ಕುಡ್ಡೊ! (- ಅವಿನಾಶ್ ಕುಂಕಳಕಾರ್)

ಮ್ಹಜ್ಯಾ ಅಂತಕರಣಾಚ್ಯಾ ದೊಳ್ಯಾನಿ

ಹಾಂವ್ ತುಕಾ ಪಳೊವ್ಕ್ ಶಕ್ತಾಂ

ತುಜೆ ಯಾದಿಚ್ಯಾ ಆಧಾರಾನ್

ಹಾಂವ್ ಮ್ಹಜೆಂ ಜಗ್ಣೆ ಜಗ್ತಾಂ.

ಪಯ್ರ್ ತುವೆಂನ್ ಮ್ಹಾಕಾ ಪಳೊವ್ನ್

ದೊಳೆ ಫಿರಯ್ಲೆ...

ದೊಳೆ ಆಸೂನ್ ಕುಡ್ಡೆ ಜಾಲೆಂ

ಪೂಣ್ ತುಂ ಹೆಂ ವಿಸ್ರಲೆಂ

ಜ್ಯಾ ದೊಳ್ಯಾನಿ ತುಂ ಆಜ್ ಪಳಯ್ತಾ

ತೆಂ ದೊಳೆ ಮ್ಹಜೆಂ

ಮ್ಹಜ್ಯಾ ದೊಳ್ಯಾನಿ ತುಜೊ ಸಂವ್ಸಾರ್

ಪಳ್ಜಳೀತ್ ಕೆಲಾಂ.

ಮ್ಹಜ್ಯಾ ಸ್ಕುಟ್ರೀಚ್ಯಾ

ಫಾಟ್ಲ್ಯಾನ್ ತುಂ ಭಶಿಲ್ಲೆ.

ಜೆನ್ನಾ ಆಮ್ಕಾಂ ಅಪ್ಘಾತ್ ಜಾಲ್ಲೊ

ಅಪ್ಘಾತಾಂತ್ ತುಜೆಂ ದೊಳೆ ಗೆಲೆಂ

ತುಜ್ಯಾ ಘರ್ಚ್ಯಾಂನಿ ಮ್ಹಜೆರ್ ಆರೊಪ್ ಕೆಲ್ಲೊ

ತೆನ್ನಾ ಹಾಂವೆಂ ದಾನ್ ಕೆಲೆಂ

ಮ್ಹಜೆಂ ದೊನೂಯ್ ದೊಳೆ

ಆನಿ ಹಾಂವ್ ಸಾಂಸ್ಣಾಚೊ ಕುಡ್ಡೊ ಜಾಲೊ.

ಉಪ್ಕಾರ್ ಮ್ಹಜೆಂ ಮಾನ್ಚ್ಯಾ ಬದ್ಲಾ

ತು ಸ್ವತಾಚ್ ಬದ್ಲ್ಲೆಂ

ಹಾಂವ್ ಕುಡ್ಡೊ ಮ್ಹೂಣ್

ಮ್ಹಾಕಾ ತುಂ ಸೊಡೂನ್ ಗೆಲೆಂ

ಪೂಣ್ ಹಾಂವ್ ಆಜೂನಯ್ ಪಳಯ್ತಾಂ

ವಾಟ್ ತುಜಿ ಆನಿ ಹಾಂವೆಂ ದಿಲ್ಲ್ಯಾ

ತ್ಯಾ ದೊನ್ ದೊಳ್ಯಾಂಚಿ.

- ಅವಿನಾಶ್ ಕುಂಕಳಕಾರ್. [ಎಪ್ರಿಲ್, 2020]