ಮೊಳ್ಬಾಂತುಲ್ಯಾ ಕುಪಾಂತ್

ಸಮಾಜೆಂತ್ ಕ್ರಾಂತಿ ಉಟಂವ್ಕ್ ಬಂದೂಕ್/ಗುಳೆ ಕಿತ್ಯಾಕ್? ಉತ್ರಾಂಚ್ ಪಾವಾನಾಂತ್? ಚರಿತ್ರೆಚಿಂ ಪಾನಾಂ ಉಸ್ತುನ್ ಪಳೆಲ್ಯಾರ್ ಸಯ್ತ್, ಉತ್ರಾಂನಿ ರಾಜ್ವಟ್ಕಿ ಸಂಪಯಿಲ್ಲೆಂ, ಸರ್ಕಾರ್ ಪರ್ತಿಲ್ಲಿಂ ಜಾಯ್ತಿಂ ಘಡಿತಾಂ ಆಮಿ ಸಮ್ಜತಾಂವ್. ದೇಶ್-ದೇಶಾಮಧೆಂ ಝುಜ್ ಚಲಂವ್ಕ್ ಸಯ್ತ್ ಉತ್ರಾಂಚ್ ಕಾರಣ್ ಜಾಲ್ಲೆ ಜಾಯ್ತೆ ದಾಕ್ಲೆ ಆಮ್ಕಾಂ ಪಳೆಂವ್ಕ್ ಮೆಳ್ತಾತ್. ಹಾಂಗಾಸರ್ ಥೊಡೆ ಉದ್ಕಾಚೆ ಥೆಂಬೆಚ್ ಏಕ್ ಮವ್ನ್ ಕ್ರಾಂತಿಶೆಂ ಉಭೆ ಜಾಲ್ಯಾತ್. ಹಿ ಕವಿತಾ ವಯ್ಲೆವಾರ್ ವಾಚ್ಲಿ ತರ್ ಕಾಂಯ್ ಉದ್ಕಾಚೆ ಥೆಂಬೆ, ಮೊಡಾಂ, ಪೃಥ್ವಿ ಆನಿ ಪಾಚ್ವೆಂಪಣ್ ಮಾತ್ ದಿಸುಂಕ್ ಪುರೊ ಪುಣ್ ಮಾತ್ಶಿ ಗುಂಡಾಯೆನ್ ಪಳೆತಾನಾ ಎಕೆಕಾ ಉತ್ರಾಂ ಪಾಟ್ಲ್ಯಾನ್ ಲಿಪೊನ್ ಆಸ್ಚಿ ಸಮಾಜಿಕ್/ರಾಜಕೀಯ್ ಹಕೀಗತ್ ಆಮ್ಚೆಸಮೊರ್ ಉಭಿ ಜಾತಾ.

ಬಾಬ್ ವಿನ್ಸಿ ಕ್ವಾಡ್ರೊಸ್ ಗೊಂಯ್ಚೊ ನಾಮ್ಣೆಚೊ ಕೊಂಕ್ಣಿ ವಾವ್ರಾಡಿ, ಮುಖೆಲಿ, ಬರಯ್ಣಾರ್, ಕವಿ ತಸೊಚ್ ಸಮಾಜ್-ಸುಧಾರಕ್ ಚಿಂತ್ಪಿ. ಎದೊಳ್‌ಚ್ ತಾಚೆ ಕಾಂಯ್ ತಿಸಾಂಲಾಗಿಂ ಬೂಕ್ ಕೊಂಕ್ಣೆಂತ್ ಪರ್ಗಟ್ಲ್ಯಾತ್. ಆಯ್ಲೆವಾರ್ ತಾಚ್ಯಾ ’ಜಾದೂಚೆಂ ಪೆಟುಲ್’ ಬಾಳ್ ಸಾಹಿತ್ ಬುಕಾಖಾತಿರ್ ಕೇಂದ್ರ್ ಸಾಹಿತ್ ಅಕಾಡೆಮಿಚಿ ಪ್ರಶಸ್ಥಿ ಲಾಭ್ಲ್ಯಾ. ಇಂಧೋರಾಂತ್  ಚಲ್‌ಲ್ಲ್ಯಾ ಅಖಿಲ್ ಭಾರತೀಯ್ ಕವಿಗೋಶ್ಟಿಂತ್ ವಾಚ್‌ಲ್ಲಿ ಕೊಂಕಣಿ ಕವಿತಾ ಹಿ ಜಾವ್ನಾಸಾ.

ಮೊಳ್ಬಾಂತುಲ್ಯಾ ಕುಪಾಂತ್

ಕುಪಾಂತುಲ್ಯಾ ಥಂಡಿಯೆಂತ್

ಲಿಪುನ್ ಆಸಾತ್ ಉದ್ಕಾಚೆ ಥೆಂಬೆ

ಥಂಡಾಯೆಚ್ಯಾ ಆಡೊಸಾಕ್

ವಾಟ್ ಪಳೆತ್

ಅಖಂಡ್ ಉಷ್ಣತೆಚಿ

ಗಳ್ಪಾಕ್ ಪಾವ್ಸಾಚ್ಯಾ ರುಪಾನ್

ಭಿಜಂವ್ಕ್ ಸಂಸಾರಾಕ್

ಹಾವೆಸ್ ತಾಂಚೊ ವ್ಹಡ್

ಪಾಚ್ವಿಚಾರ್ ಕರ್ಪಾಚೊ

ಪೊಡಿಂಗ್ ಜಮ್ಣಿಕ್

ಹರಿಯಾಳಿ ಉಗೊವ್ಪಾಚೊ

ರಾನಾ-ವನಾಂತ್

ಪಾನ್’ಝಡಾಕ್ ಕೊಂಬ್ರ್ಯೊ ಹಾಡುನ್

ಶೆತಾಂ ಭಾಟಾಂ

ಚೊವ್ನ್ ರೊಂವ್ಚಾಚೊ

ಅನಿಕ್‌ಯೀ ಆಸಾ ಚಿಂತೊಪ್ ತಾಂಚೆಂ

ಗರಿಕ್ ಲೊಕಾಂಕ್ ಥಕಯ್ ದಿವ್ಪಾಚಿ

ಉದ್ಕಾಚೊ ತಳ್ಮಳ್ ಸೊಂಪೊವ್ಪಾಚಿ

ಸಂಸಾರಾಂತ್ಲಿ ಘಾಣ್ ಸೊಗ್ಳಿ

ಧುವ್ನ್ ಕಾಡುನ್

ಭುಂಯ್ ಹಿ ದೆವಾಚಿ

ನಿತಳ್ ನಿರ್ಮಳ್ ಕೊರ್ಪಾಚಿ

ಆನಿ ಗರಜ್ ಪಡ್ಲ್ಯಾರ್

ಚೋರ್ ಫಟ್ಟಿಂಗ್ ಜುಲ್ಮಿಯಾಂಕ್ ಘುಸ್ಮೊಟ್ಟವಪ್

ಬೊರ್‌ಯಾಚೆಂ ವಾಯ್ಟ್ ಕೊರ್ತೊಲ್ಯಾಂಕ್

ಬುಡವ್ನ್ ಮಾರೊಪ್

ಥೆಂಬ್ಯಾ ಥೆಂಬ್ಯಾನಿ ನ್ಹಯ್

ತರ್ ತಣ್ಶೆಲ್ಲ್ಯಾ ಕುಪಾಂಚಿ

ಕುಪ್-ಫುಟ್ಟಿ ಕೊರುನ್

ಸಗ್ಳೆಂ ವಾಯ್ಟ್ ನೊಪೊಯ್ತ್ ಕೊರಪ್

ಇತ್ಲ್ಯಾ ನೆಟಾನ್ ಮೊಳ್ಬಾನುತ್ಲ್ಯಾನ್ ದೆಂವುನ್

ಕಾಯ್ದೊ ಘಡ್ಪ್ಯಾಂಕ್-ಮೊಡ್ಪ್ಯಾಂಕ್

ಖರಿ ನೀತ್ ಶಿಕವ್ಪಾಕ್‌ಯೀ

ತಾಣೆಂ ಪೆಂಗಟ್ ಭಾಂದ್ಲಾಂ

ಆನಿ ಪರ್ತುನ್ ಏಕ್ ಪಾಉಟ್ಟ್

ಸುರಿಯಾ ದೆವಾಚ್ಯಾ ಆಧಾರಾನ್

ತಿತ್ಲ್ಯಾಚ್ ನೆಟಾನ್ ಮೊಳ್ಬಾಂತ್ ಘುಸುನ್

ತ್ಯಾಚ್ ಕುಪಾಂನಿ ರಾವುಂಕ್ ಚಿಂತ್ಲಾಂ

- ವಿನ್ಸಿ ಕ್ವಾಡ್ರೊಸ್, ಗೊಯಾಂ [ಜನೆರ್ 2018]

ವಿನ್ಸಿ ಕ್ವಾಡ್ರೊಸ್: ಬಾಬ್ ವಿನ್ಸಿ ಕ್ವಾಡ್ರೊಸ್ ಗೊಂಯ್ಚೊ ನಾಮ್ಣೆಚೊ ಕೊಂಕ್ಣಿ ವಾವ್ರಾಡಿ, ಮುಖೆಲಿ, ಬರಯ್ಣಾರ್, ಕವಿ ತಸೊಚ್ ಸಮಾಜ್-ಸುಧಾರಕ್ ಚಿಂತ್ಪಿ. ಯೆದೊಳ್‌ಚ್ ತಾಚೆ ಕಾಂಯ್ ತಿಸಾಂಲಾಗಿಂ ಬೂಕ್ ಕೊಂಕ್ಣೆಂತ್ ಪರ್ಗಟ್ಲ್ಯಾತ್. ಆಯ್ಲೆವಾರ್ ತಾಚ್ಯಾ ’ಜಾದೂಚೆಂ ಪೆಟುಲ್’ ಬಾಳ್ ಸಾಹಿತ್ ಬುಕಾಖಾತಿರ್ ಕೇಂದ್ರ್ ಸಾಹಿತ್ ಅಕಾಡೆಮಿಚಿ ಪ್ರಶಸ್ಥಿ ಲಾಭ್ಲ್ಯಾ. ಇಂಧೋರಾಂತ್ ಚಲ್‌ಲ್ಲ್ಯಾ ಅಖಿಲ್ ಭಾರತೀಯ್ ಕವಿಗೋಶ್ಟಿಂತ್ ಕೊಂಕಣಿ ಕವಿತಾವಾಚನ್ ಕೆಲಾಂ.