अतिवास्तव दैवगती [शैलेंद्र मेहता]

कांय तेंपाथावन कवितेचें आमाल सेवंक अत्रेगोन आसलों हांव ही कविता वाचून वाचून कांय कवितेचो बेब्दोच कसो दिसलों. कितें संवार ह्या कवितेंत लिपल्यात आनी येदोळ पासोन ह्या कवीक हांव कोंकणी कविंच्या मेळिंत कित्याक पळेवंक सकलोंना म्हळ्ळें लाचार‌पणाचें चिंतप मतिंत घुसलें, पूण आतां तर‌यी हो कवी आनी ह्या कविच्या कवितेंक पार्कुंक तशेंच शिकुंक आवकास लाभलो म्हळ्ळो संतोस‌यी जालो.

कांय चाळीस वर्सां थावन मराठी तशेंच कोंकणिंत कविता बरवन आयिल्लो बाब शयलेंद्र मेहता, पारंपरीक कविता न्हय बगार आधुनीक कविता बरयतेल्यांच्या पंग्तेर आसा. अमूर्त संकेत (Abstract images) अपल्या कवितेंनी गुंतून उत्रांतल्या अर्थांच्या गर्भांनी तीं लिपंवची श्याथी आसचो ताक्तेवंत कवी म्हणच्याक ताचो आयलेवार पर्गट जाल्लो कविताजमो ’सिसिफस तेंग‌शेर’ गवाय. बाकिचें मापुंक तुकाच सोडतां.

[कविता] अतिवास्तव दैवगती [शैलेंद्र मेहता]

अतिवास्तव दैवगती

वंटी निर्माण जांवचेंआदीं

मळब मेकळें

कुपां विरयत

इंद्रधोणूचे कुडीसुवाळे

सजयत आपल्या आंगणात

आपोवणे धाडीत

वसंतरानांतल्या शेवण्यांक

पाशाण युगासावन

वंटी उब्यो जातकच

वारें आडावलें

सुरु जाले

आपापल्या खळ्यांतले

दशावतारांचे काले

आयलो सांवार

घुस्पले समेस्त

मिथक आनी फिक्शन

हांच्या उटंगारांत

नाचयत खेळयत

धालो- फुगडयो -शिगमो

आनी उपरांत

जीणेची धुळवड करीत

स्मृतिभ्रंशाच्या दुयेंसान

घाल्यो आड

तरण्यो कुडी

लोड शेडींग च्या निमतान बांदिल्ल्या

काळखाच्या बल्कांवांचेर

उगडासाची फस्कां पेटवपी

कुड्डया - भेड्डया -शक्तिहीन

म्हाताऱ्याकोताऱ्या

दधीचिंची हाडां

मारीत रावलीं करंदायो

पूण इतिहास विसरून गेल्ल्या

कुसांकिडींक उरलीना आस

फुलपाकुल्याच्या मुक्त उड्डाणाची

काळख्या कुपांची

चित्रविचित्र पायंजेलां

बांदून घालून

चकचकते फ्रेमिंत

मळब आयलें दाटून

स्वयंप्रकाशित काजूले

आनी सूर्य चंद्र नखेत्रां लेगीत

घुंवले - लिपले सोदित

कालचो काळ

कालचे दिस

कालचे खीण

फ्रेमीच्या उजवाडांत

- शैलेंद्र मेहता [मार्च, २०१९]

शैलेंद्र मेहता: कांय चाळीस वर्सां थावन मराठी तशेंच कोंकणिंत कविता बरवन आयिल्लो बाब शयलेंद्र मेहता, पारंपरीक कविता न्हय बगार आधुनीक कविता बरयतेल्यांच्या पंग्तेर आसा. अमूर्त संकेत (Abstract images) अपल्या कवितेंनी गुंतून उत्रांतल्या अर्थांच्या गर्भांनी तीं लिपंवची श्याथी आसचो ताक्तेवंत कवी. ताचो कविताजमो ’सिसिफस तेंग‌शेर’ आयलेवार पर्गट जाल्लो जावनासा.