಳ್ಜಾಂ-ಮನಾಂ ಜಿಕೊಂಕ್ ಸಕ್ಲಾ. ತಶೆಂಚ್ ತಾಚ್ಯಾ ಹ್ಯಾ ಕವಿತೆಕ್ ಮಯ್ನ್ಯಾಚೆಂ ಕವಿತಾ ಜಾವ್ನ್ ವಿಂಚುಂಕ್ ಸಂತೊಸ್ ಭಗ್ತಾ. ಕವಿ ಆರ್ಯನಾಕ್ ಉಲ್ಲಾಸ್.
ಉತ್ರಾಂತ್ ಸೂತ್ರಾಂ - 11: ಪಾಟಿಂ ಪಳೆನಾಕಾ
[ವಾಂಟೆಲಿ ಜಾಲ್ಲಿಂ]
3. ಸ್ಟ್ಯಾನ್ಲಿ ಮೆಂಡೊನ್ಸಾ, ಯು.ಕೆ.
4. ವಿನ್ಸಿ ಮೆಲ್ಕಾರ್, ಬೆಂಗ್ಳುರ್.
ಪಾಟಿಂ ಪಳೆಂವ್ಕ್ [ಮಯ್ನಾಚೆಂ ಕವಿತಾ]-
ಆರ್ಯನ್, ತಾಕೊಡೆ
ಪಾಟಿಂ ಪಳೆಲ್ಲ್ಯಾ ಉಪ್ರಾಂತ್
ದಿಸಾ ಸುರ್ಯಾಚ್ಯೊ, ರಾತಿ ಚಾಂದ್ನ್ಯಾಚೊ
ಸಾಂಗಾತ್ ಭಗ್ಲೊನಾ...!
ಘಡ್ಗಡ್ಯಾ ಜಗ್ಲಾಣ್ಯಾಚೊ, ವಾರ್ಯಾ ವಾದಾಳಾಚೊ
ಗಾಜ್ ಆಯ್ಕಾಲೊನಾ...!
ಪಾಟಿಂ ಪಳೆಲ್ಲ್ಯಾ ಉಪ್ರಾಂತ್
ಕೊಂಬ್ಯಾ ಸಾದ್, ಮ್ಹೊರಾಂಚೊ ನಾಚ್
ಚಾಕೊಂಕ್ ನಾ...!
ಸುಂದರ್ ಆಬೊಲಿಂ, ಗರ್ಭೆಸ್ತ್ ಭಾತಾ ಕಣ್ಶಿ
ಫುಲೊಂಕ್ ನಾಂತ್, ಧಲೊಂಕ್ ನಾಂತ್...!
ಗೇಣ್ ವಾಟ್ ಚಮ್ಕೊನ್
ಪಾಟಿಂ ಪಳೆಲ್ಲ್ಯಾ ಉಪ್ರಾಂತ್
ತುಜ್ಯೊ ಹಾಚೊ ದಿಸ್ಲ್ಯೊ ನಾಂತ್..!
ಭಗ್ಣಾಂ ವಾಚ್ಲಿನಾಂತ್...!
ಯಾದಿ ಧೊಸ್ಲ್ಯೊ ನಾಂತ್...!
ಸತ್ ಸಾಂಗಾಜಯ್ ತರ್
ಕುರ್ಡೊ.. ಹಾಂವ್ ಕುರ್ಡೊ...!
ಪಾಟಿಂ ಪಳೆನಾಕಾ [ - ಮಾ|ಜೋರ್ಜ್ ಒಲಿವೆರಾ]
ಚರಿತ್ರೆ೦ತ್ ಮಹಾನ್ ವ್ಯಕ್ತಿನಿ೦ ಮುಕಾರ್ ಪಳೆವ್ನ್ –
ಚರಿತ್ರೆಚ್ಯಾ ಪಾನಾರ್ ಅಮರ್ ಚರಿತ್ರಾ ಲಿಖ್ಲಿ!
ಕೊಲ೦ಬಸಾನ್ ದರ್ಯಾಪಯ್ಣಾರ್ ಪಾಟಿ ಪಳೆಯಿಲ್ಲೆ೦ ತರ್
ಚರಿತ್ರೆ೦ತ್ ಆಮೇರಿಕಾ ಲಿಪೊನ್ ಉರ್ತೊ!
ವಾಸ್ಕೋಡಿಗಾಮಾನ್ ಭಾರತಾಕ್ ಪಯ್ಣ್ ಕೆಲ್ಲೆ೦ನಾ ತರ್
ಅಜೂನ್ ಅಮ್ಚೊ ದೇಸ್ ಗ್ರೆಸ್ತ್ಕಾಯೆನ್ ಸೊಬ್ತೊ!
ಲೆನಿನ್, ಸ್ಟಾಲಿನ್, ಹಿಟ್ಲರ್ ಮುಖೆಲಿ ಮುಖಾರ್ ಅಯಿಲ್ಲ್ಯಾ-
ಕಾಳಾರ್; ಲೊಕಾನಿ ಪಾಟಿ ಪಳೆತಾನಾ.....
ಸ್ವತ೦ತ್ರ್ ತಾಣಿ ಹೊಗ್ಡಾಯ್ಲೆಂ...
ತಾನ್-ಭುಕ್-ಬ೦ದಡ್ ತಾಣಿ೦ ಮಾಗೊನ್ ಘೆತ್ಲಿ೦!
ಮುಕಾರ್-ಪಾಟಿ ನ್ಹಯ್, ಕಾತ್ರಿ೦ತ್ ತೆ ಸಾ೦ಪಡ್ಲೆ೦!
ಗಾ೦ಧಿ ರಾಷ್ಠ್ರ್ ಪಿತಾಕ್ ದಕ್ಷಿಣ್ ಅಫ್ರಿಕಾ೦ತ್ ಟ್ರೇನಾಥಾವ್ನ್-
ಬಾಯ್ರ್ ಲೊಟುನ್ ಘಾಲಿನಾತ್ಲ್ಲೆ೦ ತರ್ ಆನಿ ತ್ಯಾ ವೆಳಿ೦
ಗಾ೦ಧಿನ್ ಕಾವ್ಜೆವ್ನ್ ಪಾಟಿ ಪಳೆಯಿಲ್ಲೆ೦ ತರ್...
ನಾ೦ವ್ ನಾತ್ಲ್ಲೊ ಗಾ೦ಧಿ ಚರಿತ್ರೆ೦ತ್ ಲಿಪೊನ್ ಉರ್ತೊ!
ರಷ್ಯಾಚೊ ಯೂರಿ ಗೆಗರಿನಾನ್ ಗಗನಾರ್ ಪಯಿಲ್ಲೆ೦ ಪಯ್ಣ್-
ಕರು೦ಕ್ ಪಾಟ್ ಕೆಲ್ಲೆ೦ ತರ್, ಬಾರತಾಚೆ೦ ರಾಕೇಶ್ ಶರ್ಮ,
ಕಲ್ಪನಾ ಚಾವ್ಲಾ, ಸುನಿತಾ ವಿಲ್ಲಿಯಮ್ಸ್ ಆನಿ ಸಬಾರ್ -
ಗಗನ್ ಯಾತ್ರಿ ನಾ೦ವ್ ನಾಸ್ತಾನಾ ಅಮರ್ ಉರ್ತಿ೦!
ಅರ್ಮ್ ಸ್ಟ್ರೊ೦ಗ್ ಚ೦ದ್ರೆಮಾಕ್ ಪಯ್ಲೆ೦ ಮೇಟ್ ದವ್ರು೦ಕ್-
ಪಾಟಿಮುಕಾರ್ ಕೆಲ್ಲೆ೦ ತರ್ – ಚ೦ದ್ರ್ ಮನ್ಶಾಕ್ ಪಯ್ಸ್ ಉರ್ತೊ!
ಭಾರತೀಯ್ ಚ೦ದ್ರಯಾನ್ ಪಯ್ಣ್ ಹ್ಯಾ ಶೆಕ್ಡ್ಯಾ
ನ್ಹಯ್-
ಬಗಾರ್ ಮುಕ್ಲ್ಯಾ ಶೆಕ್ಡ್ಯಾ ಜಾರಿ ಜಾಯ್ತ್ ಅಸ್ಲ್ಲೆ೦!
ಪಾಟಿಂ ಪಳೆನಾಕಾ [ - ಸ್ಟ್ಯಾನ್ಲಿ ಮೆಂಡೊನ್ಸಾ, ಯು.ಕೆ.]
ಪಾಟಿಂ ಪಳೆನಾಕಾರೆ ಬಾಬಾ
ಪಾಟಿಂ ಪಳೆನಾಕಾ
ಆಪ್ಟೊನ್ ದಾಂಟೊನ್ ಪಡ್ಶಿ ಜಾಗ್ರುತ್
ಅಡ್ಕಳ್ ಅಡ್ಸೊಣಿ ಆಸಾತ್ ಮುಕಾರ್
ಪಾಟಿಂ ಕಿತೆಂ ಗೆಲಾಂ
ಸೊಡ್ ತೆಂ ವಚೊಂದಿ
ಮುಕ್ಲ್ಯಾ ಶೆವೊಟಾಚೆರ್ ತುಜೆಂ
ಗಮನ್ ಆಸೊಂದಿ
ಕಿತೆಂ ಪಾಟಿಂ ಪಳಯ್ತಾಯ್
ಸಲ್ವೊನಿ,ಕಷ್ಟ್, ಖಂತ್ ಬೆಜಾರಾಯ್ ?
ವಿಸರ್ ಸಗ್ಳೆಂ ಆನಿ ಧೈರಾನ್ ಚಲ್ ಫುಡೆಂ
ಮುಕ್ಲೆಂ ಮೇಟ್ ತುವೆಂ ಜಿಕೊಂಕ್ ಜಾಯ್
ಪಾಟಿಂ ಪಳೆನಾಕಾರೆ ಪಾಟಿಂ ಪಳೆನಾಕಾ
ವೇಳ್ ತುಜೊ ವಿಭಾಡ್ತೊಲೊ
ಪೋಂತ್ ಪಾವ್ತಾ ವರೆಗ್ ದೀಷ್ಟ್ ಪಾಟಿಂ ವರಿನಾಕಾ
ಪರ್ತ್ಯಾನ್ ಫೊಂಡಾಂಕ್ ಪೊಡ್ತೊಲೊಯ್
ಕಾಂಟೆ ಖುಂಟೆ ಗುಡ್ಡಾವ್ನ್ ರಾವ್ಲಾಯ್
ವೊಳ್, ಕೇದಾಂ ಉಪ್ಯೆವ್ನ್ ಆಯ್ಲಾಯ್
ಲಿಸಾಂವ್ ಜಾಯ್ತೆಂ ಅನ್ಭೋಗ್ ಕೆಲಾಯ್
ಪಾಟಿಂ ಪಳೆನಾಕಾರೆ ಪಾಟಿಂ ಪಳೆನಾಕಾ
ದಿಸ್ತ್ಯಾ ವಾಟೆರ್ ಖಂಚಯ್ ದೀಷ್ಟ್ ತುಜಿ
ನಂಯ್ ನಾ ದಿಸ್ತ್ಯಾ ಪೊಂತಾಕ್
ಜಾಣಾರ್ಯಾಂಚಿ ಸಾಂಗ್ಣಿ ಹಿ
ಅಲಕ್ಷ್ಯಾ ಕರಿನಾಕಾರೆ ಪಿಶಾ
ಸೊಂಸ್ಯಾ ವೆಗಾನ್ ಧಾಂವಾನಾಕಾ
ತಾಚೆಂ ಚಿಂತಾಪ್ ತುಕಾ ನಾಕಾ
ಕಾಸ್ವಾ ಮೆಟಾಂ ಕಾಡ್ಲ್ಯಾರೀ ವ್ಹಡ್ ನಾ
ಶಾಭಿತಾಯೆನ್ ಪಾವ್ತೊಲೊಯ್ ಪೊಂತಾಕ್
ಗೆಲ್ಲೊ ವೇಳ್ ಪಾಟಿಂ ಯೇತ್?
ಚಿಂತಾಯ್ ಗೆಲ್ಲೆಂ ಪಾಟಿಂ ಮೆಳಾತ್?
ಲಿಪ್ಲಾಂ ಸಗ್ಳೆಂ ತೆಂ ಕಾಳೊಕಾಂತ್ರೆ
ಪಾಟಿಂ ಪಳೆನಾಕಾ ಬಾಬಾ ಪಾಟಿಂ ಪಳೆನಾಕಾ
ಪಾಟಿಂ ಪಳೆನಾಕಾ [- ವಿನ್ಸಿ ಮೆಲ್ಕಾರ್]
ಮನ್ಶಾ೦ಪಣ್ ನಾತ್ಲ್ಲ್ಯಾ ಮನ್ಶಾ೦ ಥ೦ಯ್
ಆಪ್ಲೆ೦ ಪೋಟ್ಭರೊನ್, ಧೆ೦ಕ್ ಕಾಡುನ್ ಆಸ್ಚ್ಯಾ.
ಭುಕೆನ್ ಕೆ೦ಡ್ಚೊ ಉಜೊ ಪೊಟಾ೦ತ್ ದವ್ರುನ್
ಧುಳಿ೦ತ್ ಲೊಳೊನ್, ದೀಸ್ಭರ್ ಕಾಮ್ ಕರುನ್
ಕುಸ್ಕುಟ್ ಪೊಟಕ್ ನಾಸ್ತಾ೦ ವೊಳ್ವೊಳ್ತೆಲ್ಯಾ೦ಚೆರ್
ಕೊಣಾಚಿ ನದರ್ ಗೆಲ್ಯಾ?
ಜಿವಾನಾ೦ತ್ ಯೆ೦ವ್ಚ್ಯಾ ದುಖಾ೦ಚ್ಯೊ ಘಡಿಯೊ
ಪಾಲ್ಯಾ೦ ಉದೆ೦ವ್ಚ್ಯಾ ಚಿ೦ತ್ನಾ೦ಚ್ಯಾ ವಾಟೆರ್
ಕರ್ಗೊನ್ ವೆಚ್ಯಾಕ್, ಏಕಾ ಪಾವ್ಸಾ ಥೆ೦ಬ್ಯಾಕ್ ಆಶೆವ್ನ್
ರಾಕೊನ್, ಥಕೊನ್ ಫಾತೊರ್ ಜಾಲ್ಲ್ಯಾ೦ಚೆರ್
ಕೊಣೆ೦ಯಿ ತರೀ ಘು೦ವೊನ್ ನದರ್ ಘಾಲ್ಯಾ?
ಸಗ್ಳೊ,ದೀಸ್ ಆನಿ೦ ರಾತ್, ಕರ್ಕರೆ ಆಯ್ಕೊನ್
ಭಿತರ್ಲ್ಯಾನ್ ಖರ್ಗೊನ್, ಬಾಯ್ಲ್ಯಾನ್ ದಾಖಯ್ನಾಸ್ತಾ೦
ನೆಣ್ತಿ೦ ಮತ್ ಜಾಣ್ತಿ೦ ಜಾತಾನಾ, ಫಳ್ ಮೆಳ್ನಾಸ್ತಾ೦
ಅಸ್ಕಾರ್ ಉಸ್ಕಾರಾನ್ ದುಖಾ೦ ಗಳಯ್ತೆಲ್ಯಾ೦ಚೆರ್
ಕೊಣಾಚಿ ತರೀ ನದರ್ ಗೆಲ್ಯಾ?
ಪಿಸೊ ಹಾ೦ವ್, ಚಿ೦ತಿನಾಸ್ತಾ೦
ಅಪ್ಲಾ ಘರಾ೦ತ್ ಜರ್ಲೆ ಪೊಸೊನ್
ದುಸ್ರ್ಯಾ ಘರಾ೦ತ್ಲೆ ಮೂಸ್ ಮಾರ್ತಾ೦ ಕಿತ್ಯಾಕ್?
ಮ್ಹಜ್ಯಾಚ್ಚ್ ಅಕ್ಕಲಾಭಿತರ್ ಧುಳ್ ಭರೊನ್
ದುಸ್ರ್ಯಾ೦ಕ್ ಬೋಟ್ ಚೊಕ್ಚ್ಯಾ ಪಯ್ಲೆ೦
ಮ್ಹಾಕಾ ಮ್ಹಜೆರ್ಚ್ಚ್
ಇಲ್ಲಿ ಪುಣೀ ನದರ್ ಘಾಲ್ತಾಂ...
ಪಾಟಿಂ ಪಳೆನಾಕಾ [- ಪ್ರಸನ್ನ್, ನಿಡ್ಡೋಡಿ]
ಹಾಂವ್ರೆ ಬಾಬಾ ಆವಯ್ ಪಾಸ್ಳೆಂತ್ಲೊ ಪಿಲೊ
ಭಾಯ್ರ್ ಉಡ್ಲೊಂ ಹವ್ಯಾರ್ ಉಭ್ಲೊಂ ಸ್ವತಂತ್ರ್ ಜಾಲೊಂ
ಪಿಸೊಳ್ಯಾ ಉಡ್ಕಾಣಾಂ ಮಾರುನ್, ಫುಲಾಂ ಸೊಭಾಯ್ ಚಿಂವೊನ್
ಉಗ್ತ್ಯಾ ಮೆರೆಕ್ ವೇಂಗ್ ಮಾರುಂಕ್ ಪಾಟಿಂ ಪಳೆನಾಸ್ತಾಂ
ಸಂಸಾರಿ ವಾಟ್ರೆ ಬಾಬಾ ಆಡಂಬರಾಚೊ ಹಾಂಡೊ
ಅಚಾನಕ್ ಫುಗೊನ್ ಫೊಂಡಾಂತ್ಲೊ ಉಗ್ತೊ ಜಾಲೊ
ಚಂಚಲ್ ಮನ್ರೆ ಬಾಬಾ ವೆಂಗೊಂಕ್ ಲಾಗ್ಲೆಂ ಫೆರ್ಗೊ
ಸರ್ವಸ್ವ್ ಆಪ್ಣಾಂವ್ಕ್, ಧನ್ ಎಕ್ಟಾಂವ್ಕ್ ಪಾಟಿಂ ಪಳೆನಾಸ್ತಾಂ
ಗ್ರೇಸ್ತ್ಕಾಯ್ರೆ ಬಾಬಾ ಉತ್ವ್ಯಾರ್ ದವರಿನಾಕಾ
ಪರ್ಮಳಿಕ್ ಅಖ್ತರಾಬರಿಂ ಉಗ್ತ್ಯಾ ವಾರ್ಯಾರ್ ಉಭೊಂ
ಉಭವ್ನ್ ಸುಗಂಧ್, ಲಾಭವ್ನ್ ಆಧಾಯ್ ಬಾಂವ್ಡಾಂಕ್
ಸರ್ ಫುಡೆಂ ಭರ್ವಶ್ಯಾನ್, ವೊಡುನ್ ಸಂತೊಸಾ ಪಾವ್ಯಾಂ
ಪಾಟಿಂ ಪಳೆನಾಕಾ
ಜಳ್ರೆ ಬಾಬಾ ವಾರ್ಯಾರ್ ಉಭ್ತಾ ಸಂತೊಸಾನ್ ಫುಲ್ತಾ
ಹೆವ್ಶಿಂ ತೆವ್ಶಿಂ ಜೊಂಪೊಯ್ ಮಾರ್ತಾ ಭಿಂಯೆನಾಸ್ತಾಂ - ಪಾಟಿಂ ಪಳೆನಾಸ್ತಾಂ
ಪಿರಾಯ್ ಯಾ ವೇಳ್ಘಡಿ ಕಿತ್ಲಿ.. ಚಿಂತಾ ಆಸಾ ತಾಕಾ?
ಪ್ರೇರಣ್ ಘೆರೆ ಜಳಾರಿಚೆಂ ಸರ್ ಮುಖಾರ್.. ಪಾಟಿಂ ಸರಾನಾಕಾ
ಊಡ್ರೆ ಬಾಬಾ ಊಡ್ ಹವ್ಯಾರ್ ಉಡ್ಕಾಣಾಂ ಮಾರ್
ಬಾಂದ್ರೆ ಬಾಬಾ ಬಾಂದ್ ದಿಗಂತಾ ರಾವ್ಳೆರ್ ಬಾಂದ್
ಪಾಟಿಂ ಪಳೆನಾಕಾ..!
ಪಾಟಿಂ ಪಳೆನಾಕಾ [- ಕ್ಲೋಡ್ ಪಾಯ್ಸ್]
ಪಾಟ್ಲ್ಯಾ ಬಾಂಕಾರ್ ಬಸೊನ್
ಲಿಸಾಂವ್ ಶಿಕಾನಾಸ್ತಾಂ, ಮೆಸ್ತ್ರಿಚಿಂ ಖೆಳ್ಕುಳಾಂ ಕರುನ್
ಜಿವಾನಾಚ್ಯಾ ಆಂಧ್ಕಾರಾಂತ್, ಪಂಡ್ಕುಲ್ಯಾಂನಿ ಪಡೊನ್
ರಡೊನ್, ರಸ್ತ್ಯಾಂನಿ ಭಂವ್ಚೆ ಮೊವಾಲಿ
ಚಲಿಯಾಂಕ್ ಪಾಟ್ಲ್ಯಾನ್ ನದರ್ ಘಾಲುನ್
ಲಾಳ್ ಗಳಂವ್ಚೆ, ಅಬ್ಲೇಶಿ, ಕಸಾಯ್ಗಾರ್, ಶಿಖಂಡಿ
ಪರ್ದ್ಯಾ ಪಾಟ್ಲ್ಯಾನ್ ತೋಂಡ್ ಲಿಪವ್ನ್
ಶಿಕಾರಿ ಕರ್ಚೆ, ಭಿವ್ಕುರೆ, ಲಜ್ಮಾಡೆ ಆತಂಕ್ವಾದಿ
ಆದಿಂ ಚಿಮ್ಣಿಂ, ಲಾಂಪ್ಯಾಂವ್, ಬೊಯ್ಲಾಂಚಿ ಗಾಡಿ
ಆತಾಂ, ವೀಜ್ ದಿವೆ, ಅಣು ಸಕತ್, ರೊಕೆಟಾಂ ಅಂತ್ರಳಾರ್
ಆತುರಾಯ್ ಘಡಿಯಾಳಾಚ್ಯಾ ಕಾಂಟ್ಯಾ ಫುಡ್ಲ್ಯಾನ್ ಧಾಂವ್ಚೊ;
ಅತ್ರೆಗ್ ಜೀವನಾಚ್ಯಾ ಮೆಟಾಂ ಮೆಟಾಂನಿ ಜಯ್ತ್ ಆಪ್ಣಾಂವ್ಚೊ;
ಭರ್ವಶ್ಯಾಚ್ಯಾ ಚಿಂತ್ನಾಂನಿ, ಧಯ್ರಾನ್ ನಿಸ್ವಾರ್ಥ್ಪಣಿಂ ಜಿಣೆಂ ಜಿಯೆಂವ್ಚೊ;
ನಿಚೆವ್ ಕರುನ್ ಚಲ್ ತುಂ ಮುಖಾರ್, ಮುಖಾರ್,
ಪಾಟಿಂ ಪಾಳೆನಾಕಾ
ಪಾಟಿಂ ಪಳೆಂವ್ಚೆಂಚ್ ನಾಕಾ!!
ಪಾಟಿಂ ಪಳೆನಾಕಾ [- ಆಸ್ಟಿನ್ ಪ್ರಭು, ನಂತೂರ್]
ನಾಕಾ, ನಾಕಾ, ಪಾಟಿಂ ಪಳೆನಾಕಾ
ಧೈರಾನ್ ಕಾಡ್ಲ್ಲೆಂ ತೆಂ ಮೇಟ್ ತುಂವೆ
ಆತಾಂ ತುಂ ಪಾಟಿಂ ಪರ್ತಾನಾಕಾ
ಮ್ಹಾಕಾ ಪಳೆವ್ನ್ ಮೋಗಾರ್ ಪಡ್ಲೊಯ್
ಪಾರ್ಕಾಂ ಭೊಂವೊನ್, ಸಿನೆಮಾ ಪಳೆವ್ನ್
ತ್ಯಾ ಏಕಾ ದಿಸಾ ಆಂಗಾರ್ ಉಡ್ಲೊಯ್
ಆನಿ ಆತಾಂ ಹಾಂವ್ ವ್ಯಭಿಚಾರಿಣ್ ಮ್ಹಣ್
ಮ್ಹಾಕಾ ತುಂ ಸಾಂಡುಂಕ್ ಚಿಂತಾಯ್?
ತುಂ ಮ್ಹಜ್ಯಾ ಭುರ್ಗ್ಯಾಚೊ ಬಾಪ್ ನಂಯ್
ತುಜ್ಯಾ ಕಾರ್ಬಾರಾಚೊ ಹೊ ಫಳ್ ನಂಯ್
ಅಸೆಂ ಮ್ಹಣೊನ್ ಪಿಸಾಂತುರ್ ಕರ್ತಾಯ್?
ಮ್ಹಾಕಾ ಕೊಣಾಚಿಚ್ ಚಂಗ್ಗಾಯ್ ನಾಸ್ಲಿ
ಚಲ್ಯಾಂಚಿ ಭಿಲ್ಕುಲ್ ಸಳಾವಳ್ ನಾಸ್ಲಿ
ತುಜ್ಯಾ ಮೋಗಾಚೆರ್ ಹಾಂವ್ ಭರ್ವಸ್ಲಿಂ
ತುಜೊಚ್ ನಿಹಾಳ್ ಕರುನ್ಂಚ್ ಬಸ್ಲಿಂ
ಆತಾಂ ತುಂ ಏಕ್ ಖರೊ ದಾದ್ಲೊ ನ್ಹಯ್
ತುಂವೆ ಮ್ಹಜ್ಯಾ ದೊಳ್ಯಾಂನಿ ದು:ಖಾಂ ಹಾಡ್ಲಿಂಯ್
ಪುಣ್ ತಿಂ ತುಂವೆ ಖಂಡಿತ್ ನಾ ಪುಸ್ಲಿಂಯ್
ಬದ್ಲಾ ಮ್ಹಜೆರ್ ಖರೋಖರ್ ದುಬಾವೊನ್
ಮೋಗ್ ಮ್ಹಜೊ ಭಾರಿಚ್ ಚಿಲ್ಲರ್ ಕರುನ್
ಮ್ಹಾಕಾ ತುಂ ಆತಾಂ ತಿರಾಸ್ಕಾರ್ ಕರ್ತಾಯ್?
ನಾ, ನಾ, ಹಾಂವ್ ಖಂಡಿತ್ ಪಾಟಿಂ ಪಳೆನಾ
ನಾ, ನಾ, ಹ್ಯಾ ನೆಂಟ್ಯಾ ಬಾಳಾಚೊ ಜೀವ್
ಹಾಂವ್ ಭಿಲ್ಕುಲ್ ಕಾಡುಂಕ್ ವಚಾನಾ
ಹಾಂವ್ ತುಕಾ ನಾಕಾ ತರ್ ಮಾರ್ ಗೆಲಿ
ಹಾಂವ್ ಆಂಕ್ವಾರ್ ರಾವೊನ್ ಕಷ್ಟ್ ಸೊಸುನ್
ಖಂಡಿತ್ ಹ್ಯಾ ಬಾಳಾಕ್ ಹೊ ಸಂಸಾರ್ ದಾಖಯ್ತಾಂ
ದೆವಾ, ದೆವಾ, ತುಂಚ್ ಮ್ಹಜೊ ಆಧಾರ್!
ಪಾಟಿಂ ಪಳೆನಾಕಾ [- ಪ್ರಿಯಾ ಸಿಕ್ವೇರಾ, ಫೆರಾರ್]
ಚಲ್ತಾಯ್ ತುಂ ಮನ್ಶಾ
ಮಾತ್ಯಾರ್ ತುಜ್ಯಾ ಶಿಂಗಾ ಫುಟವ್ನ್
ಹರ್ದೆಂ ತುಜೆಂ ಬಳಾನ್ ಮುಖಾರ್ ಲೊಟುನ್
ವೊಂಟಾರ್ ಮಿಶಿಯೊ ಫುಲವ್ನ್
ರಗ್ತಾಚ್ಯೆ ಗಾದೆ ಗುಡ್ಡಾವ್ನ್
ಮಾಸಾಚೆ ಗಾದೆ ಖೊಸ್ತಾಯ್
’ಪಾಟಿಂ ಪಳೆನಾಕಾ’ ಮ್ಹಳ್ಳ್ಯಾ ಉತ್ರಾಕ್ ಮಾಂದುನ್
ಚಲ್ತಾನಾ ತುಂ ಮುಖಾರ್
ಶಿಂಗಾ ತುಜಿ ಝಾಡ್ತೆಲಿಂ
ಹರ್ದೆಂ ತುಜೆಂ ಅಸ್ಕತ್ ಜಾತೆಲೆಂ
ಗಾದೊ ತೊ ರಗ್ತಾನ್ ದಾಟ್ ಜಾವ್ನ್
ಗಾದ್ಯಾಂತ್ ನಾಂಗ್ರಾಕ್ ಹಾಡಾಂ ಆಪ್ಟೊನ್
ಜೋತ್ ತುಜೆಂ ವಿಸ್ರೊನ್
ದಾಂಟೊನ್ ತುಂ ಪಡ್ತೊಲೊಯ್
ರಾಗಾಚಿಂ ಮೊಡಾಂ ನಿತಳ್ ಜಾತಾ ಮ್ಹಣಾಸರ್
ಅಹಂಕಾರಾಚಿ ಕೊವ್ಳಾಂ ಝಡ್ತಾಸರ್
ಜೋತಾಕ್ ತುಜ್ಯಾ ಸೊದುನ್ಂಚ್ ಆಸ್ತೊಲೊಯ್
ನಾಂಗ್ರಾಕ್ ಲೊಟುಂಕ್ ತಾಂಕಾನಾಸ್ತಾಂ
ರಗ್ತಾ ಮಾಸಾಚ್ಯಾ ನವಲಾಂಕ್
ಹಾಡಾಂಚ್ಯಾ ವಿಜ್ಮಿತ್ಕಾಯೆಕ್
ಸೊಧುನ್ ಕಾಡುಂಕ್ ಸಕ್ಚೊನಾಂಯ್
ತುಂ ಮನಿಸ್ ಜಾವ್ನ್ ಜಿಯೆತಾ ಮ್ಹಣಾಸರ್!!!
ಪಾಟಿಂ ಪಳೆನಾಕಾ [- ವಾಯ್ಲೆಟ್ ಜೆ. ಪಿರೇರಾ]
ಪಾಟಿ ಪಳಯ್ನಾಕಾ, ಕಾಳಿಜ್ ಕಡಯ್ನಾಕಾ
ವೇಳ್ ವಿಭಾಡ್ನಾಕಾ, ತುಕಾಚ್ಚ್ ಸಲ್ವಯ್ನಾಕಾ
ಹ್ಯಾ ಸಂಸ್ರಾಂತ್ ಆಸಾತ್ ಸಭಾರ್ ನಾಲಿಸಾಯೆಚೆ ಕಿಡೆ
ತುಜ್ಯಾ ತ್ಯಾ ಉರ್ಭೆಕ್ ವೊತ್ತೆಲೆ ಸದಾಂಚ್ಚ್ ಉದಾಕ್ ಶೆಳೆಂ
ಹರ್ಯೆಕಾ ಶೆತಾಂತ್ ಮೆಳ್ತೆಲೆಂ ಅವ್ಮಾನಾಚೆ ಹೊಡೆಂ
ಪಾಟಿ ಪಳೆವ್ನ್ ರಾವ್ಶಿ ತರ್ ಹಾಸ್ತೆಲೆ ಥೊಡೆ
ಫಕತ್ ಜಾಣಾಂತ್ ಕರುಂಕ್ ಹೆರಾಂಚಿಂ ನಕ್ಲಾಂ
ಕಶೆಂಯ್ ಪುಣಿ ರಾಕ್ತಾತ್ ಪಾಂಯ್ ವೋಡ್ನ್ ಘಾಲುಂಕ್ ಸಕ್ಲಾ
ತಾಚೆ ಥಾವ್ನ್ ಕಿತೇಂಯ್ ಕರುಂಕ್ ಜಾಯ್ನಾತ್ಲ್ಯಾ ವಕ್ತಾ
ಕುಲ್ಫಾಂ ಕಾಡ್ನ್ ಘಡ್ಯೆಕ್ ತರೀ ಜಿಕ್ಲೆ ಮ್ಹಣ್ ಲೆಕ್ತಾತ್
ತುವೆಂ ಬರೆಂ ಕರ್ತಾನಾ ಹ್ಯಾ ಸಂಸಾರಿ
ತುಜೆರ್ ಮೊಸ್ರಾನ್ ಭರ್ತೆಲೆ ಕಿತ್ಲೆ ಮತ್ಲಾಬಿ
ಅಕ್ಮಾನಾಚೊ ಪಾವ್ಸ್ ವೊತ್ತೆಲೆ ತುಜೆ ವಯ್ರಿ
ಮೊಸ್ರಾಚೊ ಘಡ್ಗಡೊ, ಫಾರಿಕ್ಪಣಾಚೆಂ ಝಗ್ಲಾಣೆಂ ಸಗ್ಳ್ಯಾಂನಿ
ತರೀ ತುಂ ಪಳಯ್ನಾಕಾ ಕೆದ್ನಾಂಯ್ ಪಾಟಿಂ
ಖೊಟ್ಯಾ ಸ್ಪಿರಿತಾಂಕ್ ದಿವ್ಯಾಂ ಸದಾಂಚ್ಚ್ ಸುಟಿ
ಮೊಸ್ರಿಂ ಮನ್ಶ್ಯಾಂಕ್ ಜಾಂವ್ಕ್ ಸೊಡ್ಚೆ ನಾಕಾ ನಾಂವಾಡ್ದಿಕ್ ಪ್ರತಿ
ಘಮಂಡ್ ನಾಸ್ ಕರ್ನ್ ಜಾವ್ಯಾಂ ಆಮಿ ಜಯ್ತಾಚೊ ಖರ್ಯೊ ಸಾಕ್ಸಿ
ಪಾಟಿಂ ಪಳೆನಾಸ್ತಾಂ [- ಮೆಲ್ವಿನ್ ಪಿಂಟೊ, ನೀರುಡೆ]
ಪಾಟಿಂ ಪಳೆತಾನಾ
ದರ್ಕಾಸಾಂತ್ ಬುಡ್ಡುನ್ ಕೆಲ್ಲಿಂ
ರಗ್ತಾಳಿಂ ಬೆಣ್ಸಾಂ, ಘೊಸ್ ಘೊಸ್ ಸಾಂಪೆರಾಂ
ಉಡಾಸಾ ಕಟ್ಟ್ಯಾಕ್ ಆದ್ಳೊನ್
ಸುಕ್ಲ್ಲ್ಯಾ ಸುಕುರ್ನಳಿಯೆಂತ್ಯೀ
ಅತ್ರೆಗಾ ಆಂಯ್ಡೊ ಉಟಯ್ತಾತ್
ತ್ಯಾ ದಿಸಾಂನಿ ಬೆಣ್ಸಾಂ ಸಾಂಪೆರಾಂಚ್ಯಾ
ಅಮೃತ್ ರೂಚಿಕ್ ಜೀಬ್ ಸಾಕರ್ ಜಾಂವ್ಚೆ ಆದಿಂ
ಪಾಟಿಚ್ಯಾ ಬೊರಿಯಾಂ ಸಂದಾಂನಿ
ಚಿಂಚೆಚಿಂ ಫಾಂಟೆರಿಂ ಆಡಾರಾಂ
ದಾಟ್ ದಾಟ್ ಅಮೀಬಾ ಸೊಡಯ್ತಾಲಿಂ
ಪಳೆನಾತ್ಲ್ಲ್ಯಾ ಆವಯ್ಕ್ ಚಿಂತುನ್
ದೊಳ್ಯಾಂ ಖಾಂಚಿಂನಿ ಪಿಂತ್ರಾಂ-ದುಕಾಂಚೆಂ
ಇರ್ಜಾನ್ ದೆಂವ್ತಾನಾ
ಬಾಳ್ಪಣ್ ಮ್ಹಳ್ಳೆಂ
ಖಂಯ್ಚ್ಯಾ ಆಬ್ಲೆಶಿ ಆಕಾಡ್ಯಾನ್ ಫಾರ್ನ್
ಭಾಯ್ರ್ ಉಡಯ್ಲೆಂ ತೆಂ ಕಳಾನಾಸ್ತಾಂ
ಮತಿ ಘುಡಾಂನಿ ಸವಾಲಾಂ ಘೆಟೆ!
ಆತಾಂ ತುಮಿ ಪಾಟಿಂ ಪಳೆನಾಕಾ
ಮುಕ್ಲೆಂ ಚೀಂತ್ ಮ್ಹಣ್ಶಾತ್!
ಪುಣ್ ಆಜ್ ಮ್ಹಜ್ಯಾ ಜಿವಾಂತ್
ಉದೆತಾತ್ ತ್ಯಾ ನಿರಾಸ್, ತಳ್ಮಳ್ಯಾಂಕ್
ಕಾಂಪ್ಣ್ಯಾಂಕ್, ಸುರ್ಸುರ್ಯಾಂಕ್
ಕಾರಣ್ ಕೋಣ್ ತೆಂ ಸಮ್ಜಾನಾಸ್ತಾಂ
ಭೆಜ್ಯಾ ಭಿತರ್ ಫುಟೊಂಕ್ ಆಯ್ತೆ
ಭಿರಾಂತ್ ಆಕ್ಲಾಸಾಚೆ ರೊಂತೆ!
ಪಾಟಿಂ ಪಳೆನಾಕಾ [- ಕಾವ್ಯಾದಾಸ್]
ಹಾಂಗಾ ವಾಟೆರ್ ಮಧೆಂ ರಾವೊನ್
ಕಿತೆಂ ಚಿಂತುನ್ ಆಸಾಯ್?
ದುಭಾವ್ ಭಿರಾಂತ್ ಮತಿಂತ್ ತುಜ್ಯಾ
ಸವಾಲ್ ಸಮಸ್ಸ್ಯಾಂ ಸಾಯ್
ತೊಂಡಾರ್ ತುಜ್ಯಾ ಗುಸ್ಪೊಡ್, ಆಕಾಂತ್
ಕಾವ್ಜೆಣಿ ಕಳ್ವಳೆ
ಮುಕಾರ್ ವೆಚೆಂ ಕಶೆಂ ಆತಾಂ?
ಜಾಪ್ ಕಾಂಯ್ ಸೊಧ್ತಾತ್ ದೊಳೆ
ಪಾಟ್ಲ್ಯಾನ್ ತುಜ್ಯಾ ದಿಸ್ತಾ ತುಕಾ
ಆದ್ಲೆಂ ಜಿಣೆ ತುಜೆಂ
ಸರ್ವ್ ಸದಾಂಚೆಂ, ಸಾಂಗಾತಾಚೆಂ
ನಾ ಭ್ಯೆಂ ಸಮಸ್ಸ್ಯಾಂಚೆಂ
ಮುಕ್ಲ್ಯಾನ್ ಅಂಧ್ಕಾರ್, ಅಶ್ಪನ್ಟ್, ಪಳೆವ್ನ್
ಭಿಂಯೆಲಾಯ್ ತುಂ ಕಿತೆಂ?
ಅಂಧ್ಕಾರಾಚ್ಯಾ ಪಾಟ್ಲ್ಯಾನ್ ಲಿಪ್ಲಾಂ
ಸೊಭಿತ್ ಪ್ರಜ್ವಲ್ ಫಾಂತೆಂ
ತುಜೆ ಮುಕಾರ್, ಹಜಾರಾಂನಿ
ಧಯ್ರಾನ್ ಮುಕಾರ್ ಗೆಲೆ
ಗೆಲೆ ದೆಖುನ್ ಸೊಭ್ತಾತ್ ಆತಾಂ
ಪಾಂಗ್ರುನ್ ಜಯ್ತಾ ಶೆಲೆ
ಆವ್ಕಾಸ್ ಆಮ್ಕಾಂ ಆಪಯ್ತಾ ವ್ಹಯ್
ವರಿನಾ ಹಾತಾಕ್ ಧರುನ್
ಸೊಧುನ್ ತಾಕಾ ಗೆಲೊಯ್ ತರ್ ಜಯ್ತ್
ಘೆವ್ಯೆತ್ ತುಜೆಂಚ್ ಕರುನ್
ತರ್ ಚಲ್ ಮುಕಾರ್ ಧಯ್ರ್ ವಿಶ್ವಾಸಾನ್
ಜಯ್ತ್ ಆಪಯ್ತಾ ತುಕಾ
ಸಾಹಸಿಂಕ್ ಮಾತ್ರ್ ಮೆಳ್ತಾ ಕುರೊವ್
ಪಾಟಿಂ ಪಳೆನಾಕಾ
About
us | Feedback | Contact us
Copyright
© 2005 DAAIZ.COM All rights reserved.
Page concept, designed and maintained by Ashawadi
Publications
More in Daaiz
Send your comments to author on this writing
This is not a comment box. Nothing you write here appears on the site or is shown to any other reader: it is sent to him by email, privately, and he replies to you directly if a reply is called for.