ಕವಿತಾकविताPoem

ಕಾಳೀಜ್ ಉಡ್ಟಾ ಮನ್ ರಡ್ಟಾ [- ರುಪಾಲಿ ಮಾವ್ಜೊ ಕೀರ್ತನಿ]

[ಕವಿತಾ] ಕಾಳೀಜ್ ಉಡ್ಟಾ ಮನ್ ರಡ್ಟಾ [- ರುಪಾಲಿ ಮಾವ್ಜೊ ಕೀರ್ತನಿ]

ಹ್ಯಾ ಸಂಸಾರಾಂತ್ ಜಿಯೆಂವ್ಚೊ ಹರ್ಯೆಕ್ ಮನಿಸ್ ಪಯ್ಣಾರಿ. ಹೆಂ ಉತರ್ ತಾತ್ವಿಕ್ ಜಾಲೆಂ ತರ್ ಅನ್ಯೇಕಾ ಉತ್ರಾನ್ ಸಾಂಗ್ತಾಂ; ಹ್ಯಾ ಸಂಸಾರಾಂತ್ ಜಿಯೆಂವ್ಚೊ ಚಡ್ತಾವ್ ಮನಿಸ್ ಅಪ್ಲೊ ಜಲ್ಮಲ್ಲೊ ಗಾಂವ್ ಸೊಡುನ್ ಪರ್ಕಿ ಗಾಂವಾಕ್ ವೆತಾ, ಕಾಂಯ್ ದೀಸ್ಪಡ್ತೊ ಗ್ರಾಸ್ ಸೊಧುನ್, ಅಪ್ಲೊ ಬರೊ ಫುಡಾರ್ ಸೊಧುನ್ ಆನಿ ಅಪ್ಲಿಂ ಸ್ವಪ್ಣಾಂ ಘೆವುನ್. ಆನಿ ಜೆದ್ನಾಂ ಪರ್ಗಾಂವಾಕ್ ಗೆಲ್ಲೊ ಮನಿಸ್, ಅಪ್ಲ್ಯಾಂಕ್, ಅಪ್ಲ್ಯಾ ಮೊಗಾಚ್ಯಾಂಕ್ ಯಾದ್ ಕರ್ತಾನಾ ಕಾಳ್ಜಾಂತ್ ಉದೆವ್ನ್ ಯೆಂವ್ಚೆ ಉಮಾಳೆ, ತಳ್ಮಳೆ ಕಶೆ ತಾಕಾ ಅಪ್ಲ್ಯಾ ಮುಟಿಂತ್ ಘೆತಾತ್ ಮ್ಹಳ್ಳೆಂ ಚಿಂತಪ್ ಪರ್ಗಾಂವಾಂತ್ ಜಿಯೆಲ್ಲ್ಯಾಂಕ್ ಮಾತ್ ಕಳಿತ್.

ಹಾಂಗಾಸರ್ ಅಸಲಿಚ್ ಅಪುರ್ಭಾಯೆಚಿ ಕವಿತಾ ಘೆವ್ನ್ ಆಯ್ಲ್ಯಾ ಗೊಂಯ್ಚಿ ಬಾಯ್ ರುಪಾಲಿ ಮಾವ್ಜೊ ಕೀರ್ತನಿ. ಹಿಚ್ಯಾ ಕವಿತೆಂನಿ ಆಸ್ಚೆ ತೆ ಉಮಾಳೆ ಆನಿ ಹರ್‍ಯೇಕ್ಲ್ಯಾಕ್ ಆವಯ್ಚೊ ಉಡಾಸ್ ಧೊಸ್ಚೆಂ ಚಿಂತಪ್ ವಾಚ್ತಾನಾ ಹಿ ಕವಿತಾ ವಾಚ್ಪ್ಯಾಚ್ಯಾ ಕಾಳ್ಜಾಕ್ ಆಪಡ್ತಾಶೆಂ ಭಗ್ತಾ. ಹ್ಯಾ ಕವಿತೆಚೊ ಅಸ್ವಾದ್ ಕರುಂಕ್ ತುಕಾ ಉಲೊ ದಿತಾಂ.

[ಕವಿತಾ] ಕಾಳೀಜ್ ಉಡ್ಟಾ ಮನ್ ರಡ್ಟಾ [- ರುಪಾಲಿ ಮಾವ್ಜೊ ಕೀರ್ತನಿ]

ಕಾಳೀಜ್ ಉಡ್ಟಾ ಮನ್ ರಡ್ಟಾ

ಘರ್ ಸೊಡೂನ್ ವತಾ ತೆನ್ನಾ ತಾಜೆಯ್ ಮನ್ ರಡ್ಟಾ

ನೊಕ್ರಿ ಕಾಮಾ ಖಾತೀರ್ ಪಯ್ಸ್ ತಾಕಾಯ್ ರಾವ್ಚೆ ಪಡ್ಟಾ

ಘರ್ಚೆ ಯಾದೀನ್ ತಾಜೆಯ್ ಮನಾಂತ್ ಹುಂಡ್ಕ್ಯಾ ಲ್ಹಾರ್ ಫುಟ್ಟಾ

ರೊಕ್ಡೊಚ್ ವತ್ಲೊ ಘರಾ ಮ್ಹಣೀತ್ ಸಮ್ಜೂತ್ ತೊ ಕಾಡ್ಟಾ

ಒಗೀಚ್ ನಸ್ತೊ ಖರ್ಚ್ ಕಿತ್ಯಾಕ್ ಜೊಡ್ ಸಾಠಯ್ತ್ ಉರ್ತಾ

ಕರ್ಚಿ ಪಾಡಿಲ್ಲಿ ತಡ್ಜೊಡ್ ಮಾತ್ ಲಿಪಯ್ತ್ ತೊ ರಾವ್ತಾ

ಘರ್ಚೆ ಸಗ್ಳೆ ಸಣ್ವಾರ್ ತಾಕಾಯ್ ಖೂಪ್ ಚುಕ್ತಾ

ಮನ್ ಉಕ್ತಾಂವಂಕ್ ಮಾತ್ ತೊ ಸದಾಂಚ್ ಫಾಟಿ ಸರ್ತಾ

ಖುಶಾಲ್ ಆಸಾ ಹಾಂವ್ ಹಾಂಗಾ ಹಾಸೂನ್ ಘರ್ಚ್ಯಾಂಕ್ ಸಾಂಗ್ತಾ

ಸದಾಂಚ್ ತಾಂಕಾ ಹಾಂಸ್ತೆ ದವ್ರ್ ದೆವಾ ಕಡೆನ್ ಮಾಗ್ತಾ

ಕೆನ್ನಾ ಕೆನ್ನಾಯ್ ಕಾಳ್ಜಾಕ್ ತಾಜ್ಯಾಯ್ ಯಾದಿ ಪೀಳ್ ಪಡ್ಟಾ

ತೆನ್ನಾ ಮಾತ್ ಹಳೂಚ್ ತೊಂಡ್ ಉಶ್ಯಾತ್ ಲಿಪೊವ್ನ್ ಸೊಡ್ಟಾ

'ದಾದ್ಲೊ ಮನೀಸ್ ತುಂ ಬಾಬಾ ರಡಪ್ ತುಕಾ ಸೊಬ್ನಾ'

ಉತ್ರಾಂ ಘುಮ್ತಾತ್ ಕಾನಾಂತ್ ಪುಣ್ ಮನ್ ತೆನ್ನಾ ಆಯ್ಕನಾ

'ಜಡ್ ಮನಾಚೆಂ ವಜೆಂ ಆಜ್ ಜಾಯ್ನಾ ಗೆ ಪೆಲೂಂಕ್

ದುಕಾಂ ಲಗೀತ್ ತಯಾರ್ ನಾತ್ ಮ್ಹಜೆಂ ಕಾಂಯ್ಚ್ ಆಯ್ಕುಂಕ್'

ಹುಡ್ಕ್ಯಾ ಲ್ಹಾರ್ ತೆನ್ನಾ ಲ್ಹವೂಚ್ ಉಶೆಂ ಭಿಜೊವ್ನ್ ವತಾ

ರಾವ್ ನಜ್ ಜಾವ್ನ್ ಮನ್ ಸಾದ್ ಘಾಲೂಂಕ್ ಲಾಗ್ತಾ

'ಆಇ ಎ ಆಇ ತುಜಿ ಯಾದ್ ಮ್ಹಾಕಾ ಯೆತಾ

ಯಾದೀನ್ ತುಜ್ಯಾ ಮನ್ ಮ್ಹಜೆ ಸದಾಂಚ್ ಜಡ್ ಜಾತಾ

ಮನ್ ಸದಾಂಚ್ ಜಡ್ ಜಾತಾ'

- ರುಪಾಲಿ ಮಾವ್ಜೊ ಕೀರ್ತನಿ. [ಒಕ್ಟೋಬರ್, 2019]