[ಭಾತ್ ಕಾಂಡ್ಲ್ಯಾರ್]

’ಭಾತ್ ಕಾಂಡ್ಲ್ಯಾರ್ ತಾಂದುಳ್ ಜಾತಾ’ ಕವಿತಾ ಜಾತಾ ಮ್ಹಣುನ್ ಸಮಾಜೆಕ್ ಬೂದ್‌ಬಾಳ್ ಸಾಂಗುಂಕ್ ಪ್ರಾಸ್‌ಬದ್ದ್ ಉತ್ರಾಂಚೊ ದಾಳೊ ಕರುನ್ ಸಾಮಾಜಿಕ್ ಮಾಧ್ಯಮಾಂನಿ ಎಕಾಮೆಕಾ ಧಾಡ್ಚೆಂ ಏಕ್ ಆಜ್‌ಕಾಲ್ ಫೇಶನ್ ಜಾಲಾಂ. ಜಶೆಂ ಫಿರ್ಗಜ್ ಪತ್ರಾಂನಿ (ಥೊಡ್ಯಾ ಹೆರ್ ಪತ್ರಾಂನಿ ಸಯ್ತ್) ಜಾಂವ್ಚೊ ಭಾಸೆಚೊ ಖಚ್ರೊ ಪಳೆತಾನಾ ಖರೆಂಚ್ ಚಾ.ಫ್ರಾಚಿಂ ಉತ್ರಾಂ ಯಾದಿಕ್ ಯೆತಾತ್ ’ಕುಂಡೊ ಖಾವ್ನ್ ಸವಯ್ ಜಾಲ್ಲ್ಯಾಂಕ್ ಉಂಡ್ಯಾಚಿ ರೂಚ್ ಕಶಿ ಕಳ್ಚಿ?’. ಹಾಕಾ ಮೂಳ್ ಕಾರಣ್ ಕವಿತೆವಿಶಿಂ ಆಸ್ಚಿ ಸಮ್ಜೊಣಿ ಭೋವ್ ಪಾತಳ್/ಅಸ್ಕತ್ ಮ್ಹಣ್ಯೆತಾ, ವಾಚ್ಪಾಚೊ ಬೊರ್ಗೊಳ್, ಚಿಂತ್ಪಾಚೊ ದುಕೊಳ್ ಅಸ್ಲ್ಯಾರೀ, ’ಕಿತೆಂಯ್’, ’ಕಶೇಂಯ್ ಬರಯಿಲ್ಲಿ’ ಕವಿತಾ ಜಾಯ್ನಾ ಮ್ಹಳ್ಳೆಂ ಸತ್ ಕವಿನ್ ಪಯ್ಲೆಂ ಸಮ್ಜುಂಚೆಂ ಭೊವ್ ಗರ್ಜೆಚೆಂ.

ಹ್ಯಾ ಕವಿತೆಂತ್ ಜೀಬ್ ಆನಿ ರೂಕ್ ಮ್ಹಳ್ಯಾರ್ ಕಿತೆಂ? ಆನಿ ಕಾವ್ಳೊ ಮ್ಹಳ್ಯಾರ್ ಕಿತೆಂ ಮ್ಹಳ್ಳೆಂ ಸಮ್ಜಲ್ಯಾರ್ ಕವಿತೆಚಿ ಗುಂಡಾಯ್ ಅಪ್ಶಿಚ್ಚ್ ಸಮ್ಜತಾ.

ಕೊಂಕ್ಣೆಂತ್ ಆಯ್ಲೆವಾರ್ ಅಪ್ರೂಪ್ ಪುಣ್ ಅಪುರ್ಭಾಯೆಚ್ಯೊ ಕವಿತಾ ಬರಯ್ತೆಲ್ಯಾ ಭೋವ್ ಥೊಡ್ಯಾಂಚ್ಯಾ ಮೆಳಿಂತ್ಲೊ ಜೋನ್ ಸುಂಟಿಕೊಪ್ಪ ಕಾನಡಿಂತ್ ಫಾಮಾದ್ ಕವಿ. ಕವಿತೆಂತ್ ಪ್ರತಿಮಾ/ಇಮಾಜಿಂಕ್ ಉಭ್ಯೊ ಕರುನ್, ತ್ಯಾ ಇಮಾಜಿಂ ಮುಖಾಂತ್ರ್ ಏಕ್ ಸಂವೇದನಾತ್ಮಕ್/ಮಾರ್ಮಿಕ್ ಚಿಂತ್ಪಾಚೆರ್ ಉದೆಲ್ಲ್ಯಾ ಖೊವ್ಳಾಂಕ್ ಕಾಡ್ಚೆಂ ಚಿಂತಾಪ್ ಹ್ಯೇ ಕವಿತೆಂತ್ ರೂಪ್ ರೂಪ್ ದಿಸೊನ್ ಯೆತಾ.

ಜೀಬ್ ಆನಿ ರೂಕ್ ..

ತೊ ವಚೊನ್

ತೇಂಪ್ ಕಿತ್ಲೊ ಜಾಲೊಗಿ...

ದೀಸ್ ರಾತ್ ಜಾವ್ನ್

ರಾತ್ ಅನಿಕೀ ಕಾಳೆಂ ಜಾವ್ನ್

ಪ್ರಾಯ್ ಭರೊನ್ ಪಿಂರ್ಗತಾ!

ಕಾಳೊಕಾಚೆ ಕಣ್ ಕಣ್‌ಯೀ

ಮಾಂಯ್ಚಿ ಮಾಂಯ್

ಸುನೆಚಿ ಸುನ್ ಮ್ಹಣ್

ಚಾಬೊನ್ ಪಡ್ಲ್ಯಾಂತ್

ಮಾತಿಯೆಂತ್ ಮಾತಿ ಜಾಲ್ಲಿ

ಕೂಡ್ ಅನಿಕ್‍ಯೀ ಸಲ್ವಾನಾ

ತಿ ಜೀಬ್

ತಿ ಜೀಬ್ ಆತಾಂ ಖಿರ್ಲೊನ್

ವ್ಹಡ್ ರೂಕ್ ಜಾವ್ನ್ ಆಡ್ ಪಡ್ಲ್ಯಾ

ವ್ಹಾಳ್ಚ್ಯಾ ವಾರ್‍ಯಾಕ್‌ಯೀ

ಕಾಂಠಾಳೊ.. ದುರ್ಸಣ್

ಜೀಬ್ ರೂಕ್ ಜಾವ್ನ್

ರೂಕ್ ಜೀವ್ ಜಾವ್ನ್

ಎಕೇಕ್ ಪಾಳ್‌ಯೀ

ಮಾಂಯ್ ಸುನ್ ಮ್ಹಣ್ ಝಗಡ್ತಾನಾ

ಹ್ಯಾ ಮಾತಿಯೆಕೀ ವಿರಾರಾಯ್..

ಖಂಯ್ ಥಾವ್ನ್‌ಗೀ

ಉಭೊನ್ ಆಯಿಲ್ಲ್ಯಾ ಕಾವ್ಳ್ಯಾನ್

ರುಕಾಚೆರ್ ವಸ್ತಿ ಕೆಲ್ಯಾ;

ಸುಕ್‌ಲ್ಲೆ ಜಿಬಾಂಕ್ ಆತಾಂ

ಬಂಧನಾಚೆಂ ಭ್ಯೆಂ

ಬಂಧನಾಚೆಂ ಭ್ಯೆಂ..

- ಜೋನ್ ಸುಂಟಿಕೊಪ್ಪ [ಸಪ್ತೆಂಬರ್, 2016]

ಜೋನ್ ಸುಂಟಿಕೊಪ್ಪ: ಕಾನಡಿ ಭಾಸೆಂತ್ ಅಪುರ್ಭಾಯೆಚ್ಯೊ ಕವಿತಾ/ಕಾಣ್ಯೊ ಬರಂವ್ಚೊ ಜೋನ್ ಡಿ’ಸೋಜ್, ವೃತ್ತೆನ್ ಏಕ್ ಶಿಕ್ಷಕ್. ಸಾಹಿತ್ಯಾಚೆಂ ಪದ್ಯುತ್ತರ್ ಶಿಕಾಪ್ ಜೊಡುನ್ ಆಸ್ಚೊ ಹೊ ಏಕ್ ಭೋವ್ ಸಂವೇದನ್‌ಶೀಲ್ ತಶೆಂಚ್ ಭೋವ್ ಮೊವಾಳ್/ಖಾಲ್ತೊ. ಪುಣ್ ಚಿಂತ್ನಾಂನಿ ತಿತ್ಲೊಚ್ಚ್ ಪರಿಪಕ್ವ್. ಸಮಾಜಿಂತ್ಲ್ಯಾ ವಾಂಕ್ಡ್ಯಾಂಚೆರ್ ವಿಮರ್ಶಾತ್ಮಕ್ ನದರ್ ಘಾಲ್ಚೆಂ ಚಿಂತಾಪ್ ಹಾಚ್ಯಾ ಚಡ್ತಾವ್ ಬರ್ಪಾಂನಿ ನಿಶೆತಾ.

ಸ್ಮಾರ್ಟ್ ಫೋನಾಂತ್ಲೆಂ ಜಿವಿತ್