ಮಾರ್ಚ್ 8

ದೆವಾನ್ ಮನ್ಶ್ಯಾಕ್ ರಚ್ಲೊ ಆನಿ ದಿಸಾಂಕ್ ಮಾತ್ರ್ ರಚ್ಲೊ. ಪುಣ್ ಮನ್ಶ್ಯಾನ್ ಬಜಾರ್ ಉಭೊ ಕೆಲೊ ಆನಿ ಹ್ಯಾ ಬಜಾರಾಂತ್ ಮನ್ಶಾ ಸಂಬಂಧಾಂಚೊ ಗೋಳ್ ಕೆಲೊ. ದೆಕುನ್ ಆವಯಾಂಕ್ ಏಕ್ ದೀಸ್, ಬಾಪಯಾಂಕ್ ಅನ್ಯೇಕ್ ದೀಸ್, ಮೋಗ್ ಕರ್ಣಾರಾಂಕ್ ಏಕ್ ದೀಸ್, ಮೆಲ್ಲ್ಯಾಂಕ್ ಅನ್ಯೇಕ್ ದೀಸ್. ಪುಣ್ ಹಾಂಗಾಸರ್ ಜಿವಂತ್ ಆಸೊನ್ ಮೊರೊನ್ ಗೆಲ್ಲ್ಯಾ ಚಿಂತ್ಪಾಚ್ಯಾಂಕ್ ಮನ್ಶಾ ಸಂಬಂಧಾಕ್ ದಿಸಾಕ್ ರಾಕೊನ್ ರಾಂವ್ಚಿ ಗರ್ಜ್ ಆಸಾಗಿ ಮ್ಹಳ್ಳೆಂ ವಿಡಂಬನಾತ್ಮಕ್ ಸವಾಲ್ ಕರ್ತಾ ಬಾಯ್ ವಸುಧಾ ಪ್ರಭು.

ಮಾರ್ಚ್ 8 ತಾರಿಕ್ ಅಂತರ್‌ರಾಶ್ಟ್ರೀಯ್ ಸ್ತ್ರೀಯಾಂಚೊ ದಿವಸ್. ಪುಣ್ ಆಮ್ಚ್ಯಾ ದೇಶಾಂತ್, ಆಮ್ಚೆ ಸಮಾಜೆಂತ್ ಆಮ್ಚ್ಯಾ ಸ್ತ್ರೀಯಾಂಕ್ ಕಿತ್ಲೊ ಮಾನ್ ಲಾಭ್ತಾ ಮ್ಹಳ್ಳೆಂ ಸವಾಲ್ ಆಮಿ ಕರ್ಚಿ ಭೋವ್ ಚಡ್ ಗರ್ಜ್ ಆಸಾ. ’ಘರಾಚೊ ದಿವೊ’ ಜಾವ್ನಾಸ್ಚಿ ಏಕ್ ಸ್ತ್ರೀ ಖಂಡಿತ್ ಜಾವ್ನ್ ಬುಕಾಂನಿ ವಾ ಕ್ಯಾಲೆಂಡರಾಂನಿ ಸೊಭ್ಚಿ ವಸ್ತ್ ನ್ಹಯ್ ಬಗರ್ ಕಾಳ್ಜಾಂತ್ ರಾಜ್ ಕರ್ಚೆತಸ್ಲಿ ಮ್ಹಳ್ಳೆಂ ಚಿಂತಪ್ ಹ್ಯೇ ಕವಿತೆಂಕ್ ಉಟೊನ್ ದಿಸ್ಚೆಂ ತುಮಿಂಚ್ ಪಾರ್ಕಿಯಾತ್.

ಮಾರ್ಚ್ 8

ಹಾಂವ ಮ್ಹಣ್ತಾ, ಮಾರ್ಚ್ 8 ಚ್ ಕಿತ್ಯಾಕ್

ವರ್ಸಾ ಸಗ್ಳೆ ದೀಸ್ ಜಾವ್ಕಾ ಸ್ತ್ರೀ ಯಾಂಕ್

ಜನ್ಮಾ ಎತ್ತನಾಚಿ ಚೇಡು ಜಲ್ಲೆ ಮ್ಹೋಣು

ಕರ್ತಾತ್ ತಿರಸ್ಕಾರ್

ಸಗ್ಳೇ ವಿಷಯಾಂತು ಘರತೂಚಿ ಜತ್ತಾ ತಾತ್ಸಾರ್

ಸಾನ್ ಪ್ರಾಯೇರೀಚಿ ದಾಕ್ಲೇ ಭಾವಂಡಾಲಿ

ಜತ್ತಾ ತೀ ಆವಯಿ

ತಾಂಕಾ ಹಾಂಡೀರ್ ಧೋರ್ನು ಭೊವಂಡಾಯಿತಾ ಸದಯಿ

ಭೂಕ ಲಾಗ್ಲಿ ಕೀ ತಾಂಕಾ ಮೋಗಾರಿ ಘಾಸು ಭರೈತಾ

ಅಪಲೆ ಆವಯಿಕ ಮದತ್ ಮ್ಹೋಣ್

ಸಗ್ಳೇ ಘರಾ ಕಾಮಯಿ ಕರ್ತಾ

ಬೆಗ್ಗಿ ತಿಜೆ ಲಗ್ನ ಕೋರ್ನು ಬಾಮ್ಣಾ ಘರಾ ಪೆಟಯಿತಾತಿ

ಥಯಿ ವರೆ ಸಗ್ಳೇಲ್ ಸೇವಾ ಕೋರ್ನು,

ಘರ್ ದಾರ್ ಮ್ಹೋಣು ತಾತುಚಿ ಆನಂದ ಪಾವ್ತಾ ತೀ

ಸಕಾಳಿ ಧೋರ್ನು ಕಾಮಾಂತು ಅಸುನ್ ಸಕಡಾ ಜಾಯಿ ತಶಿ

ತೀ ಚೋಲ್ನು ತೀ ಜತ್ತಾ ಸಗ್ಳೇಲ್ ಹಾತ್ತಾ ಖೇಳಣೀ

ಕಳತ್ ನ ಕಳತ್ ಜಾತ್ತಾ ಮುಲ್ಲೆ ಅಶ್ಚಿ ಮಿಟ್ಟಾಚಿ ಭರಣಿ

ಆಯುಷ್ಯ ಭರಿ ಅಪ್ಣೇಲೋ ಸಂಸಾರು ಸಂಭಾಳತ್ ಅಸ್ತಾ

ಅಪ್ಣೇಲೊ ಸಂಸಾರು ಸುಖಾರಿ ದವರಿ ಮ್ಹೋಣು ದೇವಾಲೆ ಮಾಗ್ತ ಅಸ್ತ

ಕಷ್ಟ ಕಾಲಾರಿ ಸಗ್ಳೇಲೆ ಫಾಟಿಬಲಾಕ ತೀ ರಬ್ತಾ

ಕೊಣಾಲ್ಕೀ ಬಾಯಿಲ್, ಭೈಣಿ,ಆವಯಿ,ನಣಂದ, ಭಾವಜ ತೀ ಜತ್ತಾ

ಕಡೆ ಶ್ವಾಸಾ ಪರ್ಯಂತ್ ಸಕ್ಕಡ ಸಂಬಂದು ಜಪ್ತ ಅಸ್ತಾ

ಅಶ್ಶೀ ಪ್ರತೀ ಎಕ್ಲೇಲ್ ಜೀವನಾಂತು ತಿಗೆಲೋ

ವಾಂಟೋ ಹೋಡು

ಜಾಲ್ಯಾರಿಯಿ ಕಿತ್ಯಾಕ್ ನಾಂಕ ತಿರ್ಪಿತಾತ್

ಜಲ್ಲೆ ಮ್ಹೋಣು ಚೇಡು,,,,

- ವಸುಧಾ ಪ್ರಭು [ಮಾರ್ಚ್ 2018]

ವಸುಧಾ ಪ್ರಭು: ನಾಮ್ಣೆಚಿ ಅಭಿನೇತ್ರಿ, ಬರವ್ಪಿಣ್. ಕಾನಡಿ ಭಾಸೆಂತ್ ಮಾತ್ರ್ ನ್ಹಯ್ ಕೊಂಕ್ಣೆಂತ್ ಸಯ್ತ್ ಕವಿತಾ ಬರಂವ್ಚಿ ಹಿ ಮುಂಬಯಾಂತ್ ನಾಮ್ಣೆಚಿ. ನಾಟಕ್, ಫಿಲ್ಮಾಂನಿ ನಟನ್ ಕೆಲ್ಲಿ ಹಿ ಸಮಾಜಿಕ್ ವಿಡಂಬನಾಂಚೆರ್ ಕವಿತಾ ಬರಯ್ತಾ ದೆಕುನ್ ಕವಿಗೋಶ್ಟಿಂನಿ ಹಿಚ್ಯಾ ಕವಿತೆಂಕ್ ಲೋಕ್ ಖೂಬ್ ಖಯ್ಸ್ ಕರ್ತಾ. ಹಿಚೊ ಪಯ್ಲೊ ಕವಿತಾಜಮೊ ’ಬಾಯಿಲ ಬಮ್ಮುಣು’ ವೆಗಿಂಚ್ ಪರ್ಗಟ್ ಜಾಂವ್ಚ್ಯಾರ್ ಆಸಾ.