ಬಸೀಂತಲೊ ಪ್ರವಾಸ್ (- ಸಿಯಾಲೀನಿ ಫೆರ್ನಾಂಡೀಸ್)

ಚಿಂತ್ನಾ ತುಜಿಂ, ಮನಾಕ್ ಮ್ಹಜ್ಯಾ

ಮಾತೂಯ್ ಥಾರ್ ದಿನಾತ್.

ನ್ಹಿದೂಂಕ್ ಗೆಲ್ಯಾರ್, ನ್ಹಿದೂಯ್ ಯೆನಾ

ದೊಳ್ಯಾಂ ಮುಖಾರ್ ತುಜೆಂಚ್ ಮುಖ್ ಪರ್ಜಳಟಾ.

ತುಕಾ ಹಾಂವೆ ಬಸೀಂತ್ ಪಳಯ್ಲೊ.

ಫೊನಾರ್ ತುಂ ಕೊಣಾ ಲಾಗಿಂ,

ಕಿತೆಂ ತರಿ ಉಲಯ್ತಾಲೊ.

ಮ್ಹಜೆ ಕುಶೀಕ್ ರಿತೆಂ ಸೀಟ್ ಪಳೊವ್ನ್

ಯೆವ್ನ್ ತುಂ ಮ್ಹಜೆಶಿಂ ಬಸ್ಲೊ.

ಇತ್ಲ್ಯಾನೂಚ್ ಮ್ಹಜೆಂ ಕಾಳೀಜ್

ಧಡ್ಧಡೂಂಕ್ ಲಾಗ್ಲೆಂ,

ಮನಾಂತೂಯ್ ಖೊಶ್ಯೆಚೆಂ ಕೀರ್ಣ್ ಫಾಂಕ್ಲೆಂ,

ತುಜೆ ಲಾಗಿ ಉಲೊವ್ಚೆಂ ಅಶೆಂ,

ಮ್ಹಾಕಾ ಮನಾಂತ್ಲ್ಯಾನ್ ದಿಸ್ಲೆಂ.

ಪೂಣ್ ತುಂ ಫೊನಾಚೆರ್ ಆಶಿಲ್ಲ್ಯಾನ್

ಹಾಂವೂಯ್ ವೊಗೀಚ್ ರಾವ್ಲೆಂ.

ಕಂಡೆಕ್ಟರ್ ಟಿಕೆಟ್ ಮಾರೂಂಕ್ ಆಯ್ಲೊ,

ಮ್ಹಜೆ ಲಾಗಿಂ ಮೊಡ್ಚೆ ನಾಶಿಲ್ಲ್ಯಾನ್

ತುವೆಂಚ್ ಮ್ಹಜಿ ಟಿಕೆಟ್ ಕಾಡ್ಲಿ.

ತೆನ್ನಾಚ್ ಆಮ್ಚ್ಯಾ ದೊಳ್ಯಾಂಚಿ ಭೆಟ್ ಘಡ್ಲಿ.

"ದೆವ್ ಬರೆಂ ಕರುಂ" ಮ್ಹಣ್ಟಾಚ್,

ತುಜೆಂ ಸ್ಟೊಪ್ ಆಯ್ಲೆಂ.

ತೆನ್ನಾ ತುವೆಂ ದಿಲ್ಲ್ಯಾ ಮುಮುರ್ಕ್ಯಾ ಹಾಂಶ್ಯಾನೂಚ್

ಮ್ಹಜೆಂ ಮನ್ ತುವೆಂ ಜಿಖೂನ್ ಘೆತ್ಲೆಂ.

- ಸಿಯಾಲಿನಿ ಫೆರ್ನಾಂಡಿಸ್. [ಜುಲಾಯ್, 2020]