सोरोप [परेश नरेंद्र कामत ]

जेदनां मनश्याच्या मनांत अंधकार भरोन आसता, तेदनां ताच्यान दोळ्यांनी पळंवच्या वा कानांनी आयकुंच्यांत फरक दिसाना. सर्व एक दिसता. सर्व एक समजता. आनी हेच्च उणे समजणेंत मनीस फयसल करता. हेरांक मापुंक वेता. हो अग्यान, ही ना-समजणी वा मतिंतलो अंधकार एकाथराचो परदो दोळ्यांचेर घालताना सगळो संसार ताका एक सारको दिसता.

ही कविता थोडेच उतरांनी हरेक मनशाच्या असकत चिंत्पाचेर अर्सो धरता. बाब परेश नरेंद्र कामत आयलेवार साहीक अकाडेमी पुरसकार जोडपी युवकवी. कोंकणी कवितेंक देशाच्या हेर प्रांतीय भासेंनी व्हर्ची श्याथी हाच्या कवितेंनी आसा. आनी ही कविता ताची अपुर्भायेची गवाय दिता.

[कविता] सोरोप [परेश नरेंद्र कामत ]

सोरोप

सळसळटा वोत तणांत सोरपा सारकें

सळसळटा तण वोतांत सोरपा सारकें

सळसळटा सोरोप तणांत वोता सारको

हळडुवो

अध्भूत हें हळडुवेंचार

तणांतलें

भर वोतांत

सळसळत रावता म्हज्यांत

सोरपा वरी

फणॊ उबारून

- परेश नरेंद्र कामत [जनेर, २०१९]

परेश नरेंद्र कामत:  'अलंग', 'गर्भाखोळ', 'शुभांकर', 'चित्रलिपी', आनी ’रंगबोली’ म्हळ्ळे पांच कविताजमे पर्गट जाल्यात. ’चित्रलिपी’ बुकाक साहीत अकाडेमिचो पुरसकार, कोंकणी भाशा मंडळ पुरसकार, बी.बी.बोर्कर स्मारक पुरसकार, कला अकाडेमी साहित्य पुरसकार, जनगंगा साहित्य पुरसकार, गोवा कोंकणी अकाडेमी साहित्य पुरसकार आनी गोयां सर्कारा थावन यूव सृजन पुरसकार लाभल्यात. हाच्यो कविता हिंदी, गुजराती, सिंधी, मराठी, पंजबी, तेलुगू आनी इगलीश भासेंनी अनुवादीत जाल्यात.