ಸಂಜೀವ್ ಬಾಬ್ ವೆರೆಂಕಾರ್ ಸ್ಮಾರಕ್ ಮಯ್ನ್ಯಾಚಿ ಕವಿತಾ

ಕವಿ ಆನಿ ಹಕ್ಕ್-ಮಾನ್ - 8.

ಸಂಜೀವ್ ಬಾಬ್ ವೆರೆಂಕಾರ್ ಸ್ಮಾರಕ್ ಮಯ್ನ್ಯಾಚಿ ಕವಿತಾ

ಲ್ಹಾರಾಂ ಆನಿ ದರ್ಯಾಚೊ ಖೆಳ್ ಹೊ ಎಕ್ ಮನ್ಭುಲೊವಪಿ ಆನಿ ಸದಾಂಚ್ ಬದ್ಲಪಿ ದೆಖಾವೊ. ಇತಿಹಾಸ್ ಕಾಳಾಸಾವನ್ ಕವೀಂಕ್, ಕಲಾಕಾರಾಂಕ್ ಆನಿ ಲೆಖ್ಕಾಂಕ್ ತಾತೂಂತ್ಲ್ಯಾನ್ ಪ್ರೆರ್ಣಾ ಮೆಳ್ಳ್ಯಾ. ಲ್ಹಾರಾಂಚಿ ಲಯ್‌ಬದ್ದ್ ಗತಿ, ಘಸ್ಸ್ ಕರೂನ್ ಫೆಣೆರ್ ಕಾಡೀತ್ ಯೆವ್ಪಿ ಆವಾಜ್ ಆನಿ ದರ್ಯಾಚೊ ವ್ಹಡ್ ವಿಸ್ತಾರ್ ಹಾಂಚೊ ಜಾಯ್ತ್ಯಾ ಜಾಣಾಂಚೆರ್ ಪರಿಣಾಮ್ ಜಾತಾ.

ಹ್ಯಾ ಮ್ಹಯ್ನ್ಯಾಚೊ ಕವಿ ಹಕ್ಕ್ ಆನಿ ಮಾನ್ ಮೆಳೊವ್ಪಿ 'ದರ್ಯಾ ಲ್ಹಾರ್' ಹಿ ಕವಿತಾ ದರ್ಯಾ, ದರ್ಯಾದೆಗ್ ಆನಿ ಲ್ಹಾರಾಂ ಹ್ಯೊ ಪ್ರತಿಮಾ ವಾಪ್ರೂನ್ ಎಕ್ ಕೊಲಾಜ್ ನಿರ್ಮಾಣ್ ಕರ್ತಾ ಆನಿ ತಾತೂಂತ್ಲ್ಯಾನ್ ವೆಗ್ವೆಗಳೆ ಸಂದೆಶ್ ದಿತಾ.

ಎಕ್ಸುರಿ ದರ್ಯಾದೆಗ್, ಆಪ್ಲೆ ಭೊಂವ್ತಣಿ ಘಡ್ಪಿ ಘಡ್ಣುಕಾಂಕಡೆನ್ ಅಲಿಪ್ತ್ ನದ್ರೆನ್ ಪಳಯ್ತಾ. ದಿಸ್ಭರ್ ತಿ ವಾತಾಕಡಾರ್ ತಾಪ್ತಾ. ತಿಕಾ ಸಾಂಜೆವೆಳಾರ್ ಪಾಸ್ಯೆಕ್ ಆಯಿಲ್ಲೆ ಗರ್ದೆಚೊ ವಾಜ್ ಯೆತಾ, ರೆವೆಂತ್ ಖೆಳ್ಪಿ ಭುರ್ಗ್ಯಾಂಚೆಂಯ್ ತಿಕಾ ಅಪ್ರೂಪ್ ದಿಸ್ನಾ. ಆಪ್ಲ್ಯಾ ಎಕ್ಸೂರಪಣಾಚಿ ಖಂತ್ ಮನಾಂತ್ ದವ್ರೂನ್ ಭಿತರ್ಲ್ಯಾ ಭಿತರ್ ತಿಚೊ ಘುಸ್ಮಟ್ ಜಾತಾ.

ಲ್ಹಾರಾಂ ಲಯ್‌ಬದ್ದ್ ನಾಚಾಂತ್ ಹಾಲ್ತಾತ್. ತಿಂ ಮನ್ಭುಲೊವಪಿ ತಾಲ್ ಘೆವ್ನ್ ವಯ್ರ್ ಸರ್ತಾತ್ ಆನಿ ದೆಂವ್ತಾತ್. ತಾಂಚೊ ಉತಾರ್-ಚಡಾವ್ ಆನಿ ಪ್ರವಾಹ್ ಎಕ್ ಸೈಮೀಕ್ ಸಮ್ರಸತಾಯ್ ನಿರ್ಮಾಣ್ ಕರ್ತಾ ಜೊ ಶಾಂತ್ ಕರ್ಪಿ ಆನಿ ಉರ್ಬಾ ದಿವ್ಪಿ ಅಶೆ ದೊನೂಯ್ ಭಾವ್ ಮನಾಂತ್ ಜಾಗಯ್ತಾ.

ದೆಗೆರ್ ಉಬೊ ರಾವೂನ್ ದರ್ಯಾ ಭಿತರ್ ಬುಡೂನ್ ವಚ್ಪಿ ಧಾರೆಚೆರ್ ನದರ್ ಮಾರ್ತಕಚ್ ಉದ್ಕಾಚ್ಯಾ ವ್ಹಡ್ ವಿಸ್ತಾರಾಕ್ ಲಾಗೂನ್ ಭಂಯ್ ಆನಿ ಅಜಾಪಾಚಿ ಭಾವ್ನಾ ನಿರ್ಮಾಣ್ ಜಾವಂಕ್ ಸಕ್ತಾ, ಜಾಕಾ ಲಾಗೂನ್ ದರ್ಯಾಚ್ಯಾ ವ್ಹಡ್ಪಣಾಚ್ಯಾ ತುಳೆಂತ್ ವ್ಯಕ್ತೀಂಕ್ ಆಪೂಣ್ ಲ್ಹಾನ್ ಅಶೆಂ ದಿಸ್ತಾ. ದರ್ಯಾ, ತಾಚಿಂ ಬಳಿಶ್ಟ್ ಲ್ಹಾರಾಂ ಆನಿ ಅದ್ಮಾಸಾಕ್ ಯೆವಂಕ್ ಶಕ್ನಾ ಅಸೊ ಸ್ವಭಾವ್, ಹಾಂಕಾಂ ಲಾಗೂನ್ ಭವ್ಯ್ ಆನಿ ಬೆಭ್ರಂವಶಾಚೊ ಅಶಾ ದೊನೂಯ್ ಪ್ರಕಾರ್ಚ್ಯಾ ಶಕ್ತೀಚೆಂ ಪ್ರತೀಕ್. ವಾದ್ಳಿ ದರ್ಯಾಂತ್ ಗೊಂದಳ್ ಜಾತಾ, ಜಾಲ್ಯಾರ್ ಶಾಂತ್ ದರ್ಯಾ ಗೂಢ್ ಭಾವ್ನಾ ನಿರ್ಮಾಣ್ ಕರ್ತಾ. ದರ್ಯಾದೆಗೆರ್ ಲ್ಹಾರಾಂಚೊ ಖೆಳ್, ಪಾಂಯಾಂಚ್ಯಾ ಸಕಯ್ಲ್ ರೆಂವೆಚಿ ಸಂವೆದನಾ, ವಾರ್ಯಾನ್ ಯೆವ್ಪಿ ಖಾರೊ ವಾಸ್ ಆನಿ ಉದ್ಕಾಚೆ ಬದ್ಲಪಿ ರಂಗ್ ಪಳೊವ್ನ್ ಎಕ್ ಗಿರೆಸ್ತ್ ಸಂವೆದಿ ಅಣ್ಭವ್ ನಿರ್ಮಾಣ್ ಜಾತಾ.

ತೆಭಾಯ್ರ್ ಲ್ಹಾರಾಂಚಿ ಸತತ್ ಗತಿ ಬದ್ಲಾಚಿ ಅಪ್ರಿಹಾರ್ಯತಾಯ್ ಎಕ್ ರೂಪಕ್ ಮ್ಹೂಣ್ ಕಾಮ್ ಕರ್ತಾ. ಲ್ಹಾರಾಂ ಕಾಳಾಚೊ ಪ್ರವಾಸ್, ಜಿಣೆಚೊ ಚಕ್ರೀಯ್ ಸ್ವಭಾವ್ ಆನಿ ಸಂವ್ಸಾರಾಚಿ ಸಾಸ್ಣಾಚಿ ಹಾಲ್ಚಾಲ್ ದಾಖಯ್ತಾತ್. ಕಲಾಕಾರ್ ಆನಿ ಲೆಖಕ್ ಚಡ್ ಕರೂನ್ ಪ್ರೆರ್ಣಾ ಮೆಳೊವ್ಪಾ ಖಾತೀರ್ ದರ್ಯಾ ಕಡೆನ್ ವತಾತ್. ಲ್ಹಾರಾಂಚೊ ಖೆಳ್ ಆನಂದ್ ಆನಿ ಉಲ್ಲಾಸ್ ತೆ ವಿಶಾದ್ ಆನಿ ಆತ್ಮನಿರೀಕ್ಷಣಅಶಾ ವಿಂಗಡ್ ವಿಂಗಡ್ ಭಾವ್ನಾಂಚಿ ಭರ್ಸಣ್ ಕರೂಂಕ್ ಸಕ್ತಾ ಆನಿ ತೆವೆರವಿಂ ಸೃಜನಶೀಲ್ ಪ್ರೆರ್ಣೆಚೊ ಎಕ್ ಗಿರೆಸ್ತ್ ಸ್ರೊತ್ ಮೆಳ್ಟಾ.

ಪೂಣ್ ಕವಿ ಹಾಂಗಾ ದರ್ಯಾಚ್ಯಾ ಲ್ಹಾರಾಂಚೆರ್ ನಿಯಂತ್ರಣ್ ದವ್ರಪಾಚೆ ಪ್ರತಿಮೆಚೊ ವಾಪರ್ ಕರೂನ್ ವೆಗ್ಳೆಂ ಕಿತೆಂತರಿ ಸುಚಯ್ತಾ. ಜಮ್ನೀಚೊ ಆನಿ ದರ್ಯಾಚೊ ಮೆಳ್ಪಾಚೊ ಬಿಂದು ಹೊ ಎಕ್ ಗತಿಶೀಲ್ ಸಂವಾದ್ ಜಂಯ್ ದೊನ್ ಸಂವ್ಸಾರ್ ಎಕ್ಮೆಕಾಂಕ್ ಆಪ್ಟತಾತ್. ಲ್ಹಾರ್ ಆನಿ ದರ್ಯಾದೆಗ್ ಹಾಂಚೆಮದಲೊ ಮೊಗ್ ಆನಿ ತ್ಯಾ ಮೊಗಾಚೆ ಭಾವ್ನೆಕ್ ಆಡ್ಮೆಳೆಂ ಹಾಡ್ಪಿ ದರ್ಯಾ ಅಸೊ ಎಕ್ ತ್ರಿಕೊಣ್ ಕವಿ ಸಾದರ್ ಕರ್ತಾ. ಕೊಣಾಚೆರುಯ್ ನಿಯಂತ್ರಣ್ ದವ್ರಪಾಚಿ ವಾ ತಾಚೆರ್ ವರ್ಚಸ್ವ್ ಗಾಜೊವ್ಪಾಚಿ ಖರ್ ಇತ್ಸಾ, ಚಡ್ ಕರೂನ್ ಮಾಲ್ಕೀಚಿ ಭಾವ್ನಾ, ಹಾತೂಂತ್ಲ್ಯಾನ್ ಮತ್ಸರ್ ಪ್ರಗಟ್ ಜಾವಂಕ್ ಸಕ್ತಾ. ಕಾಂಯ್ ಪ್ರಮಾಣಾಂತ್ ಆಸ್ಕ್ತಿ ಆನಿ ಸಂರ್ಕ್ಷಣ್ ಸಾಮಾನ್ಯ್ ಆಸ್ಲೆಂ ತರಿ ಚಡ್ ನಿಯಂತ್ರಣಾಂಚೊ ಸಂಬಂದೀತ್ ವ್ಯಕ್ತೀಂಚೆರ್ ವಾಯ್ಟ್ ಪರಿಣಾಮ್ ಜಾವಂಕ್ ಸಕ್ತಾ. ರೊಮಂಟಿಕ್ ಸಂಬಂದಾಂತ್ ವಾಗ್ಣೂಕ್ ನಿಯಂತ್ರೀತ್ ಕರಪ್, ಮತ್ಸರ್ ಆನಿ ಜೊಡೀದಾರಾಕ್ ಸುವಾತ್ ವಾ ಸ್ವಾತಂತ್ರ್ಯ್ ದಿವ್ಪಾಕ್ ಆಡ್ಖಳ್ ಹಾಡಪ್ ಹಾತೂಂತ್ಲ್ಯಾನ್ ಅಸುರ್ಕ್ಷೀತತಾಯೆಚಿ ಭಾವ್ನಾ, ಲುಕ್ಸಾಣಾಚಿ ಭಿರಾಂತ್ ವಾ ಸ್ವತಾಚೆರ್ ವಾ ನಾತ್ಯಾಚೆರ್ ವಿಸ್ವಾಸ್ ನಾ ಜಾತಾ.

ದುಸ್ರ್ಯಾಚ್ಯಾ ನಿಯಂತ್ರಣಾಂತ್ ಆಶಿಲ್ಲ್ಯಾಕ್ ವೈಯ್ಕ್ತೀಕ್ ಸ್ವಾತಂತ್ರ್ಯ್ ಆನಿ ವ್ಯಕ್ತೀಮ್ತ್ವ್ ನಾ ಜಾವ್ಪಾಚಿ ಭಿರಾಂತ್ ಆಸ್ತಾ. ಪರಿಪೂರ್ಣತಾಯೆಚಿ ಖರ್ ಪ್ರೆರ್ಣಾ ಆಶಿಲ್ಲೆ ಉಂಚೆಲ್ಯಾ ಪಾಂವ್ಡ್ಯಾಕ್ ಪಾವ್ನಾ ಜಾಲ್ಯಾರ್ ನಿರಾಶ್ ವಾ ಅಸ್ವಸ್ಥ್ ಜಾವಂಕ್ ಸಕ್ತಾತ್. ಹೆ ಕವಿತೆಂತ್ ಲ್ಹಾರಾಚಿ ಆವ್ತಿಕಾಯ್ ಅಶೀಚ್ ಆಸಾ. ದರ್ಯಾ ಆನಿ ದೆಗ್ ಹಾಂಚೆಮದಲೆ ಸರ್ತೀಂತ್ ಲ್ಹಾರ್ ಬಳಿ ಜಾತಾ ಅಶೆಂ ಸುಚೊವ್ಪಿ ಹಿ ಕವಿತಾ ಮನ್ಶಾಚ್ಯಾ ಜೀವಿತಾಕಡೆನ್ ಬರೆಂಚ್ ಸಾರ್ಕೆಪಣ್ ದಾಖಯ್ತಾ. ದರ್ಯಾ, ಲ್ಹಾರ್ ಆನಿ ದರ್ಯಾದೆಗ್ ಹಿ ಪ್ರತೀಕಾಂ ಆಮ್ಚ್ಯಾ ಜೀವಿತಾಂತ್ಲ್ಯಾ ದೆಖೀಂಭಿತರ್ ಅಣ್ಭವೂಂಕ್ ಮೆಳ್ಟಾತ್. ಹ್ಯಾಚ್ ಪ್ರತೀಕಾಂಚ್ಯಾ ಆದಾರಾನ್ ಆಮಿ ಸರ್ಭೊಂವತಣ್ಚ್ಯಾ ಮನ್ಶಾಂಕ್ ಆನಿ ತಾಂಚ್ಯಾ ದಿಸಪ್ಟ್ಟ್ಯಾ ವೆವ್ಹಾರಾಕ್ ಪಳಯ್ತ್ ಜಾಲ್ಯಾರ್ ಆಮ್ಕಾಂ ಕವಿತೆಂತ್ ವ್ಯಕ್ತ್ ಜಾಲ್ಲ್ಯಾ ಭಾವ್ನಾಂಚಿ ಆನಿ ತಾತ್ಪರ್ಯಾಂಚಿ ಪ್ರಚೀತಿ ಯೆವಂಕ್ ಸಕ್ತಾ.

ಕವಿತೆಂತ್ ಲ್ಹಾರ್ ಪಿಡೆಸ್ತ್ ದಿಸ್ಲೆಂ ತರಿ ಆಮ್ಚೆ ಚಿಂತೆಚೆ ಬಳಿ ಸ್ವತಾ ಆಮೀಚ್ ಅಶೆಂ ಹೆ ಕವಿತೆಂತ್ಲ್ಯಾನ್ ಜಾಣವ್ಲ್ಯಾ ಬಗರ್ ರಾವ್ನಾ. ಹಿ ಚಿಂತಾ ಮ್ಹಳ್ಯಾರ್ ಆಮ್ಚ್ಯಾ ಸ್ವತಾಚ್ಯಾ ವಿಚಾರಾಂಚೆಂ, ಧಾರ್ಣಾಚೆಂ ಆನಿ ವೆಗ್ವೆಗ್ಳ್ಯಾ ಪರಿಸ್ಥಿತೀಂಚೆರ್ ಜಾವ್ಪಿ ಪ್ರತಿಕ್ರಿಯಾಚೆಂ ಉತ್ಪಾದನ್ ಅಶಿ ಕಲ್ಪನಾ ಕವಿತಾ ಕರ್ತಾ. ಚಿಂತಾ ಹೊ ಮನ್ಶಾಚೊ ಎಕ್ ಅಣ್ಭವ್ ಆಸೂನ್, ತಾಣ್, ಅನಿಶ್ಚಿತತಾಯ್, ಅಜ್ಞಾತಾಚೊ ಭಂಯ್ ವಾ ಫಾಟ್ಲ್ಯಾ ಕಾಳಾಂತಲೆ ಆಘಾತಕಾರಕ್ ಅಣ್ಭವ್ ಅಶಾ ವಿಂಗಡ್ ವಿಂಗಡ್ ಘಟ್ಕಾಂಕ್ ಲಾಗೂನ್ ತಿ ಜಾವಂಕ್ ಸಕ್ತಾ.

[ಕವಿತಾ] ದರ್ಯಾ ಲ್ಹಾರ್ (ಸಲೊಮಿ ಮಿಯಾಪದವ್, ಮೊಗರ್ನಾಡ್)

ದರ್ಯಾ ಲ್ಹಾರ್

ಎಕ್ಸುರ್ಯಾ ತಡಿಕ್

ಸಾಂಜೆಚೆಂ ಮಾತ್ರ್ ಭರೊನ್

ವೊಮ್ತುಂಚ್ಯಾ

ಲೊಕಾಂಕ್ ಪಳೆವ್ನ್

ಕಾಂಟಾಳೊ ಯೆತಾಲೊ!

ಅಪುಣ್ ಖರ್ಕಟ್ಯಾ ವೊತಾಕ್

ಭಾಜ್ಲ್ಯಾರೀ

ಮನ್ಶಾಂಕ್ ಮಾತ್ರ್

ಸಾವ್ಳೆಂತ್ ಖೆಳೊಂಕ್ ಜಾಯ್!

ರೆಂವೆರ್ ಮಜಾ ಮಾರುಂಕ್ ಜಾಯ್!

ತಾಣಿಂ ತಿಚೆರ್ ಘಾಲ್ಚ್ಯಾ ಉಡ್ಕಾಣಾಂ

ಆನಿ ಆಪ್ಲಿ ರೆಂವ್ ಉಸ್ತುನ್ ಖೆಳ್ತಾನಾ

ಸೊಸಾನಾತ್ಲಿ ದೂಕ್ ಭೊಗ್ತಾಲಿ!

ದರ್ಯೊಯ್ ಭಾರಿಚ್ ಶಾಣೊ

ಲ್ಹಾರಾಂಕ್ ಕಾಂಯ್

ಇತ್ಲೆಂ ಪಯ್ಸ್ ಧಾಡಿನಾತ್ಲೊ!

ತರೀ ಏಕ್ ಲ್ಹಾರ್ ಮಾತ್ರ್

ಅಪ್ರೂಪ್ ಯೆವುನ್

ಸಾರ್ಕೆಂ ಕರ್ತಾಲೆಂ

ತಡಿಕ್ ಉಮೆ ದಿವುನ್

ಪಾಟಿಂ ಘುಂವ್ತಾಲೆಂ

ಹ್ಯಾ ಲ್ಹಾರಾಚಿ ಚಾಲ್

ಚಮ್ಕಣ್, ಹಾವ್ ಭಾವ್,

ನಾಚ್, ಸಂಗೀತ್,ಗಾಜ್

ಹೆಂ ಸರ್ವ್

ಸದಾನೀಂಚ್ ಪಳೆವ್ನ್

ತಾಚೆ ವಯ್ರ್ ಕಿತೆಂಗೀ

ವಿಶೇಸ್ ಮೋಗ್ ಉಬ್ಜಾಲೊ!

ದೆಕುನ್

ತೆಂ ಭೆಟುಂಕ್ ಯೆತಾನಾ

ತಾಚ್ಯಾ ಕಾನಾಂತ್ ಲೋವ್ ಪುಸ್ಪುಸ್ಲಿ...

"ದರ್ಯಾಕ್ ಸಾಂಡುನ್

ಮ್ಹಜೆ ಸಂಗಿಚ್ ರಾವುಂಕ್ ಯೇ"

ತಕ್ಷಣ್ ತಾಚೊ ಘುಟ್ ಪಾರ್ಕಿಲ್ಲೊ ದರ್ಯೊ

ಲ್ಹಾರಾಂಕ್ ಅಪ್ಣಾಂ ಸರ್ಶಿಂ

ವೆಂಗುನ್ ಪಾಟಿಂ ವ್ಹರ್ನ್ ಗೆಲೊ!

ಆನ್ಯೇಕ್ ಪಾವ್ಟಿಂ ತೆಂ ಆಯ್ಲೆಂ....

ದರ್ಯಾನ್ ತಾಕಾಯ್ ತಶೆಂಚ್ ಕೆಲೆಂ!

ತಡಿ ವಯ್ರ್ ತಾಕಾ ಪಾತ್ಯೆಣಿಂಚ್

ನಾ ಜಾಲಿ

ರಾತ್ ದೀಸ್ ತೊ ಜಾಗೊಚ್ ರಾವುನ್

ಲ್ಹಾರಾಂಚಿ ರಾಕ್ವಣ್ ಕರ್ಚ್ಯಾರ್ ಪಡ್ಲೊ,

ದೆಕುನ್ ದರ್ಯಾಕ್

ಅಜೂನ್ ನೀದ್‌ಚ್ ಪಡಾನಾ!

- ಸಲೊಮಿ ಮಿಯಾಪದವ್, ಮೊಗರ್ನಾಡ್ [ಜನೆರ್, 2024]