सर्विसींग [ जोस्मिता फेर्नांडीस ]

आयचो काळ मोडर्न काळ. देकून कानाचे कानपे काडचे थावन पांयांच्यो नाक्ष्यो सोभवंक सयत अपल्या घराच बोसोन फकत मोबायलाचेर तें काम कर्तेल्यांक आपव्येत. तकलेचें मसाज जांव, आंगाचें मसाज जांव हरेक थराची सेवा आज‌काल लाभता. पूण ह्या कृतक जिवितांत सयत मनशाक मोग म्हळ्ळो अजून सहज प्रक्रिया देकून मनशाक मोग सहज रितीन जावंक जाय म्हळ्ळें चिंताप अपुर्भायेन उभजांवची कविता घेवन आयल्या बाय जोस्मिता फेर्नांडीस.

एम.ए. पद्युत्तराचें शिकप जोडून गोयांत शिकंवची ही कोंकणी काऱ्यांनी सक्रीय. सोंपे विचार पूण मनशापणाक लग्ती जाल्ले देकून हिची कविता सोंपी म्हणचेपरीं ना. आतां ह्या कवितेची सोभाय चाकुंक तुकाच सोडतां

[कविता] सर्विसींग [ जोस्मिता फेर्नांडीस ]

सर्विसींग

लग्ना पयली जावं

लग्ना उपरांत जावं

मोगाचें सर्विसींग करून घेवचेच पडटा

मोगाक तान लागता...

भूक लागता...

तिका पेट्रोल-डिजल-ऑय्ल घालून

चलोवचेच पडटा

मोगाक थंडी जाता...

जोर येता...

ही थंडी, हो जोर

‘हाय टायड’ जावन

तकलेर चडटच

मोगाक, दोतोरागेर व्हरचे पडना

‘मूड’ सारको करून घेवक

‘डॅटीक’ व्हरचे पडटा

लग्ना आदी, व्हकले-न्हऱ्याची

मोग्यांची...

लग्ना उपरांत

घोव-बायलेची...

केस्तावां सोडोवंक,

रागावल्यार- दुखवल्यार

झगडल्यार- रडल्यार

बेजारल्यार...

अशी कितलीशीच सर्विसींगां

लग्ना पयली आसूं

लग्ना उपरांत आसूं

हेच मोगाच्या तुफानाक

ऑफलायन आशिल्ले ऑनलायन हाडूक

केन्ना-केन्ना ऑफलायन वचपी मोगाक

ऑनलायन हाडचेच पडटा

मोगाचो स्र्कू टायट करुंक,

‘शौरुमांत’ व्हरचें पडटा

मोगाचें सर्विसींग करूंन घेवचेच पडटा

मोगाक तान लागता...

भूक लागता...

तिका पेट्रोल-डिजल-ऑय्ल घालून

चलोवचेच पडटा

मोगाक सर्विसींग जायच आसता.

- जोस्मिता फेर्नांडीस [मार्च, २०१९]

जोस्मिता फेर्नांडीस: एम.ए. पद्युत्तर शिकप जोडून गोयांत शिकंवची ही कविता, लेखनां तशेंच काणियो बरयता. राश्ट्रीय काऱ्यासाळांनी प्रबंध सादर केल्यात. सभार बर्पां पर्गटल्यांत, कविगोश्टिंनी वांटो घेतला. गोंयांत कोंकणी काऱ्यांनी सक्रीय रितीन वांटो घेता.