गा सभाग्या (- ग्यानेश्वर तरी)

हे दुनियेत तुमची जनगणना

अानी आमची अगणती

हाचो तुवें केन्ना हिशेब केला व्हय?

आमी तुमकां अब्ज पटीन पुरोन उरत-

श्वास-उश्वासाचो करुन गुळो.

गा सभाग्या!

ह्या धर्तरेचेर जी घाण- बुरशी

तुमच्या वेवहारातल्यान निर्मणी जाता

ताचो विलो कोण लायतात गा?

हाचो कोणे केन्ना विचार केला व्हय?

वक्लां- माकनांंनी संशोधन कर गा!

गा सभाग्या!

आमीच पळयात कोयर-कचरो

खातड-हळशीक कोराथून कोचायतात

फस्त- नश्ट पीठो करतात

तुमच्या नेत्राआड अनमनून

आमीच हो संवसार निवळ करतात.

गा सभाग्या!

उदेंत्या सूर्याक साक्ष दवरुन

चंद्रावरी रातभर जागरण जागयत

चोवीस वरां, पळां- घटीका राबयत

रेंबकण, नालो-उकीरडो कड्डयत मोलाविणें अाख्खें जग निर्मळ करतात.

पुण सभाग्या!

उदक-अन्न आमचो आहार

जळी-थळीं, हवेत करतात संचार

रगत-मांस, घायार आमचो अधिकार

कुडीत तुमच्या रीघत जाल्यार

दुयेंस जावन जीण काबार.

गा सभाग्या!

देवाची निर्मणी राकेसाची करणी

विश्वाचे रचणूकेत चिखल- पाणी

सज्जना-दुर्जना, सभाग्या-दुर्भाग्या

जीवाणु-विशाणु पुसतात कर्म-काणी

करुन गा दृश्यांतरीत जीवीत हानी.

मातयेभरवण गे सृश्टीमाया!

मातयेभरवण गे सृश्टीमाया!

-  ग्यानेश्वर तरी. [जुलाय, २०२०]

ग्यानेश्वर तरी: वृत्तेन शिक्षक जावन वावर कर्चो हो कोंकणी संघटनांनी सयत काऱ्याळ. अखील भार्तीय कोंकणी परिशदेंत तशेंच हेर संघटनांनी वावर केल्लो हो एक कथाकार, कवी तसेंच नाटक/नाटकुळे बरवन आयला. हाच्या कवितेंचे तीन बूक; ऋतुमती (१९९५), चल्येक वाच्यात (२००९) आनी सुईसायड (२०१०) येदोळ पर्गटल्यात. थोड्या कवितेंक स्पर्ध्यांनी इनामां सयत लाभल्यांत.